འཕགས་མ་གཙུག་ཏོར་རྣམ་པར་རྒྱལ་མའི་སྒྲུབ་ཐབས།
རྒྱ་གར་སྐད་དུ། ཨཱཪྻ་ཨུཥྞཱི་ཥ་བི་ཛ་ཡཱ་སཱ་དྷ་ནཾ། བོད་སྐད་དུ། འཕགས་མ་གཙུག་ཏོར་རྣམ་པར་རྒྱལ་མའི་སྒྲུབ་ཐབས། འཕགས་མ་གཙུག་ཏོར་རྣམ་པར་རྒྱལ་མ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ཁ་བསང་བ་ལ་སོགས་པ་བྱས་ནས་སྟན་བདེ་བ་ལ་ཉེ་བར་འདུག་སྟེ། ཚད་མེད་པའི་གནས་བཞི་བསྒོམ་པར་བྱའོ། །དེའི་རྗེས་ལ་རང་གི་སྙིང་གར་ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་བསམས་ནས། དེའི་སྟེང་དུ་བྷྲཱུཾ་ཡིག་དཀར་པོ་བལྟས་ལ་དེ་ལས་བྱུང་བའི་འོད་ཟེར་གྱི་ཚོགས་ཀྱིས་འགྲོ་བ་རྣམས་གསལ་བར་མཛད་ནས། མདུན་དུ་སངས་རྒྱས་དང་བྱང་ཆུབ་སེམས་དཔའ་རྣམས་བསམས་ནས་མཆོད་པ་དང་སྡིག་པ་བཤགས་པ་ལ་སོགས་པ་རྣམས་བྱའོ། །དེ་ནས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་སོ། །དེ་ནས་སླར་ཡང་རང་གི་སྙིང་གར་ཟླ་བ་ལ་པཾ་ཡིག་ལས་སྐྱེས་པའི་སྣ་ཚོགས་ཆུ་སྐྱེས་བསམས་ནས། དེའི་སྟེང་དུ་ཟླ་བའི་དཀྱིལ་འཁོར་གྱི་དབུས་སུ་གནས་པའི་བྷྲཱུཾ་ཡིག་དཀར་པོ་བལྟས་ལ། དེ་ཡོངས་སུ་གྱུར་པ་ལས་གཙུག་ཏོར་རྣམ་པར་རྒྱལ་མ་མཆོད་རྟེན་གྱི་དྲུང་དུ་བཞུགས་པ་སྐུ་མདོག་དཀར་མོ་ཞལ་གསུམ་པ་སྤྱན་གསུམ་པ། ཕྱག་བརྒྱད་པ། རྒྱན་ཐམས་ཅད་ཀྱིས་བརྒྱན་པ། སྣ་ཚོགས་ཆུ་སྐྱེས་དང་ཟླ་བ་ལ་རྡོ་རྗེ་སྐྱིལ་ཀྲུང་བཅིངས་ནས་བཞུགས་པ། ཞལ་དང་པོ་དཀར་པོ། ཞལ་གཡས་པ་སེར་པོ། ཞལ་གཡོན་པ་སྔོན་པོ། མཆེ་བས་མ་མཆུ་མནན་པ། གཡས་ཀྱི་ཕྱག་བཞི་རྣམས་སུ་སྣ་ཚོགས་རྡོ་རྗེ་དང། ཆུ་སྐྱེས་དམར་པོའི་སྟེང་ན་བཞུགས་པའི་རྒྱལ་བ་འོད་དཔག་མེད་པ་དང༌། མདའ་དང་མཆོག་སྦྱིན་གྱི་ཕྱག་རྒྱ་རྣམས་སོ། །གཡོན་གྱི་ཕྱག་བཞི་རྣམས་སུ་གཞུ་དང༌། སྡིགས་མཛུབ་དང་བཅས་པའི་ཞགས་པ་དང༌། མི་འཇིགས་པ་སྦྱིན་པའི་ཕྱག་རྒྱ་དང༌། བུམ་པ་བཟང་པོ་རྣམས་སོ། །རྣམ་པར་སྣང་མཛད་ཀྱིས་དབུ་བརྒྱན་ཅིང་ལྷའི་ན་བཟའི་སྟོད་གཡོགས་མནབས་པ། སྣ་ཚོགས་པའི་རྒྱན་གྱིས་བརྒྱན་པ། འོད་ཟེར་དཀར་པོའི་ཕྲེང་བ་ཅན་དུ་བལྟ་བར་བྱའོ། །དེའི་གཡས་ཕྱོགས་སུ་འཇིག་རྟེན་དབང་ཕྱུག་སྐུ་མདོག་དཀར་པོ་གཡོན་ན་
པདྨ་བསྣམས་པ། ཕྱག་གཡས་ན་རྔ་ཡབ་བསྣམས་པའོ། །གཡོན་ཕྱོགས་སུ་ཕྱག་ན་རྡོ་རྗེ་སྐུ་མདོག་ཨུཏྤ་ལ་སྔོན་པོའི་འདབ་མ་ལྟ་བུ་ཕྱག་གཡོན་ན་ཨུཏྤ་ལ་ལ་གནས་པའི་རྡོ་རྗེ་བསྣམས་པ། ཕྱག་གཡས་ན་རྔ་ཡབ་བསྣམས་པ་དེ་དག་བཞུགས་པར་བསམ་པར་བྱའོ། །དེ་ནས་ཤར་དང༌། ལྷོ་དང༌། ནུབ་དང༌། བྱང་ཕྱོགས་རྣམས་སུ་མི་གཡོ་བ་དང་འདོད་པའི་རྒྱལ་པོ་དང༌། དབྱུག་སྔོན་ཅན་དང༌། སྟོབས་པོ་ཆེ་རྣམས་ཐམས་ཅད་སྐུ་མདོག་སྔོན་པོ་ཕྱག་གཉིས་པ། ཞལ་གཅིག་པ། སྤྱན་གསུམ་པ། ཞབས་གཡོན་བརྐྱང་བའི་སྟག་གི་པགས་པའི་ན་བཟའ་མནབས་པ། དབུ་སྐྲ་གྱེན་དུ་བརྫེས་པ། ཀླུ་བརྒྱད་ཀྱིས་བརྒྱན་པ། སྣ་ཚོགས་ཆུ་སྐྱེས་དང་ཉི་མ་ལ་བཞུགས་པ། ཕྱག་གཡོན་པ་སྡིགས་མཛུབ་དང་བཅས་པའི་ཞགས་པ་བསྣམས་པ། ཕྱག་གཡས་པ་རྣམས་སུ་རལ་གྲི་དང༌། ལྕགས་ཀྱུ་དང། དབྱུག་པ་དང༌། རྡོ་རྗེ་བསྣམས་པ་བསྒོམ་པར་བྱའོ། །སྟེང་གི་ཕྱོགས་སུ་གནས་གཙང་མའི་རིས་ཀྱི་ལྷའི་བུ་བདུད་རྩིས་བཀང་བའི་བུམ་པ་བསྣམས་ཤིང་བདུད་རྩིའི་རྒྱུན་འབབ་བཞིན་པ་བསམ་པར་བྱའོ། །དེ་ལྟ་བུའི་བཅོམ་ལྡན་འདས་མ་འཁོར་དང་བཅས་པ་བསམ་ཞིང་དགོད་པར་བྱའོ། །ཨོཾ་ཡིག་ནི་སྤྱི་བོར་རོ། །ཨཱཿཡིག་ནི་མགྲིན་པ་ལའོ། །ཧཱུཾ་ཡིག་ནི་སྙིང་གར་རོ། །ཏྲཱཾ་ཡིག་ནི་དཔྲལ་བ་ལའོ། །ཧྲཱིཿཡིག་ནི་ལྟེ་བ་ལའོ། །ཨཾ་ཨཱཿརྐང་པ་དག་ལའོ། །དེ་ནས་ཕྱག་རྒྱ་བཅིང་བར་བྱའོ། །ཐལ་མོ་ཡང་དག་པར་སྦྱར་ནས་མཛུབ་མོ་བཀུག་ནས་མཐེབ་ཆེན་དག་དང་སྦྱར་བ་ལེགས་པར་སྦྱིན་པར་མཛད་ནས། ཨོཾ་ཡིག་གསུམ་དང་བཅས་པའི་གཟུངས་ལན་ཅིག་བཟླས་ནས་ཕྱི་ནས་འདུལ་བའི་ཕྱག་རྒྱས་སྔགས་བཟླས་པར་བྱའོ། །ཨོཾ་བྷྲཱུཾ་སྭཱ་ཧཱ་སྙིང་པོའི་སྔགས་སོ། །ཨོཾ་ཨ་མི་ཏ་ཨཱ་ཡུརད་དེ་སྭཱ་ཧཱ། ཉེ་བའི་སྙིང་པོའི་སྔགས་སོ། །ཨོཾ་ཨ་མི་ཏེ་ཨ་མེ་ཏོད་བྷ་བེ་ཨ་མེ་ཏ་བི་ཀྲཱན་ཏེ་ཨ་མི་ཏ་ག་ཏེ་ཨ་མི་ཏེ་གཱ་མི་ནི་ཨ་མི་ཏཱ་ཡུརད་དེ་ག་གན་ཀཱིརྟི་ཀ་རེ་སརྦ་ཀླེ་ཤ་ཀྵ་ཡཾ་ཀ་རི་ཡཻ་སྭཱ་ཧཱ། ཞེས་པ་ནི་ཕྲེང་བའི་སྔགས་སོ། །འཕགས་མ་གཙུག་ཏོར་རྣམ་པར་རྒྱལ་མའི་སྒྲུབ་ཐབས་རྫོགས་སོ།། །།