རི་དྭགས་གཙོད་ལ་ཐེབས་པའི་གཏོར་བརླག
མཐོ་སྒང་གི་རི་དྭགས་གཙོད་ནི། འཛམ་གླིང་གི་ཁྱད་ནོར་དང་། རང་ཅག་གི་གཅེས་ནོར་དུ་ངོས་མ་ཟིན་པར། འཕྲལ་གྱི་ཁེ་ཕན་ཙམ་གྱིས་གཏོར་བརླག་ཐེབས་པ་འབྲེལ་ཡོད་ཡིག་ཆ་ལྟར་ན། ༡༩༩༩ ལོའི་ཡས་མས་སུ་བོད་ལྗོངས་སུ་གཞུང་བཞེས་བཏང་བའི་གཙོད་ལྤགས ༦༠༠༠ དང་། ཁུ་ལི་རྒྱ་མ ༢༠༠༠ གཞུང་བཞེས་བཏང་བ་དང་། ༡༩༩༢ ནས ༡༩༩༣ བར་གཙོད་ལྤགས ༡༥༢༤༣ གཞུང་བཞེས་བཏང་བ་དང་། ཕལ་ཆེར་གཙོད ༣༠༠༠༠ ལྐོག་གསོད་ཐེབས། བྱེ་བྲག་ཏུ ༡༩༩༩ ལོའི་ཟླ ༤ ཚེས༡༡ ནས་ཟླ ༥ ཚེས༡༠ བར་ཨ་ཆེན་གངས་རྒྱུད་ནས། གཙོད་རྐུ་རྔོན་རྡུང་བརྡེག་བྱེད་པའི་བྱ་འགུལ་ཞིག་སྤེལ་བ་སྟེ། རྔོན་རྐུན་ཚོགས་པ ༡༧ གཏོར་བ་དང་། རླངས་འཁོར ༡༨ མེ་མདའ ༡༤ མདེའུ ༡༢༠༠༠ བླངས་པ་དང་། དེ་ལས་གཞན་རྔོན་རྐུན་ཚོགས་པ་འདི་དག་གིས་རྒྱས་བཟང་བསོད་ནམས་དར་རྒྱས་སོགས་ལྔ་ལམ་དུའང་བརྫངས་ཡོད་པ་རེད།
༡༩༩༩ཟླ ༦ ཚེས༡༤ ཉིན་ཨར་ཅིན་རི་བོའི་སྲུང་སྐྱོང་མི་སྣ་དང་། ཞང་ཀང་ཨ་རིའི་རི་དྭགས་སྲུང་སྐྱོང་རྩ་འཛུགས། གཙོད་ཀྱི་རིགས་རྒྱུད་སྤེལ་བ་ལ་ཞིབ་འཇུག་ཏུ་ཕྱིན་དུས། ཉིན་གཉིས་ཀྱི་རིང་གཙོད ༨༠༠ གསད་པའི་བྱ་ངན་སྙིང་ལ་གཟེར་ཤ་ལངས་པ་དེ་དངོས་སུ་མཐོང་བ་དང་། ད་དུང་ས་དེའི་མང་ཚོགས་ཀྱིས་བཤད་པ་ལྟར་ན། སྔ་སོར་གཙོད་ཉིས་སྟོང་ཙམ་གྱི་ཁྱུ་ཚོགས་རྩྭ་ཆུ་ལ་རོལ་བ་མཐོང་སྣང་དུ་གྲུབ་ཀྱང་། ད་ལྟ་རེ་གཉིས་ལས་མཐོང་རྒྱུ་མེད་པ་འབྲེལ་བརྗོད་བྱས་ཡོད་པ་རེད།
དེ་ལས་གཞན། ཀན་སུའུ་རྨ་ཆུ་རྫོང་ལ་མཚོན་ནའང་། དུས་རབས་ཉི་ཤུ་བའི་ལོ་རབས་དྲུག་ཅུ་བར་རྩ་ཆེའི་སྲོག་ཆགས་ཀྱི་རིགས ༢༣༠ ལྷག་མཆིས་མོད། མིག་སྔར་སྡོམ་རྩིས་བྱས་པ་ལྟར་ན། སྔོན་ཆད་ལས ༩༠ ལྷག་ཇེ་ཉུང་དུ་སོང་འདུག་སྐད།
༢༠༠༢ ལོའི་ཟླ ༡༡ ནང་རྔོན་པ ༡༡ ཤིན་ཅང་དུ་འཇབ་བསྐྱོད་ཀྱིས་ཉིན ༢༠ རིང་གཙོད ༧༥༠ བསད་དེ་གོར་མོ་ཐོན་སྐབས་འཛིན་བཟུང་བྱས་པ་དང་།
ཡང ༢༠༠༢ ལོའི་ཟླ ༥ བའི་ནང་སྒེར་རྩེ་རྫོང་དྲག་པོ་ཤང་གི་འབྲོག་པ་དྲུག་རྫི་བོར་བརྫུས་ནས་བྱང་ཐང་དུ་གཙོད ༣༠༠ བསད་ལ། ཐ་མར་འཛིན་བཟུང་བྱེད་སྐབས་ཉེན་རྟོག་པ་གཅིག་ཀྱང་གསད་ཡོད་པ་རེད།
གཞན་ཡང༡༩༩༣ ལོ་ནས ༩༩ བར་རྒྱ་གར་སྲིད་གཞུང་གིས་ཁུ་ལུ་རྒྱ་མ ༡༦༡༦《གཙོད ༦༤༦༠ ཙམ་གྱི་ཁུ་ལུ》དང་། སྐེ་དཀྲིས ༥༡༠ གཞུང་བཞེས་བཏང་། ༡༩༩༤ ནས ༩༩ བར་བལ་ཡུལ་གྱིས་གཙོད་ཁུ་རྒྱ་མ ༡༡༥༢《གཙོད ༥༠༠༠ ཙམ་གྱི་ཁུ་ལུ》གཞུང་བཞེས་བཏང་བ་དང་། དེ་ལས་གཞན་ཨ་རི་དང་། དབྱིན་ཇི། ཧྥ་རན་སི་སོགས་འཛད་སྤྱོད་རྒྱལ་ཁབ་ཁག་གིས་གཙོད་ཁུའི་ཉོ་ཚོང་དང་ཐོན་རྫས་ལ་བཀག་སྡོམ་བྱས་ལ། དཔེར་ན༡༩༩༧ ལོའི་ཟླ ༢ བའི་ནང་དབྱིན་ཇིའི་རྒྱལ་ས་ལོན་ཏོན་དུ་ཨ་སྒོར་ཁྲི་ཚོ ༦༠ ཟིན་པའི་སྐེ་དཀྲིས ༡༣༨ གཞུང་བཞེས་བཏང་ཡོད། མདོར་ན་རྒྱལ་ཁབ་ཕྱི་ནང་གི་བསམ་བློ་བ་མང་བོས་ཐབས་བརྒྱ་ཇུས་སྟོང་གིས་རི་དྭགས་གཙོད་སྲུང་སྐྱོང་བྱེད་པའི་བྱ་འགུལ་རབ་དང་རིམ་པར་སྤེལ་བ་འདི་དགའ་འོས་པའི་དོན་བཟང་ཞིག་ཡིན་པར་མ་ཟད། ཉེ་བའི་ལོ་ཉི་ཤུའི་རིང་བོད་རང་སྐྱོང་ལྗོངས་དང་། མཚོ་སྔོན། ཤིན་ཅང་སོགས་གཙོད་གནས་ས་ཁུལ་མང་བོར། སྲུང་སྐྱོང་ས་ཚིགས་བཙུགས་ཏེ་གཙོད་ལ་མཐོང་ཆེན་གནང་སྟེ། ཁ་མིན་ལག་ལེན་གྱི་ཁྲོད་ནས་སྲུང་སྐྱོབ་བྱེད་པ་ནི། ཉམ་ཆུང་གི་རི་དྭགས་ལ་གསོན་ཆོས་རྙེད་པའི་དགའ་ཚོར་དང་། རང་ཅག་གི་མི་རབས་འདིའི་གཟི་བརྗིད་ཅིག་ཏུ་བརྩི་ཆོག་ཆོག་ཡིན་ནོ། །བར་ལམ་ཞིག་ནས་རི་དྭགས་གཙོད་ཀྱི་མགོ་ལ་གནམ་རྡིབས་པ་ལྟ་བུའི་འཇིགས་སྣང་ཞིག་སླེབས་པ་མ་གཏོགས། རང་ཅག་བོད་ལ་རི་དྭགས་གཙོད་རྩ་ཆེན་སྲུང་སྐྱོང་བྱེད་པའི་གོམས་སྲོལ་སྒྲུང་གཏམ་ཚུན་ནའང་མང་སྟེ། དཔེར་ན། རི་ཤིའི་ཤ་རྫོང་ལས་གེ་སར་རྒྱལ་བོས་རི་ཤི་རྣམས་སྡིག་སྤོང་དགེ་སྒྲུབ་ལ་སྐུལ་བའི་གསུང་མགུར་དུ། ལི་ཡུལ་གད་ཐང་སྐྱ་མོ་དེ། །ཤར་སྐྱ་རེངས་ནམ་མཁའ་ལངས་པ་འདྲ། །གཙོད་ཁམ་པ་ཆགས་པའི་ཕ་ས་རེད། །གོམ་བདེ་མོ་གཞུང་ལམ་བསྐོར་ས་རེད། །རྭ་རྩེ་མོ་དགུང་ལ་འཕྱར་ས་རེད། །དགུང་ནམ་མཁའི་གློག་དམར་འཁྱུག་འདྲ་བ། །གུག་པོ་གཙོད་ཀྱི་གོམ་མྱུར་ཟེར། །རླུང་བསིལ་མའི་ཐོག་ལ་ཞོན་འདྲ་བ། །གུག་པོ་གཙོད་ཀྱི་བང་ཁ་ཟེར། །མགོ་རྣ་གཤོག་རླུང་གི་གུར་ཁང་ཕུབ། །ལ་བཅུ་རྒྱབ་བྱེའུ་ཆུང་གཤོག་སྒྲ་གོ །།སྤྱན་ཁྲ་ཆུང་ལྗང་ཁུའི་ཨ་འབྲས་ལ། །ཀུན་མི་མཐོང་བལྟ་བའི་སོ་བ་ཐུབ། །ས་མི་འགྱུར་བྱང་ཐང་མངའ་བདག་ལ། །རྒྱུ་འབྱོར་ཕྱུག་རྒྱས་པའི་རྟེན་འབྲེལ་གཅིག །གདན་ས་གཞི་བྱང་ཐང་སྐྱ་མོ་ལ། །རྒྱན་མེ་ཏོག་བཀྲ་བའི་རྟེན་འབྲེལ་གཉིས། །ལས་བསྐལ་བ་ཆགས་པའི་རྟེན་འབྲེལ་གསུམ། །དུས་མ་འོངས་མཁོ་བའི་རྟེན་འབྲེལ་བཞི། །དེ་འགྲོ་དོན་གཙོད་ལས་ཆེ་བ་མེད། །གསོད་མི་རུང་རི་ཤིའི་སྡེ་ཚོགས་རྣམས། །ལྷ་བརྒྱ་བྱིན་དབང་བོའི་སྡེ་ཚོགས་ཀྱིས། །གུག་པོ་གཙོད་ལ་མིག་འཚོ་བྱེད། །ལི་ཁྲིའི་མཚལ་དམར་བཅུ་བདུན་གྱིས། །གུག་པོ་གཙོད་ལ་རྒྱང་འཚོ་བྱེད། །ལི་དམར་སྡེ་ཚན་རིགས་ལྔ་ཡིས། །གུག་པོ་གཙོད་ལ་ཁ་འཚོ་བྱེད། །ཅེས་སོགས་ཀྱིས་ཤེས་ནུས་སོ། །