[༢༨] རྡོ་བླ་འཇིགས་མེད་སྐལ་བཟང་།
གྲུབ་དབང་རྫོགས་ཆེན་པ་ངེས་དོན་བསྟན་འཛིན་བཟང་པོ་དང་རྡོ་གྲུབ་ཆེན་རྣམ་གཉིས་ཀྱི་ཐུགས་སྲས་ཞལ་སློབ་རྡོ་བླ་འཇིགས་མེད་སྐལ་བཟང་ནི། བོད་རབ་བྱུང་བཅུ་གསུམ་པའི་དཀྱིལ་སྨད་ཙམ་ལ་མདོ་ཁམས་རོལ་ཆེན་བཅོ་བརྒྱད་ཀྱི་ནང་ཚན་རྡོ་ཁོག་ཏུ་སྐུ་འཁྲུངས། ཆུང་ངུ་ནས་ཐེག་པ་ཆེན་པོའི་རིགས་སད་དེ་བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་ངང་གིས་འཇུག་པས་རྔོན་པ་དང་ཤན་པ། སྤྲང་པོ་སོགས་མཐོང་ཚེ་སྙིང་རྗེ་ཤས་མི་བཟོད་པ་དང་སྡིག་ལས་ལ་འཇིགས་པའི་བློ་བཅོས་མིན་མངའ། བཤེས་གཉེན་ཆེན་པོ་ཉི་གྲགས་སྐལ་བཟང་དབང་ལྡན་དང་། རྫོགས་ཆེན་གསུམ་པ་ངེས་དོན་བསྟན་འཛིན་བཟང་པོ། རྡོ་གྲུབ་འཇིགས་མེད་ཕྲིན་ལས་འོད་ཟེར། དགེ་རྩེ་འཇིགས་མེད་ངོ་མཚར། མཚམས་པ་འཇིགས་མེད་རྒྱལ་བའི་མྱུ་གུ་སོགས་ཀྱི་ཞབས་པད་མཉེས་པ་གསུམ་གྱིས་རྒྱུན་རིང་བསྟེན་ཏེ་རྒྱུད་སྡེ་གསར་རྙིང་གི་སྨིན་ཁྲིད་མཐའ་ཡས་པ་དང་། ཁྱད་པར་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གོང་འོག་གི་ཟབ་ཁྲིད་ལ་གསན་བསམ་སྒོམ་སྒྲུབ་དཔྱིས་ཕྱིན་པ་མཛད་པས་རྫོགས་པ་ཆེན་པོའི་རྟོགས་པ་ཀློང་དུ་གྱུར་པའི་རྣལ་འབྱོར་གྱི་དབང་ཕྱུག་ཆེན་པོར་གྱུར། གཞན་རྒྱུད་ཀྱི་རྟོག་པ་མཁྱེན་པ་དང་དངོས་མེད་ཀྱི་ལྷ་འདྲེ་དམ་འོག་ཏུ་འདུས་པ་སོགས་མཆོག་ཐུན་ལས་བཞིའི་ཕྲིན་ལས་ལ་རང་དབང་འབྱོར་བའི་རྟགས་མཚན་དུ་མ་མངའ། རྡོ་གྲུབ་རིན་པོ་ཆེའི་ཐུགས་སྲས་གཙོ་བོ་རྡོ་རྗེའི་གདུང་ཆེན་བཞི་ཞེས་གྲགས་པའི་ཡ་གྱལ་རྗེ་འདི་ཉིད་འདྲེན་པའི་ངག་རྒྱུན་ཡང་ཡོད་པར་ཐོས། སྐུ་ཚེ་གང་པོར་གདུལ་བྱ་ངེས་མེད་དུ་བསྐྱངས་ཤིང་རྫ་རྒྱུད་སྟོད་སྨད་དང་མགོ་ལོག་གསེར་རྟ་སོགས་ཕྱོགས་ཀྱི་སྐྱེ་བོ་ཀུན་དགེ་སྦྱོར་སྡིག་སྤང་ལ་བསྐུལ་བས་ཡུལ་ཁམས་ཐམས་ཅད་དཀར་པོར་བསྒྱུར། དམ་པ་འདི་ལས་མན་ངག་རྫོགས་པ་ཆེན་པོའི་སྨིན་ཁྲིད་བཞེས་པའི་ཞལ་སློབ་རྒྱལ་སྲས་གཞན་ཕན་མཐའ་ཡས་དང་། དཔའ་སྤྲུལ་སེམས་དཔའ་ཆེན་པོ། མདོ་མཁྱེན་བརྩེ་སྐྱེས་བུ་ཡེ་ཤེས་རྡོ་རྗེ་སོགས་ཕལ་ཆེར་རྡོ་གྲུབ་རིན་པོ་ཆེ་དང་ཐུན་མོང་དུ་བཞུགས། དེ་ལྟར་འགྲོ་དོན་ཕྱོགས་མེད་དུ་བསྐྱངས་ནས་མཐར་སྐུ་ན་མཐོན་པོར་སོན་པའི་སྐབས་སུ་ཕྱི་གསལ་གཟུགས་སྐུའི་བཀོད་པ་ནང་དབྱིངས་ཀ་དག་གི་རྒྱལ་སར་མངོན་པར་གཤེགས་པར་མཛད་དོ། །