མ་མོ།
མ་མོ་ཞེས་པའི་ཐ་སྙད་འདི། ནམ་མཁའི་ནོར་བུས་བོན་ལས་དབྱལ་མ་མོ་ཞེས་པ་སྟེ། དབྱལ་ནི་ལྕམ་གྱི་བརྡ་རྙིང་དུ་བཤད་ཅིང་། མ་མོ་ཞེས་པ་ནི་དབྱལ་གྱི་ནང་ནས་ཀྱང་ཆེས་སྔ་བའི་མ་ཆེན་མོ་ལྟ་བུ་ཞིག་ཡིན་ཡང་ཟེར།
མ་མོ་བརྒྱད་ནི། འཇིག་རྟེན་པའི་ལྷ་ཆེན་པོ་བརྒྱད་ཀྱི་བཙུན་མོ་སྟེ། བདེ་ཆེན་བློ་བཟང་ཆོས་འཕེལ་རྒྱ་མཚོའི་གདུགས་འགྲེལ་ལས། དབང་མོ་ཚངས་མ། ཁྱབ་འཇུག་མ། དྲག་མོ། གཞོན་ནུ་མ། ཕག་མོ། དཔལ་མོ། རྒན་བྱེད་མ་སྟེ་མ་མོ་བརྒྱད་དང་། ཀློང་རྡོལ་བླ་མས། ཚངས་མ། དྲག་མོ། ཁྱབ་འཇུག་མ། གཞོན་ནུ་མ། དབང་མོ། ཕག་མོ། གཤིན་རྗེ་མོ། ལུས་ངན་མོ་བཅས་འདྲེན་པ་དང་། གཞན་ཡང་། མ་མོ་བདུན་འདྲེན་ཚེ། ཚངས་མ་དབང་མོ་གཞོན་ནུ་མ། །ལྷ་ཆེན་མ་དང་རྟོག་འདོད་མ། །རྒན་ཆེན་མ་དང་སྣ་ཆེན་མ། །ཞེས་སོ། །
ཡང་། ཐུའུ་བཀྭན་ཆོས་ཉིའི་རྟ་མགྲིན་གསང་སྒྲུབ་ཀྱི་ནད་བདག་སྟོབས་འཇོམས་ཀྱི་ཆོ་ག་འཁྱེར་བདེ་ལས། ནད་བདག་མོ་བུད་མེད་ནག་མོ་འཇིགས་པའི་གཟུགས་ཅན་ཁྲག་གི་རལ་བ་བསྙིལ་བ་ཐལ་མོ་བརྡེབ་པའི་ཚུལ་ལངས་སྟབས་སུ་ཡོད་པ་ཆེ་བ་གཅིག་དང་། ཕྱོགས་བཞིར་རང་འདྲ་དེ་ལས་ཆུང་བ་བཞི། ཞེས་གསུངས་ལ། ནད་བདག་མ་མོ་དེའི་འབྱུང་ཁུངས་དང་ནད་གཏོང་ཚུལ་ཡང་དེ་ཉིད་ལས། སྲིད་ལ་ལས་ཀྱི་ནད་བདག་མོ། །བདུད་མོ་ཁྲག་མིག་རལ་བ་ཅན། །གཉན་མོ་ཁ་འབར་ཞེས་བྱ་བ། །ནད་ཀྱི་བདག་མོ་ཆེན་མོ་ཞིག །རྒྱ་མཚོའི་གཏིང་ནས་སྐུ་བསྐྱོད་དེ། །རི་རབ་ཟོམ་ལ་བརྟེན་བྱས་ནས། །ཐལ་མོ་བར་སྣང་ཁམས་སུ་བརྡེབ། །ང་རོ་ནམ་མཁའི་མཐོངས་སུ་འབོད། །ནམ་མཁའ་ནད་ཀྱི་རླངས་པས་སྒྲིབ། །ས་ནད་མེ་ལྟར་འབར་བ་དང་། །གཉན་ནད་ནག་པོ་རྒྱུག་འགྱེལ་དང་། །རྩ་ནད་ཧ་ལ་ལྕོག་འགྱེལ་དང་། །བདུད་ནད་ཐོམ་པོ་མགོ་ཡོར་དང་། །བལ་ནད་ནག་པོ་སུམ་སྒྲིལ་དང་། །འདྲེ་ནད་འཛུམ་པ་ལྟག་སྒྱེད་དང་། །འབྲུམ་ནད་ཧས་གཉན་ག་བ་དང་། །སྐྱ་འབྲུམ་ཆུ་སྦུར་ལུག་མིག་དང་། །མཛེ་ནད་ཤུ་བ་ཕོལ་མིག་འབྲས། །དམུ་ཆུ་རྦབ་མཇིང་འཆུ་ས་དང་། །རྩ་རྒྱུག་མིག་སེར་ཤ་ཡ་དང་། །སད་དང་སེར་བ་བཙའ་དང་འབུ། །དུས་ཀྱི་འཁྲུགས་པ་གློ་བུར་གཏོང་། །སྡེ་བ་ནང་འཐབ་བྱེད་པ་དང་། །བཙུན་པ་གྲི་རུ་གསོད་པ་དང་། །བཙུན་མ་ལུས་རྒྱས་ནལ་བུ་གསོད། །ཁྱོད་ཉིད་ཁྲོས་པའི་སྔ་ལྟས་ཡིན། །ཞེས་པས་ཤེས་ནུས་སོ། །
ཡང་། ཤེར་སྙིང་བདུད་བཟློག་གི་ཆོ་ག་ཞིག་ལས། མ་མོ་མ་ཅིག་ཡམ་བདག་ཅེས་པ། ལག་པ་གཡས་པ་ན་བདུད་ཀྱི་ཁྲམ་བམ་དང་གཡོན་པ་ན་བཙན་གྱི་ཤྭ་རྡེལ་དཀར་ནག མཆན་ཁུང་གཡས་ན་གཤིན་རྗེ་ཁྲམ་ཤིང་དམར་བོ་དང་གཡོན་ན་ནད་ཀྱི་རྐྱལ་བ་ནག་པོ་ལ་སྦྲུལ་ནག་ལྔ་བརྒྱའི་ཁ་ཆིངས་ཅན་ཡོད་པར་ཡང་གསུངས་སོ། །
མ་མོའི་རྫོང་འདེབས་ལའང་། བསྒྲུབ་བྱའི་ཁྲུས་ཆུས་སྤྲུས་པའི་ཟན་ལ་ལུས་ཀྱི་དྲི་མ་བསྲེས་ཤིང་མི་ཕྱུགས་མང་བོའི་ཁ་སྣའི་དབུགས་ཀྱིས་བདུག་པས་གླུད་སྐེ་མཆེད་དོད་པ། གོས་དུམ་དང་། དར་ཟབ་ཡུངས་དཀར་གྱིས་བརྒྱན་པ་དང་། མཐའ་བསྐོར་དུ་བཤོས་བུ་ནག་པོ་ཟུར་གསུམ། ནལ་བུའི་ཤ་ཁྲག ལུག་ནག་རྨ་བྱ་སོགས། མདའ་འཕང་ནག་པོ། ཆངས་བུ། མཐེབ་ཀྱུ། ངར་མི། ཤ་སྣ། ཁྲག་སྣ། རུས་པ། ལོ་མ། སྦང་མ། སྒོག་པ། ལ་ཕུག ནས་འབྲས་གྲོ་སྲན། བཙོས་པའི་མཆན། སྣམ་ཐེར་གོས་དར་གྱི་དུམ་བུ། རིན་པོ་ཆེའི་རིགས། ས་སྣ་སོགས་རེ་རེ་གྲངས་བརྒྱ་རེ་ཚང་བའམ། མ་འབྱོར་ན་གང་འཇོམས་སོ། །རྫོང་འདེབས་རན་དུས་གུ་གུལ་གྱིས་བདུག ཡུངས་དཀར་གྱིས་བྲབས། རོལ་མོ་ཚམ་རྔམས་དང་བཅས་གླུད་ཡས་རྣམས་ཀོ་གྲུ་ལྟ་བུར་བཅུག་སྟེ་ཆུ་བོར་བསྐུར་བའམ། ཡང་ན། ཐེབས་ཀྱི་ཕྱོགས་སུ་སྐྱེལ་ནས། སྐྱེལ་མིས་ཕྱིར་མིག་ཙམ་ཡང་མི་བལྟ་བར་སྐྱེལ་དགོས་སོ། །
མ་མོ་འདི་དག་གིས་གནོད་པ་བྱུང་ཚེ། མ་མོ་འཁྲུགས་བསྐང་དང་། འཁྲུགས་མདོས་སོགས་ཀྱི་ཆོ་གའང་ཡོད་དོ། །