སྒྲོལ་མ་དཀར་མོའི་སྒྲུབ་ཐབས།
བཅོམ་ལྡན་འདས།
རྒྱ་གར་སྐད་དུ། སུ་ཀླཱ་ཏཱ་རཱ་སཱ་དྷ་ནཾ། བོད་སྐད་དུ། སྒྲོལ་མ་དཀར་མོའི་སྒྲུབ་ཐབས། བཅོམ་ལྡན་འདས་མ་སྒྲོལ་མ་ལ་ཕྱག་འཚལ་ལོ། །དཀར་པོའི་ལས་ནི་ཉེར་བསྒྲུབ་པའི། །སྒྲོལ་མ་དཀར་མོ་ལ་བཏུད་ནས། ཏིང་ངེ་འཛིན་འབྱུང་གདམས་ངག་གིས། །རྙེད་པའི་སྒྲུབ་ཐབས་དེ་བརྗོད་བྱ། །དང་པོ་རེ་ཞིག་སྔགས་པས་ཡིད་དང་མཐུན་པའི་གནས་སུ། བདེ་བའི་གདན་ལ་རྡོ་རྗེ་སྐྱིལ་མོ་ཀྲུང་བཅས་ཏེ། ཐང་ཀ་ལ་སོགས་པར་གཏོགས་པའི་བཅོམ་ལྡན་འདས་མ་དཀར་མོ་ཉེ་བར་སྟོན་པ་ནི་སྒྲོལ་མ་ལ་མེ་ཏོག་དང༌། བདུག་སྤོས་ལ་སོགས་པས་མཆོད་ནས། རང་གི་སྙིང་གར་ཨཾ་ལས་བྱུང་བའི་ཟླ་བ་ལ་ཧཱུཾ་དཀར་པོའོ། །དེ་ལས་འོད་དཀར་པོ་ཕྱོགས་བཅུར་ཡང་དག་པར་སྤྲོས་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས་རབ་ཏུ་བསྐུལ་ནས། རང་གི་སྙིང་གའི་ས་བོན་ལ་གཞུག་པར་བྱའོ། །དེ་ནས་བར་སྣང་ལ་བཅོམ་ལྡན་འདས་མ་སྒྲོལ་མ་དཀར་མོ་ཞལ་གསུམ་ཕྱག་དྲུག་མ་འོག་ནས་གསུངས་པའི་རང་གི་གཟུགས་སུ་བལྟ་བར་བྱའོ། །དེ་ནས་རང་གི་ས་བོན་ལས་བྱུང་བའི་ལྷ་རྫས་ཀྱི་མེ་ཏོག་ལ་སོགས་པས་མངོན་པར་མཆོད་ལ། སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། གསུམ་ལ་སྐྱབས་སུ་འགྲོ་བ་ལ་སོགས་པ་བྱའོ། །བུ་གཅིག་པ་ལ་བརྩེ་བའི་མཚན་ཉིད་ཕན་པ་དང༌། བདེ་བ་ལ་ཉེ་བར་སྟེར་བའི་མཚན་ཉིད་ནི་བྱམས་པའོ། །སྡུག་བསྔལ་དང་སྡུག་བསྔལ་གྱི་རྒྱུ་ལས་ཡང་དག་པར་སྒྲོལ་བའི་རང་བཞིན་ནི་སྙིང་རྗེའོ། །ཉན་ཐོས་ལ་སོགས་པའི་ལྟ་བ་ལས་རྣམ་པར་ལོག་པའི་མཚན་ཉིད་ནི་དགའ་བའོ། །གཟུང་བ་དང་འཛིན་པའི་རྣམ་པར་རྟོག་པ་བཅོམ་པའི་མཚན་ཉིད་ནི་བཏང་སྙོམས་སོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བ་ལ་ཆོས་ཐམས་ཅད་རང་བཞིན་མེད་པའི་སྟོང་པ་ཉིད་ཀྱི་ངོ་བོ་ཉིད་ཀྱི་བྱང་ཆུབ་མངོན་དུ་བྱའོ། །དེ་ནས་སྨོན་ལམ་རྗེས་སུ་དྲན་པ་ལས་མདུན་དུ་རཾ་ལས་བྱུང་བའི་ཉི་མ་ལ་ཧཱུཾ་ཡིག་ཡོངས་སུ་གྱུར་པ་ལས་རྡོ་རྗེའི་གུར་ལ་སོགས་པ་རྣམ་པར་བསྒོམས་ལ། དེའི་དབུས་སུ་པཾ་ཡོངས་སུ་གྱུར་པ་ལས་པདྨ་དེའི་སྟེང་དུ་ཟླ་བ་ལ་ཧཱུཾ་ཡིག་དཀར་པོར་ཡོངས་སུ་བལྟས་ལ། ཧཱུཾ་གི་ས་བོན་ནང་དུ་ཆུད་པའི་ཧཱུཾ་དང༌། ཨུཏྤ་ལ་ལ་བལྟའོ། །ཧཱུཾ་དང་ཨུཏྤ་ལ་གཉིས་འདྲེས་ཤིང་གྱུར་པ་ལས་རྫོགས་པའི་བཅོམ་ལྡན་འདས་མ་དུར་
ཁྲོད་བརྒྱད་ཀྱིས་ཉེ་བར་བརྒྱན་པ། དཀར་བ་ཞལ་གསུམ་པ་དཀར་བ་དང༌། སེར་བ་དང༌། ནག་པོ་ནི་རྩ་བ་དང༌། གཡས་དང་ཅིག་ཤོས་ཀྱི་ཞལ་ལོ། །ཞལ་སོ་སོ་ལ་སྤྱན་གསུམ་གསུམ་མོ། །དེ་བཞིན་གཤེགས་པ་རྣམ་པ་ལྔ་འཕྲོ་བ། ཕྱག་དྲུག་པ། གཡས་ཀྱིས་མཆོག་སྦྱིན་དང༌། ཕྲེང་བ་དང༌། མདའ་བསྣམས་པའོ། །གཡོན་གྱིས་ཨུཏྤ་ལ་དང༌། པདྨ་དང༌། གཞུ་བསྣམས་པའོ། །ཟླ་བའི་གདན་ལ་སྐྱིལ་ཀྲུང་ཕྱེད་པས་བཞུགས་པ་ཟླ་བའི་རྒྱབ་ཡོལ་ཅན། རལ་པའི་ཅོད་པན་དང་ལྡན་པའི་དབུ་ལ་མགོ་བོ་རྣམ་པ་ལྔས་བརྒྱན་པ། ཟླ་བ་ཕྱེད་པས་དབུ་ཐོད་བྱས་པ། རྒྱན་ཐམས་ཅད་ཀྱིས་བརྒྱན་པ། སྟག་གི་པགས་པའི་ཤམ་ཐབས་ཅན། བརྒྱད་གཉིས་ལོན་པའི་རྣམ་པ་ཅན། མ་ལུས་པའི་སེམས་ཅན་ལ་དཀར་པོའི་ལས་ཉེ་བར་སྟོན་པའི་སྒྲོལ་མའོ། །མི་གཡོ་བའི་དེ་ཁོ་ན་ཉིད་སྟོན་པས་ཨ་ཙ་ལེའོ། །རྒྱུ་དང་འབྲས་བུ་དབྱེར་མེད་པའི་རིམ་པས་ཨ་ནི་མིཏྟ་པ་རཾ་མོ། །ཤེས་རབ་དང་ཐབས་ཀྱི་རང་བཞིན་གྱིས་ཧཱུཾ་ངོ༌། །སྨོན་པ་མེད་པའི་རང་བཞིན་མ་རིག་པ་ཉེ་བར་ཞི་བས་ཕཊ་དང་སྤེལ་བའོ། །འདོད་ཆགས་ལ་སོགས་པ་ཉོན་མོངས་པ་རབ་ཏུ་ཞི་བས་སྭཱ་ཧཱ་མཐར་བསྒོམ་པར་བྱའོ། །དེ་ནས་བཅོམ་ལྡན་འདས་མའི་སྙིང་གར་གཉུག་མའི་ས་བོན་བལྟས་ལ། དེ་ནས་ཡང་འོད་ཟེར་ཕྱུང་སྟེ། ཁམས་གསུམ་ཁྱབ་པར་བྱས་ནས། དེ་ཉིད་ལ་རབ་ཏུ་གཞུག་པར་བྱའོ། །དེའི་རྗེས་སུ་བསྒོམས་པས་སྐྱོ་ན་སྔགས་བཟླས་པར་བྱའོ། །དེ་ལ་སྔགས་ནི་འདི་ཡིན་ཏེ། ཨོཾ་ཨ་ཙ་ལེ་ཨ་ནི་མིཏྟ་བ་རཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཡང་ཆོ་ག་ནི་འདི་ཡིན་ཏེ། ཚེས་བརྒྱད་ནས་བཟུང་སྟེ་གསོ་སྦྱོང་དང་ལྡན་པར་བྱས་ལ། ཇི་སྲིད་ཟླ་བ་ཉའི་བར་དུ་ཐུན་མཚམས་བཞི་རུ་མཆོད་པ་དང༌། གཏོར་མའི་ཆོ་ག་སྔོན་དུ་འགྲོ་བས། བཅོམ་ལྡན་འདས་མ་བསྒོམ་ཞིང་དེ་ལྟར་ཆོ་ག་བྱས་ན། ཆར་མེད་ན་ཆར་འབབ་པར་འགྱུར་རོ། །རྟག་ཏུ་སྒོམ་པར་བྱེད་ན་ས་ལ་སོགས་པ་ཡང་འགྲུབ་བོ། །འཕགས་མ་དཀར་བ་ཉེ་བར་སྟོན་པའི་སྒྲོལ་མ་ཞེས་བྱ་བའི་སྒྲུབ་པའི་ཐབས། བཅོམ་ལྡན་འདས་ཉིད་ཀྱིས་གསུངས་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ།།