ཆོས་ཉིད་བར་དོའི་ངོ་སྤྲོད་ཀྱི་ལྷན་ཐབས།

ཟབ་ཆོས་ཞི་ཁྲོ་དགོངས་པ་རང་གྲོལ་ལས། ཆོས་ཉིད་བར་དོའི་ངོ་སྤྲོད་ཀྱི་ལྷན་ཐབས་བཞུགས་སོ། །

ཀུན་བཟང་ཞི་ཁྲོའི་ལྷ་ལ་ཕྱག་འཚལ་ལོ། །འོད་གསལ་ཐོད་རྒལ་གྱི་ཉམས་ཁྲིད་ལ་བརྟེན་ནས་ཆོས་ཉིད་བར་དོའི་ངོ་སྤྲོད་ཀྱི་རིམ་པ་ནི། དེ་ཡང་ཞག་དང་པོ་ལ། སྣང་བ་ཐམས་ཅད་འོད་མཐིང་གར་འཆར་པའི་རྟགས་ལ། ནམ་མཁའ་རྐྱེན་བྲལ་ཤིན་ཏུ་དངས་པ་དང་བསྟུན་ཅིང་། དབེན་པའི་སར་ཁྲི་མཐོ་བར་བྱས་ལ། དེའི་སྟེང་དུ་ཡོལ་བ་ཁྲི་གདུགས་སྔོན་པོ་ཤ་སྟག་བྱའོ། །ཁྲིའི་སྟེང་དུ་ཁྱེའུ་གཙང་མ་ལ། རྣམ་པར་སྣང་མཛད་ཀྱི་ཆ་ལུགས་བྱ་སྟེ། འཛོམ་ན་སྐུ་འབག་གམ། མ་འཛོམ་ན་གདོང་ལ་སྣུམ་བྱུགས་ལ། རྡུལ་ཚོན་དཀར་པོ་འགྱེད་ཅིང་། དབུ་རྒྱན་དང་། དར་སྣ་ཚོགས་དང་། རུས་རྒྱན་ལ་སོགས་སྤྲད་ཅིང་། ཕྱག་ན་འཁོར་ལོ་དང་དྲིལ་བུ་བསྣམས་པ། ཞབས་སྐྱིལ་ཀྲུང་། དེའི་མདུན་ནས་མར་ལ་ཆོས་དབྱིངས་ཡེ་ཤེས་ཀྱི་འོད་ལམ་ནི་དར་ཆེན་ནམ་མཁའི་མདོག་ནང་སྦྲག་ཅན་ལ་མེ་ལོང་ཆེ་བ་ཁྱུད་སྐོར་མ་ཙམ་ལ་ཆུང་བ་སོར་གསུམ་ཙམ་བཞི་ཚོམ་བྱས་ལ། སྣམ་བུ་གང་བར་བསྒྲིགས་པ་སྐྱེས་བུའི་འདོམ་པ་ཕྱེད་དོ་ཙམ། ཞེང་དུ་མཐོ་གང་དང་སོར་བཞི་ཙམ་གང་འོས་གདགས། དེ་དང་དུས་མཉམ་དུ་ལྷའི་འོད་ལམ་སྐྱ་བོ་གཅིག་ཀྱང་གདགས། གཞན་ཕྱག་མཚན་དར་བསྒྲོན། དར་སྣ་ཚོགས་ཀྱི་ཅོད་པན་སོགས་རྒྱན་ཆས་མང་དུ་བཏགས་ཤིང་རབ་ཏུ་བརྗིད་པར་བྱ༔ ཁྲིའི་གཡས་གཡོན་གང་རུང་ཞིག་ཏུ། སློབ་དཔོན་གྱི་

གདན་ཁྲི་བཤམ། དེ་ལྟར་ཆས་སྤྲད་པའི་དུས་སུ་ཡང་མདུན་ངོས་སུ་ཡོལ་བ་བྲིས་ཤིང་། སུས་ཀྱང་མ་མཐོང་བར་བྱས་ནས། སྐྱབས་འགྲོ་སེམས་བསྐྱེད་ལ་སོགས་སྔོན་དུ་བཏང་ལ། བཅའ་ག་རྣམས་ཚང་པ་དང་། གསོལ་བ་འདེབས་ཤིང་མདུན་ཡོལ་བསལ་ལ། སློབ་མ་རྣམས་འདོམ་གསུམ་གྱི་སར་དམའ་བར་བསྡད་ཅིང་མན་ཤེལ་ལ་བལྟར་བཅུག་གོ །གསན་པར་ཞུ། སྐྱེས་བུ་རྣམས་འཆི་བའི་ཚེ་གཞིའི་འོད་གསལ་ལ་ངོས་མ་ཟིན་ན། ཡང་བར་དོ་གཉིས་པ་ལ། དག་པའི་སྒྱུ་ལུས་ཞེས་ཀྱང་བྱ། གཞིའི་འོད་གསལ་ངོས་མ་ཟིན་ནས་འདིར་འཁྱམས་དགོས་བྱུང་བ་ཡིན་ནོ། །ད་ནི་ཁྱེད་ལ་ཆོས་ཉིད་བར་དོ་ཞེས་ཀྱང་བྱ། བར་དོ་གསུམ་པ་ཡང་ཟེར། ལྷུན་གྲུབ་བར་དོ་ཞེས་བྱ་བ་འཆར་རོ། །ཀྱཻ་རིགས་ཀྱི་བུ་རྣམས་བར་དོ་ངོ་ཤེས་པར་གྱིས་ཤིག །དེའི་ཚེ་འཁོར་བའི་རུ་ལོག་ནསསྣང་བ་ཐམས་ཅད་འོད་དང་སྐུ་རུ་འཆར་རོ། །ནམ་མཁའ་ཐམས་ཅད་འོད་ཁ་དོག་མཐིང་གར་འཆར་རོ། །དེའི་དུས་སུ་དབུས་ཕྱོགས་ཐིག་ལེ་བརྡལ་བའི་ཞིང་ཁམས་ནས་བཅོམ་ལྡན་འདས་རྣམ་པར་སྣང་མཛད་སྐུ་མདོག་དཀར་པོ་སེང་གེའི་ཁྲི་ལ་བཞུགས་པ། ཕྱག་ན་འཁོར་ལོ་རྩིབས་བརྒྱད་པ་བསྣམས་པ། ཡུམ་ནམ་མཁའི་དབྱིངས་ཕྱུག་མ་དང་ཞལ་སྦྱོར་བ་རང་ལ་འཆར་དུ་འོང་ངོ་། །རྣམ་པར་ཤེས་པའི་ཕུང་པོ་གནས་སུ་དག་པ། འོད་མཐིང་ག་ཆོས་ཀྱི་དབྱིངས་ཀྱི་ཡེ་ཤེས་ཁ་དོག་མཐིང་གསལ་ལ་དྭངས་པ་བཀྲག་ལ་འཚེར་བ་ཞིག །རྣམ་པར་སྣང་མཛད་ཡབ་ཡུམ་ཀྱི་ཐུགས་ཀ་ནས་རང་གི་མདུན་དུ་མིག་གིས་བལྟ་མི་བཟོད་པ་ཙམ་དུ་ཟུགས་ནས་འོང་ངོ་། །དེ་དང་དུས་མཉམ་དུ་ཉོན་མོངས་པ་གཏི་མུག་ལས་གྲུབ་པའི་ལྷའི་འོད་དཀར་པོ་བཀྲག་མེད་པ་གཅིག་ཀྱང་མདུན་དུ་ཟུང་གཤིབས་སུ་ཟུག་ནས་འོང་ངོ་། །དེའི་དུས་སུ་ལས་ངན་གྱི་དབང་གིས། འོད་མཐིང་ག་བཀྲག་

དང་ལྡན་པ་ཆོས་ཀྱི་དབྱིངས་ཀྱི་ཡེ་ཤེས་དེ་ལ་འཇིགས་སྐྲག་སྐྱེ་ཞིང་བྲོས་ཏེ། ལྷའི་འོད་དཀར་པོ་བཀྲག་མེད་དེ་ལ་ཁྱེད་དགའ་བའི་འདུ་ཤེས་སྐྱེས་ནས་འོང་ངོ་། །དེ་ཙ་ན་འོད་མཐིང་ག་གསལ་ལ་འཚེར་བ་དྭངས་ལ་བཀྲག་ཆེ་བ་མཆོག་གི་འོད་དེ་ལ་མ་སྔངས་ཤིག །མ་སྐྲག་པར་དེ་བཞིན་གཤེགས་པའི་འོད་ཟེར་ཆོས་ཀྱི་དབྱིངས་ཀྱི་ཡེ་ཤེས་ཞེས་བྱ་བ་ཡིན་གྱི། དེ་ལ་དད་པ་དང་མོས་གུས་དུང་དུང་གྱིས་ཤིག །བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་རྗེའི་འོད་ཟེར་ཡིན་ནོ་སྙམ་པའི་མོས་པ་གྱིས་ལ་གསོལ་བ་ཐོབ་ཅིག །ཡེ་ཤེས་ལྔའི་འོད་འཆར་ཚུལ་ནི། རྫོགས་ཆེན་རིག་པ་རང་ཤར་གྱི་རྒྱུད་ནས་གསུངས་སོ། །ཉི་ཟླ་ཁ་སྦྱོར་ལས། རང་གི་སྙིང་ག་ནས་འོད་ཟེར་ཤིན་ཏུ་ཕྲ་བ་ཞིག་འཆར་ཏེ། ཚོམ་བུའི་འོད་ཟེར་དང་། རང་གི་སྙིང་གའི་འོད་ཟེར་གཉིས་འབྲེལ་བའི་ཚེ། སྐུ་དེ་དག་ཐམས་ཅད་ཀྱི་ཐུགས་ཀར་འབྲེལ་ཏེ། རང་གི་ཤེས་པས་ཟིན་ནས་ཟེར་ཐག་དེ་ལ་ཐིག་ལེ་གྲངས་མེད་པ་འཆར་རོ། །དེ་ནི་བཅོམ་ལྡན་འདས་རྣམ་པར་སྣང་མཛད་ཀྱིས་བར་དོའི་འཕྲང་ལ་བསུ་བ་ལ་འོང་བ་ཡིན་ནོ། །ལྷའི་འོད་དཀར་པོ་བཀྲག་མེད་དེ་ལ་དགའ་བར་མ་བྱེད་ཅིག །མ་ཆགས་ཤིག །མ་ཞེན་ཅིག །དེ་ལ་ཆགས་ན་ནི་ལྷའི་གནས་སུ་འཁྱམས་ཏེ། རིགས་དྲུག་ཏུ་འཁྱམས་ནས་ཐར་བའི་ལམ་འགགས་པའི་བར་ཆད་ཡིན་པས། དེ་ལ་མིག་གིས་མ་བལྟ་བར། འོད་མཐིང་ག་བཀྲག་མདངས་ཅན་དེ་ལ་མོས་པ་གྱིས་ལ། རྣམ་པར་སྣང་མཛད་ལ་འདུན་པ་དྲག་པོ་གཏོད་ལ། སྨོན་ལམ་འདི་སྐད་ཀྱང་ཐོབ་ཅིག །དབྱངས་དང་བཅས་པས། ཀྱེ་མ། གཏི་མུག་དྲག་པོས་འཁོར་བར་འཁྱམས་པའི་ཚེ༔ཆོས་དབྱིངས་ཡེ་ཤེས་གསལ་བའི་འོད་ལམ་ལ༔བཅོམ་ལྡན་རྣམ་པར་སྣང་མཛད་ལམ་སྣ་དྲོངས༔ཡུམ་མཆོག་དབྱིངས་ཕྱུག་མ་ཡིས་རྒྱབ་ནས་སྐྱོར༔ བར་དོ་འཇིགས་པའི་

འཕྲང་ལས་བསྒྲལ་དུ་གསོལ༔ཡང་དག་རྫོགས་པའི་སངས་རྒྱས་ས་རུ་སྐྱོལ༔ཞེས་མོས་གུས་དྲག་པོས་སྨོན་ལམ་འདི་སྐད་བཏབ་པས་རྣམ་པར་སྣང་མཛད་ཀྱི་ཐུགས་ཀར་འཇའ་འོད་དུ་ཐིམ་ནས། དབུས་ཕྱོགས་སྟུག་པོ་བཀོད་པའི་ཞིང་ཁམས་སུ་ལོངས་སྤྱོད་རྫོགས་པའི་ཚུལ་དུ་སངས་རྒྱས་པར་འགྱུར་རོ། །དེ་དག་ནི་ཞག་དང་པོའི་ངོ་སྤྲོད་དོ། །༈ ཡང་ཞག་གཉིས་པའི་ངོ་སྤྲོད་ནི། གཞན་གོང་ལྟར་ལས། ཐམས་ཅད་ཁ་དོག་དཀར་པོ་ཤ་སྟག་བྱ། ཁྱད་པར་ཁྲིའི་སྟེང་དུ་ཁྲི་ཆུང་བཤམས་ལ། ཁྱེའུ་གཅིག་རྡོ་རྗེ་སེམས་དཔའི་ཆ་ལུགས་སྔོན་པོ་ཕྱག་ན་རྡོ་རྗེ་དང་དྲིལ་བུ་བསྣམས་པ། གཡས་སུ་སའི་སྙིང་པོ་རིན་པོ་ཆེའི་མྱུ་གུ་དང་དྲིལ་བུ་བསྣམས་པ། གཡོན་དུ་བྱམས་པ་ཀླུ་ཤིང་དང་དྲིལ་བུ་འཛིན་པ་གཉིས་བཞུགས་པ། མདུན་གྱི་གཡས་ཟུར་དུ་ལཱ་སྱེ་མ་དཀར་མོས་མེ་ལོང་འཛིན་པ། མདུན་གྱི་གཡོན་ཟུར་དུ་པུཥྤེ་མས་མེ་ཏོག་འཛིན་པ། གཉིས་ཀ་ཕྱེད་སྐྱིལ་དུ་བཞུགས་པ། བཞི་གའི་གཡོན་དུ་དྲིལ་བུ་འཛིན་པ། ཐམས་ཅད་སྐུ་མདོག་དཀར་པོའོ། །གོང་ལྟར་གཙོ་འཁོར་ལྔ་ལ་དར་དང་རིན་པོ་ཆེ་དང་། རུས་རྒྱན་ལ་སོགས་པས་མཛེས་པར་བརྒྱན། མེ་ལོང་ཡེ་ཤེས་ཀྱི་འོད་ལམ་དཀར་པོ་དང་། དམྱལ་བའི་འོད་ལམ་དུད་ཁ་གཉིས་བརྐྱང་། དེ་ནས་གསོལ་བ་གདབ་ཅིང་། མན་ཤེལ་འགྲིམས་ལ་འདི་སྐད་དོ། །ཡང་གོང་དུ་རང་སྣང་གི་ལྷ་དང་ཡེ་ཤེས་ཀྱི་རང་མདངས་དེ་ལྟ་བུ་ཤར་ཀྱང་ངོས་མ་ཟིན་ནས་འདིར་འཁྱམས་དགོས་བྱུང་བ་ཡིན། ད་ཞག་གཉིས་པ་ལ་རྡོ་རྗེ་སེམས་དཔའི་ལྷ་ཚོགས་དང་། ཉོན་མོངས་པ་ཞེ་སྡང་ལས་གྲུབ་པའི་དམྱལ་བའི་ལས་ངན་གཉིས་ཀྱིས་བསུ་བ་ལ་འོང་སྟེ། ཀྱེ་རིགས་ཀྱི་བུ་རྣམས། མ་ཡེངས་པར་ཉོན་ཅིག །ཞག་གཉིས་པ་ལ་འབྱུང་བ་ས་རྣམ་པར་དག་པའི་འོད་དཀར་

པོ་ འཆར་རོ། །དེའི་དུས་སུ་ཤར་ཕྱོགས་མངོན་པར་དགའ་བའི་ཞིང་ཁམས་མཐིང་ག་ནས་བཅོམ་ལྡན་འདས་རྡོ་རྗེ་སེམས ་དཔའ་མི་བསྐྱོད་པ། སྐུ་མདོག་མཐིང་ག་ཕྱག་ན་རྡོ་རྗེ་རྩེ་ལྔ་པ་བསྣམས་པ། གླང་པོ་ཆེའི་གདན་ལ་བཞུགས་པ། ཞེས་རྒྱས་པར་བཀྲོལ་ཞིང་སྨོན་ལམ་གདབ་བོ། །དེ་དག་ནི་ཞག་གཉིས་པའི་ངོ་སྤྲོད་དོ། །༈ ཡང་ཞག་གསུམ་པའི་ངོ་སྤྲོད་ནི། གཞན་ཐམས་ཅད་སྔར་ལྟར་ལས། ཡོལ་བ་ལ་སོགས་པ་ཐམས་ཅད་སེར་པོ་བྱ། ཁྲི་ཆུང་གི་སྟེང་ན་རིན་ཆེན་འབྱུང་ལྡན་གྱི་ཆ་ལུགས་སེར་པོ་བྱ། ཕྱག་ན་རིན་པོ་ཆེ་དང་དྲིལ་བུ་བསྣམས་པ། གཡས་སུ་ཀུན་ཏུ་བཟང་པོ་སྙེ་མ་འཛིན་པ། གཡོན་དུ་ནམ་མཁའི་སྙིང་པོ་རལ་གྲི་འཛིན་པ། མདུན་གྱི་གཡས་ཟུར་དུ་མཱ་ལྱེ་མས་ཕྲེང་བ་འཛིན་པ། གཡོན་ཟུར་དུ་དྷུསྤེ་མས་སྤོས་ཕོར་འཛིན་པ། བཞི་ཀའི་གཡོན་ཐམས་ཅད་ན་དྲིལ་བུ་འཛིན་པ། ཐམས་ཅད་སྐུ་མདོག་སེར་པོ། བཞུགས་ཚུལ་ནི་སྔར་ལྟར་ལས། མཛེས་པའི་རྒྱན་སྣ་ཚོགས་ཀྱིས་བརྒྱན་པ། མཉམ་ཉིད་ཡེ་ཤེས་ཀྱི་འོད་ལམ་སེར་པོ་དང་མིའི་འོད་ལམ་སྔོན་པོ་གཉིས་བརྐྱངས། དེ་ནས་གསོལ་བ་གདབ་ཅིང་། མན་ཤེལ་འགྲིམས་ལ་འདི་སྐད་དུ་ངོ་སྤྲད་དོ། །ཡང་གོང་དུ་རང་སྣང་གི་ལྷ་དང་དག་པ་ཡེ་ཤེས་ཀྱི་འོད་ལམ་དེ་ལྟ་བུ་ཤར་ཀྱང་ངོས་མ་ཟིན་ནས་འདིར་འཁྱམས་དགོས་བྱུང་ངོ་། །ད་ཞག་གསུམ་པ་ལ། བཅོམ་ལྡན་རིན་ཆེན་འབྱུང་ལྡན་གྱི་ཐུགས་རྗེའི་འོད་ཟེར་དང་ཉོན་མོངས་པ་ང་རྒྱལ་ལས་གྲུབ་པ་མིའི་འོད་ལམ་གཉིས་ཀྱིས་བསུ་བ་ལ་འོང་སྟེ། ཀྱཻ་རིགས་ཀྱི་བུ་རྣམས་མ་ཡེངས་བར་ཉོན་ཅིག །ཞག་གསུམ་པ་ལ་འབྱུང་བ་ཆུ་རྣམ་པར་དག་པའི་འོད་སེར་པོ་འཆར་རོ། །དེའི་དུས་སུ་ལྷོ་ཕྱོགས་དཔལ་དང་ལྡན་པའི་ཞིང་ཁམས་སེར་པོ་ནས། བཅོམ་ལྡན་འདས་རིན་ཆེན་འབྱུང་ལྡན་སྐུ་མདོག་སེར་པོ་

ཕྱག་ན་ནོར་བུ་རིན་པོ་ཆེ་བསྣམས་པ། རྟ་མཆོག་གི་གདན་ལ་བཞུགས་པ། ཞེས་གཞུང་ལྟར་རྒྱས་པར་བཀྲོལ་ཞིང་། སྨོན་ལམ་གདབ་བོ། །དེ་ནི་ཞག་གསུམ་པའི་ངོ་སྤྲོད་དོ། །༈ ཡང་ཞག་བཞི་པའི་ངོ་སྤྲོད་ནི། གཞན་ཐམས་ཅད་གོང་ལྟར་ལས། རྒྱན་དང་ཡོལ་བ་ཐམས་ཅད་དམར་པོ་བྱ༔ཁྲི་ཆུང་གི་སྟེང་དུ་སྣང་བ་མཐའ་ཡས་ཆ་ལུགས་དམར་པོ། པདྨ་དང་དྲིལ་བུ་བསྣམས་པ། གཡས་སུ་སྤྱན་རས་གཟིགས་པདྨ་འཛིན་པ། གཡོན་དུ་འཇམ་དཔལ་ཨུཏྤལ་འཛིན་པ། མདུན་གྱི་གཡས་ཟུར་དུ་གཱིརྟི་མས་པི་ཝང་འཛིན་པ། གཡོན་ཟུར་དུ་ཨཱ་ལོ་ཀེ་མས་མར་མེ་འཛིན་པ། བཞི་གའི་གཡོན་དྲིལ་བུའོ། །ཐམས་ཅད་སྐུ་མདོག་དམར་པོ་བྱ། བཞུགས་ཚུལ་ནི་གོང་ལྟར་ལས། སོ་སོར་རྟོག་པའི་ཡེ་ཤེས་ཀྱི་འོད་ལམ་དམར་པོ་དང་ཡི་དྭགས་ཀྱི་འོད་ལམ་སེར་པོ་གཉིས་བརྐྱངས། དེ་ནས་གསོལ་བ་གདབ་ཅིང་། ཤེལ་རྡོ་འགྲིམས་ལ་འདི་སྐད་ངོ་སྤྲད་དོ། །སྔར་གོང་དུ་རང་སྣང་གི་ལྷ་དང་དག་པ་ཡེ་ཤེས་ཀྱི་འོད་ལམ་དེ་ལྟ་བུ་ཤར་ཀྱང་ངོས་མ་ཟིན་ནས་འདིར་འཁྱམས་དགོས་བྱུང་ངོ་། །ད་ཞག་བཞི་པ་ལ་བཅོམ་ལྡན་འདས་སྣང་བ་མཐའ་ཡས་ཀྱི་ཐུགས་རྗེའི་འོད་ཟེར་དང་། ཉོན་མོངས་འདོད་ཆགས་སེར་སྣ་ལས་གྲུབ་པའི་ཡི་དྭགས་ཀྱི་འོད་ལམ་གཉིས་ཀྱིས་བསུ་བ་ལ་འོང་སྟེ། ཀྱཻ་རིགས་ཀྱི་བུ་རྣམས་ཉོན་ཅིག །ཞག་བཞི་པ་ལ་འབྱུང་བ་མེ་རྣམ་པར་དག་པའི་འོད་དམར་པོ་འཆར་རོ། །དེའི་དུས་སུ་ནུབ་ཕྱོགས་བདེ་བ་ཅན་གྱི་ཞིང་ཁམས་དམར་པོ་ནས། བཅོམ་ལྡན་འདས་སངས་རྒྱས་སྣང་བ་མཐའ་ཡས་སྐུ་མདོག་དམར་པོ་ཕྱག་ན་པདྨ་བསྣམས་པ། རྨ་བྱའི་གདན་ལ་བཞུགས་

པ། ཞེས་རྒྱས་པར་བཀྲོལ་ཞིང་སྨོན་ལམ་གདབ་བོ། །དེ་དག་ནི་ཞག་བཞི་པའི་ངོ་སྤྲོད་དོ། །༈ ཡང་ཞག་ལྔ་པའི་ངོ་སྤྲོད་ནི། གཞན་ཐམས་ཅད་གོང་ལྟར་ལས། ཡོལ་བ་རྒྱན་ལ་སོགས་ལྗང་གུ་བྱའོ། །ཁྲི་ཆུང་གི་སྟེང་དུ་དོན་ཡོད་གྲུབ་པའི་ཆ་ལུགས་ལྗང་གུ་རྒྱ་གྲམ་དང་དྲིལ་བུ་འཛིན་པ། གཡས་སུ་ཕྱག་རྡོར་རྡོ་རྗེ་འཛིན་པ། གཡོན་དུ་སྒྲིབ་པ་རྣམ་སེལ་པོ་ཏི་འཛིན་པ། མདུན་ཟུར་གཡས་སུ་གྷནྡྷེ་མས་དུང་ཕོར་འཛིན་པ། གཡོན་དུ་ནཱིརྟི་མས་ཞལ་ཟས་འཛིན་པ། བཞི་གའི་གཡོན་པས་དྲིལ་བུ་འཛིན་པ། ཐམས་ཅད་སྐུ་མདོག་ལྗང་གུ། བཞུགས་ཚུལ་ནི་སྔར་ལྟར་རོ། །བྱ་གྲུབ་ཡེ་ཤེས་ཀྱི་འོད་ལམ་ལྗང་གུ་དང་། ལྷ་མ་ཡིན་གྱི་འོད་ལམ་དམར་པོ་བརྐྱངས། དེ་ནས་གསོལ་བ་གདབ་ཅིང་། རྡོ་རྗེ་སེམས་དཔའི་མེ་ལོང་འགྲིམས་ཤིང་འདི་ལྟར་ངོ་སྤྲད་དོ། །ཡང་གོང་དུ་རང་སྣང་གི་ལྷ་དང་དག་པ་ཡེ་ཤེས་ཀྱི་འོད་ལམ་དེ་ལྟ་བུ་ཤར་ཀྱང་། ངོས་མ་ཟིན་ནས་འདིར་འཁྱམས་དགོས་བྱུང་ངོ་། །ད་ཞག་ལྔ་པ་ལ། བཅོམ་ལྡན་འདས་དོན་ཡོད་གྲུབ་པའི་ཐུགས་རྗེའི་འོད་ཟེར་དང་ཉོན་མོངས་པ་ཕྲག་དོག་ལས་གྲུབ་པའི། ལྷ་མ་ཡིན་གྱི་འོད་ལམ་གཉིས་ཀྱིས་བསུ་བ་འོང་སྟེ། ཀྱཻ་རིགས་ཀྱི་བུ་རྣམས་མ་ཡེངས་པར་ཉོན་ཅིག །ཞག་ལྔ་པ་ལ། འབྱུང་བ་རླུང་ཐམས་ཅད་རྣམ་པར་དག་པའི་འོད་ལྗང་གུར་འཆར་རོ། །དེའི་དུས་སུ་བྱང་ཕྱོགས་ལས་རབ་རྫོགས་པའི་ཞིང་ཁམས་ལྗང་གུ་ནས། བཅོམ་ལྡན་འདས་དོན་ཡོད་གྲུབ་པ་{གཙོ་འཁོར་}སྐུ་མདོག་ལྗང་གུ་ཕྱག་ན་རྡོ་རྗེ་རྒྱ་གྲམ་དང་དྲིལ་བུ་བསྣམས་པ། ནམ་མཁའ་ལྡིང་ཤང་ཤང་གི་ཁྲི་ལ་བཞུགས་པ། ཞེས་གཞུང་ལྟར་བཀྲོལ་ཞིང་སྨོན་ལམ་གདབ་བོ། །དེ་དག་ནི་ཞག་ལྔ་པའི་ངོ་སྤྲོད་དོ། །༈ ཡང་ཞག་དྲུག་པའི་ངོ་སྤྲོད་

ནི། གཞན་ཐམས་ཅད་སྔར་ལྟར་ལས། ཡོལ་བ་རྒྱན་སོགས་འཇའ་ཚོན་མ་བྱ། ཁྲིའི་སྟེང་དུ་སྦ་ཕུབ་ཆེ་བ་ཞིག་གི་ངོས་ལ་ཆང་གར་མས་བྱུག་ཅིང་། རྡུལ་ཚོན་གྱི་འཇའ་ཚོན་ལྔ་ཟླུམ་པོ་བྲི། དེའི་སྟེང་དུ་གྲོ་ཟན་ཐབ་ཏུ་བཙོས་པ་དུམ་བུ་རེ་ལྷན་ཅིང་། ཏིང་ཕོར་སྦྱར། དབུས་སུ་ཆེ་བ་གཅིག །ཕྱོགས་རེ་རེ་ནས་རིགས་བཞི་ཡབ་ཡུམ་རེ་རེ་ལ་སེམས་དཔའ་གཉིས་གཉིས་སེམས་མ་གཉིས་གཉིས་ཀྱིས་བསྐོར་བ་དང་བཅས་པ། གཙོ་འཁོར་ལྔ་ལྔའི་ཏིང་ཕོར་སྦྱར། ཕྱོགས་བཞི་མཚམས་བཞི་དང་བརྒྱད་དུ། ཐུབ་པ་དྲུག་དང་། ཀུན་ཏུ་བཟང་པོ་དང་ཀུན་ཏུ་བཟང་མོའི་ཏིང་ཕོར་སྦྱར། ཕྱོགས་བཞིར་སྒོ་བ་བཞིའི་ཏིང་ཕོར་སྦྱར་ཞིང་། ཞི་བ་བཞི་བཅུ་རྩ་གཉིས་ཀྱང་ཚོམ་བུ་སུམ་ཅུ་སོ་གསུམ་ལ་ཚང་བར་བཀོད་ཅིང་ཏིང་ཕོར་གྱི་དབུས་སུ་འཇའ་འོད་འཁྱིལ་བའི་ནང་དུ་ལྷ་རྣམས་ཀྱི་དབུ་དོད་པ་ཙམ་བྲིས་པ་ལྷན། དེའི་མདུན་དུ་བྱ་གྲུབ་ཡེ་ཤེས་ཀྱི་འོད་ལམ་མ་གཏོགས་པའི་འོད་ལམ་བཞི་ཀ་བརྐྱང་། འགྲོ་བ་རིགས་དྲུག་གི་འོད་ལམ་ཡང་བརྐྱང་། དེ་ནས་གསོལ་བ་བཏབ་ཅིང་། མན་ཤེལ་འགྲིམས་ཤིང་འདི་སྐད་ངོ་སྤྲད་དོ། །དེ་ལྟར་ལན་མང་དུ་ངོ་སྤྲད་ཀྱང་། བག་ཆགས་ཚན་ཆེ་ལ་འགྲོགས་ཡུན་རིང་། དག་སྣང་ཡེ་ཤེས་ལ་སྔར་འདྲིས་མེད་པའི་དབང་གིས་ངོ་སྤྲད་ཀྱང་། བག་ཆགས་ངན་པས་ཕྱིར་ལ་ཁྲིད་དེ། ཐུགས་རྗེའི་འོད་ཟེར་གྱི་ལྕགས་ཀྱུས་མི་ཟིན་པར་འོད་ཟེར་ལ་སྔངས་སྐྲག་སྐྱེས་ནས་མར་ལ་འཁོར་བས། ད་ནི་ཞག་དྲུག་པ་ལ། རིགས་ལྔ་ཡབ་ཡུམ་འཁོར་དང་བཅས་པ་དུས་གཅིག་ལ་འཆར་ནས་འོང་སྟེ། དེའི་ཚེ་རིགས་དྲུག་གི་འོད་དྲུག་ཀྱང་དུས་གཅིག་ལ་འཆར་ནས་འོང་ངོ་། །ཀྱཻ་རིགས་ཀྱི་བུ་རྣམས་གསོན་ཅིག །ཁར་སང་ཕན་ཆད་རིགས་ལྔ་སོ་སོའི་སྣང་བ་ཤར་ཀྱང་རང་སྣང་དུ་ངོ་མ་ཤེས་

ནས། བག་ཆགས་ཀྱི་དབང་གིས་དེ་རྣམས་ལ་སྔངས་སྐྲག་སྐྱེ་ནས། ད་ཕན་ཆད་འདིར་ལུས་པ་ཡིན་ནོ། །གོང་དུ་རིགས་ལྔ་ཡེ་ཤེས་ཀྱི་རང་མདངས་དེ་རྣམས་རང་སྣང་དུ་ངོ་ཤེས་ན། རིགས་ལྔ་སོ་སོའི་སྐུ་ལ་འཇའ་འོད་དུ་ཐིམ་ནས། ལོངས་སྤྱོད་རྫོགས་པའི་སྐུར་སངས་རྒྱ་རྒྱུ་ཡིན་པ་ལ། ཞེས་གཞུང་ལྟར་རྒྱས་པར་བཀྲོལ་ཞིང་སྨོན་ལམ་བཏབ་པས། ཡེ་ཤེས་བཞི་སྦྱོར་གྱི་སྣང་བ། རྡོ་རྗེ་སེམས་དཔའ་ཁོང་སེང་གི་ལམ་ལས་སངས་རྒྱས་པར་འགྱུར་རོ། །

༈ ཡང་ཞག་བདུན་པའི་ངོ་སྤྲོད་ནི། ཡོལ་བ་རྒྱན་བཀོད་པ་རྣམས་སྔར་ལྟར་ལས། སྐྱེས་བུ་ལུས་བདེ་བ་ལྔའི་ལུས་ཁྲུས་བྱས་ཏེ། རྐེད་པར་སྨད་གཡོགས་རེ་དཀྲིས། གཅིག་ནི་ལུས་ལ་ཁ་དོག་སྣ་ཚོགས་བྱ། གཅིག་ནི་དཀར་པོ། གཅིག་ནི་སེར་པོ། གཅིག་ནི་དམར་པོ། གཅིག་ནི་ལྗང་གུ་བྱས་ཏེ། ཁ་དོག་དང་མཐུན་པའི་སྐུ་འབག་ཁྲོ་ཞལ་བཞད་པའི་ཚུལ་ཅན་རེ་རེ་གྱོན། དབུ་རྒྱན། སྙན་ཆ་རྒྱན་ལ་སོགས་པ་དང་། དར་སྣ་ཚོགས་ཀྱིས་བརྒྱན། རུས་པའི་རྒྱན་དྲུག་གིས་སྤྲས། ཕྱག་ན་ཌཱ་དྲིལ་དང་གྲི་གུག་དང་ཐོད་པ་བསྣམས་ནས་གར་སྟབས་འགྱིངས་ཤིང་སྤྱོད། འདིའི་དུས་སུ་ཤ་ཆེན་གྱི་གསུར་དང་། རྔ་དང་། རྐང་གླིང་ལ་སོགས་པའི་རོལ་མོ་རྣམ་པ་སྣ་ཚོགས་པ་འཁྲོལ། ལྷན་སྐྱེས་ཡེ་ཤེས་ཀྱི་འོད་ལམ་ཁྲ་བོ་མདུན་དུ་བརྐྱངས། དུད་འགྲོའི་འོད་ལམ་ཡང་མཉམ་དུ་བརྐྱངས། དེ་ནས་གསོལ་བ་གདབ་ཅིང་། མདུན་གྱི་ཡོལ་བ་བསལ། རིག་འཛིན་རྣམས་ཀྱིས་འཆམས་སྟབས་བྱ། མན་ཤེལ་འགྲིམས་ལ་འདི་སྐད་དུ་ངོ་སྤྲད་དོ། །འཽ། གོང་དུ་རིགས་ལྔ་སོ་སོ་དང་ཡོངས་རྫོགས་ཀྱི་སྣང་བ་ཤར་ཡང་ངོས་མ་ཟིན་ནས་འདི་ནས་མར་ལ་འཁྱམས་དགོས་པས། ཞག་བདུན་པ་ལ། དག་པ་མཁའ་སྤྱོད་ཀྱི་ཞིང་ཁམས་ནས་རིག་འཛིན་གྱི་ལྷ་ཚོགས་རྣམས་དང་། ཉོན་མོངས་པ་གཏི་

མུག་ལས་གྲུབ་པའི་དུད་འགྲོའི་འོད་ལམ་གཉིས་ཀྱིས་བསུ་བ་ལ་འོང་ངོ་། །ཀྱཻ་རིགས་ཀྱི་བུ་མ་ཡེངས་པར་ཉོན་ཅིག །ཞག་བདུན་པ་ལ་བག་ཆགས་དབྱིངས་སུ་དག་པའི་འོད་ཁྲ་བོ་ཤར་དུ་འོང་ངོ་། །དེའི་དུས་སུ་དག་པ་མཁའ་སྤྱོད་ཀྱི་ཞིང་ཁམས་ནས་རིག་འཛིན་གྱི་ལྷ་ཚོགས་བསུ་བ་ལ་འོང་སྟེ། འཇའ་དང་འོད་ཀྱིས་འཐིབས་པའི་དཀྱིལ་འཁོར་གྱི་དབུས་སུ། རྣམ་པར་སྨིན་པའི་རིག་འཛིན། བླ་ན་མེད་པ་པདྨ་གར་གྱི་དབང་ཕྱུག་ཅེས་བྱ་བ། ཞེས་གཞུང་ལྟར་བཀྲོལ་ཞིང་སྨོན་ལམ་གདབ་བོ། །དེ་དག་ནི་ཞག་བདུན་པའི་ངོ་སྤྲོད་དོ། །༈ ཡང་ཞག་བརྒྱད་པའི་ངོ་སྤྲོད་ནི། ཡོལ་བ་བཀོད་པ་ལ་སོགས་སྔར་ལྟར་ལས། སྐྱེས་བུ་གསུམ་གྱི་ལུས་ལ་ཚོན་རྩི་ཁ་དོག་དམར་སྨུག་བྱུགས་ཏེ། དབུས་མའི་ཞལ་སྨུག་པོ། གཡས་ཞལ་དཀར་པོ། གཡོན་ཞལ་དམར་པོ་སྟེ། ཤིན་ཏུ་ཁྲོ་བོའི་སྐུ་འབག་རེ་རེ་གསོལ་བ། རྐེད་དཀྲིས་དར་ཁྲ་བོ་གཅིག་གི་སྟེང་དུ་རྒྱན་དྲུག་གིས་སྤྲས་པ། ཕྱག་དྲུག་ལ། གཡས་ཀྱི་དང་པོ་འཁོར་ལོ། བར་མ་དགྲ་སྟྭ། ཐ་མ་རལ་གྲི། གཡོན་གྱི་དང་པོ་དྲིལ་བུ། བར་མ་ན་ཐོང་གཤོལ། ཐ་མ་ན་བྷན་དྷ་འཛིན་པ། ཤིན་ཏུ་འཇིགས་པའི་ཆ་ལུགས་སུ་བཀོད། གཡས་སུ་ཀཽ་རཱི་དཀར་མོའི་གཟུགས་ཅན་མས་དབྱུག་པ་ཐོགས་པ། གཡོན་སིངྷ་སྨུག་ནག་སེང་གེའི་གདོང་ཅན་གྱི་གཟུགས་བྱས་ལ། བམ་རོ་ཐོགས་པ། འཇིགས་ཤིང་སྐྱི་གཡའ་བའི་ཚུལ་དུ་བཀོད་དོ། །གཞན་ཡང་རོལ་མོ་སྣ་ཚོགས་དང་གསུར་ཆེན་ཀྱི་དུད་པ་ལ་སོགས་པ་བཏང་ནས། གཡས་གཡོན་འགྱིངས་སྟབས་ཀྱིས་འཆམས་པ་ལ་སོགས་པ་བྱའོ། །མན་ཤེལ་བལྟ་རུ་བཅོལ་ལ། གསོལ་བ་གདབ་ཅིང་། དེ་ནས་འདི་སྐད་ངོ་སྤྲད་དོ། །ཀྱཻ་རིགས་ཀྱི་བུ་རྣམས་མ་ཡེངས་པར་ཉོན་ཅིག །གོང་དུ་ཞི་བའི་བར་དོ་དེ་ཙམ་ཤར་ཀྱང་ངོས་མ་ཟིན་ནས། ད་ཁྲག་འཐུང་ཁྲོ་

བོའི་ལྷ་ཚོགས་འབར་བ་ལྔ་བཅུ་རྩ་བརྒྱད་གོང་གི་ལྷ་ཚོགས་གནས་འགྱུར་ནས་འཆར་དུ་འོང་བས་ད་ནི་གོང་དང་མི་འདྲ་སྟེ། འདི་ནི་ཁྲོ་བོའི་བར་དོ་ཡིན་པས་འཇིགས་སྐྲག་སྔངས་གསུམ་གྱི་དབང་དུ་འགྲོ་སྟེ། ངོ་སྤྲད་པ་ཡང་དཀའ་རུ་འགྲོའོ། །རིག་པ་རང་དབང་མ་ཐོབ་པས་བརྒྱལ་བ་ཁོར་ཡུག་ཏུ་འགྲོ་སྟེ། ཅུང་ཟད་ཙམ་ཞིག་ངོས་ཟིན་ན་གྲོལ་བའང་སླ་སྟེ། ཅིའི་ཕྱིར་ཞེ་ན། སྔངས་སྐྲག་འཇིགས་གསུམ་གྱི་སྣང་བ་ཤར་བས་རིག་པ་ཡེངས་ལོང་མེད་དེ། རིག་པ་རྩེ་གཅིག་ཏུ་བསྒྲིམས་ནས་ཡོད་པའི་ཕྱིར་རོ། །ད་ནི་ཞག་བརྒྱད་པ་ལ་ཁྲོ་བོའི་ལྷ་ཚོགས་ཤར་དུ་འོང་ངོ་། །མ་ཡེངས་བར་ངོས་ཟིན་པར་གྱིས་ཤིག །ཀྱཻ་རིགས་ཀྱི་བུ་དཔལ་ཆེན་པོ་བུདྡྷ་ཧེ་རུ་ཀ་ཞེས་བྱ་བ། སྐུ་མདོག་སྨུག་ནག་དབུ་གསུམ་ཕྱག་དྲུག་ཞབས་བཞི་བགྲད་པ། ཞེས་གཞུང་ལྟར་རྒྱས་པར་བཀྲོལ་ཞིང་ངོ་སྤྲད་དོ། །༈ ཡང་ཞག་དགུ་པའི་ངོ་སྤྲོད་ནི། གཞན་སོགས་གོང་ལྟར་ལས། ཁྲིའི་སྟེང་དུ་བཛྲ་ཧེ་རུ་ཀའི་གཟུགས་བཀོད་ཅིང་ཤེལ་རྡོ་བསྟན་ལ་འདི་སྐད་དོ། །ཡང་གོང་གི་ལྷ་དེ་ལ་འཇིགས་སྐྲག་སྐྱེས་ནས་བྲོས་པས་ངོ་མ་འཕྲོད་ན་ཁྲག་འཐུང་རྡོ་རྗེའི་རིགས་བསུ་བ་ལ་འོང་ངོ་། །ཀྱཻ་རིགས་ཀྱི་བུ་རྣམས་ཉོན་ཅིག །ཁྲག་འཐུང་རྡོ་རྗེའི་རིགས་ཀྱི་གཙོ་བོ་བཛྲ་ཧེ་རུ་ཀ་ཞེས་བྱ་བ། ཞེས་གཞུང་ལྟར་རྒྱས་པར་བཀྲོལ་ཞིང་ངོ་སྤྲད་དོ། །ཡང་ཞག་བཅུ་པའི་ངོ་སྤྲོད་ནི། ཁྲིའི་སྟེང་དུ་རཏྣ་ཧེ་རུ་ཀའི་སྐུ་བསྟན་ཅིང་། ཤེལ་རྡོ་འགྲིམས་ཤིང་འདི་སྐད་དོ། །ཡང་ལས་སྒྲིབ་ཆེ་བ་རྣམས་ཀྱིས་དེ་ལ་སྔངས་སྐྲག་སྐྱེས་ནས་བྲོས་པས་ངོ་མ་འཕྲོད་པར། ཞག་བཅུ་པ་ལ་ཁྲག་འཐུང་རིན་པོ་ཆེའི་རིགས་བསུ་བ་ལ་འོང་ངོ་། །ཀྱཻ་རིགས་ཀྱི་བུ་རྣམས་གསོན་ཅིག །ཞག་བཅུ་པ་ལ། ཁྲག་འཐུང་རིན་པོ་ཆེའི་རིགས་རཏྣ་ཧེ་རུ་ཀ་ཞེས་བྱ་བ། ཞེས་རྒྱས་པར་ངོ་སྤྲད་དོ། །

༈ ཡང་ཞག་བཅུ་གཅིག་པའི་ངོ་སྤྲོད་ནི། ཁྲིའི་སྟེང་དུ་པདྨ་ཧེ་རུ་ཀའི་སྐུ་གསལ་བར་བསྟན་ཅིང་། མན་ཤེལ་བསྟན་ལ་འདི་སྐད་དོ། །ཡང་བག་ཆགས་ངན་པའི་དབང་གིས་སྔངས་སྐྲག་སྐྱེས་ནས་ཕྱིར་བྲོས་ཏེ། ཡི་དམ་དུ་ངོ་མ་ཤེས་པས་གཤིན་རྗེར་མཐོང་ནས་ངོ་མ་འཕྲོད་ན། ཞག་བཅུ་གཅིག་པ་ལ་ཁྲག་འཐུང་པདྨའི་རིགས་ཀྱིས་བསུ་བ་འོང་ངོ་། །ཀྱཻ་རིགས་ཀྱི་བུ་རྣམས་ཞག་བཅུ་གཅིག་པའི་དུས་སུ་ཁྲག་འཐུང་པདྨའི་རིགས། བཅོམ་ལྡན་འདས་པདྨ་ཧེ་རུ་ཀ་ཞེས་བྱ་བ། ཞེས་གཞུང་ལྟར་རྒྱས་པར་བཀྲོལ་ཞིང་ངོ་སྤྲད་དོ། །༈ ཡང་ཞག་བཅུ་གཉིས་པའི་ངོ་སྤྲོད་ནི། ཁྲིའི་སྟེང་དུ་ཀརྨ་ཧེ་རུ་ཀའི་སྐུ་བསྟན་ཅིང་འདི་སྐད་དོ། །ཡང་གོང་དུ་ལྷ་དེ་ལྟ་བུའི་སྐུ་ཤར་ཀྱང་། རང་སྣང་དུ་ངོ་མ་ཤེས་པས་འཁྲུལ། ད་ཞག་བཅུ་གཉིས་པ་ལ། ཁྲག་འཐུང་ལས་ཀྱི་རིགས་ཀྱིས་བསུ་བ་ལ་འོང་ངོ་། །ཀྱཻ་རིགས་ཀྱི་བུ་རྣམས་གསོན་ཅིག །ཞག་བཅུ་གཉིས་པའི་དུས་སུ་ཁྲག་འཐུང་ལས་ཀྱི་རིགས་བཅོམ་ལྡན་འདས་ཀརྨ་ཧེ་རུ་ཀ་ཞེས་བྱ་བ། ཞེས་རྒྱས་པར་ངོ་སྤྲད་དོ། །ཁྱད་པར་ཁྲིའི་སྟེང་དུ། སྦ་ཕུབ་ལ་སྔར་ལྟར་འཇའ་ཚོན་བྲི། དེའི་དབུས་སུ་ཁྲག་འཐུང་རིགས་ལྔ། དེའི་ཕྱི་རོལ་ཀཽ་སེང་བཅུ་དྲུག །སྒོ་མ་བཞི། དེའི་མཐའ་བསྐོར་དུ་དབང་ཕྱུག་ཉེར་བརྒྱད་ཀྱི་ཏིང་ཕོར་སྦྱར་ལ། ཀྱཻ་རིགས་ཀྱི་བུ་རྣམས་གསོན་ཅིག །ད་ནི་ཁྲག་འཐུང་ཡོངས་རྫོགས་ཀྱི་སྣང་བ་འཆར་ཏེ། དབུས་སུ་བུདྡྷ་ཧེ་རུ་ཀ་ཡབ་ཡུམ། ཤར་ཏུ་བཛྲ་ཧེ་རུ་ཀ་ཡབ་ཡུམ། ལྷོར་རཏྣ་ཧེ་རུ་ཀ་ཡབ་ཡུམ། ནུབ་ཏུ་པདྨ་ཧེ་རུ་ཀ་ཡབ་ཡུམ། བྱང་དུ་ཀརྨ་ཧེ་རུ་ཀ་ཡབ་ཡུམ། རང་གི་ཀླད་པའི་དབུས་སུ་བུདྡྷ་ཧེ་རུ་ཀ་ཡབ་ཡུམ་ཐོན་ནས་རང་ལ་འཆར་རོ། །དེ་ལ་མ་སྐྲག་ཅིག །མ་སྔངས་ཤིག །མ་འཇིགས་ཤིག །ཅེས་པ་དང་། ཕྱོགས་བཞི་ཀར་ངོ་སྤྲད་དོ། །ཁྲག་འཐུང་གི་

ལྷ་ཚོགས་འདི་རྣམས་སྐུ་ཆེ་ལ་ཡན་ལག་རགས་པ་ནམ་མཁའ་དང་མཉམ་པར་འཆར་རོ། །དེའི་ཚེ་རང་སྣང་དུ་ངོ་ཤེས་པར་གྱིས་ཤིག །ཡི་དམ་གྱི་ལྷ་རུ་ངོ་ཤེས་པར་གྱིས་ཤིག །མ་སྐྲག་ཅིག །མ་སྔངས་ཤིག །མ་འཇིགས་ཤིག །ཀྱཻ་རིགས་ཀྱི་བུ། རང་གི་ཀླད་པའི་ནང་གི་ཕྱི་རོལ་ན། ཀཽ་རཱི་མ་མོ་བརྒྱད་ཐོན་ནས་རང་ལ་འཆར་དུ་འོང་ངོ་། །དེ་ལ་མ་འཇིགས་ཤིག །རང་གི་ཀླད་པའི་ཤར་ནས་ཀཽ་རཱི་དཀར་མོ་གཡས་ན་ཞིང་དབྱུག །གཡོན་པས་བྷནྡྷ་དམར་གྱིས་བཀང་བ་བསྣམས་ནས་རང་ལ་འཆར་རོ། །དེ་ལ་མ་འཇིགས་ཤིག །དེ་ལྟར་གཞུང་ནས་ཀཽ་རཱི་བརྒྱད་དང་། སེང་ཧ་བརྒྱད་དང་། སྒོ་མ་བཞི་དང་། དབང་མོ་ཉེར་བརྒྱད་ལ་སོགས་པ་ཀུན་ལ་ངོ་སྤྲད་དོ། །དེ་ནས་ཞི་ཁྲོའི་སྨོན་ལམ་གདབ་བོ། །བསྔོ་བ་ལ་སོགས་པ་བྱའོ། །ཞི་ཁྲོའི་ངོ་སྤྲོད་དེ་དག་ཐམས་ཅད་ཀྱང་། རབ་ལ་ཆ་ལུགས་ཇི་ལྟ་བ་བཞིན་བྱ། དེ་མ་འཛོམ་ན་སྐུ་འདྲ་ཆེན་པོ་འམ་ཐང་ཀ་ལ་སོགས་ལ་ངོ་སྤྲད་དོ། །འོད་ལམ་ཡང་ཡེ་ཤེས་ལྔ་ལ་ཆོས་གོས་སོ་སོའི་ཁ་དོག་ལ། མེ་ལོང་ཆེ་ཆུང་ལྔ་ཙམ་མང་དུ་བསྒྲིག །ལྷན་སྐྱེས་ཡེ་ཤེས་ཀྱི་འོད་ལམ་ཡང་དར་སྣ་གཤིབས་པ་ལ་མེ་ལོང་གིས་སྤྲས་པ། དེ་མ་འཛོམ་ན་རས་སམ་ཤོག་གུ་ལ་སོ་སོའི་ཚོན་གྱིས་བྱུགས་ཤིང་། ཐིག་ལེ་དང་ཐིག་ཕྲན་གྱིས་སྤྲས་པ། ལྷན་ཅིག་སྐྱེས་པའི་འོད་ལམ་ལ་ཡང་ཚོན་སྐུད་སྦྲེལ་བ་ལྟ་བུ་བྲིས་ལ། ཐིག་ལེ་དང་ཐིག་ཕྲན་གྱིས་སྤྲས་པ་བྱ། དེ་ཡང་ངོ་སྤྲོད་ལ་མེད་ཐབས་མེད་པའི་རྫས། རྡོ་རྗེ་སེམས་དཔའི་གསལ་བྱེད་ཐུགས་ཀྱི་མེ་ལོང་ཞེས་བྱ་བ། མན་ཤེལ་ཟུར་མང་ལ་སྐྱོན་མེད་པ་སྒོ་མ་འགགས་པར་གསལ་བ། རབ་ཁྲུ་གང་། འབྲིང་མཐོ་གང་། ཐ་མ་ཡང་ཚོན་གང་པ་ཡན་ཆད་བཅང་བར་བྱའོ། །གཞན་ཡང་ངོ་སྤྲོད་ལ་དགོས་པའི་རྫས་དང་ཡོད་བྱད་ཆེ་འབྲིང་ཆུང་སོགས་ཐམས་ཅད་ཚང་བར་བསོག་ཅིང་། བླ་མ་ཡི་དམ་

མཁའ་འགྲོ་ཆོས་སྐྱོང་ཡུལ་ལྷ་གཞི་བདག་དང་བཅས་པ་ལ་ཚོགས་དང་གཏོར་མས་དགྱེས་པ་བསྐང་ཞིང་། སློབ་མ་ཡང་ཆོས་ཁྲིད་མ་ཐོབ་པ་རྣམས་ལ་མི་བྱེད་དོ། །སྔར་གོང་ནས་དབང་ཁྲིད་ཐོབ་པ་རྣམས་ལ་རུང་ངོ་། །གནད་ཟབ་མོ་རྣམས་ལ། ལོང་མེད་དང་། བྲེལ་སྟབས་དང་། བསླུ་ཆོས་དང་། ཚོད་ཡོད་ཀྱི་དབང་དུ་མ་སོང་བར། དཔོན་སློབ་ཐམས་ཅད་ཀྱི་ལུས་ངག་ཡིད་གསུམ་དལ་བའི་ངང་ནས་ངོ་སྤྲད་པར་བྱའོ། །དེ་ཡང་དུས་ནི། སྤྲིན་དང་ན་བུན་རླུང་འཚུབས་ལ་སོགས་པ་མེད་ཅིང་། ནམ་མཁའ་རྐྱེན་བྲལ་ཤིན་ཏུ་དངས་པ་དང་སྐབས་བསྟུན་པ་ནི་གནད་ཟབ་མོ་ཡིན་ནོ། །དེ་ཡང་སྔ་དྲོའམ། ཕྱི་དྲོ་གང་རུང་ལ་འབད་པར་བྱའོ། །ནུབ་མོ་མར་མེ་ལ་ངོ་སྤྲད་པ་ནི། སྟེགས་བུའི་ཁར་མར་མེ་ཉི་ཤུ་རྩ་གཞིའི་རྡེའུ་ཉི་ཤུ་རྩ་བརྒྱད་ཅེས་བྱ་མཆན། བརྒྱད་བཤམས་ལ། མན་ཤེལ་ལ་བལྟས་ནས་ངོ་སྤྲོད་པ་ནི། སློབ་དཔོན་གྱིས་འདི་སྐད་དོ། །ཀྱཻ་རིགས་ཀྱི་བུ་རྣམས་འོག་ཞི་བའི་དཀྱིལ་འཁོར་སྟེང་ཁྲོ་བོའི་དཀྱིལ་འཁོར་ཡིན། བརྡའ་མིག་གིས་མཐོང་བ་ཡིན། རང་འཆི་བའི་དུས་སུ་ཆོས་ཉིད་བར་དོར་འོད་གསལ་གྱི་དཀྱིལ་འཁོར་འདི་འདྲ་འཆར་རོ། །དེ་ཡང་ཆེ་བས་ནམ་མཁའ་ཁེབ་པ། འབྲིང་རི་བོ་མཆོག་རབ་ཙམ། ཆུང་བ་ཕུབ་ཙམ་དུ་འཆར་བས་དེ་ཡང་རང་སྣང་དུ་ངོ་ཤེས་པར་གྱིས་ཤིག །མདུན་གྱི་ནམ་མཁར་མར་མེ་ལྔ་བརྩེགས་ལ་སོགས་པ་འཇའ་འོད་ཟེར་དང་བཅས་པ་མཐོང་བ་ལྟར། ད་ལྟར་རང་གི་སྙིང་གར་ཞི་བའི་དཀྱིལ་འཁོར་བཞི་བཅུ་རྩ་གཉིས་གནས་ཤིང་སྙིང་ནང་དུ་ཉི་ཤུ་རྩ་བརྒྱད། ཕྱོགས་བཞིའི་སྒོ་བ་ཡབ་ཡུམ་བརྒྱད། ཐུབ་དྲུག་ནི་གནས་དྲུག་ཏུ་བཞུགས་སོ། །ཞི་བ་གནས་འགྱུར་གྱི་ཁྲོ་བོ་ཞེས་བྱ་བ། ཐོད་པའི་འོག་ཀླད་པའི་སྟེང་། ཀླད་རྒྱའི་མཚམས་ན་འབར་བ་ལྔ་བཅུ་རྩ་བརྒྱད་བཞུགས་སོ། །བར་དོའི་སྐབས་སུ་ཡེ་ཤེས་རྣམ་པ་ལྔའི་བདག་

ཉིད་ཞི་ཁྲོའི་ལྷ་ཚོགས་ཐམས་ཅད་འོད་དང་ཟེར་དུ་འཆར་བའི་དུས་སུ་རང་སྣང་ལས་བྱུང་བ་ཡིན་པས། ངོ་ཤེས་པར་གྱིས་ཤིག །མ་འཇིགས་ཤིག །མ་སྔངས་ཤིག །རང་སྣང་ཆོས་ཉིད་ཀྱི་དཀྱིལ་འཁོར་དུ་ངོ་ཤེས་པར་གྱིས་ཤིག །ཅེས་ངོ་སྤྲད་དོ། །རྟགས་ཀྱི་ངོ་སྤྲད། བྲེ་གུ་དང་། ཙཀྵུ་ལ་ངོ་སྤྲད་པ་ནི། ད་ལྟ་ཡང་ཞི་ཁྲོ་རང་ལུས་ལ་གནས་པའི་རྟགས་སུ། མིག་གཉིས་ཀྱི་མགོ་མཇུག་མཛུབ་མོས་མནན་པས། རང་གི་འོད་ཁྲ་ཆིལ་ཆིལ་འཆར་བར་འགྱུར་རོ། །དེ་ཡེ་ཤེས་ཀྱི་རང་འོད་ལྷར་བཅས་ལུས་ལ་གནས་པའི་བརྡའོ། །ཕྱིས་ཆོས་ཉིད་ཀྱི་བར་དོར་འཆར་བར་འགྱུར་རོ། །ཡང་ལག་མཐིལ་གྱིས་མིག་གཉིས་ཤེད་ཆེར་མནན་པས་ཟེར་མཚོན་ཆའི་རྩེ་མོ་གཟེངས་པ་ལྟར་འཆར་རོ། །ཕྱིས་ཆོས་ཉིད་ཀྱི་བར་དོར་འཆར་བའི་རྟགས་སོ། །ཆོས་ཉིད་ཀྱི་རང་སྒྲ་གླང་པོ་ཆེའི་འུར་སྒྲ་ལ་ངོ་སྤྲད་པ་ནི༔རྣ་བའི་བུག་པ་གཉིས་མཛུབ་མོ་གཉིས་ཀྱིས་མནན་པས་སྒྲ་འུ་རུ་རུ་གྲགས་པ་ནི་ཆོས་ཉིད་རང་སྒྲ་འབྲུག་སྟོང་ལྡིར་བ་ཙམ་ཅིག་ད་ལྟར་རང་ལ་གནས་པའི་བརྡའོ། །ཕྱིས་ཆོས་ཉིད་བར་དོར་འཆར་བས་སྒྲ་ཐམས་ཅད་རང་སྒྲར་ངོ་ཤེས་པར་གྱིས་ཤིག །ཅེས་ངོ་སྤྲད་དོ། །མར་མེ་བསྡུ་ཞིང་སྨོན་ལམ་བྱའོ། །དེ་ནས་བར་དོར་གཞི་སྣང་ཡེ་ཤེས་ཀྱི་ངོ་བོར་ངོ་སྤྲད་པ་ནི། གནས་ཁང་ཤིན་ཏུ་ངམ་ནག་པ་ལ། ཉི་ཞུར་འཆར་བའི་བུ་ག་ནི་མདུང་ཤིང་ཙམ་གྱིས་ཕུག་པ་ལ། ཉི་ཟླའི་ཟེར་ཐག་སེང་བ་དེ་ལ་མེ་ལོང་ཟེད་པར་བྱའོ། །ཤེལ་ཀྱང་ཉི་ཟེར་དེ་ལ་བསྒྲིལ། མུན་ཁང་འཇའ་ཡིས་གང་ནས་འོང་ངོ་། །དེའི་དུས་སུ་གཉིད་ལོག་གི་འཕར་རྩ་མནན་པ་དང་། གར་གིང་ཁྲོ་འབག་མང་པོའི་བྱེད་ཚུལ་ཐམས་ཅད་ནི། ཤེལ་རྡོ་ངོ་སྤྲོད་མཐོང་བ་རང་གྲོལ་ལྟར་རྒྱས་པར་བྱའོ། །དེ་ནས་སྐུ་གསུམ་ངོ་སྤྲོད་ཀྱང་ལོང་ཁྱབ་དང་

བསྟུན་ལ་བྱའོ། །དེ་དག་ནི་བར་དོར་གཞི་རང་སྣང་གི་ངོ་སྤྲོད་དོ། །དེ་དག་ཐམས་ཅད་ཀྱིས་ཆོས་ཉིད་བར་དོ་ལ་ངོ་སྤྲད་པ་རྣམས་ཐལ་ལོ། །ད་ནི་ཆོས་ཡིད་ལ་མི་དྲན་ཅིང་། དགེ་སྡིག་འཆོལ་ཉོག་ཏུ་སྤྱོད་པ་རྣམས་ལ་སྲིད་པ་བར་དོ་ལ་ངོ་སྤྲད་པ་ནི། ཁྲིའི་སྟེང་ན་འགྲོ་བ་རིགས་དྲུག་གི་འོད་ལམ་དྲུག་བཀྲམ་ལ། ལོང་སྐབས་བྱུང་ན་ཤེལ་རྡོ་ཡང་དུས་ལ་བབས་པའི་ཚེ་བལྟ་རུ་བཅུག་གོ །སྲིད་པ་བར་དོའི་ཐོས་གྲོལ་ཆེན་མོར་ཇི་ལྟར་གསུངས་བཞིན་དུ་ངོ་རྒྱས་པར་སྤྲད་པར་བྱའོ། །དེའི་ནུབ་མོ་སྲིད་པ་བར་དོའི་ངོ་སྤྲོད་དགེ་སྡིག་རང་གཟུགས་སྟོན་པའི་གདམས་པ་སྲིད་པ་རང་གྲོལ་གྱི་གཞུང་ལྟར་ངོ་སྤྲོད་རྒྱས་པར་བྱ་བ་ནི་གལ་ཆེའོ། །དེ་དག་ཐམས་ཅད་དྲིལ་བས་ཆོས་ཡིད་ལ་མི་དྲན་ཅིང་། དགེ་སྡིག་འཆོལ་ཉོག་ཏུ་སྤྱོད་པ་རྣམས་ལ་སྲིད་པ་བར་དོའི་སྣང་ཚུལ་ངོ་སྤྲོད་པའོ། །དེ་ལྟར་ངོ་སྤྲོད་ཀྱི་རིམ་པ་རྣམས་ཀྱང་བསླབ་བྱ་དང་ལྡན་པར་བྱ་ཞིང་། སློབ་མ་རྣམས་ཀྱིས་བླ་མ་ལ་མཎྜལ་ཕུལ་ཞིང་བླ་མ་ལ་དགྱེས་པ་བསྒྲུབ། བླ་མས་ཀྱང་དད་ལྡན་དང་བ་འདྲེན་པའི་སྤྱོད་ལམ་དང་ལྡན་པས། སློབ་མ་རྣམས་ཀྱི་ཤེས་རྒྱུད་འབོལ་ཆིལ་གྱིས་མ་སོང་བར་དུ་ཐབས་ཀྱིས་ངོ་སྤྲད་ཅིང་སྲང་ལ་འཇུག་པར་བྱའོ། །ཟབ་ཆོས་ཞི་ཁྲོ་དགོངས་པ་རང་གྲོལ་ལས། བར་དོ་ཐོས་གྲོལ་གྱི་ངོ་སྤྲོད་མཐོང་བ་རང་གྲོལ་གྱི་ལག་ལེན་རྣམས། མཚུངས་མེད་གུ་རུ་རཏྣ་སུརྱ་ཙནྡྲ་རསྨིའི་ཞལ་གྱིས་གསུངས་པའི་བདུད་རྩི་ལ་བརྟེན་ཅིང་། ཅུང་ཟད་ཙམ་ཡིད་ལ་མ་དྲན་པ་རྣམས་བར་དོ་གསང་སྐོར་ནས་བཏུས་ཤིང་། རང་བཟོ་ནི་གཅིག་ཀྱང་མི་དམིགས་པའི་ཟིན་བྲིས་འདི་གུ་རུ་པདྨའི་མཚན་ཅན་གྱི་གསུང་ཆོས་ལ་བརྟེན་ནས། བློ་དམན་རྣམས་ཀྱི་དོན་དུ་དུས་མཐའི་བཙུན་པ་རྒྱ་ར་བ་ནམ་མཁའ་ཆོས་ཀྱི་རྒྱ་མཚོས་རྟ་ལོ་ཟླ་བ་ལྔ་པ་ལ། སྨན་མོ་བཀྲ་ཤིས་རྫོང་གི་ཡང་དབེན་དུ་བྲིས་པ་འདིས་སངས་རྒྱས་ཀྱི་བསྟན་པ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་ཤིང་། སེམས་

ཅན་ཐམས་ཅད་བར་དོ་རང་ངོ་ཤེས་ནས་མྱུར་དུ་མངོན་པར་རྫོགས་པར་འཚང་རྒྱ་བར་གྱུར་ཅིག །མངྒ་ལམ། བྷ་ཝནྟུ།