གནོད་སྦྱིན།
མཆིམས་མཛོད་ལས། གནོད་སྦྱིན་ཕལ་མོ་ཆེ་ལྷའི་སྡེ་གཏོགས་དང་། ཀླུ་དང་ཡི་དྭགས་ཀྱི་རིགས་སུ་གཏོགས་པའང་ཡོད་པར་བཤད། མདོ་རྩའི་མཆན་དུ། གནོད་སྦྱིན་ནི་རྣམ་ཐོས་ལ་སོགས་པའི་ལྷའི་གནས་སུ་མཆོད་པར་བྱ་བ་གཏོར་མ་ལེན་པ་རྣམས་སོ། །ཞེས་པ་ལྟར། གནོད་སྦྱིན་གྱི་སྡེ་དཔོན་ཆེན་པོ་ནི་རྣམ་སྲས་ཡིན་ལ། དེ་ལ་གཙོ་འཁོར་བརྒྱད་དེ། ཛམ་བྷ་ལ། གང་བ་བཟང་བོ། ནོར་བུ་བཟང་བོ། ཡང་དག་ཤེས། འབྲོག་གནས་ནག་པོ། ལྔ་རྩེན་སེར་སྐྱ། ཙི་པི། ཀུན་དྷ་ལི་བཅས་སོ། །དེ་དག་ནི་ལོངས་སྤྱོད་ཧ་ཅང་ཆེ་བ། སྐུ་ཤ་རྒྱས་ཤིང་གསུས་ཁྱིམ་ཆེ་བ། ཕྱག་ན་དཔག་བསམ་ཤིང་དང་། རིན་པོ་ཆེ། གཏེར་བུམ། ནེའུ་ལེ་འཛིན་པ་དག་གོ །
ཡང་། རིགས་སྔགས་ཀྱི་རྒྱལ་མོ་རྨ་བྱ་ཆེན་མོ་ལས་འབྱུང་བ་ལྟར་ན། ཤར་དུ་རིང་བོ་དང་། མིག་བཟང་དང་། གང་བོ་དང་། སེང་སྐྱ་སྟེ་བཞི། ལྷོར་སེང་གེ་དང་། ཉེ་བའི་སེང་གེ་དང་། དུང་ཅན་དང་། དགའ་བོ་སྟེ་བཞི། ནུབ་ཏུ་སེང་གེ་དང་། སེང་གེ་རལ་བ་ཅན་དང་། བླ་མ་དང་། སེར་སྐྱ་སྟེ་བཞི། བྱང་དུ་འཛིན་པ་དང་། འཛིན་དགའ་དང་། བརྩོན་སྐྱོང་དང་། ཁྱབ་འཇུག་སྟེ་བཞི། ཕྱོགས་མཚམས་སུ་ལྔ་སྤྱོད་དང་། ཚིགས་ལྔ་སེར་བོ་དང་། རི་མཉམ་དང་། གསེར་ཅན་ཏེ་བཞི། ས་ལ་པ་བ་དང་། ཤིན་ཏུ་སངས་དང་། ནག་པོ་དང་། ཉེ་ནག་སྟེ་བཞི། བར་སྣང་ལ་ཉི་མ་དང་། ཟླ་བ་དང་། མེ་དང་། རླུང་སྟེ་བཞི་བཅས་ཁྱོན་བསྡོམས་གནོད་སྦྱིན་ཉེར་བརྒྱད་དོ། །
འདུལ་གཞུང་ལས། ཀུན་དགའ་བོ་ཁྱོད་ཀྱིས་རྣམ་ཐོས་བུའི་ཆོས་ཀྱི་སྤུན་གང་ཡིན་པ་དག་སེམས་ཅན་རྣམས་སྲུང་ཞིང་སྐྱོང་བར་བྱེད་པ། འཇིག་རྟེན་ན་ཡམས་ཀྱི་ནད་དང་གནོད་པ་དང་འཁྲུགས་པ་མེད་པར་བྱེད་པ། འཇིག་རྟེན་ན་ཕན་པར་བྱེད་པ་རྣམས་ཀྱི་མིང་ཟུངས་ཤིག འདི་ལྟ་སྟེ། དབང་བོ་དང་། ཟླ་བ་དང་། ཆུ་ལྷ་དང་། སྐྱེ་དགུའི་བདག་པོ་དང་། བྷ་ར་དྷྭ་ཛ་དང་། དབང་ལྡན་དང་། ཙན་དན་དང་། འདོད་པའི་གཙོ་བོ་དང་། མགྲིན་ངན་དང་། པ་ཊི་དང་། ནོར་བུ་དང་། ནོར་བུ་སྤྱོད་དང་། སྒྲ་རབ་དང་། ཉེ་ལྔ་བོ་དང་། རི་མཉམ་དང་། གསེར་ཅན་དང་། གང་བོ་དང་། སེང་ལྡེང་དང་། གཡོན་ཅན་དང་། བ་ལང་སྐྱོང་དང་། འབྲོག་གནས་དང་། མི་ཡི་རྒྱལ་བོ་དང་། རྒྱལ་བའི་ཁྱུ་མཆོག་དང་། ལྕགས་མདུང་རིང་བོ་དང་ལྡན་པ་སྟེ། གནོད་སྦྱིན་ཆེན་པོ་རྣམས་སོ། །
འོན་ཀྱང་། ལོ་རྒྱུས་ཆེན་མོའི་སྐབས་སུ། དང་བོ་གནོད་སྦྱིན་ནག་པོས་དབང་བྱས་ཏེ། །ཞེས་དང་། སྤྲིན་གྱི་ཕོ་ཉ་ལས། གནོད་སྦྱིན་རྒྱལ་བོའི་མཛོད་གཉེར་ཞིག རྒྱལ་བོར་འགལ་ཏེ་ཆད་པ་བཅད་པ་དེ་དང་། སྐབས་འདིར་བཤད་ཀྱི་གནོད་སྦྱིན་གཅིག་ཏུ་འགབ་པར་མི་བྱའོ། །