སྙིང་རྗེ་ལ་བསྟོད་པ།
ཀུན་སྦྱིན།
རྒྱ་གར་སྐད་དུ། ཀཱ་རུ་ཎ་སྟོ་ཏྲ། བོད་སྐད་དུ། སྙིང་རྗེ་ལ་བསྟོད་པ། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །པདྨས་བརྒྱན་པ་ལྷུན་པོ་ལས་བྱུང་བ། །པདྨ་དྲི་མེད་ཕྱག་གི་དབུས་ན་བསྣམས། །ཐོར་ཚུགས་ཅན་ལ་གཟུགས་ལྡན་ཅོད་པན་ཐོགས། །སྤྱི་བོ་འོད་དཔག་མེད་བརྒྱན་ཕྱག་འཚལ་ལོ། །ཐུགས་རྗེ་བྱམས་པས་གཟིགས་པའི་བཅོམ་ལྡན་འདས། །ཕོངས་གྱུར་འགྲོ་བ་ལ་ནི་ཁྱོད་ལྟ་བུ། །གཟིགས་པ་ཙམ་གྱིས་ཞི་བར་མཛད་པ་པོ། །སྤྱན་རས་གཟིགས་ཀྱིས་བདག་ལ་གཟིགས་སུ་གསོལ། །མཆོག་སྦྱིན་བདག་ནི་རབ་ཏུ་སྡུག་བསྔལ་ཏེ། །མུན་ནག་གཏིབས་པ་སྣང་བ་མེད་པ་བཞིན། །རི་བོ་གཡང་སའི་ཁན་གནས་འདྲ་ཡི། །དུས་འདིར་ཐུགས་རྗེ་ལྡན་པས་གཟིགས་སུ་གསོལ། །ཕོངས་པ་གང་གིས་ད་ནི་དྲན་བྱས་ན། །དེ་ཡི་སྡུག་བསྔལ་བསལ་བར་བྱའོ་ཞེས། །དང་པོའི་སྨོན་ལམ་མི་འགྱུར་དེ་ལགས་ན། །བདག་ལ་དེ་འདྲའི་འབྲས་བུ་མཆིས་པར་མཛོད། །ང་ནི་མཐོང་ཐོས་རེག་པའམ་དྲན་ཡང་རུང༌། །ནད་རྣམས་ཀུན་གྱི་གསོས་སུ་གྱུར་ཅིག་ཅེས། །བདག་ནི་མི་བཟད་ནད་ཀྱིས་ཐེ་བས་ལགས་ཀྱིས།། མཆོག་སྦྱིན་དམ་བཅས་དེ་དག་དགོངས་སུ་གསོལ། །གང་ཞིག་སྡུག་བསྔལ་གང་གིས་ཉམ་ཐག་པ། །དེ་དང་དེ་ཡི་སྡུག་བསྔལ་བསལ་ལོ་ཞེས། །འགྲོ་ལ་དགོངས་པ་ཁྱོད་ཀྱིས་རྒྱུན་འབྱུང་ན། །མགོན་པོ་ཅི་སླད་སྡུག་བསྔལ་བདག་མ་གཟིགས། །གང་གིས་ཁྱོད་ནི་རྗེས་དྲན་ཙམ་གྱིས་ཀྱང༌། །
དེ་ཡི་མོད་ལ་མགོན་པོས་གནོད་བསལ་ན། །བདག་ནི་རྟག་ཏུ་འདི་ན་བྲོ་འཚལ་ཀྱང༌། །ཐུགས་དཔག་མ་མཛད་པ་ནི་བདག་བྱུར་ངན། །མཐུ་ལྡན་སྒྱུ་མེད་ཕན་མཛད་བློ་གྲོས་ཅན། །ཐུགས་རྗེ་ལྡན་པ་ཁྱོད་ལ་བསྟེན་ཀྱང་ནི། །ཅི་སྟེ་འདི་དག་ཞི་བར་མ་གྱུར་ན། །བདག་ནི་སྡུག་བསྔལ་གྱུར་ཏེ་ཀྱི་ཧུད་ཀྱིས། །གང་དང་གང་དག་སྡུག་བསྔལ་ཉམ་ཐག་ཅིང༌། །གང་དང་གང་དག་མགོན་མེད་གྱུར་རྣམས་ལ། །དེ་དང་དེར་ནི་ཁྱོད་ཀྱི་ཐུགས་རྗེ་སྟེ། །མངོན་པར་འཕེལ་བར་འགྱུར་ཞེས་དེ་སྐད་གདའ། །དེ་ནི་ལས་ངན་ཉོན་མོངས་བདག་ལགས་ཤིང༌། །སྡུག་བསྔལ་བཟོད་དཀས་ལུས་གཟིར་སྐྱབས་མ་མཆིས། །སྐྱབས་མེད་བདག་ལ་ཅི་སླད་ཐུགས་མི་རྗེ། །ཉི་ཚེར་གྱུར་ན་ཐུགས་རྗེ་མ་ལགས་མོད། །གང་ཚེ་སྔོན་ཆད་རྨོངས་པ་འཇིག་རྟེན་ན། །ཁྱོད་ཉིད་རྗེས་སུ་དྲན་པར་མ་བགྱིས་པ། །བདག་ནི་ཉོན་མོངས་སྟོབས་ཀྱིས་ཤིན་ཏུ་གཟིར། །མགོན་པོ་འགུམ་དུ་ཉེ་ན་ཐུགས་རྗེས་གཟིགས། ཐུགས་རྗེའི་འབྱུང་གནས་ཐུགས་རྗེ་ཆེ་རྒྱས་པ། །སྡུག་བསྔལ་མ་ལུས་ཟད་པར་མཛད་ཁྱོད་ཀྱིས། །ཅི་སྟེ་བདག་ནི་སྤངས་པར་གྱུར་ན་ཡང༌། །བདག་གི་མགོན་བགྱིད་གཞན་ནི་སུ་ལགས་གསུངས། །ཁྱོད་ལ་སྐྱབས་སུ་མཆིས་བ་ཙམ་གྱིས་ཀྱང༌། །དེ་ཡི་མོད་ལ་སྡུག་བསྔལ་སེལ་མཛད་པས། མགོན་པོ་ཁྱོད་ནི་བདག་གི་སྐྱབས་ལགས་ཀྱིས། །ཐུགས་རྗེས་མི་བཟད་འདི་ལས་བསྐྱབ་ཏུ་གསོལ། །མཚན་ནས་བརྗོད་པ་ཙམ་གྱིས་ཉམ་ཐག་པ། །ཞི་བར་མཛད་པ་ཁྱོད་དང་མཇལ་གྱུར་ལ། །བདག་གིས་འབད་ཀྱང་འབྲས་བུ་མ་མཆིས་ན། །ཁྱོད་ནི་ཐུགས་རྗེ་ཅན་དུ་རུང་ལགས་སམ། །ཁྱོད་ཀྱིས་སེམས་ཅན་བསྐྱབ་ཕྱིར་སྨོན་ལམ་གང༌། །བཏབ་པར་གྱུར་དེའང་འགྲུབ་པར་འགྱུར་ལགས་ན། །བདག་ཀྱང་སེམས་ཅན་གྲངས་སུ་གཏོགས་པས་ན། །མཆོག་སྦྱིན་བདག་གི་དུཿཁ་བསལ་དུ་གསོལ། །ཁྱོད་ལ་བདག་ནི་སྐྱབས་སུ་མཆིས་ཀྱང་ནི། །ཅི་སྟེ་དེ་ནི་ཉམ་ཐག་གྱུར་ན་ཀོ། །ཉི་མ་མུན་པའི་ཚེགས་སུ་གྱུར་པ་བཞིན། །ཟླ་བའི་འོད་ཟེར་སྲེག་པར་བྱེད་འདྲ་གང༌། །ཁྱོད་ནི་འཇིག་རྟེན་དག་ལ་གསོལ་འདེབས་ན། །བདག་ནི་ཁྱོད་ལ་གསོལ་བ་བགྱིད་གྱུར་པ། །བདག་ནི་སྐྱེ་བོ་ངན་པ་སྐལ་པ་ཆུང༌། །བསོད་ནམས་མིན་པའི་དྲི་མ་ངན་པ་ཅན། །མགོན་པོ་ཐུགས་རྗེ་ཆེ་དང་མ་བྲལ་
བས། །སེམས་ཅན་དོན་ལ་བསྐུལ་ལྟ་མི་འཚལ་ཀྱང༌། །སྡུག་བསྔལ་རང་བཞིན་དུ་ནི་བདག་གྱུར་པས། །སྐྱོབ་པའི་སྤྱན་སྔར་ཡང་ནི་གསོལ་བ་འདེབས། །ཕ་དང་མ་ལ་གང་ཞིག་སློང་ན་ཡང༌། །ཤིན་ཏུ་སྐྱོ་བ་མེད་པ་ཇི་བཞིན་དུ། །སེམས་ཅན་དོན་བརྩོན་དེ་ནི་ཁྱོད་ལགས་པས། །ཚེ་རབས་ཀུན་དུ་བདག་གི་སྐྱབས་མཛོད་ཅིག །སྡུག་བསྔལ་མི་བཟད་པས་ནི་བདག་གདུངས་པས། །བཅོམ་ལྡན་འདས་ལ་རྟག་ཏུ་འབོད་སྒྲོགས་ཀྱིས། །ཉིན་གཅིག་བཞིན་དུ་སྡིག་པའི་ལས་ཀྱིས་ནི། །ཟིལ་ནོན་འདི་ལས་བདག་ལ་སྲུང་དུ་གསོལ། །དེ་ལྟར་བདག་གིས་ཤིན་ཏུ་སྨྲེས་གསོལ་བས།། ཁྱོད་ཀྱི་ཐུགས་ནི་ཐུགས་རྗེས་བརླན་པ་ལྟར། །འགྲོ་བ་སྡུག་བསྔལ་བརྒྱ་ཡིས་གཟིར་བ་ལ། །སྲིད་ལས་གྲོལ་བས་དེ་བཞིན་གཟིགས་སུ་གསོལ། །ཐུགས་རྗེའི་དབང་དུ་གྱུར་ཅིང་སེམས་བརྟན་ལ། །གཞན་དོན་བརྩོན་ཞིང་ཡོན་ཏན་མཆོག་གི་གནས། །ཁྱོད་བཞིན་བདག་ཀྱང་སྡུག་བསྔལ་ཐམས་ཅད་ཀྱི། །གདུད་བསལ་བའི་མཐུ་དང་ལྡན་པར་ཤོག །དེ་ལྟར་སྲིད་པ་མཐར་ཕྱིན་སྤྱན་རས་གཟིགས་དབང་ལ། །བདག་གིས་བསྟོད་པ་བགྱིས་པའི་བསོད་ནམས་གང་ཐོབ་པ། །དེས་ནི་འགྲོ་བའི་སྡུག་བསྔལ་སྤངས་ཤིང་བཅོམ་པ་ཡི། །རང་བཞིན་བདེ་ལྡན་བདེ་བ་ཅན་དུ་འགྲོ་བར་ཤོག །སྙིང་རྗེ་ལ་བསྟོད་པ་དགེ་བསྙེན་ཀུན་སྦྱིན་གྱིས་མཛད་པ་རྫོགས་སོ།།