སྲོག་བླུ་ཚེ་ཐར་གྱི་དགེ་མཚན།
རང་རེའི་སྲོག་བླུ་ཚེ་ཐར་གྱི་ཕྱག་སྲོལ་བཟང་བོ་འདིས་ཁོར་ཡུག་སྲུང་སྐྱོང་ལ་ཕན་ནུས་ཁྱད་པར་ཅན་ཐོན་ཡོད། དེ་ཡང་བླ་མའི་ཞབས་བརྟན། ནད་མེད་ཚེ་རིང་། གཤིན་པོའི་དགེ་རྩ། ཆོས་སྲུང་ལ་མཆོད་ཕྱིར་གཏོང་བ་སྟེ། ད་ལྟ་ལྷ་རྟ་དང་། ལྷ་གཡག ལྷ་ར་ཞེས་པ་དེ་རྣམས་ཡིན། ཁྱད་པར་དུ་ཐང་ཧྲུའུ་དུ་རི་དྭགས་གཉན་བོད་ཀྱིས་ལྷར་བཀུར་བར་བཤད་ཡོད་ལ། བོད་རྒྱལ་དམུས་ལོང་དཀོན་པ་བཀྲ་ཤིས་ཀྱི་མིག་ལ་ནད་བཅོས་བྱས་ཚེ། དང་ཐོག་གཉན་ཞིག་གཟིགས་པས་སྟག་རི་གཉན་གཟིགས་བཏགས་པ་སོགས་ལ་བལྟས་ནའང་རི་དྭགས་གཉན་ལ་མཐོང་ཆེན་ཇི་ལྟར་བྱེད་པ་རྟོགས་ཐུབ། དེ་ཡང་མདོར་དྲིལ་ན་ལས་འབྲས་ཀྱི་རྣམ་སྨིན་ལ་སྙིང་ཁོང་རུས་པའི་གཏིང་ནས་ཡིད་ཆེས་ཡོད་པའི་སྟེང་ནས། ཁོར་ཡུག་སྲུང་སྐྱོང་བྱེད་སྟངས་འདི་ལག་ལེན་ཁྲོད་བྱུང་བ་ཡིན། དམྱལ་གླིང་མུན་པ་རང་སངས་ལས། ལྕགས་སྲེག་ཐང་ན་ཚེ་འདས་ཕོ་མོ་རྣམས། །ལུས་པོ་ཚིག་ནས་ཨ་ཚ་ཟེར་བ་འདི། །འཇིག་རྟེན་མི་ཡུལ་གསོན་པོར་འདུག་པའི་དུས། །ར་ལུག་གསོན་པོར་བཟུང་ནས་གསུར་ལ་འདྲེན། །ཆུ་ནང་ཉ་མོ་བཟུང་ནས་སྐམ་ལ་ཕུད། །དགུན་གསུམ་རི་བོ་ཆེན་པོ་མེ་ལ་བསྲེགས། །ལས་ངན་དེ་འདྲ་བྱས་པའི་རྣམ་སྨིན་རེད། །ལས་མཁན་མཚོན་ཆ་ཐོགས་པ་འབུམ་ཕྲག་གིས། །ཚེ་འདས་ཕོ་མོ་བགྲང་ལས་འདས་པ་གསོད། །ཡང་ཤི་ཡང་སོས་སྡུག་བསྔལ་བརྒྱ་རེ་མྱོང་། །འཇིག་རྟེན་མི་ཡུལ་གསོན་པོར་འདུག་པའི་དུས། །ཉེས་མེད་རི་དྭགས་མང་བོ་མདའ་ཡིས་བསད། །རྐུན་ཇག་བྱས་ནས་མི་རྟ་མང་བོ་བསད། །བྱ་ཚང་བྱེའུ་ཚང་སྒོ་ང་རྡོ་ལ་བརྒྱབ། །གཡུ་སྤྱང་ཝ་མོ་དར་མ་མང་བོ་བསད། །འཕྱི་བ་རི་བོང་ཤྭ་རྐྱང་མདའ་ཡིས་བསད། །ན་ཁའི་སྦལ་བ་ཚྭ་ཆུ་བཏབ་ནས་བསད། །ས་འོག་དུག་སྦྲུལ་གླ་རྩི་དུག་གིས་བསད། །ལས་ངན་དེ་འདྲ་བྱས་པའི་རྣམ་སྨིན་རེད། །ཅེས་གསུངས་པ་འདིས་སྲོག་བཅད་པའི་རྣམ་སྨིན་གྱི་དཔེ་གསོན་པོ་ཞིག་བསྟན་ཡོད། ཚུལ་འདི་ལ་དགོངས་ནས། སྐྱེས་ཆེན་དམ་པ་རྣམས་ཀྱིས་འདུས་བྱས་ཀྱི་དགེ་རྩ་ཀུན་ལས་སྲོག་སྐྱོབ་པ་འདི་ཕན་ཡོན་ཆེ་བར་དགོངས་ནས། དབང་ཡོད་ཚོས་རི་རྒྱ་ལུང་བརྒྱ་བསྡམས་པ་དང་། ཚེ་ཐར་སྲོག་བླུའི་ཆོ་ག་མང་དུ་སྤེལ་ཏེ། ལྷག་པར་དུས་བཟང་ལ་དགེ་རྩ་བརྒྱ་འགྱུར་དུ་དམིགས་ནས། སྐམ་ས་དང་ཆུར་གནས་སྲོག་ཆགས་མང་བོ། གསོན་ཆོས་སླར་ཡང་རྙེད་པ་ལྟ་བུའི་སྲོལ་བཟང་བྱུང་བ་ཡིན། དེའི་འབྲས་རྟགས་ཀྱང་ནད་མེད་ཚེ་རིང་དང་། ས་བཅུད་གསོ་བ། འབྱོར་བ་རྒྱས་པ། བློ་བདེ་བག་ཕེབས་དང་ཉམས་སྤྲོ་བ། ཐར་ལམ་འཐོབ་པ་བཅས་ཕན་ཡོན་བསམ་གྱིས་མི་ཁྱབ་བོ། །