ནགས་ཚལ་ས་ནག་ཏུ་གྱུར་བ།
ནགས་ཚལ་ནི་སའི་གོ་ལའི་སྟེང་གི་རང་བྱུང་ཁམས་ཀྱི་ལྗང་མདོག་གི་བང་མཛོད་དང་། རང་ཅག་གི་མེས་པོ་སྤྲ་དང་སྤྲེའུ་འཚར་ལོངས་བྱུང་སའི་ཕ་གཞིས་དང་། ད་ལྟ་གླིང་ཀ་གཏོང་ས་སོགས་མིའི་རིགས་ལ་ཞབས་འདེགས་མང་བོ་སྒྲུབ་བཞིན་ཡོད། སྐྱེ་དངོས་རིག་པ་བས་སྡོམ་རྩིས་བྱས་པ་ལྟར་ན། སའི་གོ་ལའི་ཁྱོན་ན། ལྗོན་ཤིང་གི་རིགས་ཁྲི ༣༠ ལྷག་དང་། ཕྲ་བའི་རྩི་ལྗོན་གྱི་རིགས་ཕལ་ཆེར་ཁྲི ༡༠ ཡོད་པར་བཤད་ཡོད། ནགས་ཚལ་ནི་དེའི་ཁྲོད་ཀྱི་བླ་སྲོག་ལྟ་བུར་གྱུར་ཡོད། དེ་དག་གི་གཟུགས་པོའི་ལྕི་ཚད་ཀྱི ༧༥％ ནས ༩༥ ％ ཕལ་ཆེར་ཆུ་ཡིན་པས། མིའི་འབྱུང་ཁམས་དང་། ས་བཅུད་ལ་ཤིན་ཏུ་ནས་ཀྱང་ནུས་པ་གལ་ཆེན་ཐོན་གྱི་ཡོད། ཡིན་ནའང་། རང་ཅག་མི་རྣམས་རྨོངས་གཉིད་ལས་མ་སད་པར། མིག་སྔར་གྱི་རང་དོན་ཁོ་ནར་བལྟས་ནས་ནགས་ཚལ་ལ་གཏོར་བརླག་ཐེབས་པ་སྟེ། བཟོ་ལས་ཀྱི་དགོས་མཁོ་སྐོང་ཆེད་ནགས་ཚལ་བཅད་པ། མི་འབོར་འཕར་བས་ཤིང་ནགས་བཅད་དེ་ཞིང་ལས་སྤེལ་བ། འཛམ་གླིང་གི་མི་གྲངས་ཕྱེད་ཀས་བུད་ཤིང་སྤྱོད་པ། ནགས་བཅད་ནས་འབྲོག་ལས་སྤེལ་བ། མཁའ་རླུང་རྫད་སྐྱོན་གྱིས་ནགས་ཚལ་གྱི་སྐྱེས་སྟོབས་ཉམས་པ་སོགས་ཀྱི་བྱས་ཉེས་ཡིན།
དེ་བས། སའི་གོ་ལའི་ཐོག་གི་ནགས་ཚལ་ལོ་རེར་རྒྱ་ཁྱོན་སྤྱི་ཆིང་ཉིས་སྟོང་ཇེ་ཉུང་དུ་འགྲོ་བཞིན་ཡོད་པ་དང་། ཉེ་རབས་ལོ་སུམ་ཅུ་ལྷག་ཙམ་གྱི་ནང་ནགས་ཚལ་རྒྱ་ཁྱོན་ཕྱེད་ཀ་ལྷག་ཙམ་ཇེ་ཉུང་དུ་སོང་ཡོད་སྐད། ལོ་ལྔ་སྟོང་གི་སྔོན་དུ་ཨོ་གླིང་ནགས་ཚལ་གྱི་རྒྱ་ཁྱོན་སྐམ་སའི་རྒྱ་ཁྱོན་གྱི ༨༠％ ཡིན་ཡང་། དུས་རབས་ཉི་ཤུ་བའི་ནང ༣༠％ ལས་ཟིན་མེད་པ་དང་། ལོ་མང་རིང་ཧྥེ་གླིང་གི་ནགས་ཚལ ༤༠％ ལ་གཏོར་བརླག་ཐེབས་པ་དང་། ཡང་སྔོན་ཆད་གོ་ལའི་ཁྱོན་ནགས་ཚལ་མང་ཙམ་ཡོད་ཀྱང་། ད་ལྟ་འཛམ་གླིང་ན་ནགས་ཚལ ༣％ ལས་མི་ཟིན་པ་དང་། ཁྱད་པར་དུ་དུས་རབས་ཉི་ཤུ་བའི་དུས་མཇུག་ཏུ། འཛམ་གླིང་ཡོངས་ཀྱི་ནགས་ཚལ་ལ་གཏོར་བརླག་བཏང་བའི་ཚད་ནི། ཆུ་ཚོད་སྐར་ཆ་རེར་ནགས་ཚལ་མུའུ ༥༧༠ བརླག་འགྲོ་བར་བཤད། ནགས་ཚལ་ཉམས་དམས་ཇི་ཙམ་འགྲོ་བ་དེ་ཙམ་དུ། རང་བྱུང་ཁམས་ཀྱི་མཛེས་ལྗོངས་ལ་གནོད་འཚེ་ཐེབས་ཏེ་བྱེ་ཐང་དང་། རྡུལ་འཚུབ་སོགས་ཇེ་མང་དུ་འགྲོ་བ་སྟེ། དཔེར་ན། ༡༩༨༢ ནས ༡༩༨༥ བར་ཧྥེ་གླིང་ལ་ཐན་པ་བྱུང་ནས་མི་ཁྲི ༢༠༠ ལྷག་གི་ཚེ་སྲོག་ཤོར་བ་དང་། ༡༩༨༩ ལོར་ཨེ་ཙེ་ཨོ་ཕོ་ཡར་ཐན་པ་བྱུང་བས། ས་ཆ་མང་ཆེ་བར་འབྲུ་རྡོག་གཅིག་ཀྱང་ལེན་རྒྱུ་མ་བྱུང་བས། མི་སེར་ཁྲི ༤༠༠ ལོ་བཅུའི་རིང་བཀྲེས་སྐོམ་གྱིས་མནར་བ་དང་།
རང་ཅག་བོད་ལ་མཚོན་ནའང་། ཚན་རིག་པས་དཔྱད་བརྗོད་བྱས་པ་ལྟར་ན། སྤྱི་ལོ་སྔོན་གྱི ༦༠༠༠ དང་སྔོན་གྱི ༣༠༠༠ ལོའི་བར་ནམ་ཟླ་དྲོད་གཤེར་གྱི་དུས་ཡིན་པས། མཐོ་སྒང་གི་ཤར་ཕྱོགས་ནི་ནགས་ཚལ་སྟུག་པོས་ཁྱབ་པ་དང་། ནུབ་ཕྱོགས་སུའང་ཤིང་རིགས་དང་རྩྭ་སས་ཁྱབ་པར་བཤད་ལ། ད་ལྟ་ཇི་ལྟར་གྱུར་བ་ནི་བདག་ཅག་གིས་མཁྱེན་གསལ་ལོ། །
ཡང ༡༩༨༩ ལོར་མཚོ་ལྷོ་གླིང་ཕྲན་ལ་རྡུལ་འཚུབ་ལངས་ཏེ། ས་ཞིང་མུའུ་ཁྲི ༡༠༠ བརླག་ཅིང་། ཁང་ཁྱིམ ༡༠༠༠༠ ཙམ་རྡིབས་ལ། མི ༡༢༥༦ ལ་རྨས་སྐྱོན་ཕོག ༡༩༩༡ ལོར་ཀྲུང་གོ་ཅང་སུའུ་དང་ཨན་ཧེའི་ཁོངས་གཏོགས་ཀྱི་ཡུལ་ཚོ ༡༨ ལ་ཆུ་ལོག་གིས་གནོད་འཚེ་ཐེབས་ཏེ། མི་སྟོང་ཕྲག་མང་བོ་ཚེ་སྲོག་ཤོར་བ་དང་། ས་ཞིང་མུའུ་དུང་ཕྱུར ༣ བསྣུབས་ལ། སྒོར་དུང་ཕྱུར ༤༡༡ ལྷག་གི་གྱོང་གུད་ཐེབས། དེ་ལྟར་གནོད་སྐྱོན་རབས་དང་རིམ་པར་བྱུང་བའི་རྒྱུ་རྐྱེན་གཙོ་བོ་ནི་ནགས་ཚལ་ལ་གཏོར་བཤིག་བཏང་བ་ལས་མ་འདས་སོ། །