རྡོ་རྗེ་རྣམ་པར་འཇོམས་པའི་གཟུངས་ཀྱི་སྒྲུབ་ཐབས་ཞེས་བྱ་བ།
ཡེ་ཤེས་རྡོ་རྗེ།
རྒྱ་གར་སྐད་དུ། བཛྲ་བི་དཱ་ར་ཎ་དྷཱ་ར་ཎཱི་སཱ་དྷ་ནཱ་མ། བོད་སྐད་དུ། རྡོ་རྗེ་རྣམ་པར་འཇོམས་པའི་གཟུངས་ཀྱི་སྒྲུབ་ཐབས་ཞེས་བྱ་བ། བཅོམ་ལྡན་འདས་དཔལ་ཀུན་དུ་བཟང་པོ་ལ་ཕྱག་འཚལ་ལོ། །མི་ཤིགས་ཀུན་འཇོམས་རྡོ་རྗེ་འཛིན། །ཁྲོས་ཤིང་གཏུམ་པའི་སྐུ་མངའ་བ། །རྡོ་རྗེ་ཡོན་ཏན་རྫོགས་བཏུད་དེ།། དེ་ཉིད་བསྒྲུབ་པའི་རིམ་པ་བཤད། །དད་བརྟན་གཡོ་དང་ང་རྒྱལ་མེད། །སེར་སྣ་ཆུང་ཞིང་བླ་མར་གུས། །འདི་ལ་ལྷག་པར་ཆེ་དད་པས། །བསྒྲུབ་པ་འདི་འབད་བདེ་ལེགས་ཤོག །དང་པོར་ཡིད་འོང་ཕྱོགས་སུ་ཡང༌། །འགྲོ་བ་བསྒྲལ་བའི་བསམ་པ་ཡིས། །རྟག་ཏུ་འདི་ལ་བརྩོན་པར་བྱ། །མཎྜལ་མཆོད་དང་གཏོར་མ་དང༌། །ལས་དང་པོ་ཡི་རྣལ་འབྱོར་པས། །དམིགས་པའི་རྟེན་ཀྱང་བྲི་བར་བྱ། །རང་ཉིད་ཕྱི་ནང་ཁྲུས་བྱས་ཏེ། །ཁྱད་པར་དུ་ནི་ལུས་ཀྱི་ཁྲུས། །དྲི་ཡི་ཆུ་ཡིས་རྟག་ཏུ་བྱ། །བདེ་བའི་སྟན་ལ་འདུག་ནས་ནི། །རང་ཉིད་ཟླ་བ་ས་བོན་བསམ། །དེ་ཡི་འོད་ཀྱིས་བླ་མ་སོགས། །ནམ་མཁའི་ཕྱོགས་སུ་དམིགས་ནས་ནི། །བྱིན་གྱིས་བརླབ་པར་གསོལ་བ་གདབ། །དེ་ནས་སེམས་ཅན་ཐམས་ཅད་ལ། །ལྷག་པར་བྱམས་པ་བསྐྱེད་པར་བྱ། །དེ་བཞིན་སྙིང་རྗེ་དགའ་བ་དང༌། །བཏང་སྙོམས་ཚུལ་བཞིན་བསྒོམ་པར་བྱ། །དེ་རྗེས་རྣམ་པར་མི་རྟོག་པའི། །རྡོ་རྗེའི་རང་བཞིན་བསྒོམ་པར་བྱ། །དེ་ལ་ཅུང་ཟད་དམིགས་ནས་ནི། །རྣམ་པར་རྟོག་པར་ལྡང་བར་བྱ། །གཟུགས་ལ་སོགས་པ་མི་དམིགས་ཀྱང༌། །སྔགས་ཀྱི་སྒྲ་རུ་བསྒོམ་པར་བྱ། །དེ་རྗེས་རང་གི་ཤེས་པ་ནི། །སྔགས་ཀྱི་ཕྲེང་བར་བསྒོམ་པར་བྱ། །གསུང་གི་རྣམ་པར་རྫོགས་པ་ཡི། །ཕྲ་ཞིང་གསལ་པའི་རྣམ་པར་རོ། །དེ་ནས་ཟླ་བའི་དཀྱིལ་འཁོར་དེ། །གསལ་ཞིང་ཆ་མ་འདྲེས་པར་བསམ། །དེ་ཡི་འོད་ཀྱིས་འགྲོ་བ་རྣམས། །རྣམ་པར་འཇོམས་པ་བྱས་ནས་ནི། །ཚུར་ལ་བསྡུ་བའི་ཚུལ་གྱིས་ནི། །རང་སྙིང་རྣམ་པར་འཇོམས་པར་བསྒོམ། །ཞབས་
གཉིས་ཆུ་འཛིན་དག་ལ་ནི། །གཡོན་བརྐྱང་པས་ནི་རྣམ་པར་བཞུགས། །སྐུ་ནི་ཨིནྡྲ་ནཱི་ལ་དང༌། །རྡོ་རྗེ་སྙིང་པོ་དང་ཡང་མཚུངས། །མཆེ་བ་རྣམ་པར་གཙིགས་པ་སྟེ། །སྤྱན་དམར་དཔྲལ་བ་ཁྲོ་གཉེར་ཅན། །མགོ་སྐྱེས་དམར་སེར་གྱེན་འགྲེང་བ། །གསུས་པ་ཆེ་ཞིང་སྤྲུལ་གྱིས་བརྒྱན། །སྨད་ནི་བ་ཏི་མནབས་བ་སྟེ། །སྐུ་སྟོད་དར་ལ་ཡིས་དཀྲིས་པ། །རིན་པོ་ཆེ་ཡི་དཔུང་རྒྱན་ཅན། །རང་གི་བདག་པོ་དབུ་ལ་གནས། །གཡས་པ་རྒྱ་གྲམ་ཕྱོགས་གསུམ་བསྣམས། །གཡོན་པ་སྡིགས་མཛུབ་ཐུགས་ཀར་འཛིན། །སྲ་ཞིང་མཁྲེགས་པའི་སྐུ་དང་ལྡན། །འཇའ་ལྟར་གསལ་བའི་བདག་ཉིད་དུ། །བདག་ཉིད་རྟག་ཏུ་བསམ་པར་བྱ། །དམ་ཚིག་ཕྱག་རྒྱ་བཅིང་བར་བྱ། །སྔགས་འདིས་བྱིན་གྱིས་བརླབ་བྱ་ཞིང༌། །གནས་ལྔ་དག་ཏུ་གཏུག་པར་བྱ། །ཨོཾ་བཛྲ་ཛྭ་ལཱ་ན་ལཱ་ཡ་སྭཱ་ཧཱ། དེ་ནས་རང་མདོག་ཕྱག་མཚན་དང༌། །བློ་ཡིས་གསལ་བར་བསྒོམ་པར་བྱ། །གསལ་བ་སྒྱུ་མའི་རང་བཞིན་དུ། །བདག་ཉིད་རྟག་ཏུ་བསམ་པར་བྱ། །དེ་ལས་སྐྱོན་སྔགས་བཟླས་པ། །དེ་ནི་ཕྱི་དང་ནང་གིའོ། །དེ་ལ་ནང་གི་བཤད་བྱ་སྟེ། །རང་ཉིད་ཟླ་བ་རང་ས་བོན། །དེ་ཡི་མཐའ་མ་གསང་སྔགས་རྒྱལ། །མུ་ཏིག་འཇའ་དང་མར་མེ་ལྟར། །རྣམ་པ་དེ་ལྡན་ཟླ་བར་བསྒོམ། །དེ་ལ་ཅུང་ཞིག་དམིགས་ནས་ནི། །ཡང་ནི་གསང་སྔགས་རྒྱལ་བོ་བཟླས། །དེ་དག་ནི་ན་མོ་རཏྣ་ཏྲ་ཡཱ་ཡ་ཞེས་པ་ནས། ཨ་མྲྀ་ཏེ་ཧཱུཾ་ཕཊ་ཅེས་པའི་བར་དུའོ། །དེ་ནི་སྒྲ་དང་བཅས་པའོ། །རང་སྙིང་ཁྲོ་བོའི་ཚོགས་སྤྲོས་ཏེ། །ཀུན་ཀྱང་གསང་སྔགས་རྒྱལ་པོ་ཟློས། །སྔགས་ཀྱི་འབྲུག་གི་སྒྲ་དང་བཅས། །ཕྱོགས་རྣམས་ཀུན་དུ་རྣམ་པར་སྤྲོ། །གདུག་པ་ཅན་རྣམས་པ་སྡིགས་པར་མཛད། །དེ་བཞིན་སྤྲོ་ཞིང་བསྡུ་བ་ནི། །མཚོན་ཆའི་འཁོར་ལོ་དྲག་སྤྱོད་ལ། །ཞི་ལ་འོད་ཟེར་དཀར་པོ་སྟེ། །དབང་ལ་ལྕགས་ཀྱུ་དམར་པོའོ། །རྒྱས་པ་ལ་ནི་སེར་པོ་སྟེ། །དེ་ལྟར་ལས་དང་རྗེས་མཐུན་པར། །འོད་ཟེར་དག་ཀྱང་སྤྲོ་བར་བྱ། །ཕྱི་ནི་ནམ་མཁའི་ཟླ་དཀྱིལ་དུ། །ཡི་གེའི་ཕྲེང་པ་བསམ་བྱས་ཏེ། །རྒྱུད་ལས་ཇི་སྐད་བཤད་པ་བཞིན། །སྒྲ་ལ་གནས་པའི་བསམ་གཏན་བྱ། །དེ་ལྟར་བསམ་གཏན་འབུམ་གྱི་བར། །སྔོན་དུ་བསྙེན་པ་བྱ་བའོ། །དེ་
ལྟར་བསྙེན་པ་རྫོགས་ནས་ནི། །ལས་རྣམས་ཀུན་དུ་སྤྱད་པར་བྱ། །དེ་དག་རབ་ཏུ་བཤད་པ་ནི། །རིག་སྔགས་བཅད་དང་བཅིང་བ་དང༌། །བུར་བུས་གདབ་ཅིང་མནན་པར་བྱ། །དེ་བཞིན་ནོར་སོགས་རྒྱས་པ་དང༌། །སྡིག་སོགས་ཞི་དང་དབང་དུ་བྱ། །དེ་ལ་དབང་དུ་བྱ་བ་ནི། །བྱི་རུ་དམར་འདྲའི་ས་གཞི་ལ། །མོ་ཡི་པདྨའི་དབྱིབས་འདྲ་བའི། །ཐབ་ཁུང་དག་ནི་བཅའ་ཞིང་བསམ། །དེ་ནས་སྟར་བུའི་མེ་བུས་ཏེ། །མེ་ཡི་ལྷ་ནི་བདག་པོ་ཉིད། །དམར་པོ་ལྕགས་ཀྱུ་ཐོགས་བསམས་ནས། །མངོན་བྱས་ནས་ནི་འོད་ཟེར་སྤྲོ། །གསང་སྔགས་མཇུག་ལ་ལས་མཐུན་གདགས། །སྟར་བུའི་འབྲུ་དང་མེ་ཏོག་དམར། །ཕུབ་མ་དག་ནི་བརྒྱ་སྟོང་སྲེག །དེ་ཡིས་གང་འདོད་དེ་བཞིན་ནོ། །པད་ལྟར་དཀར་བའི་ས་གཞི་ལ། །ཟླ་རྒྱས་འདྲ་བའི་ཐབ་ཁུང་དུ། །ཙནྡན་དཀར་པོའི་མེ་སྤར་ཏེ། །རང་ལྷ་དཀར་པོ་བདུད་རྩིར་ལྡན། །དེ་ལ་སྐད་ཅིག་དམིགས་བྱས་ལ། །ཙནྡན་དཀར་པོའི་འོ་མ་སྦགས། །དེ་བཞིན་དཀར་པོའི་རྫས་རྣམས་ལ། །དེ་བཞིན་ཡང་ནི་སྔགས་བཟླས་ཏེ། །ཇི་ཙམ་ནུས་པའི་སྦྱིན་སྲེག་བྱ། །ས་གཞི་སེར་ཞིང་འཕོས་བ་ན། །དབང་ཆེན་ལྟ་བུའི་དབྱིབས་སུ་བྱ། །མཁས་པས་ཐབ་ནི་བཅའ་བྱ་ཞིང༌། །སྟར་ཀ་ཨ་རུ་ར་ཡི་མེ། །ཆོ་ག་དང་བཅས་སྦར་བྱ་སྟེ། །འབྲས་བུར་བཅས་པའི་ཡམ་ཤིང་ལ། །དེ་བཞིན་བ་རུ་ལ་སོགས་ཀྱིས། །དབང་ཆེན་ལ་གནས་བཅོམ་ལྡན་འདས། །གསེར་མདོག་འདྲ་ཞིང་དབང་ཆེན་འཕྲོ། །དེ་ལ་སྦྱིན་སྲེག་སྟོང་བྱས་ལ། །གང་དག་འདོད་པ་རྒྱས་པར་བྱ། །དེ་དག་ལས་ཀྱི་རིམ་པ་སྟེ། །རང་ཉིད་བསྙེན་པ་རྫོགས་པས་སུ། །གསང་སྔགས་རྒྱལ་པོ་རྗེས་དྲན་བྱ། །གང་དག་གདོན་གྱིས་ཉེན་པ་ཡི། །ཆོ་ག་ལ་སོགས་བཤད་པར་བྱ། །དཀྱིལ་འཁོར་ལེགས་པར་བྱས་ནས་ནི། །བུམ་པ་རྫས་སོགས་ལྡན་པར་བྲི། །གསང་སྔགས་བརྒྱ་དང་གཅིག་བཟླས་ཏེ། །བསྒྲུབ་བྱ་དཀྱིལ་འཁོར་སྟེང་གཞག་སྟེ། །དེ་ལ་ཁྲུས་ནི་ལན་གསུམ་བྱ། །སྲུང་སྐུད་མདུད་བ་གསུམ་པ་ནི། །དཔུང་བའམ་སྲིན་ལག་དག་ལ་བཅིང༌། །དེས་ནི་གྲོལ་བར་ཐེ་ཚོམ་མེད། །འཁོར་ལོ་དག་གིས་བསྲུང་བྱ་ནི། །རྩིབས་བཞིའི་མཚམས་སུ་མཚོན་ཆར་
ལྡན། །མུ་ཁྱུད་མེ་རི་རྡོ་རྗེས་བསྐོར། །གུར་ཀུན་གི་ཝཾ་དག་གིས་བྲིས་ནས་ནི། །སྔ་དྲོ་ཆོ་ག་ལྡན་པར་བསྲུང་བར་བྱ། །དེ་ལྟར་འདི་ནི་བསྲུང་བའི་རྒྱལ་པོ་སྟེ། །འགྲོ་བ་རྣམས་ལ་གསང་སྔགས་རྒྱལ་པོས་བརླབ། །དེ་རྒྱུད་དེ་དང་གཞན་ལས་གསུངས་པའོ། །ཨོཾ་བཛྲ་ཛྭ་ལཱ་ན་ལཱ་ཡ་སྭཱ་ཧཱ། ཨོཾ་ཙུ་རུ་ཙུ་རུ་ཙཎྜ་ཀི་ལི་ཀཱི་ལཱ་ཡ་སྭཱ་ཧཱ། ཨོཾ་ཏྲཱ་ས་ཡ་ཏྲཱ་ས་ཡ་བཛྲ་ཀི་ལི་ཀཱི་ལཱ་ཡ་སྭཱ་ཧཱ། ཨོཾ་ཧ་ར་ཧ་ར་བཛྲ་དྷ་རཱ་ཡ་སྭཱ་ཧཱ། ཨོཾ་པྲ་ཧ་ར་པྲ་ཧ་ར་བཛྲ་པྲ་བྷཉྫ་ནཱ་ཡ་སྭཱ་ཧཱ། བསྲུང་བ་ཡིའོ། །ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཎ་ཡ། མཧཱ་ཡཀྵ་སེ་ནཱ་བ་ཏ་ཡེ། ཏདྱ་ཐཱ། ཨོཾ་སརྦ་བྱཱ་དྷི། སརྦ་བིགྷྣཱན། སརྦ་དུར་སྭ་པྣི། སརྦ་དུ་རྨི་ཏི། སརྦ་གྲ་ཧེ། སརྦ་ཛྭ་རེ། སརྦཱ་ཀཱ་ལ་མྲྀ་ཏྱུ། སརྦ་ཨུ་པ་དྲ་པེ་བྷྱཿ། སརྦ་ཤ་ཏྲཱུཾ། སརྦ་པཱ་པཾ་ཤཱནྟིཾ་ཀུ་རུ་སྭཱ་ཧཱ་ཞེས་ཁྲུས་ཀྱིའོ། །ཨོཾ་སརྦ་པུཥྚ་ཡེ་པུཥྚིཾ་ཀུ་རུ་སྭཱ་ཧཱ། རྒྱས་པའིའོ། །ཨོཾ་བཛྲ་བ་ཤཾ་ཀུ་རུ་སྭཱ་ཧཱ་ཞེས་དབང་དུ་བྱའོ། །འདི་རྣམས་ལས་དང་མཐུན་པའི་སྔགས་ཁ་ལས་ཀྱང་ཤེས་པར་བྱའོ། །འདི་ནི་རྡོ་རྗེ་རྣམ་འཇོམས་ཀྱི་སྒྲུབ་ཐབས་རྒྱུད་དང་འབྲེལ་པའི་ལས་དང་བཅས་པར་ཤེས་པར་བྱའོ། །གཞན་ཡང་འདིར་མ་བཀོད་པ་རྣམས་བླ་མའི་ཞལ་ལས་ཤེས་པར་བྱའོ། །འདི་ནི་སྒྲུབ་ཐབས་ཀུན་གྱི་རྒྱལ། །རང་སེམས་མོས་པའི་རྗེས་འབྲེལ་པའི། །རྟོག་པ་དང་བཅས་སྒྲུབ་པའི་ཐབས། །རྣལ་འབྱོར་རྣམས་ལ་ཕན་བྱེད་ཡིན། །འདི་བྱས་བསོད་ནམས་དྲི་མེད་པ། །ཟླ་བ་ཡར་ངོ་བཞིན་དུ་འཕེལ་གྱུར་པའི། །འགྲོ་རྣམས་མོས་པའི་བྱེ་བྲག་འགྲུབ་གྱུར་ཏེ། །རྣམ་པར་འཇོམས་པའི་སྐུ་འགྲུབ་ཤོག །རྡོ་རྗེ་རྣམ་པར་འཇོམས་པའི་སྒྲུབ་ཐབས་ལས་དང་བཅས་པ་སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་སོ།།