སྦྲ་གུར།
༡ སྦྲའི་སྤྱོད་སྒོ་བཤད་པ། སྦྲ་ནི། བོད་རིགས་མི་དམངས་ཀྱི་བློ་རྩལ་ལས་ཐོན་པའི་སྒྱུ་རྩལ་ཞིག་དང་། སྤྱོད་སྒོ་ཆེ་བའི་ཁྱད་ནོར་ཞིག་ཡིན་པས། དམངས་ཁྲོད་དུ། དེ་དང་འབྲེལ་ཡོད་ཀྱི་གཏམ་དཔེ་དང་ལྡེའུ་སོགས་ཀྱང་མང་བོ་ཡོད། དཔེར་ན། ས་ནག་ནང་ནས་གནས་གཞི་བཟུང་། །སྦྲ་ནག་ནང་གི་འཁོར་བ་བཟུང་། །ཞེས་དང་། སྐྱིད་ན་མགོ་སྦྲ་མ་ཆེ། །སྡུག་ན་ཕོར་བ་མ་ཆུང་། །ཞེས་ཟེར་ལ། ལྡེའུ་ལ་མཚོན་ན་ཡང་། འབྲི་གཅིག་ཐག་པ་བརྒྱ་ཡིས་བཏགས་དང་། སྦྲའི་ཁ་ཚུབ་ཕྱེས་པ་ལ། གཡག་རྒན་མ་སྒུལ་ཟེ་བ་འགུལ། ཟེར་བ་སོགས་མང་དུ་ཡོད། ལྷག་པར་དུ། རུ་སྤོར་ཚེ་ས་བརྐོ་རྡོ་སློག་བྱེད་མི་དགོས་པས། ཁོར་ཡུག་སྲུང་སྐྱོབ་ཀྱི་ནུས་པ་ཐོན་ཡོད་པ་དང་། ནགས་ཚལ་ལ་གཏོར་བརླག་ཐེབས་མི་དགོས་པར་ནོར་རྩིད་ཀྱིས་སླེས་པའི་རེ་ལྡེས་བཟོས་ཆོག་པའི་ཁྱད་ནུས་ཐོན་ཡོད།
གདོད་མའི་དུས་སུ་སྦྲ་དེ་ཡང་། འཇག་སྐྱ་ལས་སླེས་པར་མངོན་ཏེ། བཀའ་ཐང་སྡེ་ལྔ་ལས། འཇག་ཆེན་སྦྲ་ཆེན་ཕུབ་འདྲ། ཞེས་པ་ལས་གདོད་མའི་སྦྲ་དེ་འཇག་མས་བསླེས་པའི་རྩའི་སྤྱིལ་བུ་ཙམ་ཡིན་པར་འདོད་ལ། ཕྱིས་སུ་ཐོན་ལས་གོང་འཕེལ་དུ་སོང་བ་དང་བསྟུན། ནོར་རྩིད་ཀྱི་བསླེས་པ་སྟེ། གཡུང་དྲུང་བོན་གྱི་བསྟན་འགྱུར་ཕྱོགས་བསྡུས་ལས། བོད་ཡུལ་མ་སངས་སྤུན་དགུས་དབང་བྱས་ཏེ། །ཡུལ་མིང་བོད་ཁམས་གཞུང་དྲུག་ཞེས་སུ་གྲགས། །ལྕགས་རིགས་རྙེད་ཅིང་རྡོ་བཟོ་ཤིང་གཅོད་ཤེས། །སྤུ་བྲེག་ཐག་ཚེམས་ཞིང་འདེབས་སོགས་ཤེས་དུས། །འབྲོག་དང་ཡུལ་བ་ཞེས་པའི་སྲིད་པ་བྱུང་། །ཞེས་པ་ལྟར། འབྲོག་ཕྱོགས་ཕལ་མོ་ཆེར་སྤྱོད་པའི་སྦྲ་གུར་ནི། རྒྱུ་རྩིད་པ་ལས་བཟོས་པ་ཡིན་ཏེ། དམངས་ཁྲོད་ཀྱི་སྦྲ་བསྟོད་དུ། གཡུ་སྦྲ་གོང་སྨུག་འདིར་བསྟོད་པ་རྣམ་གསུམ་རེ་བྱས་ན། གཡག་ཀ་ལ་བརྒྱ་ཡི་མཆན་རྩིད་ཡིན་ནས། །འབྲི་ཐོའུ་མ་བརྒྱ་ཡི་ལག་རྩིད་ཡིན་ནས། །འཕང་ལོ་གསེར་རྡོ་སེར་བོ་ཡིན་ནས། །བཀལ་བའི་འཕང་ལ་རོམ་ཕྲ་མེད་ནས། །ཞེས་ཟེར་ལ། ཁྱད་པར་དུ། སྦྲ་ནག་འདི་རུ་སྐྱས་འདེགས་བྱེད་པ་ལ་སྟབས་བདེར་བཟོས་ཡོད་ལ། བཟོ་དབྱིབས་མང་ཆེ་བ་ནི། ཁྱུང་ཆེན་གྱི་དབྱིབས་དང་། རུས་སྦལ་གྱི་དབྱིབས་ལྟར་གྲུ་བཞི་དང་། ཡང་ན། སྒོར་སྒོར་ཙམ་ཡིན། ཆེ་ཆུང་ནི་དབུལ་ཕྱུག་དང་དོ་ཅ། བཟའ་མི་མང་ཉུང་གིས་བཟོས་ཡོད་ཅིང་། ཀ་བ་ཁ་ཤས་ཡོད་པ་ལས་གཞན། དཀར་ཁུང་གི་ཁ་ཚུབ། ཆོན་ཐག་དང་ཆོན་འདེགས་ཀྱི་དབྱུག་རྟེན་ཡང་ཡོད། སྦྲ་གུར་ནང་དུ་བཟའ་མི་ཚང་མ་ཉལ་སྲོལ་དང་། གཞི་ཁྱིམ་ལ་མཁོ་བའི་དངོས་རྫས་ཆ་ཚང་ཤོང་བ་ཡིན།
སྦྲ་བཤད་རྣམས་སུ། སྦྲའི་ཡ་ལག་ན་ཕོ་འདོམས་ལྔ་བརྒྱ་ཡོད་ནས་ཟེར་གི། སྟག་ཤ་རས་རྟ་རྒྱུགས་བྱེད་ས་ཡོད་ནས་ཟེར་གི། རྟ་རྒྱུགས་ན་མགྱོགས་དར་ལེན་ས་ཡོད་ནས་ཟེར་གི། སྦྲའི་མ་ལག་ན་མོ་འདོམས་དགུ་བརྒྱ་ཡོད་ནས་ཟེར་གི། མ་བུ་མོས་གླུ་ལེན་བྱེད་ས་ཡོད་ནས་ཟེར་གི། གླུ་བླངས་ནས་གར་ཡང་རྩེ་ས་ཡོད་ནས་ཟེར་གི། མཚམས་བཞི་ན་སྐྱེ་འགྲོའི་མདའ་ར་ཡོད་ནས་ཟེར་གི། མདའ་འཕངས་ནས་དཔའ་དར་འཐེན་ས་ཡོད་ནས་ཟེར་གི། ཞེས་བཤད་ལ། ཐང་ཡིག་ལས་ཀྱང་། བཙན་པོ་འཕྱོངས་ལུང་ངམ་སྐྱིད་ལུང་དུ་བཞུགས། ལྕགས་རི་བྲང་ས་མཆིས་ཀྱང་གནས་རྟེན་གུར་དུ་འཆའ། གུར་ལ་ཕོ་བྲང་དུ་འབོད་ཅིང་། ནང་ལ་མི་བརྒྱ་ཕྲག་འགའ་ཤོང་། དམག་མིས་བྱ་ར་བྱེད་པས་ཕོ་བྲང་རྟེན་བཙན། འཁོར་རྣམས་སྦྲ་གུར་དུ་སྡོད། ཅེས་གསུངས་པ་དང་། ཡང་། མགར་སྟོང་བཙན་གྱིས་རྒྱ་བོད་ཀྱི་སོ་མཚམས་མཚོ་སྔོན་པོའི་ཕྱོགས་ནས་སྒར་ཆེན་བབས་དུས་ཀྱང་། སྦྲ་ནག་ཀ་བརྒྱ་མ་ཕིབ་ཏེ་བཞུགས་པས། དེང་སང་ཡང་། ས་དེའི་བོད་མི་རྣམས་ཀྱིས་དྲན་གསོའི་ཆེད་དུ་སྦྲ་ནག་ཀ་བརྒྱ་མ་བཞེངས་ནས་འགྲེམས་སྟོན་བྱེད་པ་དང་།
དེར་མ་ཟད། སྔོན་དུས་སུ་ཨ་མདོའི་འབྲོག་པ་ཚོར་མི་སྟོང་ཕྲག་ཤོང་ཞིང་། རུ་སྤོར་གྱི་ཚེ་ན་སྦྲ་རྒན་མཛོ་གཡག་མང་བོ་འགེལ་དགོས་པའང་ཡོད་པར་བཤད། འདིའི་རྒྱུ་ནི་འབྲི་གཡག་གི་རྩིད་པ་ཤ་སྟག་ཡིན་པས། ཞིབ་ཚགས་ལྡན་ཞིང་དུ་ཞགས་བསྒོས་ཡོད་ལ། ཁ་དཔེར་ཡང་། སྦྲ་ནག་དུད་པ་ཅན། །སླ་ང་དྲེག་པ་ཅན། །ཟེར་ལ། ལྷག་པར་དུ། གླིང་སྒྲུང་ལས། སྦྲ་འདི་གཡུ་སྦྲ་མཐིང་ཤོག་རེད། །སྟེང་གི་ལྷ་མོ་སུམ་ཅུས་བཀལ། །ཕྲ་སྦོམ་ཙམ་ཡང་ཡོད་ལེ་མིན། །འོག་གི་ཀླུ་མོ་སུམ་ཅུས་བརྒྱུས། །འགྱུར་ཚག་ཙམ་ཡང་ཡོད་ལེ་མིན། །བར་གྱི་གཉན་མོ་སུམ་ཅུས་འཐག །ཐགས་སྐུད་ནོར་ཙམ་ཡོད་ལེ་མིན། །ཅེས་རྟོག་བཏགས་ཀྱི་ཐབས་ལ་བརྟེན་ནས་རེ་ལྡེའི་ཕྲ་སྦོམ་དང་། ཞིབ་ཚགས། ལྷས་སྟངས་སོགས་ཞིབ་བརྗོད་བྱས་ཡོད་པ་ལྟར། དགུན་ཁ་ཆར་བུ་ཡུག་དང་། དབྱར་ཚ་གདུགས་ཡང་འགོག་ཐུབ་པའི་ཁྱད་ཆོས་ལྡན་པས། བོད་ཀྱི་དམངས་གླུ་ལས་ཀྱང་། སྦྲ་མཐིང་སྨུག་ཡན་ན་དྲིན་ཆེན་མེད། །དབྱར་ཟླ་གསུམ་ལ་ཆར་བ་བཀག །དགུན་ཟླ་གསུམ་ལ་ཁངས་སྐྱ་བཀག །དྲིན་ལན་བསབ་པའི་ར་བདག་དཀའ། །ཞེས་ཟེར་བ་དང་། ད་དུང་། མགོ་སྦྲ་ནག་པོའི་ནང་འཛིན། ཁྲ་ཁྲ་ཕྱུགས་ཀྱི་འགོ་རྫི། ཞེས་སྦྲ་འཛིན་མཁན་དེ་ངོ་སོ་བསྟད་ཡོད། གཞན་ཡང་། ཕིབ་བདེ་དང་འཁྱེར་བདེ། ས་འགུལ་སོགས་ཀྱིས་མི་གནོད་པའི་ཁྱད་ཆོས་ལྡན་པར་མ་ཟད།
སྦྲ་གུར་ཕུབ་དུས་ས་དཔྱད་ལའང་གཞིགས་ན། ཤར་ཕྱེ་ལྷོ་སྤུངས་ནུབ་འདན་པ། །བྱང་ནི་ཡོལ་བ་འཐེན་འདྲ་བཟང་། །ཞེས་ཤར་ཕྱོགས་ན་གཞུང་ཆེ་བ། ལྷོ་ཕྱོགས་རི་ཚོགས་སྟུག་ཅིང་ཆུ་བོ་གཡས་བསྐོར་དུ་འབབ་པ། རྒྱབ་རི་ལྷུན་སྟུག་ལ་ལྷགས་རླུང་ཐལ་རྡུལ་འགོག་པ། བྱང་དུ་རི་རྒྱུད་མ་ཆད་ཅིང་འགྲུལ་ལམ་སོགས་ཀྱིས་མ་བཅད་པ་སྟེ་ས་སྲུང་བཞི་ཚང་བར་ཡང་བཤད་དོ། །སྦྲ་འདི་བོད་བཙན་པོའི་སྐབས་སུ་འང་སྤྱོད་སྒོ་ཆེ་སྟེ། ཐང་ཡིག་ལས། གྲུ་གུ་ཡུལ་གྱི་ཨོང་དུ་ནམ་ཆད་དུ། བོད་ཀྱི་དམག་དཔུང་སྦྲ་ནག་ཕིབ་ནས་ནི། ཞེས་མཐའ་མཚམས་སྲུང་བའི་བོད་དམག་གིས་ཀྱང་སྦྲ་ནག་ཕིབ་པའི་ལོ་རྒྱུས་ཡོད། དེ་བས་སྦྲ་ནག་གིས་བོད་ཀྱི་འཚོ་བའི་ཁྲོད་གོ་གནས་ཆེན་པོ་ཟིན་ཡོད་པས། ཆེ་བསྟོད་ཡང་མང་བོ་བྱས་ཡོད་། དཔེར་ན། གེ་སར་སྒྲུང་ལས། སྐྱིད་ཀྱི་གཡུ་སྦྲ་གོང་དགུ་ཡོད། །ཕོ་ལུང་ཐམས་ཅད་གསེར་ལུང་རེད། །མོ་ལུང་ཐམས་ཅད་དངུལ་ལུང་རེད། །ཆ་རུ་ཐམས་ཅད་དུང་སྒྲོག་རེད། །ངོ་ཐིག་ཐམས་ཅད་མུ་ཏིག་རེད། །རིན་པོ་ཆེ་ཡི་དོ་ཆ་ཡོད། །རྨང་ནག་གོས་ཀྱི་དོ་ཕྱར་ཡོད། །གླིང་ཕ་ཆོས་དུམ་པ་བཅུ་གཉིས་ཡོད། །གསེར་སེར་བོའི་ཐར་མདོ་དགུ་བརྒྱ་ཡོད། །དངུལ་དཀར་བོའི་མ་ཎི་བཀའ་འབུམ་ཡོད། །བྱུ་རུའི་ཚེ་དཔག་མེད་མགོན་ཡོད། །གཡུ་ཡི་སྒྲོལ་མ་རང་བྱོན་ཡོད། །ཕུག་ཆོན་དབུས་གཙང་ཡུལ་ལ་འཐེན། །དཀྱིལ་ཆོན་སྐུ་རྒྱལ་བོད་ལ་འཐེན། །སྒོ་ཆོན་རྒྱ་ནག་ཡུལ་ལ་འཐེན། །ཞེས་སོ། །
༢ ཁྱུང་ཆེན་དབྱིབས་ཀྱི་སྦྲ་ནག་གིས་གནོད་འཚེ་ཁོག་པ། ཁྱུང་ཆེན་འདི་བོན་གཞུང་དང་ནང་བསྟན་གཉིས་ཆར་ནས་སྦྲུལ་གདུག་ཀླུ་ཡི་ཁ་གནོན་དུ་གསུངས་ཡོད་པ་ལས་གཞན། གསོ་རིག་ལས་ཀྱང་། ཁྱུང་ལྔས་མཛེ་རིགས་བཅོ་བརྒྱད་སོགས་ཀླུ་ཡི་དུག་ནད་འཇོམས་ནུས་པ་བཤད་ཡོད། དེ་བས་ཁ་དཔེར་ཡང་། སྦྲ་རོག་རོག་ཅན་ལ་མཛེ་མི་འབྱུང། །ཁང་སྐྱ་ལེབ་ཅན་ལ་ཐོག་མི་འཕེན། །ཟེར་བ་ཡིན། ཁྱུང་ཆེན་ནི་ཀླུ་གདོལ་བ་སོགས་ཀྱི་གཉེན་པོར་གྱུར་བའི་ཆ་ནས་བཤད་པ་ཡིན་ཏེ། བདུད་འདུལ་ལས། བྱ་ཁྱུང་ཆེན་དམར་བོ་མཁའ་ལྡིང་གིས། །ཀླུ་གདོལ་བ་ནག་པོ་ཁམ་བཟས་བྱེད། །ཅེས་དང་། མོན་གླིང་གཡུལ་འགྱེད་ལས། རི་རྩེ་རྒྱལ་སྨུག་པོའི་རི་སུལ་ནས། །སྦྲུལ་དུག་ཆེན་ཟེར་བའི་གཡེར་པོ་ཆེ། །རི་རྩེ་རྒྱལ་རྩེ་ལ་དཀྲིས་གཅིག་བརྒྱབ། །མཐོང་ཚད་དུག་གིས་འཆི་བས་ཟེར། །དབུས་རི་རབ་རི་ཡི་རྩེ་མོ་ནས། །ཁྱུང་མཁའ་ལྡིང་ཟེར་བའི་སྟོབས་པོ་ཆེས། །ལུས་འགྱུར་གཅིག་གོང་ནས་གནམ་ལ་འཁྱེར། །ལུས་འཇིག་པ་སྡོང་དུམ་བཞིན་དུ་འཕངས། །མཆུ་རྭ་ཟོར་ཀླུ་བདུད་ཟ་བའི་གཤེད། །དུག་ཧ་ལ་ཟེར་བ་རྫུན་དུ་གདའ། །ཞེས་སོགས་ཁྱུང་ནི་ཀླུ་གདོན་གྱི་གཉེན་པོར་གྱུར་བ་སྒྲུང་གཞན་དུའང་མང་དུ་བསྟན་ཡོད་པ་དང་།
གསོ་རིག་ལས་བྱ་ཁྱུང་ལྔ་བའི་རིལ་བུ་ཀླུ་ནད་ཀྱི་གཉེན་པོར་འགྲོ་ཚུལ་གྱི་ལོ་རྒྱུས་ཞིག་ལ། བཻ་སྔོན་དུ། སྔོན་རྒྱལ་བོ་སིང་ག་པ་ལའི་ཡུལ་དུ་ཀླུ་གཉན་ས་བདག་གི་ནད་གདོན་སྣ་ཚོགས་བྱུང་བ་ལ། དེའི་གཉེན་པོ་ཡེ་ཤེས་ཀྱི་ཁྱུང་ལྔ་བྱུང་སྟེ། དེ་མཐོང་ཐོས་དྲན་རེག་ཐམས་ཅད་ནད་གདོན་ལས་གྲོལ་ལོ། །རིང་ཞིག་ནས་ཁྱུང་དེ་མྱ་ངན་ལས་འདའ་བར་བརྩམས་པ་ན། མི་རྣམས་ཀྱིས། ཀྱེ། ནམ་མཁའ་ལྡིང་ཁྱེད་འདས་ན་བདག་ཅག་གིས་ཇི་ལྟར་བྱ། །ཞེས་སྨྲས་པ་ལས། ཁྱུང་དེས་ང་འདས་ནས་ལུས་འདི་རིལ་བུ་དྲིལ་ནས་བསྟེན་ན། ནད་གདོན་ལས་གྲོལ་བར་འགྱུར་རོ། །དེ་ཡང་ཟད་ན་མི་རུང་བས་བདག་གི་རྫས་ལ་བྱིན་གྱིས་བརླབས་པར་བྱའོ། །ཞེས་ཨ་རུ་ར་ཤ་རུ་བྱིན་གྱིས་བརླབས། དེ་བཞིན་དུ་རུ་རྟ་རུས་པར། ཤུ་དག་རྒྱུས་པར། སྨན་ཆེན་སྙིང་དང་། གླ་རྩི་ཁྲག་ཏུ་བྱིན་གྱིས་བརླབས་པ་ལས་དེང་སང་བྱ་ཁྱུང་རྣམ་ལྔ་ཞེས་གྲགས། ཞེས་གསུངས་ལ། དེ་བས་གསོ་རིག་འབུམ་བཞི་ལས་ཀྱང་། མ་རུངས་ཀླུ་གདོན་འདུལ་བྱེད་ཀ་རུ་ཀ། ཀླུ་གདོན་འདུལ་བྱེད་ཁྲོ་ཁྱུང་ནག་པོ་ཡིན། །བསྙེན་བསྒྲུབས་སྔགས་བཟླས་ཀླུ་ཡི་དུག་འཇོམས་རྣམས། །ཞེས་གསུངས་སོ། །ཁྱུང་ལྔས་མཛེ་སོགས་གཉན་ནད་འཇོམས་ཚུལ་ཡང་། མན་ངག་བཀའ་བརྒྱ་མ་ལས། དེ་ལྟར་བྱས་པའི་རིལ་བུ་དེ། །རེ་རེས་ཀྱང་ནི་ཀླུ་གཉན་དང་། །ས་བདག་གྲོང་ཁྱེར་ཐམས་ཅད་ཀུན། །རྩྭ་ཕུང་མེ་འབར་བཞིན་བྱེད་དོ། །མདོར་ན་འདི་ཡིས་ཕན་ཡོན་ནི། །མཛེ་ནད་འཇོམས་པའི་འཁོར་ལོ་ཡིན། །གག་ལྷོག་གསོ་བའི་བདུད་རྩི་ཡིན། །གཉན་རིགས་སྲུང་བའི་ཆོ་ག་ཡིན། །འགོ་གདོན་བསྲེག་པའི་མེ་དཔུང་ཡིན། །ཞེས་པ་འདི་དག་གི་རྩ་དོན་གཅིག་ཏུ་དྲིལ་ན་ཁྱུང་ཆེན་འདི་ཀླུ་དང་གཉན་ནད་ཀྱི་གཉེན་པོར་འགྲོ་བ་བཞིན། རང་ཅག་གི་མེས་པོ་རྣམས་ཀྱིས་རྟེན་འབྲེལ་གྱི་ཆོས་ཉིད་ལ་དགོངས་ནས་ཀླུ་གདོལ་སོགས་ཀྱི་གཉེན་པོར་མགོ་སྦྲ་ཁྱུང་ཆེན་དབྱིབས་ཀྱི་བཟོ་ལུགས་འདི་དར་སྤེལ་བཏང་བ་ཡིན་ནོ། །
༣ རུས་སྦལ་དབྱིབས་ཀྱི་སྦྲ་ནག་ཀླུ་གཉན་ས་བདག་གི་གཉེན་པོར་འགྱུར་ཚུལ། བོད་ཀྱི་སྦྲའི་དབྱིབས་རུས་སྦལ་གྱི་རྣམ་པར་བཟོ་བ་འདི་ཡང་། ས་བཅུད་འཕེལ་བ་དང་ས་དགྲའི་གཉེན་པོར་འགྱུར་ཚུལ་གཞུང་ལུགས་སུ་མ་ཟད། དམངས་ཁྲོད་ཀྱི་ངག་རྒྱུན་དང་གླུ་གཞས་ཚུན་ནའང་ཡོད་དེ། དཔེར་ན། རུས་སྦལ་གྱི་དྲིས་གླུ་ལས། ས་མར་ལ་གནོན་པའི་རུས་སྦལ་རེད། །ཅེས་དང་། ཡང་། རུས་སྦལ་གྱི་འདུག་སྟངས་ལས་འབྱུང་བ་བཞི་སྙོམས་སྒྲིག་བྱས་ལུགས་ཀྱང་། དམངས་གླུ་ལས། རུས་སྦལ་མགོ་བོ་ཤར་ལ་གཏད། །ཤར་མེ་ཁམས་རྒྱལ་བོ་བདེ་བའི་རྟགས། །རུས་སྦལ་གཞོགས་གཡས་ལྷོ་ལ་གཏད། །ལྷོ་ཤིང་ཁམས་རྒྱལ་བོ་བདེ་བའི་རྟགས། །རུས་སྦལ་གཞོགས་གཡོན་ནུབ་ལ་གཏད། །ནུབ་རླུང་ཁམས་རྒྱལ་བོ་བདེ་བའི་རྟགས། །རུས་སྦལ་མཇུག་མ་བྱང་ལ་གཏད། །བྱང་ཆུ་ཁམས་རྒྱལ་བོ་བདེ་བའི་རྟགས། །ཞེས་བཤད་ཡོད་པ་དང་། ཁྱད་པར་དུ་ནག་རྩིས་ཀྱི་གཞུང་ལས་འབྱུང་བཞི་སྤར་སྨེ་གཟའ་སྐར་ལོ་སྐོར་བཅུ་གཉིས་སོགས་རུས་སྦལ་གྱི་ལྟོ་བར་བཀོད་དེ་བརྩི་སྲོལ་ཡོད་པའི་རིག་གནས་འདིས། རུས་སྦལ་གྱི་སྟེང་དུ་དེ་དག་སྙོམས་སྒྲིག་གི་རྟེན་འབྲེལ་ཚང་བ་དང་། མཐུན་གྲུབ་ཏུ་བཟོ་བའི་ཁྱད་ནུས་ལྡན་པ་རྟོགས་ཐུབ་པས། དེ་ཡོད་ན་ཀླུ་གཉན་ས་བདག་གི་གནོད་པའི་ནད་རིགས་མང་བོ་སེལ་ཐུབ་པ་ཆོས་ཉིད་ལྟ་བུར་ཆགས་ཡོད།
དེ་ལས་གཞན། གསོ་རིག་ལས་གདོན་ནད་གསོ་བའི་སྐབས་སུ། ཡི་དམ་གྱི་སྙིང་བོ་གསེར་གྱིས་བྲིས་པ་རུས་སྦལ་གྱི་ཁོག་པར་བཅུག་ནས་ལུས་ལ་བཅངས་ན་ཕྱོགས་ངན་ཐུབ་པར་གསུངས་ཡོད། བདུད་རྩི་སྨན་གྱི་འཁྲུངས་དཔེ་ལེགས་བཤད་ནོར་བུའི་ཕྲེང་མཛེས་ལས་ཀྱང་། རུས་སྦལ་གྱི་ཤས་གཉན་རིམས་དང་མཛེ་ནད་སེལ། སྙིང་གིས་མགོ་རྨ་གསོ་བར་བྱེད། ཕྱི་སྒྲོམ་གྱིས་གདོན་ནད་དང་འདྲེ་ཤིག་སྲུང་བར་བྱེད། ཅེས་སོགས་གསུངས་ཡོད་པ་འདི་དག་གིས། རུས་སྦལ་ནི་ཤི་གསོན་གང་གི་ཚེ་ཡང་གཉན་རིམས་སོགས་ཀྱི་དངོས་གཉེན་དུ་འགྲོ་བ་གདོན་མི་ཟ་བས། རུས་སྦལ་དབྱིབས་ཅན་གྱི་སྦྲ་ནག་ཕིབ་སྟེ། རང་ཅག་གི་མེས་པོ་གོང་མ་རྣམས་ཀྱིས། སྦྲ་རོག་རོག་ཅན་ལ་མཛེ་མི་འབྱུང་། ཞེས་སྡོམ་ཚིག་བཀོད་ཡོད་པ་དང། ལྷག་པར་དུ་རོང་བའི་དུད་ཁྱིམ་ལྟ་བུར་མཚོན་ན་གཏན་སྡོད་ཡིན་པས། ས་དཔྱད་ལ་གཞིགས་ཏེ་མཁར་ལས་གནང་ཆོག་ན་ཡང་། འབྲོག་པ་ནི་རྩྭ་སའི་དགོས་མཁོ་ལྟར། རུ་བ་སྐྱས་འདེགས་མང་དུ་གནང་དགོས་པར་བརྟེན། གདོད་མའི་བོད་མི་རྣམས་ཀྱིས། ཀླུ་གཉན་ས་བདག་ལས་འཕྲོས་པའི་གདུག་པ་མཛེ་ནད་དང་། ཞ་སྐུམ་ཆུ་རྒྱུས་ཀྱི་ནད་དང་། ཆུ་སེར་གྱི་ནད་ཡམས་སོགས་ཀྱིས་མི་ལ་ན་ཚ་དང་། ཕྱུགས་ལ་གོད་ཁ་འགོག་ཆེད་ཁྱུང་དང་རུས་སྦལ་དབྱིབས་ཀྱི་སྦྲ་ནག་འདི་དར་སྤེལ་བཏང་བ་ཡིན་ནོ། །
ཡང་། བཤད་ཚུལ་གཞན་ཞིག་ལ། སྦྲ་ནག་འདི་བོད་བཙན་པོའི་སྐབས་ཀྱི་དམག་སྒར་ཡིན་པས་ཆེད་དུ་དུག་སྡོམ་ཀྱི་དབྱིབས་ལྟར་བཟོས་པར་བཤད་ལ། རྒྱུ་མཚན་ནི། དུག་སྡོམ་ནི་འབུ་སྲིན་གཞན་དག་དང་འཕྲད་ཚེ་ཚར་གཅོད་ཀྱི་ནུས་པ་ལྡན་པས་ཡིན། ཞེས་ཀྱང་ཟེར་རོ། །
༤ རྩིས་གཞུང་གི་མཚོན་ལྟར་སྦྲ་ནག་གི་གྲུབ་ཆ་བཟོས་པ། སྦྲ་ནག་གི་གྲུབ་ཆ་རེ་རེས་སྤར་ཁ་བརྒྱད་དང་སྨེ་བ་དགུ ལོ་སྐོར་བཅུ་གཉིས་སོགས་མཚོན་བྱེད་དུ་དམིགས་ནས་བཟོས་ཡོད་པས། ས་ཆུ་ལ་བརྟག་མི་དགོས་པ་དང་དགྲ་གནོན་གྱི་ནུས་པ་ལྡན། དཔེར་ན། སྦྲའི་ཕྱི་རོལ་གྱི་ཟུར་བཞིར་ཆོན་ཐག་བཞི་དང་། སྦྲའི་སྐེད་དམ་མཁལ་གཉིས་ཀར་ཆོན་ཐག་རེ། སྒོ་ཆོན་གཉིས་དང་ཕུག་ཆོན་གཅིག་སྟེ་བསྡོམས་པས་ཆོན་ཐག་དགུས་སྨེ་བ་དགུ་མཚོན་པ་དང་། དེ་དག་བཀར་བྱེད་ཀྱི་ཀ་བའང་དགུ་ཡོད་པས་སྨེ་བ་དགུ་མཚོན། སྦྲ་འདབས་ཀྱི་ཕུར་བ་ཉེར་བརྒྱད་ཀྱིས་རྒྱུ་སྐར་ཉེར་བརྒྱད་ཀྱི་དོད་དང་། ཕུར་སྣེ་གཞོག་དུས་ཀྱང་སྔགས་མཁན་གྱི་ཕུར་བུའི་དབྱིབས་ལྟར་བྱ་དགོས། དེ་ནི་ས་དགྲ་མནོན་ཞིང་གཞིས་ཁྱིམ་སྲུང་བའི་རྟེན་འབྲེལ་དུ་བཤད། སྦྲ་ནག་གྲུ་བཞིའི་ཆོན་ཐག་གམ་ཁ་ཐིག་ལ་དུས་ཚིགས་བཞིའི་མཚོན་རྟགས་དང་། སྦྲའི་ཁ་ཚུབ་རེ་ལྡེ་དཀར་བོས་བྱས་ཡོད་པས་གདོན་འདྲེ་དང་གཟའ་བཙན་སོགས་འགོག་པའི་རྟེན་འབྲེལ་དང་། གཞིས་ཁྱིམ་གྱི་ཁ་རྗེ་དབང་ཐང་དང་ཀླུང་རྟ་དགུ་ཚིགས་བཞིན་ཡུན་རིང་རྟག་བརྟན་ཡོང་བ་དང་། ཕུགས་ཀྱི་ཁ་ཚུབ་རྒྱུན་དུ་མི་ཕྱེ་བ་ཡང་། འགོ་བའི་ལྷ་ལྔ་དང་ཕུགས་ལྷ་སོགས་ཁྱིམ་དེར་མི་འབྲལ་བའི་རྟེན་འབྲེལ་ཏེ། ཁ་དཔེར་ཡང་། ཕུགས་ཀྱི་ལྷ་མ་བདེ་ན། །ཁྱིམ་གྱི་མི་མི་བདེ། །ཟེར་བ་དང་། གཞོགས་གཉིས་སྦྲེལ་བྱེད་ཕོ་ལུང་མོ་ལུང་གཉིས་ཀྱིས་བཟའ་ཟླ་མཐུན་འཇུག་དང་བརྩེ་སེམས་རྟག་བརྟན་ཡོང་བ་མཚོན་ནོ། །ཡང་། ཁ་ཆར་འབབ་ཞོད་ཧ་ཅང་ཆེ་དུས་མ་གཏོགས་སྦྲའི་ཁ་ཚུབ་ཡོངས་རྫོགས་མི་བསུམ་ལ། ཐམས་ཅད་སུམ་ཚེ། རྒན་རྒོན་དག གུང་ནག་མ་བྱེད། དམུ་གབ་ཡོང་ཞེས་ཀྱང་ཟེར། མོ་སྦྲའི་ཕྱོགས་སུ་ཤ་དམར་རྗེན་འཁྱེར་ན་གུང་ལྷ་འཁྲུགས་ཟེར། ཕྱི་རོལ་གྱི་ཆོན་ཐག་དགུའི་ཐོག་ཏུ་དར་ལྕོག་འདོགས་སྲོལ་ཡོད་པ་དང་། ད་དུང་། ཇག་རྒོད་ཀྱི་ཁྱིམ་ཚང་ལ་ལས་བང་ཁ་ནས་མདུང་མོ་བསླངས་ཏེ་ཁ་ཚུབ་ལས་ཕྱིར་བུད་ཡོད། སྦྲའི་ཕུག་ཆོན་སྲུང་མའི་རྟེན་ཡིན་པས་ལྷ་བསང་གཏོང་ས་དང་། དཀྱིལ་ཆོན་ཕྱུགས་རྟེན་ཡིན་པས་བལ་འགེལ་བ་དང་། སྒོ་ཆོན་འཁོར་བའི་རྟེན་ཡིན་པས་བག་གསར་གྱི་རྟ་འདོགས་སྲོལ་ཡོད་དོ། །
སྦྲ་ནག་ནང་གི་མཚོན་དོན་ནི། ནང་ངོས་ན་ངོ་ཐིག་བཅུ་གཉིས་ཡོད་པས་ལོ་སྐོར་ཟླ་བ་བཅུ་གཉིས་དང་། སྦྲའི་ནང་བཀར་བྱེད་ཀྱི་ཀ་བ་བརྒྱད་ཡོད་པས་སྤར་ཁ་བརྒྱད་དང་། ཡས་ཕུག་གི་ཀ་བ་ཤིང་སྟག་པ་ཡིན་པ། ཕུག་རྟག་དགོས་ཞེས་ཁྱིམ་མིའི་སྐུ་ཚེ་ཡུན་རིང་རྟག་པ་དང་། སྒོ་ཁའི་ཀ་བ་ཤུག་པ་ཡིན་པས། སྒོ་ཕྱུག་དགོས་ཞེས་རྒྱུ་ནོར་གྱི་འཕེལ་ཁ་དར་ནས་ཁྱིམ་ཚང་ཕྱུག་པོར་ཡོང་བ་སོགས་ཀྱི་རྟེན་འབྲེལ་ཡོད་དོ། །