ཁོར་ཡུག་སྲུང་སྐྱོང་བྱེད་དགོས་པ།
ཁོར་ཡུག་སྲུང་སྐྱོང་བྱེད་པ་ནི། ཆེ་ས་ནས་འཛམ་གླིང་སྤྱི་ཕན་དང་། ཆུང་ས་ནས་རང་ཉིད་སྒེར་ཕན་གྱི་བྱ་བཞག་རླབས་ཆེན་ཞིག་ཡིན། ད་ལྟ་ཚེ་སྲོག་དང་སྐྱེ་ཁམས་དོ་མཉམ་ཞེས། ཁ་ནས་མ་ཎི་བཞིན་ཟློ་ཡང་། ལག་ལེན་ལ་མ་ཞུགས་ན་རི་བོང་གནམ་རྡིབས་ཀྱི་དཔེ་བཞིན་ངལ་བ་འབྲས་མེད་ཡིན། དེ་བས་མིའོ་ཅོག་གིས་ས་སྒང་གཅིག་ལ་རྐང་སྟེགས་འཆའ་བའམ། གྲུ་ཐོག་གཅིག་གིས་སྐུ་མགྲོན་བཞིན་བདེ་ན་མཉམ་བདེ་དང་། སྡུག་ན་མཉམ་སྡུག་གི་གནས་ལུགས་འདིར་མནོ་བསམ་གཏོང་དགོས། དཔེར་ན། དུས་རབས་ཉི་ཤུའི་ལོ་རབས་ལྔ་བཅུའི་སྔ་གཞུག་ཏུ། ལོའོ་ཧྲན་ཅིའི་འོད་རྫས་འགྱུར་དུ་སྨུག་དང་། ལོན་ཏོན་དུ་སྨུག འཇར་པན་དུ་རུས་པའི་འབྲས་སྐྲན་སོགས་དོན་རྐྱེན་མང་བོ་འཕྲོ་རིམ་འཕྲོར་བྱུང་སྟེ། མིའི་རིགས་ལ་འཇིགས་སྣང་སྐུལ་བས། ཁོར་ཡུག་གི་གནད་དོན་དེ་སའི་གོ་ལའི་གནད་དོན་ཞིག་ཏུ་བརྩིས་ནས། སྐྱེ་ཁམས་རིག་པ་དང་། རྫས་འགྱུར་རིག་པ། ས་ཁམས་རིག་པ། གསོ་རིག་པ། ཆོས་ལུགས་མི་སྣ་སོགས་ཀྱིས་ཐབས་བརྒྱ་ཇུས་སྟོང་གིས། ཁོར་ཡུག་རྩ་གཏོར་དུ་གཏོང་བའི་གནོད་སྐྱོན་ལ་སྔོན་འགོག་བྱེད་ཅི་ཐུབ་དང་། སྲུང་སྐྱོང་བྱེད་པའི་སྤྱོད་སྒོ་མང་དུ་སྤེལ་བ་སྟེ། དཔེར་ན། ༡༩༧༠ ལོའི་ཟླ ༤ ཚེས ༢༢ ཉིན་ཨ་རིའི་རྒྱལ་ཡོངས་སུ《འཛམ་གླིང་ས་དཀྱིལ་ཉིན་མོ》ཞེས་པའི་ཁྲོམ་བསྐོར་ནང་། སློབ་གྲྭ་ཆེ་ཆུང་གི་སློབ་མ ༢༥༠༠ ཙམ་དང་། སྲིད་གཞུང་གི་མི་སྣ། བཟོ་བ་སོགས་ཀྱིས་ཁོར་ཡུག་ལ་སྲུང་སྐྱོང་བྱེད་དགོས་པའི་བསྒྲགས་གཏམ་སྤེལ་བར་མ་ཟད། ལག་ཏུ་པར་རིས་དང་ཡིག་བྱང་འཁྱེར་ནས། ཁོར་ཡུག་བཙོག་སྐྱོན་ལ་ཐེར་འདོན་བྱས་པས། མཉམ་འབྲེལ་རྒྱལ་ཚོགས་ཀྱི་ཁོར་ཡུག་ཚོགས་ཆེན་འཚོགས་རྒྱུར་སྐུལ་ལྕག་ཐེབས་པར་མ་ཟད། ལོ་རེའི་ཟླ ༤ བའི་ཚེས ༢༢ ཉིན《འཛམ་གླིང་ས་དཀྱིལ་ཉིན་མོ》གཏན་འཁེལ་བྱས་པ་དང་། གཞན་སྐམ་གཤེར་གཉིས་སུ་འཚོ་བའི་བདག་མེད་སྲོག་ཆགས་སྲུང་སྐྱོབ་བྱ་རྒྱུའི་ཐད། ལོ་རེར《ཀེ་ཏིའི་བྱ་དགའི་དངུལ》ཞེས་པ་ཨ་རིའི་སྒོར་ཁྲི་ལྔ་ལོ་རེར་སྤྲོད་པ་སོགས་ཀྱིས་མཚོན། བྱང་ཐང་ལྗང་འགྱུར། སྡོང་འཛུགས་ནགས་བསྐྲུན། རི་རྒྱ་ལུང་རྒྱ་བསྡམས་ནས་རི་དྭགས་སོགས་སྲོག་ཆགས་ཀྱི་རིགས། སྨན་སྣ་སོགས་རྩི་ལྗོན་གྱི་རིགས། རིན་ཆེན་སོགས་གཏེར་ཁའི་རིགས། གཞན་ཡང་། གངས་རི་སོགས་རི་བོ་སྙེད། མཚོ་དང་མཚེའུ་སོགས་རང་ནུས་གང་ལྕོགས་ཀྱིས་སྲུང་སྐྱོབ་བྱེད་དགོས། ལྷག་པར་དུ་དགའ་འོས་པ་ཞིག་ལ། དེང་སྐབས་འཛམ་གླིང་ཐོག་རྒྱལ་ཁབ་དང་སྲིད་གཞུང་ཁག་གིས། ཁོར་ཡུག་སྲུང་སྐྱོང་འདི་གཙོ་གནད་དུ་བཟུང་སྟེ། བཅའ་ཁྲིམས་དང་། ཚོགས་པ། ལས་ཁུངས་དང་། དྲན་སྐུལ་གྱི་ཉིན་མོ་གཏན་འབེབས་གནང་ནས། ལག་ལེན་དོན་འཁྱོལ་བྱེད་པ་ལ་ཡི་རང་དང་བཅས། རང་ཉིད་ཀྱང་འདིའི་རྗེས་སུ་བློ་ཁ་ཕྱོགས་ཏེ། མི་སྒེར་གྱི་སྟེང་ནས་འབད་པ་བྱེད་པ་ནི། སྤྱི་སྒེར་གཉིས་ཕན་གྱི་བྱ་བཞག་རླབས་པོ་ཆེ་ཞིག་བསྒྲུབས་པ་ཡིན་ནོ།