བསྙེན་བསྒྲུབ་ཀྱི་ཟིན་བྲིས་ཉམས་ལེན་སྙིང་པོ་བསྡུས་པ་དམ་པའི་ཞལ་ལུང་།

ཟབ་ཆོས་ཞི་ཁྲོ་དགོངས་པ་རང་གྲོལ་གྱི་བསྙེན་བསྒྲུབ་ཀྱི་ཟིན་བྲིས་ཉམས་ལེན་སྙིང་པོ་བསྡུས་པ་དམ་པའི་ཞལ་ལུང་ཞེས་བྱ་བ་བཞུགས་སོ། །

རྒྱལ་ཀུན་ཐུགས་ཀྱི་གསང་བའི་མཛོད་ཆེན་པོ། །རིམ་དགུའི་ཐེག་པའི་རྩེ་རྒྱལ་ཨ་ཏི་ཡི། མན་ངག་དགོངས་དོན་མ་ནོར་མངོན་སུམ་དུ། །སྟོན་པའི་ཆོས་འདིར་ཡིད་ཆེས་དད་པས་འདུད། །ལུས་ཅན་ཀུན་ལ་གཞི་གནས་ལྷུན་གྲུབ་ཀྱི། །ཁྱབ་བདག་གདོད་མའི་མགོན་པོ་ཡོངས་བཞུགས་ཀྱང་། །མ་རྟོགས་འཁྲུལ་བ་རང་མཚན་བཟུང་བའི་འགྲོ། །གཞི་ཐོག་གྲོལ་བྱེད་ཐབས་མཆོག་འདི་རྨད་བྱུང་། ཀུན་བཟང་རིགས་ལྔ་རིག་འཛིན་བརྒྱུད་པའི་བཀའ། །པདྨས་ཕྱག་རྒྱས་བཏབ་སྟེ་ཕྱི་མའི་འགྲོར། །ཕན་ཕྱིར་སྦས་པ་ཕྲིན་ལས་རིགས་སྤྲུལ་པ། །གང་དེས་སླར་ཡང་བཏོན་པའི་བཀའ་དྲིན་དྲན། །ཨོ་རྒྱན་མཁན་པོའི་རང་ལུགས་ཟླ་མེད་པ། །ཞི་ཁྲོ་དགོངས་པ་རང་གྲོལ་བསྙེན་སྒྲུབ་ཀྱི། །ཟིན་བྲིས་ཉམས་ལེན་སྙིང་པོ་བསྡུས་པའི་གནད། །དམ་པའི་ཞལ་ལུང་ཇི་བཞིན་གསལ་བར་བཀོད། །དེ་ཡང་བློ་གསལ་རྣམས་ཀྱི་མགྲིན་པ་ཡི། །འཁོར་ལོར་མཛེས་པའི་རྒྱན་དུ་སྡེབ་ལེགས་ཀྱི། །ཚིག་དོན་རིན་ཆེན་ཕྲེང་བའི་ཆུན་འཕྱངས་འདི། །སྦྱིན་པས་ཚུལ་བཞིན་ལོངས་ལ་གཅེས་སྤྲས་མཛོད། །ཅེས་མཆོད་པར་བརྗོད་པས་མདུན་བསུས་ཏེ་བསྙེན་བསྒྲུབ་བྱེད་ཚུལ་ཅུང་ཟད་བྲི་བ་ལ། དེ་ཡང་གསང་སྔགས་སྤྱི་དང་ཁྱད་པར་ཞི་ཁྲོ་དགོངས་པ་རང་གྲོལ་སོགས་

ཀྱི་བསྙེན་བསྒྲུབ་ལ་མཁོ་བའི་ཉེར་དགོས་ནི། གནས་དབེན་ཞིང་གློ་བུར་བའི་འགལ་རྐྱེན་མི་འབྱུང་བའི་སར། ལུས་ཀྱི་འཚོ་ཆས་དང་བསྒྲུབ་པའི་ཡོ་བྱད་རྣམས་འདུ་བྱས་ལ། མཚམས་མ་བསྡམ་པའམ། བསྡམ་ཀྱང་རུང་སྟེ། སྐྱབས་སེམས། ཕྱག་དང་། རྡོར་སེམས་བསྒོམ་བཟླས། མཎྜལ་དང་། བླ་མའི་རྣལ་འབྱོར་རྣམས་ལ་བརྩོན། ཆོས་སྤྱོད་བག་ཆགས་རང་གྲོལ་འདོན་ལ་བདག་ཉིད་རྡོར་སེམས་གསལ་བའི་སྤྱི་བོར་ཁྲག་འཐུང་གི་ལྷ་ཚོགས། མགྲིན་པར་རིག་འཛིན། སྙིང་ཁར་ཞི་བའི་ལྷ་ཚོགས་གསལ། ཡིག་བརྒྱ་འབུམ་སོགས་ཅི་ནུས་བཟླ་སྨོན་ལམ་དྲག་ཏུ་འདེབས། བདག་གི་བསྙེན་བསྒྲུབ་ཟབ་མོ་ཚུལ་བཞིན་ཉམས་སུ་ལེན་པ་འདི་ལ་བར་ཆད་མེད་ཅིང་དངོས་གྲུབ་ཐོབ་པའི་གསོལ་འདེབས་ཆོས་སྲུང་ལ་ཕྲིན་བཅོལ་བྱ། འདི་ནི་དངོས་གཞིར་བར་ཆད་མེད་ཕྱིར་གལ་ཆེའོ། །དེ་ནས་མཚམས་ལ་འཇུག་པ་དངོས་ནི། ཡར་ངོའི་ཚེས་བརྒྱད་ནས་བཅོ་ལྔའི་བར་དུ། གཟའ་ལྷག་པ་ཕུར་བུ་པ་སངས། སྤེན་པ་སོགས་རང་གི་བླ་གཟའ་དར་བ་དང་། སྐར་མ་རྒྱལ་སོགས་ཤིས་པའི་ཉིན་གནས་ཁང་བྱི་དོར་དང་སྤོས་ཀྱིས་བདུག །མདུན་དུ་སྟེགས་བུ་གྲུ་བཞི་པ་བཅའ། །མལ་འོག་ཏུ་འབྲུ་དཀར་རམ་ས་དཀར་གྱིས་གཡུང་དྲུང་ཆོས་བསྐོར་དུ་བྲི། རྣལ་འབྱོར་རང་ཉིད་ཁྲུས་དང་དྲི་བཟང་གིས་བྱུག་པ་གདན་ལ་འདུག་སྟེ་སྐྱབས་སེམས་ཡན་ལག་བདུན་པ་སོགས་བརྗོད་དོ། །ད་དངོས་གཞི་ལ་ས་བཅད་བཅུ་གསུམ་གྱིས་བསྟན་ཏེ། མཚམས་གཅོད་པ། དམ་ཚིག་ལ་གནས་པ། དམ་བཅའ་བ། དཀྱིལ་འཁོར་བྲི་བ། རྟེན་བཤམས་པ། མཆོད་པ་བཤམ་བཀོད། ལས་གཞུང་ལ་འཇུག་པ། འཛབ་དང་། ཐུན་བཞིའི་རྣལ་འབྱོར། དུས་གྲངས་རྟགས་དང་། དངོས་གྲུབ་ལེན་པ། ཁ་བསྐང་སྦྱིན་སྲེག །ལས་རྗེས་མི་

མངོན་པར་བྱ་ཞིང་གནས་མལ་སྲུང་བ་དང་བཅུ་གསུམ་མོ། དང་པོ་མཚམས་གཅོད་པ་ནི། ཕྱོགས་བཞིའམ་སྒོ་དྲུང་དུ་ཐོ་དཀར་པོ་བང་རིམ་ཅན་ལ་རྒྱལ་ཆེན་སྡེ་བཞིའི་སྐུའམ། སྔགས་བྱང་ཤམ་བུར་བདག་གི་སྒྲུབ་པ་འདིའི་དངོས་གྲུབ་ཐོབ་ཀྱི་བར་བར་ཆད་སྲུང་ཤིག་རཀྵ་དང་རྡོ་རྗེ་འབར་བ་བྲིའོ། །རང་ཉིད་བཛྲ་ཧེ་རུ་ཀ་ཞལ་གཅིག་ཕྱག་གཉིས་རྡོར་དྲིལ་འཛིན་པ་དུར་ཁྲོད་རོལ་པའི་ཆས་ཅན་ཁྲོ་གཏུམ་བཟོད་པར་དཀའ་བའི་གཟི་བརྗིད་ཆེར་འབར་ཞིང་རང་སྣང་གི་ཡུམ་དང་བཅས་པའི་སྐུར་གྱུར་པར་བསམ་ལ། ༀ་བཛྲ་མ་ཧཱ་ཤྲྀ་ཧེ་རུ་ཀོ྅་ཧཾ༔ བཟླ་ཞིང་གཞི་བདག་ལ་གཏོར་མ་ཕུལ་འཕྲིན་བཅོལ་བྱ། བགེགས་གཏོར་བརླབ་འགུགས་བསྔོ་ལ། ཧཱུྃ་ང་ཉིད་ལྷ་ཡི་ང་རྒྱལ་སོགས་དྲག་སྔགས་རོལ་མོ་རྫས་དུད་དང་ཁྲོ་བོའི་སྤྲིན་འཁྲིགས་པས་བགེགས་བསྐྲད། དེ་ནས་ཕྱིའི་ཐོ་རྩར་ཉེར་སྤྱོད་གཏོར་མ་གསེར་སྐྱེམ་བཤམ་ལ། རཾ་ཡཾ་ཁཾ་གསུམ་གྱིས་སྦྱང་། ༀ་ཨཱཿཧཱུྃ་གསུམ་གྱིས་བརླབ། ནམ་མཁའ་མཛོད་ཀྱིས་སྔགས་རྒྱས་སྤེལ་ཏེ། ཐོ་བསངས་སྦྱང་། སྟོང་པའི་ངང་ལས་རྒྱལ་ཆེན་སྡེ་བཞིའི་སྐུར་ལམ་གྱིས་གསལ་བར་གྱུར། རང་གི་ཐུགས་ལས་འཕྲོས་པའི་འོད་ཀྱི་རི་རབ་ཀྱི་ཕྱོགས་བཞི་ནས་རྒྱལ་ཆེན་སྡེ་བཞི་འཁོར་དང་བཅས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བཾ་ཧོཿས་རྟེན་ལ་བསྟིམ། ༀ་དྷྲིཥྚ་རཥྚ་ཧཱུྃ་ཛ༔ ༀ་བཻ་རཱུ་ཌྷ་ཀ་ཧཱུྃ་ཛ༔ ༀ་བཻ་རཱུ་པཀྵ་ཧཱུྃ་ཛ༔ ༀ་བཻ་ཤྲ་མ་ཎ་ཧཱུྃ་ཛ༔ ཞེས་བཟླས། ༀ་བཛྲ་ཨརྒྷཾ་སོགས་ཀྱིས་མཆོད། གོང་གི་སྔགས་བཞིའི་མཐར། བ་ལིཾ་ཏ་ནཱ་ན་ཁ་དནྟུ་གྲྀཧྣ་ཧཱུྃ་ཁ་ཧི་ཁ་ཧི༔ གསུམ་གྱིས་གཏོར་མ་འབུལ། ཧཱུྃ་རི་རབ་ཆེན་པོའི་ཕྱོགས་བཞི་ནས༔ ཕྱག་ན་རྡོ་རྗེའི་དབང་གི་མཐུས༔ རྒྱལ་པོ་ཆེན་པོ་སྡེ་བཞི་ཡིས༔ བདག་ཅག་རེ་བ་བསྐང་བའི་ཕྱིར༔ མ་དག་པ་རྣམས་མཚམས་ཆོད་ཅིག༔ སྒྲུབ་ཁང་རྣམ་རྒྱལ་ཁང་

བཟང་དང་། ཕྱོགས་བཞིའི་ཐོ་བཞི་རི་རབ་ཀྱི་ལྕོག་བཞིར་བསམ་ལ། ཐོ་བཞི་ཡོད་ན་སོ་སོར་བྱའོ། །ཕྲིན་ལས་བཅོལ། བརྟན་བཞུགས་བྱ། རྟེན་སྙིང་དང་ཏིཥྛ་བཛྲ་གྱིས་བརྟན་པར་བྱ་སྟེ་ཤིས་བརྗོད་ཀྱང་བྱའོ། །ནང་དུ་སྒོའི་ཡ་ཐེམ་ལ་བཀའ་སྲུང་དྲེགས་པ་སྡེ་བདུན་འཁོར་བཅས་ཀྱིས་སྒྲུབ་ལ་བར་དུ་གཅོད་པ་ཐམས་ཅད་འདི་ཡན་ཆད་མ་བཏང་ཞིག །ཅེས་བྲིས། ལམ་རིམ་ལྟར་བདག་གི་སྒྲུབ་པ་འདི་མཐར་མ་ཕྱིན་བར་དུ་ཐེམ་པ་འདིའི་ཕྱིར་བརྒལ་ན་མགོ་བོ་ཁོས་ཤིག་ཅེས་པ་ཡང་བྲིས། མ་གྲུབ་ཀྱང་ཆད་སྐྱོན་མེད་དོ། །ནང་དུ་གདན་ལ་འཁོད། ཧཱུྃ་རང་ཉིད་ལྷ་ཡི་ཐུགས་ཀ་སོགས། ནང་དུ་རྡོ་རྗེའི་གུར་ཏོག་བླ་བྲེ་དྲ་བ་རྭ་བ་ས་གཞི་ཐམས་ཅད་རྡོ་རྗེའི་རང་བཞིན། དེའི་ཕྱི་རིན་པོ་ཆེ། དེ་རྒྱབ་པདྨ། དེ་རྒྱབ་རྡོ་རྗེ་རྩེ་གཅིག་རྩེ་གསུམ་རྩེ་ལྔའི་རྒྱ་གྲམ། དེ་རྒྱབ་མཚོན་ཆ་འཁོར་ལོ། དེ་རྒྱབ་མེ་རི། དེ་དག་གི་བར་མཚམས་རྣམས་སུ་ཁྲོ་ཆུང་གྲངས་མེད་ཀྱིས་བར་མཚམས་མེད་པ་ཐེམ་མེར་གང་། ཞལ་ཕྱིར་གྱུའི་བཟློགས་སྔགས་དང་། ནང་གྱུའི་བསྲུང་སྔགས་བཟླ་ཞིང་དེའི་ལས་བྱེད་པར་བསྒོམ་མོ། །འདི་སྒྲུབ་པ་གྲོལ་ཉིན་གྱི་ཐུན་ཐ་མའི་ཚེ་མ་གཏོགས་མི་བསྡུ་ཞིང་། ཐུན་མགོ་རྣམས་སུ་གསལ་འདེབས་རེས་ཡང་གསལ་དུ་བསྐྱེད་དོ། །འདི་ནས་བཟུང་མཚམས་ཁང་དུ་ཡོད་པ་མ་གཏོགས་མི་གཞན་དང་མི་འཕྲད་མཚམས་བཅད་དོ། །གཉིས་པ་དམ་ཚིག་ལ་གནས་པ་ནི། ཁ་ལག་མི་བཀྲུ། སྐྲ་སེན་མི་བྲེག་མལ་སྟན་མི་བསྒུལ། མཚོན་རྩེ་ཁར་མི་འཇུག །མེ་དང་ཉི་མ་ཆང་སོགས་ཧ་ཅང་མང་ན་འགལ་བས་སྤངས། སྒོག་ཙང་སོགས་དྲོད་ཆེ་བ་སྤང་། སྔོ་སྡུམ་ལྕེ་མཚེར་པ་སོགས་སྔགས་ནུས་ཉམས་པས་སྤང་། མེ་ལ་ཕུས་མི་བཏབ། སྔགས་མར་སྲུང་སྐུད་དང་གཞན་ལ་

བྱིན་རླབས་སྤང་། སྒྲུབ་ཁང་ནས་ཆས་ཀ་བཏང་ལེན་མི་བྱ། གོས་མི་བརྗེ་བར་བཤད་ཀྱང་ནང་ན་ཡོད་པ་མི་འགལ་ལམ་སྙམ། འགྲངས་ཆེ་བ་དང་ལྟོག་ཆེ་བ། སྒོ་གསུམ་གྱི་མཚམས་རལ་བ། ལུས་ཀྱི་དྭངས་མ་ཉམས་པ། ཁམས་ཉོག་པའི་ཟས་སྔར་ཟ་མ་མྱོང་བའི་ཟས་དང་སྔར་མ་མྱོང་བའི་སྤྱོད་ལམ་གཏམ་སྐད་སོགས་རྟོག་པ་འཕྲོ་བའི་རྐྱེན་མཐའ་དག་སྤང་ངོ་། །གསུམ་པ་དམ་བཅའ་བ་ནི། བདག་གི་སྒྲུབ་པ་འདིའི་འབྲས་བུ་ཁྱབ་བདག་ཀུན་ཏུ་བཟང་པོའི་གོ་འཕང་མ་ཐོབ་ཀྱི་བར་རམ། བསྙེན་སྒྲུབ་ཚད་དུ་མ་ཕྱིན་པར། རྒྱ་མཚོ་ཁ་ལུད། རི་རབ་རྡུལ་དུ་ཞིག །གནམ་ལྕགས་ཐོག་ཆར་ལྟར་བབས་རུང་། རྒྱལ་པོའི་ཆད་པ། བདུད་ཀྱི་ཆོ་འཕྲུལ་གཟུགས་ཅན་གཟུགས་མེད་ཀྱི་དམག་དཔུང་། མེ་དང་མཚོན་གྱི་འཇིག་པ་བྱུང་རུང་། ཕ་དང་མའམ་ཉེ་དུ་ཤི་བའམ་དགྲ་དང་གཅན་གཟན་གྱིས་ཁྱེར་རུང་། རང་ནད་དང་གདོན་གྱིས་བཏབ་ཀྱང་གདན་ཐོག་འདིར་ཤི་བ་ལས་དམ་བཅའ་ལྷོད་རེ་སྙམ་དུ་སྙིང་ཐག་པ་ནས་དམ་བཅའོ། །བཞི་པ་དཀྱིལ་འཁོར་བྲི་བ་ནི། དེ་ཡང་བླ་མ་གོང་མ་འགའ་ཞིག་གིས་འོག་ཁང་ཞི་བ་དང་། སྟེང་ཁང་ཁྲོ་དཀྱིལ་དུ་མཛད་པ་ནི། ཆོས་སྤྱོད་དང་བསྟུན་པར་གནང་བས་འགལ་བ་མེད་མོད། འོན་ཀྱང་ལས་བྱང་ཆེ་ཆུང་དུ་སྟེང་འོག་གི་འགྲོས་མེད་པ་དང་། ན་རཀ་དོང་སྤྲུགས་སྡིག་སྒྲིབ་བཤགས་པའི་རྒྱལ་པོ་ཞེས་གསུངས་འདུག་པས། འདིར་ཞི་ཁྲོ་ཁྲོམ་དཀྲུགས་ཀྱི་ལུགས་འདི་སྨིན་གླིང་མཁན་ཆེན་གྱིས་གཞུང་དང་སྦྱོར་བ་གནང་འདུག་པས་དེའི་རྗེས་སུ་འབྲངས་ཏེ། དཀྱིལ་འཁོར་གྱི་གཞི་ཇི་ལྟར་འཚམས་པ་ལ་ཐིག་བརྒྱད་བཏབ། མེ་རྡོར་དུར་ཁྲོད་པདྨའི་འཁོར་ཡུག་གིས་བསྐོར་བའི་ནང་དུ་སྣ་ཚོགས་རྡོ་རྗེ་ལ་གནས་པའི་དཀྱིལ་འཁོར་གྲུ་བཞི་སྒོ་བཞི་རྟ་

བབས་བང་རིིམ་བཞི་པ། པད་འཁོར་རི་དྭགས་གདུགས་དང་བཅས་པ། རྩ་ཐིག་ནས་ཁྱམས་ཆ་ཆེན་གཅིག་དོར་བའི་ནང་དུ་ལྟེ་བ་ནས་ཟླུམ་བསྐོར་ཆ་མཉམ་གཉིས་བསྐོར། དེའི་ཕྱི་མའང་གསུམ་གཉིས་ནང་དུ་དོར་ནས་བསྐོར་བའི་ལྟེ་བ་ཟླུམ་པོའི་དབུས་སུ་ཟླུམ་བསྐོར་ལྔ་ཚོམ། གཉིས་པ་འཁོར་ལོ་རྩིབས་བཞི།  གསུམ་པར་འཁོར་ལོ་རྩིབས་བརྒྱད ། ཁྱམས་ཕྱེད་དུ་བཅད་དེ་ལྷ་སྣམ་ཉིས་རིམ་དུ་གདབ། ཚོན་ནི་ལྟེ་བ་སྔོན་པོའི་གཞིར་ཟླུམ་སྐོར་ལྔ་ཚོམ་གྱི་དབུས་མཐིང་། ཕྱོགས་བཞིའི་ཐིག་ལེ་དང་། རྩིབས་བཞི་ཁྱམས་སྒོ་དང་བཅས་པ་ཕྱོགས་མདོག །རྩིབས་བརྒྱད་ཀྱི་ཕྱོགས་བཞི་ཕྱོགས་མདོག་མཚམས་དང་གྲུ་ཆད་ཕྱེད་ཚོན། རྩིག་པ་ནང་ནས་རིམ་བཞིན། མཐིང་དཀར་སེར་དམར་ལྗང་གཞན་སྤྱི་དང་མཐུན། ལྷ་གནས་སུ་སྐུའམ། ཡིག་འབྲུའམ། ཕྱག་མཚན་ནམ། རང་མདོག་གི་ཐིག་ལེ་ལྟ་བུའི་མཚན་མ་ཇི་ལྟར་འོས་པ་བྲི་དགོས་ཏེ། རྒྱུད་ལས། གཙོ་བོ་གཟུགས་སུ་རྫོགས་པ་བྲི། །འཁོར་རྣམས་ཕྱག་རྒྱ་དག་དུ་བྱ། །ཕལ་པ་ལ་ནི་ཡིག་འབྲུའོ། །ཞེས་སོ། །ཚོན་སྤུང་བྱས་ན་ཡང་རུང་ངོ་། །རྡུལ་ཚོན་མ་གྲུབ་ན་རས་བྲིས་ཀྱི་དཀྱིལ་འཁོར་བཀྲམ། ཐ་ན་སྟེགས་ཀྱི་ཁར་འབྲུ་ཚོམ་ལྷ་གྲངས་བཞིན་བཀོད་ན་རུང་ཙམ་བཤད་དོ། །ལྔ་པ་རྟེན་བཀོད་པ་ནི། རྒྱུད་ལས། རྟེན་འབྲེལ་རྫས་མེད་དངོས་གྲུབ་ཡལ་བར་དོར། །ཅེས་གསུངས་པས་སྒྲུབ་རྟེན་ནི་དཀྱིལ་འཁོར་དབུས་སུ་མཉྫུའི་ཁར་བུམ་པ་ཉེར་ལྔའི་བཅུད་ལྡན་རྒྱུན་བབས་ཆུ་དང་། དྲི་བཟང་བ་དམར་ཟལ་གྱི་འོ་མ་ཅུང་ཟད་བཅས་པས་བུམ་པའི་སུམ་ཆ་བཀང་། ཁ་རྒྱན་མགུལ་ཆིངས་གཟུང་རྡོར་གྱིས་བརྒྱན་པ། རིགས་ལྔའི་ཕྱག་རྒྱས་སྤྲས་པ། བུམ་པ་ལྔའམ་གཅིག་ཏུ་བསྡུས་ཀྱང་ཆོག །རིགས་ལྔ་ཀུན་བཟང་ཡབ་ཡུམ་སྐུ་ཙཀ་ལིའམ། ཞི་ཁྲོ་ཡོངས་རྫོགས་སྐུ་ཙཀ་

གང་འཛོམས་ལ་རྒྱབ་ཏུ་གནས་ཡིག་དང་སྔགས་བྲིས་པ་སྐུ་རྟེན། བཏགས་གྲོལ་རྒྱུད་མཐིང་ཤོག་ལ་གསེར་གྱིས་བྲིས་པའམ་ཅི་འབྱོར། དེ་ཡང་མ་འབྱོར་ན་རིགས་བརྒྱའི་སྙིང་པོའམ། ཡང་སྙིང་གསེར་གྱིས་བྲིས་པ་དར་སྣས་དྲིལ་བ། བུམ་པའི་མདུན་དུ་འབྲུ་ཚོམས་ཀྱི་ཁར་བཞག་པ་དང་། ཐོད་པ་དུམ་གཅིག་ནང་བྱང་སེམས་ཨ་མྲྀ་ཏས་གཏམ་པ་གསུང་གི་རྟེན། ཐུགས་རྟེན་དུ་གཟུགས་བརྙན་གསལ་བར་འཆར་བའི་མེ་ལོང་། རིགས་ཙཀཤེལ་རྡོ་རྣམས་དབང་བཞིའི་ཚུལ་དུ་དགོད། བསྒྲུབ་གཏོར་ཡང་དགོས། དྲུག་པ་མཆོད་པ་བཤམས་པ་ནི། ཕྱོགས་བཞིར་རྩ་གསུམ་ཆོས་སྐྱོང་ཀུན་འདུས་ཀྱི་གཏོར་མ། དེའི་མཐར་དྲག་མཆོད་གཡོན་སྐོར་དུ་བཤམས། སྨན་ཨ་མྲྀ་ཏ་ཆང་དང་སྦྱར་བ། རཀྟ་སོ་ལྔ་ལ་སོགས་ཀྱི་ཕབ་ལྡན་ཐོད་སྣོད་དུ་ཞི་གཏོར་གྱི་གཡས་གཡོན་དུ་བཤམས། ནང་མཆོད་འདི་རྣམས་རློན་པ་རྣམས་སྐམ་གྱི་དོགས་ན་མ་གཏོག་ཁ་གསོ་མི་དགོས། དེ་ཀུན་དར་དམར་པོའི་གུར་རམ་ཡོལ་བས་སྒྲིབ་ཏེ་མི་མངོན་པར་བྱ། དེའི་ཕྱིའི་མདུན་དུ་རྨད་བྱུང་གཏོར་མ། བཀའ་སྲུང་དམ་ཅན་སྡེ་བདུན་གཏོར་མ་ཤ་ལིང་སྙིང་སོགས་ཀྱིས་བརྒྱན་པ་དང་། གསོལ་ཁ། སྨན་རཀ་ཕབ་ལྡན། ཆུ་གཙང་འོ་མའི་བྲན་པས་མཆོད་ཡོན། ཙན་དན་ཆུ་དང་སྦྱར་བའི་ཞབས་བསིལ། ཐང་སྐྱེས་ཆུ་སྐྱེས་སོགས་མེ་ཏོག །ལྷན་སྐྱེས་དང་སྦྱར་བྱུང་གི་བདུག་སྤོས། གུརྒུམ་ཙནྡན་སོགས་སྨན་སྣ་དཀར་གསུམ་གྱི་དྲི་ཆབ། འབྲུ་མར་རྩི་མར་གྱི་མར་མེ། རོ་བཅུད་འདུས་པའི་ཞལ་ཟས། འུར་ཏིང་སིང་ཁྲོལ་གྱི་རོལ་མོ་སྣ་ཚོགས། འདི་དག་ནི་ཐུན་གྱི་མགོ་དང་སྟོང་ཚིག་སྐབས་རྣམས་སུ་གསོ་བྲན་བྱའོ། །བདུན་པ་ལས་གཞུང་ལ་འཇུག་པ་དངོས་ནི། མཆོད་པ་རྟེན་སྒྲུབ་ཀྱི་རྫས་རྣམས་བཤམས་ཚར་བའི་ཕྱི་དྲོ་ལ་བབས་པ་ན། ཡེ་ཤེས་འཇིག་རྟེན་གྱི་ལྷ་

དང་མཁའ་འགྲོ་དམ་ཅན་རྒྱ་མཚོ་དབང་དུ་འདུ་བའི་རྟེན་འབྲེལ་གྱིས་དགོང་མོ་དབང་གི་དུས་དུ་བརྒྱུད་པའི་གསོལ་འདེབས་བྱ། ཐོ་སོགས་གོང་དུ་མ་གྲུབ་ཚེ། འདིར་མཚམས་ཐོ་བཞག །དཀར་བགེགས་བཏང་། བསྲུང་འཁོར་གསལ་བཏབ། མདུན་མཁར་སྐྱབས་ཡུལ་བརྒྱུད་པའི་བླ་མ་སངས་རྒྱས་བྱང་སེམས་ཡི་དམ་མཁའ་འགྲོ་དམ་ཅན་རྒྱ་མཚོའི་ཚོགས་བཅས་གསལ་རྒྱུན་བཤགས་ཡན་ལག་བརྒྱད་པའམ་བཅུ་པ་ཕུལ་ནས། མཆོད་རྟེན་སྒྲུབ་རྫས་བྱིན་རླབས་མཐར་མཚམས་ལྷ་སྐད་ཅིག་གིས་གསལ་ཡོད་པ་མི་དམིགས་པའི་ངང་ལ་བཞག་ནས། ཏིང་འཛིན་གསུམ་གྱིས་ཁོག་ཕུབ་དགོས་ཏེ། པདྨའི་སྙིང་གུར་ལས། དཔའ་བར་འགྲོ་བས་སྣོད་བཅུད་ལྷར་བལྟ་ཞིང་། །སྒྱུ་མ་ལྟ་བུར་སྒྲ་རྣམས་ཆོས་ཀྱི་དབྱིངས། །རྡོ་རྗེ་ལྟ་བུ་དེ་བཞིན་ཉིད་ལ་སྦྱོར། །ཏིང་འཛིན་གསུམ་ལས་རྒྱུན་དུ་གཡོ་མི་བྱ། །ཞེས་གསུངས་པ་ལྟར། དེ་ལ་དང་པོ་དེ་བཞིན་ཉིད་ཀྱི་ཏིང་འཛིན་ནི། ཨ་རྣམ་པར་རྟོག་གསུམ་བྲལ་བ་ཡི༔ དམིགས་མེད་བརྗོད་བྲལ་དེ་བཞིན་ཉིད༔ ཅེས་པ་ལྟར། བཟང་རྟོག་ངན་རྟོག་ལུང་མ་བསྟན་གྱི་རྟོག་པ་གསུམ་དང་བྲལ་བ། དམིགས་གཏད་འཛིན་ཞེན་མེད་པ། ཚིག་གིས་བརྗོད་པ་བྲལ་ཞིང་། བློའི་ཡུལ་ལས་འདས་པའི་ཤེས་རིག་སོ་མ་རང་བབས་ཀྱི་གནས་ལུགས་རྗེན་པ་བསལ་བཞག་མེད་པ་ལ་མཉམ་པར་བཞག་པ་འདིས། མར་འཁོར་བའི་དྲི་མ་འཆི་སྲིད་སྦྱོང་ཞིང་། མཚན་འཛིན་གྱི་རྟོག་པ་དག་པར་བྱེད། ཡར་འབྲས་བུ་ཆོས་སྐུ་མངོན་དུ་འགྲུབ་པའི་ནུས་པ་རྩལ་རྫོགས། བར་དུ་རྫོགས་རིམ་གྱི་སྐབས་སུ་དོན་གྱི་འོད་གསལ་རྒྱུད་ལ་སྐྱེ་བའི་གཞི་འདིང་བའི་སྨིན་བྱེད་དུ་འགྱུར་རོ། །གཉིས་པ་ཀུན་སྣང་གི་ཏིང་འཛིན་ནི། ཨ་རྟོག་བྲལ་ངང་ལས་རང་བྱུང་རྩལ༔ སྟོང་ཉིད་སྙིང་རྗེ་ཀུན་དུ་སྣང་༔ ཞེས་པས་

བསྟན་ལ། རྟོག་བྲལ་སྟོང་པ་ཆེན་པོ་དེའི་ངང་ལས། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་བྱུང་རིག་པའི་རྩལ་ཙམ་ལས་རང་བཞིན་བདེན་པར་མ་གྲུབ་ཅིང་། རིག་པའི་ངོ་བོ་སྐྱེ་འགགས་གནས་གསུམ་བྲལ་བ་ཡིན་པར་ཇི་བཞིན་མ་རྟོགས་པའི་དབང་གིས་འགྲོ་བ་རྣམས་སྡུག་བསྔལ་ལ་སྤྱོད་པ་ལ་རིག་རྩལ་སྙིང་རྗེ་སྒྱུ་མ་ལྟ་བུར་ཤར་བ་ཀུན་ལ་ཁྱབ་པར་བསྒོམ། འདིས་མར་བར་སྲིད་ཀྱི་བག་ཆགས་དང་། ཆད་ལྟ་འཛིན་པའི་རྟོག་པ་དག་པར་བྱེད། ཡར་འབྲས་བུ་ལོངས་སྐུ་འགྲུབ་པའི་ནུས་པ་རྫོགས། བར་དུ་དོན་གྱི་འོད་གསལ་ལས་དག་པའི་སྒྱུ་ལུས་ལྡང་བའི་རྫོགས་རིམ་གྱི་གཞི་འདིང་བའི་སྨིན་བྱེད་དུ་འགྱུར་རོ། །གསུམ་པ་རྒྱུའི་ཏིང་ངེ་འཛིན་ནི། དེ་ཡང་ཐུགས་སྲོག་ཡིག་འབྲུ་བསྒོམ་པ་སྟེ། ཡུམ་བར་མ་ལས། ཨ་ཞེས་བྱ་བ་ནི་གདོད་མ་ནས་མ་སྐྱེས་པའི་ཕྱིར་ཆོས་ཐམས་ཅད་ཀྱི་སྒོའོ། །ཞེས་དང་། སྒྱུ་འཕྲུལ་ཕྱི་མ་ལས། ཨ་ནི་སྟོང་པ་ཡེ་ནས་སྟོང་། །སྟོང་པ་ཉིད་ལ་སྟོང་པ་མེད། །ཡི་གེ་ཀུན་གྱི་གཞིའམ་རྒྱུ། །ཞེས་པ་ལྟར། རང་གཞུངས་ལས། ཨ་རང་སེམས་རིག་རྩལ་འགགས་མེད་འདི༔ མཐིང་ནག་རྒྱུ་ཡི་ཡི་གེ་ཨ༔ ཞེས་པ་ལྟར། སྟོང་པ་ཉིད་དང་སྙིང་རྗེ་ཟུང་འཇུག་གི་རང་མདངས་ལས་འདིར་རྡོ་རྗེའི་ཆོ་ག་གསུམ་བསྐྱེད་ཀྱི་དང་པོ་གསུང་ཡིག་འབྲུ་བསྐྱེད་པའི་ཆོ་ག་ལ། དེ་ཡང་སྦྱང་བྱ་མངལ་གྱི་གནས་སྐབས་སུ། དང་པོ་ཕ་མའི་ཁམས་དཀར་དམར་ཚོགས་ནས། དེར་བར་དོའི་རྣམ་ཤེས་ཞུགས་པ། སྦྱོང་བྱེད་ལྷའི་ས་བོན་ཡི་གེ་ཨ་མཐིང་ཀམི་གཡོ་མི་འགྱུར་མངོན་པར་མི་འགྱུར། ཅིར་ཡང་བསྒྱུར་དུ་རུང་བ་སྟེ། རབ་ཏུ་བརྟན་པར་གྱུར་པའི་ཚད་བཞི། སལ་ལེ། སང་ངེ། ལྷག་གེལྷང་ངེ་བ་སྟེ་གསལ་བའི་ཚད་བཞི་དང་གསལ་བརྟན་གྱི་ཚད་བརྒྱད་དང་ལྡན་པ་རྩེ་གཅིག་གསལ་བས། སྦྱོང་

གཞི་ངག་གི་ཁམས་གྱི་དྲི་མ་དག །སྦྱངས་འབྲས་རྒྱལ་བ་ཐམས་ཅད་ཀྱི་གསུང་རྡོ་རྗེ་གཞོམ་མེད་ནཱ་དཱའི་སྒྲ་དབྱངས་སུ་རྫོགས། གསུང་རྡོ་རྗེ་ལོངས་སྤྱོད་རྫོགས་པའི་སྐུར་སྨིན་པའི་རྟེན་བྱེད་པའོ། །གསང་སྙིང་ལས། ཨ་རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོས། །བསྡུས་ཀྱང་འཕེལ་འགྲིབ་མེད་པར་བརྟན། །ཞེས་པ་ལྟར། རྒྱུའི་ས་བོན་ཨ་ཡིག་ནམ་མཁར་བསྒོམ་པ་ལས། ཨེ་ཡཾ་བཾ་ལཾ་རྣམས་སྤྲོས་པ་ལས། ཨེ་ལས་ནམ་མཁའི་དཀྱིལ་འཁོར་ཆོས་ཀྱི་འབྱུང་གནས་འབྱམས་ཀླས་པའི་དབྱིངས་སུ། ཡཾ་ལས་རླུང་གི་དཀྱིལ་འཁོར་ལྗང་གུ་རྒྱ་གྲམ། བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། ལཾ་ལས་སའི་དཀྱིལ་འཁོར་སེར་པོ་གྲུ་བཞི་པ་རྣམས་བརྩེགས་མར་གནས་པའི་དབུས་སུ། རིན་པོ་ཆེ་སྣ་བཞི་ལས་གྲུབ་པའི་རི་རབ་ཀྱི་རྩེར་པདྨ་དང་སྣ་ཚོགས་རྡོ་རྗེའི་ལྟེ་བ་ལ་གནས་པའི་བྷྲཱུཾ་ཡིག་ཡོངས་སུ་གྱུར་པ་ལས། ཐར་པ་ཆེན་པོའི་གཞལ་ཡས་ཁང་གྲུ་བཞི་པ་སྒོ་བཞི་ནང་ནས་རིམ་པ་བཞིན་མཐིང་དཀར་སེར་དམར་ལྗང་བའི་རྩིགས་པ་རིམ་པ་ལྔས་བསྐོར་བའི་སྟེང་དུ་ཕ་གུ་དང་དྲ་བ་དྲྭ་ཕྱེད་ཤར་བུ་མདའ་ཡབ་དང་བཅས་པ། རྩིགས་པའི་རྩ་བར་འདོད་ཡོན་གྱི་སྣམ་བུ་ལ་མཆོད་པའི་ལྷ་མོ་བཅུ་དྲུག་འཁོད་པས་མཆོད་པའི་སྤྲིན་སྤྲོ་བ། ནང་ཀ་བ་བརྒྱད་ཀྱིས་བཏེགས་ཤིང་རྡོ་རྗེའི་གདུང་གིས་ཕུབ་པའི་ཡ་ཕུབ་ཕྱུར་བུའི་རྩེར་རྡོ་རྗེའི་ཏོག་གིས་སྤྲས་པའམ། རང་སྣང་ལྷུན་གྲུབ་རྣམ་བྱང་ཡེ་ཤེས་ཆེན་པོའི་བཞུགས་ཚུལ་ལྟར་ན་ཕྱི་ལྟར་ཁམས་གསུམ་དུ་འཛིན་པའི་སྣང་ཞེན་བྱང་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ངོ་བོ་ཉིད་ཆོས་སྐུའི་རྟེན་གྱི་རྣམ་པར་རྫོགས་པའི་ཚུལ། རྡོ་རྗེ་བཀོད་པ་ལས། འདོད་ཁམས་དབང་གི་རི་བོ་ལ། །གཟུགས་ཁམས་བང་རིམ་ཁྲི་འཕང་ཅན། །གཟུགས་མེད་བུམ་རྟེན་བུམ་པར་བཅས། སྐུ་

གདུང་ཆེན་པོར་རྒྱུན་དུ་གནས། །ཞེས་སོ། །དེ་བས་ན་གཞལ་མེད་ཁང་གི་རང་བཞིན་ཀྱང་། ཕྱི་མཆོད་རྟེན་རྩེ་ལྔ་པའི་རྣམ་པ་ལ། ནང་རང་བྱུང་ལོངས་སྤྱོད་རྫོགས་པའི་གནས། འོག་མིན་སྟུག་པོ་སོགས་ཞི་ཁྲོ་ངན་སོང་སྦྱོང་བའི་ཡང་ཡིག་དཀའ་གནད་རྒྱ་འགྲོལ་ལས་གསུངས་པ་ལྟར། གཞལ་ཡས་རྩེར་མཆོད་རྟེན་གྱི་རྣམ་པ་ཅན་བྱས་ཀྱང་མི་འགལ་བས། བླ་མ་གོང་མ་འགའ་ཞིག་དེ་ལྟར་དུ་བཞེད། སྒོ་བཞིར་ཀ་བ་བཞི་བཞིས་བཏེགས་པའི་རྟ་བབ་སྣམ་བུ་བཞི་པ་ཆོས་འཁོར་རི་དྭགས་གདུགས་དང་བཅས་པ། གཞུང་ལྟར་ན་ཕྱི་རིན་པོ་ཆེའི་གཞལ་ཡས་ཁང་ལ། ནང་དུར་ཁྲོད་རོལ་པའི་བརྒྱན་བཀོད། ལྷ་ཆེན་བརྒྱད་ཀྱི་ཀ་གདུང་། གཟའ་བརྒྱད་ཀ་ཞུ། རུས་སྦལ་ཀ་གདན། ལྷ་ཕྲན་རྒྱུ་སྐར་དྲལ་ཕྱམ། ཕྱམ་རྩེ་ཉེར་བརྒྱད་ལ་དྲིལ་བུ་འཕྱངས་པས། སྟེང་ཐོག་མཆོད་རྟེན་གྱི་རྣམ་པས་མཐའ་བསྐོར་བ། མི་ནུབ་རྒྱལ་མཚན་བཅུས་བརྒྱན་པ། རྒྱལ་མཚན་བཅུ་ནི། ༡རྒྱལ་བྱེད་ལྕགས་ཀྱི་རྒྱལ་མཚན། ༢གདུལ་བྱ་ཤ་བའི་རྒྱལ་མཚན། ༣གཅན་གཟན་གཟིག་གི་རྒྱལ་མཚན། ༤སྤྲུལ་པ་རྡོ་རྗེའི་རྒྱལ་མཚན། ༥རིན་ཆེན་སྦྲུལ་ནག་རྒྱལ་མཚན། ༦དཔའ་བོ་སྟག་གི་རྒྱལ་མཚན། ༧གཟི་མདངས་མི་ཡི་རྒྱལ་མཚན། ༨དམར་གསལ་ཁྲག་གི་རྒྱལ་མཚན། ༩རྩལ་ཆེན་སེང་གེའི་རྒྱལ་མཚན། ༡༠གཏུམ་པོ་དོམ་གྱི་རྒྱལ་མཚན་དང་བཅུའོ། །ཚད་དང་མཚན་ཉིད་ཐམས་ཅད་ཡོངས་སུ་རྫོགས་ཤིང་རྒྱན་ཐམས་ཅད་ཀྱིས་རྣམ་པར་བརྒྱན་པ། ཕྱོགས་ཀྱི་དེ་བཞིན་གཤེགས་པ་བཞིའི་ཁ་དོག་ཅན་དྭངས་ཤིང་སྒྲིབ་པ་མེད་པའི་འོད་ཟེར་ཀུན་ཏུ་འཕྲོ་བ་ཕྱི་རོལ་ནས་དུར་ཁྲོད་བརྒྱད་དང་། རྡོ་རྗེའི་རྭ་བ་མེ་དཔུང་འབར་བའི་འཁོར་ཡུག་གིས་བསྐོར་བ། ནང་བར་ཁྱམས་གྲུ་

བཞི་པ་ལ་ལྷ་སྣམ་རིམ་པ་གཉིས་སུ་ཕྱེ་བའི་ནང་དུ་གྲུ་ཆད་དང་འཁོར་ལོ་ཉིས་རིམ་གྱིས་ལྟེ་བར་རིགས་ཀྱི་ཁ་དོག་ཅན་གྱི་ཐིག་ལེ་ལྔ་ཚོམ་གྱིས་མཛེས་པ། ལྷ་གནས་གྱི་གདན་ནི། དབང་བསྐུར་རྒྱལ་པོའི་རྒྱུད་ལས། ཐུགས་ནི་མི་འཇིགས་བཞི་ཡིས་བདུད་བཞི་འཇོམས། །དེ་གྲུབ་རྟགས་སུ་སེང་གེའི་ཁྲི་ལ་བཞུགས། །སྐུ་ནི་སྟོབས་བཅུས་མི་དགེ་བཅུ་རྣམས་འདུལ། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་བཞིས་ཆགས་མེད་བགྲོད། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །གསུང་ནི་དབང་བཅུ་མཐར་ཕྱིན་རྒྱལ་པོའི་གསུང་། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། །ལས་ནི་ཕྲིན་ལས་བཞི་ཡིས་ཐོགས་མེད་སྒྲོལ། །དེ་གྲུབ་རྟགས་སུ་ཤང་ཤང་ཁྲི་ལ་བཞུགས། །ཞེས་དང་། ཉི་ཟླ་པདྨ་རིན་པོ་ཆེ། སྐྱེས་བུ་ལྔ་ལ་ལྔ་བརྩེགས་སྟེ། །སེམས་དཔའ་ལ་ནི་སུམ་བརྩེགས་སོ། །ཉི་རྐྱང་ཁྲོ་ལ་པད་རྐྱང་ཐུབ། །ཞེས་པ་ལྟར་གསལ་བ་དང་། ཁྲོ་བོ་ལ། རང་གཞུང་ལས། རུ་ཏྲ་ཕོ་མོ་རིན་ཆེན་ཁྲི་རྐང་དང་༔ བྱོལ་སོང་པདྨ་ཉི་ཟླ་བརྩེགས་པའི་སྟེང་༔ ཞེས་དང་། མཁའ་ལྡིང་ཁྱུང་ཆེན་རིན་ཆེན་བྲག༔ ཅེས་པས་ཆེ་མཆོག་གི་གདན་དང་། གཞན་ལྔ་བྱོལ་སོང་གཙོ་བརྒྱད་རིན་ཆེན་བྲག༔ ཅེས་པས་བསྟན་ལ། རིན་ཆེན་བྲག་རི་བརྩེགས་པའི་ཁྲི་རྐང་ཁྱུང་དང་བྱོལ་སོང་པད་ཉི་རུ་ཏྲ་སོགས། དབུས་སུ་རུ་ཏྲ་དང་དབང་ཕྱུག་ཕོ་མོ། ཤར་དུ་དྲི་ཟ། ལྷོར་གཤིན་རྗེ། ནུབ་ཏུ་སྲིན་པོ་བྱང་དུ་གནོད་སྦྱིན་ཕོ་མོ། དེ་དག་ལས་ལ་ནན་ཏུར་དུ་བསྟན་པའི་ཕྱིར། ཕོ་ཁ་སྦུབ་ཀྱི་སོག་ཕྲག་དང་། མོ་གན་རྐྱལ་གྱི་ནུ་ཕྲག་ནས། དུག་ལྔ་གནས་སུ་དག་པའི་བརྡར། དུད་འགྲོ་གདུག་པ་ཅན་གྱི་སྤར་བས་བཟུང་བ་སྟེ། གཉིས་འཛིན་མཚན་མའི་ཡུལ་ལས་འདས་ཤིང་ཆོས་དབྱིངས་མཁའ་ལ་ཐོགས་མེད་དུ་བགྲོད་པས་ཀླུ་ཟིལ་གྱིས་

གནོན་པའི་ཕྱིར་ཁྱུང་ནི་ཆེ་མཆོག་གི་གདན། དེ་ཡང་རོང་པ་ཆོས་ཀྱི་བཟང་པོའི་ཞལ་སྔ་ནས། ཁྱུས་འགྲོས་ཟིལ་གྱིས་གནོན་པའི་ཕྱིར། །ཁྱུ་མཆོག་ནི་ཐུགས་ཀྱི་ཕྱག་རྒྱ། མ་ཧེ་གཟི་བརྗིད་ཆེ་བས་སྐུའི་ཕྱག་རྒྱ། གཟིག་གདུག་པ་ཆེ་བས་མི་གཏོང་བའི་ཕྱིར་ཡོན་ཏན་གྱི་ཕྱག་རྒྱ། སྟག་དཔའ་རྟུལ་ཆེ་བས་ཐུགས་རྗེ་ཆེན་པོའི་མི་མཇེད་པདྨའི་ཕྱག་རྒྱ། དོམ་གཏུམ་པའི་ཕྱིར་ལས་རིགས་ཀྱི་ཕྱག་རྒྱའོ། །ཞེས་གསུངས་པ་བཞིན་གསལ་ལ། ཀོ་རི་སེང་ཧ་བརྒྱད་ལ་ཞིང་ཆེན་གྱི་གདན། སྒོ་མ་བཞི་ལ་ཞིང་ཆེན་བསྣོལ་མ། དབང་ཕྱུག་ཉེར་བརྒྱད་ལ་ཞིང་རྐྱང་གི་གདན་གསལ་ལ། གཉིས་པ་ཐུགས་ཕྱག་མཚན་གྱི་ཆོ་ག་ནི། སྦྱངས་བྱ་ཕ་མའི་ཁམས་དཀར་དམར་ཀྱི་དབུས་སུ་བར་སྲིད་ཀྱི་རྣམ་ཤེས་ཞུགས་ནས་དེ་གསུམ་རོ་གཅིག་འདྲེས་པ་ལས། རིམ་བཞིན་མེར་མེར་དང་། ནུར་ནུར་དང་། ལྟར་ལྟར། གོར་གོར་འཕྲང་(འཁྲང་)འགྱུར་སོགས་མངལ་གྱི་གནས་སྐབས་ལྔ་ཉམས་སུ་མྱོང་བར་འགྱུར་བ་སྦྱང་བའི་ཕྱིར། སྦྱོང་བྱེད་ནི། རང་གཞུང་ལས། བདག་ཉིད་ཐ་མལ་རང་སེམས་འདི༔ རྟོག་པས་མ་ཆོད་སོ་མའི་ངང་༔ བསམ་བྲལ་ངང་ལས་སེམས་ཉིད་འདི༔ རྡོ་རྗེ་མཐིང་ནག་ཨ་ཡི་མཚན༔ ཞེས་པ་ལྟར། དཀྱིལ་འཁོར་དབུས་མཐིང་གསལ་ཐིག་ལེའི་ལྟེ་བར་སེང་ཁྲི་པད་ཉི་ཟླ་བའི་གདན་སྟེང་དུ་རྒྱུའི་ཨ་ཡིག་ནམ་མཁའ་ནས་གློག་འཁྱུག་པ་ལྟར་བབ་པ་འོད་ཞུ། རྡོ་རྗེ་སྔོན་པོ་ཡི་གེ་ཨ་ཡི་མཚན་པར་བསྒོམ་པས། སྦྱང་གཞི་ཡིད་ཀྱི་ཁམས་ཀྱི་དྲི་མ་དག །ཐུགས་རྡོ་རྗེ་དབྱེར་མེད་པའི་ཡེ་ཤེས་ཆེན་པོར་རྫོགས། སྦྱངས་འབྲས་ཆོས་ཀྱི་སྐུར་སྨིན་པའི་རྟེན་བྱེད་པའོ། །གསུམ་པ་སྐུ་ཡོངས་སུ་རྫོགས་པའི་ཆོ་ག་ནི། སྦྱང་བྱ་མངལ་གྱི་ལུས་དེ་ཉིད་ལྟེ་བ་

སོགས་རྩ་འཁོར་རྣམས་རྫོགས་པར་ཆགས་ནས་ཁམས་དང་སྐྱེ་མཆེད་ཐམས་ཅད་རྫོགས་པར་གྱུར་ནས་ཕྱིར་བཙས་པ་སྦྱང་བའི་ཕྱིར། སྦྱོང་བྱེད་ནི་རང་གཞུང་ལས། རྡོ་རྗེ་ཨར་བཅས་འོད་ཟེར་འཕྲོས༔ ཡར་མར་འཕྲོས་འདུས་དོན་གཉིས་བྱས༔ ཚུར་འདུས་རྡོ་རྗེ་ཨར་བཅས་པ༔ འོད་ཞུ་མ་རིག་ཉོན་མོངས་སྦྱངས༔ ཞེས་པས་བསྟན་ལ། རྡོ་རྗེ་ཨར་བཅས་ལས་འོད་ཟེར་འཕྲོས་དོན་གཉིས་བྱས། སངས་རྒྱས་ཀྱི་མཛད་པ་བསྒྲུབ། ཚུར་འདུས་ཡོངས་སུ་གྱུར་པ་ལས། བདག་ཉིད་བཅོམ་ལྡན་འདས་དཔལ་ཀུན་ཏུ་བཟང་པོ་མཐིང་གསལ། ཡུམ་ཀུན་ཏུ་བཟང་མོ་དཀར་མོ་གཉིས་ཀའང་འདུས་བྱས་མཚན་མའི་རྟོག་པའི་སྒྲིབ་གཡོགས་དག་པའི་བརྡར་སྐུ་གཅེར་བུ། དབྱིངས་རིག་འདུ་འབྲལ་མེད་པའི་ཕྱིར་ཟུང་འཇུག་འཁྲིལ་སྦྱོར་དུ་ཕྱག་མཉམ་བཞག་ཞབས་སྐྱིལ་ཀྲུང་དུ་བཞུགས་པར་ལྷའི་སྐུ་རྫོགས་པར་བསྐྱེད་པས་སྦྱང་གཞི་ལུས་ཀྱི་ཁམས་ཀྱི་དྲི་མ་ད༷ག །ཕུང་ཁམས་གདན་གསུམ་ཚང་བའི་རང་བཞིན་སྐུ་རྡོ་རྗེའི་ངོ་བོར་རྫོ༷གས། སྦྱང་འབྲས་གདུལ་བྱ་སོ་སོའི་སྐལ་བ་དང་མཐུན་པར་སྤྲུལ་པའི་སྐུར་སྨི༷ན་པའི་རྟེན་བྱེད་པའོ། །ཀུན་བཟང་ཐུགས་ལས། ༀ་ལཾ། ཧཱུྃ་མུཾ། སྭཱ་མཾ། ཨཱཿཔྱཾ། ཧ་ཏཾ་རྣམས་འཕྲོས་པ་ལས། གཙོ་བོའི་གཡས་སུ་སེང་ཆེན་ཁྲི་སྟེང་དུ་རྣམ་སྣང་དང་དབྱིངས་ཕྱུག་མ། ཕྱོགས་ཀྱི་ཐིག་ལེ་བཞི་ལ། ཤར་དུ་གླང་ཆེན་ཁྲི་སྟེང་རྡོ་རྗེ་སེམས་དཔའ་དང་སངས་རྒྱས་སྤྱན་མ་དང་། ལྷོར་རྟ་མཆོག་ཁྲི་སྟེང་རིན་འབྱུང་དང་མ་ཀི། ནུབ་ཏུ་རྨ་བྱའི་ཁྲི་སྟེང་སྣང་མཐའ་དང་གོས་དཀར་མོ། བྱང་དུ་ཤང་ཤང་ཁྲི་སྟེང་དུ་དོན་ཡོད་གྲུབ་པ་དང་དམ་ཚིག་སྒྲོལ་མ། རྡོར་སེམས་ཡབ་ཡུམ་གྱི་ཀྵི་མེ་དང་ཧཱུྃ་ཧཱུྃ་སྤྲོས་པས། སེམས་དཔའ་ས་སྙིང་དང་བྱམས་པ། སེམས་མ་ལ་སེ་དང་པུཥྤེས་མ། རིན་འབྱུང་ཡབ་ཡུམ་གྱི་ཧཱུྃ་ཏྲཾ་དང་ཏྲཾ་ཛ་སྤྲོས་པས།

སེམས་དཔའ་ཀུན་བཟང་དང་ནམ་སྙིང་། སེམས་མ་མ་ལེ་དང་དྷུཔྤེ། སྣང་མཐའ་ཡབ་ཡུམ་གྱི་ཧྲཱི་མུཾ་དང་ཧྲཱི་བཾ་སྤྲོས་པས་སེམས་དཔའ་སྤྱན་གཟིགས་དང་འཇམ་དཔལ། སེམས་མ་གིརྟི་དང་ཨ་ལོ། དོན་གྲུབ་ཡབ་ཡུམ་གྱི་ཐླྷིཾ་ཛྷིཾ་ཧོ་ཨ་སྤྲོས་པས་སེམས་དཔའ་སྒྲིབ་སེལ་དང་ཕྱག་རྡོར་སེམས་མ་གྷནྡྷེ་དང་ནིརྟི་མ། གཙོ་བོའི་ཐུགས་ལས། ཀྲེཾ་བྲེཾ་ཏྲུ་ཾ་ཀྵེཾ་སྲུཾ་ཡེ༔ འཕྲོས་པས་སྟེང་འོག་དང་གྲུ་ཆད་བཞིར་ཐུབ་པ་དྲུག །གཙོ་བོའི་ཐུགས་ལས་ཧཱུྃ་བཞི་དང་ཛཿཧཱུྃཿབཾ་ཧོཿའཕྲོས་པས། སྒོ་ཕུག་བཞིར་མཐར་བྱེད་སྒོ་བ་ཡབ་ཡུམ་སྟེ་ཞི་བ་བཞི་རྩ་གཉིས་དང་། སླར་ཡང་ཀུན་བཟང་གི་ཐུགས་ཀ་ནས་ཧཱུྃ་ཟུང་ཆད་པ་ལས། གཙོ་བོའི་མདུན་དུ་མཁའ་ལྡིང་ཁྱུང་གིས་བཏེགས་པའི་རིན་ཆེན་བྲག་རི་བརྩེགས་པའི་ཁྲི་པད་ཉི་རུ་ཏྲ་སོགས་གཞུང་ལྟར། རུ་ཏྲ་ཕོ་མོ་རིན་ཆེན་ཁྲི་རྐང་སྟེང་སོགས་པདྨ་ཉི་ཟླ་བརྩེགས་པའི་སྟེང་དུ་དཔལ་ཆེན་པོ་ཆེ་མཆོག་ཧེ་རུ་ཀ་ཡུམ་ཀྲོ་དྷི་ཤྭ་རི་མ་དང་མཉམ་པར་སྦྱོར་བ། དེའི་ཐུགས་ཀ་ནས་ཧཱུྃ་བཅུ་ཆད་པ་ལས་དང་པོ་ཧཱུྃ་ཟུང་ཡོངས་སུ་གྱུར་པ་ལས། ཀུན་བཟང་གི་གཡོན་ཁྲི་སྔར་ལྟར་དབང་ཕྱུག་ཕོ་མོ་མ་ཧེ་སོགས་ཀྱི་སྟེང་བུདྡྷ་ཧེ་རུ་ཀ་ཡབ་ཡུམ། ཧཱུྃ་ཟུང་བཞི་འཁོར་ལོའི་རྩིབས་བཞིར་བབ་པ་ཡོངས་སུ་གྱུར་པ་ལས། དྲེགས་པ་དྲི་ཟ། གཤིན་རྗེ། སྲིན་པོ། གནོད་སྦྱིན་ཕོ་མོ་དང་། བྱོལ་སོང་ཁྱུ་མཆོག་གཟིག་སྟག་དོམ་ཟུང་སོགས་ཀྱིས་བཏེགས་པའི་སྟེང་བཛྲ་རཏྣ་པདྨ་ཀརྨ་ཧེ་རུ་ཀ་རྣམས་སོ་སོའི་ཡུམ་དང་འཁྲིལ་བ། ཆེ་མཆོག་གི་ཐུགས་ལས་ཧ་བརྒྱད་སྤྲོས་པས་རྩིབས་བརྒྱད་ཞིང་ཆེན་གདན་སྟེང་ཀོ་རི་ལ་སོགས་གནས་ཀྱི་མ་མོ་བརྒྱད། ཆེ་མཆོག་ཐུགས་ལས་ཧེ་བརྒྱད་སྤྲོས་པས་ཞིང་ཆེན་གདན་སྟེང་ལྷ་སྣམ་ནང་མར་སེང་ཧ་ལ་སོགས་ཡུལ་གྱི་ཕྲ་མེན་བརྒྱད་རིགས་བཞིའི་ཧེ་རུ་ཀའི་ཐུགས་ཀ་ནས་ཛཿཧཱུྃ་བཾ་ཧོ་བཞི་

འཕྲོས་པས་སྒོ་ཕུག་གི་མཐར་བྱེད་བཞིའི་ཕྱི་རོལ་དུ་སྒོ་སྐྱོང་གདོང་མོ་བཞི་ཞེང་ཆེན་བསྣོལ་བའི་གདན་སྟེང་དུ་བཞུགས་པ། དཔལ་ཆེན་པོའི་ཐུགས་ལས་འོད་ཟེར་བྷྱོ་ཡིག་ཉེར་བརྒྱད་སྤྲོས་པས། ལྷ་སྣམ་ཁྱམས་ཕྱི་མར་ཞིང་རྐྱང་གི་གདན་སྟེང་དུ་ཕྱོགས་རེ་ལས་བཞིའི་དབང་མོ་དྲུག་རེ་ཕྱིའི་སྒོ་གཡབ་བཞིར་སྒོ་སྐྱོང་དབང་མོ་བཞི་རྣམས་དྭངས་བའི་མཚོ་ལ་གཟའ་སྐར་ཤར་བ་ལྟར་མ་འདྲེས་ཡོངས་རྫོགས་སུ་བཀྲ་ལམ་ཀྱིས་གསལ་བར་མོས་ལ། ཀུན་བཟང་སོགས་གཙོ་བོ་རིགས་ལྔ་ཡབ་རྣམས་རྫོགས་པའི་སྐྱིལ་མོ་ཀྲུང་སྟེ་རྡོ་རྗེ་སྐྱིལ་ཀྲུང་དང་། ཡུམ་རྣམས་བརྟུལ་ཞུགས་ཀྱི་སྐྱིལ་མོ་ཀྲུང་སྟེ། པདྨའི་སྐྱིལ་ཀྲུང་གིས་ཡབ་ལ་འཁྲིལ་བ། སེམས་དཔའ་ཡབ་རྣམས་གཡས་ཅུང་ཟད་བརྐྱངས་པའི་ཕྱེད་སྐྱིལ་གྱིས་བཞུགས་པ། ཐུབ་པ་དྲུག་བཞེངས་སྟབས་དང་། སྒོ་བ་ཡབ་རྣམས་གཡས་བརྐྱངས་བའི་གྱད་ཆེན་པོའི་དོར་སྟབས་དང་། ཡུམ་རྣམས་གཡོན་བརྐྱང་བའི་གྱད་ཀྱི་དོར་སྟབས་ཀྱིས་བཞུགས་པ། ཁྲོ་བོ་ལས་གཙོ་བོ་ཁྲག་འཐུང་ཡབ་ཡུམ་རྣམས་ཞི་བའི་སྒོ་བ་ཡབ་ཡུམ་དང་བཞུགས་སྟབས་མཚུངས་ཤིང་། ཀོ་རི་སེང་ཧ་སྒོ་མ་སོགས་སྲས་མོ་ཉི་ཤུ་ཞབས་གཡས་བརྐུམ་གཡོན་བརྐྱངས་བསྣོལ་བའི་གར་སྟབས་དང་། དབང་མོ་ཉེར་བརྒྱད་ཞབས་གཡས་བརྐུམ་པའི་རྟིང་པ་གསང་བར་གཏད་ཅིང་གཡོན་བརྐྱངས་པ་རང་རང་གི་གདན་ལ་རོལ་པ་སྐྱིལ་ཀྲུང་ཕྱེད་པའི་གར་སྟབས་སོ། །དེ་ལྟར་ལྷ་དེ་དག་གི་སྐུ་མདོག་ཕྱག་མཚན་རྒྱན་ཆ་ལུགས་དང་བཞུགས་སྟངས་སོགས་རྣམ་པ་གསལ་ལ་མ་འདྲེས་པ་སྤྱན་གྱི་དཀར་ནག་གི་ཆ་ཚུན་ཆད་གསལ་བ་དེ་དག་ཀྱང་སྣང་ལ་རང་བཞིན་མེད་པ་ནམ་མཁའི་འཇའ་ཚོན་དང་ཆུ་ནང་གི་ཟླ་བ་ལྟར་མ་ཡེངས་པའི་ངང་ནས་ཡིད་ཡུལ་དུ་ལམ་ལམ་གསལ་བ་དང་། དེ་དག་ཀྱང་

ཞི་བ་རྣམས་སྐྱེ་བ་གནས་སུ་དག་པས་སྐུ་མཉེན་ཤ་ཆགས་པ། ན་བ་གནས་སུ་དག་པས་སྐུ་སྐབས་ཕྱེད་ཅིང་རིམ་པར་འཚམས་པས་ལྕུགས་པ། འཆི་བ་གནས་སུ་དག་པས་སྐུ་ཤ་ལྷོད་པོ་མ་གྱུར་པས་འཁྲིལ་བ། འཁྱོགས་པ་མ་ཡིན་པར་དྲངས་ཤིང་འགྱིང་བག་ལྡན་པས་ལྡེམ་པ། རྒ་བ་གནས་སུ་དག་པས་སྐུ་འཇམ་ཞིང་གཞོན་ཤ་ཆགས་པ། མཚན་དཔེའི་ཡོན་ཏན་རྣམས་མ་འདྲེས་པར་གཙང་ཞིང་གསལ་བ། རྒྱང་རིང་པོར་མངོན་ཞིང་བཀྲག་ཆེ་བས་འཚེར་བ། ཡིད་དུ་འོང་ཞིང་གཟི་བརྗིད་ཆེ་བས་ལྷུན་སྟུག་པ། གཞན་གྱིས་ཟིལ་གྱིས་གནོན་པར་མི་ནུས་ཤིང་གདུལ་བྱ་རྣམས་ཟིལ་གྱིས་གནོན་པས་གཟི་བྱིན་དང་ལྡན་པ་སྟེ་ཞི་བའི་ཚུལ་དགུ་དང་། རིགས་ལྔ་ཡབ་ཡུམ་སེམས་དཔའ་སེམས་མ་རྣམས་ལ་ཞི་བའི་རྒྱན་ཆས་བཅུ་གསུམ་སྟེ། དར་གྱི་སྟོད་གཡོགས་སྨད་དཀྲིས་དང་། ཅོད་པན་ཟི་ལྡིར་གར་དུང་ལྔ། རིན་ཆེན་དབུ་རྒྱན་སྙན་ཆ་དང་། །མགུལ་རྒྱན་དོ་ཤལ་སེ་མོ་དོ། །ཕྱག་གདུབ་ཞབས་གདུབ་སྐ་རགས་ བརྒྱད། །བསྡོམས་པས་རྒྱན་ཆས་བཅུ་གསུམ ་མོ། །ཞེས་པ་ལྟར། དར་ཆས་ལྔ་ནི། དར་དཀར་གསེར་གྱི་ངང་པ་ཁ་སྤྲོད་དམ་གསེར་རིས་{སྒོབ་པ་}ཡོད་པ་ཁ་ཚར་མ་ཉམས་པ་སྐུ་སྟོད་ནས་གཡོགས་ནས་སྣེ་མགུལ་ནས་དཔྱངས་པའོ། །དར་ལྗང་གུའི་གསང་གོས་གར་དུང་འགའ་འདྲ་སྟོད་ཐུང་ཙམ་གསོལ་བ་དང་། ཚིག་གུའི་སྨད་དཀྲིས་ནི་ལ་ལར་དར་སྣ་ཚོགས་ལ་བཤད་ཡོད་ཀྱང་དར་དམར་སྨུག་གི་སྨད་དཀྲིས། སྐྲ་ལྕོག་སྒྲོག་ནས་རྒྱབ་དར་ཡར་སྣེ་ལྟེབ་ཆག་འཕྲུལ་ཆིངས་བྱས་པ་ཟི་ལྡིར་དང་། མར་དཔྱངས་པ་དར་དཔྱངས་སུ་འདོད་པ་ཡོད། ཁ་ཅིག་སྒྱུ་འཕྲུལ་ལ་དར་དམར་མཐིང་སྙན་གཡས་གཡོན་ནས་མར་འཕྱངས་པ་དར་དཔྱངས་དང་། དར་སྣ་ལྔའི་རྒྱབ་དར་ཟི་ལྡིར་ལ་བཞེད་པ་ཡང་ཡོད། རིན་པོ་ཆེའི་རྒྱན་ བརྒྱད་ནི།

དབུ་རྒྱན་ཐོར་ཙུགས་སྐེད་ཆིང་གསུམ ་བྱས་པའི་རྩེར་རིན་པོ་ཆེའི་ཏོག་པྲོག་ཞུ་རིན་པོ་ཆེའི་ཁང་བུའི་ནང་རིགས་ལྔའི་སྐུས་སྤྲས་པ་དེ་ལ་སྐྲ་མཚམས་ནས་སྤྱི་བོའི་རྩ་འདབས་སོ་གཉིས་མཚོན་པའི་རིན་པོ་ཆེའི་དྲ་ཕྱེད་ཆུང་ངུ་སོ་གཉིས་ཀྱིས་མཛེས་པའོ། །སྙན་རྒྱན་ནི་སྙན་གཉིས་ལ་རིན་ཆེན་ལས་བྱས་པའི་ས་སྤྲ་༼པ་ཁྲ་༽པད་སྤུངས་གཡུ་དང་པད་རཀ་བཻཌཱུཪྻ་སོགས་ཀྱིས་ཕྲས་མཛེས་པའོ། །མགུལ་རྒྱན་རིན་པོ་ཆེའི་རྒྱན་སྣ་ཚོགས་དབུས་མགུལ་གབ་ཕྲ་པད་ཅན་དེ་ལ་མུ་ཏིག་སོགས་ཞིབ་མོའི་དྲ་ཕྱེད་ཆུང་ཆུང་བཅུ་དྲུག་གིས་བརྒྱན་པའོ། །དོ་ཤལ། རིན་པོ་ཆེའི་ཕྲེང་བ་རྒྱན་རིན་ཆེན་མགུལ་ནས་མནབ་པ་སྙིང་ཁར་སླེབ་པ་དེ་ལ་དྲ་ཕྱེད་ཆུང་ཆུང་བརྒྱད་ཀྱིས་སྤྲས་པའོ། །སེ་མོ་དོ་རིན་ཆེན་ཕྲེང་བ་སྣེ་མོ་སྦྲེལ་བ། སྣེ་གཉིས་ཛར་ལོ་བྱས་པ་གཡས་ནས་གཡོན་དང་། གཡོན་ནས་གཡས་སུ་མགུལ་བའི་རྒྱབ་ནས་འོང་སྟེ་མདུན་དུ་སྣེ་གཉིས་དཔྱངས་པ་དེ་འདྲ་ལ་འདོད། ལ་ལར་སེ་མོ་དོ་སེ་རལ་ཁར་རིན་པོ་ཆེའི་འཁོར་ལོ་མདུན་དུ་ཡོད་པ་དེ་ལས་གྱེས་པས་རིན་ཆེན་ཕྲེང་བ་གཡས་གཡོན་མཆན་ཁུང་ནས་དོ་ཤལ་བྱས་པ་དེ་འདྲ་ལ་བཞེད་པ་ཡང་ཡོད། ཕྱག་ལ་གདུབ་བུ་ཕྲ་པད་གསུམ་པ་གཡས་གཡོན་ལ་བརྒྱན་པ་དེའི་ཁོང་ནས་དཔུང་རྒྱན་ཕྲ་པད་བཞི་པ་ཡོད་ཀྱང་དེ་བཞི་གཅིག་ཏུ་བརྩིས་པ་དང་། ཞབས་གདུབ་ཕྲ་པད་ གསུམ་པ་གཉིས་གཅིག་ཏུ་བརྩིས་པའོ། །རིན་པོ་ཆེའི་སྐེད་ཆིང་ཕྲ་པད་བརྒྱད ་པ་དྲ་བ་དྲ་ཕྱེད་ཞིབ་མོར་ཆུང་ཆུང་དྲུག་བཅུ་རེ་བཞིས་མཛེས་པར་བརྒྱན་པ་དང་ བརྒྱད་དོ། །ཐུབ་པ་དྲུག་ནི་ཆོས་གོས་རྣམ་གསུམ ་སྤྲུལ་སྐུའི་ཆ་བྱད་དང་། སྒོ་བ་ཡབ་ཡུམ་རྣམས་སྒེག་པ་སོགས་གར་ཉམས་དགུ་དང་ལྡན་པ། དུར་ཁྲོད་ཆས་བརྒྱད་ཡུམ་ལ་སྟག་ཤམས་ཀྱི་དོད་གཟིག་ཤམས་སོ། །ཁྲོ་བོ་དཔལ་ཆེན་པོ་ཆེ་མཆོག་ཁྲག་འཐུང་ཡབ་

ཡུམ་སོགས། ཆགས་ཉམས་ཀྱིས་སྒེག་པ། ཁྲོ་ཉམས་ཀྱིས་དཔའ་བའི་ཉམས། རྨོངས་ཉམས་ཀྱིས་མི་སྡུག་པ་སྟེ་འཇིགས་སུ་རུང་བ་སྐུ་ཡི་གར་ཉམས་གསུམ། གསུང་གི་ཧ་ཧ་ཧི་ཧིའི་གད་རྒྱང་སྒྲོགས་པས་རྒོད་པ། རྒྱོབ་སོད་ཧཱུྃ་ཕཊ་ཀྱི་སྒྲ་སྒྲོགས་པས་གཤེ་བ། ཛ་བྷྱོ་རུ་ལུའི་སྒྲས་འབྲུག་སྟོང་དུས་གཅིག་ལྡིར་བ་ལྟར་དང་ཐོག་སྟོང་དུས་གཅིག་ཏུ་ལྷུང་བ་ལྟར་འུར་ཆོམ་གྱི་སྒྲས་རྔམ་སྒྲ་འཇིགས་རུང་སྟེ་གསུང་གི་གར་ཉམས་གསུམ། ཐུགས་ཀྱི་གདུལ་བྱ་གདུག་པ་ཅན་ལ་རྗེས་ཆགས་སྙིང་རྗེའི་ཉམས་དང་། བུ་ལམ་དུ་བཙུད་པ་ལ་ཕ་མས་བརྡེག་པ་ལྟར་གདུག་པ་ཅན་འདུལ་བ་ལ་རྔམ་པའི་ཉམས་འཇིགས་པའི་མཚོན་ཆ་སྣ་ཚོགས་གདེངས་ཤིང་ལོག་འདྲེན་གསོད་པའི་ཚུལ་སྟོན་ཀྱང་གདུག་པ་ཅན་ལོག་པར་མི་གཏོང་བས་ཐུགས་བརྩེ་བས་ཞི་བའི་ཉམས་དང་ཐུགས་ཀྱི་གར་ཉམས་གསུམ་དང་དགུའོ། །རཱུ་ཏྲ་བཏུལ་བའི་ཆས་རྣམས་རྒྱལ་བྱེད་དཔའ་རྟགས་ཀྱི་ཚུལ་དུ་སྐུ་ལ་གསོལ་བ་ནི་དུར་ཁྲོད་བདག་པོ་རཱུ་ཏྲའི་ཆས་ཡིན་པས་ བརྒྱད་ནི། བགོ་བའི་གོས་གསུམ ། གདགས་པའི་རྒྱན་གཉིས། བྱུག་པའི་རྫས་གསུམ་སྟེ། སྟོད་དུ་གླང་ཆེན་གྱི་ཀོ་རློན། རྐེད་དུ་མི་ལྤགས་ཀྱི་གཡང་གཞི། སྨད་དུ་སྟག་སྤགས་ཀྱི་ཤམ་ཐབས་སྟེ། དྲེག་པ་ལྷ་རྒྱུད་ལས། ཞིང་ཆེན་གཡང་གཞི་བྱང་ཆུབ་སེམས་ཀྱི་རྒྱན། །གླང་ཆེན་ཀོ་རློན་སྟོབས་ཆེན་མཆོག་གི་རྒྱན། །སྟག་གི་ཤམ་ཐབས་དཔའ་བརྟུལ་ཟ་བྱེད་རྒྱན། །ཞེས་དང་། གདགས་པའི་རྒྱན་ལ་ཐོད་རྒྱན་དང་སྦྲུལ་རྒྱན་གཉིས་ལས། དེ་ཡང་ཐོད་པ་ཚར་གསུམ་སྐུ་གསུམ་བརྙེས་པའི་རྒྱན་ཞེས་པས་ཐོད་པ་སྐམ་པོ་ལྔའི་དབུ་རྒྱན། རློན་པ་ལྔ་བཅུའི་དོ་ཤལ། ཐོད་པ་ཚལ་བུས་ཕྱག་ཞབས་ཀྱི་གདུ་བུ་བྱས་པའོ། །སྦྲུལ་ནག་ཆུན་པོ་མཉེན་ལྕུགས་འཁྲིལ་བའི་རྒྱན་ཞེས་པས། སྦྲུལ་རྒྱལ་

རིགས་དཀར་ཁྲའི་མགུལ་ཆུན། རྗེ་རིགས་སེར་ཁྲའི་སྙན་ཆ། བྲམ་ཟེ་དམར་ཁྲའི་ཅོད་པཎ་སྟེ་སྐྲ་ཆིང་། དམངས་རིགས་ལྗང་གུས་ཕྱག་ཞབས་ཀྱི་གདུ་བུ། གདོལ་པ་ནག་པོའི་སྐུ་རེགས་བྱས་པའོ། །བྱུག་པའི་རྩི་ནི། དཔྲལ་བར་ཐལ་ཆེན་གྱི་ཚོམ་བུ། མཁུར་ཚོས་གཉིས་སྣའི་ཟོར་སྟེ་འབུར་གསུམ་ལ་རཀྟའི་ཐིག་ལེ། ཨོལ་ཀོ་མགྲིན་པ་ལ་མིའི་ཚིལ་ཆེན་གྱི་ཞག་གི་སོར་རིས་བྱུག་པ་སྟེ། རཀྟ་ཐུགས་རྗེ་ཆགས་པའི་རྒྱན། ཐལ་བ་འདུལ་བྱེད་ཕྲིན་ལས་རྒྱན། ཞག་ཆེན་དོན་དམ་བཅུད་ཀྱི་རྒྱན། །ཞེས་སོ། །དཔལ་ཆེན་པོའི་སྐུ་ལ་གདོད་ནས་གྲུབ་པའི་ཆ་ལུགས་ནི་དཔལ་ཆས་ཡིན་ལ། ཞི་ཁྲོའི་རང་གཞུང་ལས། མེ་དཔུང་ཆས་དགུའི་བརྒྱན༔ ཞེས་གསུངས་པ་སྟེ། དེ་ཡང་ཇི་སྐད་དུ། དབུ་སྐྲ་གྱེན་བརྫེས་འཁོར་བ་རུ་བཟློག་ཆས། །རྡོ་རྗེའི་ཁྱུང་གཤོག་ཐབས་དང་ཤེས་རབ་ཆས། །མཐིང་དམར་ཅོད་པཎ་རྟག་ཆད་ཟིལ་གནོན་ཆས། །སྤྱི་གཙུག་རྡོ་རྗེ་ལྷག་པ་རིག་པའི་ཆས། །དབང་གི་བསེ་ཁྲབ་གཟི་འབར་བགྲོད་པའི་ཆས། །གཉིས་མེད་སྦྱོར་བ་ཤེས་རབ་ཡུམ་གྱི་ཆས། །གནོད་གདུག་བཟློག་བྱེད་དཔའ་བོ་ལྕགས་ཀྱི་ཆས། །ཉོན་མོངས་སྲེག་བྱེད་རྡོ་རྗེ་མེ་ཡི་ཆས། །བྱང་སེམས་བརྟན་པ་སྙན་གོང་གསལ་བའི་རྒྱན། །ཞེས་དཔལ་ཆས་སོགས་རྒྱན་གྱི་བརྒྱན་པས། ཆེ་བརྗིད་རྔམ་འཇིགས་ལྡན་པ་གསལ། དེ་ལྟར་ལྷ་ཡི་གསལ་སྣང་ཡང་དང་པོ་བསམ་པའི་ཡུལ་ལ་བཀྲ་ལམ་མེར་གསལ་བ་དང་། དེ་ནས་མཐོང་བའི་ཡུལ་ལའང་ཇི་ལྟ་བ་བཞིན་གསལ་བ་དང་། དེ་ནས་རེག་པའི་ཡུལ་ལ་ཡང་མངོན་སུམ་དུ་གསལ་བར་གྱུར་པ་དེ་དག་རེག་མཐོང་གི་མཚན་མ་ཐོབ་པའང་ཡུལ་གསུམ་གྱད་དུ་གྱུར་པ་ཞེས་བརྟན་པ་ཐོབ་པའི་ཚད་ཡིན་ལ། དེ་ལྟར་བསྒོམ་པའི་ལྷའི་རྣམ་དག །གཙོ་བོ་ཞལ་གཅིག་

ཕྱག་གཉིས་ལ་ཆོས་ཉིད་ཉག་གཅིག་མཚོན་པའི་བརྡར་ཞལ་གཅིག །སྟོང་ཉིད་སྙིང་རྗེ་ཟུང་དུ་འབྲེལ་བའི་བརྡར་ཕྱག་གཉིས། གཟུང་འཛིན་རྣམ་པར་དག་ཅིང་སྲིད་ཞི་མཉམ་པར་བརྡལ་བའི་ཞབས་གཉིས་སོགས་དང་། དུག་གསུམ་དག་ཅིང་སྐུ་གསུམ་མངའ་བའི་ཕྱིར་དབུ་གསུམ། ཡེ་ཤེས་དྲུག་ལ་དབང་བསྒྱུར་ཞིང་ཕ་རོལ་ཕྱིན་དྲུག་གིས་འགྲོ་དྲུག་སྒྲོལ་བའི་ཕྱག་དྲུག །རྫུ་འཕྲུལ་བཞི་དང་ལྡན་ཞིང་བདུད་བཞི་འདུལ་བའི་ཕྱིར་ཞབས་བཞི་དང་ལྡན་པ་སོགས་སོ་སོར་དག་དྲན་དགོས་ལ། སྤྱི་ཙམ་དུ་གཞལ་ཡས་ཁང་ནི་རྣམ་སྣང་དུ་དག་པ་དྲན་པ་དང་། ཕྱག་མཚན་རྣམས་མི་བསྐྱོད་པར་དག་དྲན་དང་། རིན་པོ་ཆེའི་རྒྱན་སོགས་རིན་འབྱུང་གི་ངོ་བོར་དག་པ་དྲན་པའོ། །མདོར་ན་གཉུག་མའི་སེམས་ཉིད་ཀྱི་སྟེང་ནས་སངས་རྒྱས་ཀྱི་ཡོན་ཏན་རྣམས་རང་བཞིན་ལྷུན་གྲུབ་ཏུ་བཞུགས་པ་ལས་ཡོན་ཏན་དེ་རྣམས་ལྷ་དེ་དང་དེའི་ངོ་བོར་གདོད་ནས་དག་པ་ཡིན་པས། ཏིང་ངེ་འཛིན་གྱིས་བསྒོམ་པའི་ལྷ་དེ་ཡང་ཡོན་ཏན་དེའི་ངོ་བོར་རྣམ་པར་དག་པ་ཤེས་དགོས། ང་རྒྱལ་བརྟན་པ་ནི། རང་གི་རྣམ་སྨིན་གྱི་ལུས་སྦྱངས་ནས་དག་པ་ལྷར་བསྐྱེད་པས་སྐྱོན་ཀུན་ཟད་ཡོན་ཏན་ཀུན་ལྡན་གྱི་བསྒོམ་བྱའི་ལྷར་སྣང་ཆ་འདི་ལྷའི་སྐུ་དངོས་ཡིན་སྙམ་པའི་ང་རྒྱལ་དང་། ངག་རླུང་གི་རང་བཞིན་སྙིང་པོ་སྔགས་སུ་སྦྱངས་པས་འབྱུང་འཇུག་གནས་གསུམ་སྔགས་ཀྱི་རང་གདངས་འདི་ལྷའི་གསུང་ཡིན་སྙམ་པའི་ང་རྒྱལ་དང་། ཡིད་ཆོས་ཉིད་དུ་སྦྱངས་ནས་གང་ཤར་ལྷ་ལ་ལྷ་རོལ་བ་དྲན་རྟོག་ཐམས་ཅད་ལྷའི་ཐུགས་རྣམ་པར་མི་རྟོག་པའི་ཡེ་ཤེས་ཡིན་སྙམ་པའི་ང་རྒྱལ་དང་། མདོར་ན་སྣང་གྲགས་རིགས་གསུམ་གྱི་ཚོགས་ཐམས་ཅད་ལྷ་སྔགས་ཆོས་ཉིད་དུ་ཤེས་པའི་ང་རྒྱལ་བརྟན་པོ་དང་མ་བྲལ་བར་གནད་དུ་ཆེའོ། །དེ་ལྟར་བསྒོམས་པས་བརྟན་པ་

ཐོབ་ཅིང་བདེན་གཉིས་དབྱེར་མེད་དུ་རྟོགས་ནས་ལུས་སེམས་ཤིན་ཏུ་སྦྱངས་བའི་ནུས་པ་ཐོབ་པ་ནི། ཏིང་འཛིན་ལྷའི་གཟེར་ཐེབས་པ་ཞེས་བྱ་ལ། རང་གི་བསྒོམ་བྱའི་ལྷ་གང་ཡིན་པ་དེའི་ཐུགས་སྲོག་སྔགས་འཁོར་གྱི་ངོ་བོ་གསུང་རྡོ་རྗེའི་སྒྲ་དབྱིངས་སུ་དག་པ་དང་། བྱིན་རླབས་ནུས་པས་སྡིག་སྒྲིབ་ཞི་བ་སོགས་རྟགས་རྣམས་འབྱུང་བ་ནི་སྙིང་པོ་སྔགས་ཀྱི་གཟེར་ཐེབས་པ་ཞེས་བྱ་ལ། ལྷ་{གང་དང་}གང་ཡིན་གཅིག་བསྒྲུབ་པའི་ངོ་བོ་རང་སེམས་ལས་ལོག་ན་མེད་དེ། རང་གི་ཆོས་ཉིད་ནི་དག་པ་ལྷ་རུ་སྨིན། ལྷ་ཡི་ཐུགས་ཡེ་ཤེས་ཆེན་པོར་རང་དང་ཡེ་ནས་དབྱེར་མེད་རོ་མཉམ་ཆེན་པོར་ནི་དགོངས་པ་མི་འགྱུར་བ་ཆོས་ཉིད་ཀྱི་གཟེར་ཐེབས་པ་ཞེས་བྱ་ལ། འཕྲོ་འདུའི་དམིགས་པ་དང་སྔགས་དང་ཕྱག་རྒྱ་སོགས་གནད་དུ་སྨིན་པས་གང་འདོད་འཕྲིན་ལས་བཞི་ལ་རང་དབང་འབྱོར་བ་ནི་འཕྲོ་འདུ་འཕྲིན་ལས་ཀྱི་གཟེར་ཐེབས་པ་ཞེས་བྱ་བ་ཡིན་ལ་དེ་ལྟར་གཟེར་བཞི་དང་ལྡན་པའི་སྒོ་ནས་སྒྲུབ་པ་མཐར་ཕྱིན་པའི་དྲོད་རྟགས་རྣམས་རྫོགས་པ་དང་། འབྲས་བུ་ཇི་ལྟར་འབྱུང་བའི་ཚུལ་ནི། འོག་ཏུ་ཉུང་ཙམ་འཆད་ལ། དེ་ཡང་གསང་སྔགས་རྙིང་མ་ལ་བདག་མདུན་ཐ་མི་དད་པ་ཡིན་པ་དེ་ནི་བདག་བསྐྱེད་ལྷ་གཞལ་ཡས་ནི་ནམ་མཁའི་ཟླ་བ་ལྟ་བུ་ལ། མདུན་བསྐྱེད་ནི་དེའི་རང་མདངས་ཆུ་སྣོད་ཀྱི་ཟླ་གཟུགས་ལྟ་བུ་བདག་བསྐྱེད་མིའི་བྱད་གཟུགས་བཞིན་ལ། མདུན་བསྐྱེད་དཀྱིལ་འཁོར་སྒྲུབ་རྫས་བུམ་པ་ལ་སོགས་མེ་ལོང་ནང་ལ་བཞིན་གཟུགས་མ་འགགས་པར་འཆར་བ་ལྟ་བུ་ཐ་དད་མ་ཡིན་བདག་གི་ཆོ་འཕྲུལ་དུ་ཤེས་པར་བྱའོ། །དཀྱིལ་འཁོར་གཞལ་ཡས་ཤར་སྒོ་རང་ལ་བསྟན། པད་གདན་མདུན་གྱི་དུར་ཁྲོད་རྡོ་ར་མེ་གུར་གཉིས་གཉིས་མེ་རི་འདབས་འབྱར་དུ་བསྒོམ། དེ་ལྟར་སྤྱན་འདྲེན་བཞུགས་གསོལ་ཕྱག་མཆོད་

བསྟོད་བཤགས་པ་བཅས་གྲུབ་ནས། བརྒྱད་པ་འཛབ་བཟླ་བ་ནི། ཕྲེང་བ་ནི། རྒྱུད་ལས། བྷོ་དྷི་ཙིཏྟ་བསྔགས་ཏེ། བྷོ་དྷི་ཙི་ཡིས་ལས་ཀུན་བྱེད། །ཅེས་སོ། །རཀྴ་ཐོད་ཕྲེང་མ་གཏོགས་པ། ར་དང་རུས་པའི་ཕྲེང་བ་བསྒྲངས་མི་བྱ། བླ་མེད་ལུགས་འདིར་ཐོད་ཕྲེང་ཡང་བཟང་ངོ་། །ཕྲེང་བ་བྱིན་རླབས་བྱས་ནས། ལྷ་ཚོགས་ཞི་བའི་ཐུགས་ཀར་ཟླ་བ་ཁྲོ་བོའི་ཐུགས་ཀར་ཉི་མའི་སྟེང་རང་སྲོག་ས་བོན་ནི། ཀུན་བཟང་ལ་ཨ་དང་། ཞི་བར་སོ་སོའི་ས་བོན་ༀ་ལཾ་སོགས་དང་། ཆེ་མཆོག་ཡབ་ཡུམ་ཁྲག་འཐུང་ཁྲོ་བོ་ཧཱུྃ་སོགས་གཞན་ཧ་ཧེ་ཛཿཧཱུྃ་བཾ་ཧོ་བྷྱོ་སོགས་གསལ། ཞི་བར་བོ་དྷི་བཅུ་དྲུག་དང་། ཁྲོ་བོ་ལ་རུ་ལུ་བརྒྱད་ཀྱིས་བསྐོར་བ། ཐུགས་སྲོག་མདུན་ནས་ཞལ་སྲོག་ཡིག་ལ་ཕྱོགས་པ་གཡས་སྐོར་དུ་འཁོར་བའམ། སྔགས་འབྲུ་བརྟན་པའི་འོད་ལྔའི་ཕྲེང་ཐག་འགལ་མེའི་འཁོར་ལོ་ལྟར་བར་མ་ཆད་པར་མགྱོགས་བུལ་མེད་པ་ཆོས་བསྐོར་དུ་ཀྱི་ལི་ལི་རང་སྒྲ་དི་རི་རི་འཁོར་བ་དེ་ལས་འོད་ཟེར་ཉི་མ་འབུམ་བརྡལ་བ་བཞིན་རབ་འབྱམས་རྒྱལ་བའི་ཞིང་ཁམས་མཐའ་ཡས་པ་དང་། ངན་སོང་གི་འཇིག་རྟེན་ནམ་མཁའ་དང་མཉམ་པ་ལ་ཁྱབ་ཏེ། རྒྱལ་བ་རྣམས་མཆོད་ནས་བྱིན་རླབས་བསྡུས་བདག་མདུན་རྣམས་ལ་ཐིམ་པས་རབ་འབྱམས་རྒྱལ་བའི་དབང་ཐོབ་ནས་གཟི་བརྗིད་ཆེར་འབར་བར་བསྒོམ། སེམས་ཅན་གྱི་སྡིག་སྒྲིབ་སྦྱངས། འཁོར་བའི་གནས་སྟོང་ནས་སངས་རྒྱས་ཀྱི་ཞིང་དུ་གྱུར་ཏེ། ཞི་ཁྲོའི་ལྷ་ཚོགས་སུ་གནས་པས་ཐམས་ཅད་ཀྱིས་གྲགས་སྟོང་རྡོ་རྗེའི་སྔགས་སྒྲ་སྒྲོགས་པས་ཞིང་ཁམས་ཐམས་ཅད་ལ་ཁྱབ། དེ་དག་གི་རྒྱལ་བ་རབ་འབྱམས་རྣམས་རང་གི་ཡི་དམ་ལྷར་མོས་ལ། སྔགས་འབྲུ་རྣམས་གདན་ལས་འཕགས་ཏེ་རང་སྒྲ་དང་བཅས་འཁོར་བ་ལ་སེམས་

གཏད་དེ་བཟླས་པ་ནི་ཟླ་བ་སྐར་འཕྲེང་ལྟ་བུའི་ཛབ་དགོངས་བསྙེན་པའི་ཡན་ལག་ཡིན། ཡང་ཐུགས་ཀའི་སྔགས་ཕྲེང་གཉིས་པ་ཞིག་འཕྲོས་པ་རང་ལྷར་གསལ་བའི་ཞལ་ནས་ཐོན། ཡུམ་གྱི་ཞལ་དུ་ཞུགས་སྐུའི་ནང་བརྒྱུད་ཐུགས་སྲོག་ལ་འཁོར་པདྨ་ནས་བྱུང་ཡབ་ཀྱི་གསང་གནས་ཀྱི་ལམ་ནས་ཡར་བྱང་སེམས་བདེ་བ་ཆེན་པོའི་རང་བཞིན་དུ་ཐུགས་ཀའི་ས་བོན་ལ་ཐིམ་པ་བདེ་ཆེན་སྒྱུ་མ་ཕྱག་རྒྱ་ཆེན་པོའི་དངོས་གྲུབ་སོགས་མཆོག་ཐུན་གྱི་དངོས་གྲུབ་ཀུན་ཐོབ་པར་བསམ། བདག་མདུན་ལ་དེ་ལྟར་སྔགས་འཕྲེང་ཉེ་བར་བསྙེན་པ་འགལ་མེའི་འཁོར་ལོ་ལྟ་བུའི་ཛབ་ཡིན། ཡང་སྔགས་ཕྲེང་ལས་འོད་ཟེར་ཡར་ཕྱོགས་བཅུའི་ཞིང་རབ་འབྱམས་ཀྱི་རྒྱལ་བ་རྣམས་ལ་སྤྲོས་པས་མཆོད་པ་ཕུལ། སྒྲིབ་པ་དག་ཚོགས་རྫོགས་དབང་བཞི་ཐོབ་པར་བསམ་པ་བདག་དོན་བྱིན་རླབས་བསྡུ་བ་དང་། ཡང་འོད་ཟེར་མར་འཕྲོས་ཁམས་གསུམ་རིགས་དྲུག་གི་སེམས་ཅན་རྣམས་ལ་ཕོག་པས་ལས་ཉོན་སྡིག་སྒྲིབ་སྦྱངས་ནས་སྒོ་གསུམ་རྡོ་རྗེ་གསུམ་དུ་གྱུར་པར་བསམ་པ་གཞན་དོན་ཕྲིན་ལས་ཀྱི་བཟླས་པ་འདི་གཉིས་ལ་སྒྲུབ་པ་རྒྱལ་པོའི་ཕོ་ཉ་ལྟ་བུའི་ཛབ་དགོངས་ཡིན། ཡང་ལྷ་དང་སྔགས་འཕྲེང་ལས་འོད་ཟེར་གྲངས་མེད་འཕྲོས་པས་མ་དག་སྣོད་ཀྱི་ཆ་འདི་ཞིང་དང་བཅུད་ཀྱི་སེམས་ཅན་ལྷ། སྒྲ་གྲགས་ཐམས་ཅད་སྔགས། དྲན་རྟོག་ཐམས་ཅད་ཆོས་ཉིད་ཆོས་སྐུའི་རོལ་བར་ཤེས་པའི་ངང་ནས་སྔགས་སྒྲ་བུང་བ་ཚང་ཞིག་པ་ལྟར་འུར་དིར་བཟླ་བར་བསམ་པ་ནི་སྒྲུབ་པ་ཆེན་པོའི་སྐབས་ཀྱི་བདག་གཞན་གཉིས་མེད་ཀྱི་བཟླས་པ་བུང་བ་ཚང་ཞིག་པ་ལྟ་བུའི་ཛབ་དགོངས་ཡིན། དེ་ལྟར་ངག་བཟླས་མ་མགྱོགས་པ། ཧ་ཅང་མ་བུལ་བ། ཆད་ལྷག་མེད་པ། སྒྲ་ཞན་པ་དང་དྲག་པའི་སྐྱོན་རྣམས་སྤང་ཏེ་བཟླའོ། །སྨྲ་བ་མ་བཅད་ན་ནུས་པ་མི་འབྱུང་ཏེ། འཇིག་

རྟེན་པའི་གཏམ་དང་འདྲེས་པའི་བཟླས་པ་ནི། དུག་སྨན་འདྲེས་པ་བཞིན་ནོ། །ངག་གཏམ་སྐད་པའི་སྦག་སྦག་སྦུག་སྦུག་དེ་ནི་ཤིན་ཏུ་ནས་མི་རུང་གསུངས་སོ། །བརྡ་དང་རྡུལ་བྱང་ལ་བྲི་བ་རུང་བར་བཤད་དོ། །བཟླས་པ་དང་སྔགས་འཁོར་འཁོར་བ་གཉིས་ཀ་རྒྱུན་མ་ཆད་པ་ཆུ་བོའི་རྒྱུན་ལྟར་མ་ཡེངས་པར་བྱེད་དེ། བླ་མ་དྲག་པོ་ལས། མ་ཡེངས་ཏིང་འཛིན་ལྡན་པས་བཟླས༔ གཞན་དུ་ཡེངས་བར་གྱུར་པས་ན༔ བསྐལ་པར་བཟླས་ཀྱང་འབྲས་མི་འབྱིན༔ ཞེས་པས་སོ། །གཙོ་བོ་ཇི་བཞིན་འཁོར་རྣམས་ཀྱི་ཐུགས་ཀར་སྔགས་འཁོར་དུས་གཅིག་ལ་འཁོར་བ་སྟེ། རླུང་གཅིག་གིས་རླུང་འཁོར་གང་ཡོད་བསྐོར་བ་ལྟར་རོ། །ཐུན་གཅིག་ལ་བསྙེན་གྲངས་རྫོགས་པ་དང་། སྔགས་རིང་ཚར་གསུམ་སོགས་གང་སྐབས་དང་། ལས་ཤམ་ཡང་དེ་བཞིན། དབྱངས་གསལ་གྱི་མགོར་ༀ་དང་མཇུག་ཏུ་ཞི་ཁྲོ་རབ་འབྱམས་ཀྱི་ལྷ་ཚོགས་འགྲུབ་པར་གྱུར་ཅིག་སྭཱ་ཧཱ༔ གསུམ་གྱིས་སྔགས་ཉམས་པ་གསོ། ཡིག་བརྒྱ་གསུམ་གྱིས་ཏིང་འཛིན་ཉམས་པ་གསོ། ཡེ་དྷར་གྱིས་བརྟན་པར་བྱ་སྟེ། མཆོད་བསྟོད་དང་། དབང་བཞི་ཡིད་ལེན་སོགས་རྒྱུན་པར་འདྲའོ། །དགུ་པ་ཐུན་བཞིའི་རྣལ་འབྱོར་ནི། ཐོ་རེངས་ཁྱིམ་བྱ་སྔ་མ་མཚེར་བ་ནས་ནམ་ལང་བར་དུ་ཞི་བའི་དུས་ཀྱི་ཐོར་ཐུན་ཏེ། གུ་རུ་རིན་པོ་ཆེའི་ཐུགས་བརྒྱུད་བསྐུལ་བ་ཧཱུྃ་བཞེངས་ཤིག་པདྨ་འབྱུང་གནས་མཁའ་འགྲོའི་ཚོགས། སྙན་པའི་དབྱངས་ཀྱིས་ཌཱ་དྲིལ་བྱ། གཏི་མུག་གཉིད་སྐྲོག་འདོན་ཀྱང་ཆོག །ནུས་པ་སྟོབས་འབྱིན་ཐུན་མོངས་སྔོན་འགྲོ། བསམ་ལྷུན། བླ་མའི་རྣལ་འབྱོར་རྒྱལ་བ་ཀུན་འདུས་མ་ནི་ཐུན་བཞི་གར་དགོས་སོ། །སྲུང་འཁོར་ནས་བཟུང་གཞུང་ལྟར་བསྲངས་བསྙེན་པ་བཟླ། ནམ་

ལང་བ་དང་། བསྟོད་ནས་མཇུག་རྒྱུན་སྤྱོད་བར་རོ། །ཉི་མ་ཤར་བའི་བར་དུ་ཁ་ཏོན་ཆབ་གཏོར་མདོ་ཆོས་སྤྱོད་འདོན་པ་རྣམས་བྱའོ། །ཉི་ཤར་ནས་ཉི་མ་གུང་བར་རྒྱས་པའི་དུས་ཀྱི་སྔ་ཐུན་བླ་མའི་རྣལ་འབྱོར་རྒྱལ་བ་ཀུན་འདུས་མ་ཙམ་དང་གཞུང་བསྲངས། གོང་ཡོལ་ནས་ཉི་ནུབ་བར་དབང་གི་དུས་ཀྱི་དགོང་ཐུན་ཏེ། ཐུན་མགོར་མཆོད་པ་གསོ་བྲན། གཏོར་འབུལ་དང་ཚོགས་ཀྱི་ཆས་བཤམས་གྲུབ་ནས། བླ་མའི་རྣལ་འབྱོར། སྐྱབས་གནས་ཀུན་གྱི་ངོ་བོ་མཁྱེན་བརྩེ་ནུས་པའི་སོགས་དང་། གཞུང་བསྲངས་ནས་མཆོད་བསྟོད་བྱས་ནས་བཀའ་གཏེར་སྲུང་མ་སྡེ་བདུན་འདོན། ཚོགས་འཁོར་དང་། བསྐང་བ་དངོས་པོ་ཆོས་ཉིད་མ་ཙམ་དུ་བྱའོ། །ཚོགས་རྣམས་སྒྲུབ་གཏོར་མདུན་དུ་འབུལ། ལྷག་མ་སྣོད་གཅིག་ལ་བསགས་ཆད་ཐོ་བརྟན་མ་རྒྱུན་བཞག་ལ་དམར་གཏོར་ཉིས་འབྱར་ཐེབ་ཀྱུ་ཅན་དེ་མཆོད། རྟ་བྲོ་མཆོད་བསྟོད་ནོངས་བཤགས་རྟེན་བཞུགས། ༀ་ཆོས་སྐུའི་བཀྲ་ཤིས་སོགས་ནས་ལྷར་ལྡང་རྒྱུན་སྤྱོད་བར་བྱ། སྲོད་ཐུན་ལ། མཚོ་དབུས་གེ་སར་མ། ཕྱོགས་དུས་རྒྱལ་བ་དང་། ཀུན་བཟང་བཀའ་བརྒྱུད་ཀྱི་བླ་མའི་རྣལ་འབྱོར་བྱ། ལས་བྱང་ཆུང་བ་ནི་རྒྱུན་དུ་བྱ་དགོས། ལས་གཞུང་བསྲངས་ནས་བསྙེན་པ་ཅི་ནུས་འདོན། ཐུན་གྲོལ་ཁར་དབྱངས་གསལ། ཡིག་བརྒྱ་ཡེ་དྷར་གསུམ་རེ་བྱས། བླ་མ་ཀུན་བཟང་གིས་མཆོད། ཆོས་སྐུ་ནམ་མཁས་བསྟོད། བདེ་གཤེགས་རྒྱལ་བས་དངོས་གྲུབ་ལེན། ནོངས་བཤགས་བཀྲ་ཤིས་བསྡུ་རིམ་ལྷར་ལྡང་བར་བྱའོ། །དེ་ནས་ཕུང་པོ་མཆོད་སྦྱིན་དང་། ཀློང་ཆེན་པས་མཛད་པའི་བར་དོའི་སྨོན་ལམ་འོད་གསལ་སྨོན་ལམ་དང་བཅས་འདོན་ནས། འོད་གསལ་ངང་ལ་གཉིད་ལོག་གོ །།ཐོ་རངས་སད་པ་དང་། དཔའ་བོ་རྣལ་འབྱོར་མའི་ཚོགས་ཀྱིས་ཌཱ་མ་རུ་དང་དྲིལ་བུའི་

བརྡས་བསྐུལ་བར་བསམ་ཞིང་། ཧཱུྃ་བཞེངས་ཤིག་པདྨ་འབྱུང་གནས་སོགས་དང་གཏི་མུག་གཉིད་སྐྲོག་སོགས་འདོན་ཀྱང་ཆོག་གོང་ལྟར་རོ། །དེ་ལྟ་བུས་བརྩོན་པར་བྱའོ། །བཅུ་པ་དུས་བསྙེན་ནི། རབ་ལོ་གསུམ། འབྲིང་གི་ལོ་གཅིག །ཐ་མའི་ཟླ་བ་དྲུག་གི་བར་རོ། གྲངས་ནི་བྱེ་བ་འབྲུ་འབུམ་སོགས་དང་། རྟགས་མཚན་ནི། རབ་ཀྱིས་དངོས་སུ་ཞལ་མཇལ་ལུང་བསྟན་ཐོབ་པ། འབྲིང་གིས་ཉམས་སྣང་དུ་དེ་ལྟར་དང་། ཐ་མས་རྨི་ལམ་དུ་ཞལ་མཇལ་ཆོས་གསུང་ལུང་བསྟན་ཐོབ་པའི་བར་དེ་སྲིད་དུ་བཟླ་བའོ། །ཡང་ཐས་སྡིག་སྒྲིབ་བྱང་ལྟས་རྨི་ལམ་དགེ་བ་ཙམ་མོ། །མཚན་མ་མཐོང་ནས། བཅུ་གཅིག་པ་དངོས་གྲུབ་ལེན་པ་ནི། ཡར་ངོའི་ཚེས་གཟའ་སྐར་ཤིས་པའི་དུས། སང་གྲོལ་བའི་དགོང་ཐུན་ལ་མཆོད་གཏོར་གསར་བ་བཤམས་རྙིང་པ་ཁ་གསོ་བཟའ་བཏུང་ཚོགས་ཀྱི་ལོངས་སྤྱོད་རྒྱ་ཆེར་བཤམ་བསྲུང་འཁོར་བསྒོམ་པ་ནས་བཟུང་ལས་གཞུང་བསྲངས། མདུན་གྱི་བསྒྲུབ་གཏོར་སོགས་སྒྲུབ་རྫས་ཐམས་ཅད་ལྷར་གསལ། བདག་མདུན་གྱི་ཐུགས་ཀའི་སྔགས་འཕྲེང་ལས་འོད་ཟེར་ཕྱོགས་བཅུའི་ཞིང་ཁམས་རབ་འབྱམས་རྣམས་སུ་འཕྲོས་པས་རྒྱལ་བ་ཐམས་ཅད་མཆོད་མཉེས་ནས་བྱིན་རླབས་དངོས་གྲུབ་འོད་ཕུང་གི་རྣམ་པར་བསྡུས་ནས་མདུན་གྱི་སྒྲུབ་རྟེན་ཡོད་ཚད་ཀྱི་རྫས་ལ་ཐིམ་པར་བསྒོམ་ཞིང་རྩ་སྔགས་ལ། ཀ་ཡ་ཝཀྐ་ཙིཏྟ་སརྦ་སིདྡྷི་ཕ་ལ་ཧཱུྃ༔ ཞེས་བཏགས་པ་བཟླའོ། །སླར་བདག་གི་ཐུགས་ཀའི་སྔགས་ཀྱི་འོད་ཟེར་མདུན་བསྐྱེད་ལ་མཆོད་པའི་ཚུལ་གྱིས་ཕོག་ཐུགས་དགྱེས་པའི་དངོས་གྲུབ་འོད་ཕུང་ཟེར་ཐག་གི་རྣམ་པ་བདག་གི་གནས་བཞི་ལ་ཐིམ་པས་དབང་བཞི་ཆིག་རྫོགས་སུ་ཐོབ་པར་བསྒོམ་ཏེ་དམིགས་པ་

ཡང་ཡང་བསྐྱར་ལ་བཟླའོ། །སྲོད་ཐུན་ཡང་དེ་ལྟར་དང་། དངོས་གྲུབ་ལེན་པའི་ཐོར་ཐུན་བླ་མའི་རྣལ་འབྱོར་གྱི་གསོལ་བ་དྲག་ཏུ་བཏབ་གཞན་གོང་ལྟར་བུམ་བཟླས་དང་། བཀའ་སྲུང་ཚོགས་འཁོར་ལྷག་མ་ལ་ཐུག་གི་བར་བྱ། དེ་ནས་བགེགས་བསྐྲད་བྱིན་འབེབས་སྨན་མཆོད། རྗེ་བཙུན་བླ་མ་རྣམས་ཀྱི་ནོངས་བཤགས་ཡིག་བརྒྱ་མཆོད་བསྟོད་བྱས་ལ་བསྡུ་ན་བདེར་གཤེགས་རྒྱལ་བ་མའི་དངོས་གྲུབ་ལེན། རྒྱས་པ་ནི་དོན་དབང་ལྟར་བྱས་ན་ཆོག །དེ་ནས་མདུན་བསྐྱེད་ཡེ་ཤེས་པའི་དྲུང་དུ་བདག་དམ་ཚིག་པ་དབང་ཞུ་བ་པོ་བྱས་ནས་མཎྜལ་ཕུལ། དབང་རྒྱས་པའམ་དོན་དབང་ནོར་བུའི་ལུགས་ལྟར་ལེན་མཐར། སྒྲུབ་གཏོར་སྤྱི་བོར་ལེན་གཏོར་དབང་འདོན། གཏོར་མའི་ལྷ་ཚོགས་འོད་དུ་ཞུ་ཚངས་བུག་ནས་སྙིང་དབུས་སུ་བྱོན་ཡེ་ཤེས་སེམས་དཔར་བཞུགས་པར་བསམ། གཏོར་མ་བདུད་རྩིར་ཞུ་བ་མོས་པས་ཁར་ཅུང་ཟད་རེག །བཟའ་བཏུང་དངོས་གྲུབ་རྫས་ཀུན་ལ་རོལ་ནས། སྒྲུབ་རྫས་རང་གནས་སུ་བཀོད། གསོ་བྲན་མཆོད་བསྟོད་བྱས་རྗེས་གཞན་མཚམས་ཁང་དུ་ཡོད་པ་ལ་དབང་བསྐུར་དགོས་ན་བྱའོ། །གང་ལྟར་ཡང་ལྷག་མ་ནས་བཟུང་གཞུང་བཞིན་ནོངས་བཤགས་སྐབས་ཡིག་བརྒྱ་བརྒྱ་རྩ་ཙམ་དང་བདེ་གཤེགས་སྤྱི་བཤགས་བྱའོ། །ༀ་ཁྱེད་ཀྱིས་སེམས་ཅན་སོགས་ཡེ་ཤེས་པ་གཤེགས་པའམ་རྟེན་ལ་བསྟིམ། ཡེ་དྷར་བརྒྱ་རྩ་སོགས་ཀྱིས་མི་ཤིག་པར་བྱ། བསྲུང་བའི་འཁོར་ལོ་དང་བཅས་པའི་དམ་ཚིག་པ་བསྡུ་ལྡང་དང་བསྔོ་སྨོན་མར་མེའི་སྨོན་ལམ་བཅས་དང་ཤིས་བརྗོད་ཀྱིས་མཐའ་བརྒྱན་པར་བྱའོ། །བཅུ་གཉིས་པ་ཁ་བསྐང་སྦྱིན་སྲེགས་བྱ་བ་ནི། རྗེ་དབོན་པདྨ་ཀུན་གྲོལ་རྣམ་རྒྱལ་གྱིས་མཛད་པའི་ལས་བཞིའི་སྦྱིན་སྲེག་བསྡུས་པ་མེ་ཐབས་མི་དམིགས་མས་ཞི་

སྦྱིན་ལྷག་ཆད་ཁ་བསྐང་བྱས་ཀྱང་ཆོག །ཐབ་དཀྱིལ་དཀར་ཟླུམ་ཁ་ཁྱེར་མུ་རན་ཅན་ལྟེ་བར་ལྷ་གྲངས་ཚོན་སྤུངས་གོང་བཞིན་བྱེད་ཁ་ཁྱེར་ནས་བལ་ཤུག་ལྕང་མ་སོགས་ཞི་བའི་ཤིང་ངམ་སྲོག་ཆགས་མེད་པའི་ལྕི་བ་རྩིག་པ་རང་བསྲུང་ཏི་སེའི་གངས་རི་ཝཾ་ཡིག་ཅན་གྱི་མེ་ཡོལ་དང་། དེའི་མདུན་ནས་ཁ་མེ་ཐབ་ལ་ཕྱོགས་པ། མཆོད་པ་ཕྱི་ནང་ཚང་བར་བཤམས། ཉེ་ལོགས་སུ་ཡམ་ཤིང་མར་ཁུ་ཏིལ་ནག །སོ་ཝ། དུང་དངུལ་སྟོང་སོགས། རིན་ཆེན། གྲོ་ནས། འབྲས། ཡུངས་དཀར། སྲན་མ། མ་ཤཀུ་ཤདུར་ཝ། ཟས་མཆོག་ཞོ་ཟན་མངར་གསུམ་སྦྱར་བ། དར་སྣ། སཱ་ལའི་ཐང་ཆུའམ། མེ་ཏོག་དཀར་པོ། ཙནྡན་དཀར་པོ་དྲི་ཞིམ་པོའི་སྤོས་སོགས། འཇུག་པ་བདེ་ཕྱིར་གཅིག་ཏུ་བསྲེས་པ། སྣོད་གཙང་དུ་བཤམ། སོ་རྩི། གོས་ཟུང་དགང་བླུག་སོགས་འདུ་བྱས་བདག་བསྐྱེད་ཚོགས་ལྷག་བར་ཚར་ནས། མཆོད་སྟེགས་རྣམས་མཆོད་པ་ལྟར་བརླབས། ༀ་ཨགྣེ་ཡེ་ཛྭ་ལ་རཾ་གསུམ་གྱིས་མེ་སྦར་ཧཱུྃ་གསུམ་བརྗོད། རླུང་གཡབ་མེ་ཐབ་ༀ་བཛྲ་ས་ཏྭ་ཧཱུྃ་དང་། སྭཱ་བྷཱ་ཝས་སྦྱངས་སྟོང་པའི་ངང་ལས་ཞི་བའི་ཐབ་ཁུང་མཚན་ཉིད་རྫོགས་པའི་དབུས་སུ་རཾ་ལས་ཞི་བའི་མེ་ལྷ་དཀར་པོ་བགྲང་ཕྲེང་དང་གུ་དྷེ་བསྣམས་པ་ཞི་བའི་ཆ་བྱད་རྫོགས་པ་དེའི་ལྟོ་བ་ཡངས་ཤིང་རྒྱ་ཆེ་བའི་ནང་དུ། ཨ་ལས་བྷྲཱུཾ་འཕྲོས་གཞལ་ཡས་ཁང་། ཟུར་བཞི་ལོག་བཞི་སྒོ་བཞི་ལྡན་སོགས་ནས་བསྟོད་པའི་བར་སོང་རྗེས། མེ་ལྷའི་ལྗགས་རྡོ་རྗེའི་རྣམ་པ་ཅན། དཀར་པོ་ལ་རཾ་དང་། དགང་བླུག་གི་ཁར་ཧཱུྃ་ཡིག་དཀར་པོ་བདུད་རྩིའི་རྒྱུན་དྲངས་པས་ལྷ་ཚོགས་རྣམས་ཀྱིས་གསོལ་བས་སྐུ་ལས་འོད་ཟེར་དཀར་པོ་འཕྲོས་པས་ཏིང་འཛིན་མ་གསལ་སྔགས་ལྷག་ཆད་སོགས་ནད་གདོན་སྡིག་སྒྲིབ་དག་པར་མོས། ༀ་ཨགྣེ་ཡེ་སྭཱ་ཧཱ༔ མར་ཁུ་ལན་བདུན་གྱིས་བཀང་བའི་

དགང་བླུག་ཁ་སྦྱར་གཡས་སྐོར་གསུམ། རྩ་བའི་སྔགས་མཐར་ༀ་ཨགྣེ་ཡེ་ཨཱ་དཱི་བྱ་ཨཱ་བི་༼ནི་༽ཤ་ཡ་ཨཱ་བི་ཤ་ཡ་མ་ཧཱ་ཤྲི་ཧ་བྱ་ཀ་བྱ་ཝཱ་ཧཱ་ན་ཡེ་སྭཱ་ཧཱ༔ བསྙེན་སྒྲུབ་ཀྱི་འགལ་རྐྱེན་དུ་གྱུར་པ་ཐམས་ཅད་ཞི་ཞིང་མཆོག་གི་དངོས་གྲུབ་འགྲུབ་པར་གྱུར་ཅིག་སྭཱ་ཧཱ༔ ལན་གསུམ་གྱིས་བྱོན་ཟན་དབུལ། དེ་ནས་མེ་སྲོག་འཛིན་པའི་རྫས་གཉིས་ནས་བཅུ་ཚན་དུ་བཅད་དེ་རྩ་སྔགས་ཁོ་ནས་འབུལ་ཞིང་། མཚམས་སུ་སྔ་མ་ལྟར་འདོད་དོན་གསོལ་བ། བསྙེན་པའི་བཅུ་ཆའི་གྲངས་ལོངས་སུ་བསགས། བྱོན་ཟན་ལྟར་གཤེགས་སྐྱེམས་ཕུལ་ལ། ༀ་བཛྲ་ཏཾ་བུ་ལ་ཡེ་སྭཱ་ཧཱཿས་སོ་རྩི་དང་། ༀ་བཛྲ་ཝས་ཏྲ་ཡེ་སྭཱ་ཧཱཿས་གོས་ཟུང་ཕུལ། མཆོད་པའི་དུས་ཕྱི་ནང་སྨན་རཀ་གཏོར་མ་འབུལ། བསྟོད་པ། ནོངས་བཤགས་ནས་ཡེ་ཤེས་པ་གཤེགས། དམ་ཚིག་པ་བདག་ལ་བསྡུ། འཇིག་རྟེན་མེ་ལྷ་མེ་འབར་བའི་རྣམ་པར་རང་གནས་སུ་གཤེགས། བསྔོ་སྨོན་བཀྲ་ཤིས་བྱའོ། །ལྷག་མ་ནས་བཟུང་བདག་བསྐྱེད་རྗེས་ཆོག་བྱའོ། །སྦྱིན་སྲེགས་ཐལ་བ་ཆུ་བོར་གཤེགས་སོ། །དེ་ལྟར་བསྙེན་བསྒྲུབ་ལ་ལོ་དང་ཟླ་བར་བརྩོན་པས་འབད་པའི་འབྲས་བུ་ཇི་ལྟར་འབྱུང་བར་བྱ་བ་ལ་ཤེས་པར་བྱ་བ་བཅུ་དང་དམ་ཚིག་དྲུག་ལ་བརྩོན་དགོས། དེ་ལྟར་བསྒོམ་པའི་ལྷ་དེ་དག་མཉམ་བཞག་ཏུ་ལྷའི་དཀྱིལ་འཁོར་དང་། རྗེས་ཐོབ་ཏུ་སྒྱུ་མ་ལྟར་ཤེས་པ་དང་གཅིག །མིང་ཚིག་ཐམས་ཅད་སྨིག་རྒྱུ་ལྟར་ཤེས་པ་དང་གཉིས། སྤྱོད་ལམ་ཐམས་ཅད་རྨི་ལམ་ལྟར་ཤེས་པ་དང་གསུམ། དངོས་པོ་ཐམས་ཅད་མེ་ལོང་གི་གཟུགས་བརྙན་ལྟར་ཤེས་པ་དང་བཞི། གནས་ཡུལ་ཐམས་ཅད་དྲི་ཟའི་གྲོང་ལྟར་ཤེས་པ་དང་ལྔ། སྒྲ་ཐམས་ཅད་བྲག་ཆ་ལྟར་ཤེས་པ་དང་དྲུག །ལྷ་སྐུ་ཐམས་ཅད་ཆུ་ཟླ་ལྟར་སྣང་ལ་རང་བཞིན་མེད་པར་ཤེས་པ་དང་བདུན། ཏིང་འཛིན་

རྣམས་ཆུ་ལས་ཆུ་བུར་རྡོལ་བ་ལྟར་ཤེས་པ་དང་བརྒྱད། འཕྲོ་འདུ་ཐམས་ཅད་མིག་ཡོར་ལྟར་ཤེས་པ་དང་དགུ། ཆོ་འཕྲུལ་ཐམས་ཅད་སྤྲུལ་པ་ལྟར་མཚན་ཉིད་མེད་པར་ཤེས་པ་དང་བཅུ་འདི་ཤེས་པར་བྱའོ། །བླ་མ་ལ་དད་པ་དང་། ཏིང་ངེ་འཛིན་གྱི་མཐུན་ཕྱོགས་བསྒྲུབ་པ་དང་། མི་མཐུན་ཕྱོགས་སྤང་པ་དང་། སྤྱོད་ལམ་ཀུན་ཏུ་ཏིང་ངེ་འཛིན་མི་གཏོང་བ་དང་། ཡི་དམ་གྱི་ལྷ་མི་སྤང་བ་དང་། བསྐྱེད་རྫོགས་ཀྱི་དོན་དང་སྤྱོད་ལམ་རྣམས་སྣོད་མིན་ལ་གསང་བ་དྲུག་པོ་དེ་དམ་ཚིག་ཡིན་པས་སྤང་བླང་དམིགས་ཕྱེད་པར་བྱའོ། །དེ་ལྟར་དམ་ཚིག་བསྲུང་ཞིང་ལྷ་བསྒོམ་པས་ལམ་རྟགས་ཀྱི་ཡོན་ཏན་ནི། རིག་པ་འཛིན་པའི་སྡེ་སྣོད་ལས། ཕུང་པོའི་ཁམས་རྣམས་ལྷ་རུ་བསྒོམ། །འཛབ་དང་སྤྲོ་བསྡུ་ཚོགས་ཀྱི་ལམ། །དེ་ཉིད་འདྲིས་བྱེད་སྦྱོར་བའི་ལམ། །ཀུན་ཏུ་བཟང་པོ་ཧེ་རུ་ཀ༔ སེམས་སུ་སྨིན་པ་མཐོང་བའི་ལམ། །ཤིན་ཏུ་བརྟན་པ་བསྒོམ་པའི་ལམ། །དབྱིངས་ཡེ་གཉིས་མེད་མཐར་ཕྱིན་ལམ། །ཞེས་པས། ཚོགས་ལམ་དང་སྦྱོར་བའི་ལམ་གྱི་རིམ་པའི་རྟགས་དང་། འབྱུང་ལྔའི་རླུང་རྣམས་དབུ་མར་ཞུགས་པའི་རྟགས་ལྔ་དང་། རྨི་ལམ་དུ་ས་ཐོབ་པ་དང་ནོན་པའི་རྟགས་རྣམས་དང་། ཕྱི་ནང་གསང་བའི་དྲོད་ཐོབ་པའི་རྟགས་དང་། ཡོན་ཏན་རྣམ་པར་ཐོབ་ནས། ལུས་ཀྱི་སྦུབས་ནས་སེམས་ལྷ་སྐུར་སྨིན་པ་རྣམ་སྨིན་རིག་འཛིན་དང་། ལུས་དངས་མར་སྨིན་པ་ཚེ་དབང་རིག་འཛིན་དེ་གཉིས་མཐོང་ལམ་ནུས་པ་ཐོབ་མ་ཐོབ་ལས་སོ། །སྒོམ་ལམ་ཕྱག་རྒྱ་ཆེན་པོའི་རིག་འཛིན་དང་། རྒྱུན་མཐར་ལྷུན་གྱིས་གྲུབ་པའི་རིག་འཛིན་དང་རིག་འཛིན་བཞིའི་གོ་འཕང་ཐོབ་ནས་མི་སློབ་པའི་ཟུང་འཇུག་གི་སྐུ་དེ་ནི། ཁ་སྦྱོར་ཡན་ལག་བདུན་ལྡན་གྱི་གཟུགས་སྐུ་མཐར་ཐུག་ཡིན་ལ། ཁ་སྤྱོར་ཡན་ལག་ནི་སློབ་དཔོན་ངག་གི་དབང་ཕྱུག་གྲགས་པས། ལོངས་

སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེའི་ཡོངས་གང་རྒྱུན་མི་འཆད་དང་འགགས་པ་མེད། །ཡན་ལག་བདུན་བཤད་དོན་དང་ལྡན་པ་བསྒྲུབ་བྱ་འདིར། །བདག་འདོད་ཚད་མས་ཡང་སྒོམ་བློ་ཆེན་གྱིས་ཀྱང་བསྔགས། །ཞེས་པ་ལྟར་ཐོབ་ནས་འབྲས་བུའི་ཆོས་ཉེར་ལྔ་ནི། དེ་ཡང་སྐུ་ལྔ་ནི། གཟུགས་སྐུ་ནི་ཕྱིར་གསལ། ཆོས་སྐུ་ནི་ནང་གསལ་ཡིན་ཏེ། ཆོས་ཉིད་སྟོང་པ་ཉིད་རྟག་བརྟན་འཕོ་འགྱུར་མེད་པའི་ཆ་ནས་མི་འགྱུར་རྡོ་རྗེའི་སྐུ། སྐུ་གསུམ་དབྱེར་མི་ཕྱེད་པའི་ཡོན་ཏན་ལྷུན་གྲུབ་ཏུ་རྫོགས་པའི་ཆ་ནས་མངོན་པར་བྱང་ཆུབ་པའི་སྐུ། ཡེ་ཤེས་ཀྱི་མཁྱེན་ཆ་ནང་གསལ་བའི་ཆ་ནས་ཆོས་སྐུ་སྟེ་ནང་གསལ་རང་སྣང་གི་སྐུ་གསུམ་ངོ་བོ་གཅིག་ལ་ལྡོག་ཆའི་སྒོ་ནས་དབྱེ། ཡེ་ཤེས་རྣམ་པ་ལྔའི་རང་རྩལ་ངེས་པ་ལྔ་ལྡན་གྱི་ཞིང་ཁམས་སྣང་བ་ལོངས་སྐུ། གང་ལ་གང་འདུལ་གྱི་རྣམ་རོལ་དུ་སྣང་བ་ཅིར་ཡང་སྤྲུལ་པའི་སྐུ་སྟེ། ཕྱིར་གསལ་ཐུགས་རྗེའི་རྣམ་ཆ་གཟུགས་སྐུ་གཉིས་སོ། །གསུང་ལྔ་ནི། ཆོས་སྐུ་སྐྱེ་མེད་དོན་གྱི་གསུང་། །ལོངས་སྐུ་དགོངས་པ་བརྡའི་གསུང་། །སྤྲུལ་སྐུ་བརྗོད་པ་ཚིག་གི་གསུང་། མངོན་བྱང་རིག་པ་བྱིན་རླབས་གསུང་། །མི་འགྱུར་རྡོ་རྗེའི་གསུང་ནི། སྟོང་ཉིད་རྡོ་རྗེའི་གསུང་ངོ་། །ཐུགས་ལྔ་ནི། ཆོས་སྐུའི་ཐུགས་ཆོས་དབྱིངས་ཡེ་ཤེས། ལོངས་སྐུའི་ཐུགས་མེ་ལོང་ཡེ་ཤེས། སྤྲུལ་སྐུའི་ཐུགས་བྱ་གྲུབ་ཡེ་ཤེས། མི་འགྱུར་རྡོ་རྗེའི་ཐུགས་མཉམ་ཉིད་ཡེ་ཤེས། མངོན་པར་བྱང་ཆུབ་ཀྱི་ཐུགས་སོ་སོར་རྟོགས་པའི་ཡེ་ཤེས་སོ། །ཡོན་ཏན་ལྔ་ནི། རྣམ་པར་དག་པའི་ཞིང་ཁམས། རྒྱ་ཚད་བྲལ་བའི་གཞལ་ཡས། གསལ་ཞིང་དག་པའི་འོད་ཟེར། ཁྱད་པར་འཕགས་པའི་གདན་ཁྲི། དགྱེས་དགུར་སྤྱོད་པའི་ལོངས་སྤྱོད་དང་ལྔའོ། །ཕྲིན་ལས་ལྔ་ནི། ནད་གདོན་སྡིག་སྒྲིབ་འཇིགས་བརྒྱད་ཞི་བ། ཚེ་

བསོད་ཉམས་རྟོགས་ཡེ་ཤེས་རྒྱས་པ། འཁོར་འདས་སྣང་སྲིད་རང་རིག་ངང་དུ་དབང་དུ་འདུས་པ། གཉིས་འཛིན་ལོག་རྟོག་ཚར་གཅོད་པ། ལྷུན་གྱིས་གྲུབ་པའི་ཕྲིན་ལས་སྟེ་ལྔའོ། །དེ་ལྟར་མཐར་ཐུག་གི་འབྲས་བུ་ཉེར་ལྔ་ལ་དབང་བསྒྱུར་ནས་མངོན་རྫོགས་དང་པོའི་མགོན་པོ་མི་ཟད་རྒྱན་འཁོར་ལྔ་ཡི་བདག་ཉིད་ཀྱི་གོ་འཕང་མངོན་དུ་མཛད་པའོ། །ས་བཅད་བཅུ་གསུམ་པ་ལས་རྗེས་མི་མངོན་པར་བྱ་ཞིང་གནས་མལ་བསྲུང་བ་ནི། སྒོ་བྱང་སྔར་བཞག་ཡོད་ན་གཤེགས་གསོལ་བྱས་ནས་བཀྲོལ། རྒྱལ་ཐོ་རྩར་མཆོད་པ་སྔར་ལྟར་བཤམས་པ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་མཇུག་གི་མ་དཔེ་མ་རྙེད།