༢ རྡོ་རིང་ཕྱི་མ།
རྡོ་རིང་འདི་ནི་བཙན་པོ་ཁྲི་སྲོང་ལྡེ་བཙན་གྱི་སྐུ་རིང་ལ་བཙུགས་ཤིང་། རྩེ་པོ་ཏ་ལའི་མདུན་དུ་ཡོད། འདི་ལ་རྡོ་རིང་ཕྱི་མ་ཐོགས་དོན་ནི། པོ་ཏ་ལའི་རྡོ་སྐས་ཀྱི་གཤམ་དུ་རྡོ་རིང་ཞིག་ཡོད་པ་ལ་ནང་མ་དང་། འདི་ལ་ཕྱི་མ་ཟེར། རྡོ་རིང་གི་རྩེ་མོར་ཆར་ཁེབས་ཏོག་བཅས་ཡོད་ལ། ངོས་གསུམ་བོད་ཡིག་དང་། བྱང་ངོས་སྟོང་བ་ཡིན། ནང་དོན་ནི། ཆོས་རྒྱལ་ཁྲི་སྲོང་ལྡེ་བཙན་གྱིས། ཁོང་གི་ནང་བློན་སྟག་སྒྲ་ཀླུ་ཁོང་གི་མཛད་རྗེས་ལ་གཟེངས་བསྟོད་དང་ཞལ་བཞེས་རྡོ་རིང་ལ་བཏབ་པ་ཞིག་ཡིན། རྡོ་རིང་གི་ནང་དོན་ལ་བརྟག་ན་ཕལ་ཆེར་སྤྱི་ལོ ༧༦༣ ལོའི་མཇུག་ཙམ་ལ་བཙུགས་པར་འདོད།