[༢༣] འབར་ཆུང་འཇིགས་མེད་གོ་ཆ།

རིག་འཛིན་འཇིགས་མེད་གླིང་པ་དང་རྫོགས་ཆེན་གསུམ་པ་ངེས་དོན་བསྟན་འཛིན་བཟང་པོའི་ཞལ་སློབ་ཁམས་པ་འཇིགས་མེད་རྣམ་བཞིའི་ཡ་གྱལ་འབར་ཆུང་འཇིགས་མེད་གོ་ཆ་ནི། ཡུལ་མདོ་ཁམས་སྡེ་དགེའི་ཆོས་རྒྱལ་ཆེན་པོའི་ཆབ་འོག་ཟླ་ཀླུང་དལ་གྱིས་འབབ་པའི་འགྲམ་ངོགས་འབར་ཆུང་ཞེས་པའི་འབྲོག་སྡེ་རུ། ཡབ་ལྡོང་གི་དབང་ཕྱུག་རྒྱལ་མཚན་གྱི་རིགས་ལས་ཆད་པའི་སྙིང་དཀར་ཚེ་རིང་དང་བསྐྱེད་ཡུམ་ཐར་མོ་སྐྱིད་གཉིས་ཀྱི་བསྐྱེད་ཁྱིམ་དུ། སྤྱི་ལོ་༡༧༦༣པ་རབ་བྱུང་བཅུ་གསུམ་པའི་ཆུ་ལུག་རྒྱལ་ཟླའི་ཚེས་ཉེར་ལྔ་ཉིན་སྐུ་འཁྲུངས། དགུང་གྲངས་ལྔའི་སྐབས་ཉི་སྤྲུལ་གཉིས་པ་པདྨ་ཐེག་མཆོག་བསྟན་པའི་རྒྱལ་མཚན་ཡུལ་དེར་ཕེབས་ནས་ཐུགས་རྗེ་ཆེན་པོ་མ་རིག་མུན་སེལ་གྱི་སྒོ་ནས་སངས་རྒྱས་སྟོང་དབང་གནང་བ་ཞུས། བྱིས་པའི་དུས་སུ་ལྷ་འདྲེའི་འཕྲུལ་གཟུགས་སྣ་ཚོགས་པ་དང་གྱང་དང་རྩིག་པ་སོགས་ཀྱིས་བར་ཆོད་པའི་དངོས་པོའང་ཐོགས་མེད་དུ་གཟིགས། དགུང་ལོ་བདུན་ལ་སོན་སྐབས་རྫོགས་ཆེན་སྐུ་རབས་གསུམ་པ་ངེས་དོན་བསྟན་འཛིན་བཟང་པོ་ལ་གཙུག་ཕུད་ཕུལ་བས་པདྨ་ཆོས་དཔལ་ཞེས་མཚན་བསྩལ། རང་མོས་ཀྱི་དགེ་རྒན་མེད་པར་ཀློག་ལ་སྦྱངས་ཤིང་རིང་པོར་མ་ཐོགས་པར་བྱང་ཆུབ་པ་བྱུང་བས་ཐམས་ཅད་ཡ་མཚན་པ་བྱུང་། སྐུ་ན་ཅུང་སོན་ནས་རྗེ་བླ་མ་རི་ཁྲོད་རིག་འཛིན་རྒྱ་མཚོའི་དྲུང་ནས་རྫོགས་ཆེན་གསང་བ་སྙིང་ཐིག་གི་བཀའ་ཁྲིད་ཞག་བརྒྱའི་ཁྲིད་སྦྱངས་མཛད་པས་འཇིག་རྟེན་ལ་བློ་བཟློག་པའི་ངེས་འབྱུང་བཅོས་མིན་ཐུགས་རྒྱུད་ལ་འཁྲུངས། རྗེ་དེ་ཉིད་ལས་ཉི་གྲགས་ཆོས་སྐོར་གྱི་དབང་ལུང་གཙོ་བོར་གྱུར་པའི་ཟབ་ཆོས་མཐའ་ཡས་པ་གསན་བཞེས་གནང་རྗེས་རུ་དམ་ཨོ་རྒྱན་བསམ་གཏན་ཆོས་གླིང་དུ་ཕེབས་ནས་ངེས་དོན་བསྟན་འཛིན་བཟང་པོའི་ཞལ་སྔ་ནས་ཟབ་ཆོས་མཐའ་ཡས་གསན་པ་སྟེ། རྗེ་ཉིད་ཀྱིས་མཛད་པའི་རང་རྣམ་ལས། དེ་ནས་ནང་དུ་ཆེར་མ་བསྡད་པར་རྫོགས་ཆེན་དགོན་དུ་འགྲོ་རྩིས་བྱས་པས་ཕ་རྒན་བློ་མི་འཐད་ཀྱང་ཕུ་བོ་དབང་རྒྱལ་འདིས་བདག་ཆོས་སྒྲུབ་པ་ལ་མཐུན་རྐྱེན་མ་གཏོགས་མི་མཐུན་གནོད་འགལ་དུ་འགྲོ་བའི་བྱ་བ་ཅུང་ཟད་ཀྱང་བྱས་པ་མེད་པས་མཐུན་རྐྱེན་གང་དགོས་སྦྱར་ཏེ། ཡོན་ཏན་མ་ལུས་པའི་འབྱུང་གནས་རྫོགས་ཆེན་དགོན་རུ་དམ་བསམ་གཏན་ཆོས་གླིང་དུ་ཕྱིན། ཡོངས་རྫོགས་བསྟན་པའི་མངའ་བདག་རྫོགས་ཆེན་མཆོག་སྤྲུལ་རིན་པོ་ཆེ་ངེས་དོན་བསྟན་འཛིན་བཟང་པོས་བླ་ཆེན་བླ་ཆུང་བརྒྱ་ཕྲག་བརྒལ་ངེས་ཀྱིས་གཙོས་ཁྲིད་ཞུ་བ་ལྔ་བརྒྱ་ལྷག་ཏུ་ཉེ་བར་ཟབ་ཆོས་མཁའ་འགྲོ་སྙིང་ཐིག་གི་ཁྲིད་ཆེན་བསྩལ་བ་ཞུས། རྗེ་ཉིད་མཁས་པའི་གསུང་བཤད་རྒྱ་ཆེ་བས་དོན་ཁྲོལ་ལ་རྒྱས་བསྡུས་འཚམ་པས་གོ་བདེ་བ། སོ་སོའི་བློ་དང་འཚམ་ཞིང་འབྲེལ་ཆགས་པ་ཐམས་ཅད་གནད་ཐོག་ཏུ་མེ་བཙའ་ལྟར་གྱུར་པས་ཀུན་ལ་ཡིད་ཆེས་ཀྱི་དད་པ་ཐོབ་པ་སྟེ། རྫོགས་པའི་སངས་རྒྱས་དངོས་སུ་བྱོན་ཡང་འདི་ལས་གསུང་རྒྱུ་མེད་སྙམ་པས་ཡིད་ཚིམས་ཏེ་མི་ཟློག་པའི་དད་པའི་གནས་ལ་སྦྱར། ཆོས་འཇིག་རྟེན་གཉིས་ཀར་མཁྱེན་དཔྱོད་ཡངས་པས་ཁྲིད་ཞུ་པ་རྣམས་ཀྱང་བག་ཡང་བྱེད་རྒྱུ་མེད་པར་སྡེ་ཚན་མང་དུ་བགོས་ཏེ། ཚོ་རེར་ཁྲིད་དཔོན་དང་སྒྲིག་གནོན་མཁན་གྱི་དགེ་བསྐོས་རེ། འདོན་པ་བསྐུལ་བའི་དབུ་མཛད་རེ་བཅས་བསྐོ་བཞག་མཛད། ཐུན་བཞི་བཅད་པའི་དགེ་སྦྱོར་གྱི་ཉིན་མཚན་འདའ་བས་འདིར་སྣང་གི་སྤྱོད་པ་ཕར་ཆེར་དོར་བ་འདི་ལྟ་བུའི་རྒྱུན་སྐྱོང་རྒྱུ་བྱུང་ན་སངས་རྒྱས་པ་ལ་ཚེགས་མི་འདུག་སྙམ་པ་བྱུང་། ཁྲིད་ཞུ་རྣམས་ཀྱི་ཁྲོད་ནས་རབ་ཚེ་དང་སྒྲུབ་པ་སྙོམས་པ། འབྲིང་ལོ་མཚམས་བདུན་རེ་ངག་བཅད་བྱེད་པ། ཐ་མའང་ལོ་རེ་གཉིས་ཀྱི་མཚམས་དང་། རབ་ཤ་ཆང་གཉིས་ཀ་གཏན་སྤང་། འབྲིང་གི་ལོ་བདུན་རེ། ཐ་མས་ཀྱང་ལོ་ལྔ་གསུམ་རེ་སྤངས་པ། མ་ཎི་དུང་ཕྱུར་རེ་མ་སོང་བར་མཚམས་བྱེད་པ་སོགས་ཁས་ལེན་བྱེད་མཁན་གྱི་འུར་ལང་། མིང་ཐོ་བཀོད་དེ་སེམས་རྒྱུགས་ཀྱང་བཞེས་སོང་བས་བདག་ཀྱང་ཕྱིན། རང་གི་རྟོགས་ཚུལ་ཞུས་པས་སེམས་གནད་རྩད་གཅོད་ཀྱི་དྲི་བ་གནང་བྱུང་བར་ཞུ་མི་བདེ་བའི་རིགས་མ་བྱུང་བས། སྤྱིར་རྟོགས་ཚུལ་ལ་རིམ་གྱིས་པ་དང་གཅིག་ཆར་པ་གཉིས་ཡོད་པའི་དབང་རབ་གཅིག་ཆར་བ་བྱ་བ་དེར་འདུག་གསུངས། དབུགས་དབྱུང་གཟེངས་བསྟོད་མཛད་དེ་བརྩེ་བ་ཆེན་པོས་རྗེས་སུ་བཟུང་། བདག་ལ་བྱང་ཆུབ་ཤིང་གི་ཕྲེང་བ་སེར་པོ་ཞིག་ཡོད་པས། རིན་པོ་ཆེའི་ཞལ་ནས། ཁྲིད་ཞུ་ལྔ་བརྒྱའི་ཁྲོད་ན་གནས་ལུགས་ཀྱི་དོན་རྟོགས་པ་ལ་སྤྱོད་ཡུལ་པ་དཀོན་མཆོག་བཀྲ་ཤིས་དང་། དགེ་རྩེ་ཕྲེང་བ་སེར་པོ་ཅན་དེ་གཉིས་ལས་ལྷག་པ་མ་བྱུང་ཞེས་སྐུ་མདུན་པ་རྣམས་ལ་བཀའ་ཕེབས་པར་གྲགས་པས། བདག་ལ་དགེ་རྩེ་ཕྲེང་སེར་ཅན་དུ་མིང་དུ་ཆགས། རིན་པོ་ཆེ་འདི་གོ་ས་མཐོ་ཡང་ཆེ་འགྱིངས་དང་དཀའ་ཚེགས་སོགས་ལ་མི་འཛེམ་པར་གཞན་རྒྱུད་ལ་ཕན་པའི་ཐབས་ཁོ་ན་ལྷུར་མཛད་པས་རྒྱལ་སྲས་འཕགས་པའི་རྣམ་ཐར་དང་མཚུངས། ཁྲིད་སྦྱང་གྲུབ་རྗེས་དགོན་ནང་དེར་མི་ཚོགས་མང་ཕྱིར་གང་བྱས་རྣམ་གཡེང་གི་ངང་ལ་ཤོར་ཆེ་བས་རི་ཁྲོད་གཅིག་ཏུ་ཕྱིན་པར་དགའ་སྙམ། དགོན་ཕུའི་ནགས་ཁྲོད་དུ་ཕྱིན་ཏེ་རྡོ་ཕ་ཝང་ཆེན་པོ་ཞིག་གི་འོག་བྲུས་ཏེ་བསྡད། དབྱར་དགུན་གྱི་འགྱུར་བ་དང་བྱ་རིགས་སྣ་ཚོགས་པའི་གྲེ་འགྱུར། འབབ་ཆུ་དྲག་པོའི་ཅ་ཅོ་སྒྲོག་པ་སོགས་སྐྱོ་ཤས་ངེས་འབྱུང་བསྐུལ་བའི་སློབ་དཔོན་དུ་བཟང་བས་དགེ་སྦྱོར་འཕེལ་བ་བྱུང་། རི་ཁྲོད་བླ་མ་བཛྲ་ཤྲཱིའི་དྲུང་དུ་རྩ་རླུང་གི་ཁྲིད་འཕྲུལ་འཁོར་དང་བཅས་པ་ཞིག་སྙིང་རུས་བསྐྱེད་དེ་བྱས། དཔོན་སློབ་གསང་སྔགས་བསྟན་འཛིན་གྱི་དྲུང་དུ་རྫོགས་ཆེན་མཁའ་འགྲོ་སྙིང་ཐིག་གི་ཁྲིད་དང་གཏེར་སྟོན་ཉི་ཟླ་སངས་རྒྱས་ཀྱི་འཕོ་བ་འཇག་ཟུག་མའི་ཁྲིད་བཅས་ཞུས། ཨ་འཛི་བླ་མའི་དབོན་པོ་བློ་ལྡན་རི་ཁྲོད་དུ་བྱུང་བ་དང་ལྷན་དུ་རླུང་གི་འཕྲུལ་འཁོར་ལ་བརྩོན་པས་སྦྱང་། རི་ཁྲོད་ཕན་ཚུན་དུ་བཞུགས་མཁན་ཡང་ཤིན་ཏུ་མང་ཞིང་སྒྲུབ་ཁང་གསར་པ་ཡང་མང་དུ་ཆགས། ཚེ་དང་སྒྲུབ་པ་མཉམ་པའི་གྲུབ་པའི་དབང་ཕྱུག་བླ་མ་བསྟན་འཛིན་དཔལ་མཆོག་དགོན་ནང་ནས་སྐུ་མཚམས་གྲོལ་ཏེ་རི་ཁྲོད་དུ་བཅད་རྒྱར་ཕེབས། ཉི་གྲགས་གཏེར་བྱོན་པདྨ་དྲག་པོ་ཁྲོས་པ་དང་ཉང་གི་རྟ་ནག་ལྕགས་རལ་ཅན་གྱི་དབང་ལུང་ཞིག་ཞུས། བླ་མ་འདིས་རྟ་མགྲིན་ལ་བསྙེན་པ་དུང་ཕྱུར་མཛད་འདུག་པས་བྱིན་རླབས་དང་ནུས་པ་ཆེ་ཞིང་བརྩེ་བས་རྗེས་སུ་བཟུང་སྟེ་བསླབ་བྱ་མང་དུ་བསྩལ། བདག་གི་རྟ་མགྲིན་གྱི་བསྙེན་པ་ཞིག་ཀྱང་བཏང་བས་བསྙེན་རྟགས་ཀྱང་དགའ་རབ་བྱུང་བ་བླ་མའི་བྱིན་རླབས་སུ་མངོན། དགེ་སྦྱོར་གྱི་གཙོ་བོ་རང་སེམས་ཀྱི་ངོ་བོ་སྐྱོང་ཁུལ་བྱས། རྫོགས་ཆེན་རིན་པོ་ཆེས་རིགས་བདག་ཏུ་བསྐུར་བ་སྒྲུབ་དཔོན་བླ་མ་ཤ་བཞི་དགེ་སློང་ཞུ་བ་རི་ཁྲོད་པ་རྣམས་ཀྱི་རྟོགས་པའི་རྒྱུགས་བཞེས་པར་ཕེབས། བདག་གི་སེམས་ཀྱི་དོགས་གནས་ཞིབ་ཏུ་ཞུས་པས་རྗེ་འདིས་ཆོས་ཉིད་དགོངས་ཀློང་དུ་གྱུར་པའི་ཉམས་ཀྱི་བསླབ་བྱ་བསྩལ་བ་རྟོག་གེ་ཁ་བྱང་སྨྲ་བའི་གཡམ་རྒྱུག་ཀྱི་རྗེས་དཔག་དང་མི་འདྲ་བས་མོས་པ་ལྷག་པར་འཕེལ། བླ་མ་དགོན་ཐོག་ཏུ་ཕྱིར་ཕེབས་པའི་ཕྱག་ཕྱིིར་རི་ཁྲོད་པ་རྭ་ལོ་ཀུན་བཟང་འོད་ཟེར་ཞུ་བ་ཕྱིན་པས་གཟིམས་སྒོའི་ཟུར་ནས་ཉན་པ་ན། རྫོགས་ཆེན་རིན་པོ་ཆེའི་ཞལ་ནས། རི་ཁྲོད་པའི་ཉམས་རྟོགས་སུ་དྲག་པ་འདུག་ཅེས་བཀའ་འདྲི་མཛད་པར་དགེ་རྩེ་མཚམས་པ་ཞིག་གི་མཚམས་གཡོག་བན་གཞོན་ཞིག་འདུག་པ་དེ་ལས་ལྷག་མ་བྱུང་ཞེས་གསུང་འཕྲོས་མཛད་སོང་ཟེར། ཁོང་རི་ཁྲོད་དུ་སླེབས་མ་ཐག་ཏུ་ཀུན་ལ་དེ་ལྟར་བསྒྲགས་ཤིང་། བདག་ལ་ཁྱེད་ཁྱད་པར་འཕགས་པ་ཞིག་ཡིན་འདུག་ཟེར་ནས་ཧ་ལས་ལས་བྱེད། འགའ་ཞིག་གྲགས་པའི་རྗེས་སུ་འབྲངས་ཏེ་བདག་ལ་མོས་པ་བྱེད་ཁུལ་དང་སེམས་གནད་བསླབ་བྱ་དགོས་ཟེར་བ་དུ་མ་བྱུང་། མ་ཤི་བར་རི་ཁྲོད་འདི་ནས་མི་འགྲོ་བསམ་པ་བྱས་ཏེ་བསྡད་ཡོད་པའི་སྐབས་ཤིག་ན་ཆོས་གྲོགས་པདྨ་ཀུན་བཟང་ཕུ་བོ་ཤི་བའི་ཚབ་ཏུ་ཁྱིམ་སོ་འཛིན་པར་བསྐུལ་བ་ཁས་ལེན་མ་བྱས་པར་རྫོགས་ཆེན་རི་ཁྲོད་དུ་ཆོས་བྲོས་སུ་སླེབས། (པདྨ་ཀུན་བཟང་འདི་མཚམས་པ་འཇིགས་མེད་རྒྱལ་བའི་མྱུ་གུ་ཡིན་མཆན།) འདིར་བསྡད་ན་ཕ་ཡུལ་དང་ས་ཐག་ཉེ་བས་ཆོས་གྲོགས་ལ་རྗེས་གཅོད་པ་འོང་བར་དོགས་པས་དབུས་གཙང་ཕྱོགས་སུ་འགྲོ་རྒྱུའི་ཐག་བཅད། སྒྲུབ་དཔོན་བླ་མ་ཆོས་ལྡན་ལ་རྫོགས་ཆེན་རིན་པོ་ཆེ་ལ་དགོངས་ཞུས་གནང་རོགས་ཞུས་པར། ཁོང་ནས་རིན་པོ་ཆེས་ཁྱོད་ལ་ཐུགས་བརྩེ་ཆེན་པོ་ཞིག་མཛད་གིན་འདུག་པས་ཁོང་མ་ཕེབས་བར་སྡོད་ལ་དེ་ནས་དགོངས་ཞུས་བྱས་ཏེ་ཕྱིན་ན་ལེགས་ཚུལ་གསུངས་པར། རིན་པོ་ཆེ་ནམ་ཕེབས་མེད་པས་དེ་བར་བསྡད་ན་ཆོས་གྲོགས་ལ་རྗེས་བསྙེགས་བྱུང་དོགས་ཡོད་ཚུལ་བཅས་ཞུས་ཏེ་ཕྱིན་ཉིན་ལམ་ལ་ཆས། ཞེས་སོགས་གསུངས། དེ་ནས་རིམ་པར་ཆོས་གྲོགས་པདྨ་ཀུན་བཟང་དང་ལྷན་དུ་ལྷ་སར་འབྱོར་ཞིང་གནས་མཇལ་གྲུབ་མཚམས་བསམ་ཡས་སུ་ཕེབས་པས་དེར་གྲུབ་དབང་འཇིགས་མེད་ཕྲིན་ལས་འོད་ཟེར་དང་མཇལ། སྔར་ནས་ཐུགས་འདྲིས་ཆེ་བས་དགྱེས་ཚོར་ཆེན་པོས་སྒྲུབ་ཁང་དུ་ཕེབས་ནས་གསུང་གླེང་ཞིབ་རྒྱས་གནང་བ་ན། གྲུབ་དབང་རིན་པོ་ཆེའི་ཞལ་ནས། སྤྱིར་དབུས་གཙང་འདི་ཆོས་དར་ས་ཡིན་ཡང་ཆོས་སེམས་མི་དཀར། སྒོས་ཁམས་པ་འཕུར་ཡང་བདེན་པ་མི་འཛིན། དབུས་གཙང་གཉིས་ལས་དབུས་པ་ལྟོགས། གནས་བཟང་ཡང་ཡུལ་འདི་པྲེ་ཏ་ཡིན། ཟན་སྒོང་གཅིག་གིས་ལྷ་ས་ལན་དགུ་སྐོར་བའི་དཔེ་ཡོད། ཁྱེད་དང་ངེད་གཉིས་བླ་མ་རྫོགས་ཆེན་རིན་པོ་ཆེའི་དྲུང་ནས་ཆོས་དམ་གཅིག་ཏུ་འབྲེལ་བའི་ཆོས་གྲོགས་ཡིན་པས་རང་རེ་གཉིས་ལྟོགས་གྲིར་ཤི་ཡང་མཉམ་ཤི་སོས་ཀྱང་མཉམ་སོས་བྱེད། ད་ཐོག་མར་ཁྱེད་རང་གཉིས་བླ་མ་བཟང་པོ་ཞིག་བསྟེན་པ་གཙོ་གནད་དུ་ཆེ་བས་ཡར་ཀླུང་འཕྱོང་རྒྱས་ཀྱི་ཕུ་ན་ཁོ་བོའི་བླ་མ་གྲུབ་མཐའ་རྒྱ་མཚོའི་ཕ་རོལ་ཏུ་སོན་པ་མཁྱེན་བརྩེའི་འོད་ཟེར་ཞེས་སུ་གྲགས་པ་སངས་རྒྱས་དངོས་དང་ཁྱད་མེད་པ་ཞིག་བཞུགས། ཚུར་མཐོང་གི་སྐྱེ་བོ་དག་ཁ་ཟེར་བ་ཐོས་ཀྱང་བ་གླང་ལྟ་བུའི་སྐྱེ་བོ་རྣམས་ལ་ཅི་ཆ་ཡོད་དེ་དག་གི་རྗེས་སུ་འབྲངས་མི་འཚལ་སོགས་བསླབ་བྱ་མང་དུ་མཛད། མཇལ་དར་དུ་ཁ་བཏགས་བཟང་བ་དང་རས་ཡུག་དཀར་པོ་ཡུག་ཆེན་སྲིད་དུ་རིང་བ་ཞིག་དང་། རྗེ་བླ་མའི་ཕྱག་བྲིས་ཞིག་གནང་བ་བཅས་ཁྱེར་ནས་མཇལ་བར་ཕྱིན་པ་ན་ལམ་གྱི་མི་རེ་གཉིས་ལ་སྐད་ཆ་དྲིས་ཚེ་ཁོ་མུ་སྟེགས་པ་ཡིན་ཟེར་བ་སོགས་ཁ་གཏོང་མཁན་འབའ་ཞིག་ལས་བཟང་པོ་བཞུགས་ཟེར་མཁན་མ་བྱུང་། དྲུང་དུ་ཕྱིན་པས་མཁས་དང་གྲུབ་པའི་དབང་ཕྱུག་སངས་རྒྱས་དངོས་དང་མཚུངས་པའི་ལུང་རྟོགས་ཡོན་ཏན་རྒྱ་མཚོའི་གཏེར་མཛོད་དུ་སྣང་ཞིང་། ཐུགས་བརྩེ་བ་ཆེན་པོས་ཀློང་ཆེན་རིག་འཛིན་འདུས་པའི་རྩ་དབང་དང་སྔོན་འགྲོ་ཁྲིད་གནད་བསྡུས་པ་ཞིག་གསུངས་ནས་རྗེས་སུ་བཟུང་། སྐབས་སྐབས་སུ་དམིགས་གནད་སོགས་ལ་རྒྱུགས་འབུལ་ཞུས་པས་ཁམས་པ་འདི་ཚོ་རིག་པ་དགའ་རབ་འདུག་ཅེས་མཉེས་ཚོར་མཛད། དེ་ལྟར་ཀུན་མཁྱེན་བླ་མའི་དྲུང་ནས་སེམས་གནད་ཀྱི་དོགས་པ་ཞིབ་ཏུ་བཅད་པས་གེགས་དང་གོལ་སའི་ཐེ་ཚོམ་སེལ་ནས་བླུན་སྒོམ་ཡིད་དཔྱོད་དང་བྲལ་བར་ངོ་རང་ཐོག་ཏུ་འཕྲོད་པའི་ཚུལ། ཉིད་ཀྱི་གསུང་མགུར་ལས། རྗེ་མཁྱེན་བརྩེའི་འོད་ཟེར་ཞལ་དཀྱིལ་མཇལ། །ཆོས་མན་ངག་གནད་འདུས་སྙིང་པོ་བསྩལ། །རས་དཀར་འཇམ་ཡུག་གི་མཇལ་དར་ཕུལ། །དེ་རྟེན་འབྲེལ་ལེགས་གསུང་ཞལ་འཛུམ་མཛད། །རྒྱུ་དངོས་པོ་ཆུང་ཡང་གནད་གཅིག་ལགས། །གསུང་ཞལ་གདམས་བདུད་རྩིའི་ཐིག་པ་བསྩལ། །ཞེན་བག་ཆགས་དབང་གིས་འཁོར་བར་འཕེན། །རང་སྐྱེ་བའི་ཕ་ཡུལ་སྤོངས་ཤིག་གསུངས། །གྲོགས་ཆགས་སྡང་ཅན་གྱི་གྲྭ་ས་རུ། །ཆོས་མི་ཡོང་དབེན་པར་བསྟེན་ཅིག་གསུངས། །ཕུག་འཁོར་བར་བསྐྱུར་བའི་གཉའ་གནོན་ཡིན། །དཀོར་གྲོང་ཆོག་རྙེད་འཚོལ་མ་བྱེད་གསུངས། །ཆོས་བྱང་ཆུབ་སྒྲུབ་པའི་གེགས་ཡིན་པས། །སེམས་འདུ་འཛིའི་གཡེང་བ་སྤོངས་ཤིག་གསུངས། །ལར་ངན་འགྲོར་འཁྲིད་པའི་ལམ་མཁན་ཅན། །གྲོགས་ཆོས་དང་མི་མཐུན་མ་འགྲོགས་གསུངས། །བློ་བླ་མ་དཀོན་མཆོག་གསུམ་ལ་གཏོད། །དུས་ནམ་ཡང་བསླུ་བ་མི་སྲིད་གསུངས། །ལར་སྐྱིད་སྡུག་ལེགས་ཉེས་རྣམ་རྟོག་ཡིན། །གཞི་རྩ་ཆོད་ལ་ལྷོད་ཅིག་གསུངས། །ཆོས་ཡོན་ཏན་རིན་ཆེན་མཛོད་ཆེན་འདི། །ལམ་གོལ་འཆུགས་སྤང་ཕྱིར་ཟུངས་ཤིག་གསུངས། །ཆོས་ཀུན་གྱི་རྩ་བ་བྱང་སེམས་ཡིན། །དོན་ཀུན་རྫོབ་དོན་དམ་ལ་འདུ་གསུངས། །ཚོགས་གཉིས་ལ་མ་བརྟེན་སངས་རྒྱས་མེད། །ལམ་ཕར་ཕྱིན་དྲུག་ལ་བརྟེན་ཅིག་གསུངས། །ལར་རོ་སྙོམས་ལམ་དུ་སློང་ཤེས་ན། །རྐྱེན་ངན་པ་དགེ་བའི་གྲོགས་ཡིན་གསུངས། །ནང་བློ་འདས་ཀྱི་རྟོགས་པ་ཤར་བའི་ཚེ། །ཡེ་གདོད་མའི་ཀློང་ན་གཉིས་མེད་གསུངས། །དོན་ཚུལ་བཞིན་ཉམས་སུ་བླངས་གྱུར་ན། །ཕུགས་བསམ་པ་ཡིད་བཞིན་འགྲུབ་བོ་གསུངས། །སེམས་རང་རིག་ཆོས་སྐུར་ངོ་སྤྲོད་མཛད། །ཅེས་སོགས་རྟོགས་པ་ཀློང་དུ་གྱུར་པའི་གསུང་བྱོན། དེ་ནས་ཡར་ཀླུང་ཕྱོགས་ཀྱི་རྟེན་གནས་ཐམས་ཅད་མཇལ་བཞིན་བསམ་ཡས་སུ་རྡོ་གྲུབ་རིན་པོ་ཆེ་བཞུགས་པའི་དྲུང་དུ་ཕྱིན་པ་ན་དཔོན་སློབ་རྣམས་ལྷན་དུ་གངས་རི་ཐོད་དཀར་དུ་ཕེབས་ཏེ་དཀའ་སྤྱད་ཆེན་པོས་སྒྲུབ་པར་བཞུགས། སྐབས་ཞིག་རྡོ་གྲུབ་རིན་པོ་ཆེའི་ཞལ་ནས། གཙང་རྒྱལ་རྩེ་ཕྱོགས་སུ་བྱང་གཏེར་གྱི་ལམ་ནས་གྲུབ་པ་བརྙེས་པའི་རྣལ་འབྱོར་གྱི་དབང་ཕྱུག་རིག་འཛིན་པདྨ་བཤེས་གཉེན་ཞུ་བའི་ཁྱད་པར་ཅན་ཞིག་བཞུགས་སྐད་འདུག་པ་ཁོང་ལས་རྫོགས་ཆེན་རིན་པོ་ཆེས་ཀྱང་བཀའ་ཆོས་མང་པོ་གསན་འདུག་པས་བཟང་པོ་ཞིག་ཡོད་པ་ཡིན་ངེས་པས་ཆོས་ཤིག་ཞུ་ཨེ་ཐུབ་ལྟ་གསུངས། དཔོན་སློབ་རྣམས་སྐུ་ཚེགས་ཆེད་དུ་བསད་ནས་ཕེབས་པའི་ལམ་བར་དུ་རྡོ་གྲུབ་རིན་པོ་ཆེའི་ཞབས་རྐང་ཆུ་སེར་གྱི་བསྙུན་གྱིས་ཉིན་རེ་ཆུ་ཕོར་བ་གང་རེ་ཙམ་རྡོལ་བ་དང་། རྗེ་འདིའི་སྐུ་ལུས་ཡོངས་རླུང་གིས་སྦོས་ཏེ་ནུབ་གཅིག་འདས་སོང་སྙམ་པ་ལྟ་བུ་བྱུང་ཚེ་རི་དྭགས་རྣ་བའི་རུས་པ་ཞིག་རྙེད་པ་ཆུ་ནང་དུ་བསྐོལ་བ་བཞེས་པས་དབུགས་སོས་པ་བྱུང་བ་སོགས་ཆོས་ཕྱིར་དཀའ་སྤྱད་ཀྱི་མཛད་པ་བསམ་གྱིས་མི་ཁྱབ། རིག་འཛིན་པདྨ་བཤེས་གཉེན་གྱི་ཞལ་མཇལ་ནས་རྡོ་རྗེ་ཕག་མོའི་ཟབ་རྒྱའི་དབང་ཁྲིད་ཀྱི་ཆོས་སྒོ་ཐོག་མར་ཕྱེས་པ་ནས་ཟབ་ཆོས་མང་དུ་གསན། རྡོ་གྲུབ་རིན་པོ་ཆེ་ལྷ་སར་ཕེབས་པར་འཇིགས་མེད་རྒྱལ་བའི་མྱུ་གུས་སྐྱེལ་མ་མཛད་ཅིང་། རྗེ་འདི་ལོ་གཅིག་རིང་གནས་འདིར་སྒྲུབ་པར་བཞུགས་རྒྱུའི་དམ་བཅའ་མཛད་དེ་བཞུགས། འདི་སྐབས་ཉམས་རྟོགས་ལ་བོགས་བསྐྱེད་སྔར་ལས་ལྷག་པ་བྱུང་བའི་གསུང་བྱོན་པ་ནི། བདག་ཆོས་མེད་སྤྲང་པོ་མདོ་ཁམས་པ། །ཚེ་འདིའི་སྙན་གྲགས་མི་ཆེ་ཡང་། །ཕ་མཚན་ལྡན་བླ་མའི་བཀའ་དྲིན་གྱིས། །ཆོས་ཉམས་ལེན་གནད་ཀྱི་སྙིང་པོ་ལོན། །སེམས་སྒོམ་མེད་གཉུག་མའི་རང་བཞིན་མཐོང་། །དེར་འཛིན་མེད་དམིགས་པའི་འཇུར་སྒོམ་བྲལ། །བློས་མ་སླད་ཤེས་པ་ཟངས་ཀ་མ། །ཡེ་གདོད་ནས་སྤྲོས་པ་བྲལ་བ་མཚར། །ང་ཡེངས་མེད་སྒོམ་པའི་རྣལ་འབྱོར་བདེ། །ནང་ཆོས་ཉིད་འོད་གསལ་ཉི་མ་ཤར། །བློ་གཏི་མུག་མུན་པ་རང་སར་སངས། །ཡེ་ཀ་ནས་དག་པ་གདོད་མའི་ངང་། །སེམས་འཁྲུལ་རྟོག་བློ་ཡི་སྤུ་རིས་ཡལ། །བཀའ་མདོ་རྒྱུད་ལ་སྦྱངས་པ་ཆེར་མེད་ཀྱང་། །གནད་རྟོགས་པ་དཀའ་བའི་གནས་ལུགས་ཤེས། །འདི་མོས་གུས་ཀྱིས་ཕ་ཕོགས་ཐོབ་པ་ཡིན། །དུས་གསུམ་གྱི་བག་ཆགས་འགའ་ཡང་དྲན། །འདི་བསམ་བཞིན་མཚན་ལྡན་བླ་མའི་དྲིན། །ཞེས་སོགས་གསུང་མགུར་མང་དུ་མཛད། དེ་ནས་རེ་ཞིག་ན་དཔལ་གྱི་ཙ་རི་ཏྲར་ཕེབས་རྒྱུའི་ཐུགས་འདུན་ཡོད་ཚུལ་རྗེ་བླ་མ་ལ་ཞུས་པ་ན། ཞལ་ནས། ཁྱོད་ཙ་རི་ནས་རེ་ཞིག་འདི་ཕྱོགས་སུ་སླེབས་པ་མི་ཡོང་། ཁོ་བོའང་ན་ཚོད་ཡོལ་བས་སྐྱེ་བ་འདིར་མཇལ་ཐུབ་པ་ཞིག་མི་ཡོང་གསུངས་ནས་ཞལ་གདམས་བསླབ་བྱ་ཕྱི་མཐའ་གཟིགས་པའི་ལུང་བསྟན་བསྩལ་ནས་ཞལ་གྱེས་ཞུས། ལྷ་ས་དང་། ཡེར་བ་བརྒྱུད་བསམ་ཡས་ཕྱོགས་སུ་ཕེབས། བསམ་ཡས་མཆིམས་ཕུ་དང་། བྲག་དམར་ཀེའུ་ཚང་། ཤེལ་བྲག ཨོ་རྒྱན་ཆེན་པོའི་གཟིམས་ཕུག་གུར་དཀར་ཕུག་སོགས་སུ་གནས་འབྲེལ་ཚོགས་མཆོད་དང་རོ་སྙོམས་ཀྱི་སྤྱོད་པ་སྐྱོང་བཞིན་དོན་མཁར་ཚེ་རིང་ལྗོངས་སུ་བྱོན། ཀུན་མཁྱེན་བླ་མ་རིགས་འཛིན་འཇིགས་མེད་གླིང་པའི་དགྱེས་ཞལ་ཐེངས་གཉིས་པ་མཇལ་ཏེ་ཀློང་ཆེན་སྙིང་ཐིག་གི་རྩ་ཁྲིད་དང་། འཕོ་བ། རྩ་རླུང་གི་ཁྲིད། དཔལ་ཆེན་རིགས་བཞིའི་དགོས་དབང་ཞུས། ཞལ་ནས་ཡང་དག་འདིའི་བཀའ་ཁྱོད་ལ་བབ་པ་ཞིག་འདུག་པས་ཉམས་སུ་ལོངས་དང་རྟགས་མཚན་ཞིག་འབྱུང་བར་འདུག་སོགས་བརྩེ་བས་རྗེས་སུ་བཟུང་སྟེ་སྙན་བརྒྱུད་ཀྱི་གདམས་པ་བསྩལ་ཚུལ། ཉིད་མཛད་རང་རྣམ་ལས། རྗེ་ཐམས་ཅད་མཁྱེན་པ་འཇིགས་མེད་གླིང་། ཁོང་ནམ་མཁའ་ལྟ་བུའི་རྣལ་འབྱོར་མཇལ། །དཔལ་ཡང་དག་རྟོགས་པའི་བཀའ་བབས་གནང་། །ཆོས་མན་ངག་རྫོགས་ཆེན་ངོ་སྤྲད་མཛད། །གནད་དཀའ་བའི་མདུད་པ་དབྱིངས་སུ་བཀྲལ། །རྗེ་ཐམས་ཅད་མཁྱེན་པ་འཇིགས་མེད་གླིང་། །བུ་མོས་གུས་ཅན་ལ་ངང་ནས་གཟིགས། །ཐུགས་ཆོས་སྐུའི་ཀློང་དུ་དབྱེར་མེད་འདྲེས། །ང་གཏན་གྱི་འདུན་མ་ལེགས་ཏེ་བྱུང་། །ཞེས་སོགས་ཐུགས་ཡིད་ཚིམས་པའི་གསུང་བྱོན། དེ་ནས་གཉལ་གྱི་གནས་རྣམས་མཇལ་བཞིན་ཙ་རིའི་གནས་ནང་དུ་ཞབས་སོད་འཁོད་ཅིང་། ཆོས་ཟམ་གདོང་། གཅིག་ཆར། ལ་བ་ཕུག མི་ལྤགས་ཐང་། སྟག་མ་ལ། ཕོ་བྲང་གཡུ་མཚོ། སྟག་ཚང་དོམ་ཚང་སོགས་སུ་ཞག་སྒྲུབ་དང་སྦྱིན་སྲེག་ཚོགས་མཆོད་འབུལ་ཅི་འགྲུབ་འབུལ་བཞིན་ཕེབས། ཟབ་ལམ་རྡོ་རྗེའི་ར་བ་རུ་སྒྲུབ་སྒོ་འདག་སྦྱར་གྱིས་མཚམས་ལ་ཡུན་རིང་བཞུགས་སྐབས་སྣང་ཉམས་སྣ་ཚོགས་པ་བྱུང་ཚུལ་གསུང་མགུར་ལས། གནས་མཁའ་སྤྱོད་གཉིས་པ་ཙ་རི་ཏྲའི། །དཔལ་ཟབ་ལམ་རྡོ་རྗེའི་ར་བ་རུ། །ང་རྣལ་འབྱོར་ཉམས་འཆར་དབྱངས་སུ་ལེན། །ཕུ་རྡོ་རྗེའི་དཀྱིལ་ལོ་ཀྲུང་འདྲ་བ། །དཔལ་རྟ་མཆོག་རོལ་བའི་གཞལ་ཡས་ཁང་། །གཡས་སེང་ཆེན་འགྱིང་འདྲའི་གནས་མཆོག་ལ། །མ་མཁའ་འགྲོའི་གྲོང་ཁྱེར་འབུམ་ཕྲག་རྒྱུ། །འཁོར་ཤ་ཟ་མཁའ་འགྲོའི་དྲོད་ཚད་ཉུལ། །ང་རོ་སྙོམས་ལམ་སློང་རྣལ་འབྱོར་པ། །རྐྱེན་ངན་པ་ས་ལམ་གྱི་བོགས་སུ་གྱུར། །རི་རྨོག་ལྕོག་འདྲ་བའི་མདུན་ས་རུ། །ལྷ་དགེ་བསྙེན་ཤ་ཡི་ར་བ་ཅན། །འཁོར་ལྷ་བཙན་འབུམ་གྱི་རྒྱུག་འབྲང་བྱེད། །ང་དམ་ལྡན་རྣལ་འབྱོར་ཕྲིན་ལས་སྒྲུབ། །རྒྱབ་གླང་ཆེན་འདྲ་བའི་རི་བོ་ལ། །ཡུམ་མཁའ་འགྲོའི་གཙོ་མོ་ཕག་ཞལ་ཅན། །ནང་དག་པ་རྩ་ཡི་དཀྱིལ་འཁོར་བསྟན། །ལམ་བདེ་ཆེན་ཡེ་ཤེས་བསྐྱེད་པའི་གྲོགས། །སེམས་ལྷན་སྐྱེས་གཉུག་མའི་ཡེ་ཤེས་བསྟན། །ཞེས་དང་། ཕ་མཁས་པའི་དབང་ཕྱུག་ཞབས་དྲུང་ནས། །གནས་ཙ་རི་ཏྲ་རུ་སྒྲུབ་ལ་ཆས། །ལྕམ་སྒྲུབ་སྡེར་ཁྲོས་མ་བསྙེན་པའི་ཚེ། །གནས་དེ་ཉིད་བདེ་མཆོག་ཕོ་བྲང་མཐོང་། །སེམས་དད་པའི་ཤུགས་ཀྱིས་བསྟོད་ཚོགས་ཕུལ། །གནས་ཟབ་ལམ་རྡོ་རྗེའི་བ་ར་རུ། །ང་རྩེ་གཅིག་སྒྲུབ་པར་སྙིང་པོར་དྲིལ། །གནས་ཕྱི་ནང་བཀོད་པའི་ཁྱད་པར་མཐོང་། །དཔལ་རྩ་གསུམ་ལྷ་ཡི་རང་ཞལ་མཇལ། །མ་མཁའ་འགྲོས་བརྡའ་ཆོས་དག་སྣང་བསྟན། །གནས་གཉན་ཁྲོད་བརྟུལ་ཞུགས་སྤྱོད་པ་བསྐྱངས། །ཞེས་སོགས་གསུངས་པ་ལྟར་ཐུགས་དམ་བོགས་འདོན་ཆེན་པོ་བྱུང་བཞིན་ཕྱིར་ལྷ་སར་ཕེབས། སླར་ཡང་བསམ་ཡས་བརྒྱུད་རིགས་བདག་བླ་མ་ཀུན་མཁྱེན་འཇིགས་མེད་གླིང་པའི་དྲུང་དུ་བཅར་ཏེ་ཀུན་མཁྱེན་ཉིད་ཀྱི་གསུང་འབུམ་ཆ་ཚང་བའི་བཀའ་ལུང་དང་། དགོངས་གཏེར་ཡོངས་རྫོགས་ཀྱི་དབང་ཁྲིད་གསན། དབང་གི་སྐབས་རྣམས་སུ་དབང་རྫས་གཞན་མེད་པར་མགུར་ཕུར་ལ་བརྟེན་ནས་བསྐུར་བར་མཛད་ཅིང་། ཞལ་ནས་སློབ་དཔོན་ལྟ་བའི་གདེངས་དང་ལྡན་པས་སློབ་མ་གནས་ལུགས་ཀྱི་དྲོད་ཚད་བརྙེས་པ་ལ་རྫས་ལ་བརྟེན་མི་དགོས་ཏེ་དོན་གྱི་དབང་ཡིན། གཞན་ལ་གཞུང་བཞིན་ཆོ་གའི་ཡན་ལག་མ་ཉམས་པར་ཉམས་སུ་མ་བསྟར་བར་བསྐུར་མི་རུང་གསུངས། དེ་ནས་ཨོ་རྒྱན་གླིང་ཡང་དགོན་དུ་ལོ་ངོ་ལྔ་ལྷག་སྒྲུབ་པ་ལ་བཞུགས་ཤིང་དུས་འདི་ཙམ་ནས་ཕྱོགས་དང་ཕྱོགས་ནས་གདམས་ངག་ཞུ་བ་བྱུང་བ་ཀུན་དབང་ཆོས་ཀྱི་རྗེས་སུ་འཛིན་པར་མཛད། རེ་ཞིག་ན་གྲུབ་དབང་འཇིགས་མེད་ཕྲིན་ལས་འོད་ཟེར་གྱིས་ཕྱིར་ཁམས་ཕྱོགས་སུ་མ་ཕེབས་ཐབས་མེད་ཡིན་པའི་གསུང་བྲིས་བཀའ་ནན་འབྱོར་བ་ལྟར་སྐུ་མཚམས་ལས་བཞེངས་ཏེ་ལམ་ལ་ཆས། ལྷོ་བྲག་གི་གནས་ཆེན་རྣམས་དང་སྐུ་གསུང་ཐུགས་རྟེན་ལ་མཇལ་བཞིན་ཕེབས་པ་དང་ཆོས་འབྲེལ་ཞུ་མཁན་ཀུན་ལ་མོས་ཁམས་དང་མཐུན་པའི་ཟབ་ཆོས་ཀྱིས་རྗེས་སུ་འཛིན་པར་མཛད། སྲས་མཁར་དགུ་ཐོག་ཏུ་རྗེ་བཙུན་མི་ལའི་རྣམ་རོལ་རྡོ་རྗེ་འཛིན་པ་ངག་དབང་ཆོས་བཟང་དང་མཇལ་བས་ཕན་ཚུན་ཚེ་རབས་སྔ་མའི་བག་ཆགས་སད་དེ་ཕ་བུ་འཕྲད་པ་ལྟ་བུའི་ཐུགས་དགྱེས་པ་ཆེན་པོས་ཟབ་ཆོས་གདམས་ངག་འབུལ་བཞེས་མཛད། འབྲལ་མི་ཕོད་པ་ལྟ་བུའི་ངང་ནས་གྱེས་ཏེ་ལམ་བར་གྱི་གནས་རྟེན་རྩ་ཆེན་རྣམས་ལ་མཇལ་སྐོར་དང་ཚོགས་མཆོད་འབུལ་བཞིན་བཤུལ་ལམ་རིམ་བགྲོད་ཀྱིས་ཕེབས་པས་རྗེ་གྲུབ་དབང་འཇིགས་མེད་ཕྲིན་ལས་འོད་ཟེར་གྱི་ཞབས་དྲུང་དུ་འབྱོར། རྗེ་བླ་མ་སྐུ་བགྲེས་ཚུལ་བཞེས་འདུག་པས་ཐུགས་དགའ་སྐྱོ་འདྲེས་མས་རེ་ཞིག་གསུང་ལན་ཡང་འབུལ་མི་ཐུབ་པ་ལྟ་བུ་བྱུང་གསུངས། ཟླ་གཅིག་ལྷག་བཞུགས་རིང་རྗེ་བླ་མའི་ཞལ་སྔ་ནས་མཛོད་བདུན་སོགས་འདོད་ཆོས་མང་དུ་ཞུས་ནས་རང་ཡུལ་དུ་ཕེབས་ཙམ་མཛད། དེ་ནས་མཁས་གྲུབ་དུ་མའི་གདན་ས་ཞེ་ཆེན་བསྟན་གཉིས་དར་རྒྱས་གླིང་དུ་ཕེབས་ཏེ་རྒྱལ་ཚབ་པདྨ་གསང་སྔགས་བསྟན་འཛིན་དང་། མཆོག་སྤྲུལ་རིག་འཛིན་དཔལ་འབྱོར་རྒྱ་མཚོ་ཡབ་སྲས་ལས་བཀའ་མ་འདུས་པ་མདོ་དབང་དང་། སེམས་སྡེ་ཨ་དོན་བཅོ་བརྒྱད། གཏེར་མ་བཀའ་བརྒྱད་རྣམ་གསུམ་བཅས་ཀྱི་དབང་ལུང་གསན་བཞེས་གནང་བ་དང་། ཕར་ལ་བྱང་གཏེར་ཀ་དག་དགོངས་པ་ཟངས་ཐལ། ཐུགས་སྒྲུབ་ཡང་ཏིག་གཅེས་སྒྲོན། ཕག་མོ་ཟབ་རྒྱ་རྣམས་ཀྱི་དབང་ལུང་ཁྲིད། རཏྣའི་ཐུགས་སྒྲུབ་ཡང་སྙིང་ཀུན་འདུས། ཀུན་མཁྱེན་ལྔ་པའི་གསང་བ་རྒྱ་ཅན་ཡོངས་རྫོགས། དུང་མཚོ་རས་པའི་ཡང་ཏི། མཁའ་འགྲོ་སྙིང་ཐིག་བཅས་ཀྱི་དབང་ལུང་ཕུལ། རིམ་གྱིས་བཤད་སྒྲུབ་བསྟན་པའི་འབྱུང་གནས་རུ་དམ་ཨོ་རྒྱན་བསམ་གཏན་ཆོས་གླིང་དུ་ཕེབས་ནས་རྗེ་ནམ་མཁའ་ཚེ་དབང་མཆོག་གྲུབ་ལས་བཀའ་མ་སྒྱུ་འཁྲུལ་ཞི་ཁྲོའི་དབང་དང་། ལུང་རྒྱུན་ཤིན་ཏུ་དཀོན་པ་ཁྲོས་མའི་གསང་རྒྱུད་གྱི་ལུང་དང་གཞན་ཡང་ཆོས་བཀའ་འགའི་དབང་ལུང་གསན། སླར་རང་ཡུལ་དུ་ཕེབས་ནས་ཞང་པོ་སོགས་ཉེ་འབྲེལ་རྣམས་ལ་དབང་ཆོས་ཀྱིས་འབྲེལ་བ་དང་སྨོན་ལམ་ཟབ་མོ་མཛད་དེ་དབུས་ཕྱོགས་སུ་ཕེབས་ཞལ་ཕྱོགས། བསམ་གཏན་གངས་བཟང་དུ་མ་སླེབས་ཙམ་ནས་ཡུལ་ལྷས་བསུ་བའི་རྟགས་མཚན་བྱུང་བ་སོགས་རྟེན་འབྲེལ་གྱི་ལེགས་ཚོགས་ཆེར་འཕེལ་ངང་གཉུབས་ཆེན་སངས་རྒྱས་ཡེ་ཤེས་ཀྱི་སྒྲུབ་གནས་ཁུ་ལུང་དུ་འབྱོར། ས་མོ་ལུག་གི་ལོར་སྡེ་དཔོན་སྐྱིད་གཤོངས་པ་དང་གཡུང་དྲུང་དར་རྒྱས་གླིང་གཉིས་ཀས་སྦྱིན་བདག་མཛད་དེ་དབེན་གནས་ཕྲིན་ལས་རབ་རྒྱས་གླིང་ཞེས་པའི་དབེན་དགོན་ཕྱག་བཏབ་ཏེ་སྐུ་མཚམས་ལ་བཞུགས། འདི་སྐབས་འཇམ་མགོན་ས་སྐྱ་གོང་མ་རིན་པོ་ཆེའི་དབུའི་བླ་མར་གདན་ཞུས་ཀྱི་བཀའ་ཤོག་ཕེབས་པ་ལྟར་ས་སྐྱ་གོང་དུ་བྱོན། གོང་མ་རིན་པོ་ཆེ་ལ་ཐོག་མར་རྟེན་འབྲེལ་གྱི་ཆེད་དུ་ཚེ་དཔག་མེད་འཆི་མེད་དཔལ་སྟེར་གྱི་ཚེ་དབང་དང་། དེ་ནས་རིམ་བཞིན་ཤར་གཏེར་དཀོན་མཆོག་སྤྱི་འདུས། རྒོད་ལྡེམ་པའི་རིག་འཛིན་གདུང་སྒྲུབ་རྣམས་ཀྱི་དབང་ལུང་། སྔ་འགྱུར་རྒྱུད་འབུམ་རིན་པོ་ཆེའི་ལུང་སོགས་ཟླ་བ་བཞིའི་རིང་ཟབ་ཆོས་མཐའ་ཡས་པ་ཕུལ། འདི་སྐབས་འཇམ་མགོན་གོང་མ་རིན་པོ་ཆེའི་གཟིགས་སྣང་དུ་རྗེ་འདི་ཨོ་རྒྱན་སྣང་སྲིད་ཟིལ་གནོན་དུ་མཇལ་བ་བྱུང་གསུངས་པ་དང་། བསྙེན་བཀུར་རྒྱ་ཆེན་པོའི་ཕེབས་སྐྱེལ་དང་བཅས་ཕྱིར་སྒྲུབ་ཁང་དུ་ཕེབས་ནས་ཐུགས་དམ་སྙེན་སྒྲུབ་ལ་བཞུགས་ཤིང་བར་མཚམས་རྣམས་སུ་དབང་ཁྲིད་ཀྱིས་གདུལ་བྱ་རྗེས་སུ་འཛིན་པར་མཛད་དོ། །དེ་ལྟར་རྗེ་ཉིད་དགུང་ལོ་ཞེ་གཅིག་ཡན་གྱི་རང་རྣམ་ཉུང་བསྡུས་རྣམ་གསལ་ཞེས་པ་མགུར་ཚོགས་དང་བཅས་པོད་ཆེན་གཅིག་བཞུགས་པ་ལ་གཞི་བྱས་ནས་མདོར་བསྡུས་སུ་བཀོད་པ་ཡིན་ལ། སྐུ་ཚེའི་སྨད་ཀྱི་རྣམ་ཐར་ལག་སོན་མ་བྱུང་བས་ཐེངས་འདིར་ཞུ་བ་རྔོ་མ་ཐོགས་པས་སླད་ཕྱིན་ཁུངས་བཙུན་གྱི་ངག་རྒྱུན་སོགས་གོ་ཐོས་བྱུང་ཚེ་འདིར་ཁ་སྐོང་མཛད་པར་ཞུ་ཞེས་གསོལ་བ་འདེབས་པའོ། །