[༢༦] ཆེ་ཡོལ་རིག་འཛིན་ཆེན་མོ་དཔའ་བོ་ལས་རབ་རྩལ།
རྫོགས་ཆེན་གསུམ་པ་ངེས་དོན་བསྟན་འཛིན་བཟང་པོ་དང་ཉི་སྤྲུལ་གཉིས་པའི་ཐུགས་སྲས་ཆེ་ཡོལ་རིག་འཛིན་ཆེན་པོ་དཔའ་བོ་ལས་རབ་རྩལ་ནི། བདག་ཅག་གི་སྟོན་པ་མཉམ་མེད་ཐུབ་པའི་དབང་པོའི་སྤྱན་སྔར་ཤཱ་རིའི་བུ་དང་། དགེ་བསྙེན་དྷརྨ་ཏ། ཞི་བའི་གོ་ཆ། ལང་གྲོ་དཀོན་མཆོག་འབྱུང་གནས། བོ་དྷི་ར་ཛ། ས་སྐྱ་བླ་མ་བསོད་ནམས་རྒྱལ་མཚན། རྒྱལ་བའི་དབང་པོ་རང་བྱུང་རྡོ་རྗེ། ཆོས་རྒྱལ་རཏྣ་གླིང་པ། ཨ་མཁར་རྟོགས་ལྡན་ཀརྨ་ཕྲིན་ལས་སོགས་བསྟན་དང་གདུལ་བྱའི་དོན་དུ་བསམ་བཞིན་སྲིད་པ་ཉེ་བར་བཟུང་བའི་རྣམ་རོལ་བརྒྱུད་མར་བྱོན་བྱོན་པའི་མཐར། ཡུལ་མདོ་སྨད་སྡེ་དགེའི་ཆབ་འབངས་ཀྱི་བྱེ་བྲག་ཆེ་ཡོལ་ཞེས་པའི་འབྲོག་སྡེ་རུ་ཇིང་གིར་རྒྱལ་པོའི་རིགས་སུ་སྐུ་འཁྲུངས། བྱིས་པའི་དུས་ནས་སྔོན་གནས་རྗེས་སུ་དྲན་པས་ཡི་གེ་འབྲི་ཀློག་སོགས་སློབ་སྦྱོང་ལ་མ་ལྟོས་པར་མཁྱེན། དགུང་ལོ་བདུན་གྱི་དུས་གཏེར་སྟོན་རཏྣ་གླིང་པ་ཡིན་པའི་སྔོན་གནས་དྲན་ཅིང་གཏེར་གྱི་བརྡ་ཡིག་ཀྱང་ཀློག དགུང་ལོ་བཅུ་པ་ནས་ཉི་སྤྲུལ་གཉིས་པ་པདྨ་ཐེག་མཆོག་བསྟན་པའི་རྒྱལ་མཚན་གྱིས་རྗེས་སུ་བཟུང་ཞིང་སྲིན་རྫོང་འོད་གསལ་སྒྲུབ་སྡེར་ཕེབས། རྗེ་འདི་ཉིད་ལས་སྔ་ཕྱི་རྣམས་སུ་བཀའ་གཏེར་གསར་རྙིང་གི་ཆོས་བཀའ་བསམ་གྱིས་མི་ཁྱབ་པ་གསན་ཞིང་དོན་བརྒྱུད་སྙིང་པོའི་བསྟན་པ་གཏད། སྐུ་གཤེགས་ནས་ཀྱང་ཡེ་ཤེས་ཀྱི་སྐུས་ལན་དུ་མར་རྗེས་སུ་བཟུང་ཞིང་ལུང་བསྟན་གདམས་པ་ཡང་ཡང་བསྩལ། བར་སྐབས་མཚོ་སྔོན་ཕྱོགས་སུ་ཕེབས་ཤིང་ཁྲི་ཤོང་རྒྱལ་མོ་ལས་ཡིད་བཞིན་ནོར་བུ་ཞིག་གཏེར་དུ་བཞེས། དད་ལྡན་རྣམས་ལ་རྫོགས་ཆེན་གྱི་སྨིན་ཁྲིད་གནང་བ་སོགས་འབྲེལ་ཚད་དོན་ལྡན་གྱི་ས་ལ་བཀོད། ཕྱིར་རང་ཡུལ་དུ་ཕེབས་ནས་ཕུར་སྒྲུབ་མཛད་པས་ཕུར་པ་རྣམས་འཕུར་འཁྲབ་ལྡིང་བ་སོགས་དང་ཕུར་པ་ཆུང་བ་འགའ་ཞིག་རི་རྩེ་རྣམས་སུ་འཕུར་བ་དང་ཕུར་གཏོར་ལས་མེ་འབར་བ་སོགས་བྱུང་། ཟླ་ཡི་སྦོམ་ཆེན་ལུང་ནས་གནན་བྱ་འདྲེ་བདུད་ཀྱི་བླ་རྡོ་དང་། གནོན་བྱེད་གུ་རུའི་ཞབས་རྗེས་རྣམས་ཕྱག་ཏུ་སོན། དེ་ཙམ་ན་ས་སྐྱ་གོང་མ་ངག་དབང་ཀུན་དགའ་བློ་གྲོས་ཀྱིས་གསུང་བསྐུལ་ལྟར་ས་སྐྱོང་སྡེ་དགེའི་རྒྱལ་ཁབ་ཏུ་སྤྱན་དྲངས་ནས་དབུའི་མཆོད་གནས་སུ་བཀུར། བདུད་འདུལ་ལྷ་ཁང་དུ་འདྲེ་བདུད་ཀྱི་བླ་རྡོ་མནན་པའི་སྟེང་ན་གུ་རུ་རྡོ་རྗེ་གྲོ་ལོད་ཀྱི་ཞབས་རྗེས་ཀྱིས་མནན་ཏེ། དེའི་སྟེང་དུ་གུ་རུ་སྣང་སྲིད་ཟིལ་གནོན་གྱི་སྐུ་ཐོག་ཚད་མ་བཞེངས་ནས་རབ་གནས་སོགས་ལུང་དོན་བཞིན་མཛད། མི་ལོ་ཉི་ཤུའི་ཚུན་ལ་མཐའ་མིའི་གནོད་པ་མི་འབྱུང་བར་ཞལ་གྱིས་བཞེས་པ་སོགས་ས་སྐྱོང་རྒྱལ་པོའི་བསྟན་སྲིད་ལ་རིམ་གྲོ་མཛད་པས་ཐུབ་བསྟན་ནོར་བུའི་གླིང་གི་ཆོས་སྡེ་རྟེན་དང་བརྟེན་པ་གསར་འདེབས་གནང་བའི་བདག་རྐྱེན་སྲི་ཞུ་ཚད་མེད་ཕུལ། སླར་བོད་ཡུལ་དབུས་ཕྱོགས་སུ་གནས་མཇལ་ལ་བྱོན་ཞིང་ཤཱཀྱ་མུ་ནེའི་ཐུགས་ཀ་ནས་དེ་བཞིན་གཤེགས་པའི་རིང་བསྲེལ་ཞིག་ཕྱག་ཏུ་བབ། བསམ་ཡས་མཆིམས་ཕུར་རྩ་གསུམ་སྒྲུབ་པའི་གདམས་སྐོར་སོགས་དགོངས་གཏེར་མང་པོ་བབ། སྲིན་མོ་རྫོང་ཕུག་ནག་བདེ་བ་ཆེན་པོ་ནས་ཨ་མྲྀ་ཏ་དང་དབུ་རུ་ཏི་སྒྲོ་བྲག་ནས་རཏྣ་གླིང་པས་ཡང་གཏེར་དུ་སྦས་པའི་གུ་རུའི་སྐུ་ཚབ་པདྨ་གུ་རུ་སོགས་སྤྱན་དྲངས། འདམ་གྱི་རྒྱལ་ཆེན་བཅོ་བརྒྱད་སོགས་དམ་ལ་བཏགས་ནས་རང་གནས་མདོ་ཁམས་སུ་ཕེབས། རྗེ་འདིས་སྔ་ཕྱི་ཀུན་ཏུ་གངས་ལྗོངས་སྤྱིའི་ས་གནད་གསོ་བ་དང་ས་དམིགས་གཟེར་གང་ཆེ་རྣམས་སུ་དམ་སྲི་འགོང་པོ་མནན་སྲེག་གི་ལས་ལ་སྦྱར་པ་མང་དུ་མཛད་ཅིང་། ཁྱད་པར་གཞི་བདག་དཀར་ཕྱོགས་སྐྱོང་བ་རྣམས་ལ་དམ་ཚིག་བསྒྲགས་ཤིང་བསྟན་འགྲོའི་ཕན་བདེ་སྤེལ་བའི་གཉེར་གཏད་ཟབ་མོ་མཛད། འདི་སྐབས་ཙམ་ན་སྔོན་སྨོན་ཐུགས་བསྐྱེད་ཀྱི་བདེན་མཐུ་དུས་སུ་སྨིན་པས་མདོ་སྔགས་ཆོས་ཚུལ་རྒྱ་མཚོའི་ཉིང་ཁུ་སྔ་འགྱུར་རྙིང་མའི་རྒྱུད་སྡེ་རིན་པོ་ཆེ་རྣམས་དཔེ་རྒྱུན་ཆེས་དཀོན་པ་དང་། ཡི་གེ་བཞུགས་པ་རྣམས་ཀྱང་མ་དག་པ་དང་ཆ་མི་ཚང་པ་སོགས་ཆེས་ཉམས་རྒུད་དུ་ཕྱོགས་པར་ཐུགས་བློས་མ་བཟོད་པར། དངུལ་སྲང་སྟོང་ཕྲག་ལྷག་གི་དངོས་རྫས་གསེར་དངུལ་རྟ་ནོར་བཅས་ཐེབས་རྩ་གནང་ནས། སྡེ་དགེའི་བཙུན་མོ་ཚེ་དབང་ལྷ་མོ་ལ་རྙིང་རྒྱུད་རིན་པོ་ཆེ་པར་དུ་བརྐོ་དགོས་པའི་བཀའ་ནན་བསྩལ་བས་ཐུགས་བཞེད་བཞིན་ལེགས་འགྲུབ་བྱུང་སྟེ་སྙིང་པོ་དོན་གྱི་བསྟན་པར་མཛད་རྗེས་ཉམས་པ་མེད་པ་བཞག་གོ། དེ་ལྟར་བསྟན་པ་དང་སེམས་ཅན་གྱི་དོན་རྒྱ་ཆེར་མཛད་དེ་རེ་ཞིག་གདུལ་བྱའི་ཡུལ་དེ་ཙམ་དུ་གཟིགས་ནས་རབ་བྱུང་བཅུ་བཞི་པའི་སྨད་དུ་ཆོས་དབྱིངས་བདེ་བ་ཆེན་པོའི་རང་བཞིན་དུ་མངོན་པར་གཤེགས་པར་མཛད་དོ། །