སོ་ནམ་པའི་ཐོང་ཀར་ཕྱེ་སྟངས།
ཐོང་ཀར་ཕྱེ་སྲོལ་འདི་ཞིང་ལས་ཁྲོད་གཙིགས་འཛིན་བྱེད་པའི་ཞིང་ཕར་འདེབས་ཀྱི་ཉིན་སྐར་ཐོག་མ་ཡིན། ས་ཆ་ལ་ལས་ཐོང་ཀར་ཕྱེས་པ་འདི་ལ་གཉའ་སྦྲེལ་དུས་ཆེན་ཡང་ཟེར། དེ་ནི་རྨོན་པ་དོར་དུ་སྡེབ་ནས་གཉའ་སྦྲེལ་བའི་དུས་སྐར་གྱི་ཐོག་མ་ཡིན་པས་དེ་ལྟར་བཏགས། དེ་ཡང་ཡུལ་གྲུ་ཁག་གི་གནམ་གཤིས་དྲོ་གྲང་ལ་གཞིགས་ནས་གཟའ་སྐར་འཕྲོད་སྦྱོར་གང་བཟང་ཞིག་ལ་ཐོང་ཀར་ཕྱེ་སྲོལ་ཡོད། རྩིས་གཞུང་གི་ཆ་ནས་བཤད་ན། སོ་ནམ་འཁོར་ལོ་དང་། ཐོང་གཤོལ་འཁོར་ལོའི་འབྲས་བཤད་དུ། སྤྱི་ལ་སོ་ནམ་སྔ་འདེབས་བཟང་། །བར་འདེབས་འབྲིང་ལ་ཕྱི་འདེབས་ཞན། །གསུངས་པ་ལྟར། མདོར་ན་རྩིས་གཞུང་ལ་མ་རྐང་བྱས་ཏེ། ཡུལ་ཆོས་དང་བསྟུན་ནས་སོ་ནམ་རྒན་པོའི་ངག་བཀོད་བཞིན་ཐོང་ཀར་འབྱེད་དགོས། ཞིང་རྨོ་བ་དང་། སོ་ནམ་འབྲུ་འདེབས་ནི། ཟླ་བ་ལྷག་པ་ཕུར་བུ་སྤེན་པ་བཟང་། ཉི་མ་མིག་དམར་པ་སངས་ངན། ལོ་ལེགས་སྐྱེས་རྒྱལ་སྐར་མ་དྲུག ནབས་སོ་ལྷ་མཚམས་ཆུ་སྟོད་ཆུ་སྨད་བྱི་བཞིན་གྲོ་ཞུན་བཟང་། མུ་གེ་བསེ་རག་སྐར་མ་གསུམ། བྲ་ཉེ་སྨིན་དྲུག་རྒྱལ་ཡིན་ནོ། །གཞན་རྣམས་འབྲིང་ངོ་། །ཡང་། རྒན་རབས་པའི་ངག་རྒྱུན་ལ་ལོ་སྐོར་བཅུ་གཉིས་ལས། ཁྱི་ཕག་གླང་སོགས་གཡང་སྐར་ལ་ཁེལ་བ་ཞིག་བདམས་པ་ཡིན། དེ་ནི་ཁྱི་ནི་ལོ་ཏོག་གི་བདག་པོར་བཤད་པ་དང་། གླང་ནི་བསོད་ནམས་ཆེ་ཞིང་ལོ་འདེབས་པ་པོ་དང་། ཕག་ནི་ལུས་ཚོ་ཞིང་འཕེལ་ཚད་མང་བའི་རྟེན་ལ་བཤད་དོ། །སྐར་བཟང་ལ་སོན་འདེབས་དགོས་པ་ནི། ཀརྨ་ཆགས་མེད་ཀྱི་ཞིང་ལྷའི་མཆོད་གསོལ་ལས་ཀྱང་། སྔོན་གྱི་སྲིད་པའི་དཔེ་བཞིན་དུ། །བདག་དང་ཡོན་བདག་འདི་དག་གིས། །ཞིང་རྨོས་ས་བོན་འདེབས་པ་ལ། །གནམ་ལ་སྐར་མ་གཟའ་ཡང་བཟང་། །ས་ལ་ཉི་མ་ལྷུན་ཡང་དྲོ། །དུས་ཚོད་མ་བུ་བཀྲ་ཡང་ཤིས། །ལྷ་གཞིའི་སྟེང་དུ་འབྲུ་ཡང་བཀྲམ། །ཞེས་པ་མཐུན་ནོ། །
མདོ་སྨད་ཀྱི་ཡུལ་ཁམས་འགར་སྡེ་བའི་ནང་གི་ཕྱུག་བརྒྱུད་བར་མ་ཆད་པའི་ཁྱིམ་ཚང་འབྱོར་ལྡན་ཞིག་གིས་ཐོང་ཀར་ཕྱེ་མཐར། སྡེ་དམངས་ནས་ཞིང་འདེབས་སྲོལ་ཡོད་པ་ལས། ཆོས་ལུགས་ཀྱི་ཆོ་ག་དང་གསོལ་སྟོན་སྤེལ་སྲོལ་མེད་མོད། ཀརྨ་ཆགས་མེད་ཀྱི་ཞིང་ལྷའི་མཆོད་གསོལ་ལས། སོག་མ་དེ་ནི་མདུང་ཡུ་ཙམ། །སྙེ་མ་དེ་ནི་ལྷོ་སྤྲིན་ཙམ། །ཞེས་དང་། ནས་འབྲུ་དེ་ནི་ཁྱུང་སྒོང་ཙམ། །གྲ་མ་དེ་ནི་རྒོད་གཤོག་ཙམ། །སྙེ་མ་དེ་ནི་ཁྱུང་གཤོག་ཙམ། །ནས་ཕུང་དེ་ནི་རི་རབ་ཙམ། །འཕེལ་ཁ་ཆེ་བའི་ནས་གཡང་བསྡུས། །ཞེས་དང་། ས་ནག་བཞི་བཅུའི་ལོ་གཡང་ཕོབ། །རྒྱ་ཡི་ཡུལ་ནས་ཞིང་གཡང་ཕོབ། །བལ་བོའི་ཡུལ་ནས་ཞིང་གཡང་ཕོབ། །ཁ་ཆེའི་ཡུལ་ནས་ཞིང་གཡང་ཕོབ། །དམུ་ཡི་ཡུལ་ནས་ཞིང་གཡང་ཕོབ། །འབྲུ་གཅིག་འབྲུ་བརྒྱ་འཕེལ་བའི་གཡང་ཕོབས་ཤིག །བྲེ་གང་བྲེ་བརྒྱ་འཕེལ་བའི་གཡང་ཕོབས་ཤིག །ཁལ་གཅིག་ཁལ་བརྒྱ་འཕེལ་བའི་གཡང་ཕོབས་ཤིག །ཞེས་པ་དང་མཐུན་པར། དང་ཐོག་རྨོན་འདེབས་ཀྱི་ལས་གཞས་ལ། ཨ་མདོའི་ཕྱོགས་སུ། ལོ་ཤོག་ལོ་ཤོག སྟོད་རྒྱ་གར་གྱི་ལོ་ཤོག སྨད་རྒྱ་ནག་གི་ལོ་ཤོག ནས་དཀར་ལྕོང་ཀ་ལྟ་བུ་ཤོག སྲན་མ་བོའུ་འདེའུ་ལྟ་བུ་ཤོག ཤོག་རེའི་ནང་ནས་སྒམ་རེ་ཤོག ཡུ་མོའི་ནང་ནས་བྲེ་རེ་ཤོག མཛོད་ལ་མི་ཤོང་ནི་ཞིག་ཤོག ཟོས་ནས་མི་ཚར་ནི་ཞིག་ཤོག ཅེས་དང་། ཡང་ན། ལོ་ཡག ལོ་ཡག སྟོད་རྒྱ་གར་གྱི་ལོ་ཡག་འདིར་འདུས། སྨད་རྒྱ་ནག་གི་ལོ་ཡག་འདིར་འདུས། སྐུ་རྒྱལ་བོད་ཀྱི་ལོ་ཡག་འདིར་འདུས། ལོ་ཡག་ཐམས་ཅད་འདིར་འདུས། ཡ་ད་ལོ་ཡག ལོ་ཡག ནས་ཕྱེ་ཡིས་ཐབ་ཀ་བྱུགས་པར་ཤོག ཅོང་རྡོག་གིས་རྡོ་ཁ་གཡུག་པར་ཤོག ཅེས་བརྗོད་དེ་རྨོན་འདེབས་ཀྱི་ཐོང་ཀ་དང་བོ་ནི་ཆར་ཆུ་དུས་སུ་འབེབས་པ་དང་། གཉིས་པ་ནི་རྒྱལ་དར་འབངས་བདེ། གསུམ་པ་གནག་ཕྱུགས་འབྱོར་འཕེལ། བཞི་བ་འབྲུ་དྲུག་ལོ་ལེགས་ཡོང་བའི་རྟེན་འབྲེལ་དུ་བརྩི་སྲོལ་ཡོད་དོ། །
ཡང་། ཞིང་ལྷ་ལ་འཕྲིན་བཅོལ་བྱས་ཏེ་ལོ་ཡག་རེ་བ་ནི། ཀརྨ་ཆགས་མེད་ཀྱི་ཞིང་ལྷའི་མཆོད་གསོལ་ལས། ཞིང་ལྷ་ཚངས་པ་ཞོས་ལྷ་རྒྱལ་མོ་དང་། །འབྲུ་ལྷ་གང་བཟང་ལ་སོགས་པའི། །ཡུལ་ལྷའི་རྒྱལ་བོ་འཁོར་བཅས་རྣམས། །ཕྭ་གཡང་རྟེན་འདི་འཁོར་བར་མཛོད། །ཉི་མ་དེ་རིང་ཕན་ཆད་ལ། །བཙའ་སེར་སད་གསུམ་ལ་སོགས་པའི། །ཞིང་གི་ལོ་ནད་བཟློག་ཏུ་གསོལ། །ཞེས་དང་། གང་བ་བཟང་བོས་འབྲུ་རྣམས་སྤེལ། །ཞིང་ལྷ་ཚངས་པས་འབྲུ་རྣམས་སྤེལ། །ཞོས་ལྷ་རྒྱལ་མོས་འབྲུ་རྣམས་སྤེལ། །ཡུལ་ལྷ་རྣམས་ཀྱིས་འབྲུ་རྣམས་སྤེལ། །ཆར་ཆུ་དུས་སུ་འབབ་པར་ཤོག །ལོ་ཕྱུགས་རྟག་ཏུ་ལེགས་པར་ཤོག །ཅེས་ཀྱང་གསུངས་སོ། །
དབུས་གཙང་གི་རྨོན་འདེབས་གཞས་ལ། སྟོད་ལུང་བདེ་ཆེན་རྫོང་གིས། དཔྱིད་ཀའི་ནམ་དུས་ཤར་སོང་། །ཞིང་ཆུང་གྲུ་བཞིའི་ཐོག་ལ། །རྨོད་མཛོ་ཆ་ཆ་རུབ་རུབ། །གཉའ་ཤིང་འཁྱོག་ལ་མ་གཏོང་། །དེ་འདྲ་རྨོད་པ་བརྒྱབ་མཁན། །བུ་ཆུང་བཀྲ་ཤིས་སྟོབས་རྒྱལ། །མཛོ་ཕོ་རུ་ཁ་འགྱུར་ཤོག །ཕར་རྒྱུགས་ཚར་རྒྱུགས་མ་གནང་། །རོལ་ལམ་སི་ཤན་འདྲ་བ། །ཕྲ་མོའི་མིག་ལ་མཛེས་པ། །སྨན་ཆུང་ཡུར་མ་བརྒྱབ་དུས། །ཐུགས་སེམས་དེ་བས་སྤྲོ་བ། །ས་རུབ་མུན་པ་སླེབས་དུས། །ལས་ཐག་གཅོད་རོགས་གནང་དང་། །ཨེ་ལེའི། སི་ཁྲ་འུ་ལེའི། སེ་ལ། ལས་ལ་ཕོ་ལས་ཤེས་ཡོད། །ལས་ལ་མོ་ལས་ཤེས་ཡོད། །ལྟོ་ལ་གཞིགས་ཏེ་ལས་ཀ། བུ་ཆུང་ང་རས་བྱས་ཡོད། །ཅེས་དང་།
ཡང་། སྐྱིད་གྲོང་གིས། བྱ་ཁྱུང་ལ་མོའི་སྒང་སྒང་། །ལུ་མ་རིང་མོའི་གཤོང་གཤོང་། །བདག་དང་ཁྱུང་དཀར་མཛོ་ཕོ། །སྒྲིབ་པ་སྦྱོང་ས་ཡིན་ནོ། །གཡུ་མཚོའི་སྒྲོལ་མའི་རྦ་རླབས། །སེམས་ལ་གཟན་པོ་བྱས་བྱུང་། །ཞེས་དང་།
རིན་སྤུངས་རྫོང་གིས། མཛོ་ཕོའི་རོལ་གྱི་ནང་ནས། །སྐྱོ་གླུ་ལེན་པ་མ་གནང་། །འབྲི་མོའི་སྤང་སྟོད་ཕྱོགས་ནས། །རྩྭ་ཁ་གཡར་བོ་བྱས་ཆོག །བྱ་དེ་ཆུང་ལ་མཛེས་པ། །གོང་དཀར་གཡུ་བྱ་སྔོན་མོ། །གཡུ་བྱ་སྔོན་མོའི་རྗེས་སུ། །ཁྱུང་ཕྲུག་བྲེལ་དུ་ལངས་སོང་། །ཉི་མ་དགུང་དྲོའི་ཁྱུང་ཕྲུག །ནམ་མཁའི་བྱ་ལས་མགྱོགས་པ། །སོགས་རྨོད་གླུ་གཏོང་རྒྱུ་ཡོད་པར་མ་ཟད། སོན་འདེབས་ཀྱི་ཉིན་ཐོག་མ་དེར། དགེ་འདུན་པ་ཞིག་གིས་ཆོ་ག་འདོན་པ་དང་། ལྷ་གསོལ་བསང་གཏོང་དང་། གཟབ་འཆོར་སྤྲས་ཏེ། གཉའ་སྦྲེལ་རྟེན་འབྲེལ་བྱེད་པའི་ས་གནས་དེར་འདུ་འཛོམས་བྱས་ནས། རྟེན་འབྲེལ་མཚོན་བྱེད་དུ་གྲོ་སོ་ཕྱེ་མར་དང་ཇ་ཆང་། ཟས་རིགས་གསོལ་སྟོན་བཤམས། ཐོང་ཀར་གྲུབ་རྗེས་ཕན་ཚུན་གླུ་གཞས་གཏོང་བའམ། སྒེར་གཞས་གཏོང་སྲོལ་ཡང་ཡོད་དོ། །