བསིལ་བའི་ཚལ་ཆེན་མོའི་སྒྲུབ་པའི་ཐབས།

---

^{[མ་དཔེ་གཟིགས་ན་འདིར་གནོན།]}

རྒྱ་གར་སྐད་དུ། མ་ཧཱ་ཤཱི་ཏ་བ་ཏཱི་སཱ་དྷ་ནཾ། བོད་སྐད་དུ། བསིལ་བའི་ཚལ་ཆེན་མོའི་སྒྲུབ་པའི་ཐབས། འཕགས་མ་བསིལ་བའི་ཚལ་ཆེན་མོ་ལ་ཕྱག་འཚལ་ལོ། །བསིལ་བའི་ཚལ་ཆེན་མོ་ཞལ་གཅིག་མ། ཕྱག་བཞི་པ་མདོག་དམར་མ། གཡས་པའི་ཕྱག་གཉིས་ན་ཕྲེང་བ་དང༌། མཆོག་སྦྱིན་པའི་ཕྱག་རྒྱའོ། །གཡོན་པའི་ཕྱག་གཉིས་ན་རྡོ་རྗེ་ལྕགས་ཀྱུ་དང༌། སྙིང་གར་གནས་པའི་པོ་ཏི་ཕྱག་ནའོ། །ཛྲྀཾ་གི་ས་བོན་ནོ། །འོད་དཔག་མེད་པའི་དབུ་རྒྱན་ཅན། སྐྱིལ་ཀྲུང་ཕྱེད་པ། ན་བཟའ་དང་རྒྱན་ལ་སོགས་པ་དང༌། ཉི་མའི་རྒྱབ་རྟེན་དང་གདན་དང་ལྡན་པའོ། །བཟླས་པའི་སྔགས་ནི། ཨོཾ་ཛྲྀཾ་སྭཱ་ཧཱ། བཟླའོ། །འཕགས་མ་བསིལ་བའི་ཚལ་ཆེན་མོའི་སྒྲུབ་པའི་ཐབས་རྫོགས་སོ།། །།པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།།