[༢༡] རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར།
གྲུབ་དབང་སྐུ་རབས་གསུམ་པ་ངེས་དོན་བསྟན་འཛིན་བཟང་པོ་དང་རིག་འཛིན་འཇིགས་མེད་གླིང་པའི་ཐུགས་སྲས་ཐུ་བོ་རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར་ནི། ཀུན་མཁྱེན་འཇིགས་མེད་གླིང་པའི་རྡོ་རྗེའི་ལུང་བྱང་ལས། ལྷ་སྲས་སྤྲུལ་བས་ཆོས་སྒོ་འབྱེད། །ཅེས་དང་། བདེ་ཆེན་གླིང་པའི་གཏེར་ལུང་ལས། ལྷ་སྲས་རྣམ་སྤྲུལ་བྱང་སེམས་སྙིང་སྟོབས་ཅན། །ཞེས་སོགས་གསུངས་པ་ལྟར་ལྷ་སྲས་མུ་རུབ་བཙན་པོ་ནས་གཏེར་སྟོན་སངས་རྒྱས་གླིང་པ་སོགས་སྤྲུལ་པའི་རྣམ་རོལ་ཇི་སྙེད་ཅིག་བྱོན་པའི་མཐར། སངས་རྒྱས་གླིང་པའི་དགོངས་འདུས་ལུང་བསྟན་བཀའ་རྒྱ་མ་ལས་གསལ་བར་བསྟན་པ་ལྟར། བོད་ཆེན་པོའི་རྒྱལ་ཁབ་ཀྱི་ཤར་ཕྱོགས་མདོ་ཁམས་རོང་ཆེན་བཅོ་བརྒྱད་ཀྱི་ནང་ཚན། ཡུལ་ལྷ་བྲག་ལྷ་མགོན་པོས་སྲུང་བའི་གནས་མཆོག་ཤར་རྡོ་རོང་ཞེས་གྲགས་པའི་ནོར་འཛིན་གྱི་ཐིག་ལེ་རུ། སྤྱི་ལོ་༡༧༤༥པ་རབ་བྱུང་བཅུ་གཉིས་པའི་ཁྲོ་བོ་ཞེས་པ་ཤིང་མོ་གླང་གི་ལོ་ལ་བོད་ཆུང་ཞེས་པ་སྨུག་པོ་གདོང་གི་རིགས་སུ་སྐུ་བལྟམས། སྐུ་ཆུང་ངུའི་དུས་ནས་སྙིང་རྗེ་ཆེ་ཞིང་ཚེ་རབས་དྲན་པ་དང་གཟུགས་མེད་ཀྱི་ལྷ་འདྲེ་བཏུལ་བ་སོགས་ངོ་མཚར་བའི་རྣམ་ཐར་དུ་མ་ལྷན་སྐྱེས་སུ་མངའ། དགུང་གྲངས་བཅོ་ལྔ་པར་དགེ་བའི་བཤེས་གཉེན་ཤེས་རབ་རིན་ཆེན་ལས་སྐྱབས་སྡོམ་དང་ཐུན་མོང་ལམ་རིམ་བཅས་གསན་པས་ཐོས་བསམ་གྱི་གནས་ལ་མཁྱེན་རབ་ཡངས་པས་ཐམས་ཅད་ཡིད་དབང་འཕྲོག་པར་གྱུར། དེ་ནས་དགུང་གྲངས་ཉེར་གཅིག་སོན་པ་ཤིང་བྱ་ལོར་ཐོས་བསམ་ཕྱོགས་མེད་དུ་འཚོལ་བའི་འདུན་པས་དྲངས་ཏེ་དབུས་གཙང་ཕྱོགས་སུ་ཞབས་བསྐྱོད་གནང་། མཁས་གྲུབ་རྣམ་འདྲེན་ཉི་ཤུ་ལྷག་གི་ཞབས་པད་གཙུག་ཏུ་བསྙེན་ཞིང་ཆོས་ཚུལ་མཐའ་ཡས་པ་ལ་གསན་སྦྱངས་མཛད། ཁྱད་པར་དུ་དྭགས་ལྷ་སྒམ་པོ་དང་གྲུབ་ཆེན་དམ་ཆོས་དབང་ཕྱུག་ལས་བཀའ་གདམས་ལམ་རིམ་དང་ཆོས་དྲུག་ཟབ་ཁྲིད་སོགས་གསན་ཞིང་གདམས་ངག་ལ་ཞུན་ཐར་བཅད། ཞིང་སྐྱོང་མཁའ་འགྲོའི་གནས་མཆོག་དཔལ་གྱི་ཙ་རི་ཏྲར་ཕེབས་ཏེ་སྒྲུབ་པ་མཛད་པས་ཨོ་རྒྱན་རིན་པོ་ཆེས་ཞལ་གཟིགས་ཤིང་། སྐབས་དེར་ཨོ་རྒྱན་རིན་པོ་ཆེ་ལ་གསོལ་བ་འདེབས། །སོགས་ཀྱི་གསོལ་འདེབས་ཞལ་མཐོང་མའང་མཛད། ཙཱ་རིའི་ཅིག་ཆར་གནས་སུ་དབྱིངས་ཕྱུག་རྡོ་རྗེ་ཕག་མོས་བྱིན་གྱིས་བརླབས་པས་ཞག་བདུན་ཕྲག་དུ་མར་གང་སྣང་བདེ་སྟོང་གི་ཀློང་དུ་འབྱམས་སུ་ཀླས་པ་བྱུང་། རེ་ཞིག་ན་ཕྱིར་ཁམས་ཕྱོགས་སུ་ཕེབས་ཤིང་ཞེ་ཆེན་རབ་འབྱམས་གཉིས་པ་འགྱུར་མེད་ཀུན་བཟང་རྣམ་རྒྱལ་དང་། འབར་བླ་བཀྲ་ཤིས་རྒྱ་མཚོ། རྗེ་དབོན་པདྨ་ཀུན་གྲོལ་རྣམ་རྒྱལ་སོགས་ཀྱི་དྲུང་ནས་བཀའ་གཏེར་གྱི་སྨིན་གྲོལ་སྤྱི་དང་། ཁྱད་པར་རྫོགས་ཆེན་གསུམ་པ་ངེས་དོན་བསྟན་འཛིན་བཟང་པོའི་ཞལ་སྔ་ནས་བླ་མ་ཡང་ཏིག་དང་མཁའ་འགྲོ་སྙིང་ཐིག་གི་སྨིན་ཁྲིད་ཡོངས་རྫོགས་ཆིག་བརྒྱུད་དུ་གསན། དེས་ན་ཀློང་ཆེན་སྙིང་ཐིག་གི་ཆོས་སྐོར་རིག་འཛིན་འཇིགས་མེད་གླིང་པ་ལས་གསན་པས་ཉེ་བརྒྱུད་དེ་ལྟར་འདྲེན་པར་འོས་ཤིང་གཞན་ཟབ་པ་པོད་བཞིའི་ཆོས་སྐོར་རྗེ་འདི་ཁོ་ན་ལས་གསན་པས་བླ་མ་ཡང་ཏིག་གི་བརྒྱུད་འདེབས་སོགས་སུ་གསལ་བའི་བླ་བརྒྱུད་ཀྱི་རིམ་པའང་མཁྱེན་པར་འཚལ་ལོ། །རུ་དམ་གངས་ཁྲོད་བདེ་བ་ཆེན་པོར་དཔལ་ཆེན་རྡོ་རྗེ་གཞོན་ནུ་དང་ཡི་དམ་སྒྲུབ་ཆེན་བཀའ་བརྒྱད་ཀྱི་བསྙེན་མཚམས་ལ་བཞུགས་པས་གྲུབ་པ་ཐོབ་སྟེ་འཇམ་དཔལ་གཤིན་རྗེ་གཤེད་ཀྱིས་ཞལ་གཟིགས་པས་སྒྲུབ་གནས་ལའང་གཤིན་རྗེ་སྒྲུབ་ཕུག་ཅེས་མཚན་དུ་ཐོགས། གཞན་ཡང་སྐབས་དེར་ཨོ་རྒྱན་ཆེན་པོས་དངོས་སུ་ཞལ་གཟིགས་གནང་སྟེ་གསེར་མདོག་བདུད་རྩིའི་ཆུ་ཡིས་དབང་བསྐུར། དེ་མཚུངས་སྒྲུབ་གནས་འོག་མ་ཚེ་རིང་ཕུག་ཏུ་དཀའ་སྤྱད་ཆེན་པོས་ཡུན་རིང་བཞུགས་ཤིང་འཚོ་ཆས་ཆད་པའི་ཚེ་ཞིང་སྐྱོང་ལྷ་མོ་ཚེ་རིང་མས་རང་གཟུགས་དངོས་སུ་བསྟན་ཏེ་བ་མིན་གྱི་འོ་ཞོ་ཕུལ། དེ་སྐབས་ཤིིག་ན་རྡོ་གྲུབ་ཆེན་ཞེས་པའི་མཚན་གྱི་གྲགས་པས་ཕྱོགས་ཀུན་ཁྱབ་པ་བྱུང་ཞིང་རུ་དམ་གདན་སར་ལོ་ངོ་བདུན་ལ་བཞུགས། རྗེ་དབོན་བླ་མ་དང་ངེས་དོན་པའི་བཀའ་དགོངས་ལྟར་ནགས་ཁྲོད་སྒྲུབ་གྲྭ་གསར་འདེབས་ཀྱི་ཁྲིད་དཔོན་དུ་ལོ་ངོ་འགར་བཞུགས་པར་མཛད་ཅིང་། སྐབས་དེར་བསྟན་བཅོས་ཡོན་ཏན་མཛོད་མཇལ་པ་ན་སྔོན་སྨོན་མོས་གུས་ཀྱི་རིགས་ཡོངས་སུ་སད་དེ་དོན་མཁར་ཚེ་རིང་ལྗོངས་སུ་ཀུན་མཁྱེན་བླ་མ་རང་བྱུང་རྡོ་རྗེའི་ཞབས་སུ་བཅར། མཇལ་བ་ཙམ་གྱིས་ལྷ་སྲས་དམ་འཛིན་གྱི་རྣམ་རོལ་དུ་ངོས་བཟུང་ནས་ཕ་བུ་ལྟ་བུའི་འདུ་ཤེས་ཀྱིས་ཕན་ཚུན་ཐུགས་ཡིད་གཅིག་འདྲེས་སུ་བྱུང་བ་སྟེ། རྗེ་འདིས་ཀུན་མཁྱེན་ཉིད་ཐོག་མར་མཇལ་དུས་ཐང་སྟོང་རྒྱལ་པོའི་སྐུ་ཕྱག་གཡས་སྐྱབས་སྦྱིན་དང་། གཡོན་ཚེ་བུམ་འཛིན་པ་ཞིག་གི་ནུ་མ་གཡོན་པ་ནས་ཚེ་ཆུ་ཚེ་རིལ་ཚེ་སྒྲུབ་ཀྱི་ཆོས་སྐོར་དང་བཅས་ཐོན་པ་དང་། ཡང་ཤེས་རབ་གཏེར་སྟོན་ཟེར་བ་ཞིག་གིས་རྒྱ་གར་གྱི་རི་བོ་ཞིག་གི་རྩེ་ནས་སློབ་དཔོན་ཆེན་པོའི་སྐུ་བརྒྱ་རྩ་བརྒྱད་འདོན་རྒྱུའི་ཁ་བྱང་བསྟན་པ་ཞིག་དང་། ཙན་དན་དམར་པོའི་སྐུ་མང་པོ་ཐུ་བར་བབ་པ་སོགས་ཀྱི་སྣང་ཉམས་བྱུང་བ་བྱིན་རླབས་ཞུགས་པའི་རྟགས་ཁྱད་པར་ཅན་དུ་ཀུན་མཁྱེན་ཉིད་ཀྱིས་བཞེད་པ་དང་། ཡང་། སེམས་བསྐྱེད་ཀྱི་མཆོད་པ་དང་འབྲེལ་བྱང་སྡོམ་ཕོག་པའི་ནུབ་རྗེ་འདིའི་རྨི་ལམ་ན་མཆོད་རྟེན་དཀར་པོ་བང་རིམ་ལྔ་པ་ཞིག་གི་དང་པོ་ཁྲོ་ཆུས་བསྡམས་པ་ནས་གཏེར་ཐོན་ཅིག་ཅེས་གསུངས་ནས་ཀུན་མཁྱེན་གྱི་ཕྱག་ནས་གཟོང་ཞིག་གནང་བྱུང་བ་དེས་བརྐོས་པས་རིང་བསྲེལ་དཀར་ཡོལ་དོ་དང་། ཡོལ་གོ་གཅིག་ན་སྐྱེ་བདུན་སྐུ་ཤ་ཡིན་ཟེར་བ་སྣང་བ་ལས། རིང་བསྲེལ་སངས་རྒྱས་འོད་སྲུང་གི་ཡིན་ཟེར། དེ་ནས་དཀར་ཡོལ་གང་པོ་བླ་མ་ལ་ཕུལ། གཅིག་ཤོས་ནས་དེར་འཁོད་མང་པོ་ལ་བྱིན་པས་ཟད་རྒྱུ་མེད་པར་བྱུང་ཟེར་བ་ཞིག་མནལ་ལམ་དུ་བྱུང་བ་ལའང་ཀུན་མཁྱེན་དེ་ཉིད་ཀྱི་གསུང་ལས། ངེད་རྒྱལ་པོ་ཀྲྀ་ཀྲྀའི་སྲས་སུ་གྱུར་པའི་ཚེ་སངས་རྒྱས་འོད་སྲུང་ལས་སེམས་བསྐྱེད་ཐོབ་ཚུལ་གྱི་ཉིང་འཁྲུལ་བདེན་ན་ཁོང་གིས་ཆོས་ཀྱི་གདུང་འཛིན་ཅིང་སེམས་ཅན་ལ་ཕན་ཐོགས་པར་རིགས། ཞེས་སོགས་གསུངས་པ་དང་། ཡང་བླ་མ་དགོངས་འདུས་ཀྱི་དབང་གི་སྐབས། རྗེ་འདིའི་གཟིགས་སྣང་ལ་ཀུན་མཁྱེན་ཉིད་མངའ་བདག་ཉིད་དང་། རྗེ་ཉིད་སངས་རྒྱས་གླིང་པར་མངོན་སུམ་དུ་གསལ་སྣང་ཤར་བ་དེ་དེ་བཞིན་དུ་དོན་ལ་གནས་པར་ཀུན་མཁྱེན་ཉིད་ཀྱིས་གསུངས་ཤིང་། གཞན་ཡང་ཀུན་མཁྱེན་དེ་ཉིད་ཀྱིས་རྗེ་འདིར་ཞལ་གདམས་གནང་བར་ཡང་། ཟན་གཡང་ཆོས་འཁོར་བཞེངས་པའི་ཚེ། །ཕ་བུའི་དམ་ཚིག་འབྲེལ་བའི་ཚུལ། །གནད་བྱང་ཐུགས་ཀྱི་སྒྲོམ་བུ་དང་། །མཐུན་པའི་དག་སྣང་ཁྱོད་ལའང་ཤར། །ཁྱོད་ཉིད་ཆུང་ངུར་གྱུར་དུས་ནས། །ང་ཉིད་དབེན་པ་བསྟེན་པ་ཡི། །མངོན་རྟོགས་ཇི་བཞིན་མཇལ་གྱུར་ནས། །གཏེར་གྱི་ལུང་བསྟན་ཐོབ་པ་དེ། །ད་ལྟ་བཀའ་གཏེར་ཆོས་ཀྱི་མཛོད། །ཁྱོད་ལ་བསྐུར་ནས་མཐའ་འཁོབ་ཏུ། །བསྟན་པ་སྤེལ་བའི་ལུང་བསྟན་ཡིན། །ཞེས་གསུངས་པ་དང་། བླ་མ་དགོངས་འདུས་ལུང་བསྟན་ལས་ཀྱང་། ལྷ་སྲས་གྲུབ་པའི་འབྲས་བུ་བརྙེས་གྱུར་ཀྱང༔ རྒྱལ་བའི་གསང་སྔགས་ཡིད་སྨོན་མཐུ་ཆེ་བས༔ འགྲོ་བའི་དོན་ཕྱིར་སྤྲུལ་པ་ཡང་དང་ཡང༔ ཆ་ལུགས་མ་ངེས་གང་ལ་གང་འདུལ་གྱིས༔ ཆོ་འཕྲུལ་རྣམ་པར་སྤྲུལ་པ་སྟོན་པར་བྱེད༔ ཅེས་དང་། ཡང་སངས་རྒྱས་གླིང་པའི་སྐྱེ་བརྒྱུད་ལུང་བསྟན་ལས། ཡུལ་བཟུང་རིགས་ཅན་དེ་ལྟར་བྱུང་དུས་ན༔ སྐྱེས་བུ་ཁྱེད་ཀྱི་ལས་ཀྱི་ལྷག་མ་རྣམས༔ མ་ལུས་བྱང་ནས་སྨོན་ལམ་དབང་གིས་ནི༔ ས་མཐའ་མུན་པའི་གླིང་བར་ལྟ་བུ་ཡི༔ ཁྲོད་དུ་སྐྱེ་བ་བཞེས་ནས་རབ་བྱུང་ཞིང༔ སྤྱན་རས་གཟིགས་ཀྱི་ཆོས་སྐོར་ཉམས་སུ་ལེན༔ དེ་ཡི་དུས་སུ་བཀའ་ཆེམས་དྲན་བགྱིས་ལ༔ ཨོ་རྒྱན་གྲུབ་པ་ཐོབ་པའི་འགྲོ་མགོན་གྱི༔ བྱིན་རླབས་རྗེས་སུ་གནང་ནས་བུདྡྷའོ༔ སོགས་ཀྱིས་མཚོན་ཀུན་མཁྱེན་ཉིད་མངའ་བདག་ཁྲི་སྲོང་དུ་སྐྱེ་བ་བཞེས་དུས་རྗེ་འདི་ལྷ་སྲས་མུ་རུབ་བཙན་པོ་ཡིན་པར་ཐེ་མི་ཚོམ་སྟེ། གོང་དུ་སྨོས་པའི་མནལ་ལམ་གཟིགས་སྣང་སོགས་དང་གཏེར་ལུང་དུའང་རྗེ་འདི་ཉིད་ཀྱི་འཁྲུངས་ཡུལ་དང་། ཡབ་རྗེ་ཀུན་མཁྱེན་མཆོག་དང་མཇལ་ནས་བྱིན་གྱིས་བརླབས་ཚུལ་བཅས་ཤིན་ཏུ་གསལ་ལོ། །དེ་ལྟར་ཀུན་མཁྱེན་གཉིས་པས་སྔ་འགྱུར་བཀའ་གཏེར་རབ་འབྱམས་ཀྱི་ཆོས་ཚུལ་ཐམས་ཅད་བུམ་པ་གང་བྱོར་བསྩལ་བ་དང་། ཁྱད་པར་འོད་གསལ་རྫོགས་པོ་ཆེན་ཀློང་ཆེན་སྙིང་གི་ཐིག་ལེའི་སྨིན་ཁྲིད་རྒྱབ་ཆོས་དང་བཅས་པ་ཆིག་རྫོགས་སུ་བསྩལ་ཏེ་དོན་བརྒྱུད་བསྟན་པའི་བཀའ་གཏད་མཛད། རྗེ་ཉིད་ཀྱི་དགོངས་གཏེར་ཆོས་སྐོར་གྱི་རྩ་བའི་ཆོས་བདག་ཏུ་མངའ་གསོལ་ཏེ་འཇིགས་མེད་ཕྲིན་ལས་འོད་ཟེར་ཞེས་མཚན་གྱི་ཅོད་པན་དཔྱངས། སྔ་ཕྱིར་ཀུན་མཁྱེན་བླ་མའི་དྲུང་དུ་ལན་གྲངས་བཞི་ལ་བྱོན་ཅིང་དེ་དག་གི་སྐབས་སུ་སྒྲུབ་དང་དངོས་པོའི་མཎྜལ་རྒྱ་ཆེན་པོས་མཆོད་ཅིང་སྤྱན་འབྱེད་ཀྱི་མཐུན་རྐྱེན་གནང་བ་སོགས་ཞབས་ཏོག་དཔག་མེད་མཛད། དེ་སྐབས་ཤིག་ན་བལ་པོའི་དམག་གིས་བོད་ཀྱི་ཆོས་སྲིད་ལ་འཚེ་བ་བྱུང་བས་རྗེ་ཉིད་བསམ་ཡས་པེ་ཧར་དཀོར་མཛོད་གླིང་དུ་ཕེབས་ཏེ་སྐུ་རྟེན་ལ་བཀའ་བསྒོས་པས་དབུ་སྒུར་མཛད། དེ་འཕྲལ་ཧས་པོ་རི་རྩེར་ལྷ་བསང་བཏང་བའི་དུད་པ་ནམ་མཁར་བྱ་ཁྱུང་གི་རྣམ་པར་ཕྱིན་པས་དམག་དཔུང་བཟློག་པ་ཀུན་གྱི་མཐུན་སྣང་དུ་བྱུང་ཞིང་གཞུང་ས་ནས་ཀྱང་བདག་རྐྱེན་ཚད་མེད་གནང་། གཞན་ཡང་དབུས་གཙང་རུ་བཞིར་ཐན་པ་ཆེན་པོ་བྱུང་བས་སྦྱིན་སྲེག་མཛད་དེ་ཐལ་བ་མཚོ་ནང་དུ་གཤེགས་པས་ཆར་གྱི་རྒྱུན་དེ་མ་ཐག་ཏུ་བབ། བྲག་དཀར་སྤྲེལ་རྫོང་དང་སོག་ཡུལ་སོགས་ནས་གྲོག་སྐམ་དང་བྲག་རི་ནས་ཆུ་གཏེར་བཞེས་པ་ད་ལྟའང་དངོས་སུ་མཇལ་དུ་ཡོད་པ་དང་། རྨ་ཆུ་དཀར་མོ་གཡས་འཁྱིལ་གྱི་འགྲམ་དུ་ཨ་རིག་ར་རྒྱ་དགོན་པ་གསར་བཞེངས་སྐབས་ཐོག་མའི་རྟེན་འབྲེལ་ཉེས་པའི་དབང་གིས་དགེ་འདུན་ཕྱེད་ཙམ་འཕྲལ་རྐྱེན་ཁོ་ནས་གཤེགས་པས་ཡུལ་བུད་དེ་བྱོན་པས་སྒར་ཆགས་ས་དེ་ད་ལྟ་སྒར་ལུང་དུ་གྲགས་ཤིང་། དགོན་ཆེན་དེ་ལ་གནོད་འཚེ་བྱེད་པའི་རྒྱལ་གདོན་དེ་ཟབ་མོ་གཅོད་ཀྱི་སྒོ་ནས་སྦྱིན་སྲེག་མཛད་དེ་དགོན་གནས་ཚུར་སྤོ་ཆོག་པའི་དབུགས་དབྱུང་། དེ་བཞིན་བེམ་པོ་ལ་རིག་པ་གཏད་ནས་ཕཊཿསྒྲ་བརྗོད་ཚེ་ནམ་མཁར་འཕར་ནུས་པ་དང་། འབྱུང་པོ་རོ་ལངས་བཏུལ་པ་སོགས་གྲུབ་སྤྱོད་སྣ་ཚོགས་ལ་མངའ་བརྙེས་ཏེ་གྲུབ་པའི་རྒྱལ་ས་མཐོན་པོར་གཤེགས། སྐབས་དེའི་ཕྱོགས་ཀྱི་མི་དབང་ཆེན་མོ་གཞུང་སའི་དྲུང་འཁོར་ཁག་དང་། སྡེ་དགེའི་ས་སྐྱོང་ཆེན་མོ། དར་མདོའི་ལྕགས་ལ་རྒྱལ་པོ། རྒྱལ་རོང་ཨ་སྐྱོང་སོགས་ཀྱི་མགོ་དཔོན་ཡོངས་ཀྱིས་ཞབས་ཀྱི་པདྨོ་སྤྱི་བོའི་རྒྱན་དུ་བཀོད་དེ་ལུགས་གཉིས་ཀྱི་ཕྲིན་ལས་སྤེལ། སོག་པོ་ངག་དབང་ཆོས་རྒྱལ་ལམ་ཝང་རྒྱལ་པོས་དབུ་བླར་བཀུར་ཞིང་འོད་གསལ་གསང་བ་སྙིང་ཐིག་གི་ཆོས་བཀའ་གསན་པའི་རྒྱུན་ལས། ཞབས་དཀར་ཚོགས་དྲུག་རང་གྲོལ་སོགས་གྲུབ་བརྙེས་སྐྱེས་ཆེན་དུ་མ་བྱོན་པ་བཅས་ཕྲིན་ལས་ཕྱོགས་མཐར་རྒྱས། དགུང་གྲངས་དྲུག་ཅུ་རེ་དྲུག་བཞེས་པ་རབ་ཡིད་ལྕགས་རྟ་ལོར་རོང་སྟོན་པདྨ་བདེ་ཆེན་གླིང་པའི་ལུང་བྱང་ལས། ལྷ་སྲས་རྣམ་འཕྲུལ་བྱང་སེམས་སྙིང་སྟོབས་ལྡནཿ རྫོགས་ཆེན་ཨ་ཏིའི་སྟོན་སྒོམ་ཁྱུ་གཅིག་འབྱུངཿ གསེར་གྱི་སྟོད་སྨད་དགོན་གནས་གསུམ་ཙམ་འཆའཿ ཞེས་པ་ལྟར་གདན་ས་དང་པོ་ཤུགས་ཆེན་འགྲོ་དོན་ལྷུན་གྲུབ་དང་། གཉིས་པ་བྲག་ཆེན་ཡར་ལུང་པདྨ་བཀོད། གསུམ་པ་གཙང་ཆེན་དངོས་གྲུབ་དཔལ་འབར་གླིང་དང་གསུམ་དུ་བྱུང་ཞིང་། རྗེ་ཉིད་ཀྱི་ཞལ་ནས། ངས་སྒྲུབ་སྡེ་འདིའི་མཁོས་ཀ་ལ་བལྟས་ན་ཕྱུག་པོའི་ལྷས་མལ་ཙམ་ལས་མེད་ཀྱང་རྙིང་བསྟན་གྱི་རྩ་བ་གནས་པས་རྡོ་རྗེ་མཁའ་འགྲོ་མ་རྣམས་སྤྲིན་བཞིན་དུ་འདུ་བར་འདུག་ཅེས་གསུངས་ཤིང་། སྐུ་ཚེའི་སྨད་དུ་གདན་ས་བར་པར་ཡུན་རིང་དུ་བཞུགས་ནས་རྒྱ་སོག་རེབ་ཀོང་སྡེ་དགེའི་ཡུལ་ཁམས་སོགས་ཕྱོགས་ནས་འདུས་པའི་སློབ་ཚོགས་བགྲང་བར་མི་ནུས་པ་ལ་ཆོས་ཀྱི་འཁོར་ལོ་བར་མེད་དུ་བསྐོར་བས་ཐམས་ཅད་ཚིམ་པར་མཛད། ལྷག་པར་རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེ་ལ་ཛཱ་གད་དཔའ་བོའི་ཕུད་སྐྱེམས་ཀྱི་བརྡ་ཐབས་ལས་ཐུགས་བརྒྱུད་དགོངས་པའི་བྱིན་རླབས་བསྩལ་པས་སྐུ་ཚེ་དེ་ཉིད་ལ་ཆོས་ཉིད་ཟད་པའི་སར་ཕེབས། ཀུན་མཁྱེན་འཇིགས་མེད་གླིང་པའི་ཡང་སྲིད་མཁྱེན་བརྩེ་ཡེ་ཤེས་རྡོ་རྗེ་ངོས་འཛིན་གནང་ནས་གདན་ས་གོང་མ་རུ་དམ་ཨོ་རྒྱན་བསམ་གཏན་ཆོས་གླིང་དུ་གདན་དྲངས་ཏེ་གསེར་ཁྲིར་མངའ་གསོལ། བཀའ་གཏེར་སྨིན་གྲོལ་གྱི་ཆོས་ཚུལ་རབ་འབྱམས་བུམ་པ་གང་བྱོར་བསྩལ་བ་སོགས་ལུགས་གཉིས་ཀྱི་ཐུགས་བརྩེས་བསྐྱངས། རྗེ་འདིའི་ཐུགས་སྲས་ཞལ་སློབ་གཙོ་བོ་ནི། རྡོ་རྗེའི་གདུང་ཆེན་བཞི་དང་གདུང་མཆོག་གཉིས་ཞེས་གྲགས་པ་སྟེ། ཇི་སྐད་དུ། དགོངས་འདུས་ལུང་བསྟན་ལས། ཤར་དུ་དུང་དཀར་ཚངས་དབྱངས་གྲགས་ལྡན་འབྱུང༔ ལྷོ་རུ་འབྲས་དཀར་མཁར་ཟླུམ་སྤུང་འདྲ་འབྱུང༔ ནུབ་ཏུ་དམར་སེར་པདྨ་རྒྱས་འདྲ་འབྱུང༔ བྱང་དུ་ནུས་མཐུ་ཕུར་པ་གདབ་འདྲ་འབྱུང༔ ཞེས་པ་ལྟར། ཤར་དུ་འཇིགས་མེད་སྐལ་བཟང་ཆོས་དབྱིངས་རྡོ་རྗེའམ་རྡོ་བླ་འཇིགས་མེད་སྐལ་བཟང་། ལྷོ་རུ་ཁྱུང་ལུང་རས་པ་དམ་ཚིག་རྡོ་རྗེ། ནུབ་ཏུ་རང་བྱུང་རིག་པའི་རྡོ་རྗེའམ་རྒྱལ་སྲས་གཞན་ཕན་མཐའ་ཡས། བྱང་དུ་ཆོས་དབྱིངས་སྟོབས་ལྡན་རྡོ་རྗེ་སྟེ་ལུང་ཟིན་རྡོ་རྗེའི་གདུང་ཆེན་བཞི་དང་། གཞན་ཡང་སྣང་བཞི་མཐར་ཕྱིན་མི་འགྱུར་ནམ་མཁའི་རྡོ་རྗེ་དང་། ཧེ་རུ་ཀ་དཔལ་མཁྱེན་བརྩེ་ཡེ་ཤེས་རྡོ་རྗེ་སྟེ་རྡོ་རྗེའི་གདུང་མཆོག་གཉིས་ཞེས་གྲགས་པ་དང་། དེ་བཞིན་གསར་རྙིང་རིས་མེད་ཀྱི་དགེ་བའི་བཤེས་གཉེན་ཆེན་པོ་འཇིགས་མེད་རྒྱལ་བའི་མྱུ་གུ། འབར་ཆུང་འཇིགས་མེད་གོ་ཆ། འཇིགས་མེད་ངོ་མཚར་རྒྱ་མཚོ། དགེ་རྩེ་འཇིགས་མེད་གོ་ཆ། སོག་པོ་ངག་དབང་ཆོས་རྒྱལ། རྫོགས་ཆེན་དཔོན་སློབ་གསུམ་པ། ཀཿཐོག་སི་ཏུ། ཀཿཐོག་དགེ་རྩེ་པཎ་ཆེན། སྒྲུབ་བརྩོན་ངག་དབང་ཆོས་འབྱོར་བཅས་དང་། ངོར་ཆེན་བྱམས་པ་ནམ་མཁའ་འཆི་མེད། དཔའ་ཆེན་ནམ་མཁའ་འཇིགས་མེད་སོགས་ནམ་མཁའི་མཚན་ཅན་ཁོ་ན་བཅུ་གསུམ་དང་། དཀྱིལ་འཁོར་འཛིན་པ་བརྒྱ་རྩར་གྲགས་པ་སོགས་བསྟན་པ་འཛིན་པའི་སྐྱེས་ཆེན་བགྲངས་ཀྱིས་མི་ལང་པ་བསྐྲུན། དེ་བཞིན་ཕྱི་རབས་གདུལ་བྱའི་སྐལ་བར་བཞག་པའི་དག་སྣང་བསྟན་བཅོས་ཀྱི་སྐོར་ལ། ཡོན་ཏན་རིན་པོ་ཆེའི་མཛོད་ཀྱི་དཀའ་འགྲེལ་སོགས་དགོངས་འགྲེལ་བསྟན་བཅོས་ཀྱི་སྐོར་དང་། སྔོན་འགྲོའི་ངག་འདོན་སོགས་སྙིང་ཐིག་གོང་འོག་གི་མན་ངག་ཞལ་ཤེས་སྣ་ཚོགས། རྗེ་བཙུན་བཞད་པ་རྡོ་རྗེའི་སྒྲུབ་ཐབས། ཁྱུང་སྒྲུབ་དབང་ཆོག་གདོན་ཁྲོལ་དང་བཅས་པ། ཡང་གསང་རྟ་མགྲིན་སྒྲུབ་ཐབས། བཀའ་སྲུང་མ་ཧཱ་དེ་ཝའི་སྒྲུབ་ཐབས། དམ་ཚིག་ཉམས་ཆག་བཤགས་པའི་ཆོ་ག །མགོན་པོ་ཚོགས་བདག་སྒྲུབ་ཆོག་སྟོད་ལས་སྨད་ལས་དགྲ་མནན་དབང་ཆོག་དང་བཅས་པ། སངས་རྒྱས་གླིང་པའི་ཕུར་པ་ཐུགས་ཀྱི་ཉིང་ཁུའི་སྟོད་ལས་སྨད་ལས་དབང་ཆོག་དང་བཅས་པ་སོགས་དག་སྣང་དགོངས་གཏེར་གྱི་རིགས་ཟབ་ཁྱད་ལྡན་པ་དུ་མ་མཛད། དགུང་གྲངས་དོན་བདུན་བཞེས་པ་བོད་རབ་བྱུང་བཅུ་བཞི་པའི་ལྕགས་འབྲུག་ལོའི་སྟོན་ཁར་སློབ་ཚོགས་ཐམས་ཅད་བསྡུས་ནས་རང་རང་གི་བློ་དང་འཚམས་པའི་ཞལ་གདམས་ལུང་བསྟན་བསྩལ་བ་དང་། སྐུ་རྫས་ཐམས་ཅད་གནང་སྦྱིན་མཛད་དེ་ཡུན་རིང་མི་བཞུགས་པའི་གསུང་འཕྲོས་དང་བཅས་བཅད་རྒྱ་མཛད། ལོ་དེའི་ཕྱི་ལོ་ལྕགས་སྦྲུལ་ཆོ་འཕྲུལ་ཟླ་བའི་ཚེས་བཅུ་གསུམ་གྱི་ནམ་ཕྱེད་ལ་སྐུ་ལོངས་སྐུའི་ཆས་སུ་ཞུགས་ཏེ་འཇའ་འོད་མེ་ཏོག་གི་ཆར་གྱིས་ནམ་མཁའ་གང་བཞིན་འོད་གསལ་ཆོས་སྐུའི་དབྱིངས་སུ་གཟིམས་པར་མཛད། དུས་དེར་གྲུབ་པའི་གོ་འཕང་མཐོན་པོར་གཤེགས་པའི་ལམ་རྟགས་སུ་འབྱུང་བའི་གྲང་རང་ལྷོད་དེ་དབྱར་ཀའི་ནམ་ཟླ་ལྟར་གྱུར་པ་དང་། སྐུ་གདུང་ཞུགས་ལ་ཕུལ་པའི་དུད་སྤྲིན་ལ་ཡེ་ཤེས་ཀྱི་མཁའ་འགྲོ་མ་རྣམས་མཁའ་ལྡིང་གི་ཟོལ་གྱིས་སྐོར་བ་བྱེད་པ། གདུང་ཆེན་ལྔ་དང་རིང་བསྲེལ་ཕྲ་མོའི་ཚོགས་བསམ་གྱིས་མི་ཁྱབ་པ་གདུལ་བྱའི་བསོད་ནམས་ཀྱི་སྐལ་བར་བཞག་པ་བཅས་དོན་གཉིས་ལྷུན་གྲུབ་ཀྱི་མཛད་པ་ཕྱོགས་མེད་དུ་བརྡལ་ནས་ཞིང་འདིའི་ཕྲིན་ལས་རེ་ཞིག་རྫོགས་པའི་ཚུལ་བསྟན་ཏོ། །