གཤེད།
གཤེད་ཅེས་པའི་ངེས་ཚིག་ནི། ཀ་རྨ་ཆགས་མེད་ཀྱིས། ཚེ་འདས་རྣམས་ཀྱི་གཟུགས་བཟུང་ནས། །གསོན་པོ་རྣམས་ཀྱི་གཤེད་མ་བྱེད། །དེ་ཕྱིར་གཤེད་ཅེས་བྱ་བ་ཡིན། །གསུངས་ལ། ཚེ་འཕོས་པ་ཇི་ལྟར་འགྱུར་བའི་མདོ་ལས་གནོད་སྦྱིན་འཆི་ཁ་མར་ཉེར་འཇུག་དང་། དྲི་ཟ་ཁྱབ་བྱེད། པི་ཤ་པ་ན། སྨྲ་འདོད། ཀུན་ཏུ་རྟོག་འདོད། གནོད་སྦྱིན་ཝ་ར་ཧི་ཏ་སོགས་འཆི་ཁར་དབུགས་གཏིང་ཟ་ཞིང་ཕུང་བོ་བདག་ཏུ་འཛིན་པའི་ཟ་འདྲེ་རྣམས་དང་། ཡང་། གཏོ་ཆོག་ཞིག་ལས། དབང་ཆེན་རུས་སྦལ་རི་རབ་འབྱུང་བཞིའི་སྟེང་། །གཤེད་པོ་ཐེ་སེ་བདུན་ཟུར་རྟ་ལ་ཞོན། །སྤར་བརྒྱད་སྨེ་དགུ་ལོ་སྐོར་བཅུ་གཉིས་བསྐོར། །ལོ་ཟླ་ཞག་དུས་གཟའ་སྐར་འབྱུང་བ་བཞི། །ཟ་འདྲེ་ཤི་གཤེད་བདུད་བཞི། ཞེས་ཀྱང་གསུངས་སོ། །
ཀརྨ་ཆགས་མེད་ཀྱི་གཤེད་གཏོ་ལས་གཤེད་པོ་ཐེ་སེ་ནག་པོ་གནམ་ལོ་བདུན་ཟུར་ལ་བཅིབ་པ་དང་། གཤིན་རྗེ་ནག་པོ་ཁྲག་གྲོད་འཁུར་བ་དང་། ཤར་ལྷོ་ནུབ་བྱང་ལ་གནས་པའི་གཤེད་པོ་འབྲུག་ལུག་ཁྱི་དང་གླང་གི་མགོ་བཞི་སེར། ལུས་དང་རྟ་ནི་དཀར་སེར་དམར་ལྗང་ནག དྲུག་ཀའི་ཕྲག་གཡས་སུ་ཁྲམ་ཤིང་དང་། གཡོན་དུ་གཤའ་གྲི་དམར་བོ་བཙུགས་པར་བཤད།
དེ་དག་གི་བྱེད་ལས་ནི་གཤེད་གཏོ་དེ་ལས། ཤི་བ་རྣམས་ཀྱི་ཉེ་དུར་སྤྲུལ། །ཁྱོད་ཀྱི་ཕ་མ་ང་ཡིན་ཟེར། །ཁྱོད་ཀྱི་ཉེ་དུ་ང་ཡིན་ཟེར། །འོ་དོད་ལྷང་ལྷང་འབོད་བྱེད་ཅིང་། །ཆགས་འཛིན་གདུང་སེམས་སྐྱེད་བྱེད་པ། །ཐར་བ་འཐོབ་ཏུ་མི་འཇུག་པ། །ལྕགས་དང་སྡོས་སུ་བྱེད་པའི་ཕྱིར། །ཤི་གཤེད་གཤིན་ལྕགས་ཞེས་བྱ་བ། །བྱེ་བ་དུང་ཕྱུར་གྲངས་མེད་ཚོགས། །ཞེས་དང་། ཡང་། གཤེད་གཏོ་དེར། བདག་ཅག་ཡོན་མཆོད་མི་ནོར་འཁོར་དང་བཅས་པ་ལ་གནོད་ཅིང་འཚེ་བར་བྱེད་པའི་ལོ་བདུད་ལོ་གཤེད། ཟླ་བདུད་ཟླ་གཤེད། ཞག་བདུད་ཞག་གཤེད། གཤིན་པོ་རྣམས་ཐར་བ་འཐོབ་ཏུ་མི་འཇུག་པ་ལྕགས་དང་སྡོས་སུ་བྱེད་པ། གསོན་པོ་རྣམས་ཀྱི་ཚེ་སྲོག་གི་བདུད་བྱེད་པ། ཟ་བའི་འདྲེ། ཤི་བའི་གཤེད། ཉེ་དུ་ཉེ་འབྲེལ་གྱི་གཤེད་ཁ། ཟ་རེ་འཐུང་སྐོམ་བྱེད་པ། དོན་མེད་ཀྱི་འདྲེ་ལྟོགས་གཤེད་འཁྱམས། དོང་སྟོང་བཞིན་དུ་བླ་ལ་བཏགས་པ། ཐག་ནག་བཞིན་དུ་རྒྱུད་ལ་འཁྲིལ་བ། ཤ་ཁྱི་བཞིན་དུ་རྗེས་སུ་འབྲངས་པ། ཡས་དང་གླུད་ལ་རེ་ཆེ་བ། སྒབ་འདྲེ། ཡུལ་འདྲེ། ལམ་འདྲེ། གྲི་བོ་གྲི་མོ་གནོད་ཅིང་འཚེ་བར་བྱེད་པ་གང་ཡིན་པ། ཞེས་གསུངས་སོ། །