ལས་གདགས་པ།

---

^{[མ་དཔེ་གཟིགས་ན་འདིར་གནོན།]}

རྒྱ་གར་སྐད་དུ། ཀར་མ་པྲཛྙཱ་པྟི། བོད་སྐད་དུ། ལས་གདགས་པ། དཀོན་མཆོག་གསུམ་ལ་ཕྱག་འཚལ་ལོ། །སྡོམ་ནི། ཆེད་དུ་བྱས་དང་སེམས་པ་དང༌། །འདས་པ་དང་ནི་དགེ་བ་དང༌། །དམིགས་པ་དང་ནི་འདོད་པའི་ཁམས། །ཚིགས་སུ་བཅད་དང་ལས་བསྡུ་བ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ང་ནི་ཆེད་དུ་བྱས་ཤིང་བསགས་པའི་རྣམ་པར་སྨིན་པ་ཉམས་སུ་མྱོང་བར་སྟོན་ཏེ། དེ་ཡང་ཚེ་འདི་དང༌། སྐྱེས་པའི་འོག་དང༌། ལན་གྲངས་གཞན་ལ་མྱོང་བར་འགྱུར་བའོ། །དགེ་སློང་དག་དེ་ལ་ལུས་ཀྱིས་ཆེད་དུ་བྱས་ཤིང་བསགས་པ། མི་དགེ་བ་སྡུག་བསྔལ་སྐྱེད་པ། རྣམ་པར་སྨིན་པ་སྡུག་བསྔལ་བ་ནི་རྣམ་པ་གསུམ་མོ། །ངག་གི་ནི་རྣམ་པ་བཞིའོ། །ཡིད་ཀྱི་ནི་རྣམ་པ་གསུམ་མོ། །དགེ་སློང་དག་ལུས་ཀྱིས་ཆེད་དུ་བྱས་པའི་ལས་བྱས་ཤིང་བསགས་པ། མི་དགེ་བ་སྡུག་བསྔལ་

---

^{[མ་དཔེ་གཟིགས་ན་འདིར་གནོན།]}

བསྐྱེད་པ། རྣམ་པར་སྨིན་པ་སྡུག་བསྔལ་བ་རྣམ་པ་གསུམ་ཇི་ལྟ་བུ་ཡིན་ཞེ་ན། སྲོག་གཅོད་པ་ནི་དྲག་ཅིང་ལག་དམར་བ་བསད་པ་དང༌། རབ་ཏུ་བསད་པ་ལ་ཞེན་པ་ངོ་ཚ་མེད་པ། སེམས་ཅན་སྲོག་ཆགས་སུ་གྱུར་པ་ཐམས་ཅད་ལ་ཐ་ན་སྲོག་ཆགས་གྲོག་སྦུར་ཡན་ཆད་ལ་སྙིང་རྗེ་མེད་པ་ཡིན་ཏེ། དེ་ནི་སྲོག་གཅོད་པ་མ་སྤངས་པ་ཡིན་ནོ། །མ་བྱིན་པར་ལེན་པ་ནི་དེས་གྲོང་ངམ། དགོན་པ་ནས་མ་བྱིན་པར་རྐུན་ཐབས་སུ་བླངས་པ་ཡིན་ཏེ། མ་བྱིན་པར་ལེན་པ་མ་སྤངས་པ་ཡིན་ནོ། །འདོད་པ་ལ་ལོག་པར་གཡེམ་པ་ནི་གཞན་གྱི་བུད་མེད། གཞན་གྱི་ཆུང་མ་གཞན་གྱིས་ཡོངས་སུ་བཟུང་བ་འདི་ལྟ་སྟེ། མས་བསྲུངས་པ་འམ། ཕས་བསྲུངས་པ་འམ། མིང་པོས་བསྲུངས་པ་འམ། ཕུ་ནུ་མོས་བསྲུངས་པ་འམ། སྒྱུག་མོས་བསྲུངས་པའམ། གྱོས་པོས་བསྲུངས་པ་འམ། རིགས་གཅིག་པས་བསྲུངས་པ་འམ། གཉེན་གྱིས་བསྲུངས་པའམ། རུས་གཅིག་པས་བསྲུངས་པའམ། ཆད་པ་ཡོད་པའམ། བགེགས་ཡོད་པ་གང་ཡིན་པ་དེ་དག་དང༌། ཐ་ན་མེ་ཏོག་གི་ཕྲེང་བ་བཏགས་པ་ཡང་རུང་སྟེ། དེ་ལྟ་བུའི་འདོད་པའི་ཉེ་བའི་ཉོན་མོངས་པ་རྣམས་ཀྱིས་སྤྱོད་པ་ལ་འཇུག་པ་ཡིན་ཏེ། དེ་ནི་འདོད་པ་ལ་ལོག་པར་གཡེམ་པ་མ་སྤངས་པ་ཡིན་ནོ། །དགེ་སློང་དག་དེ་ལྟར་ན་ཆེད་དུ་བྱས་པའི་ལས་རྣམ་པ་གསུམ་བྱས་ཤིང་བསགས་པ་མི་དགེ་བ་སྡུག་བསྔལ་བསྐྱེད་པ། རྣམ་པར་སྨིན་པ་སྡུག་བསྔལ་བ་ཡིན་ནོ། །དགེ་སློང་དག་གང་གིས་ཆེད་དུ་བྱས་པའི་ལས་རྣམ་པ་བཞི་བྱས་ཤིང་བསགས་པ། མི་དགེ་བ་སྡུག་བསྔལ་བསྐྱེད་པ། རྣམ་པར་སྨིན་པ་སྡུག་བསྔལ་བ་ཇི་ལྟ་བུ་ཞེ་ན། བརྫུན་དུ་སྨྲ་བ་ནི་དེ་ཚོགས་པའི་ནང་ན་འདུག་ཀྱང་རུང༌། འཁོར་གྱི་ནང་ན་འདུག་ཀྱང་རུང༌། རྒྱལ་པོའི་ཕོ་བྲང་གི་ནང་ན་འདུག་ཀྱང་རུང༌། གཉེན་གྱི་ཁྱིམ་གྱི་ནང་ན་འདུག་ཀྱང་རུང༌། ཆེ་བཞིར་དྲིས་ཏེ། ཀྱེ་མི་ཁྱོད་གང་ཤེས་པ་དེ་ནི་སྨྲོས་ཤིག །གང་མི་ཤེས་པ་དེ་ནི་མ་སྨྲ་ཤིག །གང་མཐོང་བ་དེ་ནི་སྨྲོས་ཤིག །གང་མ་མཐོང་བ་དེ་ནི་མ་སྨྲ་ཞིག་ཅེས་བྱས་ན། དེ་མི་ཤེས་བཞིན་དུ་ནི་ཤེས་སོ་ཞེས་ཟེར། ཤེས་བཞིན་དུ་ནི་མི་ཤེས་སོ་ཞེས་ཟེར། མ་མཐོང་བཞིན་དུ་ནི་མཐོང་

---

^{[མ་དཔེ་གཟིགས་ན་འདིར་གནོན།]}

ངོ་ཞེས་ཟེར། མཐོང་བཞིན་ད་ནི་མ་མཐོང་ངོ་ཞེས་ཟེར་ཏེ། དེ་དག་གི་ཕྱིར་རམ། གཞན་གྱི་ཕྱིར་རམ། ཟང་ཟིང་ཆུང་ཟད་ཙམ་གྱི་ཕྱིར། ཤེས་བཞིན་དུ་བརྫུན་དུ་སྨྲ་བ་མ་སྤངས་པ་ཡིན་ནོ། །ཕྲ་མ་ཟེར་བ་ནི་ཚུ་རོལ་པ་རྣམས་ཀྱི་ཐོས་ནས། དེ་དག་དབྱེ་བའི་ཕྱིར་ཕ་རོལ་པ་རྣམས་ཀྱི་ཐད་དུ་སོང་སྟེ་བསྙད་ལ། དེ་དག་གིས་ཐོས་ན་ཡང་ཚུ་རོལ་པ་རྣམས་དབྱེ་བའི་ཕྱིར། ཚུ་རོལ་པ་རྣམས་ཀྱི་ཐད་དུ་སོང་སྟེ། བསྙད་པར་བྱེད་དེ། དེ་ལྟར་འདུམ་པ་རྣམས་དབྱེ་བ་དང༌། དབྱེ་བ་རྣམས་ལ་རྗེས་སུ་ཕྱོགས་ལ། མི་མཐུན་པར་འདོད་ཅིང་མི་མཐུན་པར་དགའ་སྟེ་མི་མཐུན་པར་འགྱུར་བའི་ཚིག་སྨྲ་བ་ནི་ཕྲ་མ་མ་སྤངས་པ་ཡིན་ནོ། །ཚིག་རྩུབ་པོར་སྨྲ་བ་ནི་དེས་ཚིག་འཇམ་ཞིང་རྣར་སྙན་ལ། ཡིད་དུ་འོང་བ་དང༌། སྙན་བ་དང༌། འདོད་པར་བྱ་བ་དང༌། ཕོ་བྲང་འཁོར་གྱི་སྐད་དང༌། སྙན་ཅིང་འཇབས་པ་དང༌། ཟུར་ཕྱིན་པ་དང༌། བརྡ་ཕྲད་པ་དང༌། རྣར་འོང་བ་དང༌། སྐྱེ་བོ་མང་པོའི་སྙིང་དུ་སྡུག་བ་དང༌། སྐྱེ་བོ་མང་པོས་གཅེས་པར་བྱ་བ་དང༌། སྐྱེ་བོ་མང་པོ་དགའ་བ་དང༌། སྐྱེ་བོ་མང་པོའི་ཡིད་དུ་འོང་བ་དང༌། མཉམ་པར་གཞག་པ་དང༌། ཏིང་ངེ་འཛིན་དུ་འགྱུར་བ་གང་ཡིན་པ་དེ་དག་དང༌། དེ་ལྟ་བུའི་ཚིག་བོར་ཏེ། ཚིག་ཀུན་དུ་ཟུག་པ་དང༌། རྩུབ་པ་དང༌། གཞན་གྱིས་མི་བཟོད་པ་དང༌། གཞན་གྱི་ཞེར་འདེབས་པ་དང༌། སྐྱེ་བོ་མང་པོའི་སྙིང་དུ་མི་སྡུག་པ་དང༌། སྐྱེ་བོ་མང་པོས་གཅེས་པར་མི་བྱ་བ་དང༌། སྐྱེ་བོ་མང་པོ་མི་དགའ་བ་དང༌། སྐྱེ་བོ་མང་པོའི་ཡིད་དུ་མི་འོང་བ་དང༌། མཉམ་པར་གཞག་པ་མ་ཡིན་པ་དང༌། ཏིང་ངེ་འཛིན་དུ་གྱུར་པ་མ་ཡིན་པ་གང་ཡིན་པ་རྣམས་ཏེ། དེ་ལྟ་བུའི་ཚིག་རྣམས་སྨྲ་བ་ནི། ཚིག་རྩུབ་བོ་མ་སྤངས་པ་ཡིན་ནོ། །ཚིག་ཀྱལ་པ་ནི་དེ་དུས་མ་ཡིན་པར་སྨྲ་བ་དང༌། ཡང་དག་པ་མ་ཡིན་པར་སྨྲ་བ་དང༌། མི་བདེན་པར་སྨྲ་བ་དང༌། ཕན་པ་མ་ཡིན་པར་སྨྲ་བ་དང༌། སྐུར་པ་སྨྲ་བ་དང༌། ཆོས་མ་ཡིན་པ་སྨྲ་བ་དང༌། གྱ་ཚོམ་དུ་སྨྲ་ཞིང་བབ་ཆོལ་གྱི་ཚིག་སྨྲ་བ་དང༌། གཏན་ཚིགས་མེད་པ་དང༌། སྙད་མེད་པ་དང༌། དོན་དང་མི་ལྡན་པ་དང༌། འཆལ་བ་རྣམས་ཀྱི་ཚིག་ཀྱལ་བ་མ་སྤངས་པ་ཡིན་ནོ། །དགེ་སློང་དག་དེ་ལྟར་ན་ངག་གིས་ཆེད་དུ་བྱས་པའི་ལས་རྣམ་པ་བཞི་བྱས་ཤིང་བསྩགས་

---

^{[མ་དཔེ་གཟིགས་ན་འདིར་གནོན།]}

པ་མི་དགེ་བ་སྡུག་བསྔལ་བསྐྱེད་པ། རྣམ་པར་སྨིན་པ་སྡུག་བསྔལ་བ་ཡིན་ནོ། །དགེ་སློང་དག་ཡིད་ཀྱིས་ཆེད་དུ་བྱས་པའི་ལས་རྣམ་པ་གསུམ་བྱས་ཤིང་བསགས་པ། མི་དགེ་བ་སྡུག་བསྔལ་བསྐྱེད་པ། རྣམ་པར་སྨིན་པ་སྡུག་བསྔལ་བ་ཇི་ལྟ་བུ་ཞེ་ན། བརྣབ་སེམས་ནི་ཕ་རོལ་གྱི་རྫས་རྣམས་དང༌། ཕ་རོལ་གྱི་ནོར་རྣམས་དང༌། ཕ་རོལ་གྱི་ཡོ་བྱད་རྣམས་མཐོང་ན། བརྣབ་སེམས་སྐྱེད་པར་བྱེད་དེ། ཀྱེ་མ་འདི་དག་བདག་ལ་ཡོད་ཀྱང་ཇི་མ་རུང་སྙམ་སྟེ། བརྣབ་སེམས་མ་སྤངས་པ་ཡིན་ནོ། །གནོད་སེམས་ཀྱིས་སྡང་བར་བྱེད་པ་ནི། ཀྱེ་མ་སེམས་ཅན་འདི་དག་བརྒྱབ་ཀྱང་རུང་ངོ༌། །བསད་ཀྱང་རུང་ངོ༌། །ཉམས་པར་བྱས་ཀྱང་རུང་ངོ༌། །མི་རིགས་པར་ཉོན་མོངས་ཀྱང་རུང་ངོ་སྙམ་པ་ནི་གནོད་སེམས་ཀྱི་སྡང་བ་མ་སྤངས་པ་ཡིན་ནོ། །ལོག་པར་ལྟ་བ་ནི་ཕྱིན་ཅི་ལོག་ཏུ་ལྟ་ཞིང་འདི་ལྟར་ལྟ་ལ། འདི་སྐད་དུ་སྨྲ་སྟེ། སྦྱིན་པ་མེད་དོ། །མཆོད་སྦྱིན་མེད་དོ། །སྦྱིན་སྲེག་མེད་དོ། །ལེགས་པར་སྤྱད་པ་མེད་དོ། །ཉེས་པར་སྤྱད་པ་མེད་དོ། །ལེགས་པར་སྤྱད་པ་དང༌། ཉེས་པར་སྤྱད་པའི་ལས་རྣམས་ཀྱི་འབྲས་བུ་རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །ཕ་མེད་དོ། །མ་མེད་དོ། །སེམས་ཅན་སྐྱེ་བ་མེད་དོ། །འཇིག་རྟེན་ན་དགྲ་བཅོམ་པ་ཡང་དག་པར་སོང་བ་ཡང་དག་པར་ཞུགས་པ་གང་འཇིག་རྟེན་འདི་དང་འཇིག་རྟེན་ཕ་རོལ་ཚེ་འདི་ཉིད་ལ་དག་ཉིད་ཀྱིས་མངོན་པར་ཤེས་པས་མངོན་སུམ་དུ་བྱས་ཏེ། བསྒྲུབས་ནས་ཁོང་དུ་ཆུད་དེ། བདག་ཅག་གི་སྐྱེ་བ་ཟད་དོ། །ཚངས་པར་སྤྱད་པ་བསྟེན་ཏོ། །བྱ་བ་བྱས་སོ། །འདི་ལས་སྲིད་པ་གཞན་གྱི་ཤེས་སོ་སྙམ་དུ་སེམས་པ་མེད་དོ་ཞེས་བྱ་བ་ནི་ལོག་པར་ལྟ་བ་མ་སྤངས་པ་ཡིན་ནོ། །དགེ་སློང་དག་དེ་ལྟར་ན་ཡིད་ཀྱིས་ཆེད་དུ་བྱས་པའི་ལས་རྣམ་པ་གསུམ་བྱས་ཤིང་བསགས་པ། མི་དགེ་བ་སྡུག་བསྔལ་བསྐྱེད་པ། རྣམ་པར་སྨིན་པ་སྡུག་བསྔལ་བ་ཡིན་ནོ། །དགེ་སློང་དག་དེ་ལ་ཐོས་པ་དང་ལྡན་པའི་འཕགས་པ་ཉན་ཐོས་ནི། ལུས་ཀྱི་ལས་མི་དགེ་བ་སྤངས་ནས། ལུས་ཀྱི་ལས་དགེ་བ་སྒོམ་པར་བྱེད་དོ། །ངག་གི་ལས་མི་དགེ་བ་སྤངས་ནས། ངག་གི་ལས་དགེ་བ་སྒོམ་པར་བྱེད་དོ། །ཡིད་ཀྱི་ལས་མི་དགེ་བ་སྤངས་

---

^{[མ་དཔེ་གཟིགས་ན་འདིར་གནོན།]}

ནས། ཡིད་ཀྱི་ལས་དགེ་བ་སྒོམ་པར་བྱེད་དོ། །དེ་བྱམས་པ་དང་ལྡན་པའི་སེམས་ཁོན་མེད་པ་དང༌། གཅུགས་མེད་པ་དང༌། གནོད་པ་མེད་པ་དང༌། རྒྱ་ཆེ་བ་དང༌། ཆེན་པོར་གྱུར་པ་དང༌། ཚད་མེད་པས་ཕྱོགས་གཅིག་ཏུ་མོས་པར་བྱས་ཏེ། ཁྱབ་པར་བྱས་ནས་བསྒྲུབས་ཏེ་གནས་སོ། །ཕྱོགས་གཉིས་པ་ཡང་དེ་བཞིན་ནོ། །གསུམ་པ་ཡང་དེ་བཞིན་ནོ། །བཞི་པ་ཡང་དེ་བཞིན་ནོ། །སྟེང་དང་འོག་དང༌། ཐད་ཀ་ཐམས་ཅད་དུ་ཡང་དེ་བཞིན་ཏེ། འཇིག་རྟེན་འདི་ཐམས་ཅད་བྱམས་པ་དང་ལྡན་བའི་སེམས་ཀྱིས་མོས་པར་བྱས་ཏེ། ཁྱབ་པར་བྱས་ནས་བསྒྲུབས་ཏེ་གནས་སོ། །དེ་འདི་སྙམ་དུ་སེམས་ཏེ། བདག་གིས་སེམས་འདི་སྔོན་ནི་ཆུང་ངུར་གྱུར་པ་ལ་མ་བསྒོམས། དེ་ནི་བདག་གི་སེམས་འདི་ཚད་མེད་ཅིང༌། རྒྱ་ཆེ་ལ་བསྒོམས་པ་ཡིན་ནོ་སྙམ་མོ། །དགེ་སློང་དག་འཕགས་པ་ཉན་ཐོས་ཀྱི་སེམས་ནི་ཚད་མེད་ཅིང་རྒྱ་ཆེ་ལ་ཤིན་ཏུ་བསྒོམས་པ་ཡིན་ཏེ། དེའི་སྔོན་ཚད་ཡོད་པར་གྱུར་པ་གང་ཡིན་པ་དེས་དེ་བཀྲི་བར་མི་འགྱུར་རོ། །དེ་དེར་གནས་པར་ཡང་མི་འགྱུར་རོ། །དེ་དེར་བགྲང་བར་ཡང་མི་འགྱུར་རོ། །དགེ་སློང་དག་གལ་ཏེ་བྱིས་པ་གཞོན་ནུའམ། གཞོན་ནུ་མ་ཡང་རུང་སྟེ། ཐོག་མ་ནས་བྱམས་པ་སེམས་ཀྱིས་ཏིང་ངེ་འཛིན་བསྒོམས་ན་ཡང་ཅི་ལུས་སམ། ངག་གམ་ཡིད་ཀྱིས་སྡིག་པའི་ལས་བྱེད་པར་འགྱུར་རམ། བཙུན་པ་དེ་ནི་མ་ལགས་སོ། །དགེ་སློང་དག་ལེགས་སོ་ལེགས་སོ། །བྱམས་པའི་སེམས་ཀྱིས་ཏིང་ངེ་འཛིན་ནི་སྐྱེས་པ་ཡང་རུང༌། བུད་མེད་ཀྱང་རུང༌། ཁྱིམ་པ་ཡང་རུང༌། རབ་ཏུ་བྱུང་བ་ཡང་རུང་བས་བསྒོམ་པར་བྱའོ། །དེ་ཅིའི་ཕྱིར་ཞེ་ན། སྐྱེས་པ་ཡང་རུང༌། བུད་མེད་ཀྱང་རུང༌། ཁྱིམ་པ་ཡང་རུང༌། རབ་ཏུ་བྱུང་བ་ཡང་རུང་བས་ནི། ལུས་འདི་ཁྱེར་ཏེ་འགྲོ་བར་མི་འགྱུར་བའི་ཕྱིར་རོ། །དགེ་སློང་དག་མི་ནི་སེམས་ཀྱི་རྒྱུ་ལས་འབྱུང་བ་ཡིན་ཏེ། སེམས་ལ་བརྟེན་ཅིང༌། སེམས་ལ་རག་ལས་ལ་སེམས་ལ་བརྟེན་ནས་དབང་བྱེད་དོ། །ལུས་འདིས་སྔོན་སྡིག་པ་མི་དགེ་བའི་ལས་བྱས་ཤིང་བསགས་པ། མི་དགེ་བ་སྡུག་བསྔལ་བསྐྱེད་པ། རྣམ་པར་སྨིན་པ་སྡུག་བསྔལ་བ་གང་ཡིན་པ་དེ་དག་ཐམས་ཅད་འདིར་མྱོང་བར་འགྱུར་ཏེ། ཚེ་འདི་ཉིད་ལ་མྱོང་བར་འགྱུར་གྱི། སྐྱེས་པའི་འོག་

---

^{[མ་དཔེ་གཟིགས་ན་འདིར་གནོན།]}

དང༌། ལན་གྲངས་གཞན་ལ་མ་ཡིན་ནོ། །དགེ་སློང་དག་དེ་ལྟར་བྱམས་པའི་ཏིང་ངེ་འཛིན་བསྒོམས་པ་ནི། གལ་ཏེ་གོང་དུ་རྟོགས་པར་མ་བྱས་ན་ཡང་ཕྱིར་མི་འོང་བར་གནས་པར་འགྱུར་རོ། །དགེ་སློང་དག་གཞན་ཡང་ཐོས་པ་དང་ལྡན་པའི་འཕགས་པ་ཉན་ཐོས་ནི། ལུས་ཀྱི་ལས་མི་དགེ་བ་སྤངས་ནས་ཞེས་བྱ་བ་ནས། རྒྱས་པར་སྙིང་རྗེ་དང་ལྡན་པ་དང༌། དགའ་བ་དང་ལྡན་པ་དང༌། བཏང་སྙོམས་དང་ལྡན་པ་ཡང་དེ་བཞིན་དུ་བརྗོད་པར་བྱ་སྟེ། དེ་སྐད་ཅེས་བཀའ་སྩལ་ཏོ། །ཆེད་དུ་བྱས་པ་ཞེས་བྱ་བ་ལ་དེ་ལ་སེམས་པའི་ལས་དང༌། བསམ་པའི་ལས་དང་གཉིས་ཡོད་དེ། སེམས་པའི་ལས་གང་ཞེ་ན། སྨྲས་པ། སེམས་པ་དང༌། མངོན་བར་སེམས་པ་དང༌། སེམས་པར་གྱུར་པ་དང༌། སེམས་པར་གཏོགས་པ་དང༌། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་གང་ཡིན་པ་འདི་ནི་སེམས་པའི་ལས་ཞེས་བྱའོ། །བསམ་པའི་ལས་གང་ཞེ་ན། སྨྲས་པ། བསམ་པའི་ལུས་ཀྱི་ལས་དང་བསམ་པའི་ངག་གི་ལས་འདི་ནི་བསམ་པའི་ལས་ཞེས་བྱའོ། །དེ་ལ་སེམས་པའི་ལས་ནི་འདས་པ་ཡང་ཡོད་དོ། །མ་འོངས་པ་ཡང་ཡོད་དོ། །ད་ལྟར་བྱང་བ་ཡང་ཡོད་དོ། །སེམས་པའི་ལས་འདས་པ་གང་ཞེ་ན། སྨྲས་པ། སེམས་པ་གང་སྐྱེས་པ་དང༌། ཡང་དག་པར་སྐྱེས་པ་དང༌། བྱུང་བ་དང༌། གྲུབ་པ་དང༌། མངོན་པར་གྲུབ་པ་དང༌། ཡང་དག་པར་གྲུབ་པ་དང༌། བྱུང་བར་གྱུར་ནས་མངོན་པར་འདས་པ་དང༌། ཟད་པ་དང༌། འགགས་པ་དང༌། བྲལ་བ་དང༌། རྣམ་པར་གྱུར་པ་དང༌། འདས་པ་དང༌། འདས་པའི་ཆར་གཏོགས་པ་དང༌། འདས་པའི་དུས་ཀྱིས་བསྡུས་པ་འདི་ནི་སེམས་པའི་ལས་འདས་པའོ། །སེམས་པའི་ལས་མ་འོངས་པ་གང་ཞེ་ན། སྨྲས་པ། སེམས་པའི་ལས་གང་མ་སྐྱེས་པ་དང༌། ཡང་དག་པར་མ་སྐྱེས་པ་དང༌། མ་བྱུང་བ་དང༌། ཡང་དག་པར་མ་བྱུང་བ་དང་ད་དུང་མ་ཕྱིན་པ་དང༌། མངོན་པར་མ་གྲུབ་པ་དང༌། མ་བྱུང་བ་དང༌། མ་འོངས་པ་དང༌། མ་འོངས་པའི་ཆར་གཏོགས་པ་དང༌། མ་འོངས་པའི་དུས་ཀྱིས་བསྡུས་པ་འདི་ནི། སེམས་པའི་ལས་མ་འོངས་པའོ། །སེམས་པའི་ལས་ད་ལྟར་བྱུང་བ་གང་ཞེ་ན། སྨྲས་པ། སེམས་པ་གང་

---

^{[མ་དཔེ་གཟིགས་ན་འདིར་གནོན།]}

སྐྱེས་པ་དང༌། ཡང་དག་པར་སྐྱེས་པ་དང༌། བྱུང་བ་དང༌། ཡང་དག་པར་བྱུང་བ་དང༌། ཕྱིན་ཟིན་པ་དང༌། བྱུང་བར་གྱུར་པ་དང༌། གནས་པ་དང༌། རྣམ་པར་མ་གྱུར་པ་དང༌། ད་ལྟར་འདུག་པ་ནས་རྒྱས་པར་སྦྱར་ཏེ། འདི་ནི་སེམས་པའི་ལས་ད་ལྟར་བྱུང་བའོ། །དེ་ལ་སེམས་པའི་ལས་ནི་དགེ་བ་ཡང་ཡོད་མི་དགེ་བ་ཡང་ཡོད། ལུང་དུ་མ་བསྟན་པ་ཡང་ཡོད་དོ། །སེམས་པའི་ལས་དགེ་བ་གང་ཞེ་ན། སྨྲས་པ། དགེ་བ་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། ཇི་ལྟ་ཞེ་ན། འདི་ལྟ་སྟེ། ཆགས་བ་མེད་པ་དང༌། སྡང་བ་མེད་པ་དང༌། རྨོངས་པ་མེད་པས་ཚུལ་བཞིན་དུ་སོ་སོར་བརྟགས་ནས། མིག་གིས་གཟུགས་རྣམས་མཐོང་བ་དང༌། རྣ་བས་སྒྲ་རྣམས་ཐོས་པ་དང༌། སྣས་དྲི་རྣམས་བསྣམ་པ་དང༌། ལྕེས་རོ་རྣམས་མྱང་བ་དང༌། ལུས་ཀྱིས་རེག་བྱ་རྣམས་རེག་པ་དང༌། ཡིད་ཀྱིས་ཆོས་རྣམས་རྣམ་པར་ཤེས་པའི་སེམས་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་པ་ཞེས་བྱའོ། །གཞན་ཡང་ཡོངས་སུ་ཟིན་པ་མ་ཡིན་པས། བསམ་གཏན་བཞི་དང༌། གཟུགས་མེད་པ་བཞི་སྒོམ་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་པ་ཞེས་བྱའོ། །གཞན་ཡང་སྲོག་གཅོད་པ་སྤངས་པ་དང་ལྡན་པའི་ཡིད་ལ་བྱེད་པ་དང་མཚུངས་པར་ལྡན་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་དང༌། བརྣབ་སེམས་དང༌། གནོད་སེམས་སྤངས་པ་དང༌། ཡང་དག་པའི་ལྟ་བ་དང་ལྡན་པའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་པ་ཞེས་བྱའོ། །གཞན་ཡང་ཁྲོ་བ་མེད་པ་དང༌། ཁོན་དུ་འཛིན་པ་མེད་པ་དང༌། འཆབ་པ་མེད་པ་དང༌། འཚིག་པ་མེད་པ་དང༌། ཕྲག་དོག་མེད་པ་དང༌། སེར་སྣ་མེད་པ་དང༌། སྒྱུ་མེད་པ་དང༌། གཡོ་

---

^{[མ་དཔེ་གཟིགས་ན་འདིར་གནོན།]}

མེད་པ་དང༌། ངོ་ཚ་ཤེས་པ་དང༌། ཁྲེལ་ཡོད་པ་དང་ལྡན་པའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་བ་ཞེས་བྱའོ། །གཞན་ཡང་གསོང་པོར་སྨྲ་བ་དང༌། ཕྱག་འཚལ་བ་དང༌། མངོན་དུ་ལྡང་བ་དང༌། ཐལ་མོ་སྦྱར་བ་དང༌། འདུད་པ་དང་ལྡན་པའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་པ་ཞེས་བྱའོ། །གཞན་ཡང་སྦྱིན་བ་དག་སྦྱིན་བ་འམ། བསོད་ནམས་དག་བྱེད་པའམ། གསོ་སྦྱོང་ལ་ཉེ་བར་གནས་པའམ། ཚུལ་ཁྲིམས་ཡང་དག་པར་བླངས་ཏེ་འདུག་པའམ། དད་པའི་སེམས་ཀྱིས་རང་གི་ལག་དར་ཏེ་ལས་བྱེད་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་པ་ཞེས་བྱའོ། །གཞན་ཡང་དགེ་བའི་ཡིད་ལ་བྱེད་པས་སྡུག་བསྔལ་ལ་སྡུག་བསྔལ་བར་ཡིད་ལ་བྱེད་པའམ། ཀུན་འབྱུང་བ་ལ་ཀུན་འབྱུང་བ་འམ། འགོག་པ་ལ་འགོག་པ་འམ། ལམ་ལ་ལམ་དུ་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་བ་ཞེས་བྱའོ། །མི་དགེ་བའི་སེམས་པ་གང་ཞེ་ན། སྨྲས་པ། མི་དགེ་བའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་མི་དགེ་བའི་སེམས་པ་ཞེས་བྱ་སྟེ། ཅི་ལྟ་ཞེ་ན། འདི་ལྟར་ཆགས་པ་འམ། སྡང་བ་འམ། རྨོངས་པས་ཚུལ་བཞིན་མ་ཡིན་པ་དང༌། སོ་སོར་མ་བརྟགས་པར་མིག་གིས་གཟུགས་རྣམས་མཐོང་བ་དང༌། ཡིད་ཀྱིས་ཆོས་རྣམས་རྣམ་པར་ཤེས་པའི་བར་གྱི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་མི་དགེ་བའི་སེམས་པ་ཞེས་བྱའོ། །གཞན་ཡང་སྲོག་གཅོད་པ་དང་ལྡན་པའི་ཡིད་ལ་བྱེད་པ་དང༌། མཚུངས་པར་ལྡན་པ་དང༌། མ་བྱིན་པར་

---

^{[མ་དཔེ་གཟིགས་ན་འདིར་གནོན།]}

ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་དང་ལྡན་པའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་མི་དགེ་བའི་སེམས་པ་ཞེས་བྱའོ། །གཞན་ཡང་ཁྲོ་བ་དང༌། ཁོན་དུ་འཛིན་པ་དང༌། འཆབ་པ་དང༌། འཚིག་པ་དང༌། ཕྲག་དོག་དང༌། སེར་སྣ་དང༌། སྒྱུ་དང༌། གཡོ་དང༌། ངོ་ཚ་མི་ཤེས་པ་དང༌། ཁྲེལ་མེད་པ་དང་ལྡན་པའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་མི་དགེ་བའི་སེམས་པ་ཞེས་བྱའོ། །གཞན་ཡང་ལག་པ་དང༌། ཁུ་ཚུར་དང༌། ཐལ་ལྕག་གིས་བསྣུན་པ་དང༌། ཡལ་ག་དང་ལྕུག་མས་གནོད་པར་བྱ་བ་དང་ལྡན་པའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་མི་དགེ་བའི་སེམས་པ་ཞེས་བྱའོ། །གཞན་ཡང་མི་དགེ་བའི་ཀུན་དུ་སྦྱོར་བ་དང༌། འཆིང་བ་དང༌། བག་ལ་ཉལ་བ་དང༌། ཉེ་བའི་ཉོན་མོངས་པ་དང༌། ཀུན་ནས་དཀྲིས་པ་རྣམས་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་མི་དགེ་བའི་སེམས་པ་ཞེས་བྱའོ། །ལུང་དུ་མ་བསྟན་པའི་སེམས་པ་གང་ཞེ་ན། སྨྲས་པ། ལུང་དུ་མ་བསྟན་པའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས་སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་ལུང་དུ་མ་བསྟན་པའི་སེམས་པ་ཞེས་བྱའོ། །ཇི་ལྟར་ཞེ་ན་འདི་ལྟ་སྟེ། དགེ་བའི་སེམས་ཀྱང་མ་ཡིན། ཉོན་མོངས་པ་ཅན་གྱི་སེམས་ཀྱང་མ་ཡིན་པ། རང་བཞིན་དུ་མི་གནས་པ། སྤྱོད་ལམ་ལ་ཞུགས་པ། མིག་གིས་གཟུགས་རྣམས་མཐོང་བ་ནས། ཡིད་ཀྱི་ཆོས་རྣམས་རྣམ་པར་ཤེས་པའི་བར་གྱིས་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ།

---

^{[མ་དཔེ་གཟིགས་ན་འདིར་གནོན།]}

འདི་ནི་ལུང་དུ་མ་བསྟན་པའི་སེམས་པ་ཞེས་བྱའོ། །གཞན་ཡང་ཡོངས་སུ་ཟིན་པའི་སེམས་ཀྱིས་བསམ་གཏན་བཞི་དང༌། གཟུགས་མེད་པ་བཞི་བསྒོམ་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་ལུང་དུ་མ་བསྟན་པའི་སེམས་པ་ཞེས་བྱའོ། །གཞན་ཡང་ལུང་དུ་མ་བསྟན་པའི་ཀུན་དུ་སྦྱོར་བ་དང༌། འཆིང་བ་དང༌། བག་ལ་ཉལ་བ་དང༌། ཉེ་བའི་ཉོན་མོངས་པ་དང༌། ཀུན་ནས་དཀྲིས་པ་རྣམས་དང་མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་ལུང་དུ་མ་བསྟན་པའི་སེམས་པ་ཞེས་བྱའོ། །དགེ་བའི་སེམས་བ་དགེ་བ་ལ་དམིགས་པ་དང༌། མི་དགེ་བ་ལ་དམིགས་པ་དང༌། ལུང་དུ་མ་བསྟན་པ་ལ་དམིགས་པ་ཡོད་དམ། སྨྲས་པ། དགེ་བ་ལ་དམིགས་པ་ཡང་ཡོད་དོ། །མི་དགེ་བ་ལ་དམིགས་པ་ཡང་ཡོད་དོ། །ལུང་དུ་མ་བསྟན་པ་ལ་དམིགས་པ་ཡང་ཡོད་དོ། །དགེ་བ་དང་མི་དགེ་བ་ལ་དམིགས་པ་ཡང་ཡོད་དོ། །དགེ་བ་དང་ལུང་དུ་མ་བསྟན་པ་ལ་དམིགས་པ་ཡང་ཡོད་དོ། །དགེ་བ་དང་མི་དགེ་བ་དང་ལུང་དུ་མ་བསྟན་པ་ལ་དམིགས་པ་ཡང་ཡོད་དོ། །དགེ་བ་ཇི་ལྟ་བ་བཞིན་དུ་མི་དགེ་བ་དང༌། ལུང་དུ་མ་བསྟན་པ་ལ་དམིགས་པ་ཡང་དེ་དང་འདྲ་བར་ཡོད་པར་བརྗོད་པར་བྱའོ། །དགེ་བའི་སེམས་པ་ལ་དམིགས་པ་གང་ཞེ་ན། སྨྲས་པ། དགེ་བའི་ལུས་ཀྱི་ལས་དང༌། ངག་གི་ལས་དང༌། དགེ་བའི་སེམས་དང༌། སེམས་ལས་བྱུང་བའི་ཆོས་རྣམས་དང༌། དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། ཆོས་འདི་དག་ནི་རྒྱུ་དང་བཅས་པ་ལས་བྱུང་བ་འབྲས་བུ་ཡོད་པ། རྣམ་པར་སྨིན་པ་དང་བཅས་པ་ཡིན་ནོ་སྙམ་དུ་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་བ་དང༌། ཡང་ན་ཆོས་དེ་དག་གི་ཕན་ཡོན་དང་ལྡན་པའི་ཡིད་ལ་བྱེད་པས། ཡིད་ལ་བྱེད་ཅིང་ཆོས་འདི་དག་ནི་དགེ་བ་སྟེ། སྐྱེས་བུ་དམ་པས་རང་གིས་རྟོགས་པ། སངས་རྒྱས་རྣམས་དང༌། སངས་རྒྱས་ཀྱི་ཉན་ཐོས་རྣམས་དང༌། དམ་པ་རྣམས་དང༌། སྐྱེས་བུ་དམ་

---

^{[མ་དཔེ་གཟིགས་ན་འདིར་གནོན།]}

བ་རྣམས་ཀྱིས་བསྔགས་པ་སྟེ། ཟིན་ཅིང་ཡང་དག་པར་ཟིན་ན། བདག་ལ་ཡང་གནོད་པར་མི་འགྱུར་ཞིང༌། གཞན་ལ་ཡང་གནོད་པར་མི་འགྱུར་ལ། གཉི་ག་ལ་ཡང་གནོད་པར་མི་འགྱུར་ཏེ། ཤེས་རབ་སྐྱེ་བར་འགྱུར་བ་དང༌། ཕོངས་པར་འགྱུར་བའི་ཕྱོགས་དང་མཐུན་པ་མ་ཡིན་པ་དང༌། མྱ་ངན་ལས་འདའ་བར་འགྱུར་བ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་པ་དགེ་བ་ལ་དམིགས་པའོ། །དགེ་བའི་སེམས་པ་མི་དགེ་བ་ལ་དམིགས་པ་གང་ཞེ་ན། སྨྲས་པ། མི་དགེ་བའི་ལུས་ཀྱི་ལས་དང༌། ངག་གི་ལས་དང༌། མི་དགེ་བའི་སེམས་དང༌། སེམས་ལས་བྱུང་བའི་ཆོས་རྣམས་དང༌། མི་དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། ཆོས་འདི་དག་ནི་རྒྱུ་དང་བཅས་པ་ལས་བྱུང་བ་འབྲས་བུ་ཡོད་པ། རྣམ་པར་སྨིན་པ་དང་བཅས་པ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་བ་དང༌། ཡང་ན་ཆོས་དེ་དག་གི་ཉེས་དམིགས་དང་ལྡན་པའི་ཡིད་ལ་བྱེད་པས་ཡིད་ལ་བྱེད་ཅིང༌། ཆོས་འདི་དག་ནི་མི་དགེ་བ་ཡིན་ཏེ། སྐྱེས་བུ་དམ་པས་རང་གིས་རྟོགས་པ། སངས་རྒྱས་རྣམས་དང༌། སངས་རྒྱས་ཀྱི་ཉན་ཐོས་རྣམས་དང༌། དམ་པ་རྣམས་དང༌། སྐྱེས་བུ་དམ་པ་རྣམས་ཀྱིས་སྨད་པ་སྟེ། ཟིན་ཅིང་ཡང་དག་པར་ཟིན་ན། བདག་ལ་ཡང་གནོད་པར་གྱུར་ཞིང༌། གཞན་ལ་ཡང་གནོད་པར་འགྱུར་ལ། གཉི་ག་ལ་ཡང་གནོད་པར་འགྱུར་ཏེ། ཤེས་རབ་འགགས་པར་འགྱུར་བ་དང༌། ཕོངས་པར་འགྱུར་བའི་ཕྱོགས་དང་མཐུན་པ། མྱ་ངན་ལས་འདའ་བར་མི་འགྱུར་བ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་པ་མི་དགེ་བ་ལ་དམིགས་པའོ། །དགེ་བའི་སེམས་པ་ལུང་དུ་མ་བསྟན་པ་ལ་དམིགས་པ་གང་ཞེ་ན། སྨྲས་པ། ལུང་དུ་མ་བསྟན་པའི་གཟུགས་དང༌། ལུང་དུ་མ་བསྟན་པའི་སེམས་དང༌། སེམས་ལས་བྱུང་བའི་ཆོས་རྣམས་དང༌། ལུང་དུ་མ་བསྟན་པའི་སེམས་དང་

---

^{[མ་དཔེ་གཟིགས་ན་འདིར་གནོན།]}

མི་ལྡན་པའི་འདུ་བྱེད་རྣམས་དང༌། ཆོས་འདི་དག་ནི་རྒྱུ་མེད་པ་ལས་བྱུང་བ། འབྲས་བུ་མེད་པ་རྣམ་པར་སྨིན་པ་མེད་པ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་པ་ལུང་དུ་མ་བསྟན་པ་ལ་དམིགས་པའོ། །དགེ་བའི་སེམས་པ་དགེ་བ་དང༌། མི་དགེ་བ་ལ་དམིགས་པ་གང་ཞེ་ན། སྨྲས་པ། དགེ་བ་དང་མི་དགེ་བའི་ལུས་ཀྱི་ལས་དང༌། ངག་གི་ལས་དང༌། དགེ་བ་དང༌། མི་དགེ་བའི་སེམས་དང༌། སེམས་ལས་བྱུང་བའི་ཆོས་རྣམས་དང༌། དགེ་བ་དང༌། མི་དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། ཆོས་འདི་དག་ནི་རྒྱུ་ལས་བྱུང་བ། འབྲས་བུ་ཡོད་པ་རྣམ་པར་སྨིན་པ་དང་བཅས་པ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་པ་དགེ་བ་དང༌། མི་དགེ་བ་ལ་དམིགས་པའོ། །དགེ་བའི་སེམས་པ་དགེ་བ་དང༌། ལུང་དུ་མ་བསྟན་པ་ལ་དམིགས་པ་གང་ཞེ་ན། སྨྲས་པ། དགེ་བའི་ལུས་ཀྱི་ལས་དང༌། ངག་གི་ལས་དང༌། དགེ་བའི་སེམས་དང༌། སེམས་ལས་བྱུང་བའི་ཆོས་རྣམས་དང༌། དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། ལུང་དུ་མ་བསྟན་པའི་གཟུགས་དང༌། ལུང་དུ་མ་བསྟན་པའི་སེམས་དང༌། སེམས་ལས་བྱུང་བའི་ཆོས་རྣམས་དང༌། ལུང་དུ་མ་བསྟན་པའི་སེམས་དང་མི་ལྡན་པའི་འདུ་བྱེད་རྣམས་དང༌། ཆོས་འདི་དག་ནི་རྒྱུ་ལས་བྱུང་བ་དང༌། འབྲས་བུ་ཡོད་པ་དང༌། རྣམ་པར་སྨིན་པ་དང་བཅས་པ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་པ་དགེ་བ་དང༌། ལུང་དུ་མ་བསྟན་པ་ལ་དམིགས་པའོ། །དགེ་བའི་སེམས་པ་མི་དགེ་བ་དང༌། ལུང་དུ་མ་བསྟན་པ་ལ་དམིགས་པ་གང་ཞེ་ན། སྨྲས་པ། མི་དགེ་བའི་ལུས་ཀྱི་ལས་དང༌། ངག་གི་ལས་དང༌། མི་དགེ་བའི་སེམས་དང་སེམས་ལས་བྱུང་བའི་ཆོས་རྣམས་དང༌། མི་དགེ་བའི་

---

^{[མ་དཔེ་གཟིགས་ན་འདིར་གནོན།]}

སེམས་དང་མི་ལྡན་པའི་འདུ་བྱེད་རྣམས་དང༌། ལུང་དུ་མ་བསྟན་པའི་གཟུགས་དང༌། ལུང་དུ་མ་བསྟན་པའི་སེམས་དང༌། སེམས་ལས་བྱུང་བའི་ཆོས་རྣམས་དང༌། ལུང་དུ་མ་བསྟན་པའི་སེམས་དང་མི་ལྡན་པའི་འདུ་བྱེད་རྣམས་དང༌། ཆོས་འདི་དག་ནི་རྒྱུ་ལས་བྱུང་བ་འབྲས་བུ་ཡོད་པ། རྣམ་པར་སྨིན་པ་དང་བཅས་པ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་པ་མི་དགེ་བ་དང༌། ལུང་དུ་མ་བསྟན་པ་ལ་དམིགས་པའོ། །དགེ་བའི་སེམས་པ་དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་ལ་དམིགས་པ་གང་ཞེ་ན། སྨྲས་པ། དགེ་བ་དང་མི་དགེ་བའི་ལུས་ཀྱི་ལས་དང༌། ངག་གི་ལས་དང༌། དགེ་བ་དང་མི་དགེ་བའི་སེམས་དང༌། སེམས་ལས་བྱུང་བའི་ཆོས་རྣམས་དང༌། དགེ་བ་དང་མི་དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། ལུང་དུ་མ་བསྟན་པའི་གཟུགས་དང༌། ལུང་དུ་མ་བསྟན་པའི་སེམས་དང༌། སེམས་ལས་བྱུང་བའི་ཆོས་རྣམས་དང༌། ལུང་དུ་མ་བསྟན་པའི་སེམས་དང་མི་ལྡན་པའི་འདུ་བྱེད་རྣམས་དང༌། ཆོས་འདི་དག་ནི་རྒྱུ་ལས་བྱུང་བ། འབྲས་བུ་ཡོད་པ་རྣམ་པར་སྨིན་པ་དང་བཅས་པ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་དགེ་བའི་སེམས་པ་དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་ལ་དམིགས་པའོ། །མི་དགེ་བའི་སེམས་པ་དགེ་བ་ལ་དམིགས་པ་གང་ཞེ་ན། སྨྲས་པ། མི་དགེ་བའི་ལུས་ཀྱི་ལས་དང༌། ངག་གི་ལས་དང༌། མི་དགེ་བའི་སེམས་དང༌། སེམས་ལས་བྱུང་བའི་ཆོས་རྣམས་དང༌། མི་དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། ཆོས་འདི་དག་ནི་རྒྱུ་མེད་པ་ལས་བྱུང་བ་འབྲས་བུ་མེད་པ། རྣམ་པར་སྨིན་པ་མེད་པ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་བ་དང༌། ཡང་ན་ཆོས་དེ་དག་གི་ཕན་ཡོན་དང་ལྡན་བའི་ཡིད་ལ་བྱེད་པས་ཡིད་ལ་བྱེད་ཅིང༌། ཆོས་འདི་དག་ནི་དགེ་བ་ཡིན་ཏེ། སྐྱེས་

---

^{[མ་དཔེ་གཟིགས་ན་འདིར་གནོན།]}

བུ་དམ་པས་རང་གི་རྟོགས་པ་སངས་རྒྱས་རྣམས་དང༌། སངས་རྒྱས་ཀྱི་ཉན་ཐོས་རྣམས་ཀྱིས་བསྔགས་པ་ནས། རྒྱས་པར་གཉི་ག་ལ་ཡང་གནོད་པར་མི་འགྱུར་བའི་བར་དུ་སྦྱར་ཏེ། ཤེས་རབ་སྐྱེ་བར་འགྱུར་བ་དང༌། ཕོངས་པར་འགྱུར་བའི་ཕྱོགས་དང༌། མཐུན་པ་མ་ཡིན་པ་དང༌། མྱ་ངན་ལས་འདའ་བར་འགྱུར་བ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་མི་དགེ་བའི་སེམས་པ་དགེ་བ་ལ་དམིགས་པའོ། །མི་དགེ་བའི་སེམས་པ་མི་དགེ་བ་ལ་དམིགས་པ་གང་ཡིན་ཞེ་ན། སྨྲས་པ། མི་དགེ་བའི་ལུས་ཀྱི་ལས་དང༌། ངག་གི་ལས་དང༌། མི་དགེ་བའི་སེམས་དང་སེམས་ལས་བྱུང་བའི་ཆོས་རྣམས་དང༌། མི་དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། ཆོས་འདི་དག་ནི་རྒྱུ་མེད་པ་ལས་བྱུང་བ་འབྲས་བུ་མེད་པ། རྣམ་པར་སྨིན་པ་མེད་པ་ཡིན་ནོ་སྙམ་དུ་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་བ་དང༌། ཡང་ན་ཆོས་དེ་དག་གི་ཉེས་དམིགས་དང་ལྡན་པའི་ཡིད་ལ་བྱེད་པས་ཡིད་ལ་བྱེད་ཅིང་ཆོས་འདི་དག་ནི་མི་དགེ་བ་ཡིན་ཏེ། སྐྱེས་བུ་དམ་པ་མ་ཡིན་པས། རང་གི་རྟོགས་པ་སངས་རྒྱས་རྣམས་དང༌། སངས་རྒྱས་ཀྱི་ཉན་ཐོས་རྣམས་དང་དམ་པ་རྣམས་དང༌། སྐྱེས་བུ་དམ་པ་རྣམས་ཀྱིས་སྨད་པ་སྟེ། ཟིན་ཅིང་ཡང་དག་པར་ཟིན་ན། བདག་ལ་ཡང་གནོད་པར་འགྱུར་ཞིང༌། གཞན་ལ་ཡང་གནོད་པར་འགྱུར་ལ་གཉི་ག་ལ་ཡང་གནོད་པར་འགྱུར་ཏེ། ཤེས་རབ་འགག་པར་འགྱུར་བ་དང༌། ཕོངས་པར་འགྱུར་བའི་ཕྱོགས་དང་མཐུན་པ་དང༌། མྱ་ངན་ལས་འདའ་བར་མི་འགྱུར་བ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་མི་དགེ་བའི་སེམས་པ་མི་དགེ་བ་ལ་དམིགས་པའོ། །མི་དགེ་བའི་སེམས་པ་ལུང་དུ་མ་བསྟན་པ་ལ་དམིགས་པ་གང་ཞེ་ན། སྨྲས་པ། ལུང་དུ་མ་བསྟན་པའི་གཟུགས་དང༌། ལུང་དུ་མ་བསྟན་པའི་སེམས་དང་སེམས་ལས་བྱུང་བའི་ཆོས་རྣམས་དང༌། ལུང་དུ་མ་

---

^{[མ་དཔེ་གཟིགས་ན་འདིར་གནོན།]}

བསྟན་པའི་སེམས་དང་མི་ལྡན་པའི་འདུ་བྱེད་རྣམས་དང་ཆོས་འདི་དག་ནི་རྒྱུ་མེད་པ་ལས་བྱུང་བ། འབྲས་བུ་མེད་པ་རྣམ་པར་སྨིན་པ་མེད་པ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས་སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་མི་དགེ་བའི་སེམས་པ་ལུང་དུ་མ་བསྟན་པ་ལ་དམིགས་པའོ། །མི་དགེ་བའི་སེམས་པ་དགེ་བ་དང༌། མི་དགེ་བ་ལ་དམིགས་པ་གང་ཞེ་ན། སྨྲས་པ། དགེ་བ་དང༌། མི་དགེ་བའི་ལུས་ཀྱི་ལས་དང༌། ངག་གི་ལས་དང༌། དགེ་བ་དང་མི་དགེ་བའི་སེམས་དང་སེམས་ལས་བྱུང་བའི་ཆོས་རྣམས། དང་དགེ་བ་དང༌། མི་དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། ཆོས་འདི་དག་ནི་རྒྱུ་མེད་པ་ལས་བྱུང་བ། འབྲས་བུ་མེད་པ། རྣམ་པར་སྨིན་པ་མེད་པ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་མི་དགེ་བའི་སེམས་པ་དགེ་བ་དང༌། མི་དགེ་བ་ལ་དམིགས་པའོ། །མི་དགེ་བའི་སེམས་པ་དགེ་བ་དང༌། ལུང་དུ་མ་བསྟན་པ་ལ་དམིགས་པ་གང་ཞེ་ན། སྨྲས་པ། དགེ་བའི་ལུས་ཀྱི་ལས་དང༌། ངག་གི་ལས་དང༌། དགེ་བའི་སེམས་དང་སེམས་ལས་བྱུང་བའི་ཆོས་རྣམས་དང༌། དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། ལུང་དུ་མ་བསྟན་པའི་གཟུགས་དང༌། ལུང་དུ་མ་བསྟན་པའི་སེམས་དང་སེམས་ལས་བྱུང་བའི་ཆོས་རྣམས་དང༌། ལུང་དུ་མ་བསྟན་པའི་སེམས་དང་མི་ལྡན་པའི་འདུ་བྱེད་རྣམས་དང༌། ཆོས་འདི་དག་ནི་རྒྱུ་མེད་པ་ལས་བྱུང་བ། འབྲས་བུ་མེད་པ། རྣམ་པར་སྨིན་པ་མེད་པ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་མི་དགེ་བའི་སེམས་པ་དགེ་བ་དང༌། ལུང་དུ་མ་བསྟན་པ་ལ་དམིགས་པའོ། །མི་དགེ་བའི་སེམས་པ་མི་དགེ་བ་དང༌། ལུང་དུ་མ་བསྟན་པ་ལ་དམིགས་པ་གང་ཞེ་ན། སྨྲས་པ། མི་དགེ་བའི་ལུས་ཀྱི་ལས་དང༌། ངག་གི་ལས་དང༌། མི་དགེ་བའི་སེམས་དང༌། སེམས་ལས་བྱུང་བའི་ཆོས་རྣམས་དང༌། མི་དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌།

---

^{[མ་དཔེ་གཟིགས་ན་འདིར་གནོན།]}

ལུང་དུ་མ་བསྟན་པའི་གཟུགས་དང༌། ལུང་དུ་མ་བསྟན་པའི་སེམས་དང༌། སེམས་ལས་བྱུང་བའི་ཆོས་རྣམས་དང༌། ལུང་དུ་མ་བསྟན་པའི་སེམས་དང་མི་ལྡན་པའི་འདུ་བྱེད་རྣམས་དང་ཆོས་འདི་དག་ནི་རྒྱུ་མེད་པ་ལས་བྱུང་བ། འབྲས་བུ་མེད་པ། རྣམ་པར་སྨིན་པ་མེད་པ་ཡིན་ནོ་སྙམ་དུ་དེ་ལྟར་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་མི་དགེ་བའི་སེམས་པ་མི་དགེ་བ་དང༌། ལུང་དུ་མ་བསྟན་པ་ལ་དམིགས་པའོ། །མི་དགེ་བའི་སེམས་པ་དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་ལ་དམིགས་པ་གང་ཞེ་ན། སྨྲས་པ། དགེ་བ་དང༌། མི་དགེ་བའི་ལུས་ཀྱི་ལས་དང༌། ངག་གི་ལས་དང༌། དགེ་བ་དང་མི་དགེ་བའི་སེམས་དང༌། སེམས་ལས་བྱུང་བའི་ཆོས་རྣམས་དང༌། དགེ་བ་དང༌། མི་དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། ལུང་དུ་མ་བསྟན་པའི་གཟུགས་དང༌། ལུང་དུ་མ་བསྟན་པའི་སེམས་ལས་བྱུང་བའི་ཆོས་རྣམས་དང༌། ལུང་དུ་མ་བསྟན་པའི་སེམས་དང་མི་ལྡན་པའི་འདུ་བྱེད་རྣམས་དང༌། ཆོས་འདི་དག་ནི་རྒྱུ་མེད་པ་ལས་བྱུང་བ། འབྲས་བུ་མེད་པ། རྣམ་པར་སྨིན་པ་མེད་པ་ཡིན་ནོ་སྙམ་དུ་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་མི་དགེ་བའི་སེམས་པ་དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་ལ་དམིགས་པའོ། །ལུང་དུ་མ་བསྟན་པའི་སེམས་པ་ལུང་དུ་མ་བསྟན་པ་ལ་དམིགས་པ་གང་ཞེ་ན། སྨྲས་པ། ལུང་དུ་མ་བསྟན་པའི་གཟུགས་དང༌། ལུང་དུ་མ་བསྟན་པའི་སེམས་དང༌། སེམས་ལས་བྱུང་བའི་ཆོས་རྣམས་དང༌། ལུང་དུ་མ་བསྟན་པའི་སེམས་དང་མི་ལྡན་པའི་འདུ་བྱེད་རྣམས་དང༌། དམིགས་པ་འདི་དག་ལས་བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་ཡང་རུང་སྟེ། ཡིད་ལ་བྱེད་པའི་སེམས་གང་ཡིན་པ་ནས་སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་ལུང་དུ་མ་བསྟན་པའི་སེམས་པ་ལུང་དུ་མ་བསྟན་པ་ལ་དམིགས་པའོ། །ལུང་དུ་མ་བསྟན་པའི་སེམས་པ་དགེ་བ་ལ་དམིགས་པ་

---

^{[མ་དཔེ་གཟིགས་ན་འདིར་གནོན།]}

གང་ཞེ་ན། སྨྲས་པ། དགེ་བའི་ལུས་ཀྱི་ལས་དང༌། ངག་གི་ལས་དང༌། དགེ་བའི་སེམས་དང༌། སེམས་ལས་བྱུང་བའི་ཆོས་རྣམས་དང༌། དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། དམིགས་པ་འདི་དག་ལ་བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་ཡང་རུང་སྟེ། ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་ལུང་དུ་མ་བསྟན་པའི་སེམས་པ་དགེ་བ་ལ་དམིགས་པའོ། །ལུང་དུ་མ་བསྟན་པའི་སེམས་པ་མི་དགེ་བ་ལ་དམིགས་པ་གང་ཞེ་ན། སྨྲས་པ། མི་དགེ་བའི་ལུས་ཀྱི་ལས་དང༌། ངག་གི་ལས་དང༌། མི་དགེ་བའི་སེམས་དང༌། སེམས་ལས་བྱུང་བའི་ཆོས་རྣམས་དང༌། མི་དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། དམིགས་པ་འདི་ལས་བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་ཡང་རུང་སྟེ། ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་ལུང་དུ་མ་བསྟན་པའི་སེམས་པ་མི་དགེ་བ་ལ་དམིགས་པའོ། །ལུང་དུ་མ་བསྟན་པའི་སེམས་པ་དགེ་བ་དང༌། མི་དགེ་བ་ལ་དམིགས་པ་གང་ཞེ་ན། སྨྲས་པ། དགེ་བ་དང༌། མི་དགེ་བའི་ལུས་ཀྱི་ལས་དང༌། ངག་གི་ལས་དང༌། དགེ་བ་དང༌། མི་དགེ་བའི་སེམས་དང༌། སེམས་ལས་བྱུང་བའི་ཆོས་རྣམས་དང༌། དགེ་བ་དང༌། མི་དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། དམིགས་པ་འདི་དག་ལས་བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་ཡང་རུང་སྟེ། ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་ལུང་དུ་མ་བསྟན་པའི་སེམས་པ་དགེ་བ་

---

^{[མ་དཔེ་གཟིགས་ན་འདིར་གནོན།]}

དང༌། མི་དགེ་བ་ལ་དམིགས་པའོ། །ལུང་དུ་མ་བསྟན་པའི་སེམས་པ་དགེ་བ་དང༌། ལུང་དུ་མ་བསྟན་པ་ལ་དམིགས་པ་གང་ཞེ་ན། སྨྲས་པ། དགེ་བའི་ལུས་ཀྱི་ལས་དང༌། ངག་གི་ལས་དང༌། དགེ་བའི་སེམས་དང་སེམས་ལས་བྱུང་བའི་ཆོས་རྣམས་དང༌། དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། ལུང་དུ་མ་བསྟན་པའི་གཟུགས་དང༌། ལུང་དུ་མ་བསྟན་པའི་སེམས་དང་སེམས་ལས་བྱུང་བའི་ཆོས་རྣམས་དང༌། ལུང་དུ་མ་བསྟན་པའི་སེམས་དང་མི་ལྡན་པའི་འདུ་བྱེད་རྣམས་དང༌། དམིགས་པ་འདི་དག་ལས་བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་ཡང་རུང་སྟེ། ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་ལུང་དུ་མ་བསྟན་པའི་སེམས་པ་དགེ་བ་དང༌། ལུང་དུ་མ་བསྟན་པ་ལ་དམིགས་པའོ། །ལུང་དུ་མ་བསྟན་པའི་སེམས་པ་མི་དགེ་བ་དང༌། ལུང་དུ་མ་བསྟན་པ་ལ་དམིགས་པ་གང་ཞེ་ན། སྨྲས་པ། མི་དགེ་བའི་ལུས་ཀྱི་ལས་དང༌། ངག་གི་ལས་དང༌། མི་དགེ་བའི་སེམས་དང༌། སེམས་ལས་བྱུང་བའི་ཆོས་རྣམས་དང༌། མི་དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། ལུང་དུ་མ་བསྟན་པའི་གཟུགས་དང༌། ལུང་དུ་མ་བསྟན་པའི་སེམས་དང་སེམས་ལས་བྱུང་བའི་ཆོས་རྣམས་དང༌། ལུང་དུ་མ་བསྟན་པའི་སེམས་དང་མི་ལྡན་པའི་འདུ་བྱེད་རྣམས་དང༌། དམིགས་པ་འདི་དག་ལས་བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་ཡང་རུང་སྟེ། ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་ལུང་དུ་མ་བསྟན་པའི་སེམས་པ་མི་དགེ་བ་དང༌། ལུང་དུ་མ་བསྟན་པ་ལ་དམིགས་པའོ། །

---

^{[མ་དཔེ་གཟིགས་ན་འདིར་གནོན།]}

ལུང་དུ་མ་བསྟན་པའི་སེམས་པ་དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་ལ་དམིགས་པ་གང་ཞེ་ན། སྨྲས་པ། དགེ་བ་དང༌། མི་དགེ་བའི་ལུས་ཀྱི་ལས་དང༌། ངག་གི་ལས་དང༌། དགེ་བ་དང་མི་དགེ་བའི་སེམས་དང༌། སེམས་ལས་བྱུང་བའི་ཆོས་རྣམས་དགེ་བ་དང༌། མི་དགེ་བའི་སེམས་དང་མི་ལྡན་པའི་འདུ་བྱེད་རྣམས་དང༌། ལུང་དུ་མ་བསྟན་པའི་གཟུགས་དང༌། ལུང་དུ་མ་བསྟན་པའི་སེམས་དང༌། སེམས་ལས་བྱུང་བའི་ཆོས་རྣམས་དང༌། ལུང་དུ་མ་བསྟན་པའི་སེམས་དང་མི་ལྡན་པའི་འདུ་བྱེད་རྣམས་དང༌། དམིགས་པ་འདི་དག་ལས་བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་ཡང་རུང་སྟེ། ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་ལུང་དུ་མ་བསྟན་པའི་སེམས་པ་དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་ལ་དམིགས་པའོ། །དེ་ལ་སེམས་པའི་ལས་ནི་འདོད་པ་དང་ལྡན་པ་ཡང་ཡོད། གཟུགས་དང་ལྡན་པ་ཡང་ཡོད། གཟུགས་མེད་པ་དང་ལྡན་པ་ཡང་ཡོད་དོ། །སེམས་པའི་ལས་འདོད་པ་དང་ལྡན་པ་གང་ཞེ་ན། སྨྲས་པ། འདོད་པ་དང་ལྡན་པའི་ཡིད་ལ་བྱེད་པ་དང་མཚུངས་པར་ལྡན་པའི་སེམས་པ་ཐ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་སེམས་པའི་ལས་འདོད་པ་དང་ལྡན་པའོ། །སེམས་པའི་ལས་གཟུགས་དང་ལྡན་པ་གང་ཞེ་ན། སྨྲས་པ། གཟུགས་མེད་པ་དང་ལྡན་པའི་ཡིད་ལ་བྱེད་པ་དང་མཚུངས་པར་ལྡན་པའི་སེམས་པ་གང་ཡིན་པ་ནས་སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་སེམས་པའི་ལས་གཟུགས་དང་ལྡན་པའོ། །སེམས་པའི་ལས་གཟུགས་མེད་པ་དང་ལྡན་པ་གང་ཞེ་ན། སྨྲས་པ། གཟུགས་མེད་པ་དང་ལྡན་བའི་ཡིད་ལ་བྱེད་པ་དང་མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་སེམས་པའི་ལས་གཟུགས་མེད་པ་དང་ལྡན་པའོ། །དེ་ལ་འདོད་པ་དང་ལྡན་པའི་སེམས་པ་ནི་དགེ་བ་ཡང་ཡོད། མི་དགེ་བ་ཡང་ཡོད། ལུང་

---

^{[མ་དཔེ་གཟིགས་ན་འདིར་གནོན།]}

དུ་མ་བསྟན་པ་ཡང་ཡོད་དོ། །འདོད་པ་དང་ལྡན་པའི་སེམས་པ་དགེ་བ་གང་ཞེ་ན། སྨྲས་པ། འདོད་པ་དང་ལྡན་པའི་དགེ་བའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་པའི་སེམས་པ་དགེ་བ་སྟེ། ཇི་ལྟ་ཞེ་ན། འདི་ལྟར་ཆགས་པ་མེད་པས་ཚུལ་བཞིན་དུ་སོ་སོར་བརྟགས་ནས་མིག་གིས་གཟུགས་རྣམས་མཐོང་བ་དང༌། རྣ་བས་སྒྲ་རྣམས་ཐོས་པ་དང༌། སྣས་དྲི་རྣམས་བསྣམས་པ་དང༌། ལྕེས་རོ་རྣམས་མྱོང་བ་དང༌། ལུས་ཀྱིས་རེག་བྱ་རྣམས་རེག་པ་དང༌། ཡིད་ཀྱིས་ཆོས་རྣམས་རྣམ་པར་ཤེས་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་བའི་སེམས་པ་དགེ་བའོ། །གཞན་ཡང་སྲོག་གཅོད་པ་སྤངས་པ་དང་ལྡན་པའི་ཡིད་ལ་བྱེད་པ་དང༌། མཚུངས་པར་ལྡན་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་དང༌། བརྣབ་སེམས་དང༌། གནོད་སེམས་སྤངས་པ་དང་ལྡན་པ་དང༌། ཡང་དག་པའི་ལྟ་བ་དང་ལྡན་པའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་པའི་སེམས་པ་དགེ་བའོ། །གཞན་ཡང་ཁྲོ་བ་མེད་པ་དང༌། ཁོན་དུ་འཛིན་པ་མེད་པ་དང༌། འཆབ་པ་མེད་པ་དང༌། འཚིག་པ་མེད་པ་དང༌། ཕྲག་དོག་མེད་པ་དང༌། སེར་སྣ་མེད་པ་དང༌། སྒྱུ་མེད་པ་དང༌། གཡོ་མེད་པ་དང༌། ངོ་ཚ་ཤེས་པ་དང༌། ཁྲེལ་ཡོད་པ་དང་ལྡན་པའི་ཡིད་ལ་བྱེད་པ་དང་མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་པའི་སེམས་པ་དགེ་བའོ། །གཞན་ཡང་འདོད་པ་དང་ལྡན་པའི་གསོང་པོར་སྨྲ་བ་དང༌། ཕྱག་འཚལ་བ་དང༌། མངོན་དུ་ལྡང་བ་དང༌། ཐལ་མོ་སྦྱར་བ་དང༌། འདུད་པ་དང་ལྡན་པའི་ཡིད་ལ་བྱེད་པ་དང༌། མཚུངས་པར་ལྡན་པའི་

---

^{[མ་དཔེ་གཟིགས་ན་འདིར་གནོན།]}

སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་པའི་སེམས་པ་དགེ་བའོ། །གཞན་ཡང་སྦྱིན་པ་དག་སྦྱིན་པ་འམ། གནོད་སེམས་དག་མི་བྱེད་པའམ། ཚུལ་ཁྲིམས་ཡང་དག་པར་བླངས་ཏེ་འདུག་པའམ། གསོ་སྦྱོང་ལ་གནས་པའམ། སེམས་དད་པས་རང་གིས་ལག་དར་ཏེ་ལས་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་པའི་སེམས་པ་དགེ་བའོ། །གཞན་ཡང་འདོད་པ་དང་ལྡན་པའི་དགེ་བའི་ཡིད་ལ་བྱེད་པས། སྡུག་བསྔལ་ལ་སྡུག་བསྔལ་བར་ཡིད་ལ་བྱེད་པའམ། ཀུན་འབྱུང་བ་ལ་ཀུན་འབྱུང་བའམ། འགོག་པ་ལ་འགོག་པའམ། ལམ་ལ་ལམ་དུ་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་པའི་སེམས་པ་དགེ་བའོ། །འདོད་པ་དང་ལྡན་པའི་སེམས་པ་མི་དགེ་བ་གང་ཞེ་ན། སྨྲས་པ། མི་དགེ་བའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་པའི་སེམས་པ་མི་དགེ་བའོ། །ཇི་ལྟ་ཞེ་ན། འདི་ལྟར་ཆགས་པ་དང༌། སྡང་བ་དང༌། རྨོངས་པས་ཚུལ་བཞིན་མ་ཡིན་པ་དང༌། སོ་སོར་མ་བརྟགས་པར་མིག་གིས་གཟུགས་རྣམས་མཐོང་བ་ནས། ཡིད་ཀྱིས་ཆོས་རྣམས་རྣམ་པར་ཤེས་པའི་བར་གྱི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་བའི་སེམས་པ་མི་དགེ་བའོ། །གཞན་ཡང་སྲོག་གཅོད་པ་དང་ལྡན་པའི་ཡིད་ལ་བྱེད་པ་དང་མཚུངས་པར་ལྡན་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་དང༌། བརྣབ་སེམས་དང༌། གནོད་སེམས་དང་ལོག་པར་ལྟ་བ་དང་ལྡན་པའི་ཡིད་ལ་བྱེད་པ་དང༌། མཚུངས་པར་ལྡན་པའི་ཡིད་ལ་བྱེད་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་

---

^{[མ་དཔེ་གཟིགས་ན་འདིར་གནོན།]}

སྦྱར་ཏེ། འདི་ནི་འདོད་པ་དང་ལྡན་པའི་སེམས་པ་མི་དགེ་བའོ། །གཞན་ཡང་ཁྲོ་བ་དང༌། ཁོན་དུ་འཛིན་པ་དང༌། འཆབ་པ་དང༌། འཚིག་པ་དང༌། ཕྲག་དོག་དང༌། སེར་སྣ་དང༌། སྒྱུ་དང་གཡོ་དང༌། ངོ་ཚ་མི་ཤེས་པ་དང༌། ཁྲེལ་མེད་པ་དང་ལྡན་པའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་པའི་སེམས་བ་མི་དགེ་བའོ། །གཞན་ཡང་ལག་པ་དང༌། །བུ་ཚུར་དང་ཐལ་ལྕག་བསྣུན་པ་དང༌། ཡལ་གདང་ལྕུག་མས་གནོད་པར་བྱེད་པ་དང་ལྡན་པའི་ཡིད་ལ་བྱེད་པ་དང་མཚུངས་པར་ལྡན་པའི་སེམས་པ་གང་ཡིན་པ་ནས་སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་པའི་སེམས་པ་མི་དགེ་བའོ། །གཞན་ཡང་མི་དགེ་བ་ཀུན་དུ་སྦྱོར་བ་དང༌། འཆིང་བ་དང༌། བག་ལ་ཉལ་བ་དང༌། ཀུན་ནས་དཀྲིས་པ་རྣམས་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་པའི་སེམས་པ་མི་དགེ་བའོ། །འདོད་པ་དང་ལྡན་པའི་སེམས་པ་ལུང་དུ་མ་བསྟན་པ་གང་ཞེ་ན། སྨྲས་པ། འདོད་པ་དང་ལྡན་པའི་ལུང་དུ་མ་བསྟན་པའི་ཡིད་ལ་བྱེད་པ་དང་མཚུངས་པར་ལྡན་བའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་པའི་སེམས་པ་ལུང་དུ་མ་བསྟན་པའོ། །ཇི་ལྟ་ཞེ་ན། འདི་ལྟར་དགེ་བའི་སེམས་ཀྱང་མ་ཡིན་ཉོན་མོངས་པ་ཅན་གྱི་སེམས་ཀྱང་མ་ཡིན་པ། རང་བཞིན་དུ་གནས་པ། སྤྱོད་ལམ་ལ་ཞུགས་པས། མིག་གིས་གཟུགས་རྣམས་མཐོང་བ་ནས། ཡིད་ཀྱིས་ཆོས་རྣམས་རྣམ་པར་ཤེས་པའི་བར་གྱི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་པའི་སེམས་པ་ལུང་དུ་མ་བསྟན་པའོ། །གཞན་ཡང་འདོད་པ་དང་ལྡན་པའི་ལུང་དུ་མ་བསྟན་པའི་ཀུན་དུ་སྦྱོར་བ་དང༌། འཆིང་བ་དང༌། བག་ལ་ཉལ་བ་དང༌། ཉེ་བའི་ཉོན་

---

^{[མ་དཔེ་གཟིགས་ན་འདིར་གནོན།]}

མོངས་པ་དང༌། ཀུན་ནས་དཀྲིས་པ་རྣམས་དང༌། མཚུངས་པར་ལྡན་པའི་སེམས་པ་གང་ཡིན་བ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་འདོད་པ་དང་ལྡན་པའི་སེམས་བ་ལུང་དུ་མ་བསྟན་པའོ། །དེ་ལ་གཟུགས་དང་ལྡན་པའི་སེམས་པ་དགེ་བ་ཡང་ཡོད། ལུང་དུ་མ་བསྟན་པ་ཡང་ཡོད། གཟུགས་དང་ལྡན་པའི་སེམས་པ་དགེ་བ་གང་ཞེ་ན། སྨྲས་པ། གཟུགས་དང་ལྡན་པའི་དགེ་བའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་དང་ལྡན་པའི་སེམས་པ་དགེ་བའོ། །ཇི་ལྟ་ཞེ་ན། འདི་ལྟར་ཆགས་པ་མེད་པའམ། སྡང་བ་མེད་པའམ། རྨོངས་པ་མེད་པ་ལ་ཚུལ་བཞིན་དུ་སོ་སོར་བརྟགས་ནས། མིག་གིས་གཟུགས་རྣམས་མཐོང་བ་དང༌། རྣ་བས་སྒྲ་རྣམས་ཐོས་པ་དང༌། སྣས་དྲི་རྣམས་བསྣམས་པ་དང༌། ལྕེས་རོ་རྣམས་མྱོང་བ་དང༌། ལུས་ཀྱིས་རེག་བྱ་རྣམས་རེག་པ་དང༌། ཡིད་ཀྱིས་ཆོས་རྣམས་རྣམ་པར་ཤེས་པའི་བར་གྱི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་དང་ལྡན་པའི་སེམས་པ་དགེ་བའོ། །གཞན་ཡང་ཡོངས་སུ་མ་ཟིན་པའི་བསམ་གཏན་བཞི་བསྒོམ་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་དང་ལྡན་པའི་སེམས་པ་དགེ་བའོ། །གཞན་ཡང་གཟུགས་དང་ལྡན་པའི་གསོང་པོར་སྨྲ་བ་དང༌། ཕྱག་འཚལ་བ་དང༌། མངོན་དུ་ལྡང་བ་དང༌། ཐལ་མོ་སྦྱར་བ་དང༌། འདུད་པ་དང་ལྡན་པའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་དང་ལྡན་པའི་སེམས་པ་དགེ་བའོ། །གཞན་ཡང་གཟུགས་དང་ལྡན་པའི་དགེ་བའི་ཡིད་ལ་བྱེད་པས། སྡུག་བསྔལ་བ་ལ་སྡུག་བསྔལ་བར་ཡིད་ལ་བྱེད་པའམ། ཀུན་འབྱུང་བ་ལ་ཀུན་འབྱུང་བར་ཡིད་ལ་བྱེད་པའམ། འགོག་པ་ལ་འགོག་

---

^{[མ་དཔེ་གཟིགས་ན་འདིར་གནོན།]}

པར་ཡིད་ལ་བྱེད་པའམ། ལམ་ལ་ལམ་དུ་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་དང་ལྡན་པའི་སེམས་པ་དགེ་བའོ། །གཟུགས་དང་ལྡན་པའི་སེམས་པ་ལུང་དུ་མ་བསྟན་པ་གང་ཞེ་ན། སྨྲས་པ། གཟུགས་དང་ལྡན་པའི་ལུང་དུ་མ་བསྟན་པའི་ཡིད་ལ་བྱེད་པ་དང་མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་དང་ལྡན་པའི་སེམས་པ་ལུང་དུ་མ་བསྟན་པའོ། །ཇི་ལྟ་ཞེ་ན། འདི་ལྟར་དགེ་བའི་སེམས་ཀྱང་མ་ཡིན། ཉོན་མོངས་པ་ཅན་གྱི་སེམས་ཀྱང་མ་ཡིན་པ་རང་བཞིན་དུ་གནས་པ། སྤྱོད་ལམ་དུ་ཞུགས་པས། མིག་གིས་གཟུགས་རྣམས་མཐོང་བ་དང༌། རྣ་བས་སྒྲ་རྣམས་ཐོས་པ་དང༌། སྣས་དྲི་རྣམས་བསྣམས་པ་དང༌། ལྕེས་རོ་རྣམས་མྱོང་བ་དང༌། ལུས་ཀྱིས་རེག་བྱ་རྣམས་རེག་པ་དང༌། ཡིད་ཀྱིས་ཆོས་རྣམས་རྣམ་པར་ཤེས་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་དང་ལྡན་པའི་སེམས་པ་ལུང་དུ་མ་བསྟན་པའོ། །གཞན་ཡང་ཡོངས་སུ་ཟིན་པའི་སེམས་ཀྱིས་བསམ་གཏན་བཞི་སྒོམ་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་དང་ལྡན་པའི་སེམས་པ་ལུང་དུ་མ་བསྟན་པའོ། །གཞན་ཡང་གཟུགས་དང་ལྡན་པའི་ཀུན་དུ་སྦྱོར་བ་དང༌། འཆིང་བ་དང༌། བག་ལ་ཉལ་བ་དང༌། ཉེ་བའི་ཉོན་མོངས་པ་དང༌། ཀུན་ནས་དཀྲིས་པ་རྣམས་དང་ལྡན་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་དང་ལྡན་པའི་སེམས་པ་ལུང་དུ་མ་བསྟན་པའོ། །དེ་ལ་གཟུགས་མེད་པ་དང་ལྡན་པའི་སེམས་པ་ནི་དགེ་བ་ཡང་ཡོད། ལུང་དུ་མ་བསྟན་པ་ཡང་ཡོད་དོ། །གཟུགས་མེད་པ་དང་ལྡན་པའི་སེམས་པ་དགེ་བ་གང་ཞེ་ན། སྨྲས་པ། གཟུགས་མེད་པ་དང་ལྡན་པའི་དགེ་བའི་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་པ་

---

^{[མ་དཔེ་གཟིགས་ན་འདིར་གནོན།]}

གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་མེད་པ་དང་ལྡན་པའི་སེམས་པ་དགེ་བའོ། །ཇི་ལྟ་ཞེ་ན། འདི་ལྟར་ཆགས་པ་མེད་པའམ། སྡང་བ་མེད་པའམ། རྨོངས་པ་མེད་པས་ཚུལ་བཞིན་དུ་སོ་སོར་བརྟགས་ནས་ཡིད་ཀྱིས་ཆོས་རྣམས་རྣམ་པར་ཤེས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་པར་དུ་སྦྱར་ཏེ། འདི་ནི་གཟུགས་མེད་པ་དང་ལྡན་པའི་སེམས་པ་དགེ་བའོ། །གཞན་ཡང་ཡོངས་སུ་ཟིན་པའི་སེམས་ཀྱིས་གཟུགས་མེད་པ་བཞི་བསྒོམས་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་མེད་པ་དང་ལྡན་པའི་སེམས་པ་དགེ་བའོ། །གཞན་ཡང་གཟུགས་མེད་པ་དང་ལྡན་པའི་ཡིད་ལ་བྱེད་པས་སྡུག་བསྔལ་ལ་སྡུག་བསྔལ་པར་ཡིད་ལ་བྱེད་པ་འམ། ཀུན་འབྱུང་བ་ལ་ཀུན་འབྱུང་བ་འམ། འགོག་པ་ལ་འགོག་པའམ། ལམ་ལ་ལམ་དུ་ཡིད་ལ་བྱེད་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་མེད་པ་དང་ལྡན་པའི་སེམས་པ་དགེ་བའོ། །གཟུགས་མེད་པ་དང་ལྡན་པའི་སེམས་པ་ལུང་དུ་མ་བསྟན་པ་གང་ཞེ་ན། སྨྲས་པ། གཟུགས་མེད་པའི་ཡིད་ལ་བྱེད་པ་ལུང་དུ་མ་བསྟན་པ་དང་མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་བར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་མེད་པ་དང་ལྡན་པའི་སེམས་པ་ལུང་དུ་མ་བསྟན་པའོ། །ཇི་ལྟ་ཞེ་ན། འདི་ལྟར་དགེ་བའི་སེམས་ཀྱང་མ་ཡིན། ཉོན་མོངས་པ་ཅན་གྱི་སེམས་ཀྱང་མ་ཡིན་པ་རང་བཞིན་དུ་གནས་པ་ཡིད་ཀྱི་ཆོས་རྣམས་རྣམ་པར་ཤེས་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང་ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་མེད་པ་དང་ལྡན་པའི་སེམས་པ་ལུང་དུ་མ་བསྟན་པའོ། །གཞན་ཡང་ཡོངས་སུ་ཟིན་པའི་སེམས་ཀྱིས་གཟུགས་མེད་པ་བཞི་བསྒོམ་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་

---

^{[མ་དཔེ་གཟིགས་ན་འདིར་གནོན།]}

པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་མེད་པ་དང་ལྡན་བའི་སེམས་པ་ལུང་དུ་མ་བསྟན་པའོ། །གཞན་ཡང་གཟུགས་མེད་པ་དང་ལྡན་པའི་ཀུན་དུ་སྦྱོར་བ་དང༌། འཆིང་བ་དང༌། བག་ལ་ཉལ་བ་དང༌། ཉེ་བའི་ཉོན་མོངས་པ་དང༌། ཀུན་ནས་དཀྲིས་པ་རྣམས་དང་མཚུངས་པར་ལྡན་པའི་སེམས་པ་གང་ཡིན་པ་ནས། སེམས་མངོན་པར་འདུ་བྱེད་པ་དང༌། ཡིད་ཀྱི་ལས་ཀྱི་བར་དུ་སྦྱར་ཏེ། འདི་ནི་གཟུགས་མེད་པ་དང་ལྡན་པའི་སེམས་པ་ལུང་དུ་མ་བསྟན་པའོ། །འདུལ་མཆོག་ཁ་ལོ་སྒྱུར་བ་ཚངས་པའི་གསུང་དང་ལྡན། །སྐུ་མདོག་གསེར་འདྲ་ཁ་ལོ་སྒྱུར་བ་རྣམས་ཀྱི་མཆོག །རྣམ་པར་འདྲེན་པར་མཛད་པ་བྱུང་བ་གང་ཡིན་ཏེ། །འཇིགས་པ་མེད་པར་ལས་རྣམས་ཐ་དད་སྟོན་པར་མཛད། །རྒྱུ་གཅིག་གིས་ལས་རྣམས་བསྡུས་ཏེ། ལས་ཞེས་བྱ་བའི་ཕྱིར་རོ། །རྒྱུ་གཉིས་ཀྱིས་ལས་རྣམས་བསྡུས་ཏེ། སེམས་པའི་ལས་དང༌། ཆེད་དུ་བསམས་པའི་ལས་སོ། །རྒྱུ་གསུམ་གྱིས་ལས་རྣམས་བསྡུས་ཏེ། ལུས་ཀྱི་ལས་དང༌། ངག་གི་ལས་དང༌། ཡིད་ཀྱི་ལས་སོ། །རྒྱུ་བཞིས་ལས་རྣམས་བསྡུས་ཏེ། འདོད་པ་དང་ལྡན་པ་དང༌། གཟུགས་དང་ལྡན་པ་དང༌། གཟུགས་མེད་པ་དང་ལྡན་པ་དང་མི་ལྡན་པའོ། །རྒྱུ་ལྔས་ལས་རྣམས་བསྡུས་ཏེ། མཐོང་བས་སྤང་བར་བྱ་བ་ལུང་དུ་བསྟན་པ་དང༌། ལུང་དུ་མ་བསྟན་པ་དང༌། བསྒོམས་པས་སྤང་བར་བྱ་བ་ལུང་དུ་བསྟན་པ་དང༌། ལུང་དུ་མ་བསྟན་པ་དང༌། སྤང་བར་བྱ་བ་མ་ཡིན་བའི་ལས་སོ། །རྒྱུ་དྲུག་གིས་ལས་རྣམས་བསྡུས་ཏེ། སྡུག་བསྔལ་མཐོང་བས་སྤང་བར་བྱ་བ་དང༌། ཀུན་འབྱུང་བ་དང༌། འགོག་པ་དང༌། ལམ་མཐོང་བ་དང༌། བསྒོམ་པས་སྤང་བར་བྱ་བ་དང༌། སྤང་བར་བྱ་བ་མ་ཡིན་པའོ། །རྒྱུ་བདུན་གྱིས་ལས་རྣམས་བསྡུས་ཏེ། འདོད་པ་དང་ལྡན་པ་མཐོང་བས་སྤང་བར་བྱ་བ་དང༌། བསྒོམ་པས་སྤང་བར་བྱ་བ་དང༌། གཟུགས་དང་ལྡན་པ་མཐོང་བས་སྤང་བར་བྱ་བ་དང༌། བསྒོམ་པས་སྤོང་བར་བྱ་བ་དང༌། གཟུགས་མེད་པ་དང་ལྡན་པ་མཐོང་བས་སྤང་བར་བྱ་བ་དང༌། བསྒོམ་པས་སྤང་བར་བྱ་བ་དང༌། སྤང་བར་བྱ་བ་མ་ཡིན་པའོ། །རྒྱུ་

---

^{[མ་དཔེ་གཟིགས་ན་འདིར་གནོན།]}

བརྒྱད་ཀྱིས་ལས་རྣམས་བསྡུས་ཏེ། འདོད་པ་དང་ལྡན་པའི་དགེ་བ་དང༌། མི་དགེ་བ་དང་ལུང་དུ་མ་བསྟན་པ་དང༌། གཟུགས་དང་ལྡན་པའི་དགེ་བ་དང༌། ལུང་དུ་མ་བསྟན་པ་དང༌། གཟུགས་མེད་པ་དང་ལྡན་པའི་དགེ་བ་དང༌། ལུང་དུ་མ་བསྟན་པ་དང་ལྡན་པ་མ་ཡིན་པའི་ལས་སོ། །རྒྱུ་དགུས་ལས་རྣམས་བསྡུས་ཏེ། ལུས་ཀྱི་ལས་དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་དང༌། ངག་གི་ལས་དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་དང༌། ཡིད་ཀྱི་ལས་དགེ་བ་དང༌། མི་དགེ་བ་དང༌། ལུང་དུ་མ་བསྟན་པའོ། །རྒྱུ་བཅུས་ལས་རྣམས་བསྡུས་ཏེ། ལུས་ཀྱི་ལས་དགེ་བ་ཟག་པ་ཟད་པ་དང༌། བཅས་པ་དང༌། མི་དགེ་བ་དང༌། ལུང་དུ་མ་བསྟན་པ་དང༌། ཟག་པ་མེད་པའི་ལས་སོ། །ངག་གི་ལས་དགེ་བ་ཟག་པ་ཟད་པ་དང་བཅས་པ་དང༌། མི་དགེ་བ་དང༌། ལུང་དུ་མ་བསྟན་པ་དང༌། ཟག་པ་མེད་པའི་ལས་སོ། །ཡིད་ཀྱི་ལས་དགེ་བ་ཟག་པ་ཟད་པ་དང་བཅས་པ་དང༌། མི་དགེ་བ་དང༌། ལུང་དུ་མ་བསྟན་པ་དང༌། ཟག་པ་མེད་པའི་ལས་སོ། །རྒྱུ་བཅུ་གཅིག་གིས་ལས་རྣམས་བསྡུས་ཏེ། འདོད་པ་དང་ལྡན་པའི་དགེ་བ་དང༌། མི་དགེ་བ་དང༌། བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་དང༌། གཟུགས་དང་ལྡན་པའི་དགེ་བ་དང༌། བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་དང༌། གཟུགས་མེད་པ་དང་ལྡན་པའི་དགེ་བ་དང༌། བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་དང་ལྡན་པ་མ་ཡིན་པའི་ལས་སོ། །རྒྱུ་བཅུ་གཉིས་ཀྱིས་ལས་རྣམས་བསྡུས་ཏེ། ལུས་ཀྱི་ལས་དགེ་བ་དང༌། མི་དགེ་བ་དང༌། བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་དང༌། དག་གི་ལས་དགེ་བ་དང༌། མི་དགེ་བ་དང༌། བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པ་དང༌། ཡིད་ཀྱི་ལས་དགེ་བ་དང༌། མི་དགེ་བ་དང༌། བསྒྲིབས་ལ་ལུང་དུ་མ་བསྟན་པ་དང༌། མ་བསྒྲིབས་ལ་ལུང་དུ་མ་བསྟན་པའོ། །བསྟན་བཅོས་ཆེན་པོ་ཆོས་མངོན་པ་ལས། ལས་གདགས་པ་ཚིགས་དང་པོའོ།། །།སྡོམ་ནི། རྩ་བ་གསུམ་དང་དབྱེ་

---

^{[མ་དཔེ་གཟིགས་ན་འདིར་གནོན།]}

བ་དང༌། །མི་དགེ་ལས་ལམ་བཅུ་པོ་དང༌། །ཡུང་ན་ལས་རྣམས་བཅུ་ཡི་རྒྱུ། །མི་དགེ་བ་ནི་གསུམ་པོ་ཡིན། །མི་དགེ་བའི་རྩ་བ་གསུམ་གང་ཞེ་ན། གསུམ་ནི་ཆགས་པ་མི་དགེ་བའི་རྩ་བ་དང༌། ཞེ་སྡང་མི་དགེ་བའི་རྩ་བ་དང༌། གཏི་མུག་མི་དགེ་བའི་རྩ་བའོ།། ཆགས་པ་མི་དགེ་བའི་རྩ་བ་གང་ཞེ་ན། སྨྲས་པ། འདོད་ཆགས་པ་དང༌། ཀུན་དུ་འདོད་ཆགས་པ་དང༌། ཀུན་དུ་ཞེན་པ་དང༌། ཆུམས་པ་དང༌། ལྷག་པར་ཞེན་པ་དང༌། སྲེད་པ་དང༌། ཚོལ་བ་དང༌། འདོད་པ་དང༌། བརྒྱལ་བ་དང༌། ཞེན་པ་དང༌། ཡོངས་སུ་ཞེན་པ་དང༌། ནང་གི་འཆིང་བ་དང༌། དོན་དུ་སྒྲུབ་པ་དང༌། བརྣབ་སེམས་དང༌། སྡུག་བསྔལ་དང༌། ཀུན་འབྱུང་བ་ལ་ཆགས་པ་དང༌། ཆགས་པ་ལས་བྱུང་བ་གང་ཡིན་པ་འདི་ནི་ཆགས་པ་ཞེས་བྱའོ། །མི་དགེ་བའི་རྩ་བ་གང་ཞེ་ན། སྨྲས་པ། ཆོས་དེ་མི་དགེ་བ་ཡིན་ལ། དེ་ནི་མི་དགེ་བའི་ཆོས་མང་པོའི་རྩ་བ་གང་ཡིན་པས་ན། དེའི་ཕྱིར་དེ་ནི་ནད་ཀྱི་རྩ་བ་དང༌། འབྲས་ཀྱི་རྩ་བ་དང༌། ཟུག་རྔུའི་རྩ་བ་དང༌། སྡིག་པའི་རྩ་བ་དང༌། རྣམ་པར་མ་དག་བའི་རྩ་བ་དང༌། ཀུན་ནས་ཉོན་མོངས་པའི་རྩ་བ་དང༌། རྣམ་པར་བྱང་བ་མ་ཡིན་པའི་རྩ་བ་དང༌། ཡོངས་སུ་བྱང་བ་མ་ཡིན་པའི་རྩ་བ་ཡིན་ཏེ། དེ་བས་ན་ཆགས་པ་མི་དགེ་བའི་རྩ་བ་ཞེས་བྱའོ། །ཞེ་སྡང་མི་དགེ་བའི་རྩ་བ་ཞེས་བྱ་བ་ལ་ཞེ་སྡང་གང་ཞེ་ན། སྨྲས་པ། སེམས་ཅན་རྣམས་ལ་ཀུན་ནས་མནར་སེམས་དང༌། ཐ་བ་དང༌། ཁོང་ཁྲོ་བ་དང༌། གནོད་སེམས་དང༌། གནོད་སེམས་སུ་བྱེད་པ་དང༌། གནོད་སེམས་སུ་གྱུར་བ་དང༌། སྡང་བ་དང༌། རབ་ཏུ་སྡང་བ་དང༌། སེམས་ཀྱིས་སྡང་བ་གང་ཡིན་བ་དང༌། སེམས་ཅན་རྣམས་ལ་མི་མཐུན་པར་བྱེད་པ་དང༌། སྡང་བ་དང༌། སྡང་བར་བྱེད་པ་དང་སྡང་བར་གྱུར་པ་གང་ཡིན་པ་འདི་ནི་ཞེ་སྡང་བ་ཞེས་བྱའོ། །མི་དགེ་བའི་རྩ་བ་ཞེས་བྱ་བ་གང་ཞེ་ན། སྨྲས་པ། ཆོས་དེ་མི་དགེ་བ་ཡིན་པ་ནས་རྒྱས་པར་ཡོངས་སུ་བྱང་བ་མ་ཡིན་པའི་རྩ་བ་ཞེས་བྱ་བའི་བར་དུ་སྦྱར་ཏེ། དེ་བས་ན་ཞེ་སྡང་མི་དགེ་བའི་རྩ་བ་ཞེས་བྱའོ། །གཏི་མུག་མི་དགེ་བའི་རྩ་བ་ཞེས་བྱ་བ་ལ། གཏི་མུག་གང་ཞེ་ན། སྨྲས་པ། སྔོན་གྱི་མཐའ་མི་ཤེས་པ་དང༌། ཕྱི་མའི་མཐའ་མི་ཤེས་

---

^{[མ་དཔེ་གཟིགས་ན་འདིར་གནོན།]}

པ་དང༌། དབུས་ཀྱི་མཐའ་མི་ཤེས་པ་དང༌། ནང་མི་ཤེས་པ་དང༌། ཕྱི་རོལ་མི་ཤེས་པ་དང༌། ནང་དང་ཕྱི་རོལ་མི་ཤེས་པ་དང༌། ལས་མི་ཤེས་པ་དང༌། རྣམ་པར་སྨིན་པ་མི་ཤེས་པ་དང༌། ལས་དང་རྣམ་པར་སྨིན་པ་མི་ཤེས་པ་དང༌། ལས་ལེགས་པར་བྱས་པ་མི་ཤེས་པ་དང༌། ལས་ཉེས་པར་བྱས་པ་མི་ཤེས་པ་དང༌། ལས་ལེགས་པར་བྱས་པ་དང་ཉེས་པར་བྱས་པ་མི་ཤེས་པ་དང༌། རྒྱུ་མི་ཤེས་པ་དང༌། རྒྱུ་ལས་སྐྱེས་པའི་ཆོས་རྣམས་མི་ཤེས་པ་དང༌། ཁ་ན་མ་ཐོ་བ་དང་བཅས་པ་དང༌། ཁ་ན་མ་ཐོ་བ་མེད་པ་དང༌། ངན་པ་དང༌། བཟང་པོ་དང༌། གནག་པ་དང༌། དཀར་བ་དང༌། རྟེན་ཅིང་འབྲེལ་པར་འབྱུང་བའི་ཆོས་རྣམས་རབ་ཏུ་དབྱེ་བ་དང་བཅས་པ་མི་ཤེས་པ་དང༌། རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་དུ་མི་ཤེས་མི་མཐོང་བ་དང༌། མུན་པ་དང༌། རྨོངས་པ་དང༌། མ་རིག་པའི་མུན་པ་དང༌། གློག་དང༌། རྙོག་པ་ཅན་དང༌། བསྒྲིབས་པ་དང༌། ཆོད་པ་དང༌། ལོང་པར་བྱེད་པ་དང༌། མིག་མེད་པར་བྱེད་པ་དང༌། ཤེས་རབ་དང་མི་མཐུན་པ་དང༌། ཕོངས་པའི་ཕྱོགས་དང་མཐུན་པ་དང༌། མྱ་ངན་ལས་འདའ་བར་འགྱུར་བ་དང༌། མ་རིག་པ་དང༌། མ་རིག་པའི་ཆུ་བོ་དང༌། མ་རིག་པའི་དུག་གི་རྩ་བ་དང༌། མ་རིག་པའི་དུག་གི་སྡོང་པོ་དང༌། མ་རིག་པའི་དུག་གི་ལོ་མ་དང༌། མ་རིག་པའི་དུག་གི་མེ་ཏོག་དང༌། མ་རིག་པའི་དུག་གི་འབྲས་བུ་དང༌། རྨོངས་པ་དང༌། ཀུན་དུ་རྨོངས་པ་དང༌། རབ་ཏུ་རྨོངས་པ་དང༌། གཏི་མུག་དང༌། གཏི་མུག་ལས་བྱུང་བ་གང་ཡིན་པ་འདི་ནི་གཏི་མུག་ཅེས་བྱའོ། །མི་དགེ་བའི་རྩ་བ་ཞེས་བྱ་བ་གང་ཞེ་ན། སྨྲས་པ། ཆོས་དེ་མི་དགེ་བ་ཡིན་ལ། དེ་ནི་མི་དགེ་བའི་ཆོས་མང་པོའི་རྩ་བ་ཡང་ཡིན་པས་ན། དེའི་ཕྱིར་དེ་ནི་ནད་ཀྱི་རྩ་བ་ནས། ཡོངས་སུ་བྱང་བ་མ་ཡིན་པའི་རྩ་བ་ཡིན་པའི་བར་དུ་སྦྱར་ཏེ། ད་བས་ན་གཏི་མུག་མི་དགེ་བའི་རྩ་བ་ཞེས་བྱའོ། །མི་དགེ་བ་བཅུའི་ལས་ཀྱི་ལམ་ནི་སྲོག་གཅོད་པ་དང༌། མ་བྱིན་པར་ལེན་པ་དང་འདོད་པ་ལ་ལོག་པར་གཡེམ་པ་དང༌། ཀ་ཅ་ནི་རྣམ་པ་གསུམ་སྟེ། ཆགས་པ་ལས་བྱུང་བ་དང༌། ཞེ་སྡང་ལས་བྱུང་བ་དང༌། གཏི་མུག་ལས་བྱུང་བའོ། །མ་བྱིན་པར་ལེན་པ་ཆགས་པ་ལས་བྱུང་བ་གང་ཞེ་ན། སྨྲས་པ། ཇི་ལྟར་འདི་ན་ཁ་ཅིག་ཡོ་བྱད་གང་འདོད་པ་དེ། དེས་གཞན་དག་ལས་མ་

---

^{[མ་དཔེ་གཟིགས་ན་འདིར་གནོན།]}

བྱིན་པར་ལེན་པར་བྱེད་དོ། །དེ་མ་ཡིན་ཏེ་བདག་ཉིད་མི་འདོད་དུ་ཟིན་ཀྱང་དེ་འདི་སྙམ་དུ་སེམས་ཏེ། སེམས་ཅན་བདག་ལ་སྡུག་པ་དང༌། གཅེས་པ་དང༌། དགའ་བ་དང༌། ཡིད་དུ་འོང་བ་གང་ཡིན་པ་དེ་དག་ལ་མཁོ་བ་དང༌། འཆང་བ་དང༌། ལོངས་སྤྱོད་དུ་འགྱུར་རོ་སྙམ་ནས་དེ་དག་གི་དོན་དུ་གཞན་དག་ལས་མ་བྱིན་པར་ལེན་པར་བྱེད་དོ། །ཡང་ན་གཞན་དག་དེ་ལ་འདི་སྐད་དུ་ཁྱོད་ཚུར་ཤོག་ལ། མིང་འདི་ཞེས་བྱ་བ་ལས་མ་བྱིན་པར་ལོང་ཤིག་དང༌། ངས་ཁྱོད་ལ་འདི་དང་འདི་ལྟ་བུ་ཞིག་སྦྱིན་ནོ། །འདི་དང་འདི་ལྟ་བུ་ཞིག་བྱའོ་ཞེས་བསྒོ་ནས། དེས་ལོངས་སྤྱོད་དེ་དག་འདོད་ནས། གཞན་དག་ལས་མ་བྱིན་པར་ལེན་པར་བྱེད་པ་དེ་ལྟ་བུ་ནི་ཆགས་པ་ལས་བྱུང་བ་ཡིན་ནོ། །ཞེ་སྡང་ལས་བྱུང་བ་ཇི་ལྟ་བུ་ཞེ་ན། སྨྲས་པ། ཇི་ལྟར་འདི་ན་ཁ་ཅིག་གང་ལ་ཀུན་ནས་མནར་སེམས་དང༌། ཁྲོ་བའི་སེམས་ཡོད་པའི་ཕྱིར། དེ་ལས་མ་བྱིན་པར་ལེན་པར་བྱེད་དོ། །དེ་མ་ཡིན་ཏེ་དེ་ལས་ཀུན་ནས་མནར་སེམས་དང༌། ཁྲོ་བའི་སེམས་མེད་དུ་ཟིན་ཀྱང་དེ་དག་གི་ཡོ་བྱད་སྡུག་པ་དང༌། གཅེས་པ་དང༌། དགའ་བ་དང༌། ཡིད་དུ་འོང་བ་དེ་རྣམས་དེ་དག་ལ་ཀུན་ནས་མནར་སེམས་དང༌། ཁྲོ་བའི་སེམས་ཡོད་པའི་ཕྱིར། དེ་འདི་སྙམ་དུ་སེམས་ཏེ། དེ་དག་ཡུན་རིང་པོར་མི་བཟོད་ཅིང༌། མི་ལ་སེམས་མངོན་བར་མི་དགའ་བར་འགྱུར་བར་བྱའོ་སྙམ་ནས། དེས་དངོས་པོ་དེ་མ་བྱིན་པར་ལེན་པར་བྱེད་པ་དེ་ལྟ་བུ་ནི། ཞེ་སྡང་ལས་བྱུང་བ་ཡིན་ནོ། །གཏི་མུག་ལས་བྱུང་བ་ཇི་ལྟ་བུ་ཞེ་ན། སྨྲས་པ། བྲམ་ཟེ་དག་འདི་སྐད་དུ་འདི་དག་ཐམས་ཅད་ནི་བྲམ་ཟེ་རྣམས་དབང་མོད་ཀྱི། འོན་ཀྱང་མཐུ་ཆུངས་པས་ན། དམངས་རྣམས་ཀྱང་སྤྱད་དོ་ཞེས་ཟེར་ཏེ། དེ་དག་ལ་ཕ་རོལ་གྱིས་ཡོངས་སུ་བཟུང་བའི་འདུ་ཤེས་མེད་པ་མ་ཡིན་ན། ལས་དེ་ལ་ཅི་ཡང་མི་འོང་བར་ལྟ་ཞིང༌། འབྲས་བུ་མེད་པར་ལྟ་ལ། འདི་ལྟར་ལྟ་ཞིང་འདི་སྐད་དུ་སྨྲ་སྟེ། ལས་འདི་མེད་དོ། །ལས་འདིའི་འབྲས་བུ་རྣམ་པར་སྨིན་པ་མེད་དོ་ཞེས་ཟེར་བ་དེ་ལྟ་བུ་ནི་གཏི་མུག་ལས་བྱུང་བ་ཡིན་ནོ། །འདོད་པ་ལ་ལོག་པར་གཡེམ་པ་ནི་རྣམ་པ་གསུམ་ཏེ། ཆགས་པ་ལས་བྱུང་བ་དང༌། ཞེ་སྡང་ལས་བྱུང་བ་དང༌། གཏི་མུག་ལས་བྱུང་བའོ། །འདོད་པ་ལས་

---

^{[མ་དཔེ་གཟིགས་ན་འདིར་གནོན།]}

ལོག་པར་གཡེམ་པ་ཆགས་པ་ལས་བྱུང་བ་གང་ཡིན་ཞེ་ན། སྨྲས་པ། ཇི་ལྟར་འདི་ན་ཁ་ཅིག་གང་ལ་ལྟ་ཞིང་སེམས་ཆགས་པ་དེ་ལས་འདོད་པ་ལས་ལོག་པར་གཡེམ་པར་ཀུན་དུ་སྤྱོད་པར་བྱེད་དོ། །དེ་མ་ཡིན་ཏེ་བདག་ཉིད་ལྟ་བ་དང་ལྡན་ཞིང་སེམས་ཆགས་པ་མེད་དུ་ཟིན་ཀྱང༌། དེ་འདི་སྙམ་དུ་སེམས་ཏེ། སེམས་ཅན་བདག་ལ་སྡུག་པ་དང༌། གཅེས་པ་དང༌། དགའ་བ་དང༌། ཡིད་དུ་འོང་བ་གང་ཡིན་པ་དེ་དག་ལ། མཁོ་བ་དང༌། འཆང་བ་དང༌། ལོངས་སྤྱོད་དུ་འགྱུར་རོ་སྙམ་ནས། དེ་དག་གི་དོན་དུ་གཞན་ལ་འདོད་པ་ལ་ལོག་པར་གཡེམ་པ་ཀུན་ནས་སྤྱོད་པར་བྱེད་དོ། །ཡང་ན་གཞན་དག་དེ་ལ་འདི་སྐད་དུ་ཁྱོད་ཚུར་ཤོག་ལ་མིང་འདི་ཞེས་བྱ་བ་ལ་འདོད་པ་ལ་ལོག་པར་གཡེམ་པ་ཀུན་དུ་སྤྱོད་ཅིག་དང༌། ངས་ཁྱོད་ལ་འདི་དང་འདི་ལྟ་བུ་ཞིག་སྦྱིན་ནོ། །འདི་དང་འདི་ལྟ་བུ་ཞིག་བྱའོ་ཞེས་བསྒོ་ནས། དེས་ལོངས་སྤྱོད་དེ་དག་འདོད་ནས་གཞན་གྱི་དོན་དུ་འདོད་པ་ལ་ལོག་པར་གཡེམ་པ་ཀུན་དུ་སྤྱོད་པར་བྱེད་པ་དེ་ལྟ་བུ་ནི། ཆགས་པ་ལས་བྱུང་བ། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་སྟེ། མི་དགེ་བའི་རྩ་བ་གསུམ་པོ་དེ་དག་ནི་མི་དགེ་བ་བཅུའི་ལས་ཀྱི་ལམ་འདི་དག་གི་རྒྱུ་དང༌། རྩ་བ་དང༌། འཇུག་པར་བྱེད་པ་དང༌། གཞི་དང༌། བྱེད་རྒྱུ་དང༌། སྐྱེད་པ་དང༌། རྐྱེན་དང༌། ཀུན་ནས་སློང་བའོ། །ལས་གདགས་པ་ཚིགས་གཉིས་པའོ།། །།སྡོམ་ནི། རྒྱུ་གང་རྣམ་རིག་བྱེད་མིན་གཟུགས། །ཐོགས་བཅས་དང་ནི་སེམས་ལས་བྱུང༌། །ཆགས་པ་དང་ནི་ཞེ་སྡང་གསུམ། །རྣམ་པ་གསུམ་དུ་སྐྱེ་བ་ཡིན། །མི་དགེ་བ་བཅུའི་ལས་ཀྱི་ལམ་ནི། སྲོག་གཅོད་པ་ནས། ལོག་པར་ལྟ་བའི་བར་དག་གོ །སྲོག་གཅོད་པའི་རྒྱུ་གང་ཞེ་ན། སྨྲས་པ། མི་དགེ་བའི་རྩ་བ་དང༌། ཚུལ་བཞིན་མ་ཡིན་པའི་ཡིད་ལ་བྱེད་པ་ནི་སྲོག་གཅོད་པའི་རྒྱུའོ། །སྲོག་གཅོད་པ་གང་གི་རྒྱུ་ཞེ་ན། སྨྲས་པ། སྲོག་གཅོད་པ་ནི་སྲོག་གཅོད་པའི་རྣམ་པར་སྨིན་པའི་རྒྱུའོ། །སྲོག་གཅོད་པ་ཅི་ལས་བྱུང༌། ཀུན་འབྱུང་བ་ནི་གང༌། ཀུན་ནས་སློང་བ་ནི་གང་ཞེ་ན། སྨྲས་པ། མི་དགེ་བའི་རྩ་བ་དང༌། ཚུལ་བཞིན་མ་ཡིན་པའི་ཡིད་ལ་བྱེད་པ་ནི་སྲོག་གཅོད་པ་ཀུན་ནས་

---

^{[མ་དཔེ་གཟིགས་ན་འདིར་གནོན།]}

སློང་བའོ། །སྲོག་གཅོད་པ་གང་གིས་ཀུན་ནས་བསླང་བར་བྱ་བ་ཡིན་ཞེ་ན། སྨྲས་པ། སྲོག་གཅོད་པ་ཀུན་ནས་སློང་བར་བྱེད་པའི་སེམས་དང༌། སེམས་ལས་བྱུང་པའི་ཆོས་རྣམས་ཀྱིའོ། །སྲོག་གཅོད་པ་ཅི་ལས་དམིགས་ཤེ་ན། སྨྲས་པ། སེམས་ཅན་ལ་དམིགས་སོ། །སྲོག་གཅོད་པ་གང་གི་དམིགས་པ་ཡིན་ཞེ་ན། སྨྲས་པ། སྲོག་གཅོད་པ་ཀུན་ནས་སློང་བར་བྱེད་པའི་སེམས་དང༌། སེམས་ལས་བྱུང་བའི་ཆོས་རྣམས་ཀྱིའོ། །སྲོག་གཅོད་པའི་འབྲས་བུ་ཅི་ཞེ་ན། སྨྲས་པ། མི་སྡུག་པའི་འབྲས་བུ་དང༌། མི་གཅེས་པའི་འབྲས་བུ་དང༌། མི་དགེ་བའི་འབྲས་བུ་དང༌། ཡིད་དུ་མི་འོང་པའི་འབྲས་བུ་དང༌། ཡིད་དུ་མི་འཐད་པའི་འབྲས་བུ་དང༌། མི་འདོད་པའི་འབྲས་བུའོ། །སྲོག་གཅོད་པ་གང་གི་འབྲས་བུ་ཡིན་ཞེ་ན། སྨྲས་པ། སྲོག་གཅོད་པ་ཀུན་ནས་སློང་བར་བྱེད་པའི་སེམས་དང༌། སེམས་ལས་བྱུང་བའི་ཆོས་རྣམས་ཀྱིའོ། །སྲོག་གཅོད་པའི་རྣམ་པར་སྨིན་པ་ཅི་ཞེན། སྨྲས་པ། མི་སྡུག་པའི་རྣམ་པར་སྨིན་པ་དང༌། མི་གཅེས་པའི་རྣམ་པར་སྨིན་པ་དང༌། མི་དགེ་བའི་རྣམ་པ་སྨིན་པ་དང༌། ཡིད་དུ་མི་འོང་བའི་རྣམ་པར་སྨིན་པ་དང༌། ཡིད་དང་མི་འཐད་པའི་རྣམ་པར་སྨིན་པ་དང༌། མི་འདོད་པའི་རྣམ་པར་སྨིན་པའོ། །སྲོག་གཅོད་པ་གང་གི་རྣམ་པར་སྨིན་པ་གང་ཞེ་ན། སྨྲས་པ། སྲོག་གཅོད་པ་ཀུན་ནས་སློང་བར་བྱེད་པའི་སེམས་དང༌། སེམས་ལས་བྱུང་བའི་ཆོས་རྣམས་ཀྱིའོ། །སྲོག་གཅོད་པའི་ཉེས་དམིགས་ཅི་ཡིན་ཞེ་ན། སྨྲས་པ། ཉེས་དམིགས་ལྔ་སྟེ། དེ་བདག་ཉིད་ཀྱིས་སྨད་པར་འགྱུར་བ་དང༌། དེ་གཞན་གྱིས་སྨད་པར་འགྱུར་པ་དང༌། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་དྲིས་ན། ཆོས་བཞི་ན་དུ་སྨད་པར་འགྱུར་བ་དང༌། ཕྱོགས་དང་ཕྱོགས་མཚམས་རྣམས་སུ་སྡིག་ཅན་དང༌། བསྔགས་པ་མ་ཡིན་པ་དང༌། སྙན་པ་མ་ཡིན་པ་དང༌། དགེ་བ་མ་ཡིན་པའི་སྒྲ་དང༌། ཚིགས་སུ་བཅད་པ་གྲགས་པར་འགྱུར་བ་དང༌། ལུས་དང་བྲལ་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །སྲོག་གཅོད་པ་སུ་ལ་ཉེས་དམིགས་སུ་འགྱུར་ཞེ་ན།

---

^{[མ་དཔེ་གཟིགས་ན་འདིར་གནོན།]}

སྨྲས་པ། གཉི་ག་ལ་ཉེས་དམིགས་སུ་འགྱུར་ཏེ། སྲོག་ཆགས་སྲོག་དང་བྲལ་བར་བྱེད་པ་གང་ཡིན་པ་དང༌། སྲོག་ཆགས་གང་སྲོག་དང་བྲལ་བར་བྱ་བ་ལའོ། །མ་བྱིན་པར་ལེན་པའི་རྒྱུ་གང་ཞེ་ན། སྨྲས་པ། མི་དགེ་བའི་རྩ་བ་དང༌། ཚུལ་བཞིན་མ་ཡིན་པ་ཡིད་ལ་བྱེད་པ་ནི། མ་བྱིན་པར་ལེན་པའི་རྒྱུ་སྟེ། སྲོག་གཅོད་པ་ལ་ཇི་ལྟ་བ་བཞིན་དུ་རྒྱས་པར་བརྗོད་པར་བྱའོ། །དེ་ལ་ཁྱད་པར་ནི་འདི་ཡོད་དེ། མ་བྱིན་པར་ལེན་པ་ནི་ཡོ་བྱད་ལ་དམིགས་སོ། །གཉི་ག་ལ་ཉེས་དམིགས་སུ་འགྱུར་ཏེ། མ་བྱིན་པར་ལེན་པ་གང་ཡིན་པ་དང༌། གང་གི་མ་བྱིན་པར་ལེན་པའོ། །འདོད་པ་ལ་ལོག་པར་གཡེམ་པ་གང་ལ་དམིགས་ཤེན། སེམས་ཅན་ལ་དམིགས་སོ། །གཉི་ག་ལ་ཉེས་དམིགས་སུ་འགྱུར་ཏེ། འདོད་པ་རྣམས་ལ་ལོག་པར་གཡེམ་པ་གང་ཡིན་པ་དང༌། འདོད་པ་ལ་ལོག་པར་གཡེམ་པས་གང་ལ་ཀུན་དུ་སྤྱོད་པའོ། །བརྫུན་དུ་སྨྲ་བ་ནི་མིང་ལ་དམིགས་སོ། །གཉི་ག་ལ་ཉེས་དམིགས་སུ་འགྱུར་ཏེ། བརྫུན་དུ་སྨྲ་བ་གང་ཡིན་པ་དང༌། བརྫུན་དུ་སྨྲ་བས་བསླུ་བར་བྱ་བ་གང་ཡིན་པའོ། །ཕྲ་མ་ཡང་མིང་ལ་དམིགས་སོ། །གསུམ་ལ་ཉེས་དམིགས་སུ་འགྱུར་ཏེ། མཛའ་བོ་འབྱེད་པ་གང་ཡིན་པ་དང༌། མཛའ་བོ་གང་ལས་ཕྱེ་བ་དང༌། གང་གིས་མཛའ་བོ་ཕྱེ་བའོ། །ཚིག་རྩུབ་པོ་ཡང་མིང་ལ་དམིགས་སོ། །གཉི་ག་ལ་ཉེས་དམིགས་སུ་གྱུར་ཏེ། ཚིག་རྩུབ་པོར་སྨྲ་བ་གང་ཡིན་པ་དང༌། ཚིག་རྩུབ་པོས་གང་ལ་ཀུན་དུ་སྤྱོད་པའོ། །ཚིག་ཀྱལ་པ་ཡང་མིང་ལ་དམིགས་སོ། །གཉི་ག་ལ་ཡང་ཉེས་དམིགས་སུ་འགྱུར་ཏེ། ཚིག་ཀྱལ་པ་སྨྲ་བ་གང་ཡིན་པ་དང༌། ཚིག་ཀྱལ་པས་གང་ལ་སླུ་བའོ། །བརྣབ་སེམས་ནི་ཡོ་བྱད་ལ་དམིགས་སོ། །གཉི་ག་ཉེས་དམིགས་སུ་འགྱུར་ཏེ། བརྣབ་སེམས་བྱེད་པ་གང་ཡིན་པ་དང༌། གང་གི་དངོས་པོ་ལ་བརྣབ་སེམས་བསྐྱེད་པའོ། །གནོད་སེམས་ནི་སེམས་ཅན་ལ་དམིགས་སོ། །གཉི་ག་ལ་ཉེས་དམིགས་སུ་འགྱུར་ཏེ། གནོད་སེམས་བྱེད་པ་གང་ཡིན་པ་དང༌། གང་གི་རྒྱུ་ལ་གནོད་སེམས་བསྐྱེད་པའོ། །ལོག་པར་ལྟ་བའི་རྒྱུ་གང་ཞེ་ན། སྨྲས་པ། མི་དགེ་བའི་རྩ་བ་དང༌། ཚུལ་བཞིན་མ་ཡིན་པ་ཡིད་ལ་བྱེད་པ་ནི། ལོག་པར་ལྟ་བའི་རྒྱུའོ། །ལོག་པར་ལྟ་བ་

---

^{[མ་དཔེ་གཟིགས་ན་འདིར་གནོན།]}

གང་གི་རྒྱུ་གང་ཞེ་ན། སྨྲས་པ། ལོག་པར་ལྟ་བ་ནི་ལོག་པར་ལྟ་བའི་རྣམ་པར་སྨིན་པའི་རྒྱུའོ། །ལོག་པར་ལྟ་བ་ཅི་ལས་འབྱུང༌། ཀུན་འབྱུང་བ་ནི་གང༌། ཀུན་ནས་སློང་བ་ནི་གང་ཞེ་ན། སྨྲས་པ། མི་དགེ་བའི་རྩ་བ་དང༌། ཚུལ་བཞིན་མ་ཡིན་པའི་ཡིད་ལ་བྱེད་པ་ནི། ལོག་པར་ལྟ་བའི་ཀུན་ནས་སློང་བའོ། །ལོག་པར་ལྟ་བ་གང་གིས་ཀུན་ནས་བསླང་བ་ཡིན་ཞེ་ན། སྨྲས་པ། ལོག་པར་ལྟ་བ་ཀུན་ནས་སློང་བར་བྱེད་པའི་སེམས་དང༌། སེམས་ལས་བྱུང་བའི་ཆོས་རྣམས་ཀྱིས་སོ། །ལོག་པར་ལྟ་བ་ཅི་ལ་དམིགས་ཤེ་ན། སྨྲས་པ། མིང་དང་གཟུགས་ལ་དམིགས་སོ། །ལོག་པར་ལྟ་བ་གང་གིས་དམིགས་པ་ཡིན་ཞེན། སྨྲས་པ། ལོག་པར་ལྟ་བ་ཀུན་ནས་སློང་བར་བྱེད་པའི་སེམས་དང་སེམས་ལས་བྱུང་བའི་ཆོས་རྣམས་ཀྱིའོ། །ལོག་པར་ལྟ་བའི་འབྲས་བུ་ཅི་ཞེ་ན། སྨྲས་པ། མི་སྡུག་པའི་འབྲས་བུ་དང༌། མི་གཅེས་པའི་འབྲས་བུ་དང༌། མི་དགའ་བའི་འབྲས་བུ་དང༌། ཡིད་དུ་མི་འོང་བའི་འབྲས་བུ་དང༌། ཡིད་དུ་མི་འཐད་པའི་འབྲས་བུ་དང༌། མི་འདོད་པའི་འབྲས་བུའོ། །ལོག་པར་ལྟ་བ་གང་གི་འབྲས་བུ་ཡིན་ཞེ་ན། སྨྲས་པ། ལོག་པར་ལྟ་བ་ཀུན་ན་སློང་བར་བྱེད་པའི་སེམས་དང་སེམས་ལས་བྱུང་བའི་ཆོས་རྣམས་ཀྱིའོ། །ལོག་པར་ལྟ་བའི་རྣམ་པར་སྨིན་པ་ཅི་ཞེ་ན། སྨྲས་པ། མི་སྡུག་པའི་རྣམ་པར་སྨིན་པ་དང༌། མི་གཅེས་པའི་རྣམ་པར་སྨིན་པ་དང༌། མི་དགེ་བའི་རྣམ་པར་སྨིན་པ་དང༌། ཡིད་དུ་མི་འོང་བའི་རྣམ་པར་སྨིན་པ་དང༌། ཡིད་དང་མི་འཐད་པའི་རྣམ་པར་སྨིན་པ་དང༌། མི་འདོད་པའི་རྣམ་པར་སྨིན་པའོ། །ལོག་པར་ལྟ་བ་གང་གི་རྣམ་པར་སྨིན་པ་ཡིན་ཞེ་ན། སྨྲས་པ། ལོག་པར་ལྟ་བ་ཀུན་ནས་སློང་བར་བྱེད་པའི་སེམས་དང༌། སེམས་ལས་བྱུང་བའི་ཆོས་རྣམས་ཀྱིའོ། །ལོག་པར་ལྟ་བའི་ཉེས་དམིགས་ཅི་ཡིན་ཞེ་ན། སྨྲས་པ། ཉེས་དམིགས་ལྔ་སྟེ། དེ་བདག་ཉིད་ཀྱིས་སྨད་པར་འགྱུར་བ་དང༌། དེ་གཞན་གྱིས་སྨད་པར་འགྱུར་བ་དང༌། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་དྲིས་ན་ཆོས་བཞིན་དུ་སྨད་པར་འགྱུར་བ་དང༌། ཕྱོགས་དང་ཕྱོགས་མཚམས་རྣམས་སུ་

---

^{[མ་དཔེ་གཟིགས་ན་འདིར་གནོན།]}

སྡིག་ཅན་དང༌། བསྔགས་པ་མ་ཡིན་པ་དང༌། སྙན་པ་མ་ཡིན་པ་དང༌། དགེ་བ་མ་ཡིན་པའི་སྒྲ་དང་ཚིགས་སུ་བཅད་པ་གྲགས་པར་འགྱུར་བ་དང༌། ལུས་དང་བྲལ་ཏེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་བའོ། །ལོག་པར་ལྟ་བ་སུ་ལ་ཉེས་དམིགས་སུ་འགྱུར་ཞེ་ན། སྨྲས་པ། གཉི་ག་ལ་ཉེས་དམིགས་སུ་འགྱུར་ཏེ། ལོག་པར་རྟོག་པ་གང་ཡིན་པ་དང་གང་དང་ལོག་པར་རྟོག་པའོ། །མི་དགེ་བ་བཅུའི་ལས་ཀྱི་ལམ་ཞེས་བྱ་བ་ནས་རྒྱས་པར་སྦྱར་ཏེ། སྲོག་གཅོད་པ་རྣམ་པར་རིག་བྱེད་ཅེས་བྱ་བ་འམ། འོན་ཏེ་རྣམ་པར་རིག་བྱེད་མ་ཡིན་ཞེས་བྱ་ཞེ་ན། སྨྲས་པ། རྣམ་པར་རིག་བྱེད་ཀྱང་ཡོད། རྣམ་པར་རིག་བྱེད་མ་ཡིན་པ་ཡང་ཡོད་དོ། །རྣམ་པར་རིག་བྱེད་གང་ཞེ་ན། སྨྲས་པ། ཇི་ལྟར་འདི་ན་ཁ་ཅིག་ལ་ལ་ཞིག་འདི་སྐད་དུ་སྲོག་ཆགས་ཀྱི་སྲོག་ཆོད་ཅིག་ཅེས་བསྒོ་ལ་དེས་ཀྱང་གཅད་པར་བྱའོ་ཞེས་སྨྲས་ཀྱང་རུང༌། མ་བཅད་ཅིག་ཅེས་བསྒོ་བཞིན་དུ་གཅོད་དོ་ཞེས་སྨྲས་ཀྱང་རུང་བ་ལས། ཕར་སོང་སྟེ་སྲོག་ཆགས་ཀྱི་སྲོག་བཅད་ཀྱང་རུང༌། ཕྱིར་འོངས་ཏེ་སྲོག་ཆགས་ཀྱི་སྲོག་གཅོད་ཀྱང་རུང་སྟེ། གང་གི་ཚེ་སྲོག་ཆགས་ཀྱི་སྲོག་གཅོད་པ་དེའི་ཚེ། ལུས་ཀྱི་ལས་གང་ཡིན་པ་དེ་ནི་རྣམ་པ་རིག་བྱེད་ཅེས་བྱའོ། །རྣམ་པར་རིག་བྱེད་མ་ཡིན་པ་གང་ཡིན་ཞེ་ན། སྨྲས་པ། སྲོག་གཅོད་པ་ལས་ཕྱིར་མ་ལོག་ཅིང་ཕྱིར་མ་ནུར་ལ་མ་བཏང་མ་སྤངས་པས། ཇི་སྟེ་ན་ལུས་ཀྱིས་ཀྱང་རྣམ་པར་རིག་པར་མི་བྱེད་པ་འདི་ནི། རྣམ་པར་རིག་བྱེད་མ་ཡིན་པ་ཞེས་བྱའོ། །མ་བྱིན་པར་ལེན་པ་རྣམ་པར་རིག་བྱེད་ཅེས་བྱ་འམ། འོན་ཏེ་རྣམ་པར་རིག་བྱེད་མ་ཡིན་པ་ཞེས་བྱ་ཞེ་ན། སྨྲས་པ། རྣམ་པ་རིག་བྱེད་ཀྱང་ཡོད། རྣམ་པར་རིག་བྱེད་མ་ཡིན་པ་ཡང་ཡོད་དོ། །རྣམ་པར་རིག་བྱེད་གང་ཞེ་ན། སྨྲས་པ། ཇི་ལྟར་འདི་ནི་ཁ་ཅིག་ལ་ལ་ཞིག་འདི་སྐད་དུ། གཞན་དག་ལས་མ་བྱིན་པར་ལོངས་ཤིག་ཅེས་བསྒོ་ལ། དེས་ཀྱང་བླང་ངོ་ཞེས་སྨྲས་ཀྱང་རུང༌། མ་ལེན་ཅིག་ཅེས་བསྒོ་བཞིན་དུ་བླང་ངོ་ཞེས་སྨྲས་ཀྱང་རུང་བ་ལས། ཕར་སོང་སྟེ་གཞན་དག་ལས་མ་བྱིན་པར་ལེན་ཀྱང་རུང༌། ཕྱིར་འོངས་ཏེ་གཞན་དག་ལས་མ་བྱིན་པར་ལེན་ཀྱང་རུང་སྟེ། གང་གི་ཚེ་གཞན་དག་ལས་མ་བྱིན་པར་

---

^{[མ་དཔེ་གཟིགས་ན་འདིར་གནོན།]}

ལེན་པ་དེའི་ཚེ། ལུས་ཀྱི་ལས་གང་ཡིན་པ་དེ་ནི་རྣམ་པར་རིག་བྱེད་དོ། །རྣམ་པར་རིག་བྱེད་མ་ཡིན་པ་གང་ཞེ་ན། སྨྲས་པ། མ་བྱིན་པར་ལེན་པ་ལས་ཕྱིར་མ་ལོག་ཅིང༌། ཕྱིར་མ་ནུར་ལ་མ་བཏང་མ་སྤངས་པས། ཇི་སྟེ་ན་ལུས་ཀྱིས་ཀྱང་རྣམ་པར་རིག་པར་མི་བྱེད་པ་འདི་ནི་རྣམ་པར་རིག་བྱེད་མ་ཡིན་པའོ། །འདོད་པ་ལས་ལོག་པར་གཡེམ་པ་རྣམ་པར་རིག་བྱེད་ཅེས་བྱ་འམ། འོན་ཏེ་རྣམ་པར་རིག་བྱེད་མ་ཡིན་པ་ཞེས་བྱ་ཞེ་ན། སྨྲས་པ། རྣམ་པར་རིག་བྱེད་ཀྱང་ཡོད། རྣམ་པར་རིག་བྱེད་མ་ཡིན་པ་ཡང་ཡོད་དོ། །རྣམ་པར་རིག་བྱེད་གང་ཞེ་ན། སྨྲས་པ། ཇི་ལྟར་འདི་ན་ཁ་ཅིག་ལ་ལ་ཞིག་ལ་འདི་སྐད་དུ། གཞན་དག་གི་འདོད་པ་རྣམས་ལ་ལོག་པར་སྤྱོད་ཅིག་ཅེས་བསྒོ་ལ། དེས་ཀྱང་སྤྱད་པར་བྱའོ་ཞེས་སྨྲས་ཀྱང་རུང༌། མ་སྤྱད་ཅིག་ཅེས་བྱ་བ་བསྒོ་བཞིན་དུ་སྤྱོད་དོ་ཞེས་སྨྲས་ཀྱང་རུང་བ་ལས་ཕར་སོང་སྟེ། གཞན་དག་གི་འདོད་པ་རྣམས་ལ་ལོག་པར་སྤྱོད་ཀྱང་རུང༌། ཕྱིར་འོངས་ཏེ་གཞན་དག་གི་འདོད་པ་རྣམས་ལ་ལོག་པར་སྤྱོད་ཀྱང་རུང་སྟེ། གང་གི་ཚེ་གཞན་དག་གི་འདོད་པ་རྣམས་ལ་ལོག་པར་སྤྱོད་པ་དེའི་ཚེ་ལུས་ཀྱི་ལས་གང་ཡིན་པ་དེ་ནི་རྣམ་པར་རིག་བྱེད་དོ། །རྣམ་པར་རིག་བྱེད་མ་ཡིན་པ་གང་ཞེ་ན། སྨྲས་པ། འདོད་པ་ལ་ལོག་པར་སྤྱོད་པ་ལས་ཕྱིར་མ་ལོག་ཅིང་ཕྱིར་མ་ནུར་ལ་མ་བཏང་མ་སྤངས་པས། ཅི་སྟེ་ན་ལུས་ཀྱིས་ཀྱང་རྣམ་པར་རིག་པར་མི་བྱེད་པ་འདི་ནི། རྣམ་པར་རིག་བྱེད་མ་ཡིན་པའོ། །བརྫུན་དུ་སྨྲ་བ་རྣམ་པར་རིག་བྱེད་ཅེས་བྱ་འམ། འོན་ཏེ་རྣམ་པར་རིག་བྱེད་མ་ཡིན་པ་ཞེས་བྱ་ཞེ་ན། སྨྲས་པ། རྣམ་པར་རིག་བྱེད་ཀྱང་ཡོད། རྣམ་པར་རིག་བྱེད་མ་ཡིན་པ་ཡང་ཡོད་དོ། །རྣམ་པར་རིག་བྱེད་གང་ཞེ་ན། སྨྲས་པ། ཇི་ལྟར་འདི་ན་ཁ་ཅིག་ལ་ལ་ཞིག་ལ་འདི་སྐད་དུ། གཞན་དག་ལ་བརྫུན་དུ་སྨྲོས་ཤིག་ཅེས་བསྒོ་ལ། དེས་ཀྱང་སྨྲ་བར་བྱའོ་ཞེས་སྨྲས་ཀྱང་རུང༌། མ་སྨྲ་ཤིག་ཅེས་བསྒོ་བཞིན་དུ་སྨྲ་བར་བྱའོ་ཞེས་སྨྲས་ཀྱང་རུང་བ་ལས་ཕར་སོང་སྟེ། གཞན་དག་ལ་བརྫུན་དུ་སྨྲ་ཡང་རུང༌། ཕྱིར་འོངས་ཏེ་གཞན་དག་ལ་བརྫུན་དུ་སྨྲས་ཀྱང་རུང་སྟེ། གང་གི་ཚེ་གཞན་དག་ལ་བརྫུན་དུ་སྨྲ་བ་དེའི་ཚེ། ངག་གི་ལས་གང་ཡིན་པ་དེ་ནི་རྣམ་པར་རིག་བྱེད་དོ། །རྣམ་

---

^{[མ་དཔེ་གཟིགས་ན་འདིར་གནོན།]}

པར་རིག་བྱེད་མ་ཡིན་པ་གང་ཞེ་ན། སྨྲས་པ། བརྫུན་དུ་སྨྲ་བ་ལས་ཕྱིར་མ་ལོག་ཅིང་ཕྱིར་མ་ནུར་ལ་མ་བཏང་མ་སྤངས་པས། ཇི་སྟེ་ན་ཚིག་གིས་ཀྱང་རྣམ་པར་རིག་པར་མི་བྱེད་པ་འདི་ནི། རྣམ་པར་རིག་བྱེད་མ་ཡིན་པའོ། །ཕྲ་མ་རྣམ་པར་རིག་བྱེད་ཅེས་བྱའམ། རྣམ་པར་རིག་བྱེད་མ་ཡིན་པ་ཞེས་བྱ་ཞེ་ན། སྨྲས་པ། རྣམ་པར་རིག་བྱེད་ཀྱང་ཡོད། རྣམ་པར་རིག་བྱེད་མ་ཡིན་པ་ཡང་ཡོད་དོ། །རྣམ་པར་རིག་བྱེད་གང་ཞེ་ན། སྨྲས་པ། ཇི་ལྟར་འདི་ནི་ཁ་ཅིག་ལ་ལ་ཞིག་ལ་འདི་སྐད་དུ་གཞན་དག་གི་མཛའ་བོ་ཕྱེ་ཤིག་ཅེས་བསྒོ་ལ། དེས་ཀྱང་དབྱེའོ་ཞེས་སྨྲས་ཀྱང་རུང༌། མ་དབྱེ་ཤིག་ཅེས་བསྒོ་བཞིན་དུ་དབྱེའོ་ཞེས་སྨྲས་ཀྱང་རུང་བ་ལས། ཕར་སོང་སྟེ་གཞན་དག་གི་མཛའ་བོ་འབྱེད་ཀྱང་རུང༌། ཕྱིར་འོངས་ཏེ་གཞན་དག་གི་མཛའ་བོ་འབྱེད་ཀྱང་རུང་སྟེ། གང་གི་ཚེ་གཞན་དག་གི་མཛའ་བོ་འབྱེད་པ་དེའི་ཚེའི་ངག་གི་ལས་གང་ཡིན་པ་དེ་ནི་རྣམ་པར་རིག་བྱེད་དོ། །རྣམ་པར་རིག་བྱེད་མ་ཡིན་པ་གང་ཞེ་ན། སྨྲས་པ། ཕྲ་མ་ལས་ཕྱིར་མ་ལོག་ཅིང་ཕྱིར་མ་ནུར་ལ་མ་བཏང་མ་སྤངས་པས། ཇི་སྟེ་ན་ཚིག་གིས་ཀྱང་རྣམ་པར་རིག་པར་མི་བྱེད་པ་འདི་ནི་རྣམ་པར་རིག་བྱེད་མ་ཡིན་པའོ། །ཚིག་རྩུབ་པོ་རྣམ་པར་རིག་བྱེད་ཅེས་བྱ་འམ། འོན་ཏེ་རྣམ་པར་རིག་བྱེད་མ་ཡིན་པ་ཞེ་ན། སྨྲས་པ། རྣམ་པར་རིག་བྱེད་ཀྱང་ཡོད། རྣམ་པར་རིག་བྱེད་མ་ཡིན་པ་ཡང་ཡོད་དོ། །རྣམ་པར་རིག་བྱེད་གང་ཞེ་ན། སྨྲས་པ། ཇི་ལྟར་འདི་ན་ཁ་ཅིག་ལ་ལ་ཞིག་ལ་འདི་སྐད་དུ་གཞན་དག་ལ་ཚིག་རྩུབ་པོ་སྨྲོས་ཤིག་ཅེས་བསྒོ་ལ། དེས་ཀྱང་སྨྲ་བར་བྱའོ་ཞེས་སྨྲས་ཀྱང་རུང༌། མ་སྨྲ་ཤིག་ཅེས་བསྒོ་བ་བཞིན་སྨྲ་བར་བྱའོ་ཞེས་སྨྲས་ཀྱང་རུང་བ་ལས། ཕར་སོང་སྟེ་གཞན་དག་ལ་ཚིག་རྩུབ་པོས་སྨྲས་ཀྱང་རུང༌། ཕྱིར་འོངས་སྟེ་གཞན་དག་ལ་ཚིག་རྩུབ་པོ་སྨྲས་ཡང་རུང་སྟེ། གང་གི་ཚེ་གཞན་དག་ལ་ཚིག་རྩུབ་པོ་སྨྲ་བ་དེའི་ཚེའི་ངག་གི་ལས་གང་ཡིན་པ་དེ་ནི་རྣམ་པར་རིག་བྱེད་དོ། །རྣམ་པར་རིག་བྱེད་མ་ཡིན་པ་གང་ཞེ་ན། སྨྲས་པ། ཚིག་རྩུབ་པོ་ལས་ཕྱིར་མ་ལོག་ཅིང་ཕྱིར་མ་ནུར་ལ་མ་བཏང་མ་སྤངས་བས། ཇི་སྟེ་ན་ཚིག་གིས་ཀྱང་རྣམ་པར་རིག་པར་མི་བྱེད་པ་འདི་ནི་རྣམ་པར་རིག་བྱེད་མ་ཡིན་པའོ། །ཚིག་

---

^{[མ་དཔེ་གཟིགས་ན་འདིར་གནོན།]}

ཀྱལ་པ་རྣམ་པར་རིག་བྱེད་ཅེས་བྱ་འམ་འོན་ཏེ་རྣམ་པར་རིག་བྱེད་མ་ཡིན་པ་ཞེས་བྱ་ཞེ་ན། སྨྲས་པ། རྣམ་པར་རིག་བྱེད་ཀྱང་ཡོད། རྣམ་པར་རིག་བྱེད་མ་ཡིན་པ་ཡང་ཡོད་དོ། །རྣམ་པར་རིག་བྱེད་གང་ཞེ་ན། སྨྲས་པ། ཇི་ལྟར་འདི་ན་ཁ་ཅིག་ལ་ལ་ཞིག་ལ་འདི་སྐད་དུ། གཞན་དག་ལ་ཚིག་ཀྱལ་པ་སྨྲོས་ཤིག་ཅེས་བསྒོ་ལ། དེས་ཀྱང་སྨྲ་བར་བྱའོ་ཞེས་སྨྲས་ཀྱང་རུང༌། མ་སྨྲ་ཤིག་ཅེས་བསྒོ་བཞིན་དུ་སྨྲ་བར་བྱའོ་ཞེས་སྨྲས་ཀྱང་རུང་བ་ལས། ཕར་སོང་སྟེ་གཞན་དག་ལ་ཚིག་ཀྱལ་པ་སྨྲ་ཡང་རུང༌། ཕྱིར་འོངས་ཏེ་གཞན་དག་ལ་ཚིག་ཀྱལ་པ་སྨྲ་ཡང་རུང་སྟེ། གང་གི་ཚེ་གཞན་དག་ལ་ཚིག་ཀྱལ་པ་སྨྲ་བ་དེའི་ཚེའི་ངག་གི་ལས་གང་ཡིན་པ་དེ་ནི་རྣམ་པར་རིག་བྱེད་དོ། །རྣམ་པར་རིག་བྱེད་མ་ཡིན་པ་གང་ཞེ་ན། སྨྲས་པ། ཚིག་ཀྱལ་པ་ལས་ཕྱིར་མ་ལོག་ཅིང་ཕྱིར་མ་ནུར་ལ་མ་བཏང་མ་སྤངས་པས། ཇི་སྟེན་ཚིག་གིས་ཀྱང་རྣམ་པར་རིག་པར་མི་བྱེད་པ་འདི་ནི་རྣམ་པར་རིག་བྱེད་མ་ཡིན་པའོ། །བརྣབ་སེམས་དང༌། གནོད་སེམས་དང༌། ལོག་པར་ལྟ་བ་རྣམ་པར་རིག་བྱེད་ཅེས་བྱའམ། འོན་ཏེ་རྣམ་པར་རིག་བྱེད་མ་ཡིན་པ་ཞེས་བྱ་ཞེ་ན། སྨྲས་པ། རྣམ་པར་རིག་བྱེད་ཀྱང་མ་ཡིན། རྣམ་པར་རིག་བྱེད་མ་ཡིན་པ་ཡང་མ་ཡིན་ནོ། །མི་དགེ་བ་བཅུའི་ལས་ཀྱི་ལམ་ཞེས་བྱ་བ་ནས་རྒྱས་པར་སྦྱར་ཏེ། སྲོག་གཅོད་པ་གཟུགས་ཅན་ཞེས་བྱ་འམ། འོན་ཏེ་གཟུགས་ཅན་མ་ཡིན་པ་ཞེས་བྱ་ཞེ་ན། སྨྲས་པ། གཟུགས་ཅན་ཞེས་བྱའོ། །དེ་བཞིན་དུ་མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་གཟུགས་ཅན་ཞེས་བྱའམ། འོན་ཏེ་གཟུགས་ཅན་མ་ཡིན་པ་ཞེས་བྱ་ཞེ་ན། སྨྲས་པ། གཟུགས་ཅན་ཞེས་བྱའོ། །བརྣབ་སེམས་དང༌། གནོད་སེམས་དང༌། ལོག་པར་ལྟ་བ་གཟུགས་ཅན་ཞེས་བྱ་འམ། འོན་ཏེ་གཟུགས་ཅན་མ་ཡིན་པ་ཞེས་བྱ་ཞེ་ན། སྨྲས་པ། གཟུགས་ཅན་མ་ཡིན་པ་ཞེས་བྱའོ། །མི་དགེ་བ་བཅུའི་ལས་ཀྱི་ལམ་ཞེས་བྱ་བ་ནས་རྒྱས་པར་སྦྱར་ཏེ། སྲོག་གཅོད་པ་ཐོགས་པ་དང་བཅས་པ་ཞེས་བྱ་འམ། འོན་ཏེ་ཐོགས་

---

^{[མ་དཔེ་གཟིགས་ན་འདིར་གནོན།]}

པ་མེད་པ་ཞེས་བྱ་ཞེ་ན། སྨྲས་པ། ཐོགས་པ་དང་བཅས་པ་ཡང་ཡོད་ཐོགས་པ་མེད་པ་ཡང་ཡོད་དོ། །ཐོགས་པ་དང་བཅས་པ་གང་ཞེ་ན། སྨྲས་པ། རྣམ་པར་རིག་བྱེད་གང་ཡིན་པའོ། །ཐོགས་པ་མེད་པ་གང་ཞེ་ན། སྨྲས་པ། རྣམ་པར་རིག་བྱེད་མ་ཡིན་པ་གང་ཡིན་པའོ།། སྲོག་གཅོད་པ་ཇི་ལྟ་བ་བཞིན་དུ་མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་ཡང་དེ་དང་འདྲའོ། །བརྣབ་སེམས་དང༌། གནོད་སེམས་དང༌། ལོག་པར་ལྟ་བ་ཐོགས་པ་དང་བཅས་པ་ཞེས་བྱ་འམ། འོན་ཏེ་ཐོགས་པ་མེད་པ་ཞེས་བྱ་ཞེ་ན། སྨྲས་པ། ཐོགས་པ་མེད་པ་ཞེས་བྱའོ། །མི་དགེ་བ་བཅུའི་ལས་ཀྱི་ལམ་ཞེས་བྱ་བ་ནས་རྒྱས་པར་སྦྱར་ཏེ། སྲོག་གཅོད་པ་སེམས་ལས་བྱུང་བ་ཞེས་བྱའམ། འོན་ཏེ་སེམས་ལས་བྱུང་བ་མ་ཡིན་པ་ཞེས་བྱ་ཞེ་ན། སྨྲས་པ། སེམས་ལས་བྱུང་བ་མ་ཡིན་པ་ཞེས་བྱའོ། །སྲོག་གཅོད་པ་ཇི་ལྟ་བ་བཞིན་དུ་མ་བྱིན་པར་ལེན་པ་དང༌། འདོད་པ་ལ་སོགས་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་ཡང་དེ་དང་འདྲའོ། །བརྣབ་སེམས་དང༌། གནོད་སེམས་དང༌། ལོག་པར་ལྟ་བ་སེམས་ལས་བྱུང་བ་ཞེས་བྱའམ། འོན་ཏེ་སེམས་ལས་བྱུང་བ་མ་ཡིན་པ་ཞེས་བྱ་ཞེ་ན། སྨྲས་པ། སེམས་ལས་བྱུང་བ་ཞེས་བྱའོ། །མི་དགེ་བ་བཅུའི་ལས་ཀྱི་ལམ་ཞེས་བྱ་བ་ནས་རྒྱས་པར་སྦྱར་ཏེ། སྲོག་གཅོད་པ་ནི་རྣམ་པ་གསུམ་སྟེ། ཆགས་པ་ལས་བྱུང་བ་དང༌། ཞེ་སྡང་ལས་བྱུང་བ་དང༌། གཏི་མུག་ལས་བྱུང་བའོ། །སྲོག་གཅོད་པ་ཆགས་པ་ལས་བྱུང་བ་གང་ཞེ་ན། སྨྲས་པ། ཇི་ལྟར་འདི་ན་ཁ་ཅིག་སྲོག་ཆགས་གང་གི་ཤའམ། པགས་པའམ། རྭ་འམ། སོ་འམ། རུས་པའམ། རྒྱུས་པའམ། མཇུག་མ་འདོད་དེ། དེའི་རྒྱུ་དང་དེའི་རྐྱེན་གྱིས་སྲོག་ཆགས་ཀྱི་སྲོག་གཅོད་པར་བྱེད་དོ། །དེ་མ་ཡིན་ཏེ་བདག་ཉིད་མི་འདོད་བཞིན་དུ་ཟིན་ཀྱང་དེ་འདི་སྙམ་དུ་སེམས་ཏེ། སེམས་ཅན་བདག་ལ་སྡུག་པ་དང༌། གཅེས་པ་དང༌། དགའ་བ་དང༌། ཡིད་དུ་འོང་བ་གང་ཡིན་པ་དེ་དག་ལ་མཁོ་བ་དང༌། ལོངས་སྤྱོད་དུ་འགྱུར་རོ་སྙམ་ནས། དེ་དག་གི་དོན་

---

^{[མ་དཔེ་གཟིགས་ན་འདིར་གནོན།]}

དུ་སྲོག་ཆགས་ཀྱི་སྲོག་གཅོད་པར་བྱེད་དོ། །ཡང་ན་གཞན་གྱིས་དེ་ལ་འདི་སྐད་དུ། ཁྱོད་ཚུར་ཤོག་ལ་སྲོག་ཆགས་འདི་ལྟ་བུ་ཞིག་གི་སྲོག་གཅོད་ཅིག་དང༌། ངས་ཁྱོད་ལ་འདི་དང་འདི་ལྟ་བུ་ཞིག་སྦྱིན་ནོ། །འདི་དང་འདི་ལྟ་བུ་ཞིག་བྱའོ་ཞེས་བསྒོ་ན། དེས་ལོངས་སྤྱོད་དེ་དག་འདོད་ནས་སྲོག་ཆགས་ཀྱི་སྲོག་གཅོད་པར་བྱེད་དེ། དཔེར་ན་རྒྱལ་པོ་གཉིས་ཕན་ཚུན་མི་མཐུན་པ་དེས་རས་སམ་དོང་ཚེའམ། དོང་ཚེ་སྟོང་གི་ཕྱིར་མགོ་བོ་ཁྱེར་ཏེ་འོང་བར་བྱེད་ཅིང༌། དེས་ལོངས་སྤྱོད་དེ་དག་འདོད་ནས་སྲོག་ཆགས་ཀྱི་སྲོག་གཅོད་པར་བྱེད་པ་དེ་ལྟ་བུ་ནི། ཆགས་པ་ལས་བྱུང་བ་ཡིན་ནོ། །ཞེ་སྡང་ལས་བྱུང་བ་ཇི་ལྟ་བུ་ཞེ་ན། སྨྲས་པ། ཇི་ལྟ་འདི་ན་ཁ་ཅིག་གང་ལ་ཀུན་ནས་མནར་སེམས་དང༌། གསད་པའི་སེམས་ཡོད་པའི་ཕྱིར། སྲོག་ཆགས་དེའི་སྲོག་གཅོད་པར་བྱེད་དོ། །དེ་མ་ཡིན་ཏེ། དེ་ལ་ཀུན་ནས་མནར་སེམས་དང་གསད་པའི་སེམས་མེད་དུ་ཟིན་ཀྱང༌། གང་གི་སྲོག་ཆགས་སྡུག་པ་དང༌། གཅེས་པ་དང༌། དགའ་བ་དང༌། ཡིད་དུ་འོང་བ་དེ་དག་ལ་ཀུན་ནས་མནར་སེམས་དང༌། གསད་པའི་སེམས་ཡོད་པའི་ཕྱིར། དེ་འདི་སྙམ་དུ་སེམས་ཏེ། དེ་དག་ཡུན་རིང་པོར་མི་བཟོད་ཅིང་མི་བདེ་ལ། སེམས་མངོན་པར་མི་དགའ་བར་འགྱུར་བར་བྱའོ་སྙམ་ནས། སྲོག་ཆགས་དེའི་སྲོག་གཅོད་པར་བྱེད་པ་དེ་ལྟ་བུ་ནི་ཞེ་སྡང་ལས་བྱུང་བ་ཡིན་ནོ། །གཏི་མུག་ལས་བྱུང་བ་ཇི་ལྟ་བུ་ཞེ་ན། དཔེར་ན་བྲམ་ཟེ་དག་འདི་སྐད་དུ། སྤྲུལ་དང༌། སྡིག་པ་དང༌། སྲོག་ཆགས་ཏྲཻ་ལ་ཏ་དང༌། ཏྲེ་མ་བུ་ཀ་དང༌། སྲིན་གྱི་མེད་ལ་སྩོགས་པ་འདི་དག་ནི་གསད་པར་བྱའོ། །དེ་ཅིའི་ཕྱིར་ཞེ་ན། སྨྲས་པ། འདི་དག་ནི་མི་རྣམས་ཀྱི་དགྲ་དང༌། ཕྱིར་རྒོལ་བ་ཡིན་པའི་ཕྱིར། གླང་པོ་ཆེ་དང༌། རྟ་དང༌། རྔ་མོ་དང༌། བ་ལང་དང༌། བོང་བུ་ལ་སྩོགས་པ་འདི་དག་ཀྱང་གསད་པར་བྱའོ། །དེ་ཅིའི་ཕྱིར་ཞེ་ན། སྨྲས་པ། འདི་དག་ནི་མི་རྣམས་ཀྱི་ལོངས་སྤྱོད་ཡིན་པའི་ཕྱིར་ཞེས་ཟེར་བ་ལྟ་བུ་དང༌། ནུབ་ཕྱོགས་ན་བྲམ་ཟེ་མཆུ་སྐྱེས་ཞེས་བྱ་བ་དག་ཡོད་དེ། དེ་དག་ནི་འདི་སྐད་དུ། གང་ཕ་འམ། མ་འམ། ཕུ་ནུ་པོའམ། སྲིང་མོ་འམ། མཛའ་བོ་དང་

---

^{[མ་དཔེ་གཟིགས་ན་འདིར་གནོན།]}

གཉེན་དང༌། རྒན་རབས་གང་ཡང་རུང་བ་ནད་ཀྱིས་ཐེབས་ཏེ། སྡུག་བསྔལ་ཞིང་ནད་ཚབས་ཆེ་བའི་སྲོག་གཅོད་པ་ལ་ནི་བསོད་ནམས་མང་པོ་འཕེལ་བར་འགྱུར་རོ། །དེ་ཅིའི་ཕྱིར་ཞེ་ན། སྨྲས་པ། ཇི་སྲིད་ཀྱི་བར་དུ་གསོན་ཞིང་འདུག་ལ་སྡོད་ཅིང་འཚོ་བ་དེ་སྲིད་ཀྱི་བར་དུ་སྡུག་བསྔལ་ཞིང་ཡིད་དུ་མི་འོང་བས་གནས་ལ་ལུས་དང་བྲལ་ན་ནི་དེ་ལྟ་མ་ཡིན་པའི་ཕྱིར་རོ་ཞེས་ཟེར་ཏེ། ལས་དེ་ལ་ཅི་ཡང་མི་འོང་བར་ལྟ་ཞིང་འབྲས་བུ་མེད་པར་ལྟ་ལ། འདི་ལྟར་ལྟ་ཞིང་འདི་སྐད་དུ་སྨྲ་སྟེ། ལས་འདི་མེད་དོ། །ལས་འདིའི་འབྲས་བུ་རྣམ་པར་སྨིན་པ་མེད་དོ་ཞེས་ཟེར་བ་དེ་ལྟ་བུ་ནི་གཏི་མུག་ལས་བྱུང་བ་ཡིན་ནོ། །མ་བྱིན་པར་ལེན་པ་ཡིན་ནོ། །ཞེ་སྡང་ལས་བྱུང་བ་ཇི་ལྟ་བུ་ཞེ་ན། སྨྲས་པ། ཇི་ལྟར་འདི་ན་ཁ་ཅིག་གང་ཟག་གང་ལ་ཀུན་ནས་མནར་སེམས་དང༌། ཁྲོ་བའི་སེམས་ཡོད་པའི་ཕྱིར། དེ་ལ་འདོད་པ་ལ་ལོག་པར་གཡེམ་པ་ཀུན་དུ་སྤྱོད་པར་བྱེད་དོ། །དེ་ནི་མ་ཡིན་ཏེ། དེ་ལ་ཀུན་ནས་མནར་སེམས་དང༌། ཁྲོ་བའི་སེམས་མེད་དུ་ཟིན་ཀྱང༌། གང་ཟག་དེའི་སྡུག་པ་དང༌། གཅེས་པ་དང༌། དགའ་བ་དང༌། ཡིད་དུ་འོང་བ་གང་ཡིན་པ་དེ་དག་ལ་ཀུན་ནས་མནར་སེམས་དང༌། ཁྲོ་བའི་སེམས་ཡོད་པའི་ཕྱིར་དེ་འདི་སྙམ་དུ་སེམས་ཏེ། དེ་དག་ཡུན་རིང་པོར་མི་བཟོད་ཅིང༌། མི་བདེ་ལ་སེམས་མངོན་པར་མི་དགའ་བར་འགྱུར་བར་བྱའོ་སྙམ་ནས་གང་ཟག་དེའི་ལ་འདོད་པ་ལ་ལོག་པར་གཡེམ་པ་ཀུན་དུ་སྤྱོད་པ་དེ་ལྟ་བུ་ནི་ཞེ་སྡང་ལས་བྱུང་བ་ཡིན་ནོ། །གཏི་མུག་ལས་བྱུང་བ་ཇི་ལྟ་བུ་ཞེ་ན། སྨྲས་པ། དཔེར་ན་བྲམ་ཟེ་དག་འདི་སྐད་དུ་བྲམ་ཟེའི་ཆུང་མ་ནི་བཞི་སྟེ། བྲམ་ཟེ་མོ་དང༌། རྒྱལ་རིགས་མོ་དང༌། རྗེའུ་རིགས་མོ་དང༌། དམངས་རིགས་མོའོ། །རྒྱལ་རིགས་ཀྱི་ནི་གསུམ་སྟེ། རྒྱལ་རིགས་མོ་དང༌། རྗེའུ་རིགས་མོ་དང༌། དམངས་རིགས་མོའོ། རྗེའུ་རིགས་ཀྱི་ནི་གཉིས་ཏེ། རྗེའུ་རིགས་མོ་དང༌། དམངས་རིགས་མོའོ། །དམངས་རིགས་ཀྱི་ནི་གཅིག་སྟེ། དམངས་རིགས་མོའོ་ཞེས་ཟེར་བ་ལྟ་བུ་དང༌། ནུབ་ཕྱོགས་ན་བྲམ་ཟེ་མཆུ་སྐྱེས་ཞེས་བྱ་བ་དག་ཡོད་དེ། དེ་དག་ནི་འདི་སྐད་དུ། གང་མའམ། བུ་མོའམ། སྲིང་མོའམ། ཡང་ན་མཛའ་བོ་དང༌།

---

^{[མ་དཔེ་གཟིགས་ན་འདིར་གནོན།]}

གཉེན་དང༌། རྒན་རབས་ཀྱི་འདོད་པ་ལ་ལོག་པར་གཡེམ་པ་ཀུན་དུ་སྤྱོད་པ་དེ་ལ་ནི་གཞི་དེ་ལས་སྡིག་པར་འགྱུར་བ་མེད་དོ། །དེ་ཅིའི་ཕྱིར་ཞེ་ན། སྨྲས་པ། བུད་མེད་ནི་འབྲས་ཆན་བཙོས་པ་དང་འདྲ་སྟེ། དཔེར་ན་འབྲས་ཆན་བཙོས་པ་ནི་འདི་ལྟ་སྟེ། ལོངས་སྤྱད་པར་བྱ་བའི་རྒྱུ་ཡིན་པ་དེ་བཞིན་དུ། བུད་མེད་ཀྱང་འདི་ལྟ་སྟེ། འཁྲིག་པར་བྱ་བའི་རྒྱུ་ཡིན་ནོ། །བུད་མེད་ནི་གཏུན་དང་འདྲ་སྟེ་དཔེར་ན་གཏུན་ནི་འདི་ལྟ་སྟེ། དྲུ་བའི་རྒྱུ་ཡིན་པ་དེ་བཞིན་དུ་བུད་མེད་ནི་འདི་ལྟ་སྟེ། འཁྲིག་པར་བྱ་བའི་རྒྱུ་ཡིན་ནོ། །བུད་མེད་ནི་ལམ་དང་འདྲ་སྟེ། དཔེར་ན་ལམ་ནི་འདི་ལྟ་སྟེ། འོང་བ་དང་འགྲོ་བར་བྱ་བའི་རྒྱུ་ཡིན་པ་དེ་བཞིན་དུ། བུད་མེད་ནི་འདི་ལྟ་སྟེ། འཁྲིག་པར་བྱ་བའི་རྒྱུ་ཡིན་ནོ། །བུད་མེད་ནི་ཆུ་ཀླུང་གི་ཆུ་ཁ་དང་འདྲ་སྟེ། དཔེར་ན་ཆུ་ཀླུང་གི་ཆུ་ཁ་ནི་འདི་ལྟ་སྟེ། ཁྲུས་ལ་སྩོགས་པ་བྱ་བའི་རྒྱུ་ཡིན་པ་དེ་བཞིན་དུ། བུད་མེད་ནི་འདི་ལྟ་སྟེ། འཁྲིག་པར་བྱ་བའི་རྒྱུ་ཡིན་ནོ། །བུད་མེད་ནི་མེ་ཏོག་དང་འབྲས་བུ་དང་འདྲ་སྟེ། དཔེར་ན་མེ་ཏོག་དང་འབྲས་བུ་ནི་འདི་ལྟ་སྟེ། ལོངས་སྤྱོད་པར་བྱ་བའི་རྒྱུ་ཡིན་པ་དེ་བཞིན་དུ་བུད་མེད་ནི་འདི་ལྟ་སྟེ། འཁྲིག་པར་བྱ་བའི་རྒྱུ་ཡིན་ནོ་ཞེས་ཟེར་བ་ལྟ་བུ་དང༌། འདི་སྐད་ཅེས་ཟེར་བ་ཡང་ཡོད་དེ། མི་རྣམས་ལ་འདོད་པ་ལ་ལོག་པར་གཡེམ་པར་འགྱུར་བ་མེད་དེ། དེ་ཅིའི་ཕྱིར་ཞེ་ན། སྨྲས་པ། མི་རྣམས་ལ་ཐ་དད་པའི་མི་མེད་པའི་ཕྱིར་རོ་ཞེས་ཟེར་ཏེ། ལས་དེ་ལ་ཅི་ཡང་མི་འོང་བར་ལྟ་ཞིང་འབྲས་བུ་མེད་པར་ལྟ་ལ། འདི་ལྟར་ལྟ་ཞིང་འདི་སྐད་དུ་སྨྲ་སྟེ། ལས་འདི་མེད་དོ། །ལས་འདིའི་འབྲས་བུ་རྣམ་པར་སྨིན་པ་མེད་དོ་ཞེས་ཟེར་བ་དེ་ལྟ་བུ་ནི་འདོད་པ་ལ་ལོག་པར་གཡེམ་པ་གཏི་མུག་ལས་བྱུང་བ་ཡིན་ནོ། །བརྫུན་དུ་སྨྲ་བ་ནི་རྣམ་པ་གསུམ་སྟེ། ཆགས་པས་ལས་བྱུང་བ་དང༌། ཞེ་སྡང་ལས་བྱུང་བ་དང༌། གཏི་མུག་ལས་བྱུང་བའོ། །བརྫུན་དུ་སྨྲ་བ་ཆགས་པ་ལས་བྱུང་བ་གང་ཞེ་ན། སྨྲས་པ། ཇི་ལྟར་འདི་ན་ཁ་ཅིག་ཡོ་བྱད་གང་འདོད་པ་དེ་སྒྲུབ་པར་བྱེད་པ་ན་དེ་གཞན་ལ་བརྫུན་དུ་སྨྲ་བར་འདྲིད་པར་བྱེད་དོ། །དེ་མ་ཡིན་ཏེ་བདག་ཉིད་མི་འདོད་དུ་ཟིན་ཀྱང་དེ་འདི་སྙམ་དུ་སེམས་ཏེ། སེམས་ཅན་བདག་ལ་སྡུག་པ་དང༌།

---

^{[མ་དཔེ་གཟིགས་ན་འདིར་གནོན།]}

གཅེས་པ་དང༌། དགའ་བ་དང༌། ཡིད་དུ་འོང་བ་གང་ཡིན་པ་དེ་དག་ལ་མཁོ་བ་དང༌། འཆང་བ་དང༌། ལོངས་སྤྱོད་དུ་འགྱུར་རོ་སྙམ་ནས། དེ་དེ་དག་གི་དོན་དུ་གཞན་དག་ལ་ཤེས་བཞིན་དུ་བརྫུན་དུ་སྨྲས་པས་འདྲིད་པར་བྱེད་དོ། །ཡང་ན་གཞན་དག་དེ་ལ་འདི་སྐད་དུ་ཁྱོད་ཚུར་ཤོག་ལ། མིང་འདི་ཞེས་བྱ་བ་ལ་ཤེས་བཞིན་དུ་བརྫུན་དུ་སྨྲ་བས་བྲིད་ཅིག་དང༌། ངས་ཁྱོད་ལ་འདི་དང་འདི་ལྟ་བུ་ཞིག་སྦྱིན་ནོ། །འདི་དང་འདི་ལྟ་བུ་ཞིག་བྱའོ་ཞེས་བསྒོ་ནས། དེས་ལོངས་སྤྱོད་དེ་དག་འདོད་ནས། གཞན་དག་ལ་ཤེས་བཞིན་དུ་བརྫུན་དུ་སྨྲ་བས་འདྲིད་པར་བྱེད་པ་དེ་ལྟ་བུ་ནི་ཆགས་པ་ལས་བྱུང་བ་ཡིན་ནོ། །ཞེ་སྡང་ལས་བྱུང་བ་ཇི་ལྟ་བུ་ཞེ་ན། སྨྲས་པ། ཇི་ལྟར་འདི་ན་ཁ་ཅིག་གང་ལ་ཀུན་ནས་མནར་སེམས་དང༌། ཁྲོ་བའི་སེམས་ཡོད་པའི་ཕྱིར་དེ་ལ་ཤེས་བཞིན་དུ་བརྫུན་དུ་སྨྲ་བས་འདྲིད་པར་བྱེད་དོ། །དེ་མ་ཡིན་ཏེ་དེ་ལ་ཀུན་ནས་མནར་སེམས་དང༌། ཁྲོ་བའི་སེམས་མེད་དུ་ཟིན་ཀྱང༌། དེའི་སྡུག་པ་དང༌། གཅེས་པ་དང༌། དགའ་བ་དང༌། ཡིད་དུ་འོང་བ་གང་ཡིན་པ་དེ་དག་ལ། ཀུན་ནས་མནར་སེམས་དང་ཁྲོ་བའི་སེམས་ཡོད་པའི་ཕྱིར་དེ་འདི་སྙམ་དུ་སེམས་ཏེ། དེ་དག་ཡུན་རིང་པོར་མི་བཟོད་ཅིང་མི་བདེ་ལ་སེམས་མངོན་བར་མི་དགའ་བར་འགྱུར་བར་བྱའོ་སྙམ་ནས། དེའི་ལ་ཤེས་བཞིན་དུ་བརྫུན་དུ་སྨྲ་བས་འདྲིད་པར་བྱེད་པ་དེ་ལྟ་བུ་ནི་ཞེ་སྡང་ལས་བྱུང་བ་ཡིན་ནོ། །གཏི་མུག་ལས་བྱུང་བ་ཇི་ལྟ་བུ་ཞེ་ན། དཔེར་ན་དགོན་པའི་རི་དགས་མཐོང་ན། རྔོན་པས་དེ་ལ་དྲིས་ཏེ། ཁྱོད་ཀྱིས་རི་དགས་མཐོང་ངམ་ཞེས་བྱས་ན། དེ་འདི་སྙམ་དུ་སེམས་ཏེ། རྔོན་པས་རི་དགས་བསད་ན་མི་རུང་ངོ་སྙམ་ནས། དེ་ལ་མ་མཐོང་ངོ་ཞེས་ཟེར་བ་ལྟ་བུ་དང༌། དཔེར་ན་མི་རྒོད་ཀྱི་དཔུང་མཐོང་ལ། རྒྱལ་པོའི་དཔུང་གིས་དེ་ལ་དྲིས་ཏེ། ཅི་ཁྱོད་ཀྱིས་མི་རྒོད་ཀྱི་དཔུང་མཐོང་ངམ་ཞེས་བྱས་ན། དེ་འདི་སྙམ་དུ་སེམས་ཏེ། རྒྱལ་པོའི་དཔུང་གིས་མི་རྒོད་ཀྱི་དཔུང་བསད་ན་མི་རུང་ངོ་སྙམ་ནས། བདག་གིས་མི་མཐོང་ངོ་ཞེས་ཟེར་བ་ལྟ་བུ་དང༌། དཔེར་ན་རྒྱལ་པོའི་དཔུང་མཐོང་ལ། ཅི་ཁྱོད་ཀྱིས་རྒྱལ་པོའི་དཔུང་མཐོང་ངམ་ཞེས་དེ་ལ་དེས་དྲིས་ན། དེ་འདི་སྙམ་དུ་སེམས་ཏེ། མི་རྒོད་ཀྱི་དཔུང་གིས་རྒྱལ་པོའི་དཔུང་བསད་ན་མི་རུང་ངོ་སྙམ་ནས་

---

^{[མ་དཔེ་གཟིགས་ན་འདིར་གནོན།]}

བདག་གིས་མ་མཐོང་ངོ་ཞེས་ཟེར་བ་ལྟ་བུ་སྟེ། ལས་དེ་ལ་ཅི་ཡང་མི་འོང་བར་ལྟ་ཞིང་འབྲས་བུ་མེད་པར་ལྟ་ལ་འདི་ལྟར་ལྟ་ཞིང་འདི་སྐད་དུ་སྨྲ་སྟེ། ལས་འདི་མེད་དོ། །ལས་འདིའི་འབྲས་བུ་རྣམ་པར་སྨིན་པ་མེད་དོ་ཞེས། གཏི་མུག་ལས་བྱུང་བའི་བརྫུན་དུ་སྨྲ་བར་བྱེད་པ་དེ་ལྟ་བུ་ནི་གཏི་མུག་ལས་བྱུང་བ་ཡིན་ནོ། །ཕྲ་མ་ནི་རྣམ་པ་གསུམ་སྟེ། ཆགས་པ་ལས་བྱུང་བ་དང༌། ཞེ་སྡང་ལས་བྱུང་བ་དང༌། གཏི་མུག་ལས་བྱུང་བའོ། །ཕྲ་མ་ཆགས་པ་ལས་བྱུང་བ་གང་ཞེ་ན། སྨྲས་པ། ཇི་ལྟར་འདི་ན་ཁ་ཅིག་ཡོ་བྱད་གང་འདོད་པ་དེའི་རྒྱུ་དང༌། དེའི་རྐྱེན་གྱིས་དེ་གཞན་དག་གི་མཛའ་བོ་འབྱེད་པར་བྱེད་དོ། །དེ་མ་ཡིན་ཏེ་བདག་ཉིད་མི་འདོད་དུ་ཟིན་ཀྱང༌། དེ་འདི་སྙམ་དུ་སེམས་ཏེ། སེམས་ཅན་བདག་ལ་སྡུག་པ་དང༌། གཅེས་པ་དང༌། དགའ་བ་དང༌། ཡིད་དུ་འོང་བ་གང་ཡིན་པ་དེ་དག་ལ་མཁོ་བ་དང༌། འཆང་བ་དང༌། ལོངས་སྤྱོད་དུ་འགྱུར་རོ་སྙམ་ནས་དེ་དག་གི་དོན་དུ། གཞན་དག་གི་མཛའ་བོ་འབྱེད་པར་བྱེད་དོ། །ཡང་ན་གཞན་གྱིས་དེ་ལ་འདི་སྐད་དུ་ཁྱོད་ཚུར་ཤོག་ལ་མིང་འདི་ཞེས་བྱ་བའི་མཛའ་བོ་ཕྱེ་ཤིག་དང༌། ངས་ཁྱོད་ལ་འདི་དང་འདི་ལྟ་བུ་ཞིག་སྦྱིན་ནོ། །འདི་དང་འདི་ལྟ་བུ་ཞིག་བྱའོ་ཞེས་བསྒོ་ནས། དེས་ལོངས་སྤྱོད་དེ་དག་འདོད་ནས་གཞན་དག་གི་མཛའ་བོ་འབྱེད་བར་བྱེད་དོ། །དཔེར་ན་བྲམ་ཟེའི་བསོད་སྙོམས་སྙེར་བའི་ཁྱིམ་ནོར་མ་གོས་པ་དེ་དག་ལས། དེའི་ལྷུང་བཟེད་གཅིག་དང༌། གོས་གཅིག་དང༌། ཟན་གཅིག་པུ་འོང་བ་ལ་དེ་འདི་སྙམ་དུ་སེམས་ཏེ། ཇི་སྲིད་དུ་འདི་དག་ལྷན་ཅིག་ན་འཁོད་ཅིང་མཐུན་པ་དེ་སྲིད་དུ་འདི་དག་ལས་བདག་གིས་ལྷུང་བཟེད་གཅིག་དང་གོས་གཅིག་དང༌། ཟན་གཅིག་པུ་འོང་གིས། བདག་གིས་འདི་དག་དབྱེ་བའི་ཐབས་ཤིག་བྱ་གོར་མ་ཆག་སྙམ་ནས། དེ་དག་འབྱེད་པའི་ཐབས་བྱེད་པ་ལྟ་བུ་དང༌། དཔེར་ན་རྒྱལ་པོ་གཉིས་ཕན་ཚུན་མི་མཐུན་ཏེ་ནང་ན་འཁོད་པ་རྣམས་ནི་ཕྱི་རོལ་གྱི་ལོངས་སྤྱོད་འདོད་ནས། ཕྱི་རོལ་པ་རྣམས་དབྱེ་བའི་ཐབས་བྱེད་ལ། ཕྱི་རོལ་པ་རྣམས་ནི་ནང་གི་ལོངས་སྤྱོད་འདོད་ནས་ནང་ན་འཁོད་པ་རྣམས་དབྱེ་བའི་ཐབས་བྱེད་པ་དེ་ལྟ་བུ་ནི་ཆགས་པ་ལས་བྱུང་བ་ཡིན་ནོ། །ཞེ་སྡང་ལས་

---

^{[མ་དཔེ་གཟིགས་ན་འདིར་གནོན།]}

བྱུང་བ་ཇི་ལྟ་བུ་ཞེ་ན། སྨྲས་པ། ཇི་ལྟར་འདི་ན་ཁ་ཅིག་གང་ལ་ཀུན་ནས་མནར་སེམས་དང༌། ཁྲོ་བའི་སེམས་ཡོད་པ་དེའི་མཛའ་བོ་འབྱེད་དོ། །དེ་མ་ཡིན་ཏེ་དེ་ལ་ཀུན་ནས་མནར་སེམས་དང༌། ཁྲོ་བའི་སེམས་མེད་དུ་ཟིན་ཀྱང་སེམས་ཅན་དེ་གང་དག་སྡུག་པ་དང༌། གཅེས་པ་དང༌། དགའ་བ་དང༌། ཡིད་དུ་འོང་བ་དེ་དག་ལ་ཀུན་ནས་མནར་སེམས་དང༌། ཁྲོ་བའི་སེམས་ཡོད་པའི་ཕྱིར། དེ་འདི་སྙམ་དུ་སེམས་ཏེ། དེ་དག་ཡུན་རིང་པོར་མི་བཟོད་ཅིང༌། མི་བདེ་ལ་སེམས་མངོན་པར་མི་དགའ་བར་འགྱུར་བར་བྱའོ་སྙམ་ནས། དེ་དག་གི་མཛའ་བོ་དེ་འབྱེད་པར་བྱེད་པ་དེ་ལྟ་བུ་ནི་ཞེ་སྡང་ལས་བྱུང་བ་ཡིན་ནོ། །གཏི་མུག་ལས་བྱུང་བ་ཇི་ལྟ་བུ་ཞེ་ན། བྲམ་ཟེ་དག་འདི་སྐད་དུ་ལུག་གསོད་པ་དང༌། བྱ་གག་གསོད་པ་དང༌། ཕག་གསོད་པ་དང༌། བྱ་བ་དང༌། རྔོན་པ་དང༌། ཆོམ་རྐུན་དང༌། གཤེད་མ་དང༌། བརྩོན་རྫི་དང༌། ཁྱི་ཤ་ཅན་དང༌། རི་བོང་རྒྱས་འཚོར་བ་གང་ཡིན་པ་འདི་དག་ནི་དབྱེ་བར་བྱའོ། །ཅིའི་ཕྱིར་ཞེ་ན། ཇི་སྲིད་དུ་འདི་དག་ལྷན་ཅིག་འཁོད་ཅིང་མཐུན་པ་དེ་སྲིད་དུ་བསོད་ནམས་མ་ཡིན་པ་མང་དུ་འཕེལ་བར་འགྱུར་ལ། ཕྱེ་ན་ནི་དེ་ལྟར་མི་འགྱུར་རོ་ཞེས་ཟེར་ཏེ། ལས་དེ་ལ་ཅི་ཡང་མི་འོང་བར་ལྟ་ཞིང༌། འབྲས་བུ་མེད་པར་ལྟ་ལ། འདི་ལྟར་ལྟ་ཞིང་འདི་སྐད་དུ་སྨྲ་སྟེ། ལས་འདི་མེད་དོ། །ལས་འདིའི་འབྲས་བུ་རྣམ་པར་སྨིན་པ་མེད་དོ་ཞེས་ཏེ། གཏི་མུག་ལས་བྱུང་བའི་ཕྲ་མ་ཟེར་བ་དེ་ལྟ་བུ་ནི་གཏི་མུག་ལས་བྱུང་བ་ཡིན་ནོ། །ཚིག་རྩུབ་པོ་ནི་རྣམ་པ་གསུམ་སྟེ། ཆགས་པ་ལས་བྱུང་བ་དང༌། ཞེ་སྡང་ལས་བྱུང་བ་དང༌། གཏི་མུག་ལས་བྱུང་བའོ། །ཚིག་རྩུབ་པོ་ཆགས་པ་ལས་བྱུང་བ་གང་ཞེ་ན། སྨྲས་པ། ཇི་ལྟར་འདི་ན་ཁ་ཅིག་ཡོ་བྱད་གང་འདོད་པ་དེའི་རྒྱུ་དང༌། རྐྱེན་གྱིས་གཞན་ལ་ཚིག་རྩུབ་པོ་ཀུན་དུ་སྤྱོད་པར་བྱེད་དོ། །དེ་མ་ཡིན་ཏེ་བདག་ཉིད་མི་འདོད་དུ་ཟིན་ཀྱང་དེ་འདི་སྙམ་དུ་སེམས་ཏེ། སེམས་ཅན་བདག་ལ་སྡུག་པ་དང༌། གཅེས་པ་དང༌། དགའ་བ་དང༌། ཡིད་དུ་འོང་བ་དེ་དག་ལ་མཁོ་བ་དང༌། འཆང་བ་དང༌། ལོངས་སྤྱོད་དུ་འགྱུར་རོ་སྙམ་ནས། དེ་དག་གི་དོན་དུ་གཞན་ལ་ཚིག་རྩུབ་པོ་ཀུན་དུ་སྤྱོད་པར་བྱེད་དོ། །དཔེར་ན་ཡི་གེ་འམ། རྩིས་སམ། བགྲང་བ་

---

^{[མ་དཔེ་གཟིགས་ན་འདིར་གནོན།]}

འམ། ལག་རྩིས་སམ། བཟོའི་གནས་སམ། ལས་ཀྱི་གནས་གང་ཡང་རུང་བའི་སྒོ་ནས་གྲོང་དང༌། གྲོང་རྡལ་དང༌། ཡུལ་འཁོར་དང༌། རྒྱལ་པོའི་ཕོ་བྲང་དེ་དང་དེ་དག་ཏུ་བསྐོས་ན། དེས་ལོངས་སྤྱོད་དེ་དག་འདོད་ནས། གཞན་ལ་ཚིག་རྩུབ་པོ་ཀུན་དུ་སྤྱོད་པར་བྱེད་དོ། །ཡང་ན་གཞན་གྱིས་དེ་ལ་འདི་སྐད་དུ་ཁྱོད་ཚུར་ཤོག་ལ་མིང་འདི་ཞེས་བྱ་བ་ལ་ཚིག་རྩུབ་པོ་ཀུན་དུ་སྤྱོད་ཅིག་དང༌། ངས་ཁྱོད་ལ་འདི་དང་འདི་ལྟ་བུ་ཞིག་སྦྱིན་ནོ། །འདི་དང་འདི་ལྟ་བུ་ཞིག་བྱའོ་ཞེས་བསྒོ་ནས། དེས་ལོངས་སྤྱོད་དེ་དག་འདོད་ནས། གཞན་ལ་ཚིག་རྩུབ་པོ་ཀུན་དུ་སྤྱོད་པར་བྱེད་པ་དེ་ལྟ་བུ་ནི་ཆགས་པ་ལས་བྱུང་བ་ཡིན་ནོ། །ཞེ་སྡང་ལས་བྱུང་བ་ཇི་ལྟ་བུ་ཞེ་ན། སྨྲས་པ། ཇི་ལྟར་འདི་ན་ཁ་ཅིག་གང་ལ་ཀུན་ནས་མནར་སེམས་དང༌། ཁྲོ་བའི་སེམས་ཡོད་པའི་ཕྱིར། དེ་ལ་ཚིག་རྩུབ་པོ་ཀུན་དུ་སྤྱོད་པར་བྱེད་དོ། །དེ་མ་ཡིན་ཏེ་དེ་ལ་ཀུན་ནས་མནར་སེམས་དང༌། ཁྲོ་བའི་སེམས་མེད་དུ་ཟིན་ཀྱང་གང་དག་གི་སེམས་ཅན་སྡུག་པ་དང༌། གཅེས་པ་དང༌། དགའ་བ་དང༌། ཡིད་དུ་འོང་བ་དེ་དག་ལ་ཀུན་ནས་མནར་སེམས་དང༌། ཁྲོ་བའི་སེམས་ཡོད་པའི་ཕྱིར་དེ་འདི་སྙམ་དུ་སེམས་ཏེ། དེ་དག་ཡུན་རིང་པོར་མི་བཟོད་ཅིང༌། མི་བདེ་ལ་སེམས་མངོན་པར་མི་དགའ་བར་འགྱུར་བར་བྱའོ་སྙམ་ནས། སེམས་ཅན་དེ་དག་ལ་ཚིག་རྫུབ་པོ་ཀུན་དུ་སྤྱོད་པར་བྱེད་པ་དེ་ལྟ་བུ་ནི་ཞེ་སྡང་ལས་བྱུང་བ་ཡིན་ནོ། །གཏི་མུག་ལས་བྱུང་བ་ཇི་ལྟ་བུ་ཞེ་ན། སྨྲས་པ། དཔེར་ན་མིའི་ལས་སྤྱོད་པ་དང༌། རལ་པ་ཅན་དག་ནི་ཕལ་ཆེར་ཚིག་རྩུབ་པོ་སྨྲ་བ་ཡིན་ཏེ། དེ་དག་གི་སློབ་མ་ཁྱིམ་པ་གོས་དཀར་པོ་ཅན་གང་ཡིན་པ་དེ་དག་འདི་སྙམ་དུ་སེམས་ཏེ། བདག་ཅག་གི་སྟོན་པ་ནི་ཤེས་པས་ཤེས་ཤིང༌། མཐོང་བས་མཐོང་ལ་དེ་ཚིག་རྩུབ་པོ་སྨྲ་བ་ལས་ནི་འདི་ལྟ་སྟེ་ཚིག་རྩུབ་པོ་འདི་ནི་ལེགས་པ་ཞིག་ཡིན་གོར་མ་ཆག་གོ །འདི་ནི་ཤིན་ཏུ་བཟང་པོ་ཞིག་ཡིན་གོར་མ་ཆག་གོ་སྙམ་སྟེ། ལས་དེ་ལ་ཅི་ཡང་མི་འོང་བར་ལྟ་ཞིང༌། འབྲས་བུ་མེད་པར་ལྟ་ལ་འདི་སྐད་དུ་སྨྲ་སྟེ། ལས་འདི་མེད་དོ། །ལས་འདིའི་འབྲས་བུ་རྣམ་པར་སྨིན་པ་མེད་དོ་ཞེས་ཟེར་ཏེ། གཏི་མུག་

---

^{[མ་དཔེ་གཟིགས་ན་འདིར་གནོན།]}

ལས་བྱུང་བའི་ཚིག་རྩུབ་པོ་སྨྲ་བ་དེ་ལྟ་བུ་ནི། གཏི་མུག་ལས་བྱུང་བ་ཡིན་ནོ། །ཚིག་ཀྱལ་པ་ནི་རྣམ་པ་གསུམ་སྟེ། ཆགས་པ་ལས་བྱུང་བ་དང༌། ཞེ་སྡང་ལས་བྱུང་བ་དང༌། གཏི་མུག་ལས་བྱུང་བའོ། །ཚིག་ཀྱལ་བ་ཆགས་པ་ལས་བྱུང་བ་གང་ཞེ་ན། སྨྲས་པ། ཇི་ལྟར་འདི་ན་ཁ་ཅིག་ཡོ་བྱད་གང་འདོད་པ་དེའི་རྒྱུ་དང༌། དེའི་རྐྱེན་གྱིས་གཞན་དག་ལ་ཚིག་ཀྱལ་པས་འདྲིད་པར་བྱེད་དོ། །དེ་མ་ཡིན་ཏེ་བདག་ཉིད་མི་འདོད་དུ་ཟིན་ཀྱང༌། དེ་འདི་སྙམ་དུ་སེམས་ཏེ། སེམས་ཅན་བདག་ལ་སྡུག་པ་དང༌། གཅེས་པ་དང༌། དགའ་བ་དང༌། ཡིད་དུ་འོང་བ་དེ་དག་ལ་མཁོ་བ་དང༌། འཆང་བ་དང༌། དེ་དག་གི་ལོངས་སྤྱོད་དུ་གྱུར་རོ་སྙམ་ནས། དེ་དག་གི་དོན་དུ་གཞན་ལ་ཚིག་ཀྱལ་བས་འདྲིད་པར་བྱེད་དོ། །ཡང་ན་གཞན་གྱིས་དེ་ལ་འདི་སྐད་དུ་ཁྱོད་ཚུར་ཤོག་ལ། མིང་འདི་ཞེས་བྱ་བ་ལ་ཚིག་ཀྱལ་པས་དྲིད་ཅིག་དང༌། ངས་ཁྱོད་ལ་འདི་དང་འདི་ལྟ་བུ་ཞིག་སྦྱིན་ནོ། །འདི་དང་འདི་ལྟ་བུ་ཞིག་བྱའོ་ཞེས་བསྒོ་ནས། དེ་ལོངས་སྤྱོད་དེ་དག་འདོད་ནས། གཞན་དག་ལ་ཚིག་ཀྱལ་པས་འདྲིད་པར་བྱེད་དེ། དཔེར་ན་བུད་མེད་སྐྱེས་པ་ལ་རག་ལས་ན་ཚིག་ཀྱལ་པ་མང་དུ་སྨྲ་བ་དང༌། སྐྱེས་པ་བུད་མེད་ལ་རག་ལས་ན་ཚིག་ཀྱལ་པ་མང་དུ་སྨྲ་བ་ལྟ་བུ་དང༌། དཔེར་ན་ཟློས་གར་མཁན་དང༌། གར་མཁན་དང༌། བཞད་གད་པ་དང༌། སྒེག་པ་དང༌། སྨད་འཚོང་མ་དང༌། སྨད་འཚོང་མའི་གཙོ་མོ་དང༌། སྒྱུ་རྩལ་བྱེད་པ་རྣམས་ཀྱིས་གཞན་དག་གི་ལོངས་སྤྱོད་དག་འདོད་ནས། གཞན་དག་ལ་ཚིག་ཀྱལ་པ་སྨྲ་བར་བྱེད་པ་ལྟ་བུ་འམ། ཡང་ན་སངས་རྒྱས་ཀྱིས་གསུངས་པ་དབྱངས་དང་སྦྱོར་བ་ལ་ཆགས་ཏེ། ཆགས་པ་ལས་བྱུང་བའི་ཚིག་ཀྱལ་པ་སྨྲ་བ་དེ་ལྟ་བུ་ནི་ཆགས་པ་ལས་བྱུང་བ་ཡིན་ནོ། །ཚིག་ཀྱལ་པ་ཞེ་སྡང་ལས་བྱུང་བ་ཇི་ལྟ་བུ་ཞེ་ན། སྨྲས་པ། ཇི་ལྟར་འདི་ན་ཁ་ཅིག་གང་ལ་ཀུན་ནས་མནར་སེམས་དང༌། ཁྲོ་བའི་སེམས་ཡོད་པའི་ཕྱིར་དེ་ལ་ཚིག་ཀྱལ་བས་འདྲིད་པར་བྱེད་དོ། །དེ་མ་ཡིན་ཏེ་དེ་ལ་ཀུན་ནས་མནར་སེམས་དང༌། ཁྲོ་བའི་སེམས་མེད་དུ་ཟིན་ཀྱང་དེ་དེ་དག་གི་སེམས་ཅན་སྡུག་པ་དང༌། གཅེས་པ་དང༌། དགའ་བ་དང༌། ཡིད་དུ་འོང་བ་དེ་དག་ལ་ཀུན་ནས་མནར་སེམས་དང༌། ཁྲོ་བའི་སེམས་ཡོད་པའི་ཕྱིར། དེ་འདི་སྙམ་དུ་སེམས་

---

^{[མ་དཔེ་གཟིགས་ན་འདིར་གནོན།]}

ཏེ། དེ་དག་ཡུན་རིང་པོར་མི་བཟོད་ཅིང༌། མི་བདེ་བ་ལ་སེམས་མངོན་པར་མི་དགའ་བར་འགྱུར་བར་བྱའོ་སྙམ་ནས། དེ་དག་ལ་ཚིག་འཁྱལ་པས་འདྲིད་པར་བྱེད་པ་དེ་ལྟ་བུ་ནི་ཞེ་སྡང་ལས་བྱུང་བ་ཡིན་ནོ། །ཚིག་འཁྱལ་བ་གཏི་མུག་ལས་བྱུང་བ་ཇི་ལྟ་བུ་ཞེ་ན། སྨྲས་པ། བྲམ་ཟེ་དག་འདི་སྐད་དུ་མི་ནི་མེས་དག་པར་འགྱུར་རོ། །གྲོལ་བར་འགྱུར་རོ། །ངེས་པར་འབྱུང་བར་འགྱུར་རོ། །བདེ་བ་དང་སྡུག་བསྔལ་བ་ལས་འདའ་བར་འགྱུར་རོ། །བདེ་བ་དང་སྡུག་བསྔལ་བ་ལས་འདས་པ་ཡང་ཐོབ་པར་འགྱུར་རོ། །དེ་བཞིན་དུ་མཆོད་སྦྱིན་དང༌། དཀའ་ཐུབ་ངན་པ་རྣམ་པ་སྣ་ཚོགས་ཀྱང་དེ་དང་འདྲའོ་ཞེས་ཟེར་ཏེ། ལས་དེ་ལ་ཅིའང་མི་འོང་བར་ལྟ་ཞིང༌། འབྲས་བུ་མེད་པར་ལྟ་ལ་འདི་ལྟར་ལྟ་ཞིང་འདི་སྐད་དུ་སྨྲས་ཏེ། ལས་འདི་མེད་དོ། །ལས་འདིའི་འབྲས་བུ་རྣམ་པར་སྨིན་པ་མེད་དོ་ཞེས་ཟེར་ཏེ། གཏི་མུག་ལས་བྱུང་བའི་ཚིག་ཀྱལ་པ་སྨྲ་བ་དེ་ལྟ་བུ་ནི་གཏི་མུག་ལས་བྱུང་བ་ཡིན་ནོ། །བརྣབ་སེམས་ནི་རྣམ་པ་གསུམ་སྟེ། ཆགས་པ་ལས་བྱུང་བ་དང༌། ཞེ་སྡང་ལས་བྱུང་བ་དང༌། གཏི་མུག་ལས་བྱུང་བའོ། །བརྣབ་སེམས་ཆགས་པ་ལས་བྱུང་བ་ཇི་ལྟ་བུ་ཞེ་ན། སྨྲས་པ། དཔེར་ན་ཆགས་པའི་ཀུན་ནས་དཀྲིས་པའི་རྗེས་ཐོགས་སུ། བརྣབ་སེམས་ཀྱིས་ཀུན་ནས་དཀྲིས་པ་སྐྱེད་པར་བྱེད་པ་ལྟ་བུ་སྟེ། འདི་ནི་བརྣབ་སེམས་ཆགས་པ་ལས་བྱུང་བ་ཡིན་ནོ། །བརྣབ་སེམས་ཞེ་སྡང་ལས་བྱུང་བ་གང་ཞེ་ན། སྨྲས་པ། དཔེར་ན་ཞེ་སྡང་གི་ཀུན་ནས་དཀྲིས་པའི་རྗེས་ཐོགས་སུ་བརྣབ་སེམས་ཀྱི་ཀུན་ནས་དཀྲིས་པ་སྐྱེད་པར་བྱེད་པ་ལྟ་བུ་སྟེ། འདི་ནི་བརྣབ་སེམས་ཞེ་སྡང་ལས་བྱུང་བ་ཡིན་ནོ། །བརྣབ་སེམས་གཏི་མུག་ལས་བྱུང་བ་གང་ཞེ་ན། སྨྲས་པ། དཔེར་ན་གཏི་མུག་གི་ཀུན་ནས་དཀྲིས་པའི་རྗེས་ཐོགས་སུ། བརྣབ་སེམས་ཀྱི་ཀུན་ནས་དཀྲིས་པ་སྐྱེད་པར་བྱེད་པ་ལྟ་བུ་སྟེ། འདི་ནི་གཏི་མུག་ལས་བྱུང་བ་ཡིན་ནོ། །གནོད་སེམས་ནི་རྣམ་པ་གསུམ་སྟེ། ཆགས་པ་ལས་བྱུང་བ་དང༌། ཞེ་སྡང་ལས་བྱུང་བ་དང༌། གཏི་མུག་ལས་བྱུང་བའོ། །གནོད་སེམས་ཆགས་པ་ལས་བྱུང་བ་གང་ཞེ་ན། སྨྲས་པ། དཔེར་ན་ཆགས་པའི་ཀུན་ནས་དཀྲིས་པའི་རྗེས་ཐོགས་སུ། གནོད་སེམས་ཀྱི་ཀུན་ནས་དཀྲིས་པ་སྐྱེད་པར་བྱེད་པ་ལྟ་བུ་སྟེ། འདི་ནི་ཚིགས་པ་ལས་བྱུང་བའོ། །གནོད་

---

^{[མ་དཔེ་གཟིགས་ན་འདིར་གནོན།]}

སེམས་ཞེ་སྡང་ལས་བྱུང་བ་གང་ཞེ་ན། སྨྲས་པ། དཔེར་ན་ཞེ་སྡང་གི་ཀུན་ནས་དཀྲིས་པའི་རྗེས་ཐོགས་སུ་གནོད་སེམས་ཀྱི་ཀུན་ནས་དཀྲིས་པ་སྐྱེད་པར་བྱེད་པ་ལྟ་བུ་སྟེ། འདི་ནི་ཞེ་སྡང་ལས་བྱུང་བ་ཡིན་ནོ། །གནོད་སེམས་གཏི་མུག་ལས་བྱུང་བ་གང་ཞེ་ན། སྨྲས་པ། དཔེར་ན་གཏི་མུག་གི་ཀུན་ནས་དཀྲིས་པའི་རྗེས་ཐོགས་སུ་གནོད་སེམས་ཀྱི་ཀུན་ནས་དཀྲིས་པ་སྐྱེད་པར་བྱེད་པ་ལྟ་བུ་སྟེ། འདི་ནི་གཏི་མུག་ལས་བྱུང་བའོ། །ལོག་པར་ལྟ་བ་ནི་རྣམ་པ་གསུམ་སྟེ། ཆགས་པ་ལས་བྱུང་བ་དང༌། ཞེ་སྡང་ལས་བྱུང་བ་དང༌། གཏི་མུག་ལས་བྱུང་བའོ། །ལོག་པར་ལྟ་བ་ཆགས་པ་ལས་བྱུང་བ་གང་ཞེ་ན། སྨྲས་པ། དཔེར་ན་ཆགས་པའི་ཀུན་ནས་དཀྲིས་པའི་རྗེས་ཐོགས་སུ་ལོག་པར་ལྟ་བའི་ཀུན་ནས་དཀྲིས་པ་སྐྱེད་པར་བྱེད་པ་ལྟ་བུ་སྟེ། འདི་ནི་ཆགས་པ་ལས་བྱུང་བའོ། །ལོག་པར་ལྟ་བ་ཞེ་སྡང་ལས་བྱུང་བ་ཇི་ལྟ་བུ་ཞེ་ན། སྨྲས་པ། དཔེར་ན་ཞེ་སྡང་གི་ཀུན་ནས་དཀྲིས་པའི་རྗེས་ཐོགས་སུ་ལོག་པར་ལྟ་བའི་ཀུན་ནས་དཀྲིས་པ་སྐྱེད་པར་བྱེད་པ་ལྟ་བུ་སྟེ། འདི་ནི་ཞེ་སྡང་ལས་བྱུང་བ་ཡིན་ནོ། །ལོག་པར་ལྟ་བ་གཏི་མུག་ལས་བྱུང་བ་ཇི་ལྟ་བུ་ཞེ་ན། སྨྲས་པ། དཔེར་ན་གཏི་མུག་གི་ཀུན་ནས་དཀྲིས་པའི་རྗེས་ཐོགས་སུ་ལོག་པར་ལྟ་བའི་ཀུན་ནས་དཀྲིས་པ་སྐྱེད་པར་བྱེད་པ་ལྟ་བུ་སྟེ། འདི་ནི་གཏི་མུག་ལས་བྱུང་བའོ། །ཚིག་གཉིས་པ། མི་དགེ་བ་བཅུའི་ལས་ཀྱི་ལམ་ཞེས་བྱ་བ་ནས་རྒྱས་པར་སྦྱར་ཏེ། སྲོག་གཅོད་པ་ནི་རྣམ་པ་གསུམ་སྟེ། ཆུང་དུ་དང༌། འབྲིང་དང༌། ཆེན་པོའོ། །སྲོག་གཅོད་པ་ཆེན་པོ་ཀུན་དུ་བསྟེན་ཅིང་བསྒོམས་ཏེ། མང་དུ་བྱས་པས་ནི་ལུས་དང་བྲལ་ཏེ། ཤི་བའི་ལོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་ཏུ་སྐྱེ་བར་འགྱུར་རོ། །སྲོག་གཅོད་པ་འབྲིང་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་ནི་ལུས་དང་བྲལ་ཏེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བདུད་འགྲོ་རྣམས་དང༌། སྐལ་བ་མཉམ་པར་སྐྱེ་བར་འགྱུར་རོ། །སྲོག་གཅོད་པ་ཆུང་དུ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་ནི། ལུས་དང་བྲལ་ཏེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་ཡི་དྭགས་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །ཇི་ལྟར་སྲོག་གཅོད་པ་རྣམ་པ་གསུམ་ཡོད་པ་དེ་བཞིན་དུ་

---

^{[མ་དཔེ་གཟིགས་ན་འདིར་གནོན།]}

མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་ལ་ཡང་ཆུང་ངུ་དང༌། འབྲིང་དང༌། ཆེན་པོ་ཡོད་དེ། ལོག་པར་ལྟ་བ་ཆེན་པོ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པས་ནི། ལུས་དང་བྲལ་ཏེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །ལོག་པར་ལྟ་བ་འབྲིང་ཀུན་དུ་བསྟེན་ཅིང་མང་དུ་བྱས་པས་ནི། ལུས་དང་བྲལ་ཏེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་དུད་འགྲོ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །ལོག་པར་ལྟ་བུ་ཆུང་དུ་ཀུན་དུ་བསྟེན་ཅིང་བསྒོམས་ཏེ། མང་དུ་བྱས་པས་ནི་ལུས་དང་བྲལ་ཏེ། ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་ཡི་དྭགས་རྣམས་དང་སྐལ་པ་མཉམ་བར་སྐྱེ་བར་འགྱུར་རོ། །ལས་གདགས་པ་ཚིགས་གསུམ་པའོ།། །།སྡོམ་ནི། ཆུང་དང་འབྲིང་དང་ཆེན་པོ་དང༌། །ཆ་ཤས་ཇི་ལྟར་གསེ་བ་དང༌། །ཉེས་པར་སྤྱོད་པས་བསྡུས་པ་དང༌། །ཆོས་གསུམ་དག་དང་ལྷན་ཅིག་འབྱུང༌། །མི་དགེ་བ་བཅུའི་ལས་ཀྱི་ལམ་ཞེས་བྱ་བ་ནས་རྒྱས་པར་སྦྱར་ཏེ། སྲོག་གཅོད་པ་ནི་རྣམ་པ་གསུམ་སྟེ། ཆུང་དུ་དང༌། འབྲིང་དང༌། ཆེན་པོའོ། །སྲོག་གཅོད་པ་ཆུང་དུ་དང༌། འབྲིང་དང༌། ཆེན་པོར་ཇི་ལྟར་ཤེས་པར་བྱ་ཞེ་ན། སྨྲས་པ། སོ་སོའི་རྒྱུ་ལས་སྲོག་གཅོད་པ་ཆུང་ངུ་དང༌། འབྲིང་དང༌། ཆེན་པོར་ཤེས་པར་བྱའོ། །ཇི་ལྟ་ཞེ་ན། སྨྲས་པ། ཀུན་ནས་དཀྲིས་པ་ཆུང་དུས་ཀུན་ནས་དཀྲིས་ཏེ། སྲོག་ཆགས་ཀྱི་སྲོག་གཅོད་པར་བྱེད་ན་ནི། རྣམ་པར་སྨིན་པ་ཆུང་དུར་འགྱུར་རོ། །ཀུན་ནས་དཀྲིས་པ་འབྲིང་དང༌། ཆེན་པོས་ཀུན་ནས་དཀྲིས་ཏེ། སྲོག་ཆགས་ཀྱི་སྲོག་གཅོད་པར་བྱེད་ན་ནི། རྣམ་པར་སྨིན་པ་འབྲིང་དང་ཆེན་པོར་འགྱུར་ཏེ། དཔེར་ན་དགེ་བའི་རྩ་བ་ཆད་པ་གཉིས་ཤིག་སྲོག་ཆགས་ཀྱི་སྲོག་གཅོད་པར་བྱེད་ལ་དེ་གཉི་ག་ཡང་ཕ་ཡང་མ་ཡིན། མ་ཡང་མ་ཡིན་ན། གང་ཁ་ན་མ་ཐོ་བ་ཆེན་པོར་འགྱུར་ཞེ་ན། སྨྲས་པ། གང་ཀུན་ནས་དཀྲིས་པ་ཆེས་ཆེ་བས།

---

^{[མ་དཔེ་གཟིགས་ན་འདིར་གནོན།]}

ཀུན་ནས་དཀྲིས་ཏེ་སྲོག་གཅོད་པར་བྱེད་པའོ། །ཀུན་ནས་དཀྲིས་པ་མཉམ་པའི་ནི་རྣམ་པར་སྨིན་པ་ཡང་མཉམ་མོ། །གཅིག་ནི་ཕ་འམ། མ་ཡིན་ན་གང་ཁ་ན་མ་ཐོ་བ་ཆེས་ཆེ་བར་འགྱུར་ཞེ་ན། སྨྲས་པ། ཕ་འམ་མ་གང་ཡིན་པའོ། །གཉི་ག་ཕ་འམ་མ་ཡིན་ན། གང་ཁ་ན་མ་ཐོ་བ་ཆེས་ཆེ་བར་འགྱུར་ཞེ་ན། སྨྲས་པ། གང་ཀུན་ནས་དཀྲིས་པ་ཆེས་ཆེ་བས། ཀུན་ནས་དཀྲིས་ཏེ་སྲོག་གཅོད་པར་བྱེད་པའོ། །ཀུན་ནས་དཀྲིས་པ་མཉམ་པ་ནི། རྣམ་པར་སྨིན་པ་ཡང་མཉམ་པ་ལྟ་བུའོ། །དཔེར་ན་དགེ་བའི་རྩ་བ་ཆད་ཕ་མ་ཡིན་པ་གཉིས་ཤིག །སྲོག་ཆགས་ཀྱི་སྲོག་གཅོད་པར་བྱེད་ལ་དེ་གཉི་ག་ཕ་ཡང་མ་ཡིན། མ་ཡང་མ་ཡིན། གང་ཁ་ན་མ་ཐོ་བ་ཆེས་ཆེ་བར་འགྱུར་ཞེ་ན། སྨྲས་པ། གང་ཆེས་དགེ་བའི་ཆོས་ཅན་ཡིན་པའོ། །གཉི་ག་དགེ་བའི་ཆོས་ཅན་དུ་མཉམ་ན། གང་ཆེས་ཁ་ན་མ་ཐོ་བ་ཆེན་པོར་འགྱུར་ཞེ་ན། སྨྲས་པ། གང་ཀུན་ནས་དཀྲིས་པ་ཆེན་པོས་ཀུན་ནས་དཀྲིས་ཏེ། སྲོག་གཅོད་པར་བྱེད་པའོ། །ཀུན་ནས་དཀྲིས་པ་མཉམ་པའི་ནི་རྣམ་པར་སྨིན་པ་ཡང་མཉམ་མོ། །གཅིག་ནི་ཕ་འམ་མ་ཡིན་ན། གང་ཁ་ན་མ་ཐོ་བ་ཆེས་ཆེ་བར་འགྱུར་ཞེ་ན། སྨྲས་པ། ཕ་འམ་མ་གང་ཡིན་པའོ། །གཉི་ག་ཕ་འམ་མ་ཡིན་ན། གང་ཁ་ན་མ་ཐོ་བ་ཆེས་ཆེ་བར་འགྱུར་ཞེ་ན། སྨྲས་པ། གང་ཆེས་ཆེ་བའི་ཆོས་ཅན་ཡིན་པའོ། །གཉི་ག་ཆོས་ཅན་དུ་མཉམ་ན། གང་ཆེས་ཁ་ན་མ་ཐོ་བ་ཆེན་པོར་འགྱུར་ཞེ་ན། སྨྲས་པ། གང་ཀུན་ནས་དཀྲིས་པ་ཆེན་པོས་ཀུན་ནས་དཀྲིས་ཏེ་སྲོག་གཅོད་པར་བྱེད་པའོ། །ཀུན་ནས་དཀྲིས་བ་མཉམ་པའི་ནི་རྣམ་པར་སྨིན་པ་ཡང་མཉམ་པ་ལྟ་བུའོ། །སྲོག་གཅོད་པ་ཇི་ལྟ་བ་བཞིན་དུ་མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་རྣམས་ཀྱང་དེ་བཞིན་དུ་སྦྱར་རོ། །མི་དགེ་བ་བཅུའི་ལས་ཀྱི་ལམ་ཞེས་བྱ་བ་ནས་རྒྱས་པར་སྦྱར་ཏེ། ཉེས་པར་སྤྱོད་པ་ནི་རྣམ་པ་གསུམ་སྟེ། ལུས་ཀྱིས་ཉེས་པར་སྤྱོད་པ་དང༌། ངག་གིས་ཉེས་པར་སྤྱོད་པ་དང༌། ཡིད་ཀྱིས་ཉེས་པར་སྤྱོད་པའོ། །ཅི་མི་དགེ་བ་བཅུའི་ལས་རྣམས་ཀྱིས་

---

^{[མ་དཔེ་གཟིགས་ན་འདིར་གནོན།]}

ཉེས་པར་སྤྱོད་པ་གསུམ་བསྡུས་སམ། འོན་ཏེ་གསུམ་གྱིས་བཅུ་བསྡུས་ཤེ་ན། སྨྲས་པ། གསུམ་གྱིས་བཅུ་བསྡུས་ཀྱི། བཅུས་ནི་གསུམ་མ་བསྡུས་སོ། །གང་མ་བསྡུས་ཤེ་ན། སྨྲས་པ། ལུས་ཀྱིས་ཉེས་པར་སྤྱོད་པ་དང༌། ངག་གིས་ཉེས་པར་སྤྱོད་པ་དང༌། ཡིད་ཀྱིས་ཉེས་པར་སྤྱོད་པ་མ་བསྡུས་སོ། །ལུས་ཀྱིས་ཉེས་པར་སྤྱོད་པ་ནི་རྣམ་པ་གསུམ་སྟེ། སྲོག་ཆགས་གསོད་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་བའོ། །ཅི་ལུས་ཀྱིས་ཉེས་པར་སྤྱོད་པ་རྣམ་པ་གསུམ་གྱིས་ལུས་ཀྱིས་ཉེས་པར་སྤྱོད་པ་ཐམས་ཅད་བསྡུས་སམ། འོན་ཏེ་ཐམས་ཅད་ཀྱིས་རྣམ་པ་གསུམ་བསྡུས་ཤེ་ན། སྨྲས་པ། ལུས་ཀྱིས་ཉེས་པར་སྤྱོད་པ་ཐམས་ཅད་ཀྱིས། ལུས་ཀྱིས་ཉེས་པར་སྤྱོད་པ་རྣམ་པ་གསུམ་བསྡུས་ཀྱི། རྣམ་པ་གསུམ་གྱིས་ནི་ཐམས་ཅད་མ་བསྡུས་སོ། །གང་མ་བསྡུས་ཤེ་ན། སྨྲས་པ། ལག་པ་དང༌། ཁུ་ཚུར་དང༌། ཐལ་ལྕག་གིས་བསྣུན་པ་དང༌། ཡལ་ག་དང༌། ལྕུག་མས་གནོད་པར་བྱ་བ་དང་ལྡན་བའི་ལུས་ཀྱི་ལས་དང༌། འབྲུའི་ཆང་དང༌། འབྲས་བུའི་ཆང་འཐུང་བ་དང༌། རྐུ་བའི་སེམས་ཀྱིས་རང་གི་རྫས་ཁྱེར་བ་དང༌། བརྗེད་ངས་པ་དང༌། ཤེས་བཞིན་མེད་པས་ཁ་ཟས་ཟ་བའི་ལུས་ཀྱི་ལས་གང་ཡིན་པ་དང༌། བདག་གི་ཆུང་མ་ལ་ལོག་པར་འཇུག་པ་དང༌། ཕྱོགས་གང་ན་ཚུལ་ཁྲིམས་འཆལ་བའི་སྐྱེས་བུ་གང་ཟག་རྣམས་འཁོད་པ་དེ། ཡོངས་སུ་མ་སྤངས་པ་དང་ལྡན་པའི་ལུས་ཀྱི་ལས་སོ། །ངག་གི་ཉེས་པར་སྤྱོད་པ་ནི་རྣམ་པ་བཞི་སྟེ། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པའོ། །ཅི་ངག་གི་ཉེས་པར་སྤྱོད་པ་རྣམ་པ་བཞིས་ངག་གི་ཉེས་པར་སྤྱོད་པ་ཐམས་ཅད་བསྡུས་སམ། འོན་ཏེ་ཐམས་ཅད་ཀྱིས་རྣམ་པ་བཞི་བསྡུས་ཤེ་ན། སྨྲས་པ། ངག་གིས་ཉེས་པར་སྤྱོད་པ་ཐམས་ཅད་ཀྱིས། ངག་གིས་ཉེས་པར་སྤྱོད་པ་རྣམ་པ་བཞི་བསྡུས་ཀྱི། རྣམ་པ་བཞིས་ནི་ཐམས་ཅད་མ་བསྡུས་སོ། །གང་མ་བསྡུས་ཤེ་ན། སྨྲས་པ། འདི་ལྟར་གཅིག་པུ་དབེན་པ་ན་གནས་ཤིང་ཚིག་ཏུ་སྨྲ་སྟེ། སྦྱིན་པ་མེད་དོ། །མཆོད་སྦྱིན་མེད་དོ། །སྦྱིན་སྲེག་མེད་དོ། །ལེགས་པར་སྤྱད་པ་མེད་དོ། །ཉེས་པར་སྤྱད་པ་མེད་

---

^{[མ་དཔེ་གཟིགས་ན་འདིར་གནོན།]}

དོ། །ལེགས་པར་སྤྱད་པ་དང༌། ཉེས་བར་སྤྱོད་པའི་ལས་རྣམས་ཀྱི་འབྲས་བུ་རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །ཕ་མེད་དོ། །མ་མེད་དོ། །སེམས་ཅན་སྐྱེ་བ་པོ་མེད་དོ། །འཇིག་རྟེན་ན་དགྲ་བཅོམ་པ་ཡང་དག་པར་སོང་བ། ཡང་དག་པར་ཞུགས་པ་གང་འཇིག་རྟེན་འདི་དང༌། འཇིག་རྟེན་ཕ་རོལ་ཚེ་འདི་ཉིད་ལ་བདག་ཉིད་ཀྱི་མངོན་པར་ཤེས་པས་མངོན་སུམ་བྱས་ཏེ། བསྒྲུབས་ནས་ཁོང་དུ་ཆུད་དེ། བདག་ཅག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ་སྙམ་དུ་སེམས་པ་མེད་དོ་ཞེས་ཟེར་བའོ། །ཡིད་ཀྱིས་ཉེས་བར་སྤྱོད་པ་ནི་རྣམ་པ་གསུམ་སྟེ། བརྣབ་སེམས་དང༌། གནོད་སེམས་དང༌། ལོག་པར་ལྟ་བའོ། །ཅི་ཡིད་ཀྱིས་ཉེས་པར་སྤྱོད་པ་རྣམ་པ་གསུམ་གྱིས། ཡིད་ཀྱིས་ཉེས་པར་སྤྱོད་པ་ཐམས་ཅད་བསྡུས་སམ། འོན་ཏེ་ཐམས་ཅད་ཀྱིས་རྣམ་པ་གསུམ་བསྡུས་ཤེ་ན། སྨྲས་པ། ཡིད་ཀྱིས་ཉེས་པར་སྤྱོད་པ་ཐམས་ཅད་ཀྱིས། ཡིད་ཀྱིས་ཉེས་པ་རྣམ་པར་སྤྱོད་པ་གསུམ་བསྡུས་ཀྱི། རྣམ་པ་གསུམ་གྱིས་ནི་ཐམས་ཅད་མ་བསྡུས་སོ། །གང་མ་བསྡུས་ཤེ་ན། སྨྲས་པ། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་དང་ལྡན་པའི་ཚོར་བ་དང༌། འདུ་ཤེས་དང༌། སེམས་པ་དང༌། རེག་པ་དང༌། ཡིད་ལ་བྱེད་པ་དང༌། རྣམ་པར་ཤེས་པའོ། །ལྷན་ཅིག་འབྱུང་བའི་ཆོས་ནི་གསུམ་ཡོད་དེ། ཆགས་པ་དང་ལྷན་ཅིག་འབྱུང་བའི་ཆོས་རྣམས་དང༌། ཞེ་སྡང་དང་ལྷན་ཅིག་འབྱུང་བའི་ཆོས་རྣམས་དང༌། གཏི་མུག་དང་ལྷན་ཅིག་འབྱུང་བའི་ཆོས་རྣམས་སོ། །ཆགས་པ་དང་ལྷན་ཅིག་འབྱུང་བའི་ཆོས་རྣམས་གང་ཞེ་ན། སྨྲས་པ། ཆགས་པ་དང་ལྷན་ཅིག་འབྱུང་བའི་ལུས་ཀྱི་ལས་དང༌། ངག་གི་ལས་དང༌། ཆགས་པ་དང་མཚུངས་པར་ལྡན་པའི་ཚོར་བ་དང༌། འདུ་ཤེས་དང༌། སེམས་པ་དང༌། རེག་པ་དང༌། ཡིད་ལ་བྱེད་པ་དང༌། རྣམ་པར་ཤེས་པ་སྟེ། འདི་དག་ནི་ཆགས་པ་དང་ལྷན་ཅིག་འབྱུང་བའི་ཆོས་རྣམས་ཞེས་བྱའོ། །ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ཆོས་རྣམས་གང་ཞེ་ན། སྨྲས་པ། ཞེ་སྡང་

---

^{[མ་དཔེ་གཟིགས་ན་འདིར་གནོན།]}

དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ལུས་ཀྱི་ལས་དང༌། ངག་གི་ལས་དང༌། ཞེ་སྡང་དང༌། ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ཚོར་བ་དང༌། འདུ་ཤེས་དང༌། སེམས་པ་དང༌། རེག་པ་དང༌། ཡིད་ལ་བྱེད་པ་དང༌། རྣམ་པར་ཤེས་པ་དང༌། འདི་དག་ནི་ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ཆོས་རྣམས་ཞེས་བྱའོ། །ལས་གདགས་པ་ཚིགས་བཞི་པའོ།། །།སྡོམ་ནི། ལས་དང་རྣམ་རིག་མ་ཡིན་གཟུགས། །ཐོགས་པ་དང་ནི་སེམས་ལས་བྱུང༌། །དུ་ཞིག་ལས་དང་ལས་མ་ཡིན། །ཡང་དག་མ་བསྡམས་སྡོམ་པ་བཅུ། ཆོས་གསུམ་ཡོད་དེ། ཆགས་པ་དང་ལྷན་ཅིག་འབྱུང་བའི་ཆོས་དང༌། ཞེ་སྡང་དང་ལྷན་ཅིག་འབྱུང་བའི་ཆོས་དང༌། གཏི་མུག་དང་ལྷན་ཅིག་འབྱུང་བའི་ཆོས་སོ། །ཆགས་པ་དང་ལྷན་ཅིག་འབྱུང་བའི་ཆོས་རྣམས་ལས་ཞེས་བྱ་བ་འམ། འོན་ཏེ་ལས་མ་ཡིན་པ་ཞེས་བྱ་ཞེ་ན། སྨྲས་པ། ལས་ཀྱང་ཡོད། ལས་མ་ཡིན་པ་ཡང་ཡོད་དོ། །ལས་གང་ཞེ་ན། སྨྲས་པ། ཆགས་པ་དང་ལྷན་ཅིག་འབྱུང་བའི་ལུས་ཀྱི་ལས་དང༌། ངག་གི་ལས་དང༌། སེམས་པ་སྟེ། འདི་ནི་ལས་ཡིན་ནོ། །ལས་མ་ཡིན་པ་གང་ཞེ་ན། སྨྲས་པ། ཆགས་པ་དང་ལྷན་ཅིག་འབྱུང་བའི་ཚོར་བ་དང༌། འདུ་ཤེས་དང༌། རེག་པ་དང༌། ཡིད་ལ་བྱེད་པ་དང༌། རྣམ་པར་ཤེས་པ་སྟེ། འདི་ནི་ལས་མ་ཡིན་པའོ། །ཞེ་སྡང་དང་ལྷན་ཅིག་འབྱུང་བའི་ཆོས་རྣམས་དང༌། གཏི་མུག་དང་ལྷན་ཅིག་འབྱུང་བའི་ཆོས་རྣམས་ལས་ཞེས་བྱ་འམ། ལས་མ་ཡིན་པ་ཞེས་བྱ་ཞེ་ན། སྨྲས་པ། ལས་ཀྱང་ཡོད། ལས་མ་ཡིན་པ་ཡང་ཡོད་དོ། །ལས་གང་ཞེ་ན། སྨྲས་པ། ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ལུས་ཀྱི་ལས་དང༌། ངག་གི་ལས་དང༌། སེམས་པ་སྟེ། འདི་ནི་ལས་ཡིན་ནོ། །ལས་མ་ཡིན་པ་གང་ཞེ་ན། སྨྲས་པ། ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ཚོར་བ་དང༌། འདུ་ཤེས་དང༌། རེག་པ་དང༌། ཡིད་ལ་བྱེད་བ་དང༌། རྣམ་པར་ཤེས་པ་སྟེ། འདི་ནི་ལས་མ་ཡིན་པའོ། །ཆགས་པ་དང་ལྷན་ཅིག་འབྱུང་བའི་ཆོས་

---

^{[མ་དཔེ་གཟིགས་ན་འདིར་གནོན།]}

རྣམས་རྣམ་པར་རིག་བྱེད་ཅེས་བྱའམ། འོན་ཏེ་རྣམ་པར་རིག་བྱེད་མ་ཡིན་བ་ཞེས་བྱ་ཞེ་ན། སྨྲས་པ། རྣམ་པར་རིག་བྱེད་ཀྱང་ཡོད། རྣམ་པར་རིག་བྱེད་མ་ཡིན་པ་ཡང་ཡོད་དོ། །རྣམ་པར་རིག་བྱེད་གང་ཞེ་ན། སྨྲས་པ། ཆགས་པ་དང་ལྷན་ཅིག་འབྱུང་བའི་ལུས་ཀྱི་རྣམ་པ་རིག་བྱེད་དང༌། ངག་གི་རྣམ་པར་རིག་བྱེད་དེ། འདི་ནི་རྣམ་པར་རིག་བྱེད་དོ། །རྣམ་པར་རིག་བྱེད་མ་ཡིན་པ་གང་ཞེ་ན། ལུས་ཀྱི་རྣམ་པར་རིག་བྱེད་མ་ཡིན་པ་དང༌། ངག་གི་རྣམ་པར་རིག་བྱེད་མ་ཡིན་པ་དང༌། ཆགས་བ་དང་ལྷན་ཅིག་འབྱུང་བའི་ཚོར་བ་དང༌། འདུ་ཤེས་དང༌། སེམས་པ་དང༌། རེག་པ་དང༌། ཡིད་ལ་བྱེད་པ་དང༌། རྣམ་པར་ཤེས་པ་སྟེ། འདི་ནི་རྣམ་པར་རིག་བྱེད་མ་ཡིན་པའོ། །ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ཆོས་རྣམས་རྣམ་པར་རིག་བྱེད་ཅེས་བྱ་འམ། རྣམ་པར་རིག་བྱེད་མ་ཡིན་པ་ཞེས་བྱ་ཞེ་ན། སྨྲས་པ། རྣམ་པར་རིག་བྱེད་ཀྱང་ཡོད། རྣམ་པར་རིག་བྱེད་མ་ཡིན་པ་ཡང་ཡོད་དོ། །རྣམ་པར་རིག་བྱེད་གང་ཞེ་ན། སྨྲས་པ། ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ལུས་ཀྱི་རྣམ་པར་རིག་བྱེད་དང༌། ངག་གི་རྣམ་པར་རིག་བྱེད་དེ། འདི་ནི་རྣམ་པར་རིག་བྱེད་དོ། །རྣམ་པར་རིག་བྱེད་མ་ཡིན་པ་གང་ཞེ་ན། སྨྲས་པ། ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ལུས་ཀྱི་རྣམ་པར་རིག་བྱེད་མ་ཡིན་པ་དང༌། ངག་གི་རྣམ་པར་རིག་བྱེད་མ་ཡིན་པ་དང༌། ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ཚོར་བ་དང༌། འདུ་ཤེས་དང༌། སེམས་པ་དང༌། རེག་པ་དང༌། ཡིད་ལ་བྱེད་པ་དང༌། རྣམ་པར་ཤེས་པ་སྟེ། འདི་ནི་རྣམ་པར་རིག་བྱེད་མ་ཡིན་པའོ། །ཆགས་པ་དང་ལྷན་ཅིག་འབྱུང་བའི་ཆོས་རྣམས་གཟུགས་ཅན་ཞེས་བྱ་འམ། འོན་ཏེ་གཟུགས་ཅན་མ་ཡིན་པ་ཞེ་བྱ་ཞེ་ན། སྨྲས་པ། གཟུགས་ཅན་ཡང་ཡོད། །གཟུགས་ཅན་མ་ཡིན་པ་ཡང་ཡོད་དོ། །གཟུགས་ཅན་གང་དག་ཡིན་ཞེ་ན། སྨྲས་པ། ཆགས་པ་དང་ལྷན་ཅིག་འབྱུང་བའི་ལུས་ཀྱི་ལས་དང༌། ངག་གི་ལས་ཏེ། འདི་དག་ནི་གཟུགས་ཅན་ནོ། །གཟུགས་ཅན་མ་ཡིན་པ་གང་དག་ཡིན་ཞེ་ན། སྨྲས་པ། ཆགས་པ་དང་

---

^{[མ་དཔེ་གཟིགས་ན་འདིར་གནོན།]}

ལྷན་ཅིག་འབྱུང་བའི་ཚོར་བ་དང༌། འདུ་ཤེས་དང༌། སེམས་པ་དང༌། རེག་པ་དང༌། ཡིད་ལ་བྱེད་པ་དང༌། རྣམ་པར་ཤེས་པ་སྟེ། འདི་དག་ནི་གཟུགས་ཅན་མ་ཡིན་པའོ། །ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ཆོས་རྣམས་གཟུགས་ཅན་ཞེས་བྱའམ། འོན་ཏེ་གཟུགས་ཅན་མ་ཡིན་པ་ཞེས་བྱ་ཞེ་ན། སྨྲས་པ། གཟུགས་ཅན་ཡང་ཡོད། གཟུགས་ཅན་མ་ཡིན་པ་ཡང་ཡོད་དོ། །གཟུགས་ཅན་གང་དག་ཡིན་ཞེ་ན། སྨྲས་པ། ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ལུས་ཀྱི་ལས་དང༌། ངག་གི་ལས་ཏེ། འདི་དག་ནི་གཟུགས་ཅན་ནོ། །གཟུགས་ཅན་མ་ཡིན་པ་གང་དག་ཡིན་ཞེ་ན། སྨྲས་པ། ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ཚོར་བ་དང༌། འདུ་ཤེས་དང༌། སེམས་པ་དང༌། རེག་པ་དང༌། ཡིད་ལ་བྱེད་པ་དང༌། རྣམ་པར་ཤེས་པ་སྟེ། འདི་དག་ནི་གཟུགས་ཅན་མ་ཡིན་པའོ། །ཆགས་པ་དང་ལྷན་ཅིག་འབྱུང་བའི་ཆོས་རྣམས་ཐོགས་པ་དང་བཅས་པ་ཞེས་བྱ་འམ། འོན་ཏེ་ཐོགས་པ་མེད་པ་ཞེས་བྱ་ཞེ་ན། སྨྲས་པ། ཐོགས་པ་དང་བཅས་པ་ཡང་ཡོད། ཐོགས་པ་མེད་པ་ཡང་ཡོད། ཐོགས་པ་དང་བཅས་པ་གང་དག་ཡིན་ཞེ་ན། སྨྲས་པ། ཆགས་པ་དང་བའི་ལུས་ཀྱི་རྣམ་པར་རིག་བྱེད་དང༌། ངག་གི་རྣམ་པར་རིག་བྱེད་དེ། འདི་དག་ནི་ཐོགས་པ་དང་བཅས་པའོ། །ཐོགས་པ་མེད་པ་གང་དག་ཡིན་ཞེ་ན། སྨྲས་པ། ཆགས་པ་དང་ལྷན་ཅིག་འབྱུང་བའི་ལུས་ཀྱི་རྣམ་པར་རིག་བྱེད་མ་ཡིན་པ་དང༌། ངག་གི་རྣམ་པར་རིག་བྱེད་མ་ཡིན་པ་དང༌། ཆགས་པ་དང་ལྷན་ཅིག་འབྱུང་བའི་ཚོར་བ་དང༌། འདུ་ཤེས་དང༌། སེམས་པ་དང༌། རེག་པ་དང༌། ཡིད་ལ་བྱེད་པ་དང༌། རྣམ་པར་ཤེས་པ་སྟེ། འདི་དག་ནི་ཐོགས་པ་མེད་པའོ། །ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ཆོས་རྣམས་ཐོགས་པ་དང་བཅས་པ་ཞེས་བྱའམ། འོན་ཏེ་ཐོགས་པ་མེད་པ་ཞེས་བྱ་ཞེ་ན། སྨྲས་པ། ཐོགས་པ་དང་བཅས་པ་ཡང་ཡོད། ཐོགས་པ་མེད་པ་ཡང་ཡོད་དེ། །ཐོགས་པ་དང་བཅས་པ་གང་དག་ཡིན་ཞེ་ན། སྨྲས་པ། ཞེ་སྡང་དང་ལྷན་ཅིག་འབྱུང་

---

^{[མ་དཔེ་གཟིགས་ན་འདིར་གནོན།]}

བ་དང༌། གཏི་མུག་དང་ལྷན་ཅིག་འབྱུང་བའི་ལུས་ཀྱི་རྣམ་པར་རིག་བྱེད་དང༌། ངག་གི་རྣམ་པར་རིག་བྱེད་དེ། འདི་དག་ནི་ཐོགས་པ་དང་བཅས་པའོ། །ཐོགས་པ་མེད་པ་གང་དག་ཡིན་ཞེ་ན། སྨྲས་པ། ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ལུས་ཀྱི་རྣམ་པར་རིག་བྱེད་མ་ཡིན་པ་དང༌། ངག་གི་རྣམ་པར་རིག་བྱེད་མ་ཡིན་པ་དང༌། ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ཚོར་བ་དང༌། འདུ་ཤེས་དང༌། སེམས་པ་དང༌། རེག་པ་དང༌། ཡིད་ལ་བྱེད་པ་དང༌། རྣམ་པར་ཤེས་པ་སྟེ། འདི་དག་ནི་ཐོགས་པ་མེད་པའོ། །ཆགས་པ་དང་ལྷན་ཅིག་འབྱུང་བའི་ཆོས་རྣམས་སེམས་ལས་བྱུང་བ་ཞེས་བྱའམ། འོན་ཏེ་སེམས་ལས་བྱུང་བ་མ་ཡིན་པ་ཞེས་བྱ་ཞེ་ན། སྨྲས་པ། སེམས་ལས་བྱུང་བ་ཡང་ཡོད། སེམས་ལས་བྱུང་བ་མ་ཡིན་པ་ཡང་ཡོད་དོ། །སེམས་ལས་བྱུང་བ་གང་དག་ཡིན་ཞེ་ན། སྨྲས་པ། ཆགས་པ་དང་ལྷན་ཅིག་འབྱུང་བའི་ཚོར་བ་དང༌། འདུ་ཤེས་དང༌། སེམས་པ་དང༌། རེག་པ་དང༌། ཡིད་ལ་བྱེད་པ་སྟེ། འདི་དག་ནི་སེམས་ལས་བྱུང་བའོ། །སེམས་ལས་བྱུང་བ་མ་ཡིན་པ་གང་དག་ཡིན་ཞེ་ན། སྨྲས་པ། ཆགས་པ་དང་ལྷན་ཅིག་འབྱུང་བའི་ལུས་ཀྱི་ལས་དང༌། ངག་གི་ལས་དང༌། སེམས་ཏེ་འདི་དག་ནི་སེམས་ལས་བྱུང་བ་མ་ཡིན་པའོ། །ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ཆོས་རྣམས་སེམས་ལས་བྱུང་བ་ཞེས་བྱ་ཞེ་འམ། འོན་ཏེ་སེམས་ལས་བྱུང་བ་མ་ཡིན་པ་ཞེས་བྱ་ཞེ་ན། སྨྲས་པ། སེམས་ལས་བྱུང་བ་ཡང་ཡོད། སེམས་ལས་བྱུང་བ་མ་ཡིན་པ་ཡང་ཡོད་དོ། །སེམས་ལས་བྱུང་བ་གང་དག་ཡིན་ཞེ་ན། སྨྲས་པ། ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ཚོར་བ་དང༌། འདུ་ཤེས་དང༌། སེམས་པ་དང༌། རེག་པ་དང༌། ཡིད་ལ་བྱེད་པ་སྟེ། འདི་དག་ནི་སེམས་ལས་བྱུང་བའོ། །སེམས་ལས་བྱུང་བ་མ་ཡིན་པ་གང་དག་ཡིན་ཞེ་ན། སྨྲས་པ། ཞེ་སྡང་དང་ལྷན་ཅིག་འབྱུང་བ་དང༌། གཏི་མུག་དང་ལྷན་ཅིག་འབྱུང་བའི་ལུས་ཀྱི་ལས་དང༌། ངག་གི་ལས་དང༌། སེམས་ཏེ། འདི་དག་ནི་སེམས་ལས་བྱུང་བ་མ་ཡིན་པའོ། །མི་དགེ་བ་བཅུའི་ལས་ཀྱི་ལམ་ཞེས་བྱ་བ་ནས་རྒྱས་པར་སྦྱར་ཏེ་

---

^{[མ་དཔེ་གཟིགས་ན་འདིར་གནོན།]}

མི་དགེ་བ་བཅུའི་ལས་ཀྱི་ལམ་གང་ཡིན་པ་དེ་དག་ལས། དུ་ཞིག་ལས་ཀྱང་ཡིན་ལ་ལས་ཀྱི་ལམ་ཡང་ཡིན། དུ་ཞིག་ལས་ཀྱི་ལམ་ནི་ཡིན་ལ་ལས་ནི་མ་ཡིན་ཞེ་ན། སྨྲས་པ། བདུན་ནི་ལས་ཀྱང་ཡིན་ལ་ལས་ཀྱི་ལམ་ཡང་ཡིན་ཏེ། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་རྣམས་སོ། །གསུམ་ནི་ལས་ཀྱི་ལམ་ཡིན་ལ། ལས་ནི་མ་ཡིན་ཏེ། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་རྣམས་སོ། །ཅིའི་ཕྱིར་ལས་ཀྱང་ཡིན་ལ། ལས་ཀྱི་ལམ་ཡང་ཡིན་ཞེ་ན། སྨྲས་པ། སྲོག་གཅོད་པའི་ལས་ནི་ད་ལྟར་དེ་བྱེད་པ་ཡང་ཡིན་ལ་སྲོག་གཅོད་པས་ཀུན་ནས་བསླང་བའི་སེམས་པ་རྣམས་ཀྱི་ལམ་དང༌། བགྲོད་པ་དང༌། སྲང་ཡང་ཡིན་ཏེ། རྒྱུ་དེས་ན་སྲོག་གཅོད་པ་ལས་ཀྱང་ཡིན་ལ། ལས་ཀྱི་ལམ་ཡང་ཡིན་ནོ། །སྲོག་གཅོད་པ་ཇི་ལྟ་བ་བཞིན་དུ་མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་ཡང་དེ་དང་འདྲའོ། །ཅིའི་ཕྱིར་བརྣབ་སེམས་དང༌། གནོད་སེམས་དང༌། ལོག་པར་ལྟ་བ་ལས་ཀྱི་ལམ་ཡིན་ལ་ལས་མ་ཡིན་ཞེ་ན། སྨྲས་པ། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་ནི་ལས་ཀྱང་མ་ཡིན། བྱེད་པ་ཡང་མ་ཡིན་གྱི། བརྣབ་སེམས་དང༌། གནོད་སེམས་དང༌། ལོག་པར་ལྟ་བས་ཀུན་ནས་བསླང་བའི་སེམས་ལས་བྱུང་བ་རྣམས་ཀྱི་ལམ་དང༌། བགྲོད་བ་དང༌། སྲང་ཡིན་ཏེ། རྒྱུ་དེས་ན་བརྣབ་སེམས་དང༌། གནོད་སེམས་དང༌། ལོག་པར་ལྟ་བས་ལས་ཀྱི་ལམ་ཡིན་ལ། ལས་མ་ཡིན་ནོ། །ཡང་དག་པར་མ་བསྡམས་པའི་སྡོམ་པ་བཅུ་གང་ཞེ་ན། སྨྲས་པ། བཅུ་ནི་སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་རྣམས་སོ། །ཅིའི་ཕྱིར་སྲོག་གཅོད་པ་ཡང་དག་པར་མ་བསྡམས་པའི་སྡོམ་པ་ཡིན་ཞེ་ན། སྨྲས་པ། རྣམ་པར་རིག་བྱེད་

---

^{[མ་དཔེ་གཟིགས་ན་འདིར་གནོན།]}

ཀྱི་དམིགས་པ་ལས་ཡང་དག་པར་མ་བསྡམས་པའི་ཕྱིར་ཏེ། མ་སྤངས་པས་ན་འདོད་པའི་ཁམས་ཐམས་ཅད་ཡང་དག་པར་མ་བསྡམས་པ་ཞེས་བརྗོད་པར་བྱའོ། །སྲོག་གཅོད་པ་ཇི་ལྟ་བ་བཞིན་དུ་མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་རྣམས་ཀྱང་དེ་དང་འདྲའོ། །ཅིའི་ཕྱིར་བརྣབ་སེམས་དང༌། གནོད་སེམས་དང༌། ལོག་པར་ལྟ་བ་ཡང་དག་པར་མ་བསྡམས་པའི་སྡོམ་པ་ཡིན་ཞེ་ན། སྨྲས་པ། ཀུན་ནས་དཀྲིས་པས་དམིགས་པ་རྣམས་ལ་ཡང་དག་པར་མ་བསྡམས་པའི་ཕྱིར་ཏེ། མ་སྤངས་པས་ན་ཐམས་ཅད་དུ་ཡང་དག་པར་མ་བསྡམས་པ་ཞེས་བརྗོད་པར་བྱའོ། །ལས་གདགས་པ་ཚིགས་ལྔ་པའོ།། །སྡོམ་ནི། ཡང་དག་མ་བསྡམས་བཅུར་བསྟན་དང༌། །དེ་ཡི་སྒོ་ནས་རྣམ་ལྔར་བཅད། །ཡང་དག་མ་བསྡོམས་སྡོམ་མིན་བཅུ། །སྡོམ་པ་མ་ཡིན་གསུམ་པོ་དང༌། །དེ་ཡི་སྒོ་ནས་རྣམ་པ་ལྔ། །སྲོག་གཅོད་པ་ནས་ལོག་པར་ལྟ་བའི་བར་དུ་སྡོམ་པ་མ་ཡིན་པ་ཡང་ཡིན་ལ། ལས་ཀྱང་ཡིན་པ་ཡོད་དམ་ཞེ་ན། སྨྲས་པ། ཡོད་དེ། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པའོ། །སྡོམ་པ་མ་ཡིན་ལ། ལས་ནི་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། བརྣབ་སེམས་དང༌། གནོད་སེམས་དང༌། ལོག་པར་ལྟ་བའོ། །སྡོམ་པ་མ་ཡིན་པ་ཡང་ཡིན་ལ། རྣམ་པར་རིག་བྱེད་ཀྱང་ཡིན་པ་ཡོད་དམ་ཞེ་ན། སྨྲས་པ། ཡོད་དེ། སྲོག་གཅོད་པ་ལས་བྱུང་བའི་རྣམ་པར་རིག་བྱེད་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་ལས་བྱུང་བའི་རྣམ་པར་རིག་བྱེད་དོ། །སྡོམ་པ་མ་ཡིན་པ་ཡིན་ལ། རྣམ་པར་རིག་བྱེད་ནི་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། སྲོག་གཅོད་པ་ལས་བྱུང་བའི་རྣམ་པར་རིག་བྱེད་མ་ཡིན་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌།

---

^{[མ་དཔེ་གཟིགས་ན་འདིར་གནོན།]}

ཚིག་རྩུབ་པོ་དང༌། ཚིག་ཀྱལ་པ་ལས་བྱུང་པའི་རྣམ་པར་རིག་བྱེད་མ་ཡིན་པའོ། །བརྣབ་སེམས་དང༌། གནོད་སེམས་དང༌། ལོག་པར་ལྟ་བ་ཡང་དེ་དང་འདྲའོ། །སྡོམ་པ་མ་ཡིན་པ་ཡང་ཡིན་ལ། གཟུགས་ཀྱང་ཡིན་པ་ཡོད་དམ་ཞེ་ན། སྨྲས་པ། ཡོད་དེ། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པའོ། །སྡོམ་པ་མ་ཡིན་པ་ཡིན་ལ། གཟུགས་ཀྱང་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། བརྣབ་སེམས་དང༌། གནོད་སེམས་དང༌། ལོག་པར་ལྟ་བའོ། །སྡོམ་པ་མ་ཡིན་པ་ཡང་ཡིན་ལ། ཐོགས་པ་དང་བཅས་པ་ཡང་ཡིན་པ་ཡོད་དམ་ཞེ་ན། སྨྲས་པ། ཡོད་དེ། སྲོག་གཅོད་པ་ལས་བྱུང་བའི་རྣམ་པར་རིག་བྱེད་དེ། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་ལས་བྱུང་བའི་རྣམ་པར་རིག་བྱེད་དོ། །སྡོམ་པ་མ་ཡིན་པ་ཡང་ཡིན་ལ། ཐོགས་པ་ཡང་མེད་པ་ཡོད་དམ་ཞེ་ན། སྨྲས་པ། ཡོད་དེ། བརྣབ་སེམས་དང༌། གནོད་སེམས་དང༌། ལོག་པར་ལྟ་བའོ། །སྡོམ་པ་མ་ཡིན་པ་ཡང་ཡིན་ལ། སེམས་ལས་བྱུང་བ་ཡང་ཡིན་པ་ཡོད་དམ་ཞེ་ན། སྨྲས་པ་ཡོད་དེ། བརྣབ་སེམས་དང༌། གནོད་སེམས་དང༌། ལོག་པར་ལྟ་བའོ། །སྡོམ་པ་མ་ཡིན་པ་ཡིན་ལ། སེམས་ལས་བྱུང་བ་ནི་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པའོ། །ལུས་ཀྱི་སྡོམ་པ་མ་ཡིན་པ་ནི་རྣམ་པ་གསུམ་སྟེ། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པའོ། །ལུས་ཀྱི་སྡོམ་པ་མ་ཡིན་པ་ཡང་ཡིན་ལ། ལས་ཀྱང་ཡིན་པ་ཡོད་དམ་ཞེ་ན། སྨྲས་པ། ཡོད་དེ། ཐམས་ཅད་དོ། ལུས་ཀྱི་སྡོམ་པ་མ་ཡིན་པ་ཡིན་ལ། ལས་ནི་མ་ཡིན་པ་ཡང་ཡོད་དམ་ཞེ་ན། སྨྲས་པ། མེད་དོ། །ལུས་ཀྱི་སྡོམ་པ་ཡང་ཡིན་ལ། རྣམ་པར་རིག་བྱེད་ཀྱང་ཡིན་པ་ཡོད་དམ་ཞེ་ན། སྨྲས་པ།

---

^{[མ་དཔེ་གཟིགས་ན་འདིར་གནོན།]}

ཡོད་དེ། སྲོག་གཅོད་པ་ལས་བྱུང་བའི་རྣམ་པར་རིག་བྱེད་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་ལས་བྱུང་བའི་རྣམ་པར་རིག་བྱེད་དོ། །ལུས་ཀྱི་སྡོམ་པ་མ་ཡིན་ལ། རྣམ་པར་རིག་བྱེད་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། སྲོག་གཅོད་ལས་བྱུང་བའི་རྣམ་པར་རིག་བྱེད་མ་ཡིན་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་ལས་བྱུང་བའི་རྣམ་པར་རིག་བྱེད་མ་ཡིན་པའོ། །ལུས་ཀྱི་སྡོམ་པ་མ་ཡིན་པ་ཡང་ཡིན་ལ། གཟུགས་ཀྱང་ཡིན་པ་ཡོད་དམ་ཞེ་ན། སྨྲས་པ། ཡོད་དེ། ཐམས་ཅད་དོ། །ལུས་ཀྱི་སྡོམ་པ་མ་ཡིན་པ་ཡིན་ལ། གཟུགས་མ་ཡིན་པ་ཡོད་དམ་ཞེ་ན། སྨྲས་པ། མེད་དོ། །ལུས་ཀྱི་སྡོམ་པ་མ་ཡིན་པ་ཡང་ཡིན་ལ། ཐོགས་པ་དང་བཅས་པ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། སྲོག་གཅོད་པ་ལས་བྱུང་བའི་རྣམ་པར་རིག་བྱེད་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་ལས་བྱུང་བའི་རྣམ་པར་རིག་བྱེད་དོ། །ལུས་ཀྱི་སྡོམ་པ་མ་ཡིན་པ་ཡིན་ལ། ཐོགས་པ་ནི་མེད་པ་ཡོད་དམ་ཞེ་ན། སྨྲས་པ། ཡོད་དེ། སྲོག་གཅོད་པ་ལས་བྱུང་བའི་རྣམ་པར་རིག་བྱེད་མ་ཡིན་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་ལས་བྱུང་བའི་རྣམ་པར་རིག་བྱེད་མ་ཡིན་པའོ། །ལུས་ཀྱི་སྡོམ་པ་མ་ཡིན་པ་ཡང་ཡིན་ལ། སེམས་ལས་བྱུང་བ་ཡང་ཡིན་པ་ཡོད་དམ་ཞེ་ན། སྨྲས་པ། མེད་དོ། །ལུས་ཀྱི་སྡོམ་པ་མ་ཡིན་པ་ཡིན་ལ། སེམས་ལས་བྱུང་བ་ནི་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། ཐམས་ཅད་དོ། །ངག་གི་སྡོམ་པ་མ་ཡིན་པ་ནི་རྣམ་པ་བཞི་སྟེ། བརྫུན་དུ་སྨྲ་བ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པའོ། །ངག་གི་སྡོམ་པ་མ་ཡིན་པ་ཡང་ཡིན་ལ། ལས་ཀྱང་ཡིན་པ་ཡོད་དམ་ཞེ་ན། སྨྲས་པ། ཡོད་དེ། ཐམས་ཅད་དོ། །ངག་གི་སྡོམ་པ་མ་ཡིན་པ་ཡིན་ལ། ལས་ནི་མ་ཡིན་པ་ཡོད་དམ་ཞེ་ན། སྨྲས་པ། མེད་དོ། །ངག་གི་སྡོམ་པ་མ་ཡིན་པ་ཡང་ཡིན་ལ། རྣམ་པར་རིག་བྱེད་ཀྱང་ཡིན་པ་ཡོད་དམ་ཞེ་ན། སྨྲས་པ། ཡོད་དེ། བརྫུན་དུ་སྨྲ་བ་ལས་བྱུང་བའི་རྣམ་པར་རིག་བྱེད་དང༌། ཕྲ་མ་དང༌།

---

^{[མ་དཔེ་གཟིགས་ན་འདིར་གནོན།]}

ཚིག་རྩུབ་པོ་དང༌། ཚིག་ཀྱལ་པ་ལས་བྱུང་བའི་རྣམ་པར་རིག་བྱེད་དོ། །ངག་གི་སྡོམ་པ་མ་ཡིན་པ་ཡིན་ལ། རྣམ་པར་རིག་བྱེད་ནི་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། བརྫུན་དུ་སྨྲ་བ་ལས་བྱུང་བའི་རྣམ་པར་རིག་བྱེད་མ་ཡིན་པ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་ལས་བྱུང་བའི་རྣམ་པར་རིག་བྱེད་མ་ཡིན་པའོ། །ངག་གི་སྡོམ་པ་མ་ཡིན་པ་ཡང་ཡིན་ལ། གཟུགས་ནི་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། ཐམས་ཅད་དོ། །ངག་གི་སྡོམ་པ་མ་ཡིན་ལ། གཟུགས་ནི་མ་ཡིན་པ་ཡོད་དམ་ཞེ་ན། སྨྲས་པ། མེད་དོ།། ངག་གི་སྡོམ་པ་མ་ཡིན་པ་ཡང་ཡིན་ལ། ཐོགས་པ་དང་བཅས་པ་ཡང་ཡིན་པ་ཡོད་དམ་ཞེ་ན། སྨྲས་པ། ཡོད་དེ། བརྫུན་དུ་སྨྲ་བ་ལས་བྱུང་བའི་རྣམ་པར་རིག་བྱེད་དང༌། ཕྲ་མ་དང༌། ཚིག་རྩུབ་པོ་དང༌། ཚིག་ཀྱལ་པ་ལས་བྱུང་བའི་རྣམ་པར་རིག་བྱེད་དོ། །ངག་གི་སྡོམ་པ་མ་ཡིན་ལ། ཐོགས་པ་ནི་མེད་པ་ཡོད་དམ་ཞེ་ན། སྨྲས་པ། ཡོད་དོ། །བརྫུན་དུ་སྨྲ་བ་ལས་བྱུང་བའི་རྣམ་པར་རིག་བྱེད་མ་ཡིན་པ་དང༌། ཕྲ་མ་དང༌། ཚིག་རྩུབ་པོ་དང༌། ཚིག་རྐྱལ་པ་ལས་བྱུང་བའི་རྣམ་པར་རིག་བྱེད་མ་ཡིན་པའོ། །ངག་གི་རྣམ་པར་རིག་བྱེད་མ་ཡིན་པ་ཡང་ཡིན་ལ། སེམས་ལས་བྱུང་བ་ཡང་ཡིན་པ་ཡོད་དམ་ཞེ་ན། སྨྲས་པ། མེད་དོ། །ངག་གི་སྡོམ་པ་མ་ཡིན་པ་ཡིན་ལ། སེམས་ལས་བྱུང་བ་ནི་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། ཐམས་ཅད་དོ། །ཡིད་ཀྱི་སྡོམ་པ་མ་ཡིན་པ་ནི་རྣམ་པ་གསུམ་སྟེ། བརྣབ་སེམས་དང༌། གནོད་སེམས་དང༌། ལོག་པར་ལྟ་བའོ། །ཡིད་ཀྱི་སྡོམ་པ་མ་ཡིན་པ་ཡང་ཡིན་ལ། ལས་ཀྱང་ཡིན་པ་ཡོད་དམ་ཞེ་ན། སྨྲས་པ། མེད་དོ། ཡིད་ཀྱི་སྡོམ་པ་མ་ཡིན་པ་ཡིན་ལ། ལས་ནི་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། ཐམས་ཅད་དོ། །ཡིད་ཀྱི་སྡོམ་པ་མ་ཡིན་པ་ཡང་ཡིན་ལ། རྣམ་པར་རིག་བྱེད་ཀྱང་མ་ཡིན་པ་ཡོད་དམ་ཞེ་ན། སྨྲས་པ། མེད་དོ། །ཡིད་ཀྱི་སྡོམ་པ་མ་ཡིན་པ་ཡིན་ལ་རྣམ་པར་རིག་བྱེད་ནི་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། ཐམས་ཅད་དོ། །ཡིད་ཀྱི་སྡོམ་པ་མ་ཡིན་པ་ཡང་ཡིན་ལ། གཟུགས་ཀྱང་ཡིན་པ་ཡོད་དམ་ཞེ་ན། སྨྲས་པ།

---

^{[མ་དཔེ་གཟིགས་ན་འདིར་གནོན།]}

མེད་དོ། །ཡིད་ཀྱི་སྡོམ་པ་མ་ཡིན་པ་ཡིན་ལ་གཟུགས་ནི་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། ཐམས་ཅད་དོ། །ཡིད་ཀྱི་སྡོམ་པ་མ་ཡིན་པ་ཡང་ཡིན་ལ། ཐོགས་པ་དང་བཅས་པ་ཡང་ཡོད་དམ་ཞེ་ན། སྨྲས་པ། མེད་དོ། །ཡིད་ཀྱི་སྡོམ་པ་མ་ཡིན་པ་ཡིན་ལ། ཐོགས་པ་ནི་མེད་པ་ཡོད་དམ་ཞེ་ན། སྨྲས་པ། ཡོད་དེ་ཐམས་ཅད་དོ། །ཡིད་ཀྱི་སྡོམ་པ་མ་ཡིན་པ་ཡང་ཡིན་ལ་སེམས་ལས་བྱུང་བ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། ཐམས་ཅད་དོ། །ཡིད་ཀྱི་སྡོམ་པ་མ་ཡིན་པ་ཡང་ཡིན་ལ། སེམས་ལས་བྱུང་བའི་ནི་མ་ཡིན་པ་ཡོད་དམ་ཞེ་ན། སྨྲས་པ། མེད་དོ། །ལས་གདགས་པ་ཚིགས་དྲུག་པའོ།། །།སྡོམ་ནི། སྡོམ་པ་མ་ཡིན་ལྔ་ཚན་བཞི། །དྲུག་ཚན་དག་ཀྱང་རབས་ལྔར་བཅད། །སྡོམ་མིན་རྣམས་ནི་ལྔ་དང་དགུ། །བཅོ་ལྔ་དང་ནི་དགུ་བཅུ་བརྒྱད། །ཡང་དག་པར་མ་བསྡམས་པའི་སྡོམ་པ་མ་ཡིན་པ་ནི་ལྔ་ཡོད་དེ། ལྔ་གང་ཞེ་ན། སྨྲས་པ། ལུས་ཀྱི་སྒོ་ནས་རྣམ་པར་རིག་བྱེད་དང༌། རྣམ་པར་རིག་བྱེད་མ་ཡིན་པ་དང༌། ངག་གི་སྒོ་ནས་རྣམ་པར་རིག་བྱེད་དང༌། རྣམ་པར་རིག་བྱེད་མ་ཡིན་པ་དང༌། ཡིད་ཀྱི་སྒོ་ནས་རྣམ་པར་རིག་བྱེད་མ་ཡིན་པའོ། །གཞན་ཡང་ཡང་དག་པར་མ་བསྡམས་པའི་སྡོམ་པ་ལྔ་ཡོད་དེ། ལུས་ཀྱི་སྒོ་ནས་ཐོགས་པ་དང་བཅས་པ་དང༌། ཐོགས་པ་མེད་པ་དང༌། ངག་གི་སྒོ་ནས་ཐོགས་པ་དང་བཅས་པ་དང༌། ཐོགས་པ་མེད་པ་དང༌། ཡིད་ཀྱི་སྒོ་ནས་ཐོགས་པ་མེད་པའོ། །གཞན་ཡང་ཡང་དག་པར་མ་བསྡམས་པའི་སྡོམ་པ་མ་ཡིན་པ་ལྔ་ཡོད་དེ། འདོད་པ་དང་མཚུངས་པར་ལྡན་པའི་ཐོགས་པ་དང་བཅས་པ་དང༌། ཐོགས་པ་མེད་པ་དང༌། གཟུགས་དང་མཚུངས་པར་ལྡན་པའི་ཐོགས་པ་དང་བཅས་པ་དང༌། ཐོགས་པ་མེད་པ་དང༌། གཟུགས་མེད་པ་དང༌། མཚུངས་པར་ལྡན་པའི་ཐོགས་པ་མེད་པའོ། །གཞན་ཡང་ཡང་དག་པར་མ་བསྡམས་པའི་སྡོམ་པ་མ་ཡིན་པ་ལྔ་ཡོད་དེ། འདོད་པ་དང་མཚུངས་པར་ལྡན་པའི་རྣམ་པར་རིག་བྱེད་དང༌། རྣམ་པར་རིག་བྱེད་མ་ཡིན་པ་དང༌། གཟུགས་དང་མཚུངས་པར་ལྡན་པའི་རྣམ་པར་རིག་བྱེད་དང༌། རྣམ་པར་རིག་བྱེད་མ་ཡིན་པ་དང༌། གཟུགས་མེད་པ་དང་མཚུངས་པར་ལྡན་པའི་རྣམ་པར་

---

^{[མ་དཔེ་གཟིགས་ན་འདིར་གནོན།]}

རིག་བྱེད་མ་ཡིན་པའོ། །ཡང་དག་པར་མ་བསྡམས་པའི་སྡོམ་པ་མ་ཡིན་པ་དྲུག་ཡོད་དེ། འདོད་པ་དང་མཚུངས་པར་ལྡན་པའི་སེམས་ལས་བྱུང་བ་དང༌། སེམས་ལས་བྱུང་བ་མ་ཡིན་པ་དང༌། གཟུགས་དང་མཚུངས་པར་ལྡན་པའི་སེམས་ལས་བྱུང་བ་དང༌། སེམས་ལས་བྱུང་བ་མ་ཡིན་པ་དང༌། གཟུགས་མེད་པ་དང་མཚུངས་པར་ལྡན་པའི་སེམས་ལས་བྱུང་བ་དང༌། སེམས་ལས་བྱུང་བ་མ་ཡིན་པའོ། །གཞན་ཡང་ཡང་དག་པར་མ་བསྡམས་པའི་སྡོམ་པ་མ་ཡིན་པ་དྲུག་ཡོད་དེ། འདོད་པ་དང་མཚུངས་པར་ལྡན་པའི་སེམས་དང་ལྡན་པ་དང༌། སེམས་དང་མི་ལྡན་པ་དང༌། གཟུགས་དང་མཚུངས་པར་ལྡན་པའི་སེམས་དང་ལྡན་པ་དང༌། སེམས་དང་མི་ལྡན་པ་དང༌། གཟུགས་མེད་པ་དང་མཚུངས་པར་ལྡན་པའི་སེམས་དང་ལྡན་པ་དང༌། སེམས་དང་མི་ལྡན་པའོ། །གཞན་ཡང་ཡང་དག་པར་མ་བསྡམས་པའི་སྡོམ་པ་མ་ཡིན་པ་དྲུག་ཡོད་དེ། འདོད་པ་དང་མཚུངས་པར་ལྡན་པའི་དམིགས་པ་དང་བཅས་པ་དང༌། དམིགས་པ་མེད་པ་དང༌། གཟུགས་དང་མཚུངས་པར་ལྡན་པའི་དམིགས་པ་དང་བཅས་པ་དང༌། དམིགས་པ་མེད་པ་དང༌། གཟུགས་མེད་པ་དང་མཚུངས་པར་ལྡན་པའི་དམིགས་པ་དང་བཅས་པ་དང་དམིགས་པ་མེད་པའོ། །གཞན་ཡང་ཡང་དག་པར་མ་བསྡམས་པའི་སྡོམ་པ་མ་ཡིན་པ་དྲུག་ཡོད་དེ། འདོད་པ་དང་མཚུངས་པར་ལྡན་པའི་མཐོང་བས་སྤང་བར་བྱ་བ་དང༌། བསྒོམ་པས་སྤང་བར་བྱ་བ་དང༌། གཟུགས་དང་མཚུངས་པར་ལྡན་པའི་མཐོང་བས་སྤང་བར་བྱ་བ་དང༌། བསྒོམ་པས་སྤང་བར་བྱ་བ་དང༌། གཟུགས་མེད་པ་དང་མཚུངས་པར་ལྡན་པའི་མཐོང་བས་སྤང་བར་བྱ་བ་དང༌། བསྒོམ་པས་སྤང་བར་བྱ་བའོ། །གཞན་ཡང་ཡང་དག་པར་མ་བསྡམས་པའི་སྡོམ་པ་མ་ཡིན་པ་དྲུག་ཡོད་དེ། མིག་གི་སྡོམ་པ་མ་ཡིན་པ་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་སྡོམ་པ་མ་ཡིན་པའོ། །གང་མིག་གི་སྡོམ་པ་མ་ཡིན་པ་དང་ལྡན་པ་དེ། རྣ་བའི་སྡོམ་པ་མ་ཡིན་པ་དང་ཡང་ལྡན་ནམ་ཞེ་ན། སྨྲས་པ། དེ་ཡིན་ནོ། །གང་རྣ་བའི་སྡོམ་པ་མ་ཡིན་པ་དང་ལྡན་པ་དེ། མིག་གི་སྡོམ་པ་མ་ཡིན་པ་དང་ལྡན་ནམ་ཞེ་ན། སྨྲས་པ། དེ་

---

^{[མ་དཔེ་གཟིགས་ན་འདིར་གནོན།]}

ཡིན་ནོ། །མིག་གི་སྡོམ་པ་མ་ཡིན་པ་དང༌། རྣ་བའི་སྡོམ་པ་མ་ཡིན་པ་ཇི་ལྟ་བ་བཞིན་དུ་ལུས་ཀྱི་སྡོམ་པ་མ་ཡིན་པ་ཡང་དེ་དང་འདྲའོ། །གང་མིག་གི་སྡོམ་པ་མ་ཡིན་པ་དང་ལྡན་པ་དེ། སྣའི་སྡོམ་པ་མ་ཡིན་པ་དང་ཡང་ལྡན་ནམ་ཞེ་ན། སྨྲས་པ། གང་སྣའི་སྡོམ་པ་མ་ཡིན་པ་དང་ལྡན་པ་དེ་ནི་མིག་གི་སྡོམ་པ་མ་ཡིན་པ་དང་ལྡན་ནོ། །མིག་གི་སྡོམ་པ་མ་ཡིན་པ་དང་ལྡན་ལ། སྣའི་སྡོམ་པ་མ་ཡིན་པ་དང་ནི་མི་ལྡན་པ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་འདོད་པ་རྣམས་ལས་འདོད་ཆགས་དང་བྲལ་བ། ཚངས་པའི་འཇིག་རྟེན་ལས་ནི་འདོད་ཆགས་དང་མ་བྲལ་བ་ལྟ་བུའོ། །མིག་གི་སྡོམ་པ་མ་ཡིན་པ་དང༌། སྣའི་སྡོམ་པ་མ་ཡིན་པ་ཇི་ལྟ་བ་བཞིན་དུ་ལྕེའི་སྡོམ་པ་མ་ཡིན་པ་ཡང་དེ་དང་འདྲའོ། །གང་མིག་གི་སྡོམ་པ་མ་ཡིན་པ་དང་ལྡན་བ་དེ། ཡིད་ཀྱི་སྡོམ་པ་མ་ཡིན་པ་དང་ལྡན་ནམ་ཞེ་ན། སྨྲས་པ། གང་མིག་གི་སྡོམ་པ་མ་ཡིན་པ་དང་ལྡན་པ་དེ་ནི། ཡིད་ཀྱི་སྡོམ་པ་མ་ཡིན་པ་དང་ལྡན་ནོ། །ཡིད་ཀྱི་སྡོམ་པ་མ་ཡིན་པ་དང་ལྡན་ལ། མིག་གི་སྡོམ་པ་མ་ཡིན་པ་དང་ནི་མི་ལྡན་པ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་ཚངས་པའི་འཇིག་རྟེན་ལས་འདོད་ཆགས་དང་བྲལ་ལ། གོང་མའི་འདོད་ཆགས་དང་མ་བྲལ་བ་ལྟ་བུའོ། །ཇི་ལྟར་མིག་གི་སྡོམ་པ་མ་ཡིན་པ་དང༌། སྔ་མ་བཞིན་དུ་སྦྱར་བ་དེ་བཞིན་དུ། རྣ་བ་དང་ལུས་ཀྱི་སྡོམ་པ་མ་ཡིན་པ་དང་ཡང་སྔ་མ་བཞིན་དུ་སྦྱར་རོ། །གང་སྣའི་སྡོམ་པ་མ་ཡིན་པ་དང་ལྡན་པ་དེ། ལྕེའི་སྡོམ་པ་མ་ཡིན་པ་དང་ལྡན་ནམ་ཞེ་ན། སྨྲས་པ། དེ་ནི་མ་ཡིན་ནོ། །གང་ལྕེའི་སྡོམ་པ་མ་ཡིན་པ་དང་ལྡན་པ་དེ་སྣའི་སྡོམ་པ་མ་ཡིན་པ་དང་ཡང་ལྡན་ནམ་ཞེ་ན། སྨྲས་པ། དེ་ཡིན་ནོ། །གང་སྣའི་སྡོམ་པ་མ་ཡིན་པ་དང་ལྡན་པ་དེ། ཡིད་ཀྱི་སྡོམ་པ་མ་ཡིན་པ་དང་ལྡན་ནམ་ཞེ་ན། སྨྲས་པ། གང་སྣའི་སྡོམ་པ་མ་ཡིན་པ་དང་ལྡན་བ་དེ་ནི་ཡིད་ཀྱི་སྡོམ་པ་མ་ཡིན་པ་དང་ཡང་ལྡན་ནོ། །ཡིད་ཀྱི་སྡོམ་པ་མ་ཡིན་པ་དང་ལྡན་པ་དེ། སྣའི་སྡོམ་པ་མ་ཡིན་པ་དང་ལྡན་པ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་འདོད་པ་རྣམས་ལ་འདོད་ཆགས་དང་བྲལ་ལ། གཟུགས་རྣམས་ལ་ནི་འདོད་ཆགས་དང་མ་བྲལ་བ་ལྟ་བུའོ།།

---

^{[མ་དཔེ་གཟིགས་ན་འདིར་གནོན།]}

ཇི་ལྟར་སྣའི་སྡོམ་པ་མ་ཡིན་པ་སྔ་མ་བཞིན་དུ་སྦྱར་བ་དེ་བཞིན་དུ་ལྕེའི་སྡོམ་པ་མ་ཡིན་པ་ཡང་སྔ་མ་བཞིན་དུ་སྦྱར་རོ། །ཡང་དག་པར་མ་བསྡམས་པའི་སྡོམ་པ་མ་ཡིན་པ་ནི་ལྔ་སྟེ། ལྔ་གང་ཞེ་ན། སྨྲས་པ། སྡུག་བསྔལ་མཐོང་བས་སྤང་བར་བྱ་བའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་དང༌། ཀུན་འབྱུང་བ་དང༌། འགོག་པ་དང༌། ལམ་མཐོང་བ་དང༌། བསྒོམ་པས་སྤང་བར་བྱ་བའི་ཡང་དག་པར་མ་བསྡམས་པའི་སྡོམ་པ་མ་ཡིན་པའོ། །ཡང་དག་པར་མ་བསྡམས་པའི་སྡོམ་པ་མ་ཡིན་པ་ནི་དགུ་སྟེ། དགུ་གང་ཞེ་ན། སྨྲས་པ། སྡུག་བསྔལ་ལ་ཆོས་ཤེས་པས་སྤང་བར་བྱ་བའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་དང༌། སྡུག་བསྔལ་ལ་རྗེས་སུ་ཤེས་པས་སྤང་བར་བྱ་བ་དང༌། ཀུན་འབྱུང་བ་ལ་ཆོས་ཤེས་པས་སྤང་བར་བྱ་བ་དང༌། ཀུན་འབྱུང་བ་ལ་རྗེས་སུ་ཤེས་པས་སྤང་བར་བྱ་བ་དང༌། འགོག་པ་ལ་ཆོས་ཤེས་པས་སྤང་བར་བྱ་བ་དང༌། འགོག་པ་ལ་རྗེས་སུ་ཤེས་པས་སྤང་བར་བྱ་བ་དང༌། ལམ་ལ་ཆོས་ཤེས་པས་སྤང་བར་བྱ་བ་དང༌། ལམ་ལ་རྗེས་སུ་ཤེས་པས་སྤང་བར་བྱ་བ་དང༌། བསྒོམ་པས་སྤང་བར་བྱ་བའི་ཡང་དག་པར་མ་བསྡམས་པའི་སྡོམ་པ་མ་ཡིན་པའོ། །ཡང་དག་པར་མ་བསྡོམས་པའི་སྡོམ་པ་མ་ཡིན་པ་ནི་བཅོ་ལྔ་སྟེ། བཅོ་ལྔ་གང་ཞེ་ན། སྨྲས་པ། འདོད་པ་དང་མཚུངས་པར་ལྡན་པ་ལྔ་དང་གཟུགས་དང་མཚུངས་པར་ལྡན་པ་ལྔ་དང༌། གཟུགས་མེད་པ་དང་མཚུངས་པར་ལྡན་པ་ལྔའོ། །འདོད་པ་དང་མཚུངས་པར་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་ལྔ་གང་ཞེ་ན། སྨྲས་པ། འདོད་པ་དང་མཚུངས་པར་ལྡན་པ་སྡུག་བསྔལ་མཐོང་བས་སྤང་བར་བྱ་བའི་ཡང་དག་པར་མ་བསྡམས་པའི་སྡོམ་པ་གང་ཡིན་པ་དང༌། འདོད་པ་དང་མཚུངས་པར་ལྡན་པ་ཀུན་འབྱུང་བ་དང༌། འགོག་པ་དང༌། ལམ་མཐོང་བ་དང༌། བསྒོམ་པས་སྤང་བར་བྱ་བའི་ཡང་དག་པར་མ་བསྡམས་པའི་སྡོམ་པ་མ་ཡིན་པའོ། །འདོད་པ་དང་མཚུངས་པར་ལྡན་པ་ཇི་ལྟ་བ་བཞིན་དུ། གཟུགས་དང༌། གཟུགས་མེད་པ་དང་མཚུངས་པར་ལྡན་པ་ཡང་དེ་དང་འདྲའོ། །ཡང་དག་པར་མ་བསྡམས་པའི་སྡོམ་པ་མ་ཡིན་པ་ནི་དགུ་བཅུ་རྩ་

---

^{[མ་དཔེ་གཟིགས་ན་འདིར་གནོན།]}

བརྒྱད་དེ། དགུ་བཅུ་རྩ་བརྒྱད་གང་ཞེ་ན། སྨྲས་པ། འདོད་པ་དང་མཚུངས་པར་ལྡན་པ་སུམ་ཅུ་རྩ་དྲུག་དང༌། གཟུགས་དང་མཚུངས་པར་ལྡན་པ་སུམ་ཅུ་རྩ་གཅིག་དང༌། གཟུགས་མེད་པ་དང་མཚུངས་པར་ལྡན་པ་སུམ་ཅུ་རྩ་གཅིག་གོ །འདོད་པ་དང་མཚུངས་པར་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་སུམ་ཅུ་རྩ་དྲུག་གང་ཞེ་ན། སྨྲས་པ། སྡུག་བསྔལ་མཐོང་བས་སྤང་བར་བྱ་བ་བཅུ་དང༌། ཀུན་འབྱུང་བ་མཐོང་བས་སྤང་བར་བྱ་བ་བདུན་དང༌། འགོག་པ་མཐོང་བས་སྤང་བར་བྱ་བ་བདུན་དང༌། ལམ་མཐོང་བས་སྤང་བར་བྱ་བ་བརྒྱད་དང༌། བསྒོམ་པས་སྤང་བར་བྱ་བ་བཞིའོ། །གཟུགས་དང་མཚུངས་པར་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་སུམ་ཅུ་རྩ་གཅིག་གང་ཞེ་ན། སྨྲས་པ། སྡུག་བསྔལ་མཐོང་བས་སྤང་བར་བྱ་བ་དགུ་དང༌། ཀུན་འབྱུང་བ་མཐོང་བས་སྤང་བར་བྱ་བ་དྲུག་དང༌། འགོག་པ་མཐོང་བས་སྤང་བར་བྱ་བ་དྲུག་དང༌། ལམ་མཐོང་བས་སྤང་བར་བྱ་བ་བདུན་དང༌། བསྒོམ་པས་སྤང་བར་བྱ་བ་གསུམ་མོ། །གཟུགས་དང་མཚུངས་པར་ལྡན་པ་རྣམས་ཇི་ལྟ་བ་བཞིན་དུ། གཟུགས་མེད་པ་དང་མཚུངས་པར་ལྡན་པ་རྣམས་ཀྱང་དེ་དང་འདྲའོ། །འདོད་པ་དང་མཚུངས་པར་ལྡན་པའི་མ་བསྡམས་པའི་སྡོམ་པ་མ་ཡིན་པ་བཅུ་གང་ཞེ་ན། སྨྲས་པ། འདོད་པ་དང་མཚུངས་པར་ལྡན་པ་སྡུག་བསྔལ་མཐོང་བས་སྤང་བར་བྱ་བའི་འཇིག་ཚོགས་ལ་ལྟ་བ་དང༌། མཐར་འཛིན་པར་ལྟ་བ་དང༌། ལོག་པར་ལྟ་བ་དང༌། ལྟ་བ་མཆོག་ཏུ་འཛིན་པ་དང༌། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་དང༌། ཐེ་ཚོམ་དང༌། འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པའོ། །འདོད་པ་དང་མཚུངས་པར་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་བདུན་གང་ཞེ་ན། སྨྲས་པ། འདོད་པ་དང་མཚུངས་པར་ལྡན་པ་ཀུན་འབྱུང་བ་མཐོང་བས་སྤང་བར་བྱ་བའི་ལོག་པར་ལྟ་བ་དང༌། ལྟ་བ་མཆོག་ཏུ་འཛིན་པ་དང༌། ཐེ་ཚོམ་དང༌། འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པའོ། །འདོད་པ་དང་མཚུངས་པར་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་

---

^{[མ་དཔེ་གཟིགས་ན་འདིར་གནོན།]}

བདུན་གང་ཞེ་ན། སྨྲས་པ། འདོད་ཆགས་དང་མཚུངས་པར་ལྡན་པའི་འོག་པ་མཐོང་བས་སྤང་བར་བྱ་བའི་ལོག་པར་ལྟ་བ་དང༌། ལྟ་བ་མཆོག་ཏུ་འཛིན་པ་དང༌། ཐེ་ཚོམ་དང༌། འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པའོ། །འདོད་པ་དང་མཚུངས་པར་ལྡན་པའི་ཡང་དག་པར་མ་བསྡམས་པའི་སྔོམ་པ་མ་ཡིན་པ་བརྒྱད་གང་ཞེ་ན། འདོད་པ་དང་མཚུངས་པར་ལྡན་པའི་ལམ་མཐོང་བས་སྤང་བར་བྱ་བའི་ལོག་པར་ལྟ་བ་དང༌། ལྟ་བ་མཆོག་ཏུ་འཛིན་པ་དང༌། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་དང༌། ཐེ་ཚོམ་དང༌། འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པའོ། །འདོད་པ་དང་མཚུངས་པར་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་བཞི་གང་ཞེ་ན། སྨྲས་པ། འདོད་པ་དང་མཚུངས་པར་ལྡན་པ་བསྒོམ་པས་སྤང་བར་བྱ་བའི་འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པའོ། །འདོད་པ་དང་མཚུངས་པར་ལྡན་པ་ཇི་ལྟ་བ་བཞིན་དུ་གཟུགས་དང༌། གཟུགས་མེད་པ་དང་མཚུངས་པར་ལྡན་པ་ཡང་དེ་དང་འདྲ་སྟེ། ཁོང་ཁྲོ་བ་ནི་མ་གཏོགས་སོ། །ཅིའི་ཕྱིར་འདོད་པ་དང་མཚུངས་བར་ལྡན་པའི་འཇིག་ཚོགས་ལ་ལྟ་བ་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཞེས་བྱ་ཞེ་ན། སྨྲས་པ། ཀུན་ནས་དཀྲིས་པའི་ཕྱིར་ནི་དམིགས་པ་ལ་ཡང་དག་པར་མ་བསྡམས་ལ་མ་སྤངས་པའི་ཕྱིར་ནི། འདོད་པའི་ཁམས་ཐམས་ཅད་ལ་ཡང་དག་པར་མ་བསྡམས་པ་ཞེས་བྱའོ། །འཇིག་ཚོགས་ལ་ལྟ་བ་ཇི་ལྟ་བ་བཞིན་དུ་མཐར་འཛིན་པར་ལྟ་པ་དང༌། སྡུག་བསྔལ་མཐོང་བས་སྤང་བར་བྱ་བའི་ལོག་པར་ལྟ་བ་དང༌། ལྟ་བ་མཆོག་ཏུ་འཛིན་པ་དང༌། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་དང༌། ཐེ་ཚོམ་དང༌། མ་རིག་པ་ཀུན་དུ་འགྲོ་བ་རྣམས་ཀྱང་དེ་དང་འདྲའོ། །ཅིའི་ཕྱིར་འདོད་པ་དང་མཚུངས་པར་ལྡན་པ་སྡུག་བསྔལ་མཐོང་བས་སྤང་བར་བྱ་བའི་འདོད་ཆགས་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཞེས་བྱ་ཞེ་ན། སྨྲས་པ། ཀུན་ནས་དཀྲིས་པའི་ཕྱིར་ནི་དམིགས་པ་ལ་ཡང་དག་པར་མ་བསྡམས་ལ། མ་སྤངས་པའི་ཕྱིར་ནི་འདོད་པ་དང་མཚུངས་པར་ལྡན་པའི་

---

^{[མ་དཔེ་གཟིགས་ན་འདིར་གནོན།]}

སྡུག་བསྔལ་མཐོང་བས་སྤང་བར་བྱ་བའི་ཚས་རྣམས་ལ་ཡང་དག་པར་མ་བསྡམས་པ་ཞེས་བྱའོ། །འདོད་པ་དང་མཚུངས་པར་ལྡན་པ་སྡུག་བསྔལ་མཐོང་བས་སྤང་བར་བྱ་བའི་འདོད་ཆགས་ཇི་ལྟ་བ་བཞིན་དུ་ཁོང་ཁྲོ་བ་དང༌། ང་རྒྱལ་དང༌། མ་རིག་བ་རྣམས་ཀྱང་དེ་དང་འདྲའོ། །ཐམས་ཅད་དུ་འགྲོ་བ་ནི་སྡུག་བསྔལ་མཐོང་བས་སྤང་བར་བྱ་བ་རྣམས་ཇི་ལྟ་བ་བཞིན་དུ། ཀུན་འབྱུང་བ་མཐོང་བས་སྤང་པར་བྱ་བ་རྣམས་ཀྱང་དེ་དང་འདྲ་སྟེ། འཇིག་ཚོགས་ལ་ལྟ་བ་དང༌། མཐར་འཛིན་པར་ལྟ་བ་ནི་མ་གཏོགས་སོ། །ཅིའི་ཕྱིར་འདོད་པ་དང་མཚུངས་པར་ལྡན་པ་འགོག་པ་མཐོང་བས་སྤང་བར་བྱ་བའི་ལོག་པར་ལྟ་པ་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཞེས་བྱ་ཞེ་ན། སྨྲས་པ། ཀུན་ནས་དཀྲིས་པའི་ཕྱིར་ནི་དམིགས་པ་ལ་ཡང་དག་པར་མ་བསྡམས་ལ། མ་སྤངས་པའི་ཕྱིར་ནི་དེ་དང་མཚུངས་པར་ལྡན་པའི་ཆོས་རྣམས་ཀྱིས་ཡང་དག་པར་མ་བསྡམས་པ་ཞེས་བྱའོ། །འདོད་པ་དང་མཚུངས་པར་ལྡན་པ་འགོག་པ་མཐོང་བས་སྤང་བར་བྱ་བའི་ལོག་པར་ལྟ་བ་ཇི་ལྟ་བ་བཞིན་དུ་ཐེ་ཚོམ་དང༌། མ་རིག་པ་ཟག་པ་མེད་པ་ལ་དམིགས་པ་ཡང་དེ་དང་འདྲའོ། །ཅིའི་ཕྱིར་འདོད་པ་དང་མཚུངས་པར་ལྡན་པ་འགོག་པ་མཐོང་བས་སྤང་བར་བྱ་བའི་ལྟ་བ་མཆོག་ཏུ་འཛིན་པ་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཞེས་བྱ་ཞེ་ན། སྨྲས་པ། ཀུན་ནས་དཀྲིས་པའི་ཕྱིར་ནི་དམིགས་པ་ལ་ཡང་དག་པར་མ་བསྡམས་ལ། མ་སྤངས་པའི་ཕྱིར་ནི་འདོད་བ་དང་མཚུངས་པར་ལྡན་པ་འགོག་པ་མཐོང་བས་སྤང་བར་བྱ་བའི་ཆོས་རྣམས་ཀྱིས་ཡང་དག་པར་མ་བསྡམས་པ་ཞེས་བྱའོ། །འདོད་བ་དང་མཚུངས་པར་ལྡན་པ་འགོག་པ་མཐོང་བས་སྤང་བར་བྱ་བའི་ལྟ་བ་མཆོག་ཏུ་འཛིན་པ་ཇི་ལྟ་བ་བཞིན་དུ་འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པ་ཟག་པ་དང་བཅས་པ་ལ་དམིགས་པ་རྣམས་ཀྱང་དེ་དང་འདྲའོ། །འགོག་པ་མཐོང་བས་སྤང་བར་བྱ་བ་རྣམ་མ་ཇི་ལྟ་བ་བཞིན་དུ་ལམ་མཐོང་བས་སྤང་བར་བྱ་བ་རྣམས་ཀྱང་དེ་དང་འདྲ་སྟེ། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པར་བསྟན་པར་བྱའོ། །ཅིའི་ཕྱིར་འདོད་པ་དང་མཚུངས་པར་

---

^{[མ་དཔེ་གཟིགས་ན་འདིར་གནོན།]}

ལྡན་པ་བསྒོམ་པས་སྤང་བར་བྱ་བའི་འདོད་ཆགས་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཞེས་བྱ་ཞེ་ན། སྨྲས་པ། ཀུན་ནས་དཀྲིས་པའི་ཕྱིར་ནི་དམིགས་པ་ལ་ཡང་དག་པར་མ་བསྡམས་ལ། མ་སྤངས་པའི་ཕྱིར་ནི་འདོད་པ་དང་མཚུངས་པར་ལྡན་པ་བསྒོམ་པས་སྤང་བར་བྱ་བའི་ཆོས་རྣམས་ཀྱིས་ཡང་དག་པར་མ་བསྡམས་པ་ཞེས་བྱའོ། །འདོད་པ་དང་མཚུངས་པར་ལྡན་པ་བསྒོམ་པས་སྤང་བར་བྱ་བའི་འདོད་ཆགས་ཇི་ལྟ་བ་བཞིན་དུ་ཁོང་ཁྲོ་བ་དང༌། ང་རྒྱལ་དང༌། མ་རིག་པ་ཡང་དེ་དང་འདྲའོ། །འདོད་པ་དང་མཚུངས་པར་ལྡན་པ་རྣམས་ཇི་ལྟ་བ་བཞིན་དུ། གཟུགས་དང་གཟུགས་མེད་པ་དང་མཚུངས་པར་ལྡན་པ་རྣམས་ཀྱང་དེ་དང་འདྲ་བར་བརྗོད་པར་བྱའོ། །ལས་གདགས་པ་ཚིགས་བདུན་པའོ།། །།སྡོམ་ནི། ཡང་དག་མ་བསྡམས་སྡོམ་མིན་ནི། །སུམ་ཅུ་རྩ་དྲུག་བསྟན་པ་སྟེ། །ཁམས་ཀྱི་སྒོ་ནས་སྡོམ་མིན་གསུམ། །སེམས་དང་མི་ལྡན་དྲུག་པོ་ལས། །སྡོམ་པ་མ་ཡིན་ཐ་མ་རྣམས། །དེ་བཞིན་དཀར་པོའི་ཕྱོགས་ལ་ཡང༌། །རྒྱས་བ་དག་ཏུ་སྦྱར་བར་བྱ། །རྩ་བ་གསུམ་ལས་བཟུང་ནས་ཀྱང༌། །དེ་ཡི་རྗེས་ལ་དྲི་བར་བྱ། །ཡང་དག་པར་མ་བསྡམས་པའི་སྡོམ་པ་མ་ཡིན་པ་སུམ་ཅུ་རྩ་དྲུག་གང་ཞེ་ན། སྨྲས་པ། སྡུག་བསྔལ་མཐོང་བས་སྤང་བར་བྱ་བ་བཅུ་དང༌། ཀུན་འབྱུང་བ་མཐོང་བས་སྤང་བར་བྱ་བ་བདུན་དང༌། འགོག་པ་མཐོང་བས་སྤང་བར་བྱ་བ་བདུན་དང༌། ལམ་མཐོང་བས་སྤང་བར་བྱ་བ་བརྒྱད་དང༌། བསྒོམ་པས་སྤང་བར་བྱ་བ་བཞིའོ། །སྡུག་བསྔལ་མཐོང་བས་སྤང་བར་བྱ་བའི་ཡང་དག་པར་མ་བསྡོམས་པའི་སྡོམ་པ་མ་ཡིན་པ་བཅུ་གང་ཞེ་ན། སྨྲས་པ། འཇིག་ཚོགས་ལ་ལྟ་བ་དང༌། མཐར་འཛིན་པར་ལྟ་པ་དང༌། སྡུག་བསྔལ་མཐོང་བས་སྤང་བ་བྱ་བའི་ལོག་པར་ལྟ་བ་དང༌། ལྟ་བ་མཆོག་ཏུ་འཛིན་པ་དང༌། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་དང༌། ཐེ་ཚོམ་དང༌། འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པའོ། །ཀུན་འབྱུང་བ་མཐོང་བས་སྤང་བར་བྱ་བའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་བདུན་གང་ཞེ་ན། སྨྲས་པ། ཀུན་འབྱུང་བ་མཐོང་བས་སྤང་བར་བྱ་བའི་

---

^{[མ་དཔེ་གཟིགས་ན་འདིར་གནོན།]}

ལོག་པར་ལྟ་བ་དང༌། ལྟ་བ་མཆོག་ཏུ་འཛིན་པ་དང༌། ཐེ་ཚོམ་དང༌། འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པའོ། །འགོག་པ་མཐོང་བས་སྤང་བར་བྱ་བ་རྣམས་ཀྱང་དེ་དང་འདྲའོ། །ལམ་མཐོང་བས་སྤང་བར་བྱ་བའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་བརྒྱད་གང་ཞེ་ན། སྨྲས་པ། ལམ་མཐོང་བས་སྤང་བར་བྱ་བའི་ལོག་པར་ལྟ་བ་དང༌། ལྟ་བ་མཆོག་ཏུ་འཛིན་པ་དང༌། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་དང༌། ཐེ་ཚོམ་དང༌། འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པའོ། །བསྒོམ་པས་སྤང་བར་བྱ་བའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་བཞི་གང་ཞེ་ན། སྨྲས་པ། བསྒོམ་པས་སྤང་བར་བྱ་བའི་འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པའོ། །ཅིའི་ཕྱིར་འཇིག་ཚོགས་ལ་ལྟ་བ་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཞེས་བྱ་ཞེ་ན། སྨྲས་པ། ཀུན་ནས་དཀྲིས་པའི་ཕྱིར་ནི་དམིགས་པ་ཡང་དག་པར་མ་བསྡམས་ལ། མ་སྤངས་པའི་ཕྱིར་ནི་འདོད་པའི་ཁམས་ཐམས་ཅད་དུ་ཡང་དག་པར་མ་བསྡམས་པ་ཞེས་བྱའོ། །འཇིག་ཚོགས་ལ་ལྟ་བ་ཇི་ལྟ་བ་བཞིན་དུ་མཐར་འཛིན་པར་ལྟ་པ་དང༌། སྡུག་བསྔལ་མཐོང་བས་སྤང་བར་བྱ་བའི་ལོག་པར་ལྟ་བ་དང༌། ལྟ་བ་མཆོག་ཏུ་འཛིན་པ་དང༌། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་དང༌། ཐེ་ཚོམ་དང༌། མ་རིག་པ་ཀུན་དུ་འགྲོ་བ་ཡང་དེ་དང་འདྲའོ། །ཅིའི་ཕྱིར་སྡུག་བསྔལ་མཐོང་བས་སྤང་བར་བྱ་བའི་འདོད་ཆགས་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཞེས་བྱ་ཞེ་ན། སྨྲས་པ། ཀུན་ནས་དཀྲིས་པའི་ཕྱིར་ནི་དམིགས་པ་ལ་ཡང་དག་པར་མ་བསྡམས་ལ་མ་སྤངས་པའི་ཕྱིར་ནི། སྡུག་བསྔལ་མཐོང་བས་སྤང་བར་བྱ་བའི་ཆོས་རྣམས་ཀྱི་ཡང་དག་པར་མ་བསྡམས་པ་ཞེས་བྱའོ། །སྡུག་བསྔལ་མཐོང་བས་སྤང་བར་བྱ་བའི་འདོད་ཆགས་པ་ཇི་ལྟ་བ་བཞིན་དུ་ཁོང་ཁྲོ་བ་དང༌། ང་རྒྱལ་དང༌། མ་རིག་པ་ཀུན་དུ་འགྲོ་བ་མ་ཡིན་པ་ཡང་དེ་དང་འདྲའོ། །སྡུག་བསྔལ་མཐོང་བས་སྤང་བར་བྱ་བ་རྣམས་ཇི་ལྟ་བ་བཞིན་དུ་ཀུན་འབྱུང་བ་མཐོང་བས་སྤང་བར་བྱ་བ་རྣམས་ཀྱང་དེ་དང་འདྲ་སྟེ། འཇིག་

---

^{[མ་དཔེ་གཟིགས་ན་འདིར་གནོན།]}

ཚོགས་ལ་ལྟ་བ་དང༌། མཐར་འཛིན་པར་ལྟ་བ་དང༌། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་ནི་མ་གཏོགས་སོ། །ཅིའི་ཕྱིར་འགོག་པ་མཐོང་བས་སྤང་བར་བྱ་བའི་ལོག་པར་ལྟ་བ་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཞེས་བྱ་ཞེ་ན། སྨྲས་པ། ཀུན་ནས་དཀྲིས་པའི་ཕྱིར་ནི་དམིགས་པ་ལ་ཡང་དག་པར་མ་བསྡམས་ལ། མ་སྤངས་པའི་ཕྱིར་ནི་དེ་དང་མཚུངས་པར་ལྡན་པའི་ཆོས་རྣམས་ཀྱིས་ཡང་དག་པར་མ་བསྡམས་པ་ཞེས་བྱའོ། །འགོག་པ་མཐོང་བས་སྤང་བར་བྱ་བའི་ལོག་པར་ལྟ་བ་ཇི་ལྟ་བ་བཞིན་དུ་ཐེ་ཚོམ་དང༌། མ་རིག་པ་ཟག་པ་མེད་པ་ལ་དམིགས་པ་ཡང་དེ་དང་འདྲའོ། །ཅིའི་ཕྱིར་འགོག་པ་མཐོང་བས་སྤང་བར་བྱ་བའི་ལྟ་བ་མཆོག་ཏུ་འཛིན་པ་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཞེས་བྱ་ཞེ་ན། སྨྲས་པ། ཀུན་ནས་དཀྲིས་པའི་ཕྱིར་ནི་དམིགས་པ་ཡང་དག་པར་མ་བསྡམས་ལ། མ་སྤངས་པའི་ཕྱིར་ནི་འགོག་པ་མཐོང་བས་སྤང་བར་བྱ་བའི་ཆོས་རྣམས་ཀྱིས་ཡང་དག་པར་མ་བསྡམས་པ་ཞེས་བྱའོ། །འགོག་པ་མཐོང་བས་སྤང་བར་བྱ་བའི་ལྟ་བ་མཆོག་ཏུ་འཛིན་པ་ཇི་ལྟ་བ་བཞིན་དུ་འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པ་ཟག་པ་དང་བཅས་པ་ལ་དམིགས་པ་ཡང་དེ་དང་འདྲའོ། །འགོག་པ་མཐོང་བས་སྤང་བར་བྱ་བ་རྣམས་ཇི་ལྟ་བ་བཞིན་དུ། ལམ་མཐོང་བས་སྤང་བར་བྱ་བ་རྣམས་ཀྱང་དེ་དང་འདྲ་སྟེ། ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་བསྟན་པར་བྱའོ། །ཅིའི་ཕྱིར་བསྒོམ་པས་སྤང་བར་བྱ་བའི་འདོད་ཆགས་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཞེས་བྱ་ཞེ་ན། སྨྲས་པ། ཀུན་ནས་དཀྲིས་པའི་ཕྱིར་ནི་དམིགས་པ་ལ་ཡང་དག་པར་མ་བསྡམས་ལ། མ་སྤངས་བའི་ཕྱིར་ནི་བསྒོམ་པས་སྤང་བར་བྱ་བའི་ཆོས་རྣམས་ཀྱིས་ཡང་དག་པར་མ་བསྡམས་པ་ཞེས་བྱའོ། །བསྒོམ་པས་སྤང་བར་བྱ་བའི་འདོད་ཆགས་ཇི་ལྟ་པ་བཞིན་དུ་ཁོང་ཁྲོ་བ་དང༌། ང་རྒྱལ་དང༌། མ་རིག་པ་ཡང་དེ་དང་འདྲའོ། །ཡང་དག་པར་མ་བསྡམས་པའི་སྡོམ་པ་མ་ཡིན་པ་གསུམ་ཡོད་དེ། འདོད་པ་དང་ལྡན་པའི་ཡང་དག་པར་མ་བསྡམས་པའི་

---

^{[མ་དཔེ་གཟིགས་ན་འདིར་གནོན།]}

སྡོམ་པ་མ་ཡིན་པ་དང༌། གཟུགས་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་དང༌། གཟུགས་མེད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པའོ། །གང་གི་འདོད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་མ་སྤངས་ཤིང་ཡོངས་སུ་མ་ཤེས་པ་དེའི་ནི་གཟུགས་དང་ལྡན་པའི་ཡང་དག་པར་མ་བསྡོམས་པའི་སྡོམ་པ་མ་ཡིན་བ་ཡང་མ་སྤངས་ཤིང་ཡོངས་སུ་མ་ཤེས་པ་ཡིན་ནམ། གཟུགས་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་མ་སྤངས་ཤིང་ཡོངས་སུ་མ་ཤེས་པ་གང་ཡིན་པ་དེའི་ནི་འདོད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཡང་དག་པར་མ་སྤངས་ཤིང་ཡོངས་སུ་མ་ཤེས་པ་ཡིན་ནམ་ཞེ་ན། སྨྲས་པ། གང་གི་འདོད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་བ་མ་ཡིན་པ་མ་སྤངས་ཤིང་ཡོངས་སུ་མ་ཤེས་པ་དེའི་ནི་གཟུགས་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཡང་མ་སྤངས་ཤིང་ཡོངས་སུ་མ་ཤེས་པ་ཡིན་ནོ། །གཟུགས་དང་ལྡན་པ་ཡིན་ལ་འདོད་པ་དང་ལྡན་པ་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་འདོད་པ་རྣམས་ལས་འདོད་ཆགས་དང་བྲལ་ལ། གཟུགས་རྣམས་ལས་འདོད་ཆགས་དང་མ་བྲལ་བ་ལྟ་བུའོ། །གང་གི་འདོད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་མ་སྤངས་ཤིང་ཡོངས་སུ་མ་ཤེས་པ་དེའི་ནི་གཟུགས་མེད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཡང་མ་སྤངས་ཤིང་ཡོངས་སུ་མ་ཤེས་པ་ཡིན་ནམ། གཟུགས་མེད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་མ་སྤངས་ཤིང་ཡོངས་སུ་མ་ཤེས་པ་གང་ཡིན་པ་དེའི་ནི་འདོད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་བ་ཡང་མ་སྤངས་ཤིང་ཡོངས་སུ་མ་ཤེས་པ་ཡིན་ན་མ་ཞེ་ན། སྨྲས་པ། གང་གི་འདོད་པ་དང་ལྡན་པའི་ཡང་དག་པར་མ་བསྡམ་པའི་སྡོམ་པ་མ་ཡིན་པ་མ་སྤངས་ཤིང་ཡོངས་སུ་མ་ཤེས་པ་དེའི་ནི་གཟུགས་མེད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་

---

^{[མ་དཔེ་གཟིགས་ན་འདིར་གནོན།]}

ཡང་མ་སྤང་ཤིང་ཡོངས་སུ་མ་ཤས་པ་ཡིན་ནོ། །གཟུགས་མེད་པ་དང་ལྡན་ལ་འདོད་པ་དང་མི་ལྡན་པ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་འདོད་པ་རྣམས་ལས་འདོད་ཆགས་དང་བྲལ་བ་ལྟ་བུའོ། །གང་གི་གཟུགས་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་མ་སྤངས་ཤིང་ཡོངས་སུ་མ་ཤེས་པ་གང་ཡིན་པ་དེའི་ནི་གཟུགས་མེད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཡང་མ་སྤངས་ཤིང་ཡོངས་སུ་མ་ཤེས་པ་ཡིན་ནམ། གཟུགས་མེད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་མ་སྤངས་ཤིང་ཡོངས་སུ་མ་ཤེས་པ་དེའི་ནི་གཟུགས་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཡང་མ་སྤངས་ཤིང་ཡོངས་སུ་མ་ཤེས་པ་ཡིན་ནམ་ཞེ་ན། སྨྲས་པ། གང་གི་གཟུགས་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་མ་སྤངས་ཤིང་ཡོངས་སུ་མ་ཤེས་པ་དེའི་ནི་གཟུགས་མེད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་ཡང་མ་སྤངས་ཤིང་ཡོངས་སུ་མ་ཤེས་པ་ཡིན་ནོ། །གཟུགས་མེད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་མ་སྤངས་ཤིང་ཡོངས་སུ་མ་ཤེས་པ་ལ། གཟུགས་དང་ལྡན་པའི་ནི་མ་སྤངས་ཤིང་ཡོངས་སུ་མ་ཤེས་པ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་གཟུགས་རྣམས་ལས་འདོད་ཆགས་དང་བྲལ་ལ་གཟུགས་མེད་པ་རྣམས་ལས་ནི་འདོད་ཆགས་དང་བྲལ་བ་ལྟ་བུའོ། །ཡང་དག་པར་མ་བསྡམས་པའི་སྡོམ་པ་མ་ཡིན་པ་དྲུག་ཡོད་དེ། དྲུག་གང་ཞེ་ན། སྨྲས་པ། འདོད་པ་དང་ལྡན་པའི་སེམས་དང་མཚུངས་པར་ལྡན་པ་དང༌། སེམས་དང་མི་ལྡན་པ་དང༌། གཟུགས་དང་ལྡན་པའི་སེམས་དང་མཚུངས་པར་ལྡན་པ་དང༌། སེམས་དང་མི་ལྡན་པ་དང༌། གཟུགས་མེད་པ་དང་ལྡན་པའི་སེམས་དང་མཚུངས་པར་ལྡན་པ་དང༌། སེམས་དང་མི་ལྡན་པའོ། །འདོད་པ་དང་མཚུངས་པར་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་མངོན་སུམ་དུ་བྱེད་པ་ན་སྡོམ་པ་མ་ཡིན་པ་དུ་ཞིག་གིས་མ་བསྡམས་ཞེས་བྱ། གཟུགས་དང་ལྡན་

---

^{[མ་དཔེ་གཟིགས་ན་འདིར་གནོན།]}

པ་དང༌། གཟུགས་མེད་པ་དང་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་མངོན་སུམ་དུ་བྱེད་པ་ན་སྡོམ་པ་མ་ཡིན་པ་དུ་ཞིག་གིས་མ་བསྡམས་ཞེས་བྱ་ཞེ་ན། སྨྲས་པ། འདོད་པ་དང་ལྡན་པའི་སེམས་དང་མཚུངས་པར་ལྡན་པའི་ཡང་དག་པར་མ་བསམས་པའི་སྡོམ་བ་མ་ཡིན་པ་མངོན་སུམ་དུ་བྱེད་པ་ན་ནི་སྡོམ་པ་མ་ཡིན་པ་བཞིས་མ་བསྡམས་པ་ཞེས་བྱ་སྟེ། འདོད་པ་དང་ལྡན་པའི་སེམས་དང་མཚུངས་པར་ལྡན་པ་དང༌། སེམས་དང་མི་ལྡན་པ་དང༌། གཟུགས་དང་ལྡན་པའི་སེམས་དང་མི་ལྡན་པ་དང༌། གཟུགས་མེད་པ་དང་ལྡན་པའི་སེམས་དང་མི་ལྡན་པས་སོ། །གཟུགས་དང་ལྡན་པའི་མཚུངས་པར་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་མངོན་སུམ་དུ་བྱེད་པ་ན་ནི་སྡོམ་པ་མ་ཡིན་པ་གསུམ་གྱིས་མ་བསྡམས་པ་ཞེས་བྱ་སྟེ། གཟུགས་དང་ལྡན་པའི་སེམས་དང་མཚུངས་པར་ལྡན་པ་དང༌། སེམས་དང་མི་ལྡན་པ་དང༌། གཟུགས་མེད་པ་དང་ལྡན་པའི་སེམས་དང་མི་ལྡན་པས་སོ། །གཟུགས་མེད་པ་དང་ལྡན་པའི་སེམས་དང་མཚུངས་པར་ལྡན་པའི་ཡང་དག་པར་མ་བསྡམས་པའི་སྡོམ་པ་མ་ཡིན་པ་མངོན་སུམ་དུ་བྱེད་པ་ན་ནི་སྡོམ་པ་མ་ཡིན་པ་གཉིས་ཀྱིས་མ་བསྡམས་པ་ཞེས་བྱ་སྟེ། གཟུགས་མེད་པ་དང་ལྡན་པའི་སེམས་དང་མཚུངས་པར་ལྡན་པ་དང༌། སེམས་དང་མི་ལྡན་པས་སོ། །ཇི་ལྟར་ཚིགས་བདུན་པ་ལས་ནག་པོའི་ཕྱོགས་ཀྱི་སྒོ་ནས་བསྟན་པ་དེ་བཞིན་དུ། དཀར་པོའི་ཕྱོགས་ལ་ཡང་དགེ་བའི་རྩ་བ་གསུམ་ལས་བཟུང་སྟེ་ཐམས་ཅད་བརྗོད་པར་བྱའོ། །ལས་གདགས་པ་ཚིགས་བརྒྱད་པའོ།། །།སྡོམ་ནི། འདས་པ་འདས་པའི་རྒྱུ་ལས་བྱུང༌། །འདྲེས་པའི་དྲི་བ་དེ་དང་གཉིས། །ཆོས་གང་དགེ་བའི་རྒྱུ་ལས་བྱུང༌། །རྣམ་པར་སྨིན་ལ་གནས་བཞི་ཡོད། །འདས་པའི་སེམས་པ་འདས་པའི་རྒྱུ་ལས་བྱུང་པ་ཡིན་ལ། མ་འོངས་པའི་རྒྱུ་ལས་བྱུང་བ་ཡང་མ་ཡིན། ད་ལྟར་བྱུང་བའི་རྒྱུ་ལས་བྱུང་བ་ཡང་མ་ཡིན་པ་ཡོད་དམ། འདས་པའི་སེམས་པ་མ་འོངས་པའི་རྒྱུ་ལས་བྱུང་བ་ཡང་ཡིན་ལ། འདས་པའི་རྒྱུ་ལས་བྱུང་བ་ཡང་མ་ཡིན། ད་ལྟར་བྱུང་བའི་རྒྱུ་ལས་བྱུང་བ་ཡང་མ་ཡིན་པ་ཡོད་དམ། འདས་

---

^{[མ་དཔེ་གཟིགས་ན་འདིར་གནོན།]}

པའི་སེམས་པ་ད་ལྟར་བྱུང་བའི་རྒྱུ་ལས་བྱུང་བ་ཡིན་ལ། འདས་པའི་རྒྱུ་ལས་བྱུང་བ་ཡང་མ་ཡིན། མ་འོངས་པའི་རྒྱུ་ལས་བྱུང་བ་ཡང་མ་ཡིན་པ་ཡོད་དམ། འདས་པའི་སེམས་པ་འདས་པ་དང་ད་ལྟར་བྱུང་བའི་རྒྱུ་ལས་བྱུང་བ་ཡིན་ལ། མ་འོངས་པའི་རྒྱུ་ལས་བྱུང་བ་མ་ཡིན་པ་ཡོད་དམ། འདས་པའི་སེམས་པ་མ་འོངས་པ་དང་ད་ལྟར་བྱུང་བའི་རྒྱུ་ལས་བྱུང་བ་ཡིན་ལ། འདས་པའི་རྒྱུ་ལས་བྱུང་བ་མ་ཡིན་པ་ཡོད་དམ། འདས་པའི་སེམས་པ་འདས་པ་དང༌། མ་འོངས་པ་དང༌། ད་ལྟར་བྱུང་པའི་རྒྱུ་ལས་བྱུང་བ་ཡོད་དམ། འདས་པ་ཇི་ལྟ་བ་བཞིན་དུ་མ་འོངས་པ་དང༌། ད་ལྟར་བྱུང་བའི་ཡང་དེ་དང་འདྲ་བར་སྦྱར་ཏེ། དེ་ལས་འདས་པའི་སེམས་པ་ཐམས་ཅད་ནི་འདས་པའི་རྒྱུ་ལས་བྱུང་བ་ཡིན་ནོ། །མུ་ལྷག་མ་རྣམས་ནི་མེད་དོ། །མ་འོངས་པའི་སེམས་པ་འདས་པའི་རྒྱུ་ལས་བྱུང་བ་ཡིན་ལ། མ་འོངས་པའི་རྒྱུ་ལས་བྱུང་བ་ཡང་མ་ཡིན། ད་ལྟར་བྱུང་བའི་རྒྱུ་ལས་བྱུང་བ་ཡང་མ་ཡིན་པ་ཡོད་དམ་ཞེ་ན། སྨྲས་པ། མེད་དོ། །མ་འོངས་པའི་སེམས་པ་མ་འོངས་པའི་རྒྱུ་ལས་བྱུང་བ་ཡིན་ལ་འདས་པའི་རྒྱུ་ལས་བྱུང་བ་ཡང་མ་ཡིན། ད་ལྟར་བྱུང་བའི་རྒྱུ་ལས་བྱུང་བ་ཡང་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། ཡང་དག་པའི་ངེས་པ་ལ་ཞུགས་པའི་གང་ཟག་གི་མ་འོངས་པའི་ཟག་པ་མེད་པའི་སེམས་པ་གང་ཡིན་པའོ། །དེའི་མ་འོངས་པའི་རྒྱུ་གང་ཞེ་ན། སྨྲས་པ། ལྷན་ཅིག་འབྱུང་བ་དང༌། མཚུངས་པར་ལྡན་པའི་ཆོས་རྣམས་སོ། །མ་འོངས་པའི་སེམས་པ་འདས་པའི་རྒྱུ་ལས་བྱུང་བ་ཡིན་ལ། མ་འོངས་པའི་རྒྱུ་ལས་བྱུང་བ་ཡང་མ་ཡིན། ད་ལྟར་བྱུང་བའི་རྒྱུ་ལས་བྱུང་བ་ཡང་མ་ཡིན་པ་ཡོད་དམ་ཞེ་ན། སྨྲས་པ། མེད་དོ། །མ་འོངས་པའི་སེམས་པ་ད་ལྟར་བྱུང་བའི་རྒྱུ་ལས་བྱུང་བ་ཡིན་ལ། འདས་པའི་རྒྱུ་ལས་བྱུང་བ་ཡང་མ་ཡིན། མ་འོངས་པའི་རྒྱུ་ལས་བྱུང་བ་ཡང་མ་ཡིན་པ་ཡོད་དམ་ཞེ་ན། སྨྲས་པ། མེད་དོ། །མ་འོངས་པའི་སེམས་པ་མ་འོངས་པ་དང༌། ད་ལྟར་བྱུང་པའི་རྒྱུ་ལས་བྱུང་བ་ཡིན་ལ། འདས་པའི་རྒྱུ་ལས་བྱུང་བ་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། སྡུག་བསྔལ་ལ་ཆོས་ཤེས་པའི་བཟོད་པ་མངོན་སུམ་དུ་གྱུར་པ་

---

^{[མ་དཔེ་གཟིགས་ན་འདིར་གནོན།]}

ན་དེ་ལས་གཞན་པའི་མ་འོངས་པའི་སེམས་པ་གང་ཡིན་པའོ། །དེའི་མ་འོངས་པའི་རྒྱུ་གང་ཞེ་ན། སྨྲས་པ། ལྷན་ཅིག་འབྱུང་བ་དང་མཚུངས་པར་ལྡན་པའི་ཆོས་རྣམས་སོ། །དེའི་ད་ལྟར་བྱུང་བའི་རྒྱུ་གང་ཞེ་ན། སྨྲས་པ། སྡུག་བསྔལ་ལ་ཆོས་ཤེས་པའི་བཟོད་པ་དང༌། དེ་དང་མཚུངས་པར་ལྡན་པའི་ཆོས་རྣམས་སོ། །མ་འོངས་པའི་སེམས་པ་འདས་པ་དང༌། མ་འོངས་པའི་རྒྱུ་ལས་བྱུང་པ་ཡིན་ལ། ད་ལྟར་བྱུང་བའི་རྒྱུ་ལས་བྱུང་བ་ལ་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། དེའི་མ་འོངས་པའི་རྒྱུ་གང་ཞེ་ན། སྨྲས་པ། ལྷན་ཅིག་འབྱུང་བ་དང་མཚུངས་པར་ལྡན་པའི་ཆོས་རྣམས་སོ། །དེའི་འདས་པའི་རྒྱུ་གང་ཞེ་ན། སྨྲས་པ། འདས་པའི་ཆོས་གང་ཡིན་པ་རྣམས་ཀྱིས་ནི་སེམས་པ་དེ་དང་འདྲ་བའམ་རྣམ་པར་སྨིན་པ་ཡིན་གྱི། ད་ལྟར་བྱུང་བའི་ཆོས་རྣམས་ཀྱི་ནི་སེམས་པ་དེ་དང་འདྲ་པའམ། རྣམ་པར་སྨིན་པ་མ་ཡིན་ནོ། །མ་འོངས་པའི་སེམས་པ་འདས་པ་དང༌། མ་འོངས་པ་དང་ད་ལྟར་བྱུང་བའི་རྒྱུ་ལས་བྱུང་བ་ཡོད་དམ་ཞེན། སྨྲས་པ། ཡོད་དེ། དེའི་མ་འོངས་པའི་རྒྱུ་གང་ཞེ་ན། སྨྲས་པ། ལྷན་ཅིག་འབྱུང་བ་དང༌། མཚུངས་པར་ལྡན་པའི་ཆོས་རྣམས་སོ། །དེའི་འདས་པ་དང་ད་ལྟར་བྱུང་བའི་རྒྱུ་གང་ཞེ་ན། སྨྲས་པ། འདས་པ་དང་ད་ལྟར་བྱུང་བའི་ཆོས་གང་ཡིན་པ་རྣམས་ཀྱི་ནི་སེམས་པ་དེ་འོང་བ་འམ། རྣམ་པར་སྨིན་པ་ཡིན་ནོ། །ད་ལྟར་བྱུང་བའི་སེམས་པ་ད་ལྟར་བྱུང་བའི་རྒྱུ་ལས་བྱུང་བ་ཡིན་ལ། མ་འོངས་པའི་རྒྱུ་ལས་བྱུང་བ་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། སྡུག་བསྔལ་ལ་ཆོས་ཤེས་པའི་བཟོད་པ་མངོན་སུམ་དུ་གྱུར་པ་དང་མཚུངས་པར་ལྡན་པའི་སེམས་པའོ། །དེའི་ད་ལྟར་བྱང་བའི་རྒྱུ་གང་ཞེ་ན། སྨྲས་པ། ལྷན་ཅིག་འབྱུང་བ་དང་མཚུངས་པར་ལྡན་པའི་ཆོས་རྣམས་སོ། །ད་ལྟར་བྱུང་བའི་སེམས་པ་འདས་པའི་རྒྱུ་ལས་བྱུང་བ་ཡིན་ལ། མ་འོངས་པའི་རྒྱུ་ལས་བྱུང་བ་ཡང་མ་ཡིན། ད་ལྟར་བྱུང་བའི་རྒྱུ་ལས་བྱུང་བ་ཡང་མ་ཡིན་པ་ཡོད་དམ་ཞེ་ན། སྨྲས་པ། མེད་དེ། ད་ལྟར་བྱུང་བའི་སེམས་པ་མ་འོངས་པའི་རྒྱུ་ལས་བྱུང་པ་ཡིན་ལ། འདས་པའི་རྒྱུ་ལས་བྱུང་བ་ཡང་མ་ཡིན། ད་ལྟར་བྱུང་བའི་རྒྱུ་ལས་བྱུང་བ་ཡང་མ་ཡིན་པ་ཡོད་དམ་ཞེ་ན། སྨྲས་པ། མེད་དོ། །ད་ལྟར་བྱུང་བའི་

---

^{[མ་དཔེ་གཟིགས་ན་འདིར་གནོན།]}

སེམས་པ་འདས་པ་དང་ད་ལྟར་བྱུང་བའི་རྒྱུ་ལས་བྱུང་བ་ཡིན་ལ། མ་འོངས་པའི་རྒྱུ་ལས་བྱུང་བ་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། དེའི་ད་ལྟར་བྱུང་བའི་རྒྱུ་གང་ཞེ་ན། སྨྲས་པ། ལྷན་ཅིག་འབྱུང་བ་དང་མཚུངས་པར་ལྡན་པའི་ཆོས་རྣམས་སོ། །དེའི་འདས་པའི་རྒྱུ་གང་ཞེ་ན། སྨྲས་པ། འདས་པའི་རྒྱུ་གང་ཡིན་པ་རྣམས་ཀྱི་ནི་སེམས་པ་དེ་དང་འདྲ་བ་འམ། རྣམ་པར་སྨིན་པ་ཡིན་ནོ། །ད་ལྟར་བྱུང་བའི་སེམས་པ་མ་འོངས་པ་དང༌། ད་ལྟར་བྱུང་བའི་རྒྱུ་ལས་བྱུང་བ་ཡོད་དམ་ཞེ་ན། སྨྲས་པ། མེད་དོ། །འདས་པ་དང་མ་འོངས་པའི་རྒྱུ་ལས་བྱུང་བ་ཡང་མེད་དོ། །འདས་པ་དང་མ་འོངས་པ་དང་ད་ལྟར་བྱུང་བའི་རྒྱུ་ལས་བྱུང་བ་ཡང་མེད་དོ། །ཆོས་གསུམ་ཡོད་དེ། དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་རྣམས་སོ། །དགེ་བའི་ཆོས་རྣམས་དགེ་བའི་རྒྱུ་ལས་བྱུང་བ་ཡོད་དམ་ཞེ་ན། སྨྲས་པ། ཡོད་དེ། དགེ་བའི་འདུས་བྱས་ཀྱི་ཆོས་རྣམས་སོ། །དགེ་བའི་ཆོས་རྣམས་མི་དགེ་བའི་རྒྱུ་ལས་བྱུང་བ་ཡོད་དམ་ཞེ་ན། སྨྲས་པ། མེད་དོ། །དགེ་བའི་ཆོས་རྣམས་ལུང་དུ་མ་བསྟན་པའི་རྒྱུ་ལས་བྱུང་བ་ཡོད་དམ་ཞེ་ན། སྨྲས་པ། མེད་དོ། །མི་དགེ་བའི་ཆོས་རྣམས་མི་དགེ་བའི་རྒྱུ་ལས་བྱུང་བ་ཡོད་དམ་ཞེ་ན། སྨྲས་པ། ཡོད་དེ། ཐམས་ཅད་དོ། །མི་དགེ་བའི་ཆོས་རྣམས་དགེ་བའི་རྒྱུ་ལས་བྱུང་བ་ཡོད་དམ་ཞེ་ན། སྨྲས་པ། མེད་དོ། །མི་དགེ་བའི་ཆོས་རྣམས་ལུང་དུ་མ་བསྟན་པའི་རྒྱུ་ལས་བྱུང་བ་ཡོད་དམ་ཞེ་ན། སྨྲས་པ། ཡོད་དེ། ཐམས་ཅད་དོ། །ལུང་དུ་མ་བསྟན་པའི་ཆོས་རྣམས་ལུང་དུ་མ་བསྟན་པའི་རྒྱུ་ལས་བྱུང་བ་ཡོད་དམ་ཞེ་ན། སྨྲས་པ། ཡོད་དེ། ལུང་དུ་མ་བསྟན་པའི་འདུས་བྱས་ཀྱི་ཆོས་རྣམས་སོ། །ལུང་དུ་མ་བསྟན་པའི་ཆོས་རྣམས་དགེ་བའི་རྒྱུ་ལས་བྱུང་བ་ཡོད་དམ་ཞེ་ན། སྨྲས་པ། ཡོད་དེ། དགེ་བའི་རྣམ་པར་སྨིན་བ་ལས་བྱུང་བའི་ཆོས་རྣམས་སོ། །ལུང་དུ་མ་བསྟན་པའི་ཆོས་རྣམས་མི་དགེ་བའི་རྒྱུ་ལས་བྱུང་བ་ཡོད་དམ་ཞེ་ན། སྨྲས་པ། ཡོད་དེ། མི་དགེ་བའི་རྣམ་པར་སྨིན་པ་ལས་བྱུང་བའི་ཆོས་རྣམས་དང༌། འདོད་པ་དང་ལྡན་པའི་འཇིག་ཚོགས་ལ་ལྟ་བ་དང༌། མཐར་འཛིན་པར་ལྟ་བ་དང་མཚུངས་

---

^{[མ་དཔེ་གཟིགས་ན་འདིར་གནོན།]}

པར་ལྡན་པའི་ཆོས་རྣམས་སོ། །ཆོས་གསུམ་ཡོད་དེ། དགེ་བའི་ཆོས་རྣམས་དང༌། མི་དགེ་བའི་ཆོས་རྣམས་དང༌། ལུང་དུ་མ་བསྟན་པའི་ཆོས་རྣམས་སོ། །དགེ་བའི་ཆོས་རྣམས་དགེ་བའི་རྒྱུ་འབའ་ཞིག་ལས་བྱུང་བ་ཡོད་དམ་ཞེ་ན། སྨྲས་པ། ཡོད་དེ། བྱང་ཆུབ་ཀྱི་ཡན་ལག་དང་མཚུངས་པར་ལྡན་པའི་སེམས་པའོ། །དགེ་བའི་ཆོས་རྣམས་མི་དགེ་བའི་རྒྱུ་འབའ་ཞིག་ལས་བྱུང་བ་ཡོད་དམ་ཞེ་ན། སྨྲས་པ། མེད་དོ། །ལུང་དུ་མ་བསྟན་པའི་རྒྱུ་འབའ་ཞིག་ལས་བྱུང་བ་ཡང་མེད་དོ། །མི་དགེ་བའི་ཆོས་རྣམས་མི་དགེ་བའི་རྒྱུ་འབའ་ཞིག་ལས་བྱུང་བ་ཡོད་དམ་ཞེ་ན། སྨྲས་པ། ཡོད་དེ། འདོད་པའི་འདོད་ཆགས་དང་བྲལ་བའི་འཕགས་པའི་གང་ཟག་འདོད་པའི་འདོད་ཆགས་དང་བྲལ་བ་དེ་ལས་ཡོངས་སུ་ཉམས་པར་གྱུར་ན་ཉོན་མོངས་པ་ཅན་གྱི་སེམས་དང་པོ་མངོན་སུམ་དུ་བྱེད་པ་གང་ཡིན་པའོ། །མི་དགེ་བའི་ཆོས་རྣམས་དགེ་བའི་རྒྱུ་འབའ་ཞིག་ལས་བྱུང་བ་ཡོད་དམ་ཞེ་ན། སྨྲས་པ། མེད་དོ། །ལུང་དུ་མ་བསྟན་བའི་རྒྱུ་འབའ་ཞིག་ལས་བྱུང་བ་ཡང་མེད་དོ། །ལུང་དུ་མ་བསྟན་པའི་ཆོས་རྣམས་ལུང་དུ་མ་བསྟན་པའི་རྒྱུ་འབའ་ཞིག་ལས་བྱུང་བ་ཡོད་དམ་ཞེ་ན། སྨྲས་པ། ཡོད་དེ། སྤྱོད་ལམ་ལས་བྱུང་བ་རྣམས་དང༌། བཟོའི་གནས་ལས་བྱུང་བ་རྣམས་དང༌། གཟུགས་དང་གཟུགས་མེད་པ་དང་ལྡན་པའི་ཉོན་མོངས་པ་ཅན་རྣམས་སོ། །ལུང་དུ་མ་བསྟན་པའི་ཆོས་རྣམས་དགེ་བའི་རྒྱུ་འབའ་ཞིག་ལས་བྱུང་བ་ཡོད་དམ་ཞེ་ན། སྨྲས་པ། མེད་དོ། །མི་དགེ་བའི་རྒྱུ་འབའ་ཞིག་ལས་བྱུང་བ་ཡང་མེད་དོ། །ཆོས་གསུམ་ཡོད་དེ། དགེ་བའི་ཆོས་རྣམས་དང༌། མི་དགེ་བའི་ཆོས་རྣམས་དང༌། ལུང་དུ་མ་བསྟན་པའི་ཆོས་རྣམས་སོ། །ཆོས་གང་དག་དགེ་བ་ཡང་ཡིན་ལ། ཆོས་དེ་དག་དགེ་བའི་རྒྱུ་ལས་བྱུང་བ་ཡིན་ནམ་ཞེ་ན། སྨྲས་པ། ཆོས་རྣམས་ལ་དགེ་བ་ཡིན་ལ། ཆོས་དེ་དག་དགེ་བའི་རྒྱུ་ལས་བྱུང་བ་ནི་མ་ཡིན་པ་ཡང་ཡོད་དོ། །ཆོས་རྣམས་ལས་དགེ་བའི་རྒྱུ་ལས་བྱུང་བ་ཡིན་ལ། དགེ་བ་མ་ཡིན་པ་དག་ཀྱང་ཡོད་དོ། །ཆོས་རྣམས་ལ་དགེ་བ་ཡང་ཡིན་ལ། ཆོས་དེ་དག་དགེ་བའི་རྒྱུ་ལས་བྱུང་བ་ཡང་ཡོད་དོ། །ཆོས་རྣམས་ལ་དགེ་བ་ཡང་མ་ཡིན་ལ། ཆོས་དེ་དག་དགེ་བའི་རྒྱུ་ལས་བྱུང་བ་མ་ཡིན་པ་ཡང་

---

^{[མ་དཔེ་གཟིགས་ན་འདིར་གནོན།]}

ཡོད་དོ། །ཆོས་རྣམས་ལ་དགེ་བ་ཡིན་ལ། ཆོས་དེ་དག་དགེ་བའི་རྒྱུ་ལས་བྱུང་བ་ནི་མ་ཡིན་པ་དེ་དག་གང་ཞེ་ན། སྨྲས་པ། སོ་སོར་བརྟགས་ཏེ་འགོག་པ་སྟེ། ཆོས་དེ་དག་ནི་དགེ་བ་ཡིན་ལ། ཆོས་དེ་དག་ནི་དགེ་བའི་རྒྱུ་ལས་བྱུང་བ་མ་ཡིན་ནོ། །ཆོས་རྣམས་ལས་དགེ་བའི་རྒྱུ་ལས་བྱུང་བ་ཡིན་ལ། ཆོས་དེ་དག་དགེ་བ་ནི་མ་ཡིན་པ་གང་ཞེ་ན། སྨྲས་པ། དགེ་བའི་རྣམ་པར་སྨིན་པ་ལས་བྱུང་བའི་ཆོས་རྣམས་ཏེ། ཆོས་དེ་དག་ནི་དགེ་བའི་རྒྱུ་ལས་བྱུང་བ་ཡིན་ལ། ཆོས་དེ་དག་ནི་དགེ་བ་མ་ཡིན་ནོ། །ཆོས་རྣམས་ལ་དགེ་བ་ཡང་ཡིན་ལ། དགེ་བའི་རྒྱ་ལས་བྱུང་བ་ཡང་ཡིན་པ་རྣམས་གང་ཞེ་ན། སྨྲས་པ། དགེ་བ་འདུས་བྱས་ཀྱི་ཆོས་རྣམས་ཏེ། ཆོས་དེ་དག་ནི་དགེ་བ་ཡང་ཡིན་ལ། དགེ་བའི་རྒྱུ་ལས་བྱུང་བ་ཡང་ཡིན་ནོ། །ཆོས་རྣམས་ལ་དགེ་བ་ཡང་མ་ཡིན། དགེ་བའི་རྒྱུ་ལས་བྱུང་བ་ཡང་མ་ཡིན་པ་གང་ཞེ་ན། སྨྲས་པ། དགེ་བའི་རྣམ་པར་སྨིན་པ་ལུང་དུ་མ་བསྟན་པའི་ཆོས་རྣམས་མ་གཏོགས་པ་དེ་མ་ཡིན་པའི་ལུང་དུ་མ་བསྟན་པའི་ཆོས་རྣམས་དང་མི་དགེ་བ་རྣམས་ཏེ། ཆོས་དེ་དག་ནི་དགེ་བ་ཡང་མ་ཡིན། དགེ་བའི་རྒྱུ་ལས་བྱུང་བ་ཡང་མ་ཡིན་ནོ། །ཆོས་གང་དག་མི་དགེ་བ་ཡིན་ལ། ཆོས་དེ་དག་མི་དགེ་བའི་རྒྱུ་ལས་བྱུང་བ་ཡང་ཡིན་པ་ཡོད་དམ་ཞེ་ན། སྨྲས་པ། ཆོས་གང་དག་མི་དགེ་བ་ཡིན་པའི་ཆོས་དེ་དག་ནི་མི་དགེ་བའི་རྒྱུ་ལས་བྱུང་བ་ཡང་ཡིན་ནོ། །ཆོས་རྣམས་ལ་མི་དགེ་བའི་རྒྱུ་ལས་བྱུང་བ་ཡིན་ལ། ཆོས་དེ་དག་མི་དགེ་བ་ཡང་མ་ཡིན་པ་ཡོད་དམ་ཞེ་ན། སྨྲས་པ། ཡོད་དེ། མི་དགེ་བའི་རྣམ་པར་སྨིན་པ་ལས་བྱུང་བའི་ཆོས་རྣམས་དང༌། འདོད་པ་དང་ལྡན་པའི་འཇིག་ཚོགས་ལ་ལྟ་བ་དང༌། མཐར་འཛིན་པར་ལྟ་བ་དང༌། མཚུངས་པར་ལྡན་པའི་ཆོས་རྣམས་སོ། །ཆོས་གང་དག་ལུང་དུ་མ་བསྟན་པ་ཡང་ཡིན་ལ། ཆོས་དེ་དག་ལུང་དུ་མ་བསྟན་བའི་རྒྱུ་ལས་བྱུང་བ་ཡང་ཡིན་པ་ཡོད་དམ་ཞེ་ན། སྨྲས་པ། ཆོས་རྣམས་ལ་ལུང་དུ་མ་བསྟན་པ་ཡང་ཡིན་ལ། ལུང་དུ་མ་བསྟན་པའི་རྒྱུ་ལས་བྱུང་བ་ཡང་ཡིན་པ་དག་ཡོད་དོ། །ལུང་དུ་མ་བསྟན་པའི་རྒྱུ་ལས་བྱུང་བ་ཡིན་ལ། ལུང་དུ་མ་བསྟན་པ་ནི་མ་ཡིན་པ་དག་ཀྱང་ཡོད་དོ། །ལུང་

---

^{[མ་དཔེ་གཟིགས་ན་འདིར་གནོན།]}

དུ་མ་བསྟན་པ་ཡང་ཡིན་ལ། ལུང་དུ་མ་བསྟན་པའི་རྒྱུ་ལས་བྱུང་བ་མ་ཡིན་པ་དག་ཀྱང་ཡོད་དོ། །ཆོས་རྣམས་ལ་ལུང་དུ་མ་བསྟན་པ་ཡང་ཡིན་ལ། ལུང་དུ་མ་བསྟན་པའི་རྒྱུ་ལས་བྱུང་བ་ཡང་མ་ཡིན་པ་དག་ཀྱང་ཡོད་དོ། །ཆོས་རྣམས་ལ་ལུང་དུ་མ་བསྟན་པ་ཡང་ཡིན་ལ། ཆོས་དེ་དག་ལུང་དུ་མ་བསྟན་པའི་རྒྱུ་ལས་བྱུང་བ་ཡང་ཡིན་པ་རྣམས་གང་ཞེ་ན། སྨྲས་པ། ནམ་མཁའ་དང་སོ་སོར་བརྟགས་ཏེ་འགོག་པ་མ་ཡིན་པ་སྟེ། ཆོས་དེ་དག་ནི་ལུང་དུ་མ་བསྟན་པ་ནི་ཡིན་ལ། ཆོས་དེ་དག་ལུང་དུ་མ་བསྟན་པའི་རྒྱུ་ལས་བྱུང་བ་ནི་མ་ཡིན་ནོ། །ཆོས་རྣམས་ལ་ལུང་དུ་མ་བསྟན་པའི་རྒྱུ་ལས་བྱུང་བ་ཡིན་ལ། ལུང་དུ་མ་བསྟན་པ་ནི་མ་ཡིན་པ་རྣམས་གང་ཞེ་ན། སྨྲས་པ། མི་དགེ་བའི་ཆོས་རྣམས་ཏེ། ཆོས་དེ་དག་ནི་ལུང་དུ་མ་བསྟན་པའི་རྒྱུ་ལས་བྱུང་བ་ཡིན་ལ། ཆོས་དེ་དག་ལུང་དུ་མ་བསྟན་པ་ནི་མ་ཡིན་ནོ། །ཆོས་རྣམས་ལ་ལུང་དུ་མ་བསྟན་པ་ཡང་ཡིན་ལ། ལུང་དུ་མ་བསྟན་པའི་རྒྱུ་ལས་བྱུང་བ་ཡིན་བ་རྣམས་གང་ཞེ་ན། སྨྲས་པ། ལུང་དུ་མ་བསྟན་པའི་འདུས་བྱས་ཀྱི་ཆོས་རྣམས་ཏེ། ཆོས་དེ་དག་ནི་ལུང་དུ་མ་བསྟན་པ་ཡང་མ་ཡིན། ལུང་དུ་མ་བསྟན་པའི་རྒྱུ་ལས་བྱུང་བ་ཡང་ཡིན་ནོ། །ཆོས་རྣམས་ལ་ལུང་དུ་མ་བསྟན་པ་ཡང་མ་ཡིན། ལུང་དུ་མ་བསྟན་པའི་རྒྱུ་ལས་བྱུང་བ་ཡང་མ་ཡིན་པ་གང་ཞེ་ན། སྨྲས་པ། དགེ་བའི་ཆོས་རྣམས་ཏེ། ཆོས་དེ་དག་ནི་ལུང་དུ་མ་བསྟན་པ་ཡང་མ་ཡིན། ལུང་དུ་མ་བསྟན་པའི་རྒྱུ་ལས་བྱུང་བ་ཡང་མ་ཡིན་ནོ། །དགེ་བའི་ལས་ཀྱི་རྣམ་པར་སྨིན་པ་དགེ་བའི་སེམས་སམ། མི་དགེ་བའི་སེམས་སམ། ལུང་དུ་མ་བསྟན་པའི་སེམས་ཀྱིས་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་དགེ་བའི་ལས་ཀྱི་རྣམ་པར་སྨིན་པས་ཚེ་རིང་བ་དང༌། མདོག་བཟང་བ་དང༌། རིགས་མཐོ་བ་དང༌། ལོངས་སྤྱོད་ཆེ་བ་དང༌། ཆེ་བར་གྲགས་པ་དང༌། ཚིག་བརྩན་པ་ཐོབ་བ་ནི་དེ་གལ་ཏེ་དགེ་བའི་སེམས་དང་ལྡན་པར་གྱུར་ན་ནི་དགེ་བའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་མི་དགེ་བའི་སེམས་དང་ལྡན་པར་གྱུར་ན་ནི་མི་དགེ་བའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་ལུང་དུ་མ་བསྟན་པའི་

---

^{[མ་དཔེ་གཟིགས་ན་འདིར་གནོན།]}

སེམས་དང་ལྡན་པར་གྱུར་པ་ན་ནི་ལུང་དུ་མ་བསྟན་པའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །མི་དགེ་བའི་ལས་ཀྱི་རྣམ་པར་སྨིན་པ་དགེ་བའི་སེམས་སམ། མི་དགེ་བའི་སེམས་སམ། ལུང་དུ་མ་བསྟན་པའི་སེམས་ཀྱིས་ཉམས་སུ་མྱོང་བ་ཡོད་དམ། ཞེ་ན། སྨྲས་པ། ཡོད་དེ། དཔེར་ན་མི་དགེ་བའི་ལས་ཀྱི་རྣམ་པར་སྨིན་པས་ཚེ་ཐུང་བ་དང༌། མདོག་ངན་པ་དང༌། རིགས་དམའ་བ་དང༌། ལོངས་སྤྱོད་ཆུང་བ་དང༌། ཆུང་བར་གྲགས་པ་དང༌། ཚིག་མི་བརྩན་པ་ཐོབ་པར་གྱུར་པ་ན་དེ་གལ་ཏེ་དགེ་བའི་སེམས་དང་ལྡན་པར་གྱུར་ན་ནི་དགེ་བའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་མི་དགེ་བའི་སེམས་དང་ལྡན་པར་གྱུར་ན་ནི། མི་དགེ་བའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་ལུང་དུ་མ་བསྟན་པའི་སེམས་དང་ལྡན་པར་གྱུར་ན་ནི་ལུང་དུ་མ་བསྟན་པའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དགེ་བ་དང་མི་དགེ་བའི་ལས་ཀྱི་རྣམ་པར་སྨིན་པ་དགེ་བའི་སེམས་སམ། མི་དགེ་བའི་སེམས་སམ། ལུང་དུ་མ་བསྟན་པའི་སེམས་ཀྱིས་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་དགེ་བའི་ལས་ཀྱི་རྣམ་པར་སྨིན་པས་ཚེ་རིང་བ་དང༌། མདོག་བཟང་པ་དང༌། རིགས་མཐོ་བ་ཐོབ་པར་གྱུར་ལ། མི་དགེ་བའི་ལས་ཀྱི་རྣམ་པར་སྨིན་པས་ལོངས་སྤྱོད་ཆུང་བ་དང༌། ཆུང་བར་གྲགས་པ་དང༌། ཚིག་མི་བརྩན་པ་ཐོབ་པར་གྱུར་ཏམ། ཡང་ན་མི་དགེ་བའི་རྣམ་པར་སྨིན་པས་ཚེ་ཐུང་བ་དང༌། མདོག་ངན་པ་དང༌། རིགས་དམའ་བ་ཐོབ་པར་གྱུར་ལ། དགེ་བའི་ལས་ཀྱི་རྣམ་པར་སྨིན་པས་ལོངས་སྤྱོད་ཆེ་བ་དང༌། ཆེ་བར་གྲགས་པ་དང༌། ཚིག་བརྩན་པ་ཐོབ་པར་གྱུར་པ་ན་དེ་གལ་ཏེ་དགེ་བའི་སེམས་པ་དང་ལྡན་པར་གྱུར་ན་ནི་དགེ་བའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་མི་དགེ་བའི་སེམས་དང་ལྡན་པར་གྱུར་ན་ནི་མི་དགེ་བའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་ལུང་དུ་མ་བསྟན་པའི་སེམས་དང་ལྡན་པར་གྱུར་ན་ནི་ལུང་དུ་མ་བསྟན་པའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དགེ་བའི་རྣམ་པར་སྨིན་པ་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པ་དང༌། བསྒོམ་

---

^{[མ་དཔེ་གཟིགས་ན་འདིར་གནོན།]}

བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པ་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་དགེ་བའི་ལས་ཀྱི་རྣམ་པར་སྨིན་པས། ཚེ་རིང་བ་དང༌། མདོག་བཟང་བ་དང༌། རིགས་མཐོ་བ་དང༌། ལོངས་སྤྱོད་ཆེ་བ་དང༌། ཆེ་བར་གྲགས་པ་དང༌། ཚིག་བརྩན་པ་ཐོབ་པར་གྱུར་ལ། དེ་གལ་ཏེ་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པར་གྱུར་ན་ནི་དེས་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པར་གྱུར་ན་ནི་དེས་བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་རྣམ་པར་སྨིན་པ་ཉམས་སུ་མྱོང་ངོ༌། །མི་དགེ་བའི་ལས་ཀྱི་རྣམ་པར་སྨིན་པ་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་དང༌། བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་མི་དགེ་བའི་ལས་ཀྱི་རྣམ་པར་སྨིན་པས་ཚེ་ཐུང་བ་དང༌། མདོག་ངན་པ་དང༌། རིགས་དམའ་བ་དང༌། ལོངས་སྤྱོད་ཆུང་བ་དང༌། ཆུང་བར་གྲགས་པ་དང༌། ཚིག་མི་བརྩན་པ་ཐོབ་པར་གྱུར་པ་ན། དེ་གལ་ཏེ་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པར་གྱུར་ན་ནི་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པར་གྱུར་ན་ནི་དེས་བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་རྣམ་པར་སྨིན་པ་ཉམས་སུ་མྱོང་ངོ༌། །དགེ་བ་དང་མི་དགེ་བའི་ལས་ཀྱི་རྣམ་པར་སྨིན་པ་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པ་དང༌། བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་མྱོང་བར་འགྱུར་བ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་དགེ་བའི་ལས་ཀྱི་རྣམ་པར་སྨིན་པས་ཚེ་རིང་བ་དང༌། མདོག་བཟང་བ་དང༌། རིགས་མཐོ་བ་ཐོབ་པར་གྱུར་ལ། མི་དགེ་བའི་ལས་ཀྱི་རྣམ་པར་སྨིན་པས་ལོངས་སྤྱོད་ཆུང་བ་དང༌། ཆུང་

---

^{[མ་དཔེ་གཟིགས་ན་འདིར་གནོན།]}

བར་གྲགས་པ་དང༌། ཚིག་མི་བརྩན་པ་ཐོབ་པར་གྱུར་ཏམ། ཡང་ན་མི་དགེ་བའི་ལས་ཀྱི་རྣམ་པར་སྨིན་པས་ཚེ་ཐུང་བ་དང༌། མདོག་ངན་པ་དང༌། རིགས་དམའ་བ་ཐོབ་པར་གྱུར་ལ། དགེ་བའི་ལས་ཀྱི་རྣམ་པར་སྨིན་པས་ལོངས་སྤྱོད་ཆེ་བ་དང༌། ཆེ་བར་གྲགས་པ་དང༌། ཚིག་བརྩན་པ་ཐོབ་པར་གྱུར་པ་ན། དེ་གལ་ཏེ་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པར་གྱུར་ན་ནི་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པར་གྱུར་ན་ནི་བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་རྣམ་པར་སྨིན་པ་ཉམས་སུ་མྱོང་ངོ༌། །མཐོང་བས་སྤང་བར་བྱ་བའི་ལས་ཀྱི་རྣམ་པར་སྨིན་པ་དགེ་བའི་སེམས་སམ། མི་དགེ་བའི་སེམས་སམ། ལུང་དུ་མ་བསྟན་པའི་སེམས་ཀྱིས་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་མཐོང་བས་སྤང་བར་བྱ་བའི་ལས་ཀྱི་རྣམ་པར་སྨིན་པས་ཚེ་ཐུང་བ་དང༌། མདོག་ངན་པ་དང༌། རིགས་དམའ་བ་དང༌། ལོངས་སྤྱོད་ཆུང་བ་དང༌། ཆུང་བར་གྲགས་པ་དང༌། ཚིག་མི་བརྩན་པ་ཐོབ་པ་ན། དེ་གལ་ཏེ་དགེ་བའི་སེམས་དང་ལྡན་པར་གྱུར་ན་ནི་དགེ་བའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་མི་དགེ་བའི་སེམས་དང་ལྡན་པར་གྱུར་ན་ནི་མི་དགེ་བའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་ལུང་དུ་མ་བསྟན་པའི་སེམས་དང་ལྡན་པར་གྱུར་ན་ནི་ལུང་དུ་མ་བསྟན་པའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །བསྒོམ་པས་སྤང་བར་བྱ་བའི་ལས་ཀྱི་རྣམ་པར་སྨིན་པ་དགེ་བའི་སེམས་སམ། མི་དགེ་བའི་སེམས་སམ། ལུང་དུ་མ་བསྟན་པའི་སེམས་ཀྱིས་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་བསྒོམ་པས་སྤང་བར་བྱ་བའི་མི་དགེ་བའི་ལས་ཀྱི་རྣམ་པར་སྨིན་པས་ཚེ་ཐུང་བ་དང༌། མདོག་ངན་པ་དང༌། རིགས་དམའ་བ་ཐོབ་པར་གྱུར་ལ། དགེ་བའི་ལས་ཀྱི་རྣམ་པར་སྨིན་པས་ལོངས་སྤྱོད་ཆེ་བ་དང༌། ཆེ་བར་གྲགས་པ་དང༌། ཚིག་བརྩན་པ་ཐོབ་པར་གྱུར་ཏམ། ཡང་ན་དགེ་བའི་ལས་ཀྱི་རྣམ་པར་སྨིན་པས་ཚེ་རིང་བ་དང༌། མདོག་

---

^{[མ་དཔེ་གཟིགས་ན་འདིར་གནོན།]}

བཟང་བ་དང༌། རིགས་མཐོ་བ་ཐོབ་པར་གྱུར་ལ། བསྒོམ་པས་སྤང་བར་བྱ་བའི་ལས་ཀྱི་རྣམ་པར་སྨིན་པས་ལོངས་སྤྱོད་ཆུང་བ་དང༌། ཆུང་བར་གྲགས་པ་དང༌། ཚིག་མི་བརྩན་པ་ཐོབ་པར་གྱུར་པ་ན། དེ་གལ་ཏེ་དགེ་བའི་སེམས་དང་ལྡན་པར་གྱུར་ན་ནི་དགེ་བའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་མི་དགེ་བའི་སེམས་དང་ལྡན་པར་གྱུར་ན་ནི་མི་དགེ་བའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་ལུང་དུ་མ་བསྟན་པའི་སེམས་དང་ལྡན་པར་གྱུར་ན་ནི་ལུང་དུ་མ་བསྟན་པའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །མཐོང་བས་སྤང་བར་བྱ་བ་དང༌། བསྒོམ་པས་སྤང་བར་བྱ་བའི་ལས་ཀྱི་རྣམ་པར་སྨིན་པ་དགེ་བའི་སེམས་སམ། མི་དགེ་བའི་སེམས་སམ། ལུང་དུ་མ་བསྟན་པའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་མཐོང་བས་སྤང་བར་བྱ་བ་དང༌། བསྒོམ་པས་སྤང་བར་བྱ་བའི་མི་དགེ་བའི་ལས་ཀྱི་རྣམ་པར་སྨིན་པས་ཚེ་ཐུང་བ་དང༌། མདོག་ངན་པ་དང༌། རིགས་དམའ་བ་ཐོབ་པར་གྱུར་ལ། དགེ་བའི་ལས་ཀྱི་རྣམ་པར་སྨིན་པས་ལོངས་སྤྱོད་ཆེ་བ་དང༌། ཆེ་བར་གྲགས་པ་དང༌། ཚིག་བརྩན་པ་ཐོབ་པར་གྱུར་ཏམ། ཡང་ན་དགེ་བའི་ལས་ཀྱི་རྣམ་པར་སྨིན་པས་ཚེ་རིང་བ་དང༌། མདོག་བཟང་བ་དང༌། རིགས་མཐོ་བ་ཐོབ་པར་གྱུར་ལ་མཐོང་བས་སྤང་བར་བྱ་བ་དང༌། བསྒོམ་པས་སྤང་བར་བྱ་བའི་མི་དགེ་བའི་ལས་ཀྱི་རྣམ་པར་སྨིན་པས་ལོངས་སྤྱོད་ཆུང་བ་དང༌། ཆུང་བར་གྲགས་པ་དང༌། ཚིག་མི་བརྩན་པ་ཐོབ་པར་གྱུར་པ་ན། དེ་གལ་ཏེ་དགེ་བའི་སེམས་དང་ལྡན་པར་གྱུར་ན་ནི་དགེ་བའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་མི་དགེ་བའི་སེམས་དང་ལྡན་པར་གྱུར་ན་ནི་མི་དགེ་བའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་ལུང་དུ་མ་བསྟན་པའི་སེམས་དང་ལྡན་པར་གྱུར་ན་ནི་ལུང་དུ་མ་བསྟན་པའི་སེམས་ཀྱིས་རྣམ་པར་སྨིན་པ་ཉམས་སུ་མྱོང་ངོ༌། །མཐོང་བས་སྤང་བར་བྱ་བའི་ལས་ཀྱི་རྣམ་པར་སྨིན་པ་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པ་དང༌། བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་ཉམས་སུ་མྱོང་བ་ཡོད་དམ་ཞེ་ན། སྨྲས་

---

^{[མ་དཔེ་གཟིགས་ན་འདིར་གནོན།]}

པ། ཡོད་དེ། དཔེར་ན་མཐོང་བས་སྤང་བར་བྱ་བའི་མི་དགེ་བའི་ལས་ཀྱི་རྣམ་པར་སྨིན་པས་ཚེ་ཐུང་བ་དང༌། མདོག་ངན་པ་དང༌། རིགས་དམའ་བ་དང༌། ལོངས་སྤྱོད་ཆུང་བ་དང༌། ཆུང་བར་གྲགས་པ་དང༌། ཚིག་མི་བརྩན་པ་ཐོབ་པར་འགྱུར་པ་ན། དེ་གལ་ཏེ་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པར་གྱུར་ན་ནི་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པར་གྱུར་ན་ནི་བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་རྣམ་པར་སྨིན་པ་ཉམས་སུ་མྱོང་ངོ༌། །བསྒོམ་པས་སྤང་བར་བྱ་བའི་ལས་ཀྱི་རྣམ་པར་སྨིན་པ་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པ་དང༌། བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་བསྒོམ་པས་སྤང་བར་བྱ་བའི་མི་དགེ་བའི་ལས་ཀྱི་རྣམ་པར་སྨིན་པས་ཚེ་ཐུང་བ་དང༌། མདོག་ངན་པ་དང༌། རིགས་དམའ་བར་གྱུར་ལ། དགེ་བའི་ལས་ཀྱི་རྣམ་པར་སྨིན་པས་ལོངས་སྤྱོད་ཆེ་བ་དང༌། ཆེ་བར་གྲགས་པ་དང། ཚིག་བརྩན་པ་ཐོབ་པར་གྱུར་ཏམ། ཡང་ན་དགེ་བའི་ལས་ཀྱི་རྣམ་པར་སྨིན་པས་ཚེ་རིང་བ་དང༌། མདོག་བཟང་བ་དང༌། རིགས་མཐོ་བ་ཐོབ་པར་གྱུར་ལ། བསྒོམ་པས་སྤང་བར་བྱ་བའི་མི་དགེ་བའི་ལས་ཀྱི་རྣམ་པར་སྨིན་པས་ལོངས་སྤྱོད་ཆུང་བ་དང༌། ཆུང་བར་གྲགས་པ་དང༌། ཚིག་མི་བརྩན་པ་ཐོབ་པར་གྱུར་ན། དེ་གལ་ཏེ་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པར་གྱུར་ན་ནི། མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་བསྒོམ་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པར་གྱུར་ན་ནི་བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་རྣམ་པར་སྨིན་པ་ཉམས་སུ་མྱོང་ངོ༌། །མཐོང་བས་སྤང་བར་བྱ་བའི་ལས་ཀྱི་རྣམ་པར་སྨིན་པ་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པ་དང༌། བསྒོམ་པས་སྤང་བར་བྱ་བའི་ཀུན་ནས་

---

^{[མ་དཔེ་གཟིགས་ན་འདིར་གནོན།]}

དཀྲིས་པས་ཀུན་ནས་དཀྲིས་པས་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཡོད་དེ། དཔེར་ན་མཐོང་བས་སྤང་བར་བྱ་བ་དང༌། བསྒོམ་པས་སྤང་བར་བྱ་བའི་མི་དགེ་བའི་ལས་ཀྱི་རྣམ་པར་སྨིན་པས་ཚེ་ཐུང་བ་དང༌། མདོག་ངན་པ་དང༌། རིགས་དམའ་བ་ཐབ་པར་གྱུར་ལ། དགེ་བའི་ལས་ཀྱི་རྣམ་པར་སྨིན་པས་ལོངས་སྤྱོད་ཆེ་བ་དང༌། ཆེ་བར་གྲགས་པ་དང༌། ཚིག་བརྩན་པ་ཐོབ་པར་གྱུར་ཏམ། ཡང་ན་དགེ་བའི་ལས་ཀྱི་རྣམ་པར་སྨིན་པས་ཚེ་རིང་བ་དང༌། མདོག་བཟང་བ་དང༌། རིགས་མཐོ་བ་ཐོབ་པར་གྱུར་ལ། མཐོང་བས་སྤང་བར་བྱ་བ་དང༌། བསྒོམ་པས་སྤང་བར་བྱ་བའི་མི་དགེ་བའི་ལས་ཀྱི་རྣམ་པར་སྨིན་པས་ལོངས་སྤྱོད་ཆུང་བ་དང༌། ཚེ་ཐུང་བ་དང༌། ཚིག་མི་བརྩན་པ་ཐོབ་པར་གྱུར་པ་ན། དེ་གལ་ཏེ་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པར་གྱུར་ན་ནི་མཐོང་བས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་རྣམ་པར་སྨིན་པ་ཉམས་སུ་མྱོང་ངོ༌། །དེ་སྟེ་བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པར་གྱུར་ན་ནི་བསྒོམ་པས་སྤང་བར་བྱ་བའི་ཀུན་ནས་དཀྲིས་པས་ཀུན་ནས་དཀྲིས་པས་རྣམ་པར་སྨིན་པ་ཉམས་སུ་མྱོང་ངོ༌། །ལས་གདགས་པ་ཚིགས་དགུ་པའོ།། །།སྡོམ་ནི། རྩ་བ་ཟད་དང་ཟག་བཅས་དང༌། །ཁ་ན་མ་ཐོ་བཅས་དང་གནག །ཆོས་ཀྱི་སྒོ་ནས་གསུམ་དུ་བྱ། །སྐྱེ་བ་ལས་ནི་གཉིས་སུ་བྱ། །ལས་རྩ་བ་ཟད་པས་ཟད་པར་འགྱུར་ལ། རྣམ་པར་སྨིན་པ་ཟད་པས་ཟད་པར་མི་འགྱུར་བ་ཡོད་དམ། རྣམ་པར་སྨིན་པ་ཟད་པས་ཟད་པར་འགྱུར་ལ། རྩ་བ་ཟད་པས་ཟད་པར་མི་འགྱུར་བ་ཡོད་དམ། རྩ་བ་ཡང་ཟད་ལ་རྣམ་པར་སྨིན་པ་ཡང་ཟད་པས་ཟད་པར་འགྱུར་བ་ཡོད་དམ། ལས་རྩ་བ་ཡང་ཟད་ལ་རྣམ་པར་སྨིན་པ་ཡང་ཟད་པས་ཀྱང་ཟད་པར་མི་འགྱུར་བ་ཡོད་དམ་ཞེ་ན། སྨྲས་པ། ཡོད་དེ། ལས་རྩ་བ་ཟད་པས་ཟད་པར་འགྱུར་ལ། རྣམ་པར་སྨིན་པ་ཟད་པས་ཟད་པར་མི་འགྱུར་བ་གང་ཞེ་ན། སྨྲས་པ། དགེ་བའི་རྩ་བ་ཆད་པའི་གང་ཟག་གི་ལས་དགེ་བ་ཟག་པ་དང་བཅས་པ་རྣམ་པར་སྨིན་པ་མ་སྨིན་པ་གང་ཡིན་པ་དང༌། དགེ་བའི་རྩ་བ་ཆད་པའི་གང་ཟག་གི་ལས་མི་དགེ་བ་རྣམ་པར་སྨིན་པ་མ་སྨིན་པ་གང་ཡིན་པ་སྟེ། འདི་ནི་ལས་རྩ་བ་ཟད་པར་འགྱུར་ལ། རྣམ་པར་སྨིན་པ་

---

^{[མ་དཔེ་གཟིགས་ན་འདིར་གནོན།]}

ཟད་པས་ཟད་པར་མི་འགྱུར་བའོ། །ལས་རྣམ་པར་སྨིན་པ་ཟད་པས་ཟད་པར་འགྱུར་ལ། རྩ་བ་ཟད་པས་ཟད་པར་མི་འགྱུར་བ་གང་ཞེ་ན། སྨྲས་པ། དགེ་བའི་རྩ་བ་ཆད་པའི་གང་ཟག་གི་ལས་མི་དགེ་བ་རྣམ་པར་སྨིན་པ་སྨིན་ཟིན་པ་གང་ཡིན་པ་དང༌། དགེ་བའི་རྣ་བ་ཆད་པའི་གང་ཟག་གི་ལས་དགེ་བ་ཟག་པ་དང་བཅས་པ་རྣམ་པར་སྨིན་པ་སྨིན་ཟིན་པ་གང་ཡིན་པ་སྟེ། འདི་ནི་ལས་རྣམ་པར་སྨིན་པ་ཟད་པས་ཟད་པར་འགྱུར་ལ། རྩ་བ་ཟད་པས་ཟད་པར་མི་འགྱུར་བའོ། །ལས་རྩ་བ་ཡང་ཟད་ལ་རྣམ་པར་སྨིན་པ་ཡང་ཟད་པར་འགྱུར་བ་གང་ཞེ་ན། སྨྲས་པ། དགེ་བའི་རྩ་པ་ཆད་པའི་གང་ཟག་གི་ལས་དགེ་བ་ཟག་པ་དང་བཅས་པ་རྣམ་པར་སྨིན་པ་སྨིན་ཟིན་པ་གང་ཡིན་པ་དང༌། དག་བའི་རྩ་བ་ཆད་པའི་གང་ཟག་གི་ལས་རྣམ་པར་སྨིན་པ་མ་སྨིན་པ་གང་ཡིན་པ་སྟེ། འདི་ནི་ལས་རྩ་བ་ཡང་ཟད་ལ་རྣམ་པར་སྨིན་པ་ཡང་ཟད་པས་ཟད་པར་འགྱུར་བའོ། །ལས་རྩ་པ་ཡང་ཟད་ལ་རྣམ་པར་སྨིན་པ་ཡང་ཟད་པས་ཀྱང་ཟད་པར་མི་འགྱུར་བ་གང་ཞེ་ན། སྨྲས་པ། དགེ་བའི་རྩ་བ་ཆད་པའི་གང་ཟག་གི་ལས་མི་དགེ་བ་རྣམ་པར་སྨིན་པ་མ་སྨིན་པ་གང་ཡིན་པ་དང༌། དགེ་བའི་རྩ་བ་ཆད་པའི་གང་ཟག་གི་ལས་དགེ་བ་རྣམ་པར་སྨིན་པ་མ་སྨིན་པ་གང་ཡིན་པ་སྟེ། འདི་ནི་ལས་རྩ་བ་ཡང་ཟད་ལ་རྣམ་པར་སྨིན་པ་ཡང་ཟད་པས་ཀྱང་ཟད་པར་མི་འགྱུར་བའོ། །ལས་ཡོངས་སུ་ཤེས་པས་ཟད་པར་འགྱུར་ལ། རྣམ་པར་སྨིན་པ་ཟད་པས་ཟད་པར་མི་འགྱུར་བ་ཡོད་དམ། རྣམ་པར་སྨིན་པ་ཟད་པས་ཟད་པར་འགྱུར་ལ། ཡོངས་སུ་ཤེས་པས་ཟད་པར་མི་འགྱུར་བ་ཡོད་དམ། ཡོངས་སུ་ཤེས་ལ་རྣམ་པར་སྨིན་པ་ཡང་ཟད་པས་ཟད་པར་འགྱུར་བ་ཡོད་དམ། ལས་ཡོངས་སུ་ཤེས་ལ་རྣམ་པར་སྨིན་པ་ཡང་ཟད་པས་ཀྱང་ཟད་པར་མི་འགྱུར་བ་ཡོད་དམ་ཞེ་ན། སྨྲས་པ། ཡོད་དེ། ལས་ཡོངས་སུ་ཤེས་པས་ཟད་པར་འགྱུར་ལ་རྣམ་པར་སྨིན་པ་ཟད་པས་ཟད་པར་མི་འགྱུར་བ་གང་ཞེ་ན། སྨྲས་པ། དགྲ་བཅོམ་པ་དང་ཕྱིར་མི་འོང་བའི་ལས་མི་དགེ་བ་དང༌། དགེ་བ་ཟག་པ་དང་བཅས་པ་རྣམ་པར་སྨིན་པ་མ་སྨིན་པ་གང་ཡིན་པ་སྟེ། འདི་ནི་ལས་ཡོངས་སུ་ཤེས་པ་ཟད་པས་ཟད་པར་འགྱུར་ལ། རྣམ་པར་སྨིན་པ་ཟད་པས་ཟད་

---

^{[མ་དཔེ་གཟིགས་ན་འདིར་གནོན།]}

པར་མི་འགྱུར་བའོ། །ལས་རྣམ་པར་སྨིན་པ་ཟད་པས་ཟད་པར་འགྱུར་ལ། ཡོངས་སུ་ཤེས་པས་ཟད་པར་མི་འགྱུར་བ་གང་ཞེ་ན། སྨྲས་པ། འཆིང་བ་ཐམས་ཅད་དང་ལྡན་པའི་གང་ཟག་གི་ལས་མི་དགེ་བ་དང༌། དགེ་བ་ཟག་པ་དང་བཅས་པ་རྣམ་པར་སྨིན་པ་སྨིན་ཟིན་པ་གང་ཡིན་པ་སྟེ། འདི་ནི་ལས་རྣམ་པར་སྨིན་པ་ཟད་པས་ཟད་པར་འགྱུར་ལ། ཡོངས་སུ་ཤེས་པས་ཟད་པར་མི་འགྱུར་བའོ། །ལས་ཡོངས་སུ་ཤེས་ལ་རྣམ་པར་སྨིན་པས་ཡང་ཟད་པར་འགྱུར་བ་གང་ཞེ་ན། སྨྲས་པ། དགྲ་བཅོམ་པ་དང་ཕྱིར་མི་འོང་བའི་ལས་མི་དགེ་བ་དང༌། དགེ་བ་ཟག་པ་དང་བཅས་པ་རྣམ་པར་སྨིན་པ་སྨིན་ཟིན་པ་གང་ཡིན་པ་སྟེ། འདི་ནི་ལས་ཡོངས་སུ་ཤེས་ལ། རྣམ་པར་སྨིན་པ་ཡང་ཟད་པས་ཟད་པར་འགྱུར་བའོ། །ལས་ཡོངས་སུ་ཤེས་ལ་རྣམ་པར་སྨིན་པ་ཡང་ཟད་པས་ཀྱང་ཟད་པར་མི་འགྱུར་བ་གང་ཞེ་ན། སྨྲས་པ། འཆིང་བ་ཐམས་ཅད་དང་ལྡན་པའི་གང་ཟག་གི་ལས་མི་དགེ་བ་དང༌། དགེ་བ་ཟག་པ་དང་བཅས་པའི་རྣམ་པར་སྨིན་པ་དང་མ་སྨིན་པ་གང་ཡིན་པ་སྟེ། འདི་ནི་ལས་ཡོངས་སུ་ཤེས་ལ། རྣམ་པར་སྨིན་པ་ཡང་ཟད་པས་ཀྱང་ཟད་པར་མི་འགྱུར་བའོ། །ཟག་པ་དང་བཅས་པའི་ལས་ཀྱི་ཟག་པ་དང་བཅས་པའི་འབྲས་བུ་ཡོད་དམ་ཞེ་ན། སྨྲས་པ། ཡོད་དེ། རྒྱུ་དང་མཐུན་པའི་འབྲས་བུ་དང༌། རྣམ་པར་སྨིན་པའི་འབྲས་བུའོ། །ཟག་པ་དང་བཅས་པའི་ལས་ཀྱི་ཟག་པ་མེད་པའི་འབྲས་བུ་ཡོད་དམ་ཞེ་ན། སྨྲས་པ། ཡོད་དེ། བྲལ་བའི་འབྲས་བུའོ། །ཟག་པ་དང་བཅས་པའི་ལས་ཀྱི་ཟག་པ་དང་བཅས་པ་དང༌། ཟག་པ་མེད་པའི་འབྲས་བུ་ཡོད་དམ་ཞེ་ན། སྨྲས་པ། ཡོད་དེ། རྒྱུ་དང་མཐུན་པའི་འབྲས་བུ་དང༌། རྣམ་པར་སྨིན་པའི་འབྲས་བུ་དང་བྲལ་བའི་འབྲས་བུའོ། །ཟག་པ་མེད་པའི་ལས་ཀྱི་ཟག་པ་མེད་པའི་འབྲས་བུ་ཡོད་དམ་ཞེ་ན། སྨྲས་པ། ཡོད་དེ། རྒྱུ་དང་མཐུན་པའི་འབྲས་བུ་དང༌། བྲལ་བའི་འབྲས་བུའོ། །ཟག་པ་མེད་པའི་ལས་ཀྱི་ཟག་པ་དང་བཅས་པའི་འབྲས་བུ་ཡོད་དམ་ཞེ་ན། སྨྲས་པ། མེད་དོ། །ཟག་པ་དང་བཅས་པའི་ལས་ཀྱི་ཟག་པ་དང་བཅས་པ་དང༌། ཟག་བ་མེད་བའི་འབྲས་བུ་ཡོད་དམ་ཞེ་ན། སྨྲས་པ། མེད་དོ། །ཟག་པ་དང་བཅས་པ་དང་ཟག་པ་མེད་པའི་ལས་ཀྱི་ཟག་པ་དང་བཅས་པའི་ལས་ཀྱི་

---

^{[མ་དཔེ་གཟིགས་ན་འདིར་གནོན།]}

འབྲས་བུ་ཡོད་དམ་ཞེ་ན། སྨྲས་པ། མེད་དོ། །ཟག་པ་དང་བཅས་པ་དང༌། ཟག་པ་མེད་པའི་ལས་ཀྱི་ཟག་པ་མེད་པའི་འབྲས་བུ་ཡོད་དམ་ཞེ་ན། སྨྲས་པ། ཡོད་དེ། བྲལ་བའི་འབྲས་བུའོ། །ཁ་ན་མཐོ་བ་དང་བཅས་པའི་ལས་ཀྱིས་སྐྱེས་ལ། ཁ་ན་མ་ཐོ་བ་དང་བཅས་པ་ཉིད་ཀྱི་ལས་ཀྱི་རྣམ་པར་སྨིན་པ་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཉམས་སུ་མྱོང་བ་ཡོད་དེ། གླང་པོ་ཆེའི་རྒྱལ་པོས་སྲུང་གི་བུ་དང༌། གླང་པོ་ཆེའི་རྒྱལ་པོ་རབ་བརྟན་དང༌། རྒྱལ་པོ་གཤིན་རྗེ་ལྟ་བུའོ། །ཁ་ན་མ་ཐོ་བ་དང་བཅས་པའི་ལས་ཀྱི་སྐྱེས་ལ། གནོད་པ་དང་བཅས་པ་དང་གནོད་པ་མེད་པའི་ལས་ཀྱི་རྣམ་པར་སྨིན་པ་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཉམས་སུ་མྱོང་བ་ཡོད་དེ། གླང་པོ་ཆེ་ཅང་ཤེས་སྐྱིད་དེ་བར་འདུག་པ་དང༌། རྟ་ཅང་ཤེས་སྐྱིད་དེ་བར་འདུག་པ་ལས་དང་པོ་ཁ་ལྕགས་ལ་སོགས་པའི་གནོད་པས་གནོད་པར་བྱ་བ་གང་ཡིན་པ་དེ་ནི་གནོད་པ་དང་བཅས་པའི་ལས་ཀྱི་འབྲས་བུའོ། །ཕྱིས་དུལ་ཞིང་བྱ་བར་གྱུར་ནས་གླང་པོ་ཆེའི་རྒྱན་རྣམས་དང༌། རྟའི་རྒྱན་རྣམས་དང༌། བཟའ་བ་དང༌། བཏུང་བ་དང་ཆས་ལ་སོགས་པ་ཐོབ་པ་གང་ཡིན་པ་དེ་ནི་གནོད་པ་མེད་པའི་ལས་ཀྱི་འབྲས་བུའོ། །གནོད་པ་མེད་པའི་ལས་ཀྱིས་སྐྱེས་ལ། གནོད་པ་མེད་པ་ཉིད་ཀྱི་ལས་རྣམ་པར་སྨིན་པ་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཉམས་སུ་མྱོང་བ་ཡོད་དེ། གཟུགས་དང་གཟུགས་མེད་པ་ན་སྤྱོད་པའི་ལྷ་ཐམས་ཅད་དང༌། མི་ཁ་ཅིག་དང༌། འདོད་པ་ན་སྤྱོད་པའི་ལྷ་ཁ་ཅིག་གོ །གནོད་པ་མེད་པའི་ལས་ཀྱིས་སྐྱེས་ལ། གནོད་པ་དང་བཅས་པའི་ལས་ཀྱི་རྣམ་པར་སྨིན་པ་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཉམས་སུ་མྱོང་བ་ཡོད་དེ། དཔེར་ན་མི་ཁ་ཅིག་དང༌། འདོད་པ་ན་སྤྱོད་པའི་ལྷ་ཁ་ཅིག་གནོད་པ་དང་བཅས་པའི་ལས་ཀྱི་རྣམ་པར་སྨིན་པས་ཚེ་ཐུང་བ་དང༌། མདོག་ངན་པ་དང༌། རིགས་དམའ་བ་དང༌། ལོངས་སྤྱོད་ཆུང་བ་དང༌། ཆུང་བར་གྲགས་པ་དང། ཚིག་མི་བརྩན་པ་ཐོབ་པར་གྱུར་པ་ལྟ་བུའོ། །གནོད་པ་མེད་པའི་ལས་ཀྱིས་སྐྱེས་ལ། གནོད་པ་དང་བཅས་པ་དང༌། གནོད་པ་མེད་པའི་ལས་ཀྱི་རྣམ་པར་སྨིན་པ་ཉམས་སུ་མྱོང་བ་ཡོད་དམ་ཞེ་ན། སྨྲས་པ། ཉམས་སུ་མྱོང་བ་ཡོད་དེ། དཔེར་ན་མི་ཁ་ཅིག་དང༌། འདོད་པ་ན་སྤྱོད་པའི་ལྷ་ཁ་

---

^{[མ་དཔེ་གཟིགས་ན་འདིར་གནོན།]}

ཅིག་གནོད་པ་དང་བཅས་པའི་ལས་ཀྱི་རྣམ་པར་སྨིན་པས་ཚེ་ཐུང་བ་དང༌། མདོག་ངན་པ་དང༌། རིགས་དམའ་བ་ཐོབ་པར་གྱུར་ལ། ཁ་ན་མ་ཐོ་བ་མེད་པའི་ལས་ཀྱི་རྣམ་པར་སྨིན་པས་ལོངས་སྤྱོད་ཆེ་བ་དང༌། ཆེ་བར་གྲགས་པ་དང༌། ཚིག་བརྩན་པ་ཐོབ་པར་གྱུར་ཏམ། ཡང་ན་གནོད་པ་མེད་པའི་ལས་ཀྱི་རྣམ་པར་སྨིན་པས་ཚེ་རིང་བ་དང༌། མདོག་བཟང་བ་དང༌། རིགས་མཐོ་བ་ཐོབ་པར་གྱུར་ལ། ཁ་ན་མ་ཐོ་བ་དང་བཅས་པའི་ལས་ཀྱི་རྣམ་པར་སྨིན་པས་ལོངས་སྤྱོད་ཆུང་བ་དང༌། ཆུང་བར་གྲགས་པ་དང༌། ཚིག་མི་བརྩན་པ་ཐོབ་པར་གྱུར་པ་ལྟ་བུའོ། །གླེང་གཞི་ནི་མཉན་དུ་ཡོད་པ་ན་བཞུགས་སོ། །ལས་ནི་བཞི་སྟེ། བཞི་གང་ཞེ་ན། ལས་ཀྱང་གནག་ལ་རྣམ་པར་སྨིན་པ་ཡང་གནག་པ་ཡང་ཡོད་དོ། །ལས་ཀྱང་དཀར་ལ་རྣམ་པར་སྨིན་པ་ཡང་དཀར་བ་ཡང་ཡོད་དོ། །ལས་ཀྱང་དཀར་གནག་འདྲེས་ལ་རྣམ་པར་སྨིན་པ་ཡང་དཀར་གནག་འདྲེས་པ་ཡང་ཡོད་དོ། །ལས་གནག་པ་ཡང་མ་ཡིན་དཀར་བ་ཡང་མ་ཡིན་རྣམ་པར་སྨིན་པ་ཡང་མེད་པ་ཡང་ཡོད་དོ། །ལས་ཐམས་ཅད་ཟད་པར་འགྱུར་ཞེས་བྱ་བ་ནས་རྒྱས་པར་ཡང་དག་པར་འགྲོ་བའི་རྣམ་གྲངས་ལས་ཇི་སྐད་འབྱུང་བ་བཞིན་དུ་བརྗོད་པར་བྱའོ། །ཆོས་ཡང་དག་པར་བླང་བ་ནི་བཞི་སྟེ། བཞི་གང་ཞེ་ན། ཆོས་ཡང་དག་པར་བླང་བ་ད་ལྟར་བྱུང་བ་དེ་ལ་ཕྱི་མ་ལ་རྣམ་པར་སྨིན་པ་སྡུག་བསྔལ་བ་ཞེས་བྱ་བ་ནས། རྒྱས་པར་ཡང་དག་པར་འགྲོ་བའི་རྣམ་གྲངས་ལས་ཇི་སྐད་འབྱུང་བ་བཞིན་དུ་སྦྱར་རོ། །གཞན་ཡང་ཆོས་ཡང་དག་པར་བླང་བ་བཞི་སྟེ། བཞི་གང་ཞེ་ན། ཆོས་ཡང་དག་པར་བླང་བ་ཡིད་དུ་འོང་བས་དཀར་བས་དཀར་ལ་རྣམ་པར་སྨིན་པ་དཀར་བས་དཀར་བ་མ་ཡིན་པ་ཡང་ཡོད་དོ། །ཆོས་ཡང་དག་པར་བླང་བ་རྣམ་པར་སྨིན་པ་དཀར་བས་དཀར་བ་ལ། ཡིད་དུ་འོང་བ་དཀར་བས་དཀར་བ་ཡང་མ་ཡིན་པ་ཡོད་དོ། །ཆོས་ཡང་དག་པར་བླང་བ་ཡིད་དུ་འོང་བ་དཀར་བས་ཀྱང་དཀར་ལ་རྣམ་པར་སྨིན་པ་དཀར་བས་ཀྱང་དཀར་བ་ཡང་ཡོད་དོ། །ཆོས་ཡང་དག་པར་བླང་བ་ཡིད་དུ་འོང་བ་དཀར་བས་ཀྱང་དཀར་བ་མ་ཡིན་ལ། རྣམ་པར་སྨིན་པ་དཀར་བས་ཀྱང་དཀར་བ་མ་ཡིན་པ་ཡང་ཡོད་དོ། །ཆོས་ཡང་དག་པར་བླང་བ་ཡིད་དུ་འོང་བ་དཀར་བས་དཀར་ལ་རྣམ་པར་སྨིན་པ་དཀར་བས་དཀར་བ་མ་ཡིན་པ་གང་ཞེ་ན། སྨྲས་པ།

---

^{[མ་དཔེ་གཟིགས་ན་འདིར་གནོན།]}

ཆོས་ཡང་དག་པར་བླང་བ་དང་པོ་སྟེ། འདི་ནི་ཆོས་ཡང་དག་པར་བླང་བ་ཡིད་དུ་འོང་བ་དཀར་བས་དཀར་ལ་རྣམ་པར་སྨིན་པ་དཀར་བས་དཀར་བ་མ་ཡིན་པའོ། །ཆོས་ཡང་དག་པར་བླང་བ་རྣམ་པར་སྨིན་པ་དཀར་བས་དཀར་ལ་ཡིད་དུ་འོང་བས་དཀར་བས་དཀར་བ་མ་ཡིན་པ་གང་ཞེ་ན། སྨྲས་པ། ཆོས་ཡང་དག་པར་བླང་བ་གཉིས་པ་སྟེ། འདི་ནི་ཆོས་ཡང་དག་པར་བླང་བ་རྣམ་པར་སྨིན་པ་དཀར་བས་དཀར་ལ་ཡིད་དུ་འོང་བ་དཀར་བས་དཀར་བ་མ་ཡིན་པའོ། །ཆོས་ཡང་དག་པར་བླང་བ་ཡིད་དུ་འོང་བ་དཀར་བས་ཀྱང་དཀར་ལ་རྣམ་པར་སྨིན་པ་དཀར་བས་ཀྱང་དཀར་བ་གང་ཞེ་ན། སྨྲས་པ། ཆོས་ཡང་དག་པར་བླང་བ་གསུམ་པ་སྟེ། འདི་ནི་ཆོས་ཡང་དག་པར་བླང་བ་ཡིད་དུ་འོང་བ་དཀར་བས་ཀྱང་དཀར་ལ་རྣམ་པར་སྨིན་པ་དཀར་བས་ཀྱང་དཀར་བའོ། །ཆོས་ཡང་དག་པར་བླང་བ་ཡིད་དུ་འོང་བ་དཀར་བས་ཀྱང་དཀར་བ་མ་ཡིན་ལ། རྣམ་པར་སྨིན་པ་དཀར་བས་ཀྱང་དཀར་བ་མ་ཡིན་པ་གང་ཞེ་ན། སྨྲས་པ། ཆོས་ཡང་དག་པར་བླང་བ་བཞི་པ་སྟེ། འདི་ནི་ཆོས་ཡང་དག་པར་བླང་བ་ཡིད་དུ་འོང་བ་དཀར་བས་ཀྱང་དཀར་བ་མ་ཡིན་ལ། རྣམ་པར་སྨིན་པ་དཀར་བས་ཀྱང་དཀར་བ་མ་ཡིན་པའོ། །གཞན་ཡང་ཆོས་ཡང་དག་པར་བླང་བ་ནི་བཞི་སྟེ། བཞི་གང་ཞེ་ན། ཆོས་ཡང་དག་པར་བླང་བ་ཡིད་དུ་འོང་བ་གནག་པས་གནག་ལ་རྣམ་པར་སྨིན་པ་གནག་པས་གནག་པ་མ་ཡིན་པ་ཡང་ཡོད་དོ། །ཆོས་ཡང་དག་པར་བླང་བ་རྣམ་པ་སྨིན་པ་གནག་པས་གནག་ལ་ཡིད་དུ་འོང་བ་གནག་པས་གནག་པ་མ་ཡིན་པ་ཡང་ཡོད་དོ། །ཆོས་ཡང་དག་པར་བླང་བ་ཡིད་དུ་འོང་བ་གནག་པས་ཀྱང་གནག་ལ་རྣམ་པར་སྨིན་པ་གནག་པས་ཀྱང་གནག་པ་ཡང་ཡོད་དོ། །ཆོས་ཡང་དག་པར་བླང་བ་ཡིད་དུ་འོང་བ་གནག་པས་ཀྱང་གནག་པ་མ་ཡིན་ལ་རྣམ་པར་སྨིན་པ་གནག་པས་ཀྱང་གནག་པ་མ་ཡིན་པ་ཡང་ཡོད་དོ། །ཆོས་ཡང་དག་པར་བླང་བ་ཡིད་དུ་འོང་བས་གནག་པས་གནག་ལ། རྣམ་པར་སྨིན་པ་གནག་པས་གནག་པ་མ་ཡིན་པ་གང་ཞེ་ན། སྨྲས་པ། ཆོས་ཡང་དག་པར་བླང་བ་དང་པོ་སྟེ། འདི་ནི་ཆོས་ཡང་དག་པར་བླང་བ་ཡིད་དུ་འོང་བ་གནག་པས་གནག་ལ་རྣམ་པར་སྨིན་པ་གནག་པས་གནག་པ་མ་ཡིན་པའོ། །ཆོས་ཡང་དག་པར་བླང་བ་

---

^{[མ་དཔེ་གཟིགས་ན་འདིར་གནོན།]}

རྣམ་པར་སྨིན་པ་གནག་པས་གནག་ལ་ཡིད་དུ་འོང་བ་གནག་པས་གནག་པ་མ་ཡིན་པ་གང་ཞེ་ན་སྨྲས་པ། ཆོས་ཡང་དག་པར་བླང་བ་གཉིས་པ་སྟེ། འདི་ནི་ཆོས་ཡང་དག་པར་བླང་བ་རྣམ་པར་སྨིན་པ་གནག་པས་གནག་ལ་ཡིད་དུ་འོང་བ་གནག་པས་གནག་པ་མ་ཡིན་པའོ། །ཆོས་ཡང་དག་པར་བླང་བ་ཡིད་དུ་འོང་བ་གནག་པས་ཀྱང་གནག་ལ་རྣམ་པར་སྨིན་པ་གནག་པས་ཀྱང་གནག་པ་གང་ཞེ་ན། སྨྲས་པ། ཆོས་ཡང་དག་པར་བླང་བ་གསུམ་པ་སྟེ། འདི་ནི་ཆོས་ཡང་དག་པར་བླང་བ་ཡིད་དུ་འོང་བ་གནག་པས་ཀྱང་གནག་ལ། རྣམ་པར་སྨིན་པ་གནག་པས་ཀྱང་གནག་པའོ། །ཆོས་ཡང་དག་པར་བླང་བ་ཡིད་དུ་འོང་བ་གནག་པས་གནག་པ་མ་ཡིན་ལ་རྣམ་པར་སྨིན་པ་གནག་པས་ཀྱང་གནག་པ་མ་ཡིན་པ་གང་ཞེ་ན། སྨྲས་པ། ཆོས་ཡང་དག་པར་བླང་བ་བཞི་པ་སྟེ། འདི་ནི་ཆོས་ཡང་དག་པར་བླང་བ་ཡིད་དུ་འོང་པ་གནག་པས་ཀྱང་གནག་པ་མ་ཡིན་ལ་རྣམ་པར་སྨིན་པ་གནག་པས་ཀྱང་གནག་པ་མ་ཡིན་པའོ། །ལས་ནི་བཞི་སྟེ། བཞི་གང་ཞེ་ན། མངོན་པར་འགྲུབ་པའི་རྣམ་པར་སྨིན་པ་ཡིན་ལ་སྐྱེ་བའི་རྣམ་པར་སྨིན་པ་མ་ཡིན་པའི་ལས་ཀྱང་ཡོད་དོ། །སྐྱེ་བའི་རྣམ་པར་སྨིན་པ་ཡིན་ལ་མངོན་པར་འགྲུབ་པའི་རྣམ་པར་སྨིན་པ་མ་ཡིན་པའི་ལས་ཀྱང་ཡོད་དོ། །མངོན་པར་འགྲུབ་པའི་རྣམ་པར་སྨིན་པ་ཡང་ཡིན་ལ། སྐྱེ་བའི་རྣམ་པར་སྨིན་པ་ཡང་ཡིན་པའི་ལས་ཀྱང་ཡོད་དོ། །མངོན་པར་འགྲུབ་པའི་རྣམ་པར་སྨིན་པ་ཡང་མ་ཡིན་ལ། སྐྱེ་བའི་རྣམ་པར་སྨིན་པ་ཡང་མ་ཡིན་པའི་ལས་ཀྱང་ཡོད་དོ། །མངོན་པར་འགྲུབ་པའི་རྣམ་པར་སྨིན་པ་ཡིན་ལ། སྐྱེ་བའི་རྣམ་པར་སྨིན་པ་མ་ཡིན་པའི་ལས་གང་ཞེ་ན། སྨྲས་པ། ལས་གང་གི་རྣམ་པར་སྨིན་པས་བར་མདོའི་སྲིད་པར་མངོན་པར་འགྲུབ་པ་ལས་དེའི་རྣམ་པར་སྨིན་པས་སྐྱེ་བའི་སྲིད་པར་ཉིང་མཚམས་སྦྱོར་བར་མི་བྱེད་པ་སྟེ། འདི་ནི་མངོན་པར་འགྲུབ་པའི་རྣམ་པར་སྨིན་པ་ཡིན་ལ། སྐྱེ་བའི་རྣམ་པར་སྨིན་པ་མ་ཡིན་པའི་ལས་སོ། །སྐྱེ་བའི་རྣམ་པར་སྨིན་པ་ཡིན་ལ། མངོན་པར་འགྲུབ་པའི་རྣམ་པར་སྨིན་པ་མ་ཡིན་པའི་ལས་གང་ཞེ་ན། སྨྲས་པ། ལས་གང་གི་རྣམ་པར་སྨིན་པས་སྐྱེ་བའི་སྲིད་པར་ཉིང་མཚམས་སྦྱོར་ལ་ལས་དེའི་རྣམ་པར་སྨིན་པས་བར་མ་དོའི་སྲིད་པར་ཉིང་མཚམས་སྦྱོར་བར་མི་

---

^{[མ་དཔེ་གཟིགས་ན་འདིར་གནོན།]}

འགྱུར་བ་སྟེ། འདི་ནི་སྐྱེ་བའི་རྣམ་པར་སྨིན་པ་ཡིན་ལ། མངོན་པར་འགྲུབ་པའི་རྣམ་པར་སྨིན་པ་མ་ཡིན་པའི་ལས་སོ། །མངོན་པར་འགྲུབ་པའི་རྣམ་པར་སྨིན་པ་ཡིན་ལ། སྐྱེ་བའི་རྣམ་པར་སྨིན་པ་ཡང་ཡིན་པའི་ལས་གང་ཞེ་ན། སྨྲས་པ། ལས་གང་གི་རྣམ་པར་སྨིན་པས་བར་མ་དོའི་སྲིད་པ་ཡང་མངོན་པར་འགྲུབ་ལ། ལས་དེའི་རྣམ་པར་སྨིན་པས་སྐྱེ་བའི་སྲིད་པ་ཉིང་མཚམས་སྦྱོར་བ་སྟེ། འདི་ནི་མངོན་པར་འགྲུབ་པའི་རྣམ་པར་སྨིན་པ་ཡང་ཡིན་ལ། སྐྱེ་བའི་རྣམ་པར་སྨིན་པ་ཡང་ཡིན་པའི་ལས་སོ། །མངོན་པར་འགྲུབ་པའི་རྣམ་པར་སྨིན་པ་ཡང་མ་ཡིན་ལ། སྐྱེ་བའི་རྣམ་པར་སྨིན་པ་ཡང་མ་ཡིན་པའི་ལས་གང་ཞེ་ན། སྨྲས་པ། ལས་གང་གི་རྣམ་པར་སྨིན་པས་བར་མ་དོའི་སྲིད་པ་ཡང་མངོན་པར་འགྲུབ་པར་མི་འགྱུར་ལ། སྐྱེ་བའི་སྲིད་པ་ཡང་ཉིང་མཚམས་སྦྱོར་བར་མི་འགྱུར་བ་སྟེ། འདི་ནི་མངོན་པར་འགྲུབ་པའི་རྣམ་པར་སྨིན་པ་ཡང་མ་ཡིན་ལ། སྐྱེ་བའི་རྣམ་པར་སྨིན་པ་ཡང་མ་ཡིན་པའི་ལས་སོ། །གཞན་ཡང་ལས་ནི་བཞི་སྟེ། བཞི་གང་ཞེ་ན། སྐྱེ་བའི་རྣམ་པར་སྨིན་པ་ཡིན་ལ། སྐྱེས་ནས་རྣམ་པར་སྨིན་པ་མ་ཡིན་པའི་ལས་ཀྱང་ཡོད་དོ། །སྐྱེས་ནས་རྣམ་པར་སྨིན་པ་ཡིན་ལ། སྐྱེ་བའི་རྣམ་པར་སྨིན་པ་མ་ཡིན་པའི་ལས་ཀྱང་ཡོད་དོ། །སྐྱེ་བའི་རྣམ་པར་སྨིན་པ་ཡང་ཡིན་ལ། སྐྱེས་ནས་རྣམ་པར་སྨིན་པ་ཡང་ཡིན་པའི་ལས་ཀྱང་ཡོད་དོ། །སྐྱེ་བའི་རྣམ་པར་སྨིན་པ་ཡང་མ་ཡིན་ལ། སྐྱེས་ནས་རྣམ་པར་སྨིན་པ་ཡང་མ་ཡིན་པའི་ལས་ཀྱང་ཡོད་དོ། །སྐྱེ་བའི་རྣམ་པར་སྨིན་པ་ཡིན་ལ། སྐྱེས་ནས་རྣམ་པར་སྨིན་པ་མ་ཡིན་པའི་ལས་གང་ཞེ་ན། སྨྲས་པ། ལས་གང་གི་རྣམ་པར་སྨིན་པས་སྐྱེ་བའི་སྲིད་པར་ཉིང་མཚམས་སྦྱོར་ལ། སྐྱེས་པའི་འོག་ཏུ་ལས་དེའི་རྣམ་པར་སྨིན་པ་ཉམས་སུ་མྱོང་བར་འགྱུར་བ་སྟེ། འདི་ནི་སྐྱེ་བའི་རྣམ་པར་སྨིན་པ་ཡིན་ལ། སྐྱེས་ནས་རྣམ་པར་སྨིན་པ་མ་ཡིན་པའི་ལས་སོ། །སྐྱེས་ནས་རྣམ་པར་སྨིན་པ་ཡིན་ལ། སྐྱེ་བའི་རྣམ་པར་སྨིན་པ་མ་ཡིན་པའི་ལས་གང་ཞེ་ན། སྨྲས་པ། སྐྱེས་པའི་འོག་ཏུ་ལས་གང་གི་རྣམ་པར་སྨིན་པ་ཉམས་སུ་མྱོང་བར་འགྱུར་ལ། ལས་དེའི་རྣམ་པར་སྨིན་པས་སྐྱེ་བའི་སྲིད་པར་ཉིང་མཚམས་སྦྱོར་པར་ནི་མི་བྱེད་པ་སྟེ། འདི་ནི་སྐྱེས་ནས་རྣམ་པར་སྨིན་པ་ལ། སྐྱེ་བའི་རྣམ་པར་སྨིན་པ་མ་ཡིན་པའི་ལས་སོ།།

---

^{[མ་དཔེ་གཟིགས་ན་འདིར་གནོན།]}

སྐྱེ་བའི་རྣམ་པར་སྨིན་པ་ཡང་ཡིན་ལ། སྐྱེས་ནས་རྣམ་པར་སྨིན་པ་ཡང་ཡིན་པའི་ལས་གང་ཞེ་ན། སྨྲས་པ། ལས་གང་གི་རྣམ་པར་སྨིན་པས་སྐྱེ་བའི་སྲིད་པར་ཡང་ཉིང་མཚམས་སྦྱོར་བར་བྱེད་ལ་སྐྱེས་པའི་འོག་ཏུ་ལས་དེའི་རྣམ་པར་སྨིན་པ་ཡང་ཉམས་སུ་མྱོང་བར་འགྱུར་བ་སྟེ། འདི་ནི་སྐྱེ་བའི་རྣམ་པར་སྨིན་པ་ཡང་ཡིན་ལ། སྐྱེས་ནས་རྣམ་པར་སྨིན་པ་ཡང་ཡིན་པའི་ལས་སོ། །སྐྱེ་བའི་རྣམ་པར་སྨིན་པ་ཡང་མ་ཡིན་ལ། སྐྱེས་ནས་རྣམ་པར་སྨིན་པ་ཡང་མ་ཡིན་པའི་ལས་གང་ཞེ་ན། སྨྲས་པ། ལས་གང་གི་རྣམ་པར་སྨིན་པས་སྐྱེ་བའི་སྲིད་པར་ཡང་ཉིང་མཚམས་སྦྱོར་བར་མི་བྱེད་ལ། སྐྱེས་པའི་འོག་ཏུ་ལས་དེའི་རྣམ་པར་སྨིན་པ་ཡང་ཉམས་སུ་མྱོང་བར་མི་འགྱུར་བ་སྟེ། འདི་ནི་སྐྱེ་བའི་རྣམ་པར་སྨིན་པ་ཡང་མ་ཡིན་ལ། སྐྱེས་ནས་རྣམ་པར་སྨིན་པ་ཡང་མ་ཡིན་པའི་ལས་སོ། །ལས་གདགས་པ་ཚིགས་བཅུ་པའོ།། །།སྡོམ་ནི། ཚེ་ཟད་པ་དང་འོད་སྲུངས་དང༌། །བདེ་དང་སྡུག་བསྔལ་ལུས་བཞི་དང༌། །སྦྱིན་པ་བཞི་དང་བརྒྱད་ཚན་གསུམ། །ལས་གསུམ་གྱིས་ནི་སྡེ་ཚན་གསུམ། །གཅེར་བུ་རྣམས་ནི་སྔོན་བྱས་དང༌། །མཚམས་མེད་པ་ནི་ཐ་མ་ཡིན། །ཚེ་ཟད་པས་ནི་ཤི་འཕོས་ལ་བསོད་ནམས་ཟད་པས་ཤི་འཕོ་བ་མ་ཡིན་པ་ཞེས་བྱ་བ་ཡང་ཡོད་དོ། །བསོད་ནམས་ཟད་པས་ཤི་འཕོས་ལ་ཚེ་ཟད་པས་ཤི་འཕོས་པ་མ་ཡིན་པ་ཡང་ཡོད་དོ། །ཚེ་ཡང་ཟད་ལ་བསོད་ནམས་ཀྱང་ཟད་པས་ཤི་འཕོས་པ་ཡང་ཡོད། ཚེ་ཡང་མ་ཟད་བསོད་ནམས་ཀྱང་མ་ཟད་པར་ཤི་འཕོས་པ་ཞེས་བྱ་བ་ཡང་ཡོད་དོ། །ཚེ་ཟད་པས་ཤི་འཕོས་ལ་བསོད་ནམས་ཟད་པས་ཤི་འཕོས་པ་མ་ཡིན་པ་ཞིས་བྱ་བ་ཇི་ལྟ་བུ་ཞེ་ན། སྨྲས་པ། ཇི་ལྟར་འདི་ན་ཁ་ཅིག་གིས་ཚེའི་རྣམ་པར་སྨིན་པའི་ལས་ཆུང་དུ་བྱས་ཤིང་བསྩགས་ལ། ལོངས་སྤྱོད་ཀྱི་རྣམ་པར་སྨིན་པའི་ལས་རྒྱ་ཆེན་པོ་བྱས་ཤིང་བསྩགས་པས། དེའི་ཚེ་གཏུགས་པར་བྱེད་ཀྱི། ལོངས་སྤྱོད་རྣམས་གཏུགས་པར་མི་བྱེད་དེ། དེ་ནི་ཚེ་གཏུགས་པས་འཆི་བའི་དུས་བྱེད་ཀྱི་ལོངས་སྤྱོད་གཏུགས་པས་ནི་མ་ཡིན་ཏེ། དེ་ལྟར་ན་ཚེ་ཟད་པས་ཤི་འཕོས་ལ། བསོད་ནམས་ཟད་པས་ཤི་འཕོས་པ་མ་ཡིན་པ་ཞེས་བྱའོ། །བསོད་ནམས་ཟད་པས་ཤི་འཕོས་ལ་ཚེ་ཟད་པས་ཤི་འཕོས་པ་མ་ཡིན་པ་ཞེས་བྱ་བ་ཇི་ལྟ་བུ་ཞེ་ན། སྨྲས་པ། ཇི་ལྟར་

---

^{[མ་དཔེ་གཟིགས་ན་འདིར་གནོན།]}

འདི་ན་ཁ་ཅིག་གིས་ལོངས་སྤྱོད་ཀྱི་རྣམ་པར་སྨིན་སྨིན་པའི་ལས་ཆུང་དུ་བྱས་ཤིང་བསྩགས་ལ། ཚེའི་རྣམ་པར་སྨིན་པའི་ལས་རྒྱ་ཆེན་པོ་བྱས་ཤིང་བསྩགས་པས་དེའི་ལོངས་སྤྱོད་རྣམས་གཏུགས་པར་བྱེད་ཀྱི་ཚེ་གཏུགས་པར་མི་བྱེད་དེ། དེ་ནི་ལོངས་སྤྱོད་གཏུགས་པས་འཆི་བའི་དུས་བྱེད་ཀྱི་ཚེ་གཏུགས་པས་མ་ཡིན་ཏེ། དེ་ལྟར་ན་ལོངས་སྤྱོད་ཟད་པས་ཤི་འཕོས་ལ་ཚེ་ཟད་པས་ཤི་འཕོས་པ་མ་ཡིན་པ་ཞེས་བྱའོ། །ཚེ་ཡང་ཟད་ལ་ལོངས་སྤྱོད་ཀྱང་ཟད་པས་ཤི་འཕོས་པ་ཞེས་བྱ་བ་ཇི་ལྟ་བུ་ཞེ་ན། སྨྲས་པ། ཇི་ལྟར་འདི་ན་ཁ་ཅིག་གིས་ཚེའི་ཚད་རྣམ་པར་སྨིན་པའི་ལས་ཀྱང་ཆུང་དུ་བྱས་ཤིང་བསགས་ལ། ལོངས་སྤྱོད་ཀྱི་རྣམ་པར་སྨིན་པའི་ལས་ཀྱང་ཆུང་དུ་བྱས་ཤིང་བསྩགས་པས་དེའི་ཚེ་ཡང་གཏུགས་པར་བྱེད་ལ་ལོངས་སྤྱོད་ཀྱང་གཏུགས་པར་བྱེད་དེ། དེ་ནི་ཚེ་ཡང་གཏུགས་པ་ལ་ལོངས་སྤྱོད་ཀྱང་གཏུགས་པས་འཆི་བའི་དུས་བྱེད་དེ། དེ་ལྟར་ན་ཚེ་ཡང་ཟད་ལ་ལོངས་སྤྱོད་ཀྱང་ཟད་པས་ཤི་འཕོས་པ་ཞེས་བྱའོ། །ཚེ་ཡང་མ་ཟད་ལ་བསོད་ནམས་ཀྱང་མ་ཟད་པར་ཤི་འཕོས་པ་ཞེས་བྱ་བ་ཇི་ལྟ་བུ་ཞེ་ན། སྨྲས་པ། ཇི་ལྟར་འདི་ན་ཁ་ཅིག་གིས་ཚེའི་རྣམ་པར་སྨིན་པའི་ལས་ཀྱང་རྒྱ་ཆེན་པོ་བྱས་ཤིང་བསྩགས་ལ། ལོངས་སྤྱོད་ཀྱི་རྣམ་པར་སྨིན་པའི་ལས་ཀྱང་རྒྱ་ཆེན་པོ་བྱས་ཤིང་བསྩགས་པས་དེའི་ཚེ་ཡང་གཏུགས་པར་མི་བྱེད་ལ་ལོངས་སྤྱོད་ཀྱང་གཏུགས་པར་མི་བྱེད་དེ། དེ་ནི་ཚེ་གཏུགས་པ་དང་ལོངས་སྤྱོད་གཏུགས་པས་ཀྱང་འཆི་བའི་དུས་མི་བྱེད་མོད་ཀྱི། འོན་ཀྱང་མི་མཐུན་པ་མ་སྤངས་པ་གང་ཡང་རུང་བ་འགའ་ཞིག་གིས་འཆི་བའི་དུས་བྱེད་དེ། དེ་ལྟར་ན་ཚེ་ཡང་མ་ཟད་ལ་བསོད་ནམས་ཀྱང་མ་ཟད་པར་ཤི་འཕོས་པ་ཞེས་བྱའོ། །བཅོམ་ལྡན་འདས་རྒྱལ་པོའི་ཁབ་ཀྱི་འོད་མའི་ཚལ་བྱ་ཀ་ལན་ད་ཀ་གནས་པ་ལ་བཞུགས་སོ། །དེ་ནས་བཅོམ་ལྡན་འདས་སྔ་དྲོ་སྨད་གཡོགས་དང༌། ཆོས་གོས་བསྣམས་ཏེ་ལྷུང་བཟེད་བསྣམས་ནས་རྒྱལ་པོའི་ཁབ་ཏུ་བསོད་སྙོམས་ལ་གཤེགས་སོ། །དེའི་ཚེ་འོད་སྲུངས་ཀྱི་རིགས་གོས་མེད་ཀྱང་རྒྱལ་པོའི་ཁབ་ཏུ་སྤྱོད་ཡུལ་ལ་ཞུགས་ཏེ། འོད་སྲུངས་ཀྱི་རིགས་གོས་མེད་ཀྱིས་བཅོམ་ལྡན་འདས་ཐག་རིང་བོ་ཁོ་ན་ཞིག་ནས་མཐོང་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དང་ལྷན་ཅིག་མངོན་

---

^{[མ་དཔེ་གཟིགས་ན་འདིར་གནོན།]}

སུམ་དུ་ཡང་དག་པར་དགའ་བར་འགྱུར་བ་དང༌། ཡད་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་ཀྱིས་འདྲེས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུ་བ་ལུང་བསྟན་པའི་སླད་དུ་སྐབས་ཕྱེ་ན་བཅོམ་ལྡན་འདས་གཽ་ཏ་མ་ལ་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་ནས། བཅོམ་ལྡན་འདས་ཀྱིས་འོད་སྲུངས་ཀྱི་རིགས་གོས་མེད་ལ་འདི་སྐད་ཅེས་བཀའ་སྩལ་ཏོ། །འོད་སྲུངས་བསོད་སྙོམས་ལ་ཁྱིམ་གྱི་ནང་དུ་ཞུགས་པས་རེ་ཞིག་དྲི་བ་ལུང་བསྟན་པའི་དུས་ལ་མ་བབ་ཀྱི། ཕྱི་རོལ་གྱི་ཀུན་དགའ་ར་བར་དྲིས་ཤིག་དང༌། དེར་ཁྱོད་ཀྱི་དྲི་བ་ལུང་དུ་བསྟན་པའི་དུས་ལ་བབ་བོ། །ཀྱེ་གཽ་ཏ་མ་བདག་ལ་ཡང་བར་ཆད་འགའ་ཞིག་འབྱུང་བར་འགྱུར་གདའ་ལ། གཽ་ཏ་མ་ཁྱོད་ཀྱང་གཞན་དུ་འགྱུར་གདའ་བས། གལ་ཏེ་ཞུ་བ་ལུང་བསྟན་པའི་སླད་དུ་སྐབས་ཕྱེ་ན་འདི་ཉིད་དུ་བཅོམ་ལྡན་འདས་གཽ་ཏ་མ་ལ་བདག་ཕྱོགས་འགའ་ཞིག་ཞུའོ། །ལན་གཉིས་ལན་གསུམ་གྱི་བར་དུ་བཅོམ་ལྡན་འདས་ལ་འོད་སྲུངས་ཀྱི་རིགས་གོས་མེད་ཀྱིས་འདི་སྐད་ཅེས་གསོལ་ཏོ། །གལ་ཏེ་ཞུ་བ་ལུང་བསྟན་པའི་སླད་དུ་སྐབས་ཕྱེ་ན་བཅོམ་ལྡན་འདས་གཽ་ཏ་མ་ལ་བདག་ཕྱོགས་འགའ་ཞིག་ཞུའོ། །བཅོམ་ལྡན་འདས་ཀྱིས་ཀྱང་ལན་གཉིས་ལན་གསུམ་གྱི་དབར་དུ་འོད་སྲུངས་ཀྱི་རིགས་གོས་མེད་ལ་འདི་སྐད་ཅེས་བཀའ་སྩལ་ཏོ། །འོད་སྲུངས་ང་བསོད་སྙོམས་ལ་ཁྱིམ་གྱི་ནང་དུ་ཞུགས་པས་རེ་ཞིག་དྲི་བ་ལུང་བསྟན་པའི་དུས་ལ་མ་བབ་ཀྱི། ཕྱི་རོལ་གྱི་ཀུན་དགའ་ར་བར་དྲིས་ཤིག་དང༌། དེར་ཁྱོད་ཀྱི་དྲི་བ་ལུང་བསྟན་པའི་དུས་ལ་བབ་བོ། །ཀྱེ་གཽ་ཏ་མ་བདག་ལ་ཡང་བར་ཆད་འགའ་ཞིག་འབྱུང་བར་འགྱུར་གདའ་ལ། གཽ་ཏ་མ་ཁྱོད་ཀྱང་གཞན་དུ་འགྱུར་གདའ་བས། གལ་ཏེ་ཞུ་བ་ལུང་བསྟན་པའི་སླང་དུ་སྐབས་ཕྱེ་ན་འདི་ཉིད་དུ་བཅོམ་ལྡན་འདས་གཽ་ཏ་མ་ལ་བདག་ཕྱོགས་འགའ་ཞིག་ཞུའོ། །འོད་སྲུངས་ལན་གསུམ་གྱི་བར་དུ་སྐབས་མ་ཐོབ་པར་ངེས་ཀྱི། །དེའི་ཕྱིར་འོད་སྲུངས་ཁྱོད་ཅི་དང་ཅི་འདོད་པ་དྲིས་ཤིག །ཀྱེ་གཽ་ཏ་མ་ཅི་ལགས། སྡུག་བསྔལ་རང་གིས་བགྱིས་པ་ལགས་སམ། འོད་སྲུངས་འདི་ལྟ་སྟེ། སྡུག་བསྔལ་རང་གིས་བྱས་པ་འདི་ནི་ངས་ལུང་མ་བསྟན་ཏོ། །ཀྱེ་གཽ་ཏ་མ་ཅི་ལགས། སྡུག་བསྔལ་གཞན་གྱིས་བགྱིས་པ་ལགས་སམ། འོད་སྲུངས་འདི་ལྟ་སྟེ། སྡུག་བསྔལ་

---

^{[མ་དཔེ་གཟིགས་ན་འདིར་གནོན།]}

གཞན་གྱིས་བྱས་པ་འདི་ཡང་ངས་ལུང་མ་བསྟན་ཏོ། །ཀྱེ་གཽ་ཏ་མ་ཅི་ལགས། སྡུག་བསྔལ་རང་གིས་བགྱིས་པ་ཡང་ལགས་ལ། གཞན་གྱིས་བགྱིས་པ་ཡང་ལགས་སམ། རང་གིས་བགྱིས་པ་ཡང་མ་ལགས་ལ། གཞན་གྱིས་བགྱིས་པ་ཡང་མ་ལགས་ཏེ། རྒྱུ་མ་མཆིས་པ་ལས་བྱུང་བ་ལགས་སམ། འོད་སྲུངས་འདི་ལྟ་སྟེ། སྡུག་བསྔལ་རང་གིས་བྱས་པ་ཡང་ཡིན་ལ། གཞན་གྱིས་བྱས་པ་ཡང་ཡིན་པ་དང༌། རང་གིས་བྱས་པ་ཡང་མ་ཡིན་ལ། གཞན་གྱིས་བྱས་པ་ཡང་མ་ཡིན་ཏེ། རྒྱུ་མེད་པ་ལས་བྱུང་བ་འདི་ཡང་ངས་ལུང་མ་བསྟན་ཏོ། །ཀྱེ་གཽ་ཏ་མ་ཅི་ལགས། སྡུག་བསྔལ་རང་གིས་བགྱིས་སམ་ཞེས་ཞུས་ན་ཡང་ལུང་མ་བསྟན་ཞེས་གསུང་ངམ། ཀྱེ་གཽ་ཏ་མ་ཅི་ལགས། སྡུག་བསྔལ་གཞན་གྱིས་བགྱིས་སམ་ཞེས་ཞུས་ན་ཡང་ལུང་དུ་མ་བསྟན་ཞེས་གསུང་ངམ། ཀྱེ་གཽ་ཏ་མ་ཅི་ལགས། སྡུག་བསྔལ་རང་གིས་བགྱིས་པ་ཡང་ལགས་ལ། གཞན་གྱིས་བགྱིས་པ་ཡང་ལགས་སམ། རང་གིས་བགྱིས་པ་ཡང་མ་ལགས་ལ། གཞན་གྱིས་བགྱིས་པ་ཡང་མ་ལགས་ཏེ། རྒྱུ་མ་མཆིས་པ་ལས་བྱུང་བ་ལགས་སམ་ཞེས་ཞུས་ན་ཡང་ལུང་མ་བསྟན་ཞེས་གསུང་ངམ། ཀྱེ་གཽ་ཏ་མ་ཅི་ལགས། སྡུག་བསྔལ་མ་མཆིས་སམ་འོད་སྲུངས་ང་ནི་སྡུག་བསྔལ་མེད་དོ་ཞེས་མི་ཟེར་གྱི། འོད་སྲུངས་སྡུག་བསྔལ་ནི་ཡོད་པ་ཁོ་ནའོ། །ཀྱེ་གཽ་ཏ་མ་ཅི་ནས་བདག་གི་སྡུག་བསྔལ་རྟོགས་པར་འགྱུར་བ་དང༌། སྡུག་བསྔལ་མཐོང་བར་འགྱུར་བ་དེ་ལྟ་བུའི་ཆོས་བདག་ལ་བཀའ་སྩལ་ན་ལེགས་སོ་ལེགས་སོ། །འོད་སྲུངས་དེའི་ཕྱིར་ལེགས་པར་ཉོན་ལ་ཤིན་ཏུ་ཡིད་ལ་གྱིས་ཤིག་དང་ངས་བསྟན་ཏོ། །འོད་སྲུངས་ཚོར་བར་བྱེད་པ་དེ་ཉིད་མྱོང་བར་བྱེད་པ་ཡིན་ན་ནི། དེ་ལྟ་ན་དེའི་སྡུག་བསྔལ་རང་གིས་བྱས་པར་འགྱུར་ཏེ། འོད་སྲུངས་ང་ནི་དེ་སྐད་མི་ཟེར་རོ། །འོད་སྲུངས་གཞན་ཞིག་གིས་ཚོར་བ་གཞན་ཞིག་གིས་མྱོང་ན་ནི་དེ་ལྟར་ན་དེའི་སྡུག་བསྔལ་གཞན་གྱིས་བྱས་པར་འགྱུར་ཏེ། འོད་སྲུངས་ང་ནི་དེ་སྐད་ཀྱང་མི་ཟེར་རོ། །བདག་ཚོར་བས་ཟིལ་གྱིས་ནོན་ལ་གཞན་ཞིག་སྡུག་བསྔལ་སྒྲུབ་པར་བྱེད་ན་ཡང༌། དེ་ལྟར་ན་དེའི་སྡུག་བསྔལ་རང་གིས་བྱས་པ་ཡང་ཡིན་ལ། གཞན་གྱིས་བྱས་པ་ཡང་ཡིན་པར་འགྱུར་ཏེ། འོད་སྲུངས་

---

^{[མ་དཔེ་གཟིགས་ན་འདིར་གནོན།]}

ང་ནི་དེ་སྐད་ཀྱང་མི་ཟེར་རོ། །རྐྱེན་རྣམས་མེད་པ་ལས་སྡུག་བསྔལ་སྐྱེས་སོ་ཞེས་བྱས་ན་ཡང་དེ་ལྟ་ན་དེའི་སྡུག་བསྔལ་རང་གིས་བྱས་པ་ཡང་མ་ཡིན་ལ། གཞན་གྱིས་བྱས་པ་ཡང་མ་ཡིན་ཏེ། རྒྱུ་མེད་བ་ལས་སྐྱེས་པར་འགྱུར་ན། འོད་སྲུངས་ང་ནི་དེ་སྐད་ཀྱང་མི་ཟེར་རོ། །འོད་སྲུངས་དེ་བཞིན་གཤེགས་པ་ནི་མཐའ་འདི་གཉིས་ཁས་མི་ལེན་པར་དབུ་མའི་ལམ་གྱི་ཆོས་བསྟན་ཏེ། འདི་ལྟ་སྟེ། འདི་ཡོད་ན་འདི་འབྱུང་ལ། འདི་སྐྱེས་པས་འདི་སྐྱེ་ཞེས་བྱ་བ་སྟེ། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ་དང༌། སྐྱེ་བའི་རྐྱེན་གྱིས་རྒ་ཤི་དང། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུགས་པ་རྣམས་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་ཀྱང་འབྱུང་བར་འགྱུར་རོ། །འདི་ལྟ་སྟེ། འདི་མེད་ན་འདི་མི་འབྱུང་ལ། འདི་འགགས་པས་འདི་འགག་པར་འགྱུར་བ། འདི་ལྟ་སྟེ། མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲིད་པ་འགག་ས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུགས་པ་རྣམས་འགག་པར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་ཀྱང་འགག་པར་འགྱུར་རོ། །ཆོས་ཀྱི་རྣམ་གྲངས་འདི་བསྟན་པ་ན། འོད་སྲུངས་ཀྱི་རིགས་གོས་མེད་རྡུལ་མེད་ཅིང་དྲི་མ་དང་བྲལ་

---

^{[མ་དཔེ་གཟིགས་ན་འདིར་གནོན།]}

ཏེ། ཆོས་རྣམས་ལ་ཆོས་ཀྱི་མིག་སྐྱེས་སོ། །དེ་ནས་འོད་སྲུངས་ཀྱི་རིགས་གོས་མེད་ཆོས་མཐོང་བ་དང༌། ཆོས་རིག་པ་དང༌། ཆོས་ཐོབ་པ་དང༌། ཆོས་ཀྱི་གཏིང་སླེབས་པ་དང༌། སོམ་ཉི་ལས་རྒལ་བ་དང༌། ཐེ་ཚོམ་ལས་རྒལ་བ་དང༌། གཞན་གྱི་དྲིང་འཇོག་པ་དང༌། གཞན་གྱིས་མི་བཀྲི་བ་དང༌། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་པ་དང༌། འབྲས་བུ་ལ་གནས་པར་གྱུར་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ནི་ཞུགས་ལགས་སོ། །བཙུན་པ་བདེ་བར་གཤེགས་པ་བདག་ནི་ཞུགས་སོ། །བདག་ནི་བཙུན་པ་བཅོམ་ལྡན་འདས་ལ་སྐྱབས་སུ་མཆིའོ། །ཆོས་དང་དགེ་སློང་གི་དགེ་འདུན་ལ་ཡང་སྐྱབས་སུ་མཆིའོ། །བཅོམ་ལྡན་འདས་བདག་དེང་སླན་ཆད་ཇི་སྲིད་འཚོའི་བར་དུ་སྲོག་གཅོད་པ་ལ་སོགས་པ་སྤངས་པ་དང། སྐྱབས་སུ་མཆིས་པ་དང༌། མངོན་པར་དགའ་བར་གྱུར་བའི་དགེ་བསྙེན་ལགས་པར་གཟུང་དུ་གསོལ། དེ་ནས་བཅོམ་ལྡན་འདས་ཀྱིས་འོད་སྲུངས་ཀྱི་རིགས་གོས་མེད་ལ་ཆོས་ཀྱི་གཏམ་རྣམ་གྲངས་དུ་མས་ཡང་དག་པར་བསྟན་ཅིང་ཡང་དག་པར་འཛིན་དུ་བཅུག་ལ། ཡང་དག་པར་གཟེངས་བསྟོད་དེ། ཡང་དག་པར་དགའ་བར་མཛད་ནས་གཤེགས་སོ། །དེ་ནས་འོད་སྲུངས་ཀྱི་རིགས་གོས་མེད་ཐ་གི་ཟད་ཙམ་གྱི་བར་དུ་བཅོམ་ལྡན་འདས་ཀྱི་སླད་བཞིན་དུ་ཞམ་རིང་བྱས་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཐད་ནས་སོང་ངོ༌། །དེ་ནས་བཅོམ་ལྡན་འདས་ཀྱི་ཐད་ནས་སོང་ནས། རིང་པོ་མ་ལོན་པར་བ་དྲུས་མ་ཞིག་གིས་བསད་དེ་འཆི་བའི་དུས་ཀྱི་ཚེ། དབང་པོ་རྣམས་ནི་རྣམ་པར་དང་བར་གྱུར། བཞིན་གྱི་མདོག་ནི་ཡོངས་སུ་དག་པར་གྱུར། པགས་པའི་མདོག་ནི་ཡོངས་སུ་གསལ་བར་གྱུར་ཏོ། །དེ་ནས་དགེ་སློང་མང་པོ་དག་སྔ་དྲོ་ཤམ་ཐབས་དང༌། ཆོས་གོས་བགོས། ལྷུང་བཟེད་ཁྱེར་ནས་རྒྱལ་པོའི་ཁབ་ཏུ་བསོད་སྙོམས་ལ་དོང་ངོ༌། །དེ་ནས་དགེ་སློང་མང་པོ་རྒྱལ་པོའི་ཁབ་ཏུ་བསོད་སྙོམས་རྒྱུ་བདག་གིས་འོད་སྲུངས་ཀྱི་རིགས་གོས་མེད་དེས་བཅོམ་ལྡན་འདས་ལ་སྡུག་བསྔལ་གྱི་ཆོས་ལ་ཞུ་བ་ཞུས་ཏེ།

---

^{[མ་དཔེ་གཟིགས་ན་འདིར་གནོན།]}

ཞུས་ནས་དེ་བཅོམ་ལྡན་འདས་ཀྱི་ཐད་ནས་སོང་ནས། རིང་པོ་མ་ལོན་པར་བ་དྲུས་མ་ཞིག་གིས་བསད་དེ། དེ་འཆི་བའི་དུས་ཀྱི་ཚེ། དབང་པོ་རྣམས་ནི་རྣམ་པར་དང་བར་གྱུར། བཞིན་གྱི་མདོག་ནི་ཡོངས་སུ་དག་པར་གྱུར། པགས་པའི་མདོག་ནི་ཡོངས་སུ་གསལ་བར་གྱུར་ཏོ་ཞེས་ཐོས་སོ། །ཐོས་ནས་ཀྱང་དགེ་སློང་མང་པོ་རྣམས་ཀྱི་རྒྱལ་པོའི་ཁབ་ཏུ་བསོད་སྙོམས་བསྐོར་ནས་ཁ་ཟས་ཀྱི་བྱ་བ་བྱས་ཏེ་ཁ་ཟས་ཕྱིས་ཟ་བ་སྤངས་ནས། ལྷུང་བཟེད་དང་ཆོས་གོས་གནས་སུ་བཞག་སྟེ། རྐང་པ་བཀྲུས་ནས་ནང་དུ་ཡང་དག་འཇོག་པའི་ཕྱིར་གཙུག་ལག་ཁང་དུ་ཞུགས་སོ། །དེ་ནས་དགེ་སློང་མང་པོ་དག་ཕྱེ་མ་རེད་ཀྱི་དུས་ཀྱི་ཚེ་ནང་དུ་ཡང་དག་འཇོག་ལས་ལངས་ནས། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་དགེ་སློང་མང་པོ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འདིར་བདག་ཅག་དགེ་སློང་མང་པོ་སྔ་དྲོ་ཤམ་ཐབས་དང་ཆོས་གོས་བགོས་ཏེ། ལྷུང་བཟེད་འཚལ་ནས་རྒྱལ་པོའི་ཁབ་ཏུ་བསོད་སྙོམས་ལ་མཆིས་ནས་བདག་ཅག་གིས་ཐོས་པ། བཅོམ་ལྡན་འདས་རྒྱལ་པོའི་ཁབ་ཏུ་བསོད་སྙོམས་ལ་གཤེགས་པ་ན། འོད་སྲུངས་ཀྱི་རིགས་གོས་མེད་དེས་བཅོམ་ལྡན་འདས་ལ་སྡུག་བསྔལ་གྱི་ཆོས་ལ་ཞུ་བ་ཞུས་ནས། དེ་ནས་བཅོམ་ལྡན་འདས་ཀྱི་ཐད་ནས་མཆིས་ནས་རིང་པོ་མ་ལོན་པར་བ་དྲུས་མ་ཞིག་གིས་བཀུམ་སྟེ། དེ་འགུམས་པའི་དུས་ཀྱི་ཚེ་དབང་པོ་རྣམས་ནི་རྣམ་པར་དང་བར་གྱུར། བཞིན་གྱི་མདོག་ནི་ཡོངས་སུ་དག་པར་གྱུར། པགས་པའི་མདོག་ནི་ཡོངས་སུ་གསལ་བར་གྱུར་ཞེས་ཐོས་ལགས་ན། བཙུན་པ་དེའི་འགྲོ་བ་ནི་གང་ལགས། གང་དུ་ནི་སྐྱེས་ལགས། འཇིག་རྟེན་ཕ་རོལ་ནི་གང་ལགས། དགེ་སློང་དག་རིགས་ཀྱི་བུ་དེ་ནི་ནོར་དུ་འགྱུར་ཏེ། ཆོས་ཀྱི་རྗེས་སུ་མཐུན་པའི་ཆོས་མངོན་པར་རྟོགས་སོ། །ཆོས་ཀྱི་སྐབས་ནས་ང་ལ་ཅུང་ཟད་ཀྱང་མཐོ་བཙམས་པ་མེད་དོ། །དགེ་སློང་དག་རིགས་ཀྱི་བུ་དེ་ནི་ཡོངས་སུ་མྱ་ངན་ལས་འདས་ཀྱི་དེའི་ལུས་ལ་ལུས་ཀྱི་མཆོད་པ་གྱིས་ཤིག་ཅེས། དེར་བཅོམ་ལྡན་འདས་ཀྱིས་འོད་སྲུངས་ཀྱི་རིགས་གོས་མེད་དགེ་

---

^{[མ་དཔེ་གཟིགས་ན་འདིར་གནོན།]}

སློང་གི་དགེ་འདུན་གྱི་མདུན་དུ་མཆོག་ཏུ་ལུང་བསྟན་ཏེ་དེ་སྐད་ཅེས་བཀའ་སྩལ་ཏོ། །ཀྱེ་གཽ་ཏ་མ་ཅི་ལགས། སྡུག་བསྔལ་རང་གིས་བགྱིས་པ་ལགས་སམ་ཞེས་སྨྲས་པ་ནི། ཀྱེ་གཽ་ཏ་མ་ཅི་ལགས། རང་གི་བདག་སྡུག་བསྔལ་གྱི་རྒྱུ་དང༌། རྩ་བ་དང༌། སྐྱེད་པ་དང༌། གཞི་དང༌། བྱེད་རྒྱུ་དང༌། འབྱིན་པ་དང༌། རྐྱེན་དང༌། ཀུན་འབྱུང་བ་དང༌། སློང་བ་ལགས་སམ་ཞེས་བྱ་བའི་དོན་ཏེ། དེ་བས་ན་ཀྱེ་གཽ་ཏ་མ་ཅི་ལགས། སྡུག་བསྔལ་རང་གིས་བགྱིས་པ་ལགས་སམ་ཞེས་སྨྲས་སོ། །ཀྱེ་གཽ་ཏ་མ་ཅི་ལགས། སྡུག་བསྔལ་གཞན་གྱིས་བགྱིས་པ་ལགས་སམ་ཞེས་སྨྲས་པས་ནི། ཀྱེ་གཽ་ཏ་མ་ཅི་ལགས། གཞན་དག་གི་སྡུག་བསྔལ་གྱི་རྒྱུ་དང༌། རྩ་བ་དང༌། སྐྱེད་པ་དང༌། གཞི་དང༌། བྱེད་རྒྱུ་དང༌། འབྱིན་པ་དང༌། རྐྱེན་དང༌། ཀུན་འབྱུང་བ་དང༌། སློང་བ་ལགས་སམ་ཞེས་བྱ་བའི་དོན་ཏེ། དེ་བས་ན་ཀྱེ་གཽ་ཏ་མ་ཅི་ལགས། སྡུག་བསྔལ་གཞན་གྱིས་བགྱིས་པ་ལགས་སམ་ཞེས་སྨྲས་སོ། །ཀྱེ་གཽ་ཏ་མ་ཅི་ལགས། སྡུག་བསྔལ་རང་གིས་བགྱིས་པ་ཡང་ལགས་ལ། གཞན་གྱིས་བགྱིས་པ་ཡང་ལགས་སམ་ཞེས་སྨྲས་པ་ནི། ཀྱེ་གཽ་ཏ་མ་ཅི་ལགས། རང་གི་བདག་དང༌། གཞན་གྱི་བདག་ཀྱང་སྡུག་བསྔལ་གྱི་རྒྱུ་དང༌། རྩ་བ་དང༌། སྐྱེད་པ་དང༌། གཞི་དང༌། བྱེད་རྒྱུ་དང༌། འབྱིན་པ་དང༌། རྐྱེན་དང༌། ཀུན་འབྱུང་བ་དང༌། སློང་བ་ལགས་སམ་ཞེས་བྱ་བའི་དོན་ཏོ། །དེ་བས་ན་ཀྱེ་གཽ་ཏ་མ་ཅི་ལགས། སྡུག་བསྔལ་རང་གིས་བགྱིས་པ་ཡང་ལགས་ལ། གཞན་གྱིས་བགྱིས་པ་ཡང་ལགས་སམ་ཞེས་སྨྲས་སོ། །ཀྱེ་གཽ་ཏ་མ་ཅི་ལགས། སྡུག་བསྔལ་རང་གིས་བགྱིས་པ་ཡང་མ་ལགས་ལ། གཞན་གྱིས་བགྱིས་པ་ཡང་མ་ལགས་ཏེ། རྒྱུ་མ་མཆིས་པ་ལས་བྱུང་བ་ལགས་སམ་ཞེས་སྨྲས་པ་ནི། ཀྱེ་གཽ་ཏ་མ་ཅི་ལགས། སྡུག་བསྔལ་རྒྱུ་མེད་ལགས་སམ་ཞེས་བྱ་བའི་དོན་ཏེ། དེ་བས་ན་ཀྱེ་གཽ་ཏ་མ་ཅི་ལགས། སྡུག་བསྔལ་རང་གིས་བགྱིས་པ་ཡང་མ་ལགས་ལ། གཞན་གྱིས་བགྱིས་པ་ཡང་མ་ལགས་ཏེ། རྒྱུ་མ་མཆིས་པ་ལས་བྱུང་བ་ལགས་སམ་ཞེས་སྨྲས་སོ། །དེ་ལ་ནི་འདི་སྐད་ཅེས་བྱ་སྟེ། འོད་སྲུངས་རང་གི་བདག་སྡུག་བསྔལ་གྱི་རྒྱུ་དང༌། རྩ་བ་དང༌། སྐྱེད་པ་དང༌། གཞི་དང༌། བྱེད་རྒྱུ་

---

^{[མ་དཔེ་གཟིགས་ན་འདིར་གནོན།]}

དང། འབྱིན་པ་དང༌། རྐྱེན་དང༌། ཀུན་འབྱུང་བ་དང༌། སློང་བ་ཡིན་དུ་ཟིན་ན། དེ་ལྟར་ན་ནི་རང་གི་བདག་མ་ཆད་ཀྱི་བར་དུ་སྡུག་བསྔལ་ཡང་དག་པར་ཟད་པ་དང༌། སྡུག་བསྔལ་མཐར་བྱེད་པ་མེད་པར་འོང་ངོ༌། །འོད་སྲུངས་གཞན་གྱི་བདག་སྡུག་བསྔལ་གྱི་རྒྱུ་དང༌། རྩ་བ་དང༌། སྐྱེད་པ་དང༌། གཞི་དང༌། བྱེད་རྒྱུ་དང༌། འབྱིན་པ་དང༌། རྐྱེན་དང༌། ཀུན་འབྱུང་བ་དང༌། སློང་བ་ཡིན་དུ་ཟིན་ན། དེ་ལྟར་ན་ཡང་གཞན་གྱི་བདག་མ་ཆད་ཀྱི་བར་དུ་སྡུག་བསྔལ་ཡང་དག་པར་ཟད་པ་དང༌། སྡུག་བསྔལ་མཐར་བྱེད་པ་མེད་པར་འོང་ངོ༌། །འོད་སྲུངས་རང་གི་བདག་དང་གཞན་གྱི་བདག་སྡུག་བསྔལ་གྱི་རྒྱུ་དང༌། རྩ་བ་དང༌། སྐྱེད་པ་དང༌། གཞི་དང༌། བྱེད་རྒྱུ་དང༌། འབྱིན་པ་དང༌། རྐྱེན་དང༌། ཀུན་འབྱུང་བ་དང༌། སློང་བ་ཡིན་དུ་ཟིན་ན། དེ་ལྟར་ན་ཡང་རང་གི་བདག་དང་གཞན་གྱི་བདག་མ་ཆད་ཀྱི་བར་དུ་སྡུག་བསྔལ་ཡང་དག་པར་ཟད་པ་དང༌། སྡུག་བསྔལ་མཐར་བྱེད་པ་མེད་པར་འོང་ངོ༌། །འོད་སྲུངས་སྡུག་བསྔལ་རྒྱུ་མེད་པ་ལས་བྱུང་བ་ཡིན་དུ་ཟིན་ན། དེ་ལྟ་ན་ཡང་དེའི་རྒྱུ་གང་ཟད་པར་བྱས་པས་སྡུག་བསྔལ་ཡང་དག་པར་ཟད་པ་དང༌། སྡུག་བསྔལ་མཐར་བྱེད་པར་འགྱུར་བའི་རྒྱུ་མེད་པར་འོང་ངོ༌། །འོད་སྲུངས་དེ་བས་ན་རང་གིས་བྱས་པ་དང༌། གཞན་གྱིས་བྱས་པ་དང༌། རང་གིས་ཀྱང་བྱས་ལ་གཞན་གྱིས་ཀྱང་བྱས་པ་དང༌། རང་གིས་ཀྱང་མ་བྱས་ལ་གཞན་གྱིས་ཀྱང་མ་བྱས་ཏེ། རྒྱུ་མེད་པ་ཡང་མ་ཡིན་པ་ནི་འདི་ལྟར་ཁས་བླང་བར་བྱ་སྟེ། རང་གིས་བྱས་པ་ཇི་ལྟ་བུ་ཞེ་ན། སྨྲས་པ། ཇི་ལྟར་འདི་ན་ཁ་ཅིག་རང་གིས་རང་གི་སྐྲ་འབལ་བའམ། ཁ་སྤུ་འབལ་བའམ། སྐྲ་དང༌། ཁ་སྤུ་འབལ་བའམ། ལྕག་གིས་འཇུ་བའམ། ལྕུག་མས་འཇུ་བའམ། འབྲེང་པས་འཇུ་བའམ། ལག་པ་གཅོད་པའམ། རྐང་པ་གཅོད་པའམ། རྣ་བ་གཅོད་པའམ། སྣ་གཅོད་པའམ། གཏན་འཆི་བར་བྱེད་པའམ། གྲངས་ནས་གྲང་སར་འགྲོ་བའམ། ཚ་བའི་ས་ནས་ཚ་བའི་སར་འགྲོ་བར་བྱེད་ལ། དེའི་རྐྱེན་གྱིས་ཀྱང་དེའི་སྡུག་བསྔལ་སྐྱེ་བར་འགྱུར་བ་ལྟ་བུ་སྟེ། དེ་ལྟར་ན་རང་གིས་བྱས་པ་ཡིན་ནོ། །གཞན་གྱིས་བྱས་པ་ཇི་ལྟ་བུ་ཞེ་ན། སྨྲས་པ། ཇི་ལྟར་འདི་ན་ཁ་ཅིག་

---

^{[མ་དཔེ་གཟིགས་ན་འདིར་གནོན།]}

གཞན་གྱིས་དེའི་སྐྲ་འབལ་བའམ། ཁ་སྤུ་འབལ་བའམ། སྐྲ་དང་ཁ་སྤུ་འབལ་བའམ། ལྕག་གིས་འཇུ་བའམ། ལྕུག་མས་འཇུ་བའམ། འབྲེང་པས་འཇུ་བའམ། ལག་པ་གཅོད་པའམ། རྐང་པ་གཅོད་པའམ། རྣ་བ་གཅོད་པའམ། སྣ་གཅོད་པའམ། གཏན་འཆི་བར་བྱེད་པའམ། གྲངས་ནས་གྲང་སར་གཏོང་བའམ། ཚ་བའི་ས་ནས་ཚ་བའི་སར་གཏོང་བར་བྱེད་ལ། དེའི་རྐྱེན་གྱིས་ཀྱང་དེའི་སྡུག་བསྔལ་སྐྱེ་བར་འགྱུར་བ་ལྟ་བུ་སྟེ། དེ་ལྟར་ན་གཞན་གྱིས་བྱས་པ་ཡིན་ནོ། །གཉི་གས་བྱས་པ་ཇི་ལྟ་བུ་ཞེ་ན། སྨྲས་པ། ཇི་ལྟར་འདི་ན་ཁ་ཅིག་བདག་ཉིད་དང༌། གཞན་གྱིས་དེའི་སྐྲ་འབལ་བ་དང༌། ཁ་སྤུ་འབལ་བ་དང༌། སྐྲ་དང་ཁ་སྤུ་འབལ་བ་དང༌། ལྕག་གིས་འཇུ་བའམ། ལྕུག་མས་འཇུ་བའམ། འབྲེང་བས་འཇུ་བའམ། ལག་པ་གཅོད་པའམ། རྐང་པ་གཅོད་པའམ། རྣ་བ་གཅོད་པའམ། སྣ་གཅོད་པའམ། གཏན་འཆི་བར་བྱེད་པའམ། གྲངས་ནས་གྲང་སར་གཏོང་བའམ། ཚ་བའི་ས་ནས་ཚ་བའི་སར་གཏོང་བར་བྱེད་ལ། དེའི་རྐྱེན་གྱིས་ཀྱང་དེའི་སྡུག་བསྔལ་སྐྱེ་བར་འགྱུར་བ་ལྟ་བུ་སྟེ། དེ་ལྟར་ན་རང་གིས་བྱས་པ་ཡང་ཡིན་ལ། གཞན་གྱིས་བྱས་པ་ཡང་ཡིན་ནོ། །རང་གིས་ཀྱང་མ་བྱས་གཞན་གྱིས་ཀྱང་མ་བྱས་ལ། རྒྱུ་མེད་པ་ལས་བྱུང་བ་ནི་མ་ཡིན་པ་ཇི་ལྟ་བུ་ཞེ་ན། སྨྲས་པ། དཔེར་ན་རླུང་ལྡང་བ་དང༌། ཆར་པ་འབབ་པ་དང༌། ཐོག་ཐོག་འབབ་པ་ན་ཁྱིམ་རྡིབ་པར་བྱེད་པའམ། ཤིང་རྣམས་གཅོད་པར་བྱེད་པའམ། བྲག་གི་རྩེ་མོ་རྣམས་འཇོམས་པར་བྱེད་དེ། དེས་ན་ཁ་ཅིག་གི་ནི་ལག་པ་གཅོད་པར་བྱེད། ཁ་ཅིག་གི་ནི་རྐང་པ་གཅོད་པར་བྱེད། ཁ་ཅིག་གི་ནི་རྣ་བའམ། སྣ་ཆད་པར་བྱེད་དེ། ཁ་ཅིག་ནི་གཏན་འཆི་བར་བྱེད་པ་ལྟ་བུ་སྟེ། རླུང་དེ་དང༌། ཆར་པ་དེ་དང༌། ཐོག་ཐོག་དེ་ནི་ཁྱིམ་དེ་དག་རྡིབ་པར་བྱེད་པ་དང། ཤིང་རྣམས་ཆག་པར་བྱེད་པ་དང༌། བྲག་གི་རྩེ་མོ་རྣམས་འཇོམས་པར་བྱེད་པའི་རྒྱུ་ཁོ་ན་ཡིན་ཏེ། དེ་ལྟར་ན་རང་གིས་ཀྱང་མ་བྱས། གཞན་གྱིས་ཀྱང་མ་བྱས་པའི་རིགས་དང་རྒྱུ་ལས་བྱུང་བ་ཡིན་ནོ། །འོད་སྲུངས་སེམས་ཅན་རྣམས་ཀྱི་བདེ་བ་དང༌། སྡུག་བསྔལ་སྐྱེ་བ་ཅི་ཡང་

---

^{[མ་དཔེ་གཟིགས་ན་འདིར་གནོན།]}

རུང་བ་དེ་དག་ཐམས་ཅད་ནི་རང་གིས་བྱས་པ་དང༌། གཞན་གྱིས་བྱས་པ་དང༌། གཉི་གས་བྱས་པ་དང༌། དུས་ཚིགས་འགྱུར་བའི་རྐྱེན་བཞིས་སྐྱེ་བར་འགྱུར་རོ། །བདག་གིས་བྱས་པ་ཇི་ལྟ་བུ་ཞེ་ན། སྨྲས་པ། འདི་ན་ཁ་ཅིག་རང་གིས་རང་གི་སྐྲ་འབལ་བའམ། ཁ་སྤུ་འབལ་བའམ། སྐྲ་དང་ཁ་སྤུ་འབལ་བའམ། ལྕག་གིས་འཇུ་བའམ། ལྕུག་མས་འཇུ་བའམ། འབྲང་པས་འཇུ་བའམ། ལག་པ་གཅོད་པའམ། རྐང་པ་གཅོད་པའམ། རྣ་བ་གཅོད་པའམ། སྣ་གཅོད་པའམ། གཏན་འཆི་བར་བྱེད་པའམ། གྲངས་ནས་གྲང་སར་འགྲོ་བའམ། ཚ་བའི་ས་ནས་ཚ་བའི་སར་འགྲོ་བའམ། ལུས་སྣུམ་གྱིས་བསྐུ་ཞིང་དྲིལ་བ་དང༌། ཁྲུས་བྱེད་པའམ་མཉེ་བར་བྱེད་ལ། དེའི་རྐྱེན་གྱིས་ཀྱང་དེའི་བདེ་བ་དང་སྡུག་བསྔལ་སྐྱེ་བར་འགྱུར་བ་ལྟ་བུ་སྟེ། དེ་ལྟར་ན་བདག་གིས་བྱས་པ་ཡིན་ནོ། །གཞན་གྱིས་བྱས་པ་ཇི་ལྟ་བུ་ཞེ་ན། སྨྲས་པ། དཔེར་ན་འདི་ན་ཁ་ཅིག་གཞན་གྱིས་དེའི་སྐྲ་འབལ་བ་ནས། གཏན་འཆི་བའི་བར་དུ་བྱེད་པ་དང༌། གྲང་ས་ནས་གྲང་སར་གཏོང་བའམ། ཚ་བའི་ས་ནས་ཚ་བའི་སར་གཏོང་བའམ། ལུས་སྣུམ་གྱིས་བསྐུ་ཞིང་དྲིལ་བ་དང༌། ཁྲུས་བྱེད་པ་དང༌། ལུས་མཉེ་བར་བྱེད་ལ་དེའི་རྐྱེན་གྱིས་ཀྱང་དེའི་བདེ་བ་དང༌། སྡུག་བསྔལ་སྐྱེ་བར་འགྱུར་བ་ལྟ་བུ་སྟེ། དེ་ལྟར་ན་གཞན་གྱིས་བྱས་པ་ཡིན་ནོ། །གཉི་གས་བྱས་པ་ཇི་ལྟ་བུ་ཞེ་ན། སྨྲས་པ། དཔེར་ན་འདི་ན་ཁ་ཅིག་བདག་ཉིད་དང༌། གཞན་གྱིས་ཀྱང་དེའི་སྐྲ་འབལ་བ་ནས། གཏན་འཆི་བའི་བར་དུ་བྱེད་པ་དང༌། གྲངས་ནས་གྲང་སར་གཏོང་བའམ། ཚ་བའི་ས་ནས་ཚ་བའི་སར་གཏོང་བའམ། ལུས་སྣུམ་གྱིས་བསྐུ་ཞིང་དྲིལ་བ་དང༌། ཁྲུས་བྱེད་པ་དང་མཉེ་བར་བྱེད་ལ། དེའི་རྐྱེན་གྱིས་ཀྱང་དེའི་བདེ་བ་དང༌། སྡུག་བསྔལ་སྐྱེ་བར་འགྱུར་བ་ལྟ་བུ་སྟེ། དེ་ལྟར་ན་གཉི་གས་བྱས་པ་ཡིན་ནོ། །དུས་ཚིགས་འགྱུར་བ་ཇི་ལྟ་བུ་ཞེ་ན། སྨྲས་པ། དཔེར་ན་རྒྱལ་པོ་དགུན་ཅིག་ཏུ་ངེས་པར་གྲང་བ་དང༌། དབྱར་ཅིག་ཏུ་ངེས་པར་ཚ་བ་དང༌། སོ་གའི་གྲང་བ་དང༌། ཚ་བ་དེ་གཉི་ག་ལས་བདེ་བ་དང༌། སྡུག་བསྔལ་སྐྱེ་བར་འགྱུར་བ་ལྟ་བུ་སྟེ། དེ་ལྟར་ན་དུས་ཚིགས་འགྱུར་བ་ལས་གྱུར་པ་ཡིན་ནོ། །ལས་

---

^{[མ་དཔེ་གཟིགས་ན་འདིར་གནོན།]}

འཐོབ་པ་ནི་རྣམ་པ་བཞི་སྟེ། རྒྱས་པར་ཡང་དག་པར་འགྲོ་བའི་རྣམ་གྲངས་ལས་ཇི་སྐད་འབྱུང་བ་བཞིན་དུ་བརྗོད་པར་བྱའོ། །སྦྱིན་པ་ནི་བཞི་སྟེ། བཞི་གང་ཞེ་ན། སྦྱིན་པ་པོ་རྣམ་པར་དག་པ་ལེན་པ་པོ་རྣམ་པར་མ་དག་པ་ཡང་ཡོད་དོ་ཞེས་བྱ་བ་ནས། རྒྱས་པར་ཡང་དག་པར་འགྲོ་བའི་རྣམ་གྲངས་ལས་ཇི་སྐད་འབྱུང་བ་བཞིན་དུ་བརྗོད་པར་བྱའོ། །སྦྱིན་པ་ནི་བརྒྱད་དེ། བརྒྱད་གང་ཞེ་ན། ཉེ་བར་གྱུར་པ་ལ་སྦྱིན་པ་ཞེས་བྱ་བ་ནས། རྒྱས་པར་ཡང་དག་པར་འགྲོ་བའི་རྣམ་གྲངས་ལས་ཇི་སྐད་འབྱུང་བ་བཞིན་དུ་བརྗོད་པར་བྱའོ། །གཞན་ཡང་སྦྱིན་པ་ནི་བརྒྱད་དེ། བརྒྱད་གང་ཞེ་ན། གང་ཟག་དད་པ་ཆུང་དུས་སྦྱིན་པ་ཆུང་དུ་བྱིན་ལ། ཚུལ་ཁྲིམས་འཆལ་པ་རྣམས་ལ་བྱིན་ཏེ་ཡུན་རིང་དུ་ཐུབ་པ་མ་ཡིན་པ་དང༌། གང་ཟག་དད་པ་ཆུང་དུས་སྦྱིན་པ་ཆེན་པོ་བྱིན་ལ། ཚུལ་ཁྲིམས་འཚལ་པ་རྣམས་ལ་བྱིན་ཏེ་ཡུན་རིང་དུ་མི་ཐུབ་པ་བྱིན་པ་དང༌། གང་ཟག་དད་པ་ཆུང་ངུས་སྦྱིན་པ་ཆེན་པོ་བྱིན་ལ། ཚུལ་ཁྲིམས་དང་ལྡན་པ་རྣམས་ལ་བྱིན་ཏེ་ཡུན་རིང་དུ་ཐུབ་པ་བྱིན་པ་དང༌། གང་ཟག་དད་པ་ཆུང་ངུས་སྦྱིན་པ་ཆེན་པོ་བྱིན་ལ། ཚུལ་ཁྲིམས་དང་ལྡན་པ་རྣམས་ལ་བྱིན་ཏེ་ཡུན་རིང་དུ་མི་ཐུབ་པ་བྱིན་པ་དང༌། གང་ཟག་དད་པ་ཆེན་པོས་སྦྱིན་པ་ཆུང་ངུ་བྱིན་ལ། ཚུལ་ཁྲིམས་འཆལ་པ་རྣམས་ལ་བྱིན་ཏེ། ཡུན་རིང་དུ་མི་ཐུབ་པ་བྱིན་པ་དང༌། གང་ཟག་དད་པ་ཆེན་པོས་སྦྱིན་པ་ཆེན་པོ་བྱིན་ལ། ཚུལ་ཁྲིམས་འཆལ་པ་རྣམས་ལ་བྱིན་ཏེ། ཡུན་རིང་དུ་མི་ཐུབ་པ་བྱིན་པ་དང༌། གང་ཟག་དད་པ་ཆེན་པོས་སྦྱིན་པ་ཆེན་པོ་བྱིན་ལ། ཚུལ་ཁྲིམས་དང་ལྡན་པ་རྣམས་ལ་བྱིན་ཏེ། ཡུན་རིང་དུ་མི་ཐུབ་པ་བྱིན་པ་དང༌། གང་ཟག་དད་པ་ཆེན་པོས་སྦྱིན་པ་ཆེན་པོ་བྱིན་ལ། ཚུལ་ཁྲིམས་དང་ལྡན་པ་རྣམས་ལ་བྱིན་ཏེ། ཡུན་རིང་དུ་ཐུབ་པ་བྱིན་པའོ། །དེ་ལ་གང་ཟག་དད་པ་ཆུང་ངུས་སྦྱིན་པ་ཆུང་དུ་བྱིན་ལ། ཚུལ་ཁྲིམས་འཆལ་བ་རྣམས་ལ་བྱིན་ཏེ། ཡུན་རིང་དུ་མི་ཐུབ་པ་བྱིན་པ་གང་ཡིན་པའི་སྦྱིན་པ་འདི་ནི་སྦྱིན་པ་དེ་རྣམས་ཀྱི་ནང་ན་ཆུང་ངུ་ཞེས་བརྗོད་དོ། །དེ་ལ་གང་ཟག་དད་པ་ཆུང་ངུས་སྦྱིན་པ་ཆེན་པོ་བྱིན་ལ། ཚུལ་ཁྲིམས་འཆལ་པ་རྣམས་ལ་བྱིན་ཏེ། ཡུན་རིང་དུ་མི་ཐུབ་པ་བྱིན་པའི་སྦྱིན་པ་

---

^{[མ་དཔེ་གཟིགས་ན་འདིར་གནོན།]}

གང་ཡིན་པ་དེ་ནི་སྦྱིན་པ་དེ་བས་ཆེ་བར་བརྗོད་དོ། །དེ་ལ་གང་ཟག་དད་པ་ཆུང་ངུས་སྦྱིན་པ་ཆེན་པོ་བྱིན་ལ། ཚུལ་ཁྲིམས་དང་ལྡན་པ་རྣམས་ལ་བྱིན་ཏེ། ཡུན་རིང་དུ་མི་ཐུབ་པ་བྱིན་པ་གང་ཡིན་པའི་སྦྱིན་པ་འདི་ནི་དེ་གཉིས་པས་ཆེ་བར་བརྗོད་དོ། །དེ་ལ་གང་ཟག་དད་པ་ཆུང་ངུས་སྦྱིན་པ་ཆེན་པོ་བྱིན་ལ། ཚུལ་ཁྲིམས་དང་ལྡན་པ་རྣམས་ལ་བྱིན་ཏེ། ཡུན་རིང་དུ་ཐུབ་པ་གང་ཡིན་པའི་སྦྱིན་པ་དེ་ནི་སྦྱིན་པ་དེ་དག་པས་ཆེར་བརྗོད་དོ། །དེ་ལ་གང་ཟག་དད་པ་ཆེན་པོས་སྦྱིན་པ་ཆུང་ངུ་བྱིན་ལ། ཚུལ་ཁྲིམས་འཆལ་པ་རྣམས་ལ་བྱིན་ཏེ། ཡུན་རིང་དུ་མི་ཐུབ་པ་གང་ཡིན་པའི་སྦྱིན་པ་འདི་ནི་སྦྱིན་པ་དེ་དག་པས་ཆེ་བར་བརྗོད་དོ། །དེ་ལ་གང་ཟག་དད་པ་ཆེན་པོས་སྦྱིན་པ་ཆེན་པོ་སྦྱིན་ལ། ཚུལ་ཁྲིམས་དང་ལྡན་པ་རྣམས་ལ་བྱིན་ཏེ། ཡུན་རིང་དུ་མི་ཐུབ་པ་གང་ཡིན་པའི་སྦྱིན་པ་འདི་ནི་སྦྱིན་པ་དེ་དག་པས་ཆེ་བར་བརྗོད་དོ། །དེ་ལ་གང་ཟག་དད་པ་ཆེན་པོས་སྦྱིན་པ་ཆེན་པོ་བྱིན་ལ། ཚུལ་ཁྲིམས་དང་ལྡན་པ་རྣམས་ལ་བྱིན་ཏེ། ཡུན་རིང་དུ་ཐུབ་པ་བྱིན་པ་གང་ཡིན་པའི་སྦྱིན་པ་འདི་ནི་སྦྱིན་པ་དེ་དག་པས་ཆེ་བ་དང༌། མཆོག་ཏུ་བརྗོད་པ་དང༌། གཙོ་བོ་དང༌། ཁྱད་པར་དུ་འཕགས་པ་དང༌། བླ་ན་མེད་པར་བརྗོད་དེ། དཔེར་ན་བ་བས་ནི་འོ་མ། འོ་མ་བས་ནི་ཞོ། །ཞོ་བས་ནི་མར་སར། མར་སར་བས་ནི་ཞུན་མར། ཞུན་མར་བས་ནི་མར་གྱི་ཉིང་གུ་ཆེ་བ་དང༌། མཆོག་ཏུ་བརྗོད་པ་དང༌། གཙོ་བོ་དང༌། ཁྱད་པར་དུ་འཕགས་པ་དང༌། བླ་ན་མེད་པར་བརྗོད་པ་དེ་བཞིན་དུ། གང་ཟག་དད་པ་ཆེན་པོས་སྦྱིན་པ་ཆེན་པོ་བྱིན་ལ། ཚུལ་ཁྲིམས་དང་ལྡན་པ་རྣམས་ལ་བྱིན་ཏེ། ཡུན་རིང་དུ་ཐུབ་པ་བྱིན་པ་གང་ཡིན་པའི་སྦྱིན་པ་འདི་ནི་སྦྱིན་པ་དེ་དག་པས་ཆེ་བ་དང༌། མཆོག་ཏུ་བརྗོད་པ་དང༌། གཙོ་བོ་དང༌། ཁྱད་པར་དུ་འཕགས་པ་དང༌། བླ་ན་མེད་པར་བརྗོད་དོ། །ལས་ནི་བརྒྱད་དེ། བརྒྱད་གང་ཞེ་ན། བདེ་བ་མྱོང་བར་འགྱུར་བ་དང༌། སྡུག་བསྔལ་མྱོང་བར་འགྱུར་བ་དང༌། ཚེ་འདི་ལ་མྱོང་བར་འགྱུར་བ་དང༌། ལན་གྲངས་གཞན་དུ་མྱོང་བར་འགྱུར་བ་དང༌། ཆུང་ངུ་མྱོང་བར་འགྱུར་བ་དང༌། རྒྱ་ཆེན་པོ་མྱོང་བར་འགྱུར་བ་དང༌། ལས་ཡོངས་སུ་མ་སྨིན་པ་དང༌། ལས་ཡོངས་སུ་སྨིན་པའོ།།

---

^{[མ་དཔེ་གཟིགས་ན་འདིར་གནོན།]}

ལས་གང་བདེ་བ་མྱོང་བར་འགྱུར་བ་དེ་བརྩལ་བའི་རྒྱུའམ། བརྩོན་པའི་རྒྱུས་སྡུག་བསྔལ་མྱོང་བར་འགྱུར་བར་བྱར་རུང་བའི་གནས་དེ་ལྟ་བུར་བསྒྱུར་དུ་རུང་ངམ། འོན་ཏེ་གནས་དེ་ལྟ་བུར་བསྒྱུར་དུ་མི་རུང་ཞེ་ན། སྨྲས་པ། གནས་དེ་ལྟ་བུར་བསྒྱུར་དུ་མི་རུང་ངོ༌། །ལས་གང་སྡུག་བསྔལ་མྱོང་བར་འགྱུར་བ་དེ་བརྩལ་བའི་རྒྱུའམ། བརྩོན་པའི་རྒྱུས་བདེ་བ་མྱོང་བར་འགྱུར་བར་བྱར་རུང་བའི་གནས་དེ་ལྟ་བུར་བསྒྱུར་དུ་རུང་ངམ། འོན་ཏེ་གནས་དེ་ལྟ་བུར་བསྒྱུར་དུ་མི་རུང་ཞེ་ན། སྨྲས་པ། གནས་དེ་ལྟ་བུར་བསྒྱུར་དུ་མི་རུང་ངོ༌། །ལས་གང་ཚེ་འདི་ལ་མྱོང་བར་འགྱུར་བ་དེ་བརྩལ་བའི་རྒྱུའམ། བརྩོན་པའི་རྒྱུས་ལན་གྲངས་གཞན་ལ་མྱོང་བར་འགྱུར་བར་བྱར་རུང་བའི་གནས་དེ་ལྟ་བུར་བསྒྱུར་དུ་རུང་ངམ། འོན་ཏེ་གནས་དེ་ལྟ་བུར་བསྒྱུར་དུ་མི་རུང་ཞེ་ན། སྨྲས་པ། གནས་དེ་ལྟ་བུར་བསྒྱུར་དུ་རུང་ངོ༌། །ལས་གང་ལན་གྲངས་གཞན་ལ་མྱོང་བར་འགྱུར་བ་དེ་བརྩལ་བའི་རྒྱུའམ། བརྩོན་པའི་རྒྱུས་ཚེ་འདི་ལ་མྱོང་བར་འགྱུར་བར་བྱར་རུང་བའི་གནས་དེ་ལྟ་བུར་བསྒྱུར་དུ་རུང་ངམ། འོན་ཏེ་གནས་དེ་ལྟ་བུར་བསྒྱུར་དུ་མི་རུང་ཞེ་ན། སྨྲས་པ། གནས་དེ་ལྟ་བུར་བསྒྱུར་དུ་མི་རུང་ངོ༌། །ལས་གང་ཆུང་དུ་མྱོང་བར་འགྱུར་བ་དེ་བརྩལ་བའི་རྒྱུའམ། བརྩོན་པའི་རྒྱུས་རྒྱ་ཆེ་བ་མྱོང་བར་འགྱུར་བར་བྱར་རུང་བའི་གནས་དེ་ལྟ་བུར་བསྒྱུར་དུ་རུང་ངམ། འོན་ཏེ་དེ་ལྟ་བུའི་གནས་སུ་བསྒྱུར་དུ་མི་རུང་ཞེ་ན། སྨྲས་པ། གནས་དེ་ལྟ་བུར་བསྒྱུར་དུ་རུང་ངོ༌། །ལས་གང་རྒྱ་ཆེན་པོ་མྱོང་བར་འགྱུར་བ་དེ་བརྩལ་བའི་རྒྱུའམ། བརྩོན་པའི་རྒྱུས་ཆུང་དུ་མྱོང་བར་འགྱུར་བར་བྱར་རུང་བའི་གནས་དེ་ལྟ་བུར་བསྒྱུར་དུ་རུང་ངམ། འོན་ཏེ་གནས་དེ་ལྟ་བུར་བསྒྱུར་དུ་མི་རུང་ཞེ་ན། སྨྲས་པ། གནས་དེ་ལྟ་བུར་བསྒྱུར་དུ་རུང་ངོ༌། །ལས་གང་ཡོངས་སུ་མ་སྨིན་པ་དེ་བརྩལ་བའི་རྒྱུའམ། བརྩོན་པའི་རྒྱུས་ཡོངས་སུ་སྨིན་པར་བྱར་རུང་བའི་གནས་དེ་ལྟ་བུར་བསྒྱུར་དུ་རུང་ངམ། འོན་ཏེ་གནས་དེ་ལྟ་བུར་བསྒྱུར་དུ་མི་རུང་ཞེ་ན། སྨྲས་པ། གནས་དེ་ལྟ་བུར་བསྒྱུར་དུ་མི་རུང་བ་ཡང་ཡོད། བསྒྱུར་དུ་རུང་བ་ཡང་ཡོད་དེ། དཔེར་ན་འདི་ན་ཁ་ཅིག་ཡོངས་སུ་མ་སྨིན་པའི་

---

^{[མ་དཔེ་གཟིགས་ན་འདིར་གནོན།]}

ལས་ཡོངས་སུ་སྨིན་པར་བྱའོ་སྙམ་ནས་རལ་པ་འཆད་པ་དང༌། སྐྲ་འབལ་བའམ། ཁ་སྤུ་འབལ་བའམ། སྐྲ་དང་ཁ་སྤུ་འབལ་བའམ། ལམ་ངན་པ་དང༌། དཀའ་ཐུབ་ངན་པ་སྣ་ཚོགས་ཀྱིས་བདག་ཉིད་ཀུན་དུ་གདུང་བར་བྱེད་པ་འདི་ནི་བསྒྱུར་དུ་མི་རུང་བའོ། །བསྒྱུར་དུ་རུང་བ་གང་ཞེ་ན། སྨྲས་པ། དཔེར་ན་འདི་ན་ཁ་ཅིག་ཡོངས་སུ་མ་སྨིན་པའི་ལས་ཡོངས་སུ་སྨིན་པར་བྱའོ་སྙམ་ནས། སྦྱོར་བ་དང་རྩོལ་བ་དང་འབད་པ་བྱས་ན། རྒྱུན་དུ་ཞུགས་པའི་འབྲས་བུ་ཐོབ་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། འབྲས་བུའི་མཆོག་དགྲ་བཅོམ་པ་ཉིད་འཐོབ་པ་འདི་ནི་བསྒྱུར་དུ་རུང་བའོ། །གང་ལས་ཡོངས་སུ་སྨིན་ཟིན་པ་དེ་བརྩལ་བའི་རྒྱུ་འམ། བརྩོན་པའི་རྒྱུས་གཞན་དུ་བསྒྱུར་དུ་རུང་བའི་གནས་དེ་ལྟ་བུར་བསྒྱུར་དུ་རུང་ངམ། འོན་ཏེ་གནས་དེ་ལྟ་བུར་བསྒྱུར་དུ་མི་རུང་ཞེ་ན། སྨྲས་པ། གནས་དེ་ལྟ་བུར་བསྒྱུར་དུ་རུང་ངོ༌། །ལས་ནི་གསུམ་སྟེ། གསུམ་གང་ཞེ་ན། ཚེ་འདི་ལ་མྱོང་བར་འགྱུར་བ་དང༌། སྐྱེས་ནས་མྱོང་བར་འགྱུར་བ་དང༌། ལན་གྲངས་གཞན་ལ་མྱོང་བར་འགྱུར་བའོ། །ཚེ་འདི་ལ་མྱོང་བར་འགྱུར་བའི་ལས་ཀྱི་རྣམ་པར་སྨིན་པ་ཉམས་སུ་མ་མྱོང་བར་སྐྱེས་ནས་མྱོང་བར་འགྱུར་བ་དང༌། ལན་གྲངས་གཞན་ལ་མྱོང་བར་འགྱུར་བའི་ལས་ཀྱི་རྣམ་པར་སྨིན་པ་ཉམས་སུ་མྱོང་བར་འགྱུར་བ་ཡོད་དམ་ཞེ་ན། སྨྲས་པ། ཉམས་སུ་མྱོང་བར་འགྱུར་བ་ཡོད་དེ། དེ་ཡང་དགྲ་བཅོམ་པ་ཉིད་ཐོབ་པ་ན། ལས་དེའི་རྣམ་པར་སྨིན་པ་མངོན་དུ་འབྱུང་ཞིང་འོང་བར་འགྱུར་བའི་ཕྱིར་རོ། །སྐྱེས་ནས་མྱོང་བར་འགྱུར་བའི་ལས་ཀྱི་རྣམ་པར་སྨིན་པ་ཉམས་སུ་མ་མྱོང་བར་ཚེ་འདི་ལ་མྱོང་བར་འགྱུར་བ་དང༌། ལན་གྲངས་གཞན་ལ་མྱོང་བར་འགྱུར་བའི་ལས་ཀྱི་རྣམ་པར་སྨིན་པ་ཉམས་སུ་མྱོང་བར་འགྱུར་བ་ཡོད་དམ་ཞེ་ན། སྨྲས་པ། ཉམས་སུ་མྱོང་བར་འགྱུར་བ་ཡོད་དེ། དེ་ཡང་དགྲ་བཅོམ་པ་ཉིད་ཐོབ་པ་ན། ལས་དེའི་རྣམ་པར་སྨིན་པ་མངོན་སུམ་དུ་འབྱུང་ཞིང་འོང་བར་འགྱུར་བའི་ཕྱིར་རོ། །ལན་གྲངས་གཞན་ལ་མྱོང་བར་འགྱུར་བའི་ལས་ཀྱི་རྣམ་པར་སྨིན་པ་ཉམས་སུ་མ་མྱོང་བ་ཚེ་འདི་ལ་མྱོང་བར་

---

^{[མ་དཔེ་གཟིགས་ན་འདིར་གནོན།]}

འགྱུར་བ་དང༌། སྐྱེས་ནས་མྱོང་བར་འགྱུར་བའི་ལས་ཀྱི་རྣམ་པར་སྨིན་པ་མྱོང་བར་འགྱུར་བ་ཡོད་དམ་ཞེ་ན། ཉམས་སུ་མྱོང་བར་འགྱུར་བ་ཡོད་དེ། དེ་ཡང་དགྲ་བཅོམ་པ་ཉིད་ཐོབ་པ་ནས། ལས་དེའི་རྣམ་པར་སྨིན་པ་མངོན་དུ་འབྱུང་ཞིང་འོང་བར་འགྱུར་བའི་ཕྱིར་རོ། །གཞན་ཡང་ལས་ནི་གསུམ་སྟེ། གསུམ་གང་ཞེ་ན། བདེ་བ་མྱོང་བར་འགྱུར་བ་དང༌། སྡུག་བསྔལ་མྱོང་བར་འགྱུར་བ་དང༌། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པ་མྱོང་བར་འགྱུར་བའོ། །བདེ་བ་མྱོང་བར་འགྱུར་བའི་ལས་ཀྱི་རྣམ་པར་སྨིན་པ་ཉམས་སུ་མ་མྱོང་བར་སྡུག་བསྔལ་མྱོང་བར་འགྱུར་བ་དང༌། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པ་མྱོང་བར་འགྱུར་བའི་ལས་ཀྱི་རྣམ་པར་སྨིན་པ་ཉམས་སུ་མྱོང་བར་འགྱུར་བ་ཡོད་དམ་ཞེ་ན། སྨྲས་པ། ཉམས་སུ་མྱོང་བར་འགྱུར་བ་ཡོད་དེ། དེ་ཡང་དགྲ་བཅོམ་པ་ཉིད་ཐོབ་པ་ན། ལས་དེའི་རྣམ་པར་སྨིན་པ་མངོན་དུ་འབྱུང་ཞིང་འོང་བར་འགྱུར་བའི་ཕྱིར་རོ། །སྡུག་བསྔལ་མྱོང་བར་འགྱུར་བའི་ལས་ཀྱི་རྣམ་པར་སྨིན་པ་ཉམས་སུ་མྱོང་བར་བདེ་བ་མྱོང་བར་འགྱུར་བ་དང༌། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པ་མྱོང་བར་འགྱུར་བའི་ལས་ཀྱི་རྣམ་པར་སྨིན་པ་ཉམས་སུ་མྱོང་བར་འགྱུར་བ་ཡོད་དམ་ཞེ་ན། སྨྲས་པ། ཉམས་སུ་མྱོང་བར་འགྱུར་བ་ཡོད་དེ། དེ་ཡང་དགྲ་བཅོམ་པ་ཉིད་ཐོབ་པ་ན། ལས་དེའི་རྣམ་པར་སྨིན་པ་མངོན་དུ་འབྱུང་ཞིང་འོང་བར་འགྱུར་བའི་ཕྱིར་རོ། །སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ལས་ཀྱི་རྣམ་པར་སྨིན་པ་ཉམས་སུ་མ་མྱོང་བར་བདེ་བ་མྱོང་བར་འགྱུར་བ་དང༌། སྡུག་བསྔལ་མྱོང་བར་འགྱུར་བའི་ལས་ཀྱི་རྣམ་པར་སྨིན་པ་ཉམས་སུ་མྱོང་བར་འགྱུར་བ་ཡོད་དམ་ཞེ་ན། སྨྲས་པ། ཉམས་སུ་མྱོང་བར་འགྱུར་བ་ཡོད་དེ། དེ་ཡང་དགྲ་བཅོམ་པ་ཉིད་ཐོབ་པ་ན། ལས་དེའི་རྣམ་པར་སྨིན་པ་མངོན་དུ་འབྱུང་ཞིང་འོང་བར་འགྱུར་བའི་ཕྱིར་རོ། །གཞན་ཡང་ལས་ནི་གསུམ་སྟེ། གསུམ་གང་ཞེ་ན། འདོད་པ་དང་ལྡན་པའི་ལས་དང༌། གཟུགས་དང་ལྡན་པའི་ལས་དང༌། གཟུགས་མེད་པ་དང་ལྡན་

---

^{[མ་དཔེ་གཟིགས་ན་འདིར་གནོན།]}

པའི་ལས་སོ། །འདོད་པ་དང་ལྡན་པའི་ལས་ཀྱི་རྣམ་པར་སྨིན་པ་མ་མྱོང་བར་གཟུགས་དང་ལྡན་པའི་ལས་དང༌། གཟུགས་མེད་པ་དང་ལྡན་པའི་ལས་ཀྱི་རྣམ་པར་སྨིན་པ་ཉམས་སུ་མྱོང་བར་འགྱུར་པ་ཡོད་དམ་ཞེ་ན། སྨྲས་པ། ཉམས་སུ་མྱོང་བར་འགྱུར་བ་ཡོད་དེ། དེ་ཡང་དགྲ་བཅོམ་པ་ཉིད་ཐོབ་པ་ན། ལས་དེའི་རྣམ་པར་སྨིན་པ་མངོན་དུ་འབྱུང་ཞིང་འོང་བར་འགྱུར་བའི་ཕྱིར་རོ། །གཟུགས་དང་ལྡན་པའི་ལས་ཀྱི་རྣམ་པར་སྨིན་པ་མ་མྱོང་བར་འདོད་པ་དང་ལྡན་པའི་ལས་དང༌། གཟུགས་མེད་པ་དང་ལྡན་པའི་ལས་ཀྱི་རྣམ་པར་སྨིན་པ་ཉམས་སུ་མྱོང་བར་འགྱུར་བ་ཡོད་དམ་ཞེ་ན། སྨྲས་པ། ཉམས་སུ་མྱོང་བར་འགྱུར་བ་ཡོད་དེ། དེ་ཡང་དགྲ་བཅོམ་པ་ཉིད་ཐོབ་པ་ན། ལས་དེའི་རྣམ་པར་སྨིན་པ་མངོན་དུ་འབྱུང་ཞིང་འོང་བར་འགྱུར་བའི་ཕྱིར་རོ། །གཟུགས་མེད་པ་དང་ལྡན་པའི་ལས་ཀྱི་རྣམ་པར་སྨིན་པ་ཉམས་སུ་མ་མྱོང་བར་འདོད་པ་དང་ལྡན་པའི་ལས་དང༌། གཟུགས་དང་ལྡན་པའི་ལས་ཀྱི་རྣམ་པར་སྨིན་པ་ཉམས་སུ་མྱོང་བར་འགྱུར་བ་ཡོད་དམ་ཞེ་ན། སྨྲས་པ། ཉམས་སུ་མྱོང་བར་འགྱུར་བ་ཡོད་དེ། དེ་ཡང་དགྲ་བཅོམ་པ་ཉིད་ཐོབ་པ་ན། ལས་དེའི་རྣམ་པར་སྨིན་པ་མངོན་དུ་འབྱུང་ཞིང་འོང་བར་འགྱུར་བའི་ཕྱིར་རོ། །གཅེར་བུ་པ་རྣམས་ནི་འདི་སྐད་དུ། སྐྱེས་བུ་གང་ཟག་འདིས་ཉམས་སུ་མྱོང་བ་ཅི་ཡང་རུང་བ་དེ་དག་ཐམས་ཅད་ནི། སྔོན་བྱས་པའི་རྒྱུ་ལས་བྱུང་བ་ཡིན་ནོ་ཞེས་ཟེར་ཏེ། དེ་དག་ལ་ནི་འདི་སྐད་དུ། གཅེར་བུ་པ་ཁྱེད་རྣམས་ཅིའི་ཕྱིར་དཀའ་ཐུབ་སྤྱོད་པར་བྱེད་ཅེས་བྱའོ། །དེ་དག་འདི་སྐད་དུ། བདག་ཅག་ནི་ཚེ་འདི་ལ་བརྩལ་བའི་ཕྱིར་དཀའ་ཐུབ་སྤྱོད་པར་བྱེད་དོ་ཞེས་ཟེར་ན། དེ་དག་ལ་འདི་སྐད་ཅེས་བྱ་སྟེ། གཅེར་བུ་པ་རྣམས་ཉོན་ཅིག །དེ་ལྟ་ན་སྐྱེས་བུ་གང་ཟག་འདིས་ཉམས་སུ་མྱོང་བ་ཅི་ཡང་རུང་བ་དེ་དག་ཐམས་ཅད་ནི། སྔོན་བྱས་པའི་རྒྱུ་ལས་བྱུང་བ་ཡིན་ཏེ། བདག་ཅག་ནི་ཚེ་འདི་ལ་བརྩལ་བའི་ཕྱིར་དཀའ་ཐུབ་སྤྱོད་པར་བྱེད་དོ་ཞེས་མ་ཟེར་ཅིག །དེ་སྟེ་ཁྱེད་ད་ལྟར་བདག་ཅག་གི་ཚེ་འདི་ལ་བརྩལ་བའི་ཕྱིར། དཀའ་ཐུབ་སྤྱོད་པར་བྱེད་དོ་ཞེས་ཟེར་ན་ནི། སྐྱེས་བུ་གང་ཟག་འདིས་

---

^{[མ་དཔེ་གཟིགས་ན་འདིར་གནོན།]}

ཉམས་སུ་མྱོང་བར་འགྱུར་བ་ཅི་ཡང་རུང་བ་དེ་དག་ཐམས་ཅད་སྔོན་བྱས་པའི་རྒྱུ་ལས་བྱུང་བ་ཡིན་ནོ་ཞེས་མ་ཟེར་ཅིག །སྐྱེས་བུ་གང་ཟག་འདིས་ཉམས་སུ་མྱོང་བ་ཅི་ཡང་རུང་བ་དེ་དག་ཐམས་ཅད་ནི། སྔོན་བྱས་པའི་རྒྱུ་ལས་བྱུང་བ་ཡིན་ཏེ། བདག་ཅག་ནི་ཚེ་འདི་ལ་བརྩལ་བའི་ཕྱིར་དཀའ་ཐུབ་སྤྱོད་པར་བྱེད་དོ་ཞེས་བྱར་མི་རུང་ངོ༌། །དེ་དག་འདི་སྐད་དུ། བདག་ཅག་གི་རྣམ་པར་སྨིན་པའི་ཡང་རྣམ་པར་སྨིན་པ་ཉམས་སུ་མྱོང་བར་བྱེད་དོ་ཞེས་ཟེར་ན་ཡང༌། དེ་དག་ལ་འདི་སྐད་དུ། ཅི་གཅེར་བུ་པ་ཁྱེད་ལ་དག་པར་འགྱུར་བ་ཡོད་དམ། གྲོལ་བར་འགྱུར་བ་ཡོད་དམ། མྱ་ངན་ལས་འདས་པར་འགྱུར་བ་ཡོད་དམ་ཞེས་བྱའོ། །དེ་དག་འདི་སྐད་དུ། ཚེ་དང་ལྡན་པ་བདག་ཅག་ལ་དག་པར་འགྱུར་བ་ཡང་ཡོད། གྲོལ་བར་འགྱུར་བ་ཡང་ཡོད། མྱ་ངན་ལས་འདའ་བར་འགྱུར་བ་ཡང་ཡོད་དོ་ཞེས་ཟེར་ན་ནི། དེ་དག་ལ་འདི་སྐད་ཅེས་བྱ་སྟེ། གཅེར་བུ་པ་རྣམས་ཉོན་ཅིག །དེ་ལྟར་ན་བདག་ཅག་ནི་རྣམ་པར་སྨིན་པའི་ཡང་རྣམ་པར་སྨིན་པ་ཉམས་སུ་མྱོང་བར་བྱེད་དེ། བདག་ཅག་ལ་དག་པར་འགྱུར་བ་ཡང་ཡོད། གྲོལ་བར་འགྱུར་བ་ཡང་ཡོད། མྱ་ངན་ལས་འདའ་བར་འགྱུར་བ་ཡང་ཡོད་དོ་ཞེས་མ་ཟེར་ཅིག །དེ་སྟེ་ཁྱེད་ད་ལྟར་བདག་ཅག་ལ་དག་པར་འགྱུར་བ་ཡང་ཡོད། གྲོལ་བར་འགྱུར་བ་ཡང་ཡོད། མྱ་ངན་ལས་འདའ་བར་འགྱུར་བ་ཡང་ཡོད་དོ་ཞེས་ཟེར་ན་ནི། བདག་ཅག་ནི་རྣམ་པར་སྨིན་པའི་ཡང་རྣམ་པར་སྨིན་པ་ཉམས་སུ་མྱོང་བར་བྱེད་དོ་ཞེས་མ་ཟེར་ཅིག །བདག་ཅག་ནི་རྣམ་པར་སྨིན་པའི་ཡང་རྣམ་པར་སྨིན་པ་ཉམས་སུ་མྱོང་བར་བྱེད་དེ། བདག་ཅག་ལ་དག་པར་འགྱུར་བ་ཡང་ཡོད། གྲོལ་བར་འགྱུར་བ་ཡང་ཡོད་དོ། །མྱ་ངན་ལས་འདའ་བར་འགྱུར་བ་ཡང་ཡོད་དོ་ཞེས་བྱར་ནི་མི་རུང་ངོ༌། །སྤུན་དྲུང་གིས་སྤུན་དྲུང་བཏང་སྟེ་སོང་ལ་མ་སོད་ཅིག །བདག་ཉིད་ཀྱིས་སོད་ལ་གཞན་གསོད་དུ་མ་གཞུག་ཅིག་ཅེས་བྱས་ན། དེ་གཉི་ག་མཚམས་མེད་པའི་ལས་དང་ལྡན་པར་འགྱུར་རམ། འོན་ཏེ་གཅིག་ལྡན་པར་འགྱུར་ཞེ་ན། སྨྲས་པ། གལ་ཏེ་

---

^{[མ་དཔེ་གཟིགས་ན་འདིར་གནོན།]}

བདག་ཉིད་ཀྱིས་བསད་ན་ནི། གཉི་ག་མཚམས་མེད་པའི་ལས་དང་ལྡན་བར་འགྱུར་རོ། །དེ་སྟེ་གཞན་གསོད་དུ་བཅུག་སྟེ། བདག་ཉིད་ཀྱིས་མ་བསད་ན་ནི། ཕྱི་མ་ཤོས་མཚམས་མེད་པའི་ལས་དང་ལྡན་པར་འགྱུར་གྱི། སྔ་མ་ཤོས་ནི་མ་ཡིན་ནོ། །དེ་སྟེ་བདག་དང་གཞན་གཉི་གས་བསད་ན་ཡང༌། ཕྱི་མ་ཤོས་ཉི་ཚེ་མཚམས་མེད་པའི་ལས་དང་ལྡན་པར་འགྱུར་གྱི། སྔ་མ་ཤོས་ནི་མ་ཡིན་ནོ། །སྤུན་དྲུང་གིས་སྤུན་དྲུང་བཏང་སྟེ་སོང་ལ་མ་སོད་ཅིག །གཞན་གསོད་དུ་ཆུག་ལ། བདག་ཉིད་ཀྱིས་མ་བསད་ཅིག་ཅེས་བྱས་ན། དེ་ཅི་གཉི་ག་མཚམས་མེད་པའི་ལས་དང་ལྡན་པར་འགྱུར་རམ། འོན་ཏེ་གཅིག་ལྡན་པར་འགྱུར་ཞེ་ན། སྨྲས་པ། གལ་ཏེ་གཞན་གསོད་དུ་བཅུག་སྟེ། བདག་ཉིད་ཀྱིས་མ་བསད་ན་ནི་གཉི་ག་མཚམས་མེད་པའི་ལས་དང་ལྡན་པར་འགྱུར། འོན་ཏེ་གཅིག་ལྡན་པར་འགྱུར་ཞེ་ན། སྨྲས་པ། གལ་ཏེ་གཞན་གསོད་དུ་བཅུག་སྟེ། བདག་ཉིད་ཀྱིས་མ་བསད་ན་ནི། གཉི་ག་མཚམས་མེད་པའི་ལས་དང་ལྡན་པར་འགྱུར་རོ། །དེ་སྟེ་བདག་ཉིད་ཀྱིས་བསད་དེ། གཞན་གསོད་དུ་མ་བཅུག་ན་ནི། ཕྱི་མ་ཤོས་མཚམས་མེད་པའི་ལས་དང་ལྡན་པར་འགྱུར་གྱི། སྔ་མ་ཤོས་ནི་མ་ཡིན་ནོ། །གལ་ཏེ་བདག་དང་གཞན་གཉི་གས་བསད་ན་ཡང༌། ཕྱི་མ་ཤོས་མཚམས་མེད་པའི་ལས་དང་ལྡན་པར་འགྱུར་གྱི། སྔ་མ་ཤོས་ནི་མ་ཡིན་ནོ། །སྤུན་དྲུང་གིས་སྤུན་དྲུང་བཏང་སྟེ། སོང་ལ་མ་སོད་ཅིག །བདག་དང་གཞན་གཉི་གས་སོད་ཅིག་ཅེས་བྱས་ན། དེ་ཅི་གཉི་ག་མཚམས་མེད་པའི་ལས་དང་ལྡན་པར་འགྱུར་རམ། འོན་ཏེ་མི་འགྱུར་ཞེ་ན། སྨྲས་པ། གལ་ཏེ་བདག་དང་གཉི་གས་བསད་ན་ནི། གཉི་ག་མཚམས་མེད་པའི་ལས་དང་ལྡན་པར་འགྱུར་རོ། །དེ་སྟེ་བདག་ཉིད་ཀྱིས་བསད་དེ་གཞན་གྱིས་མ་བསད་ན་ནི། ཕྱི་མ་ཤོས་མཚམས་མེད་པའི་ལས་དང་ལྡན་པར་འགྱུར་གྱི། སྔ་མ་ཤོས་ནི་མ་ཡིན་ནོ། །དེ་སྟེ་གཞན་གྱིས་བསད་དེ། བདག་ཉིད་ཀྱིས་མ་བསད་ན་ནི། ཕྱི་མ་ཤོས་མཚམས་མེད་པའི་ལས་དང་ལྡན་པར་འགྱུར་གྱི། སྔ་མ་ཤོས་ནི་མ་ཡིན་ནོ། །དེ་བཞིན་

---

^{[མ་དཔེ་གཟིགས་ན་འདིར་གནོན།]}

དུ་མཚོན་ཆ་དང༌། མེ་དང༌། དུག་དང༌། དབྱུག་པས་བསྣུན་པ་ལ་སོགས་པ་ཐབས་རྣམ་པ་སྣ་ཚོགས་ཀྱིས་བསད་པ་ཡང་དེ་དང་འདྲ་བར་བརྗོད་པར་བྱའོ། །སྤུན་དྲུང་གིས་སྤུན་དྲུང་ལ་ཇི་ལྟ་བ་བཞིན་དུ་མིང་པོས་སྲིང་མོ་ལ་བསྒོ་བ་དང༌། སྲིང་མོས་མིང་པོ་ལ་བསྒོ་བ་དང༌། སྤུན་དྲུང་མོས་སྤུན་དྲུང་མོ་ལ་བསྒོ་བ་ཡང་དེ་དང་འདྲའོ། །མ་ཇི་ལྟ་བ་བཞིན་དུ་ཕ་ཡང་དེ་དང་འདྲའོ། །མར་འདུ་ཤེས་པས་མ་གསད་པར་བྱའོ་སྙམ་སྟེ། ཉེ་དུ་མ་ཡིན་པའི་བུད་མེད་བསད་ན། དེ་ཅི་མཚམས་མེད་པའི་ལས་དང་ལྡན་པར་འགྱུར་རམ། འོན་ཏེ་མི་འགྱུར་ཞེ་ན། སྨྲས་པ། ལྡན་པར་ནི་མི་འགྱུར་རོ། །ཉེ་དུ་མ་ཡིན་པའི་བུད་མེད་དུ་འདུ་ཤེས་པས། ཉེ་དུ་མ་ཡིན་པའི་བུད་མེད་གསད་པར་བྱའོ་སྙམ་པ་ལས། མ་བསད་པར་གྱུར་ན། དེ་ཅི་མཚམས་མེད་པའི་ལས་དང་ལྡན་པར་འགྱུར་རམ། འོན་ཏེ་ལྡན་པར་མི་འགྱུར་ཞེ་ན། སྨྲས་པ། ལྡན་པར་མི་འགྱུར་རོ། །ཉེ་དུ་མ་ཡིན་པའི་བུད་མེད་ཡིན་པར་འདུ་ཤེས་པས། ཉེ་དུ་མ་ཡིན་པའི་བུད་མེད་བསད་ན། དེ་ཅི་མཚམས་མེད་པའི་ལས་དང་ལྡན་པར་འགྱུར་རམ། འོན་ཏེ་ལྡན་པར་མི་འགྱུར་ཞེ་ན། སྨྲས་པ། གལ་ཏེ་དགྲ་བཅོམ་མ་བསད་པར་གྱུར་ན་ནི། དེ་ལྡན་པར་འགྱུར་རོ། །དེ་ལྟ་མ་ཡིན་ན་ནི་མི་འགྱུར་རོ། །མར་འདུ་ཤེས་པས་མ་ཉིད་བསད་ན། དེ་ཅི་མཚམས་མེད་པའི་ལས་དང་ལྡན་པར་འགྱུར་རམ། འོན་ཏེ་མི་འགྱུར་ཞེ་ན། སྨྲས་པ། མཚམས་མེད་པའི་ལས་དང་ལྡན་པར་འགྱུར་རོ། །མ་ཇི་ལྟ་བ་བཞིན་དུ་ཕ་ཡང་དེ་དང་འདྲའོ། །སྤྱི་སྡོམ་ནི། ཆེད་དུ་བྱས་དང་རྩ་བ་དང༌། །རྒྱུ་མེད་པ་དང་ཆུང་དུ་དང༌། །ལས་དང་ཡང་དག་མ་བསྡམས་པ། །དེ་ཡི་གཞི་དང་སུམ་ཅུ་དྲུག །འདས་པའི་རྒྱུ་ལས་བྱུང་བ་དང༌། །རྩ་བཟད་དང་ཚེ་ཟད་པའོ། །ཆོས་མངོན་པ་ལས་ལས་གདགས་པ་བཤད་པ་ཚིགས་བཅུ་གཅིག་པའོ། །ལས་གདགས་པ་བཤད་པ་སྟེ་གསུམ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང༌། དཱ་ན་ཤཱི་ལ་དང༌། པྲཛྙཱ་ཝརྨ་དང༌། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།