[༤༢] ཉག་བླ་པདྨ་བདུད་འདུལ།
གྲུབ་དབང་བཞི་པ་མི་འགྱུར་ནམ་མཁའི་རྡོ་རྗེ་དང་མདོ་མཁྱེན་བརྩེ་སྐྱེས་བུ་ཡེ་ཤེས་རྡོ་རྗེ་རྣམ་གཉིས་ཀྱི་ཞལ་སློབ་ཉག་བླ་པདྨ་བདུད་འདུལ་ནི། ཇི་སྐད་དུ། ཨོ་རྒྱན་སངས་རྒྱས་གླིང་པའི་གནས་ཆེན་དཀར་ཆག་ཏུ། གངས་ཅན་ཞིང་ཁམས་གནས་ཀུན་པདྨའི་ཚལ༔ ལྷང་ལྷང་གནས་འདི་ཨུ་དུམ་ཝཱ་ར་བཞིན༔ འདི་འདྲའི་གནས་ཆེན་ཞིང་ཁམས་ལེགས་པ་ན༔ ཐུགས་རྗེ་བྱིན་རླབས་ཤིན་ཏུ་ཆེ་བ་སྟེ༔ མཆོག་ཐུན་གྲུབ་པ་བརྙེས་པའི་གནས་ཆེན་ཡིན༔ ཞེས་དང་། རྗེ་ཉིད་ཀྱི་ལུང་བྱང་ལས། ངོ་མཚར་ལྷོ་གླིང་གངས་ཅན་ཤར་གྱི་ཕྱོགས༔ སྦས་ཡུལ་རོང་ཆེན་འབོར་ར་སྒང་གཉིས་པར༔ ཤེལ་བྲག་དུང་མདོག་ནམ་མཁའི་དབྱིངས་སུ་ཟུག༔ རལ་གྲི་བྲག་གམ་གནམ་རྫོང་བྲག་དཀར་རམ༔ ཁྱད་པར་ལྷང་ལྷང་ནོར་བུའི་ཡང་རྩེར་གྲགས༔ ཡེ་ཤེས་ལྷ་ཚོགས་བསམ་གྱིས་མི་ཁྱབ་བཞུགས༔ རིག་གསུམ་མགོན་དང་སངས་རྒྱས་གཉིས་པ་སོགས༔ རིག་འཛིན་གྲུབ་ཐོབ་གྲངས་མེད་བྱོན་པའི་གནས༔ གྲུབ་རྟགས་རྣམ་པ་སྣ་ཚོགས་གྲངས་ལས་འདས༔ མཐོང་ཐོས་དྲན་རེག་ས་ལམ་ཡོན་ཏན་རྫོགས༔ འཇའ་ལུས་མཁའ་སྤྱོད་ལ་སོགས་གྲུབ་པ་བརྙེས༔ ཞེས་སོགས་རྒྱ་ཆེར་བསྔགས་པའི་གནས་ཆེན་ཉག་ལྷང་བྲག་གི་ཉེ་ཞོལ་དུ། ཡབ་སྟག་བླའི་བརྒྱུད་པ་ལས་བྱུང་བའི་རིགས་རུས་ཕུན་ཚོགས་ཀྱིས་ཕྱུག་པ་ཁང་བརྩེགས་མགོན་པོ་དང་སྐྱེད་ཡུམ་བསོད་ནམས་སྐྱིད་ཅེས་པའི་ཁྱིམ་དུ་སྐུ་བལྟམས་པ་སྟེ། ཐོག་མར་ལྷུམས་སུ་ཞུགས་པའི་ཚེ་མ་ཡུམ་གྱི་སྤྱི་གཙུག་ཏུ་ཉི་མ་རབ་ཏུ་འབར་བ་ཞིག་ཐིམ་པར་རྨིས་པ་དང་། ཕ་ཡབ་ཀྱིས་མནལ་ལམ་དུ་རང་གི་པང་དུ་ཤེལ་གྱི་མཆོད་རྟེན་དྭངས་གསལ་ཤིན་ཏུ་མཛེས་པ་ཞིག་བབ། དེ་ལ་ཉི་ཟེར་ཕོག་པས་ཕྱོགས་བཅུའི་ཁམས་ཁྱབ་པ་སོགས་ངོ་མཚར་བའི་རྨི་ལྟས་དང་བཅས་སྤྱི་ལོ༡༨༡༦པ་སྟེ་མེ་ཕོ་བྱི་བའི་ལོའི་ཟླ་བ་དགུ་པའི་ཚེས་བཅུའི་ཉིན་སྐུ་འཁྲུངས། དུས་དེར་གཟིམས་སྦྲ་ལ་འཇའ་ཚོན་སྣ་ལྔ་ཟུག་ཅིང་དྲི་ཞིམ་པོས་ཕྱོགས་ཀུན་ཁྱབ། ཞག་གསུམ་གྱི་ནང་པར་སྐུ་དཀྱིལ་མོ་ཀྲུང་གིས་བཞུགས་སྟེ་ཞལ་ནས་ཨཱ་མི་དཱེ་ཝ་ལན་གསུམ་དང་། ང་ཨོ་རྒྱན་ཐུགས་ཀྱི་སྤྲུལ་པ་ཡིན་ནོ་ཞེས་གསུངས་བྱོན། དེ་ནས་ཞག་དྲུག་གི་དུས་སུ་ལྕགས་མདུད་བླ་མ་རྣམ་དག་ཞེས་པ་དྲངས་ནས་བྱིན་རླབས་མཛད་སྐབས་སྐུའི་རྣམ་འགྱུར་གར་སྟབས་ལིང་ལིང་མཛད་ཅིང་། ཞལ་ནས་སིདྡྷི་ལན་བདུན་གསུངས། བླ་མས་འདི་སྤྲུལ་པའི་སྐུ་འཁྲུལ་བྲལ་ཞིག་ཡིན་འདུག་གསུངས་ནས་དད་སྤྲོ་དཔག་མེད་མཛད། དེ་ནས་བདུན་ཕྲག་གསུམ་འདས་པའི་ཚེ་ཀཿཐོག་ཞིང་སྤྲུལ་རིན་པོ་ཆེ་རིག་འཛིན་འཇིགས་མེད་མགོན་པོ་ཉག་ཡུལ་དུ་བྱོན་སྐབས་དང་འགྲིགས་པས་གདན་དྲངས་ཏེ་དབང་བསྐུར་བྱིན་རླབས་ཞུས་ཚེ། གཞོན་ནུ་གསེར་བུམ་ཁྲི་གདུགས་མངའ་དབང་ཅན༔ སྨིན་གྲོལ་བདུད་རྩི་སྦྱིན་ནུས་བཅུད་གཏེར་འཁྱིལ༔ ཞེས་པ་སོགས་ལུང་བསྟན་ཡི་གེར་བཀོད་ནས་གནང་ངོ་། །དེ་ནས་ཟླ་བ་དགུ་བཞེས་པའི་ཚེ་ཁུ་བོ་བླ་མ་ཀུན་བཟང་གིས། ཚ་བོ་འདི་བླ་མ་བཟང་པོ་ཞིག་འོང་གསུངས་ཤིང་ཕྱག་གིས་རྡོར་དྲིལ་གཏད་ཚུལ་མཛད་པས་དགའ་ཞིང་སྤྲོ་བའི་ངང་ནས་ཚུར་ལེན་ཚུལ་མཛད། ཁུ་བོ་བླ་མས་བཀྲ་ཤིས་དོན་འགྲུབ་ཅེས་མཚན་གསོལ་ཏོ། །དགུང་ལོ་གཉིས་བཞེས་པའི་དུས་སུ་གནས་ཆེན་ནོར་བུའི་བྲག་གི་མདུན་ཞོལ་ཐང་བཟང་ཞེས་པ་རུ་ཡབ་ཁྱིམ་ཡོད་སྐབས། གནས་འདིའི་གནས་བདག་ཡིན་ཟེར་བའི་མི་དཀར་དར་གྱི་ལ་ཐོད་ཅན་སོགས་དཔའ་བོ་དཔའ་མོ་མང་པོ་བྱོན་ནས་རྩེད་གྲོགས་བྱེད་པ་ལན་འགའ་བྱུང་། ཡང་སྐབས་ཤིག་ཡབ་ཡུམ་དང་བཅས་པ་གནས་ཆེན་བསྐོར་བ་དང་བསང་མཆོད་གཏོང་བར་བྱོན་ཚེ་གནས་མདུན་གཏེར་མཛོད་ཐང་ནས་དཔའ་བོ་དཔའ་མོ་སྟོང་ཕྲག་མང་པོས་བསུ་བར་མཛད་པ་གཟིགས་ཤིང་། གཞན་རྣམས་ལ་འདི་ལྟར་བྱོན་ནོ་གསུངས་ཏེ་ཕྱག་གི་མཛུབ་མོས་བསྟན་ཀྱང་མཐོང་བར་མ་གྱུར། མདོར་ན་སྐུ་གཞོན་ནུའི་དུས་སུ་རྩེད་མོ་གང་མཛད་དབང་བསྐུར་། ཆོས་འཆད། ལྷ་ཁང་བཞེངས་ཚུལ། བྲག་ཕུག་དང་ལྗོན་ཤིང་གང་ཡོད་ཀྱི་རྩར་མཉམ་པར་བཞག་ཚུལ་སོགས་བྱིས་པ་ཕལ་དང་གཏན་ནས་མི་འདྲ་བར་གྲགས། དེ་ནས་དགུང་ལོ་བདུན་པའི་དུས་བླ་མ་པདྨ་ཞེས་པའི་དྲུང་དུ་ཡི་གེ་བསླབ་ཏུ་བྱོན་པ་ན་ཐུགས་རིག་ཤིན་ཏུ་རྣོ་བས་སློབ་དཔོན་གྱིས་འགོ་སྨྲོས་པ་ཙམ་གྱིས་ཤེས་པ་བྱུང་ངོ་། །དགུང་ལོ་དགུ་བཞེས་པའི་དུས་སུ་ཁུ་བོ་སྟག་བླའི་གདན་ས་རུ་རྒྱལ་སྲས་རྡོ་རྗེ་ཆོས་དབང་གདན་དྲངས་ནས་དབང་ལུང་འགའ་ཞིག་གསན། རྒྱལ་སྲས་ཀྱིས་བན་ཆུང་ཁྱོད་ཀློང་གསལ་སྙིང་པོ་སོགས་དམ་པ་མང་པོའི་སྤྲུལ་པ་ཡིན་འདུག་པས་བསྟན་པ་དང་འགྲོ་བ་ལ་ཕན་ཐོགས་ཅན་ཞིག་འོང་གསུངས། དེ་ནས་རེ་ཤིག་ན་ཡབ་ཁང་བརྩེགས་མགོན་པོ་འཇིག་རྟེན་ཕྱི་མའི་ལྔ་ལམ་དུ་སོང་བས་དངོས་འབྱོར་ཕལ་མོ་ཆེ་དགེ་རྩ་ལ་བཏང། མ་ཡུམ་དང་གཅུང་ཆུང་བ་གཉིས་བཅས་ལུས་པ་ཕ་སྤུན་ཁུ་བོ་རྣམས་དགྲར་ལངས་སྟེ་ནོར་རྫས་ཁང་ས་དང་བཅས་པ་འཕྲོག་པས་དཀའ་སྡུག་སྣ་ཚོགས་པ་མྱོང་པ་རྗེ་མི་ལའི་རྣམ་ཐར་བཞིན་བྱུང་བ་སྟེ། སྐབས་དེར་ཉེ་འབྲེལ་འགའ་ཞིག་ནས་ར་མ་གཅིག་དང་། རྫ་མ། སྒྲོ་སྣོད། སྤར་བུ། སྡེར་མ་སོགས་བྱིན་པས་ཕན་ཐོགས་རྒྱ་ཆེར་བྱུང་། གྲུབ་རྗེས་དེ་དུས་ནས་འཁོར་བའི་རང་མཚང་སྒྱུ་མ་ལྟ་བུའི་ཆོས་སུ་གཟིགས་པས་ཐུགས་འགྱོད་ཁོང་ཁྲོ་མི་མཛད་པར་མ་ཡུམ་ལ་སེམས་གསོའི་མགུར་མང་པོ་བཞེངས། ཅུང་མ་འགོར་བར་སྐུ་མཆེད་འབྲིང་བ་དེའང་དུས་ལས་ཡོལ་ཞིང་གྲུབ་རྗེ་ཡང་སྐུ་འབྲུམ་གྱིས་བསྙུངས་པས་གྲོང་པའི་མི་རྣམས་ཀྱིས་རྒྱང་ཐག་རིང་པོ་ཞིག་ཏུ་ནད་གཡོག་རྒྱ་མཚོ་ཟེར་བ་དང་གཉིས་ཀ་བསྐྱལ། མ་ཡུམ་གྱིས་གསོལ་ཆས་ཅུད་ཟད་རེ་ཁྱེར་རྒྱུ་རྙེད་སྐབས་གྲུབ་རྗེའི་བཞུགས་གནས་དང་ཐག་རིང་བ་ཞིག་ཏུ་བཞག་ནས་བརྡ་རེ་བྱེད་ཅིང་སོང་། དེ་ནས་བསྙུན་གཞི་ཡར་དྭངས་སུ་སོང་ཡང་གསོལ་ཆས་རྣམས་ཟད་པས་རྩམ་པ་དང་ཡུངས་མ་བྲ་བོ་ཅུང་ཟད་བརྐུས་ནས་གསོལ་དགོས་བྱུང་། ཉིན་གཅིག་གྲུབ་རྗེ་ཉིད་ར་གཅིག་ཡོད་པའི་རྫི་བོ་ལ་བྱོན་པའི་ཚེ་ན་རྐུན་མ་གཉིས་ཀྱིས་སྤྱན་གཉིས་ཀྱི་ནང་དུ་ཐལ་བ་བླུགས་ཏེ་ར་མ་དང་ན་བཟའ་ཕྱར་བ་དབུ་ཞྭ་དང་བཅས་པ་འཕྲོག་ནས་སོང་། དེ་ནས་སྐུ་མཆེད་ཆུང་བ་ཨ་ལོད་ཟེར་བ་དེའང་མུ་གེའི་རྐྱེན་གྱིས་དུས་ལས་ཡོལ་སོང་བར་མ་ཡུམ་གྱིས་མྱ་ངན་ཆེན་པོ་བྱས་པར་མི་རྟག་པའི་རང་བཞིན་སྟོན་པའི་མགུར་མང་བཞེངས། སྐབས་ཤིག་འབོས་ཨ་བླ་ཚང་ཟེར་བས་ཆོས་ཚོགས་འཚོགས་པའི་གྲལ་དུ་བླ་གྲྭ་མང་མ་དང་མཉམ་དུ་བཞུགས་པ་ན། ཡོན་བདག་ཚང་གི་མི་གཅིག་བྱུང་ནས་སྤྲང་པོ་གནམ་བལྟས་ཁྱེད་འདིར་མ་འདུག་ཕྱི་རོལ་དུ་སོང་ཟེར་ནས་འདུག་མ་བཅུག གྲུབ་རྗེ་ཉིད་བཤུམས་ཤིང་བཤུམས་ཤིང་ཕྱིར་ལོག་ནས་ཕྱི་བལྟས་རེ་མཛད་ཅིང་སོང་བ་ཡིན་གསུངས། དེ་བཞིན་དུ་རྒྱ་ཤོད་བུ་ཀླུ་ཚང་དང་ཀླུ་ཕྱུག་ཚང་སོགས་ཡོན་བདག་མང་པོས་ཚོགས་གྲལ་དུ་མ་བཞག་ནས་ཕྱི་རོལ་དུ་དེད། ཡང་རེ་ཞིག་ན་ཡུལ་བ་སྤྱིའི་ཆོས་འཚོགས་སྐབས་བླ་གྲྭ་རྣམས་ཀྱིས་གསོལ་རྩམ་རང་རང་གིས་ཁྱེར་ནས་བྱོན་སྲོལ་ཡོད་པས། གྲུབ་རྗེ་ལ་གསོལ་རྩམ་མེད་ནས་ཨ་ཉུག་ཟེར་བ་དེའི་ཙམ་ཁུག་ནང་ནས་གསོལ་ཕོར་གསུམ་ཙམ་བརྐུས་པ་བདག་པོས་གོ་ནས་གྲུབ་རྗེ་ལ་ཁུ་ཚུར་འགའ་རེ་བསྣུན་རྗེས་རྐུ་འཇལ་དུ་འབུལ་བ་ཅི་ཡོད་སྦྱིན་དགོས་བྱུང་། ཡང་སྐབས་ཤིག་ལྕགས་མདུད་བླ་མ་རྣམ་དག་གིས་གཙོས་ཚོགས་པ་མང་པོ་ཆོས་འཚོགས་སུ་འདུས་པ་ན། བླ་མ་རྣམ་དག་གིས་གྲུབ་རྗེ་ཉིད་ཀྱང་འཚོགས་པའི་གྲལ་འདབས་ཙམ་ཞིག་ལ་བཞག་ཐབས་བྱེད་དགོས་དགོངས་ཏེ། ཚེ་དབང་དར་རྒྱས་ལ་གསུངས་ཀྱང་། ཅི་ནས་ཀྱང་འོང་མི་དགོས་ཟེར་ནས་ཞག་གཅིག་གི་བར་དུ་བྱོན་མ་བཅུག་སྟེ་སྤྲང་པོ་རྣམས་དང་ལྷན་ཅིག་ཏུ་བཞུགས། ཕྱི་ཉིན་ལྕགས་མདུད་བླ་མ་རྣམ་དག་གིས་ཁང་སྟེང་ནས་གཟིགས་པས་ཚེ་དབང་དར་རྒྱས་ལ། སྦྱིན་བདག་དད་པ་ཅན་ཁྱེད་རང་ཉོན་དང་། དེང་སང་སྒོ་རྩ་ན་བཞུགས་པའི་ཁང་བརྩེགས་ཚང་གི་བུ་ཆུང་འདི་སྐྱེས་ནས་ཞག་དྲུག་ལོན་པའི་ཚེ་ན། བདག་ཀྱང་དེར་ཕེབས་པ་དང་མཉམ་དུ་སྤྲུལ་པའི་སྐུ་འདི་ཉིད་ཀྱིས་ཐུགས་དགྱེས་པ་དང་སྤྲོ་བའི་ཉམས་ཀྱིས་ཞི་བ་དང་ཁྲོ་བོའི་གཟིགས་སྟངས་སྣ་ཚོགས་པ་དང་། ཞལ་ནས་རྡོ་རྗེའི་སྒྲ་དབྱངས་ལན་བདུན་བཟླས་པ་བདག་གིས་མཐོང་བ་དང་ཐོས་པ་ཡིན། བསམ་གྱིས་མི་ཁྱབ་པའི་ཡོན་ཏན་དང་ལྡན་པ་འདི་ལྟ་བུའི་སྤྲུལ་སྐུ་ཡ་མཚན་ཅན་ཚེ་འདིར་མཇལ་མ་མྱོང་བས། ད་རེས་ཚེ་དབང་དར་རྒྱས་ཁྱེད་ཀྱིས་མཆོག་སྤྲུལ་རིན་པོ་ཆེ་འདི་ཉིད་ཡར་འཚོགས་པའི་གྲལ་དུ་ཞོག་གསུངས་པས་ཁོས་མི་མོས་བཞིན་དུ་འཚོགས་པའི་གྲལ་མཐའ་རུ་བཞུགས་བཅུག་དགོས་བྱུང་། དེར་འཚོགས་པ་མང་པོའི་གྲལ་མཐའ་རུ་བཞུགས་ཚེ་ལྕགས་མདུད་བླ་མ་རྣམ་དག་སྤྱན་ཆབ་ཕྱུང་བ་ཙམ་གྱི་ཐུགས་མུག་པའི་རྣམ་འགྱུར་མང་པོ་མཛད་ཅིང་། འཚོགས་པའི་ནང་ནས་ཀྱང་གསོལ་རྩམ་ཕྲན་བུ་རེ་བསྡུས་ཏེ་གྲུབ་རྗེའི་གསོལ་ཁུག་ནང་དུ་བླུགས། ལྕགས་མདུད་བླ་མ་འཇིགས་མེད་ཀུན་བཟང་སོགས་ནས་ཀྱང་གསོལ་ཆས་བཟང་པོ་ཕུལ། དེ་ནས་དགུང་ལོ་བཅུ་གསུམ་བཞེས་པའི་ཚེ་སྐུའི་སྐྱེ་བ་སྔ་མའི་དུས་ཀྱི་འཕགས་པའི་ཡུལ་དུ་གྲུབ་ཐོབ་འགའ་ཞིག་དང་། པདྨའི་དྲུང་དུ་གྲུབ་ཆེན་ལྷ་སྲས་དམ་འཛིན། ཟབ་གཏེར་སྒོ་འབྱེད་ཨོ་རྒྱན་སངས་རྒྱས་གླིང་པ། གྲུབ་པའི་དབང་ཕྱུག་ཆོས་རྗེ་སྣ་ཚོགས་རང་གྲོལ་སོགས་དང་། ཁྱད་པར་ཆོས་འཁོར་དཔལ་གྱི་བསམ་ཡས་སུ་ཨོ་རྒྱན་ཆེན་པོའི་འཁོར་ཚོགས་རྗེ་འབངས་འདུས་པ་བཅས་པར་ཟབ་རྒྱའི་གདམས་ངག་མང་པོ་གསུང་པ་རྗེས་སུ་དྲན། དེ་ནས་དགུང་ལོ་བཅོ་ལྔ་བཞེས་ཚེ་རིག་འཛིན་ཆེན་པོ་འགྲོ་འདུལ་འོད་གསལ་རྡོ་རྗེའམ་ཀུན་བཟང་བདུད་འཇོམས་ཀྱི་དྲུང་དུ། ཉིད་ཀྱི་གཏེར་བྱོན་རྗེ་བཙུན་སྒྲོལ་མའི་སྙིང་ཐིག་གི་ཆོས་སྐོར་གྱི་དབང་ལུང་ཡོངས་རྫོགས་ཞུས་པ་དང་། ཉག་གི་ཕྱོགས་ནས་བདུད་འདུལ་མིང་ཅན་འབྱུང༔ སྐྱེས་བུ་དེར་འཕྲད་ཡོན་ཏན་བདུན་དང་བདུན༔ ཞེས་སོགས་འབྱུང་བ་དེ་ཁྱེད་ཉིད་ཡིན་པར་འདུག་ཅེས་བསྔགས་བརྗོད་མཛད། དགུང་ལོ་བཅོ་བརྒྱད་བཞེས་ཚེ་ཉམས་སྣང་དང་གཟིགས་ལམ་འདྲེས་མའི་ངང་དམྱལ་ཁམས་ཀྱི་སྡུག་བསྔལ་དཔག་ཏུ་མེད་པ་གཟིགས། སེམས་ཅན་ལས་ངན་པ་འདི་རྣམས་སྙིང་རེ་རྗེ་སྙམ་པའི་ངང་བླ་མ་དང་དཀོན་མཆོག་ལ་གསོལ་བ་དྲག་པོ་ཕུར་ཚུགས་སུ་བཏབ་པའི་ཚེ། ཐུགས་རྗེ་ཆེན་པོ་ཞི་ཞིང་འཛུམ་པའི་ཉམས་དང་ལྡན་པ་ཞིག་མདུན་མཁར་བཞུགས་པའི་ཕྱག་ཏུ་ཇོ་འཁོར་ལྟ་བུ་ཞིག་བཟུང་ནས་གཡས་སུ་བསྐོར་ཞིང་། གཙོ་འཁོར་དང་བཅས་པས་མགྲིན་གཅིག་ཏུ་ཡི་གེ་དྲུག་མའི་དབྱངས་འཐེན་འཐེན་པའི་མཐར་རྗེ་ཉིད་ཀྱི་སྤྱི་བོར་བཞག་ཅིང་ལག་ཏུ་གཏད་ནས། བུ་ཁྱོད་ཀྱིས་འདི་ལྟ་བུའི་ཆོས་ཀྱི་འཁོར་ལོ་བསྐོར་ནས་འགྲོ་བ་འདྲེན་པར་ཤོག་ཅིག་ཅེས་ལན་གསུམ་གསུངས། ཕྱི་ཉིན་མ་ཡུམ་ལ་འཕགས་པ་ཐུགས་རྗེ་ཆེན་པོས་ལུང་བསྟན་བཞིན་ཇོ་འཁོར་ཞིག་བསྐོར་ན་ཨེ་ཆོག་གསུངས་པར། མ་ཡུམ་གྱིས། དེ་ཤིན་ཏུ་ལེགས་སོ། །མདང་རྒན་མོ་ང་ཡིས་རྨི་ལམ་དུའང་། ཤར་གྱི་རི་རྩེ་ནས་ཉི་མ་ཤིན་ཏུ་འོད་གསལ་བ་ཅན་ཤར་བ་དང་། ནམ་མཁའ་ལ་འཇའ་འོད་འཁྲིགས་པའི་ཀློང་དུ་ཨོ་རྒྱན་པདྨ་འབྱུང་གནས་དང་འཕགས་པ་སྤྱན་རས་གཟིགས་རེད་ཟེར་བའི་བླ་མ་མང་པོ་བཞུགས་ཤིང་། ཀུན་གྱིས་ཕྱག་ན་ཇོ་འཁོར་བསྐོར་ཞིང་མཐར་ཐམས་ཅད་ཀྱིས་བུ་ཁྱོད་ལ་གཏད་སོང་། ཁྱེད་ཀྱིས་བསྐོར་བ་ན་ཇོ་འཁོར་ལས་འོད་ཉི་ཟེར་ལྟ་བུ་འཕྲོས་ཏེ་ཡུལ་ཁམས་ཀུན་ཁྱབ་པར་རྨིས་ཟེར། དེ་ནས་མ་བུ་གཉིས་ཀའི་ཇོ་འཁོར་གྱི་ཆས་རྣམས་ཟླ་བ་གཅིག་ཙམ་བསྒྲུབས་ཏེ་ཚད་ལྡན་ཞིག་གྲུབ་རྗེས། ཁུ་བོ་བླ་མ་ཀུན་བཟང་བསོད་ནམས་ཞེས་པའི་དྲུང་དུ་ཇོ་འཁོར་ལ་རབ་གནས་ཞུ་བར་སོང་། བླ་མས་མདང་གི་རྨི་ལམ་དུའང་། མེ་ཏོག་སྣ་ཚོགས་པའི་ཐང་ཆེན་ན། དར་དཀར་པོའི་གདུགས་ཕུབ་པ་དང་། ཁྲི་ཤིན་ཏུ་མཐོན་པོ་ཞིག་གི་སྟེང་ན། ཁྱོད་རང་འདུག་ནས་ཆོས་བཤད་པ་སོགས་ངོ་མཚར་གྱི་རྟགས་མང་པོ་རྨིས་པས་ཇོ་འཁོར་འདིས་འགྲོ་དོན་ཞིག་འོང་གསུངས་ཏེ་རབ་གནས་དང་སྨོན་ལམ་མཛད། དེ་ནས་ཡང་ཤང་ལང་གཤིས་པའི་ཡུལ་འབྲོག་སྟོད་སྨད་དང་། ཁྲོམ་ཁོག་སོགས་སུ་བྱོན་ཏེ་ཇོ་འཁོར་སྐོར་བཞིན་བློ་ལྡོག་རྣམ་བཞི་དང་སྐྱབས་འགྲོའི་ཁྲིད་གསུངས་པས་སྐྱ་སེར་ཐམས་ཅད་ཀྱི་བློ་སྣ་ཆོས་ལ་ཕྱོགས་ཏེ་མ་ཎི་དང་སིདྡྷི་དུང་ཕྱུར་འགའ་ཞིག་དང་ཡིག་དྲུག་རྡོ་བརྐོས་སོགས་འགྲོ་དོན་རྒྱས་པ་བྱུང་། དེ་ནས་དགུང་ལོ་ཉེར་གཅིག་བཞེས་པའི་ཚེ་ཉག་སྟོད་སྨད་ཕན་ཚུན་དམག་འཐབ་བྱེད་པའི་སྐབས་ཡིན་པས། སྐུ་ཡུལ་ཁང་བརྩེགས་གྲོང་དུ་ཉག་སྐེད་དཔོན་གྱི་དགྲ་བྱུང་ནས་མི་གསུམ་བཞི་བསད་དེ་རྗེའི་མཆེད་ཡ་ནོར་བུ་ཞེས་པ་བཙོན་དུ་ཁྲིད་ཤོར་བས། རྗེ་འདི་རི་ནང་དཔོན་གྱི་དམག་ཁྲལ་དུ་ཉག་སྐེད་ལ་ངོ་ལོག་བྱེད་པར་བྱོན་དགོས་བྱུང་། སྐབས་དེར་མདོ་མཁྱེན་བརྩེ་སྐྱེས་བུ་ཡེ་ཤེས་རྡོ་རྗེ་ཉག་སྟོད་སྨད་ཀྱི་འཁོན་པ་བསྡུམ་པར་བྱོན་པ་དང་མཇལ་ནས་ཟླ་བ་ཁ་ཤས་རིང་མཁྱེན་བརྩེ་རིན་པོ་ཆེའི་ཞལ་སྔ་ནས་སྙིང་ཐིག་རྩ་གསུམ་གྱི་དབང་ལུང་མང་པོ་དང་། ཀློང་ཆེན་སྙིང་ཐིག་གི་སྔོན་འགྲོ་དང་། དངོས་གཞི་ཡེ་ཤེས་བླ་མ་དང་གཞན་གདམས་ངག་ཟབ་མོ་ཁྱད་པར་ཅན་མང་པོ་གནང་བ་ཐོབ། བུ་ཁྱོད་སྒྲུབ་པ་ལ་རྩེ་གཅིག་འབད་ནུས་ན་བསྟན་དང་འགྲོ་བའི་དོན་དཔག་ཏུ་མེད་པ་འབྱུང་ཞེས་གསུངས། མཁྱེན་བརྩེ་རིན་པོ་ཆེས་བཀའ་གསུང་ལྟར་མཆེད་ཡ་སོགས་མི་བདུན་པོ་བཙོན་གྲོལ་བྱུང་། དེ་རྗེས་ཁྲོ་ཟུར་རྒྱལ་སྲས་རིག་འཛིན་བསྐལ་བཟང་ལྡེའུ་བཙན་ཤང་གཤིས་དང་ལྷང་ལྷང་དུ་གནས་མཇལ་དུ་བྱོན་པ་ལས། ཕུར་པ་སོགས་དབང་ལུང་འགའ་ཞིག་གསན་པས་དེ་ཉིད་ཀྱི་ཞལ་ནས་ཀྱང་། བུ་ཁྱོད་ལས་དང་སྐལ་པ་ལྡན་པའི་སྐྱེས་བུར་འདུག་པས་སྒྲུབ་ལ་འབུངས་དང་འགྲོ་དོན་འབྱུང་གསུངས། །སྐབས་དེ་ཙམ་ན་དག་པའི་གཟིགས་སྣང་དུ་ཟངས་མདོག་དཔལ་གྱི་རི་བོ་ལ་བྱོན་ཏེ་གུ་རུ་རིན་པོ་ཆེ་དང་རྗེ་འབངས་འདུས་པ་རྒྱ་མཚོའི་ཞལ་མཇལ་ཞིང་། གསུང་གིས་གནང་བ་ཐོབ་པ་དང་ཐུགས་རྒྱུད་བྱིན་གྱིས་བརླབས། དགུང་ལོ་ཉེར་ལྔར་བཞེས་པའི་ཚེ་གྲུབ་ཆེན་པདྨ་འགྱུར་མེད་ཁྲོམ་ཁོག་ན་བྱོན་པ་ཐོས་པས་མཇལ་སར་བྱོན། གྲུབ་ཐོབ་ཀྱིས་ཁྲོམ་ཚོགས་མང་པོ་ལ་ཆོས་གསུང་བཞིན་པའི་གྲལ་དུ་བཞུགས་པས། བན་ཆུང་ཁྱོད་ཤིན་ཏུ་ལས་དང་སྐལ་པ་བཟང་ཞིང་སྐྱེ་བ་གྲངས་མེད་ནས་ཚོགས་བསགས་སྒྲིབ་པ་དག་པ་སྐྱེས་མཆོག་མང་པོའི་སྤྲུལ་པ་ཡིན་འདུག མདང་སུམ་ང་ཡི་རྨི་ལམ་དུ། ཇོ་བོ་རྗེ་ཨ་ཏི་ཤ་དང་། རྗེ་མི་ལ་རས་པ། རྩེ་ལེ་སྣ་ཚོགས་རང་གྲོལ་རྣམས་ཀྱི་སྤྲུལ་པ་ཡིན་ཟེར་བའི་རྣལ་འབྱོར་པ་ཞིག་གིས་ཤེལ་གྱི་རི་བོ་མཐོ་སང་ངེ་བ་ལ་ལམ་དཀར་པོ་དོད་པ་ཞིག་ནས་སེམས་ཅན་དུང་ཕྱུར་མང་པོ་བདེ་འགྲོར་སྐྱེལ་འགྲོ་བ་རྨིས་གསུངས་ནས་ཐུགས་བརྩེ་ཆེན་པོ་མཛད། བླ་མ་དེ་ཉིད་ཀྱི་དྲུང་ནས་ཀློང་ཆེན་སྙིང་ཐིག་གི་ཆོས་ཚན་འགའི་དབང་ལུང་སོགས་གསན། མ་འོངས་ལུང་བསྟན་ཡང་མང་དུ་གསུངས་ཏེ་མཚན་ལ་པདྨ་བདུད་འདུལ་དུ་གསོལ། ཤང་ལང་བྲག་གི་གནས་ལ་སྒྲུབ་པ་རྩེ་གཅིག་ཏུ་འབད་ཐུབ་ན་འགྲོ་དོན་དཔག་ཏུ་མེད་པ་འོང་གསུངས་སོ། །དགུང་གྲངས་སོ་གཅིག་པ་མེ་ཕོ་རྟ་ཡི་ལོར་མཚོ་ཕུ་གྲུབ་ཆེན་འགྱུར་མེད་ཆོས་དབྱིངས་རང་གྲོལ་གྱི་དྲུང་དུ་ཆོས་ཞུ་གྲོགས་པོ་འགའ་ཞིག་དང་བཅས་ཏེ་ཤིང་སྒོ་གངས་ཀྱི་ར་བ་ལ་ཕེབས། བླ་མའི་ཞལ་མཇལ་བ་དང་རྡོ་རྗེ་འཆང་མི་ཡི་རོལ་གར་དུ་ཕེབས་པའི་ཐུགས་དད་བྱུང་ཞིང་། རྗེ་དེ་ཉིད་ཀྱིས་ཐོག་མར་དབང་བསྐུར་ཞིང་རྒྱུད་སྨིན་པར་མཛད་པ་ནས་ཀློང་གསལ་རྡོ་རྗེ་སྙིང་པོའི་ཐུན་མོང་ཐུན་མིན་གྱི་སྔོན་འགྲོ་ནས་ཁྲེགས་ཆོད་ཐོད་རྒལ་དང་བཅས་པའི་ཞིབ་ཁྲིད་གནང་། འཕོ་ལུང་ཁྲིད་དང་རྩ་རླུང་སོགས་ཀྱི་སྐབས་སུ་རྟགས་ཁྱད་པར་དུ་མ་བྱུང་བ་ཀུན་གྱིས་མཐོང་། གཞན་ཡང་གནས་དེ་ཉིད་དུ་བཤེས་གཉེན་མང་པོའི་དྲུང་ནས་སྙིང་ཐིག་མ་བུ། སྨིན་གླིང་གཏེར་ཆེན་སྐུ་མཆེད་ཀྱི་ཆོས་སྐོར། རྒོད་ལྡེམ་ཆོས་སྐོར། བདུད་འདུལ་ཆོས་སྐོར། ཀློང་གསལ་ཆོས་སྐོར་སོགས་དབང་ལུང་བསམ་གྱིས་མི་ཁྱབ་པར་གསན། རྗེ་ཉིད་ལ་ཉམས་སྣང་དང་རྨི་ལམ་ཀུན་དུའང་སྒྲིབ་པ་དག་པའི་རྟགས་མང་དུ་བྱུང་བ་དང་། ཁྱད་པར་དུའང་ཉམས་རྟོགས་རྩོལ་མེད་དུ་འབར་ཞིང་གནས་ལུགས་ལྟ་བའི་ཕུ་ཐག་ཆོད། བླ་མ་ལ་ཉམས་ལེན་གྱི་བདར་ཤ་བཅད་པའི་རྟོགས་འབུལ་ལན་མང་དུ་ཞུས། རེ་ཞིག་ན་བླ་མ་ལ་བདག་རྒྱ་གར་འཕགས་པའི་ཡུལ་ནས་རྒྱ་ནག་རི་བོ་རྩེ་ལྔའི་བར་དུ་གནས་མཇལ་དང་། རང་གི་ཉམས་ལེན་ཡང་བོགས་འདོན་ཕྱིར་འགྲོ་སྙམ་པ་ཞུས་པས། བླ་མ་ཐུགས་ཤིན་ཏུ་ཁྲོས་པའི་ངང་ནས། བུ་ཁྱོད་ཀྱིས་གནས་ལུགས་ལ་ཉམས་ལེན་ཤེས་ཚུལ་ནི་འདི་ལས་གོང་ན་མེད། རིགས་བཟང་ཞིང་བློ་གསལ་བ་ཆུང་ནས་ཆོས་ལ་དད་པའི་སྐྱེ་སྤྲུལ་ཞིག་ཡིན་པ་སོགས་ནི་ང་ཡིས་སྔར་ནས་ཀྱང་ཐོས། ད་ཁྱོད་ཆོས་ཐོས་པའི་རྗེས་སུ་སྒྲུབ་པ་ལ་མི་བརྩོན་པར་འགྲོ་སྣང་བཀྱག་པ་དེ་རྒྱལ་འགོང་ཞུགས་པ་རེད། འཁྱམས་སྙིང་སྤྲོ་བ་དེ་བསླུ་བྲིད་རེད། ད་ཁྱོད་ང་ཡི་ཁ་ལ་ཉན་ན་ཕ་ཡུལ་དུ་སོང་ལ་ཨོ་རྒྱན་པདྨའི་སྦས་གནས་ཁྱད་དུ་འཕགས་པ་ལྷང་ལྷང་བྲག་དཀར་དུ་སྡོད་ལ་སྒྲུབ་ལ་རྩེ་གཅིག་ཏུ་འབད་ཐུབ་ན་རང་གཞན་གཉིས་ཀ་དོན་ཆེན་རེ་འབྱུང་བ་བན་རྒན་ང་ཡིས་བསམ་དུའོ། །ཞེས་གདམས་པར་བསྩལ་བ་ལྟར་རང་ཡུལ་དུ་ཕེབས་ཏེ་བཞུགས་པ་ན། ཆུ་ཕོ་བྱི་བའི་ལོར་སྔོན་གྲུབ་ཆེན་དཔལ་གྱི་རྡོ་རྗེའི་སྒྲུབ་ཕུག་གི་གཡས་ཟུར་ནས་པདྨའི་ཟབ་གཏེར་གྱི་ཁ་བྱང་རྙེད་ཅིང་ཟབ་གཏེར་གྱི་དཀྱིལ་འཁོར་ཞལ་ཕྱེས་ཀྱང་། རེ་ཞིག་སྤེལ་བའི་བཀའ་རྒྱ་མཁའ་འགྲོས་མ་གནང་བས་ཤིན་ཏུ་གསང་རྒྱ་མཛད། དེའི་སྐབས་སུ་ཐུགས་ཉམས་འུར་ཏེ་བརྟུལ་ཞུགས་ཀྱི་སྤྱོད་པས་རྡོ་ལ་ཞབས་ཕྱག་གིས་རྗེས་མང་དུ་བཞག་པར་གྲགས། དེ་ནས་རྗེ་རང་གི་ཟབ་གཏེར་ཁ་བྱང་ལས། བདག་འདྲ་བདུད་འདུལ་རྡོ་རྗེ་གྲོ་བོ་ལོད༔ ང་སྤྲུལ་འཁྲུལ་ཞིག་གླིང་པ་ཞེས་བྱ་འབྱུང༔ དོན་དམ་ཐུགས་ཀྱི་དགོངས་པ་ཀློང་ནས་རྡོལ༔ བརྡ་རྟགས་བྲག་ཆེན་དཀྱིལ་ནས་ཟབ་གཏེར་དྲངས༔ ཅེས་པ་ལྟར་མེ་མོ་སྦྲུལ་གྱི་ལོའི་ཟླ་བ་བཅུ་པའི་ཚེས་བཅུའི་ཐོ་རངས་སུ། གཟིམས་མལ་འོད་གསལ་དང་འདྲེས་པའི་སྣང་ཆ་ལ། རིན་ཆེན་སྣ་ལྔར་འདྲེས་པའི་ཤོག་སེར་ལ༔ བཻཌཱུཪྱ་ཞུན་མས་བྲིས་པའི་གླེགས་བམ་གཉིས༔ ཁྱད་པར་ཁྲོ་ལོད་ཕུར་པའི་སྒྲུབ་སྐོར་དང༔ སྐུ་རྟེན་ཐུགས་རྟེན་བརྒྱ་དང་ཉི་ཤུ་ལྔ༔ མྱོང་གྲོལ་རིལ་བུ་སྐྱེ་བདུན་སྐུ་ཤ་དང༔ པདྨའི་ཕྱག་མཁར་ཙནྡན་སྦྲུལ་གྱི་སྙིང༔ ཞེས་པ་སོགས་ཀྱི་ཁ་བྱང་བབ། རྗེ་ཉིད་ཀྱི་ཐུགས་དགོངས་ལ་ངས་ཚེ་འདི་ལ་བྱ་བྲལ་བརྟུལ་ཞུགས་ཀྱི་སྤྱོད་པ་བསྐྱངས་ཏེ་སངས་རྒྱས་གཞན་ནས་མི་འཚོལ་བའི་ཐེག་པ་མཆོག་གི་གྲུབ་མཐའ་སྙེག་པ་འདི་བས་ལྷག་པའི་དངོས་གྲུབ་ལ་རེ་བ་མེད་ནའང་། སྔོན་གྱི་ལས་འཕྲོ་བཙན་པོའི་མཐུས་ཟབ་གཏེར་གྱི་སྐལ་པ་བབ་པ་བཏང་སྙོམས་སུ་འཇོག་མི་རུང་དགོངས་ཏེ། རྗེ་རང་གི་ཞལ་སློབ་རྣམས་མདུན་དུ་བསྡུས་ཏེ་འོད་གསལ་གྱི་ངང་ནས་དག་པའི་སྣང་བ་གཟིགས་ཚུལ་དང་། ཁ་བྱང་ཡོད་ཚུལ་སོགས་གསུངས། དེ་ནས་དཔོན་སློབ་རྣམས་ཀྱིས་ཚོགས་འཁོར་བཏང་སྟེ་བྲག་རི་ཆེན་པོའི་རྩ་བར་ཕེབས་ཚེ། དམ་པ་ཉིད་སྣང་སེམས་ཆོས་ཉིད་གསུམ་རོ་གཅིག་ཏུ་འདྲེས་པའི་ཐུགས་ཉམས་འུར་ནས་བྲག་ཆེན་གྱི་ངོས་སུ་ཐོགས་པ་མེད་པར་བསྐྱོད་པས། སྔར་གྱི་ཁ་བྱང་ནས་གསུངས་པ་གཞིན་གཏེར་སྒོ་ལ་བརྡ་རྟགས་མི་འགྱུར་བར་སྣང་། ཞལ་ནས། ཧཱུྃ་ཧཱུྃ་ཧཱུྃ༔ སྔོན་ཚེ་བདུད་འདུལ་རྡོ་རྗེ་གྲོ་ལོད་ཀྱི༔ ཟབ་གཏེར་བསྟན་པ་བསྲུང་བར་ཁས་བླངས་པའི༔ ཕྱི་ནང་གསང་བའི་གཏེར་གྱི་སྲུང་མའི་ཚོགས༔ དམ་བཞག་བཀའ་བསྒོས་ཐ་ཚིག་དྲན་མཛོད་ལ༔ ཕ་ནོར་བུ་ཡིས་ལེན་པའི་དུས་ལ་བབ༔ ཟབ་གསང་གཏེར་གྱི་དངོས་གྲུབ་བདག་ལ་སྤྲོད༔ ཅེས་སྲུང་མ་རྣམས་ལ་དམ་བསྒྲགས་མཛད་དེ་གཏེར་སྒོ་གོང་འོག་ཐམས་ཅད་ཞལ་ཕྱེས་པ་དང་དྲི་བཟང་པོའི་ངད་ཀྱིས་ཕྱོགས་ཀུན་ཁྱབ་ཅིང་མེ་ཏོག་གི་ཆར་བབ་པ་སོགས་ངོ་མཚར་བའི་རྟགས་མང་པོ་བྱུང་། སྐུ་གསུང་ཐུགས་ཀྱི་ཟབ་གཏེར་མང་པོ་སྤྱན་དྲངས་ནས་ཞལ་སློབ་རྣམས་ཀྱི་རྩར་བྱོན་པར་མཛད། དེ་ནས་རྗེ་རང་གིས་ཐག་པ་བཟུང་ནས་སློབ་མ་རྣམས་གཏེར་སྒོ་འོག་མའི་བར་དུ་དྲངས་ཏེ་ཕ་ཝང་དུང་གླང་འདྲ་བའི་རྩ་བར་རྗེ་རང་གི་ཕྱག་འཁར་གྱིས་བཏབ་པས་ཆུ་གཏེར་ལྷའི་བདུད་རྩི་ལ་འགྲན་ནུས་པ་ཅན་ཉིལ་གྱིས་བྱུང་། ཞལ་སློབ་རྣམས་དང་གནས་སྐོར་མཁན་རྣམས་ཀྱིས་ས་རྒོག་དང་རྡོ་སྐམ་དཀྱིལ་ནས་ཆུ་དྲངས་པ་གྲུབ་པའི་རྟགས་ཁྱད་པར་ཅན་འདི་འདྲ་ཞེས་རྗེ་ཉིད་ལ་སངས་རྒྱས་དངོས་ཀྱི་འདུ་ཤེས་དང་མི་ཕྱེད་པའི་དད་པ་ཐོབ། དེ་ནས་རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེ་ཞལ་མཇལ་དུ་དཔོན་སློབ་དྲུག་ཅུ་ཙམ་བྱོན་ཏེ། རིན་པོ་ཆེའི་རིགས་དང་། དར་ཟབ་ཀྱི་རིགས་དང་། ལྷ་ཆའི་རིགས་དང་། གཞན་ཡང་ཇ་དང་། རྟ་མཛོ་ལ་སོགས་པ་འབུལ་བ་གྱ་ནོམ་པའི་མནྜལ་ཕུལ་ཞིང་། རྫོགས་སྤྲུལ་རིན་པོ་ཆེས་ཀློང་ཆེན་སྙིང་གི་ཐིག་ལེའི་ཐུན་མོང་གི་སྔོན་འགྲོ་དང་ཐར་ལམ་དཀར་པོ་གཉིས་སྤེལ་ཏེ་ཆོས་ཁྲིད་རྒྱས་པར་གནང་། རིན་པོ་ཆེ་དང་མཁན་པོ་སྐལ་ལྡན་གཉིས་ཀས་ཐུན་མོང་དུ་ཡེ་ཤེས་བླ་མ་དང་རྩ་རླུང་གཏུམ་མོ་རྣམས་ཀྱི་ཁྲིད་ལུང་གསུངས། གཞན་ཡང་རིག་འཛིན་འདུས་པ་དང་། ཡུམ་ཀ་དང་། རྟ་ཁྱུང་འབར་བ་དང་། དཀོན་མཆོག་སྤྱི་འདུས་དང་། ཁོང་གི་གཏེར་ཆོས་དག་སྣང་གུ་རུ་རཀྴ་ཐོད་ཕྲེང་རྩལ་སོགས་དབང་ལུང་ཡོངས་སུ་རྫོགས་པ་གནང་། རིན་པོ་ཆེ་ཁོང་གི་ཐུགས་བཞེད་བསྐང་ཕྱིར་དུ་དམ་པ་འདིས་ཕར་ལ་རང་གཏེར་གྱི་ལུང་ཕྲན་འགའ་ཞིག་ཕུལ། དུས་དེར་དཔལ་སྤྲུལ་རིན་པོ་ཆེ་དང་མཇལ་འཕྲད་བྱུང་བས། དཔལ་སྤྲུལ་རིན་པོ་ཆེས། དམ་པ་ཁྱོད་ཀྱི་མཛད་སྤྱོད་ངས་ཐོས་པས་ད་ལྟ་སྙིགས་མའི་དུས་སུ་ཁ་བཤད་དོན་དང་མཚུངས་པའི་བྱང་ཆུབ་སེམས་དཔའ་ངེས་པར་ཡིན་འདུག ཁྱེད་ཀྱིས་སྤྱོད་འཇུག་ཞིག་འཆད་ན་འདྲ་ཆགས་པ་འདུག་གསུངས་ཏེ་སྤྱོད་འཇུག་གི་དཔེ་ཆ་ཚར་བཅོ་ལྔ་གནང་ནས་འཇམ་དཔལ་མཚན་བརྗོད་ཀྱི་ལྗགས་ལུང་བསྩལ། རུ་དམ་གངས་ཁྲོད་སྒྲུབ་མཚོ་གོང་འོག་རྣམས་སུ་བྱོན་ཏེ་འབྱུང་འགྱུར་ཟབ་གཏེར་འདོན་པའི་ཕྱིར་བྲག་ལ་གཏེར་རྟགས་ཀྱི་རི་མོ་བཀོད། གཞན་ཡང་དགོན་གནས་དེ་ཉིད་དུ་དག་པའི་གཟིགས་སྣང་དཔག་ཏུ་མེད་པ་བྱུང་། ཕྱིར་ཕེབས་ཁར་རྫོགས་སྤྲུལ་རིན་པོ་ཆེས་ཉིད་ཀྱི་དབུ་ཞྭ་དང་མནབ་གཟན་སོགས་དང་། སྐུ་གསུང་ཐུགས་ཀྱི་རྟེན་སོགས་གནང་སྦྱིན་མཛད་དེ་སྐྱེས་བུ་དམ་པ་ཁྱེད་དང་ང་རང་གཉིས་དག་པའི་ཞིང་ཁམས་ཀུན་ཏུའང་འབྲལ་བ་མེད་གསུངས་ཤིང་ཐུགས་ཡིད་གཅིག་ཏུ་འདྲེས་པར་གྱུར། དེ་ནས་རྗེ་ཉིད་ཀྱི་གདན་ས་བསྐལ་བཟང་དགོན་དུ་ཞབས་སོར་འཁོད་དེ་གཙུག་ལག་ཁང་གསར་དུ་བཞེངས་པར་རབ་གནས་བཅས་གྲུབ་མཚམས། ཞི་ཁྲོ་དགོངས་པ་རང་གྲོལ་དང་རྗེའི་རང་གཏེར་མཁའ་ཁྱབ་རང་གྲོལ་གྱི་སྒོ་ནས་བུམ་སྒྲུབ་འཚོགས་པས་རིལ་བུ་རྣམས་ཕྱོགས་མཚམས་ཀུན་ཏུ་འཕུར་བ་བྱུང་། དགོན་གནས་དེ་ཉིད་དུ་འོད་དགོན་བླ་མ་ཤེས་རབ་རྒྱལ་མཚན་གདན་དྲངས་ཏེ་རྒྱུད་གསང་བ་སྙིང་པོ་དང་། རྗེ་རང་བྱུང་རྡོ་རྗེའི་ཟབ་མོའི་ནང་དོན་སོགས་བསྡུས་ཁྲིད་ཙམ་མཛད། དེ་རྗེས་རྫོགས་ཆེན་མཁན་པོ་ཤེས་རབ་མཐར་ཕྱིན་རུ་དམ་མ་དགོན་ནས་གདན་དྲངས་ཏེ་རྗེ་ཉིད་བཅས་པས་སྔ་འགྱུར་རྙིང་མའི་རྒྱུད་འབུམ་ཡོངས་རྫོགས་ཀྱི་ལུང་དང་། ཞི་བ་ལྷའི་སྤྱོད་འཇུག་དང་། རྒྱལ་སྲས་གཞན་ཕན་པའི་མཁས་བྱའི་གནས་དྲུག་རྣམས་ཀྱི་བཤད་ཁྲིད་གསན། སྐབས་ཤིག་ན་ནམ་མཁའ་ཐམས་ཅད་འཇའ་ཚོན་ཁ་དོག་ལྔ་པའི་ཐིག་ལེ་ཐིག་ཕྲན་དང་། འོད་ཀྱི་ཟླུམ་བསྐོར་ཆེན་པོ་ལ། ཕྱོགས་བཞི་ནས་ཟླུམ་བསྐོར་ཆུང་ངུ་བཞིས་བསྐོར་བ་སོགས་སྔར་མཐོང་མ་མྱོང་བའི་ངོ་མཚར་གྱི་རྟགས་ཁྱད་པར་ཅན་མང་པོ་བླ་གྲྭ་ཐམས་ཅད་ཀྱིས་མཇལ། རྗེ་ཉིད་དང་སློབ་བུ་སྐལ་ལྡན་མཐའ་ཡས་སོགས་འགའ་ཞིག་གིས་བསྐལ་བཟང་སངས་རྒྱས་སྟོང་རྩའི་ཞལ་མངོན་སུམ་དུ་མཇལ། དེ་ཙམ་ན་ཁྲོམ་དགེ་གོང་འོག་གི་སྤྲུལ་སྐུ་རིན་པོ་ཆེ་རྣམས་དང་། ཛཿསྤྲུལ་རིན་པོ་ཆེ་ཀུན་བཟང་རྣམ་རྒྱལ། ཨ་འཛོམས་སྤྲུལ་སྐུ་ཁུ་དབོན་རྣམས་དང་མཇལ་འཕྲད་ལེགས་པར་བྱུང་ཞིང་ཕན་ཚུན་ཐུགས་ཡིད་གཅིག་འདྲེས་སུ་གྱུར། གཞན་ཡང་མཁས་དང་གྲུབ་པའི་དབང་པོ་བླ་མ་ལུང་རྟོགས་བྱོན་ནས། རྗེ་བླ་མ་ལ་དཀོན་མཆོག་རྗེས་དྲན་གྱི་མདོའི་དོན་ཁྲིད་དང་། རྒྱལ་སྲས་ཞི་བ་ལྷའི་སྤྱོད་འཇུག་བཅས་ཀྱི་ཆོས་ཁྲིད་བསྡུས་པ་ཙམ་གསུངས། ཕྱིས་སུའང་མཁར་ཁོག་རི་ཁྲོད་དུ་བླ་མ་ལུང་རྟོགས་ལས་ཁྲིད་ཡིག་ཡེ་ཤེས་བླ་མའི་བསྡུས་དོན་ཙམ་གསན་པར་གྲགས། དེ་ནས་རེ་ཞིག་ན་སྐུ་ལ་བསྙུན་ཚུལ་དྲག་ཏུ་བཞེས་པའི་ཚུལ་མཛད་དེ་བདུན་གསུམ་ཙམ་གྱི་བར་དུ་གསོལ་བ་ཅང་མ་མཛད། བུ་སློབ་རྣམས་ལ་ང་ནི་ཞི་བའི་དབྱིངས་སུ་གཤེགས་པ་ཡིན། ཨོ་རྒྱན་མཁའ་འགྲོའི་གླིང་སོགས་དག་པའི་ཞིང་ནས་དཔའ་བོ་དང་རྣལ་འབྱོར་མའི་ཚོགས་བསུ་མ་འབྱོར་བའི་སྣང་བ་བྱུང་གསུངས། རྟོགས་ལྡན་དཔལ་ལྡན་སོགས་བུ་སློབ་རྣམས་ཀྱིས་བསྟན་འགྲོ་སྤྱི་དང་འདིར་འདུས་ཀྱི་བུ་སློབ་རྣམས་ལ་ཐུགས་རྗེས་འདོར་བ་མི་འཚལ་སོགས་ཞུས་ཚེ། ཁྱེད་རྣམས་མྱ་ངན་མ་བྱེད་ང་ད་དུང་ལོ་གཅིག་གཉིས་ལ་འདུག་གསུངས་ནས་སྔ་ཕྱིའི་ཞལ་སློབ་རྣམས་ལ་ཁྲིད་ཡིག་ཡེ་ཤེས་བླ་མའི་ཟབ་ཁྲིད་བསྩལ། སྐབས་སྐབས་སུ་རྡོ་རྗེའི་སློབ་མ་རྣམས་ལ་ང་ཉིད་ཤི་ཡང་རུང་། འདུག་ཀྱང་རུང་། ཁྱེད་རྣམས་ཀྱིས་དོན་མེད་འཇིག་རྟེན་གྱི་འཁྲུལ་སྤྱོད་དང་། ཆོས་བརྒྱད་ལ་བརྟེན་པའི་དགེ་བའི་གཟུགས་བརྙན་དང་། ལྟ་བ་གོ་ཡུལ་ལ་ཤོར་བའི་ཁ་འབྱམས་དང་། རང་རྒྱུད་ལ་སྙིང་རྗེ་མ་འབྱོངས་པའི་འགྲོ་དོན་མིང་བཏགས་རྣམས་ལིང་གིས་བསྐྱུར་བར་གྱིས་དང་རྒན་པོ་ང་ཡི་བསམ་པ་རྫོགས་པ་ཡིན་ཞེས་དང་། ཞལ་སློབ་གསར་བུ་རྣམས་ལ་རེ་རེ་བཞིན་དབྱུག་པ་རེ་གནང་སྟེ་ཁྱེད་རྣམས་ཀྱིས་ཚོགས་དྲུག་ཡུལ་ཕྱིར་འབྲངས་པའི་འཁྲུལ་བར་ནག་འབྱམས་སུ་མ་བཏང་། རང་སེམས་རང་ངོ་ཤེས་པའི་དྲན་པས་མ་ཟིན་པའི་ཚེ། འགྲོ་བར་འདོད་ན་རྐང་པ་ལ་རྒྱོབ། ལས་བྱེད་པ་འདོད་ན་ལག་པ་ལ་རྒྱོབ། སྨྲ་བ་འདོད་ན་ཁ་ལ་རྒྱོབ། ལྟ་སྒོམ་ཡུལ་དུ་མ་བཞག་པར་སྙིང་ལ་རུས་པ་བསྐྱེད་ཅེས་གདམས་པར་མཛད། དེ་ནས་དགུང་གྲངས་ང་བདུན་བཞེས་པ་ཆུ་སྤྲེལ་ལོའི་ས་ག་ཟླ་བའི་གནམ་སྟོང་གི་ཉིན་རྗེ་ཉིད་ཅོག་གུར་ཞིག་ཕུབ་པའི་ནང་བཞུགས་ཡོད་པ་ལ། སློབ་མ་རྣམས་ལ་ཁྱོད་རྣམས་འདིར་ཤོག་གསུངས་ནས་སྨོན་ལམ་ཟབ་རྒྱས་གསུངས། ཀུན་གྱི་སྤྱི་བོ་ལ་རྟེན་སྒམ་བཞག་པར་མཛད་ཅིང་སྨོན་ལམ་རྒྱས་པ་གསུངས། ད་ཁྱེད་རྣམས་རང་གནས་སུ་སོང་ལ་ང་ཡི་ཅོག་གུར་འདིའི་སྒོ་དྲུབ་ནས་ཞག་བདུན་གྱི་བར་དུ་སུ་ཡང་འོང་མ་འཇུག་གསུངས། བུ་སློབ་རྣམས་ཀྱིས་བླ་མས་གསུངས་པ་ལྟར་མི་བྱེད་ཀ་མེད་ཀྱིས་བློ་མ་བདེ་བཞིན་དུ་རང་གནས་སུ་ཕྱིན། ཞག་བདུན་གྱི་ནངས་པར་བླ་མའི་གཟིམས་གུར་ལ་ཕྱག་འཚལ་ཞིང་ཕྱེས་ཚེ་ན་བཟའ་དང་། དབུ་སྐྲ། ཕྱག་ཞབས་ཀྱི་སེན་མོ་རྣམས་རང་མལ་དུ་འདུག་པ་ལས་སྐུའི་དཀྱིལ་འཁོར་མི་སྣང་བ་འཇའ་ལུས་འོད་ཀྱི་ཕུང་པོར་མངོན་སུམ་དུ་གཤེགས་པ་མཛད་དོ། །