དཔལ་རྟ་མགྲིན་གྱི་སྒྲུབ་ཐབས།
མར་མེ་མཛད་ཡེ་ཤེས།
དཔལ་རྟ་མགྲིན་གྱི་སྒྲུབ་ཐབས། འཇིག་རྟེན་དབང་ཕྱུག་ལ་ཕྱག་འཚལ་ལོ། །དོན་མེད་དག་ལ་གནོད་པའི་བྱ་བ་རྣམས་སྤངས་ཏེ། །རི་བཞིན་བརྟན་པས་རྣམ་དཔེན་ས་ཕྱོགས་སོང་ནས་ནི། །གནས་དེར་བསམ་གཏན་ཁང་པ་ཤིན་ཏུ་ཡིད་འཐད་པར། །འོག་གིས་གཞི་ཤིན་ཏུ་འཐས་པ་ཁོ་ན་ལ། །ས་ལ་མ་ལྷུང་ལྕི་བ་དྲི་བཟང་རྣམས་དང་ནི། །བསྲེས་པས་ལེགས་བྱུགས་གཟུགས་བརྙན་འཆར་པ་ལྟ་བུར་བྱ། །དྲི་ཞིམ་མེ་ཏོག་དག་གིས་གཏོར་ལ་རྒྱན་རྣམས་བྲེ། །དཀྱིལ་འཁོར་དག་ཏུ་ཞུགས་ཤིང་དམ་ཚིག་ལ་གནས་པའམ། །སོ་སོར་ཐར་ལ་གནས་པའམ་བྱང་ཆུབ་སེམས་བསྐྱེད་པས། །བདེ་བའི་སྟན་ལ་གནས་ནས་བདུན་པོ་རྣམ་པར་དག་པར་བྱས། །དེ་རྗེས་ཚད་མེད་བཞི་ཡིས་བདག་བློ་ལེགས་པར་སྦྱང༌། །ཤཱུ་ནྱ་ཏཱའི་སྔགས་ཀྱིས་སྟོང་པ་ཉིད་དུ་བསྒོམ། །བདག་ཉིད་རྣམ་ཤེས་ངོ་བོ་ཡི་གེ་པཾ་དུ་ལྟ། པཾ་དེ་ཡོངས་སུ་གྱུར་བས་པདྨ་འདབ་མ་བརྒྱད། །པདྨའི་ལྟེ་བར་ཨ་ལས་ཟླ་བའི་དཀྱིལ་འཁོར་རོ། །དེ་སྟེང་པཾ་ལས་ཉི་མ་དེ་སྟེང་ཧཱུ༵་བསམ་བྱ། །དེ་ལས་རྡོ་རྗེའི་ལྟེ་བར་ཧཱུ༵་གིས་མཚན་པ་བསམ། །དེ་ལས་འོད་འཕྲོས་ས་གཞིར་བ་གུར་དུ་གྱུར། །རྡོ་རྗེ་ཧཱུ༵་བཅས་དེ་ལས་གཞལ་ཡས་ཁང་པ་བསྐྱེད། །དེ་ནས་རྡོ་རྗེ་ཧཱུཾ་བཅས་ལས། །བདག་ཉིད་རྟ་མགྲིན་སྐུར་གྱུར་ཏེ། །དམར་པོ་ཞལ་གསུམ་ཕྱག་ཞབས་བཞི། །དབུས་དམར་གཡས་སྔོ་གཡོན་དཀར་བ། །དབུས་མའི་གཙུག་ནས་རྟ་མགོ་ལྗང༌། །གྱེན་དུ་ཁ་བལྟས་རྟ་སྐད་འབྱིན། །དང་པོ་རྡོ་རྗེ་པདྨ་བསྣམས། །ཐ་མ་གཉིས་ཀྱིས་མདའ་གཞུ་འགེངས། །རིགས་ལྔའི་བདག་ཉིད་དབུ་ལའོ། །དབུ་སྐྲ་ཁམ་ནག་གྱེན་དུ་བརྫེས། །ཐོད་པའི་ཕྲེང་བས་རབ་ཏུ་བརྒྱན། །ཡན་ལག་དྲུག་ལ་སྦྲུལ་གྱིས་བརྒྱན། །སྐུ་སྨད་སྟག་གི་པགས་པས་གཡོགས། །ཞབས་བཞི་ཡིས་ནི་འཇིག་རྟེན་གྱི། །ལྷ་ཆེན་བཞི་ནི་རབ་ཏུ་མནན།
མེ་དབུང་འབར་བའི་དཀྱིལ་ན་བཞུགས། །དཀྱིལ་འཁོར་གྱི་ནི་ཕྱོགས་བཞིར་ནི། །ཤར་དུ་རྡོ་རྗེ་ལས་བྱེད་མ། །ཞལ་གཅིག་ཕྱག་གཉིས་སྔོན་པོར་བསྒོམ། །ལྷོ་རུ་གཤིན་རྗེ་ལས་བྱེད་མ། །ཞལ་གཅིག་ཕྱག་གཉིས་ནག་མོར་བསྒོམ། །ནུབ་ཏུ་ཀླུ་ཡི་ལས་བྱེད་མ། །ཞལ་གཅིག་ཕྱག་གཉིས་དཀར་མོར་བསྒོམ། །བྱང་དུ་གནོད་སྦྱིན་ལས་བྱེད་མ། །ཞལ་གཅིག་ཕྱག་གཉིས་སེར་མོར་བསྒོམ། །གཡས་པ་ཀུན་ལ་གྲི་གུག་སྟེ། །གཡོན་པ་ཀུན་ལ་ཐོད་ཁྲག་བསྣམས། །དཀྱིལ་འཁོར་འཁོར་ལོ་རྫོགས་ནས་ནི། །ཡེ་ཤེས་སེམས་དཔའ་བཀུག་ལ་གཞུག །ལྷ་ཡི་འཁོར་ལོ་བསྒོམ་བྱས་ལ། །ལས་རྣམས་འདོད་ན་བཟླས་པ་བྱ། །ཨོཾ་ཧ་ཧ་ཧི་ཧི་ཧྲིཾ་ཧྲིཾ་ཧྲི་ཧྲི་ཧཱུ༵་ཧཱུ༵་ཕཊ་ཕཊ། །བསྙེན་པ་གྲངས་བཞིན་བཟླས་ནས་ནི། །ལས་བྱེད་རྣམས་ཀྱི་མཚན་སྔགས་བཟླས། །བཛྲ་ཤོ་ན་ས་མ་ཡ། ཡ་མ་ཤོ་ན་ས་མ་ཡ། ནཱ་ག་ཤོ་ན་ས་མ་ཡ། ཁ་རག་ཤོ་ན་ས་མ་ཡ། །རྒྱལ་འགོང་རྒྱལ་ཚེ་ལ་མ་ཤ་དོམ། རོ་ལ་ཁྲག་འཐུང་ལ་སྙིང་ཁྲག་བཛྲ་ས་དུ་ས་མ་ཡ་ཛཿབཛྲ་ཛཿཏྲིག་རོག་ཏ་འབྱུང་པོ་མཱ་ར་ཡ་སྙིང་ཁྲག་ཛཿཧཱུ༵་བཾ་ཧོཿབཛྲ་ཨ་གུ་ཤ་ཛཿའྦྱུང་པོའི་ཚེ་ལ་མ་ཤ་དོམ། རོ་ལ་ཁྲག་འཐུང༌། སྙིང་ཁྲག་འཐུང༌། སྙིང་ཁྲག་འབྱུང་བོ་འབྱུང་མོ་པྲ་ཏི་པྲི་མོའི་ཚེ་ལ་མ་ཤ་དོམ། རོ་ལ་ཁྲག་འཐུང་སྙིང་ཁྲག་མ་ལཱ་མ་ལཱ་ཡེས་ཡེས་བྷྱོ་བྷྱོ་ཀྲོཾ་ཀྲོཾ་སྭཱ་ཧཱ། ཨོཾ་བཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུ༵་ཕཊ། ཨོཾ་ཌ་ཀི་ཙ་ཏི་བི་ཙ་ཏི། ཧུ་ཡ་ཧུ་ཡ། ཧུ་ལུ་ཧུ་ལུ། པུ་རུ་ཏེ་པུ་རུ་ཏེ་ཧཱུ༵་ཕཊ་སྭཱ་ཧཱ། ཉ་ཤ་སྒོག་བཙོང་སྤངས་པ་ཡི། །གཏོར་མ་ལྔའམ་བཟང་པོ་དབུལ། །ཇི་ལྟར་འདོད་དོན་གསོལ་བ་གདབ། །དཔལ་རྟ་མགྲིན་གྱི་སྒྲུབ་ཐབས་སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།།