ལེའུ་ཉེར་གཉིས་པ། ཞབས་བྲོ་དང་ཟློས་གར་སོགས།
འཆམ།
༡ འཆམ་གྱི་བྱུང་རིམ། འཆམ་ཞེས་པ་ནི་ཡི་དམ་ཆོས་སྲུང་གི་འདྲ་འབག་དང་། ཆོས་གོས་གྱོན་ཞིང་ཕྱག་མཚན་ཐོགས་ནས་གར་འཁྲབ་པ་ལ་ཟེར། དེ་ཡང་གར་དང་འཆམ་གཉིས་ཅུང་ཟད་མི་འདྲ་བའི་ཁྱད་པར་ནི། ཞི་ཉམས་གཙོ་བོར་སྟོན་ཅིང་ལག་པའི་ཕྱག་རྒྱ་གཙོ་བོར་གནང་སྟེ་ལྷ་ལ་མཆོད་པ་འབུལ་བ་དང་། འཆམ་ལ་ལུས་ཀྱི་ཉམས་འགྱུར་སྟངས་སྟབས་གཙོ་བོར་བྱས་ཤིང་གདོན་བགེགས་འདུལ་བའི་རྣམ་པ་གཙོ་བོར་སྟོན་པའོ། །འཆམ་གྱི་མིང་གི་རྣམ་གྲངས་སུ་ལྷ་བྲོ་ཡང་ཟེར་ཏེ། སྦ་བཞེད་ལས། བཙན་པོ་ཁྲི་སྲོང་ལྡེ་བཙན་གྱིས་བསམ་ཡས་དགོན་པ་བཞེངས་སྐབས་སློབ་དཔོན་པདྨ་འབྱུང་གནས་སྤྱན་དྲངས་ཏེ་གདོན་འདྲེ་འདུལ་བའི་སྔོན་ཁྲིད་ནས་བྲོ་གར་འཁྲབ་པ་འདི་ནི་བོད་ཀྱི་ལྷ་བྲོ་ཡིན་ལ་འཆམ་ཞེས་པའང་རེད། ཅེས་པ་འདིས་རྟོགས་ནུས་སོ། །འཆམ་གྱི་ཁུངས་ནི། གསང་སྔགས་ཀྱི་སྒྲུབ་མཆོད་སྐབས། སྦྱིན་སྲེག་དང་། གཏོར་ཟོར་འཕེན་སྐབས་འབུད་རྡུང་དཀྲོལ་གསུམ་གྱི་འགྲོས་དང་བསྟུན་ཏེ། ཞི་ཁྲོའི་ལྷ་ཚོགས་རྣམས་ཀྱི་ལས་སུ་ཞུགས་ནས་གར་འཆམ་པ་དེ་ཡིན་ལ། ཉམས་འགྱུར་གྱི་ཆ་ནས་ཀྱང་། གཡས་བརྐྱངས། གཡོན་བསྐུམ། ས་ག་ཟླུམ་པོ། རྡོ་རྗེ་རྒྱ་གྲམ། རྡོ་རྗེ་བྱེད་པ། དགའ་བ་འཁྱིལ་བ་སོགས་རྐང་སྟབས་དང་། ལག་སྟབས། ལུས་ཀྱི་ཉམས་འགྱུར། བསམ་པའི་འཁྱེར་སོ། ངག་གི་གདངས་དབྱངས་སོགས་རྒྱུད་སྡེའི་གཞུང་ལས་གསུངས་པའི་ལྷ་སྐུའི་རྣམ་འགྱུར་དང་ཕྱག་སྟབས་སོགས་དང་བསྟུན་ནས་བྱེད་དགོས་པའི་དམིགས་གསལ་གྱི་ཁྱད་ཆོས་ཡོད།
གཞན་ཡང་། རང་རེའི་བོད་དུ་གར་འཆམ་རྩེད་སྲོལ་འདི་གཤིན་རབས་མི་བོ་ཆེའི་སྐུ་དུས་སུ་བྱུང་ཡོད་དེ། གཟི་བརྗིད་དེབ ༡༤ ཨང ༥༦༣ ལས། ལ་ལ་ནི་སྟག་འགྲོས་བྱེད་དོ། །ལ་ལ་ནི་སེང་སྟབས་བྱེད་དོ། །ལ་ལ་ནི་རྒྱ་བག་སྒྱུར་རོ། །ལ་ལ་ནི་རྒྱ་རྟ་འཆམ་མོ། །ལ་ལ་ནི་ཁྲོ་བོའི་འགྱིང་གར་བྱེད་དོ། །ལ་ལ་ནི་ཁྲོ་མོའི་འཛུམ་གར་བྱེད་དོ། །ཞེས་པའི་ཤེས་ནུས་ལ། གཞན་གསང་སྔགས་བོན་སྒོ་སྤྱི་སྤུངས་ཁྲོ་བོ་དབང་ཆེན་ངོ་མཚར་རྒྱས་པ་དང་། བོན་གྱི་ཡི་དམ་དཔལ་ཕྱུར་མ་རྒྱུད་ཞི་ཨ་གསལ་སོགས་ལས། གཤེན་རབས་དགུ་འཆམ་དང་། གཟེ་མ་དགུ་འཆམ། སྟག་ལྷའི་རྔ་འཆམ། ཞི་ཁྲོའི་ཁྲོ་འཆམ་སོགས་འཆམ་སྣ་བཅུ་བདུན་ཡོད་པར་གཞིགས་ན། ནང་བསྟན་ལ་གར་འཆམ་མ་དར་གོང་གི་ལོ་ངོ་སྟོང་རྩ་ལྷག་གི་སྔོན་ནས་བོད་འདིར་གར་འཆམ་ཡོད་སྙམ་མོ། །འཆམ་གྱི་ཉམས་འགྱུར་མངོན་སྟངས་ཡང་། ལམ་འགྲོས། སྟག་འགྲོས། སེང་སྟབས། ཞི་དྲག མེ་རི། མ་རྒྱུད། རྔམ་འགྱུར། ཕྱག་ཕེབས། གློག་རྒྱུ། མདའ་འཐེན། གནམ་འདུལ། བཞི་རྒྱག སྲིད་པ་རྒྱལ་མོ། བླ་མ་བོན་འཁོར་སོགས་མང་ངོ་། །ཁྱད་པར་དུ། དགྲ་བགེགས་འདུལ་ཆེད་འཆམ་ཉམས་སྣ་ཚོགས་སྟེགས་རྒྱུ་ཡོད་དེ། མ་རྒྱུད་སྒོམ་འབྲེལ་ལས། ཁྲོ་བོ་རོལ་བའི་གར་བཞི་བཅུ་རྩ་ལྔ། ཁྲོ་མོ་རྔམ་པ་བྲོ་བཞི་བཅུ་རྩ་ལྔ། བརྟུལ་ཞུགས་མཁའ་འགྲོའི་གླུ་བཞི་བཅུ་རྩ་ལྔས་བཏུལ་ཞེས་གསུངས་པ་ལས་ཤེས་ནུས་སོ། །
སྦ་བཞེད་ལས་མཁན་སློབ་ཆོས་གསུམ་གྱིས་བསམ་ཡས་གཙུག་ལག་ཁང་གི་ས་འདུལ་རྒྱག་སྐབས། གདོན་འདྲེ་འདུལ་བར་གར་འཆམ་གནང་བ་དང་། གྲུབ་སྟོན་དུ་འཆམ་རྩེ་བ་སོགས་ནི་བོན་གྱི་གར་འཆམ་ཡིན་པར་གསལ་ཏེ། རྒྱལ་བོ་བཀའི་ཐང་ཡིག་ལེའུ་བཅུ་གཅིག་པ་ལས། རྒྱལ་བོ་སྐྱོ་སངས་འབག་དང་སེང་གེ་དང་། །སྔགས་བོན་རྔ་ཐོགས་འཆམ་པོ་བྱེད་པ་དང་། །ཞེས་པ་འདིས་གྲུབ་ལ། བསྟན་པ་ཕྱི་དར་སྐབས་སུ་གསང་སྔགས་ལ་ཁ་གཡར་ནས་ཆོས་ཀྱི་བྱེད་སྒོ་ཆ་མ་ཆོ་རིགས་དར་བའི་སྐབས་དེར། སྔགས་པ་དྲན་རིག་འགའ་ཞིག་གིས་རྣམ་པ་བོན་ལ་ནང་དོན་ནང་བསྟན་ལྟར་བཅོས་པའི་འཆམ་འདི་དར་སྤེལ་བཏང་བར་འདོད་དེ། ས་སྐྱའི་གྲུབ་མཐའི་སྲོལ་འབྱེད་འཁོན་དཀོན་མཆོག་རྒྱལ་བོ་སྔ་སོར་རྙིང་མ་བ་ཞིག་ཡིན་ཀྱང་། ཁྲོམ་དཀྱིལ་དུ་སྔགས་པ་མང་བོས་དབང་མོ་ཉེར་བརྒྱད་ཀྱི་འབག་གྱོན། ཕྱག་མཚན་མི་འདྲ་བ་འཁྱེར། མ་མོ་རལ་བ་ཅན་གྱི་རྔ་སྟབས་དང་བཅས་འཆམ་བྱེད་པ་གཟིགས་ཏེ་བླ་མ་གཅེན་ལ་ཞུས་པས། གཅེན་གྱི་ཞལ་ལས། ད་གསང་སྔགས་འཆོལ་བའི་དུས་བྱུང་བ་ཡིན། ཕྱིན་ཆད་སྔགས་རྙིང་མ་ལ་གྲུབ་ཐོབ་ཚད་ལྡན་མི་འོང་གསུངས་པ་ལས་རྟོགས་ནུས་སོ། །རྒྱལ་དབང་བསྟན་འཛིན་རྒྱ་མཚོའི་ཞལ་སྔ་ནས་ཀྱང་། ཆོས་དང་འབྲེལ་བའི་གར་དང་འཆམ་ཞེས་པའི་འཆམ་ནི། ཕུར་བའི་རྩ་འཆམ་ཞེས་ཕལ་ཆེར་མངོན་སྤྱོད་ཀྱི་ལས་སྒྲུབ་པའི་ཆེད་ཡིན་མོད་ཀྱང་། ང་ཚོ་བོད་པའི་དགོན་པ་ཆུང་ཆུང་དེ་ཚོ་འཆམ་རྒྱག་རྒྱུར་མཁས་པོ་ཡོད། ང་ཚོས་འཆམ་ཞེས་ལབ་དུས་ལྟད་མོ་འཁྲབ་པའི་འདུ་ཤེས་མ་གཏོགས་གང་ཡང་མེད། དངོས་གནས་བཤད་ན་དེའི་མིང་ལ་གསང་སྔགས་འཆལ་བ་ཟེར་བ་ཡིན། ཞེས་གསུངས་པ་ལྟ་བུའོ། །
ཕྱིས་སུ་ས་སྐྱ་ལུགས་ཀྱི་རྡོ་རྗེ་ཕུར་བའི་གར་འཆམ་གཞིར་བཟུང་ནས་ས་སྐྱའི་བླ་མ་དམ་པ་བསོད་ནམས་རྒྱལ་མཚན་གྱི་ཕྱག་བཞེས་བཞིན་མཆོད་དཔོན་ཤེས་རབ་སྣང་བས་འཆམ་ཡིག་བརྩམས་པ་སོགས་གར་འཆམ་རྩེད་སྲོལ་འདི་ཆེས་ཆེར་དར་བ་སྟེ། དཔེར་ན། འབྲི་གུང་གར་འཆམ། གོང་དཀར་ཆོས་སྡེའི་རྔ་འཆམ། རྩེ་རྣམ་རྒྱལ་གྲྭ་ཚང་གི་འཆམ། བཀྲ་ཤིས་ལྷུན་པོའི་འཆམ། སྐུ་འབུམ་བྱམས་པ་གླིང་གི་འཆམ། རོང་བོ་དགོན་ཆེན་གྱི་འཆམ། བླ་བྲང་གི་འཆམ། མཚུར་ཕུའི་གར་འཆམ། ཞྭ་ལུ་རྣམ་སྲས་མཆོད་པའི་གར་འཆམ་སོགས་དར་ཚུལ་དང་། འཆམ་ཡིག འཆམ་ཚུལ་སོགས་དུང་དཀར་ཚིག་མཛོད﹙ཤོག་ངོས༤༨༨ ནས ༤༩༡ བར﹚ན་གསལ། གཞན་ཡང་། གྲུབ་མཐའ་སོ་སོའི་གར་འཆམ་གྱི་རྔ་སྦུབ་རྡུང་ཚུལ་དང་། དུང་ཆེན་འབུད་ཚུལ། རྐང་ལག་གི་སྟངས་སྟབས་བསྒྱུར་ཚུལ། དམ་ཉམས་དགྲ་བགེགས་བསྒྲལ་ཚུལ། ཆོ་ག་ཕྱག་ལེན་རྣམས་ནི་སོ་སོའི་འཆམ་དཔེ་དང་མཐོང་བ་བརྒྱུད་པའི་ཕྱག་ལེན་ལས་ཤེས་པར་བྱའོ། །
བྲོ་གར།
བྲོ་གར་ནི། རོལ་དབྱངས་འགྱུར་ཁུགས་དང་བསྟུན་ཏེ། རྐང་ལག་གིས་ལྡེམ་མྱུར་དང་། གདོང་གི་རྣམ་འགྱུར། སེམས་ཀྱི་འཁྱེར་སོ་སྟོན་པ་ཞིག་ཡིན། རང་ཅག་བོད་འདིར་ལོ་ངོ་སྟོང་ཕྲག་གི་སྔོན་ནས་བྲོ་གར་འདི་དར་ཡོད་པར་མ་ཟད། ཧ་ཅང་དགའ་བོ་བྱེད་པས། སྨྲ་ཤེས་པ་ཙམ་ནས་གླུ་ལེན་ཤེས་ལ། འགྲོ་ཤེས་པ་ཙམ་ནས་བྲོ་འཁྲབ་ཤེས། ཞེས་ཟེར་ལ། བོད་ཀྱི་ཞབས་བྲོ་འདི་ལས་ཀྱང། བོད་ཀྱི་གནས་བབ་དང་། ཡུལ་སྲོལ་གོམས་འདྲེས་སོགས་མང་བོ་མཐོང་ཐུབ་པའི་མེ་ལོང་ལྟ་བུ་ཞིག་ཀྱང་ཡིན། བོད་ཀྱི་ལོ་རྒྱུས་རྣམས་ལས་མཐོང་གསལ་ལྟར་ན། བོད་རྒྱལ་དེ་ཤོ་ལེགས་ཀྱི་སྐབས་བོད་དུ་གླུ་གར་དར་བར་བཤད་པ་དང་། བོད་ཀྱི་བྲོ་གར་དེ་ཡང་རང་བྱུང་སྲོག་ཆགས་ཁྱད་འཕགས་ཀྱི་འཕུར་ལྡིང་དང་ལྷ་གྱད་སོགས་ཀྱི་འགྱིང་འགྲོས། ཐོན་སྐྱེད་ངལ་རྩོལ་ཁྲོད་ཀྱི་སྟངས་སྟབས་སོགས་ལ་རྨང་གཞི་བཏིང་སྟེ། གསར་གཏོད་བྱས་པ་ཞིག་ཏུ་སྣང་། དཔེར་ན། གཟི་བརྗིད་ལས། ལ་ལ་ནི་གར་བྱེད་དོ། །ལ་ལ་ནི་བྲོ་བརྡུང་ངོ་། །ལ་ལ་ནི་ཤོན་བྲོ་འཁྲབ་བོ། །ལ་ལ་ནི་ལྷ་བྲན་གྱི་བཞད་གར་བྱེད་དོ། །ལ་ལ་ནི་གྱད་ཀྱི་འགྱིང་གར་བྱེད་དོ། །ཞེས་དང་། ལ་ལ་ནི་ཁྱུང་མོ་ལྡིང་གར་བྱེད་དོ། །ལ་ལ་ནི་སེང་གེ་འགྱིང་གར་བྱེད་དོ། །ལ་ལ་ནི་གླང་བོའི་འགྱིང་གར་བྱེད་དོ། །ལ་ལ་ནི་རྟ་མཆོག་གི་མཆོངས་གར་བྱེད་དོ། །ལ་ལ་ནི་རྨ་བྱའི་མཛེས་གར་བྱེད་དོ། །ཞེས་སོ། །
དེ་ལས་གཞན། ལས་གླུ་དང་བསྟུན་ནས་ཞབས་བྲོ་འཁྲབ་སྟངས་དེང་སང་ཡང་མང་དུ་སྣང་རྒྱུ་ཡོད་པ་འདི་དག་གིས་ར་སྤྲོད་བྱས་ཡོད། དཔེར་ན། རོང་བར་མཚོན་ན། སོན་འདེབས་ཞིང་རྨོ་དང་། ཞིང་འབྲེག་དང་ཡུར་མ་ཡུར་བ། གཡུལ་གཅོག་སྟོན་བསྡུ། རྒྱ་དབྱུག་གཞུ་བ། གྱང་རྡུང་བ། ཨར་ཀ་བཅོག་པ། ཀོ་གྲུ་གཏོང་བ་སོགས་དང་། འབྲོག་པར་མཚོན་ན། བལ་འབྲེག་དང་ཕྱིང་སྒྲིལ། ཞོ་དཀྲོགས་དང་འོ་མ་འཇོ་བ། སྣམ་བུ་འཐག་པ་སོགས་ཞབས་བྲོ་གང་ལས་བྱུང་བའི་དཔེ་སྟོན་དང་མ་ཁུངས་སུ་ཆགས་ཡོད། དེ་ནས་རིམ་གྱིས། ལྷ་ཐོ་ཐོ་རི་སྙན་བཙན་གྱི་དུས་སུ། གླིང་བུ་དར་བ་དང་། ཆོས་རྒྱལ་སྲོང་བཙན་གྱིས་བལ་བཟའ་དང་། རྒྱ་བཟའ་ཁབ་ཏུ་བཞེས་སྐབས། གླུ་གར་གྱི་བསུ་བ་གཟབ་རྒྱས་གནང་ཡོད་པར་མ་ཟད། ཁྱད་པར་དུ། ཀོང་ཇོ་བོད་དུ་ཕེབས་ནས། ལྷ་གཅིག་འཁོར་བཅས་བྲག་ལྷའི་ནེའུ་ཐང་ལ་གཟིགས་མོར་ཕེབས་དུས། བོད་འབངས་བགྲང་གིས་མི་ལང་བས་གླུ་གར་རྩེད་འཇོ་བསམ་གྱིས་མི་ཁྱབ་པ་གནང་ཡོད་པ་དང་། ར་ས་གཙུག་ལག་ཁང་བཞེངས་གྲུབ་བྱུང་བའི་མཛད་སྒོ་ཡང་རྟ་རྒྱུགས་མདའ་འཕེན། མི་རྒྱུགས་རྡོ་འགྱོགས་དང་། ཁྱད་པར་དུ་གླུ་གར་འབྲོང་རྩེད་སོགས་ཉིན་ཞག་དུ་མའི་བར་གཟབ་རྒྱས་གནང་བ། ལྷ་སའི་གཙུག་ལག་ཁང་གི་བར་སྒོའི་གཡོན་ངོས་ཀྱི་ལྡེབས་རིས་སུ་ད་ལྟ་སྣང་རྒྱུ་ཡོད་པ་དང་།
དུས་རབས་བཅུ་གཉིས་པར་སྡེ་སྲིད་སངས་རྒྱས་རྒྱ་མཚོས། སྟོད་ཀྱི་མགོན་གསུམ་གྱིས་མངའ་རིས་སུ་སྲིད་སྐྱོང་སྐབས་དར་བའི་བྲོ་གར་ལ། རྫ་རྔ་དང་གླིང་བུ། སུར་སྣ﹙རྒྱ་གླིང་འདྲ་བ་ཞིག﹚བཅས་རོལ་ཆ་མཉམ་དཀྲོལ་གྱི་བྲོ་གར་རྒྱུན་བཟུང་ནས། བྲོ་གར་འཁྲབ་མཁན་རྣམས་གཅིག་བསྡུས་ཀྱིས་གར་བའི་ཆེད་ལས་ཚོགས་པ་ཞིག་བཙུགས་ཏེ། ལ་དྭགས་རྒྱལ་བོའི་རོལ་མོ་མཁས་ཅན་མ་ཎི་དེ་བ་དང་། བུད་མེད་གཞས་མ་དྭགས་པ་ཨོ་རྒྱན་བུ་ཁྲིད། རོལ་མོ་བ་ཀུ་ཏིའི་བུ་འབྲིང་བ་བཀྲ་ཤིས། སུར་སྣ་དང་གླིང་བུ་གཏོང་མཁས་དར་མདོ་ཚེ་བརྟན་མང་གུ་ར། སྒྲ་སྙན་གཏོང་མཁན་བྱང་རྒྱབ་བློ་བཟང་སོགས་བསྡུས་ཐོག བྲོ་གར་དང་རོལ་ཆ་སོགས། སྔར་ཡོད་ལ་ཞུ་དག་དང་། ཉམས་པ་སོར་ཆུད། སྔོན་མེད་གསར་གཏོད་བཏང་ནས་བོད་ཀྱི་གླུ་གར་ལ་བཅོས་བསྒྱུར་ཐེངས་གཅིག་བྱས་པར་མ་ཟད། ཁོང་གིས་རབ་བྱུང་བཅུ་གཉིས་པའི་ས་འབྲུག ༡༦༨༨ ལོར་གོང་གསལ་བྲོ་གར་རོལ་ཆ་ལ་མཁས་པ་རྣམས་ཀྱིས་ཕུལ་བའི་ཟིན་བྲིས་རྨང་གཞིར་བཏིང་སྟེ། ﹙གནའ་བོའི་ལུགས་བཟང་ཡ་རབས་སྲོལ་གཏོད་པའི་དེབ་ཐེར་མིག་ཡིད་རྣ་བའི་དགའ་སྟོན﹚ ཞེས་གསར་རྩོམ་གནང་ལ། དེའི་ནང་། ཕོ་གར་དང་མོ་གར། གར་གླུ་མཉམ་གཏོང་། རོལ་ཆ་མཉམ་དཀྲོལ། གྲི་གར། ཕེབས་རྔ་སོགས་ལེའུ་ལྔ་བཅུ་ཙམ་མཆིས། ཞིབ་ཏུ་ཤེས་འདོད་པ་དག་གིས་དེར་གཟིགས་པར་འཚལ། དེ་ནས་བཟུང་། བོད་ཆོལ་ཁ་གསུམ་གྱི་ཡུལ་ལུང་སོ་སོ་སྲོལ་རྒྱུན་གྱི་ཞབས་བྲོ་དུ་མ་ཞིག་བྱུང་དང་འབྱུང་བཞིན་ཡོད་པ། དཔེར་ན། ལྷོ་ཁའི་སྒོར་གཞས་དང་། གཞིས་རྩེའི་སྟོད་གཞས། གླང་བའི་ཆང་གཞས། འཁོར་ཆག་འབྲོང་རྩེ། ཆབ་མདོའི་ཞབས་བྲོ། བསྐོར་བྲོ། གླིང་བྲོ་སོགས་མང་ལ། འཁྲབ་སྟངས་ཡང་མི་གྲངས་མང་ཉུང་མ་ངེས་པར། སྒོར་དབྱིབས་དང་། ཕྲེང་བསྒྲིགས། གཡུང་དྲུང་སོགས་རེ་ཁཱ་སྣ་ཚོགས་སུ་དར་བ་དང་། ཁེར་འཁྲབ་དང་། ཉིས་འཁྲབ་སོགས་དུ་མ་ཡོད། རྒྱན་གོས་ཀྱི་ཐད་ལ་ཡང་། སྤྱིར་བཏང་གི་རྣམ་པ་དང་། གཟབ་འཕྱོར་སྤྲས་པ་སོགས་སྣ་ཚོགས་ཡོད། རྩེ་དུས་ནི་ལོ་སར་དང་། གསོལ་སྟོན་ཆེ་མ་ཆུང་གསུམ་དུ་རྩེ་བ་སོགས། ཞིབ་ཏུ་གར་དཔོན་པ་སངས་དོན་གྲུབ་ཀྱིས་བསྡུ་སྒྲིག་གནང་བའི་གངས་ལྗོངས་ཀྱི་གར་ཕྲུག་པ་གསོ་སྐྱོང་སྒྲིག་གཞི་དང་ལོ་རྒྱུས་སྐོར་མདོ་ཙམ་བརྗོད་པ་ཞེས་པར་གསལ་ལོ། །
འབྲས་དཀར་བསམ་པའི་དོན་འགྲུབ།
འབྲས་དཀར་གྱི་བཤད་པ་འདི་ནི། མདོ་དབུས་ཁམས་གསུམ་ཆ་མཉམ་དུ་དར་བར་བཤད་ལ། འཁྲབ་གར་གྱི་གོ་རིམ་ཕལ་ཆེར་མཚུངས། དེ་ཡང་འབྲས་དཀར་རྒན་པོ་ཟེར་བ་ཡང་། སྟོན་ཁའི་དུས་སུ་རོང་འབྲོག་གི་ཞིང་ཕྱུགས་རྒྱས་པའི་དུས་སུ་འཕྲིན་བཟང་བསྒྲགས་པས་ཆ་ནས། འབྲས་དཀར་དང་། བཤད་མཁན་རྒན་པོའི་ཆ་ལུགས་དང་། རྒྱལ་ཁམས་ཀྱི་ཆ་རྒྱུས་ཤེས་པས་ཆ་ནས་རྒན་པོ་ཞེས་བརྗོད། འབྲས་དཀར་ལ་མིང་གི་རྣམ་གྲངས་མང་སྟེ། འབྲས་བཟང་ལེན་པའི་དུས་སུ་འཁྲབ་པས་བསླབ་ཚིགས་གསུམ་དཀར་དང་། ཡུལ་བསྐོར་བའི་མཐོང་ཐོས་འབེལ་གཏམ་སྨྲ་བའི་ཆ་ནས། འབེལ་གར། བེར་གས་གར་འཁྲབ་པ་དང་བེར་ག་ལ་དཔྱད་པ་གཏོང་བའི་ཆ་ནས་བེར་གར་ཡང་ཟེར། ཆ་ལུགས་ནི། ར་ལྤགས་གྱོན་པ། ཐོད་པར་མེ་ལོང་འཆང་བ། གཡས་ཀྱི་ཨ་ར་དཀར་བོ་དང་། གཡོན་གྱི་ཨ་ར་ནག་པོ་ཡིན་པ། མན་ཚར་དང་ཁ་སྤུ་མིག་སྤུ་རིང་བ། སྣ་མགོར་མགྲོན་བུ་བཏགས་ཡོད་པ་ཡིན། འབྲས་དཀར་རྒན་པོས་རང་ཉིད་རྒྱལ་ཁམས་པ་ཞིག་ཡིན་པས་ཚུལ་བསྟན་ནས། མི་ཚོགས་ཀྱི་དཀྱིལ་དུ་ཡོང་སྟེ། དབྱུག་གར་འཁྲབ་བཞིན་ཐོག་མར་འཚམ་འདྲིའི་དབྱངས་སྙན་བརྗོད་པ་དང་། ཁད་ཀྱིས། ང་ད་ནངས་ཡོང་ཡོང་གང་ནས་ཡོང་། །ད་ནངས་ཡོང་བ་ཤར་ནས་ཡོང་། །ཤར་རྡོ་རྗེ་སེམས་དཔའི་མདུན་ནས་ཡོང་། །ད་ལྟ་འགྲོ་འགྲོ་གང་དུ་འགྲོ། །ད་ལྟ་འགྲོ་འགྲོ་ནུབ་ལ་འགྲོ། །ནུབ་སྣང་བ་མཐའ་ཡས་མདུན་ལ་འགྲོ། །ང་འབེལ་གར་བསམ་པའི་དོན་འགྲུབ་ཡིན། །འབེལ་ཕྲུག་ཡིད་བཞིན་ནོར་བུ་ཡིན། །ངའི་མགོ་ལ་ར་ལྤགས་གྱོན་ནོ་འདི། །འབྲས་དཀར་རྒན་པོའི་ཆ་ལུགས་ཡིན། །ཁ་སྤུ་མིག་སྤུ་རིང་ནོ་འདི། །ཨ་ཙ་ར་ཡི་ཆ་ལུགས་ཡིན། །མ་ནེ་མགོ་ཡི་མན་ཚར་འདི་། །ར་མ་རྒྱལ་མོའི་ཆ་ལུགས་ཡིན། །གཡས་ཀྱི་ཨ་ར་དཀར་བོ་འདི། །རྒྱ་གར་རྒྱལ་བོའི་ཆ་ལུགས་ཡིན། །ཇ་འོ་མ་འཐུང་གི་རྟེན་འབྲེལ་ཡིན། །གཡོན་གྱི་ཨ་ར་ནག་པོ་འདི། །རྒྱ་ནག་རྒྱལ་བོའི་ཆ་ལུགས་ཡིན། །ཇ་ནག་པོ་འཐུང་གི་རྟེན་འབྲེལ་ཡིན། །ཐོད་པར་མེ་ལོང་བཏགས་ནོ་འདི། །ལྷ་ཨོ་རྒྱན་པདྨའི་ཆ་ལུགས་ཡིན། །ཞེས་འབྲས་དཀར་རྒན་པོའི་ཆ་ལུགས་བརྗོད་པ་དང་། ལྷག་པར་དུ་མེད་མི་རུང་གི་དབྱུག་པའི་བཤད་པ་འདི་ལྟར། ངའི་ལག་ལ་བཟུང་བའི་དབྱུག་པ་འདི། །ལྷ་ཨོ་རྒྱན་པདྨའི་སྒྲུབ་ཤིང་ཡིན། །རྗེ་རིན་པོ་ཆེ་ཡི་ཕྱག་རྟེན་ཡིན། །སྨད་རྒྱ་ནག་རྒྱལ་བོའི་ཁྲིམས་ཤིང་ཡིན། །ཉིན་ནས་སྐྱེས་པའི་གསོམ་དཀར་ཡིན། །སྲིབ་ནས་སྐྱེས་པའི་གསོམ་དམར་ཡིན། །ཉིན་སྲིབ་བར་གྱི་ལྕང་མ་ཡིན། །ལྷ་ཤིང་ཙན་དན་དཀར་བོ་ཡིན། །མ་ཤིང་ལྷ་ཤིང་ཤུག་པ་ཡིན། །འདི་རྒྱབ་ལ་འཁུར་ན་བོའུ་དང་འདྲ། །སྨན་མུ་ཟི་མི་དགོས་ཡ་མཚར་ཆེ། །གཡས་ལ་བཏགས་ན་གྲི་དང་འདྲ། །གྲི་ཤུབས་མི་དགོས་ཡ་མཚར་ཆེ། །ཆུ་ལ་བཙུགས་ན་ཟམ་པ་འདྲ། །ཟམ་རྡུང་མི་དགོས་ཡ་མཚར་ཆེ། །ལག་ལ་བཟུང་ན་མདུང་དང་འདྲ། །མདུང་མགོ་མི་དགོས་ཡ་མཚར་ཆེ། འོག་ལ་ཞོན་ན་རྟ་དང་འདྲ། །སྒ་སྲབ་མི་དགོས་ཡ་མཚར་ཆེ། །ལྷ་འདྲེ་དམ་ལ་འདོགས་བྱེད་ཡིན། །མི་རྒོད་དཔུང་བ་གཅོག་བྱེད་ཡིན། །ཁྱི་རྒན་འགྲམ་སོ་གཏོར་བྱེད་ཡིན། །ས་ནག་མཆིན་པ་སློག་བྱེད་ཡིན། །ང་འབྲས་དཀར་ལམ་གྱི་འགྲོ་རོགས་ཡིན། །འདི་བྲག་ལ་བཙུགས་ན་སྐས་དང་འདྲ། །རྩིབས་དྲ་མིག་མི་དགོས་ཡ་མཚར་ཆེ། །འདི་ས་ལ་བརྒྱབ་ན་འགས་རྒྱུ་མེད། །རྡོ་ལ་བརྒྱབ་ན་ཆག་རྒྱུ་མེད། །ཨེ་བདེན་མི་བདེན་ལྟོས་ན་ཤེས། །ཞེས་དང་། མཇུག་མཐར་བཀྲ་ཤིས་ཀྱི་ཚིག་ལ། ང་འབེལ་དཀར་ཡོང་ཡོང་བོད་ལ་ཡོང་། །བོད་ལ་རྟེན་འབྲེལ་སྒྲིག་ཏུ་ཡོང་། །དེ་རིང་རྟེན་འབྲེལ་སྙིང་བོ་ལ། །ཕྱུགས་འཕེལ་ཁ་དར་བའི་རྟེན་འབྲེལ་སྒྲིག །ཞིང་ལོ་ཡག་ཡོང་བའི་རྟེན་འབྲེལ་སྒྲིག །མི་རྒྱུད་དར་བའི་རྟེན་འབྲེལ་སྒྲིག །གཞུང་རྒྱུད་འཇམ་པའི་རྟེན་འབྲེལ་སྒྲིག །ཅེས་སོགས་བཤད་པ་གནང་བ་འདི་ལ་ཡུལ་ལུང་སོ་སོའི་རྗོད་བྱེད་ཚིག་ལ་མི་འདྲ་བ་ཅུང་ཟད་ཡོད་དོ། །
ཟློས་གར།
༡ རྒྱ་གར་གྱི་ཟློས་གར། ཟློས་གར་ནི། ལེགས་སྦྱར་གྱི་སྐད། ཡུལ་མི་རང་བཞིན་པའི་སྐད། ཟུར་ཆག་གི་སྐད། ཤ་ཟའི་སྐད་ཀྱིས་ཚིགས་བཅད་དང་། ལྷུག་པ། སྤེལ་མའི་སྒོ་ནས་སྔོན་བྱུང་གཏམ་གྱི་གླུ་ཟློས་ཤིང་ལུས་ཀྱི་གར་སྟབས་སྣ་ཚོགས་རོལ་མོ་དང་སྦྲེལ་ནས་བྱ་བ་ཞིག་ལ་ཟེར། དེ་ཡང་། ལུས་ཀྱི་ཉམས་དགུ་དང་དབྱངས་ཀྱི་ངེས་པ་བདུན་ཀྱིས་མཚོན་པར་བྱེད་པ་སྟེ། ལུས་ཀྱི་ཉམས་དགུས་ནི། ཟློས་གར་མཁན་གྱིས་ལུས་ཀྱི་རྣམ་འགྱུར་དང་ངག་གི་སྨྲ་བརྗོད་ལ་བརྟེན་ནས་འཁྲབ་བྱའི་མི་སྣ་མི་འདྲ་བའི་བསམ་བློའི་སྣང་བརྙན་དངོས་སུ་མཚོན་དགོས། དེ་ནི་མཛེས་ཤིང་སྒེག་པའི་ཉམས། བརྗིད་ཅིང་དཔའ་བའི་ཉམས། ཡིད་དུ་མི་འོང་ཞིང་མི་སྡུག་པའི་ཉམས། ཡ་མཚན་ཞིང་དགོད་བྲོ་བའི་ཉམས། དབང་བཙན་ཞིང་དྲག་ཤུལ་གྱི་ཉམས། མཐོང་བ་དང་ཐོས་པ་ཙམ་གྱིས་དངངས་ཤིང་འཇིགས་པའི་ཉམས། སྡུག་བསྔལ་གྱི་ཉམ་ཐག་ཅིང་སྙིང་རྗེའི་ཉམས། འདོད་པ་ལ་རྔམ་ཞིང་ཆགས་པའི་ཉམས། དུལ་ཞིང་འཇམ་ལ་ཞི་བའི་ཉམས་ཏེ་དགུའི་ཕྱུག་དགོས་པ་དང་། དབྱངས་ཀྱི་ངེས་པ་བདུན་ནི། ཇི་སྐད་དུ། རྩེ་མོ་རློམ་པར་བླངས་པ་ནི། །ལྔ་བ་དང་ནི་བར་མའི་དབྱངས། །དཔའ་བོ་དྲག་པོ་ངོ་མཚར་དུ། །དྲུག་སྐྱེས་ཁྱུ་མཆོག་དེ་བཞིན་ནོ། །ས་འཛིན་པ་དང་འཁོར་ཉན་དང་། །སྙིང་རྗེ་རོ་ལ་བླང་བར་བྱ། །འཐབ་མོ་འཇིགས་དང་བཅས་པ་ལ། །བློ་གསལ་དབྱངས་ནི་བླང་བར་བྱ། །དེ་ལྟར་རྒྱུད་མངས་དང་མགྲིན་པ་ལས་བྱུང་བའི་དབྱངས་བདུན་ཏེ། ལྔ་བ་ནི་ཁུ་བྱུག་གི་སྐད་ལྟ་བུའོ། །བར་མ་ནི་ཁྲུང་ཁྲུང་གི་སྐད་ལྟ་བུའོ། །དྲུག་སྐྱེས་ནི་རྨ་བྱའི་སྐད་ལྟ་བུའོ། །ཁྱུ་མཆོག་ནི་བ་ལང་གི་སྐད་ལྟ་བུའོ། །ས་འཛིན་ནི་རའི་སྐད་ལྟ་བུའོ། །འཁོར་ཉན་ནི་གླང་བོ་ཆེའི་སྐད་ལྟ་བུའོ། །བློ་གསལ་ནི་རྟ་སྐད་འཚེར་བ་ལྟ་བུའོ། །དེ་ཡང་སྟོན་པའི་རྣམ་ཐར་གྱི་འགྲོས་དང་མཐུན་པ་སྟེ། སྔོན་སྟོན་པ་བཙུན་མོའི་ཚོགས་དང་རྩེ་ཞིང་རོལ་བ་དང་རློམ་སེམས་པའི་ཚུལ་དུ་བསྟན་པ་དེ་དང་མཐུན་པར་ལྔ་བ་དང་བར་མའི་གླུ་དག་བླངས་ལ། དེས་དྲག་པོའི་གཟུགས་སུ་བསྟན་ཅིང་བདུད་ཚར་གཅོད་པ་ལ་སོགས་པ་ངོ་མཚར་གྱི་ཁྱད་པར་བསྟན་པ་དེ་དང་མཐུན་པར་དྲུག་སྐྱེས་དང་ཁྱུ་མཆོག་གོ །དེ་ཉིད་སྙིང་རྗེ་རོ་དང་ལྡན་པས་དེ་དང་མཐུན་པར་ས་འཛིན་དང་འཁོར་ཉན་གྱི་གླུ་དག་བླང་ངོ་། །དེ་འཛིན་པའི་རྩོད་པའི་འཁོར་ལོ་ཤོམས་པ་ལྟ་བུར་བསྟན་ཏེ་དེ་དང་མཐུན་པར་བློ་གསལ་ཞེས་བྱ་བའི་གླུ་བླངས་པའོ། །འདི་དག་ལ་གཞི་བཅོལ་ནས་འཇིན་རྟེན་ཀུན་ཏུ་དགའ་བའི་ཟློས་གར་དང་། ཀླུ་ཀུན་ཏུ་དགའ་བའི་ཟློས་གར་སོགས་རྒྱ་གར་མཁས་པས་མཛད་པ་ཡིན་ནོ། །
༢ བོད་དུ་ཟློས་གར་དར་ཚུལ། ཅི་ཞིག་ལ་ཟློས་གར་ཟེར་ཞེ་ན། དུང་དཀར་བློ་འཕྲིན་གྱིས། སྔོན་བྱུང་གཏམ་རྒྱུད་དང་ལོ་རྒྱུས་སོགས་ཀྱི་ནང་གསལ་བའི་མི་སྣ་དང་ལྷ་འདྲེ་སོགས་མཚོན་པའི། གཟུགས་སུ་བྱས་ཏེ་རང་རང་སོ་སོའི་སྐད་ཀྱི་སྒོ་ནས་གླུ་ལེན་པ་དང་། བསམ་པའི་རྣམ་འགྱུར་སྣ་ཚོགས་ཡང་ནས་ཡང་དུ་ཟློས་ཤིང་གར་བྱེད་པ་ལ་ཟེར་གསུངས་ལ། དེ་ཡང་། འབུད་རྡུང་དཀྲོལ་གསུམ་གྱི་རོལ་མོའི་རམ་འདེགས་འོག་ཟློས་གར་ལ་དགོས་པའི་ཡན་ལག་ལྔ་སྟེ། མདོ་འཛིན་པ། རོལ་མོ་བ། ཆས་ཞུགས་པ། བཞད་གད་པ། ཟློས་གར་བ་བཅས་སོ། །སྤྱིར་ན། གདོད་མ་ནས་བོད་མི་ཚོས་དགའ་སྐྱོ་སྐྲག་གསུམ་གྱི་ཚོར་བ་ཕྱིའི་རྣམ་འགྱུར་དུ་ཤར་བའི་བཞིན་གྱི་འགྱུར་ལྡོག་དང་། རྐང་ལག་གི་སྟངས་སྟབས། ངུ་དགོད་ཀྱི་རྣམ་པ་དང་། ཆབ་སྲིད་སྒྲུང་ལྡེའུ་བོན་གསུམ་གྱིས་བསྐྱངས་བའི་སྟེང་ནས་ཀྱང་བོད་དུ་ཟློས་གར་གྱི་ས་བོན་མངོན་ཡོད་ལ། ཟློས་གར་དངོས་གནས་པ་ནི། སྲོང་བཙན་གྱི་སྐུ་དུས་ནས་ཡོད་པར་ངེས་ཏེ། ཁོང་གི་རྒྱ་བཟའ་ཁབ་ཏུ་བསུས་སྐབས། རྒྱལ་བློན་འབངས་གསུམ་གྱིས་བསུ་བ་དང་། དགའ་སྟོན་གྱི་ཟློས་གར་བཤམས་པ་གཙུག་ལག་ཁང་དང་པོ་ཏ་ལའི་ལྡེབས་རིས་སུ་བཀོད་ཡོད་པ་དང་། དེའི་རྗེས་ཁྲི་སྲོང་གི་དུས་བསམ་ཡས་བཞེངས་གྲུབ་ཀྱི་མཛད་སྒོར། བྲོ་གར་དང་གླུ་གཞས་ཀྱི་སྒྱུ་རྩལ་རིགས་མི་འདྲ་བ་མང་བོ། ལྡེབས་རིས་སུ་བཀོད་པ་དང་།
ཁྱད་པར་དུ། བོད་ཀྱི་སྐད་གྲགས་ཆེ་བའི་ཨ་ཅེ་ལྷ་མོའི་ཟློས་གར་ནི། དུས་རབས་བཅུ་བཞི་བའི་ནང་། གྲུབ་ཆེན་ཐང་སྟོང་རྒྱལ་བོས་ལྷ་སའི་སྐྱིད་ཆུར་བརྒལ་བའི་འགྲིམ་འགྲུལ་བདེ་མིན་ལ་རྐྱེན་བྱས་ཏེ། ལྕགས་ཟམ་མང་བོ་གསར་སྐྲུན་བཞེད་དེ། ཐོག་དང་བོ་ཆུ་ཤུར་ཟམ་པ་འཛུགས་སྐབས། རྒྱུ་ཤུགས་དང་ལས་ཤུགས་མ་འདང་བས་ལེགས་འགྲུབ་མ་བྱུང་། དེ་བས་ཁོང་གིས་གླུ་གཞས་ལ་མཁས་པའི་རྒྱུ་ཆ་འཚོལ་སྡུད་བྱེད་ཆེད། དཔེར་ན། དམངས་གླུ་ལས། ཕྲ་མོའི་སྐད་དང་བདེ་མོའི་ངག །དཔེ་ཆ་མེད་པའི་མགུར་ཞིག་རེད། །བརྒྱ་སྟོང་ཁྲོམ་གྱི་དོ་ཡ་རེད། །ཅེས་པར་གཞིགས་ནས། ལྷོ་ཁའི་བུ་མོ་སྤུན་བདུན་ལ་བཀའ་བཀོད་གནང་སྟེ། བུ་མོ་གཉིས་ཀྱིས་རྔོན་པ། བུ་མོ་བཞིས་ལྷ་མོ། བུ་མོ་གཅིག་གིས་རོལ་མོ་དཀྲོལ་མཁན། གྲུབ་ཐོབ་རང་ཉིད་ཀྱིས་རྔ་རྡུང་མཁན་མཛད་དེ་ལྷ་མོའི་ཚོགས་པ་དེ་ཐོག་མར་བཙུགས། དེ་ཡང་སྔོན་གྱི་ངག་རྒྱུན་ནམ་དཔེ་ཆ་ནས་བཤད་པའམ་ལྡེབས་རིས་ལ་བལྟ་བ་སོགས་བྱས་ཏེ། རྣ་བས་ཉན་པ་ཙམ་མ་ཡིན་པར། མིག་གི་དགའ་སྟོན་སུ་བཤམས་ཏེ། ཡུལ་བསྐོར་འཁྲབ་སྟོན་གྱི་ཞོར་དུ་སློང་མོ་བྱས། ལྟད་མོ་བ་མང་བོས་དགའ་བསུ་ཚད་མེད་ཐོབ་ནས། ཟམ་འཛུགས་ཀྱི་རྒྱུ་ཆའི་དངོས་རྫས་བདེ་བླག་ཏུ་གྲུབ་པས། ཟློས་གར་འདི་ལ་བརྟེན་ནས་ལྕགས་ཟམ་ལྔ་བརྒྱ་ང་བརྒྱད་ཚེགས་མེད་དུ་གྲུབ། འདི་ལ་ཨ་ཅེ་ལྷ་མོ་ཞེས་ཐོགས་དོན་ཡང་། གཙང་ཁུལ་དུ་བུ་མོ་ལ་ཨ་ཅེ་ཟེར་བ་དང་། ཁྱད་པར་དུ་བུ་མོ་དེ་དག་གི་བྱད་བཞིན་མཛེས་ལ། འཁྲབ་སྟོན་སྒྱུ་རྩལ་བློས་མི་ཤོང་བ་ཙམ་དུ་གདའ་ལ། སྙན་འཇེབས་ཀྱི་དབྱངས་རྟ་སོགས། གཞན་ཀྱི་བློ་ཡུལ་ལས་འགོངས་པ་ཞིག གློ་རྡོལ་དུ་བྱུང་བས། དེ་རིང་ཁོ་བོ་ཅག་གི་མདུན་དུ་ནམ་མཁའི་ལྷ་མོ་གར་འཁྲབ་བཞིན་སྣང་ཞེས་བསྔགས་བརྗོད་ཚད་མེད་གནང་བས། མིང་དེ་ལྟར་ཐོགས། དེ་ནས་རིམ་བཞིན་མར་མེ་གཅིག་ལས་གཉིས་ཆད་ཀྱི་ཚུལ་དུ་ལྷ་མོ་ཚོགས་པ་མང་དུ་གྱེས། རས་འབོག་སོགས་ལའང་མཚོན་དོན་སྣ་ཚོགས་འགྲེལ་བརྗོད་གནང་རྒྱུ་ཡོད། ལྷ་མོ་རས་འབག་ལ་སྣ་ཚོགས་གྱོན་སྲོལ་ཡོད་ཀྱང་། སྔ་སོར་དར་བའི་འབག་ནི་ཨག་ཚོམ་དཀར་བོ་ཡིན། དེ་ནི་གྲུབ་ཆེན་ཐང་སྟོང་བའི་བཞིན་གྱི་རྣམ་པ་མཚོན་པར་བཤད་ལ། ད་དུང་ར་ལྤགས་དཀར་བོས་བརྒྱན་པ་དེར། ཚེ་རིང་གཡང་ཆགས་ཞེས་འབོད་ལ། དེ་ནི་མི་རྒན་ལ་ནད་མེད་ཚེ་རིང་དང་། དར་གཞོན་ལ་ལོངས་སྤྱོད་འཕེལ་བའི་མཚོན་རྟགས་སུ་བཤད། ཕྱིས་སུ་ལྷ་མོའི་འབག་སྔོ་ནག་ཏུ་བསྒྱུར་བ་གང་ལགས་ཤེ་ན། གྲུབ་ཆེན་འབྲུག་སྨྱོན་ཡར་འབྲོག་མཚོ་ཁར་གནས་སྡོད་བྱེད་སྐབས། ཡར་འབྲོག་གི་ཉ་བ་རྣམས་ནི་མདོག་སྔོ་ཡི་དམ་དྲག་པོ་ཕྱག་ན་རྡོ་རྗེ་དང་མཚུངས་ཞེས་བརྗོད་པ་ལ་བརྟེན་ནས། རྔོན་པའི་འབག་དེ་ལ་བཀྲ་ཤིས་རྟགས་བརྒྱད་ཀྱི་མཚོན་དོན་ཆ་ཚང་ཞིག་འགྲེལ་བརྗོད་གནང་རྒྱུ་འདུག་སྟེ། མེ་ལོང་བུམ་པ། ཁ་མིག་དང་སྨིན་མ། མཁུར་ཚོས་ལྐོག་མ་བཅས་ཀྱི་པད་མ། སྣ་རྒྱན་གྱིས་དཔལ་བེའུ། དཔྲལ་བའི་ཉི་ཟླའི་ཆོས་འཁོར། འགྲོན་བུའི་དུང་དཀར། དཔྲལ་བའི་གོས་རྒྱ་སེ་ཐོད་སྐོར་ཀྱིས་གསེར་ཉ་ཁ་སྤྲོད། ནོར་བུས་ཐོར་ཅོག་དང་དེའི་སྟེང་གི་འཁྱིལ་སྣ་གྱེན་དུ་ཕྱོགས་པས་གདུགས་དཀར། གོས་སྣ་ཚོགས་ཀྱི་རྒྱབ་དར་གྱིས་རྒྱལ་མཚན་བཅས་མཚོན་པ་དང་། ཡང་། འབག་གཞི་དམར་བོར་སྨྲ་ར་དང་སྨིན་མ་ནག་པོ་བྱས་པ་དེ་རིགས་ནི་ཡབ་རྒྱལ་བོ་སོགས་སྐྱེས་པའི་བརྗིད་རྔམ་མཚོན་པ་དང་། ཡང་། ཡུམ་ཆེན་ཨ་མའི་ཚོས་གཞི་ལྗང་ཁུས་བུད་མེད་ཀྱི་མཛེས་ཆས། དྲང་སྲོང་གི་འབག་གཞི་སེར་སྐྱ་དང་སྨྲ་ར་སྨིན་མ་དཀར་བོ་སོགས་གོང་གསལ་ཐང་སྟོང་རྒྱལ་བོའི་ཞལ་མཚོན་བྱེད། ཡ་མ་གྷན་ཏེའི་འབག་གི་ཕྱེད་དཀར་ཕྱེད་ནག་པས་ངོ་གཉིས་དབྱེན་སྦྱོར་བྱེད་པ་མཚོན་པ་སོགས་སོ། །དུས་རབས་བཅོ་བརྒྱད་པ་ཡས་མས་སུ་དེ་དག་གི་ནང་ནས་སྐད་གྲགས་ཆེ་བ། སྐྱོར་མོ་ལུང་བ། ཤངས་པ། གུང་བ། འབྲི་གུང་བའི་ལྷ་མོ་ཟློས་གར་ཚོགས་པ་བཅས་བྱུང་ནས། ཕོ་བྲང་པོ་ཏ་ལ་བཞེངས་གྲུབ་ཀྱི་རབ་གནས་མཛད་སྒོར། ལྷ་མོ་ཚོགས་པས་ནོར་བཟང་གི་གཞུང་འཁྲབ་སྟོན་བྱས་ཚུལ། གསེར་སྡོང་འཛམ་གླིང་རྒྱན་གཅིག་གི་དཀར་ཆག་ནང་བཀོད་ཡོད།
ཕྱིས་སུ་དུས་རབས་བཅུ་དགུ་བའི་དུས་མཇུག་ཏུ། ཨ་ལྕེ་དྭངས་བཟང་ཞེས་པའི་ཟློས་གར་མཁས་ཆེན་དེས། སྐྱོར་མོ་ལུང་ཁུལ་གྱི་མི་སྐོར་ཞིག་བསྡུ་རུབ་མཛད་དེ། ལྷ་མོའི་འཁྲབ་གཞུང་། འགྲོ་བ་བཟང་མོ། པདྨ་འོད་འབར། གཟུགས་ཀྱི་ཉི་མ་སོགས་འཁྲབ་སྟོན་བྱས་པར་བརྟེན། ཁོང་ཚོར་དྭངས་བཟང་ལྷ་མོའི་ཚོགས་པ་ཞེས་མིང་འཐོབ། ཁོང་ཚོས་ཟློས་གར་འཁྲབ་སྐབས་ཡིད་ཀྱི་འཆར་བཀོད། ལུས་ཀྱི་འཁྲབ་འཁྱེར། ངག་གི་གདངས་སྙན། ཁྱད་པར་དུ་འཁྲབ་གཞུང་བར་གསེང་དུ་བཞད་གད་སློང་བ་སོགས་དམིགས་གསལ་ཁྱད་ཆོས་དོད་པོ་བྱུང་བས། ལྟད་མོ་བ་ཚོས་ཆེས་དགའ་བོ་བྱེད་ཅིང་། ཚོགས་པ་འདི་དབྱར་དུས་དབུས་གཙང་ཁུལ་དང་། དགུན་དུས་ལྷོ་མོན་འབྲུག་འབྲས་སོགས་སུ་བསྐོར་བསྐྱོད་འཁྲབ་སྟོན་ཞོ་སྟོན་དུས་ཆེན་ལ་གཟིགས་འབུལ་གཏན་འཁེལ་གནང་རྗེས། སྐྱོར་མོ་ལུང་དུ་ས་ཞིང་ཁྲལ་རྟེན་ཕྲན་བུ་གནང་ཡང་། ཁོང་ཚོས་ས་ཞིང་མ་བླངས་པར་བསྐོར་བསྐྱོད་འཁྲབ་སྟོན་ཁོ་ན་བྱས་སྟབས། ཁ་དཔེར་ཡང་། སྐྱོར་མོ་ལུང་བའི་ཕ་གཞིས་འཛིན་པ་ལས། །ལུ་གུ་ཁྲིད་དེ་གནས་བཟང་བསྐོར་བ་དགའ། །ཞེས་ཤོད་སྲོལ་བྱུང་བ་སོགས་ཟློས་གར་འདི་ཧ་ཅང་གཙིགས་འཛིན་བྱས་པའི་ལོ་རྒྱུས་ཡོད། གཞན་ཁམས་ཀྱི་རས་པ། ཆབ་མདོའི་བྲོ། མངའ་རིས་དང་འབའ་ཐང་གི་སྒོར་གཞས། ཚིག་རྒྱག འབྲས་དཀར། ཤེལ་གྲོང་གི་འབྲོང་རྩེད། འབག་སེང་སོགས་བོད་རིགས་ཀྱི་ཁྱད་ཆོས་ལྡན་པའི་ཟློས་གར་དང་། དེ་དག་གི་འཁྲབ་གཞུང་ཡང་མང་བོ་ཡོད།
མདོ་སྨད་དུ་ཟློས་གར་དར་ཚུལ་ནི། ཡབ་རྗེ་བླ་མ་སྐུ་ཕྲེང་གསུམ་པ་དགེ་འདུན་འཕྲིན་ལས་རབ་རྒྱས་ཀྱི་སྐབས། སྤྱི་ལོ ༡༦༩༠ ནས ༡༧༢༠ ལོའི་བར། རོང་བོ་དགོན་ཆེན་དུ་འཆམ་སྟེགས་སྲོལ་དང་། རྣམ་ཐར་ཟློས་གར་རྩེ་སྲོལ་དབུ་བརྙེས་པར་བཤད། དེ་ཡང་། དབུས་གཙང་ལ་སློབ་གཉེར་ཕྱིན་པའི་གྲྭ་བ་རྣམས་ཀྱིས། ལྷ་མོའི་འཁྲབ་གཞུང་དང་། ནང་མ་མཐོང་ཐོས་མྱོང་གསུམ་བརྒྱུད་པ་དེ་རྨང་གཞིར་བཏང་སྟེ། ཡབ་རྗེ་བླ་མའི་མགུར་རྟ་སྣ་ཚོགས་ཀྱིས་ཟུར་བརྒྱན་ཏེ་དབྱར་སྟོན་དུ་འཁྲབ་ལ། རྣམ་ཐར་ཟློས་གར་གྱི་འཁྲབ་སྟོན་དེ་ལ་དབྱར་རྩེད་ཟེར། སྒོ་དེ་དང་བསྟུན་ཏེ་བླ་བྲང་བཀྲ་ཤིས་འཁྱིལ་དུ་སྤྱི་ལོ ༡༧༤༠ ནས ༡༧༩༤ ལོའི་བར་རྣམ་ཐར་རྩེད་སྲོལ་བྱུང་སྟེ། དགོན་སྡེ་སོ་སོར་དར་རྒྱས་བྱུང་། དེ་ནས། ཡུན་རིང་ཞིག་ལ་གྲྭ་བ་རྐྱང་རྐྱང་གིས་འཁྲབ་སྟོན་བྱེད་ལ། ལྟ་མཁན་ཡང་བླ་གྲྭ་ཤ་སྟག་ཡིན། རིམ་གྱིས་དགོན་སྡེ་ལས་གྲོང་ཡུལ་དུ་དར་སོ་བྱུང་བ་སྟེ། དཔེར་ན། རེབ་གོང་ལྕང་སྐྱ་དང་གླིང་རྒྱ། ཞོ་འོང་སོགས་ཀྱིས་རྣམ་ཐར་ཟློས་གར་རྩེས་པ་བརྒྱུད་ནས། རྨ་ལྷོ་ཟློས་གར་ཚོགས་པ་སོགས་ཀྱིས་ཀྱང་འཁྲབ་སྟོན་གནང་བས། ལྟ་མཁན་མང་བོས་དགའ་བསུ་འཐོབ་ཅིང་། གསེར་དངུལ་གྱི་རྟགས་མ་ཡང་མང་བོ་འཐོབ་མྱོང་། ཁྱད་པར་དུ་ལྕང་སྐྱ་སྡེ་བས﹙སྤྱི་ལོ ༡༩༨༡﹚དྲི་མེད་ཀུན་ལྡན་གྱི་རྣམ་ཐར་ཟློས་གར། པཎ་ཆེན་སྐུ་ཕྲེང་བཅུ་བར་གཟིགས་མོར་ཕུལ་བས། ཁོང་གིས་བསྟོད་བསྔགས་དང་རིག་གནས་འདི་རྒྱུན་བསྲིངས་དགོས་པའི་ཞལ་གདམས་གནང་ངོ་། །
༣ བོད་དུ་ཟློས་གར་གྱི་བསྟན་བཅོས་བརྩམས་ཚུལ། སྙན་ངག་གི་གཞུང་ལས་བཤད་པའི་ཟློས་གར་ནི། སྐད་རིགས་མི་འདྲ་བ་བཞིས་སྒོ་ནས་བརྩམས་པའི་བསྟན་བཅོས་ཏེ། ལྷའི་རིགས་ལ་ལེགས་སྦྱར་གྱི་སྒོ་ནས་གཏམ་སྨྲ་ཞིང་གླུ་ལེན་པ་དང་། ལྷ་སྲིན་སྡེ་བརྒྱད་སོགས་ཀྱི་སྐད་ལ་ཤ་ཟའི་སྐད་དང་། བྲན་ཕོ་མོ་དང། བཞད་གད་མཁན་ལ་ཟུར་ཆག་གི་སྐད་དང་། བུད་མེད་ཀྱི་རིགས་ཕལ་ཆེ་བས་ཡུལ་མི་རང་བཞིན་པའི་སྐད་ཀྱིས་བརྗོད། རང་རེའི་བོད་དུ་རྒྱ་གར་ལྟར་སྐད་རིགས་བཞི་ཚང་བ་དེ་འདྲ་མེད་ཀྱང་། སྐད་རིགས་བཞིའི་སྒོ་ནས་བརྩམས་པའི་བསྟན་བཅོས་ནི། གུང་ཐང་བསྟན་སྒྲོན་གྱི་ཟློས་གར་བསྟན་བཅོས་ཡང་དག་ལམ་དུ་བཀྲི་བའི་རོལ་རྩེད་ཞེས་པའི་ནང་། རྒྱ་དཀར་ནག་དང་། སོག་བོད་ཀྱི་ཆོས་སྨྲ་བ་བཞིས་རང་རང་གི་སྐད་ཀྱིས་བགྲོ་ལྒིང་བྱས་པའི་རྣམ་པ་དང་། ཡང་། གུང་ཐང་བསྟན་པའི་སྒྲོན་མེས། ཟློས་གར་གྱི་བསྟན་བཅོས་ཁྱི་ར་བ་མགོན་པོ་རྡོ་རྗེ་དང་། གཞན་ཡང་། ཟློས་གར་རིག་པའི་གཞུང་ལུགས་ལྟ་བུར་མཛད་པ། ས་པཎ་གྱིས་རོལ་མོའི་བསྟན་བཅོས་དང་། དེའི་འགྲེལ་བ་ངོར་མཁན་ཆེན་བསོད་ནམས་ལྷུན་འགྲུབ་ཀྱིས་མཛད་པ་ཞིག་ཀྱང་ཡོད། དེ་ལས་གཞན། སློབ་དཔོན་ཙནྡྲ་གོ་མིས་མཛད་པའི་འཇིག་རྟེན་ཀུན་ཏུ་དགའ་བའི་ཟློས་གར་དང་། སློབ་དཔོན་དགའ་བ་ལྷས་མཛད་པའི་ཀླུ་ཀུན་ཏུ་དགའ་བའི་ཟློས་གར་སོགས་བོད་དུ་བསྒྱུར་ཡོད་པ་དང་། སློབ་དཔོན་ནག་མོ་ཁོལ་གྱིས་མཛད་པའི་བྱ་ལེན་མའི་ཟློས་གར་མཁས་དབང་དགེ་ཆོས་ཀྱིས་བསྒྱུར་བ་དེ་དང། དེ་ལས་གཞན། འཇུ་མི་ཕམ་གྱི་གླུ་བྲོ་སྒྱུ་མའི་རོལ་མོ་སོགས་ཡོད་དོ། །
བོད་དུ་གྲགས་ཆེ་བའི་ཟློས་གར་གྱི་བསྟན་བཅོས་ཆེན་པོ་བརྒྱད་ངོ་སྤྲོད།
༡ ཆོས་རྒྱལ་ནོར་བཟང་། ཆོས་རྒྱལ་ནོར་བཟང་གི་རྣམ་ཐར་འདིའི་འབྱུང་ཁུངས་ནི། རྒྱལ་བའི་བཀའ་འགྱུར་ལས་མདོ་སྡེ་ཁྲོད་ཀྱི་འདུལ་བའི་བམ་པོ་﹝ཁ་བ﹞་དང་། བསྟན་འགྱུར་ལས་﹝ཁེ﹞དུམ་པ་ལས་རྟོགས་བརྗོད་དཔག་བསམ་འཁྲི་ཤིང་གི་ཡལ་འདབ་རེ་བཞི་བ་ལས་བསྟན་ཡོད། དཔག་བསམ་འཁྲི་ཤིང་བོད་དུ་བསྒྱུར་རྗེས། བོད་རིགས་དམངས་ཁྲོད་དུ་དར་ཁྱབ་ཆེ་ཞིང་། ཕྱིས་སུ་སྡིངས་ཆེན་སྨྱོན་པ་ཚེ་རིང་དབང་འདུས་ཤེལ་དཀར་ལས་འཛིན་དུ་སྡོད་སྐབས། བོད་རང་གི་ཡུལ་སྲོལ་དང། སེམས་ཁམས་ལ་བསྟུན་ཏེ་བསྡུ་སྒྲིག་བྱས་པ་ཞིག་ཡིན། དེ་ལྟར་དཔེ་སྣ་གསུམ་པོ་དེ་ལ་རྩ་བའི་ཆ་ནས་མི་མཐུན་པ་མེད་ཀྱང་། ས་མིང་དང་བརྗོད་དོན། མི་སྣ་དང་ཁ་ཤས་ལ་རྒྱལ་བོ་དགེ་དབང་དང་སྡིངས་སྨྱོན་གྱིས། གདུལ་བྱའི་སེམས་ཁམས་དང་ས་གནས། ཡུལ་སྲོལ་གོམས་གཤིས་མི་འདྲ་བའི་དབང་གིས་འགྱུར་བ་ཅུང་ཟད་རེ་བཏང་ཡོད། དཔེར་ན། ཡུལ་གྱི་ཆ་ནས་ཀྱང་། བཀའ་འགྱུར་ལས་ཡུལ་ལྔ་ལེན་པར། བྱང་ཕྱོགས་ཀྱི་ལྔ་ལེན་དང་ལྷོ་ཕྱོགས་ཀྱི་ལྔ་ལེན། ཞེས་དང་། རྟོགས་བརྗོད་ལས། ཧ་སྟི་ནའི་གྲོང་ཁྱེར་ཆེན་པོ་དང་དེའི་ཕར་ལོགས་ན་གྲོང་ཁྱེར་དེ་ལ་སྡང་བའི་རྒྱལ་བོ། ཞེས་དང་། སྡིངས་ཆེན་སྨྱོན་པས་རྒྱ་གར་ཤར་གླིང་ན། བྱང་ཕྱོགས་མངའ་ལྡན་པ་དང་ལྷོ་ཕྱོགས་རིགས་ལྡན་པ། ཞེས་དང་། བརྗོད་དོན་གྱི་ཆ་ནས། བཀའ་འགྱུར་ལས་རྔོན་པས་སྔགས་པ་བསྒྲལ་རྗེས། དྲང་སྲོང་མདུན་དུ་སོང་བས། དྲང་སྲོང་གིས། ཡིད་འཕྲོག་མ་འཛིན་ཆེད་དོན་ཞགས་གནང་བ་དང་། རྟོགས་བརྗོད་ལས་རྔོན་པས་སྔགས་པ་བསྒྲལ་རྗེས་སུ་རྔོན་པ་ཀླུ་ཡུལ་དུ་སོང་དུས། ཀླུ་རྣམས་ཀྱིས་དོན་ཞགས་ལ་མཆོད་པ་མཐོང་ཞིང་རྒྱུ་མཚན་དྲིས་པས། དེའི་ཡོན་ཏན་རྟོགས་ཏེ་ནན་གྱིས་བསླངས། ཡུན་རིང་སོང་རྗེས་རྔོན་པ་འདས། བུས་ཀྱང་སྔར་ལྟར་དྲང་སྲོང་གི་ཞབས་ཏོག་བསྒྲུབས་པའི་མོད་ལ་ཁྲུས་ཀྱི་རྫིང་བུར་མི་འམ་ཅི་མོ་ཡིད་འཕྲོག་མཐོང་བས། དྲང་སྲོང་གི་མཛུབ་སྟོན་ལྟར་བཟུང་བ་དང་། སྡིངས་སྨྱོན་གྱིས་དྲང་སྲོང་དང་རྔོན་པ་ཚངས་པ་འདུ་བའི་ཁྲུས་རྫིང་དུ་ཕེབས་ཚེ། རྔོན་པས་ཡིད་འཕྲོག་མ་མཐོང་རྗེས། ད་གཟོད་འཛིན་སྤྱད་ཀྱི་དོན་ཞགས་དགོས་པ་ཤེས་ཤིང་སློང་བ་དང་། མི་མིང་ལ་མཚོན་ནའང་། བཀའ་འགྱུར་ལས་རྔོན་པའི་མིང་དུ་སྤང་ལེབ་ཅན་དང་། རྟོགས་བརྗོད་ལས་ཨུཏྤལ་ཅན་དང་། སྡིངས་སྨྱོན་གྱིས་སྤང་ལེབ་འཛིན་པ་དང་། ཡང་། བཀའ་འགྱུར་ལས་དྲང་སྲོང་བློ་གྲོས་རབ་གསལ་བྱ་བ་མཚན་བཀོད་མེད་པ་དང་། སྔགས་འཆང་སྦྲུལ་ནག་ཁ་འཛིན་བྱ་བ་གདན་འདྲེན་བྱས་པ་སོགས་མི་སྣང་ཡང་། སྡིངས་ཆེན་གྱིས་དེ་དག་ཁ་སྣོན་བརྒྱབ་པ་སོགས་མི་འདྲ་ས་ཉུང་ཟད་རེ་ཡོད་དོ། །དེར་མ་ཟད། ཆོས་རྒྱལ་ནོར་བཟང་གི་རྣམ་ཐར་གྱིས་བོད་ཀྱི་རིག་གཞུང་ལ་ཤན་ཞུགས་ཐེབས་པ་མང་ཀྱང་མཚོན་ཙམ་སྨྲས་ན། ཚངས་མགུར་ལས། སྙིང་ཐུབ་ཡིད་འཕྲོག་ལྷ་མོ། །རྔོན་པ་ང་རས་ཟིན་ཀྱང་། །དབང་ཆེན་མི་ཡི་དཔོན་པོ། །ནོར་བཟང་རྒྱ་ལུས་འཕྲོག་སོང་། །ཞེས་ལྟ་བུའི་མཚོན་ནོ། །
ནོར་བཟང་གི་རྣམ་ཐར་འདི་བོད་ཙམ་དུ་མ་ཟད། ཐེ་གོ འབར་མ། ལོ་ཝོ། རྒྱ་ནག་སོགས་སུའང་དར་བར་བཤད་ལ། དེ་དག་ལས་ཀྱང་གཏམ་རྒྱུད་འདིའི་མི་སྣ་དང་ས་མིང་འགའ་རེ་མི་མཚུངས་པ་མ་གཏོགས། བྱུང་རིམ་ཕལ་ཆེར་གཅིག་མཚུངས་ཡིན།
ནོར་བཟང་གི་རྣམ་ཐར་འདི་སྡིངས་སྨྱོན་གྱིས། གནས་ཡུལ་དང་འགྲོ་བ་མི་འདྲ་བའི་སོ་མཚམས་ལས་བརྒལ་ཏེ། ནོར་བཟང་དང་ཡིད་འཕྲོག་ཟུང་གི་དྭངས་གཙང་བརྩེ་དུང་གི་སླད་དུ། བཙན་ཤེད་དང་དབང་ཐང་ལ་མི་སྐྲག་ཤིང་སྲིད་འབྱོར་ལོངས་སྤྱོད་མཆིལ་མའི་ཐལ་བ་བཞིན་སྤངས་ཏེ། སྲོག་ཉེན་ལ་མི་འཛེམ་པའི་དཀའ་སྤྱད་དང་། བློ་བརྟན་འགྱུར་མེད་ཀྱི་གཤིས་ཀ་འཚོ་བ་དངོས་དང་སྦྱར་ཏེ། ཕྲི་སྣོན་གང་ལེགས་གནང་ནས་ཚིག་ནུས་ཁྱད་མཚར་ཅན་གྱིས་སྤྲས་ཏེ། རང་མོས་འདོད་བརྩེ་ལ་གྲུང་ཤ་དོད་ཅིང་གསོན་ཉམས་ལྡན་པའི་སྒྲུང་རྩོམ་ཞིག་ཏུ་གྲུབ་ཡོད་ནའང་། གཏམ་རྒྱུད་འདིའི་རྒྱབ་ལྗོངས་ཀྱི་བརྗོད་དོན་དངོས་མ་ནི། དེ་ལས་ལོག་པ་སྟེ། རྒྱལ་བུ་དོན་གྲུབ་སངས་རྒྱས་ནས། ཡབ་སྲས་གཙང་གིས་ནན་གྱིས་ཕོ་བྲང་དུ་བསུས་པ། གྲགས་འཛིན་མའི་མཐོང་ནས་སྔར་འདྲིས་ཀྱི་བག་ཆགས་བརྟས་ཏེ། ད་ནི་རྒྱལ་བུ་ཁོང་ལ་འགྲོགས་པ་དང་འཁྱུད་པ། རེག་པའི་བདེ་བ་མེད་སྙམ་ནས་ཁང་བརྩེགས་ལས་མཆོངས་ཚེ་སངས་རྒྱས་ཀྱིས་བསྐྱབས་པ་དང་། ཕྱིས་སུ་ནགས་ཚལ་དུ་འདུས་པའི་ཚེ་རྗེས་འཇུག་པ་རྣམས་ཀྱིས་དེའི་རྒྱུ་དང་རྐྱེན་ཞུས་པས། སྟོན་པས་དེ་དུས་ཀྱི་ནོར་བཟང་ནི་སྟོན་པ་ཁོང་རང་ཉིད་དང་། ཡིད་འཕྲོག་མ་ནི་གྲགས་འཛིན་མ་ཡིན་ཚུལ་གྱིས་འཇིག་རྟེན་བརྩེ་དུངས་ལ་སྙིང་བོ་མེད་པ་དང་། ད་ལྟའང་འཛིན་ཆགས་དམ་པས་བསྡམས་ཏེ། བྱས་འབྲས་ངན་པ་འདི་ལྟར་བྱུང་ཚུལ་ལས་བརྩམས་ནས། འཁོར་བ་ལ་ངེས་འབྱུང་རྣལ་མ་སྐྱེས་དགོས་ཚུལ་གདམས་པ་ནི་བརྗོད་དོན་དངོས་མའོ། །
བརྗོད་སྙིང་ནི། གནའ་སྔ་མོའི་དུས་སུ་རྒྱ་གར་འཕགས་ཡུལ་ན། བྱང་ཕྱོགས་མངའ་ལྡན་པ་དང་། ལྷོ་ཕྱོགས་རིགས་ལྡན་རྒྱལ་ཁབ་ཟེར་བ་གཉིས་ཡོད། རྒྱལ་ཁབ་དེ་གཉིས་སྟོབས་འབྱོར་མངའ་ཐང་། མངའ་འབངས་དང་མངའ་ཁོངས་ལ་གང་ཐད་ནས་འདྲ་འདྲར་ཆགས་ཡོད། ནམ་ཞིག་གི་ཚེ། ལྷོ་ཕྱོགས་རིགས་ལྡན་གྱི་རྒྱལ་བོ་ཤག་པ་གཞོན་ནུའི་རྒྱལ་སྲིད་ཉམས་རྒུད་དུ་སོང་སྟེ། འབངས་འཐོར། བླ་མཚོ་བསྐམས་ཞིང་བླ་ཤིང་འགྱེལ་བ་སོགས་བྱུང་བས། འབངས་མང་བོ་སྟོབས་འབྱོར་མངའ་ཐང་རྒྱས་པའི་བྱང་ཕྱོགས་མངའ་ལྡན་པའི་སྲིད་འོག་ཏུ་སོང་། སྐབས་དེར་རྒྱལ་བོ་ཤག་པ་གཞོན་ནུས་བྱང་ཕྱོགས་མངའ་ལྡན་པའི་མངའ་ཐང་ཚུར་འགུགས་ཐབས་ལ། སྔགས་པ་སྦྲུལ་ནག་ཁ་འཛིན་སྐུལ་ཏེ་བྱང་ཕྱོགས་པའི་པདྨ་བླ་མཚོར་ངན་སྔགས་དང་རྫས་ངན་བཏབ་པས། མཚོ་འཁྲུགས་ཤིང་ཀླུ་རྣམས་འུ་ཐུག་སྟེ་རྔོན་པར་སྲོག་སྐྱོབ་ཀྱི་རེ་བ་ཞུས་ཚེ། རྔོན་པ་གཉིད་ལས་སད་ནས་སྔགས་པ་བསྒྲལ་པས། ཀླུ་རྣམས་ཀྱིས་དྲིན་བཟོའི་སླད་དུ་རྔོན་པ་ལ་ནོར་བུ་དགོས་འདོད་དཔུང་འཇོམས་ཕུལ། རྔོན་པས་ནོར་བུའི་ནོར་ཉམས་མ་ཆོད་པས་ཀེའུ་རིའི་དྲང་སྲོང་བློ་གྲོས་རབ་གསལ་གྱི་དྲུང་དུ་ནོར་ཉམས་གཅོད་པར་ཕྱིན་ཚེ། ལྷ་མོ་ཡིད་འཕྲོག་མས་སྐུ་ཁྲུས་བྱེད་པ་གཟིགས་པས། དོན་ཞགས་བཏབ་ནས་ཡིད་འཕྲོག་ལྷ་མོ་བཟུང་སྟེ། དྲང་སྲོང་གི་བཀའ་བཞིན་ལྷ་མོ། ནོར་བཟང་གི་བཙུན་མོར་ཕུལ། རྒྱལ་སྲས་ནོར་བཟང་ནི་ཡར་དཀོན་མཆོག་ལ་མཆོད་བཀུར་དང་། མར་དབུལ་ཕོངས་ལ་སྦྱིན་པ་གཏོང་བར་དགའ་ཞིང་། འབངས་འཁོར་རྣམས་གཉེན་ཉེ་ལྟར་སྐྱོང་བར་བྱེད་པ་ཞིག་ཡིན་པས། སྐྱེ་འགྲོ་མི་མ་ཟད་ལྷ་ཀླུ་གཉན་གསུམ་ཡང་ཁོ་ལ་ཧ་ཅང་དགའ་བོ་བྱེད་ལ། ཁྱད་པར་དུ། པདྨ་བླ་མཚོ་ལ་གནས་པའི་ཀླུ་རིགས་མང་བོར་མཆོད་པས། སྲིད་འབྱོར་རིག་གསུམ་དབྱར་མཚོ་བཞིན་རྒྱས་པའི་ཁར། ཡིད་འཕྲོག་མ་བཙུན་མོར་འཐོབ་པས་དགའ་བདེའི་དཔལ་ལ་རོལ་བཞིན་བཞུགས།
སྐབས་དེར་སྔར་ཡོད་ཀྱི་བཙུན་མོ་ཉིས་སྟོང་ལྔ་བརྒྱ་ཤིན་ཏུ་མ་དགའ་བར། ནོར་བཟང་དང་ཡིད་འཕྲོག་མ་ཁ་བྲལ་གཏོང་བར་ཇུས་ངན་བཤམས་ཏེ། ཨ་མཆོད་ཧ་རི་ནག་པོར་ཁོག་བརྒྱབ་ཏེ། ཡབ་རྒྱལ་བོའི་རྨི་ལམ་དཀྲུགས་ནས་ནོར་བཟང་བྱང་ཕྱོགས་དམུ་རྒོད་འདུལ་དུ་མངགས། ཕེབས་ཤུལ་དུ། བསམ་སྦྱོར་ངན་པས་གཞན་ལ་འཚེ་བའི་ཨ་མཆོད་ཧ་རི་དང་། ཕྲག་དོག་དུག་ཆུས་ཀུན་ནས་བསླངས་པའི་དོན་འགྲུབ་དཔལ་མོ་སོགས་ཀྱིས་ཕོ་བྲང་དགའ་བའི་བསམ་གླིང་གི་མཐའ་བསྐོར་ནས།
ཡིད་འཕྲོག་མའི་སྙིང་ཚིལ་ལེན་པར་ཡོང་དུས། ལྷ་མོས་ཡུམ་ཆེན་གྱི་དྲུང་ནས་གཙུག་རྒྱན་ནོར་བུའི་དོ་ཤལ་བཞེས་ཏེ་བར་སྣང་དུ་འཕུར་ནས། མདའ་ཚ་བོ་ཡོད་ན་བུ་མོའི་རྗེས་ལ་སྙོགས་ཤོག །མདུང་རིང་བོ་ཡོད་ན་བུ་མོའི་རྗེས་ལ་སྙོགས་ཤོག །བུ་མོ་ང་ལ་འགྲན་ན་ནམ་མཁའི་མཐོངས་ལ་འཕུར་ཤོག །མཛེས་མའི་སྙིང་ཚལ་དགོས་ན་དགུང་སངས་འདི་རུ་ཤོག་དང་། །ལྟད་མོ་ཆེ་བ་ཨེ་བྱུང་བཙུན་མོ་ཡི་ལྔ་བརྒྱ། །ཐུགས་དགོངས་རྫོགས་པ་ཨེ་བྱུང་ཧ་རི་ཡི་ནག་པོ། །ཞེས་གསུངས་ནས་ལྗོན་པའི་ཡུལ་དུ་བྱོན། ནོར་བཟང་རྒྱལ་ཁའི་ངང་ཕྱིར་འཁོར་དུས་ལྷ་མོ་མེད་པས། སྐད་ཅིག་ཀྱང་སྡོད་བློ་མ་བྱུང་བར། དྲང་སྲོང་གི་ལྷ་མོའི་སོར་གདུབ་བསྣམས་ནས་ཁོང་གིས་དཀའ་བ་མང་བོ་ཁྱད་དུ་བསད་དེ། ཡིད་འཕྲོག་མ་སླར་བཀུགས་པར་མ་ཟད། ཁོང་གི་ལེགས་ཚོགས་ལ་གཏོར་བརླག་བྱེད་པའི་ཕོ་བྲང་གི་མི་ངན་དེ་དག་ལ་འཚང་འབྱིན་དང་ཐེར་འདོན་བྱས་ཐོག ཡབ་རྒྱལ་བོས་ནོར་བཟང་ལ་རྒྱལ་སྲིད་ཕུལ་ཏེ། སླར་ཡིད་འཕྲོག་མ་དང་ལྷན་དུ་བདེ་སྐྱིད་ཀྱི་དཔལ་ལ་རོལ་བ་སྟེ། ཆེས་ཡིད་འགུགས་ལྡན་པའི་རྣམ་ཐར་ཞིག་ཡིན།
༢ འགྲོ་བ་བཟང་མོ། བརྩམས་ཆོས་འདི་ནི་བོད་ཡུལ་མོན་རྟ་དབང་ཁུལ་དུ་བྱུང་བའི་དམངས་ཁྲོད་ཀྱི་གཏམ་རྒྱུད་ཞིག་གཞིར་བཟུངསྟེ། དུས་རབས་བཅུ་བདུན་པའི་དུས་མཇུག་ཏུ་མོན་བླ་མ་བློ་གྲོས་རྒྱ་མཚོས་མཛད་ཟེར། དེ་ཡང་། སྐྱེས་རབས་སུ་ལྕམ་སྲིང་ཁྲིད་དེ་མ་བསད་པར་སྦས་བཞག་སྟེ། རྗེས་སུ་བཏོན་པར་བཤད་པ་སོགས་ལ་སྦྱར་ནས་བརྩམས་པར་གསལ་ཏེ། དེ་ནི་ལྷ་མོ་བའི་གཞུང་བཤད་ཀྱི་ནང་དུ་སྟོན་པའི་དག་པ་དང་མ་དག་པའི་སྐྱེས་བ་ལྔ་བརྒྱ་བཞེས་པའི་འཁྲུངས་རབས་ལས། ད་ལམ་མཁའ་འགྲོ་མ་འགྲོ་བ་བཟང་མོའི་གཞུང་བརྗོད་པར་བྱའོ། །ཞེས་བརྗོད་པ་ལས་ཤེས་ནུས་སོ། །
བརྗོད་སྙིང་ནི། ཡུལ་མཎྜལ་སྒང﹙བོད་རང་སྐྱོང་ལྗོངས་ཀྱི་མཚོ་སྣ་རྫོང་འོག་མིན་ཡུལ་རྟ་དབང་དགོན་པ་ཆགས་པ་དེའི་མིང་རྙིང་ཡིན་པར་བཤད﹚ཞེས་པའི་མཐའ་འཁོབ་ཀྱི་ཡུལ་དེར། སྡིག་སྤྱོད་ཤ་སྟག་བྱེད་པའི་དུས་ཤིག ཡུལ་དེའི་ཤར་ཕྱོགས་ཀྱི་ནགས་གསེབ་ན། བྲམ་ཟེ་རྒས་འཁོགས་བློ་བོ་དང་ཡུམ་བྲམ་ཟེ་མཛེས་མ་བྱ་བར། ཡ་མཚན་གྱི་ལྟས་བཟང་དང་བཅས་ཏེ་འགྲོ་བ་བཟང་མོ་སྐུ་བལྟམས། སྐབས་དེར་མཁའ་འགྲོ་སྡེ་ལྔས་བུ་མོ་འགྲོ་བ་བཟང་མོ་ལ། བསྟན་པ་སྔ་དར་དང་། བར་དར། ཕྱི་དར་གསུམ་འབྱུང་བར་ལུང་བསྟན་པ་སྟེ། སྔ་དར་གྱི་དུས་སུ་ཡུལ་མཎྜལ་སྒང་གི་རྒྱལ་བོ་དབང་དུ་འདུ་བ་དང་། བར་དར་གྱི་དུས་སུ་སྲས་མིང་སྲིང་གཉིས་འཁྲུངས་ཚུལ། ཕྱི་དར་གྱི་དུས་སུ་བདུད་ཀྱི་བར་ཆད་ཅིག་འབྱུང་བས། ནུབ་ཕྱོགས་མཁའ་འགྲོའི་གླིང་དུ་འཕུར་ཤོག་ཅེས་ལུང་བསྟན། ནམ་ཞིག་གི་ཚེ། མཎྜལ་སྒང་གི་རྒྱལ་བོ་ཀཱ་ལ་དབང་བོས་བློན་འཁོར་དང་ཁྱི་མོ་ལྕགས་ཁྲ་འབབ་ཤེས་ཁྲིད་དེ་རྔོན་ལས་སུ་ཞུགས་པས། ཁ་ཤ་སོ་བདུན་བསད། ཉི་ནུབ་ཀྱི་ཚེ་ཁྱི་མོ་གར་སོང་ཆ་མེད་དུ་གྱུར་བས། རྒྱལ་བོ་ཐུགས་ཁྲལ་ཆེན་པོས་ཟིན་ནས། ཁྱི་མོ་འཚོལ་དགོས་པའི་བཀའ་ཕབ་པ་ལྟར། ཆོས་བློན་ཏྲི་ན་འཛིན་གྱིས་ཤར་ཕྱོགས་ཀྱི་ནགས་གསེབ་ན་ཁང་ཆུང་ཞིག་ཡོད་པ་དེར་ཁྱི་མོ་ཡོད་ཤོས་ཆེ་བར་ཞུས་པས། རྒྱལ་བློན་འཁོར་བཅས་དེར་ཕེབས་ཏེ། བྲམ་ཟེ་རྒན་རྒོན་གཉིས་ལས་འཁྲུངས་པའི་འགྲོ་བ་བཟང་མོ་གཟིགས་པས། ཕོ་བྲང་དུ་བསུས་ནས་བཙུན་མོ་མངའ་གསོལ། འགྲོ་བ་བཟང་མོས། ཡུལ་མཎྜལ་སྒང་གི་རྒྱལ་བློན་འཁོར་བཅས་དགེ་བ་བཅུ་ལ་བཀོད་ཅིང་། ལྷ་གཅིག་ཀུན་ཏུ་བཟང་མོ་དང་ལྷ་སྲས་ཀུན་ཏུ་ལེགས་པ་གཉིས་ཀྱང་འཁྲུངས་ནས། དགའ་སྐྱིད་དཔལ་ལ་རོལ་བའི་ཚེ། བཙུན་མོ་ཧ་ཅང་གིས་ཚོར་ཏེ། སྙིང་རླུང་སྟོད་འཚང་གི་ཁོང་ཁྲོ་བཟོད་མི་ཐུབ་པ་བྱུང་སྟེ། བློན་འབངས་ཀུན་ལ་བསླུ་བྲིད་བཏང་ནས། རྒྱལ་བོ་ཀཱ་ལ་དབང་བོ་སྨྱོ་ཆུ་བླུད་ནས་བཙོན་ལ་བཅུག འགྲོ་བ་བཟང་མོ་མཁའ་འགྲོའི་གླིང་དུ་བསྐྲད་དེ། ཧ་ཅང་བདུད་མོས་ནད་རྫུ་བཏབ་སྟེ། ནད་དྲག་པ་ལ་ལྷ་སྲས་ལྕམ་སྲིང་གཉིས་ཀྱི་སྙིང་དགོས་པར་གདམས་པ་ལྟར། མིང་སྲིང་ཟུང་ཤན་པ་གཉིས་ལ་གསོད་དུ་བཅུག་ཀྱང་། དེ་གཉིས་ཀྱིས་སྙིང་རྗེ་ནས་ཚེ་ཐར་དུ་བཏང་སྟེ། སྙིང་ཚབ་ཏུ་ཁྱེའུ་གཉིས་ཀྱི་སྙིང་ཕྱུང་སྟེ་བདུད་མོར་ཕུལ། ཡང་། བདུད་མོས་ལྕམ་སྲིང་གཉིས་སྐྱེད་ཚལ་དུ་རྩེད་མོ་རྩེས་པ་མཐོང་ནས། ཉ་བ་གཉིས་ལ་སྤྲད་དེ་གསོད་དུ་བཅུག་ཀྱང་། ཉ་བ་གཉིས་ཀྱིས་ཀྱང་སྙིང་རྗེ་ནས་ལག་མ་སོང་བར་ཚེ་ཐར་དུ་བཏང་ནས། ཡུལ་ཁམས་གཞན་དུ་བྲོས། ཡང་། ཧ་ཅང་བདུད་མོས་ནགས་གསེབ་ཏུ་ལྕམ་སྲིང་གཉིས་བཞུགས་ཡོད་པ་ཐོས་པས། བཙོན་ཏུ་བཅུག་སྟེ་དོ་དམ་དུ་བདུད་བློན་གཟེ་མ་ར་མགོ་བཞག་སྟེ། མཐར་གདོལ་བ་གཉིས་ལ་གསོད་དུ་བཅུག་པས། ལྷ་གཅིག་ཀུན་ཏུ་བཟང་མོ་ཚེ་ཐར་དུ་བཏང་། ལྷ་སྲས་གཡང་དུ་བསྐྱུར་ཡང་། ཡུམ་འགྲོ་བ་བཟང་མོ་བྱ་རྒོད་ཕོ་མོ་གཉིས་སུ་སྤྲུལ་ནས་ལྷ་སྲས་བསྐྱབས། ཕྱིས་སུ་ལས་ཀྱི་དབང་གིས་ལྷ་སྲས་པདྨ་ཅན་གྱི་རྒྱལ་བོར་མངའ་གསོལ་ཚེ། ལྟས་དབང་གིས་ལྷ་གཅིག་ཀུན་ཏུ་བཟང་མོ་སྤྲང་འཁྱམས་བྱས་ཏེ། ཡུལ་པདྨ་ཅན་དུ་ལྷ་སྲས་དང་འཕྲད་དེ་དགའ་བདེའི་དཔལ་ལ་རོལ་སྐབས། བདུད་མོ་ཧ་ཅང་གིས་ཚོར་ཏེ། པདྨ་ཅན་དུ་དམག་དྲངས་པས། ལྷ་སྲས་ཀྱིས་ཡ་ལན་སྤྲད་དེ། བདུད་མོ་ཚར་བཅད་ནས། ཡབ་རྒྱལ་བོ་ཀཱ་ལ་དབང་བོ་བཙོན་ལས་གྲོལ་བ་དང་། ཤན་པ་དང་ཉ་བ་སོགས་ལ་དྲིན་བཟོས་བླ་ལྷག་ཏུ་གནང་སྟེ། མཐར་ལྷ་སྲས་མིང་སྲིང་གཉིས་ཀྱིས་རྒྱལ་ཁབ་གཉིས་ཀ་ཆོས་བཞིན་དུ་བསྐྱངས་པའི་གཏམ་རྒྱུད་ཅིག་ཡིན་ནོ། །
༣ རྒྱལ་བོ་དྲི་མེད་ཀུན་ལྡན། རྒྱལ་བོ་དྲི་མེད་ཀུན་ལྡན་གྱི་རྣམ་ཐར་ནི། དུས་རབས་བཅོ་ལྔ་བའི་ནང་རུས་པའི་རྒྱན་ཅན་གྱིས་བརྩམས་ལ། དེ་ཡང་། སྡེ་དགེ་བཀའ་འགྱུར﹝ཨ﹞དུམ་པའི་འཕགས་པ་རྒྱལ་བུ་དོན་འགྲུབ་ཀྱི་མདོ（འཕགས་པ་ནོར་བུ་དོན་འགྲུབ་ཀྱི་མདོ་ཞེས་ཀྱང་འབྱུང）དང་། རྒྱ་ནག་གི་སྐད་དུ་རྒྱལ་སྲས་ཞིས་ཏའི་གཏམ་རྒྱུད་ཟེར་བ་དེ་ཡིན་པར་བཤད་ཅིང་། བཀའ་བསྟན་གྱི་གཏམ་རྒྱུད་འདིའི་འགྱུར་མི་འདྲ་བ་བདུན་ལྷག་ཡོད་པར་ཡང་བཤད། ཁ་ཅིག་དཔག་བསམ་འཁྲི་ཤིང་གི་ཡལ་འདབ་ཉེར་བཞི་བ་རྒྱལ་བོ་ཐམས་ཅད་སྒྲོལ་གྱི་རྟོགས་བརྗོད་ལ་གཞི་བཟུང་སྟེ་བརྩམས་པ་ཡིན་ཡང་ཟེར།
ཡང་། རྒྱལ་བུ་དོན་འགྲུབ་ཀྱི་མདོ་དང་རུས་པའི་རྒྱན་ཅན་གྱིས་བརྩམས་པའི་དཔེ་སྣ་གཉིས་ལ། མི་མིང་དང་ས་གནས་བརྗོད་དོན་གྱི་ཆ་ནས་མི་འདྲ་བ་ཉུང་ཟད་ཙམ་ཡོད་དེ། དཔེར་ན། མི་མིང་ལ་མཚོན་ན། རྒྱལ་བུ་དོན་འགྲུབ་ཀྱི་མདོ་ལས། རྒྱལ་བུ་དོན་འགྲུབ་དང་ཡབ་མིང་ལ་རྒྱལ་བོ་དགེ་བ་བྱ་བ་དང་། རུས་པའི་རྒྱན་ཅན་གྱིས། དྲི་མེད་ཀུན་ལྡན་དང་ཡབ་ཀྱི་མིང་ལ་ས་སྐྱོང་གྲགས་པའི་དཔལ་དང་། གཞན་ཡང་། ཡབ་རྒྱལ་བོའི་བློན་པོ་དང་བཙུན་མོའི་མང་ཉུང་། དྲི་མེད་ཀུན་ལྡན་གྱི་སྲས་ལྕམ་སྲིང་གི་མང་ཉུང་དང་དེ་རེ་རེའི་མཚན། མི་སྣ་གཞན་དག་གི་མིང་སོགས་མི་འདྲ་བ་མང་ཙམ་འདུག ཡབ་རྒྱལ་བོས་དྲི་མེད་ཀུན་ལྡན་གནས་དབྱུང་མཛད་ས་ཡང་། སྔ་མར་རི་དན་ཏིག་དང་། ཕྱི་མར་བདུད་རི་ནག་པོ་ཧ་ཤང་སྐེམ་སྐེམ་སྒྲ་སྒྲོགས་ཞེས་བཀོད་པ་དང་། ཡང་། སྔ་མར་ས་སྐྱོང་གྲགས་པའི་དགྲ་ཟླའི་རྒྱལ་ཁབ་དང་། ནོར་བུ་དགོས་འདོད་དཔུང་འཇོམས་སློང་མཁན་གྱི་བྲམ་ཟེའི་མིང་བཀོད་མེད་པ་དང་། ཕྱི་མར་དགྲ་ཟླའི་རྒྱལ་ཁབ་ལ་བྱེ་མ་ཤིང་དྲུང་དང་། ནོར་བུ་སློང་མཁན་ལ་བྲམ་ཟེ་བློ་གྲོས་ཞེས་བཀོད་པ་སོགས། རུས་པའི་རྒྱན་ཅན་གྱིས་མི་སྣ་ཞིབ་འབྲི་དང་ཟོར་ཇེ་བདེ་རུ་བཏང་སྟེ། གཏམ་རྒྱུད་འདི་ཁ་གསལ་ཞིང་ཡུལ་སྲོལ་དང་མཐུན་པའི་ཕུན་སུམ་ཇེ་ཚོགས་སུ་བཏང་ཡོད་དོ། །
བརྗོད་སྙིང་ནི། གནའ་སྔ་མོའི་དུས་སུ་བྷེ་ཏའི་ཡུལ་ཞེས་བྱ་བ་ན། རྒྱལ་བོ་ས་སྐྱོང་གྲགས་པའི་དཔལ་ཟེར་བ་ཞིག་ཡོད། དེ་ལ་ནོར་བུ་དགོས་འདོད་དཔུང་འཇོམས་སོགས་ནོར་བུའི་རིགས་བསམ་གྱིས་མི་ཁྱབ་པ་མང་བོ་ཡོད་པར་མ་ཟད། བཙུན་མོ་ཕྱེད་དང་ཉིས་སྟོང་ཁ་ན་ཡོད་ཀྱང་། སྲས་གཅིག་ཀྱང་མེད་པས། མོ་རྩིས་ཀྱི་ལུང་བསྟན་ལྟར་མཆོད་སྦྱིན་རྒྱ་ཆེན་བྱས་ཏེ། བཙུན་མོ་དགེ་འདུན་བཟང་མོ་ལ་རྒྱལ་སྲས་དྲི་མེད་ཀུན་ལྡན་འཁྲུངས། ཆེར་སོན་ཏེ་ཡུལ་པདྨ་ཅན་གྱི་སྲས་མོ་མནྟེ་བཟང་མོ་བཙུན་མོ་བཞེས་ཤིང་། རིམ་པ་བཞིན་ལེགས་ལྡན་དང་། ལེགས་དཔལ། ལེགས་མཛེས་མ་སོགས་ལྕམ་སྲིང་གསུམ་འཁྲུངས། ཁྱད་པར་དུ་དྲི་མེད་ཀུན་ལྡན་ནི། བསྟན་བཅོས་ལ་མཁས་ཤིང་། འགྲོ་ཀུན་སྙིང་བརྩེས་གཟིགས་ཏེ། ཡབ་རྒྱལ་བོས་གནང་བ་ལྟར། བང་མཛོད་ལས་སྦྱིན་གཏོང་རྒྱ་ཆེར་གནང་། སྐབས་དེར་བྱེ་མ་ཤིང་དྲུང་གི་རྒྱལ་བོ་ཤིང་ཁྲི་བཙན་པོ་ལོག་པའི་བློས་ཀུན་ནས་བསླངས་ཏེ། རྒན་པོ་བྲམ་ཟེ་བློ་གྲོས་མངགས་ནས་ནོར་བུ་དགོས་འདོད་དཔུང་འཇོམས་བསླངས་པས། ཡབ་གྱི་མ་གནང་བཞིན་དུ་རྒྱལ་སྲས་ཀྱིས་ཐུགས་བརྩེ་བས་མ་བཟོད་པར་ནོར་བུ་དགྲ་ལག་ཏུ་བྱིན། ཟླ་ངོ་གཅིག་ཙམ་གྱིས་རྗེས་སུ་བདུད་བློན་ཏ་ར་མཛེས་ཀྱིས་ཚོར་ཏེ། ཡབ་རྒྱལ་བོ་ས་སྐྱོང་གྲགས་པ་ལ་ནོར་བུ་དགྲ་ལ་སྦྱིན་པ་ཞུས་པས། རྒྱལ་བོ་ཤིན་ཏུ་ཁྲོས་ཏེ། དྲི་མེད་ཀུན་ལྡན་བཟའ་མི་འཁོར་བཅས་བདུད་རི་ནག་པོ་ཧ་ཤང﹙ད་ལྟ་རེབ་གོང་སྨད་ཀྱི་དགུ་རོང་ཁོག་ལ་ངོས་འཛིན་ལ། ས་དེར་དྲི་མེད་ཀུན་ལྡན་གྱི་སྤྱན་སྦྱིན་པ་གཏོང་ས་ཡང་། ད་ལྟ་ངོས་འཛིན་རྒྱུ་ཡོད། གཞན་ཡང་ཏན་དིག་ཏུ་ངོས་འཛིན་པའང་ཡོད་དེ། བཀའ་འགྱུར་མདོ་མངས་གྲས་ཀྱི་དུམ་པ﹝ཨ﹞འཕགས་པ་རྒྱལ་བུ་དོན་འགྲུབ་ཀྱི་མདོ་ན་བཤད་པའི་ས་མིང་མང་བོ་ད་ལྟ་ཏན་དིག་ན་ཡོད། ﹚སྤྱུགས་ཏེ། ལོ་ངོ་བཅུ་གཉིས་བར་དུ་སླར་འཁོར་མི་ཆོག་པའི་ཐ་ཚིག་བསྒྲགས། ས་དེར་ཁོང་གིས་འཇིགས་སྐྲག་དང་དཀའ་བ་སྣ་ཚོགས་ཁྱད་དུ་བསད་པར་མ་ཟད། ཤ་ལས་མཆེད་པའི་བུ་ཕྲུག་དང་། བཟའ་ཟླ། ཐ་ན་རང་གི་སྤྱན་ཟུང་ཡང་སྦྱིན་པར་བཏང་བས། ཕྱོགས་བཅུའི་སངས་རྒྱས་བྱང་སེམས་ཀྱི་ཐུགས་རྗེ་དང་། རང་གི་བདེན་སྟོབས་ལ་བརྟེན་ནས། མིག་ཟུང་དང་། བཟའ་མི་ལྷན་འཛོམས་བྱུང་བར་མ་ཟད། བྱེ་མ་ཤིང་དྲུང་གི་རྒྱལ་བོ་ཤིང་ཁྲི་བཙན་པོས་ཀྱང་ནོར་བུ་དགོས་འདོད་དཔུང་འཇོམས་སླར་སྤྲད། མཐར་བྷེ་ཏའི་ཡུལ་གྱི་རྒྱལ་བློན་འཁོར་བཅས་ཀྱིས་དཔག་ཚད་བདུན་གྱི་བར་བསུ་བ་བྱོན་ཏེ། དྲི་མེད་ཀུན་ལྡན་འཁོར་བཅས་སླར་འཁོར་ནས་རྒྱལ་སྲིད་ཆོས་བཞིན་སྐྱོང་བར་བཤད་ཡོད།
ཁྱད་པར་དུ་བརྩམས་ཆོས་འདིའི་འབུར་ཐོན་གྱི་ནུས་པ་ནི། སྦྱིན་པའི་ཕར་ཕྱིན་རྩལ་དུ་སྤྲུགས་ནས་སེམས་ཅན་དབུལ་ཕོངས་ཀྱི་སྡུག་བསྔལ་ལས་སྐྱོབ་པ་དང་། སྡུག་བསྔལ་གྱིས་མནར་བའི་སེམས་ཅན་ལ་སྙིང་རྗེ་སྐྱེས་དགོས་པ་ཆུ་ལ་ཆུ་བཞག་གི་ཚུལ་དུ་སིམ་ཡོད་པས། རྣམ་ཐར་འདི་བོད་ཁམས་ཡོངས་ལ་ཁྱབ་རྒྱ་ཆེ་ལ། ཐ་ན་ཡིག་འབྲུ་གཅིག་ཀྱང་མི་ཤེས་པའི་ཕྱུགས་རྫི་ཞིག་གི་ངག་ཐོག་ནའང་། རྒྱལ་བུ་དྲི་མེད་ཀུན་ལྡན་ནི། བྱམས་སྙིང་རྗེ་ལྡན་པ་དང་། གཏོང་ཕོད་ཆེ་བའི་རླབས་ཆེན་ཞིག་དང་། དྲི་མེད་ཀུན་ལྡན་གྱི་སྐུ་ཚེའི་ཐོག་མཐའ་བར་གསུམ་ནི་སྦྱིན་པའི་ཕར་ཕྱིན་གྱིས་རས་ལ་སྣུམ་བྱུགས་པ་ལྟ་བུར་སིམ་པའི་མི་སྣ་ཞིག་ཡིན་པར། ཡ་ཆུང་སེམས་ལ་བཞེངས་བསྐྲུན་བྱས་ཡོད་དོ། །
༤ གཟུགས་ཀྱི་ཉི་མ། གཟུགས་ཀྱི་ཉི་མའི་རྣམ་ཐར་ནི། བཙན་པོ་ཁྲི་སྲོང་ལྡེ་བཙན་གྱི་སྐུ་རིང་ལ་ལོ་ཙཱ་བ་བཻ་རོ་ཙ་ན་དང་། ཤེའུ་ལོ་ཙཱ་བ་གཉིས་ཀྱིས་རྒྱ་གར་སྐད་ནས་བོད་སྐད་དུ་བསྒྱུར་བར་གྲགས་ལ། ཕྱིས་སུ་དུས་རབས་བཅུ་བདུན་པའི་དུས་མཇུག་ཏུ་མོན་བླ་མ་བློ་གྲོས་རྒྱ་མཚོས་དྲང་སྲོང་མངོན་ཤེས་མངའ་བ་ཞིག་གིས་ཁུ་བ་དང་བཅས་པ་གཅིས་པ་རི་དྭགས་མོ་སྐོམ་པས་གདུང་བས་འཐུངས་ནས་མོའི་དབང་བོ་བསྣམས་པས། ཁྱེའུ་ཞིག་བཙས་པ་སོགས་མདོ་ལས་འབྱུང་བ་སོགས་ལ་ཁུངས་བཅོལ་བ་དང་། བོད་ཀྱི་ཡུལ་སྲོལ་དང་སེམས་ཁམས་ལ་བསྟུན་ཏེ། སྟབས་བདེར་བསྡུ་སྒྲིག་བྱས།
བརྗོད་སྙིང་ནི། གནའ་སྔ་མོའི་དུས་སུ་སེམས་ཀྱི་བློ་གྲོས་ཟེར་བའི་རྒྱལ་ཁབ་ཅིག་ཡོད། རྒྱལ་ཁབ་འདིའི་སྟོབས་འབྱོར་མངའ་ཐང་ལ་མཚོན་ན། གྲོང་ཁྱེར་འབུམ་ཚོ་སོ་དྲུག ནོར་བུའི་བང་མཛོད་སུམ་བརྒྱ་དྲུག་ཅུ། གདུགས་དཀར་གསེར་གྱི་ཡུ་བ་ཅན། འདོད་དགུ་འབྱུང་བའི་ལྷུང་བཟེད། རྟ་མཆོག་ངང་བ་འཕུར་ཤེས། གླང་ཆེན་ས་ལ་རབ་བརྟན། འདོད་འཇོའི་བ། མ་ཧེ་ཞོ་མོ་ཆེ། སྨྲ་མཁས་ནེ་ཙོ། ཕག་པ་ཕལ་ཀ སྒོ་ཁྱི་འཛིན་ཤེས་གཏོང་མི་ཤེས་པ། རྫུ་འཕྲུལ་གྱི་ཞགས་པ། འཕེལ་འགྲིབ་མེད་པའི་མེ་ཏོག་ལྡུམ་ར། བློན་པོ་རིག་པ་ཅན་ཨ་བོ་ན་གེ། རྔོན་པའི་བུ་སོགས་བསམ་གྱིས་མི་ཁྱབ་པ་ཡོད། རྒྱལ་བོ་ཟླ་བའི་དེད་དཔོན་སྐུ་ན་བགྲེས་པས། སྲིད་དབང་རྒྱལ་བུ་ཟླ་བ་སེང་གེ་ལ་སྤྲད་དེ་རྒྱལ་སྲིད་ལ་མངའ་དབང་མཛད་སྐབས། ཉིན་ཞིག་རྒྱལ་བུ་ཟླ་བ་སེང་གེས་ཤ་ཁྲག་གི་མཆོད་རྫས་བསྣམས་ནས། དབང་ཕྱུག་ཆེན་པོའི་རྡོ་སྐུ་བར་སྣང་ལ་གནས་པ་ཞིག་ཡོད་པ་དེར་མཆོད་འབུལ་དུ་འགྲོ་བའི་ལམ་བར་དུ། རིགས་ངན་ལ་ལང་ཚོ་མཚར་བའི་བུ་མོ་ཞིག་ཁྲུས་ལ་རོལ་བ་མཐོང་བས། ཡིད་འཕྲོག་སྟེ་རྒྱལ་བོའི་བཙན་མོར་བསུས། སྐབས་ཤིག་གར་ཡོང་ཆ་མ་འཚལ་བའི་ཕག་རྒོད་སྐོར་ཞིག་གིས། ཕོ་བྲང་ཕྱི་རོལ་གྱི་དུས་བཞིར་འགྱུར་མེད་ཀྱི་དགའ་ཚལ་དེ་བཅོམ་པས། རྔོན་པའི་བུས་ཕག་རྒོད་འདུལ་ཆེད་བཤུལ་ཐག་རིང་བོར་ཕྱིན་པས། ཕྱིར་ལམ་སྟོར་ཏེ་ཅི་བྱ་གཏོལ་མེད་དུ་ལུས་ཚེ། ཡུ་མོ་ལས་འཁྲུངས་ཤིང་འཇོ་སྒེག་ལང་ཚོ་མཛེས་པའི་གཟུགས་ཀྱི་ཉི་མ་དང་འཕྲད། བུ་མོས་ལམ་སྟོན་གྱི་རྫས་རྩྭ་ཀུ་ཤ་སྤར་དོ་རྔོན་པ་ལ་གནང་བ་བཟུང་སྟེ་ཕེབས་པས། གྲོང་ཁྱེར་སེམས་ཀྱི་བློ་གྲོས་ལ་བདེ་བླག་ཏུ་ཐོན། རྔོན་པས་རྒྱལ་བོ་ལ་གཟུགས་ཀྱི་ཉི་མའི་གནས་ཚུལ་ཞུས་པས། རྒྱལ་བོ་གཟུགས་ཀྱི་ཉི་མ་འཚོལ་དུ་ཕེབས་ཏེ། ཡབ་སྒོམ་ཆེན་པའི་དྲུང་དུ་ཕྱིན་སྐབས། སྒོམ་ཆེན་པའི་བཀའ་བཀོད་བཞིན་ནང་ཆོས་སུ་ཞུགས་ཏེ། སྐྱབས་འགྲོ་སེམས་བསྐྱེད་ཀྱི་བསླབ་བྱ་དང་། དགེ་བསྙེན་གྱི་སྡོམ་པ་བླངས་ཏེ་ཕོ་བྲང་དུ་བསུས། ནང་དགོས་སུ་ཡབ་སྒོམ་ཆེན་པས་གཟུགས་ཀྱི་ཉི་མར་སྲུང་བ་ཟབ་མོའི་རྟེན་དུ་མུ་ཏིག་གི་ཕྲེང་བ་གནང་ནས། རང་གི་ཁྱིམ་ཐབ་དང་ཤ་ལས་ཆད་པའི་བུ་ཕྲུག་ལའང་བསྟན་མི་ཆོག་པའི་བཀའ་ལུང་བསྩལ། བཙུན་མོས་ལྷ་ཆོས་དང་མི་ཆོས་ཁྱད་པར་ཅན་ལ་བརྟེན་ཏེ། རྒྱལ་བཀུར་འབངས་བྱམས་སོགས་མཛད་པས། རྒྱལ་བློན་འབངས་གསུམ་གྱིས་དགའ་གུས་ཐོབ་ནའང། རིགས་ངན་མས་ཕྲག་དོག་གིས་ཀུན་ནས་བསླངས་ཏེ། མོ་མ་གན་དེ་ནོར་གྱིས་བསླུས་ནས་གཡོ་ཟོལ་གྱིས། གཉིད་དང་མྱོས་པར་འགྱུར་བའི་རྫས་ངན་སོ་གཉིས་བཏབ་སྟེ་དྲངས་ཀྱང་། གནོད་པས་མ་ཚུགས་པས། མོ་མ་གན་དེས་གཟུགས་ཀྱི་ཉི་མ་ལ་སྲུང་བ་ཁྱད་པར་ཅན་ཞིག་ཡོད་པ་རྟོགས་ནས། བསླུ་བྲིད་ཀྱིས་མུ་ཏིག་གི་ཕྲེང་བ་སྟོན་བཅུག་སྟེ། ཕྲེང་བ་དེ་དང་འདྲ་མཚུངས་ཤིག་བཟོས་ཏེ་བརྗེ་སྤོར་བརྒྱབ། སླར་ཡང་རྒྱལ་བོ་དང་གཟུགས་ཀྱི་ཉི་མ་འཁོར་བཅས་མྱོས་ཤིང་རྨུགས་པར་བྱེད་པའི་རྫས་ངན་བཞི་བཅུ་བཏབ་སྟེ་དྲངས་པས། དེ་དག་གཉིད་དུ་ཡུར་བའི་རིང་ལ་གན་དེ་བཟང་མོས་གླང་ཆེན་ས་ལ་རབ་བརྟན་དང་། ལྷ་བྱ་ནེ་ཙོ། སྲས་ཆུང་བ་ཟླ་བ་གཞོན་ནུ་སོགས་བསད་དེ་གཟུགས་ཀྱི་ཉི་མའི་མཐའ་བསྐོར་དུ་སྤུངས་ནས་མ་ཉེས་ཁ་ཡོག་བཀལ་ཏེ། རྒྱལ་བོ་ལ་བསླུ་བྲིད་བཏང་བས། རྒྱལ་བོས་བདེན་པར་བཟུང་སྟེ་གཤེད་མ་གསུམ་བོས་ནས་གཟུགས་ཀྱི་ཉི་མ་དུར་ཁྲོད་དུ་ཕུང་བོ་གཟན་བསྒྱུར་གཏོང་དགོས་པའི་ཁྲིམས་ཆད་ཕོག་ཀྱང་། དེ་དག་གིས་གཟུགས་ཀྱི་ཉི་མའི་འཇོ་སྒེག་གི་གཟི་བྱིན་མ་བཟོད་དེ། སྐུ་ལུས་གྲིས་གཤགས་མ་ཕོད་པར་བཞག མཐར་ཁྲག་མཚོ་དྲག་ཏུ་ཁོལ་བ་དང་། གཅན་གཟན་སོགས་ཀྱི་འཇིགས་པ་ལས་ཐར་ཏེ། མོས་དྲང་སྲོང་སྒོམ་ཆེན་པར་གསོལ་བ་བཏབ་པ་དོན་སྨིན་གྱུར་ཏེ། དྲང་སྲོང་གི་ཐུགས་རྗེས་ནེ་ཙོ་དང་གཞོན་ནུ་གཉིས་ལ་སླར་ཡང་ཚེ་སྲོག་རྙེད་ཅིང་། བདུད་བཙན་གྱིས་རང་འཚང་བརྟོལ་ནས་ནག་ཕྱོགས་ཀྱི་སྐོར་ལ་སུན་འབྱིན་དང་། ཁ་རྡུང་བཏང་སྟེ་སླར་རྒྱལ་བོའི་ཕོ་བྲང་དུ་བསུས་པའི་གཏམ་རྒྱུད་ཅིག་ཡིན།
༥ ལྷ་གཅིག་ཀོང་ཇོ་བོད་དུ་བསུས་ཚུལ། རྣམ་ཐར་འདི་ནི་མ་ཎི་བཀའ་འབུམ་གཞིར་བཟུང་ནས་བརྩམས་པ་ཡིན།
བརྗོད་སྙིང་ནི། བོད་རྒྱལ་སོ་གཉིས་པ་སྲོང་བཙན་སྒམ་པོས། ཐང་ཆེན་པོའི་རིག་གནས་ནང་འདྲེན་དང་། མཛའ་མཐུན་སོགས་ཡོང་ཆེད། ཐང་ཐེ་ཙུང་གི་སྲས་མོ་རྒྱ་བཟའ་ཀོང་ཇོ་བཙུན་མོར་བསུ་བར། བློན་ཆེན་མགར་སྟོང་བཙན་སོགས་རྟ་བ་བརྒྱ་ཕྲག་ལ། རྒྱལ་བོའི་བཀའ་ཤོག་སྒྲོམ་བུ་དང་། རིན་ཆེན་པདྨ་རཱ་གའི་ཁྲབ། གསེར་གྱི་དོང་ཙེ། གསེར་ཕྱེ་སོགས་འབུལ་རྟེན་གྱ་ནོམ་པ་བསྐུར་ཏེ་རྒྱ་ནག་ཏུ་མངགས། བློན་ཆེན་ཁྲང་ཨན་དུ་ཕེབས་དུས། རྒྱ་གར། སྟག་གཟིག བྷ་ཏ་ཧོར། གེ་སར་སོགས་ཀྱི་གཉེན་སློང་བ་མང་བོ་འབྱོར་ཡོད་སྟབས། རྒྱ་ནག་གོང་མ་འཁོར་བཅས་ཀྱིས་བཀའ་གྲོས་མཛད་པས། གོང་མས་རྒྱ་གར་ཆོས་ཀྱི་འབྱུང་ཁུངས་ཡིན་པས་རྒྱ་གར་ལ་སྟེར་ཟེར། བཙུན་མོས་སྟག་གཟིག་སྟོབས་འབྱོར་ཆེ་བས་སྟག་གཟིག་ལ་སྟེར་ཟེར། རྒྱལ་སྲས་ཀྱིས་བྷ་ཏ་ཧོར་ནི་དཔའ་རྩལ་ཆེ་བས་དེ་ལ་སྟེར་ཟེར། ཀོང་ཇོས་གེ་སར་དམག་གི་རྒྱལ་བོ་ནི་གཟུགས་བཟང་ལང་ཚོ་ལྡན་པས་དེ་ལ་འགྲོ་ཟེར། འོན་ཀྱང་། བོད་དུ་འཐད་པ་གཅིག་ཀྱང་མ་བྱུང་། གོང་མ་ཐེ་ཙུང་ཡང་ཅི་བྱ་གཏོལ་མེད་གྱུར་ཏེ། མཐར་རྒྱལ་ཁབ་མང་བོའི་གཉེན་སློང་བ་རྣམས་ལ། རིག་པ་འགྲན་པའི་དཀའ་གནད་ལྔ་བཏོན་པ་སྟེ། ༡ གཡུ་མིག་ཀྱག་ཀྱོག་ནང་དར་སྐུད་རྒྱུ་བ། ༢ ཉིན་གཅིག་ནང་ལུག་བརྒྱ་བཤས་ཏེ། ཤ་ཟོས་ནས་པགས་པའང་མཉེད་ཚར་བ། ༣ ཆང་བན་ཆེན་པོ་བརྒྱ་མ་བོ་བར་འཐུང་ཚར་ཏེ་མ་བཟི་བ། ༤ རྟ་མ་བརྒྱ་དང་རྟེའུ་ཕྲུག་བརྒྱ་ཁ་གཏོར་ཏེ་མ་བུ་སྦྱོར་ཏུ་གཏུབ་པ། ༥ བྱ་མ་དང་བྱེའུ་ཁ་ཕྲལ་དུ་བཏང་སྟེ་མ་བུ་འཕྲོད་པ། ༦ སྦོམ་ཕྲ་མཚུངས་པའི་གསོམ་ཤིང་བརྒྱ་མགོ་རྔ་ཤེས་པ། ༧ གསོལ་སྟོན་དུ་བོས་ཏེ་ཆང་གིས་ར་རོ་བར་གྱུར་ཀྱང་གནས་ཚང་དུ་ལོག་ཐུབ་པ། ༨ རྒྱའི་མཛེས་མ་སུམ་བརྒྱའི་གྲས་ལས་ཀོང་ཇོ་ངོས་ཟིན་པ་བཅས་རིག་པ་འགྲན་རྒྱུའི་གྲོས་ཐག་བཅད་པ་བཞིན། མགར་སྟོང་བཙན་གྱི་ཐབས་ཤེས་སྣ་ཚོགས་ལ་བརྟེན་ཏེ་རེ་རེ་ལས་རྒྱལ་ནས། མཐར་རྒྱ་ནག་གིས་ཀོང་ཇོ་མི་སྟེར་ཀ་མེད་བྱུང་ནས། ཇོ་བོ་ཤཱཀྱ་མུ་ནེ། ལས་ཀྱི་མེ་ལོང་། གབ་ཙེ་གཙུག་ལག་སུམ་བརྒྱ། བཟོ་ཡི་རིག་བྱེད་དྲུག་ཅུ། བརྟག་ཐབས་བརྒྱ་དང་དཔྱད་ལྔ་སྦྱོར་སྡེ་བཞི་སོགས་ཀྱི་རྫོང་བ་དང་བཅས། རྒྱ་བཟའ་ཀོང་ཇོ་བོད་དུ་བསུས་པའི་གཏམ་རྒྱུད་ཅིག་ཡིན།
༦ སྲས་དོན་ཡོན་དང་དོན་གྲུབ། རྣམ་ཐར་འདི་ནི་དུས་རབས་བཅོ་བརྒྱད་པའི་ནང་པཎ་ཆེན་སྐུ་ཕྲེང་ལྔ་བ་བློ་བཟང་ཡེ་ཤེས་ཀྱིས་བརྩམས་པར་གྲགས། བཤད་རྒྱུན་ལ་རྣམ་ཐར་འདིའི་ཤུགས་བསྟན་ལ་རྒྱལ་བ་པཎ་ཆེན་གྱི་མཛད་རྣམ་ཀྱང་བསྟན་ཡོད་པར་བཤད། རྣམ་ཐར་འདིའི་མཚན་བྱང་ལ་གཅུང་བོ་དོན་ཡོད་དང་དོན་གྲུབ་སྐུ་མཆེད་ཀྱི་རྣམ་ཐར་དང་། གཅུང་བོ་སྐུ་མཆེད་ཀྱི་གསང་བའི་རྣམ་ཐར་ཡང་ཟེར། མི་རོ་རྩེ་སྒྲུང་ཁྲོད་ཀྱི་ཕུ་ནུ་གཉིས་ཞེས་པའི་གཏམ་རྒྱུད་དང་རྣམ་ཐར་འདི་གཉིས་ས་མིང་དང་མི་མིང་། བྱུང་རབས་ཁ་ཤས་མི་མཚུངས་པ་མ་གཏོགས་རྩ་བའི་ཆ་ནས་ཕལ་ཆེར་གཅིག་མཚུངས་ཡིན། རོ་སྒྲུང་གི་ལེའུ་ཉེར་གཅིག་པ་རྒྱལ་བུ་དོན་གྲུབ་འཕྲལ་དུ་སྡུག་ཁུར་བྱས་པ་ལས་ནམ་ཕུགས་རྒྱལ་ཁྲིམས་ཆོས་བཞིན་བསྐྱངས་པ་བྱ་བ་དང་རྣམ་ཐར་འདི་གཉིས་ཀྱང་མི་མིང་དང་བྱུང་རིམ་ཕལ་ཆེར་འདྲ་མཚུངས་སུ་གནས་པས་ན། དོན་དུ་སྒྲུང་འདི་ཇེ་རྒྱས་སུ་བཏང་ནས་བརྩམས་པར་སེམས་སོ། །
བརྗོད་སྙིང་ནི། ཟངས་གླིང་རྒྱལ་ཁབ་ཅེས་བྱ་བ་ན། རྒྱལ་བོ་སྟོབས་ཀྱི་ལྷ་དང་བཙུན་མོ་ཀུན་བཟང་མ་བྱ་བ་ཞིག་མཆིས་ལ། མངའ་ཐང་དར་ཞིང་མཆོད་སྦྱིན་ལ་གཙིགས་ཀྱང་། སྲས་མེད་པས་དཀོན་མཆོག་དང་ལྷ་ཀླུ་ལ་འཕྲིན་བཅོལ་བཏང་བས། ཐུགས་ཀ་ན་ཧྲཱྀཿཡིག་འབུར་དོད་སོགས་ཀྱི་མཚན་མ་བསམ་གྱིས་མི་ཁྱབ་པའི་ལྷ་སྲས་དོན་འགྲུབ་འཁྲུངས། དོན་འགྲུབ་དགུང་གྲངས་ལྔ་ལོན་ཚེ་ཡུམ་ཚེ་ལས་འདས་པས། སླར་ཡང་རྒྱལ་བོས་ཕལ་བའི་བུ་མོ་པདྨ་ཅན་ཁབ་ཏུ་བསུས། དེ་ཡང་། རྒྱལ་སྲས་དོན་ཡོད་འཁྲུངས་པས། བཙས་མ་ཐག་པ་ནས་མའི་ནུ་ཞོ་བཞེས་པ་ཙམ་མ་གཏོགས། ཨ་ཇོ་དོན་གྲུབ་ལ་བློ་སྙིང་བྲང་གསུམ་གཏོད་ཅིང་། ཉིན་མཚན་ཁོར་མོ་ཡུག་ལ་ལྷན་དུ་བཞུགས། སྲས་གཉིས་འཚར་ལོངས་བྱུང་རྗེས་པདྨ་ཅན་གྱི་བསམ་པར། ཐམས་ཅད་ཀྱིས་བཤད་ལུགས་གང་ལ་བལྟས་ཀྱང་། ཇོ་ཇོས་རྒྱལ་ས་འཛིན་པར་འདུག་བསམ་སྟེ། མོས་ནད་རྫུ་བཏབ་པ་སོགས་བསམ་ངན་སྦྱོར་རྩུབ་སྣ་ཚོགས་བཤམས་ནས། མོའི་ནད་གཞི་དྭངས་པ་ལ་རྒྱལ་བུ་དོན་འགྲུབ་རྒྱང་ཕུད་དུ་གཏོང་དགོས་པར་ཞུས་པ་བཞིན། རྒྱལ་བུ་དོན་འགྲུབ་མི་མེད་ཀོ་ཤའི་ཡུལ་དུ་སྤྱུགས་གྲབས་བྱེད་སྐབས། གཅུང་བོ་དོན་ཡོན་ཨ་ཇོ་ལ་ཧ་ཅང་སེམས་འཕྲེང་ནས། ཨ་ཇོ་དང་མཉམ་དུ་ཕེབས་རྒྱུའི་ཨུ་ཚུགས་མཐར་སྐྱེལ་གནང་སྟབས། གཅེན་པོ་དང་ལྷན་དུ་ཀོ་ཤའི་ཡུལ་དུ་མི་ཁྲིད་ཀ་མེད་བྱུང་། ལམ་དུ་འཇིགས་སྐྲག་དང་ཚ་གྲང་བཟོད་གླགས་མེད་པ་མྱོང་བའི་ཁར། ལམ་བར་དུ་གཅུང་བོ་དོན་ཡོན་བཀྲེས་སྐོམ་གྱིས་གཟིར་ཏེ་ཚེ་ལས་འདས། གཅེན་པོས་ནུ་བོའི་སྐུ་ཕུང་དེ་ཙན་དན་གྱི་བསིལ་གྲིབ་འོག་གཡམ་སྒྲོམ་དུ་བཞག་ནས་ཀོ་ཤའི་ཡུལ་དུ་བཞུད། ཤུལ་དུ་ལྷ་ཚངས་པ་དང་བརྒྱ་བྱིན་གྱིས་གཅུང་བོའི་སྐུ་ཕུང་ལ་ཙན་དན་གྱི་ཐང་ཆུ་གཏོར་བས། སྐུ་ལུས་སྔར་བཞིན་སོར་ཆུད་དེ་ཨ་ཇོ་འཚོལ་བར་མངགས། གཅེན་པོ་དོན་འགྲུབ་དགེ་སློང་བགྲེས་སོང་ལེགས་པའི་བློ་གྲོས་དང་འཕྲད་པས། དེའི་སྒྲུབ་གཡོག་ཏུ་བཞུགས་པའི་ཚེ། ཡུལ་གྲུ་དེའི་ལུགས་སྲོལ་ལ་ལོ་བཅོ་བརྒྱད་ཅན་གྱི་འབྲུག་ལོ་བ་ཞིག་ལོ་རེ་བཞིན་མཚོ་མཆོད་བྱེད་པའི་དུས་ལ་ཐོན་པས། བདུད་བློན་ཏྲི་ཤུས་ལུང་བའི་ཕུ་ན་དགེ་སློང་གི་སྒྲུབ་གཡོག་འབྲུག་ལོ་བ་ཞིག་ཡོད་པ་ཤེས་ནས། དགེ་སློང་ལ་རྒྱལ་བུ་དོན་འགྲུབ་མཚོ་རྫས་སུ་མཆོད་པར་ཞུས་ཀྱང་། དགེ་སློང་གིས་ཞལ་བཞེས་མ་གནང་བ་དོན་འགྲུབ་ཀྱིས་གཟིགས་ནས། དགེ་སློང་ལ་གནོད་འཚེ་ཕོག་པར་དོགས་ནས། རང་འཐད་ཀྱིས་མཚོའི་ནང་དུ་མཆོངས་པས། ཐམས་ཅད་ཀྱིས་སྡུག་བསྔལ་ཞི་སྟེ་དགའ་བདེའི་དཔལ་ལ་རོལ་ཐུབ་པ་བྱུང་བར་མ་ཟད། ཀླུས་རྒྱལ་བོས་ཀྱང་རྒྱལ་བུ་དོན་འགྲུབ་ལ་ནོར་བུ་བསམ་འཕེལ་སོགས་འབུལ་བ་གྱ་ནོམ་པ་ཕུལ་ཏེ་མི་ཡུལ་དུ་ཕེབས། རིང་བོ་མ་ལོན་པར་གཅུང་བོ་དོན་ཡོད་དང་འཇལ་ཏེ། རྒྱལ་སྲས་དོན་འགྲུབ་ཀོ་ཆའི་ཡུལ་གྱི་རྒྱལ་བོར་བསྐོས་པ་དང་། ནུ་བོ་དོན་ཡོད་ཟངས་གླིང་ཡུལ་གྱི་རྒྱལ་བོར་བཞུགས་ཏེ་ཕྱོགས་སོ་སོ་ནས་རྒྱལ་སྲིད་བསྐྱངས་པས། མངའ་ཐང་དང་འཁོར་འབངས་རྒྱས་ཏེ་བདེ་སྐྱིད་ཀྱི་དཔལ་ལ་རོལ་བའི་གཏམ་རྒྱུད་ཅིག་ཡིན།
༧ སྣང་ས་འོད་འབུམ། སྣང་ས་འོད་འབུམ་གྱི་རྣམ་ཐར་འདི་ལ་སྣང་ས་ལྷ་ཡུལ་མ་དང་སྣང་ས་ཤ་ལུས་སོགས་མི་འདྲ་བ་ཁ་ཤས་ཡོད་པར་གྲགས་ཀྱང་། སྐབས་སུ་བབ་པ་ནི། རིགས་བཟང་གི་མཁའ་འགྲོ་མ་གཟུགས་མཛེས་སྣང་ས་འོད་འབུམ་ཞེས་པ་འདི་ཡིན་ཞིང་། རྣམ་ཐར་འདི་ཕལ་ཆེར་དུས་རབས་བཅུ་གསུམ་པའི་སྔོན་ནས་སྡིངས་ཆེན་སྨྱོན་པ་ཚེ་རིང་དབང་འདུས་ཀྱིས་བརྩམས་པར་སྙམ་སྟེ། རྣམ་ཐར་འདི་རུ་སྣང་ས་ས་ཕོ་རྟ་ལ་སྐུ་བལྟམས་པ་དང་། རྗེ་མི་ལ་དང་དུས་མཉམ་པའི་བླ་མ་ཤཱཀྱ་རྒྱལ་མཚན་བྱ་བ་ལས་ཆོས་གསན་ཏེ་སྒྲུབ་པ་མཛད་པར་གསུངས་པ་ལྟར་ན། མི་ལ་ནི་སྤྱི་ལོ ༡༡༢༣ ལོར་སྐུ་མྱ་ངན་ལས་འདས་པ་ཡིན་པས། རྣམ་ཐར་འདི་ཉིད་དུ་བཤད་པའི་ས་ཕོ་རྟ་ནི་ཕལ་ཆེར་སྤྱི་ལོ ༡༠༧༨ ཡིན་པར་སྙམ་མོ། །བུ་མོ་སྣང་ས་ནི་ས་དེ་གར་དངོས་སུ་འཁྲུངས་པ་ཞིག་སྟེ། ད་ལྟ་ཡང་། རྒྱལ་རྩེ་ཁུལ་དུ་ཡུལ་མིང་ལྗང་ཕུད་ཁུད་དང་། རི་ནང་། དགོན་པ་སེ་རག་སྒྲུབ་སྡེ། བརྩེ་ཆེན་ཟམ་པ་སོགས་སྣང་སའི་རྣམ་ཐར་ལས་འབྱུང་བའི་ས་མིང་དུ་མ་ཡོད་དོ། །
བརྗོད་སྙིང་ནི། གཙང་གི་མྱང་སྟོད་རྒྱལ་རྩེ་ཡུལ་ལྗོངས་ཞེས་པ་ན་ལྗང་ཕུད་ནང་བ་ཟེར་བའི་མི་ཁྱིམ་ཕལ་བ་ཞིག་ཡོད། ཁྱིམ་དེར་སེང་ལྡེང་ནགས་སྒྲོལ་གྱི་བསྟོད་པ་ཉིན་མཚན་དུ་ཆགས་མེད་འདོན་པའི་ཀུན་བཟང་བདེ་ཆེན་དང་། མྱང་ཚ་དཔལ་སྒྲོན་ཞེས་པའི་བཟའ་ཟླ་གཉིས་ཡོད། ཁོང་གཉིས་ལ་ཚེ་སྟོད་དུ་བུ་ཕྲུག་མ་བྱུང་ཡང་། ན་རྒས་སྐྲ་དཀར་དུ་གྱུར་བའི་སྐུ་ཚེ་སྨད་ལ། གཟུགས་མཛེས་ཤིང་ངང་རྒྱུད་འཇམ་པའི་བུ་མོ་ཞིག་འཁྲུངས། བུ་མོ་དེ་བཙས་མ་ཐག་ནས། ཡུམ་གྱི་ནུ་ཞོའི་ཕུད་ཀྱིས་མཆོད་པ་ཕུད་དེ། ཕྱག་ཐལ་མོ་སྦྱར་ནས་ཞལ་ལས། དུས་གསུམ་རྒྱལ་བ་བསྐྱེད་པའི་ཡུམ་མཆོག་མ། །རྗེ་བཙུན་སྒྲོལ་མར་མཆོད་ཅིང་ཕྱག་ཀྱང་འཚལ། །ང་ནི་འགྲོ་བའི་དོན་དུ་སྣང་བ་ཡིན། །ས་སྟེང་འདི་ལ་བཀྲ་ཤིས་བདེ་ལེགས་ཤོག །ཅེས་གསུངས་པས། མཚན་ལ་ཡང་། ཚིགས་བཅད་དེ་རྣམས་བསྡུས་ནས། ཀུན་གྱིས་བུ་མོ་སྣང་ས་འོད་འབུམ་ཞེས་གསོལ་ཏོ། །སྐྱེད་བསྲིངས་ཏེ་སྣང་ས་ནི་བརྩོན་པ་ཆེ་ཞིང་སྙིང་རྗེ་ལྡན་པ། གཞུང་ལུགས་ལ་མཁས་པར་མ་ཟད། འཇིག་རྟེན་གྱི་བྱ་བ་སྔ་དྲོ་ལངས་པའི་སྔ་མ། དགོང་མོ་ཉལ་བའི་རྟིང་མ། ཟས་ཀྱི་གཡོས་སྦྱོར་དང་། སྣམ་ལས། ཞིང་ལས་སོགས་ལ་འཇོན་པས། ཁྱིམ་ཚང་དེ་འཚོ་བ་ཕུན་སུམ་ཚོགས་པ་བྱུང་། སྣང་ས་མོ་ལོ་བཅོ་ལྔ་བཞེས་ཚེ། ས་ཕྱོགས་ཀུན་ནས་མནའ་མར་སློང་བ་ཤིན་ཏུ་མང་། ནམ་ཞིག་གི་ཚེ། བུ་མོ་སྣང་སས་གཡོག་མོ་འཛོམས་པ་སྐྱིད་ཁྲིད་དེ་གནས་སྙིང་གཟུངས་སྒྲུབ་ཀྱི་གར་འཆམ་ལ་ལྟད་མོ་ཕེབས་དུས་སུ། རི་ནང་དཔོན་པོ་སྒྲ་གཅན་ཞེས་པ། མེ་ལས་དབལ་ཚ་བ། ཆུ་ཆེན་ལས་རླབས་དྲག་པ། རྟ་རྔ་ལས་ཉག་ཕྲ་བ། རྒྱ་གཡེར་ལས་ཁ་བེར་བ། སྲན་མ་ལས་རྡོག་འགྲིལ་བ། བག་ཕྱེ་ལས་རྩི་ཞིབ་པ་ཞིག་ཡོད་པ་དེས། མི་ཚོགས་ཀྱི་ཁྲོད་ལས་བུ་མོ་སྣང་ས་མཐོང་བས། ཁོའི་མིག་དབང་འཕྲོག་ཏེ། གཟིམ་དཔོན་བསོད་ནམས་དཔལ་སྐྱིད་བཏང་སྟེ་ཁྲོམ་གསེང་ལས་རི་བོང་གླག་གིས་བཟུང་བ་བཞིན། བཙན་ཤེད་ཀྱིས་ཁོའི་བུ་གྲགས་པ་བསམ་འགྲུབ་ཀྱི་མནའ་མ་ཡིན་ཞེས་མདའ་དར་བཙུགས། སྣང་ས་འོད་འབུམ་རི་ནང་གི་ཁྱིམ་ཆེན་དེ་མནའ་མར་སོང་སྐབས། མོ་ལ་སྲས་ལྷའུ་དར་བོ་འཁྲུངས་པར་མ་ཟད། མོའི་ཁོག་རྒྱ་དང་བྱམས་བརྩེ་ལ་འཁོར་གཡོག་ཀུན་གྱིས་དགའ་ཞེན་ཚད་མེད་འཐོབ་སྟེ། སྣང་སས། དཔོན་པོ་སྒྲ་ཆེན་ཡབ་སྲས་དང་། བློན་འབངས་རྣམས་ཀྱི་བློ་ཁ་ཆོས་ལ་བསྒྱུར་བར་བརྩམས་ཀྱང། ཨ་ནེ་དང་སྙིད་མོ། ནེ་ཙོ་སོགས་ཀྱིས། དཔོན་པོ་སྒྲ་གཅན་དང་སྣང་སའི་བར་ཕུ་དཀྲུག་མདའ་དཀྲུག་བྱས་པས། དེ་དག་ཆོས་ལ་འཇུག་པ་ལྟ་ཅི། ད་དུང་མནར་གཅོད་ཚད་མེད་བྱས་ཉེས་ཀྱིས་སྣང་ས་ལྔ་ལམ་དུ་བཏང་བར་མ་ཟད། སྣང་སའི་སྐུ་ཕུང་རི་ནང་ཤར་ཕྱོགས་ཀྱི་སྤང་རིའི་སྟེང་དུ་ཞག་བདུན་བཞག འོན་ཀྱང་། སྣང་ས་འདས་ལོག་བརྒྱབ་སྟེ། རྣལ་འབྱོར་མའི་ཆ་བྱད་ཀྱིས་མྱང་སྟོད་དུ་སླར་ཕེབས་པས། མི་ཀུན་ཡ་མཚར་བ་དང་། རང་གི་བུ་ལྷའུ་དར་བོ་ཁྲིད་དེ་ལྗང་ཕུད་ཁུད་ནང་པར་ཡབ་ཡུམ་གཉིས་ལ་མཇལ་བས། ཁོང་གཉིས་དགའ་ཚོར་དཔག་མེད་སྐྱེས། སྣང་སས་མོ་རང་ལྷ་ཆོས་བྱ་བར་བགྲོས་ཀྱང་ཡབ་ཡུམ་གཉིས་མོས་མཐུན་མ་བྱུང་ཡང་། སྣང་ས་འཇིག་རྟེན་འཁོར་བ་ལ་ཞེན་པ་ལོག་ནས། སེ་ར་གཡའ་ལུང་བྱ་བར། བླ་མ་བཟང་བོ་ཤཱཀྱ་རྒྱལ་མཚན་ཞུ་བ་དེའི་དྲུང་དུ་དམ་ཆོས་ལ་འགྲུས། ཚུལ་དེ་རི་ནང་དཔོན་པོ་སྒྲ་གཅན་གྱིས་ཐོས་པས། དྲག་སྦྱོར་གྱིས་སླར་འཕྲོག་རྩིས་བྱས་མོད། བླ་མ་དང་སྣང་སས། ཤར་རི་ནུབ་ཏུ་སྤོས། ནུབ་རི་ཤར་དུ་སྤོས། མདའ་གྲི་མདུང་གསུམ་གྱིས་མི་སྙོགས་པའི་བར་སྣང་དུ་དཀྱིལ་ཀྲུང་གིས་བཞུགས་ཏེ་དཔོན་པོ་འཁོར་བཅས་ལ་ཁ་ཏ་བསླབ་བྱ་གནང་བས། དེ་དག་ཀྱང་ངོ་མཚར་དང་དད་པ་སྐྱེས་ནས། སྔོན་བྱས་ལ་འགྱོད་བཤགས་བྱས་ཏེ། མཐར་སྣང་སའི་ཞལ་གདམས་ལྟར། ལྷའུ་དར་བོ་རྒྱལ་སྲིད་ལ་མངའ་གསོལ་ཏེ། དཔོན་པོ་སྒྲ་གཅན་ཡབ་སྲས་རི་ཁྲོད་འགྲིམས་ནས། དམ་པའི་ལྷ་ཆོས་མཛད་པ་བྲིས་ཡོད།
༨ པདྨ་འོད་འབར། པདྨ་འོད་འབར་གྱི་རྣམ་ཐར་ནི། དུས་རབས་བཅུ་བདུན་པའི་དུས་མཇུག་ཏུ་མོན་བླ་མ་བློ་གྲོས་རྒྱ་མཚོས་མཛད་པ་ཡིན་ཞིང་། དེ་ཡང་། པདྨ་བཀའ་ཐང་གཞིར་བཟུང་སྟེ། རྩོམ་པ་པོས་དེ་ལ་སྣོན་ཕྲི་བགྱིས་ཏེ་བརྩམས་གནང་མཛད་སྙམ་པ་དང་། ཡང་ན། བཀའ་གདམས་ཕ་ཆོས་བུ་ཆོས་ཀྱི་ནང་། རྒྱལ་བོ་དད་པ་བརྟན་པོ་སྲིན་ཡུལ་དུ་སོང་སྟེ་སྨན་མེ་ཏོག་ཀུ་ཤ་ན་ལེན་པར་ཕེབས་པ་དང་། འདིར་གསེར་གྱི་སླ་ང་བླངས་པ་ཙམ་མ་གཏོགས། སྲིན་ཡུལ་དུ་ཕེབས་སྟངས་སོགས་འདྲ་བོ་འདུག
བརྗོད་སྙིང་ནི། ཕོ་བྲང་ཁ་མ་ཎི་ཞེས་པ་ན། བདུད་མ་ཊཾ་རུ་ཊའི་སྤྲུལ་བ་རྒྱལ་བོ་ལོག་པའི་མཆོད་སྦྱིན་ཟེར་བ་ཞིག་ཡོད། དེ་ལ་བདུད་བློན་རྐང་མགྱོགས་བང་ཆེན་དང་། ཆོས་བློན་ཚོང་དཔོན་ནོར་བཟང་བྱ་བ་ཞིག་ཡོད། ཚོང་དཔོན་དེས་ཐབས་བརྒྱ་ཇུས་སྟོང་གི་ཤེས་རབ་ལ་བརྟེན་ནས་རྒྱལ་ཁབ་ཀྱི་མངའ་ཐང་སྤེལ་བཞིན་ཡོད། ཚེ་ཞིག་བདུད་རྒྱལ་དེ་རི་བོང་གནམ་རྡིབས་ཀྱི་ཕྲག་དོག་གིས་བསླངས་ནས། ཚོང་དཔོན་ནོར་བཟང་འདི་མེད་བརླག་མ་བྱས་ན། རང་གི་གོང་དུ་ཤོར་དོགས་ནས། ཀླུ་ཡུལ་པདྨ་ཅན་དུ་ནོར་བུ་དགོས་འདོད་དཔུང་འཇོམས་ལེན་པར་མངགས། ཚོང་དཔོན་གྱིས་མཁོ་བའི་ཡོ་བྱད་རྣམས་ཚགས་སུ་ཆུད་པར་བྱས་ཏེ་དམ་ཚིག་གཙང་བའི་ཚོང་ཕྲུག་ལྔ་བརྒྱ་ཁྲིད་དེ་རྒྱ་མཚོར་འཇུག་སྐབས། ཀླུ་རྣམས་ཁྲོས་ཏེ་སྡིག་རྭར་སྤྲུལ་ནས་གྲུ་རྫིངས་མགོ་རྟིང་སློག ཚོང་བ་རྣམས་ཤིང་དུམ་རེར་འཐམ་ཏེ་སྲིན་ཡུལ་དུ་སླེབས་པ་ན། བཙན་གྱིས་སྲིན་མོ་རྣམས་ཀྱི་ཁྱོ་ག་བྱས། ཉིན་ཞིག ཚོང་དཔོན་ནོར་བཟང་གིས་ཚོང་ཕྲུག་ལྔ་བརྒྱ་བོ་ཁྲིད་ནས། རྟའི་རྒྱལ་བོ་བྷ་ལ་དེ་བར་ཞོན་ཏེ་ལྷ་ཡུལ་དུ་བགྲོད་སྐབས། ཚོང་ཕྲུག་རྣམས་ཀྱིས་ཞེན་ཆགས་ཀྱིས་ཕྱིར་མིག་བལྟས་པས། ཕྱིར་སྲིན་ཡུལ་དུ་ལྷུང་། ཚོང་དཔོན་གཅིག་པུ་དགའ་ལྡན་ལྷ་ཡུལ་དུ་ཕེབས་ཐུབ་སོང་། འོན་ཀྱང་། ཚོང་དཔོན་དེ་ལ་ཕ་ལས་རྫིག་པའི་བུ་པདྨ་འོད་འབར་ཟེར་བ་ཞིག་ཡོད། དེ་ཡང་རྒྱལ་བོ་ལོག་པའི་མཆོད་སྦྱིན་གྱིས་འདི་ཆུང་དུས་སུ་མེད་པར་མ་བཏང་ན། རང་གི་གོང་དུ་ཤོར་ཉེན་ཆེ་བར་དོགས་ནས། ངན་གཡོའི་བསམ་པས། ཀླུ་རྒྱལ་དུང་སྐྱོང་དཀར་མོའི་ཕྱག་གཏེར་ཆེན་ནོར་བུ་ལེན་དུ་མངགས། མཁའ་འགྲོ་སྡེ་ལྔས་བུ་ཆུང་པདྨ་འོད་འབར་ལ། བསྟན་པ་སྔ་དར་དང་བར་དར་ཕྱི་དར་གསུམ་ཡོང་བར་ལུང་བསྟན་པ་དང་། དེ་དུས་མེ་ཆུ་སོགས་ཀྱི་གནོད་པས་མི་ཚུགས་པའི་རིག་སྔགས་ཟབ་མོ་གནང་ནས་ཕྱིན་ཏོ། །དེ་ནས་པདྨ་འོད་འབར་རྒྱ་མཚོར་འཇུག་སྐབས་ཀླུ་བདུད་སྡིག་རྭས་སྔར་བཞིན་གནོད་འཚེ་གཏོང་སྐབས། མཁའ་འགྲོའི་གདམས་ངག་ལ་བརྟེན། གནོད་འཚེ་ཅི་ཡང་མ་བྱུང་བའི་སྟེང་། ཀླུ་ཡུལ་དུ་དྲངས་ནས་ནོར་བུ་དགོས་འདོད་དཔུང་འཇོམས་སོགས་རྒྱལ་བོ་ལ་ཕུལ་ཡང་། བདུད་རྒྱལ་དེས་སླར་ཡང་། ལྷོ་ནུབ་སྲིན་ཡུལ་དུ་གསེར་གྱི་སླ་ང་དང་མཆོང་གི་རྔ་ཡབ་ལེན་དུ་འགྲོ་དགོས་པའི་བཀའ་ཕབ། ཁོ་སྲིན་ཡུལ་དུ་བྱོན་ཏེ་སྒོ་སྲུང་དང་བོ་དང་གཉིས་པ་གསུམ་པ་རྣམས་དང་འཕྲད་སྐབས། མཁའ་འགྲོའི་གདམས་ངག་ལན་གསུམ་རེ་བཏོན་པས་གནོད་པ་གཏོང་བ་ལྟ་ཅི། དེ་དག་སེམས་དུལ་ནས་ཡེ་ཤེས་ཀྱི་མཁའ་འགྲོ་མར་གྱུར་ཏེ། གསེར་གྱི་སླ་ང་དང་མཆོང་གི་རྔ་ཡབ་ཕུལ་བ་བདེ་བླག་ཏུ་སྤྱན་དྲངས། ཡང་བསྐྱར་སྡིག་རྒྱལ་དེས་པདྨ་འོད་འབར་ཤན་པ་གསུམ་ལ་སྤྲད་དེ། ཤར་རིའི་རྩེར་མེ་མཆོད་བཏང་སྟེ་གདུང་ཐལ་རྣམས་ཕྱོགས་བཞིའི་རླུང་ལ་བསྐུར་ཀྱང་། མཁའ་འགྲོ་སྡེ་ལྔའི་གདམས་ངག་ལ་བརྟེན་ཏེ། སླར་ཡང་ཁྱེའུ་དེ་མེ་ཏོག་པདྨའི་ནང་དུ་སྔར་ལས་གཟི་མདངས་རྒྱས་པ་ཞིག་འཁྲུངས། མཐར་པདྨ་འོད་འབར་གྱིས་མཁའ་འགྲོ་སྡེ་ལྔའི་རམ་འདེགས་འོག རྒྱལ་བོ་ལོག་པའི་མཆོད་སྦྱིན་དང་རྐང་མགྱོགས་བང་ཆེན་གཙོས་བདུད་བློན་རྣམས་གསེར་གྱི་སླ་ངའི་ནང་བཞག་སྟེ་ནམ་མཁར་འཁྱེར་ནས་སྲིན་ཡུལ་དུ་བསྐྱུར་ཏེ་སྲིན་པོའི་ཁ་ཟས་སུ་གྱུར། དེ་ནས་པདྨ་འོད་འབར་ཡུལ་མ་ཁ་ནའི་རྒྱལ་བོར་མངའ་གསོལ་ནས། ཕོ་བྲང་གི་ནག་རྩི་དཀར་རྩིར་བསྒྱུར་བ་དང་། དར་ནག་ཕབ་ནས་དར་དཀར་བཙུགས་པ་སོགས། བདུད་ཀྱི་བསྟན་པ་བསྣུབས་ནས་རྒྱལ་བསྟན་དར་སྤེལ་བྱས་པའི་གཏམ་རྒྱུད་ཅིག་ཡིན་ནོ། །
གཞན་ཡང་། རྒྱལ་བུ་སྤྲིན་གྱི་གཞོན་པ་དང་། དད་པ་བརྟན་པོ། རཱ་མ་ཎ། བཟོད་པའི་དབང་ཕྱུག སྦྱིན་པ་ཆེན་པོ་སོགས་རྣམ་ཐར་ཟློས་གར་གྱི་འཁྲབ་གཞུང་མང་ཡང་། འདིར་མ་སྤྲོས་སོ། །
ལས་གཞས།
ཡུལ་ལུང་གང་ཞིག་ཡིན་རུང་སོ་སོའི་འཚོ་གནས་ཀྱི་བརྒྱུད་རིམ་དང་བསྡོངས་ནས། དགའ་སྐྱོ་དྲན་གདུང་སོགས་ཀྱི་ཚོར་འདུ། སྐད་གདངས་ཀྱི་འགྱུར་ཁུགས་ལ་བཅོལ་ནས། གླུ་གཞས་སོགས་གཏོང་སྲོལ་ཡོད། སྒོས་སུ་ལས་གཞས་ལ་མཚོན་ན། མི་སྒེར་དང་ཐུན་མོང་ངལ་རྩོལ་ལ་འཇུག་སྐབས། བྱ་ལས་དེ་དང་འབྲེལ་ཡོད་ཀྱི་བརྗོད་སྙིང་གཞིར་བཟུང་སྟེ། རྣམ་པ་སྤྲོ་ཞིང་ཐང་མི་ཆད་པར། ངལ་རྩོལ་བདེ་བླག་ཏུ་གྲུབ་པའི་སེམས་ཀྱི་ཚོར་འདུ་ཞིག་སྟེ། གཞས་ཚིག་ལས་ཀྱང་། ལས་ཀ་གླུ་ལ་གཡེངས་སོང་། །དཀའ་ལས་ཁག་རྒྱུ་མི་འདུག ། ཅེས་ཟེར་བ་ལས་གཞན། ཐོག་མར་ངལ་རྩོལ་བ་མང་བོས་ལས་ཀ་ལ་ཤེད་ཤུགས་དང་། རྐང་ལག་མཉམ་པའི་ཆེད། བེ་ཡ། བེ་ཡ་ལྟ་བུ་ངག་ནས་གྱེར་བ་ལས་འཕེལ་རྒྱས་ཕྱིན་པ་རེད། དཔེར་ན། ད་ལྟ་དམག་སྦྱངས་སྐབས་ཀྱི་ངག་སྒྲ་དེ། སྟངས་སྟབས་སོགས་མཉམ་ཆེད་ཡིན་པ་ལྟ་བུའང་རེད། ལས་གཞས་དེ་ལ་དགེ་མཚན་མང་དུ་མཆིས་ཏེ། དཔེར་ན། མི་མང་གི་མཉམ་ལས་སྐབས་སྟོབས་ཤུགས་གཅིག་སྒྲིལ་ཐོན་པ་དང་། ཕན་ཚུན་སྐུལ་ལྕག་དང་ངར་ཤུགས་སློང་བའི་ཐབས་དང་། ངལ་བ་སེལ་བའི་ཁྱད་ནུས་ལྡན་པར་མ་ཟད། ཡུལ་རེབ་གོང་གི་གྱང་གླུ་ལྟ་བུ་ལ་མཚོན་ན། ཨོཾ་མ་ཎི་པདྨེ་མེ་ཧཱུཾ་རིའི། ཨོཾ་མ་ཎི་པདྨེ་མེ་ཧཱུཾ། ཞེས་པ་ལྟ་བུ་བསྐྱར་བསྐོར་བྱས་ཏེ་མདངས་ལ་འགུགས་པ་གཅིག་པུ་ལས་མེད་ཀྱང་། གཅིག་ནས་གྱང་ས་རྡུང་མཉམ་དང་སྲ་བརྟན། ལས་སྤྲོ་བ་དང་ངལ་དུབ་སངས་པ་སོགས་ཀྱི་བྱེད་ནུས་ལྡན་པར་མ་ཟད། གཉིས་ནས་མ་ཎི་དེ་ས་འབུ་མང་བོ་གཅུར་བའི་དགེ་རྩར་འགྲོ་བ་དང་། མི་རང་ཉིད་ཀྱི་སྡིག་བཤགས་སུ་འགྲོ་བའི་དགེ་མཚན་ཡོད།
ལས་གཞས་ལ་དབྱེ་ན། རོང་འབྲོག་གི་ལས་གཞས་གཉིས་སུ་འདུ་བར་འདོད་དེ། དེ་ཡང་། རོང་བར་མཚོན་ན། སོ་ནམ་བྱེད་ཚེ། མི་ཡིས་ཞིང་མགོ་གཡོག་ན། །ཞིང་གིས་མི་མགོ་གཡོག་སོང་། །ཞེས་པ་ལྟར། ཡུར་མ་ཡུར་བ་འདི། ལག་ལས་ཀྱི་ཆེས་རྩིས་མཐོང་ཆེ་བ་ཡིན་ཏེ། ཁ་རྒྱུན་ལ་ཡང་། ས་ཞིང་ལག་ལས་མ་འཐོབ་ན། །འཇག་མ་རྩྭ་ཡིས་ཤུགས་གླུ་ལེན། །ཟེར་ལ། ཡུར་མ་དེ་ཡང་ལོ་ཏོག་ས་ཁར་བུད་ནས་ཅུང་མ་འགོར་བར་ཡུར་བ་ལ་ཁེར་ཡུར། ལོ་ཏོག་ཐོ་གང་གི་མཚམས་ནས་ཡུར་བ་ལ་གཉིས་ཡུར། ལོ་ཏོག་སྨིན་ལ་ཁད་ཀྱི་སྐབས་སུ་ཡུར་བ་ལ་ཡུག་བཤངས་ཟེར།
ད་དུང་ཨ་མདོའི་ས་ཁུལ་དུ། ཡུར་མ་ཡུར་དུས་ལས་གླུ་ཡང་འདི་ལྟར་ལེན་སྲོལ་ཡོད་དེ། ལས་གནམ་ལ་བཅོལ་ནས། གསེར་ས་ལ་བཙུགས་ཡོད། འཛམ་གླིང་ཉི་མ་ཤར་སྲོལ་ཡག །ལོ་ཡག་སྙེ་མ་སྐྱེ་སྲོལ་ཡག །ཡུར་མ་རྟ་རྒོད་རྒྱུགས་རྒྱུགས་བྱོས། །ཡུར་མ་བྱ་རྒོད་འཕུར་འཕུར་བྱོས། །མ་རུལ་མ་ཞིག་གིས་ཟངས་ང་བཀྲུ་རག་བར་ཚར་བར་ཤོག ཅེས་དང་། ལྡུམ་ཤི ལྡུམ་ཤི ལྡུམ་ཤི ལྡུམ་ལྷ་རྒད་པོ་ཤི ལྡུམ་ཕྲུག་ཁ་སེར་ཤི ལྡུམ་ཕ་ཤི་དང་མ་ཤི་བྱོས། །ལྡུམ་རྩར་མེ་ཞོག ལྗང་རྩར་ཆུ་བླུགས། ལོ་ཡག་སྙེ་མ་དཀྱིལ་ལ་དྲིལ། ལོ་ངན་ལྡུམ་བུ་མཐའ་ལ་དེད། ཕ་བོང་དཀར་བོ་རྟ་ཡི་མ་ལོག་བར་དུ་ལྡུམ་བུ་ཁྱོད་མ་སྐྱེས། བྱེ་མ་སྔོན་མོ་ནས་ཀྱི་མ་ལོག་བར་དུ་ལྡུམ་བུ་ཁྱོད་མ་སྐྱེས། ལོ་ཡག ལོ་ཡག་འབྲུ་རིགས་སྣ་ལྔ་ཚང་གི་ཤོག ཅེས་ཞིང་ལས་བུད་མེད་རྣམས་ཀྱིས་རང་གི་རེ་སྨོན་གླུ་ཚིག་ལ་དྲངས་ཏེ་ཡུར་གླུ་བླངས་པས། སྡུག་ལས་དེ་དགའ་སྐྱིད་ཀྱི་རྣམ་པར་བསྒྱུར་ཐུབ་པར་མ་ཟད། ཡུར་མ་བདེ་བླག་ཏུ་ཚར་བའི་རམ་འདེགས་ཀྱང་གནང་གི་ཡོད་ལ། དད་མོས་རང་བཞིན་འདྲེས་པའི་ཚིག་ཡང་བརྗོད་ཡོད། དབུས་གཙང་ལ་མཚོན་ན། ཡུར་གླུ་ལ་ཡུར་མ་རྒྱག་གླུ་ཞེས་བརྗོད་ལ། ས་སྐྱ་རྫོང་གི་ཡུར་གླུ་ལ། ཡུར་མ་ལེགས་པོར་བཏོག་ཤོག །བྱ་ཟེ་འདྲ་ཞིག་བཏོག་ཤོག །འདི་ལ་ཟེ་སྒྲོ་མི་ཟེར། །སོགས་མང་དུ་ཡོད་ལ།
གཞན་ཡང་། ཞིང་འདེབས་ན་གཤོལ་དགོས། འབྲུ་འཕྱར་ན་རླུང་དགོས། ཞེས་དང་། འབྲུ་སྣ་རླུང་ལ་འཕྱར་ན། །ལྕི་ཡང་རླུང་གིས་འབྱེད། །ཅེས་རླུང་འདི་མེད་དུ་མི་རུང་བ་ཡིན་པས། འབྲུ་མ་འཕྱར་དུས་ཀྱང་། རླུང་ལྷ་རྒད་པོ་ཤོག རླུང་བདག་གསེར་བུ་ཤོག ཅེས་བརྗོད་པ་དང་། ལྷ་ས་ཁྲེན་ཀོན་ཆུས་འབྲུ་འཕྱར་གྱི་སྐབས་སུ། རླུང་ཞིག་རྒྱོབས་ཤོག་རྒྱོབས་ཤོག །ཤར་གྱི་ཕྱོགས་ནས་རྒྱོབས་ཤོག །གང་བྱས་འཁྱེར་ནི་འཁྱེར་ཞིག །ལ་མོའི་རྒྱབ་ལ་འཁྱེར་ཞིག །ལ་རྒྱབ་ཨ་ཁུ་འབྲོག་པའི། །གཡག་གུའི་ལྟོ་ལ་འཁྱེར་ཞིག །ད་ལོ་ལོ་ཆུ་ཡག་ནས། །ནས་སྤུངས་རི་ལས་མཐོ་བ། །དར་ལྕོག་བཙུགས་སུ་ཆོག་གོ །ཞེས་སོགས་དབུས་གཙང་གཅིག་པུར་མཚོན་ནའང་། མལ་གྲོ་དང་གཞིས་རྩེ། སྐྱིད་གྲོང་། ལྷ་རྩེ། རིན་སྤུངས། རྩྭ་མདའ། འཕྱོངས་རྒྱས། ནག་ཆུ་སོགས་ཡུལ་ལུང་སོ་སོར་འབྲུ་འཕྱར་གྱི་ལས་གླུ་མི་འདྲ་བ་ཡོད་པ་བོད་ལྗོངས་ངལ་རྩོལ་གླུ་གཞས་ཞེས་པར་བཀོད་ཡོད་པ་དང་།
ཡང་ཁ་དཔེར། མི་ངན་དང་སྣོད་ངན་སྟོན་ཁར་མཁོ། ཟེར་བ་བཞིན་སྟོན་ཁ་ནི་ཞིང་བར་མཚོན་ན། ལོ་གཅིག་གི་ནང་ཆེས་བྲེལ་འཚུབ་ཆེ་བའི་དུས་སྐབས་ཡིན་པས། རེབ་གོང་གི་བཤད་ཚུལ་ལ་སྟོན་ཁར་ཤ་ཤག་འཐབ་སྐབས་ཟེར།
ཞིང་འབྲེག་སྐབས་ཀྱི་ལས་གླུར་ཡང་ཚིག་དང་དབྱངས་རྟའི་ཐད་ནས་ཡུལ་ལུང་སོ་སོར་མི་འདྲ་བ་ཡོད། ཨ་མདོ་མཚོན་ན། འོ་་་་་་་་་ཡ་རེམ་མ་འབྲེག་ཡ། འོ་་་་་་་་་རེམ་གི་ཡོད་ཡ། འོ་་་་་་་་ཡ་རྒྱ་ཟོར་ངར་མས། འོ་་་་་་་་ཡ་བསྐོར་འབྲེག་བྱེད་ཡ། འོ་་་་་་་ཡ་མཛུབ་གུ་ལྔ་བོར། འོ་་་་་་་་ཡ་སེམས་ཆུང་བྱོས་ཡ། འོ་་་་་་་་་ཡ་རེམ་མ་འབྲེག་ཡ། ཞེས་དང་། མ་སྐྲག་མ་དངངས་གཡང་ཞིང་། །ཟླ་དགུ་ཡི་ལོ་རྒན་འབྲེག་ཚད་རེད། །ལོ་མ་ཚེས་ནའང་འབྲེག་དགོས་ཀི། ལག་མགྱོགས། ལག་མགྱོགས། ངའི་ལག་གི་མགྱོགས་ཤིག་མེད། །རྟ་རྒོད་ཅིག་རྒྱུགས་རྒྱུགས་བྱོས། །བྱ་རྒོད་ཅིག་འཕུར་འཕུར་བྱོས། །ཞེས་དང་། ཡང་། མགུར་གི་མགུར་ལུང་གོང་མ་ན། །ལྕང་མ་གླང་མས་གུར་ཞིག་ཕུབ། །རྣོ་ལྕགས་སྟ་རེའི་ཁ་རྩ་ན། །གུར་ཕུབ་ནས་འདུག་ཁོམ་གང་ན་ཡོད། །མགུར་གི་མགུར་ལུང་ཞོལ་མ་ན། །ལོ་ཡག་སྙེ་མའི་གུར་ཞིག་ཕུབ། །རྒྱ་ཟོར་དབལ་མོའི་ཁ་རྩ་ན། །གུར་ཕུབ་ནས་འདུག་ཁོམ་གང་ན་ཡོད། །ཅེས་དང་།
ཡང་། ཞིང་འབྲེག་སྐབས་ལག་ཆ་དང་། ཕན་ཚུན་སྐུལ་སློང་། ཧུར་བརྩོན་བྱེད་དགོས་པའི་གླུ་ཚིག་ནི། བ་ཡན་མགར་བའི་ཟོར་བ་དགོས་ཀི། སྒོ་མེ་ལུང་བའི་སྒོ་བརྡར་དགོས་ཀི། མགར་བའི་ལག་ནས་ཟོར་བ་ཁྱེར་ཤོག །ཞིང་འབྲེག་རྒན་པོས་ཟོར་བ་རྡོར་དང་། །ཞིང་འབྲེག་རྒན་མོས་འབྲེག་གིན་ཡོད་ཡ། །ཞིང་འབྲེག་རྒན་པོས་གཉའ་ནས་གཅུན་དང་། །ཞིང་འབྲེག་རྒན་མོས་འདབས་ནས་གཅུན་དང་། །ཨ་གསར་བུ་ཆ་བོ་ཧྲ་ལ་བྱོས་ཡ། །མཛུབ་གུ་ལྔ་བོ་སེམས་ཆུང་བྱོས་ཡ། །ལྟོས་གོ་ལོ་ལོ། ལྟད་མོ་འཇོག་ཡ། རྒྱ་ཟོར་འབལ་མོས་རྒྱ་འབྲེག་བྱོས་ཡ། །བོད་ཟོར་རྣོན་པོས་བོད་འབྲེག་བྱོས་ཡ། །རྒྱ་ཟོར་རྣོན་པོས་དབལ་ར་ར་ཡ། །བོད་ཟོར་རྣོན་པོས་ཏིང་ཏིང་ཏིང་ཡ། །ཞེས་གདངས་སུ་འགུགས་སྲོལ་ཡོད་ལ། སྲན་མ་འབལ་བའི་དུས་སུའང་གླུ་ཚིག་འདི་ལྟར་ཡོད་དེ། སྲན་མའི་མེ་ཏོག་དུང་དང་མཐུན། །དུང་ལ་མཐུན་ནས་ཡག་རེ་ལྟོས། །སྲན་སྡོང་རིང་ནས་མི་ཞོལ་གི ། མགོ་འབྲས་བུ་ཐོགས་ནས་མི་ཁྱགས་གི ། ཨ་ཞི་མོ་ཆ་བོ﹙བུད་མེད་རྣམ་པ﹚ཧྲ་ལ﹙ཧུར་བརྩོན﹚བྱོས་ཡ། །ཧྲ་ལ་བྱོས་དང་བ་གོ་གི་ཡ﹙འགྲུབ་ལ་ཉེ་བ། ﹚། །ཞེས་དང་། ཡང་ན། ངའི་ལག་གི་ཟོར་བ་རྣོན་པོ་འདི། །མགར་སྨྲ་ར་ཅན་གྱིས་རྡུང་བ་ཡིན། །མགར་ཕྲུག་མང་བོས་ངར་བླུད། །མ་སྐྲག་མ་དངངས་གཡང་ཞིང་བོ། །ཟླ་དགུ་བ་ལོན་པའི་ལོ་རྒན། །མ་ཚོས་ན་ར་འབྲེག་དགོས་པ། །ངའི་ལག་གི་ཡང་བ་མེད། །ངའི་ལག་གི་མགྱོགས་པ་མེད། །རྟ་རྒོད་པོ་ཞིག་གི་རྒྱུག་རྒྱུག་དང་། །བྱ་རྒོད་པོ་ཞིག་གི་འཕུར་འཕུར་ཡིན། །མ་རུལ་མ་ཞིག་གི་ཉོག་ཟངས་འཁྲུ་རག་ལ་ཚར་ངེས། །ཁྱི་རྒྱ་ལི་ཞིག་གི་ལྟོ་ཆས་ལྡག་རག་ལ་ཚར་ར། །ཕོ་སྣང་རིང་ཞིག་གིས་དུ་བ་འཐེན་རག་ལ་ཚར་ངེས། །ལྟོས་ཡ་སྡོད་ཡ། ཨོ་ཡ། ལྟད་མོ་འཇོག་ཡ། ཞེས་དང་།
ཞིང་རྔ་ལེན་སྐབས་ལོ་གཡང་འབོད་པའི་ཚིག་འདི་ལྟར་བརྗོད་དེ། ཞིང་ཆུང་གོར་གོར་སྐྱེས་ཡག་པོ། །ལོ་དང་མར་ཁུ་འཁྱིལ་ཡག་པོ། །དོ་ཚིགས་བཟོ་མི་བཟང་དགུ་བཟང་རེད། །ནངས་མོ་བཟོ་འདིའི་ར་བཟང་ཞིག་ཤོག །ད་བརྩིགས་ནས་དཔངས་ཀྱིས་མཐོ་ནི་ཞིག་ཤོག །རྒྱ་ཟོར་དབལ་མོས་མི་ཆོད་ནི་ཞིག་ཤོག །བོང་ཙེ་དཀར་མོས་མི་ཆོད་ནི་ཞིག་ཤོག །ཡ་ད། ལོ་ཤོག་ལོ་ཤོག ཤོག་གཅིག་ནང་ནས་འཇག་གཅིག་ཤོག །སྙེ་མའི་ནང་ནས་ཕོར་གང་ཤོག །ལོ་ལོན་རྒན་རྒོན་དགའ་ནི་ཞིག་ཤོག །བྱིས་པ་ཉག་ཉོག་རྒྱགས་ནི་ཞིག་ཤོག །རྨ་ཕར་རིའི་ལོ་ཡག་འདིར་ཤོག །རྨ་ཚུར་རིའི་ལོ་ཡག་འདིར་ཤོག །སྐུ་རྒྱལ་བོད་ཀྱི་ལོ་ཡག་འདིར་ཤོག །སྟོད་རྒྱ་གར་གྱི་ལོ་ཡག་འདིར་ཤོག །སྨད་རྒྱ་ནག་གི་ལོ་ཡག་འདིར་ཤོག་གོ །ས་འཛམ་བུ་གླིང་གི་ལོ་ཡག་འདིར་ཤོག་གོ །ཞེས་དང་།
འབྲོག་པར་མཚོན་ནའང་། ཕྱུགས་རྫིའི་འཕྱིང་ལྭ་དང་འཕྱིང་ཞྭ། ཉལ་ཆས་ཀྱི་ཁེབས་འཕྱིང་། འགྲུལ་བཞུད་ཀྱི་སྐབས་ཆར་གོས་རྐྱ་འཕྱིང་། འཕྱིང་བའི་ལྷམ་གོག་ཡུ་རིང་། བལ་སྟན་སྣ་ཚོགས་ཀྱི་རྒྱུ་ཆ་ལ། འཕྱིང་ཁུག ཁེབས་འཕྱིང་། ཕྱིང་བའི་རྫོང་ཁུག བལ་འཕྱིང་འཇོག་དགོས་ཀྱི་ཡོད། དེ་ཡང་། གནམ་གཤིས་དྭངས་ཤིང་ཉི་མ་དྲོ་བའི་དུས་སུ། སྤང་ཐང་ངོས་འཇམ་གྱི་སྟེང་རེ་འཕྱར་བཏིང་བའི་ཁར། བལ་ཡག་པོ་བསེད་དེ་ལེབ་མོར་བཞག་ཐོག ཆུ་ཁོལ་གཏོར་ནས་རེ་འཕྱར་བཅས་རིལ་བོར་བསྒྲིལ་ཏེ། ཕོ་མོ་མང་དག་བསྒྲིགས་ནས་བསྒྲིལ་དགོས་ལ། དེ་ལ་འབྲོག་པའི་བུ་དང་བུ་མོ་དག་གིས་ལས་གླུ་འདི་ལྟར་ལེན་སྲོལ་ཡོད་དེ། ཨ་ལ་མ་ཎི་པད་མེ། སྐྱེས་པ་དག འཕྱིང་ཡག་ལྷ་འུའི་ལ་ལྷ་འཕྱིང་། །བུ་མོ་དག གཡང་ཡག་གཡང་དཀར་ལ་ཁ་ཆུ། །སྐྱེས་པ་དག གཅིག་པུ་ཨ་བུ་ཡི་རྐྱ་འཕྱིང་། །བུ་མོ་དག གཉིས་ཡག་ཕྱུགས་མོ་ཡི་རྫི་འཕྱིང་། །སྐྱེས་པ་དག གསུམ་ཡག་སོ་ཁ་ཡི་དར་འཕྱིང་། །བུ་མོ་དག བཞི་ཡག་ལྷ་གཞི་ཡི་དཀར་ལིང་། །སྐྱེས་པ་དག ལྔ་ཡག་ལྷ་ལྔ་ཡི་འཕྱིང་ཞྭ། །བུ་མོ་དག དྲུག་ཡག་གྲུས་མ་ཡི་རྫི་འཕྱིང་། །ཞེས་དང་། ཡང་ན། ཕ་ས་རིལ་རིལ་རིལ། །ཨ་ལུང་གྱིག་གྱིག་གྱིག འདབ་མ་ཅིག་ཅིག་ཅིག གཅིག་ཡ། གཉིས་ཡ། གསུམ་ཡ། ཇག་ལ་འགྲོ་བའི་ཇག་ཕྱིང་། །ནགས་ལ་འགྲོ་བའི་ནགས་ཕྱིང་། །དབུས་ལ་འགྲོ་བའི་དབུས་ཕྱིང་། །དམག་ལ་འགྲོ་བའི་དམག་ཕྱིང་། །ཚོང་ལ་འགྲོ་བའི་ཚོང་ཕྱིང་། །ལུག་རྫི་རྒན་པོའི་གོན་ཕྱིང་། །གནམ་གོང་མ་རྒྱལ་བོའི་ཁྲལ་ཕྱིང་། །ཞེས་སོགས་དབྱངས་རྟ་དང་བསྡོངས་ཏེ་ལས་གླུ་ལེན་ནོ། །དེ་བཞིན་འོ་མ་དཀྲོགས་པ་དང་འཐག་འཐག་དུས། སྐུད་པ་འཁེལ་བ་དང་འོ་མ་བཞོ་དུས་སོགས་ལ་དབྱངས་རྟ་དང་བཅས་ཏེ་ལས་གླུ་ལེན་སྲོལ་ཡོད་དོ། །