༥ འཚོ་བའི་ཐད་ཀྱི་འཛེམ་བྱ།
བླ་དཔོན་མཐོ་ཤོས་མཁན་སློབ་སོགས་སུ་མཇལ་ཚེ་གོས་ཚགས་ལེགས་པར་བགྱིས་ཏེ་ཞྭ་ཕུད་པ་སོགས་གུས་ཉམས་མང་བོ་སྟོན་པ་དང་འུར་སྒྲ་མི་སྒྲོག་པ་ཡིན། ལྷ་ཆས་མཆོད་ཆས་ཀྱི་རིགས་དང་། ཞྭ་དང་སྟོད་གོས་རྣམས་མཐོ་སར་འཇོག བཟའ་བའི་སྐོར་ལའང་རྨིག་རྡུམ་དང་སྡེར་ཐོགས་སོགས་ཀྱི་ཤ་ལ་འཛེམ་ཞིང་། གསོལ་ཇ་འདྲེན་སྐབས་ཀྱང་དཀར་ཡོལ་སོགས་ལག་པ་ཡ་གཅིག་གིས་མི་སྟེར་བ་ཡིན། ཁྱིམ་རྒྱུད་གཅིག་ལས་མཆེད་པའི་རྩ་འཇིང་འདུ་འཛོམས་ཀྱི་སྐབས་སུ་གཞས་ལེན་པ་དང་འཁྲིག་ཚིག་མི་སྨྲ་བ་དང་། ཁྱད་པར་དུ། རི་བོ་ཡིད་དུ་འོང་བ་དང་། མཚོ་རྫིང་ལྟ་ན་སྡུག་པ་ལ་ལྷ་ཀླུ་གནས་པའི་འདུ་ཤེས་ཀྱིས་ས་བརྐོ་རྡོ་སློག་དང་། མི་གཙང་བ་གང་སར་མི་འདོར་བ། དེར་གནས་ཀྱི་སྲོག་ཆགས་ཡང་ལྷ་ཀླུས་བདག་ཏུ་བཟུང་བར་བསམ་ནས་གནོད་འཚེ་དང་། ཀི་འདེབས་པ། ལྟེང་ཀ་སོགས་ལག་པ་བཀྲུ་བ་སོགས་ལ་ཧ་ཅང་འཛེམ་པ་ཡིན། ཁྱིམ་དུ་ནད་པ་ཚབས་ཅན་ཡོད་ན་སྒོ་ངོས་སུ་ཤུག་པ་བཙུགས་ཏེ་མགྲོན་པོར་འཛེམ་པ་དང་། ཁྱིམ་གཞིས་ཀྱི་ཕུག་ཏུ་བུད་མེད་ཀྱི་སྐྲ་མི་ཤད་ཅིང་། སོ་མང་དང་སྐྲ་ཤད་ཀྱང་ཁྱིམ་སྟོད་དུ་མི་འཇོག་པ་དང་། ཕྲུ་གུ་བཙས་པའི་ཚེ་སྒོའི་ཕྱི་རོལ་ཏུ་ཤུག་པ་འཛུགས་པ་དང་ཐོ་བསླངས་ཏེ། མི་མཐུན་པའི་རྫས་དང་མགྲོན་པོ་སོགས་ལ་འཛེམ་པ་སོགས་ཡིན་ནོ། །