མཛད་པ་བཅུ་གཉིས།

ཐེག་ཆེན་གྱི་ལུགས་ཀྱིས་སངས་རྒྱས་རྣམས་འོག་མིན་དུ་སངས་རྒྱས་ནས་འདོད་ཁམས་སུ་མཛད་པ་བཅུ་གཉིས་སྟོན་པར་གསུངས་ཏེ། ལང་ཀར་གཤེགས་པར། འདོད་པའི་ཁམས་དང་གཟུགས་མེད་དུ། །སངས་རྒྱས་རྣམ་པར་འཚང་མི་རྒྱ། །གཟུགས་ཀྱི་ཁམས་ཀྱི་འོག་མིན་དུ། །འདོད་ཆགས་བྲལ་ཁྱོད་འཚང་རྒྱའོ། །ཞེས་པ་དང་། སྟུག་པོ་བཀོད་པའི་མདོ་ལས། སངས་རྒྱས་ཐམས་ཅད་འོག་མིན་དུ། །སངས་རྒྱས་མ་གྱུར་འདོད་ཁམས་སུ། །སངས་རྒྱས་མཛད་པ་མི་མཛད་དོ། །ཞེས་དང་། རྒྱུད་བླ་མར་ཡང་། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་ནས་ནི་འཕོ་བ་དང་། ལྷུམས་སུ་འཇུག་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་དགྱེས་རོལ་པ་དང་། །ངེས་འབྱུང་དཀའ་བ་སྤྱོད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་འཇོམས་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་སྤྲུལ་སྐུར་བཤད་པ་དང་། རྣམ་བཤད་རིགས་པར་ཡང་། བྲམ་ཟེའི་ཁྱེའུ་བླ་མ་ནས་བཟུང་སྟེ། ཡོངས་སུ་མྱ་ངན་འདས་པ་ཆེན་པོའི་བར་དུ་སྤྲུལ་པ་ཙམ་ཞིག་ཡིན་པར་བསྟན་པ་དེ་ལ་དགོས་པ་ཅི་ཡོད་ཅེ་ན། ཞེས་པའི་འགྲེལ་པར། བཅོམ་ལྡན་འདས་འོད་སྲུངས་ཀྱི་དུས་ན་བྲམ་ཟེའི་ཁྱེའུ་བླ་མ་ཚངས་པར་སྤྱོད་པ་ལ་གནས་པ་སྤྲུལ་པ་ཡིན་པར་བསྟན་ནོ། །དེ་ནས་དགའ་ལྡན་དུ་ཏོག་དཀར་པོར་སྐྱེས་པ་དང་། དེ་ནས་ཟས་གཙང་གི་སྲས་དོན་ཐམས་ཅད་གྲུབ་པར་བསྟན་པ་དང་། ཁབ་ན་བཞུགས་པ་དང་། ཁབ་ནས་ངེས་པར་བྱུང་ནས་རིང་འཕུར་ལ་སོགས་པ་ལ་བྱང་ཆུབ་ཀྱི་ལམ་ཚོལ་བ་ལ་ཞུགས་པ་དང་། རིམ་གྱིས་སངས་རྒྱས་ཏེ་ཆོས་ཀྱི་འཁོར་ལོ་བསྐོར་བ་དང་། དེ་ནས་རིམ་གྱིས་མྱ་ངན་ལས་འདས་པ་ཆེན་པོའི་བར་དུ། སྤྲུལ་པ་ཙམ་ཞིག་ཡིན་པར་བསྟན་ནོ། །ཞེས་འབྱུང་ཞིང་། ངག་གི་དབང་ཕྱུག་གྲགས་པས་ཀྱང་། དཔལ་ལྡན་སྟུག་པོ་བཀོད་པ་ཉིད་དུ་དོན་དམ་ཐུགས་ཆུད་ཅིང་། །དགའ་ལྡན་སྐྱེ་བོའི་དོན་མཛད་ཕྱིར་ནི་དམ་པ་ཏོག་དཀར་གྱུར། །དེ་ནས་འདིར་ནི་འགྲོ་བའི་དོན་དུ་ཤཱཀྱའི་ཏོག་གྱུར་གང་། །འཆི་བདག་ལས་རྒྱལ་སྒྱུ་མ་ཀུན་སྟོན་དེ་ནི་རྒྱལ་གྱུར་ཅིག །ཅེས་པ་ལ་སོགས་པ་མང་པོའི་བཞེད་པས། ཚོགས་རྫོགས་ནས་ས་བཅུ་པའི་སྲིད་པ་ཐ་མ་པའི་རྟེན་ལ་འོག་མིན་དུ་སངས་རྒྱས་ནས། གདོད་འདོད་ཁམས་སུ་མཛད་པ་བཅུ་གཉིས་སྟོན་པས། ཐམས་ཅད་སངས་རྒྱས་ཀྱི་མཛད་པར་འཆད་དོ། །ཤཱཀྱ་བཤེས་གཉེན་ལ་སོགས་པ་གསང་བ་འདུས་པའི་ལུགས་ཀྱིས། དཀའ་བ་སྤྱོད་པའི་དུས་སུ་རྣམ་སྨིན་གྱི་ལུས་ཆུ་བོ་ནེ་རན་ཛཱ་ན་རའི་འགྲམ་དུ་བཞག་ནས། ཡེ་ཤེས་ཀྱི་ལུས་འོག་མིན་དུ་ཕྱིན་ནས། ལོངས་སྤྱོད་རྫོགས་པའི་སྐུར་སངས་རྒྱས་ནས། སླར་ཡེ་ཤེས་དཀའ་བ་སྤྱོད་པའི་ལུས་ལ་ཞུགས་ཏེ། བྱང་ཆུབ་སྙིང་པོར་གཤེགས་པ་ལ་སོགས་པ་མཛད་པས། དཀའ་བ་སྤྱོད་པ་མན་ཆད་བྱང་སེམས། ཡན་ཆད་སངས་རྒྱས་སུ་འདོད་ལ། ལོ་ཙྪ་བ་ཆེན་པོ་སྤྲུལ་པའི་སྐུ་རིན་ཆེན་བཟང་པོས་ཀྱང་། སྔགས་ལོག་སུན་འབྱིན་དུ་དེ་ལྟར་བཤད་དོ། །དབུ་མ་པ་ཆོས་ཀྱི་བཤེས་གཉེན་ན་རེ། འོག་མིན་དུ་སངས་རྒྱས་ནས་འདིར་མཛད་པ་སྟོན་པ་ཐུབ་པ་འདི་ལྟ་བུ་དང་། འདོད་ཁམས་ཉིད་དུ་མཛད་པ་བཅུ་གཉིས་སྟོན་ཅིང་། སངས་རྒྱས་མངོན་དུ་བྱེད་པ་གཉིས་ཡོད་གསུང་ངོ་། །ཐེག་པ་ཐུན་མོང་བའི་ལུགས་ཀྱིས་མངོན་པ་ཀུན་ལས་བཏུས་སུ། དེ་བཞིན་གཤེགས་པ་བསམ་གྱིས་མི་ཁྱབ་པ་གང་ཞེ་ན། གང་དགའ་ལྡན་གྱི་གནས་ན་གནས་པ་ནས་བཟུང་སྟེ་ཡོངས་སུ་མྱ་ངན་ལས་འདས་པའི་བར་དུ། བྱང་ཆུབ་སེམས་དཔའི་སྤྱོད་པ་ཐམས་ཅད་དང་། སངས་རྒྱས་ཀྱི་སྤྱོད་པ་ཡང་འདོད་པའི་ཁམས་སུ་སྟོན་པའི་གང་ཟག་གོ། ཞེས་པའི་འགྲེལ་པར། བྱང་ཆུབ་སེམས་དཔའི་སྤྱོད་པ་ཐམས་ཅད་ཅེས་བྱ་བ་ནི། དགའ་ལྡན་གྱི་གནས་ན་གནས་པ་ནས་བཟུང་སྟེ། བདུད་ལས་རྒྱལ་བའི་བར་དུའོ། །སངས་རྒྱས་ཀྱི་སྤྱོད་པ་ཞེས་བྱ་བ་ནི་མངོན་པར་རྫོགས་པར་བྱང་ཆུབ་པ་ནས་བཟུང་སྟེ། ཡོངས་སུ་མྱ་ངན་ལས་འདས་པ་ཆེན་པོའི་བར་དུའོ། །ཞེས་སྒྲ་ཇི་བཞིན་པར་འཆད་དོ། །འདིར་རྒྱུད་བླའི་ཚིགས་བཅད་བཞིན་དུ་བཤད་པར་བྱ་སྟེ། བྲམ་ཟེའི་ཁྱེའུ་བླ་མ་དེ་ཚེ་འཕོས་ནས་དགའ་ལྡན་དུ་དམ་པ་ཏོག་དཀར་པོ་ཞེས་བྱ་བར་གྱུར་ཏེ། ལྷ་རྣམས་ལ་ཆོས་སྟོན་ཏོ། །དེའི་ཚེ་ཉིད་ཀྱི་བསོད་ནམས་ཀྱི་མཐུ་དང་། སངས་རྒྱས་རྣམས་ཀྱི་བྱིན་གྱི་རླབས་ཀྱིས་ལྷའི་རོལ་མོའི་སྒྲ་དག་ལས། བསོད་ནམས་རྒྱ་ཆེ་ཚོགས་མངའ་དྲན་རྟོགས་དང་། །བློ་གྲོས་མཐའ་ཡས་ཤེས་རབ་འོད་མཛད་པ། །མཚུངས་མེད་སྟོབས་མངའ་སྒྱུ་རྩལ་རྒྱ་ཆེ་བ། །མར་མེ་མཛད་ཀྱི་ལུང་བསྟན་དགོངས་པར་མཛོད། །སྐྱེས་མཆོག་ཁྱེད་ཀྱི་བསོད་ནམས་དཔལ་གྱིས་ནི། །དགའ་ལྡན་ཕོ་བྲང་ཤིན་ཏུ་མཛེས་མོད་ཀྱི། །འོན་ཀྱང་ཐུགས་རྗེའི་ཐུགས་དང་ལྡན་པས་ན། །ཐུགས་རྗེའི་རྒྱལ་མཚན་དག་ཏུ་ཆར་བ་ཕོབ། །ཅེས་པ་ནས། འདི་ནི་དུས་ལགས་བཏང་སྙོམས་མ་མཛད་ཅེས། །སྙིང་རྗེའི་ཡིད་དང་ལྡན་པས་སྐུལ་བར་བྱེད། །ཅེས་པ་ལ་སོགས་པས་བསྐུལ་ལོ། །དེའི་ཚེ་གནས་གཙང་མའི་ལྷའི་བུ་རྣམས་བྱང་ཆུབ་སེམས་དཔའ་མངལ་དུ་འཇུག་པའི་ལོ་བཅུ་གཉིས་ཀྱི་གོང་ནས་བྲམ་ཟེར་སྤྲུལ་ཏེ། འོག་ནས་འཆད་པའི་རྣམ་པས་མངལ་དུ་ཞུགས་པར་གྱུར་ན། མཚན་དཔེ་དང་ལྡན་ཏེ་འཁོར་ལོས་བསྒྱུར་རྒྱལ་ལམ། སངས་རྒྱས་སུ་འགྱུར་རོ་ཞེས་འདོན་དུ་འཇུག་ཅིང་། རང་སངས་རྒྱས་རྣམས་ལ་ལོ་བཅུ་གཉིས་ན་བྱང་ཆུབ་སེམས་དཔའ་ལྷུམས་སུ་འཇུག་གིས། ཞིང་འདི་བོར་ཅིག་ཅེས་ཟེར་ཞིང་དེ་རྒྱལ་པོའི་ཁབ་ཀྱི་མཇུག་མ་བསྒྱུར་བའི་རི་ལ་རང་རྒྱལ་གླང་པོ་ཞེས་པས་ཐོས་ཏེ། རྡོ་ལ་རྐང་རྗེས་བཞག་སྟེ་འདས་སོ། །ཝཱ་ར་ཎ་སིར་རང་རྒྱལ་ལྔ་བརྒྱ་མེའི་ཁམས་ལ་ཞུགས་ཏེ་འདས་ནས་རིང་བསྲེལ་ལྷུང་བས་དྲང་སྲོང་ལྷུང་བར་གྲགས་སོ། །དེ་ནས་བསྐུལ་བའི་དོན་རྗེས་སུ་དགོངས་ཏེ། དུས་ཚེ་ལོ་བརྒྱ་པ་དང་། གླིང་འཛམ་བུའི་གླིང་དང་། ཡུལ་དབུས་དང་། རིགས་རྒྱལ་རིགས་ཏེ་བཞི་ལ་གཟིགས་པའམ། ལུང་ལྟར་ན། རིགས་དང་། དུས་དང་། ཡུལ་དང་། རུས་དང་། བུད་མེད་ལ་གཟིགས་པ་དང་ལྔས། འཇིག་རྟེན་ལ་གཟིགས་ཏེ་མིའི་ཡུལ་དུ་གཤེགས་པར་རྩོམ་པ་ན། ལྷ་རྣམས་ལ་གྲོགས་པོ་དག་ཆོས་སྣང་བའི་སྒོ་བརྒྱ་རྩ་བརྒྱད་པོ་འདི་དག་ནི། རྒྱལ་སྲས་འཆི་འཕོ་བའི་ཚེ་བསྟན་པར་བྱའོ། །གྲོགས་པོ་དག །དད་པ་ནི་ཆོས་སྣང་བའི་སྒོ་སྟེ་བསམ་པ་མི་ཕྱེད་པར་འགྱུར་རོ། །དང་བ་ནི་ཆོས་སྣང་བའི་སྒོ་སྟེ། སེམས་རྙོག་མ་ཅན་དང་བར་འགྱུར་བའི་ཕྱིར་རོ། །ཞེས་པ་ནས། དབང་བསྐུར་བའི་ས་ནི་ཆོས་སྣང་བའི་སྒོ་སྟེ། མངལ་དུ་འཇུག་པ་ནས་མྱ་ངན་ལས་འདས་པ་ཆེན་པོ་སྟོན་པའི་བར་དུ་འགྱུར་རོ། །ཞེས་པའི་བར་དུ་གསུངས་ནས། གང་གི་ཚེ་ན་དགའ་ལྡན་གནས་མཆོག་ནས། །འདྲེན་པ་སྐྱེས་བུ་སེང་གེ་འཆི་འཕོའི་ཚེ། །ལྷ་རྣམས་དག་ལ་ཚིག་ཏུ་སྨྲས་པ་ནི། །གྲོགས་དག་བག་མེད་སྤྱོད་པ་སྤང་བར་གྱིས། །ཞེས་པ་ལ་སོགས་པ་གསུངས་ཤིང་རིན་པོ་ཆེའི་ཅོད་པན་མ་ཕམ་པའི་དབུ་ལ་བཅིངས་ནས་གྲོགས་པོ་དག །ཁོ་བོ་ནི་འཛམ་བུའི་གླིང་དུ་འཚང་རྒྱར་འགྲོ་སྟེ། ཁྱེད་ལ་མ་ཕམ་པས་ཆོས་སྟོན་ཏོ། །ཞེས་གསུངས་པས་ལྷ་རྣམས་མི་དགའ་བར་གྱུར་ནས། སྐྱེས་བུ་དམ་པ་ཁྱེད་ནི་མི་བཞུགས་ན། །དགའ་ལྡན་གནས་འདི་མཛེས་པར་མི་འགྱུར་རོ། །ཞེས་ཟེར་ཞིང་། བྱང་ཆུབ་སེམས་དཔའ་འཛམ་བུའི་གླིང་དེ་ནི་དིང་སང་འོད་སྲུངས་རྫོགས་བྱེད་དང་། ཀུན་ཏུ་རྒྱུ་གནག་ལྷས་ཀྱི་བུ་དང་། སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་དང་། མི་ཕམ་སྐྲའི་ལྭ་བ་ཅན་དང་། ཀ་ཏྱ་འི་བུ་ནོག་ཅན་དང་། གཅེར་བུ་པ་གཉེན་གྱི་བུ་སྟེ། རྟོག་གེ་པ་དྲུག་དང་། བྲམ་ཟེ་རྒྱུས་རྒྱལ་དང་། བྲམ་ཟེ་རྣས་རྡེག་དང་། བྲམ་ཟེ་བཟང་ལྡན་དང་། བྲམ་ཟེ་ཚངས་པའི་ཚེ་དང་། བྲམ་ཟེ་པདྨའི་སྙིང་པོ་དང་། བྲམ་ཟེ་དམར་པོ་སྟེ་རྗེས་སུ་སྒྲོགས་པ་དྲུག་དང་། རངས་བྱེད་ཀྱི་བུ་ལྷག་སྤྱོད་དང་། སྒྱུ་རྩལ་ཤེས་ཀྱི་བུ་རིང་འཕུར་དང་། ཀུན་ཏུ་རྒྱུ་རབ་བཟང་དང་། བྲམ་ཟེའི་ཁྱེའུ་ཀུན་རྒྱལ་དང་། དྲང་སྲོང་ཉོན་མོངས་མེད་དང་། སྟེང་རྒྱས་འོད་སྲུངས་རལ་བ་ཅན་ཏེ་སྙོམས་འཇུག་པ་དྲུག་སྟེ། སྟོན་པ་དྲུག་གསུམ་བཅོ་བརྒྱད་ཀྱིས་མ་རུངས་པར་བགྱིས་པས། གཤེགས་པའི་སྐབས་མ་ལགས་སོ། །ཞེས་གསོལ་བས། དུང་གི་སྒྲ་དང་རོལ་མོའི་སྒྲ་གཞན་མི་འདྲེ་བ་དང་། ཉི་མའི་འོད་ཀྱིས་འོད་གཞན་ལྟར། དེ་དག་གི་ཆོས་དང་མི་འདྲེ་ཞིང་། དེ་དག་ང་ཉིད་ཀྱིས་ཟིལ་གྱིས་མནན་ནུས་སོ། །སེང་གེ་གཅིག་གིས་གཅན་གཟན་ཚོགས་རྣམས་དུ་མ་རྣམ་པར་སྐྲག །རྡོ་རྗེ་གཅིག་གིས་བྲག་གི་རྩེ་མོ་དུ་མ་རྣམ་པར་འཇིག །བརྒྱ་བྱིན་གཅིག་གིས་ལྷ་མ་ཡིན་དཔུང་དུ་མ་རྣམ་པར་འཇོམས། །ཉི་མ་གཅིག་གིས་མུན་པའི་ཚོགས་རྣམས་དུ་མ་རྣམ་པར་སེལ། །ཞེས་གསུངས་ནས། ཁོ་བོ་ཇི་ལྟ་བུའི་གཟུགས་ཀྱིས་འགྲོ་བར་བྱ། ཞེས་དྲིས་པས། ལ་ལ་ཚངས་པའི་གཟུགས་ཀྱིས། ལ་ལ་བརྒྱ་བྱིན་ལ་སོགས་པའི་གཟུགས་ཀྱིས། རིགས་སོ་ཟེར་ཡང་། ལྷའི་བུ་གཟི་བརྗིད་དམ་པ་ན་རེ། རིག་བྱེད་ནས་འབྱུང་བ་བཞིན་གླང་པོ་ཆེའི་གཟུགས་ཀྱིས་རིགས་སོ། །ཟེར་ནས། བྱང་ཆུབ་སེམས་དཔའ་ཆས་པ་དང་། རྒྱལ་པོ་ཟས་གཙང་གི་ཁྱིམ་དུ་ལྟས་བཅོ་བརྒྱད་བྱུང་ངོ་། །དེ་ནས་དགུན་འདས་ཏེ། དཔྱིད་ཟླ་ཐ་ཆུང་སྐར་མ་ས་ག་ལ་བབ་པའི་ཚེས་བཅོ་ལྔ་ཟླ་བ་ཉ། སྐར་མ་རྒྱལ་གྱི་དུས་སུ། ཡུམ་གསོ་སྦྱོང་ལ་གནས་པའི་གློ་གཡས་བར། གླང་པོ་ཆེའི་རྣམ་པས་ལྷུམས་སུ་ཞུགས་ཏེ། གསེར་གྱི་དྲ་བས་ལེགས་གཡོགས་སྤྱི་གཙུག་དམར། །ཐལ་ཀར་མཆེ་བ་དྲུག་དང་རབ་ལྡན་ཞིང་། །དུང་དང་ཁ་བ་དངུལ་མདོག་ལྟ་བུ་ཡི། །གླང་པོའི་མཆོག་ཅིག་ཁོང་དུ་སོང་སྙམ་བྱེད། །དེ་ཞུགས་ནས་ནི་བདག་གི་ལུས་དང་སེམས། །སྔོན་ཆད་མཐོང་ཐོས་མྱོང་བར་མ་གྱུར་པའི། །གྱ་ནོམ་བདེ་བས་ཤིན་ཏུ་བདེར་གྱུར་ཏེ། །བསམ་གཏན་མཉམ་པར་བཞག་པ་བཞིན་དུ་གྱུར། །ཅེས་སོ། །རྨི་ལྟས་དེ་བྲམ་ཟེ་རྣམས་ལ་དྲིས་པས། སྲས་ཁྱད་པར་ཅན་ཞིག་འབྱུང་སྟེ། ཁབ་ཏུ་བཞུགས་ན་འཁོར་ལོས་སྒྱུར་རྒྱལ་དང་། རབ་ཏུ་བྱུང་ན་སངས་རྒྱས་སུ་འགྱུར་བར་ལུང་བསྟན་ནོ། །དེ་ནས་ཡུམ་གྱི་ལྷུམས་རྒྱལ་སྲས་ཀྱི་ཉེ་བར་སྤྱད་པ་རིན་པོ་ཆེ་བཀོད་པ་ཞེས་པར་བྱིན་གྱིས་བརླབས་ནས། ཟླ་བ་བཅུར་ཟག་མེད་ཀྱི་བདེ་བ་ལ་ལོངས་སྤྱད་ནས། ལྷ་དང་མིའི་སྐྱེ་དགུ་ཁྲག་ཁྲིག་ཕྲག་སུམ་ཅུ་རྩ་དྲུག་སྨིན་པར་བྱས་སོ། །དེ་ནས་མེ་ཏོག་ཁ་འབུས་ཤིང་རྒྱས་པར་གྱུར་པ་ལ་སོགས་པ་ལྟས་སུམ་ཅུ་རྩ་གཉིས་བྱུང་བ་དང་། ལུམྦི་ནིའི་ཚལ་དུ་ཡུམ་གྱི་ཕྱག་ཤིང་པླཀྵ་ལ་འཇུས་ཏེ། ཡུམ་གྱི་གློ་གཡས་པ་ནས་ཡུམ་ལ་གནོད་པ་མེད་པར་ན་བཟའ་དང་བཅས་ནས་བལྟམས་པ་ན། ལྷས་མེ་ཏོག་གཏོར། ཚངས་པ་དང་བརྒྱ་བྱིན་གྱིས་ཀ་ཤི་ཀའི་རས་ཀྱིས་བླངས། དགའ་བོ་ཉེར་དགའ་གཉིས་ཀྱིས་སྐུ་ཁྲུས་གསོལ་བ་དང་། ཀཽ་ཤི་ཀ་ང་ཐོང་གསུང་སྟེ། ཤར་དུ་དགེ་བའི་ཆོས་ཐམས་ཅད་ཀྱི་སྔོན་དུ་འགྲོ་བར་བྱའོ། །ལྷོར་ལྷ་མི་རྣམས་ཀྱི་སྦྱིན་གནས་སུ་འགྱུར་བར་བྱའོ། །ནུབ་ཏུ་ང་ནི་འཇིག་རྟེན་འདི་ན་ཕུལ་དུ་ཕྱིན་པའོ། །འདི་ནི་ངའི་སྐྱེ་བའི་ཐ་མ་སྟེ། སྐྱེ་བ་དང་རྒ་བ་དང་ན་བ་དང་འཆི་བ་མཐར་དབྱུང་ངོ་། །བྱང་དུ་སེམས་ཅན་ཐམས་ཅད་ཀྱི་ནང་ན་བླ་ན་མེད་པར་བྱའོ། །འོག་ཏུ་བདུད་དང་བདུད་ཀྱི་སྡེ་གཞོམ་པར་བྱའོ། །སེམས་ཅན་དམྱལ་བ་པ་ཐམས་ཅད་ཀྱི་སེམས་ཅན་དམྱལ་བའི་མེ་གསོད་པའི་ཆོས་ཀྱི་སྤྲིན་ཆེན་པོའི་ཆར་ཕབ་སྟེ། དེ་དག་བདེ་བས་ཚིམ་པར་བྱའོ། །སྟེང་དུ་སེམས་ཅན་ཐམས་ཅད་ཀྱིས་གྱེན་དུ་ལྟ་བར་འགྱུར་བར་བྱའོ་ཞེས་གསུངས་ཏེ། གོམ་པ་བདུན་བདུན་བོར་བ་དང་པདྨ་བྱུང་ངོ་། །དེའི་ཚེ་བཀྲ་ཤིས་པའི་ལྟས་ཕྱོགས་ཐམས་ཅད་སྣང་བས་གང་བ་དང་། ཡུལ་ཆེན་པོ་བཞིར་རྒྱལ་ཕྲན་བཞི་བཙས། ཡ་རབས་ཀྱི་རིགས་ལྔ་བརྒྱ། གྲགས་ལྡན་མ་ལ་སོགས་པ་བརྒྱད་བརྒྱ། འདུན་པ་ལ་སོགས་པ་བྲན་ལྔ་བརྒྱ། སྔགས་ལྡན་ལ་སོགས་རྟེའུ་ཁྲི། རྟེའུ་མོ་ཁྲི་དང་། བ་ལང་ཁྲི་ཡང་བཙས། གླིང་གི་དབུས་སུ་བྱང་ཆུབ་ཀྱི་ཤིང་སྐྱེས། སྐྱེད་ཚལ་ལྔ་བརྒྱ་དང་། གཏེར་ཁ་ལྔ་བརྒྱ་ཡང་བྱུང་སྟེ། རྒྱལ་བུ་དོན་ཐམས་ཅད་གྲུབ་པར་བཏགས་སོ། །དེ་ནས་རིགས་ཀྱི་ལྷ་མཆོད་པའི་སར་ཕྱིན་ཏེ། ཤཱཀྱ་མུ་ཅོར་སྨྲ་བ་རྣམས་ཐུབ་པ་བཞིན་འདུག་པས། ཤཱཀྱ་ཐུབ་པར་བཏགས། ཤཱཀྱ་འཕེལ་གྱིས་ཕྱག་བཙལ་བའམ། ལྷ་རྣམས་ཀྱིས་ཕྱག་བཙལ་བས་ལྷའི་ལྷར་བཏགས་སོ། །ཞག་བདུན་ནས་ཡུམ་ཚེའི་དུས་བྱས་ཏེ་སུམ་ཅུ་རྩ་གསུམ་དུ་སྐྱེས་སོ། །དེ་བྱང་ཆུབ་སེམས་དཔས་ནོངས་པ་མིན་གྱི། སྲས་མངོན་པར་འབྱུང་བ་གཟིགས་ན། ཡུམ་སྙིང་འགས་པར་འགྱུར་བས་ཚེ་ཚད་མཐར་ཐུག་པའི་ཕྱིར་རོ། །མདོ་གཞན་ནས་རི་བོ་ཀུན་འཛིན་ལ་གནས་པའི་དྲང་སྲོང་ཉོན་མོངས་མེད་ཀྱི་ཚ་བོ་མེས་བྱིན་གྱི་བུས་ཤེས་ཏེ། མཁན་པོ་འདིར་ནི་ཉི་མ་ཐམས་ཅད་དག །ཅིག་ཅར་བྱུང་བར་གྱུར་ཏམ་ཅི། །འདི་ལྟར་རི་ནི་ཕུག་བཅས་པ། །འོད་གཅིག་གིས་ནི་གསལ་བར་གྱུར། །ཞེས་དྲིས་པས། ལན་དུ། ཉི་མའི་འོད་ནི་རྒྱུན་དུ་རྣོ། །བུ་གཅིག་སྣང་བའི་འོད་འདི་དག །ཡན་ལག་རེག་ན་འོད་བསིལ་བས། །ངེས་པར་ཐུབ་པ་དེ་ཡི་འོད་ཅེས་སོ། །དེ་ནས་ཉོན་མོངས་མེད་སེར་སྐྱར་ཞུགས་ཏེ། །རྒྱལ་ཆེན་བདག་ཅག་འདིར་མཆིས་པ། །ཁྱེད་ཀྱི་སྲས་ནི་མཐོང་བར་འཚལ། །འཇིག་རྟེན་གཙོ་བོ་རྣམ་འདྲེན་པ། །ཐུབ་པ་དེ་ནི་བལྟ་བར་འཚལ། །ཞེས་པ་དང་། མནལ་དུ་སོང་བ་ནའང་། སྤྱན་གཟིགས་པས་སྨྲས་པ། རིགས་དང་ལྡན་པའི་རྟ་རྣམས་ནི། །མཚན་མོའི་བཞི་ཆ་ཉལ་བ་ལྟར། །དགོས་པ་དོན་གཉེར་རྣམས་ཀྱི་གཉིད། །མིག་ལ་ཡུན་རིང་མི་གནས་སོ། །ཞེས་སོ། །མཚན་མཁན་དག་འཁོར་ལོས་བསྒྱུར་བར་ལུང་སྟོན་ན་ཅིར་འགྱུར། །ས་བདག་རྟོག་པ་པོ་རྣམས་བློ་འཁྲུལ་ཏེ། །རྩོད་པའི་དུས་སུ་འཁོར་ལོས་བསྒྱུར་མི་འབྱུང་། །བསོད་ནམས་མཆོག་གི་ཆོས་ཀྱི་མཛོད་འདི་ནི། །ཉེས་ལས་རྣམ་བརྒལ་སངས་རྒྱས་ཉིད་དུ་འགྱུར། ཞེས་སོ། །གཞོན་ནུ་སྐྱེ་དགུའི་བདག་མོ་ལ་གཏད་དེ། པང་ན་འཚོ་བའི་མ་མ་བརྒྱད། ནུ་མ་བསྣུན་པ་བརྒྱད། རྩེན་བའི་མ་མ་བརྒྱད། དྲི་མ་འཕྱི་བ་བརྒྱད་དེ། སོ་གཉིས་ལ་གཏད་དེ་བསྐྱེད་བསྲིངས་སོ། །དེ་ལྟ་བུའི་ཆོ་འཕྲུལ་དེ་རི་བོ་གངས་ཅན་ན་གནས་པ་དྲང་སྲོང་ནག་པོ་ཞེས་པ་མངོན་ཤེས་ལྔ་དང་ལྡན་པ་ཞིག་གིས་ཚོར་ནས། སྣག་ཚ་མེས་བྱིན་དང་བཅས་པས་རྫུ་འཕྲུལ་གྱིས་སེར་སྐྱའི་གྲོང་ཁྱེར་དུ་ཕྱིན་ཏེ། དེའི་མཚན་བལྟས་པས། དེ་ཅིར་འགྱུར་བ་ཤེས་ཏེ། ངོ་མཚར་དང་མྱ་ངན་སྐྱེས་ནས་དེའི་ཞབས་ལ་ཕྱག་འཚལ་ཞིང་། སྐོར་བ་བྱས་ནས་གདོང་མཆི་མ་དང་བཅས་ཏེ་ལུང་བསྟན་པ། བཙས་གྱུར་གཞོན་ནུ་འདི་ཡི་མཚན་ལྟས་ནི། །སུམ་ཅུ་རྩ་གཉིས་མཚན་གྱིས་བརྒྱན་པར་མཐོང་། །འདི་ནི་གཉིས་སུ་འགྱུར་གྱི་གཞན་དུ་མིན། །ཁྱིམ་ན་གནས་ན་འཁོར་ལོས་བསྒྱུར་རྒྱལ་ལམ། །ཁྱིམ་ནས་ཁྱིམ་མེད་རབ་ཏུ་བྱུང་གྱུར་ན། །འདྲེན་པ་གཞན་གྱི་དྲིང་ལ་མི་འཇོག་པར། །འཇིག་རྟེན་འདིར་ནི་མངོན་རྫོགས་བྱང་ཆུབ་འགྱུར། །གསང་བའི་གནས་མཆོག་སྦུབས་སུ་ནུབ་པ་དང་། །སྤྱི་གཙུག་འགྲོ་བ་ཀུན་གྱིས་མི་མཐོང་བས། །ཁབ་ཏུ་ཡང་ནི་བཞུགས་པར་མི་འགྱུར་ཞིང་། །ཞེས་ལུང་ཡང་བསྟན། ཞེས་སོ། །འོ་ན་ཁྱོད་ངུ་བའི་རྒྱུ་ཅི། ལྷ། བདག་ནི་ཆོས་མཛོད་སྐྱེས་བུ་མཆོག་འདི་དང་། །ཕྲད་ནས་དོན་མ་གྲུབ་པར་འཆི་འགྱུར་ཏེ། །ཞི་བ་མ་ཐོབ་རང་གི་ཉེས་མཐོང་ནས། །ཡིད་ལ་གདུང་བ་སྐྱེས་ནས་ངུ་བ་ཡིན། ཞེས་སོ། །དེ་ནས་རང་གི་གནས་སུ་སོང་ངོ་། །དེ་ནས་ཡར་སྐྱེས་ནས་ཤཱཀྱའི་ཁྱེའུ་སྟོང་ཕྲག་བཅུ་དང་ལྷན་ཅིག་ཏུ། ཡི་གེའི་སློབ་དཔོན་ཀུན་གྱི་བཤེས་གཉེན་གྱི་གྲྭར་བྱོན་ཏོ། །ཀྱེ་སློབ་དཔོན་ཚངས་པའི་ཡི་གེ་ལ་སོགས་པ་དྲུག་ཅུ་རྩ་བཞི་ལས། བདག་གང་ལ་བསླབ། སློབ་དཔོན་ངོ་མཚར་ཏེ། སེམས་ཅན་དག་པ་ངོ་མཚར་ཆེ། །བསྟན་བཅོས་ཀུན་ལ་བསླབས་གྱུར་ཀྱང་། །འཇིག་རྟེན་འཇིག་རྟེན་རྗེས་བསྙེག་ཕྱིར། །ཡི་གེའི་གྲྭར་ནི་བྱོན་པར་གྱུར། །ཡི་གེ་གང་གི་མིང་དག་ཀྱང་། །བདག་གིས་ཤེས་པར་མ་གྱུར་པ། །དེ་ལ་འདི་ནི་བྱང་གྱུར་ཀྱང་། །ཡི་གེ་སློབ་པའི་གྲྭར་བྱོན་ཏོ། །ཞེས་སྨྲས་སོ། །དེ་ནས་གཞོན་ནུ་ནགས་རྒྱུར་སོང་ཞིང་། འཛམ་བུའི་གྲིབ་མ་ལ་བསམ་གཏན་དང་པོ་ནས་བཞི་པའི་བར་ལ་མཉམ་པར་བཞག་པས་ཕྱི་རོལ་པའི་དྲང་སྲོང་རྫུ་འཕྲུལ་ཅན་ལྔས་ནམ་མཁའ་ལ་འགྲོ་མ་ནུས་པར། ཕྱག་དང་བསྐོར་བ་བྱས་སོ། །དེའི་ཚེ་ཤིང་གཞན་གྱི་གྲིབ་མ་འཕོས་ཀྱང་། དེའི་མ་འཕོས་པས་ཡབ་ངོ་མཚར་ཏེ། ཐུབ་པ་གང་ཚེ་བལྟམས་པ་དང་། །གང་ཚེ་འོད་ལྡན་བསམ་གཏན་མཛད། །འདྲེན་པ་འདི་ལྟར་ལན་གཉིས་སུ། །མགོན་པོ་ཁྱོད་ཞབས་ཕྱག་འཚལ་ལོ། །ཞེས་ཕྱག་བྱས་སོ། །དེ་ནས་ཤཱཀྱ་རྒན་རབས་དག་གིས་རྒྱལ་པོ་ལ། ལྷ། ལྟས་མཁན་དག་གཞོན་ནུ་འདིས་ཁབ་བཞེས་ན། འཁོར་ལོས་བསྒྱུར་བར་འགྱུར་རོ་ཞེས་ལུང་སྟོན་ན། བཙུན་མོ་བླང་བར་བགྱིའོ། །རྒྱལ་པོས་གཞོན་ནུའི་ཚུལ་དང་མཐུན་པའི་བུ་མོ་གང་ཡོད་ལྟོས་ཤིག །དེ་ནས་ཤཱཀྱ་ལྔ་བརྒྱ་ཙམ་ངེད་ཀྱི་བུ་མོ་མཐུན་ནོ་ཟེར་རོ། །རྒྱལ་པོས་སྨྲས་པ། གཞོན་ནུ་ཉིད་ལ་དྲིས་ཤིག་ཟེར་ནས་དྲིས་པས། དགུང་བདུན་ན་ལན་བྱའོ་གསུང་སྟེ། བསམ་པས། འདོད་པའི་སྐྱོན་ནི་བདག་གིས་མཐའ་ཡས་རིག །འཐབ་མོ་མཁོན་བཅས་མྱ་ངན་སྡུག་བསྔལ་རྩ། །འཇིགས་བྱེད་དུག་གི་ལོ་མ་འདྲ་བ་སྟེ། །མེ་དང་འདྲ་ཞིང་རལ་གྲིའི་སོ་དང་འདྲ། །འདོད་པའི་ཡོན་ཏན་བདག་འདོད་མ་ཡིན་ཏེ། །བདག་ནི་བུད་མེད་ཚོགས་དང་མཛེས་མ་ཡིན། །བསམ་གཏན་ཏིང་འཛིན་བདེ་བས་ཞི་སེམས་སུ། །བདག་ནི་མི་སྨྲ་ནགས་ཚལ་གནས་པར་བྱ། །ཡང་དེས་བརྟགས་ནས། ཐབས་མཁས་པ་དང་སྙིང་རྗེས། འདམ་དང་ལྕག་ལྕིག་ཁྲོད་ན་པདྨ་རྣམ་པར་འཕེལ། །མི་རྣམས་གང་བའི་ནང་ན་རྒྱལ་པོ་མཆོད་པ་ཐོབ། །གང་ཚེ་བྱང་ཆུབ་སེམས་དཔའ་འཁོར་མཆོག་ཐོབ་གྱུར་པ། །དེ་ཚེ་སེམས་ཅན་བྱ་བ་ཁྲག་ཁྲིག་འཆི་མེད་འདུལ། །སྔོན་གྱི་བྱང་ཆུབ་སེམས་དཔའ་མཁས་པ་གང་བྱུང་བ། །དེ་དག་ཀུན་གྱིས་བཙུན་མོ་སྲས་དང་སླས་ཀྱང་བསྟན། །འོན་ཀྱང་འདོད་པས་ཆགས་མེད་བསམ་གཏན་བདེ་མ་ཉམས། །བདག་ཀྱང་དེ་དག་ཡོན་ཏན་རྗེས་སུ་བསླབ་པར་བྱ། །སྙམ་སྟེ། སྡེ་བུད་མེད་ཀྱི་ཡོན་ཏན་ཡི་གེ་ལ་བྲིས་ཏེ། འདི་འདྲ་བ་བདག་ལ་གསོལ། ཞེས་པ་དང་། རྒྱལ་པོས་མདུན་ན་འདོན་ལ་ཁྱོད་སོང་ལ། གང་ན་ཡོན་ཏན་འདི་དག་ཡོད་པའི་བུ་མོ་དེ་འོན་ཅིག །རྒྱལ་རིགས་བྲམ་ཟེའི་བུ་མོ་དང་། །རྗེའུ་རིགས་དམངས་རིགས་དེ་བཞིན་ཏེ། །སུ་ལ་ཡོན་ཏན་འདི་ཡོད་པའི། །བུ་མོ་དེ་ནི་འདིར་འོན་ཅིག །ང་ཡི་བུ་འདི་རིགས་དག་དང་། །རུས་དང་ངོ་མཚར་འཛིན་མ་ཡིན། །ཡོན་ཏན་བདེན་པ་ཆོས་ཀྱི་རྣམས། །དེ་ལ་འདི་ཡི་ཡིད་དགའ་འོ། །ཞེས་སྨྲས་སོ། །དེ་ནས་བྲམ་ཟེ་དེས་ཡུལ་ཀུན་ཏུ་སོང་སོང་བས། ཤཱཀྱ་ལག་ན་བེ་ཅོན་ཅན་གྱི་བུ་མོ་ས་འཚོ་མ་མཐོང་ནས། ཡི་གེ་དེ་བྱིན་པ་དང་། བཞིན་འཛུམ་སྟེ། བྲམ་ཟེ་ཡོན་ཏན་འདི་དག་བདག་ལ་ཀུན་ཚང་གིས། དེས་པའི་གཟུགས་ཅན་དེ་ནི་བདག་གི་ཁྱིམ་ཐབ་འོས། །གལ་ཏེ་གཞོན་ནུ་བཞེས་ན་ཕྱི་བཤོལ་མ་མཛད་གསུངས། །བརྒྱ་ལ་སྐྱེ་བོ་ཕལ་དང་བཞུགས་པར་གྱུར་ཀྱང་གདའ། །ཞེས་སྨྲས་སོ། །དེ་མདུན་ན་འདོན་གྱིས། རྒྱལ་པོ་ལ་གསོལ་པས། རྒྱལ་པོས། བུད་མེད་འདི་རྫུན་ཆེ་བས་ཡིད་མ་ཆེས་ཏེ། ཞག་བདུན་ན་བུ་མོ་ཐམས་ཅད་འདུན་ཁང་དུ་ཤོག་ཅིག །གཞོན་ནུས་ཡིད་དུ་འོང་བའི་ཡོ་བྱད་དག་སྦྱིན་ནོ། །ཞེས་སྨྲས་ཏེ། དགུང་བདུན་ནས་གཞོན་ནུས་འདུན་ཁང་དུ་སོང་བ་ལ། བུ་མོ་རྣམས་ཇི་ལྟར་འོངས་བཞིན་ཡོ་བྱད་དག་བྱིན་ཞིང་དེ་དག་གིས་ཀྱང་གཟི་བརྗིད་མ་བཟོད་པར་མྱུར་དུ་སོང་ངོ་། །དེ་ནས་ས་འཚོ་མ་འོངས་པ་དང་ཡོ་བྱད་ཟད་དེ་དེས་འཛུམ་དམུལ་ཏེ། བདག་གིས་ནོངས་པ་ཅི་བགྱིས་ནས། བདག་ལ་རྔན་སྡང་མཛད། གཞོན་ནུས། རྔན་སྡང་མིན་གྱི་ཁྱེད་འཕྱིས་པས་ལན་ནོ། །གསུངས་ནས་སོར་གདུབ་སྲང་བརྒྱ་སྟོང་རི་བ་དེ་བྱིན་ནོ། །དེ་ནས་དེ་སོང་བ་དང་བྱ་ར་བ་དག་གིས་རྒྱལ་པོ་ལ། གཞོན་ནུ་ས་འཚོ་མ་ལ་སྤྱན་ཆགས་ཏེ། བཀའ་མཆིད་ཀྱང་ཅུང་ཟད་བགྱིས་སོ། །ཞེས་གསོལ་ཏོ། །དེ་ནས་རྒྱལ་པོས་ཤཱཀྱ་ལག་ན་བེ་ཅོན་ཅན་ལ་ཁྱེད་ཀྱི་བུ་མོ་གཞོན་ནུ་ལ་བྱིན་ཅིག་ཅེས་ཕོ་ཉ་བཏང་བས། དེ་ན་རེ་གཞོན་ནུ་ཕོ་བྲང་ན་སྐྱིད་དེ་བར་འཁྲུངས་པས་སྒྱུ་རྩལ་མི་ཤེས་ན། བདག་གི་རིགས་ཆོས་ལ་བུ་མོ་སྒྱུ་རྩལ་ཤེས་པ་ལ་གཏོང་པ་ལགས་ན། སྒྱུ་རྩལ་མི་ཤེས་པ་ལ་ཇི་ལྟར་སྦྱིན། ཞེས་ཟེར་རོ། །དེ་བཟླས་པས། ང་ལ་འདིས་འདི་དང་ལན་གཉིས་སུ་ངོར་བལྟས་ཏེ་བརྙས་སོ་སྙམ་སྟེ་རྒྱལ་པོ་སེམས་ཤིང་འདུག་གོ། དེ་ནས་གཞོན་ནུས་དེ་ཐོས་ནས་རྒྱལ་པོ་ལ་ཅི་ནོངས། འདི་བཀའ་མི་སྩལ་དུ་མི་རུང་ངོ་། །ཞེས་སྨྲས་པས། རྒྱལ་པོས་དོན་དེ་བསྙད་དོ། །དེ་ནས་གཞོན་ནུས་སྒྱུ་རྩལ་གྱིས་འགྲན་པར་ཁས་བླངས་པས། རྒྱལ་པོ་མཉེས་ཏེ་སྒྱུ་རྩལ་འགྲན་པར་དྲིལ་བསྒྲགས་སོ། །དེ་ནས་ཞག་བདུན་ན་ཤཱཀྱ་གཞོན་ནུ་ལྔ་བརྒྱ་ཙམ་ཚོགས་ཏེ། ས་འཚོ་མ་རྒྱལ་བའི་རུ་མཚོན་དུ་བཞག་སྟེ། རལ་གྲིའི་ཐབས་དང་། འཕོང་དང་། གྱད་ཀྱི་འཛིན་སྟངས་རྒྱལ་བས་ཁྱེར་ཅིག །ཅེས་དམ་བཅས་སོ། །དེ་ནས་ཐོག་མར་ལྷ་སྦྱིན་འོངས་པ་དང་། གླང་པོ་ཆེ་ཁྲིད་པ་དང་ཕྲད་དེ། པ་ཕྲག་དོག་དང་ང་རྒྱལ་གྱིས་ཐལ་མོ་ལན་ཅིག་བསྣུན་ཏེ་བསད་དོ། །དེ་ནས་མཛེས་དགའ་བོས་གྲོང་ཁྱེར་གྱི་སྒོ་ནས་གུད་དུ་བོར་རོ། །དེ་ནས་བྱང་ཆུབ་སེམས་དཔས་རྐང་པའི་མཐེ་བོས་བླངས་ནས། ར་བ་བདུན། འོབས་བདུན་གྱི་ཕྱི་རྒྱང་གྲགས་གཅིག་ཙམ་དུ་འཕངས་ཏེ། གཤོང་ཆེན་པོར་གྱུར་ནས་གླང་པོའི་གཤོང་ཞེས་གྲགས་སོ། །དེ་ནས་སློབ་དཔོན་ཀུན་གྱི་བཤེས་གཉེན་དཔང་དུ་བཙུགས་ཏེ། ཡི་གེ་འགྲན་པས་བྱང་ཆུབ་སེམས་དཔའ་རྒྱལ་པོ། དེ་ནས་ཤཱཀྱ་སྲིད་སྒྲུབ་དཔང་དུ་བཙུགས་ཏེ་བརྩིས་པས། བྱང་ཆུབ་སེམས་དཔའ་རྒྱལ་ཏེ། སྲིད་སྒྲུབ་ཀྱིས་ཀྱང་མི་འཁྲུགས་པ་ཡན་ཆད་ལས་མ་ཤེས། བྱང་ཆུབ་སེམས་དཔས་སྙིང་པོ་མཆོག་གི་བར་ཤེས་སོ། །དེ་ནས་མཆོང་པ་དང་། རྐྱལ་དང་བང་ཡང་། བྱང་ཆུབ་སེམས་དཔའ་ལྷག་གོ། དེ་ནས་དགའ་བོ་ཀུན་དགའ་བོ་གཉིས་ཀྱིས་སྟོབས་བརྒལ་བའི་ཕྱིར། དྲུང་དུ་ཕྱིན་པས་དེའི་ལག་པ་རེག་མ་ཐག་འགྱེལ་ལོ། །དེ་ནས་ལྷས་སྦྱིན་གྱིས་ཕྱིན་པས་བྱང་ཆུབ་སེམས་དཔས་ཕྱག་གཡས་པས་བཏེག་སྟེ་ནམ་མཁའ་ལ་བསྐོར་ནས་ས་ལ་བོར་ཡང་ལུས་ལ་མི་གནོད་པར་བྱས་སོ། །དེ་ནས་ཤཱཀྱ་གཞོན་ནུ་ཐམས་ཅད་རུབ་པ་དང་། བྱང་ཆུབ་སེམས་དཔས་རེག་མ་ཐག་འགྱེལ་ལོ། །དེ་ནས་འཕོང་འགྲན་པར་བྱེད་དེ། ཀུན་དགའ་བོས་རྒྱང་གྲགས་གཉིས། ལྷ་སྦྱིན་གྱིས་རྒྱང་གྲགས་བཞི། མཛེས་དགའ་བོས་རྒྱང་གྲགས་དྲུག །བེ་ཅོན་ཅན་གྱིས་དཔག་ཚད་གཉིས་ཀྱི་ཕ་རོལ་དུ་ལྕགས་རྔ་རེ་ འབེན ་དུ་བཙུགས་པ་ལ་རང་རང་གི་ལ་ཕོག་གི། དེ་ཕན་ཆད་ལ་མ་ཕོག་གོ། བྱང་ཆུབ་སེམས་དཔས་རྒྱང་གྲངས་བཅུའི་ཕ་རོལ་དུ་ལྕགས་རྔ་གཅིག །དེའི་དྲུང་དུ་ཤིང་ཏ་ལ་བདུན་དངར། དེའི་ཕ་རོལ་དུ་ལྕགས་ཀྱི་ཕག་རྒོད་གཅིག་བཙུགས་ཏེ། ལྷ་ཁང་ནས་མེས་སེང་གེའི་ཟ་འགྲམ་གྱི་གནམ་རུ་བླངས་ཏེ། ཕྱེད་ཀྲུང་དུ་འདུག་པས་བདུངས་ཏེ། མདའ་འཕངས་པས། ལྕགས་རྔ་གཅིག་ཤིང་ཏ་ལ་བདུན། ཕག་རྒོད་རྣམས་ཕུག་སྟེ། ས་ལ་ཟུག་ནས་མི་སྣང་བར་གྱུར་ནས། ཁྲོན་པ་ལྟ་བུ་བྱུང་བས་མདའི་ཁྲོན་པ་ཞེས་གྲགས་སོ། །དེ་ནས་ལག་རྩིས་དང་། གླང་པོ་ཆེའི་གཉར་ཞོན་ནས། སྤོས་སྦྱོར་གྱི་བར། སྒྱུ་རྩལ་ཐམས་ཅད་ལ་བྱང་ཆུབ་སེམས་དཔའ་ལྷག་པར་གྱུར་པ་དང་། བེ་ཅོན་ཅན་གྱིས་བུ་མོ་ཕུལ་ལོ། །བྱང་ཆུབ་སེམས་དཔས་ཀྱང་འཇིག་རྟེན་དང་མཐུན་པར་བྱ་བའི་ཕྱིར། བུད་མེད་བརྒྱད་ཁྲི་བཞི་སྟོང་གི་མཆོག་ཏུ་ས་འཚོ་མ་དབང་བསྐུར་ཏེ། དེ་དག་དང་རྩེ་དགའ་ལ་ལོངས་སུ་སྤྱོད་དོ། །དེ་ནས་ལྷ་ཀླུ་ཁ་ཅིག་མ་ལ་སྐྱེས་བུ་དམ་པ་འདི་ནི་བཙུན་མོའི་འཁོར་དུ་ཡུན་རིང་དུ་བཞུགས་ན། སྣོད་དུ་གྱུར་པའི་སེམས་ཅན་རྣམས་མེད་པར་འགྱུར་ཞིང་། དེ་ནས་མངོན་པར་འབྱུང་བར་མི་འགྱུར་གྲང་སྙམ་ཞིང་། གུས་པ་དང་བཅས་པས་མངོན་པར་འབྱུང་ཞིང་སངས་རྒྱས་ནས་ཆོས་གསུང་སྙམ་ཞིང་འདུག་གོ། སངས་རྒྱས་བཅོམ་ལྡན་འདས་རྣམས་ཀྱིས་ཀྱང་སིལ་སྙན་གྱི་སྒྲ་ལས་སྐུལ་བའི་ཚིགས་སུ་བཅད་པ། སྡུག་བསྔལ་བརྒྱས་གང་སེམས་ཅན་མཐོང་ནས་ནི། །འགྲོ་བའི་མགོན་དང་སྐྱབས་དང་གནས་གྱུར་ཅིང་། །ཕན་བྱེད་མགོན་དང་དཔུང་གཉེན་གྱུར་ཅིག་ཅེས། །ཁྱོད་ཀྱིས་སྔོན་ནི་སྨོན་ལམ་དེ་སྐད་བཏབ། །དགེ་བ་དཔའ་བོ་སྔོན་གྱི་སྤྱོད་པ་དང་། །འགྲོ་ཕན་བྱ་ཞེས་སྨོན་ལམ་དྲན་པར་བྱོས། །འདི་ནི་ཁྱོད་ཀྱི་དུས་དང་ཚོད་ཡིན་གྱིས། །དྲང་སྲོང་མཆོག་རབ་ཁྱིམ་ནས་འབྱུང་བར་བྱོས། ཞེས་སོགས་ཀྱིས་བསྐུལ་ཞིང་། བཙུན་མོ་རྣམས་ཀྱིས་རོལ་མོའི་སྒྲ་ལས་ཀྱང་། སྔོན་གྱི་སྐྱེས་རབས་དག་གླེང་ཏེ། སྲིད་གསུམ་རྒ་དང་ནད་ཀྱི་སྡུག་བསྔལ་འབར། །འཆི་མེ་རབ་འབར་འདི་ནི་མགོན་མེད་པ། །སྲིད་ལས་འབྱུང་ལ་འགྲོ་བ་རྟག་ཏུ་རྨོངས། །བུམ་པར་ཆུད་པའི་བུང་བ་འཁོར་བ་བཞིན། །སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །འགྲོ་བའི་ཚེ་སྲོག་ནམ་མཁའི་གློག་འདྲ་སྟེ། །རི་གཟར་འབབ་ཆུ་ལྟ་བུར་མྱུར་མགྱོགས་འགྲོ། ཞེས་སོགས་ནས། སྔོན་གྱི་སྤྱོད་དེ་རྗེས་སུ་དྲན་གྱིས་ལ། །གཏི་མུག་མ་རིག་མུན་པས་བསྒྲིབས་པ་ཡི། །འགྲོ་ལ་ཤེས་རབ་དམ་པ་འོད་བཟང་བ། །ཆོས་མིག་དྲི་མེད་ཉོན་མོངས་མེད་པ་བྱིན། ཞེས་པའི་སྒྲ་ཐོས་ནས་བྱང་ཆུབ་སེམས་དཔའ་ཡང་རྒྱགས་པའི་སེམས་སྤངས་ཏེ་བྱང་ཆུབ་ཏུ་སེམས་གཏད་དོ། །ལྷའི་བུ་འབུམ་ཕྲག་སུམ་ཅུ་རྩ་གཉིས་ཀྱིས་ཀྱང་། འཆི་འཕོ་བ་ནི་ཤིན་ཏུ་བསྟན། །སྐྱེས་བུ་སེང་གེས་ཚེ་ཡང་བསྟན། །བཙུན་མོའི་འཁོར་ཡང་བསྟན་པ་མཛད། །ཁྱོད་ཀྱིས་འཇིག་རྟེན་རྗེས་མཐུན་མཛད། །འཇིག་རྟེན་ཆོས་ནི་རྗེས་ཐོབ་པས། །ལྷ་མི་མང་པོ་ཡོངས་སྨིན་མཛད། །མངོན་པར་འབྱུང་བའི་བློ་དགོངས་པའི། །དེ་ཡི་དུས་ལ་ད་དབབ་བོ། །ཞེས་སོགས་ནས། དབྱངས་སྙན་ཅིང་ནི་དབྱངས་འཇམ་པ། །མར་མེ་མཛད་ཀྱིས་ལུང་བསྟན་དགོངས། །ཡང་དག་དེ་བཞིན་མ་ནོར་བར། །རྒྱལ་བའི་སྒྲ་དབྱངས་བསྒྲག་ཏུ་གསོལ། །ཞེས་བསྐུལ་ལོ། །དེའི་ཚེ་རྒྱལ་པོའི་རྨི་ལམ་དུ་བྱང་ཆུབ་སེམས་དཔའ་རབ་ཏུ་བྱུང་བ་རྨིས་ཏེ། ཉུག་རུམ་ལ་བྱང་ཆུབ་སེམས་དཔའ་འདུག་གམ་དྲིས་པས་འདུག་ཟེར་རོ། །དེ་ནས་རྒྱལ་པོས་བྱང་ཆུབ་སེམས་དཔའ་རབ་ཏུ་བྱུང་བའི་ལྟས་སོ་སྙམ་སྟེ། བྱང་ཆུབ་སེམས་དཔའ་ཆགས་པར་བྱ་བའི་ཕྱིར། དཔྱིད་བསིལ། དབྱར་རན། དགུན་དྲོ་བའི་ཁང་བཟང་གསུམ། རེ་རེའང་གྲུ་སྐས་མི་ལྔ་བརྒྱ་ལྔ་བརྒྱས་འཛུགས་ཤིང་འབེབས་པའི་ཚེ། གཞོན་ནུ་སུས་ཀྱང་མ་ཚོར་བར་མངོན་པར་འབྱུང་དུ་འོང་ངོ་། །ཞེས་པའི་སྒྲ་དཔག་ཚད་ཕྱེད་དུ་བྱུང་ངོ་། །ལྟས་མཁན་ཀུན་གྱིས་ཀྱང་བཀྲ་ཤིས་ཀྱི་ཆབ་སྒོ་ནས་མངོན་པར་འབྱུང་བར་འགྱུར་རོ། །ཞེས་བསྟན་ནོ། །དེ་ནས་རྒྱལ་པོས་སྒོ་འཕར་ཆེན་པོ་སྒྲ་དཔག་ཚད་ཕྱེད་དུ་གྲགས་པ་མི་ལྔ་བརྒྱ་ལྔ་བརྒྱས་འབྱེད་ཅིང་གཅོད་པ་བྱས་སོ། །དེ་ནས་བྱང་ཆུབ་སེམས་དཔས། འདུན་པ་ལ་སྐྱེད་མོས་ཚལ་དུ་འགྲོ་བའི་ཤིང་རྟ་སྦྱོར་ཅིག །འདུན་པས་ཀྱང་རྒྱལ་པོ་ལ་དོན་དེ་གསོལ་ཏེ། རྒྱལ་པོས་གཞོན་ནུའི་ཡིད་དུ་མི་འོང་བ་མི་མཐོང་བར་བྱས་ཏེ། ཉམས་དགའ་བར་བྱས་སོ། །དེ་ནས་བྱང་ཆུབ་སེམས་དཔའ་ཤར་སྒོ་ནས་འཐོན་པ་དང་། ཉིད་ཀྱི་མཐུས། ལྷས་སྤྲུལ་པའི་རྒས་པའི་སྡུག་བསྔལ་གྱིས་ཉེན་པ་གཟིགས་ཏེ། འདུན་པ་ལ། ཁ་ལོ་སྒྱུར་བ་མི་རིད་ཉམ་ཆུང་ཞིང་། །ཤ་ཁྲག་བསྐམ་ལ་རྒྱུས་ལྤགས་ཉི་ཚེས་དཀྲིས། །མགོ་དཀར་སོ་རྣལ་ལུས་ནི་རབ་བསྐེམ་ལ། འཁར་བ་བརྟེན་ཅིང་མི་བདེ་འཁྱོར་འགྲོ་སུ། །དེས་སྨྲས་པ། ལྷ་གཅིག་མི་འདི་རྒ་བས་ཟིལ་གྱིས་ནོན། །དབང་པོ་ཉམས་ཤིང་སྡུག་བསྔལ་བརྩོན་སྟོབས་ཉམས། གཉེན་གྱི་སྐྱེ་བོས་བརྙས་ཤིང་མགོན་མེད་གྱུར། །དོན་བགྱིད་མི་ནུས་ནགས་ཁྲོད་ཤིང་ལྟར་བོར། །བྱང་ཆུབ་སེམས་དཔས་སྨྲས་པ། འདི་ཡི་ཆོས་འདི་རིགས་ཀྱི་ཡིན་ནམ་འོན་ཏམ་ནི། །འགྲོ་བ་འདི་ཀུན་ལ་ཡང་འདི་སྲིད་དེ་སྨྲོས་ཤིག །ཚིག་འདི་ཡང་དག་ཇི་བཞིན་མྱུར་དུ་སྨྲོས་ཤིག་དང་། །ཐོས་ནས་དེ་བཞིན་དོན་ལ་འདིར་ནི་ཚུལ་བཞིན་བསམ། །དེས་སྨྲས་པ། ལྷ་འདི་རིགས་ཆོས་མ་ཡིན་ཡུལ་འཁོར་ཆོས་མ་ལགས། །སྐྱེ་བོ་ཀུན་གྱི་དར་ལ་བབ་པ་རྒ་བས་འཇོམས། །ཁྱོད་ཀྱི་ཡབ་དང་ཡུམ་དང་ཉེ་དུ་གཉེན་ཚོགས་ཀྱང་། །རྒ་ལས་མ་ཐར་འགྲོས་པའི་ཐབས་ནི་གཞན་མ་མཆིས། །བྱང་ཆུབ་སེམས་དཔས་སྨྲས་པ། ཁ་ལོ་བསྒྱུར་བ་བྱིས་པའི་སྐྱེ་བོ་མི་མཁས་པའི། །བློ་ངན་གཞོན་པས་རྒྱགས་ཤིང་མྱོས་པས་རྒས་མ་མཐོང་། །ང་ནི་སླར་འགྲོ་ང་ཡི་ཤིང་རྟ་མྱུར་དུ་སྒྱུར། །ང་ཡང་རྒས་ལ་གནས་པས་རྩེ་དགས་ཅི་ཞིག་བྱ། །ཞེས་གསུངས་ནས་ནང་དུ་ལོག་གོ། ཡང་ལྷོ་སྒོར་འཐོན་པས། ན་བ་གཟིགས་ཏེ་སྨྲས་པ། ཁ་ལོ་བསྒྱུར་བ་མི་རྩུབ་ལུས་ཀྱང་མདོག་ངན་ལ། །དབང་པོ་ཐམས་ཅད་ཉམས་ཤིང་དབུགས་དབྱུང་རབ་ཏུ་དཀའ། །ཡན་ལག་ཀུན་བསྐམས་ལྟོ་བས་དཀྲུགས་ཤིང་ཉམ་ཐག་གྱུར། །རང་གི་གཅིན་རྟུག་སྨད་པའི་གནས་ན་འདུག་འདི་སུ། དེས་སྨྲས་པ། ལྷ་གཅིག་མི་འདི་ཤིན་ཏུ་ནད་ཀྱིས་བཏབ་པ་སྟེ། །ནད་ཀྱི་འཇིགས་པ་ཉེ་བར་མཆིས་པས་འགུམ་ལ་ཐུག །ནད་མེད་གཟི་བརྗིད་མ་མཆིས་སྟོབས་ཀྱང་རྣམ་པར་ཉམས། །མགོན་དང་སྐྱབས་དང་གླིང་དང་དཔུང་གཉེན་མ་མཆིས་ལགས། །བྱང་ཆུབ་སེམས་དཔས་སྨྲས་པ། ནད་མེད་པ་ཡང་རྨི་ལམ་ན་ནི་རྩེ་དང་མཚུངས། །ནད་ཀྱིས་འཇིགས་པ་འདི་དག་ཤིན་ཏུ་མི་བཟད་པ། །སྐྱེས་བུ་མཁས་པས་ནད་འདི་མཐོང་ནས་ཇི་ལྟ་བུར། །རྩེ་ལ་དགའ་དང་སྡུག་པའི་འདུ་ཤེས་བསྐྱེད་པར་འགྱུར། །ཡང་། ནུབ་ཏུ་ཤི་བ་གཟིགས་ཏེ་སྨྲས་པ། ཁ་ལོ་བསྒྱུར་བ་མི་འདི་ཁྱོགས་ལ་བླངས་ནས་ནི། །འདི་དག་སྐྲ་བཤིག་མགོ་ལ་ས་ཡིས་འཐོར་བྱེད་ཅིང་། །སྣ་ཚོགས་ངག་གི་ཚིག་ནི་བརྗོད་ལ་བྲང་བརྡུང་བས། །ཀུན་ནས་སྐོར་བ་བྱས་ཏེ་འཁྱེར་བ་སུ་ཞིག་ཡིན། དེས་སྨྲས་པ། ལྷ་གཅིག་མི་འདི་འཛམ་བུ་གླིང་དུ་གུམ་པ་སྟེ། །སླན་ཆད་ཕ་མ་མཆིས་བྲང་བུ་རྣམས་མཐོང་མི་འགྱུར། །ལོངས་སྤྱོད་ཁྱིམ་དང་མཛའ་གཉེན་ཚོགས་རྣམས་སྤངས་ནས་ནི། །འཇིག་རྟེན་ཕ་རོལ་མཆིས་ཏེ་སླན་ཆད་གཉེན་མི་མཐོང་། །བྱང་ཆུབ་སེམས་དཔས་སྨྲས་པ། རྒ་བས་གནོད་པར་འགྱུར་བའི་གཞོན་པ་ཅིར་མི་རུང་། །སྣ་ཚོགས་ནད་ཀྱིས་གནོད་འགྱུར་ནད་མེད་ཅིར་མི་རུང་། །རིང་དུ་མི་གནས་གསོན་པ་མཁས་ལ་ཅིར་མི་རུང་། དགའ་ལ་ཆགས་པ་སྐྱེས་བུ་མཁས་ལ་ཅིར་མི་རུང་། །གལ་ཏེ་རྒ་མེད་ན་མེད་འཆི་བ་མེད་གྱུར་ཀྱང་། །འོན་ཀྱང་ཕུང་པོ་ལྔ་འཛིན་སྡུག་བསྔལ་ཆེ་ཡིན་ན། །རྒ་ན་འཆི་བ་རྟག་ཏུ་འབྲང་བ་སྨོས་ཅི་དགོས། །ལེགས་པར་སླར་ལོག་རབ་ཏུ་ཐར་བར་བྱ་བར་བསམ། །ཡང་། བྱང་སྒོར་དགེ་སློང་གཟིགས་ཏེ་སྨྲས་པ། ཁ་ལོ་བསྒྱུར་བ་སྐྱེས་བུ་སེམས་ཞི་རབ་ཞི་ཞིང་། །མིག་ཕབ་འགྲོ་ལ་གཉའ་ཤིང་གང་ཙམ་ལྟ་བྱེད་ཅིང་། །ངུར་སྨྲིག་གོས་གྱོན་ཤིན་ཏུ་རབ་ཏུ་ཞི་བར་སྤྱོད། །ལྷུང་བཟེད་ཐོགས་ནས་མི་རྒོད་མ་ཁེངས་སུ་ཞིག་ཡིན། དེས་སྨྲས་པ། ལྷ་གཅིག་མི་འདི་དགེ་སློང་ཞེས་ནི་བགྱི་བ་ལགས། །འདོད་པའི་དགའ་བ་སྤངས་ཤིང་ཤིན་ཏུ་དུལ་བར་སྤྱོད། །བདག་ཉིད་ཞི་བ་ཚོལ་ཞིང་རབ་ཏུ་བྱུང་བར་གྱུར། །འདོད་ཆགས་ཞེ་སྡང་བྲལ་བར་བསོད་སྙོམས་སྤྱོད་ཅིང་རྒྱུ། །བྱང་ཆུབ་སེམས་དཔས་སྨྲས་པ། འདི་ནི་དགེ་བར་ལེགས་སྨྲས་ང་ཡང་འདོད་པ་སྟེ། །རབ་ཏུ་བྱུང་བ་མཁས་པ་རྣམས་ཀྱིས་རྟག་ཏུ་བསྔགས། །དེ་ནི་བདག་ལ་ཕན་ཞིང་སེམས་ཅན་གཞན་ལའང་ཕན། །འཚོ་བ་བདེ་ཞིང་ཉམས་མཐུན་འཆི་མེད་འབྲས་བུར་འགྱུར། །དེ་ནས་བྱང་ཆུབ་སེམས་དཔའ་ནང་དུ་ཞུགས་སོ། །རྒྱལ་པོས་ཀྱང་དེ་དག་མཐོང་ཐོས་པས། བསྲུང་བའི་ཕྱིར། ར་བ་དང་། འོབས་དང་། སྒོ་བརྟན་པོ་བཙུགས། གྲོང་ཁྱེར་གྱི་བཞི་མདོར་བསྲུང་བའི་དཔུང་བཞག །བཙུན་མོ་རྣམས་ཀྱང་གླུ་དབྱངས་དང་རྩེ་དགའ་སྦྱོར་དུ་བཅུག་གོ། དེའི་ཚེ་བྱང་ཆུབ་སེམས་དཔའ་རབ་ཏུ་འབྱུང་བའི་ལྟས་སུ། བྱ་སྐད་མི་འབྱིན། པདྨ་རྙིངས། ཤིང་ལ་མེ་ཏོག་མི་འཆགས། །གླིང་བུ་དང་པི་ཝང་རྒྱུད་ཚད། རྫ་རྔ་ལ་སོགས་བརྡུངས་ཀྱང་། སྒྲ་མེད་པར་གྱུར་པས། རྒྱལ་པོ་ཡང་སེམས་ཁོང་དུ་ཆུད་ཅིང་འདུག་གོ། ས་འཚོ་མ་ལ་ཡང་རྨི་ལམ་དུ་ས་གཡོས་པ་ལ་སོགས་པ་རྨིས་སོ། །བྱང་ཆུབ་སེམས་དཔའི་རྨི་ལམ་དུ་རྐང་ལག་གིས་རྒྱ་མཚོ་དཀྲུགས་པ་དང་། ས་མལ་ཆར་གྱུར། རི་རབ་སྔས་སུ་བཅུག །འོད་ཀྱིས་མུན་པ་བསལ། ས་ལས་གདུགས་ཤིག་བྱུང་བས། འཇིག་རྟེན་གསུམ་ཁྱབ། སྲོག་ཆགས་དཀར་ནག་བཞི་དང་། བྱ་ཁ་དོག་བཞི་པ་འོངས་ནས། ཁ་དོག་གཅིག་ཏུ་གྱུར་པ་དང་། ངན་སྐྱུག་གི་རི་ལ་འཛེགས་ཀྱང་མ་གོས་པ་དང་། ཆུས་ཁྱེར་བ་བཏོན་པ་དང་། ནད་པ་གསོས་པ་དང་། རི་རབ་ཀྱི་ངོས་ལ་སེང་གེའི་ཁྲི་ལ་འདུག་པ་ལ། ལྷ་རྣམས་ཀྱིས་ཕྱག་འཚལ་བ་རྨིས་སོ། །དེ་ནས་བྱང་ཆུབ་སེམས་དཔས། ཕས་མ་གནང་བར་རབ་ཏུ་འབྱུང་བར་མི་རིགས་སོ་སྙམ་སྟེ། ཕའི་དྲུང་དུ་སོང་སྟེ་སྨྲས་པ། བདག་མངོན་པར་འབྱུང་བའི་དུས་ལ་བབ་ཀྱིས། གེགས་དང་མི་དགྱེས་པ་མ་མཛད་ཅིག །རྒྱལ་པོས། ཁྱོད་ཅི་འདོད་པའི་མཆོག་སྦྱིན་གྱིས། ཁབ་ཏུ་བཞུགས་ཤིག །བྱང་ཆུབ་སེམས་དཔས་སྨྲས་པ། རྒ་ན་འཆི་རྒུད་མེད་པ་བཞི་སྩོལ་ཅིག །དེས་སྨྲས་པ། དེ་སྦྱིན་པའི་མཐུ་མེད་དོ། །གཞན་སློངས་ཤིག །བྱང་ཆུབ་སེམས་དཔས་སྨྲས་པ། རྒ་ན་འཆི་བའི་འཇིགས་དང་རྒུད་པར་མི་འགྱུར་བ། །ལྷ་གཅིག་གལ་ཏེ་མཆོག་བཞི་འདི་དག་མི་སྩལ་ན། །གཞན་ཡང་མཆོག་ཅིག་གསོལ་གྱིས་རྒྱལ་པོ་གསན་དུ་གསོལ། །འདི་ནས་ཤི་འཕོས་ཉིང་མཚམས་སྦྱོར་བར་མི་འགྱུར་མཛོད། །དེ་ནས་རྒྱལ་པོས་ཁྱེད་ཀྱིས་བསམ་པ་རྫོགས་པར་གྱུར་ཅིག །ཅེས་སྨྲས་སོ། །དེ་ནས་བྱང་ཆུབ་སེམས་དཔའ་རང་གི་གནས་སུ་སོང་ངོ་། །རྒྱལ་པོས་ཀྱང་དོན་དེ་ཤཱཀྱ་རྣམས་ལ་བསྙད་པས་སྲུང་ངོ་། །ཞེས་བགྲོས་ཏེ། སྒོ་བཞི་རེ་རེར་ཤཱཀྱ་གཞོན་ནུ་ལྔ་བརྒྱ་རེ་རེའང་ཤིང་རྟ་ལྔ་བརྒྱ། ཤིང་རྟ་རེ་རེའང་དཔུང་བུ་ཆུང་ལྔ་བརྒྱ་དང་བཅས་པ་བཀོད་དོ། །ཤཱཀྱ་རྒན་རབས་རྣམས་ལམ་གྱི་བཞི་མདོ་དང་སུམ་མདོར་འཁོད་དོ། །རྒྱལ་པོའང་མེལ་ཚེ་བྱེད་དོ། །དེའི་ཚེ་གནོད་སྦྱིན་རྣམས་དང་འཕྲོག་མའི་བུ་ལྔ་བརྒྱ་རྣམས་ཀྱང་། དོ་ནུབ་བྱང་ཆུབ་སེམས་དཔའ་མངོན་པར་འབྱུང་གིས། མཆོད་པའི་ལས་ལ་བརྩོན་ནོ། །རྒྱལ་པོ་སྡེ་བཞི་ཡང་ཆིབས་པ་འདེགས་པར་སེམས་སོ། །སུམ་ཅུ་རྩ་གསུམ་པ་རྣམས་ཀྱང་མཆོད་པའི་ལས་བྱེད་དོ། །བྱང་ཆུབ་སེམས་དཔའ་སྔོན་གྱི་སྨོན་ལམ་བཞི་མངོན་དུ་བྱེད་དོ། །ལྷའི་བུ་ཆོས་སྤྱོད་ལ་སོགས་པས་བཙུན་མོའི་འཁོར་མི་སྡུག་པར་བསྒྱུར་བ་ལ་གཟིགས་པས་དུར་ཁྲོད་ཀྱི་འདུ་ཤེས་བསྐྱེད་དེ། ཨེ་མ་སྐྱེ་དགུ་དག་ནི་སྡུག་བསྔལ་འགྱུར། །སྲིན་མོའི་ཚོགས་ལ་དགའ་བ་ཇི་ལྟར་རྙེད། །འདོད་པའི་ཡོན་ཏན་ཡོད་མིན་ཡོན་ཏན་འཛིན། །གཏི་མུག་མུན་པས་རབ་བསྒྲིབས་བློ་གྲོས་ངན། །དཔེར་ན་བྱ་ནི་བྱ་རྒྱར་ཆུད་པ་བཞིན། །ནམ་ཡང་འབྱུང་བ་རྙེད་པར་འགྱུར་མ་ཡིན། །ཞེས་གསུངས་ཏེ། རྣམ་པ་སུམ་ཅུ་རྩ་གཉིས་ཀྱིས་བརྟགས་ནས་མི་སྡུག་པར་བསྒོམས་སོ། །དེ་ནས་བྱང་ཆུབ་སེམས་དཔའ་ཁང་བཟངས་ཀྱི་སྟེང་དུ་སོང་སྟེ། སངས་རྒྱས་ཐམས་ཅད་ལ་ཕྱག་འཚལ་ཏེ་བལྟས་པས། བརྒྱ་བྱིན་དང་། རྒྱལ་པོ་སྡེ་བཞི་དང་། ཉི་ཟླ་གཉིས་ཀྱང་ཕྱག་འཚལ་ཞིང་འདུག་པར་མཐོང་ངོ་། །སྐར་མ་རྒྱལ་ཡང་ཤར་བར་མཐོང་ནས་འདུན་པ་ལ་སྨྲས་པ། ང་ཡི་བཀྲ་ཤིས་འདི་ནི་དོན་ཀུན་གྲུབ། །དོ་ནུབ་གདོན་མི་ཟ་བར་དོན་གྲུབ་ཀྱིས། །འདུན་པ་ཕྱི་བཤོལ་མ་བྱེད་ལ་གོར་དུ། །རྟ་རྒྱལ་རྒྱན་གྱིས་བརྒྱན་པ་ང་ལ་བྱིན། །དེས་སྨྲས་པ། གང་དུ་བཞུད་སྨྲས་པ། མངོན་པར་འབྱུང་བའོ། །དེ་ནས་འདུན་པས་ལན་མང་དུ་བཟློག་ཀྱང་། །འདོད་པའི་ཉེས་དམིགས་མང་དུ་གསུངས་ཏེ་མ་ཟློག་པ་དང་། ལྷའི་བུ་ཞི་བའི་བློ་གྲོས་དང་། བརྩེ་བ་བཀོད་པས། སེར་སྐྱ་བ་རྣམ་གཉིད་ལོག་ཅིང་། སྒྲ་མི་གྲག་པར་བྱས་སོ། །བྱང་ཆུབ་སེམས་དཔས་ཀྱང་། འདུན་པ་ལ་རྟ་བྱིན་ཅིག་ཅེས་སྨྲས་སོ། །དེའི་ཚེ་ལྷའི་དབང་པོ་དང་རྒྱལ་ཆེན་བཞི་ཡང་སེར་སྐྱར་ལྷགས་སོ། །འདུན་པས་དུས་མ་ལགས་སོ། །ཞེས་སྨྲས་པ་དང་། བྱང་ཆུབ་སེམས་དཔས་སྨྲས་པ། སེམས་ཅན་རྣམས་ཀྱི་དོན་ནི་ཚོལ་བ་ལ། །བྱང་ཆུབ་རྒ་ཤི་མེད་པའི་གནས་ཐོབ་ནས། །འགྲོ་བ་སྒྲོལ་ཞེས་ང་ཡིས་ཡུན་རིང་ནས། །སྨོན་ལམ་བཏབ་པ་དེ་ཡི་དུས་ལ་བབ། །ཅེས་སྨྲས་པ་དང་། ལྷའི་བུ་ཡང་དག་སྐུལ་པོས་བསྐུལ་བ། སྟོབས་དང་བརྩོན་འགྲུས་འཕགས་པ་མྱུར་དུ་བཞེངས། །སྡུག་བསྔལ་ཉེན་པའི་སེམས་ཅན་ཐམས་ཅད་སྒྲོལ། །ད་ནི་མངོན་པར་འབྱུང་བའི་དུས་ལ་བབ། ཅེས་བསྐུལ་ལོ། །དེ་ནས་བརྒྱ་བྱིན་གྱིས་བཀྲ་ཤིས་ཀྱི་སྒོ་ཕྱེ། འདུན་པས་རྟ་སྔགས་ལྡན་བརྒྱན་ཏེ་ཕུལ་བ་ལ་ཆིབས་ཏེ། རྒྱལ་ཆེན་བཞིས་བཏེག་ནས་ནམ་མཁའ་ལ་བྱོན་ཏེ། ཚངས་པ་བརྒྱ་བྱིན་གྱིས་ལམ་བསྟན། འོད་ཀྱིས་མུན་པ་བསལ། །མཆོད་པ་དང་། རོལ་མོ་སྣ་ཚོགས་དང་བཅས་ཏེ། གྱད་ཀྱི་ཡུལ་འདས་ཏེ། མཆོད་རྟེན་རྣམ་དག་གི་དྲུང་དུ་ཕྱིན་པ་དང་། རྟ་དང་རྒྱན། འདུན་པ་ལ་བྱིན་ཏེ། སླར་བཟློག་ཅིང་། དེར་མཆོད་རྟེན་བརྩིགས་པས། འདུན་པ་སླར་ལོག་པའི་མཆོད་རྟེན་ཟེར་རོ། །དེ་ནས་མཆོད་རྟེན་རྣམ་དག་གི་རྩར། ཉིད་ཀྱི་གཙུག་ཕུད་བཅད་པ། ལྷ་རྣམས་ཀྱིས་གདན་དྲངས་ཏེ་མཆོད་རྟེན་བརྩིགས་པས། གཙུག་ཕུད་ཀྱི་མཆོད་རྟེན་ཞེས་ཟེར་རོ། །དེ་ནས་རབ་ཏུ་བྱུང་བའི་ཚུལ་དང་ཀ་ཤི་ཀའི་གོས་མི་མཐུན་པས། རབ་བྱུང་གི་ཚུལ་དང་མཐུན་པའི་གོས་ཤིག་རྙེད་ན་རུང་སྙམ་པ་དང་། གནས་གཙང་མའི་ལྷ་རྔོན་པའི་གཟུགས་སུ་སྤྲུལ་པས། གོས་ངུར་སྨྲིག་ཕུལ་ལོ། །བྱང་ཆུབ་སེམས་དཔས་ཀྱང་། ཀ་ཤི་ཀའི་གོས་རྣམས་དེ་ལ་བྱིན་ནོ། །དེས་ཀྱང་ལག་པ་གཉིས་ཀས་བླངས་ཏེ། སྤྱི་བོར་བཞག་ནས་མཆོད་པའི་ཕྱིར་ལྷའི་འཇིག་རྟེན་དུ་སོང་ངོ་། །དེ་འདུན་པས་མཐོང་ནས་མཆོད་རྟེན་བརྩིགས་པས། ངུར་སྨྲིག་བླངས་པའི་མཆོད་རྟེན་ཟེར་རོ། །དེའི་ཚེ་དོན་གྲུབ་རབ་ཏུ་བྱུང་ངོ་ཞེས་པའི་སྒྲ་འོག་མིན་གྱི་བར་དུ་གྲག་གོ། འདུན་པས་ཀྱང་རྟ་དང་རྒྱན་ཁྱེར་ཏེ། རྒྱལ་པོ་དང་བཙུན་མོའི་འཁོར་གྱི་མྱ་ངན་བསལ་ལོ། །དེ་ནས་བྱང་ཆུབ་སེམས་དཔས། གཙུག་ཕུད་བཅད། ངུར་སྨྲིག་བགོས་ཏེ་རབ་ཏུ་བྱུང་ནས། བྲམ་ཟེ་རིགས་ལྡན་ལ་སོགས་པའི་གནས་སུ་སོང་ནས་ཡངས་པ་ཅན་དུ་བྱོན་པ་དང་། སྒྱུ་རྩལ་ཤེས་ཀྱི་བུ་རིང་འཕུར་སློབ་མ་སུམ་བརྒྱ་ལ་ཅི་ཡང་མེད་པའི་སྐྱེ་མཆེད་སྟོན་པ་དེའི་དྲུང་དུ་ཕྱིན་ཏེ། སློབ་མར་ཁས་བླངས་ཏེ་བསླབས་པས་ཅི་ཡང་མེད་པའི་སེམས་མངོན་དུ་གྱུར་ཏེ། རིང་འཕུར་ལ་ཁྱོད་ཀྱིས་ཆོས་འདི་ཙམ་ཞིག་ཁོང་དུ་ཆུད་དམ་སྨྲས་པ། དེ་བཞིན་ནོ། །བྱང་ཆུབ་སེམས་དཔས་སྨྲས་པ། དེ་ཁོ་བོས་ཀྱང་ཁོང་དུ་ཆུད་དོ། །སྨྲས་པ། ངས་གང་ཤེས་པ་ཁྱེད་ཀྱིས་ཤེས། ཁྱེད་ཀྱིས་གང་ཤེས་པ་ངས་ཤེས་ཀྱིས། གཉིས་ཀས་སློབ་མའི་ཚོགས་ལ་བསྟན་ནོ། །ཟེར་རོ། །དེ་ནས་བྱང་ཆུབ་སེམས་དཔས་ཆོས་འདིས་ངེས་པར་འབྱུང་བར་མི་འགྱུར་གྱིས། དེ་བས་ལྷག་པ་ཞིག་བཙལ་ལོ་སྙམ་སྟེ། རིམ་གྱིས་མ་ག་དྷར་སོང་སྟེ་རི་སྐྱ་བོར་བཞུགས་སོ། །དེ་ནས་ཆུ་དྲོན་ཅན་གྱི་སྒོ་ནས་རྒྱལ་པོའི་ཁབ་ཀྱི་གྲོང་ཁྱེར་དུ་ཞུགས་སོ། །དེའི་ཚེ་གྲོང་ཁྱེར་པ་རྣམས་དང་། རྒྱལ་པོ་གཟུགས་ཅན་སྙིང་པོ་ཤིན་ཏུ་དད་དེ་རྒྱལ་སྲིད་ཀྱི་ཤས་ཕུལ་བ་ཡང་མ་བཞེས་སོ། །དེ་ནས་རེངས་བྱེད་ཀྱི་བུ་ལྷག་སྤྱོད་སློབ་མ་བདུན་བརྒྱ་ལ་སྲིད་རྩེའི་སེམས་སྟོན་པ་མཐོང་ནས། བདག་འདི་ལྟ་བུའི་བརྟུལ་ཞུགས་དང་དཀའ་ཐུབ་བརྩམས་ནས། བདག་ཁྱད་པར་དུ་འཕགས་པའི་འདུ་ཤེས་བསྐྱེད་ཅིང་། ཟག་བཅས་ཀྱི་བསམ་གཏན་སུན་དབྱུང་ངོ་སྙམ་སྟེ། དེའི་སློབ་མར་ཁས་བླངས་ནས། མྱུར་དུ་སྲིད་རྩེའི་སེམས་ཁོང་དུ་ཆུད་ནས་སྔར་བཞིན་བརྗོད་ནས། འདིས་ནི་མྱང་འདས་སུ་འགྱུར་བ་མ་ཡིན་ནོ་ཞེས་སུན་ཕྱུང་སྟེ་སོང་ངོ་། །དེའི་ཚེ་ལྔ་སྡེ་ཡང་བྱང་ཆུབ་སེམས་དཔའི་རྗེས་སུ་འབྲངས་ཏེ་རིམ་གྱིས་རི་ག་ཡའི་རྩེ་མོར། སྔར་མ་ཤེས་པའི་དཔེ་གསུམ་མངོན་དུ་གྱུར་ཏེ། ཆུ་བོ་ནེ་རཉྫ་ནའི་འགྲམ་དུ་ཕྱིན་ནས། བདག་སྙིགས་མ་ལྔའི་དུས་དམན་པ་ལ་མོས་པ། བརྟུལ་ཞུགས་ངན་པས་དག་པར་འཛིན་པ་སུན་དབྱུང་བའི་ཕྱིར། བརྟུལ་ཞུགས་དང་དཀའ་ཐུབ་བརྩམ་མོ་སྙམ་སྟེ། ལོ་དྲུག་ཏུ་མཁའ་ཁྱབ་ཀྱི་ཏིང་ངེ་འཛིན་ལ་བཞག་སྟེ། ཏིལ་འབྲུ་གཅིག་དང་། རྒྱ་ཤུག་འབྲུ་གཅིག་དང་། འབྲས་འབྲུ་གཅིག་གིས་ལོ་དྲུག་ཏུ་དཀའ་བ་སྤྱད་དེ། དབུགས་རྒྱུ་བ་བཅད་དེ་བཞུགས་སོ། །དེའི་ཚེ་ལྷའི་བུ་ཁ་ཅིག་གིས་ལྷ་མོ་སྒྱུ་འཕྲུལ་ལ་གཞོན་ནུ་ཤིའོ་ཞེས་བརྗོད་པས། ལྷ་མོས་འོངས་པ་དང་། བྱང་ཆུབ་སེམས་དཔའི་ལུས་བསྐམས་པ་དང་། ཤི་བ་དང་འདྲ་བ་མཐོང་ནས། བལྟམས་མ་ཐག་ཏུ་ངའི་སྐྱེ་བའི་མཐའ་མ་འདིའོ་ཞེས་པའི་དམ་བཅའ་ཡང་མ་རྫོགས་དྲང་སྲོང་ནག་པོའི་ལུང་བསྟན་ཡང་མི་བདེན་ནོ། །ཞེས་སྨྲེ་སྔགས་འདོན་པ་ལ། བྱང་ཆུབ་སེམས་དཔས་སྨྲས་པ། ཉི་ཟླ་སྐར་ཚོགས་ས་ལ་ལྟུང་འགྱུར་སྲིད། །སོ་སོ་སྐྱེ་བོ་ཡིན་ཡང་ང་མི་འཆི། །དེ་ཕྱིར་འདི་ལ་མྱ་ངན་ཁྱོད་མ་བྱེད། །རིང་པོར་མི་ཐོགས་བྱང་ཆུབ་སངས་རྒྱས་མཐོང་། །ཞེས་སྨྲས་པས་དགའ་སྟེ་གནས་སུ་སོང་ངོ་། །གྲོང་གི་བ་ལང་རྫི་ལ་སོགས་པས་ཀྱང་རྣ་བར་ཤིང་བལ་བཅུག་ནས། སྣར་འབྱིན་པ་ལ་སོགས་བྱེད་དོ། །བདུད་ཀྱང་སྲོག་གཅེས་པར་གྱིས་ཤིག་ཅེས་པ་ལ་སོགས་སྙན་པར་སྨྲས་ཤིང་། གླགས་བཙལ་ཡང་མ་རྙེད་དོ། །དེ་ནས་བྱང་ཆུབ་སེམས་དཔས་དཀའ་ཐུབ་ཀྱིས་གྲོལ་བར་འཛིན་པ་དགག་པའི་ཕྱིར། ཟས་རགས་པ་ཟོས་ལ་བྱང་ཆུབ་སྙིང་པོར་འགྲོའོ་སྙམ་སྟེ། ཟས་རགས་པ་བཟའོ་ཞེས་བརྗོད་པས་ལྔ་སྡེ་མ་དད་ནས་བཱ་ར་ཎ་སིར་སོང་ངོ་། །བྱང་ཆུབ་སེམས་དཔས་ལེགས་སྐྱེས་མའི་བྲན་མོ་གྲུམ་མ་ཞེས་པའི་རོ་གསོ་རས་ཀྱིས་དཀྲིས་པ་དེ་བླངས་ཏེ། ལྷས་ལག་པ་བརྡབས་པའི་རྫིང་དུ་བརྒྱ་བྱིན་གྱིས་བཞག་པའི་རྡོ་ལེབ་ལ་བཀྲུས་སོ། །དེ་ངལ་ཏེ་རྫིང་ནས་འབྱུང་སྙམ་པ་ལ་བདུད་ཀྱིས་གད་པ་མཐོན་པོར་སྤྲུལ་པ་ལ། །ཤིང་གི་ལྷ་མོས་ཡལ་ག་སྨད་པ་ལ་འཇུས་ཏེ་བྱུང་ནས། ཤིང་སྒྲུབ་བྱེད་ཀྱི་དྲུད་དུ་ཕྱག་དར་ཁྲོད་ཀྱི་སྣམ་སྦྱར་བསྒྲུབས་ཤིང་གནས་གཙང་མའི་ལྷས་ཀྱང་། གོས་ངུར་སྨྲིག་ཕུལ་བ་བཞེས་ཏེ་སྤྱོད་ཡུལ་གྱི་གྲོང་དུ་ཞུགས་སོ། །དེ་ནས་ལྷས་སྦྲན་ཏེ། ལེགས་སྐྱེས་མས་བ་སྟོང་གི་འོ་མ་ལན་བདུན་དུ་ཉིང་ཁུར་བྱས་པ་དང་། འབྲས་དང་འབྲུ་གསར་པ་བླུགས་ཏེ་བཙོས་པས། དེའི་ནང་དུ་དཔལ་བེའུ་ལ་སོགས་པའི་བཀྲ་ཤིས་པ་དག་སྣང་བས་དགའ་སྟེ། མཚན་མཁན་གྱིས་ཀྱང་བདུད་རྩི་ཐོབ་པར་ལུང་བསྟན་ནོ། །དེ་ནས་བྱང་ཆུབ་སེམས་དཔའ་མགྲོན་དུ་བོས་ནས་འོ་ཐུག་སྦྲང་རྩི་ཅན་གྱིས་གསེར་སྣོད་བཀང་སྟེ་ཕུལ་བས་བཞེས་ནས། ནེ་རཉྫ་ནའི་འགྲམ་དུ་སོང་སྟེ། ཟས་དང་ཆོས་གོས་བཞག་ནས་ཁྲུས་མཛད་པས། ལྷས་མཆོད་ཅིང་། ཁྲུས་ཆུ་ལྷས་ཁྱེར་ལ། སྐྲ་དང་། ཨག་ཚོམས་ལེགས་སྐྱེས་མས་ཁྱེར་ཏེ། ཆུ་དེའི་ཀླུ་མོས་ཕུལ་བའི་སེང་ཁྲི་ལ་བཞུགས་ཏེ། འོ་ཐུག་གསོལ་ནས། གསེར་སྣོད་ཆུར་བོར་བ་ཀླུའི་རྒྱལ་པོ་རྒྱ་མཚོས་ཁྱེར་བ་ལ་བརྒྱ་བྱིན་གྱིས་བླངས་ནས། སུམ་ཅུ་རྩ་གསུམ་དུ་ཁྱེར་ནས། ལོ་རེ་བཞིན་སྣོད་ཀྱི་དུས་སྟོན་བྱེད་དོ། །བྱང་ཆུབ་སེམས་དཔས་ཁྲུས་བྱས། ཟས་ཟོས་པས། ལུས་མཐུ་དང་ལྡན་པས་བདུད་ལས་རྒྱལ་བའི་ཕྱིར་བྱང་ཆུབ་ཀྱི་ཤིང་དྲུང་དུ་སྐྱེས་བུ་ཆེན་པོའི་སྟོབས་ཀྱིས་ཆས་སོ། །རླུང་དང་ཆར་གྱིས་ལམ་ཕྱགས་ཤིང་ཆག་ཆག་གདབ། །རི་ཤིང་ཐམས་ཅད་དང་། བུ་ཆུང་བཙས་མ་ཐག་ཐམས་ཅད་ཀྱང་མགོ་དེ་ཕྱོགས་སུ་སྟོན་ནོ། །སྟོང་གསུམ་གྱི་བདག་པོ་ཚངས་པ་དབང་བསྒྱུར་གྱིས་འཁོར་ལ་བྱང་ཆུབ་སེམས་དཔའ་དོ་ནུབ་བྱང་ཆུབ་སྙིང་པོར་འགྲོ་ཡིས། མཆོད་པའི་ལས་གྱིས་ཤིག་ཅེས་བསྒོས་ནས། མཆོད་པའི་བཀོད་པ་བསམ་གྱིས་མི་ཁྱབ་པ་སྤྲུལ་ལོ། །བྱང་ཆུབ་སེམས་དཔས་འོད་བཀྱེ་སྟེ། ཉོན་མོངས་དང་སྡུག་བསྔལ་ཞི་ཞིང་སྣོད་དག་པར་སྦྱངས་ཏེ། ཀླུ་ནག་པོས་བསྟོད་དོ། །དེ་ནས་ལམ་གྱི་གཡས་ན་རྩྭ་འཚོང་བཀྲ་ཤིས་རྩྭ་བརྔ་བ་ལ། བཀྲ་ཤིས་རྩྭ་ནི་ང་ལ་མྱུར་དུ་བྱིན། །དེ་རིང་ང་ལ་རྩྭས་ནི་དོན་ཆེན་འགྱུར། །དཔུང་དང་བཅས་པའི་བདུད་ནི་བཅོམ་ནས་སུ། །བྱང་ཆུབ་དམ་པ་ཞི་བ་རེག་པར་འགྱུར། །ཞེས་གསུངས་པ་དང་། དེས་ཀྱང་རྩྭ་སྔོ་འཇམ་ཡིད་དུ་འོང་བ་ཕུལ་ཏེ། ཁྱེར་ནས་བྱང་ཆུབ་ཤིང་ལ་ལན་གསུམ་བསྐོར་ཏེ། རྩྭ་རྩེ་མོ་ནང་དུ་བསྟན་ནས་རྩ་བ་ཕྱིར་བསྟན་པ་ལ། ཤར་ཕྱོགས་སུ་བལྟས་ཏེ་འདུག་ནས་ལུས་དྲང་པོར་བསྲངས། དྲན་པ་མངོན་དུ་བཞག་ནས། སྟན་འདིར་བདག་གི་ལུས་ནི་བསྐམས་ཀྱང་རུང་། །པགས་པ་རུས་པ་ཤ་རྣམས་ཞིག་ཀྱང་རུང་། །བསྐལ་མང་རྙེད་དཀའི་བྱང་ཆུབ་མ་ཐོབ་པར། །སྟན་འདི་ལས་ནི་ལུས་བསྐྱོད་མི་བྱའོ། །ཞེས་ཡིད་དམ་བརྟན་པོ་བྱས་སོ། །དེའི་ཚེ། ལྷ་རྣམས་བྱང་ཆུབ་སེམས་དཔའ་བསྲུང་བའི་ཕྱིར་ཕྱོགས་བཅུར་འཁོད་དོ། །བྱང་ཆུབ་སེམས་དཔས་ཀྱང་། བྱང་ཆུབ་སེམས་དཔའ་བསྐུལ་བ་ཞེས་བྱ་བའི་འོད་བཀྱེ་སྟེ། ཞིང་དཔག་མེད་སྣང་བར་བྱས་ནས། བྱང་ཆུབ་སེམས་དཔའ་མང་པོ་བསྡུས་ནས་མཆོད་པ་བྱེད་དོ། །དེ་ནས་བདུད་ལ་མ་སྦྲན་པར། འཚང་རྒྱ་བར་མི་རིགས་སོ་སྙམ་སྟེ། སྨིན་མཚམས་ནས་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བའི་འོད་ཟེར་བཀྱེ་བས་བདུད་ཀྱི་གནས་ཐམས་ཅད་སྣང་ཞིང་གཡོས། མོག་མོག་པོར་བྱས་ཏེ། སེམས་ཅན་ཤིན་ཏུ་དག་པ་བསྐལ་མང་སྤྱོད་སྤྱད་པ། །ཟས་གཙང་སྲས་པོ་རྒྱལ་སྲིད་དག་ནི་རབ་སྤངས་ཏེ། །ཕན་བྱེད་དེ་ནི་བདུད་རྩི་མངོན་པར་འདོད་པས་བྱུང་། །བྱང་ཆུབ་ཤིང་དྲུང་འོང་གིས་དེ་རིང་སྒྲིམ་པར་གྱིས། །ཞེས་པ་ལ་སོགས་པའི་སྒྲ་བྱུང་ཞིང་། བདུད་སྡིག་ཅན་ལའང་རང་གནས་མུན་པས་ཁྱབ་པ་ལ་སོགས་པའི་རྨི་ལམ་སོ་གཉིས་རྨིས་ཏེ། རང་གི་འཁོར་ལ་སྦྲན་པ་དང་། བུ་དེད་དཔོན་གྱིས་བཟློག་ཀྱང་མ་ཟློག་པར། གནོད་སྦྱིན་གྲུལ་བུམ་ལྟོ་འཕྱེ་ཆེན་པོའི་གཟུགས། །སྲིན་པོ་ཡི་དྭགས་ཤ་ཟའི་གཟུགས་དང་བཅས། །འཇིགས་བྱེད་མི་སྡུག་དྲག་གཟུགས་ཇི་སྙེད་པ། །ཐམས་ཅད་སྒྱུ་ཡིས་དེར་ནི་སྤྲུལ་པ་བྱས། །ཞེས་པ་ལ་སོགས་པ་རྣམ་འགྱུར་དུ་མ་མཐོང་ཡང་། ཤཱཀྱའི་སྲས་པོ་ཆོས་རྣམས་རྟེན་འབྱུང་བ། །དངོས་པོ་མེད་པའི་ངོ་བོ་ཉིད་དུ་རྟོགས། །ནམ་མཁའ་ལྟ་བུའི་སེམས་དང་རབ་ཏུ་ལྡན། །དཔུང་བཅས་གཡོ་སྒྱུ་མཐོང་ཡང་མྱོས་པ་མེད། །དེ་ནས་བདུད་ཀྱི་གཡས་ནས་བྱང་ཆུབ་སེམས་དཔའ་ལ་དགའ་བ་རྣམས་ཀྱིས་བཟློག །གཡོན་ནས་མི་དགའ་བ་རྣམས་ཀྱིས་བསྐུལ་ཏེ་མཚོན་ཆ་སྣ་ཚོགས་པ་འཕངས་པས། མེ་ཏོག་ཏུ་གྱུར་ཏོ། །དེ་ནས་བདུད་ཀྱིས། ཁྱོད་ཀྱི་བསོད་ནམས་དེ་ཙམ་གྱིས་ཐར་པ་ག་ལ་ཐོབ་ཅེས་སྨྲས་པ་དང་། བྱང་ཆུབ་སེམས་དཔས་ཁྱོད་ཀྱིས་གཏན་པ་མེད་པའི་མཆོད་སྦྱིན་གཅིག་བྱས་པས་འདོད་ཁམས་ཀྱི་དབང་ཕྱུག་ཏུ་གྱུར་པ་ཡིན། ངས་གཏན་པ་མེད་པའི་མཆོད་སྦྱིན་དུ་མ་བྱས་སོ་ཞེས་བརྗོད་པ་དང་། བདུད་ཀྱིས། སྔོན་ཆད་ཁོ་བོས་མཆོད་སྦྱིན་ཁ་ན་མ་ཐོ་མེད། །གཏན་པ་མེད་པར་བྱས་པ་ཁྱོད་འདིར་དཔང་དུ་ཡོད། །ཁྱོད་ལ་འདིར་ནི་དཔང་པོ་གང་ཡང་ཡོད་མིན་པས། །སྨྲས་ཀྱང་ཕན་པ་ཅི་ཡོད་ཁྱོད་ནི་ཕམ་པར་གྱུར། །བྱང་ཆུབ་སེམས་དཔས་སྨྲས་པ། ས་འདི་ང་ཡི་དཔང་ཡིན་ནོ་གསུང་ཏེ། ཕྱག་གཡས་པ་ས་ལ་བརྡབས་ཏེ། ས་འདི་འགྲོ་བ་ཀུན་གྱི་གནས་ཡིན་ཏེ། རྒྱུ་དང་མི་རྒྱུ་སྙོམས་ཤིང་ཉེ་འཁོན་མེད། །འདི་ནི་བདག་གི་དཔང་སྟེ་བདག་བརྫུན་མེད། །འདི་ལ་ཁྱོད་ནི་བདག་གི་དཔང་བྱོས་ཤིག །ཅེས་གསུངས་པས། ས་རྣམ་པ་དྲག་ཏུ་གཡོས་པའི་གསེབ་ནས། སའི་ལྷ་མོ་བརྟན་མ་ལུས་ཕྱེད་ཕྱུང་ནས། ཐལ་མོ་སྦྱར་ཏེ། སྐྱེས་བུ་ཆེན་པོ་དེ་དེ་བཞིན་ནོ། །ཁྱོད་ཀྱིས་ཇི་སྐད་སྨྲས་པ་དེ་བཞིན་ཏེ། འདི་ནི་བདག་ལ་མངོན་སུམ་མོ། །འོན་ཀྱང་བཅོམ་ལྡན་འདས་ཉིད་ལྷ་དང་བཅས་པའི་འཇིག་རྟེན་གྱི་དཔང་དུ་གྱུར་པ་ལགས་སོ། །ཞེས་སྨྲས་ཏེ་མི་སྣང་བར་གྱུར་ཏོ། །གཡོ་ཅན་དཔུང་བཅས་ས་སྒྲ་དེ་ཐོས་ནས། །ནགས་སུ་སེང་གེས་སྒྲ་བསྒྲགས་ཝས་ཐོས་དང་། །བྱ་རོག་རྡོ་འཕངས་ནོད་ལ་བྱེར་བ་བཞིན། །སྔངས་སྐྲག་སྙིང་གས་ཐམས་ཅད་རབ་ཏུ་བྱེར། །དེ་ནས་སྡིག་ཅན་ཡིད་མ་བདེ་ནས། །རང་གི་བུ་མོ་རྣམས་སད་དུ་བཏང་སྟེ། དེ་དག་གིས་ཀྱང་བཞིན་ཕྱེད་འགེབས་པ་ལ་སོགས་པ། གཡོ་སྒྱུ་སོ་གཉིས་བསྟན་ཀྱང་བསླུར་མ་ཚུགས་པས་སྡིག་ཅན་ཡིད་མི་དགའོ། །དེའི་ཚེ་ཤིང་གི་ལྷ་མོ་དཔལ་ལྡན་ལ་སོགས་བརྒྱད་ཀྱིས། བྱང་ཆུབ་སེམས་དཔའ་ལ་ཁྱོད་ནི་དགུང་ཟླ་ཡར་གྱི་ངོ་ལྟར་མཛེས་པའོ། །ཞེས་སོགས་བཅུ་དྲུག་གིས་བསྟོད་དོ། །གནས་གཙང་མའི་ལྷས་བདུད་ལ་སྡིག་ཅན་ཁྱོད་ནི་གླང་རྒན་འདམ་དུ་བྱིང་བ་ལྟར་ཉམ་ཆུང་བའོ། །ཞེས་སོགས་བཅུ་དྲུག་གིས་སྨད་ཅིང་། ལྷ་རྣམས་ཀྱི་བཅུ་དྲུག་གིས་བཟློག་ཀྱང་། མི་སྡོག་པར། མཚོན་ཆ་སྣ་ཚོགས་འཕངས་ཤིང་ཆོ་འཕྲུལ་སྣ་ཚོགས་བསྟན་ཡང་གླགས་མ་རྙེད་ཅིང་བདུད་དཔུང་མི་འཁྲུགས་པ་ཡང་འཐོར་ཏེ་ཞག་བདུན་དུ་མ་ཕྲད་དོ། །བདུད་མང་པོས་བྱང་ཆུབ་ཏུ་སེམས་བསྐྱེད་དོ། །དེ་ནས་བྱང་ཆུབ་སེམས་དཔས་བསམ་གཏན་བཞི་བསྐྱེད། རིག་པ་གསུམ་བསྐྱེད་ནས། ནམ་གྱི་ཆ་སྨད་སྐྱ་རེངས་འཆར་ཁ་རྔ་བརྡུང་བའི་ཚོད་ཙམ་ན། རྟེན་འབྲེལ་བཅུ་གཉིས་དང་བདེན་བཞི་ཤེས་ནས། སྐད་ཅིག་གཅིག་དང་ལྡན་པའི་ཤེས་རབ་ཀྱིས་མངོན་པར་སངས་རྒྱས་སོ། །དེ་ནས་ཤིང་ཏ་ལ་བདུན་ཙམ་དུ་འཕགས་ཏེ། ལམ་གྱི་རྒྱུད་ནི་ཆད་དོ་ཞེས་པ་ལ་སོགས་པ་ཆེད་དུ་བརྗོད་པ་བརྗོད་དོ། །ལྷ་རྣམས་ཀྱིས་ཀྱང་མེ་ཏོག་པུས་ནུབ་ཙམ་གཏོར་ཏེ་མཆོད་དོ། །འཇིག་རྟེན་སྣང་བར་བྱས། ས་གཡོས། ཕྱོགས་བཅུའི་སངས་རྒྱས་ཀྱིས་ཆོས་ཀྱི་དགའ་བ་བསྐུར། ཕྱག་བརྐྱངས་ཏེ། བདག་ཅག་ཇི་ལྟར་བྱང་ཆུབ་ཐོབ་ལྟར་ཁྱོད་སངས་རྒྱས། །དཔེར་ན་མར་དང་མར་གྱི་སྙིང་ཁུ་མཚུངས་འདྲ་བཞིན། ཞེས་གསུངས་ཤིང་། ལྷའི་བུ་མོ་རྣམས་ཀྱིས་བསྟོད་དོ། །སྟོན་པས་ཀྱང་། བསོད་ནམས་རྣམ་སྨིན་བདེ་སྟེར་སྡུག་བསྔལ་ཐམས་ཅད་སེལ། །བསོད་ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། །བདུད་བཅོམ་ནས་ནི་བྱང་ཆུབ་མྱུར་དུ་རེག་པར་འགྱུར། །མྱ་ངན་ལས་འདས་ཞི་བ་བསིལ་བའི་དངོས་པོ་ཐོབ། །ཅེས་ཆེད་དུ་བརྗོད་དོ། །ལྷ་རྣམས་ཀྱིས་རྒྱ་ཆེར་བསྟོད་ནས་སྐྱིལ་ཀྲུང་མ་བཤིག་པར་ཞག་བདུན་དུ་བྱང་ཆུབ་ཤིང་ལ་གཟིགས་སོ། །ཞག་བདུན་པ་གཉིས་པ་ལ། །སྟོང་གསུམ་རྒྱང་རིང་དུ་འཆག་གོ།
གསུམ་པ་ལ། ངས་འདིར་སྡུག་བསྔལ་མཐར་ཕྱུང་སྟེ། བྱང་ཆུབ་ཀྱི་སྙིང་པོ་ལ་སྤྱན་མི་འཛུམས་པར་གཟིགས་སོ། །བཞི་པ་ལ་ཤར་ནུབ་ཀྱི་བར་དུ་རྒྱང་མི་རིང་བར་འཆག་གོ། དེ་ནས་བདུད་སྡིག་ཅན་གྱིས་མྱ་ངན་ལས་འདའ་བར་གསོལ་བ་བཏབ་ཀྱང་། །གདུལ་བྱའི་དོན་བྱས་ཟིན་གྱི་བར་དུ་མི་འདའ་བར་ཞལ་ཀྱིས་བཞེས་ཏེ། མྱ་ངན་དུ་གྱུར་ཅིང་བུ་མོ་དགའ་མ་ལ་སོགས་པའང་དྲུང་དུ་སོང་བ་ན་རྒན་མོར་མཛད་དོ། །ཞག་བདུན་པ་ལྔ་པ་ལ་ཡུལ་ངན་ཆེན་པོ་བྱུང་སྟེ། ཀླུ་བཏང་བཟུང་གི་གནས་ན་བཞུགས་སོ། །དྲུག་པ་ལ་ཤིང་ནྱ་གྲོ་དྷར་ར་སྐྱོང་དུ་བཞུད་དེ། ཀུན་ཏུ་རྒྱུ་རྣམས་ལ། ཆོས་ཐོས་པ་དང་མཐོང་བ་དང་། །དབེན་པར་དགའ་པ་བདེ་བ་ཡིན། །སྲོག་ཆགས་འབྱུང་པོ་རྣམས་ལ་བསྡམས། །གནོད་པ་མི་བྱེད་འཇིག་རྟེན་བདེ། །ཞེས་སོགས་གསུངས་སོ། །བདུན་པ་ལ། ཤིང་སྒྲོལ་རྒྱུའི་དྲུང་དུ་བཞུགས་ཏེ། ཚོང་པ་ག་གོན་དང་བཟང་པོས། སྤྲང་རྩི་དང་སྐྱོ་མ་དང་། བུ་རམ་ཤིང་བཤུས་པ་དག་ཕུལ་བ་དང་། ལག་པས་བླངས་ན་མ་ལེགས། སྔོན་གྱི་སངས་རྒྱས་ཀྱིས་སྣོད་ཇི་ལྟ་བུར་བཞེས་སྙམ་པ་དང་། རྒྱལ་ཆེན་བཞིས་གསེར་ལ་སོགས་པའི་ལྷུང་བཟེད་ཕུལ་བ་མ་བཞེས་པས། རྣམ་སྲས་ལ་སྔོན་པོའི་རིས་ཀྱི་ལྷས་བྱིན་པའི་རྡོའི་ལྷུང་བཟེད་བཞི་ཡོད་པ་རེ་རེས་བཟུང་སྟེ། མེ་ཏོག་གིས་བཀང་སྟེ་ཕུལ་བས། ཕྱག་བརྐྱངས་ཏེ། བདེ་བར་གཤེགས་ལ་ལྷུང་བཟེད་ཕུལ་ཅིག་དང་། ཁྱོད་ནི་ཐེག་པ་མཆོག་གི་སྣོད་དུ་འགྱུར། །ང་འདྲ་དག་ལ་ལྷུང་བཟེད་ཕུལ་བ་ནི། །དྲན་དང་བློ་གྲོས་ནམ་ཡང་ཉམས་མི་འགྱུར། །ཞེས་གསུངས་ཏེ་བཞེས་ནས། གཅིག་ཏུ་བྱིན་གྱིས་བརླབས་ཏེ་དེར་བླངས་སོ། །དེ་ནས་ག་གོན་དང་བཟང་པོས་བ་སྟོང་གི་འོ་མའི་ཉིང་ཁུའི་སྤྲིས་མ་བཞམས་ཏེ། རིན་པོ་ཆེའི་གཞོང་པར་བླུགས་ཏེ་ཕུལ་བ་གསོལ་ཏེ། གཞོང་པ་བོར་བ་ཚངས་པས་ཁྱེར་རོ། །སྟོན་པས་ཀྱང་། ལྷ་ཡི་བཀྲ་ཤིས་དོན་གྲུབ་ཅིང་། །ཕྱོགས་རྣམས་བཀྲ་ཤིས་བྱེད་པ་དེས། །ཁྱེད་ཀྱི་དོན་རྣམས་འགྲུབ་གྱུར་ཅིག །ཐམས་ཅད་མྱུར་དུ་མཐུན་པར་ཤོག །ཅེས་པ་ལ་སོགས་པའི་ཤིས་པ་བརྗོད་དེ། སྦྲང་རྩི་འབྱུང་བ་ཞེས་པའི་རྒྱལ་བར་ལུང་བསྟན་ནོ། །དེ་ནས་སྟོན་པ་ཐུགས་ལས་ཆུང་ངུར་བཞུགས་ཏེ། ཟབ་ཅིང་རྡུལ་བྲལ་འོད་གསལ་འདུས་མ་བྱས། །བདུད་རྩིའི་ཆོས་ནི་བདག་གིས་ཐོབ་པར་གྱུར། །བདག་གིས་བསྟན་ཀྱང་གཞན་གྱིས་མི་ཤེས་ཏེ། །མི་སྨྲ་ནགས་འདབས་གནས་པར་བྱའོ་སྙམ། །ཞེས་དགོངས་ཤིང་། འཇིག་རྟེན་ཀུན་ལ་སྙིང་རྗེ་མཐའ་ཡས་ང་། །གཞན་གྱིས་གསོལ་བ་བཏབ་ལ་ང་མི་སྡོད། །སྐྱེ་བོ་འདི་དག་ཚངས་ལ་དད་པ་སྟེ། །དེ་ཡིས་གསོལ་བ་བཏབ་ན་འཁོར་ལོ་བསྐོར། །སྙམ་སྟེ་འོད་བཀྱེ་བས། སྟོང་གསུམ་གྱི་བདག་པོ་ཚངས་པ་གཙུག་ཕུད་ཅན་གྱིས་ཤེས་ནས། གྲོགས་སྦྲན་ཏེ་ཚངས་པ་འབུམ་ཕྲག་དྲུག་ཅུ་རྩ་བརྒྱད་དང་བཅས་པས་ཐལ་མོ་སྦྱར་ཏེ། ཡེ་ཤེས་ཆེན་པོ་མཆོག་གི་དཀྱིལ་འཁོར་བསྒྲུབས་ནས་ནི། །ཕྱོགས་བཅུ་དག་ཏུ་འོད་ཟེར་རྣམ་པར་བཀྱེ་མཛད་དེ། །ཡེ་ཤེས་ཟེར་གྱིས་མི་ཡི་པདྨ་ཁ་འབྱེད་པ། །སྨྲ་བའི་ཉི་མ་དེ་རིང་ཅི་སླད་བཏང་སྙོམས་བཞུགས། །ཞེས་པ་ལ་སོགས་པས་བསྐུལ་བས། ཅང་མི་གསུང་གནང་སྟེ་སོང་ངོ་། །སྟོན་པ་ཡང་ཐུགས་ལས་ཆུང་བ་ལ་གཞོལ་བ་དང་། དེས་བརྒྱ་བྱིན་སྦྲན་ཏེ། བརྒྱ་བྱིན་གྱིས། ཟླ་བ་ཉ་བ་གཟའ་ལས་ཐར་པ་ལྟར། །ཁྱེད་ཀྱི་ཐུགས་ནི་རྣམ་པར་གྲོལ་བ་ལགས། །གཡུལ་ལས་རྣམ་པར་རྒྱལ་བ་བཞེངས་སུ་གསོལ། །འཇིག་རྟེན་མུན་པར་ཤེས་རབ་འོད་དབྱུང་གསོལ། །ཞེས་གསོལ་བས་ཅང་མི་གསུང་བ་དང་། ཚངས་པས། ཀུན་ཏུ་འཚལ་བར་འགྱུར་བ་མཆིས་ལགས་ཀྱི། །ཐུབ་པ་ཁྱོད་ཀྱིས་ཆོས་ནི་བསྟན་དུ་གསོལ། །ཞེས་པ་དང་། སྟོན་པས། སྐྱེ་དགུ་འདོད་པ་རྣམས་ལ་བཅིངས། །རྒྱུན་གྱིས་རབ་ཏུ་བརྟས་པ་ཡིན། །ངས་ནི་ཚེགས་ནི་ཆེན་པོས་རྟོགས། །དེ་ལྟ་བས་ན་བསྟན་མི་ཕན། །ཞེས་གསུངས་སོ། །ཡང་སྟོན་པ་ཐུགས་ལས་ཆུང་བ་ལ་ཐུགས་བཏུད་པ་དང་། མི་དགེ་བའི་ལྟས་མེ་མི་འབར་བ་ལ་སོགས་པ་བྱུང་བས། གཙུག་ཕུད་ཅན་གྱིས། མ་ག་དྷར་འདིར་སྔོན་ཆོས་མ་དག་པ། །དྲི་མ་བཅས་པར་སེམས་དཔའི་སྨྲ་བ་བྱུང་། །དེ་སླད་ཐུབ་པ་བདུད་རྩིའི་སྒོ་དབྱེ་གསོལ། །དྲི་མེད་སངས་རྒྱས་ཆོས་ནི་ཉན་ཅིང་མཆིས། །ཞེས་ནན་ཏན་དུ་གསོལ་བས། བཅོམ་ལྡན་འདས་ཀྱིས་མ་ངེས་པའི་སེམས་ཅན་ལ་གཟིགས་ནས། ཚངས་པ་མ་ག་དྷར་ཡི་སེམས་ཅན་གང་། །རྣ་བ་ལྡན་ཞིང་དད་དང་ལྡན་གྱུར་པ། །མི་ཚེ་འདུ་ཤེས་རྟག་ཏུ་ཆོས་ཉན་པ། །དེ་དག་ལ་ནི་བདུད་རྩིའི་སྒོ་དབྱེ་འོ། །ཞེས་ཞལ་གྱིས་བཞེས་སོ། །དེ་ནས་བྱང་ཆུབ་ཤིང་གི་ལྷ་ཆོས་སྲེད་ལ་སོགས་པས། སྟོན་པ་ཆོས་ཀྱི་འཁོར་ལོ་གང་དུ་བསྐོར། བཱ་ར་ཎ་སི་རུའོ། །དེ་ནི་སྐྱེ་བོ་ཉུང་ཞིང་གྲིབ་མ་ཆུང་བས། གཞན་དུ་རིགས་སོ་ཞེས་གསོལ་པས། བཀའ་སྩལ་པ། བཞིན་བཟངས་དག །དེ་སྐད་མ་ཟེར་ཅིག་གསུངས་ཏེ། ཐོག་མར་གདུལ་སླ་བ་སུ་ལ་ཆོས་སྟོན་སྙམ་པ་དང་། ལྷག་སྤྱོད་འདས་ཏེ་ཞག་བདུན་ལོན། རིང་འཕུར་འདས་ཏེ་ཞག་གསུམ་ལོན་པར་རིག་ནས། ལྔ་སྡེ་ལ་བསྟན་པར་བྱའོ་ཞེས་དགོངས་ཏེ། མ་ག་དྷར་ནས་གསལ་ལྡན་དུ་སོང་བ་དང་། འཚོ་བ་པ་ཞིག་དང་ཕྲད་དེ། གཏམ་མང་པོ་བྱས་ཏེ། འཚོ་བ་པས། ཁྱེད་དབང་པོ་ནི་གསལ། པགས་པ་ནི་དག་ན། སུ་ལས་ཚངས་པར་སྤྱད། བཀའ་སྩལ་པ། ང་ལ་སློབ་དཔོན་གང་ཡང་མེད། །ང་དང་འདྲ་བ་ཡོད་མ་ཡིན། །ང་ནི་གཅིག་པུར་རྫོགས་སངས་རྒྱས། །བསིལ་གྱུར་ཟག་པ་མེད་པ་ཡིན། །དེས་སྨྲས་པ། དགྲ་བཅོམ་པར་ཞལ་གྱིས་འཆེའམ། བཀའ་བསྩལ་པ། ང་ནི་འཇིག་རྟེན་དགྲ་བཅོམ་པ། །ང་ནི་སྟོན་པ་བླ་ན་མེད། །ལྷ་དང་ལྷ་མིན་དྲི་ཟར་བཅས། །ང་ཡི་དོ་ཟླའི་གང་ཟག་མེད། །དེས་སྨྲས་པ། རྒྱལ་བར་ཞལ་གྱིས་འཆེའམ། བཀའ་སྩལ་པ། གང་དག་ཟག་པ་ཟད་བརྙེས་པ། །ང་འདྲ་རྒྱལ་བར་ཤེས་པར་བྱ། །ང་ནི་སྡིག་པའི་ཆོས་ལས་རྒྱལ། །དེ་བས་ཉེ་འགྲོ་ང་རྒྱལ་ཡིན། །དེས་སྨྲས་པ། གར་བཞུད། བཀའ་སྩལ་པ། ང་ནི་བཱ་ར་ཎ་སིར་འགྲོ། །གྲོང་ཁྱེར་གསལ་ལྡན་སོང་ནས་ནི། །ལོང་བ་ལྟ་བུའི་འཇིག་རྟེན་ལ། །མཚུངས་པ་མེད་པའི་འོད་བྱའོ། །ཞེས་སོགས་གསུངས་པས། དེ་བཞིན་དུ་འགྱུར་རོ། ཟེར་ཏེ། ལྷོར་སོང་ངོ་། །སྟོན་པ་བྱང་དུ་རི་ག་ཡ་དང་ལྟེང་རྒྱས་དང་ཙན་དན་ལར་དང་། གྲོང་ཁྱེར་ཁ་ལོ་བསྒྱུར་ནས། གངྒཱའི་འགྲམ་དུ་གཤེགས་སོ། །གངྒཱའི་མཉན་པས་གྲུ་བཙས་བླངས་པས། ང་ལ་གྲུ་བཙས་མེད་གསུངས་ཏེ་ནམ་མཁའ་ལ་གཤེགས་སོ། །རྒྱལ་པོ་གཟུགས་ཅན་སྙིང་པོས་དེ་ཐོས་ནས། ཕྱིས་རབ་བྱུང་ལ་གྲུ་བཙས་མི་འདོད་པར་བྱས་སོ། །