རྗེ་ཉིད་ཀྱི་རྣམ་ཐར་ཚིགས་བཅད་མ།
ཨོཾ་སྭསྟི་སིདྡྷཾ། ཡོན་ཏན་ཀུན་གཏེར་བརྩེ་བས་དབང་བསྒྱུར་འདྲེན་པའི་མཆོག །ཡིད་ཀྱི་མུན་སེལ་རབ་ཞི་བདུད་རྩི་མཆོག་གི་དབྱིངས། །སྐྱབས་གསུམ་ཡིད་བཞིན་དབང་པོ་ལྷ་དང་མིས་མཆོད་པ། །འགྲོ་མགོན་ཏི་ཤྲི་དཔལ་ལྡན་རིན་ཆེན་ཞབས་ལ་འདུད། །སེར་སྐྱའི་གྲོང་ཁྱེར་མཆོག་འདྲ་པ་ཚབ་འདམ། །ལུམྦིའི་ཚལ་རབ་ལྟ་བུ་ལྡ་ས་ཐེལ། །བཀྲ་ཤིས་མཚན་ལྡན་བཟང་པོར་སྐུ་བལྟམས་ཤིང༌། །ཡབ་ཡུམ་ངོ་མཚར་དགྱེས་ཤིང་དགའ་སྟོན་མཛད། །ལོ་ལྔ་ལོན་ནས་གཤེགས་བཞུད་མཛད་པ་ལ། །བྱིས་པའི་ཚོགས་དང་བིའུ་རིའུ་ལུ་གུ་རྣམས། །བུ་རྣམས་མ་ཕྱིར་འབྲང་བ་ཇི་བཞིན་ཏེ། །བྱམས་པའི་ཐུགས་ཀྱིས་འཛིན་ཅིང་སྲི་ཞུ་མཛད། །ལོ་བདུན་ལོན་ནས་བྱིས་པའི་ཚོགས་རྣམས་ལ། །ཆོས་བཤད་ཚུལ་དང་སྒོམ་པའི་ལུས་གནད་སྟོན། །འཚོ་བ་བཟའ་བཏུང་ཕྱག་ཏུ་བྱུང་བ་རྣམས། །ཉིད་ཀྱི་མི་གསོལ་ཀུན་ལ་བཀྱེ་བཀོད་མཛད། །རྩེ་བ་ཞེས་པ་བཙད་པོའི་ལྷ་ཁང་དུ། །སྔོན་ཆད་མ་མཇལ་སུས་ཀྱང་མ་བསྟན་པར། །ཚེ་རབས་ཀུན་གྱི་བླ་མ་དེ་དུས་རིག །སྒོམ་ནག་མཚན་གསོལ་ཁྱེད་ལ་ཕྱག་འཚལ་བསྟོད། །ཀུན་གྱི་བཤེས་གཉེན་ལྟ་བུ་དབང་སེང་ལས། །ལོ་བརྒྱད་ལོན་ནས་ཡིག་རྩིས་ཐ་སྙད་བསླབ། །སྒོམ་ཁྲིད་ཐོན་ནས་ ཚལ་དང 
་ཡེར་པར་བྱོན། །ཚལ་པའི་སྤྱན་སྔར་སྒ་ལོ་དྭགས་སོགས་པའི། །དཀྱིལ་འཁོར་རྒྱས་པའི་དབང་སོགས་མང་དུ་ཞུས། །ཡེར་པར་སངས་སྒོམ་རིན་ཆེན་སྤྱན་སྔ་རུ། །ལམ་འབྲས་ཞི་བྱེད་བསྟན་རིམ་ལ་སོགས་པ། །འབྲི་སྒོམ་རྗེ་པའི་གདམས་པ་མ་ལུས་དང༌། །ཆོས་བཅུ་རིམ་ལྔ་ལམ་རིམ་ཁྲིད་རྣམས་ཞུས། །རྗེ་པའི་དབོན་པོ་སྨོན་ལམ་འོད་ཟེར་ལས། །རྔོག་ལུགས་རྒྱུད་གསུམ་མན་ངག་དང་བཅས་གསན། །ནམ་ར་གླག་མར་འབྲི་གུང་རྗེ་དང་མཇལ། །ཅིས་ཀྱང་འབྲི་གུང་མཐིལ་ལ་ཤོག་ཅིག་གསུངས། །བཅོ་བརྒྱད་ལོན་ནས་ཡེར་པ་ཨན་ཆུང་དུ། །མཁན་པོ་སྟོན་གྲགས་སློབ་དཔོན་དར་གཞོན་ལས། །རྣམ་དག་མཆོད་རྟེན་དྲུང་ལྟར་རབ་ཏུ་བྱུང༌། །མཁན་སློབ་གཉིས་ལས་བདེན་གཉིས་འདུལ་བ་གསན། །དུས་དེ་ཉིད་ནས་ཙམ་ཆེན་གངས་ལ་བྱོན། །རྗེ་ཡི་བཞུགས་གདན་རྡུལ་བསལ་མཛད་པའི་ཚེ། །གཉིས་མེད་སེམས་ཀྱི་ངོ་བོ་ལྷན་གྱིས་མཐོང༌། །ལྷ་ལུང་རྫ་ལུང་གཡུ་ལུང་རྫ་དེའུ་དང༌། །ལུ་གུ་སྙིང་སོགས་གངས་ཁྲོད་རྣམ་དག་ཏུ། །ནེ་རཉྫ་ནའི་འགྲམ་ལྟར་ཐུགས་དམ་བསྐྱངས། །འགྱུར་མེད་ཆོས་ཀྱི་སྐུ་ལ་ཕྱག་འཚལ་བསྟོད། །སྟག་ལུང་ཐང་པ་དཔལ་ལྡན་སྤྱན་སྔ་རུ། །མགོན་པོ་ཕག་མོ་གྲུ་པའི་ཆོས་རྣམས་ཞུས། །གང་ཚེ་འབྲི་གུང་མཐིལ་ལ་བྱོན་པ་ན། །ཡང་དགོན་གླིང་དང་བཅས་པའི་འདུག་ལུགས་ལ། །བདེ་མཆོག་དཀྱིལ་འཁོར་ཚུལ་དུ་མཐོང་སྣང་བྱུང༌། །རིན་ཆེན་སྤྱན་སྔར་སེམས་བསྐྱེད་ལ་སོགས་པ། །ཐུགས་ཀྱི་སྙིང་ཁུ་ཟབ་ཆོས་མང་པོ་ཞུས། །རྟོགས་པ་ཕུལ་བས་ཤིན་ཏུ་མཉེས་མཛད་དེ། །ཁྱེད་ཀྱིས་སུ་ལས་ཐོབ་ཅེས་བྱ་བ་གསུངས། །འདྲེན་པ་འབའ་རོམ་པ་ལས་འཁྲུངས་ཞེས་ཞུས། །ཆོས་རྗེའི་མཛད་པ་རྣམ་ཐར་ཆོས་ལུགས་ལ། །ཕྱི་ནང་གསང་གསུམ་གོ་བ་མང་པོ་འཁྲུངས། །དེ་དུས་ཉིད་ནས་ཐག་མ་དཔལ་ཆེན་དང༌། །སློབ་དཔོན་གུ་ར་བ་དང་དར་གཞོན་སོགས། །དགེ་སློང་ཉི་ཤུའི་སྤྱན་སྔར་བསྙེན་པར་རྫོགས། །རྟེན་འབྲེལ་མངོན་དུ་རྫོགས་ལ་ཕྱག་འཚལ་བསྟོད། །མ་གྷ་དྷ་རུ་ཐུབ་པ་སངས་རྒྱས་ཀྱང༌། །ཝཱ་རཱ་ཎ་སཱིར་གདུལ་བྱ་གཟིགས་པ་ལྟར། །འགྲོ་བ་འདྲེན་པའི་མི་མཆོག་འབའ་རོམ་པས། །ཁྱོད་ཀྱི་གདུལ་བྱ་ཤར་ན་ཡོད་དོ་ཞེས། །སྤོམ་ར་རྒྱལ་པོའི་ཡུལ་དུ་ལུང་བསྟན་མཛད། །ཞལ་ཏ་བྱིན་རླབས་འགྲོ་ཆོས་གནང་མཛད་ནས། །འདུས་པ་མང་པོའི་ཕྲིན་ལས་འབྱུང་ལུགས་གསུངས། །དགའ་བཞིན་བྲོད་པས་ཁམས་སུ་བྱོན་པའི་ཚེ། །ཟླ་སྨད་རླེའུ་རུ་སམ་རྟག་དགོན་པ་རུ། །ཁྲོ་རྒྱལ་རྟ་མགྲིན་རྡོ་རྗེ་ཕག་མོ་གཟིགས། །འབྲི་ཀླུང་རྒྱལ་པོའི་ཕོ་བྲང་ཞལ་བུ་མདོར། །ནུབ་གཅིག་ཐམ་ཐུམ་གཟིམས་པའི་རྨང་ལམ་ན། །གསེར་མི་ཆེན་པོ་གསེར་གྱི་རལ་གུ་གོན། །གཡས་པས་ཕྱར་དར་གཡོན་པས་ནེའུ་ལེའི་སྐྱལ་པ་འཛིན། །དབུ་ལ་གསེར་ཞྭ་སྤྱི་རིང་འདབ་མ་ཅན། །རྨ་བྱའི་སྒྲོ་འཕྲུ་བཙུགས་པ་སྒེག་ཅིང་འཛུམ། །ངང་དཀར་རྔོག་དམར་གསེར་ཆས་བརྒྱན་པ་བཅིབས། །སྤྱན་སྔར་བྱོན་ཏེ་ཡུལ་དུ་འབྱོན་ཅེས་ཞུས། །སྤོམ་ར་ཡིན་སྙམ་དགོངས་པས་ཤར་དུ་བྱོན། །རྣམ་ཐོས་གཙུག་གི་ནོར་བུར་ཕྱག་འཚལ་བསྟོད། །ཡོབ་ཆེན་གནས་སུ་ཞག་འགའ་བཞུགས་པའི་ཚེ། །ནུབ་གཅིག་དཔལ་ལྡན་ལྷ་མོ་རེ་མ་ཏི། །གཟི་བརྗིད་བསྐྱེད་དེ་ཅུང་ཟད་འཛུམ་བཅས་བྱོན། །ཁྱོད་ཀྱི་གདུལ་བྱ་ཙཱ་མིའི་རྒྱལ་ཁམས་ཡིན། །མི་ཉག་ཡུལ་དུ་ཅིས་ཀྱང་བྱོན་ཅིག་གསུངས། །གཞན་ཡང་མ་མགོན་ཡུལ་ལྷ་ཀུན་གྱིས་བསུས། །ནུབ་གཅིག་འོད་གསལ་ཉམས་གྱི་སྣང་བ་ལ། །ཁོ་རང་ཉིད་དང་གཅེན་གཅུང་སྐུ་མཆེད་གསུམ། །མ་ཡིན་ཟེར་བའི་བུད་མེད་གཅིག་དང་བཞི། །དེ་ཡིས་ཐུན་མོང་གསེར་གྱི་མཎྜལ་གཅིག །རིན་ཆེན་གསེར་གྱི་ཚོམ་བུ་བཀོད་ནས་སུ། །དགེ་བའི་བཤེས་གཉེན་གཅིག་ལ་ཕུལ་བ་རྨིས། །ནུ་བོར་སྨོས་དེས་འབུལ་བའི་ལག་ལེན་བྱས། །དེ་འབྲས་ཁོ་ཡིས་རྒྱལ་པོ་ཐོབ་པར་གྱུར། །མི་དབང་གཙུག་གི་ནོར་བུར་གསོལ་བ་འདེབས། །ཙོང་ཀ་ཏྲེ་རོང་དགོན་པར་བྱོན་པའི་ཚེ། །སློབ་དཔོན་ཡར་ལུང་བ་དང་དེའུ་པོ་པས། །བྱམས་པས་ནོར་བཟང་བསུས་པ་ཇི་བཞིན་དུ། །བསྔགས་དང་བཀུར་བ་སྣ་ལེན་རིམ་པར་མཛད། །འཇུ་ལག་ལྷས་ཅུང་དགོན་པར་ལོ་གཉིས་སུ། །སྒྲོལ་རྒྱུའི་ཚལ་དུ་བསྐུལ་བ་གཟིགས་པ་ལྟར། །ཏིང་འཛིན་རོལ་པའི་རྩེད་མོ་ཉམས་ལ་བསྟར། །སུམ་ཅུ་རྩ་ལྔའི་དུས་ན་གོ་ར་དང༌། །གཡར་པ་གུ་རུབ་ཞིན་ཁྱེའུ་གཟི་འགའ་དང༌། །མཁར་ལུང་བླ་ཆེན་དགོན་པར་ཚོགས་པ་བསྐྱངས། །གུ་རུབ་དགོན་པར་ཚོགས་པ་སྐྱོང་བའི་ཚེ། །དངོས་བརྒྱུད་བླ་མ་གོང་མ་ཐམས་ཅད་དང༌། །ཡི་དམ་མཁའ་འགྲོའི་ཚོགས་རྣམས་བྱོན་མཛད་དེ། །བྱིན་རླབས་ཕྲིན་ལས་རྒྱ་ཆེན་དེ་དུས་མཛད། །གཤེགས་བཞུད་མཛད་ཚེ་ནམ་མཁར་འཇའ་འཁྲིགས་ཤིང༌། །ཅང་ཏེའུ་ཌཱ་རུ་ཀུན་གྱིས་ཐོས་པར་འཁྲོལ། །ཞིན་ཁྱེའུ་ཕྱིན་ཆད་མི་ཉག་རྒྱ་བོད་གསུམ། །སྟོང་ཕྲག་མང་པོ་དུས་གཅིག་རུབ་ཀྱིས་འདུས། །གངས་རི་ལྟ་བུར་རྒྱང་ནས་རབ་གསལ་བའི། །སྡེ་སྣོད་འཛིན་པ་མཁས་པའི་ཚོགས་རྣམས་བྱོན། །སྟོང་ཕྲག་མང་པོ་བསྟན་ལ་རབ་དགའ་རྣམས། །ངེས་འབྱུང་ཐར་པ་ཐོབ་ཕྱིར་མཁན་པོ་མཛད། །འབུལ་ཚོགས་མང་པོ་རྒྱལ་ཁམས་གསུམ་གྱི་མིས། །བྱང་ཆུབ་ཐོབ་ཕྱིར་ཕལ་ཆེར་སེམས་བསྐྱེད་དོ། །སྣོད་ལྡན་བརྩོན་འགྲུས་བརྩམས་པའི་གང་ཟག་རྣམས། །སྨིན་ལམ་དབང་བསྐུར་གྲོལ་ལམ་གདམས་པ་ཡི། །ཁྲིད་མཛད་དཔག་བསམ་ཤིང་ལྟར་འབྲས་བུ་བསྐྲུན། །བསྐྱངས་པ་མཐར་ཕྱིན་མཛད་ལ་ཕྱག་འཚལ་བསྟོད། །གཟི་འགར་ནུབ་གཅིག་ཉམས་ཀྱི་རྨང་ལམ་ལ། །ཕུ་ནས་ཆོས་འགའ་མདའ་ནས་གདུགས་གཅིག་བྱུང༌། །དེ་སོགས་ཕྱིན་ཆད་རྒྱལ་པོའི་བླ་མཆོད་མཛད། །ལྷ་རི་དཀར་པོའི་གནོད་སྦྱིན་མཆེད་གསུམ་ནས། །མཁའ་འགྲོ་གསེར་གྱི་མཆེ་བ་ཅན་སོགས་དང༌། །སེང་རུ་ངང་ཡག་གངས་དཀར་ཤ་མེད་སོགས། །དཔག་མེད་ཡུལ་ལྷའི་ཚོགས་ཀྱིས་གུས་བཏུད་མཆོད། །ཡོ་བྱད་རྫས་ཀྱི་དངོས་པོ་ཐམས་ཅད་ཀྱང༌། །སྦྱིན་བདག་ཚོགས་རྫོགས་བསོད་ནམས་སྤེལ་བའི་ཕྱིར། །དངོས་བརྒྱུད་གདན་ས་རབ་བྱུང་ཐམས་ཅད་ལ། །ཕུན་སུམ་ཚོགས་པའི་ཞབས་ཏོག་མཐའ་ཡས་མཛད། །འོད་སྲུང་རྒྱལ་བའི་བཞུགས་གནས་ཅིར་ཁབ་ཀྱི། །སྤྲུལ་པའི་ལྷ་ཁང་ལ་སོགས་མང་པོ་གསོས། །ཕྱི་སྣོད་ནང་བཅུད་འཛོམས་པའི་གཙུག་ལག་ཁང༌། །མཁར་ལུང་གནས་གསར་ལ་སོགས་གྲངས་བཅད་མཛད། །གསེར་འབུམ་རྒྱུད་འབུམ་སྒོ་མང་རྣམ་གཉིས་དང༌། །གསེར་སྐུ་གཉིས་དང་དངུལ་སྐུ་བཏགས་སྐུ་བཞེངས། །དབུས་གཙང་ཁམས་གསུམ་ཕྱོགས་རིས་མེད་པ་ལ། །ཐམས་ཅད་སྒྲོལ་བཞིན་ཀུན་གྱི་རེ་བ་བསྐོངས། །མཛད་པ་མཐའ་ཡས་ཁྱོད་ལ་ཕྱག་འཚལ་བསྟོད། །སྐུ་གཟུགས་གསུང་རབ་མཆོད་རྟེན་གཙུག་ལག་ཁང༌། །གྲངས་ལས་འདས་པ་སྐུ་གསུང་ཐུགས་ཀྱི་རྟེན། །མངའ་གསོལ་རབ་ཏུ་གནས་པ་མཛད་པའི་ཚེ། །ལ་ལ་དྲག་ཏུ་ཁྲོ་བོ་ཧཱུྃ་སྒྲ་སྒྲོགས། །ལ་ལའི་གནས་སུ་བུམ་ཆུ་རང་བཞིན་ཁོལ། །ལ་ལའི་གནས་སུ་ཤིང་ལས་པདྨོ་རྡོལ། །ལ་ལའི་གནས་སུ་རྟེན་ལས་འོད་ཟེར་བྱུང༌། །ལ་ལ་དག་ལ་མེ་ཏོག་རང་འབྱར་ཏེ། །ལ་ལ་དག་ལ་ལྡུམ་རའི་མེ་ཏོག་ཆགས། །དག་པའི་རྒྱལ་ཁམས་ཆོས་ལ་སྤྱོད་པའི་ས། །མི་རིགས་མི་མཐུན་སྐད་རིགས་བརྒྱད་ཀྱི་ཡུལ། །རྒྱལ་བློན་འབངས་དང་བཅས་པ་བྱེ་བ་རྣམས། །སྲོག་གི་ཕྱིར་ཡང་དམ་ཆོས་མི་གཏོང་ཞིང༌། །མི་ཕྱེད་དད་པ་ཐོབ་མཛད་ཆོས་ཀྱི་རྗེ། །བསྡུ་བཞིས་འགྲོ་བ་འདྲེན་པའི་རིན་པོ་ཆེ། །ལུང་བསྟན་མཆོག་ཐོབ་ཁྱོད་ལ་ཕྱག་འཚལ་བསྟོད། །རྒྱལ་རབས་དགུ་པའི་དུས་ན་འགའ་མཁར་དུ། །བྱང་ཕྱོགས་གདུག་པའི་དམག་ཚོགས་འོངས་པའི་ཚེ། །ནང་གཅིག་མལ་ནས་ཐུགས་དམ་མཛད་པའི་ཚེ། །ཡུལ་ཁམས་སྐྱོང་བའི་རྒྱལ་པོ་རྣམ་ཐོས་སྲས། །སྐུ་ལ་གསེར་ཁྲབ་གསོལ་ཞིང་རྟ་བཅིབས་ནས། །བྲོས་པ་ལྟར་མཛད་ཤིན་ཏུ་རིངས་པར་བྱོན། །དེའི་ཕྱི་བཞིན་བདུད་རིགས་སྲིན་པོ་ནི། །གནམ་ཐེལ་དཀར་པོའི་གཟུགས་ཅན་སྡིག་པ་ཡི། །སྣ་འདྲ་ཁ་འདྲ་ཁ་དོག་དམར་པོ་ཅན། །མགོ་བོས་ནམ་མཁའ་ཁེངས་པ་ཁ་གདངས་ཤིང༌། །ཤར་ཕྱོགས་ངོས་ནས་འགའ་མཁར་ཉིད་དུ་བྱུང༌། །ཉིད་ཀྱིས་བྱམས་པའི་ཐུགས་མཆོག་རབ་བསྐྱེད་དེ། །ཡི་དམ་འཁོར་ལོ་སྡོམ་པའི་སྐུར་མཛད་ནས། །གདུག་པའི་སེམས་ཅན་དེ་ཡི་ཐད་དུ་བྱོན། །ཁ་ནི་བཙུམ་སྟེ་རྒྱལ་ཆེན་ཕྱི་བཞིན་ཐལ། །ད་ལན་མི་འཆོར་ལར་ནི་མི་གཏོང་ཞེས། །རྒྱལ་པོ་ལ་སོགས་ཀུན་ལ་གོ་བར་མཛད། །ངས་ཀྱང་རྟེན་འབྲེལ་ཟབ་མོ་བསྒྲིགས་པ་དང༌། །ཟློག་པའི་སྲུང་འཁོར་མང་པོ་མཛད་ན་ཡང༌། །དུས་འདིར་འཛམ་གླིང་སེམས་ཅན་ཕལ་ཆེར་གྱིས། །སྔོན་ལས་ཟད་པའི་རྒྱུ་འགའ་མ་ཁེགས་ཤིང༌། །གདུག་པའི་སེམས་ཅན་འདི་ཡི་མཐུ་བྱིན་ཏེ། །ཐུབ་པའི་སྤྱན་སྔར་སྨོན་ལམ་ལོག་བསྒྲུབས་ཏེ། །ནམ་ཕུག་སུས་ཀྱང་དགག་པར་མི་ནུས་གསུངས། །གདུག་པའི་གཡུལ་ངོ་བཟློག་མཛད་ཕྱག་འཚལ་བསྟོད། །ཆོས་རྒྱལ་དེ་ཡི་རྒྱལ་ཁམས་དར་རྒྱས་དང༌། །དམ་ཆོས་ཚུལ་བཞིན་སྤྱོད་པའི་བྱིན་རླབས་ཀྱིས། །ལོ་གྲངས་མང་པོའི་བར་དུ་ཉིད་ཀྱིས་བསྐྱངས། །ཕྱི་དུས་བློན་འབངས་དམ་ཚིག་མི་སྲུང་བ། །འགའ་ཞིག་རྐྱེན་གྱིས་ལོག་པའི་རྟེན་འབྲེལ་འགྲིགས། །ཕྱི་ནས་གདུག་པའི་རླུང་ཆེན་གཡོས་པའི་ཚེ། །ཉིད་ཀྱང་གདན་བསྐྱོད་བོད་དུ་བྱོན་པ་ན། །འོ་དེ་རལ་སོགས་གོ་བརྡའ་མི་མཇལ་བས། །འཁྲུལ་པའི་དབང་གིས་འཚེ་བ་བྱུང་བས་ན། །སྤྱན་རས་གཟིགས་དབང་ཞི་བའི་འཁྲུལ་འཁོར་མཛད། །དཔག་མེད་སྡུག་བསྔལ་མཐའ་ཡས་བདེ་བར་བསྒྱུར། །གོང་དུ་དམག་གི་འཚེ་བ་བསྟན་པ་དང༌། །གཟུགས་མེད་སྒྲ་ནི་ནམ་མཁར་གྲགས་པ་ཡི། །ལྷ་རྣམས་ཀྱིས་ཀྱང་བསྐུལ་མ་འདེབས་པར་མཛད། །འབྲི་ཀླུང་དམ་པ་ཆོས་ཕྱུག་ཡན་ཆོད་ནས། །སྡེ་བཞི་ལྷ་ས་དཀར་ཆུང་ཕྱིན་ཆད་དུ། །དཔག་མེད་ཆེན་པོ་གྲྭ་ས་གནས་དགོན་གྱིས། །དགའ་བྲོད་གུས་པས་ཀུན་གྱིས་བསུ་བར་མཛད། །དེ་ཤོད་རག་ཉག་གནས་ན་བཞུགས་པའི་ཚེ། །སྣ་ཚོགས་རིན་ཆེན་གཟུགས་མང་ལས་གྲུབ་པའི། །གྲུ་བཞི་སྒོ་བཞི་རྟ་བབས་དང་བཅས་པའི། །མཆོག་ཏུ་འབར་བའི་དཀྱིལ་འཁོར་གཞལ་ཡས་ཁང༌། །དེ་ཡི་དབུས་ན་རྡོ་རྗེ་རྣལ་འབྱོར་མ། །ཤིན་ཏུ་སྒེག་འཛུམ་ཡལ་ཡོལ་དགྱེས་མཛད་ཅིང༌། །རྨད་བྱུང་དམ་ཆོས་གསུངས་ལ་ཕྱག་འཚལ་བསྟོད། །དེ་ཕྱིར་མདོ་ཁམས་ཁམས་སོགས་ཧོར་ནང་དུ། །བསྟན་པ་འབྱུང་བའི་རྟེན་འབྲེལ་མང་པོ་མཛད། །ཤེལ་ཚལ་གངས་ལ་ནུབ་གཅིག་རྨང་ལམ་ན། །རྒྱལ་ཆེན་རྣམ་ཐོས་གསེར་ཁྲབ་གསོལ་ནས་སུ། །སྐུ་སྨད་ས་སྲེབ་སྐུ་སྟོད་ས་སྟེང་ཐོན། །ངོ་སོར་བཅས་པ་མདུན་དུ་བྱོན་པ་རྨིས། །ནུབ་གཅིག་ངོ་མི་ཤེས་པའི་རབ་བྱུང་གསུམ། །སྤྱན་སྔར་བྱུང་སྟེ་མགྲིན་པ་གཅིག་ཏུ་སྡེབས། །ངེད་གསུམ་ད་ནང་མི་ཉག་འགའ་ནས་འོང༌། །དོ་ནུབ་ནུབ་ཀྱི་ཕྱོགས་སུ་འགྲོ་བ་ཡིན། །ད་ལྟ་ཁྱེད་དང་མཇལ་དུ་འོང་སྟེ་ཡང༌། །གཏམ་དག་བཟླ་རྒྱུ་ཡོད་དེ་རིངས་པར་གདའ། །དེ་ཉིད་བསྟན་པ་འབྱུང་བའི་ལྟས་ཡིན་གསུངས། །དགེ་བའི་བཤེས་གཉེན་འགའ་རེས་ཞུ་ཕུལ་ཏེ། །བསྟན་པའི་སྲོལ་ཁོད་ནམ་ཞིག་ཚུགས་པར་འགྱུར། །དེ་ལ་ཡུན་ནི་ཇི་སྲིད་འབྱུང་ཞེས་ཞུས། །ཕེ་ཡོ་རྒྱལ་པོ་བགྲོངས་པར་གྱུར་པ་ན། །ཐུབ་པའི་སྤྲུལ་པ་ཧ་ལ་ཤན་དུ་འབྱུང༌། །དེ་བྱུང་ཕྱིན་ཆད་བསྟན་པ་ཚུགས་པར་འགྱུར། །བཅུ་གཉིས་ཚུར་གཏོགས་སུམ་ཅུ་རྩ་གཉིས་ན། །སྔོན་བས་དར་རྒྱས་ཆེ་བའི་བསྟན་པ་འབྱུང༌། །ཡུན་ནི་ཇི་སྲིད་འབྱུང་བ་མི་ཤེས་ཏེ། །ཁྱེད་རྣམས་ཀུན་ལ་ཕལ་ཆེར་སྣང་ཞེས་གསུངས། །སྐྱོ་ལྡག་སྡེ་སྤྱིའི་མཚེར་ན་བཞུགས་པའི་ཚེ། །ཟླ་གཉིས་བར་དུ་ལྕགས་རིའི་སྣང་བ་བྱུང༌། །རི་རྩ་འདི་རུ་འགྲོ་ལ་ཕན་བྱེད་པའི། །གནས་དང་སྒྲུབ་པ་པོ་དག་འབྱུང་འགྱུར་ཞེས། །དགེ་འདུན་ཚོགས་པའི་དབུས་སུ་དེ་ལུང་བསྟན། །འཕྲོས་པའི་ཚུལ་དུ་ལ་ལའི་སྐབས་དག་ཏུ། །དབུས་ཀྱི་གནས་དགོན་ཆེན་པོ་འགའ་ཞིག་ལས། །མ་འོངས་དུས་ན་འདི་ལྟར་འབྱུང་བ་དང༌། །ཆོས་ཚུལ་དེ་ཡང་འདི་བཞིན་འགྱུར་ཞེས་གསུངས། །ལུང་བསྟན་རྒྱ་ཆེན་མཛད་ལ་ཕྱག་འཚལ་བསྟོད། །སྡོམ་ཕུ་རོ་གད་དག་ལ་བཞུགས་པའི་ཚེ། །སྤྱན་རས་གཟིགས་དབང་འཇིག་རྟེན་མགོན་པོའི་སྐུ། །ལྷག་པར་སྐུ་མདོག་གངས་རི་བས་ཀྱང་དཀར། །ཤིན་ཏུ་ཆེ་བ་མདུན་ན་བཞུགས་པ་གཟིགས། །སྐུ་ཕྲག་གཡོན་གྱི་ཐད་ཀར་ནམ་མཁའ་ལ། །ཕྲེང་ཐག་ནམ་མཁར་བླུག་པ་ཇི་བཞིན་དུ། །བདེ་མཆོག་ཡབ་ཡུམ་ཟ་ར་ཚགས་སུ་བྱོན། །ཉིད་ཀྱི་མདུན་དུ་མ་ལུས་ཐིམ་པར་གྱུར། །ཉིན་ཞིག་ཚེ་ན་འོག་མིན་ཁང་བཟང་ན། །སྣ་ཚོགས་སིལ་སྙན་རོལ་མོ་པཎ་གདུགས་སོགས། །བཀོད་པ་མཆོད་པའི་བྱེ་བྲག་བློ་ལས་འདས། །དབུས་དང་མཐའ་མི་མངོན་པའི་གཟིགས་སྣང་བྱུང༌། །མཁར་ལུང་གནས་སུ་བསྟན་བཅོས་དཔག་མེད་གསུངས། །ཅང་སྒང་གནས་སུ་ཇོ་བོ་རྗེ་དང་མཇལ། །མཁན་རྒྱུད་སྡེ་པ་བཞི་ཡི་གཉེར་གཏད་མཛད། །དེ་ལོ་གསུམ་ཚུན་བཀའ་བརྒྱུད་བླ་མ་དང༌། །ཐུགས་དམ་མཁའ་འགྲོ་ཆོས་སྐྱོང་ཐམས་ཅད་ཀྱིས། །རྟག་པར་བསྲུང་སྟེ་མི་བཞིན་འགྲོགས་པར་མཛད། །ད་ལན་ང་ཡི་འཁོར་དུ་གྱུར་པ་རྣམས། །ཕལ་ཆེར་སེམས་ངོ་འཕྲོད་པ་ཤ་སྟག་ཡིན། །ང་ཡི་ཕྲིན་ལས་འདི་ནི་ད་ལན་ནས། །འདི་ཡི་འོག་ཏུ་འབུམ་འགྱུར་དག་ཏུ་འགྱུར། །མོས་གུས་ཅན་གྱི་བུ་སློབ་འགའ་ཞིག་དང༌། །རྒྱལ་པོ་ལ་སོགས་མང་དུ་ལུང་བསྟན་མཛད། །ཡོན་བདག་ཕྱི་མའི་འགྱུར་ལུགས་འགའ་ཡང་གསུངས། །མཁྱེན་གསུམ་མངའ་བདག་རིན་ཆེན་ཕྱག་འཚལ་བསྟོད། །དེ་དུས་བེ་རིའི་རུ་བ་ཤར་དུ་ལྷགས། །རྒྱལ་གླིང་གཉིས་དང་རྗེ་ཡིས་བར་སྡུམ་མཛད། །དུས་དེ་ཉིད་ནས་སྐུ་ཁམས་ཅུང་ཞིག་བསྙེལ། །ང་ཡི་སྒོ་མང་འདི་ནི་འགའ་མཁར་དེར། །རྟེན་འབྲེལ་འགའ་དང་ཞབས་སྡོམ་གྲུབ་པ་ན། །ཡུལ་དེ་མི་འཆོར་རང་གིས་ཟིན་སྲིད་དེ། །ད་ཡང་ཁྱེད་རྣམས་འདི་ལ་འབུང་ཞིག་གསུངས། །སྤྲེལ་ལོ་ཟླ་བ་ལྔ་པའི་ཚེས་གཅིག་ལ། །ཡོས་ཕུ་ལྷ་སྐྱམ་དག་ཏུ་དགོངས་པ་རྫོགས། །ཞག་གསུམ་བར་དུ་ནམ་མཁའ་མེ་ལོང་ལྟར། །སྤྲིན་མེད་དག་པའི་རང་བཞིན་འཇམ་པར་གྱུར། །ཟླ་གཅིག་བར་དུ་གླེའུ་ཐུ་ཡན་ཆད་དུ། །ཟ་འོག་ལྟ་བུར་ནམ་མཁར་འཇའ་ཡིས་འཁྲིགས། །བཅུ་བཞིའི་ཉིན་པར་ལྟེའུ་སྤྱིར་གདུང་སྦྱངས་ཏེ། །སྟོང་ཕྲག་མང་པོ་འདུས་པའི་མི་རྣམས་ཀྱང༌། །ཐ་དད་མཐོང་སྣང་གདུང་བ་ཚིམས་པ་དང༌། །རྩེ་གཅིག་མོས་གུས་ཡི་གེ་དྲུག་པའི་སྒྲ། །མགྲིན་གཅིག་ལྟ་བུར་ས་ཡང་ལྡེམ་པ་ཙམ། །འབྲག་སྒྲ་ལྟ་བུར་གསང་སྔགས་སྒྲོགས་པར་བྱེད། །སྐར་ཚོགས་ལྟ་བུའི་སློབ་མས་མཆོད་པའི་ཚེ། །ཐུགས་ལྗགས་གཉིས་དང་ལྷ་སྐུ་ཡིག་འབྲུ་དང༌། །ཁ་དོག་སྣ་ཚོགས་རིང་བསྲེལ་རྟེན་དུ་གནང༌། །སྐུ་གདུང་སྦྱངས་པའི་སྤུར་ཁང་དཀྱིལ་འཁོར་ལ། །ཞག་ལྔའི་བར་དུ་ཡུལ་ལྷས་མར་མེ་ཕུལ། །བཅོ་ལྔའི་ཉིན་པར་སྐུ་འབུམ་རྨིང་བཏིང་ནས། །བཞི་བཅུ་རྩ་དགུའི་ནང་པར་འབུམ་པ་ཐོན། །རབ་གནས་ཤེས་པ་ཕུན་ཚོགས་ལྟས་རྣམས་བྱུང༌། །ལྷར་བཅས་རྟེན་དུ་བཞུགས་ལ་ཕྱག་འཚལ་བསྟོད། །རྗེ་ཡི་རྣམ་ཐར་རྒྱ་མཚོ་ལྟ་བུ་ལས། །ཅུང་ཟད་སྨོས་ཏེ་བསྟོད་པ་བགྱིས་པ་ལས། །མཁའ་མཉམ་དགེ་བས་སྐུ་གསུང་ཐུགས་དང་ནི། །ཡོན་ཏན་ཕྲིན་ལས་རྗེ་དང་མཉམ་པར་ཤོག ༈ །སྐྱབས་ནི་སངས་རྒྱས་ཉག་གཅིག་ཡིན། །དལ་འབྱོར་མི་རྟག་རྒྱུ་འབྲས་སོམས། །ལོངས་སྤྱོད་མི་རྟག་སྙིང་པོ་ལོངས། །ཚེ་འདི་མི་རྟག་ལོག་ཤེས་སྤོངས། །ལྟེང་སྒོམ་མ་བྱེད་ཡང་དག་སྦྱོངས། །ན་མོ་རཏྣ་གུ་རུ། ཕྱོགས་རིས་མེད་པའི་ལྟ་བ། །དོན་ཐག་ཆོད་པའི་རྟོགས་པ། །ངེས་ཤེས་སྐྱེ་བའི་ཉམས་མྱོང༌། །མངོན་དུ་གྱུར་པའི་སྒོམ་པ། །བླང་དོར་མེད་པའི་སྤྱོད་པ། །དགོས་འདོད་འབྱུང་བའི་འབྲས་བུའོ། ༈ །སེམས་ཉིད་སྤྲོས་དང་བྲལ་བ་ལ། །དྲན་པ་བསྟེན་པའི་མི་རེ་ཉུང༌། །སྣང་བ་རྟེན་ཅིང་འབྲེལ་འབྱུང་ལ། །ཐབས་སུ་ཁྱེར་བའི་མི་རེ་ཉུང༌། །བླ་མ་སངས་རྒྱས་ཡིན་པ་ལ། །མོས་གུས་བྱེད་པའི་མི་རེ་ཉུང༌། །ཕུང་པོ་ལྷ་སྐུ་ཡིན་པ་ལ། །ལུས་ལྷ་རུ་སྒོམ་པའི་མི་རེ་ཉུང༌། །སེམས་ཅན་ཕ་མ་ཡིན་པ་ལ། །བྱམས་སེམས་སྒོམ་པའི་མི་རེ་ཉུང༌། །ང་སྒྱུ་མ་ལུས་ཀྱི་དཀྱིལ་འཁོར་དུ། །གཟུང་འཛིན་རྟོག་པའི་རི་བོ་བསྲེགས། །ཕུང་པོ་རྒྱལ་བ་རིགས་ལྔ་མཆོད། །གཉིས་སུ་མེད་པའི་དངོས་གྲུབ་ཞུས། །ལུས་ཀྱི་སྦྱིན་བསྲེགས་དེ་རུ་གྱིས། །ང་ནམ་མཁའ་ལྟ་བུའི་རྣལ་འབྱོར་པ། །ཕྱོགས་རིས་མེད་པས་ཀུན་ལ་ཁྱབ། །ང་ཉི་ཟླ་ལྟ་བུའི་རྣལ་འབྱོར་པ། །རྒྱུན་ཆད་མེད་པ་ཀུན་ལ་གསལ། །ང་འཇའ་ཚོན་ལྟ་བུའི་རྣལ་འབྱོར་པ། །ཝ་ལེར་ཡོད་ཀྱང་བཟུང་ཏུ་མེད། །ང་རེས་འགའ་འོད་གསལ་སྟོང་ཉིད་གཟུགས། །ང་རེས་འགའ་ལོངས་སྐུ་མཚན་དཔེས་བརྒྱན། །ང་རེས་འགའ་སྤྲུལ་སྐུ་དགེ་སློང་གཟུགས། །དེ་དབྱེར་མེད་ངོ་བོ་ཉིད་ཀྱི་སྐུ། །དག་པ་ཡེ་ཤེས་སྣང་བའི་གཟུགས། །སྣང་སྟོང་ཟུང་འཇུག་ལྷུན་གྱིས་གྲུབ། །བྱས་པའི་ཆོས་ལ་ཞེན་པ་བྲལ། །དེ་མངོན་དུ་གྱུར་པ་འབྲས་བུ་ཡིན། །འཁོར་བ་སྡུག་བསྔལ་ཡིན་པས་སྤང་བར་བྱ། །མྱང་འདས་བདེ་བ་ཡིན་པས་བསྒྲུབ་པར་བྱ། །གྲོགས་ངན་དྲི་མ་ཡིན་པས་སྤང་བར་བྱ། །རང་སེམས་དཔང་པོ་ཡིན་པས་མ་ཁྲེལ་མཛོད། །སེམས་ཅན་ཕ་མ་ཡིན་པས་བྱང་སེམས་སྒོམས། །བླ་མ་སངས་རྒྱས་ཡིན་པས་མོས་གུས་བསྐྱེད། །ཅེས་གསུངས་སོ།།