དགོངས་འགྲེལ་བསྟན་བཅོས་ཤན་འབྱེད།
གཉིས་པ་དགོངས་འགྲེལ་བསྟན་བཅོས་བཞེད་ཚུལ་གྱི་ཤན་འབྱེད་ནི།
བསྟན་བཅོས་རྣམ་གཞག་གཞན་དག་རྣམས། །
རྒྱུད་བླའི་དངོས་བསྟན་དྲང་དོན་ལོ། །
སྣང་ཆ་འོད་གསལ་སྤངས་པ་ཡི། །
སྟོང་རྐྱང་རིགས་སུ་འདོད་དང་བསྟུན། །
རང་བཞེད་རྒྱུད་བླ་ཐལ་འགྱུར་ཆེའི། །
དགོངས་དོན་སྣང་ཆ་འོད་གསལ་མཆོག །
རྩལ་སྟོན་ཟབ་དོན་སྙིང་པོའི་མདོའི། །
དགོངས་འགྲེལ་ངེས་དོན་བླ་མེད་བཞེད། །
མངོན་རྟོགས་རྒྱན་གཞུང་མཐའ་གཅིག་ཏུ། །
གཞན་དག་རང་རྒྱུད་གཞུང་དུ་འཆད། །
རྒྱུ་མཚན་གཙོ་བོ་རྣམ་བརྒྱད་ཀྱི། །
དམ་བཅའ་ཉམས་ཀྱིས་དོགས་པར་ཟད། །
སྔ་འགྱུར་རང་བཞེད་མི་ཕམ་རྗེས། །
ཐལ་རང་ཕྱི་མོའི་གཞུང་ཉིད་དུ། །
དངོས་སྟོབས་རིགས་པའི་འཕྲུལ་དང་བཅས། །
བརྒལ་ལན་སོགས་སུ་ཆེས་ཆེར་བསྒྲུབས། །
དེང་དུས་རྙིང་མར་སྨྲ་རྣམས་ཀྱང༌། །
རྒྱུ་མཚན་མེད་པར་གཞན་རྗེས་བཟློ། །
རང་བཞེད་སྔ་རབས་མཁས་པའི་ལུགས། །
མ་ཕམ་དགོངས་པའི་རྒྱན་དུ་བྲིས། །
གཞན་དག་དབུ་མར་རང་རྒྱུད་གཞུང༌། །
ཐལ་འགྱུར་ཆེན་པོའི་འགལ་ཟླར་སྨྲ། །
རང་བཞེད་མི་ཕམ་ཆོས་རྗེ་ཡིས། །
ཐལ་འགྱུར་ཆེན་པོའི་ལམ་སྟེགས་བཞེད། །
ཅེས་སོགས་ཏེ། དགོངས་འགྲེལ་བསྟན་བཅོས་ཀྱི་རྣམ་གཞག་བཞེད་ཚུལ་ཡང་མཁས་པའི་དབང་པོ་གཞན་དག་རྣམས་ཀྱིས་ཐེག་པ་ཆེན་པོའི་རྒྱུད་བླ་མའི་བསྟན་བཅོས་སྤྱིར་ཐེག་ཆེན་ཐལ་འགྱུར་པའི་གཞུང་དུ་བཞེད་ཀྱང་དེ་དངོས་བསྟན་གྱི་བརྗོད་བྱ་དྲང་དོན་ཡིན་ཏེ། འདི་ཡི་དགོངས་གཞི་སྟོང་ཉིད་དེ་ཞེས་སོགས་ཀྱི་ཕྱིར་ཞེས་འཆད་དེ། །ལོ་ཞེས་གཞན་འདོད་བརྗོད་པའི་ཚིག་གི་རྒྱན་ཙམ་དུ་སྦྱར་བ་སྟེ། དེ་ལྟར་འཆད་དགོས་པའི་རྒྱུ་མཚན་ཡང་ཐེག་པ་ཆེན་པོའི་ལུགས་ལ་སྣང་ཆ་འོད་གསལ་སྤངས་ཤིང་ཁས་མི་ལེན་པ་ཡི་བདེན་སྟོང་མེད་དགག་རྐྱང་པ་ཞིག་རིགས་སུ་འདོད་ཅིང་ཁས་ལེན་པའི་གྲུབ་མཐའ་དང་བསྟུན་པར་མཛད་པ་ཙམ་དུ་སྣང་ངོ༌། །
སྔ་འགྱུར་རྙིང་མའི་རང་བཞེད་ནི། བྱམས་པའི་ཆོས་སྡེ་ལྔའི་ཡ་གྱལ་རྒྱུད་བླ་མའི་བསྟན་བཅོས་ནི་ཐེག་ཆེན་ཐལ་འགྱུར་ཆེན་པོའི་དགོངས་དོན་རིགས་ཁམས་བདེ་གཤེགས་སྙིང་པོའི་སྣང་ཆ་འོད་གསལ་མཆོག་གི་ཁྱད་པར་རྩལ་དུ་བཏོན་པ་བཀའ་ཐ་མའི་བྱེ་བྲག་སྙིང་པོའི་མདོ་བཅུའི་དགོངས་འགྲེལ་དུ་གྱུར་པའི་ངེས་དོན་བླ་ན་མེད་པར་བཞེད་དོ། །
འོ་ན་འདི་ཡི་དགོངས་གཞི་སྟོང་ཉིད་དེ་ཞེས་སོགས་གསུངས་པ་མ་ཡིན་ནམ་ཞེ་ན། ལུང་དེའི་དོན་ནི་སྣང་ཆ་ནས་ནམ་མཁའི་གོས་ཅན་པའི་ལུགས་ལྟར་མ་ཡིན་པར་རང་བཞིན་འོད་གསལ་བའི་ཡོན་ཏན་མཁྱེན་བརྩེ་ནུས་གསུམ་གྱི་ཁྱད་པར་དུ་བྱས་པ་དེ་ཡང༌། སྟོང་ཆ་ནས་མུ་སྟེགས་བྱེད་ཀྱི་བདག་ལྟར་མ་ཡིན་པར་ངོ་བོ་སྟོང་པ་ཆེན་པོ་རྣམ་ཐར་སྒོ་གསུམ་གྱི་ཁྱད་པར་དུ་བྱས་པ་དང་དབྱེར་མེད་པ་ལ་དགོངས་ཏེ་གསུངས་པའི་དོན་ཡིན་གྱི། དངོས་བསྟན་དྲང་དོན་དུ་སྟོན་པའི་ཚིག་མ་ཡིན་ཏེ། དགོངས་གཞི་དང་དགོས་པའི་ཁྱད་པར་གཞུང་གི་དྲང་དོན་དུ་འཇོག་པའི་རྒྱུ་དངོས་ལ་གནོད་བྱེད་ཀྱི་ཚད་མ་མ་གསུངས་པའི་ཕྱིར་རོ། །དེ་ལྟར་འཇུག་པ་རྩ་འགྲེལ་ལས་ཀྱང་བདེ་གཤེགས་སྙིང་པོའི་རང་བཞིན་མུ་སྟེགས་བྱེད་ཀྱི་བདག་ལྟར་མ་ཡིན་པར་རྣམ་ཐར་སྒོ་གསུམ་གྱི་ཁྱད་པར་དུ་བྱས་པ་ལ་དགོངས་ཚུལ་གསུངས་པ་དང་གནད་གཅིག་ཏུ་གྱུར་པའོ། །གལ་ཏེ་དེའི་སྐབས་སུ་གཤེགས་སྙིང་ངེས་དོན་དུ་བསྟན་པའི་ཁྱད་པར་གྱི་ཐ་སྙད་ཙམ་ཡང་མེད་དོ་ཟེར་ན་དྲང་དོན་གྱི་བརྗོད་བྱ་ཡིན་ན་ཐ་སྙད་དུ་ཡང་མེད་པའི་ཁྱབ་མཐའ་འཆའ་ནུས་སམ་སྐབས་འདིར་བརྗོད་དགོས་པ་མང་ཡང་རེ་ཞིག་དེ་ཙམ་མོ། །དེ་བཞིན་དུ་ཤེར་ཕྱིན་མངོན་པར་རྟོགས་པའི་རྒྱན་གྱི་གཞུང་ཡང་མཐའ་གཅིག་ཏུ་མཁས་དབང་གཞན་དག་ཕལ་མོ་ཆེ་དག་གིས་དབུ་མ་རང་རྒྱུད་པའི་གཞུང་དུ་འཆད་པར་མཛད་དོ། །
དེའི་རྒྱུ་མཚན་ཡང་མངོན་རྟོགས་རྒྱན་ཐལ་འགྱུར་པའི་གཞུང་དུ་ཁས་བླང་ན། དེ་དག་གི་གཞུང་ནས་བཤད་པའི་དབུ་མ་ཐལ་འགྱུར་པའི་ལུགས་ཀྱི་ཁྱད་ཆོས་གཙོ་བོ་རྣམ་ པ་བརྒྱད་ཀྱི་དམ་བཅའ་ལ་གནོད་པའི་སྒོ་ནས་ཉམས་ཀྱི་དོགས 
་པར་ཟད་དེ་རྟོགས་པའི་ཁྱད་པར་འཕགས་གསུམ་རྟོགས་རིགས་གཅིག་ཏུ་འདོད་པ་དང༌། སྤང་བའི་ཁྱད་པར་ས་བརྒྱད་པ་མན་ཆད་དུ་ཤེས་སྒྲིབ་མི་སྤོང་བར་འདོད་པའི་དམ་བཅའ་ལ་མངོན་རྟོགས་རྒྱན་ལས་གནོད་ཚབ་ཆེ་བ་མེད་པའི་ཕྱིར་རོ། །
སྔ་འགྱུར་བའི་རང་བཞེད་ནི། མི་ཕམ་ཆོས་རྗེས་ཐལ་རང་གཉིས་ཀྱི་ཐུན་མོང་དུ་གྱུར་པ་ཕྱི་མོའི་གཞུང་ཉིད་དུ་དངོས་པོ་སྟོབས་ཞུགས་ཀྱི་རིགས་པའི་འཕྲུལ་དང་བཅས་ཏེ་རབ་གསལ་བརྒལ་ལན་དང༌། དམ་ཆོས་
དོགས་སེལ་སོགས་སུ་རྒྱ་ཆེར་བསྒྲུབས་པར་མཛད་དེ། འཕགས་པ ་གསུམ་གྱི་རྟོགས་རིགས་ལ་དཔྱད་པ་དང༌། ཤེས་སྒྲིབ་སྤོང་བའི་ས་མཚམས་ལ་དཔྱད་སྐབས་གཞན་དག་གིས་འཕགས་གསུམ་གྱི་རྟོགས་རིགས་ལ་ཁྱད་པར་ཡོད་ཚུལ་དེ་འདྲའི་རྣམ་གཞག་མངོན་རྟོགས་རྒྱན་ལས་བཤད་ཀྱང་དེ་རང་རྒྱུད་པའི་ལུགས་ཡིན་པའི་ཕྱིར་ཟེར་བ་ལ། ལན་དུ་མངོན་རྟོགས་རྒྱན་དུ་རང་རྒྱུད་པའི་གཞུང་ཁོ་ནར་མི་འགྲུབ་ཏེ་སོགས་དང་ཆོས་ཉིད་རྣམ་འབྱེད་ཀྱི་འགྲེལ་པར་བྱམས་ཆོས་སྡེ་ལྔའི་རྣམ་གཞག་མཛད་ཚུལ་གྱིས་ཀྱང་ཤེས་ནུས་པའི་ཕྱིར་རོ། །
འོ་ན་གཞུང་དེ་དག་གིས་ཐལ་རང་ཐུན་མོང་གི་གཞུང་ཙམ་དུ་གྲུབ་ཀྱང་ཕྱི་མོའི་གཞུང་དུ་མི་འགྲུབ་སྟེ། ཕྱི་མོ་ཞེས་པ་རྩ་བ་དབྱེ་གཞིར་གྱུར་པ་ཞིག་དགོས་ན་ཐལ་རང་གཉིས་དེ་ལས་གྱེས་པ་མིན་པའི་ཕྱིར་ཟེར་ན།
དངོས་བསྟན་སྟོང་ཉིད་ཀྱི་དགོངས་འགྲེལ་རྩ་བ་ཤེས་རབ་ཀྱི་དགོངས་པ་ཐལ་རང་གི་སློབ་དཔོན་སོ་སོས་འགྲེལ་ཚུལ་མི་མཐུན་པའི་སྒོ་ནས་གཉིས་སུ་གྱེས་པས་ན་གཞུང་ཕྱི་མོའི་དབུ་མར་འཇོག་པ་བཞིན་དུ། སྦས་དོན་མངོན་རྟོགས་ཀྱི་དགོངས་འགྲེལ་མངོན་རྟོགས་རྒྱན་གྱི་དགོངས་པ་རྒྱ་བོད་གཉིས་སུ་ཐལ་རང་གི་སློབ་དཔོན་སོ་སོས་འགྲེལ་ཚུལ་མི་མཐུན་པའི་སྒོ་ནས་གཉིས་སུ་གྱེས་པ་མཚུངས་པས་ན་གཞུང་ཕྱི་མོའི་དབུ་མ་ཉིད་དུ་གྲུབ་བོ། །དེང་སང་གི་དུས་སུ་ནི་རྒྱུ་མཚན་ཅི་ཡང་མེད་པར་རྙིང་མར་སྨྲ་བ་རྣམས་ཀྱིས་ཀྱང་མཐའ་གཅིག་ཏུ་མངོན་རྟོགས་རྒྱན་རང་རྒྱུད་པའི་གཞུང་ཡིན་ནོ་ཞེས་རྒྱུ་མཚན་མེད་པར་གཞན་གྱི་རྗེས་སུ་བཟློ་བར་མཛད་པ་མང་དུ་སྣང་ངོ༌། །
དེ་ལ་ཁོ་ན་རེ། མངོན་རྟོགས་རྒྱན་ཆོས་ཅན། རང་རྒྱུད་པའི་གཞུང་ཁོ་ནར་འཆད་རིགས་ཏེ། འཕགས་སེང་གཉིས་ཀྱིས་དེ་ལྟར་བཀྲལ་བའི་ཕྱིར་ཟེར།
འོ་ན་རྩ་བ་ཤེས་རབ་དེ་ཆོས་ཅན། རང་རྒྱུད་པའི་གཞུང་ཁོ་ནར་འཆད་རིགས་པར་ཐལ། རང་རྒྱུད་པའི་སློབ་དཔོན་རྣམས་ཀྱིས་དེ་ལྟར་བཀྲལ་བའི་ཕྱིར་རོ། །དེ་ལ་སྔ་རབས་མཁས་པའི་རིང་ལུགས་ཀྱི་ཁྱད་པར་ནི་ཤེར་ཕྱིན་གྱི་དོན་འགྲེལ་མ་ཕམ་དགོངས་པའི་རྒྱན་དུ་བྲིས་ཟིན་གྱི་དེ་ལས་མཁྱེན་པར་འཚལ་ལོ། །
དེ་བཞིན་དུ་མཁས་དབང་གཞན་དག་གིས་དབུ་མ་རང་རྒྱུད་པའི་གཞུང་ལུགས་རྣམས་ནི། ཐེག་ཆེན་ཐལ་འགྱུར་ཆེན་པོའི་འགལ་ཟླར་གྱུར་པ་ཡིན་ཏེ་ཕན་ཚུན་རྩོད་པ་དང་བཅས་པའི་ཕྱིར་ཞེས་སྨྲ་བར་མཛད་དོ། །རྙིང་ཕྱོགས་ཀྱི་རང་བཞེད་ནི་འཇམ་མགོན་མི་ཕམ་ཆོས་རྗེ་དེ་ཡིས། དབུ་མ་རྒྱན་སོགས་རང་རྒྱུད་པའི་གཞུང་ལུགས་རྣམས་ནི་གནས་སྐབས་རྣམ་གྲངས་པའི་དོན་དམ་རྩལ་དུ་བཏོན་པ་ལ་བརྟེན་ནས། མཐར་ཐུག་ཐལ་འགྱུར་ཆེན་པོའི་ལམ་སྟེགས་སུ་འགྱུར་བར་བཞེད་དེ། རྒྱན་གྱི་སྤྱི་དོན་སྐབས་སོགས་སུ་རྒྱ་ཆེར་བསྒྲུབ་པར་མཛད་པའི་ཕྱིར་རོ། །