གཤིན་རྗེ།
གཤིན་རྗེ་ཆོས་ཀྱི་རྒྱལ་བོ་ནི། འཇམ་དཔལ་གཤིན་རྗེ་གཤེད་ཀྱི་བཀའ་སྡོད་ཡིན། ལས་འབྲས་ཀྱི་ཤན་འབྱེད་ཡིན་པས། ལམ་རིམ་ལས་བསྟན་པའི་སྐྱེས་བུ་ཆུང་ངུའི་སྲུང་མ་ཡིན། འདི་ལ་ཕྱི་ནང་གསང་བ་ཡང་གསང་བཅས་མང་། བྱེད་ལས་ནི། གཤིན་རྗེ་ཁྲམ་ལ་བཏབ་ཅེས། གསོན་པོ་ལ་འཆི་བའི་བརྡ་གཏོང་བ་དང་། ཚེ་སྲོག་འཕྲོག་པ། གཤིན་ཡུལ་དུ་སླེབས་ཚེ་དགེ་སྡིག་ཤན་འབྱེད་ཀྱིས་འགྲོ་བ་གཉིས་སུ་འཕེན་པ་དེའོ། །ཡང་། རྒྱུད་ཀྱིས་ཟིན་སོ་ཆེ་བའི་གཙང་རིས་ཀྱི་དཔལ་མགོན་བདུན་ཅུ་རྩ་ལྔའི་ནང་གསེས་གཤིན་རྗེ་ནི། ཕྱག་གཡས་བེ་ཅོན་ཐོགས་པ་དང་། གཡོན་དཀུར་བརྟེན་པ། མ་ཧེ་ལ་བཅིབས་པ། ཆུང་མ་ནག་མོ་དང་འཆི་བདག་མ་དང་བཅས་པའོ། །