མི་འམ་ཅི།
ཅོ་ནེ་གྲགས་པ་བཤད་སྒྲུབ་ཀྱི་གདུགས་དཀར་འགྲེལ་བ་ལས། མི་འམ་ཅི་ནི་དུད་འགྲོའི་རིགས་མི་དང་བྱད་དབྱིབས་འདྲ་བ་ཞིག་སྟེ། ཁ་ཅིག་འདི་ནི་ལུས་མི་ལ་རྟའི་གདོང་བ་ཅན་དུ་ཡོད་པར་བཤད། ཅེས་སོ། །མི་འམ་ཅིའི་ཁ་ཟས་ལ་ངར་སྣབས་ཟ་བའི་མི་འམ་ཅི་ཞེས་གདུགས་འགྲེལ་ལས་བཤད་དོ། །དུང་དཀར་ཚིག་མཛོད་ལས། རི་རབ་ལྷུན་པོའི་ཆུ་མཚམས་ཀྱི་ཁོང་གསེང་ན། གཟུགས་མི་ལས་མཛེས་ཤིང་སྐད་ཤིན་ཏུ་སྙན་པ་ཞིག་ཡིན། ཞེས་དང་། སྟོན་པ་གཤེན་རབ་ཀྱི་མདོ་འདུས་རིན་ཆེན་མཛོད་ལས་ཀྱང་། རི་རབ་དག་གི་ཁོང་གསེང་ན། །མི་འམ་ཅི་ཡི་རྒྱལ་བོ་ལྗོན་པ་སྐྱེས། །མེ་ཏོག་འབྲས་ཟ་རྒྱ་མཚོའི་ཁ་ཞག་འཐུང་། །སྐྱེས་དྲུག་དབྱར་སྐྱེ་དགུན་ན་འཆི། །དིང་གཙུག་མཚོན་ཐོགས་སྲིན་དང་འཐབ། །མགོ་བརྙན་གླིང་དང་གླིང་བར་རྫུ་འཕྲུལ་འགྲོ། །ཞེས་དང་། མཁས་གྲུབ་ལུང་རྟོགས་རྒྱ་མཚོའི་བསྟན་འབྱུང་རིག་པའི་ཤན་འབྱེད་ནོར་བུ་ཀེ་ཏ་ཀའི་དོ་ཤལ་ལས། གླིང་ཕྲན་ལ་གནས་པའི་མིའམ་ཅི་བཞི་ནི། ལྗོན་པ་ཅན་ཞེས་ཤིང་གི་འབྲས་བུ་ཟ། རྒྱ་མཚོའི་ཁ་ཞགས་འཐུང་བ་དང་། སྐྱེས་དྲུག་ཅན་ནི་བྱིས་པ་དབྱར་ལྡང་ལ་སྟོན་ན་འཆི་བ་དང་། རྟིང་ཙུག་ཅན་ནི་སྲིན་དང་འཐབ་ཅིང་སྲོག་ཟ་བ་དང་། མགོ་བརྙན་ཅན་ནི་མི་ལུས་ལ་དུད་འགྲོ་སྣ་ཚོགས་ཀྱི་མགོ་བོ་ཅན་དང་བཞིའོ། །
དེ་དག་གནས་ཀྱིས་བསྡུས་ན་བརྒྱད་དེ། མཛོད་ལས། རྐོ་རིང་དག་གི་གླིང་ཆུང་ན། །རྔ་མོང་མགོ་ཅན་ཤིང་ཏོག་ཟ། །རྐོ་ཐུང་དག་གི་གླིང་ཆུང་ན། །སྒྱུ་མ་མཁན་དང་བགེགས་ཀྱི་ཚོགས། །གྱག་ཏི་དག་གི་གླིང་ཆུང་ན། །ར་མགོ་མིག་གསུམ་རྩི་ཐོག་ཟ། །གྱོག་ཏི་དག་གི་གླིང་ཆུང་ན། །སྦལ་དང་མི་རུ་རྫུས་ཤིང་སྤྱོད། །མར་ཞི་དག་གི་གླིང་ཆུང་ན། །གླང་བོའི་མགོ་ཅན་མཐུ་སྟོབས་ཆེ། །ཏིང་ཞི་དག་གི་གླིང་ཆུང་ན། །ཁ་ལ་རག་ཤ་སྲིན་པོའི་ཚོགས། །ཁ་སློན་དག་གི་གླིང་ཆུང་ན། །སྤྲེའུའི་མགོ་ཅན་གཡོ་འགུལ་ཆེ། །སྤྲེལ་ལྒམ་དག་གི་གླིང་ཆུང་ན། །བྱིས་པ་དབྱར་ལྡང་སྟོན་ན་འཆི། །ཞེས་སོ། །
ཡང་། གདུགས་དཀར་འགྲེལ་བ་ལས་མིའི་བྱད་དབྱིབས་ཅན་ཞིག་ཡིན་པ་བདེན་ཤོས་ཆེ་སྟེ། འདུལ་བའི་ལྒིང་འབུམ་ལས། དགེ་སློང་ཞིག་ནགས་སྟུག་པོ་ན་འདུག་པ་དང་། དེ་མི་འམ་ཅི་མོས་ཁྲིད་ནས་བྲག་ཕུག་ཏུ་བཅུག་ཅིང་འདུ་ཤེས་བསྒྱུར་ནས་སྤྱོད་ཡུལ་དུ་སོང་བ་དང་། ཞེས་གསུངས་སོ། །