[༧༧] མཁན་ཆེན་བརྩོན་འགྲུས་རིན་པོ་ཆེ།
མཁན་ཆེན་པདྨ་ཐེག་མཆོག་བློ་ལྡན་དང་ཨ་བོའི་མཁན་པོ་འཇིགས་མེད་བློ་གྲོས་རྣམ་གཉིས་ཀྱི་ཞལ་སློབ་མཁན་ཆེན་བརྩོན་འགྲུས་རིན་པོ་ཆེ་ནི། སྤྱི་ལོ་༡༩༢༠པ་བོད་རབ་བྱུང་བཅོ་ལྔ་པའི་ལྕགས་སྤྲེལ་ལོར་ཡབ་ཉེན་པ་བསྟན་པ་འཕེལ་རྒྱས་དང་། ཡུམ་སྐྱ་བཟའ་ཚེ་སྒྲོན་གཉིས་ཀྱི་སྐྱེད་ཁྱིམ་དུ་བྱང་ཕྱོགས་ཆུ་དམར་ལེབ་དུ་སྐུ་འཁྲུངས། དགུང་ལོ་བརྒྱད་ནས་ཕ་ཡབ་ནས་ཡིག་ཀློག་བསླབས་པས་དཀའ་ཚེགས་མེད་པར་མཁྱེན་པས་ཐམས་ཅད་ཀྱིས་སེ་རའི་གྲྭ་ཆུང་མཁས་པ་ཞེས་བསྔགས་བརྗོད་བྱེད་པ་བྱུང་། ཆུང་དུས་ནས་འཁོར་བ་ལ་ངེས་པར་འབྱུང་བའི་བློ་བཅོས་མིན་མངའ་བས་རང་མོས་ཀྱིས་ཆོས་ལམ་ལ་ཞུགས་ཏེ་དགེ་རྙིང་གི་ཆོས་སྤྱོད་བསྐང་གསོལ་ཐམས་ཅད་བློ་རྒྱུགས་སྤྲོད་ཐུབ་པ་མཛད། སྐྱེས་ཐོབ་ཀྱི་ཤེས་རབ་རྨད་དུ་བྱུང་བས་རིག་པའི་གནས་ཆེ་ཕྲ་ཀུན་འགོ་སྨྲོས་པ་ཙམ་གྱིས་ཁོང་དུ་ཆུད་པར་གྲགས། དཔལ་ཡུལ་དར་ཐར་དགོན་གྱི་བླ་མ་རིག་བློ་ཡུལ་དེར་འབུལ་སྡུད་ལ་ཕེབས་པ་ལས་འབྱུང་རྩིས་དང་ཡིག་གཟུགས་སོགས་སྦྱངས། དཔལ་ཡུལ་གཟི་འགག་མཆོག་སྤྲུལ་ཡུལ་དེར་འགྲོ་དོན་ལ་ཕེབས་པ་ལས་རབ་ཏུ་བྱུང་བ་དགེ་ཚུལ་གྱི་སྡོམ་པ་བཞེས། རཏྣའི་ཕུར་བ་དང་། ཀར་གླིང་ཞི་ཁྲོ་སོགས་ཀྱི་དབང་ལུང་ཡང་ཞུས། དེ་ནས་རྫོགས་ཆེན་མཁན་པོ་ཆོས་ཚ་བུ་རྒྱུད་དུ་ཕེབས་པའི་མདུན་ནས་སྔོན་འགྲོ་ཐར་ལམ་དཀར་པོ་དང་ཁྲིད་ཡིག་ཀུན་བཟང་བླ་མའི་ཞལ་ལུང་། སུམ་རྟགས། སྨན་རྩིས། སྨིན་གླིང་རྡོར་སེམས་ཀྱི་དབང་ལུང་། ཕྱག་ལེན་འདོན་རྟ་དབྱངས་སོགས་ལ་མཁས་པར་སྦྱངས་ཤིང་སེམས་ཁྲིད་ཀྱང་ཞུས། ཞེ་ཆེན་མཁན་པོ་གཙུག་ཏོར་ཅན་བུ་རྒྱུད་དུ་ཕེབས་པའི་མདུན་ནས་སྨིན་གླིང་ཆོས་སྤྱོད། དམ་ཅན་སྤྱི་གཏོར། དབྱར་གནས་འདོན་ཆ་སོགས་ཀྱི་ལུང་ཞུས། རྫོགས་ཆེན་ཀོང་སྤྲུལ་དཀོན་མཆོག་འཇིགས་མེད་དབང་པོ་བུ་རྒྱུད་དུ་ཕེབས་པ་ན་ཡབ་རྒན་གྱིས་ངའི་བུ་འདི་ཁྱེད་ལ་ཕུལ་བ་ཡིན་ཞེས་ཞུས་པས་ཐུགས་དགྱེས་ཚོར་ཆེན་པོས་མི་རིང་བར་རྫོགས་ཆེན་དགོན་དུ་འོངས་དགོས་ཞེས་གསུངས་པ་བཞིན་ལོ་རྗེས་མར་གྲྭ་པ་ཁ་ཤས་དང་མཉམ་དུ་རྫོགས་ཆེན་དགོན་དུ་ཕེབས། ཀོང་སྤྲུལ་རིན་པོ་ཆེ་ནས་དམིགས་བསལ་གྱི་བརྩེ་གཟིགས་ཆེན་པོས་ཤྲཱི་སེང་ཆོས་གྲྭའི་ཕོགས་ཐོབ་ཅན་གྱི་གྲྭ་བ་ལྔ་བཅུ་ཡོད་པའི་ཁོངས་སུ་བཞག སྐབས་དེའི་ཤྲཱི་སེང་ཆོས་གྲྭའི་ལས་ཐོག་མཁན་པོ་འཆི་མེད་ཡེ་ཤེས་ལས་ཆོས་སྡེའི་རྩ་བའི་ཡིག་ཆ་རྒྱ་གཞུང་ཆེན་མོ་བཅུ་གསུམ་གྱི་མཆན་འགྲེལ་འགྲེལ་མཆན་ཆ་ལག་དང་བཅས་པའི་བཤད་པ་དང་། སྐབས་དང་སྐབས་སུ་མཁས་གྲུབ་ངག་དབང་ནོར་བུའི་མདུན་ནས་ཡེ་ཤེས་བླ་མ་སོགས་ཀྱི་དབང་ཁྲིད་མང་པོ་དང་། མངོན་པ་མཛོད་རང་འགྲེལ་དང་མཆིམས་ཆེན་སོགས་གཞུང་འགྲེལ་ཆེན་མོ་འགའ། མཁན་པོ་འཇིགས་བློའི་མདུན་ནས་འཇམ་མགོན་མི་ཕམ་རིན་པོ་ཆེའི་ཚད་མ་རྣམ་འགྲེལ་དང་མཁས་འཇུག་སོགས་ཞུས་ཤིང་། ཆོས་དང་འཇིག་རྟེན་གང་ཐད་ནས་བརྩེ་གཟིགས་ཚད་མེད་པས་འདི་གཉིས་བཀའ་དྲིན་ཆེ་བའི་བླ་མ་གཉིས་ཡིན་གསུངས། གཞན་ཡང་མཁན་ཆེན་ལྷ་སྒང་མདུན་ནས་བསྙེན་རྫོགས་ཀྱི་སྡོམ་པ་དང་བྱང་ཆུབ་སེམས་སྡོམ་བཞེས་ཤིང་སྐུ་ཚེ་གང་བོར་ཤ་མི་གསོལ་བའི་དམ་བཅའ་མཛད། ཤྲཱི་སེང་ཆོར་གྲྭར་བཞུགས་སྐབས་མཚན་མོའི་རིང་དཔེ་ཆ་སྐྱོར་སྦྱང་ཟླ་འོད་ལ་བརྟེན་ཏེ་མཛད་ཅིང་ཟླ་བ་བརྒལ་བ་ན་ཕྱིར་ལོག་པའི་ལམ་མ་གཟིགས་ཏེ་ལ་མགོར་ལུས་པ་ཐེངས་གཉིས་ཙམ་བྱུང་བ་དང་། ཕལ་སྐད་དང་ཚིག་ལྷད་མེད་པའི་བཤད་སྒྲོས་ཉིན་མཚན་སྦྲེལ་ཏེ་སྐད་ཆེན་པོས་སྦྱངས་པས་མཆེད་གྲོགས་གཞན་དག་གིས་བརྩོན་འགྲུས་ལ་སེམས་སྐྱོན་བྱུང་ཚུལ་གླེང་ཞིང་། ཉི་མ་རེ་རེ་བཞིན་དཔེ་ཁྲིད་གང་གནང་བའི་ཆོས་ཐུན་དེ་ཉུང་མཐར་ཚར་བཅུ་ལས་མི་ཉུང་བར་སྐྱོར་སྦྱང་གནང་བ་སོགས་ཆོས་ཕྱིར་དཀའ་དཔྱད་མཛད་པ་བསམ་གྱིས་མི་ཁྱབ། གཞན་ཡང་མཁན་ཆེན་ཐུབ་སྙན་གྲགས། མཁན་ཆེན་པདྨ་ཚེ་དབང་། གླིང་སྤྲུལ་ཐུབ་བསྟན་ཕྲིན་ལས་རྒྱ་མཚོ་དང་། གྲུབ་དབང་དྲུག་པ་འཇིགས་བྲལ་བྱང་ཆུབ་རྡོ་རྗེ་སོགས་སྐྱེས་ཆེན་རྣམས་ལས་བཀའ་གཏེར་གསར་རྙིང་གི་དབང་ལུང་མང་པོ་གསན། དེ་མཚམས་ཞིག་ན་རང་ཡུལ་དུ་ལོག་ནས་ལོ་གཅིག་ཙམ་བཞུགས། སླར་རྫོགས་ཆེན་དུ་ཕེབས་པའི་ལམ་བར་ནས་མར་དོ་བོ་ཞིག་ཡོད་པ་རྫ་ཆུས་ཁྱེར་ཤོར། རྫོགས་ཆེན་དུ་སླེབས་ནས་ཟླ་ཤས་རིང་སློབ་སྦྱོང་གནང་ནས་དབྱར་ཁར་སྡེ་དགེ་དགོན་ཆེན་དུ་ཕེབས་ཏེ་གཞུང་འགྲེལ་སྐོར་ཕྱག་དཔེ་མང་ཙམ་བླུས་ནས་ཚུར་འབྱོར། མཁན་ཆེན་འཇིགས་མེད་ཡོན་ཏན་མགོན་པོ་ལས་སྙིང་ཐིག་ཡ་བཞིའི་དབང་ལུང་སོགས་ཟབ་ཁྲིད་མང་པོ་ཞུས་པ་དང་། རྫོགས་ཆེན་དགོན་གྱི་དབུ་མཛད་སྐར་མགོན་མདུན་ནས་གདངས་དབྱངས་རོལ་མོ། གཏོར་མ་རྒྱན་བཅའ་སོགས་མཐར་ཕྱིན་པར་སྦྱངས། དེ་སྐོར་ཞིག་ལ་ཞེ་ཆེན་མཁན་པོ་གཙུག་ཏོར་ཅན་ནས་ཕྱག་བྲིས་ཕེབས་གསལ་དུ། ཁྱེད་རང་གི་ལོ་རྒྱུས་ཀོང་སྤྲུལ་རིན་པོ་ཆེ་ལ་ཞུས་པ་ཡིན། ཁྱེད་རང་འདིར་འོང་ན་སེམས་ཁྲིད་ངེས་པར་ཐོབ་ས་རེད་ཨེ་ཡོང་མི་ཡོང་ཁྱེད་རང་ཤེས། ཡོང་ན་སྡོད་གནས་སོགས་ང་རང་གིས་ཐབས་བྱེད་ཆོག་གསུངས་པར། འགྲོ་འདོད་ཆེན་པོ་བྱུང་ཡང་རེ་ཞིག་འགྲོ་མ་ཐུབ་པར་དེའི་མུར་ལུས། ཉིན་གཅིག་རྫོགས་ཆེན་དགོན་ནས་གྲྭ་པ་ཁ་ཤས་ཞེ་ཆེན་ཀོང་སྤྲུལ་མཇལ་དུ་འགྲོ་གི་ཡོད་སྐད་ཐོས་འཕྲལ་བཅའ་ལག་སོགས་ཅི་ཡང་མ་ཁྱེར་བར་ཧར་རྒྱུག་བྱས་ཀྱང་དེ་རྣམས་ཀྱི་རྗེས་མ་ཟིན། ཀོང་སྤྲུལ་རིན་པོ་ཆེའི་སྐུ་མདུན་དུ་སླེབས་པ་དང་གྲྭ་པ་ཁ་ཤས་ལ་དབང་ཞིག་གསུང་མ་རག་པ་འདུག་པ་དང་སྟབས་འགྲིགས། ཕྱག་དང་མཇལ་དར་ཕུལ་བས་དེར་མཁན་པོ་གཙུག་ཏོར་ཅན་བཞུགས་འདུག་པས་ཁོང་གིས་འདི་ཁར་སྔོན་གྲྭ་པ་མཁས་པ་ཡོད་ཚུལ་ཞུས་པ་དེ་རེད་ཅེས་ངོས་སྦྱོར་མཛད། ཀོང་སྤྲུལ་རིན་པོ་ཆེ་ནས་དེ་རིང་གྲྭ་པ་གསར་པ་ཁོང་གིས་མཆོད་དཔོན་གྱིས་གསུང་པ་བཞིན་དབང་གི་མཆོད་དཔོན་བྱས། དབང་གྲོལ་པ་ན་ཐམས་ཅད་ཕྱིར་ལོག་སོང་བས་ཅི་ཞུ་མ་རྙེད་པར་སྒོ་ཕྱིར་ཐོན་པ་ན་གྲྭ་པ་ཞིག་བྱུང་སྟེ་རིན་པོ་ཆེ་ནས་ཁྱེད་རང་ཡར་ཤོག་གསུང་གི་ཟེར་བས་སྐུ་མདུན་དུ་བཅར། ཞལ་ནས་དཔེ་ཆ་གང་དང་གང་བལྟས་པ་ཡིན་སོགས་བཀའ་འདྲི་གནང་བས་ལོ་རྒྱུས་ཞུས། ད་རེས་རིན་པོ་ཆེའི་མདུན་ནས་སེམས་ཁྲིད་ཅིག་ཨེ་ཐོབ་ཀྱི་རེ་བ་ཆེན་པོ་ཡོད་པས་བཀའ་དྲིན་མ་ཆུང་བར་ཞུས་པས་ཞལ་བཞེས་གནང་། སེམས་ཁྲིད་ཀྱི་དཔེ་ཆ་གང་འདྲ་དགོས་ཞུས་པར་ཡི་གེ་གང་ཡང་མི་དགོས་གསུངས། ཕྱི་ཉིན་རྫོགས་ཆེན་དགོན་དུ་ཡར་འབྱོར་ཏེ་མཁན་པོ་འཇིགས་བློའི་མདུན་དུ་ཞེ་ཆེན་ཀོང་སྤྲུལ་མདུན་དུ་སེམས་ཁྲིད་ཞུ་བར་འགྲོ་གི་ཡོད་ཚུལ་ཞུས་པས་དགྱེས་ཚོར་ཆེན་པོས་ཁོང་དམ་པའི་སྐྱེས་བུ་མཁས་གྲུབ་གཉིས་ལྡན་ཡིན་པས་ཤིན་ཏུ་ལེགས་གསུངས། དེ་ནས་མྱུར་བར་ཞེ་ཆེན་དུ་སོང་ནས་ཟླ་བ་དྲུག་རིང་ཁྲིད་དང་དབང་ལུང་མང་པོ་གསན། ཉིན་གཅིག་ཀོང་སྤྲུལ་རིན་པོ་ཆེ་ཁོང་གི་བཞུགས་ཁང་དུ་ཐོབ་རྒྱག་ཏུ་ཕེབས་ཏེ། ཡར་གཟིགས་མར་གཟིགས་མཛད་དེ། ཨ་ཡག་པོ་མི་ལ་རས་པ་ལྟ་བུ་རེད་གསུངས་ནས་ཐུགས་དགྱེས་ཚོར་ཆེན་པོའི་ངང་གསུང་ཡ་མཚན་ཅན་འགའ་གནང་སོང་བ་དེ་ཉིན་སེམས་ངོ་འཕྲོད་པ་ཡིན་ཞེས་གསུང་། དེ་ནས་ཡར་རྫོགས་ཆེན་དུ་ཕེབས་ནས་ཟླ་ཤས་བཞུགས་རྗེས་ཕྱིར་རང་ཡུལ་དུ་ཕེབས་པའི་ལམ་ནས་རྫ་སྟོད་ལྕང་མ་སྒར་དུ་མཁན་ཆེན་ཐུབ་དགའ་རིན་པོ་ཆེ་དང་། དགེ་གོང་དུ་བོད་སྤྲུལ་མདོ་སྔགས་བསྟན་པའི་ཉི་མ་བཅས་མཇལ་ཏེ་ཆོས་བཀའ་ཅི་རིགས་གསན། རང་ཡུལ་དུ་འབྱོར་ནས་གྲོང་ཆོག་སོགས་ལ་མ་ཕེབས་པར་ཕ་ཁྱིམ་གྱི་ཟུར་དུ་སྦྲ་ཆུང་ཞིག་གི་ནང་དུ་རྒྱུན་རིང་དཔེ་གཟིགས་མཛད་དེ་བཞུགས། དོན་གཉེར་ཅན་འགའ་ཞིག་ལ་སྔོན་འགྲོ་ཀུན་བཟང་ཞལ་ལུང་དང་སྤྱོད་འཇུག་སོགས་བཀའ་ཁྲིད་གནང་། དགུང་གྲངས་སོ་གསུམ་ཙམ་ན་བྱ་བྲལ་ཀུན་སྤོང་བའི་ཚུལ་གྱིས་ཡུལ་དབུས་ལྷ་ལྡན་ཕྱོགས་སུ་གནས་མཇལ་དུ་ཕེབས་ཤིང་རང་ཡུལ་དུ་ཕྱིར་འབྱོར་བ་ན་ཀློང་སྙིང་ཐུགས་ཆེན་སྡུག་བསྔལ་རང་གྲོལ་གྱི་སྐུ་མཚམས་དམ་པོར་བཞུགས། རེ་ཞིག་ན་སླར་ཡང་དབུས་ཕྱོགས་སུ་ཕེབས་ཏེ་སེར་བྱེས་བྱ་བྲལ་ཁང་ཚན་དུ་སྒྲིག་ཞུགས་གནང་ཞིང་། དེར་དགེ་བཤེས་བཀྲ་ཤིས་འབུམ་གྱི་མདུན་དུ་ལོ་གསུམ་མ་ཟིན་ཙམ་བཞུགས་ནས་གཞུང་ལུགས་ཀུན་ལ་སྒྲོ་འདོགས་བཅད། འདི་སྐབས་ཞེ་ཆེན་ཀོང་སྤྲུལ་རིན་པོ་ཆེ་དབུས་སུ་ཕེབས་པས་གུ་རུའི་སྦས་གནས་ཀོང་པོ་བྲག་གསུམ་མཚོའི་རྩར་བླ་ཚབ་ཏུ་གཏོང་གནང་མཛད་པས་དེར་ལོ་གཅིག་ལྷག་བཞུགས། སྤྱི་ལོ་ང་བདུན་ལོར་མཆེད་གྲོགས་བླ་མ་འཇིགས་ཚེ་དང་མཉམ་དུ་ལྷོ་གནས་ཡར་ལུང་རྟེན་གསུམ་གནས་གསུམ་གྱིས་གཙོས། བསམ་ཡས། རྩེ་ཐང་། ཚེ་རིང་ལྗོངས། སྲོང་བཙན་བང་སོ། འཕྱོང་རྒྱས་དཔལ་རི། གྲྭ་ནང་རྒྱ་གླིང་ཚོགས་པ། གྲྭ་ཕྱི་སྨིན་གླིང་། ཟུར་མཁར་རྡོ་ཡི་མཆོད་རྟེན། སྒྲགས་མདའ་མཚོ་རྒྱལ་བླ་མཚོ། སྒྲགས་ཡངས་རྫོང་། ཐུབ་བསྟན་རྡོ་རྗེ་བྲག ཤུགས་གསེབ། གངས་རི་ཐོད་དཀར། ཨོ་རྒྱན་རྫོང་། གསང་ཕུ་ནེའུ་ཐོག་སོགས་དགོན་གནས་ཆེ་ཕྲ་ཐམས་ཅད་མཇལ་ནས་སེ་རར་ཕེབས། སྤྱི་ལོ་ང་དགུ་ལོའི་ཧོར་ཟླ་གཉིས་པའི་ནང་ཁང་ཚན་དང་འཛིན་གྲྭ་གཅིག་པའི་དགེ་ངག་དབང་གྲགས་པ་དང་མཉམ་དུ་འཕགས་ཡུལ་དུ་བྲོས་བྱོལ་ལ་བྱོན། རྗེ་བཙུན་མི་ལ་རས་པའི་སྒྲུབ་གནས་ཡོལ་མོ་གངས་ར་བརྒྱུད་དེ་བལ་ཡུལ་མཆོད་རྟེན་རྣམ་གསུམ་སོགས་མཇལ་ཏེ་རིམ་པས་རྒྱ་གར་ཀ་ལིང་སྤུངས་སུ་ཕེབས། དེར་མཁྱེན་སྤྲུལ་རིན་པོ་ཆེ་འགྱུར་མེད་ཐེག་མཆོག་བསྟན་པའི་རྒྱལ་མཚན་དང་རྡོ་གྲུབ་ཆེན་རིན་པོ་ཆེ་རྣམས་ཀྱི་མདུན་ནས་སྙིང་ཐིག་ཡ་བཞི། ཀློང་ཆེན་སྙིང་ཐིག་དང་། འཇམ་མགོན་མི་ཕམ་རིན་པོ་ཆེའི་གསུང་འབུམ་སོགས་ཀྱི་དབང་ལུང་གསན། དེ་ནས་སྤྱི་ལོ་༡༩༦༢ལོར་འབྲུག་གཞུང་གིས་ཆོས་རིག་སློབ་གྲྭ་གསར་བཙུགས་སྐབས་དིལ་མགོ་མཁྱེན་བརྩེ་རིན་པོ་ཆེའི་ཕྱག་རོགས་ཀྱི་ཚུལ་དུ་དགེ་རྒན་གྱི་འགན་བཞེས་ཏེ་སེམས་རྟོགས་ཁའམ་གསང་ཟབ་ཆོས་རྫོང་དུ་ལོ་གཉིས་ལྷག་རིང་སློབ་གྲྭ་བ་སེར་སྐྱ་བརྒྱ་ལྷག་ལ་བརྡའ་དག་སྙན་གསུམ་སྤྱོད་འཇུག་སོགས་དཔེ་ཁྲིད་གནང་སྟེ་སློབ་ཚོགས་བསྐྱངས་ཤིང་། འདི་དུས་འདུལ་བའི་མཚན་ཉིད་བསྡུས་པ་བརྩམས། དེ་ནས་རྒྱ་གར་གྱི་གནས་ཆེན་ཁག་ཞིབ་མཇལ་གྱིས་གུ་རུའི་གནས་ཆེན་མཚོ་པདྨ་ཅན་དུ་ལོ་ཤས་བཞུགས་ཤིང་དེར་གནས་བློ་གསལ་རྣམས་ལ་དག་སུམ་དང་དགེ་ཚུལ་ཀཱ་རི་ཀ །སྡོམ་གསུམ་སོགས་འཆད་སྤེལ་གནང་ཞིང་དེ་དུས་དགེ་ཚུལ་གྱི་བསླབ་བྱའི་འགྲེལ་པ་དང་འཇམ་མགོན་བླ་མའི་གསོལ་འདེབས་སོགས་བརྩམས། དེ་ནས་མི་སི་བྷེ་བྲིའམ་མཁས་མཆོག་དཔལ་མོས་རྒྱ་གར་ས་གནས་ཌཱ་ལ་ཧའུ་སིར་བོད་ཀྱི་རིས་མེད་ཆོས་ལུགས་ཁག་གི་སྤྲུལ་སྐུ་ན་གཞོན་རྣམས་ཕྱོགས་བསྡུས་ཀྱིས་ཕྱི་རྒྱལ་གྱི་སྐད་ཡིག་བོད་ཀྱི་ཕྱི་ནང་གི་རིག་གནས་ཡོད་པའི་སྤྲུལ་སྐུའི་སློབ་གྲྭའི་དགེ་རྒན་གནང་སྟེ་ལོ་ཤས་བཞུགས། དེ་མཚམས་སྤྱི་ལོ་༡༩༦༦སྐོར་བོད་ཀྱི་ཆོས་ལུགས་ཁག་བཞིའི་མཁས་པ་སྙན་གྲགས་ཅན་ལྔ་བཅུ་ལྷག་དང་ལྷན་ཅིག་ཏུ་ཁུ་ནུ་བླ་མ་བསྟན་འཛིན་རྒྱལ་མཚན་མདུན་དུ་ཟླ་དྲུག་རིང་ཐུན་མོང་དང་ཐུན་མིན་རིག་པའི་གནས་རྣམས་འོས་སྦྱངས་གནང་སྐབས་སྙན་ངག་ལེའུ་བར་པའི་དཔེར་བརྗོད་བརྩམས་པར་མཛད། དེ་ནས་དཔལ་སྤྲུལ་འཇམ་དཔལ་བློ་གྲོས་རིན་པོ་ཆེ་དང་། སྨིན་གླིང་མཁོ་སྤྲུལ་རིན་པོ་ཆེ་མདོ་རྒྱུད་རྒྱ་མཚོ་རྣམ་གཉིས་ཀྱིས་ཕྱག་བཏབ་པའི་སྔ་འགྱུར་གྱི་ཆོས་སྡེ་ངེས་དོན་དགའ་ཚལ་གླིང་གི་བློ་གསལ་རྣམས་ལ་ཚིག་ལ་འཁྲུལ་པ་གཅོད་པའི་སྒྲ་རིག་པ། དོན་ལ་འཁྲུལ་པ་གཅོད་པའི་ཚད་མ་རིག་པ། རྒྱལ་སྲས་བྱང་ཆུབ་སེམས་དཔའི་ཉམས་ལེན་སྤྱོད་འཇུག ཤེར་ཕྱིན། དབུ་མ། མཁས་འཇུག་སོགས་ཐུན་མོང་ནང་དོན་རིག་པའི་གཞུང་ལུགས་མང་པོ་འཆད་སྤེལ་གནང་སྟེ་ལོ་ལྔ་ལྷག་ཙམ་བཞུགས་ཤིང་དེ་སྐབས་སུམ་རྟགས་ཀྱི་འགྲེལ་པ་དང་། རྟགས་རིགས་ཀྱི་རྣམ་བཞག་བཅས་མཛད། དེ་ནས་གོང་ས་ཆེན་པོའི་བཀའ་དགོངས་བཞིན་ཝཱ་རཱ་ཎ་སིར་བོད་ཀྱི་ཆེས་མཐོ་སློབ་གྲྭའི་རིག་གནས་དགེ་རྒན་དུ་ཆེད་ཕེབས་ཀྱིས་ལོ་ངོ་གཉིས་ཙམ་བཞུགས་སྐབས་རྟགས་འཇུག་གི་འགྲེལ་པའང་བརྩམས་གནང་། སྤྱི་ལོ་༡༩༧༨པར་སྐྱབས་རྗེ་གྲུབ་དབང་པདྨ་ནོར་བུ་མཆོག་ནས་དཔལ་ཡུལ་རྣམ་རྒྱལ་བྱང་ཆུབ་གླིང་གི་སྔ་འགྱུར་མཐོ་སློབ་མདོ་སྔགས་རིག་པའི་འབྱུང་གནས་གླིང་གསར་བཙུགས་སྐབས་ཆེད་དུ་གདན་ཞུས་ལྟར་ཞབས་པད་བཀོད་དེ། བསྟུད་མར་ལོ་གྲངས་འགའ་ལ་མཁན་ཆེན་གཞན་དགའི་རྒྱ་གཞུང་བཅུ་གསུམ་གྱི་མཆན་འགྲེལ་གཙོས། ཚད་མ་རྣམ་འགྲེལ། ངལ་གསོ་སྐོར་གསུམ། ཡོན་ཏན་རིན་པོ་ཆེའི་མཛོད། ཡིད་བཞིན་རིན་པོ་ཆེའི་མཛོད་སོགས་མདོ་སྔགས་རིག་གནས་དང་བཅས་པའི་བཤད་ཁྲིད་གནང་བས་ཐུགས་སྲས་ཞལ་སློབ་ཀྱི་གཙོ་བོ་མཁན་པོ་པདྨ་ཤེས་རབ། མཁན་པོ་རྣམ་གྲོལ། རྒྱལ་སྲས་སྤྲུལ་སྐུ། དྭགས་པོ་སྤྲུལ་སྐུ། མཁན་པོ་འགྱུར་མེད་ཕྲིན་ལས། མཁན་པོ་བདེ་ཆེན་རྡོ་རྗེ། མཁན་པོ་རིག་འཛིན། མངའ་རིས་མཁན་པོ་ཡེ་ཤེས་བཟང་པོ། མཁན་པོ་དཀོན་མཆོག་འོད་ཟེར། མཁན་པོ་ནོར་བུ་སོགས་བརྒྱུད་པ་ཟིན་ངེས་ཀྱི་མཁས་དབང་དུ་མ་བྱོན་ཏེ་འཕགས་ཡུལ་སྔ་འགྱུར་གྱི་ཆོས་སྡེ་ཁག་ཏུ་ལུང་ཆོས་བཤད་པའི་བསྟན་པ་ཉིན་བཞིན་འཕེལ་བ་བྱུང་། དགུང་ལོ་དྲུག་ཅུ་བཞེས་པའི་ལོར་སྔར་གྱི་མཆེད་གྲོགས་བླ་མ་འཇིགས་ཚེ་ལ་ཕྱག་བྲིས་གནང་བར་སང་ཕོད་ང་རང་གཉིས་ལོ་རེ་གཅིག་ཀེག་ཆེ་ཤོས་ལྟ་བུ་རེད་ཕྲན་གཟུགས་པོའང་བདེ་དྭངས་རང་མི་འདུག དུས་ཚོད་འདི་འདྲ་ལ་འགའ་བསྡད་ཀྱང་དོན་ཅི་མི་འདུག་སྙམ། མཚམས་ལ་སྡོད་བསམ་ཀྱང་འདུག་མ་གྲུབ། གྲོགས་པོས་སྐྱབས་འགྲོ་སོགས་གང་ཟབ་བྱེད་རོགས་གསུངས། ལོ་དེའི་རྒྱལ་ཟླ་བའི་ཚེས་བཅོ་བརྒྱད་རྒྱལ་དབང་ཀློང་ཆེན་པའི་འདས་མཆོད་ཉིན་འཕགས་ཡུལ་ལྷོ་ཕྱོགས་རྣམ་གྲོལ་གླིང་དུ་གློ་བུར་གཟུགས་སྐུའི་བཀོད་པ་ཆོས་དབྱིངས་སུ་བསྡུ་བའི་ཚུལ་བསྟན་ཏོ། །