ཆོས་ཀྱི་འཁོར་ལོ་བསྐོར་བའི་ཚུལ།
དེ་ནས་བཱ་ར་ཎ་སི་ལ་བྱོན་ནས། བསོད་སྙོམས་བཞེས་ཏེ། ཟས་ཀྱི་བྱ་བ་བྱས་ཏེ། དྲང་སྲོང་ལྷུང་བར་གཤེགས་སོ། །ལྔ་སྡེས་སྟོན་པ་འབྱོན་པ་མཐོང་སྟེ། དགེ་སྦྱོང་གོའུ་ཏ་མ། ལྷོད་པ་མང་དུ་ཟ་བ་སྤོང་བ་ལས་ཉམས་པ་འདི་འོང་གིས། །སུས་ཀྱང་བསུ་བར་མི་བྱ། ལྡང་བར་མི་བྱ། ཆོས་གོས་དང་ལྷུང་བཟེད་བླང་བར་མི་བྱ། སྟན་ལྷག་པ་འདི་ལ་འདོད་ན་འདུག་ཅིག་ཟེར་བའི་འོག་ཁྲིམས་བཅས་ཏེ། ཀུན་ཤེས་ཀྱིས་སེམས་ཀྱིས་ཁས་མ་བླངས་སོ། །དེ་ལྟར་སྟོན་པ་བྱོན་པ་དང་ལྔ་སྡེས་མ་བཟོད་ནས། ཁྲིམས་དྲལ་ཏེ་སྟན་ལས་ལངས་ཏེ། ལ་ལས་བསུ། ལ་ལས་གདན་གཏིང་། ལ་ལས་ཞབས་བཀྲུ་བའི་ཆུ་བཤམས་ནས། ཁྱོད་ལེགས་པར་བྱོན་ཏོ། །གདན་འདི་ལ་བཞུགས་སུ་གསོལ་ཞེས་གསོལ་པ་དང་། སྟོན་པས་གདན་ལ་བཞུགས་ནས་ལྔ་སྡེ། མགུ་བར་བྱ་བའི་ཕྱིར་གཏམ་མང་པོ་བྱས་ཏེ། ལྔ་སྡེས། ཚེ་དང་ལྡན་པ་གཽ་ཏ་མ། དབང་པོ་གསལ་ལ། པགས་པ་ནི་ཡོངས་སུ་དག་ན། ཡེ་ཤེས་མཐོང་བའི་ཁྱད་པར་མངོན་དུ་མཛད་དམ། བཀའ་སྩལ་པ། ཁྱོད་དེ་བཞིན་གཤེགས་པ་ལ་ཚེ་དང་ལྡན་པ་མ་ཟེར་ཅིག །ཡུན་རིང་པོར་མི་བདེ་བར་གྱུར་ཏ་རེ། ངས་ནི་བདུད་རྩི་ཐོབ་བོ། །སངས་རྒྱས་སོ། །ཐམས་ཅད་མཁྱེན་པའོ། །ཁྱེད་ཅག་གིས་འོག་ཁྲིམས་འདི་ལྟར་མ་བཅས་སམ། ཞེས་བཀའ་སྩལ་པས་དེ་དག་དགེ་སློང་དུ་གྱུར་ཏེ། སྟོན་པའི་ཞབས་ལ་གཏུགས་ཏེ་ཉེས་པ་བཤགས་ནས་གུས་པ་བསྐྱེད་དོ། །སྟོན་པས་སྐུ་བསིལ་ནས། གང་དུ་ཆོས་འཁོར་བསྐོར་སྙམ་པ་དང་། ཕྱོགས་དེར་རིན་ཆེན་སྣ་བདུན་གྱི་ཁྲི་སྟོང་བྱུང་བའི་གསུམ་ལ་སྐོར་བ་བྱས་ཏེ། བཞི་པ་ལ་བཞུགས་ནས། འོད་ཀྱིས་སྟོང་གསུམ་སྣང་བར་གྱུར་ཅིང་། ས་གཡོས། སེམས་ཅན་རྣམས་དག་པར་བྱས་སོ། །དེ་ནས་ལྷ་རྣམས་ཀྱིས་གསེར་གྱི་འཁོར་ལོ་རྩིབས་སྟོང་དང་ལྡན་པ་ཕུལ་ནས་ཆོས་ཀྱི་འཁོར་ལོ་བསྐོར་བར་གསོལ་པ་དང་། ནམ་གྱི་ཆ་སྟོད་ལ་ཅང་མི་གསུང་བ་དང་། གུང་ཐུན་ལ་ཡང་དག་པར་འཆག་པའི་གཏམ་དང་། ཆ་སྨད་ལ་ལྔ་སྡེ་ལ་བཀའ་སྩལ་པ། དགེ་སློང་དག །མཐའ་གཉིས་པོ་འདི་དག་ནི་རབ་ཏུ་བྱུང་བའི་འཇུག་པར་བྱ་བ་མ་ཡིན་ཏེ། འདོད་པ་བསོད་ཉམས་དང་། ངལ་ཞིང་དུབ་པའི་མཐའོ། །མཐའ་གཉིས་སྤངས་ནས་དབུ་མའི་ལམ་གྱིས་དེ་བཞིན་གཤེགས་པ་ཆོས་སྟོན་ཏེ། འདི་ལྟ་སྟེ། འཕགས་པའི་ལམ་ཡན་ལག་བརྒྱད་པོ། དགེ་སློང་དག་འདི་ནི་བདེན་པ་བཞི་སྟེ། སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་མོ། །ཞེས་སོགས་དང་། སྡུག་བསྔལ་ནི་ཡོངས་སུ་ཤེས་པར་བྱའོ། །ཀུན་འབྱུང་ནི་སྤང་བར་བྱའོ། །ཞེས་སོགས་དང་། སྡུག་བསྔལ་ཡོངས་སུ་ཤེས་སོ། །ཀུན་འབྱུང་སྤངས་སོ། །ཞེས་སོགས་ཏེ། བདེན་པ་བཞི་ལན་གསུམ་བཟླས་པས། རྣམ་པ་བཅུ་གཉིས་ཀྱིས་འཁོར་ལོ་བསྐོར་བས། ཀཽ་ཎྜི་ནྱས་དགྲ་བཅོམ་སྟེ་དཀོན་མཆོག་གསུམ་གྲུབ་བོ། །དེ་ལྟར་རྣམ་པ་བཅུ་གཉིས་ཀྱིས། །ཆོས་ཀྱི་འཁོར་ལོ་རབ་བསྐོར་བ། །ཀཽ་ཎྜི་ནྱ་ཀུན་ཤེས་ཏེ། །དཀོན་མཆོག་གསུམ་ནི་མངོན་པར་གྲུབ། །ཅེས་སོ། །ཆོས་ཀྱི་འཁོར་ལོ་འདི་ལའང་། གནས། དུས། འཁོར། ཆོས། དགོས་པ་སྟེ། ལྔ་ལྔས་འཆད་གསུང་བས། དང་པོ་ཁོར་མོ་འཇིག་གོ། དུས། ཁ་ཅིག་ལོ་དྲུག་ཟླ་དྲུག་གོ་ཟེར་རོ། །མཆིམས་པ་ན་རེ་ལོ་བདུན་ཟེར་རོ། །ཆག་ན་རེ་ལོ་བདུན་དུ་ཟླ་བ་གཉིས་ཀྱིས་མ་ཚང་བའོ་ཞེས་ཟེར་རོ། །འཁོར་ནི་ཀཽ་ཎྜི་ནྱ། རྟ་ཐུལ། རླངས་པ། མིང་ཆེན། བཟང་ལྡན་ཏེ་མི་ལྔ། ལྷའི་འཁོར་མང་པོའོ། །ཆོས་བདེན་པ་བཞི་ལན་གསུམ་བཟླས་པ། རྣམ་པ་བཅུ་གཉིས་ཀྱི་འཁོར་ལོ་སྟེ། མཛོད་ལས། ཆོས་དཀྱིལ་འཁོར་ལོ་མཐོང་བའི་ལམ། །མྱུར་བར་འགྲོ་སོགས་རྩིབས་སོགས་ཀྱིས། །ཤེས་ཏེ་མཐོང་ལམ་ནི་འཁོར་ལོ་དང་མྱུར་དུ་འགྲོ་བ་དང་། འདོར་བ་དང་། འཇུག་པའི་ཕྱིར་དང་། མ་རྒྱལ་བ་ལས་རྒྱལ་བར་བྱེད་པ་དང་། རྒྱལ་བ་རྣལ་དུ་འགོད་པའི་ཕྱིར་དང་། འཕར་བ་དང་འབབ་པའི་ཕྱིར་ཆོས་མཐུན་པས་ཆོས་ཀྱི་འཁོར་ལོའོ། །བཙུན་པ་དབྱངས་སྒྲོག་ན་རེ། འཕགས་ལམ་ཡན་ལག་བརྒྱད་ཀྱི་ལྟ་བ་རྟོག་པ་རྩོལ་བ་དྲན་པ་རྣམས་རྩིབས། ངག །ལས་མཐའ། འཚོ་བ་གསུམ་ལྟེ་བ། ཏིང་ངེ་འཛིན་མུ་ཁྱུད་དང་ཆོས་མཐུན་པས་འཁོར་ལོའོ། །མཐོང་ལམ་ཆོས་ཀྱི་འཁོར་ལོ་ཡིན་ཏེ། ཀཽ་ཎྜི་ནྱ་ལ་དེ་སྐྱེས་པ་ལ་ཆོས་ཀྱི་འཁོར་ལོ་བསྐོར་ཞེས་གསུངས་སོ། །ལན་གསུམ་དུ་བཟླས་པ་ནི་འདི་ནི་སྡུག་བསྔལ་ལོ་ཞེས་སོགས་དང་། དེ་ཡོངས་སུ་ཤེས་པར་བྱའོ་ཞེས་དང་། དེ་ཡོངས་སུ་ཤེས་སོ་ཞེས་པའོ། །བཟླས་པ་རེ་རེར་མིག་སྐྱེས་སོ། །ཤེས་པ་དང་། རིག་པ་དང་། བློ་སྐྱེས་སོ། །ཞེས་སྦྱོར་བ་དང་། བར་ཆད་མེད་པ་དང་། རྣམ་གྲོལ་དང་། ཁྱད་པར་གྱི་ལམ་སྐྱེས་པར་བསྟན་པ་ནི་རྣམ་པ་བཅུ་གཉིས་སོ། །འོ་ན་བཟླས་པ་བཅུ་གཉིས་དང་རྣམ་པ་དྲུག་ཅུ་རྩ་བཞིར་འགྱུར་རོ་ཞེ་ན། གསུམ་ཚན་དང་བཅུ་གཉིས་ཚན་དུ་ཆོས་མཐུན་པའི་ཕྱིར་སྐྱོན་མེད་དོ། །བཟླས་པ་གསུམ་པོས་མཐོང་བསྒོམ་མི་སློབ་པ་གསུམ་བསྟན་ནོ་ཞེས་བྱེ་བྲག་དུ་སྨྲ་བ་ཟེར་རོ། །དེ་ལྟར་ན་ཆོས་ཀྱི་འཁོར་ལོ་ལན་གསུམ་བཟླས་པ་དང་རྣམ་པ་བཅུ་གཉིས་མ་ཡིན་པར་འགྱུར་ཏེ། མཐོང་ལམ་ཁོ་ན་ལན་གསུམ་བཟླས་པ་དང་རྣམ་པ་བཅུ་གཉིས་མ་ཡིན་པའི་ཕྱིར་རོ། །དེས་ན་ཆོས་ཀྱི་རྣམ་གྲངས་དེ་ཉིད་ཆོས་ཀྱི་འཁོར་ལོ་ཡིན་ཏེ་ལན་གསུམ་དུ་བཟླས་པ་ནི་བདེན་པ་རྣམས་ལན་གསུམ་དུ་བཟླས་པའོ། །རྣམ་པ་བཅུ་གཉིས་ནི་སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་མོ་ཞེས་པ་དང་། ཡོངས་སུ་ཤེས་པར་བྱ། སྤང་བར་བྱ། མངོན་དུ་བྱ། བསྒོམ་པར་བྱ། ཞེས་བྱ་བ་དང་། ཡོངས་སུ་ཤེས། སྤངས། མངོན་དུ་བྱས། བསྒོམས། ཞེས་པའོ། །བསྐོར་བ་ནི་གཞན་གྱི་རྒྱུད་ལ་གོ་བར་བྱེད་པའམ། ཤེས་པར་བྱེད་པའི་ཕྱིར་རོ། །དགོས་པ་ནི། བཟླས་པ་དང་པོ་ལ་ཀཽ་ཎྜི་ནྱ་དང་ལྷ་མང་པོ་ལ་མཐོང་ལམ་སྐྱེས། གཉིས་པ་ལ་ཀཽ་ཎྜི་ནྱས་དགྲ་བཅོམ། གཞན་བཞིས་མཐོང་ལམ་སྐྱེས། གསུམ་པ་ལ་ནི། བཞི་པོས་ཀྱང་དགྲ་བཅོམ་སྟེ་དངོས་ཀྱི་དགོས་པའོ། །བརྒྱུད ་པའམ་ཁྱད་པར་གྱི་དགོས་པ་གདུལ་བྱ་གང་ཟག་ཏུ་འཛིན་པ་ལས་བཟློག་ནས། འབྲས་བུ་བཞི་ལ་འགོད་པའོ། །