འབྱུང་བོ།
གཏོར་མ་ཆ་གསུམ་ལས། འབྱུང་བོ་གང་དག་རི་རབ་སྟེང་གནས་དང་། །དགའ་བའི་ཚལ་དང་ལྷ་ཡི་གནས་རྣམས་དང་། །ཤར་ནུབ་རི་དང་ཉི་ཟླའི་ཁྱིམ་རྣམས་དང་། །རི་བོ་ཀུན་ལ་དེ་དག་གནས་པ་དང་། །རིན་ཆེན་གླིང་ན་ལྷག་པར་གང་གནས་དང་། །ཆུ་བོ་ཀུན་དང་ཆུ་བོའི་མདོ་རྣམས་དང་། །མཚོ་དང་རྫིང་བུ་ལྟེང་ཀ་ཆུ་ངོགས་དང་། །གཡའ་ཆུ་བསིལ་མ་ཅན་ན་གང་གནས་དང་། །གྲོང་དང་ཕྱུགས་ལྷས་གྲོང་ཁྱེར་སྟོང་བ་དང་། །ཁང་སྟོང་དག་དང་ལྷ་ཡི་ཁང་བ་དང་། །གཙུག་ལག་ཁང་དང་མཆོད་རྟེན་གནས་རྣམས་དང་། །དཀའ་ཐུབ་གནས་དང་གླང་ཆེན་བྲེས་རྣམས་དང་། །རྒྱལ་བོའི་དཀོར་ཁང་དག་ན་གང་གནས་དང་། །ལམ་སྲང་སུམ་མདོ་དང་ནི་བཞི་མདོ་དང་། །གང་དག་ལམ་པོ་ཆེ་དང་ཤིང་གཅིག་དྲུང་། །དུར་ཁྲོད་ཆེན་པོ་ནགས་ཚལ་ཆེན་པོ་དང་། །སེང་གེ་དྲེད་དང་གཅན་གཟན་གནས་རྣམས་དང་། །འབྲོག་ཆེན་འཇིགས་སུ་རུང་བར་གང་གནས་དང་། །གང་དག་གླིང་མཆོག་དག་ན་གནས་པ་དང་། །ལྷུན་པོ་དུར་ཁྲོད་དག་ན་གནས་པ་རྣམས། །ཞེས་སོགས་གནས་ཡུལ་མང་དུ་གསུངས་ཡོད་པ་དང་།
ཁ་ཟས་ལ་ཡང་ཆ་གསུམ་ལས། ཕྲེང་བ་མེ་ཏོག་དྲི་དང་བདུག་པར་བཅས། །བསྟོད་དང་གཏོར་མ་མར་མེ་གུས་འབུལ་ན། །འདི་དག་བཏུང་ཤིང་ལེགས་པར་གསོལ་ནས་ཀྱང་། །ཞེས་དང་། བཟའ་བ་ཤ་ཆང་ལ་ཕུག་བཅས། །འབྲས་ཆན་འབྲས་བུ་མང་བོ་དག །མཆོད་པ་འདི་ཡིས་མགུ་བྱས་ལ། །གསུངས་པ་དང་། འབྱུང་བོའི་བདག་པོ་ནི་ཐལ་མདོག་ཕྱག་བཞི་བ། ཁྱུ་མཆོག་ལ་བཅིབ་པ། ཕྱག་གཡས་པ་གཉིས་ན་རྩེ་གསུམ་དང་ཨ་སྨྲ། གཡོན་པ་གཉིས་ན་རིལ་བ་སྤྱི་བླུགས་དང་། རཀྵའི་ཕྲེང་བ་འཛིན་པ་ཡུམ་དང་བཅས་པའོ། །ཡང་། དགེ་སློང་མའི་འདུལ་བ་རྣམ་འབྱེད་ལས། འབྱུང་བོ་ཞེས་བྱ་བ་ནི་སྦྲུལ་དང་། སྡིག་སྦྲུལ་དང་། ཏྲེ་མ་བུ་ག་དང་། ཏྲེ་ལ་ཏ་དང་། སྲིན་འབུ་དང་། ཕྱེ་མ་ལེབ་དང་། ཏིལ་གྱི་ཕུབ་མ་ཟ་བ་སྟེ། དེ་དག་གི་ཤིང་གང་ཡིན་པས་ནི་འབྱུང་བོའི་གནས་ཞེས་བྱའོ། །ཞེས་སོ། །གསོ་རིག་ལས་འབྱུང་བོའི་གདོན་བཅོས་ཐབས་ལ། མན་ངག་རིན་ཆེན་འབྱུང་གནས་ལས། ཤ་ཟ་སྲིན་པོ་ལ་སོགས་པ། །འབྱུང་བོའི་གདོན་གྱིས་ཟིན་པ་ལ། །ག་བུར་དུད་པས་བདུགས་ན་ཕན། །དེ་ཝ་པི་བལ་ཞེས་བྱའི་ཤིང་། །ལོ་སྡོང་གང་བྱས་སྐྱེར་བ་འདྲ། །མེ་ཏོག་ཀུ་ཤུའི་མེ་ཏོག་འདྲ། །འབྲས་བུ་ཀུ་ཤུ་འདྲ་ལ་ཆུང་། །ཤིང་དེའི་ལོ་མ་ཁ་འཕེལ་དུས། །བཏུས་ལ་གྲིབ་སྐམ་ཉར་ཚགས་བྱ། །ཚང་སྲིན་ལ་སོགས་གདོན་གྱི་རིགས། །གང་གིས་ཟིན་པར་གྱུར་ན་ཡང་། །ཤིང་དེའི་ལོ་མ་རྣ་བ་རུ། །བཅུག་ན་གདོན་དེ་ཚིག་གྱུར་ནས། །དཔག་ཚད་བརྒྱ་རུ་འབྲོ་བར་འགྱུར། །སྤེན་ཐོག་པ་ཡི་དུད་པ་ནི། །བཏང་ན་གདོན་རིགས་གང་ཡིན་པ། །སྐད་ངན་འཆོར་ཞིང་བྱེར་བར་འགྱུར། །ཞེས་གསུངས་ཡོད་དོ། །