༡ མཚན་ཉིད་ཀྱི་ཐེག་པའི་འབྲས་བུ་གཏན་ལ་དབབ་པའི་སྐབས།
དེ་ལྟར་ལམ་ལྔ་དང་ས་བཅུ་ལ་སོགས་པའི་མངོན་རྟོགས་གོང་ནས་གོང་དུ་ཡོངས་སུ་རྫོགས་པ་ལ་བརྟེན་ནས། ཐེག་གསུམ་རང་རང་གི་མྱང་འདས་དང༌། ཁྱད་པར་མཐའ་གཉིས་ལ་མི་གནས་པའི་བྱང་ཆུབ་ཆེན་པོ་མངོན་དུ་བྱེད་པར་འགྱུར་བས་གནས་བཅུ་པ་མཐར་ཕྱིན་འབྲས་བུའི་རིམ་པར་ཕྱེ་བ་ལ་སྐབས་བཞི། མཚན་ཉིད་ཐེག་པའི་འབྲས་བུ་གཏན་ལ་དབབ་པ། སྔགས་ཀྱི་ཐུན་མོང་གི་དངོས་གྲུབ་གཏན་ལ་དབབ་པ། རྡོ་རྗེ་ཐེག་པའི་མཐར་ཐུག་གི་འབྲས་བུ་གཏན་ལ་དབབ་པ། གསང་སྔགས་སྔ་འགྱུར་ལུགས་ཀྱི་འབྲས་བུ་བྱེ་བྲག་ཏུ་གཏན་ལ་དབབ་པའོ། །དང་པོ་ལ་གཉིས། ཐེག་གསུམ་འབྲས་བུ་མྱང་འདས་སྤྱིར་བཤད་པ། །ཐེག་ཆེན་འབྲས་བུ་སངས་རྒྱས་བྱེ་བྲག་ཏུ་བཤད་པའོ། །དང་པོ་ནི། ཐེག་གསུམ་ཐོབ་བྱའི་འབྲས་བུ་མྱང་འདས་ཏེ། །རང་བཞིན་མྱང་འདས་ཆོས་རྣམས་དེ་བཞིན་ཉིད། །འགོག་པའི་མྱང་འདས་བཏགས་པ་མོས་སྤྱོད་དུ། །དོན་དམ་མཐོང་སྒོམ་ལས་ཐོབ་སློབ་པ་ཡི། །མ་རྫོགས་མི་སློབ་པ་ཡི་རྫོགས་པའོ། །མི་གནས་མྱང་འདས་སྲིད་ཞིའི་མཐར་མ་ལྷུངས། །ཐེག་པ་གསུམ་གའི་ཐོབ་བྱའི་འབྲས་བུ་ནི་མྱ་ངན་ལས་འདས་པ་ཡིན་ལ། དེ་ཉིད་ཀྱང་སྤྱིར་བཏང་དུ་བཤད་ན་གསུམ་སྟེ། རང་བཞིན་མྱང་འདས། འགོག་པའི་མྱང་འདས། མི་གནས་མྱང་འདས་སོ། །དང་པོ་ནི། རྩ་ཤེ་ལས།
བརྗོད་པར་བྱ་བ་ལོག་པ་སྟེ། །སེམས་ཀྱི་སྤྱོད་ཡུལ་ལོག་པས་སོ། །མ་སྐྱེས་པ་དང་མ་འགགས་པ། །ཆོས་ཉིད་མྱ་ངན་འདས་དང་མཚུངས། །ཞེས་གསུངས་པ་ལྟར། ཆོས་རྣམས་ཀྱི་དེ་བཞིན་ཉིད་རང་བཞིན་གྱིས་རྣམ་པར་དག་པའོ། །གཉིས་པ་འགོག་པའི་མྱང་འདས་ལ་གཉིས་ཏེ། བཏགས་པ་ནི། ཀུན་ལས་བཏུས་ལས། བརྡས་ཇི་ལྟ་བུ་ཞེ་ན། འཇིག་རྟེན་པའི་ལམ་གྱིས་ས་བོན་ཉམས་སྨད་པས་འགོག་པ་གང་ཡིན་པ་སྟེ། དེའི་ཕྱིར་བཅོམ་ལྡན་འདས་ཀྱིས་དེའི་རྣམ་གྲངས་སུ་དེའི་ཡན་ལག་གིས་མྱ་ངན་ལས་འདས་པར་གསུངས་སོ། །ཞེས་པ་ལྟར་མོས་སྤྱོད་དུ་ཐོབ་པའི་འགོག་པ་བཏགས་པ་བ་རྣམས་སོ། །དོན་དམ་པའི་འགོག་པ་ནི། མཐོང་སྒོམ་ལམ་གྱི་ས་ཐོབ་པའི་འགོག་པ་སྟེ། དེ་ཉིད་ལས། དོན་དམ་པས་ཇི་ལྟ་བུ་ཞེ་ན། འཕགས་པའི་ཤེས་རབ་ཀྱིས་ས་བོན་ཀུན་ཏུ་བཅོམ་པས་འགོག་པ་གང་ཡིན་པའོ། །ཞེས་སོ། །དེ་ལའང་ཡོངས་སུ་མ་རྫོགས་པ་དང་རྫོགས་པ་གཉིས་ལས། སྔ་མ་ནི། དེ་ཉིད་ལས། ཡོངས་སུ་མ་རྫོགས་པ་ཇི་ལྟ་བུ་ཞེ་ན། རྒྱུན་དུ་ཞུགས་པའི་འབྲས་བུར་བསྡུས་པའམ་ཕྱིར་མི་འོང་བའི་འབྲས་བུར་བསྡུས་པའང་རུང་སྟེ་སློབ་པ་རྣམས་ཀྱི་འགོག་པ་གང་ཡིན་པའོ། །ཞེས་པ་ལྟར་སློབ་པའི་འགོག་པ་ཐམས་ཅད་དོ། །ཡོངས་སུ་རྫོགས་པ་ནི། དེ་ཉིད་ལས། ཡོངས་སུ་རྫོགས་པ་ཇི་ལྟ་བུ་ཞེ་ན། དགྲ་བཅོམ་པའི་འབྲས་བུར་བསྡུས་པ་མི་སློབ་བ་རྣམས་ཀྱི་འགོག་པ་གང་ཡིན་པའོ། །ཞེས་པ་ལྟར་མི་སློབ་པའི་འགོག་པ་ཐམས་ཅད་དོ། །འདི་ལའང་ཐེག་པ་སོ་སོའི་གོ་རིམ་དང་བསྟུན་པའི་ལྷག་བཅས་ལྷག་མེད་གཉིས་སུ་ཡོད་དོ། །གསུམ་པ་མི་གནས་མྱང་འདས་ནི། སངས་རྒྱས་བྱང་སེམས་རྣམས་ཀྱི་ཤེས་རབ་དང་སྙིང་
རྗེའི་སྟོབས་ཀྱིས་སྲིད་དང་ཞི་བ་གཉིས་ཀྱི་མཐར་མ་ལྷུང་བའི་མྱང་འདས་སོ། །རྩ་བའི་གཉིས་པ་ལ་གསུམ། སངས་རྒྱས་ཀྱི་རང་བཞིན་མཚན་གྱི་སྒྲ་དོན། སྐུ་ཡི་ཕྲིན་ལས་ཇི་ལྟར་འགྲུབ་པའི་ཚུལ་ལོ། །དང་པོ་ནི། ཆེན་པོ་གསུམ་ལྡན། ཅེས་པ་སྟེ། མཐར་ཐུག་གི་འབྲས་བུ་ཡང་དག་པར་རྫོགས་པའི་སངས་རྒྱས་ཀྱི་ངོ་བོ་ནི་ཆེན་པོ་གསུམ་གྱི་མཚན་ཉིད་ཅན་ཏེ། སྒྲིབ་གཉིས་བག་ཆགས་དང་བཅས་པ་ཡོངས་སུ་དག་པའི་སྐུ་ནི་སྤངས་པ་ཆེན་པོ། ཤེས་བྱའི་དཀྱིལ་འཁོར་མ་ལུས་པ་ས་ལེར་གཟིགས་པའི་ཡེ་ཤེས་ནི་རྟོགས་པ་ཆེན་པོ། དེའི་མཐུས་འགྲོ་བ་མཐའ་དག་གི་དོན་རྟག་ཁྱབ་ལྷུན་གྲུབ་ཏུ་མཛད་པ་ནི་སེམས་ཆེན་པོ་སྟེ། མངོན་རྟོགས་རྒྱན་ལས། སེམས་ཅན་ཀུན་མཆོག་ཉིད་སེམས་དང༌། །སྤང་དང་རྟོགས་དང་གསུམ་པོ་ལ། །ཆེན་པོ་གསུམ་གྱི་རང་བྱུང་གི །ཆེད་དུ་བྱ་བ་འདི་ཤེས་བྱ། །ཞེས་སོ། །གཉིས་པ་ནི། པདྨ་ལྟར་སངས་རྒྱས། །ཞེས་པ་སྟེ། ཅིའི་ཕྱིར་སངས་རྒྱས་ཞེས་བྱ་ཞེ་ན། མ་རིག་པ་གཉིད་དང་འདྲ་བ་ལས་སངས་ནས་ཤེས་བྱ་གཉིས་ལ་བློ་རྒྱས་པས་ན་སངས་རྒྱས་ཞེས་བྱ་སྟེ། ཇི་སྐད་དུ། མ་རིག་གཉིད་ལས་སངས་ཕྱིར་དང༌། །ཤེས་བྱ་ལ་ཡང་བློ་རྒྱས་ཕྱིར། །སངས་རྒྱས་པདྨ་ལྟར་སངས་རྒྱས། །ཞེས་གསུངས་པ་ལྟར་རོ། །གསུམ་པ་ལ་གསུམ། རྒྱུ་གང་ལས་གང་ཞིག་འགྲུབ་པའི་འབྲེལ་བསྟན། གནས་གང་དུ་གང་ལྟར་འགྲུབ་པའི་ཁྱད་པར་བཤད། གང་ཞིག་གྲུབ་པའི་འབྲས་བུ་རྒྱས་པར་བཤད་པའོ། །དང་པོ་ནི། བྱང་ཆུབ་སེམས་ཀྱིས་བསོད་ནམས་ཚོགས་བསགས་པས། །རྣམ་སྨིན་འབྲས་བུ་གཟུགས་ཀྱི་སྐུ་འགྲུབ་ཅིང༌། །ཡེ་ཤེས་ཚོགས་ཀྱིས་བྲལ་འབྲས་ཆོས་སྐུའོ། །བསམ་པ་བྱང་ཆུབ་ཀྱི་སེམས་དང་ལྡན་པས་སྦྱོར་བ་ཕ་རོལ་ཏུ་ཕྱིན་པ་དྲུག་
གིས་བསྡུས་པའི་ཚོགས་གཉིས་རྒྱ་ཆེན་པོ་རྫོགས་པ་ལས་སྐུ་གཉིས་འཐོབ་པ་སྟེ། དེའང་བསོད་ནམས་ཀྱི་ཚོགས་ཀྱི་དོན་དུ་སེམས་ཅན་ལ་ཕན་པ་བསྒྲུབས་པ་ལས་རྣམ་པར་སྨིན་པའི་འབྲས་བུ་གཟུགས་ཀྱི་སྐུ་འགྲུབ་ཅིང༌། ཡེ་ཤེས་ཀྱི་ཚོགས་ཀྱི་དོན་དུ་མི་རྟོག་པའི་ཏིང་ངེ་འཛིན་བསྒོམས་པ་ལས་དྲི་མ་དང་བྲལ་བའི་འབྲས་བུ་ཆོས་ཀྱི་སྐུ་འགྲུབ་སྟེ། རིན་ཆེན་ཕྲེང་བ་ལས། སངས་རྒྱས་རྣམས་ཀྱི་གཟུགས་ཀྱི་སྐུ། །བསོད་ནམས་ཚོགས་ལས་འཁྲུངས་པ་སྟེ། །ཆོས་ཀྱི་སྐུ་དེ་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་གསུངས་པ་ལྟར་རོ། །གཉིས་པ་ནི། དེ་ཡང་འོག་མིན་ཆེན་པོར་ལོངས་སྐུ་ཡི། །རྟེན་ལས་ཆོས་སྐུ་མངོན་མཛད་སྟོང་གསུམ་དུ། །སྤྲུལ་སྐུས་ཅིག་ཅར་བྱང་ཆུབ་ཚུལ་ཡང་སྟོན། །དོན་གཉིས་མཐར་ཕྱིན་སྐུ་གཉིས་རྟེན་བརྟེན་པ། །དོན་ལ་མེད་པ་མི་སྣང་ཡོད་པའི་ཕྱིར། །སྣང་བས་འདོད་དགུར་སྤྱོད་ཕྱིར་ཐར་པ་ཡིན། །སངས་རྒྱས་དེའང་གནས་གང་དུ་འགྲུབ་ན། ཁམས་གསུམ་ལས་ཡང་དག་པར་འདས་པའི་འོག་མིན་ཆེན་པོར་ལོངས་སྐུའི་རྟེན་ལ་ཆོས་ཀྱི་སྐུ་མངོན་དུ་མཛད་ཅིང༌། སྟོང་གསུམ་གྱི་འཇིག་རྟེན་གླིང་བཞི་བྱེ་བ་ཕྲག་བརྒྱར་སྤྲུལ་པའི་སྐུས་ཅིག་ཅར་མངོན་པར་བྱང་ཆུབ་པའི་ཚུལ་ཡང་སྟོན་པར་མཛད་པ་སྟེ། ལངྐར་གཤེགས་པ་ལས། གཙང་མའི་གནས་རྣམས་སྤངས་པ་ཡི། །འོག་མིན་གནས་ནི་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་གཅིག་འདིར་སངས་རྒྱས། །ཞེས་སོ། །སྐུ་གསུམ་དུ་བཞག་པའང་དགོས་པ་གཟིགས་པའི་གྲངས་ངེས་ཏེ། གཟུགས་སྐུ་གཉིས་ནི་རང་གཞན་གྱི་དོན་ཕུན་སུམ་ཚོགས་པ་ཡིན་ལ། ཆོས་སྐུ་ནི་དེའི་རྟེན་ཡིན་ཏེ། བྱམས་པས། སྐུ་གསུམ་དག་གིས་རང་གཞན་གྱི། །དོན་
འདི་རྟེན་དང་བཅས་པར་བསྟན། །ཞེས་གསུངས་ཤིང༌། ཡང་གཞན་དང་གཞན་དུ་ཆོས་སྐུ་རང་དོན་དོན་དམ་གྱི་དང༌། གཟུགས་སྐུ་གཉིས་ཅར་གཞན་དོན་ཀུན་རྫོབ་པར་ཡང་བཤད་དོ། །ཕྱི་མའང་དག་པའི་གདུལ་བྱའི་སྣང་ངོར་ལོངས་སྐུ་དང༌། མ་དག་པའི་གདུལ་བྱའི་སྣང་ངོར་སྤྲུལ་པའི་སྐུར་སྣང་བ་སྟེ། དེ་དག་གི་དང་པོ་ནི་ཕྱི་མ་གཉིས་ཀྱི་རྟེན་ཡིན་ཅིང༌། གཉིས་པོའང་རིམ་པ་ལྟར་རྟེན་བརྟེན་པ་ཡིན་ནོ། །དེ་དག་ཀྱང་དོན་ལ་མེད་པ་གློ་བུར་གྱི་དྲི་མ་སྒྲིབ་པ་མཐའ་དག་སྤངས་པས་མི་སྣང་ཞིང༌། རྟག་ཏུ་མི་འགྱུར་བར་ཡོད་པ་ཆོས་ཀྱི་དབྱིངས་མཐའ་དག་མངོན་སུམ་དུ་སྣང་བས་ཇི་ལྟར་བཞེད་པ་བཞིན་ཟག་མེད་ཀྱི་འབྱོར་པ་ལ་སྤྱོད་པ་སྟེ། མདོ་སྡེ་རྒྱན་ལས། དོན་མེད་པ་དང་དོན་ཡོད་དག །མི་སྣང་སྣང་བ་ཡིན་ཞེས་བྱ། །དེ་ནི་གནས་གཞན་གྱུར་པ་སྟེ། །འདོད་དགུར་སྤྱོད་ཕྱིར་ཐར་པ་ཡིན། །ཞེས་གསུངས་པ་ལྟར་རོ། །གསུམ་པ་ལ་བཞི། རྟེན་སྐུ། བརྟེན་པ་ཡེ་ཤེས། བྲལ་སྨིན་ཡོན་ཏན། མཛད་པ་ཕྲིན་ལས་བཤད་པའོ། །དང་པོ་ལ་གཉིས། མཚན་ཉིད་སོགས་དང༌། ཁྱད་པར་རོ། །དེའི་དང་པོ་ལའང་བཞི། ཆོས་སྐུ། ལོངས་སྐུ། སྤྲུལ་སྐུ། རྒྱུད་བླའི་དགོངས་པ་འཕྲོས་དོན་དུ་བསྟན་པའོ། །དང་པོ་ལ་གཉིས། སྒྲ་དོན་མཚན་ཉིད། ཁྱད་པར་གྱི་སྐུའི་དབྱེ་བའོ། །དང་པོ་ནི། ཟག་མེད་ཡོན་ཏན་ཀུན་ལྡན་ཆོས་ཀྱི་དབྱིངས། །དག་པ་གཉིས་ལྡན་ཆོས་ཉིད་རྟེན་གྱི་སྐུ། །མཉམ་ཟབ་རྟག་པ་གཅིག་བུ་ཡང་དག་གཙང༌། །འོད་གསལ་རྫོགས་འབྲེལ་མཚན་ཉིད་བརྒྱད་དང་ལྡན། །དེ་ལ་ཆོས་སྐུའི་ངེས་ཚིག་ནི། །འདུས་བྱས་དང་འདུས་མ་བྱས་རྣམ་ངེས་སུ་རྒྱལ་པོ་ལ་གདམས་པའི་རྣམ་འགྲེལ་གྱི་ལུང་དྲངས་པར་ཆོས་ཉིད་ཀྱི་སྐུ་ནི་ཆོས་སྐུའོ། །དེ་ནི་ཆོས་ཐམས་ཅད་ཀྱི་ལུས་ཡིན་པས་འགྲོ་
བ་ཐམས་ཅད་ཀྱི་དེ་བཞིན་ཉིད་ཀྱི་རང་བཞིན་ལས་མ་འདས་པའི་ཕྱིར་དང༌། འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་ཐམས་ཅད་ཀྱི་རྟེན་ཡིན་པ་ཉིད་ཀྱིས་སྐུའོ། །ཞེས་དྷརྨ་ཏཱ་ཀཱ་ཡ་ལ་ཏཱ་ཕྱིས་པའི་སྒྲ་བཤད་ཀྱི་ཚུལ་འབྱུང་བ་ལྟར་རོ། །མཚན་ཉིད་ནི། ཟག་པ་མེད་པའི་ཡོན་ཏན་ཐམས་ཅད་དང་ལྡན་པའི་ཆོས་ཀྱི་དབྱིངས་རང་བཞིན་གྱིས་རྣམ་པར་དག་པ་ཉིད་གློ་བུར་གྱི་དྲི་མ་ཐམས་ཅད་དང་ཡང་བྲལ་ནས་དག་པ་གཉིས་ལྡན་གྱི་ངོ་བོ་ཉིད་དུ་གྱུར་པ་ནི་ངོ་བོ་ཉིད་སྐུའམ་ཆོས་ཀྱི་སྐུ་སྟེ། མངོན་རྟོགས་རྒྱན་ལས། ཐུབ་པའི་ངོ་བོ་ཉིད་སྐུ་ནི། །ཟག་པ་མེད་པའི་ཆོས་གང་དག །ཐོབ་གྱུར་རྣམ་ཀུན་རྣམ་དག་པ། །དེ་དག་རང་བཞིན་མཚན་ཉིད་ཅན། །ཞེས་དང༌། ཐེག་བསྡུས་ལས། དེ་ལ་ངོ་བོ་ཉིད་ཀྱི་སྐུ་ནི་དེ་བཞིན་གཤེགས་པ་རྣམས་ཀྱི་ཆོས་ཀྱི་སྐུ་སྟེ་ཆོས་ཐམས་ཅད་ལ་དབང་སྒྱུར་བའི་གནས་ཡིན་པའི་ཕྱིར་རོ། །ཞེས་གསུངས་པ་ལྟར་རོ། །དེ་ལ་ལྡོག་པས་ཕྱེ་ན། མཉམ་པ་དང༌། ཟབ་པ་དང༌། རྟག་པ་དང༌། གཅིག་པ་དང༌། ཡང་དག་པ་དང༌། གཙང་བ་དང༌། འོད་གསལ་བ་དང༌། ལོངས་སྤྱོད་རྫོགས་པ་དང་འབྲེལ་བ་སྟེ་མཚན་ཉིད་བརྒྱད་དང་ལྡན་པའོ། །དེའང་སངས་རྒྱས་ཐམས་ཅད་ཀྱི་ཆོས་ཀྱི་སྐུ་ལ་ཁྱད་པར་མེད་པའི་ཕྱིར་མཉམ་པའོ། །སྤྲོས་པ་ཐམས་ཅད་དང་བྲལ་བས་རྟོགས་པར་དཀའ་བའི་ཕྱིར་ཟབ་པའོ། །འདུས་མ་བྱས་པས་དུས་གསུམ་དང་སྐྱེ་འགག་མེད་པའི་ཕྱིར་རྟག་པའོ། །དབྱིངས་དང་ཡེ་ཤེས་ཐ་མི་དད་པས་དབྱེར་མེད་པའི་ཕྱིར་གཅིག་པའོ། །སྒྲོ་སྐུར་གྱི་མཐའ་ལས་འདས་པས་ཕྱིན་ཅི་མ་ལོག་པའི་ཕྱིར་ཡང་དག་པའོ། །སྒྲིབ་པ་གསུམ་གྱི་དྲི་མ་དང་བྲལ་བའི་ཕྱིར་གཙང་བའོ། །རྣམ་པར་མི་རྟོག་པས་མི་རྟོག་པ་དེ་ཉིད་དུ་དམིགས་པའི་ཕྱིར་འོད་གསལ་བའོ། །ཡོན་ཏན་རྒྱ་ཆེན་པོའི་བདག་ཉིད་ཀྱི་ལོངས་སྤྱོད་རྫོགས་པའི་རྟེན་དུ་གྱུར་པའི་
ཕྱིར་ལོངས་སྤྱོད་རྫོགས་པ་དང་འབྲེལ་བའོ། །གཉིས་པ་ནི། འགའ་ཞིག་སྤངས་པ་ཕུན་ཚོགས་ངོ་བོ་ཉིད། །རྟོགས་པ་ཕུན་ཚོགས་ཆོས་སྐུར་རྣམ་པར་གཞག །ངོ་བོ་ལ་དབྱེར་མེད་ཀྱང་འཆད་ཚུལ་འགའ་ཞིག་ཏུ་ཉོན་མོངས་པ་དང་ཤེས་བྱའི་སྒྲིབ་གཉིས་བག་ཆགས་དང་བཅས་པ་ལམ་རྣམས་སུ་སུན་ཕྱུང་ནས་རྡོ་རྗེ་ལྟ་བུའི་ཏིང་ངེ་འཛིན་གྱི་མཇུག་ཐོགས་སུ་མ་ལུས་པ་བཅོམ་པ་སྤངས་པ་ཕུན་ཚོགས་ནི་ངོ་བོ་ཉིད་ཀྱི་སྐུ་དང༌། ཤེས་བྱ་ཇི་ལྟ་བ་དང་ཇི་སྙེད་པ་མཁྱེན་པའི་ཡེ་ཤེས་ཀྱིས་ཆོས་ཐམས་ཅད་ཀྱི་མཚན་ཉིད་ཇི་ལྟ་བ་བཞིན་མངོན་སུམ་དུ་གཟིགས་ཤིང་ཐུགས་སུ་ཆུད་པ་རྟོགས་པ་ཕུན་ཚོགས་ནི་ཆོས་ཀྱི་སྐུའོ་ཞེས་རྣམ་པར་གཞག་པའང་ཡོད་དོ། །དེའང་ཆོས་ཐམས་ཅད་ཀྱི་རང་བཞིན་སྟོང་ཉིད་སྤྲོས་པ་ཐམས་ཅད་དང་བྲལ་བ་རང་བཞིན་རྣམ་དག་གི་མཚན་ཉིད་ཅན་ངོ་བོ་ཉིད་སྐུ་དང༌། དེ་ལྟར་གཟིགས་པའི་ཡེ་ཤེས་རྣམ་དག་གི་མཚན་ཉིད་ཅན་ཆོས་ཀྱི་སྐུ་དག་ཡུལ་དང་ཡུལ་ཅན་ཡིན་པས་སོ། །གཉིས་པ་ལ་གཉིས། སྒྲ་དོན་མཚན་ཉིད། །དབྱེ་བའོ། །དང་པོ་ནི། ལོངས་སྐུ་སྟུག་པོ་བཀོད་པར་མཚན་དཔེས་བརྒྱན། །འཕགས་དང་ཐེག་ཆེན་ལོངས་སྤྱོད་རྒྱུན་མི་འཆད། །འཁོར་དང་ཞིང་སྐུ་མཚན་ཆོས་མཛད་པ་དང༌། །ལྷུན་གྲུབ་རང་བཞིན་མེད་པའི་མཚན་ཉིད་བརྒྱད། །ལོངས་སྐུའི་སྒྲ་དོན་ནི། མངོན་རྟོགས་རྒྱན་ལས། ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་གསུངས་པ་ལྟར། ཐེག་པ་ཆེན་པོའི་རྟོགས་པའི་ཆོས་རྫོགས་པར་ལོངས་སྤྱོད་པའི་རྟེན་ཡིན་པས་སམ། རྫོགས་པར་ལོངས་སྤྱོད་པའི་ཕྱིར་ཐེག་ཆེན་གྱི་ཆོས་སྟོན་པས་སོ། །མཚན་ཉིད་ནི། འོག་མིན་ཆེན་པོ་རྒྱན་སྟུག་པོ་བཀོད་པར་མཚན་དང་དཔེ་བྱད་ཀྱིས་བརྒྱན་པའི་སྐུས་རྒྱལ་སྲས་འཕགས་པ་
རྣམས་དང་ལྷན་ཅིག་ཏུ་ཐེག་པ་ཆེན་པོའི་ཆོས་ཁོ་ན་ལ་རྒྱུན་མི་འཆད་པར་ཉེ་བར་ལོངས་སྤྱོད་པ་སྟེ། མངོན་རྟོགས་རྒྱན་ལས། མཚན་ནི་སུམ་ཅུ་རྩ་གཉིས་དང༌། །དཔེ་བྱད་བརྒྱད་ཅུའི་བདག་ཉིད་འདི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་སོ། །དེ་ལའང་ལྡོག་པས་དབྱེ་ན་འཁོར་དང༌། ཞིང་དང༌། སྐུ་དང༌། མཚན་དང༌། ཆོས་དང༌། མཛད་པ་དང༌། ལྷུན་གྱིས་གྲུབ་པ་དང༌། རང་བཞིན་མེད་པའོ། །དེ་ལ་གང་དང་ལྷན་ཅིག་སྤྱོད་པའི་འཁོར་ནི་ས་བཅུ་ལ་གནས་པའི་བྱང་སེམས་ཤ་སྟག་གོ །གང་དུ་ལོངས་སྤྱོད་པའི་ཞིང་ནི་འོག་མིན་སྟུག་པོ་བཀོད་པའོ། །གང་གིས་ལོངས་སྤྱོད་པའི་སྐུ་ནི་རྣམ་པར་སྣང་མཛད་ལ་སོགས་པའོ། །གང་དང་ལྡན་པའི་མཚན་ནི་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུའོ། །གང་ལ་རྫོགས་པར་ལོངས་སྤྱོད་པའི་ཆོས་ནི་ཐེག་པ་ཆེན་པོ་འབའ་ཞིག་གོ །གང་མཛད་པའི་ཕྲིན་ལས་ནི་རྒྱལ་བའི་སྲས་པོ་ལུང་སྟོན་པ་སོགས་སོ། །ལྷུན་གྱིས་གྲུབ་པ་ནི་མཛད་པ་སོགས་དེ་ཐམས་ཅད་ཡིད་བཞིན་གྱི་ནོར་བུ་ལྟར་འབད་མེད་ལྷུན་གྲུབ་ཏུ་འབྱུང་བའོ། །རང་བཞིན་མེད་པ་ནི་སྐུ་ལ་སོགས་པ་སྣ་ཚོགས་སུ་སྣང་ཡང་འཇའ་ཚོན་ལྟར་ངོས་བཟུང་མེད་པའོ། །ངེས་པ་ལྔར་བཤད་པ་ལྟར་ན། གནས་ངེས་པ་འོག་མིན། ངོ་བོ་ངེས་པ་མཚན་དཔེས་བརྒྱན་པ། དུས་ངེས་པ་འཁོར་བ་མ་སྟོང་བར་དུ་སྟེ་རྟག་ཏུ་གནས་པ། འཁོར་ངེས་པ་ས་བཅུའི་བྱང་ཆུབ་སེམས་དཔའ། ཆོས་ངེས་པ་ཐེག་པ་ཆེན་པོའི་ཆོས་འབའ་ཞིག་གསུང་པ་སྟེ་མཚན་ཉིད་བརྒྱད་དང་ལྡན་པའོ། །གཉིས་པ་ནི། ཆེ་ཆུང་གཉིས་སམ་དངོས་དང་བཏགས་པར་དབྱེ། །གཅིག་དང་ཐ་དད་ཆེ་ཆུང་བཞེད་པ་གསུམ། །ཐ་སྙད་ཙམ་དུ་དབྱེ་ན། སྟུག་པོ་བཀོད་པར་སྣང་བ་ལོངས་སྐུ་
ཆེན་པོ་དང༌། གནས་གཙང་གི་འོག་མིན་དུ་བཞུགས་པ་ཆུང་ངུ་གཉིས་སམ། དངོས་གནས་ཚུལ་དང༌། བཏགས་པ་བ་སྣང་ཚུལ་གཉིས་སུ་དབྱེ་བ་ཡོད་ཅིང༌། སྤྱིར་མཁས་པ་ཁ་ཅིག་དུས་གསུམ་གྱི་སངས་རྒྱས་ཐམས་ཅད་ལ་ལོངས་སྐུ་གཅིག་པ་འབའ་ཞིག་ལས་གཉིས་པ་གཏན་མེད་པར་བཞེད་པ་དང༌། ཁ་ཅིག་དེ་མུ་སྟེགས་ཀྱི་འདོད་པ་དང་མཚུངས་པར་བྱས་ནས་སངས་རྒྱས་རྣམས་ཀྱི་ལོངས་སྐུ་ཐ་དད་ཁོ་ནར་སྨྲ་བ་དང༌། ལོངས་སྐུ་ཆེ་ཆུང་གཉིས་ཡོད་པར་སྨྲ་བ་གསུམ་དུ་མཆིས་པ་ལས་ཕྱོགས་སྔ་ཕྱི་གཉིས་ཀྱི་བཤད་སྲོལ་བཟང་བ་ཡིན་ཏེ། མདོ་སྡེ་རྒྱན་ལས་ཀྱང༌། ཟག་མེད་དབྱིངས་ལ་སངས་རྒྱས་རྣམས། །སྔོན་གྱི་ལུས་རྗེས་འབྲང་ཕྱིར་དང༌། །མཁའ་ལྟར་ལུས་ནི་མེད་པའི་ཕྱིར། །སངས་རྒྱས་གཅིག་མིན་དུ་མ་མིན། །ཞེས་ལུས་རང་མཚན་པ་ཞིག་མེད་པར་བཤད་པས་གདོས་བཅས་ཀྱི་རིགས་འགྲེ་སྦྱོར་མི་དགོས་པས་སོ། །སྐུ་དེའང་མེ་ལོང་གི་གཟུགས་བརྙན་ལྟར་སྣང་ལ་རང་བཞིན་མེད་པའི་ཚུལ་གྱིས་ས་བཅུའི་བྱང་ཆུབ་སེམས་དཔའ་རྣམས་ལ་སྣང་ཞིང་ཆོས་ཀྱི་སྐུའི་རྟེན་དུ་གྱུར་པའོ། །དེ་ནི་ཤེས་པའི་རང་སྣང་ཡིན་པས་སྤྱན་ནས་སྐུ་ལུས་ཀྱི་བར་དུ་སྣང་བ་རྣམས་མིག་གི་སྐྱེ་མཆེད་ནས་ལུས་ཀྱི་སྐྱེ་མཆེད་ཀྱི་བར་མ་ཡིན་ལ། ཐོགས་བཅས་ལ་རྒྱུན་གྱིས་རྟག་པའང་མི་སྲིད་པས་ཐོགས་བཅས་ལས་འདས་པའོ། །ཨིནྡྲ་བྷཱུ་ཏིའི་ཞབས་ཀྱིས་དཔལ་ཡེ་ཤེས་གྲུབ་པ་ལས་ཀྱང་ཡེ་ཤེས་མིན་པའི་སྐུ་འདོད་ན་ལུས་འཇིག་པའི་ཆོས་ཅན་ཡིན་པས་ཡེ་ཤེས་ཀྱང་དེར་ཐལ་བར་གསུངས་ཏེ། དེ་སྐད་དུའང༌། སངས་རྒྱས་རྣམས་ཀྱི་ཡེ་ཤེས་ནི། །སྐུ་དང་ཡན་ལག་ལྡན་ཞེས་ན། །མྱ་ངན་འདས་པ་དེ་ཡང་འཇིག །ལུས་ནི་འཇིག་པའི་ཆོས་ཅན་པས། །ཡེ་ཤེས་ཀྱང་ནི་འཇིག་པར་འགྱུར། །དེ་བས་སངས་
རྒྱས་ཡེ་ཤེས་སྐུ། །འཇིག་པར་རིགས་པ་མ་ཡིན་ནོ། །ཞེས་གསུངས་ཏེ། སངས་རྒྱས་རང་སྣང་དང་བྱང་ཆུབ་སེམས་དཔའི་སྣང་བས་བསྡུས་པ་གཉིས་ལ་འཇོག་གོ །གསུམ་པ་ལ་གཉིས། སྒྲ་དོན་མཚན་ཉིད། དབྱེ་བའོ། །དང་པོ་ནི། སྤྲུལ་སྐུ་འཁོར་བ་ཇི་སྲིད་འགྲོ་བའི་དོན། །སྣ་ཚོགས་སྤྲུལ་པས་དོན་མཛད་རྟེན་དང་རྒྱུ། །ཞིང་དུས་རང་བཞིན་འཇུག་སྨིན་གྲོལ་བྱེད་བརྒྱད། །སྤྲུལ་སྐུའི་སྒྲ་དོན་ནི། ངེས་པར་གཞན་དུ་སྒྱུར་ཏེ་སྤྲུལ་པའི་རང་བཞིན་གྱི་ལུས་ཡིན་པའི་ཕྱིར་ཏེ། སློབ་དཔོན་སྟོབས་བཅུ་དཔལ་བཤེས་ཀྱིས། །སྤྲུལ་པ་ནི་སྤྲུལ་པ་ཉིད་དེ་ས་གྲུབ་པའི་སྐུ་སྟེ་སྤྲུལ་པའི་སྐུའོ། །ཞེས་བཤད་པའི་ཕྱིར་རོ། །མཚན་ཉིད་ནི། འདི་ལའང་ལྡོག་པས་ཕྱེ་ན། རྟེན་དང༌། རྒྱུ་དང༌། ཞིང་དང༌། དུས་དང༌། རང་བཞིན་དང༌། འཇུག་པར་བྱེད་པ་དང༌། སྨིན་པར་བྱེད་པ་དང༌། གྲོལ་བར་བྱེད་པའོ། །དེ་ལ་རྟེན་ནི་ཆོས་ཀྱི་སྐུ་སྟེ་གཡོ་བ་མེད་བཞིན་དུའོ། །རྒྱུ་ནི་འགྲོ་བ་མཐའ་དག་ལ་ཕན་པར་བཞེད་པའི་སྙིང་རྗེ་ཆེན་པོ་ལས་བྱུང་བའོ། །ཞིང་ནི་ཡོངས་སུ་དག་མ་དག་སྣ་ཚོགས་པའོ། །དུས་ནི་འཁོར་བ་ཇི་སྲིད་ཀྱི་བར་དུའོ། །རང་བཞིན་ནི་བཟོ་དང་སྐྱེ་བ་དང་བྱང་ཆུབ་སྟེ་སྤྲུལ་པ་གསུམ་གྱི་གཟུགས་སོ། །འཇུག་པར་བྱེད་པ་ནི་འཇིག་རྟེན་ཐ་མལ་པ་དག་ཅི་རིགས་པར་མྱ་ངན་ལས་འདས་པ་རྣམ་པ་གསུམ་ལ་འདུན་ཞིང་འཇུག་པར་བྱེད་པའོ། །སྨིན་པར་བྱེད་པ་ནི་ལམ་ལ་ཞུགས་པ་རྣམས་ཚོགས་ཡོངས་སུ་སྨིན་པར་བྱེད་པའོ། །གྲོལ་བར་བྱེད་པ་ནི་དགེ་བས་ཡོངས་སུ་སྨིན་པ་དག་སྲིད་པའི་འཆིང་བ་ལས་གྲོལ་བར་བྱེད་པ་སྟེ་མཚན་ཉིད་བརྒྱད་དང་ལྡན་པའོ། །གཉིས་པ་ནི། བཟོ་སྐྱེ་མཆོག་གི་སྤྲུལ་སྐུས་མཛད་པ་སྟོན། །སྤྲུལ་པའི་སྐུ་དེ་དག་ལའང་དབྱེ་ན། བཟོ་སྤྲུལ་སྐུ། སྐྱེ་བ་སྤྲུལ་སྐུ། མཆོག་གི་སྤྲུལ་སྐུ་དང༌།
གསུམ་དུ་འགྱུར་ཞིང༌། དེ་དག་དུས་ལ་བབ་ན་མྱ་ངན་ལས་འདས་པར་ཡང་སྟོན་པས་གདུལ་བྱ་རྣམས་རྣམ་གྲོལ་ལ་སྦྱོར་བར་མཛད་པ་སྟེ། མདོ་སྡེ་རྒྱན་ལས། བཟོ་དང་སྐྱེ་དང་བྱང་ཆུབ་ཆེ། །མྱ་ངན་འདས་པ་རྟག་སྟོན་པ། །སངས་རྒྱས་སྤྲུལ་པའི་སྐུ་འདི་ནི། །རྣམ་པར་གྲོལ་བའི་ཐབས་ཆེན་པོ། །ཞེས་གསུངས་པས་སོ། །དེ་དག་ཀྱང་དྲི་ཟ་གདུལ་བའི་དོན་དུ་རྒྱུད་མང་སྤྲེང་བ་ལ་སོགས་པར་སྟོན་པ་བཟོ་སྤྲུལ་སྐུ་དང༌། རི་བོང་དང་རུ་རུ་ལ་སོགས་པར་སྟོན་པ་སྐྱེ་བ་སྤྲུལ་སྐུ་དང༌། ཐུབ་པ་ལ་སོགས་པར་སྟོན་པ་བྱང་ཆུབ་ཆེན་པོ་མཆོག་གི་སྤྲུལ་པའི་སྐུས་མཛད་པ་བཅུ་གཉིས་ལ་སོགས་པ་སྟོན་པ་སྟེ། སྔ་མ་གཉིས་རྣམ་སྨིན་མ་ཡིན་པའི་སྤྲུལ་པའི་སྐུ་དང༌། ཕྱི་མ་ནི་རྣམ་པར་སྨིན་པའི་སྤྲུལ་པའི་སྐུ་སྟེ། རྣམ་སྨིན་ཡིན་མིན་གྱི་ཁྱད་ཀྱང་རབ་ཏུ་བྱས་པས་འདྲ་བ་མིན་པར་སྨིན་པ་ཡིན་མིན་དུ་བཤད་ཀྱི་རྣམ་སྨིན་ཙམ་གྱིས་ནི་མ་ཡིན་ནོ། །བཞི་པ་ནི། རྒྱུད་བླང་ངོ་བོ་གཙང་བདག་བདེ་དང་རྟག །སྐུ་གསུམ་མཚན་ཉིད་ལྔ་ལྔ་ལྡན་པར་གསུངས། །ཐེག་པ་ཆེན་པོ་རྒྱུད་བླ་མ་ལས། སྐུ་དེ་དག་གི་ངོ་བོ་གཙང་བདག་བདེ་བ་རྟག་པ་དམ་པའི་ཕ་རོལ་ཏུ་སོན་པ་དང༌། སྐུ་གསུམ་ཀའང་མཚན་ཉིད་ལྔ་ལྔ་ལྡན་པར་གསུངས་ཏེ། དེའང་སེམས་ཉིད་རང་བཞིན་རྣམ་དག་དེ་སྔར་བག་ཆགས་ཀྱི་རྟེན་ཡིན་པ་ལས་སངས་རྒྱས་པའི་ཚེ་བག་ཆགས་ཀྱི་རྟེན་མི་བྱེད་པས་དག་པ་གཉིས་ལྡན་ནི་གཙང་བ་དམ་པའི་ཕ་རོལ་ཏུ་ཕྱིན་པ་དང༌། རྣམ་རྟོག་ཡིན་ཕྱིན་ཆད་བག་ཆགས་ཀྱིས་གོས་པའི་རང་བཞིན་ཡིན་པ་ལ་རྣམ་རྟོག་གི་གཞན་དབང་དུ་མ་སོང་བས་བདག་དམ་པ་སྟེ། བདག་དང་བདག་མེད་ཀྱི་སྤྲོས་པའི་རྣམ་རྟོག་ཐམས་ཅད་ཞི་བས་བདག་དམ་པའི་ཕ་རོལ་ཏུ་ཕྱིན་པ་དང༌། སྒྲ་དོན་དུ་སྣང་བའི་རྣམ་རྟོག་ས་བརྒྱད་པ་ནས་འགག་ཀྱང༌། རྟོག་མེད་ཀྱི་སྣང་
བ་ལ་སྣོད་བཅུད་ཀྱི་སྣང་བ་འཆར་བ་དེ་སྡུག་བསྔལ་ཕྲ་ཤོས་ཡིད་ཀྱི་རང་བཞིན་གྱི་ཕུང་པོ་ཡིན་ལ། དེ་དེའི་རྒྱུ་མ་རིག་བག་ཆགས་ཀྱི་ས་དང་བཅས་པ་འགགས་པས་སྡུག་བསྔལ་རྒྱུ་བཅས་ཐམས་ཅད་འགགས་པའི་ཕྱིར་བདེ་བ་དམ་པའི་ཕ་རོལ་ཏུ་ཕྱིན་པ་དང༌། འཁོར་འདས་ཀྱི་འཕེལ་འགྲིབ་མེད་པ་སྲིད་ཞི་མཉམ་ཉིད་ཀྱི་སྒོམ་པ་མཐར་ཐུག་པས་འཁོར་འདས་མཉམ་ཉིད་ཀྱི་རང་བཞིན་བརྙེས་པ་ནི་ནམ་མཁའ་སྲིད་ཀྱི་བར་འགྱུར་བ་ཡི་མི་སྲིད་པས་རྟག་པ་དམ་པའི་ཕ་རོལ་ཏུ་ཕྱིན་པའོ། །ཕར་ཕྱིན་དེ་བཞི་གང་ལ་ཚང་བ་ནི་སངས་རྒྱས་ཀྱི་སྐུ་སྟེ་གནས་ཚུལ་གྱི་སྐུ་གང་ལའང་འདི་ཚང་ངོ༌། །ཆོས་སྐུ་ནི་འདུས་མ་བྱས་པ་དང༌། གཉིས་སུ་དཔྱད་དུ་མེད་པ་དང༌། ཕྱིན་ཅི་མ་ལོག་པ་དང༌། སྒྲིབ་པ་དག་པ་དང༌། རང་བཞིན་གྱིས་འོད་གསལ་བ་སྟེ་ལྔ། ལོངས་སྐུ་གསུང་བརྗོད་པ་དང༌། སྐུ་སྣང་བ་དང༌། མཛད་པ་རྒྱུན་མི་འཆད་པ་དང༌། ལྷུན་གྱིས་གྲུབ་པར་མཛད་པ་དང༌། སྐུ་གསུམ་གྱི་མཛད་པ་དུ་མར་སྟོན་ཀྱང་དེའི་རང་བཞིན་དང་བྲལ་བ་སྟེ་མཚན་ཉིད་ལྔ། སྤྲུལ་སྐུ་ཞི་བའི་ལམ་སྟོན་པ་དང༌། གདུལ་བྱ་སྨིན་པར་བྱེད་པ་དང༌། ལུང་སྟོན་པར་བྱེད་པ་དང༌། ཕྲིན་ལས་སྣ་ཚོགས་པའི་རྒྱུན་གང་འདུལ་བའི་གཟུགས་སྟོན་པ་དང༌། གཞན་གྱི་རྣམ་རིག་ལ་སྣང་བ་སྟེ་མཚན་ཉིད་ལྔ་ལྔ་དང་ལྡན་པའོ། །གཟུགས་སྐུ་གཉིས་སངས་རྒྱས་སུ་བཤད་པ་དང༌། གསེར་འོད་དམ་པ་ནས་མ་ཡིན་པར་བཤད་པ་དང༌། འགའ་ཞིག་ནས་སངས་རྒྱས་མེད་དོ་ཞེས་གསུངས་པ་རྣམས་དྲང་དོན་དང་ངེས་དོན་དང་མཐར་ཐུག་གི་ངེས་དོན་ཡིན་པར་གནད་མཁྱེན་པའི་མཁས་པ་རྣམས་བཞེད་དོ། །གཉིས་པ་སྐུ་གསུམ་གྱི་ཁྱད་ཆོས་བཤད་པ་ལ་གསུམ། མཉམ་པའི་ཁྱད་པར། རྟག་པའི་ཁྱད་པར། སྣང་བའི་ཁྱད་པར་རོ། །དང་པོ་ནི། རྟེན་དང་དགོངས་པ་ཕྲིན་ལས་མཉམ་པ་ཉིད། །སྐུ་གསུམ་
ལ་ཁྱད་པར་གསུམ་ལས། མཉམ་པའི་ཁྱད་པར་ནི་སངས་རྒྱས་ཐམས་ཅད་ཀྱི་ཆོས་ཀྱི་སྐུ་ནི་རྟེན་ཆོས་ཀྱི་དབྱིངས་ཐ་དད་མེད་པས་མཉམ་པའོ། །སངས་རྒྱས་ཐམས་ཅད་ཀྱི་ལོངས་སྤྱོད་རྫོགས་པའི་སྐུ་ནི་དགོངས་པ་ཐ་དད་མེད་པས་མཉམ་པའོ། །སངས་རྒྱས་ཐམས་ཅད་ཀྱི་སྤྲུལ་པའི་སྐུ་ནི་ཕྲིན་ལས་ཐུན་མོང་དུ་གྱུར་པས་མཉམ་པའོ། །དེ་ལྟར་ཡང་མདོ་སྡེ་རྒྱན་ལས། དེ་དག་རྟེན་དང་དགོངས་པ་དང༌། །ཕྲིན་ལས་ཀྱིས་ནི་མཉམ་པ་ཉིད། །ཅེས་གསུངས་སོ། །གཉིས་པ་ནི། རང་བཞིན་ཉམས་པ་མེད་དང་རྒྱུན་གྱིས་རྟག །རྟག་པའི་ཁྱད་པར་ནི་ཆོས་ཀྱི་སྐུ་ནི་དོན་དམ་པར་སྐྱེ་འགག་དང་བྲལ་བའི་བདག་ཉིད་ཡིན་པས་རང་བཞིན་གྱིས་རྟག་པའོ། །ལོངས་སྐུ་ནི་ཆོས་ཀྱི་ལོངས་སྤྱོད་རྒྱུན་ཆད་པ་མེད་པའི་ཕྱིར་ཉམས་པ་མེད་པའི་རྒྱུན་གྱིས་རྟག་པའོ། །སྤྲུལ་སྐུ་ནི་མི་སྣང་བར་གྱུར་ནས་ཀྱང་ཡང་དང་ཡང་དུ་སྟོན་པ་སྟེ་རིགས་འདྲ་རྒྱུན་ཆད་ཀྱང་དུས་ལས་མི་ཡོལ་བར་འབྱུང་བའི་ཕྱིར་བྱ་བ་བྱེད་པའི་རྒྱུན་གྱིས་རྟག་པའོ། །དེ་ལྟར་ཡང༌། དེ་ཉིད་ལས། རང་བཞིན་དང་ནི་རྒྱུན་མི་འཆད། །རྒྱུན་གྱིས་དེ་དག་རྟག་པ་ཉིད། །ཅེས་གསུངས་སོ། །གསུམ་པ་ནི། ཤེས་བྱ་ཉོན་མོངས་ལས་སྒྲིབ་དག་པས་སྣང༌། །སྣང་བའི་ཁྱད་པར་ནི་ཆོས་ཀྱི་དབྱིངས་ལ་ཤེས་བྱའི་སྒྲིབ་པ་དག་པས་ནི་ཆོས་ཀྱི་སྐུ་སྣང་ངོ༌། །ཉོན་མོངས་པའི་སྒྲིབ་པ་དག་པས་ནི་ལོངས་སྐུ་སྣང་ངོ༌། །ལས་ཀྱི་སྒྲིབ་པ་དག་པས་ནི་སྤྲུལ་སྐུ་སྣང་བའོ། །གཞན་ཡང་གཟུགས་སྐུ་གཉིས་ནི་ཆོས་ཀྱི་སྐུའི་བྱིན་རླབས་དང༌། གདུལ་བྱའི་སྣང་བ་དང༌། སྔོན་གྱི་སྨོན་ལམ་ལས་གྲུབ་པའི་སྐུ་སྟེ་དེ་གསུམ་འཛོམ་པ་ལས་བྱུང་བར་ཤེས་པར་བྱའོ། །གཉིས་པ་བརྟེན་པ་ཡེ་ཤེས་བཤད་པ་ལ་ལྔ། རྣམ་པར་དབྱེ་བ། སྒྲ་དོན་ངོ་བོ། །འགྲུབ་བྱེད་ཀྱི་རྒྱུ། གནས་འགྱུར་གྱི་ཚུལ། སྐུ་དང་སྦྱོར་བའི་མཁྱེན་
ཚུལ་དང་བཅས་པའོ། །དང་པོ་ནི། བརྟེན་པ་ཡེ་ཤེས་ཟག་མེད་མཁྱེན་ཚུལ་ལྔ། །སྐུ་དེ་དག་དང་བརྟེན་པའི་ཚུལ་དུ་འབྲེལ་བ་ཡེ་ཤེས་ལ་ཟག་པ་མེད་པའི་མཁྱེན་ཚུལ་གྱིས་དབྱེ་ན་ལྔ་སྟེ། དེ་བཞིན་ཉིད་དག་པ་གཉིས་ལྡན་ནི་ཆོས་དབྱིངས་ཡེ་ཤེས་ཞེས་བྱ་སྟེ་ཡེ་ཤེས་ཐམས་ཅད་ཀྱི་གཞི་རྟེན་ཡིན་ལ། ཆོས་ཐམས་ཅད་མ་ལུས་པར་ཡེ་ཤེས་གཅིག་གིས་མཁྱེན་པ་མེ་ལོང་ལྟ་བུའི་ཡེ་ཤེས་དང༌། ཤེས་བྱ་ཐམས་ཅད་རང་བཞིན་མེད་པར་མཉམ་པ་ཉིད་དུ་མཁྱེན་པ་མཉམ་ཉིད་ཡེ་ཤེས་དང༌། ཇི་སྙེད་པའི་ཆོས་ཐམས་ཅད་མ་འདྲེས་པར་མཁྱེན་པ་སོར་རྟོག་ཡེ་ཤེས་དང༌། གདུལ་བྱ་འདུལ་བའི་བྱ་བ་མཁྱེན་པ་བྱ་གྲུབ་ཡེ་ཤེས་ཏེ་ལྔའོ། །གཉིས་པ་ལ། ཆོས་དབྱིངས། མེ་ལོང༌། མཉམ་ཉིད། སོར་རྟོག་བྱ་གྲུབ་ཀྱི་དོན་བཤད་པའོ། །དང་པོ་ནི། གཉིས་མེད་གསུམ་བྲལ་རྟོག་མེད་ཆོས་དབྱིངས་ཏེ། །དེའི་སྒྲ་དོན་ནི། སྒྲ་སྦྱོར་བ་མ་གཉིས་མ་ལས། དྷརྨ་དྷཱ་ཏུ་བི་ཤུདྡྷ་ཞེས་བྱ་བ་ཆོས་ཀྱི་དབྱིངས་རྣམ་པར་དག་པ་ཡིན་ཏེ། སྟོབས་དང་མི་འཇིགས་པ་ལ་སོགས་པ་འཕགས་པའི་ཆོས་རྣམས་སྐྱེ་ཞིང་འབྱུང་བ་དང་དབྱིངས་སུ་གྱུར་པས་ན་ཆོས་ཀྱི་དབྱིངས་དེ་བཞིན་ཉིད་ལ་གློ་བུར་གྱི་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་སྤྲིན་དང་འདྲ་བ་དྭངས་ཤིང་བྱང་སྟེ། ནམ་མཁའི་དབྱིངས་དག་པ་དང་འདྲ་བས་ན་ཆོས་ཀྱི་དབྱིངས་རྣམ་པར་དག་པ་ཞེས་བྱའོ། །ཞེས་པ་ལྟར་རོ། །ངོ་བོ་ནི་ཐོག་མར་སྐྱེ་བ་དབུས་སུ་གནས་པ་ཐ་མར་འགག་པ་མེད་ཅིང་དབྱིངས་རིག་ཐ་དད་དུ་རྣམ་པར་དབྱེ་བ་མེད་པ། སྒྲོ་སྐུར་གྱི་མཐའ་གཉིས་ཀྱི་ཡུལ་དུ་མེད་ཅིང་སྒྲིབ་པ་གསུམ་དང་བྲལ་བ། རང་བཞིན་གྱིས་ཉེས་པའི་དྲི་མ་བྲལ་ཞིང་རྣམ་པར་རྟོག་པའི་ཡུལ་དུ་མེད་པ། ཆོས་ཀྱི་དབྱིངས་རྣམ་པར་དག་པ་ཆོས་ཐམས་ཅད་ཀྱི་དེ་བཞིན་ཉིད་ཕྱིན་ཅི་མ་ལོག་པའི་རང་བཞིན། འཕགས་པའི་ཆོས་ཐམས་
ཅད་ཉེ་བར་སྐྱེད་པའི་རྒྱུ་དེ་བཞིན་གཤེགས་པ་ཐམས་ཅད་ཀྱི་བདག་ཉིད་དུ་གྱུར་པ་སྟེ། རྒྱུད་བླ་མ་ལས། ཐོག་མ་དབུས་མཐའ་མེད་ཅིང་རྣམ་དབྱེར་མེད། །གཉིས་མེད་གསུམ་བྲལ་དྲི་མེད་རྣམ་རྟོག་མེད། །ཆོས་དབྱིངས་རང་བཞིན་གང་ཡིན་དེ་རྟོགས་པ། །མཉམ་པར་གཞག་པའི་རྣལ་འབྱོར་པ་ཡིས་མཐོང༌། །ཞེས་གསུངས་སོ། །གཉིས་པ་ནི། འཛིན་མེད་ཤེས་བྱ་ཀུན་སྣང་མེ་ལོང་ལྟར། །དེའི་སྒྲ་དོན་ནི། སྒྲ་སྦྱོར་ལས། ཨཱ་དརྴ་ཛྙཱ་ན་ཞེས་བྱ་བ་མེ་ལོང་ལྟ་བུའི་ཡེ་ཤེས་ཡིན་ནོ། །ཆོས་ཀྱི་དབྱིངས་རྣམ་པར་དག་པ་མི་དམིགས་པས་གཟུང་བ་དང་འཛིན་པའི་རྟོག་པ་ཐམས་ཅད་དང་བྲལ་ཏེ། ཀུན་གཞིའི་རྣམ་པར་ཤེས་པ་གནས་གྱུར་པས་མེ་ལོང་ཕྱིས་པའི་ནང་དུ་ཅི་ཡང་སྣང་བ་བཞིན་དུ་ཆོས་ཐམས་ཅད་ཀྱི་གཟུགས་བརྙན་སྣང་བ་ལ་བྱ་སྟེ། ཞེས་པ་ལྟར་རོ། །ངོ་བོ་ནི་ང་ཡིར་འཛིན་པ་མེད་པའི་སྒོ་ནས་ཡུལ་མཐའ་དག་དུས་རྟག་ཏུ་མེ་ལོང་གི་གཟུགས་བརྙན་ལྟར་གསལ་བར་མཁྱེན་པས་ཤེས་བྱ་ཐམས་ཅད་ལ་མ་རྨོངས་ཤིང༌། ཡུལ་གྱི་རྣམ་པ་འཆར་བ་ལ་ལྟོས་པའང་མ་ཡིན་པ་སྟེ། མདོ་སྡེ་རྒྱན་ལས། མེ་ལོང་ཡེ་ཤེས་ང་ཡིར་མེད། །ཡོངས་སུ་མ་ཆད་རྟག་ཏུ་ལྡན། །ཤེས་བྱ་ཀུན་ལ་མ་རྨོངས་ཤིང༌། །རྟག་ཏུ་དེ་ལ་མངོན་ཕྱོགས་མིན། །ཞེས་གསུངས་པ་ལྟར་རོ། །གསུམ་པ་ནི། སྒོམ་པ་དག་པ་སྲིད་ཞི་མཉམ་པ་ཉིད། །དེའི་སྒྲ་དོན་སྔ་མ་ལས། ས་མ་ཏཱ་ཛྙཱ་ན་ཞེས་བྱ་བ་མཉམ་པ་ཉིད་ཀྱི་ཡེ་ཤེས་ཏེ། །ཐོག་མར་ས་དང་པོ་ལ་དེ་ཁོ་ན་ཉིད་ཀྱི་དོན་སྒོམ་པ་ཡོངས་སུ་དག་པ་མངོན་པར་རྟོགས་པའི་ཚེ་བདག་དང་གཞན་དུ་མི་འབྱེད་ཅིང་མཉམ་པ་ཉིད་དུ་རྟོགས་པ། ས་གོང་ནས་གོང་དུ་སྦྱངས་པས། སངས་རྒྱས་ཀྱི་ས་ལ་མི་གནས་པའི་མྱ་ངན་ལས་འདས་པར་གྱུར་པའི་ཚེ་ཉོན་མོངས་པ་ཅན་གྱི་ཡིད་ནས་འཕོས་ཏེ་
ཡེ་ཤེས་སུ་གནས་གྱུར་པ་ལ་མཉམ་པ་ཉིད་ཅེས་བྱའོ། །ཞེས་སོ། །ངོ་བོ་ནི་སློབ་ལམ་དུ་བདག་གཞན་མཉམ་པ་ཉིད་དུ་བསྒོམས་པ་གོམས་ཤིང་དག་པ་ལས་མི་གནས་པའི་མྱ་ངན་ལས་འདས་པ་ཐོབ་པ་ན་སྲིད་ཞི་མཉམ་པ་ཉིད་དུ་མཁྱེན་པ་སྟེ། དེ་ཉིད་ལས། མཉམ་ཉིད་ཡེ་ཤེས་སེམས་ཅན་ལ། །སྒོམ་པ་དག་པ་ལ་འདོད་དེ། །མི་གནས་ཞི་བར་ཞུགས་པ་ནི། །མཉམ་ཉིད་ཡེ་ཤེས་ཡིན་པར་འདོད། །ཅེས་གསུངས་པ་ལྟར་རོ། །བཞི་པ་ནི། ཇི་སྙེད་སོར་རྟོག་ཏིང་འཛིན་གཟུངས་ཀྱི་སྒོ། །དེའི་སྒྲ་དོན་སྔ་མ་ལས། པྲ་ཏྱ་བེཀྵ་ཛྙཱ་ན་ཞེས་བྱ་བ་སོ་སོར་རྟོག་པའི་ཡེ་ཤེས་ཡིན་ཏེ། ཡིད་ཀྱི་རྣམ་པར་ཤེས་པ་གནས་གྱུར་པས། གཟུངས་དང་ཏིང་ངེ་འཛིན་དང་བསམ་གཏན་དང་སྙོམས་པར་འཇུག་པ་ཐམས་ཅད་ཀྱི་གཞིར་གྱུར་པ། ཤེས་བྱ་ཐམས་ཅད་ལ་ཐོགས་པ་མེད་པའི་ཡེ་ཤེས་འཇུག་པས་ཆོས་ཀྱི་ཆར་ཆེན་པོ་འབེབས་ཤིང༌། ཐེ་ཚོམ་སྣ་ཚོགས་གཅོད་པ་དང༌། བཻཌཱུརྻ་ལ་སོགས་པ་རིན་པོ་ཆེའི་མདོག་ཏུ་སྟོན་པའི་རྒྱུར་གྱུར་པ་ནི་སོ་སོར་རྟོག་པའི་ཡེ་ཤེས་ཞེས་བྱའོ། །ཞེས་སོ། །ངོ་བོ་ནི། ཇི་སྙེད་པའི་ཤེས་བྱ་རང་དང་སྤྱིའི་མཚན་ཉིད་མ་འཁྲུལ་བར་སོ་སོར་འབྱེད་ཅིང་རྟོག་པ་ལ་རྩོལ་མེད་དུ་འཇུག་ཅིང་ཏིང་ངེ་འཛིན་དང་གཟུངས་ཀྱི་སྒོ་མཐའ་ཡས་པ་དང་ལྡན་པ་སྟེ། དེ་ཉིད་ལས། སོ་སོར་རྟོག་པའི་ཡེ་ཤེས་ནི། །ཤེས་བྱ་ཀུན་ལ་རྟག་མི་ཐོགས། །ཏིང་ངེ་འཛིན་དང་གཟུངས་རྣམས་ཀྱི། །གཏེར་དང་འདྲ་བ་ཁོ་ན་ཡིན། །ཅེས་གསུངས་པ་ལྟར་རོ། །ལྔ་པ་ནི། དཔག་མེད་ཐབས་མཁས་རྣམ་རོལ་བྱ་བ་གྲུབ། དེའི་སྒྲ་དོན་སྒྲ་མ་ལས། ཀྲྀ་ཏྱ་ནུཥྛཱ་ན་ཞེས་པ་བྱ་བ་གྲུབ་པའི་ཡེ་ཤེས་ཏེ། མིག་ལ་སོགས་པ་དབང་པོ་ལྔའི་རྣམ་པར་ཤེས་པ་གནས་གྱུར་པས་འཇིག་རྟེན་གྱི་ཁམས་ཐམས་ཅད་དུ་ཐབས་སྣ་ཚོགས་པ་དཔག་ཏུ་མེད་པས་སེམས་ཅན་མང་པོའི་
དོན་མཛད་པའི་གཞིར་གྱུར་པ་ཡིན་ཏེ་བྱ་བ་གྲུབ་པའི་ཡེ་ཤེས་ཞེས་བྱའོ། །ཞེས་འབྱུང་བ་ལྟར་རོ། །ངོ་བོ་ནི། འཇིག་རྟེན་གྱི་ཁམས་མཐའ་ཡས་པར་གདུལ་བྱ་རྣམས་ཡོངས་སུ་སྨིན་པར་མཛད་པའི་ཕྱིར་ཐབས་ལ་མཁས་པའི་རྣམ་པར་རོལ་པ་སྣ་ཚོགས་པས་སེམས་ཅན་གྱི་དོན་སྒྲུབ་པར་མཁྱེན་པ་སྟེ། དེ་ཉིད་ལས། བྱ་བ་གྲུབ་པའི་ཡེ་ཤེས་ནི། །ཞིང་ཁམས་ཀུན་ཏུ་སྣ་ཚོགས་ཤིང༌། །དཔག་མེད་བསམ་ཡས་སྤྲུལ་པ་ཡིས། །སེམས་ཅན་ཀུན་དོན་སྒྲུབ་པའོ། །ཞེས་གསུངས་པ་ལྟར་རོ། །གསུམ་པ་སྒྲུབ་བྱེད་ཀྱི་རྒྱུ་ནི། ཐོས་སོགས་སྤངས་པ་ཆོས་འཛིན་མཉམ་ཉིད་བསྒོམས། །ཆོས་སྟོན་དོན་བསྒྲུབས་པ་ལས་དེ་དག་འབྱུང༌། །ཐོས་པའི་བག་ཆགས་སྨིན་པ་སོགས་སྤོང་བ་རྒྱ་ཆེན་པོའི་རྣམ་པ་ཐམས་ཅད་པས་ཆོས་དབྱིངས་ཡེ་ཤེས་འགྲུབ་སྟེ། ཐེག་བསྡུས་ལས། ཐོས་པའི་བག་ཆགས་ཆུང་ངུ་དང་འབྲིང་དང་ཆེན་པོ་རྣམས་ནི་ཆོས་ཀྱི་སྐུའི་ས་བོན་དུ་ལྟ་སྟེ། ཞེས་དང༌། མདོ་སྡེ་རྒྱན་ལས། གང་ལ་ཉོན་མོངས་ཤེས་བྱའི་སྒྲིབ་པའི་ས་བོན་དུས་རིང་རྟག་ལྡན་པ། །སྤང་བ་ཤིན་ཏུ་རྒྱ་ཆེན་རྣམ་པ་ཀུན་གྱིས་རབ་ཏུ་བཅོམ་གྱུར་ཅིང༌། །གནས་གྱུར་ཆོས་དཀར་ཡོན་ཏན་ལྡན་པ་ཐོབ་པས་རྫོགས་པའི་སངས་རྒྱས་ཉིད། །དེ་ནི་མི་རྟོག་རབ་དག་ཤིན་ཏུ་ཡུལ་ཅན་ཡེ་ཤེས་ལམ་གྱིས་འཐོབ། །ཅེས་གསུངས་པ་ལྟར་རོ། །དེ་བཞིན་དུ་དམ་པའི་ཆོས་མང་དུ་ཐོས་ཤིང་འཛིན་པ་ལས་མེ་ལོང་ལྟ་བུའི་ཡེ་ཤེས་དང༌། བདག་གཞན་མཉམ་པ་ཉིད་དུ་བསྒོམས་པ་ལས་མཉམ་པ་ཉིད་ཀྱི་ཡེ་ཤེས་དང༌། ཡང་དག་པའི་ཆོས་གསལ་བར་བསྟན་པ་ལས་སོ་སོར་རྟོག་པའི་ཡེ་ཤེས་དང༌། གཞན་གྱི་དོན་བསྒྲུབས་པ་ལས་བྱ་བ་གྲུབ་པའི་ཡེ་ཤེས་རྣམས་འབྱུང་སྟེ། མདོ་སྡེ་རྒྱན་ལས། འཛིན་པའི་ཕྱིར་དང་སེམས་མཉམ་ཕྱིར། །ཡང་དག་ཆོས་རབ་སྟོན་ཕྱིར་དང༌།
བྱ་བ་གྲུབ་པ་ཉིད་ཀྱི་ཕྱིར། །ཡེ་ཤེས་བཞི་པོ་ཡང་དག་འབྱུང༌། །ཞེས་གསུངས་པ་ལྟར་རོ། །བཞི་པ་ནི། ཀུན་གཞིའི་སྟོང་གསལ་ཉོན་ཡིད་ཡིད་ཤེས་དང༌། །སྒོ་ལྔ་གནས་འགྱུར་ཟག་མེད་ངོ་བོ་ཉིད། །ཀུན་གཞིའི་རྣམ་ཤེས་སྟོང་ཉིད་ཀྱི་ཆ་གནས་གྱུར་པ་ཆོས་དབྱིངས་ཡེ་ཤེས་དང༌། གསལ་བའི་ཆ་གནས་གྱུར་པ་མེ་ལོང་ལྟ་བུའི་ཡེ་ཤེས་དང༌། ཉོན་མོངས་ཅན་ཡིད་གནས་གྱུར་པ་མཉམ་པ་ཉིད་ཀྱི་ཡེ་ཤེས་དང༌། ཡིད་ཀྱི་རྣམ་ཤེས་གནས་གྱུར་པ་སོ་སོར་རྟོག་པའི་ཡེ་ཤེས་དང༌། སྒོ་ལྔའི་རྣམ་ཤེས་གནས་གྱུར་པ་བྱ་བ་གྲུབ་པའི་ཡེ་ཤེས་ཞེས་བྱ་སྟེ། སློབ་དཔོན་ཙནྡྲ་གོ་མིས། གང་ཡང་ཀུན་གཞིའི་རྣམ་པར་ཤེས། །མེ་ལོང་ཡེ་ཤེས་ཉིད་གྱུར་པ། །དེ་ཡང་ཆོས་ཀྱི་དབྱིངས་ཀྱི་ནི། །ངོ་བོ་ཉིད་དུ་འགའ་ཞིག་འདོད། །ཉོན་མོངས་ཅན་ཡིད་གནས་གྱུར་པ། །མཉམ་ཉིད་ཡེ་ཤེས་བརྗོད་པར་བྱ། །སོ་སོར་རྟོག་པའི་ཡེ་ཤེས་ནི། །ཡིད་ཀྱི་རྣམ་ཤེས་ཉིད་དེའོ། །དབང་པོ་ལྔ་ཡི་རྣམ་ཤེས་གང༌། །དེ་ནི་དོན་ཀུན་ཡོངས་འཛིན་ཕྱིར། །སེམས་ཅན་ཀུན་གྱི་དོན་དུ་ནི། །བྱ་བ་གྲུབ་པ་ཙམ་ཉིད་འཐོབ། །ཅེས་གསུངས་པ་ལྟར་རོ། །དེ་ལ་གནས་གྱུར་པའི་དོན་ནི། སྲིད་པའི་ས་བོན་རྣམ་ཤེས་ཏེ། །ཞེས་པ་ལྟར་རམ། རྣམ་པར་ཤེས་པའི་ཁམས་ཀྱི་མཚན་ཉིད། ཟག་དང་བཅས་པའི་རྣམ་ཤེས་ནི། །རྣམ་ཤེས་ཁམས་ཡིན་སྐྱེ་བའི་རྟེན། །ཞེས་གསུངས་པ་དེ་བཏང་ནས་ཤེས་པ་དེའི་རིགས་རྒྱུན་ཟག་མེད་ཡེ་ཤེས་ཀྱི་ངོ་བོ་ཉིད་དུ་འཕོས་པར་གྱུར་པ་གསེར་འགྱུར་ལས་ལྕགས་གསེར་དུ་འགྱུར་བ་ལྟ་བུ་ཡིན་ནོ། །ལྔ་པ་ནི། གཉིས་རེ་སྐུ་གཉིས་བྱ་གྲུབ་སྤྲུལ་སྐུས་བསྡུས། །བློ་ལས་འདས་ཕྱིར་ཡོད་མེད་སྤྲོས་ལས་གྲོལ། །ཆོས་ཉིད་སྣང་མེད་རྟེན་འབྲེལ་སྣང་ཚུལ་ཙམ། །མཁྱེན་པའི་ཚུལ་ཡང་བསམ་གྱིས་མི་ཁྱབ་བོ། །ཡེ་ཤེས་ལྔ་ལས་
ཆོས་དབྱིངས་མེ་ལོང་གཉིས་ཆོས་སྐུ། མཉམ་ཉིད་སོར་རྟོག་གཉིས་ལོངས་སྐུ། བྱ་གྲུབ་སྤྲུལ་སྐུ་སྟེ་སྐུ་གསུམ་ཡེ་ཤེས་ལྔས་བསྡུས་པ་སངས་རྒྱས་ཀྱི་སའི་མདོ་ལས་གསུངས་སོ། །སངས་རྒྱས་ཀྱི་ས་ན་ཡེ་ཤེས་ཡོད་མེད་དང༌། ཡེ་ཤེས་ཀྱིས་མཁྱེན་ཚུལ་ལ་རྒྱ་བོད་ཕལ་ཆེར་རྟོག་པས་བརྟགས་པའི་སྨྲ་བ་ཇི་སྙེད་པ་བྱུང་ཡང༌། དོན་དམ་པའི་དབང་དུ་བྱས་ན་སངས་རྒྱས་ཀྱི་ཡེ་ཤེས་དེ་ཉིད་བློའི་སྤྱོད་ཡུལ་ལས་འདས་པའི་ཕྱིར་ཡོད་མེད་ཡིན་མིན་སོགས་སྤྲོས་པའི་མཐའ་ཐམས་ཅད་ལས་གྲོལ་བ་སྟེ། རབ་ཀྱི་རྩལ་གྱིས་རྣམ་པར་གནོན་པའི་མདོ་ལས་ཀྱང་ཡེ་ཤེས་ཡོད་མེད་གཉིས་ཀ་ལས་གྲོལ་བར་གསུངས་སོ། །ཡེ་ཤེས་དེས་ཤེས་བྱ་མཁྱེན་ཚུལ་ནི། ཆོས་ཉིད་དོན་དམ་པ་སྣང་བ་མེད་པའི་ཚུལ་གྱིས་མཁྱེན་ལ། བརྟགས་པའི་དོན་གྱི་བདེན་འགྱུར་བ། །བརྟེན་ནས་སྐྱེས་པ་ཐམས་ཅད་ནི། །ཐམས་ཅད་མཁྱེན་པས་མངོན་སུམ་གཟིགས། །ཞེས་དབུ་མ་བདེན་གཉིས་ལས་གསུངས་པ་ལྟར། གྲུབ་མཐའ་སྨྲ་བ་རྣམས་ཀྱིས་རྟོག་པས་བརྟགས་པ་མ་ཡིན་པའི་ཀུན་རྫོབ་རྒྱུ་འབྲས་རྟེན་འབྲེལ་སྣང་ཙམ་ནི་སྣང་བའི་ཚུལ་གྱིས་མཁྱེན་པ་དང༌། རང་རང་གི་སྒྲོ་བཏགས་པའི་ཆ་ཡང་རང་རང་གི་བློ་ལ་སྣང་བར་མཁྱེན་ཏེ་གཞན་སེམས་ཤེས་པའི་མངོན་ཤེས་ཀྱིས་རྨི་ལམ་བྱུང་བའི་མིའི་སྣང་ངོ་ན་རྨི་ལམ་བྱུང་བར་ཤེས་པ་བཞིན་ནོ། །དེས་ན་ཤེས་བྱ་ཇི་ལྟར་མཁྱེན་པའི་ཚུལ་ཡང་རྟོག་གེའི་སྤྱོད་ཡུལ་ལས་འདས་པའི་ཕྱིར་འཇིག་རྟེན་ཕལ་པས་བསམ་གྱིས་མི་ཁྱབ་སྟེ། ལང་གཤེགས་ལས། སོ་སོ་རང་རིག་ཡེ་ཤེས་ནི། །རྟོག་གེ་རྣམས་ཀྱི་སྤྱོད་ཡུལ་མིན། །ཞེས་དང༌། རྣམ་འགྲེལ་ལས། གཟུགས་སོགས་དང་ནི་སེམས་དེ་ལྟར། །གཟུང་བའི་མཚན་ཉིད་བསམ་པ་འདི། །མ་དག་བློ་ཅན་ལ་ཡིན་གྱི། །རྣལ་འབྱོར་རྟོགས་པ་
བསམ་མི་ཁྱབ། །ཅེས་གསུངས་པ་ལྟར་རོ། །ཀུན་རྫོབ་ཀྱི་དབང་དུ་བྱས་པ་དེའི་ཚེ་སེམས་དང་སེམས་ལས་བྱུང་བ་ལ་ཡེ་ཤེས་སུ་འདོགས་ན་ནི་དེ་འདྲ་བའི་ཡེ་ཤེས་མེད་དེ་འཁྲུལ་པ་ཐམས་ཅད་ཟད་པའི་ཕྱིར་རོ། །ཤེས་བྱ་མ་ལུས་པ་མཁྱེན་པ་ལ་ལྟོས་ནས་ནི་ཡོད་དེ་གནས་གྱུར་གྱི་སྐུ་བརྙེས་པའི་ཕྱིར་རོ། །བཞི་པ་བྲལ་སྨིན་གྱི་ཡོན་ཏན་བཤད་པ་ལ་གཉིས། མདོར་བསྟན། རྒྱས་བཤད་དོ། །དང་པོ་ནི། ཡོན་ཏན་མཐའ་ཡས་བསྡུ་ན་བྲལ་སྨིན་གཉིས། །རྫོགས་པའི་སངས་རྒྱས་ཀྱི་ཡོན་ཏན་མཐའ་ཡས་ཤིང་ཚད་བཟུང་མེད་པ་ཐམས་ཅད་ཀྱང་མདོར་བསྡུ་ན། རང་དོན་མཐར་ཕྱིན་པ་དོན་དམ་ཆོས་ཀྱི་སྐུ་ལ་གདོད་མ་ནས་དབྱེར་མེད་དུ་ཡོད་པའི་དྲི་མ་དང་བྲལ་བ་ཙམ་གྱི་འབྲས་བུས་ཕྱེ་བའི་ཡོན་ཏན་སུམ་ཅུ་རྩ་གཉིས་དང༌། གཞན་དོན་མཐར་ཕྱིན་པ་ཀུན་རྫོབ་གཟུགས་ཀྱི་སྐུ་ལ་ཡོད་པ་རིམ་གྱིས་བསྐྱེད་པ་ལས་གྲུབ་པ་རྣམ་པར་སྨིན་པའི་ཡོན་ཏན་སུམ་ཅུ་རྩ་གཉིས་ཞེས་བྱ་བ་སྡེ་ཚན་གཉིས་སུ་འདུ་བ་ཡིན་ཏེ། རྒྱུད་བླ་མ་ལས། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པ་ཀུན་རྫོབ་སྐུ་ཉིད་དེ། །བྲལ་དང་རྣམ་པར་སྨིན་པ་ལས་བྱུང་བའི། །ཡོན་ཏན་བྱེ་བ་དྲུག་ཅུ་བཞི་འདི་དག །ཅེས་སོགས་གསུངས་སོ། །གཉིས་པ་ལ་གཉིས། བྲལ་བའི་ཡོན་ཏན། རྣམ་སྨིན་ཡོན་ཏན་ནོ། །དེའི་དང་པོ་ལ་རྒྱུད་བླའི་དགོངས་པས་སུམ་ཅུ་རྩ་གཉིས་དང༌། མངོན་རྒྱན་གྱི་དགོངས་པས་ཟག་མེད་ཉེར་གཅིག་གོ །དང་པོ་ལའང་གཉིས། མདོར་བསྟན་གྱིས་མཚམས་སྦྱར། དེ་དོན་རྒྱས་པར་བཀྲོལ་བའོ། །དང་པོ་ནི། དོན་དམ་བྲལ་བའི་ཡོན་ཏན་སུམ་ཅུ་གཉིས། །ཞེས་སོ། །གཉིས་པ་ལ་གསུམ། སྟོབས་བཅུ། མི་འཇིགས་པ་བཞི། མ་འདྲེས་པ་བཅོ་བརྒྱད་དོ། །དང་པོ་ནི། གནས་དང་རྣམ་སྨིན་དབང་ཁམས་མོས་ཀུན་འགྲོ། །ཀུན་
བྱང་རྗེས་དྲན་སྐྱེ་འཆི་ཟག་པ་ཟད། །མཁྱེན་པའི་སྟོབས་བཅུ་སྒྲིབ་འཇོམས་རྡོ་རྗེ་བཞིན། །དེ་བཞིན་གཤེགས་པའི་ཡེ་ཤེས་ཀྱི་སྟོབས་གཅིག་ཉིད་མཁྱེན་ཡུལ་གྱི་སྒོ་ནས་དབྱེ་བ་ས་བཅུ་སྟེ། དེའང་སྔོན་གྱི་སེམས་བསྐྱེད་དང་སྡོམ་པའི་དམ་བཅའ་བརྟན་པས་དགེ་བའི་རྣམ་སྨིན་ཡིད་དུ་འོང་བ་ཐོབ་པ་ལྟ་བུའི་གནས་དང་རྣམ་སྨིན་ཡིད་དུ་མི་འོང་བ་ཐོབ་པ་ལྟ་བུའི་གནས་མིན་མཁྱེན་པའི་སྟོབས། དེ་བཞིན་དུ་ལས་འབྲས་བསྟན་པས་རང་རང་གིས་བྱས་པའི་ལས་འབྲས་རང་རང་གིས་མྱོང་བའི་ལས་རྣམས་ཀྱི་རྣམ་སྨིན་མཁྱེན་པ་དང༌། དབང་པོ་དང་མཐུན་པར་ཆོས་བསྟན་པས་དད་པ་ལ་སོགས་པའི་དབང་པོ་མཆོག་དམན་མཁྱེན་པ་དང༌། ཁམས་རྣམས་དང་མཐུན་པར་ཞུགས་པས་ཐེག་པ་གསུམ་གྱི་རིགས་ཐ་དད་པ་སོགས་ཁམས་སྣ་ཚོགས་མཁྱེན་པ་དང༌། མོས་པ་དང་མཐུན་པར་ཞུགས་པས་ཟག་བཅས་དང་ཟག་མེད་ལ་མོས་པ་སོགས་ཀྱི་མོས་པ་སྣ་ཚོགས་མཁྱེན་པ་དང༌། ཐེག་པ་ཐམས་ཅད་ལ་གོམས་པ་ལས་འཁོར་འདས་ཀུན་ཏུ་འགྲོ་བའི་ལམ་མཁྱེན་པ་དང༌། ཏིང་ངེ་འཛིན་ལྷུར་བླངས་པས་བསམ་གཏན་དང་རྣམ་ཐར་སོགས་ཀུན་ནས་ཉོན་མོངས་པ་དང་རྣམ་པར་བྱང་བའི་ཚུལ་མཁྱེན་པ་དང༌། དགེ་བ་ཆུད་མ་གསན་པས་སྔོན་གྱི་གནས་རྗེས་སུ་དྲན་པ་དང༌། སེམས་ཅན་ལ་ལྷག་པའི་བསམ་པ་སོགས་ལས་ལྷའི་མིག་གིས་འཆི་འཕོ་དང་སྐྱེ་བ་མཁྱེན་པ་དང༌། ཟག་པ་ཟད་པའི་དོན་དུ་ཆོས་སྟོན་པས་ཞི་བ་ཟག་ཟད་མཁྱེན་པའི་སྟོབས་གྲུབ་པ་སྟེ། དེ་ལྟར་སྟོབས་བཅུ་པོས་མ་རིག་པ་ལ་སོགས་པའི་སྒྲིབ་པ་རྣམས་འཇོམས་ཤིང་སླར་སྒྲིབ་པས་མི་ཕྱེད་པའི་ཕྱིར་རྡོ་རྗེ་བཞིན་ནོ། །གཉིས་པ་ནི། བྱང་ཆུབ་ཟག་ཟད་ལུང་དང་ངེས་འབྱུང་ལམ། །དོན་གཉིས་སྟོན་ལ་མི་འཇིགས་སེང་གེ་འདྲ། །དེའང་ཆོས་ཐམས་ཅད་མངོན་པར་བྱང་ཆུབ་པ་ལ་མི་
འཇིགས་པ་ནི། ཆོས་ཐམས་ཅད་མཁྱེན་ཅིང་ཐུགས་སུ་ཆུད་པ་ཡིན་པས་དེ་ལ་འཇིག་རྟེན་ན་མཐུ་ཆེ་བ་སུས་ཀྱང་དེ་ལྟར་མ་ཡིན་ཞེས་རྒོལ་བའི་གནས་མེད་པ་སྟེ། འདི་ནི་རྟོགས་པ་ཕུན་སུམ་ཚོགས་པའོ། །ཟག་པ་ཟད་པ་ལ་མི་འཇིགས་པ་ནི། འདོད་ཆགས་ལ་སོགས་པ་ཟག་པ་ཐམས་ཅད་ཟད་པ་ཡིན་པའི་ཕྱིར། དེ་ལྟར་ཞལ་གྱིས་བཞེས་པ་རྣམས་ལ་རྒོལ་བའི་གནས་མེད་པ་སྟེ་སྤངས་པ་ཕུན་སུམ་ཚོགས་པའོ། །བར་དུ་གཅོད་པའི་ཆོས་ལུང་སྟོན་པ་ལ་མི་འཇིགས་པ་ནི། འདོད་ཡོན་དང་ཐར་པ་ལ་ཆགས་སོགས་བར་དུ་གཅོད་པ་མངོན་སུམ་དུ་གཟིགས་པས་དེ་ལྟར་སྟོན་པ་ལ་རྒོལ་བའི་གནས་མེད་པའོ། །ངེས་པར་འབྱུང་བའི་ལམ་སྟོན་པ་ལ་མི་འཇིགས་པ་ནི། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱིས་རྣམ་པར་གྲོལ་བ་ཐོབ་ཅིང་གཞན་གྱིས་ནམ་ཡང་མ་ཡིན་པར་མངོན་སུམ་དུ་གཟིགས་པའི་ཕྱིར་དེ་ལྟར་སྟོན་པ་ལ་སུས་ཀྱང་རྒོལ་བའི་གནས་མེད་པའོ། །དེའང་དང་པོ་གཉིས་རང་དོན་དང་ཕྱི་མ་གཉིས་གཞན་དོན་ཕུན་སུམ་ཚོགས་པ་སྟེ། དེ་བཞིས་འཁོར་གྱི་ནང་དུ་ཆོས་སྟོན་པ་ལ་འཇིགས་པ་དང་བག་ཚ་བ་མེད་པ་སེང་གེ་དང་འདྲ་བའོ། །གསུམ་པ་ནི། སྤྱོད་དང་རྟོགས་པས་བསྡུས་དུག་མཛད་མཁྱེན་གསུམ། །གཞན་དང་མ་འདྲེས་བཅོ་བརྒྱད་མཁའ་དང་མཚུངས། །སངས་རྒྱས་ཁོ་ནའི་ཁྱད་ཆོས་སྤྱོད་པས་བསྡུས་པ་དྲུག་རྟོགས་པས་བསྡུས་པ་དྲུག་མཛད་པས་བསྡུས་པ་གསུམ། མཁྱེན་པས་བསྡུས་པ་གསུམ། ཉན་རང་ལ་སོགས་པ་གཞན་དང་མ་འདྲེས་པའི་ཆོས་བཅོ་བརྒྱད་དེ། གཞན་ལ་མངོན་དུ་གྱུར་པའི་གཟུགས་ཅན་མེད་པའི་འདུས་མ་བྱས་ཀྱི་ཁམས་ནམ་མཁའ་འབྱུང་བ་བཞི་དང་མ་འདྲེས་པ་དང་མཚུངས་སོ། །དེའང་དང་པོ་སྤྱོད་པས་བསྡུས་པ་ནི་དགྲ་བཅོམ་པ་རྣམས་ལ་གླང་པོ་ཆེ་གཏུམ་པོ་དང་ལྷན་ཅིག་འགྲོ་བ་སོགས་ཀྱི་འཁྲུལ་པ་དང༌། གད་མོ་དང་
འཕྱ་བ་སོགས་ཀྱི་ཅ་ཅོ་དང༌། དྲན་པ་ཐོབ་ཟིན་ཉམས་པ་དང༌། རྗེས་ཐོབ་མཉམ་པར་མ་གཞག་པ་དང༌། སྲིད་ཞིའི་རང་བཞིན་ལ་ཐ་དད་པའི་འདུ་ཤེས་དང༌། གདུལ་བྱ་མ་བརྟགས་པར་བཏང་སྙོམས་སུ་འཇོག་པ་རྣམས་ཡོད་ཀྱང༌། དེ་བཞིན་གཤེགས་པའི་སྐུའི་སྤྱོད་པ་ལ་སྦྲུལ་རྡོག་པས་རྫི་བ་སོགས་ཀྱི་འཁྲུལ་པ་མེད་པ་དང༌། གསུང་གི་སྤྱོད་པ་དོན་དུ་མི་འགྱུར་བའི་ཚིག་སྨྲ་བ་སོགས་ཀྱི་ཅ་ཅོ་མི་མངའ་བ་དང༌། ཐུགས་ཀྱི་སྤྱོད་པ་ལ་ཉོན་མོངས་པ་མེད་པར་ཡུན་རིང་པོ་ནས་མཛད་པ་དང་གསུངས་པ་རྗེས་སུ་དྲན་པས་དྲན་པ་ཉམས་པ་མི་མངའ་བ་དང༌། མཉམ་རྗེས་ཐམས་ཅད་ལ་མཁྱེན་བཞིན་དུ་འཇུག་པས་རྟག་ཏུ་མཉམ་པར་མ་གཞག་པ་མི་མངའ་བ་དང༌། སྲིད་ཞི་མཉམ་ཉིད་ཀྱི་རྟོགས་པ་མཐར་ཕྱིན་པས་འཁོར་འདས་ཐ་དད་ཀྱི་འདུ་ཤེས་མི་མངའ་བ་དང༌། གདུལ་བྱ་བརྟགས་ནས་དོན་དུ་མི་འགྱུར་ན་ཡལ་བར་འདོར་བ་སྲིད་ཀྱི་མ་བརྟགས་པར་བཏང་སྙོམས་སུ་འཇོག་པ་མི་མངའ་བ་སྟེ་སྤྱོད་པ་མ་འདྲེས་པ་དྲུག་གོ །གཉིས་པ་རྟོགས་པས་བསྡུས་པ་དྲུག་ནི། དགྲ་བཅོམ་པ་རྣམས་ལ་ཤེས་སྒྲིབ་ལྷག་མ་ཡོད་པས་འདུན་པ་ལ་སོགས་དྲུག་མ་ཐོབ་པའི་ཉམས་པ་ཡོད་ཀྱང༌། དེ་བཞིན་གཤེགས་པས་ཤེས་སྒྲིབ་མཐའ་དག་སྤངས་པའི་ཕྱིར། བརྩོན་འགྲུས་དང༌། དྲན་པ་དང༌། ཤེས་རབ་ཀྱི་དབང་པོ་གསུམ་དང༌། དེ་དག་གི་གནས་འདུན་པ་དང༌། འབྲས་བུ་རྣམ་གྲོལ་དང༌། རྣམ་གྲོལ་གྱི་ཡེ་ཤེས་གཟིགས་པ་རྣམས་མ་ཐོབ་པའི་ཡོངས་སུ་ཉམས་པ་མེད་པ་སྟེ་རྟོགས་པ་མ་འདྲེས་པ་དྲུག་གོ །འདི་དག་གི་འདྲེན་ལུགས་ལ་མདོ་ཐ་དད་ཀྱི་དགོངས་པས་ཤེར་ཕྱོགས་སུ་ཏིང་འཛིན་དང་རྣམ་གྲོལ་གཉིས་སྨོས། གཞན་དག་ཏུ་ཏིང་འཛིན་དང་རྣམ་གྲོལ་གཟིགས་པ་སྨོས་ལ། རྒྱུད་བླར་བུམ་རིན་ཆེན་གྱི་མདོ་ལ་བརྟེན་ནས་རྣམ་གྲོལ་དང་རྣམ་
གྲོལ་གཟིགས་པ་གཉིས་སྨོས། ཏིང་འཛིན་མ་བགྲངས་པ་ནི་མཉམ་པར་མ་གཞག་པའི་ཐུགས་མི་མངའ་བར་འདུས་པར་དགོངས་སོ། །གསུམ་པ་མཛད་པས་བསྡུས་པ་གསུམ་ནི། རྒྱུད་བླ་ལས། ལས་རྣམས་ཡེ་ཤེས་སྔོན་འགྲོ་དང༌། །ཞེས་གསུངས་པ་ལྟར་ཏེ། དེའང་དགྲ་བཅོམ་པའི་སྒོ་གསུམ་གྱི་ལས་ལ་རེས་དགེ་བ་རེས་ལུང་མ་བསྟན་ཡོད་ཀྱང༌། དེ་བཞིན་གཤེགས་པའི་སྐུ་དང་གསུང་དང་ཐུགས་ཀྱི་མཛད་པ་ཕྲིན་ལས་ཐམས་ཅད་ཡེ་ཤེས་ཀྱིས་ཀུན་ནས་བསླང་བས་རྒྱུའི་ཀུན་སློང་ཡེ་ཤེས་སྔོན་་འགྲོ་ཞིང༌། ཡེ་ཤེས་དང་ལྷན་ཅིག་རྒྱུ་བས་དུས་ཀྱི་ཀུན་སློང་ཡེ་ཤེས་ཀྱི་རྗེས་སུ་འཇུག་པའི་ཕྱིར་དགེ་བ་ཁོ་ན་སྟེ་ཕྲིན་ལས་མ་འདྲེས་པ་གསུམ་མོ། །བཞི་པ་མཁྱེན་པས་བསྡུས་པ་གསུམ་ནི། དགྲ་བཅོམ་པའི་ཡེ་ཤེས་ནི་རྩོལ་བ་ཙམ་གྱིས་མི་རྟོགས་པས་ཆགས་པ་དང་བཅས་ཤིང་ཐམས་ཅད་མི་རྟོགས་པས་ཐོགས་པ་དང་བཅས་པ་ཡིན་ལ། དེ་བཞིན་གཤེགས་པས་རྩོལ་བ་ཙམ་གྱིས་ཤེས་བྱ་ཐམས་ཅད་རྟོགས་པས་འདས་པ་དང༌། མ་འོངས་པ་དང༌། ད་ལྟར་བྱུང་བའི་དངོས་པོ་རྣམས་ལ་མ་ཆགས་མ་ཐོགས་ཤིང་སྨོན་པ་མེད་པའི་ཡེ་ཤེས་ཀྱི་གཟིགས་པ་སྒྲིབ་པ་མེད་པ་ཐོབ་པ་སྟེ་ཡེ་ཤེས་མ་འདྲེས་པའོ། །མ་འདྲེས་པ་བཅོ་བརྒྱད་ལ་ཅ་ཅོ་མི་མངའ་བ་སོགས་བགྲང་བ་ནི་གྲུབ་མཐའ་བཞི་ལས་མདོ་སྡེ་པ་ཡན་གྱི་ལུགས་ཏེ། མཛོད་ལས། སངས་རྒྱས་ཆོས་ནི་མ་འདྲེས་པ། །སྟོབས་ལ་སོགས་པ་བཅོ་བརྒྱད་དོ། །ཞེས་སྟོབས་བཅུ། མི་འཇིགས་པ་བཞི། མ་འདྲེས་པའི་དྲན་པ་ཉེ་བར་གཞག་པ་གསུམ། ཐུགས་རྗེ་ཆེན་པོ་སྟེ་བཅོ་བརྒྱད་འདྲེན་པ་བྱེ་བྲག་སྨྲ་བའི་ལུགས་སུ་འགྲེལ་བས་བཤད་དོ། །གཉིས་པ་ཟག་མེད་ཀྱི་སྡེ་ཚན་བཤད་པ་ནི། རྒྱས་པར་ཟག་མེད་སྡེ་ཚན་ཉེར་གཅིག་སྟེ། །བྱང་ཆུབ་ཕྱོགས་མཐུན་ཚད་མེད་རྣམ་པར་ཐར། །
སྙོམས་འཇུག་ཟད་པར་ཟིལ་གནོན་ཉོན་མོངས་མེད། །སྨོན་མཁྱེན་མངོན་ཤེས་སོ་ས་ཡང་དག་རིག །ཐམས་ཅད་ངག་བཞི་དབང་སྟོབས་མི་འཇིགས་བཞི། །སྲུང་མེད་དྲན་ཉེ་བསྙེལ་མེད་བག་ཆགས་བཅོམ། །ཐུགས་རྗེ་ཆེ་དང་མ་འདྲེས་ཀུན་མཁྱེན་ནོ། །དོན་དམ་ཆོས་སྐུའི་ཡོན་ཏན་རྒྱས་པར་མངོན་རྟོགས་རྒྱན་འབྲས་བུ་ཆོས་སྐུ་བསྟན་པའི་སྐབས་སུ་ཟག་མེད་སྡེ་ཚན་ཉེར་གཅིག་ཏུ་གསུངས་ཏེ། དེ་ལ་སྡེ་ཚན་དང་པོ་དེ་བཞིན་གཤེགས་པ་རང་ཉིད་ཀྱི་སྐུས་བསྡུས་པའི་དྲན་པ་ཉེ་བར་གཞག་པ་ནས་བཟུང་སྟེ། འཕགས་པའི་ལམ་ཡན་ལག་བརྒྱད་པའི་བར་གྱི་བྱང་ཆུབ་ཀྱི་ཕྱོགས་རྣམས་སེམས་ཅན་གྱི་དུས་བྲལ་སྟོབས་ཀྱི་ཆ་ཤས་ཡོངས་སུ་མ་རྫོགས་པས་མི་གསལ་བ་ལྟ་བུ་མིན་པ། ཡོངས་སུ་རྫོགས་པ་དྲི་མ་དང་བྲལ་བ། ཟག་པ་མེད་པའི་ཡེ་ཤེས་ཆོས་ཀྱི་དབྱིངས་ཀྱིས་བསྡུས་པ་ཡིན་ནོ། །ཟག་མེད་ཡེ་ཤེས་ཀྱི་སྡེ་ཚན་ཐམས་ཅད་ལ་འདི་བཞིན་དུ་སྦྱར་རོ། །གཉིས་པ་བྱམས་པ་ལ་སོགས་པ་ཚད་མེད་པ་སྐྱེ་བོ་གཞན་རྣམས་ཚངས་པའི་གནས་བཞིར་སྐྱེ་བར་བྱེད་པ་རྣམས་དང༌། གསུམ་པ་ནི། ནང་ཤེས་པ་གཟུགས་ཅན་དུ་འདུ་ཤེས་པས་ཕྱི་རོལ་གྱི་གཟུགས་ལ་བལྟ་བ་དང༌། ནང་གཟུགས་ཅན་མ་ཡིན་པར་འདུ་ཤེས་པས་ཕྱི་རོལ་གྱི་གཟུགས་ལ་ལྟ་བ་ནི་གཟུགས་ཅན་མིན་པ་གཟུགས་ལ་ལྟ་བའི་རྣམ་ཐར་ཞེས་བྱ་བ་གཉིས་དང༌། སྡུག་པའི་རྣམ་ཐར་ཏེ་ཡིད་དུ་འོང་བའི་རང་བཞིན་ལུས་ཀྱིས་མངོན་སུམ་དུ་བྱས་ཏེ་རྫོགས་པར་གནས་པ་ཞེས་བྱ་བ་གཅིག་དང༌། ནམ་མཁའ་དང་རྣམ་ཤེས་དང་ཅི་ཡང་མེད་པ་དང་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཅེས་བྱ་བ་བཞི་དང༌། འདུ་ཤེས་དང་ཚོར་བ་འགོག་པ་ཞེས་བྱ་བ་གཅིག་སྟེ། དེ་ལྟར་རྣམ་པར་ཐར་པ་བརྒྱད་དང༌། སྡེ་ཚན་བཞི་པ་
གཟུགས་ཀྱི་ཁམས་ཀྱི་བསམ་གཏན་བཞིའི་སྙོམས་པར་འཇུག་པ་དང༌། གཟུགས་མེད་པའི་སྙོམས་པར་འཇུག་པ་བཞི་དང༌། འགོག་པའི་སྙོམས་པར་འཇུག་པ་ཞེས་བྱ་བ་མཐར་གྱིས་གནས་པའི་སྙོམས་པར་འཇུག་པ་དགུ་དང༌། ལྔ་པ་ཟད་པར་ས་དང༌། ཆུ་དང༌། མེ་དང༌། རླུང་དང༌། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་དང༌། ནམ་མཁའ་མཐའ་ཡས་དང༌། རྣམ་པར་ཤེས་པ་མཐའ་ཡས་ཞེས་བྱ་བ་ཟད་པར་རྣམ་པ་བཅུ་དང༌། སྡེ་ཚན་དྲུག་པ་ནང་ཤེས་པ་གཟུགས་ཅན་དུ་འདུ་ཤེས་ནས་ཕྱི་རོལ་གྱི་རྣམ་པ་ཐམས་ཅད་སོ་སོར་ཆུང་ངུ་དང་ཆེན་པོའི་རྣམ་པ་དག་ཏུ་ཕྱི་རོལ་གྱི་གཟུགས་རྣམས་ལ་བལྟ་ཞིང་དེ་དག་ཟིལ་གྱིས་མནན་ནས་ཞེས་བྱ་བ་གཉིས་དང༌། ནང་གཟུགས་མེད་པར་འདུ་ཤེས་པ་དག་གིས་སོ་སོར་ཆུང་ངུ་དང་ཆེན་པོའི་རྣམ་པ་དག་ཏུ་ཕྱི་རོལ་གྱི་གཟུགས་རྣམས་ལ་བལྟ་ཞིང་དེ་དག་ཟིལ་གྱིས་མནན་ནས་ཞེས་བྱ་བ་གཉིས་ཏེ་བཞི་དང༌། ནང་གཟུགས་མེད་པར་འདུ་ཤེས་པ་དག་ཁོ་ནས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་དག་ཟིལ་གྱིས་མནན་ནས་མཐོང་བ་ཞེས་བྱ་བ་རྣམ་པ་བཞི་སྟེ། མདོར་ན་སྐལ་པ་མཉམ་པ་ལ་འབྱུང་བ་བཞི་ཁ་དོག་བཞིར་སྣང་བའི་སྣང་བ་དེ་དག་འགོག་པ་ལ་མཐུ་ཐོབ་སྟེ་མི་སྣང་བར་བྱས་ནས། ཡུལ་ཐམས་ཅད་གསེར་ལྟ་བུ་ཁོ་ནའམ་འབའ་ཞིག་གམ་ཟད་པར་སྣང་བར་བྱེད་པའི་ཏིང་ངེ་འཛིན་ནི་ཟིལ་གྱིས་གནོན་པའི་སྐྱེ་མཆེད་རྣམ་པ་བརྒྱད་དང༌། བདུན་པ་ཕ་རོལ་གྱི་རྒྱུད་དུ་གཏོགས་པའི་ཉོན་མོངས་པའི་དགྲའི་རྒྱུན་དྲུང་འབྱིན་པའི་ཏིང་ངེ་འཛིན་ཞེས་བྱ་བ་གང་ཡིན་པ་ཉོན་མོངས་པ་མེད་པ་དང༌། བརྒྱད་པ་ཡང་དག་པ་སྤྲོས་པའི་མཚན་མ་ཐམས་ཅད་དང་བྲལ་ཞིང་དེ་ལྟ་བུའི་རང་བཞིན་ལས་མ་འདས་ཀྱང༌། གདུལ་བྱ་སྤྲོས་མཚན་དུ་ལྟ་བ་དག་གི་འདོད་ཆགས་
ལ་སོགས་པ་བཅོམ་པར་བྱེད་ཅིང་ཐེ་ཚོམ་སེལ་བར་མཛད་པའི་སྨོན་ལམ་གྲུབ་པས་དེ་བཞིན་གཤེགས་པའི་ཡེ་ཤེས་འཁོར་བ་ཇི་སྲིད་པའི་གནས་སྐབས་སུ་འགྲོ་བའི་དོན་ལ་འཇུག་པ་དང༌། རྣམ་པར་གྲོལ་བ་ཇི་སྲིད་པའི་གནས་སྐབས་སུའང་མཁྱེན་པ་དེ་སེམས་ཅན་ལ་འཇུག་པ་ཞེས་བྱ་བ་སྨོན་ནས་མཁྱེན་པ། དགུ་པ་ད་ལྟར་གྱི་ལུས་ཉེ་རིང་ཇི་སྙེད་པ་ཤི་ནས་གར་སྐྱེས་པའི་གཟུགས་ཐམས་ཅད་མཐོང་བ་ལྷའི་མིག་དང༌། སྒྲ་དང་སྐད་དང་བརྡ་སྣ་ཚོགས་ཐོས་ཤིང་གོ་བ་ལྷའི་རྣ་བ་དང༌། སེམས་ཅན་གྱི་བསམ་པ་དང་བག་ལ་ཉལ་ཤས་ཆེ་ཆུང་ཀུན་ཤེས་པ་སེམས་ཀྱི་རྣམ་གྲངས་ཤེས་པ་དང༌། འབར་བ་དང༌། འཕུར་བ་དང༌། མང་ཉུང་དང༌། བཟང་ངན་དང༌། ཆུ་ལ་འགྲོ་ཞིང་ས་ལ་བྱིང་བ་དག་ཤེས་པ་ལུས་ཀྱི་རྫུ་འཕྲུལ་ཤེས་པ་དང༌། ད་ལྟར་གྱི་ལུས་ནས་བཟུང་སྟེ། ཚེ་རབས་སྔ་མ་ལ་གནས་གང་ན་གནས། ལས་ཅི་བྱེད་པའི་ལོ་རྒྱུས་དྲན་པ་ནི། སྔོན་གྱི་གནས་རྗེས་སུ་དྲན་པ་དང༌། མཐོང་བ་དང་སྒོམ་པས་སྤང་བའི་ཉོན་མོངས་པ་གང་ཞིག་སྤངས། གང་ཞིག་མ་སྤངས་པའི་རིམ་པ་ཤེས་བཞིན་ཟད་པ་དང་མི་སྐྱེ་བའི་ཡེ་ཤེས་ཐོབ་པ་ཤེས་པ་དག་ཟག་པ་ཟད་པ་ཤེས་པ་སྟེ་མངོན་པར་ཤེས་པ་དྲུག་དང༌། བཅུ་པ་སེམས་ཅན་བསམ་པ་ཐ་དད་དང་འཚམས་པར་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ནི་གཉེན་པོའི་ཐབས་སྣ་ཚོགས་སུ་སྟོན་པ་ཆོས་སོ་སོ་ཡང་དག་པར་རིག་པ། མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་སྟེ་ཆོས་སྤྱིའི་མཚན་ཉིད་དང༌། སྐྱེ་འགག་མེད་པ་དོན་གྱི་མཚན་ཉིད་དེ་མིང་ཚག་གི་བརྗོད་དོན་ཤེས་པ་དོན་སོ་སོ་ཡང་དག་པར་རིག་པ། འགྲོ་བ་ཐམས་ཅད་ཀྱི་བརྡ་དང་སྐད་དང་དེ་དག་གི་དོན་ལ་མ་རྨོངས་པ་ངེས་པའི་ཚིག་སོ་སོ་ཡང་དག་པར་རིག་པ། ཆོས་སྟོན་ཅིང་ཐེ་ཚོམ་གཅོད་པ་ལ་ཐོགས་པ་མེད་པ་སྤོབས་པ་སོ་སོ་ཡང་དག་པར་རིག་པ་བཞི་དང༌། བཅུ་
གཅིག་པ་རྟེན་དང༌། དམིགས་པ་དང༌། ཐུགས་དང༌། ཡེ་ཤེས་ཡོངས་སུ་དག་པ་ཞེས་བྱ་བ་དག་པ་བཞི་དང༌། བཅུ་གཉིས་པ། སྔར་བཤད་པ་ལྟར། ཚེ་དང་སེམས་དང་ཡོ་བྱད་ལས། །སྐྱེ་བ་མོས་པ་སྨོན་ལམ་དང༌། །རྫུ་འཕྲུལ་ཡེ་ཤེས་ཆོས་ལ་དབང༌། །ཞེས་པའི་དབང་བཅུ་དང་པོ་གསུམ་ནི་སྦྱིན་པའི་འབྲས་བུ་དང༌། ལས་དང་སྐྱེ་བ་ནི་ཚུལ་ཁྲིམས་ཀྱི་དང༌། མོས་པ་ནི་བཟོད་པའི་དང༌། སྨོན་ལམ་ནི་བརྩོན་འགྲུས་ཀྱི་དང༌། རྫུ་འཕྲུལ་ནི་བསམ་གཏན་གྱི་དང༌། ཐ་མ་གཉིས་ནི་ཤེས་རབ་ཀྱི་སྟེ་སློབ་པའི་གནས་སྐབས་སུ་ཆ་མཐུན་དང༌། དངོས་ནི་སངས་རྒྱས་ཀྱི་ས་ཁོ་ནའོ། །བཅུ་གསུམ་པ་སྟོབས་བཅུ་དང༌། བཅུ་བཞི་པ་མི་འཇིགས་པ་བཞི་དང༌། བཅོ་ལྔ་པ་དེ་བཞིན་གཤེགས་པའི་སྐུ་དང་གསུང་དང༌། ཐུགས་ཀྱི་སྤྱོད་པ་ལ་འཁྲུལ་པ་ཡོངས་སུ་དག་པ་སྟེ། སངས་རྒྱས་ཀྱི་རང་བཞིན་འདི་ལ་ཕྱིན་ཅི་ལོག་གི་ཀུན་ཏུ་སྤྱོད་པ་གཞན་གྱིས་ཡོངས་སུ་ཤེས་པར་དོགས་པའི་ངོ་ཚའམ་བག་ཚ་བས་མི་གསལ་བར་བཅབ་པར་བྱའོ་སྙམ་པའི་དགོངས་པ་མི་མངའ་བ་བསྲུང་བ་མེད་པ་རྣམ་པ་གསུམ་དང༌། བཅུ་དྲུག་པ་དེ་བཞིན་གཤེགས་པས་ཆོས་སྟོན་པ་ན་གུས་པས་ཉན་པར་འདོད་པ་དང༌། ཉན་པར་མི་འདོད་པ་དང༌། རེས་གུས། རེས་མི་གུས་པ་གཉིས་ཀ་དག་ལ་གོ་རིམ་བཞིན་དུ་རྗེས་སུ་ཆགས་པ་དང༌། ཁོང་ཁྲོ་བ་དང་ཆགས་སྡང་གཉིས་ཀ་ཆ་མཉམ་པར་སྐྱེ་བ་གཉིས་ཀས་དབེན་པ་ཁོ་ནར་བཏང་སྙོམས་སུ་དྲན་པ་དང་ལྡན་པར་གནས་པ་ཞེས་བྱ་བ་དྲན་པ་ཉེ་བར་གཞག་པ་རྣམ་པ་གསུམ། བཅུ་བདུན་པ་སེམས་ཅན་གྱི་དོན་མཛད་པའི་དུས་ལས་མི་འདའ་བར་གང་ལ་གང་འདུལ་དུ་སྟོན་པས་སྐབས་དེར་མཛད་པ་ཡོལ་མི་སྲིད་པའི་མཚན་ཉིད་ཅེས་བྱ་བ་བསྙེལ་བ་སྟེ་བརྗེད་པ་མི་མངའ་བའི་ཆོས་ཉིད་དང༌། བཅོ་བརྒྱད་པ་ཉོན་མོངས་པ་དང་ཤེས་བྱའི་སྒྲིབ་པའི་བག་ལ་ཉལ་གྱི་ངོ་བོའི་ས་
བོན་སྤངས་པས་བག་ཆགས་ཡང་དག་པར་བཅོམ་པ་དང༌། བཅུ་དགུ་པ་སྐྱེ་བོ་མཐའ་དག་ལ་ཕན་པའི་བསམ་པ་ཉིད་ཅེས་བྱ་བ་སྐྱེ་བོ་ལ་ཐུགས་རྗེ་ཆེན་པོ་ཉིད་དང༌། ཉི་ཤུ་པ་འཕགས་ཆུང་འོག་མ་རྣམས་དང་མ་འདྲེས་པའི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང༌། ཉེར་གཅིག་པ་རྣམ་མཁྱེན་ནི་རྣམ་པ་ཐམས་ཅད་མཁྱེན་པ་ཉིད་དེ་འབྲས་བུའི་རྣམ་མཁྱེན་རྣམས་སྤང་བྱའི་གནས་ཐམས་ཅད་ལས་རྣམ་པར་གྲོལ་བའི་ཆོས་ཀྱི་སྐུའི་རང་བཞིན་དུ་བཤད་དོ། །གཉིས་པ་རྣམ་སྨིན་གྱི་ཡོན་ཏན་བཤད་པ་ལ་གཉིས། མདོར་བསྟན། རྒྱས་བཤད་དོ། །དང་པོ་ནི། གཟུགས་སྐུ་རྣམ་གཉིས་མཁའ་དང་ཆུ་ཟླ་ལྟར། །སྣང་ལ་མ་གྲུབ་རྣམ་སྨིན་ཡོན་ཏན་ནི། །གཟུགས་སྐུ་གཉིས་ལས་ལོངས་སྐུ་ནམ་མཁར་ཤར་བའི་ཟླ་བ་དང་སྤྲུལ་སྐུ་ཆུ་ཟླའི་ཟླ་བ་ལྟ་བུར་གདུལ་བྱའི་དབང་གིས་སྣ་ཚོགས་སུ་སྣང་ཡང་དེའི་ངོ་བོར་མ་གྲུབ་པ་རྣམ་པར་སྨིན་པའི་ཡོན་ཏན་ནི་དངོས་མཚན་བཟང་སོ་གཉིས་དང༌། ཞར་བྱུང་དཔེ་བྱད་བརྒྱད་ཅུ། གསུང་དབྱངས་དང་བཅས་པའོ། །གཉིས་པ་ནི། ལེགས་གནས་འཁོར་ལོས་མཚན་སོགས་སོ་གཉིས་དང༌། །ཟངས་མདོག་སྣུམ་མཐོ་ལ་སོགས་བརྒྱད་ཅུ་སྟེ། །སྐྱེས་བུ་ཆེན་པོའི་མཚན་དཔེ་རྣམས་ཀྱིས་སྤྲས། །ཚངས་པའི་གསུང་དབྱངས་ཡན་ལག་དྲུག་ཅུར་ལྡན། དེ་བཞིན་གཤེགས་པས་སྔོན་དམ་བཅའ་བརྟན་པར་བྱས་པས་ཞབས་ཀྱི་མཐིལ་ལེགས་པར་མཉམ་པར་གནས་པ་དང༌། སྦྱིན་པ་བཏང་བས་ཕྱག་ཞབས་ཀྱི་མཐིལ་འཁོར་ལོས་མཚན་པ་དང༌། གཞན་ཁྱད་དུ་མ་བསད་པས་རྟིང་པ་ཡངས་ཤིང་ལོང་བུ་མི་མངོན་པ་དང༌། སེམས་ཅན་གཞན་འཇིགས་པ་ལས་བསྐྱབས་པས་སོར་མོ་རིང་བ་དང༌། གཞན་གྱི་འཁོར་ཕྲ་མས་མ་ཕྱེ་བས་ཕྱག་ཞབས་ཀྱི་སོར་མོ་རྣམས་དྲྭ་བས་འབྲེལ་བ་དང༌། གོས་སྣ་ཚོགས་བྱིན་པས་ཕྱག་ཞབས་ཀྱི་
པགས་པ་འཇམ་ཞིང་གཞོན་ཤ་ཆགས་པ་དང༌། བཟའ་བཏུང་རྒྱ་ཆེན་པོ་བྱིན་པས་ཕྱག་ཞབས་ཀྱི་མཐིལ་བཞི་དང་ཕྲག་གོང་གཉིས་དང་ལྟག་པའི་ཆ་སྟེ་སྐུའི་གནས་བདུན་དག་མཐོ་བ་དང༌། སངས་རྒྱས་ཀྱིས་གསུངས་པའི་ཆོས་བཟུང་བས་བྱིན་པ་ཨེ་ན་ཡ་ཞེས་པ་ཤ་ར་བྷའམ་བསེ་ཁ་སྒོའམ་ཤ་བའི་བྱིན་པ་དང་འདྲ་བར་ཤ་རྒྱས་ཤིང་བྱིན་གྱིས་ཕྲ་བ་དང༌། གསང་ཚིག་བསྲུངས་ཤིང་འཁྲིག་པ་སྤངས་པས་གླང་པོ་ཆེ་ལྟར་གསང་བ་སྦུབས་སུ་ནུབ་པ་དང༌། དགེ་བ་རྒྱ་ཆེན་པོ་རིམ་གྱིས་སྤྱད་པས་རོ་སྟོད་འཕེལ་ཀ་ཆེ་བ་སེང་གེ་འདྲ་བ་དང༌། དགེ་བ་ཡང་དག་པར་སྤྱོད་པས་ཐལ་གོང་མ་ཁེངས་པའི་བར་མེད་པར་རྒྱས་པ་དང༌། གཞན་ལ་མི་འཇིགས་པ་བྱིན་པས་དཔུང་མགོ་ལེགས་པར་ཟླུམ་པ་དང༌། གཞན་གྱི་བྱ་བ་བྱེད་པ་ལ་སྤྲོ་བས་ཕྱག་མཐིལ་འཇམ་ཞིང་ཟླུམ་ལ་མཐོ་དམའ་མེད་པར་མཉམ་པ་དང༌། སེམས་ཅན་གྱི་དོན་ལ་བརྩོན་པས་མ་བཏུད་པར་པུས་མོར་སླེབ་པའི་ཕྱག་རིང་བ་དང༌། དགེ་བཅུ་མི་ངོམས་པར་སྤྱད་པས་སྐུ་དྲི་མས་ཡོངས་སུ་དག་ཅིང་འོད་ཀྱི་དཀྱིལ་འཁོར་འདོམ་གང་དང་ལྡན་པ་དང༌། ནད་པ་ལ་སྨན་སོགས་བྱིན་པས་མགྲིན་པ་ཁ་དོག་དྲི་མ་མེད་ཅིང་དབྱིབས་དུང་དང་འདྲ་བར་འཁྱིལ་པ་དང༌། དང་པོར་དགེ་བ་ལ་སྦྱོར་ཞིང་ཕྱིས་རྫོགས་པར་བྱས་པས་འགྲམ་པ་རི་དྭགས་ཀྱི་རྒྱལ་པོ་འདྲ་བ་དང༌། སེམས་ཅན་ལ་བསམ་པ་མཉམ་པར་བྱས་པས་ཚེམས་བཞི་བཅུ་སྟེང་འོག་གཉིས་སུ་ཉི་ཤུ་རེར་གྲངས་མཉམ་ཞིང་ཐགས་བཟང་ལ་དྲི་མས་རྣམ་པར་དག་ཅིང་མཐོ་དམན་མཉམ་པ་ཉིད་དང༌། སྒོ་གསུམ་གྱི་ལས་བསྲུངས་པས་མཆེ་བ་རབ་མཆོག་དགར་བ་དང༌། བདེན་པར་གསུངས་པས་ལྗགས་རིང་ཞིང་མཐའ་མེད་ལ་བསམ་དུ་མེད་པ་དང༌། རོ་བྲོ་བ་མང་པོ་བྱིན་པས་ལྗགས་ཁ་ཟས་ཀྱི་རོ་བྲོ་བའི་མཆོག་དང་ལྡན་པ་དང༌། འཇམ་ཞིང་དགའ་བའི་ཚིག་སྨྲས་པས་རང་བྱུང་གི་གསུང་ཀ་
ལ་པིངྐའི་སྒྲ་དང་ཚངས་པའི་དབྱངས་ལྟར་སྙན་པ་དང༌། བྱམས་པ་དང་ལྡན་ཞིང་ཐམས་ཅད་བསྲུངས་པས་སྤྱན་བཟང་པོ་ཨུཏྤལ་སྔོན་པོ་འདྲ་བ་དང༌། བསམ་པ་གཡོ་སྒྱུ་མེད་པས་རྫི་མ་ཁྱུ་མཆོག་འདྲ་བར་སྣུམ་ཞིང་མ་འཛིངས་པ་དང༌། བསྔགས་འོས་ལ་བསྔགས་པས་ཞལ་མཛེས་དྲི་མ་མེད་པའི་སྨིན་མཚམས་ན་མཛོད་སྤུ་དཀར་པོ་ཉག་སུམ་ཅུ་རྩ་གཉིས་དང་ལྡན་པ་དང༌། བླ་མ་ལ་གུས་པས་གཙུག་ཏོར་དབུར་ལྡན་པ་སྟེ་ལུས་དྲང་པོར་མི་གཡོ་བ་དང༌། ཆོས་འཚོལ་བ་ལ་ལས་སུ་རུང་བས་པགས་པ་དག་ཅིང་སྲབ་ལ་གསེར་གྱི་མདོག་འདྲ་བ་དང༌། འདུ་འཛི་སྤངས་པས་བ་སྤུ་ཕྲ་ཞིང་འཇམ་ལ་ཁུང་བུ་རེ་ནས་རེ་རེ་སྐྱེས་པ་དང༌། གདམས་ངག་ལ་མཐུན་པར་འཛིན་པས་བ་སྤུའི་རྩེ་མོ་གྱེན་དུ་ཕྱོགས་ཤིང་གཡས་ཕྱོགས་སུ་འཁྱིལ་བ་དང༌། ཀུན་ལ་བརྩེ་ཞིང་མཚོན་ཆ་སྤངས་པས་དབུ་སྐྲ་དྲི་མ་མེད་ཅིང་རིན་པོ་ཆེ་མཐོན་མཐིང་ལྟར་སྔོ་བ་དང༌། རང་གཞན་ཐམས་ཅད་ཏིང་ངེ་འཛིན་ལ་སྦྱར་བས་ནྱ་གྲོ་དྷ་རྫོགས་པའི་ལྗོན་ཤིང་གི་དཀྱིལ་འཁོར་དང་འདྲ་བར་སྐུ་ཆུ་ཞེང་གབ་པ་དང༌། སངས་རྒྱས་ཀུན་ཏུ་བཟང་པོ་དཔེ་མེད་པ་དྲང་སྲོང་ཆེན་པོ་དེ་སྲེད་མེད་ཀྱི་བུའི་སྟོབས་མངའ་ཞིང་མཁྲེགས་པའི་སྐུ་དང་ལྡན་པ་སྟེ་སུམ་ཅུ་རྩ་གཉིས་སོ། །དཔེ་བྱད་ནི། མངོན་རྟོགས་རྒྱན་ལས། ཐུབ་པའི་སེན་མོ་ཟངས་མདོག་དང༌། །མདོག་སྣུམ་མཐོ་དང་སེན་མོ་རྣམས། །ཟླུམ་རྒྱས་བྱིན་གྱིས་ཕྲ་བ་དང༌། །རྩ་མི་མངོན་དང་མདུད་པ་མེད། །ཁོང་བུ་མི་མངོན་ཞབས་མཉམ་དང༌། །སེང་གེ་གླང་ཆེན་བྱ་དང་ནི། །ཁྱུ་མཆོག་སྟབས་གཤེགས་གཡས་ཕྱོགས་དང༌། །མཛེས་གཤེགས་དྲང་དང་འཁྲིལ་བག་དང༌། །བྱི་དོར་བྱས་འདྲ་རིམ་པར་འཚམས། །གཙང་དང་འཇམ་དང་དག་པའི་སྐུ། །མཚན་ནི་ཡོངས་སུ་རྫོགས་པ་དང༌། །སྐུ་ཡི་ཁོ་ལག་ཡངས་ཤིང་བཟང༌། །
གོམ་སྙོམས་སྤྱན་གཉིས་དག་པ་དང༌། །ཤིན་ཏུ་གཞོན་ཤ་ཅན་ཉིད་དང༌། །སྐུ་ཞུམ་མེད་དང་རྒྱས་པ་དང༌། །ཤིན་ཏུ་གྲིམས་པའི་སྐུ་ཉིད་དང༌། །ཡན་ལག་ཤིན་ཏུ་རྣམ་འབྱེས་དང༌། །གཟིགས་པ་སྒྲིབ་མེད་དག་པ་དང༌། །དཀུ་ཟླུམ་སྐབས་ཕྱིན་མ་རྙོག་དང༌། །ཕྱང་ངེ་བ་དང་ལྟེ་བ་ནི། །ཟབ་དང་གཡས་ཕྱོགས་འཁྱིལ་པ་དང༌། །ཀུན་ནས་ལྟ་ན་སྡུག་པ་དང༌། །ཀུན་སྤྱོད་གཙང་དང་སྐུ་ལ་ནི། །སྨེ་བ་གནག་བག་མེད་པ་དང༌། །ཕྱག་ནི་ཤིང་བལ་ལྟར་འཇམ་དང༌། །ཕྱག་རིས་མདངས་ཡོད་ཟབ་རིང་དང༌། །ཞལ་ནི་ཧ་ཅང་མི་རིང་དང༌། །མཆུ་ནི་བིམྦ་ལྟར་དམར་དང༌། །ལྗགས་མཉེན་པ་དང་སབ་པ་དང༌། །དམར་དང་འབྲུག་གི་སྒྲ་ཉིད་དང༌། །གསུང་མཉེན་འཇམ་དང་མཆེ་བ་ཟླུམ། །རྣོ་དང་དཀར་དང་མཉམ་པ་དང༌། །བྱིན་གྱིས་ཕྲ་དང་ཤངས་མཐོ་དང༌། །མཆོག་ཏུ་དག་པ་དག་དང་ནི། །སྤྱན་ཡངས་པ་དང་རྫི་མ་སྟུག །པདྨའི་འདབ་མ་འདྲ་བ་དང༌། །སྨིན་ཚུགས་རིང་དང་འཇམ་པ་དང༌། །སྣུམ་དང་སྤུ་ནི་མཉམ་པ་དང༌། །ཕྱག་རིང་རྒྱས་དང་སྙན་མཉམ་དང༌། །ཉམས་པ་རྣམ་པར་སྤངས་པ་དང༌། །དཔྲལ་བ་ལེགས་པར་འབྱེས་པ་དང༌། །དབྱེས་ཆེ་བ་དང་དབུ་རྒྱས་དང༌། །དབུ་སྐྲ་བུང་བ་ལྟར་གནག་དང༌། །སྟུག་དང་འཇམ་དང་མི་འཛིངས་དང༌། །མི་གཤོར་དྲི་ཞིམ་སྐྱེས་བུ་ཡི། །ཡིད་ནི་འཕྲོག་པར་བྱེད་པ་དང༌། །དཔལ་གྱི་བེའུ་དང་བཀྲ་ཤིས་ནི། །གཡུང་དྲུང་འཁྱིལ་པས་བརྒྱན་པ་སྟེ། །སངས་རྒྱས་དཔེ་བྱད་བཟང་པོར་བཞེད། །ཅེས་གསུངས་པ་ལྟར་རོ། །འདི་དག་ལས་སེན་མོ་མཐོ་པ་ནི་མ་ཞོམ་པ་དང༌། ལོང་བུའི་ཚིག་སྤོམ་པར་མི་མངོན་པ་དང༌། ཞབས་གཉིས་རིང་ཐུང་ཕྲ་སྦོམ་མཉམ་པ་དང༌། མི་ལ་སོགས་པ་ས་སྟེང་གི་འགྲོ་བ་ཟིལ་གྱིས་གནོན་པས་སེང་གེའི་སྟབས་དང༌། ཀླུ་ལ་སོགས་པ་ས་འོག་གི་འགྲོ་
བ་ཟིལ་གྱིས་གནོན་པས་གླང་པོ་ཆེའི་སྟབས་དང༌། མཁའ་ལ་རྒྱུ་བའི་སེམས་ཅན་དང་སྟེང་གི་འགྲོ་བ་རྣམས་ཟིལ་གྱིས་གནོན་པས་བྱ་ངང་པའམ་མཁའ་ལྡིང་གི་སྟབས་དང༌། འཁོར་རྣམས་ཀྱི་སྣ་འདྲེན་པས་ཁྱུ་མཆོག་གི་སྟབས་སུ་གཤེགས་པ་དང༌། མཚན་ཐམས་ཅད་དོད་ཅིང་གསལ་བས་ཡོངས་སུ་རྫོགས་པ་དང༌། ཕྱལ་གྱི་དབྱིབས་ཡངས་ཤིང་མཛེས་པས་ཕྱང་ངེ་བ་དང༌། ལྟེ་བའི་ཁུང་ཟབ་ཅིང་རི་མོ་གཡས་སུ་འཁྱིལ་པ་དང༌། ཞལ་གྱི་སྒོ་ཧ་ཅང་ཆེས་པའི་སྐྱོན་དང་གསུང་ཐག་ཧ་ཅང་རིང་བ་མེད་པ་དང༌། སྨིན་མ་གཉིས་འབྲེལ་བས་ཚུགས་རིང་བ་དང༌། དཔྲལ་བ་ལེགས་པར་རྒྱས་ཤིང་འབུར་དུ་མ་དོད་པས་དབྱེས་པ་དང༌། སྐྲ་མཚམས་མཉམ་པར་ཕྱེད་པ་དང༌། །ཕྱག་ཞབས་ལ་དཔལ་གྱི་བེའུ་དང༌། འཁོར་ལོའི་མུ་ཁྱུད་ལ་བཀྲ་ཤིས་པའི་རི་མོ་བར་མ་ཆད་བདུན་རིམ་དང༌། གཡུང་དྲུང་འཁྱིལ་པའི་དབྱིབས་ཅན་རི་མོ་གྲུ་བཞིས་བསྐོར་བའོ། །གཞན་རྣམས་ནི་གོ་སླའོ། །འདི་རྣམས་ཀྱི་ངོ་བོ་ཉིད་ནི་གང་གི་དངོས་པོ་ཡིན་ཞེ་ན། དེ་ལ་འདོད་ཚུལ་ཐ་དད་པ་ལས་ཉན་ཐོས་སྡེ་པ་དག་གི་ལྟར་ན། རྡུལ་ཕྲ་རབ་ཀྱི་ཆོས་ཅན་ཕྱི་དོན་གྱི་བེམས་པོའི་ངོ་བོ་ཉིད་དེ་གཟུགས་ཀྱི་སྐྱེ་མཆེད་དོ། །རྣམ་རིག་པ་ལྟར་ན། ངོ་བོ་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་དང༌། བྱེད་ལས་གདུལ་བྱ་ལ་སྣང་བ་སྐྱེད་པར་གསུངས་པས་གཞན་སྣང་གི་གདུལ་བྱའི་རྣམ་པར་རིག་པ་ཙམ་མོ། །འོན་ཀྱང་འདིར་ཐ་སྙད་དུ་སྐྱེ་མཆེད་པའི་གཟུགས་ཅན་ལྟ་བུའི་རྣམ་གཞག་ནི་དགོས་སོ། །དེ་བཞིན་དུ་རྣལ་འབྱོར་སྤྱོད་པ་དང་མཐུན་པའི་དབུ་མ་ལའང༌། ཡང་དག་པའི་ཀུན་རྫོབ་ཏུ་སྣང་བ་ཇི་ལྟར་མོས་པས་རབ་ཏུ་ཕྱེ་བ་སྟེ། འདི་དག་རང་སེམས་སྣང་བ་ཞེས། །སོ་སོ་སྐྱེ་བོས་མི་ཤེས་མོད། །དེ་ལྟར་ན་ཡང་གཟུགས་མཐོང་དེ། །དེ་
དག་ལ་ནི་དོན་ཡོད་འགྱུར། །ཞེས་སོགས་བཤད་པ་ལྟར་ཡིན་ནོ། །ཚངས་པའི་གསུང་དབྱངས་ཡན་ལག་དྲུག་ཅུ་ནི། དེ་བཞིན་གཤེགས་པའི་གསང་བའི་མདོ་ལས་འབྱུང་བ་སློབ་དཔོན་ཨ་བྷ་ཡས་བསྟན་བཅོས་ཐུབ་པ་དགོངས་རྒྱན་དུ་རྒྱས་པར་བཤད་པའི་དོན་སྡོམ་དུ་བསྡུ་ན། མཉེན་འཇམ་ཡིད་འོང་ཡིད་དུ་འཐད། །དག་པ་དྲི་མེད་རབ་ཏུ་གསལ། །སྙན་ཅིང་འཇེབས་ལ་མཉན་པར་འོས། །མི་ཚུགས་སྙན་པ་དུལ་མི་རྩུབ། །མི་རླངས་རབ་དུལ་རྣ་བར་སྙན། །ལུས་ཚིམ་བྱེད་དང་སེམས་ཚིམ་བྱེད། །སྙིང་དགར་བྱེད་དང་དགའ་བདེ་སྐྱེད། །ཡོངས་སུ་གདུང་མེད་ཀུན་ཤེས་བྱ། །རྣམ་པར་རིག་བྱ་རྣམ་གསལ་བ། །དགའ་བར་བྱེད་དང་མངོན་དགར་བྱེད། །ཀུན་ཤེས་བྱེད་དང་རྣམ་རིག་བྱེད། །རིགས་པ་འབྲེལ་བ་ཟློས་སྐྱོན་མེད། །སེང་གེའི་སྒྲ་ཡི་ཤུགས་ཅན་དང༌། །གླང་ཆེན་སྒྲ་སྐད་འབྲུག་སྒྲའི་དབྱངས། །ཀླུ་དབང་སྒྲ་དང་དྲི་ཟའི་གླུ། །ཀ་ལ་པིངྐའི་སྒྲ་དབྱངས་དང༌། །ཚངས་པའི་སྒྲ་དབྱངས་བསྒྲགས་པ་དང༌། །ཤང་ཤང་ཏེའུའི་སྒྲ་དབྱངས་གྲགས། །ལྷ་ཡི་དབང་པོའི་དབྱངས་ལྟར་སྙན། །རྔ་སྒྲ་མ་ཁེངས་མི་དམའ་དང༌། །སྒྲ་ཀུན་གྱི་ནི་རྗེས་སུ་ཞུགས། །ཚིག་ཟུར་མ་ཆག་མ་ཚང་མེད། །མ་ཞུམ་མི་ཞན་རབ་དགའ་ཁྱབ། །ཆུབ་དང་རྒྱུན་ཆགས་འབྲེལ་བ་དང༌། །སྒྲ་ཀུན་རྫོགས་པར་བྱེད་པ་དང༌། །དབང་ཀུན་ཚིམ་བྱེད་མ་སྨད་པ། །མི་འགྱུར་མ་བརྟབས་ཁོར་ཡུག་གྲགས། །རྣམ་པ་ཀུན་གྱི་མཆོག་ལྡན་ནོ། །བཞི་པ་མཛད་པ་ཕྲིན་ལས་བཤད་པ་ལ་གཉིས། མཛད་པའི་དོན་བདུན་རྒྱས་པར་བཤད། གཉིས་ཀྱིས་དོན་བསྡུ་བའོ། །དང་པོ་ནི། ཕྲིན་ལས་ལྷུན་གྱིས་གྲུབ་ཅིང་ཕྱོགས་རིས་མེད། །གཅིག་འདྲེས་རྒྱུན་མི་འཆད་དང་སྣ་ཚོགས་ཐབས། །སྐལ་པར་འཚམས་ཤིང་ཡོངས་སུ་སྐྱོབ་པ་སྟེ། །
རྫོགས་པའི་སངས་རྒྱས་རྣམས་ཀྱི་ཕྲིན་ལས་ནི་འདི་དང་འདི་ལྟ་བུ་བྱའོ་སྙམ་པའི་རྣམ་པར་རྟོག་པ་དང་འབད་རྩོལ་གྱི་མཚན་མ་ཅུང་ཟད་ཀྱང་མི་མངའ་བཞིན་དུ་སྔོན་གྱི་ཐུགས་བསྐྱེད་དང་སྨོན་ལམ་རྒྱ་ཆེན་པོའི་མཐུས་ཡིད་བཞིན་གྱི་ནོར་བུས་འབད་རྩོལ་མེད་བཞིན་དུ་འོད་ཟེར་སྤྲོ་བ་དང༌། ལྷའི་རྔ་བོ་ཆེས་རྟོག་པ་མེད་བཞིན་དུ་ཆོས་ཀྱི་སྡོམ་བཞི་སྟོན་པ་དང་མཐུན་པར། རང་རང་གི་ཁམས་དང་བསམ་པ་དང་དབང་པོ་དང་བག་ལ་ཉལ་ཇི་ལྟ་བ་བཞིན་དུ་སྐུ་གསུང་ཐུགས་ཀྱི་ཆོ་འཕྲུལ་མཐའ་ཡས་པས་གདུལ་བྱ་བསམ་གྱིས་མི་ཁྱབ་པའི་དོན་འབད་མེད་ལྷུན་གྱིས་གྲུབ་པར་འབྱུང་བ་དང༌། ཉི་མའི་དཀྱིལ་འཁོར་ལ་འཆར་དང་མི་འཆར་གྱི་ཕྱོགས་རིས་མེད་པར་ཆུའི་སྣོད་དྭངས་པ་དང་མི་དྭངས་པ་ཐམས་ཅད་དུ་རང་རང་དང་འཚམས་པར་ཅིག་ཅར་དུ་འཆར་བ་བཞིན་དུ། སངས་རྒྱས་རྣམས་ཀྱི་སྐུ་གསུང་ཐུགས་ཀྱི་མཛད་པའང་འདི་ལ་སྣང་འདི་ལ་མི་སྣང་ཞེས་ཕྱོགས་རིས་ཅུང་ཟད་ཀྱང་མེད་པར་གདུལ་བྱ་རྣམས་རང་རང་གི་སྐལ་པ་མཆོག་དམན་དང་འཚམས་པར་ཅིག་ཅར་དུ་སྣང་བ་དང༌། ཉི་མའི་འོད་ཟེར་དཔག་ཏུ་མེད་པའང་འདྲེས་ནས་པདྨ་ཁ་འབྱེད་པ་ལྟ་བུའི་བྱ་བ་གཅིག་ལ་འཇུག་པ་བཞིན་དུ། སེམས་ཅན་རེ་རེ་འདུལ་བ་ལའང་སངས་རྒྱས་ཐམས་ཅད་ཀྱི་ཡེ་ཤེས་དང་ཕྲིན་ལས་གཅིག་ཏུ་འདྲེས་ནས་འཇུག་པ་དང༌། འདུས་མ་བྱས་ཀྱི་ནམ་མཁའི་དབྱིངས་སུ་འདུས་བྱས་ཀྱི་དངོས་པོ་སྐྱེ་བ་དང་འཇིག་པ་རྒྱུན་མི་འཆད་པ་བཞིན་དུ་ཟག་པ་མེད་པའི་དབྱིངས་སུ་མངོན་པར་རྫོགས་པར་སངས་རྒྱས་ནས་ཀྱང༌། གདུལ་བྱ་དུས་ལ་བབ་པ་ན་ཕྲིན་ལས་འཇུག་ཅིང་མ་བབ་ན་མི་འཇུག་པའི་ཚུལ་གྱིས་སངས་རྒྱས་ཀྱི་མཛད་པ་ནམ་ཡང་རྒྱུན་མི་འཆད་པ་དང༌། ཕྱོགས་བཅུའི་ཞིང་ཁམས་མཐའ་ཡས་པར་འཁོར་བ་ཇི་སྲིད་ཀྱི་བར་དུ་ལ་ལར་
མངོན་པར་བྱང་ཆུབ་པ་དང༌། ལ་ལར་ཆོས་འཁོར་བསྐོར་བ་དང༌། ལ་ལར་མྱ་ངན་ལས་འདའ་བར་སྟོན་པ་སོགས་ཐབས་སྣ་ཚོགས་པའི་སྒོ་ནས་ཇི་ལྟར་རིགས་པར་གདུལ་བྱའི་དོན་མཛད་པ་དང༌། རི་མཐོ་དམན་གྱི་ཁྱད་པར་ལས་ཉི་མའི་འོད་ཟེར་རིམ་གྱིས་འཆར་བ་བཞིན་དུ་གདུལ་བྱ་སྐལ་པ་མཆོག་དང་བར་མ་དང་དམན་པ་རྣམས་ལའང་སངས་རྒྱས་ཀྱི་ཕྲིན་ལས་རང་རང་དང་འཚམས་པར་རིམ་གྱིས་འཇུག་པ་དང༌། སངས་རྒྱས་མཐོང་བ་ཙམ་གྱིས་འཚེ་བ་དང༌། ངན་སོང་དང༌། །ཐབས་མ་ཡིན་པ་དང༌། ཁམས་གསུམ་གྱི་སྡུག་བསྔལ་དང༌། ཐེག་པ་དམན་པ་ལས་སྐྱོབ་པ་སྟེ་ཡོངས་སུ་སྐྱོབ་པ་རྣམ་པ་ལྔས་སེམས་ཅན་གྱི་དོན་མཛད་པའོ། །གཉིས་པ་ནི། གདུལ་བྱ་ལམ་རྟེན་མཐོ་རིས་ལམ་དངོས་དང༌། །མཐར་ཕྱིན་དག་ལ་འགོད་ཕྱིར་མདོར་བསྡུ་ན། །ལྷུན་གྲུབ་རྒྱུན་མི་འཆད་པ་གཉིས་སུ་འདུ། །རྒྱལ་བའི་ཕྲིན་ལས་ཀྱི་ངོ་བོ་རྒྱུན་མི་འཆད་པར་གང་ལ་གང་འདུལ་གྱི་བཀོད་པ་ནམ་མཁའ་དང་མཉམ་པ་དང༌། བྱེད་ལས་གདུལ་བྱ་མཐའ་ཡས་པ་ཆོ་འཕྲུལ་གསུམ་གྱིས་ལམ་གྱི་རྟེན་མཐོ་རིས་ལྷ་དང་ཚངས་པའི་ཐེག་པ། ལམ་དངོས་ཚོགས་སྦྱོར་ལ་སོགས་པ། མཐར་ཕྱིན་ཐེག་པ་གསུམ་གྱི་འབྲས་བུ་ལ་འགོད་པར་མཛད་པའི་ཕྱིར་མདོར་བསྡུ་ན་ལྷུན་གྱིས་གྲུབ་པ་དང་རྒྱུན་མི་འཆད་པ་གཉིས་སུ་འདུ་བའི་སྔ་མ་ནི། རྒྱུད་བླ་མ་ལས། གང་ཞིག་གང་གིས་གདུལ་བ་ཡི། །བྱ་གང་གང་དུ་གང་གི་ཚེ། །དེ་ཡི་རྣམ་རྟོག་སྐྱེ་མེད་ཕྱིར། །ཐུབ་པ་རྟག་ཏུ་ལྷུན་གྱིས་གྲུབ། །ཅེས་དང༌། ཕྱི་མ་ནི། དེ་ཉིད་ལས། གཞན་གྱི་དབང་གིས་ངེས་འབྱུང་དང༌། །བདག་དང་སེམས་ཅན་མཚུངས་གཟིགས་དང༌། །མཛད་པ་ཡོངས་སུ་མ་རྫོགས་ཕྱིར། །འཁོར་བ་སྲིད་དུ་མཛད་མི་འཆད། །ཅེས་གསུངས་པ་ལྟར་རོ། །
མཚན་ཉིད་ཐེག་པའི་འབྲས་བུ་གཏན་ལ་དབབ་པ་སྐབས་དང་པོའི་འགྲེལ་བའོ།། །།