དེ་ཉིད་བདེ་ཆེན་དབང་དོན་དུ་ངོ་སྤྲད་པ།

དྲུག་པ་དེ་ཉིད་ཡོན་ཏན་དུ་ངོ་སྤྲད་པ་ལ་གསུམ་སྟེ། དེ་ཉིད་བདེ་ཆེན་དབང་དོན་དུ་ངོ་སྤྲད་པ་དང་། དེ་ཉིད་སྐུ་དང་ཡེ་ཤེས་ངོ་སྤྲད་པ་དང་། དེ་ཉིད་མཛད་པ་ཕྲིན་ལས་སུ་ངོ་སྤྲད་པའོ། །

དང་པོ་བདེ་ཆེན་དབང་དོན་དུ་ངོ་སྤྲད་པ་ནི། སྤྱོད་འཇུག་ལས། བདེ་བར་གཤེགས་ཀྱི་བདེ་བ་བླ་ན་མེད། ཡིད་ལ་བསམ་པ་མཐའ་དག་རྫོགས་བྱེད་པ། ཞེས་པ་དང་། དཔའ་བོ་ས་ར་ཧས། ནམ་ཞིག་སྦྱོར་བཞི་གནས་གཅིག་ལ་ནི་བཞུགས་པ་ནི། བདེ་ཆེན་མཆོག་ནི་ནམ་མཁའི་ཁམས་སུ་མི་ཤོང་ངོ་། །ཞེས་པའི་དོན། ཀུན་གཞི་ཡེ་ཤེས་ཕྱག་རྒྱ་ཆེན་པོ་དབུ་མ་ཆེན་པོ། ཐེག་པ་ཆེན་པོ། ཤེར་ཕྱིན་ཟབ་མོ། བདེ་གཤེགས་སྙིང་པོ་དེ་ཉིད་བྱེད་པ་བཅིངས་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། སྣང་སྲིད་འཁོར་འདས་ཐམས་ཅད་བདེ་སྡུག་གཉིས་སུ་མེད་པར་འདོད་ཆགས་ཆེན་པོའི་བདེ་ཆེན་གཅིག་ཏུ་གྱུར་པ་ནི། འཁོར་འདས་བདེ་བ་ཆེན་པོར་མཉམ་པ་ཉིད་གྱུར་པའི་ཤེས་རབ་ཀྱི་ཕ་རོལ་དུ་ཕྱིན་པ་ཡིན་ལ། དེ་ཉིད་ཀྱི་དུས་གསུམ་གཅིག་ཆར་དུ་མེ་ལོང་ལྟ་བུའི་ཡེ་ཤེས་ལ་གཟུགས་བརྙན་དུ་ཤར་ནས་མངོན་སུམ་དུ་ཤེས་པ་ནི། དུས་གསུམ་མཉམ་ཉིད་ཀྱི་ཤེས་རབ་ཀྱི་ཕ་རོལ་དུ་ཕྱིན་པ་ཡིན་ཞིང་། བདེ་ཆེན་དེ་རྣལ་འབྱོར་པའི་རྒྱུད་ལ་ཇི་ལྟར་འཆར་ན། སྒྲིབ་པའི་ས་བོན་རླུང་ཁུག་པ་གཅིག་མ་འགགས་ཀྱི་ཚེ་སྲོག་རྩོལ་དང་འཛིན་པའི་སྐབས་སུ། སྔ་དྲོ་རེ་ཉིན་རེ་ཞག་རེ་ཙམ་སྒོ་གསུམ་འདོད་ཆགས་ཀྱི་བདེ་བ་ཆེན་པོར་འགྱུར་ཞིང་། ཡང་ཡལ་གྱིན་སོང་པ་འོང་སྟེ། བདེ་བ་ཡོད་མེད་རེས་འཇོག་ཏུ་བྱུང་པའི་ངང་ནས་བདེ་བའི་ཡུན་ཇེ་རིང་ཤས་ཇེ་ཆེར་འཕེལ་ལོ། །སྒྲིབ་པའི་ས་བོན་རླུང་ཁུག་པ་གཅིག་འགགས་ཤིང་འགྱུར་མེད་བདེ་བའི་སྐད་ཅིག་གི་ཏིང་ངེ་འཛིན་ཐོབ་ནས་མིག་གིས་མཐོང་ཚད། རྣ་བས་ཐོས་ཚད། སྣས་ཚོར་ཚད། ལུས་ཀྱིས་རེག་ཚད། ཡིད་ལ་ཤར་ཚད་ཐམས་ཅད་འདོད་ཆགས་ཆེན་པོའི་བདེ་བ་ཁོ་ནར་འཆར་ཞིང་། དེའི་ཚེ་མེས་བསྲེགས་མཚོན་གྱིས་སྟུབས་ཆུ་ལ་སྐྱུར་ཀྱང་བདེ་ཆེན་འབའ་ཞིག་ཏུ་འཆར་ཏེ། ཡབ་སྲས་འཇལ་བའི་མདོ་ལས། ལྷའི་བུ་རྣམས་ཀྱིས་གསོལ་པ། བཙུན་པ་བཅོམ་ལྡན་འདས་བྱང་ཆུབ་སེམས་དཔའ་ལ་ཆོས་ཐམས་ཅད་བདེ་བར་འགྲོ་བ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་པ་ན། མཚོན་གྱིས་སྟུབས་སམ། མེའི་འོབས་སུ་སྐྱུར་རམ། བྲག་གི་གཡང་ལ་འཕངས་སམ། ཆུ་ལ་སྐྱུར་ཀྱང་བདེ་བ་འབའ་ཞིག་ཏུ་འགྱུར་རོ། །ཞེས་པ་དང་། དཔའ་བོ་ས་ར་ཧས། ཁམས་གསུམ་མ་ལུས་འདི་དག་ཐམས་ཅད་ནི། འདོད་ཆགས་ཆེན་པོ་གཅིག་ཏུ་ཁ་དོག་སྒྱུར་གཅིག་དང་། དེར་ནི་ཐོག་མ་བར་མཐའ་མེད། །སྲིད་མིན་མྱ་ངན་འདས་པའང་མིན། །བདེ་བ་ཆེན་པོའི་མཆོག་འདི་ལ། །བདག་དང་གཞན་དུ་ཡོད་མ་ཡིན། །མདུན་དང་རྒྱབ་དང་ཕྱོགས་བཅུ་རུ། །གང་གང་མཐོང་པ་དེ་དེ་ཉིད། ཞེས་པ་དང་། བརྟག་གཉིས་ལས། དེར་ནི་ཐོག་མ་བར་མཐའ་མེད། །སྲིད་མེད་མྱ་ངན་འདས་པ་མེད། །བདེ་བ་ཆེན་པོ་མཆོག་འདི་ལ། །བདག་དང་གཞན་དུ་ཡོད་མ་ཡིན། ཞེས་པ་དང་། མཚན་བརྗོད་ལས། མཆོད་པ་ཆེན་པོ་འདོད་ཆགས་ཆེ། །འདོད་པ་ཆེན་པོ་བདེ་བ་ཆེ། །དགའ་བ་ཆེན་པོ་མགུ་བ་ཆེ། །དགའ་ཆེན་རོལ་མོ་ཆེན་པོ་འཆང་། །སྒྱུ་འཕྲུལ་ཆེན་པོ་དགའ་བས་དགའ། །མཆོག་ཏུ་དགའ་བའི་གྲགས་བདག་དཔལ། ཞེས་པ་དང་། བདེ་མཆོག་ལས། ལྷ་དང་མིའི་བདེ་བ་ནི། །བསྡུས་བྱས་རྡོ་རྗེ་འཛིན་པ་ཡི། །བཅུ་དྲུག་ཆར་ཡང་མི་ཕོད་དོ། །ཞེས་པའོ། །སྣང་སྲིད་བདེ་ཆེན་དུ་ཤར་བ་དེའི་ཚེ་གསེར་དང་བོང་པ་སྙམ། དགྲ་དང་གཉེན་དུ་མཉམ། ཙནྡ་དང་སྟེ་འུར་མཉམ། འཁོར་བ་དང་མྱང་འདས་སུ་མཉམ། རྙེད་པ་དང་མ་རྙེད་པར་མཉམ། སྟོང་པ་དང་སྨད་པར་མཉམ། སྟོད་པ་དང་སྨད་པར་མཉམ། གྲགས་པ་དང་མ་གྲགས་པར་མཉམ། བདེ་བ་དང་སྡུག་བསྔལ་བར་མཉམ་ཞིང་། མེས་མི་ཚོགས། ཆུས་མི་ཚུགས། དབྱིག་དུག་གིས་མི་ཚུགས། དུག་སྦྱར་མས་མི་ཚུགས། དུག་གིས་མི་ཚུགས་ཤིང་བཟུང་དུ་མེད། བཅིང་དུ་མེད། ཆད་པས་གཅད་དུ་མེད། མགོ་བྲག་ཏུ་མེད། དགྲའི་དབང་དུ་མི་འགྲོ་སྟེ། དཔའ་བོ་ས་ར་ཧས། སྐྱེས་བུ་རིན་ཆེན་གང་ལ་ལྷ་རྫས་འདི་སྐྱེས་པ། གདུག་པ་མ་ལུས་ཐམས་ཅད་སྐད་ཅིག་ཉེར་ཞི་ཐིམ། སེངྒེ་གླང་ཆེན་སྨྱོན་པ་སྟག་དང་དྲེད་མོ་དང་། གཅན་ཟན་ཁྲོ་བོ་མེ་དང་དུག་སྦྲུལ་གཡང་ས་དང་། རྒྱལ་པོའི་ཆད་པ་དུག་དང་ཐོག་དང་ལྕེ་འབབ་པ། ཐམས་ཅད་ངོ་བོ་དེ་ཉིད་ཡིན་ཕྱིར་གནོད་པ་མེད། རྣམ་རྟོག་དགྲ་འདི་ཆོམས་པས་དགྲ་འདི་ཐམས་ཅད་ཆོམས། བདག་ལྟའི་གདུག་པ་ཐུལ་བས་གདུག་པ་ཐམས་ཅད་ཐུལ། ཞེས་པ་དང་། ནང་གི་དགྲ་རྣམ་རྟོག་དང་བདག་འཛིན་ཆོམས་པས། འཁོར་འདས་ཐམས་ཅད་བདེ་ཆེན་དུ་གྱུར་པའི་སྐད་ཅིག་ལ་སྐད་ཅིག་ལ་ཕྱིའི་དགྲ་ཐམས་ཅད་ཆོམས། ཞེས་པའོ། །དེ་བཞིན་དུ་ཡུལ་སྣང་ཐམས་ཅད་བདེ་བ་ཆེན་པོར་ཤར་བའི་ཡེ་ཤེས་ལ་འཇིག་རྟེན་གྱི་འགལ་པ་ཐམས་ཅད་བདེ་བ་ཆེན་པོར་མཉམ་པ་ནི། འཕགས་པ་ཀླུ་སྒྲུབ་ཀྱི་རིམ་ལྔར། ཇི་ལྟར་བདག་ཉིད་དེ་བཞིན་དགྲ། ཇི་ལྟར་ཆུང་མ་དེ་བཞིན་ཕ། ཇི་ལྟར་སྨད་འཚོང་དེ་བཞིན་མ། ཇི་ལྟར་བྲམ་ཟེ་དེ་བཞིན་གདོལ། ཇི་ལྟར་པགས་པ་དེ་བཞིན་གོས། ཇི་ལྟར་རིན་ཆེན་ཕུབ་མ་དང་། ཇི་ལྟར་ཆང་གང་དེ་བཞིན་གཅིན། ཇི་ལྟར་བཟའ་བ་དེ་བཞིན་བཤང་། ཇི་ལྟར་དྲི་བཟང་ག་བུར་དང་། དེ་བཞིན་བཤང་པ་ལ་སོགས་དྲི། ཇི་ལྟར་བསྟོད་པ་བྱེད་པའི་ཚིག །དེ་བཞིན་དུ་ནི་སྨད་པའི་ཚིག །དྲག་པོ་རྡོ་རྗེ་ཅན་དེ་བཞིན། ཇི་ལྟར་ཉིན་མོ་དེ་བཞིན་མཚན། ཇི་ལྟར་རྨི་ལམ་དེ་བཞིན་སད། ཇི་ལྟར་འཇིག་པ་དེ་བཞིན་གནས། ཇི་ལྟར་བདེ་བ་དེ་བཞིན་སྡུག །ཇི་ལྟར་སྡང་པ་དེ་བཞིན་བུ། མནར་མེད་མཐོ་རིས་དེ་བཞིན་ཏེ། དེ་བཞིན་སྡིག་དང་བསོད་ནམས་སོ། དེ་ལྟར་ཤེས་ན་ཡེ་ཤེས་ཅན། དོགས་པ་མེད་པར་ཐམས་ཅད་བྱེད། ཞེས་པའོ། །དེ་བཞིན་དུ། འཁོར་འདས་བདེ་ཆེན་དུ་མཉམ་དུ་མཉམ་པའི་ཡེ་ཤེས་དེ་ཉིད་བརྟག་གཉིས་ལ། བདེ་བ་ནག་ཅིང་བདེ་བ་སེར། །བདེ་བ་དམར་པོ་བདེ་བ་དཀར། །བདེ་བ་ལྗང་ཁུ་བདེ་བ་སྔོ། །བདེ་བ་རྒྱུ་དང་མི་རྒྱུ་ཀུན། །བདེ་བ་ཤེས་རབ་བདེ་བ་ཐབས། །དེ་བཞིན་ཀུན་ཏུ་རྒྱུ་སྐྱེས་བདེ། །བདེ་བ་དངོས་པོ་དང་དངོས་མེད་བདེ། །རྡོ་རྗེ་སེམས་དཔའ་བདེ་བར་བརྗོད། ཞེས་པའོ། །བདེ་བ་ཆེན་པོའི་ཡེ་ཤེས་དེ་ཉིད་ཀུན་རྫོབ་ཀྱི་དུས་གསུམ་མེད་པ་དང་། དོན་དམ་གྱི་དུས་གསུམ་གཅིག་ཆར་དུ་ཤར་ནས་རྟོགས་པ་དུས་གསུམ་མཉམ་ཉིད་ནི། དུས་གསུམ་དུས་མེད་རྟོགས་པ་པོ། ཞེས་པ་དང་། སེམས་དཔའ་སྲིད་པ་གསུམ་གཅིག་པ། ཞེས་པ་དང་། དུས་འཁོར་གྱི་རྒྱུད་ཕྱི་མ་ལས། སོ་སོར་སྡུད་པའི་རྣལ་འབྱོར་པ་ཡིས་དུས་གསུམ་ནམ་མཁའི་དཀྱིལ་ན་གནས་པ་མཐོང་། ཞེས་པ་དང་། དྲི་མེད་འོད་ལས། དེ་ལྟར་སྲིད་པ་ཡོངས་སུ་ཤེས་པ་ན་མྱ་ངན་ལས་འདས་པ་ཞེས་བརྗོད་དོ། །འདིར་འདས་པ་དང་མ་འོངས་པ་དང་ད་ལྟར་བྱུང་པ་སྟེ། དུས་གསུམ་གྱི་སྲིད་པ་གསུམ་ཇི་ལྟར་བར་གྱུར་པ་གཟིགས་པ་ནི་ཡོངས་སུ་ཤེས་པ་སྟེ། དེ་ཉིད་སྲིད་པ་གསུམ་སྒྲིབ་པ་ཟད་པ་དང་རྒྱུ་དང་འབྲས་བུ་འགགས་པས་རྫོགས་པའི་སངས་རྒྱས་རྣམས་ལ་གཅིག་ཆར་དུ་འགྱུར་ཏེ། ཐམས་ཅད་མཁྱེན་པ་ཉིད། རྣམ་པ་ཐམས་ཅད་མཁྱེན་པ་ཉིད། ལམ་མཁྱེན་པ་ཉིད། ལམ་གྱི་རྣམ་པ་ཐམས་ཅད་མཁྱེན་པ་ཉིད་ཀྱི་སྟོབས་ཀྱིས་སོ། །ཉན་ཐོས་དང་རང་སངས་རྒྱས་རྣམས་དང་། བྱང་ཆུབ་སེམས་དཔའ་རྣམས་ལ་དུས་གསུམ་ཇི་ལྟར་བར་གྱུར་པ་གཅིག་ཆར་ཡོངས་སུ་ཤེས་པར་མི་འགྱུར་ཏེ། ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་དབྱིངས་ཀྱི་ཕྱིར་དང་། དེ་བཞིན་དུ་བྱང་ཆུབ་སེམས་དཔའ་རྣམས་ལ་སྒྲིབ་པ་ཅུང་ཟད་ཙམ་གྱི་ཕྱིར་རོ། །ཞེས་པ་དང་། དེ་བཞིན་དུ་མདོ་ཕལ་པོ་ཆེ་ལས། བྱང་ཆུབ་སེམས་དཔའ་ནོར་བཟངས་ཀྱིས། བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོའི་ལུས་ལ་དུས་གསུམ་གཅིག་ཆར་དུ་མཐོང་པ་འདི་ལྟ་སྟེ། བྱང་ཆུབ་སེམས་དཔའ་ཀུན་ཏུ་བཟང་པོ་ཡི། །ལུས་དང་ཡན་ལག་བ་སྤུའི་སྒོ་རེ་དང་། །དེ་དག་ཕྱོགས་ཀྱི་ཆ་ཤས་རེ་ནས་ཀྱང་། །སྟོང་གསུམ་འཇིག་རྟེན་ས་ཆུ་མེ་རླུང་གི། །ཕུང་པོ་དང་བཅས་གླིང་དང་རྒྱ་མཚོར་བཅས། །རིན་ཆེན་རི་དང་རི་རབ་ཁོར་ཡུག་བཅས། །གྲོང་དང་གྲོང་ཁྱེར་ལྗོངས་དང་ཡུལ་ཁམས་བཅས། །རྒྱལ་པོའི་གནས་བཅས་ཁང་ཁྱིམ་ནགས་ཚལ་བཅས། །དམྱལ་བ་ཡི་དྭགས་བྱོལ་སོང་གནས་དང་བཅས། །ལྷ་མིན་ཀླུ་དང་ལྷ་མི་འཇིག་རྟེན་བཅས། །འདོད་ཁམས་གཟུགས་ཁམས་གཟུགས་མེད་ཡུལ་དང་བཅས། །གཞི་བཅས་རྟེན་བཅས་དབྱིབས་བཅས་སྲིན་དང་བཅས། །གློག་བཅས་སྐད་བཅས་ཟླ་ཉི་བཅས། །ལོ་དུས་བསྐལ་པར་བཅས་པ་མ་ལུས་པ། །མེ་ལོང་ནང་གི་གཟུགས་བརྙན་བཞིན་དུ་མཐོང་། །སྟོང་ གསུམ་འདི་བཞིན་ཕྱོགས་བཅུའི་འཇིག་རྟེན་མཐོང་། །ཕྱོགས་བཅུའི་འཇིག་རྟེན་ཐོག་མཐའི་མུར་ཐུག་གི །གཅིག་ནས་གཅིག་བརྒྱུད ་འཇིག་རྟེན་མ་ལུས་ཀུན། །རྣམ་པ་དང་འདྲེས་མ་འདྲེས་སོ་སོར་གསལ། །ལུས་ཀུན་མཚན་བཟང་རེ་རེ་ལ་ཡང་མཐོང་། །ཀུན་ཏུ་བཟང་པོ་བཅོམ་ལྡན་རྣམ་སྣང་གི །དྲུང་ན་རྫུ་འཕྲུལ་འགེད་པ་ཇི་ལྟ་བར། །ཆོས་དབྱིངས་ཀྱིས་སླས་མཁའ་གཏུགས་འཇིག་རྟེན་གྱི། །སངས་རྒྱས་ཀུན་གྱི་དྲུང་ནའང་དེ་བཞིན་ཏེ། །དེ་དག་ཀུན་གྱི་ལུས་ལའང་དུས་གསུམ་གྱི། །འཇིག་རྟེན་འཇིག་རྟེན་འདས་པ་མ་ལུས་མཐོང་། ཞེས་པ་སྟེ། གཟུགས་བརྙན་མ་ལུས་འཆང་བ་པོ། །གཟུགས་རྣམས་ཐམས་ཅད་སྣང་པའི་དཔལ། ཞེས་པའི་དོན་ནོ། །དེ་ལྟར་སྲིད་ཞི་དང་དུས་གསུམ་མཉམ་ཉིད་ཀྱི་ཤེས་ཕྱིན་བདེ་བ་ཆེན་པོའི་ཡེ་ཤེས་དེ་ཉིད་དོན་དམ་གྱི་ལོངས་སྤྱོད་འབྱོར་པ་ནམ་མཁའ་དང་མཉམ་པ་ནི། འཕགས་པ་ཀླུ་སྒྲུབ་ཀྱིས་རིམ་ལྔ་ལས། གཙོ་བོ་བདེ་བ་ཀུན་རང་བཞིན། །སེམས་དཔའ་ཆེན་པོ་འགྲོ་དང་བཞུགས། །གནས་དང་གོས་དང་ཟས་ལ་སོགས། །མཁའ་ལ་སྐད་ཅིག་ཅིག་གིས་རྙེད། ཞེས་པ་དང་། དེ་བཞིན་དུ་མདོ་ཕལ་པོ་ཆེ་ལས། བྱང་ཆུབ་སེམས་དཔའ་ནོར་བཟངས་ཀྱིས། བྱང་ཆུབ་སེམས་དཔའ་ཆེན་པོ་ཁྱིམ་བདག་མཁས་པའི་དྲུང་དུ་ནམ་མཁའ་མཛོད་ཀྱི་འབྱོར་པ་མཐོང་པ་འདི་ལྟ་སྟེ། དེ་ནས་ཡེ་ཤེས་མཁའ་གཏུགས་ལོངས་སྤྱོད་ལྡན། མཁའ་ལྟར་ཟད་མི་ཤེས་པའི་ནོར་གྱིས་ཕྱུག །ནམ་མཁའི་མཐར་ཐུག་ཁྱབ་པའི་བང་མཛོད་ཅན། ཁྱིམ་བདག་མཁས་པས་ནོར་བཟངས་ལ་སྨྲས་པ། ནོར་བཟངས་ཁོ་བོ་ཡིད་ཀྱི་མཛོད་ནས་བྱུང་བའི་བསོད་ནམས་ཐོབ་པ་སྟེ། དེ་མཐུས་ཁོ་བོ་འགྲོ་རྒྱུད་མི་གཅིག་སྣ་ཚོགས་སྐྱེ་དགུ་རྣམས་ལ་ནི། གང་ལ་ཅི་འདོད་སྦྱིན་བྱའི་འབྱོར་པ་ཐམས་ཅད་ནམ་མཁའི་དབྱིངས་ལས་བྱུང་། ནམ་མཁའ་མ་ཟད་དེ་སྲིད་སྦྱིན་བྱའི་ལོངས་སྤྱོད་ཡོངས་སུ་གཏུགས་མི་འགྱུར། ནོར་བཟངས་ཡུད་ཙམ་སྡོད་གཅིག་དང་། ད་ལྟ་ཁྱོད་ལ་མངོན་སུམ་འགྱུར། ཟེར་མ་ཐག་ལ་ཕྱོགས་བཅུ་ནས། སེམས་ཅན་གྲངས་མེད་མཐའ་ཡས་པ། འགྲོ་རྒྱུད་མི་གཅིག་ཐ་དད་རྣམས། རང་རང་ཟས་སོགས་དོན་གཉེར་བ། འོངས་ནས་དེ་ལ་སློངས་མོ་འདེབས། དེ་ནས་ཁྱིམ་བདག་མཁས་པ་ཡིས། ཡུད་ཙམ་བསམས་ཏེ་མཁའ་ལ་ལྟས། དེ་ཡི་མོད་ལ་ནམ་མཁའ་ནས། བཟའ་དང་བཏུང་དང་རོ་སྣ་ཚོགས། ཁ་དོག་དྲི་རོ་ཕུན་ཚོགས་ལྡན། བཟའ་བ་བཅའ་བ་ལྟག་པ་དང་། གོས་བརྒྱན་ལྷབ་ལྷུབ་ཕྲེང་བ་དང་། མེ་ཏོག་བདུག་སྤོས་ཕྱེ་མ་བྱུག །རིན་ཆེན་གསེར་དངུལ་མུ་ཏིག་དང་། རྟེན་དང་གནས་དང་མལ་ཆ་དང་། སྨན་དང་བཞོན་ཁལ་གླང་པོ་རྟ། ཤིང་རྟ་བ་ལང་བོང་བུ་དང་། མ་ཧེ་ར་ལུག་བྲན་ཕོ་མོ། བུ་ཕོ་བུ་མོ་བུད་མེད་དང་། གདུགས་དང་རྒྱལ་མཚན་བ་དན་སོགས། ཅི་འདོད་སྦྱིན་བྱའི་ཡོ་བྱད་རྣམས། ཁྱིམ་བདག་མཁས་པའི་ལག་ཏུ་བྱུང་། དེ་ཡིས་སློངས་མོ་བ་ཡི་ཚོགས། སྣ་ཚོགས་ཚིམ་ཞིང་དགའ་བར་བྱས། དེ་ནས་དེ་དག་རྣམས་ལ་ཇི་ལྟ་བུ། ཡུན་དང་གནས་སྐབས་ཀུན་ཏུ་ཕན་དང་བདེ་བའི་ཆོས། དེ་ལྟར་ལྟར་བསྟན་པས་སེམས་ཅན་དེ་དག་རྣམས། ཆོས་དང་ཟང་ཟིང་འབྱོར་པས་ཚིམ་པར་བྱེད་པ་མཐོང་། ཞེས་པ་སྟེ། མཚན་བརྗོད་ལས། དཔལ་ལྡན་འབྱོར་པ་ཀུན་བྱེད་པ། ཞེས་པའི་དོན་ནོ། །དེ་བཞིན་དུ་བསྡུས་པ་ལས། འདུས་བྱས་བདེ་དང་འདུས་མ་བྱས་བདེ་གང་ཡིན་པ། བདེ་བ་དེ་ཀུན་འདི་ལས་འབྱུང་པར་རིག་པར་བྱ། ཞེས་པ་དང་། སངས་རྒྱས་སྲས་དང་ཉན་ཐོས་རང་རྒྱལ་ལྷ་རྣམས་དང་། འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ། དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། ཤེས་རབ་ནམ་ཡང་ཟད་པ་མེད་ཅིང་འཕེལ་བ་མེད། ཞེས་པའི་དོན་ནོ། །དེ་བཞིན་དུ་སྲིད་ཞི་དང་དུས་གསུམ་མཉམ་ཉིད་ཀྱི་ཤེར་ཕྱིན་བདེ་བ་ཆེན་པོ་ཕུན་སུམ་ཚོགས་པ་དེ་ཉིད། མངོན་རྟོགས་བརྒྱན་ལས། ཚུ་རོལ་ཕ་རོལ་མཐའ་ལ་མིན། །དེ་དག་བར་ན་མི་གནས་པ། །དུས་རྣམས་མཉམ་པ་ཉིད་ཤེས་ཕྱིར། །ཤེས་རབ་ཕ་རོལ་ཕྱིན་པར་འདོད། ཞེས་པའོ། །དེ་ལྟར་འགྱུར་མེད་མཆོག་གི་བདེན་དེ་ཉིད། ཐབས་ཤེས་ཀྱི་རྒྱུད་རྣམས་ཀྱི་དབང་དོན་ཡིན་ཞིང་། འཚམས་མེད་པ་ལྔ་བྱེད་པ་རྣམས་ཀྱང་དབང་དོན་གྱི་བདེ་ཆེན་འདི་ཉིད་ཀྱིས་རྗེས་སུ་བཟུང་པ་ཡིན་ཏེ། དྲི་མེད་འོད་ལས། འཚམས་མེད་ལྔ་པོ་རྣམས་ནི་བྱས་པ་རྣམས། དབང་དོན་བདེ་བ་ཉིད་ནི་གང་ཞིག་གིས། ཐབས་དང་ཤེས་རབ་བདག་ཉིད་རྒྱུད་རྣམས་སུ། རྒྱལ་བའི་དབང་པོས་ཡང་དག་བཟུང་བར་འགྱུར། ཞེས་པ་འགྱུར་མེད་མཆོག་གི་བདེ་བ་ཆེན་པོའི་ཡེ་ཤེས་འདི་ཉིད། རྒྱུད་སྡེ་རྣམས་ཀྱི་དབང་བཞིའི་དོན་དགའ་བ་བཞི་དང་བཅུ་དྲུག་ཡིན་ལ། དེ་ལ་ལུས་བདེ་བ་ཆེན་པོ་ནི། ལུས་ཀྱི་ཐིག་ལེ་བརྟན་པ་བུམ་པའི་དབང་དགའ་བ་ཡིན་ལ། ངག་བདེ་བ་ཆེན་པོ་ནི། ངག་གི་ཐིག་ལེ་བརྟན་པ་གསུང་བའི་དབང་མཆོག་དགའ་ཡིན་ལ། སེམས་བདེ་བ་ཆེན་པོ་ནི་སེམས་ཀྱི་ཐིག་ལེ་བརྟན་པ་ཤེས་རབ་ཡེ་ཤེས་ཀྱི་དབང་ཁྱད་པར་གྱི་དགའ་བ་ཡིན་ཞིང་། ཆགས་པ་བདེ་བ་ཆེན་པོ་ནི། ཆགས་པ་ཐིག་ལེ་བརྟན་པ་བཞི་པ་དེ་ཡང་དེ་བཞིན་གྱི་དབང་ལྷན་ཅིག་སྐྱེས་པའི་དགའ་བའོ། །ཐིག་ལེ་བཞི་དང་དགའ་བ་བཞི་པོ་རེ་རེའང་བཞི་བཞིར་དབྱེ་བས་ཐིག་ལེ་བཅུ་དྲུག་དང་དགའ་བ་བཅུ་དྲུག་སྟེ། །དེ་ཉིད་རྣམ་པ་བཅུ་དྲུག་གོ །རྣལ་འབྱོར་པ་གང་ཞིག་གི་ཚེ། འགྱུར་མེད་མཆོག་གི་བདེ་བ་ཆེན་པོའི་དགའ་བ་བཅུ་དྲུག་པོ་འདི་རང་རིག་གི་ཡེ་ཤེས་ཀྱིས་རིག་པ་དེའི་ཚེ་དེ་ཉིད་རྣམ་པ་བཅུ་དྲུག་རིག །ཞེས་པའི་དོན་ནོ། །རྗེ་བཙུན་མི་ལས། སེམས་ལ་བདེ་བ་ཐོབ་པ་དོན་གྱི་དབང་། ཞེས་པ་དང་། བརྟག་གཉིས་ལས། དབང་ནི་བཞི་ཡི་དྲངས་ཀྱིས་ནི། དགའ་བ་ལ་སོགས་རིམ་ཤེས་བྱ། ཞེས་པ་དང་། བསྟོད་འགྲེལ་ལས། ངེས་པའི་དོན་གྱིས་སླར་ཡང་བུམ་པའི་སྒྲས་ནུ་མ་བརྗོད་དེ་དེ་ལ་རེག་པར་ལས་འགྱུར་བའི་བདེ་བ་གང་ཡིན་པ་དེ་ནི་བུམ་པའི་དབང་བསྐུར་བའོ། །གསང་པར་རྡོ་རྗེ་སྤྲོས་པ་ལས་འགྱུར་བའི་བདེ་བ་གང་ཡིན་པ་དེ་ནི་གསང་པའི་དབང་བསྐུར་བའོ། །དབང་པོ་གཉིས་སྙོམས་པར་ཞུགས་པ་ན་གང་ཞིག་འཛག་པའི་བདེ་བ་དེ་ནི་ཤེས་རབ་ཡེ་ཤེས་ཀྱི་དབང་བསྐུར་བའོ། །ཕྱག་རྒྱ་ཆེན་པོའི་རྗེས་སུ་ཆགས་པ་གང་ཞིག་འགྱུར་བ་མེད་པའི་བདེ་བ་དེ་ནི་བཞི་པ་དེ་ཡང་དེ་བཞིན་གྱི་དབང་བསྐུར་བའོ། །དེ་ལྟར་འགྱུར་བ་དང་འགྱུར་བ་དང་། འཛག་པ་དང་འགྱུར་བ་མེད་པའི་དབྱེ་བས་དབང་བསྐུར་བ་རྣམ་པ་བཞིའོ། །འདིར་དབང་བསྐུར་བར་བྱེད་པ་ནི་དབང་སྟེ་བདེ་བའི་སེམས་དང་ལྡན་པའི་ཕྱིར་ཞེས་པའི་དོན་ནོ། །ཞེས་པ་དང་། འདི་རྣམས་ཀྱི་དབང་བསྐུར་བ་རེ་རེ་ལ་དགའ་བ་བཞིའོ། །དགའ་བ་རེ་རེ་ལ་ལུས་དང་ངག་དང་སེམས་དང་ཡེ་ཤེས་ཀྱི་དབྱིངས་དབྱེ་བས་གནས་སྐབས་བཞི་སྟེ་ཐིག་ལེ་བཞིའི་དབྱེ་བས་སོ། །དེ་ལྟར་ཆ་བཅུ་དྲུག་གི་དབྱེ་བས་དབང་བསྐུར་སོ་སོ་ལ་དགའ་བ་བཅུ་དྲུག་སྟེ། ལུས་དང་ངག་དང་སེམས་དང་ཡེ་ཤེས་ཀྱི་ཐིག་ལེའི་དབྱེ་བ་བཞིའོ། །ཞེས་གསུངས་པ་ནི་དགའ་བ་བཞི་དང་བཅུ་དྲུག་གི་འཁོར་ལོ་འགྱུར་མེད་མཆོག་གི་བདེ་བ་ཆེན་པོ་འདི་ཉིད་རྒྱུད་སྡེ་རྣམས་ཀྱིས་ཀྱི་དབང་གི་དོན་གྱི་བདེ་བ་ཆེན་པོ་ཡིན་ནོ། །དེ་ཡང་རྗེས་དྲན་ནས་བཟུང་ནས་ཕྱག་རྒྱ་གསུམ་གྱི་སྒོ་ནས་ཉམས་སུ་ལེན་པ་ཡིན་ལ། ཕྱག་རྒྱ་ཆེན་པོ་ནི། དཔའ་བོ་ས་ར་ཧས། གང་ཡང་སྔ་ན་མེད་པའི་སྒེག་མོ་དང་ཕྲད་ན། །ཉལ་བའི་སེམས་ནི་གཞི་མེད་པ་ལ་རྟེན། །རང་གི་གཟུགས་དང་ཐ་དད་མ་བལྟ་གཅིག །སངས་རྒྱས་ལག་ཏུ་གཏོད་པར་བྱེད་པ་ཡིན། ཞེས་པ་དང་། བརྟག་གཉིས་ལས། ལྷ་མོ་དགའ་སྟེར་གནས་སྟེར་མ། །སྣ་ཚོགས་གཟུགས་ཅན་ཡིད་འོང་མ། །ཁྱེར་ཅིག་ཁྱེར་ཅིག་སེམས་དཔའ་ཆེ། །ཁྱེར་ལ་མཆོད་པ་རྟག་ཏུ་གྱིས། ཞེས་པ་དང་། བདེ་མཆོག་ལས། དབུ་མ་མཆོག་གི་དབུགས་དང་ནི། དྲི་དང་ཆུ་དང་བཅས་པ་ཡི། །རྟག་ཏུ་རིགས་ལྡན་མ་མཆོད་བྱ། །ཁྱད་པར་དུས་ལ་ཕོ་ཉ་མོ། ཞེས་པ་རྣམས་ཉམས་སུ་ལེན་པའི་དོན་ཟབ་པ་ལས་ཀྱང་ཆེས་ཤིན་ཏུ་ཟབ་པས། ཤིན་ཏུ་མཁས་པའི་ཡན་ལག་ལས་ཤེས་དགོས་སོ། །དེ་ལྟར་སྲིད་ཞི་མཉམ་ཉིད་དང་དུས་གསུམ་མཉམ་ཉིད་ཀྱི་ཤེར་ཕྱིན། གཏི་མུག་འཇོམས་པས་ཤེས་རབ་ཀྱི་ཕ་རོལ་དུ་ཕྱིན་པའི་སྔགས། མ་རིག་པ་འཇོམས་པས་རིག་པ་ཆེན་པོའི་སྔགས། འདི་ལས་བཟང་བ་མེད་པས་བླ་ན་མེད་པའི་སྔགས། འདི་དང་མཉམ་པ་འཇིག་རྟེན་ན་མེད་པས་མི་མཉམ་པ་དང་མཉམ་པར་བྱེད་པའི་སྔགས། སྐྱོན་ཐམས་ཅད་སེལ་བས་སྡུག་བསྔལ་ཐམས་ཅད་ཞི་བར་བྱེད་པའི་སྔགས། མི་བརྫུན་པས་ན་བདེན་པའི་སྔགས་བདེ་བ་ཆེན་པོའི་ཡེ་ཤེས་དེ་ཉིད། ཀུན་གཞི་ཡེ་ཤེས་ཀྱི་རྣམ་འགྱུར། ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོའི་ཡོ་ལང་། འོད་གསལ་ཆོས་སྐུའི་རོལ་པ། ཤེར་ཕྱིན་ཟབ་མོ་སྣང་པ་ཞེས་བྱ་བའི་ཏིང་ངེ་འཛིན་ཡིན་པས། བདེ་བའི་ཡེ་ཤེས་ཀྱི་གདངས་ཆེན་པོ། བདེ་བའི་ཡེ་ཤེས་ཀྱི་ཀློང་ཆེན་པོ། བདེ་བའི་ཡེ་ཤེས་ཀྱི་ཁྱབ་བརྡལ་ཆེན་པོ་ཐམས་ཅད་དོན་དམ་ཀྱི་སེམས་སུ་ངོ་སྤྲད་པར་བྱའོ།། །།