ལྷ།
ཀློང་རྡོལ་བླ་མས། ལྷ་ཐམས་ཅད་གཙང་རིས་ཀྱི་མགོན་པོ་བདུན་ཅུ་རྩ་ལྔའི་ཁོངས་སུ་འདུ་བར་གསུངས་པ་ལྟར། དེ་དག་ནི་རྒྱལ་བོ་ཆེན་པོ་བཞི། ཕྱོགས་སྐྱོང་བ་བཅུ། ལྷ་ཆེན་པོ་བརྒྱད། ཀླུ་ཆེན་པོ་བརྒྱད། གཟའ་ཆེན་པོ་བརྒྱད། རྒྱུ་སྐར་ཉི་ཤུ་རྩ་བརྒྱད། འཇིགས་བྱེད་ཆེན་པོ་དགུ་སྟེ། བདུན་ཅུ་རྩ་ལྔའོ། །
ཆོས་འབྱུང་མཁས་པའི་དགའ་སྟོན་ལས་དཔལ་མགོན་བདུན་ཅུ་རྩ་གཉིས་ཞེས་འབྱུང་བ་བརྟག་དགོས། སྤྱིར་རྒྱལ་བོ་ཆེན་པོ་བཞི་དང་། ཕྱོགས་སྐྱོང་བ་བཅུ་འམ་བཅོ་ལྔ། ལྷ་ཆེན་པོ་བརྒྱད། ཀླུ་ཆེན་པོ་བརྒྱད། གཟའ་ཆེན་པོ་བརྒྱད། རྒྱུ་སྐར་ཉི་ཤུ་རྩ་བརྒྱད། འཇིགས་བྱེད་ཆེན་པོ་དགུ་སྟེ་བརྒྱད་ཅུ་བོ། ཇོ་བོ་རྗེ་ཨ་ཏི་ཤ་སོགས་ཀྱིས་དཀར་བོ་བརྒྱད་ཅུ་ཞེས་འདྲེན་ཡང་། ཀུན་རིག་གི་དཀྱིལ་འཁོར་དང་ཤངས་པ་བཀའ་བརྒྱུད་རྣམས་ཀྱིས་ཕྱོགས་སྐྱོང་བཅོ་ལྔ་ལས་ལྔ་ཕྲི་ནས་གཙང་རིས་ཀྱི་དཔལ་མགོན་བདུན་ཅུ་དོན་ལྔར་བཤད་དོ། །དེ་དག་ལས།