ལྗིད་འགྱོགས།
ལྗིད་འགྱོགས་ལ་རྡོ་འགྱོགས་དང་ས་སྒྱེ་འགྱོགས་པ་གཉིས་ཡོད་ལ། འདི་ཡང་བོད་ཀྱི་གདོད་མ་ནས་བརྒྱུད་པའི་ལུས་རྩལ་ཞིག་ཡིན། རྡོ་འགྱོགས་ནི། ལྗིད་ཚད་རིགས་མི་འདྲ་བའི་རྡོ་རིལ་ཆེན་པོ་འཇམ་ཤ་དོད་པ། ཕྱི་ངོས་སུ་མར་དང་ཞག་བྱུགས་ཏེ། ལྕི་ལ་འཇམ་འདྲེད་ཤོར་བའི་རྡོ་ཆེན་དེ། ཡར་བཀྱགས་ཏེ་ཕྲག་མགོ་ནས་ལྟག་རྒྱབ་དང་། ཡང་ན། མགོ་ཐོག་ནས་གཡུགས་ཐུབ་མིན་ལ་བལྟ་བ་ཡིན། ས་སྒྱེ་འགྱོགས་པ་ནི། སྒྲོ་དང་སྒྱེ་མོའི་ནང་དུ་ས་བཅུས་ནས། ཐག་པས་དམ་པོར་བསྡམས་པ་དེ། ཐོག་མར་པང་དུ་བླངས། དེ་ནས་ཕྲག་པ་ནས་རྒྱབ་ཏུ་འཕེན་པ་ཡིན།
ཁྱད་པར་དུ། བོད་རྒྱལ་འདུས་སྲོང་མང་རྗེའི་དུས་སུ་རྩལ་བོ་ཆེ་མི་བདུན་གྱི་ཡ་གྱལ། རྔོག་རིང་ལ་ནག་པོས་གླང་བོ་ཆེའི་ཕྲུ་གུ་ཐེག་པ་དང་། རྔོག་གླིང་ཁམས་ཀྱིས་གཡག་གྲུས་བོ་ཆེ་ཐེག་པར་ལོ་རྒྱུས་མང་བོར་བཀོད་པ་ཡང་། ལྗིད་འགྱོགས་ཤུགས་རྩལ་འདི་མཐོང་ཆེན་གནང་བ་མཚོན། རྩེ་པོ་ཏ་ལའི་ལོགས་རིས་སུ་སྐྱེས་བུ་སྟོབས་ལྡན་གྱིས་རྡོ་འགྱོགས་རི་མོ་བྲིས་ཡོད། སྔ་སོར་སྨོན་ལམ་ཆེན་མོ་གྲོལ་སྐབས། གསུང་ཆོས་ར་བ་ནས། གཟིམ་པ་བ་དང་། སྤྱི་ཚོགས་སྟེང་ཡོང་བའི་རྡོ་འགྱོགས་སྟོབས་ལྡན་རྣམས་ཀྱིས་འགྲན་བསྡུར་བྱེད་སྲོལ་ཡོད་ལ། ད་ལྟ་དུས་སྟོན་དང་ཁྲོམ་ཚོགས་ཀྱི་སྟེང་དུ་ཡང་། ས་སྒྱེ་ཆེན་པོའམ་རྡོ་རིལ་ལུག་རོ་འདྲ་བ་འཁྱེར་ཡོང་ནས་སྟོབས་རྩལ་འགྲན་པ་དེའོ། །