འཛག་པ་གཅོད་པའི་མན་ངག་ཅེས་བྱ་བ།
ཀུ་ཛི་པ།
རྒྱ་གར་སྐད་དུ། སྲང་བ་རི་ཙྪེ་དན་ནཱ་མ། བོད་སྐད་དུ། འཛག་པ་གཅོད་པའི་མན་ངག་ཅེས་བྱ་བ། ཡུམ་དོན་གྲུབ་མ་ལ་ཕྱག་འཚལ་ལོ། །རྐྱེན་དང་རྒྱ་མཚོ་རྒྱས་པ་དང༌། །གྲང་པ་སྤྱོད་ལམ་ཉེས་པ་སྟེ། །ཁ་ཟས་བྱིན་རླབས་དམ་ཚིག་གིས། །གྲང་པ་འཛག་བ་ཆུ་རྒྱུན་བཟློག །རྡོ་རྗེའི་རྐེད་པར་དར་དཀར་བསྒྲིལ། །དར་གྱི་སྐུད་པས་དམ་པར་བཅིངས། །གཡས་
གཡོན་བ་དྲག་ཏུ་སྤྲུགས། །བསམ་གཏན་ལྟེ་བར་གཏད་པར་གྱིས། །རྣམ་སྣང་སྒོ་རུ 
་སྐུ་ཡིག་བསྒོམ། །རྒྱུན་གཅོད་སྔགས་ནི་ཞལ་ནས་ལོངས། །ཟླ་བ་རྒྱས་ན་རྒྱ་མཚོ་ལུང༌། །ཁ་བྲག་བརྒྱད་ལ་ཆུ་རྒྱུན་འཛག། གངྒཱའི་རྒྱུན་བཟློག་རྣལ་འབྱོར་ཀྱེ། །མི་ལྟུང་ཚེ་རིང་བདེ་བ་ཐོབ། །རྡོ་རྗེའི་སྤྱི་བྲོ་དྲག་སེར་བསྒོམ། །ཧྲཱིཾ་ཧྲཱིཾ་ཧཱུཾ་གི་ཐིག་ལེ་འདྲ། །སྟེང་རླུང་བཅིངས་ནས་ཞགས་པ་ལྟར། །གཡས་སྐོར་ གཡོན་སྐོར་རྩ་ལ་གྲམ། །རྒྱ་མཚོ་གྲང་བ་མི་ཡིས་བསྲོ། །བཅུད་ལེན་སྨན་གྱི་སྦྱོར་བ་བྱ། །ཨ་རུ ་གསེར་མདོག་འོ་མར་བསྐོལ། །ཚ་བ་གསུམ་དང་ཅང་ཞི་བསྲེ། །བཅུད་ཅན་ཟས་དང་སྦྱར་ལ་བཟའ། །ན་བའི་ས་རུ་མུ་སྡུག་དང༌། །བེམ་རྟོལ་བརྒྱ་དང་རྩ་བརྒྱད་བརྒྱབ། །མར་བསྐོལ་རས་བལ་མེ་བཙའ་གདབ། །གྲང་འདོན་བགས་པ་རྐེད་ལ་དཀྲི། །ལྷ་སྲུང་ལོག་ན་གདོན་གྱི་རྐྱེན། །རྒྱ་མཚོ་མ་ཐུབ་འཛག་པ་ལ། །རང་བྱུང་མེ་ཏོག་གུ་གུལ་ནག །ཡུངས་ཀར་ཐལ་བ་མེ་ཀླད་བསྲེ། །ཧ་བུའི་སྔགས་བཟླས་རྡོ་རྗེར་བྱུག །དོག་པ་ནག་པོས་བཅིང་པར་བྱ། །དྲག་པོའི་སྤྱོད་ལམ་བཟླས་བྱས་ནས། །བུམ་པའི་རླུང་བཅིང་ཧཱུཾ་ཕཊ་འདྲེན། །རྣལ་འབྱོར་ཁ་ཟས་ཉམས་ན་ནི། །སེའུའི་ཤུན་ལྤགས་འོ་མར་བསྐོལ། །ཁ་ར་བཏབ་འཐུངས་འགག་པར་འགྱུར། །དམ་ཚིག་ཉམས་ནས་རྒྱུ་བ་ལ། །མཆོད་དང་གཏོར་མ་བྱིན་རླབས་ཞུ། །གཞན་དུ་ཐམས་ཅད་རྣལ་འབྱོར་ལ། །ཡོད་པ་དག་ནི་མ་ཡིན་ནོ། །འཇོག་པ་གཅོད་པའི་མན་ངག་ཅེས་བྱ་བ་སློབ་དཔོན་ཀུ་ཛི་པས་མཛད་པ་བ་རྫོགས་སོ།།