བསེ་རག
རཱ་ག་ཨ་སེའི་གཏོར་འབུམ་ལས། བསེ་རག་རི་ཞོན་སྤུན་དགུའི་ཚོགས། །ཞེས་དང་། མདོས་གླུད་ཞེ་དགུ་མ་ལས། བསེ་རག་མི་ཡི་རྒྱལ་བོ་ནི། །གཞོན་ནུ་དཔལ་སོགས་སྤུན་དགུ་བས། །ཟས་ནོར་རྣམས་ལ་གནོད་འཚེ་བྱེད། །བསེ་རག་འགོང་བོ་མང་བོའི་ཚོགས། །ཞེས་པ་དང་མཐུན་ལ། བསེ་རག་གི་གཟུགས་ནི། ལོ་གླུད་འགོང་བོ་དཀར་ཡས་ལན་ཆགས་ཚིམ་བྱེད་ལས། བསེ་རག་གི་རྒྱལ་བོ་ནི། མི་ལ་རྒྱལ་བོ་གཞོན་དཔལ་ཞེས་བྱ་བ་དེ། བུ་ཆུང་མཛེས་པ་གཡུ་རྣ་ཅན། མགོ་ལ་དངུལ་གྱི་ལྕོག་ཞུ་དང་། དར་འཕྲུ་བྱ་ཕོད་ལྡེམས་སེ་ཡོད་པ། ཤེལ་ཁྲབ་ལུས་ལ་གསོལ་ཞིང་། སྦ་དམར་གྱི་ཕུབ་ཆུང་རྒྱབ་ཏུ་འཁུར་བ། འཁོར་གསུམ་སྐེད་ལ་བསྐོར་ཞིང་། ལག་ན་བདུད་མོའི་རླུང་རྐྱལ་འཛིན་པ། རི་བོང་སྔོན་མོ་ལ་བཅིབ་ཅིང་། ཕུ་བོ་ཆེ་འབྲིང་ཆུང་གསུམ་སོགས་བསེ་རག་སྤུན་དགུས་བསྐོར་བ། བྱ་སྲེག་པ་བདུན་ནི་ཀླད་ན་ལྡིང་བའོ། །རང་ཅག་གིས་མི་ལ་ཙེ་ཙེ་ཟེར་བའང་འདི་ཡིན་ནོ། །
བྱེད་ལས་ནི། གཏོ་ཆོག་དེ་ལས། ཁྱད་པར་འབྲས་བུ་ལོ་ཏོག་ལ། །བར་དུ་གཅོད་ཅིང་གནོད་བྱེད་པའི། །བསེ་རག་ལྟོགས་འདོད་རྣམས་ལ་བསྔོ། །ཞེས་པ་ལས་ཤེས་སོ། །
ཡང་། ཀརྨ་ཆགས་མེད་ཀྱི་འདྲེ་དགུ་སྐྱས་འདེབས་ལས་མི་ལའི་རྣམ་པ་འདི་འདྲ་ཞིག་གསུངས་ཏེ། ཕ་ཙ་ཀ་བྱི་ལ་མགོ་དང་མ་ཅུ་ཏྲ་ཅི་ར་མ་གཉིས་ཀྱི་བུར་འདྲེ་ལ་སྔ་བ་མི་ལ་ཙ་ཏྲ་བྱུང་། དེའི་ལུས་པོ་ཆུ་རུས་ཀེང་རུས་ཅན་ལ། ནུ་མ་བསྣུན་པས་བརྣངས་ནས་ཤི རོ་དེ་རྒྱལ་བུ་མཐིང་གེའི་མཁར་རྩར་སྦས་པར་བཤད་ལ། མི་ལ་དེ་ཁྱི་དང་བསྡེབས་པ་ལས་མི་ལ་ཁྱི་གུ། ཕག་དང་བསྡེབས་པ་ལས་ཕག་གུ དེ་ལྟར་མི་ལ་རེའུ་ཚེ། མི་ལ་ལུ་གུ མི་ལ་བྱིའུ་ཆུང་། ཉེལ་ཆུང་། སྐྱ་ཀ སྦལ་བ། རྨོང་ཚེ། སྲེ་མོང་སོགས་བྱུང་བར་བཤད་དོ། །
ཡང་། གོང་གསལ་གྱི་རྣམ་པ་དང་མི་མཐུན་པ་ཞིག་ལ། བསེ་རག་རྫོང་ཐོབ་བསྡུས་པ་ཞིག་ལས། དབུལ་སྲི་བསེ་རག་ལྟོགས་འགོང་ནི། །མི་རྒན་ཉམ་ཐག་སྣོད་སྟོང་ཁུར། །བསེ་རག་འབུམ་གྱིས﹙བྱིས་པ་གཅེར་བུ་དུ་མས་བསྐོར་བ﹚འཁོར་གྱིས་བསྐོར། །ཡོད་ལ་མི་དགའ་མེད་ལ་དགའ། །གང་ལ་མི་དགའ་སྟོང་ལ་དགའ། །ནོར་སྒྲུབ་བྱེད་ལ་འགབ་འདྲེར་སྡང་། །སྣོད་བཅུད་མངའ་ཐང་ཉམས་པར་བྱེད། །བློ་ཉེས་ཚོང་ཉེས་མི་ཁ་གཏོང་། །བཟའ་བཏུང་གོས་རྒྱན་སྲིས་ལ་བརྐུ། །ཁྱད་པར་ལན་ཆགས་རྗེས་སུ་སྙེགས། །ཞེས་གསུངས་པ་དང་།
བསེ་རག་ཞུགས་པའི་རྟགས་སུ། ཀརྨ་ཆགས་མེད་ཀྱི་བསེ་རག་བཀར་ཐབས་ལས། བསོད་ནམས་ཆུང་བའི་སེར་སྐྱ་འགའ་ཞིག་ལ། །ཁྱིམ་དུ་ལྟོགས་འགོང་དབུལ་སྲི་བསེ་རག་ཞུགས། །ཁྱིམ་ལ་ཚ་འུབ་དྲོད་མེད་ཤིན་ཏུ་གྲང་། །དོན་མེད་འགྲིམ་པ་ཕྱིན་ན་ལྟོགས་སྣང་སྐྱེ། །བཟའ་བཏུང་བྱིན་ཀྱང་མི་མགུ་དགའ་སྣང་མེད། །གོས་དང་ལུས་མདོག་སྐྱ་ཞིང་བཀྲག་མདངས་མེད། །ཕུག་སྲིས་ཟད་མགྱོགས་གློ་བུར་འུད་འུད་ཟད། །བཟའ་མི་མི་མཐུན་ནང་འཐབ་ནུབ་འཐབ་བྱེད། །བློ་ཉེས་ཚོང་ཉེས་གོད་ཁ་རྒྱུན་མི་ཆད། །ལོ་ཐོག་མི་སྐྱེ་སད་སེར་གོད་ཁ་ལྡང་། །ཞོ་ལད་ཆང་ལད་འོ་རུལ་མར་མི་ཐོན། །ནས་འབབ་མེད་ཅིང་ནོར་ལ་སྐམ་འགོང་ཞུགས། །མི་མང་ཟས་ནོར་ལ་སོགས་བགོ་བའི་ཚེ། །ཀུན་ལས་ཆུང་ཞིང་ངན་པ་རང་གིས་འཐོབ། །གཡོ་བསྐོར་གཟབ་ཅིང་བྱས་ཀྱང་ངན་ཞིང་ལད། །རྒྱན་དང་ཤོ་སྐུགས་གང་བཞག་མི་ལ་ཤོར། །ཅི་བསམ་བྱ་བ་ཐམས་ཅད་ལོག་པར་འགྲོ། །བཟའ་བཏུང་མང་དུ་བྱས་ཀྱང་རྒྱག་རྒྱུ་མེད། །དེ་དག་བསེ་རག་ལྟོགས་འགོང་ཞུགས་རྟགས་ཡིན། །ཞེས་སོ། །
རྫོང་འདེབས་ལ་མར་མེ། འོ་རུལ། ཞོ་ལད། ཆང་སྐྱུར། སྦང་མ། སྤྲ་བ། རུས་པ། ཚྭ་སྒོག་གཡེར་གསུམ། ཡོས་སྙིགས། མི་ཕྱུགས་ཀྱི་དྲི་གླུད་ཆངས་བུ་ཟན་རིལ་བརྒྱ་རྩ་བརྒྱད་ལ། འོ་ཆབ་ཀྱིས་བྲན་ཏེ། ཡོན་བདག་ཕོ་མོ་ངོ་གནག་ཅིང་། གྲི་བཏོན་ནས་ཧ་ཧ་བརྗོད་ཅིང་། གཞན་གྱིས་སྐམ་ཡུས་སླ་ང་བརྡུང་ཤིང་རྗེས་ནས་དེད། སྔགས་པས་བདུད་རྩི་འཁྱིལ་བའི་སྔགས་བརྗོད་དེ་གུ་གུལ་དང་རྡོ་ཐུན་གྱིས་བྲབ་ནས་དེད། ཁང་ཁྱིམ་མི་མཐོང་བའི་སར་རྒྱ་ལམ་ཞིག་ཏུ་འཕང་ནས་རང་དང་བསེ་རག་གི་བར་མེ་ཆུ་རླུང་གསུམ་གྱིས་ཆོད་པར་སྒོམ་ནས་ཕྱི་མིག་མི་ལྟ་བར་འོང་དགོས་སོ། །