༧ འཇིགས་བྱེད་དགུ།
༡ འཇིགས་བྱེད་ཀྱི་བདག་པོ་ཆེན་པོ་ནག་པོ་སྤྱན་གསུམ་པ། མཆེ་བ་གཙིགས་པ། འཇིགས་པའི་ཆ་བྱད་ཅན། ལག་གཡས་པས་ཁ་ཊཱཾ་ཀ་འཛིན་ཅིང་གཡོན་པས་ཨུ་མར་འཁྱུད་པ། ༢ འཇིགས་བྱེད་པྲ་མི་ཏ་དཀར་བོ་ལག་གཡས་པས་རིན་ཆེན་འབར་བ་འཛིན་ཅིང་། གཡོན་པས་ཚངས་མར་འཁྱུད་པ། ༣ འཇིགས་བྱེད་བྷཻ་ར་ཝ་སྔོ་ནག་ལག་གཡས་པས་རྡོ་རྗེ་རྩེ་གསུམ་འཛིན་ཅིང་། གཡོན་པས་བདེ་སོགས་མར་འཁྱུད་པ། ༤ འཇིགས་བྱེད་བྷཻ་ཤནྟྲ་དམར་ནག་ལག་གཡས་པས་མདའ་གཞུ་འཛིན་ཅིང་གཡོན་པས་ཁྱབ་འཇུག་མར་འཁྱུད་པ། ༥ འཇིགས་བྱེད་ཀུ་བེ་ར་དམར་ནག་ལག་གཡས་པས་ཐོད་དབྱུག་འཛིན་ཅིང་གཡོན་པས་རེའུ་དྲི་མར་འཁྱུད་པ། ༦ འཇིགས་བྱེད་ཡེ་ཤེས་བྷཻ་ར་ལྗང་ནག་ལག་གཡས་འཁོར་ལོ་འཛིན་ཅིང་གོ་རི་མར་འཁྱུད་པ། ༧ འཇིགས་བྱེད་བི་ཏི་སྔོ་ནག་ལག་གཡས་པས་དགྲ་སྟ་འཛིན་ཅིང་གཡོན་པས་ཝ་ར་ཧིར་འཁྱུད་པ། ༨ འཇིགས་བྱེད་ཀཱ་ལ་བྷཻ་ར་དུད་ཁ་ལག་གཡས་པས་རལ་གྲི་འཛིན་ཅིང་མ་ནུ་ཧ་ར་ལར་འཁྱུད་པ། ﹙འདིའི་ཁ་དོག་ས་སྐྱ་བས་སེར་བོ་དང་། རྒྱན་གཡེར་ལུགས་དམར་སྐྱ་དང་། རྗེ་ཡབ་སྲས་ཀྱིས་དུད་ཁར་བཞེད། ﹚༩ འཇིགས་བྱེད་ག་ན་བ་ཏི་སྔོ་ནག་ལག་གཡས་པས་རྡོ་རྗེ་འབར་བ་འཛིན་ཅིང་གཡོན་པས་ཙ་མུ་ཎྚྀར་འཁྱུད་པ། ཐམས་ཅད་ཀྱང་རབ་ཏུ་ཁྲོས་པའི་ཞལ་དང་ལྡན་པ། རང་མཚུངས་ཀྱི་བུད་མེད་ལ་ལག་པ་གཡོན་པས་འཁྱུད་པ་དང་ལྷན་གཅིག་པ། ས་སྐྱ་བ་ཐམས་ཅད་གཡས་བརྐྱངས་ཡིན་པར་བཞེད་ཀྱང་རྗེ་ཡབ་སྲས་ཀྱིས་གཡོན་བརྐྱངས་ཡིན་ཞེས་རྟ་མགྲིན་ཆོས་སྐོར་ལས་གསུངས་སོ། །
འདི་དག་ནི་རྒྱུད་ཀྱི་ཟིན་སོ་ཆེ་ཞིང་། འཇིག་རྟེན་དང་འཇིག་རྟེན་ལས་འདས་པའི་ཆ་གཉིས་རེ་དང་། དཀར་ཕྱོགས་དང་། ནག་ཕྱོགས་ཀྱི་ཆ་གཉིས་རེ་ཡོད། དཔེར་ན། སྔོན་འགྲོའི་གཏོར་མ་གཏོང་ཡུལ་ནི་འཇིག་རྟེན་པ་ཡིན་ཡང་། དཀར་ཕྱོགས་སྐྱོང་བའི་སྲུང་མ་ཡིན། ཕུར་བུ་འདེབས་ཡུལ་གྱི་ཕྱོགས་སྐྱོང་ནི་ནག་ཕྱོགས་ཀྱི་འཇིག་རྟེན་པ་ཡིན་པ་ལྟར། འདིར་དཀྱིལ་འཁོར་གྱི་དུར་ཁྲོད་ན་ཡོད་པ་ནི། གཙོ་བོའི་ཡེ་ཤེས་གྱི་སྣང་ཆ་ཡིན། གཞན་ཡང་། མདུད་ལྷ་སུམ་བརྒྱ་དྲུག་ཅུ། སྤོར་ཐང་བརྒྱད་ཅུའི་ལྷ། གབ་ཙེ་དགུའི་ལྷ། ལྷན་ཅིག་སྐྱེས་པའི་ལྷའི་རིགས་ལས་འགོ་བའི་ལྷ་ལྔ་སོགས་ཀྱི་ཆ་བྱད་དང་། གྲོགས་བྱེད་ཚུལ་སོགས་ནི། རྒྱས་པར་ཐུའུ་བཀྭན་ཆོས་ཉིའི་རྟ་མགྲིན་གསང་སྒྲུབ་ཀྱི་བསང་སྐོར་ལས་རྟོགས་པར་བྱའོ། །