ཀླད་ཀྱི་དོན།
བདེ་བར་གཤེགས་པའི་བསྟན་བའི་གསལ་བྱེད་ཆོས་ཀྱི་འབྱུང་གནས་གསུང་རབ་རིན་པོ་ཆེའི་མཛོད་ཅེས་བྱ་བ་བཞུགས་སོ།།
བདེ་བར་གཤེགས་པའི་བསྟན་བའི་གསལ་བྱེད་ཆོས་ཀྱི་འབྱུང་གནས་གསུང་རབ་རིན་པོ་ཆེའི་མཛོད་ཅེས་བྱ་བ། བཅོམ་ལྡན་འདས་ཤཱཀྱ་སེང་གེ་ལ་ཕྱག་འཚལ་ལོ། །
གང་ཞིག་ཐུགས་བསྐྱེད་དགེ་ཚོགས་བདུད་རྩིའི་ཟས་ཅན་ལས་བྱུང་བརྣག་དཀའི་བཟོད་པས་གཟི་དཔལ་འབར་བ། །སྐུ་གསུམ་མཐར་ཕྱིན་རིན་ཆེན་རང་བཞིན་དཔག་ཡས་སྨོན་ལམ་མྱུར་འགྲོ་བདུན་ལྡན་གཟུང་འཛིན་གོས་བྲལ་བས། །སྒྲིབ་གཉིས་ཆུ་འཛིན་བྲལ་བའི་བྱ་ལམ་ཡངས་པར་ཁྲིད་ཅིང་འཆར་ནུབ་བགྲོད་ཚུལ་སྣ་ཚོགས་གཞན་དོན་ཅན། །དྲི་མེད་གསུང་ཟེར་ཚ་ཟེར་བྱེད་པའི་འོད་ཟེར་བྱེ་བ་བརྒྱ་ཕྲག་སྟོང་ལྡན་ཕྱོགས་ཕྱོགས་འཕྲོས་པ་ལས། །རབ་བྱུང་སྦྱིན་དགྲ་ཡིད་ཀྱི་སྲུབས་ཤིང་གཙུག་ན་ཟླ་བ་ལོག་འདྲེན་སྐེམ་བྱེད་མིག་སྟོང་འཚོ་བྱེད་སོགས། །སྲིད་གསུམ་འདི་ན་སྟོན་པར་ཁས་འཆེ་ཆེ་བར་མངོན་རློམ་འོད་ལྡན་གཟའ་ཚོགས་གཟི་བརྗིད་ཀུན་འཇོམས་པ། །ཐུབ་པ་སེར་སྐྱ་རྐང་མིག་པ་དང་རིག་བྱེད་གཞུང་འཛིན་ནམ་མཁའི་གོས་ཅན་ཚུ་རོལ་མཛེས་པ་བ། །རྒྱས་པ་རྔ་བོང་གྲོག་མཁར་བ་སོགས་འབྱུང་པོའི་བྱ་ཚོགས་འདྲེན་བྱེད་ཉམས་བྱེད་རྒྱུ་བ་ཀུན་གཅོད་ཅིང་། །གང་དུ་ཤར་བས་བལྟ་བར་འདོད་དང་དྲི་བསུང་དོན་གཉེར་དབང་པོ་ཚིམ་བྱེད་སྦྲང་རྩིའི་མཆོག་འདོད་པའི། །མངོན་མཐོའི་སྣོད་གྱུར་ཉན་ཐོས་རང་རྒྱལ་རྒྱལ་སྲས་བུང་བ་དྲེགས་པས་མྱོས་པའི་དར་དིར་སྒྲོག་རྣམས་ལ། །མཐོ་རིས་ཟེ་འབྲུའི་ཕྲེང་ལྡན་ཁ་ཕྱེ་ཉེར་ཞིའི་དྲི་བསུང་ཕྱོགས་བཅུར་འཕྲོས་པས་མྱོས་པའི་རྐང་དྲུག་འཁྲིགས། །དོན་གཉིས་མཐར་ཕྱིན་ཀུན་མཁྱེན་སྦྲམ་རྩི་ཀུན་ནས་སྐྲུན་བྱེད་ནམ་མཁའི་ནོར་བུ་རྒྱལ་བ་རྒྱལ་གྱུར་ཅིག །གང་ཞིག་འཁྲུལ་བ་མཐའ་དག་སྤངས་ཀྱང་རྟག་ཆད་སྨྲ་བའི་ལྟ་བ་ངན་པ་གཞོམ་པ་དང་། །བསྟོད་སྨད་ལ་སོགས་ཆོས་བརྒྱད་སྤངས་ཀྱང་དཀར་ཕྱོགས་ལྷ་རྣམས་འཕྱ་བ་སྤང་བར་བྱ་བ་དང་། །རྗེས་སུ་ཆགས་པ་མཐའ་དག་སྤངས་ཀྱང་འགྲོ་ལ་ཆགས་པས་བསྟན་པ་ཡུན་དུ་གནས་བྱའི་ཕྱིར། །ཆོས་རྣམས་ངག་གི་ཡུལ་ལས་འདས་ཀྱང་ངག་གི་ཕྲེང་བས་ཆོས་རྣམས་སྡུད་མཛད་སྤྱི་བོས་མཆོད། །རྒྱལ་བ་མཆོག་གིས་མཆོག་ཏུ་ལུང་བསྟན་བསྟན་པ་དར་མཛད་མཛད་པ་དྲི་མེད་མངའ། །མངའ་བདག་དམ་པའི་དམ་པའི་ཆོས་ཀུན་ཀུན་ཏུ་གཟུང་ཕྱིར་ཐེག་པ་གསུམ་གྱི་ཚུལ། །ཚུལ་བཞིན་རབ་སྟོན་སྟོན་པའི་གསུང་རབ་རབ་ཏུ་གསལ་བྱེད་བློ་མཆོག་མངའ་བའི་ཐུགས། །ཐུགས་རྗེས་ དགོངས་འགྲེལ་འགྲེལ་བཤད་བཤད་པ 
་མ་ནོར་སྟོན་པ་འཕགས་པའི་ཚོགས་ལའང་འདུད། །
ཀུན་མཁྱེན་རྒྱལ་བའི་གངས་རི་ལས་འོངས་ཤིང་། །སྡུད་བྱེད་དམ་པའི་གསུང་རྒྱུན་རབ་བལྟམས་པས། །འགྲེལ་བཤད་འདབ་སྟོང་ལྡན་པས་བརྒྱན་པའི་མཚོ། །ལེགས་བསྒྱུར་ལོ་པཎ་སྐྱེས་མཆོག་གཙུག་གིས་མཆོད། །བསླབ་གསུམ་གསེར་གྱི་དྲ་བས་ལེགས་གཡོགས་ཤིང་། །བསྡུ་བཞིའི་ཡན་ལག་ལེགས་སྐྱེས་མཆེ་བ་བརྟན། །འཆད་རྩོད་རྩོམ་པས་ཕས་རྒོལ་གཡུལ་ལས་རྒྱལ། །ལག་ལྡན་བོད་ཀྱི་མཁས་མཆོག་རྣམས་ལ་འདུད། །གསུང་རབ་རིན་ཆེན་ཁམས་ལས་ལེགས་གྲུབ་ཅིང་། །རྣམ་དཔྱོད་ལྟ་བའི་བྱིན་ཟས་ལེགས་སྦྱངས་ཏེ། །བརྡ་སྤྲོད་ཚིག་གི་དར་གྱིས་རབ་བརྒྱན་ནས། །བདག་བློའི་ཐེ་ཚོམ་དྲ་བ་གཅོད་མཛད་པའི། །རལ་གྲི་རིན་ཆེན་ལྟ་བུའི་བླ་མའི་ཚོགས། །ཡོན་ཏན་ཁུར་གྱིས་ལྕི་བ་བཅུ་ཕྲག་གཉིས། །ཁྱད་པར་བཀའ་དྲིན་ཆེ་བའི་སློབ་དཔོན་དྲུག །རྒྱུན་དུ་དད་པའི་ཡིད་ཀྱིས་སྐྱབས་སུ་མཆི། །མ་ལྟར་བརྩེ་བའི་བླ་མས་ལེགས་བསྐྱངས་ཤིང་། །མི་ཡི་སེང་གེའི་གསུང་རབ་པདྨོའི་ཚལ། །མེ་ཏོག་ལ་དགའི་བུང་བ་ལྟར་བསྟེན་པས། །མུ་མཐའ་ཡས་པའི་ཆོས་ལ་བློ་གྲོས་རྒྱས། །དེ་ལྟས་བདག་ཀྱང་ཤཱཀྱའི་གསུང་རབ་མཚོ། །གཏིང་མཐའ་ཡས་པར་བརྒལ་བར་འདོད་པ་ཡིན། །དེ་ཡི་གཏིང་མཐའ་རྟོགས་པར་མ་ནུས་ཀྱང་། །ངོ་མཚར་དོན་གྱི་རིན་ཆེན་ཅིས་མི་རྙེད། །རྙེད་ཀྱང་དབུལ་པོའི་ལག་གི་རིན་ཆེན་ལྟར། །བདག་གི་ལེགས་བཤད་དྲི་མ་མེད་པ་འདི། །འགྲན་འདོད་ཕྲག་དོག་སྡང་སེམས་ཀྱིས་བསྒྲིབས་ནས། །གཟུར་གནས་ཡིད་ཆེས་གནས་སུ་སུ་ཞིག་ལེན། །ལེན་པ་མེད་ཀྱང་དམ་ཆོས་བདུད་རྩི་ཡིས། །རང་གི་ཡིད་ཀྱི་ཟུག་རྔུ་ཅིས་མི་སེལ། །གལ་ཏེ་འགའ་ཞིག་ལེན་ན་དེ་དག་གི །གདུང་བའི་རིམས་ནད་འཇོམས་པར་མི་འགྱུར་རམ། །དེ་ཕྱིར་རང་བློའི་དབུལ་བ་བསལ་བ་དང་། །ཆོས་ལྡན་དོན་གཉེར་སྐྱེ་བོ་རྣམས་ལ་ཡང་། །རྒྱ་ཆེན་ཆོས་ཀྱི་དགའ་སྟོན་སྤེལ་སླད་དུ། །གསུང་རབ་རིན་ཆེན་མཛོད་ཀྱི་སྒོ་དབྱེའོ། །འདི་ནས་ཐེག་པ་ཆེ་ཆུང་སྣ་ཚོགས་ཀྱི། །
དགོངས་པ ་ནོར་བུ་མཆོག་དམན་སྣ་ཚོགས་འབྱུང་། །དེ་དག་ཁྱེད་ལ་གེགས་མེད་བྱིན་ཟིན་གྱིས། །དགའ་བའི་ཡིད་ཀྱིས་ཅི་འདོད་བླང་བར་གྱིས། །