གདོན།
གདོན་གྱི་སྒྲ་བཤད་ལ། གཡུ་ཐོག་དགོངས་རྒྱན་ལས། གདོན་ནི། རང་ངོ་མ་ཤེས་པ་འཕྲུལ་བའི་རྣམ་རྟོག་གིས་ཕན་གནོད་སྒྲོ་བཏགས་བྱས་པ་ལས་བྱུང་བའི་མི་མིན་གྱི་གནོད་པ་གཏོང་བའི་ནུས་མཐུའི་མིང་ངོ་། །དེ་ལ་ཅིའི་ཕྱིར་གདོན་ཞེས་བརྗོད་ན། རྣམ་རྟོག་ལས་བྱུང་བའི་འདྲེ་བོ་ཆེ་དེས་ལུས་ཅན་གྱི་བླ་ཚེ་སྲོག་གསུམ་གདོན་ཞིང་འཕྲོག་པར་བྱ་བའི་ཕྱིར་གདོན་ཞེས་བྱ། གཞན་ཡང་། གདོན་གྱི་སྐད་དོད་ལ་གྲ་ཧཱ་སྟེ། ཉེ་བར་ལེན་པའམ་འཛིན་པ་ལ་འཇུག ཀློང་རྡོལ་བླ་མས། ནག་ཕྱོགས་བདུད་རིགས་ནི། གནས་གདོན། ལུས་གདོན། ལས་གདོན་གསུམ་ལ་དྲུག་དྲུག་ཏུ་ཕྱེ་བ་ལས། གཙོ་བོའི་གདོན་བཅོ་བརྒྱད་དོ། །དེ་དག་ལོ་གཅིག་གི་ཞག་རེ་ནས་དེ་གསུམ་གསུམ་གྱིས་བར་ཆད་བརྩམས་པའི་ཆ་ནས་གདོན་རིགས་སུམ་བརྒྱ་དྲུག་ཅུའོ། །ཞེས་མ་ཅིག་གི་གཅོད་གཞུང་ལས་གསུངས་པར་བཤད་དོ། །དུང་དཀར་ཚིག་མཛོད་ལས། གདོན་རིགས་བཅོ་བརྒྱད་ནི། ལྷ། ལྷ་མིན། དྲི་ཟ། ཀླུ། གནོད་སྦྱིན། ཚངས་པ། སྲིན་པོ། ཤ་ཟ། ཡི་དྭགས། གྲུལ་བུམ། བྱད་སྟེམས། གཡེང་བྱེད། རོ་ལངས། མཚུན་ལྷ། བླ་མ། དྲང་སྲོང་། རྒན་པོ། གྲུབ་པ་བཅས་གསུངས་སོ། །
ཡང་། མ་ཅིག་གི་གཅོད་གཞུང་ལས། གཙོ་བོའི་གདོན་ཆེན་བཅོ་བརྒྱད་འདི་ལྟར་ངོས་བཟུང་ཡོད་དེ། རྣམ་རྟོག་ཅན་ལྷ་འདྲེའི་གདོན། རླུང་ཆེ་ཅན་རྩ་རླུང་གི་གདོན། བསམ་རྒྱ་ཅན་ཁ་ཕྱིར་ལྟོས་ཀྱི་གདོན། ཉལ་སྣང་ཅན་ཞེན་ཆགས་ཀྱི་གདོན། གཏི་མུག་ཅན་བྱིང་རྒོད་ཀྱི་གདོན། གཉིད་བོ་ཆེ་ལང་འཚེར་གྱི་གདོན། སྙིང་རུས་མེད་པ་འཚེར་སྣང་གི་གདོན། གྲོད་པོ་ཆེ་ལྟོ་གདུང་གི་གདོན། ཟས་སྲེད་ཅན་ཞིམ་མངར་གྱི་གདོན། མཐུན་འཇུག་ཅན་རྣམ་གཡེང་གི་གདོན། ཞེན་ལོག་ཅན་བློ་རྒོད་ཀྱི་གདོན། བཟང་འདོད་ཅན་ཟོག་པོའི་གདོན། སེམས་ཞུམ་ཅན་དགེ་སྦྱོར་རྒྱང་བསྐྱུར་གྱི་གདོན། ཕྱི་བཤོལ་ཅན་ལེ་ལོའི་གདོན། ཕྱི་ཚིས་ཅན་གསོག་འཇོག་གི་གདོན། ལས་ངན་ཅན་ནད་གདོན་སློང་ཚད་ཀྱི་གདོན། རློམ་སེམས་ཅན་ཁྱད་གསོད་ཀྱི་གདོན། རེ་དོགས་ཅན་ཁུ་འཁྲིག་བར་ཆད་ཀྱི་གདོན་ཏེ་བཅོ་བརྒྱད་དོ། །ཡང་འཇམ་དཔལ་རྩ་རྒྱུད་ལས་ཚངས་བའི་ཆུང་མ་སོགས་མོ་གདོན་བཅུ་དགུ་ཡང་གསུངས་སོ། །
ཡང་བྱིས་པ་ལོ་བཅོ་ལྔ་མན་ཆད་ལ་གནོད་པའི་གདོན་ཆེན་བཅོ་ལྔ་ཡོད་དེ། ༡ འཇམ་པ་པོ་ནི་བ་ལང་གཟུགས། །དེས་ཟིན་མིག་ནི་རབ་ཏུ་འགྱུར། །༢ རི་དྭགས་རྒྱལ་བོ་རི་དྭགས་འདྲ། །དེས་ཟིན་སྐྱུགས་པ་མི་ཟད་སྐྱུགས། །༣ སྐེམ་བྱེད་པ་ནི་གཞོན་ནུའི་གཟུགས། །དེས་ཟིན་བྱིས་པ་འགུལ་བར་བྱེད། །༤ བརྗེད་བྱེད་པ་ནི་ཝ་འདྲའོ། །དེས་ཟིན་འགྲེ་ཞིང་སྒྲ་ཡང་འབྱིན། །༥ ཁུ་ཚུར་ཅན་ནི་བྱ་རོག་གཟུགས། །དེས་ཟིན་ཁུ་ཚུར་བཅིངས་ཤིང་དགའ། །༦ མ་མོ་དེ་ནི་མི་ཡི་གཟུགས། །དེས་ཟིན་རྒོད་ཅིང་སྒྲ་ཡང་འབྱིན། །༧ ཛ་མི་ཀ་ནི་རྟ་ཡི་གཟུགས། །དེས་ཟིན་ནུ་ཞོ་མངོན་མི་དགའ། །༨ འདོད་པ་ཅན་ནི་རྡོ་རྗེའི་གཟུགས། །དེས་ཟིན་གཉིད་ལོག་ངུ་བར་བྱེད། །༩ ནམ་གྲུ་ཁྱི་ཡི་གཟུགས་ཀྱིས་ཏེ། །དེས་ཟིན་ལྕེ་ལ་སོས་ནི་འཆའ། །༡༠ སྲུལ་བོ་ཕག་གི་གཟུགས་ཀྱིས་སོ། །དེས་ཟིན་ཀུ་ཅོའི་སྒྲ་ཡང་འབྱིན། །༡༡ མ་དགའ་བྱེད་པ་བྱི་ལའི་གཟུགས། །དེས་ཟིན་སྣ་ཚོགས་གཟུགས་སུ་འགྱུར། །༡༢ བྱ་ནི་འདབ་ཆགས་གཟུགས་ཀྱིས་སོ། །དེས་ཟིན་མནམ་པའི་དྲི་རྣམས་འབྱུང་། །༡༣ གཉའ་ལག་ཅན་ནི་བྱ་གག་གཟུགས། །དེས་ཟིན་འགུལ་བ་རབ་ཏུ་འགགས། །༡༤ བཞིན་རྒྱས་འུག་པའི་གཟུགས་ཀྱིས་ཏེ། །དེས་ཟིན་རིམས་བཏབ་འཁྲུ་བར་བྱེད། །༡༥ མིག་འཕྱང་བ་ནི་ཕ་ཝང་གཟུགས། །དེས་ཟིན་སྤྱི་བུང་ལྡན་པར་འགྱུར། །ཞེས་དང་།
དེ་དག་གི་བྱེད་ལས་ཀྱང་། རཱ་ག་ཨ་སེའི་བྱིས་གླུད་ཟིན་བྲིས་ལས། བྱིས་པའི་གདོན་ཆེན་བཅོ་ལྔ་བོ། །རྟག་ཏུ་ཁྲག་ལ་འཐུང་རྣམས་ཀྱིས། །གང་ལ་བུ་ནི་མི་ཆགས་དང་། །གང་གི་མངལ་དུ་མི་གནས་དང་། །སྐྱེས་པ་བུད་མེད་འདུ་བ་དང་། །དབང་བོ་རྣམས་ཀྱང་མྱོས་པར་བགྱི། །མེར་མེར་བོ་དང་ནུར་ནུར་བོ། །བུ་ཡིས་ས་བོན་མ་རུངས་བགྱིད། །གང་ཡང་མངལ་ནི་མཐུར་དུ་གྲུབ། །ཤ་མ་མི་འབྱུང་གདོན་བགྱིད་པ། །འདི་དག་བྱིས་པ་སྐྲག་པར་བགྱི། །འདི་དག་བུ་འཕྲོག་མ་རུངས་པ། །བྱིས་པ་རྣམས་ལ་འཇིགས་བགྱིད་པ། །ཞེས་སོ། །
ཡང་། གཏོར་མ་ཆ་གསུམ་ལས་ཕྱོགས་སྐྱོང་བཅུའི་འཁོར་ཕལ་ཆེར་དང་། སྡེ་བརྒྱད་ཕལ་ཆེར་དང་འབྱུང་བོ་དང་བགེགས་རྣམས་ཀྱང་གདོན་གྱི་རིགས་སུ་བཤད་དོ། །
གཞན་ཡང་། སྟེང་གདོན་གཟའ་དང་ཁྱབ་འཇུག བར་གདོན་བཙན་དང་རྒྱལ་བོ། འོག་གདོན་ཀླུ་དང་ས་བདག་ཏུའང་གསུངས་ལ། གླུད་ཀྱི་ཆོ་ག་རྐྱེན་ངན་ཀུན་སེལ་ལས། སྟེང་གདོན་ལྷ་སྲིན་དྲེགས་པ་ཅན། །འོག་གདོན་ཀླུ་སྲིན་ཀླུ་གཉན་དང་། །བར་གདོན་བདུད་དང་རྒྱལ་བོ་བཙན། །ཞེས་དང་། གསོ་རིག་གི་གཞུང་ལྟར་ན། སྟེང་གདོན་གཟའ་དང་རྒྱུ་སྐར་ཏེ། རླུང་གི་རང་བཞིན་ཅན་དང་། བར་གདོན་ནི་བཙན་དང་རྒྱལ་བོ་སྟེ་མཁྲིས་པའི་རང་བཞིན་ཅན་དང་། འོག་གདོན་ནི་ཀླུ་དང་ས་བདག་སྟེ་བད་ཀན་གྱི་རང་བཞིན་ཅན་ཞེས་གསུངས་སོ། །
ཡང་། གདོན་སེལ་མན་ངག་སྨན་སྦྱོར་ཞིག་ལ། རིག་པ་མཆོག་གི་རྒྱུད་ལས། ཡུངས་དཀར་ཤུ་དག་ཤིང་ཀུན་པི་པི་ལིང་། །ན་ལེ་ཤམ་དང་ཆ་མཉམ་འབྲས་བུ་གསུམ། །གི་རི་ཀར་ཎི་དཀར་བོ་དག་དང་ནི། །རུ་རྟ་པྲི་ཡང་ཀུ་དང་བཅའ་སྒ་དང་། །ཐང་ཤིང་པུ་ཤིལ་ཙེ་དང་བཅས་པ་དང་། །ནག་ཏ་མ་ལའི་འབྲས་བུར་བཅས་པ་རྣམས། །བ་གཅིན་དག་གིས་བཏགས་ཏེ་མར་དུ་བཙོ། །བ་གཅིན་བཞི་འགྱུར་བླུགས་པའི་སྨན་མར་དེ། །མིག་བསྐུ་སྣར་བླུགས་ལུས་བྱུགས་གདོན་ཀུན་གྲོལ། །གདོན་རྣམས་ཀུན་གྱི་སྨན་མཆོག་དམ་པར་བཤད། །ཅེས་སོ། །