ཞིང་སྨན་གྱི་དུག་རྫས།
ཐར་བ་ཆེན་པོའི་མདོ་ལས། ཟས་མཆིས་ན་ནི་སྲོག་མཆིས། སྲོག་མཆིས་ན་ནི་ལུས་མཆིས། ལུས་མཆིས་ན་ནི་ཆོས་ལམ་མཆིས་སོ། །ཞེས་པ་ལྟར། ཟས་ནི་ལུས་ཕུང་འདི་ཉིད་འཚོ་བའི་ཉིང་བཅུད་དུ་གྱུར་ཡོད། འོན་ཀྱང་། ད་ལྟའི་རྫས་འགྱུར་ཞིང་སྨན་འདི་དག་གིས། གཅིག་ནས་ལོ་ཏོག་སོགས་སྐྱེས་སྟོབས་དང་། གཉིས་ནས་ཟས་རིགས་ལ་དུག་རྫས་ཕོག་ཏེ། མི་རྣམས་ཀྱི་འབྱུང་ཁམས་ལ་རྡུལ་ཕྲན་གྱི་གནོད་པ་ཚབས་ཆེན་བསྒོ་བཞིན་ཡོད།
འཛམ་གླིང་འཁྲུག་ཆེན་གཉིས་པའི་རྗེས་སུ། འཕྲུལ་ཆས་མང་བོ་བཀོལ་སྤྱོད་བཏང་ནས་མིའི་རིགས་ལ་དཔལ་ཡོན་བསྐྲུན་ཀྱང་། དེ་ལས་ལྡོག་སྟེ་མིས་ལས་སྣོན་བྱས་པའི་ཐོན་སྐྱེད་བཟོ་ལས་ཀྱི་སྙིགས་རྫས་ཀྱིས་ཁོར་ཡུག་གི་རྣམ་པ་ཇེ་སྡུག་ནས་ཇེ་སྡུག་ཏུ་བཏང་ནས། མིའི་རིགས་དང་སྐྱེས་ཁམས་གཞན་པའི་ཚེ་སྲོག་ལ་གནོད་སྐྱོན་ཚབས་ཆེན་ཐེབས། དེ་བས། ཨ་རིའི་གྲོང་རྡལ་ཆུང་ཆུང་ཞིག་ནས་འཚར་ལོངས་བྱུང་བའི་བུད་མེད་ལེ་ཆེས་འཕར་ཁ་སིན་གྱིས། ༡༩༥༥ ནས་བཟུང་ལོ་ངོ་བཞིའི་དུས་ཚོད་བེད་སྤྱད་དེ་རྫས་འགྱུར་འབུ་གསོད་སྨན་རྫས་གྱི་སྐྱེ་ཁམས་ཁོར་ཡུག་ལ་ཐེབས་པའི་ཤུགས་རྐྱེན་ལ་ཞིབ་འཇུག་གནང་སྟེ། དཀའ་སྤྱད་སྡུག་རུས་དྲག་པོས་རྫས་འགྱུར་འབུ་གསོད་སྨན་རྫས་སྤྱོད་པའི་ས་ཁུལ་དུ་འགྲིམ་ནས་ཞིབ་འཇུག་སྣ་མང་སྤྱད་པའི་འབྲས་རྟགས་སུ། 《ལྷིང་འཇགས་ཀྱི་དཔྱིད་ཀ》ཞེས་པ་དཔེ་སྐྲུན་བྱས། དེའི་ནང་མིའི་རིགས་དང་རླུང་ཁམས་ཆེན་པོ། རྒྱ་མཚོ། ཆུ་རྒྱུན། ས་ཞིང་། སྐྱེ་དངོས་བར་གྱི་འབྲེལ་བ་གསལ་བཤད་བྱས་པ་དང་རྫས་འགྱུར་ཞིང་སྨན་གང་བྱུང་དུ་སྤྱད་པར་བརྟེན། སྐྱེ་དངོས་མང་བོ་གནོད་འཚེ་ཐེབས་པ་ཞིབ་མོར་བརྗོད་ཡོད་པར་མ་ཟད། དཔག་དཀའ་བའི་ནད་གཡོམ་ཞིག་གིས་འདབ་ཆགས་དང་ནོར་ལུག་མནར་ཤི་ཐེབས་པ་དང་། བྱིས་པ་ཚོ་རོལ་རྩེད་བྱེད་བཞིན་དུ་མགོ་ཡོམ་འཁོར་ཞིང་དབུགས་ཆད་དེ། ཚེ་སྲོག་རྟ་རྔ་ཙམ་ལ་ཐུག་པ་སོགས་ནི། དཔེར་ན། གྲག་འགུལ་མེད་པའི་དཔྱིད་ཀ་ཞིག་རེད་ཅེས་བརྗོད་ཡོད་པ་རེད། 《ལྷིང་འཇགས་ཀྱི་དཔྱིད་ཀ》འི་སྔ་རྗེས་སུ《མཚོ་རླུང་གི་འོག》དང་། 《ང་ཚོའི་མཐའ་འཁོབ་ཀྱི་རྒྱ་མཚོ། 》 《རྒྱ་མཚོའི་མཐའ་》སོགས་རྒྱ་མཚོ་དང་རྒྱ་མཚོའི་སྐྱེ་དངོས་རིག་པ་དང་འབྲེལ་བའི་ཆེད་རྩོམ་མང་བོ་པར་སྐྲུན་བྱས། དེ་དག་ལས《ང་ཚོའི་མཐའ་འཁོབ་ཀྱི་རྒྱ་མཚོ། 》ལ་རྒྱལ་ཁབ་རིམ་པའི་བྱ་དགའ་འཐོབ་པ་དང་། ལོ་གཅིག་རིང་དཔེ་དེབ་ཁྲི་ཉི་ཤུ་ལྷག་ཚོང་ཐུབ་པ་བྱུང་། ཁྱད་པར་དུ། 《ལྷིང་འཇགས་ཀྱི་དཔྱིད་ཀ》ཞེས་པ་པར་སྐྲུན་བྱས་རྗེས། སྐད་གྲགས་ཆེན་པོ་བྱུང་ཞིང་། སྐད་རིགས་མང་བོར་བསྒྱུར་ཏེ་མང་ཚོགས་ལ་ཤུགས་རྐྱེན་ཆེན་པོ་ཐེབས་པར་མ་ཟད། ཁོར་ཡུག་སྲུང་སྐྱོང་གི་བྱ་འགུལ་གཅིག་རྗེས་གཉིས་མཐུད་ཀྱིས་སྤེལ་མགོ་ཚུགས་པ་ལྟ་བུ་ཡིན།
དེ་ལས་གཞན། སྐྱེ་ལྡན་ལུའི་ཞིང་སྨན་དེ། སྲ་མཁྲེགས་ཆེ་བའི་ཐོར་དཀའ་བས། ས་མཁྲེགས་པོ་དང་། ས་སྐྱུར་ཇེ་མང་དུ་གཏོང་ལ། བེད་སྤྱོད་མང་བོ་བཏང་ན་ལོ་ཏོག་ལ་སླད་སྐྱོན་ཞུགས་ཏེ། མིའི་བདེ་ཐང་ལ་གནོད་ཀྱིན་ཡོད་པ་དང་། དངུལ་ཆུའི་སྨན་རྫས་གཏོར་འགྲེམས་བྱས་པའི་འབྲུ་རིགས་དང་། ཤིང་ཏོག སྔོ་ཚལ་སོགས་ལ་དངུལ་ཆུ་འདུས་ཡོད་པས། ཐད་ཀར་ཟས་དུག་ཕོག་སྲིད་པ་ཡིན། གཞན་ཡང་། སྨན་རྫས་རྩྭ་ལ་ཕོག་པས། རྩྭ་གཟན་སྲོག་ཆགས་ཀྱི་ཤས་བསྐྱེད་པའི་དུག་སོགས་འཕྲོད་བསྟེན་ལ་གནོད་པའི་དུག་རྫས་ས་ཁྱབ་རྡོ་ཁྱབ་ཏུ་བེད་སྤྱོད་པ་འདི་མིའི་ཚེ་སྲོག་གི་གཤེད་མར་འགྲོ་བ་ཤིན་ཏུ་ནས་ཀྱང་མང་ངོ་། །
ཁྱད་པར་དུ་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱིས་ཞིང་སྨན་བེད་སྤྱོད་བཏང་བའི་འབྲས་རྟགས་སུ་ལོ་རེར་མི་ཁྲི ༤ ཤི་བས། ཆ་སྙོམས་ཀྱིས་སྐར་ཆ ༡༧ རེའི་ནང་མི ༡ རེར་ཤི་བ་ལས་གཞན། ཕྲུ་གུ་མངལ་དུ་ཤི་བ་དང་། མངལ་ཤོར་བ། སྐྲན་ནད་ཕོག་པ་སོགས་འཛམ་གླིང་འཕྲོད་བསྟེན་རྩ་འཛུགས་ཀྱིས་གསལ་བསྒྲགས་བྱས་ཡོད།
གད་སྙིགས་ཀྱིས་རྫད་པ།
དེང་སྐབས་འཛམ་གླིང་ཡོངས་སུ་བཟོ་ལས་དང་། ཚན་རིག་ཅི་ཙམ་འཕེལ་རྒྱས་འགྲོ་བ་དེ་ཙམ་དུ། དེས་བསྐྱེད་པའི་གད་སྙིགས་དང་རྫས་ངན་ཡང་ཇེ་མང་དུ་འགྲོ་བཞིན་ཡོད་དེ། སྡོམ་རྩིས་བྱས་པ་ལྟར་ན། སའི་གོ་ལའི་ཁྱོན་ན་གད་སྙིགས་ཏུན་དུང་ཕྱུར ༡༠༠ ལྷག་སྔོན་ལས་ཇེ་མང་དུ་སོང་བ་བཀོད་ཡོད། གད་སྙིགས་དེ་ཡང་བཟོ་ལས་དང་འཚོ་གནས་ཀྱི་གད་སྙིགས་གཉིས་སུ་འདུ་ལ། བཟོ་ལས་ཐོན་སྐྱེད་ཀྱི་གོ་རིམ་ཁྲོད་བྱུང་བའི་སྙིགས་རོ་གཙོ་གྲས་ནི། སོལ་རྡོ་དང་། སོལ་ཐལ། ཤོག་སྙིགས། ཤེལ་སྒོ་ཆག་རོ། ལྕགས་རིགས་སོགས་ཀྱི་སྙིགས་རོ་དང་། འཚོ་གནས་ཀྱི་སྙིགས་རོ ༡༠％ ཡི་མྱུར་ཚད་འཕར་སྣོན་བྱུང་བར་བརྟེན། མིའི་བདེ་ཐང་གི་འགལ་ཚབས་ཆེན་པོ་ཞིག་ཏུ་གྱུར་བ་ཡིན་ཏེ། དེ་ཡང་གཙོ་ཆེ་ཤོས་ཞིང་ས་དང་། ཁ་དབུགས། ཆུ། རྩི་ལྗོན་སོགས་ལ་དངོས་སུ་འགོས་ནད་བསྒོས་ཏེ། བརྒྱུད་ནས་མིའི་འཕྲོད་བསྟེན་ལ་གནོད་པ་ཡིན། དཔེར་ན། རྡོ་སྣུམ་གྱིས་མཚོ་ངོས་སྦགས་པས། རུས་སྐོགས་ཅན་དང་། འོ་འཐུང་སྲོག་ཆགས་མང་བོའི་གཅེས་སྲོག་ཤོར་བའི་གནས་ཚུལ་ལྟ་བུ་ཡིན།