ཡུམ་གྱི་མདོའི་འགྲེས་རྐང་གསལ་བར་བྱེད་པ་མཁས་པའི་འཇུག་ངོགས།
ཡུམ་གྱི་མདོའི་འགྲེས་རྐང་གསལ་བར་བྱེད་པ་མཁས་པའི་འཇུག་ངོགས་ཞེས་བྱ་བ་བཞུགས།
ན་མོ་གུ་རུ་ཨཱཪྱ་མཉྫུ་ཤྲཱི་ཡེ། སྨྲ་བའི་སྐྱེས་མཆོག་སྟོན་པ་བཅོམ་ལྡན་འདས། །གང་དེའི་རྒྱལ་ཚབ་མི་ཕམ་ཆོས་ཀྱི་རྗེ། །ཤིང་རྟ་ཆེན་པོ་ཐོགས་མེད་སྐུ་མཆེད་དང་། །རྒྱལ་བ་གཉིས་པ་ཡབ་སྲས་ལ་བཏུད་ནས། །རྒྱལ་བའི་གསུང་རབ་གཞན་དང་ཤེར་ཕྱིན་གྱི། །བརྗོད་བྱ་ཀུན་བྱང་ཆོས་ཀྱི་ཁྱད་པར་འགའ། །གཞུང་མང་དག་ལ་རིང་དུ་འདྲིས་པའི་བློས། །མཁས་པའི་དགོངས་པ་ཇི་བཞིན་བཤད་པར་བྱ། །དེ་ལ་འདིར་རྒྱལ་བའི་ཡུམ་ལས་གཟུགས་ནས་རྣམ་མཁྱེན་གྱི་བར་ཀུན་བྱང་གི་ཆོས་ཀྱི་དབྱེ་བ་མང་དུ་བཤད་པ་དེ་དག་གི་མཚན་ཉིད་དབྱེ་བ་སོགས་ཇི་ལྟར་ཡིན་པའི་དགོངས་པ་རྒྱས་པར་ཕྱེ་སྟེ་བཀྲལ་ན་རང་ལ་ཕན་ཡོན་ཆེན་པོར་འགྱུར་བས་ལེགས་མོད། འོན་ཀྱང་མང་དུ་དོགས་པས་བསྡུས་ནས་བཤད་པར་བྱ་སྟེ། དེ་ཡང་འགྲེས་རྐང་བརྒྱ་རྩ་བརྒྱད་ཀྱིས་བསྟན་པ་རྣམས་བསྡུ་ན་གཉིས་སུ་འདུ་སྟེ། ཀུན་ནས་ཉོན་མོངས་ཕྱོགས་དང་། །རྣམ་པར་བྱང་བའི་ཕྱོགས་ཀྱི་ཆོས་གཉིས་སོ། །དང་པོ་ལ་ལྔ་བཅུ་རྩ་གསུམ་སྟེ། གཟུགས་ཕུང་སོགས་ཕུང་བོ་ལྔ། མིག་སོགས་དབང་བོ་དྲུག །གཟུགས་སོགས་ཡུལ་དྲུག །མིག་གི་རྣམ་པར་ཤེས་པ་སོགས་རྣམ་ཤེས་དྲུག །མིག་གི་འདུས་ཏེ་རེག་པ་སོགས་རེག་པ་དྲུག །མིག་གི་འདུས་ཏེ་རེག་པའི་རྐྱེན་གྱིས་ཚོར་བ་སོགས་ཚོར་བ་དྲུག །ས་སོགས་ཁམས་དྲུག མ་རིག་པ་སོགས་རྟེན་འབྲེལ་ཡན་ལག་བཅུ་གཉིས་སོ། །དེ་དག་རིམ་པར་བཤད་ན། དང་པོ་ཕུང་བོ་ལ་གསུམ། དབྱེ་གཞི་དང་། དབྱེ་བ་དང་། དགོས་པའོ། །དང་པོ་ནི། བློ་ཡུལ་དུ་སྤུངས་པ་ལྟར་སྣང་བའམ་འདུས་པ་སྟེ་ཕུང་བོའི་དོན་ནོ། །དབྱེ་ན་ལྔ་སྟེ། གཟུགས་ཀྱི་ཕུང་བོ། ཚོར་བ། འདུ་ཤེས། འདུ་བྱེད། རྣམ་ཤེས་ཀྱི་ཕུང་བོའོ། །དང་པོ་ལ་མཚན་ཉིད་དང་། དབྱེ་བའོ། །དང་པོ་ལ། སྤྱིར་གཟུགས་སུ་རུང་བ་ནི། གཟུགས་ཀྱི་མཚན་ཉིད་ཡིན་ཏེ། འཇུག་པ་ལས། གཟུགས་རུང་མཚན་ཉིད་ཅན་ནི་གཟུགས། ཞེས་སོ། །གཞན་བཞི་ལའང་། ཚོར་བ་མྱོང་བའི་བདག་ཉིད་ཅན། །འདུ་ཤེས་མཚན་མར་འཛིན་པ་སྟེ། །འདུ་བྱེད་མངོན་པར་འདུ་བྱེད་པའོ། །ཡུལ་ནི་སོ་སོར་རྣམ་རིག་པ། །རྣམ་པར་ཤེས་པའི་མཚན་ཉིད་དོ། །ཞེས་གསུངས་པ་ལྟར་ཏེ། ཕུང་བོའི་དོན་ནི་སྔར་བཞིན་སྦྱར་བར་བྱའོ། །དབྱེ་ན། འབྱུང་བ་དང་། འབྱུང་གྱུར་གྱི་གཟུགས་གཉིས། དང་པོ་ནི། ས་ཆུ་མེ་རླུང་སྟེ་བཞིའོ། །གཉིས་པ་འབྱུང་གྱུར་ལ་ཁ་དོག་དང་དབྱིབས་དང་དེ་ལས་གཞན་པའི་གཟུགས་གསུམ་སྟེ། དང་པོ་ནི་རྩ་བ་དང་ཡན་ལག་གི་ཁ་དོག་དང་། གཉིས་པ་ནི། རིང་ཐུང་སོགས་ཀྱི་དབྱིབས་དང་། གསུམ་པ་ནི། མིག་ལ་སོགས་པའི་དབང་བོ་གཟུགས་ཅན་རྣམས་དང་། སྒྲ་དྲི་རོ་རྣམས་དང་གཟུགས་དང་རེག་བྱ་གཉིས་ཀྱི་ཕྱོགས་གཅིག་རྣམས་འབྱུང་འགྱུར་རོ། །གཉིས་པ་ལ་མཚན་ཉིད་དང་། དབྱེ་བའོ། །དང་པོ་ནི། མྱོང་བྱ་བདེ་སྡུག་སོགས་རྣམ་སྨིན་དངོས་བཏགས་ཅི་རིགས་མྱོང་བས་རབ་ཏུ་ཕྱེ་བའི་སེམས་བྱུང་དེ། ཚོར་བའི་མཚན་ཉིད། འདི་ལ་གང་གིས་མྱོང་བྱེད་དང་གང་མྱོང་བྱ་དང་ཇི་ལྟར་མྱོང་ཚུལ་གསུམ་གྱིས་ཤེས་པར་བྱ་ཞིང་། ཚོར་བ་དངོས་ནི་དེ་གསུམ་ལས་གང་གིས་མྱོང་བར་བྱེད་པ་སྟེ། གཞན་ལའང་ཅི་ལྟར་རིག་པར་ཤེས་པར་བྱའོ། །དབྱེ་ན་བདེ་སྡུག་བར་མ་གསུམ་ཅི་རིགས་མ་འདྲེས་པར་མྱོང་བྱེད་ཀྱི་ཚོར་བ་གསུམ་མོ། །གསུམ་པ་ལ་གཉིས་ལས། དང་པོ་ནི། ཡུལ་དང་དབང་བོ་དང་རྣམ་ཤེས་གསུམ་འདུས་ཏེ་ཡུལ་གྱི་སྤུ་རིས་མི་འདྲ་བའི་མཚན་མ་འཛིན་པས་རབ་ཏུ་ཕྱེ་བའི་སེམས་བྱུང་ཏེ། འདུ་ཤེས་ཀྱི་མཚན་ཉིད་དང་། འདི་དང་འོག་མ་གཉིས་ཏེ་གསུམ་ལའང་བྱེད་པ་པོ་དང་བྱ་བ་དང་བྱེད་པ་གསུམ་གསུམ་གྱི་སྒོ་ནས་ཤེས་པར་བྱའོ། །དབྱེ་ན་རྟོགས་བཅས་རྟོག་མེད་ཀྱི་འདུ་ཤེས་གཉིས་ལས། དང་པོ་ནི། སོ་སྐྱེའི་ཡིད་ཀྱི་རྣམ་པར་ཤེས་པའི་འཁོར་དུ་གྱུར་པའི་རྟོག་པའི་འདུ་ཤེས་རགས་པ་རྣམས་ཕལ་ཆེར་ཏེ། འདི་དང་འདིའོ་ཞེས་མཐོང་ཐོས་བྱེ་བྲག་འབྱེད་པའི་ཤེས་པ་རྣམས་སོ། །འོན་ཀྱང་བརྡ་མི་ཤེས་པའི་བྱིས་པའི་འདུ་ཤེས་ནི་རྟོག་མེད་ཀྱི་ཕྱོགས་སུ་འདུ་བར་མཛད་དོ། །རྟོག་མེད་ཀྱི་འདུ་ཤེས་ནི། འདི་དང་འདིའོ་སྙམ་དུ་མི་རྟོག་པ་དོན་དམ་མངོན་སུམ་དུ་རྟོགས་པའི་མཉམ་གཞག་ཡེ་ཤེས་རྣམས་དང་བསམ་གཏན་གཟུགས་མེད་ཀྱི་སྙོམས་འཇུག་རྣམས་སོ། །བཞི་བ་ལ་གཉིས་ཀྱི་དང་པོ་ནི། ཕུང་བོ་གཞན་བཞི་གང་རུང་ལས་གཞན་པའི་འདུས་བྱས་དེ། འདུ་བྱེད་ཀྱི་མཚན་ཉིད། དབྱེ་ན་མཚུངས་ལྡན་འདུ་བྱེད་དང་། ལྡན་མིན་འདུ་བྱེད་གཉིས། དང་པོ་ནི། སེམས་ཡུལ་ལ་གཡོ་བར་བྱེད་པའི་སེམས་བྱུང་རྣམས་དང་། དགེ་མི་དགེ་ལུང་མ་བསྟན་གྱི་ལས་རྣམས་སོ། །གཉིས་པ་ནི་གཟུགས་དང་སེམས་སོགས་སྐྱེ་འཇིག་གནས་གསུམ་བྱེད་པའི་གནས་སྐབས་ལ་བཞག་པའི་དུས་བྱས་ཏེ། སྐྱེ་རྒ་ན་འཆི་མི་རྟག་འཇིག་པ་སོགས་ལྟ་བུའོ། །ལྔ་པ་ལ་གཉིས་ཀྱི་དང་པོ་ནི། རང་གི་ཡུལ་གྱི་ངོ་བོ་ལ་དམིགས་པས་རབ་ཏུ་ཕྱེ་བའི་རྣམ་རིག་དེ། རྣམ་ཤེས་ཀྱི་མཚན་ཉིད། དབྱེ་ན་གཟུགས་སྒྲ་དྲི་རོ་རེག་བྱ་ཆོས་ཤེས་པའི་རྣམ་པར་ཤེས་པ་དྲུག་གོ །གསུམ་པ་ལ་གོ་རིམ་སོགས་ཡོད་ཀྱང་འདིར་དགོས་པ་ཙམ་བཤད་ན། ཕུང་བོ་ལྔར་བསྟན་པ་ལ་དགོས་པ་ཡོད་དེ། གང་ཟག་གི་བདག་ཏུ་འཛིན་པའི་འཁྲུལ་བ་སྐྱེ་བའི་གཞིར་ཕུང་བོ་ལྔར་ངེས་ལ། ཕུང་བོ་ལྔའི་དབྱེ་བ་ལེགས་པར་ཤེས་ན་ཕུང་བོ་གང་ཟག་གི་བདག་ཏུ་འཁྲུལ་པའི་བློ་ལྡོག་པར་འགྱུར་བའི་ཕྱིར། ཕུང་བོ་ལྔ་སོ་སོ་ནས་ཀྱང་བདག་ཏུ་འཁྲུལ་བ་སྐྱེ་བའི་གཞི་ཡིན་ཏེ། མིག་སོགས་དབང་བོ་ལྔས་ཡུལ་ལ་ལོངས་སྤྱོད་པ་ན། གཟུགས་ལ་ལྟ་བ་པོའི་གང་ཟག་གི་བདག་ཡོད་པར་འཁྲུལ། ཚོར་བ་གསུམ་ལ་སྲེད་པ་གསུམ་གྱིས་ལོངས་སྤྱོད་པ་ན་རྣམ་སྨིན་མྱོང་བ་པོའི་གང་ཟག་གི་བདག་ཡོད་པར་འཁྲུལ། འདུ་ཤེས་ཀྱིས་མཐོང་ཐོས་བྱེ་བྲག་འབྱེད་པའི་སྒོ་ནས་ཐ་སྙད་འདོགས་པ་ན་ཐ་སྙད་འདོགས་པ་པོའི་རང་དབང་བའི་བདག་ཡོད་པར་འཁྲུལ། འདུ་བྱེད་ཀྱི་ལས་དཀར་ནག་གསོག་ཅིང་སྐྱེ་རྒ་ན་འཆི་དང་འགྲོ་འདུག་སོགས་བྱེད་པ་ན་དེ་གསོག་པ་པོ་དང་སྐྱེ་བ་པོ་སོགས་དང་། འགྲོ་འདུག་སོགས་བྱེད་པ་པོའི་གང་ཟག་གི་བདག་ཡོད་པར་འཁྲུལ། སེམས་སེམས་བྱུང་སྐྱེ་བ་ན་དེའི་གནས་རྣམ་པར་ཤེས་པ་ལ་རྟག་པའི་བདག་ཏུ་འཁྲུལ་བའི་བློ་སྐྱེ་བའི་ཕྱིར། བློ་དེ་རྣམས་ལྡོག་ཚུལ་ཡོད་དེ། ཕུང་བོ་ཕན་ཚུན་བརྟེན་ནས་བཞག་པའི་ཆོས་ཙམ་དུ་ཤེས་པས་དེ་ལྡོག་པར་འགྱུར་བའི་ཕྱིར་རོ། །གཞན་ཡང་ཕུང་བོ་ལྔ་བསྟན་པ་ལ་དགོས་པ་ཡོད་དེ། གཟུགས་དང་སེམས་སེམས་བྱུང་ལ་རིལ་བོ་གཅིག་ཏུ་འཛིན་པའི་རྨོངས་པ་རྣམ་པར་བཟློག་པའི་ཆེད་ཡིན་པའི་ཕྱིར་རོ། །དེ་བཞིན་དུ་འཆད་པར་འགྱུར་བ་གཞན་དག་ལའང་དགོས་པ་རེ་ཡོད་པ་ཤེས་པར་བྱའོ། །གཉིས་པ་དབང་བོ་བཤད་པ་ལ་གཉིས། དབྱེ་གཞི་དང་། དབྱེ་བའོ། །དང་པོ་ནི། རང་འབྲས་རྣམ་ཤེས་བསྐྱེད་པ་ལ་དབང་བྱེད་པའི་འདུས་བྱས་ཞིག་སྐབས་འདིའི་དབང་བོའི་དོན་ནོ། །དབྱེ་ན་དྲུག་སྟེ། མིག་གི་དབང་བོ། རྣ་བ། སྣ། ལྕེ། ལུས། ཡིད་ཀྱི་དབང་བོའོ། །དང་པོ་ལ། རང་འབྲས་མིག་གི་རྣམ་པར་ཤེས་པའི་ཐུན་མོང་མ་ཡིན་པའི་བདག་རྐྱེན་བྱེད་པ་ལ་དབང་བྱེད་པའི་གཟུགས་ཅན་དང་བ་ནི། མིག་གི་དབང་བོའི་མཚན་ཉིད་དམ་ངོ་བོ་མིག་གི་ཁམ་སོགས་ཀྱང་དེས་མཚོན་ནུས། དེ་ཡང་མེ་ལོང་དང་བའི་ནང་དུ་གཟུགས་བརྙན་སྣང་བ་བཞིན་དུ་མིག་གི་དབང་བོ་དེ་ནི་ཁ་དོག་སོགས་ཀྱི་གཟུགས་བརྙན་འཆར་དུ་རུང་བའི་གཟུགས་ཅན་དང་བ་ཞིག་གོ །རྣ་བའི་དབང་པོ་སོགས་ཀྱི་མཚན་ཉིད་ལ། རང་འབྲས་རྣ་བའི་རྣམ་ཤེས་ཀྱི་ཞེས་སོགས་དང་། རང་འབྲས་སྣའི་སོགས་དང་། དེ་བཞིན་དུ་ལྕེ་དང་ལུས་ལ་སྦྱར་བར་བྱའོ། །ཡིད་ཀྱི་དབང་བོའི་མཚན་ཉིད་ནི། རང་འབྲས་ཡིད་ཀྱི་རྣམ་པར་ཤེས་པའི་ཐུན་མོང་མ་ཡིན་པའི་བདག་རྐྱེན་བྱེད་པ་ལ་དབང་བྱེད་པའི་འདུས་བྱས་ཞིག་གོ །བྱེ་བྲག་སྨྲ་བས་མིག་གི་དབང་བོ་ནི་མིག་གི་འབྲས་བུ་ལ་གོ་སྙོད་ཀྱི་མེ་ཏོག་ལྟར་གནས་པ་རྒུན་འབྲུམ་ཙམ་པ་ཤིན་དུ་དང་བ་ཞིག་དང་། རྣ་བའི་དབང་པོ་ནི། རྣ་ལ་གྲོ་ག་བཅུས་པ་ལྟ་བུའི་རྣམ་པ་དང་། སྣ་དབང་རྒྱ་ཁབ་གཤིབས་པ་ལྟ་བུ། ལྕེ་དབང་ནི་ལྕེ་ལ་ཟླ་བ་ཕྱེད་པ་ལྟ་བུ་དང་། ལུས་དབང་ནི་ལུས་ཀྱི་ཆ་རྣམས་ལ་རྡུལ་ཕྲན་ལྟར་གནས་པར་འདོད་དོ། ཁ་ཅིག་སེམས་ཙམ་པས་མིག་དབང་དེ་མིག་ཤེས་བསྐྱེད་པ་ལ་དབང་བྱེད་པའི་ནུས་པ་ཞིག་ལ་འདོད་ཅེས་གསུངས་ཡང་། རང་ལུགས་གོང་དུ་བཤད་པ་ལྟར་ཡིད་དབང་མ་གཏོགས་འབྱུང་གྱུར་གྱི་གཟུགས་ཤིན་དུ་དང་བ་སྟེ། རྒྱལ་ཚབ་རྗེ་དང་མངོན་པ་ཀུན་བཏུས་ཀྱི་དགོངས་པའོ། །འོ་ན། མིག་དང་མིག་དབང་དང་མིག་གི་ཁམས་དང་མིག་གི་སྐྱེ་མཆེད་རྣམས་འགལ་ལམ་ཞེ་ན། ཀུན་བཏུས་དང་ཊིཀ་ལྟར་ན་མི་འགལ་ཏེ། མིག་ལྟ་བུས་རྣམ་ཤེས་བསྐྱེད་པར་དབང་བ་དང་འཛིན་པ་དང་སྐྱེད་པའི་སྒོ་ནས་རིམ་པ་བཞིན་དུ་དབང་བོ་དང་ཁམས་དང་སྐྱེ་མཆེད་དུ་བཞག་སྟེ། གཞན་དང་ལྔ་ལའང་སྦྱར་བར་བྱའོ། །བྱེ་བྲག་སྨྲ་བས་མིག་དབང་གིས་གཟུགས་མཐོང་གི །མིག་ཤེས་ཁོ་ནས་མི་མཐོང་ཞེས་འདོད་ཀྱང་། འདིར་གཉིས་ཀས་གཟུགས་མཐོང་ཞིང་། དེ་ཡང་མིག་དབང་ལ་སྣང་བ་ཙམ་གྱི་སྒོ་ནས་མཐོང་བར་བཞག་ལ། མིག་ཤེས་ཀྱིས་ནི་གཟུགས་ཀྱི་རྣམ་པ་ཤར་ཏེ། གཟུང་བའི་སྒོ་ནས་རྟོགས་སོ། །འདི་དྲུག་དང་གཟུགས་སོགས་ཡུལ་དྲུག་ལ་སྐྱེ་མཆེད་བཅུ་གཉིས་ཞེས་ཀྱང་བྱའོ། །གསུམ་པ་ཡུལ་གཟུགས་སོགས་ལ་གཉིས། དབྱེ་གཞི་དང་། དབྱེེ་བའོ། །དང་པོ་ནི། དབང་བོ་ལ་བརྟེན་ནས་རྣམ་ཤེས་ཀྱིས་རིག་པར་བྱ་བ་སྟེ། འདིར་ཡུལ་གྱི་དོན་ནོ། །དབྱེ་ན་དྲུག་སྟེ། གཟུགས། སྒྲ། དྲི། རོ། །རེག་བྱ། ཆོས་སོ། །དང་པོ་ལ། སྐབས་འདིའི་གཟུགས་ནི་གཟུགས་ཀྱི་སྐྱེ་མཆེད་ལ་དགོངས་པས་དེའི་མཚན་ཉིད་ནི། རང་འཛིན་མིག་ཤེས་ཀྱི་ཡུལ་གཙོ་བོར་གྱུར་བའི་ཕྱིའི་སྐྱེ་མཆེད་དོ། །དབྱེ་ན་ཁ་དོག་དང་དབྱིབས་གཟུགས་གཉིས་ཡོད། རང་འཛིན་ཉན་ཤེས་ཀྱིས་གོ་བར་བྱ་བའི་མཉན་བྱ། སྒྲའི་མཚན་ཉིད། དབྱེ་ན་ཟིན་པ་དང་མ་ཟིན་པའི་སྒྲ་གཉིས། རང་འཛིན་སྣ་ཤེས་ཀྱིས་སྣོམ་བྱ། དྲིའི་མཚན་ཉིད། དབྱེ་ན་ཞིམ་མི་ཞིམ་གཉིས། རང་འཛིན་ལྕེ་ཤེས་ཀྱིས་མྱང་བྱ། རོའི་མཚན་ཉིད། དབྱེ་ན་མངར་བ། སྐྱུར་བ། ཁ་བ། སྐ་བ། ཚྭ་བ། ལན་ཚྭ་བ་དང་དྲུག རང་འཛིན་ལུས་ཤེས་ཀྱིས་རེག་བྱ། རེག་བྱའི་མཚན་ཉིད། དབྱེ་ན་བཅུ་གཅིག་སྟེ། འབྱུང་བཞིའི་རེག་བྱ་བཞི་དང་། འཇམ་རྩུབ། ལྕི་ཡང་། བཀྲེས་སྐོམ། གྲང་བ་སྟེ་འབྱུང་གྱུར་གྱི་རེག་བྱ་བདུན་ནོ། །ཡིད་ཤེས་ཀྱི་ཡུལ་གཙོ་བོར་གྱུར་བ་ནི། འདིར་ཆོས་ཏེ། དབྱེ་ན། འདུས་བྱས་དང་། འདུས་མ་བྱས་ཀྱི་ཆོས་གཉིས་སོ། །བཞི་བ་རྣམ་ཤེས་ལ། དབྱེ་གཞི་དང་། དབྱེ་བའོ། །དང་པོ་ནི། ཡུལ་གྱི་ངོ་བོ་ལ་དམིགས་པ་ཙམ་གྱིས་རབ་ཏུ་ཕྱེ་བའི་རྣམ་པར་རིག་པ་སྟེ། རྣམ་ཤེས་ཀྱི་དོན་ནོ། །འདི་ལ་ཤེས་བྱ་ཤེས་བྱེད་ཤེས་ཚུལ་གསུམ་གྱིས་རིག་པར་བྱའོ། །དབྱེ་ན་དྲུག་སྟེ། མིག་གི་རྣམ་ཤེས་རྣ་བ་སྣ་ལྕེ་ལུས་ཡིད་ཀྱི་རྣམ་ཤེས་སོ། །རང་གི་ཐུན་མོང་མིན་པའི་བདག་རྐྱེན་མིག་དབང་བོ་ལ་བརྟེན་ནས་ཡུལ་གཟུགས་ཀྱི་ངོ་བོ་ལ་དམིགས་པ་ཙམ་གྱི་རབ་ཏུ་ཕྱེ་བའི་རིགས་གནས་ཀྱི་རྣམ་པར་རིག་པ་དེ། མིག་གི་རྣམ་ཤེས་ཀྱི་མཚན་ཉིད། དེ་བཞིན་དུ་རང་གི་ཐུན་མོང་མིན་པའི་བདག་རྐྱེན་རྣ་བ་སྣ་ལྕེ་ལུས་ཡིད་དབང་ལ་བརྟེན་ནས་ཡུལ་སྒྲ་དྲི་རོ་རེག་བྱ་ཆོས་ལ་དམིགས་པས་རབ་ཏུ་ཕྱེ་བའི་རིགས་གནས་ཀྱི་རྣམ་རིག་རྣམས། རིམ་པ་བཞིན་དུ་རྣ་བ་སྣ་ལྕེ་ལུས་ཡིད་ཀྱི་རྣམ་ཤེས་ཀྱི་མཚན་ཉིད་དོ། །ལྔ་བ་རེག་པ་ལ། དབྱེ་གཞི་དང་། དབྱེ་བའོ། །དང་པོ་ནི། ཡུལ་དང་དབང་བོ་དང་རྣམ་ཤེས་གསུམ་འདུས་པ་ལ་བརྟེན་ནས་ཡུལ་གྱི་འགྱུར་བ་དང་པོར་གཅོད་པའི་སེམས་བྱུང་སྟེ། འདིར་རེག་པའི་དོན་ནོ། །འདི་ལ་གང་གིས་རེག་པ་དང་། གང་ལ་རེག་པ་དང་ཇི་ལྟར་རེག་པ་གསུམ་གྱིས་ཤེས་པར་བྱའོ། །དབྱེ་ན་དྲུག་སྟེ། མིག་གི་འདུས་ཏེ་རེག་པ་ནས་ཡིད་ཀྱི་འདུས་ཏེ་རེག་པའི་བར་རོ། །གཟུགས་དང་མིག་དབང་དང་མིག་གི་རྣམ་ཤེས་གསུམ་འདུས་པ་ལ་བརྟེན་ནས་ཡུལ་གྱི་འགྱུར་བ་དང་པོར་གཅོད་པའི་སེམས་བྱུང་དེ་མིག་གི་འདུས་ཏེ་རེག་པའི་མཚན་ཉིད། དེ་བཞིན་དུ་སྒྲ་རྣ་བ་དེའི་རྣམ་ཤེས། །དྲི་སྣ་དེའི་རྣམ་ཤེས། རོ་ལྕེ་དེའི་རྣམ་ཤེས། རེག་བྱ་ལུས་དེའི་རྣམ་ཤེས། ཆོས་ཡིད་དེའི་རྣམ་ཤེས་གསུམ་འདུས་པ་ལ་བརྟེན་ནས་ཞེས་སོགས་སྔར་བཞིན་སྦྱར་ཏེ། རྣ་བའི་འདུས་ཏེ་རེག་པ་ནས་ཡིད་ཀྱི་འདུས་ཏེ་རེག་པའི་བར་གྱི་མཚན་ཉིད་དོ། །ཡུལ་གྱི་འགྱུར་བ་ནི་ཚོར་བས་མྱོང་བ་དང་མཐུན་པའི་བདེ་སྡུག་སོགས་སོ། །དྲུག་པ་ཚོར་བ་ལ། དབྱེ་གཞི་དང་། དབྱེ་བའོ། །དང་པོ་ནི་སྔར་ལྟར་རམ་ཡང་ན། ཡུལ་དབང་རྣམ་ཤེས་གསུམ་འདུས་པ་ལ་བརྟེན་ནས་རེག་པས་བཅད་པ་དང་མཐུན་པའི་ཡུལ་ཉམས་སུ་མྱོང་བའི་སེམས་བྱུང་སྟེ། འདིར་ཚོར་བའི་དོན་ལྡོག་གོ །འདི་ལའང་ཚོར་བྱེད་དང་ཚོར་བྱ་དང་ཇི་ལྟར་ཚོར་བ་གསུམ་གྱིས་ཤེས་པར་བྱའོ། །དབྱེ་ན་དྲུག་སྟེ། མིག་གི་འདུས་ཏེ་རེག་པའི་རྐྱེན་གྱིས་ཚོར་བ་ནས་ཡིད་ཀྱི་འདུས་ཏེ་རེག་པའི་རྐྱེན་གྱིས་ཚོར་བའི་བར་རོ། །གཟུགས་དང་མིག་དབང་དང་དེའི་རྣམ་ཤེས་གསུམ་འདུས་པ་ལ་བརྟེན་ནས་མིག་གི་འདུས་ཏེ་རེག་པས་བཅད་པ་དང་མཐུན་པའི་ཡུལ་གྱི་འགྱུར་བ་ཉམས་སུ་མྱོང་བའི་སེམས་བྱུང་དེ། མིག་གི་འདུས་ཏེ་རེག་པའི་རྐྱེན་གྱིས་ཚོར་བའི་མཚན་ཉིད། དེ་བཞིན་དུ་སྒྲ་རྣ་བ་དེའི་རྣམ་ཤེས་གསུམ་འདུས་པ་ལ་བརྟེན་ནས་ཞེས་སོགས་དང་གཞན་ལའང་སྦྱར་ཏེ་མཚན་ཉིད་ཤེས་པར་བྱའོ། །ཚོར་བ་དང་པོ་ལྔས་ཡུལ་སྣང་བའི་ཚུལ་གྱིས་མྱོང་ལ། ཕྱི་མ་ཡིད་ཀྱི་རྣམ་ཤེས་ཀྱི་འཁོར་དུ་གྱུར་པའི་ཚོར་བས་ཞེན་པའི་ཚུལ་གྱིས་མྱོང་ངོ་། །བདུན་པ་ཁམས་ལ། དབྱེ་གཞི་དང་། དབྱེ་བའོ། །དང་པོ་ནི། རང་གི་མཚན་ཉིད་དང་འབྲས་བུ་འཛིན་པའམ་རྒྱུ་དང་རིགས་བྱེད་པའི་ཆོས་ཏེ། ཁམས་ཀྱི་དོན་ནོ། །དབྱེ་ན། སྤྱིར་དམིགས་པ་ཡུལ་གྱི་ཁམས་དྲུག་དང་། རྟེན་དབང་པོའི་དྲུག་དང་། བརྟེན་པ་རྣམ་ཤེས་ཀྱི་ཁམས་དྲུག་སྟེ་ཁམས་བཅོ་བརྒྱད་ཡོད་དེ། གཟུགས་ནས་ཆོས་ཁམས་ཀྱི་བར་དང་། མིག་ནས་ཡིད་ཁམས་ཀྱི་བར་དང་། མིག་གི་རྣམ་ཤེས་ནས་ཡིད་ཀྱི་རྣམ་པར་ཤེས་པའི་ཁམས་ཀྱི་བར་རོ། །དེ་དག་གི་ཁྱད་པར་ནི་སྔར་བཤད་པ་རྣམས་ཀྱིས་ཤེས་ལ། སྐབས་འདིའི་ཁམས་ལ་དྲུག་ཡོད་དེ། ས་ཁམས་ཆུ་མེ་རླུང་ནམ་མཁའ་རྣམ་ཤེས་ཀྱི་ཁམས་སོ། །སྲ་ཞིང་འཐས་པ་ཉིད་སའི་ཁམས་ཀྱི་མཚན་ཉིད། དེ་བཞིན་དུ་བརླན་ཞིང་བཤེར་བ་ཆུའི་ཁམས་དང་། ཚ་ཞིང་སྲེག་པ་མེའི་ཁམས་དང་། ཡང་ཞིང་གཡོ་བ་རླུང་གི་ཁམས་དང་། ཐོགས་བཅས་ཀྱི་རེག་བྱ་བཀག་ཙམ་གྱིས་ཕྱེ་བ་ནམ་མཁའི་ཁམས་དང་། ཡུལ་གྱི་ངོ་བོ་དམིགས་པ་ཙམ་གྱིས་རབ་ཏུ་ཕྱེ་བའི་རྣམ་རིག་གི་ཁམས། རྣམ་པར་ཤེས་པའི་ཁམས་ཀྱི་མཚན་ཉིད་དོ། །འདིའི་ཙམ་སྒྲས་ནི་ཁྱད་པར་རིག་པ་མི་འགོག་ཀྱང་དགོས་པ་ཡོད་དོ། །ས་སོགས་འབྱུང་བ་བཞི་མིག་ཤེས་ཀྱི་གཟུང་བྱ་མིན་ཀྱང་། དེའི་ཁ་དོག་ནི་མིག་ཤེས་ཀྱི་གཟུང་ཡུལ་ཡིན་ཏེ། སའི་ཁ་དོག་དང་དབྱིབས་རྣམས་ས་མ་ཡིན་ཀྱང་། འཇིག་རྟེན་ནས་དཀར་བོ་དང་སེར་བོ་སོགས་མཐོང་ཞེས་པའི་ཐ་སྙད་བྱེད་པའི་ཕྱིར་ཏེ། མཛོད་ལས། འཇིག་རྟེན་གྱི་ནི་ཐ་སྙད་དུ། ཁ་དོག་དབྱིབས་ལས་ཞེས་བརྗོད། ཞེས་སོགས་གསུངས་པ་ལྟར་འབྱུང་བ་གཞན་གསུམ་ལའང་འགྲེའོ། །ཤིང་དང་རྡོ་དང་ལྕགས་སོགས་ལ་སྲ་ཞིང་འཐས་པ་ཡོད་པས་ན་དེ་དག་སའི་ཁམས་ཡིན་ནམ་མིན་ཞེ་ན། འདི་ལ་ཁ་ཅིག་སའི་ཁམས་ཡིན་ཀྱང་ས་མིན་ཞེས་གསུངས་མོད། དེ་དག་གི་སྲ་བ་སའི་ཁམས་ཡིན་ཀྱང་ངོ་བོ་ནི་དེའི་རིགས་ཀྱི་འབྱུང་གྱུར་རམ་འབྱུང་བ་གང་ཡིན་དཔྱད་པར་བྱ་སྟེ། འབྱུང་བ་ཡིན་ན་རེག་བྱའི་སྐྱེ་མཆེད་ཡིན་དགོས་པར་གསུངས་པའི་ཕྱིར་རོ། །དེ་བཞིན་དུ་འོ་མ་སོགས་དང་། ཉི་མའི་འོད་ཟེར་སོགས་དང་། སྤྲིན་སོགས་ལའང་རིམ་བཞིན་བཤེར་བ་དང་། ཚ་བ་དང་གཡོ་བ་ཡོད་པས་ཞིབ་ཆ་འབྱེད་དགོས། བྱེ་བྲག་སྨྲ་བས་གཟུགས་ཀྱི་གོང་བུ་ཆུང་ངུ་ཞིག་ལའང་འབྱུང་བ་བཞི་ཀ་ཡོད་པ་དང་། ས་ཆུ་མེ་རླུང་རེ་རེ་ལའང་འདེགས་པ་དང་བསིལ་བ་དང་དྲོ་བ་དང་གཡོ་བ་ཡོད་པས་འབྱུང་བ་བཞི་ཡོད་ཅེས་སྨྲའོ། །བརྒྱད་པ་རྟེན་འབྲེལ་ལ། དབྱེ་གཞི་དང་། དབྱེ་བའོ། །དང་པོ་ནི། བལྟས་ནས་གྲུབ་པ་སྟེ། རྟེན་འབྲེལ་གྱི་དོན་ནོ། །སྐབས་འདིར་དབྱེ་ན་མ་རིག་པ་ན་རྒ་ཤིའི་བར་བཅུ་གཉིས་སོ། །དེ་དག་གི་ཁྱད་པར་རྒྱས་པར་ཕྱེ་ན་མང་དུ་འགྱུར་བས་བསྡུས་ཏེ་བཤད་ན། སྤྱིར་མ་རིག་པ་ལ་ལས་འབྲས་དང་བདེན་བཞི་དང་རྣམ་པའི་རབ་དབྱེ་དང་དེ་ཁོ་ན་ཉིད་ཕྲ་རགས་ཅི་རིགས་ལ་རྨོངས་པ་དུ་མ་ཡོད་ནའང་། སོ་སྐྱེའི་རྒྱུད་ཀྱི་བདག་མེད་པའི་དེ་ཁོ་ན་ཉིད་ལ་རྨོངས་པའི་མ་རིག་པ་འདིར་ཡན་ལག་དང་པོའོ། །མ་རིག་པ་དེས་ཀུན་ནས་བསླངས་ཏེ་བསགས་པའི་དགེ་མི་དགེ་མི་གཡོ་བའི་ལས་གསུམ་ནི་གཉིས་པ་འདུ་བྱེད་པའི་ལས་སོ། །ལས་དེ་དག་གི་བག་ཆགས་གང་ལ་བསྒོས་པའི་ཚེ་འདིའི་རྒྱུ་དུས་ཀྱི་ཡིད་ཀྱི་རྣམ་ཤེས་དང་ཕྱི་མར་ཉིང་མཚམས་སྦྱར་མ་ཐག་པའི་འབྲས་དུས་ཀྱི་རྣམ་ཤེས་གཉིས་ནི་གསུམ་པ་རྣམ་ཤེས་སོ། །ཉིང་མཚམས་སྦྱར་མ་ཐག་པའི་རྣམ་ཤེས་དང་། ཚོར་བ་དང་འདུ་ཤེས་དང་འདུ་བྱེད་བཞི་ནི་འདིར་མིང་ཡིན་ལ་དེ་དང་ལྷན་ཅིག་པའི་མེར་མེར་བོ་ནི་གཟུགས་ཏེ་བཞི་བ་མིང་གཟུགས་སོ། །མེར་མེར་བོ་རིམ་གྱིས་འཕེལ་ནས་མིག་སྣ་སོགས་ཀྱི་ངོ་བོ་གྲུབ་པ་ནི་ལྔ་བ་སྐྱེ་མཆེད་དོ། །དེ་ནས་ཡུལ་དབང་རྣམ་ཤེས་གསུམ་འདུས་ཏེ་ཡུལ་ཡིད་དུ་འོང་མི་འོང་བར་མ་གསུམ་ཡོངས་སུ་གཅོད་པའི་རིག་པ་ནི་དྲུག་པ་རེག་པའོ། །རེག་པས་ཡུལ་བཅད་པ་དང་རྗེས་སུ་མཐུན་པར་མྱོང་བའི་ཚོར་བ་བདེ་སྡུག་བཏང་སྙོམས་གསུམ་ནི་བདུན་པ་ཚོར་བའོ། །དེ་ནས་ཚོར་བ་བདེ་བ་ལ་མི་འབྲལ་བ་དང་། སྡུག་བསྔལ་ལ་འབྲལ་བར་ཞེན་པ་ནི་བརྒྱད་པ་སྲེད་པའོ། །འདོད་ཡོན་དང་ལྟ་ངན་དང་ཚུལ་ཁྲིམས་དང་བརྟུལ་ཞུགས་ངན་པ་ལ་ཆགས་པ་ནི་དགུ་པ་ལེན་པའོ། །སྔར་གྱི་རྒྱུ་དུས་ཀྱི་རྣམ་ཤེས་ལ་གཉིས་པ་འདུ་བྱེད་ཀྱི་བག་ཆགས་བསྒོས་པ་སྲེད་ལེན་གཉིས་ཀྱིས་གསོས་བཏབ་པས་མཐུ་ཅན་དུ་གྱུར་པའི་ལས་ནི་བཅུ་བ་སྲིད་པའོ། །དེའི་དབང་གིས་སྐྱེ་གནས་བཞི་བོ་གང་རུང་དུ་རྣམ་ཤེས་ཉིང་མཚམས་སྦྱར་བ་ནི་བཅུ་གཅིག་པ་སྐྱེ་བའོ། །ཕུང་བོ་སྨིན་ཅིང་གཞན་དུ་འགྱུར་བ་ནི་རྒ་བ་ཡིན་ལ། ཕུང་བོའི་རིས་མཐུན་དོར་བ་ནི་ཤི་བ་སྟེ་བཅུ་གཉིས་པ་རྒ་ཤིའོ། །རྟེན་འབྲེལ་ཚར་གཅིག་གི་ཚེ་སྲེད་ལེན་སྲིད་པ་གསུམ་ནི་མིང་གཟུགས་ཀྱི་སྔོན་དུ་འབྱུང་བ་ཡིན་ནའང་། འདིར་ཚོར་བའི་རྗེས་སུ་བཤད་པ་ནི་རྟེན་འབྲེལ་གཞན་གྱི་སྐྱེ་རིམ་བཤད་པའོ། །དེ་ལ་གང་གིས་འཕེན་ན་མ་རིག་པས་ཀུན་ནས་བསླངས་པའི་འདུ་བྱེད་ཀྱིས་འཕེན་ནོ། །གང་འཕངས་ན་མིང་གཟུགས་སྐྱེ་མཆེད་རེག་ཚོར་བ་ཉེར་བཞིའོ། །ཇི་ལྟར་འཕངས་ན་རྣམ་ཤེས་ལ་ལས་ཀྱི་བག་ཆགས་བསྒོས་པའི་ཚུལ་གྱིས་སོ། །གང་གིས་འགྲུབ་ན་སྲིད་ལེན་སྲིད་པ་གསུམ་གྱིས་སོ། །གང་འགྲུབ་ན་སྐྱེ་བ་རྒ་ཤི་གཉིས་སོ། །དེ་དག་ཀྱང་མཚོན་ཙམ་སྟེ་རྒྱས་པར་གཞན་དུ་བལྟའོ། །གཉིས་པ་རྣམ་བྱང་ཕྱོགས་ལ་འགྲེས་རྐང་གི་དབང་དུ་བྱས་ཏེ་ལྔ་བཅུ་རྩ་ལྔར་བཤད་ཀྱང་། ཕྱོགས་གཏོགས་སོ་སོར་ཕྱེ་ན་བརྒྱ་དང་བཞི་དྲུག་སྟེ། ཕར་ཕྱིན་དྲུག སྟོང་ཉིད་བཅོ་བརྒྱད། བྱང་ཕྱོགས་སོ་བདུན། བདེན་བཞི། བསམ་གཏན་བཞི། ཚད་མེད་བཞི། གཟུགས་མེད་ཀྱི་སྙོམས་འཇུག་བཞི། རྣམ་པར་ཐར་བ་བརྒྱད། མཐར་གྱིས་གནས་པའི་སྙོམས་འཇུག་དགུ། རྣམ་ཐར་སྒོ་གསུམ། མངོན་པར་ཤེས་པ། ཏིང་ངེ་འཛིན། གཟུངས་ཀྱི་སྒོ། སྟོབས་བཅུ། མི་འཇིགས་པ་བཞི། སོ་སོ་ཡང་དག་པར་རིག་པ་བཞི། བྱམས་པ་ཆེན་པོ། སྙིང་རྗེ་ཆེན་པོ། མ་འདྲེས་པ་བཅོ་བརྒྱད། གང་ཟག་རྒྱུན་ཞུགས། ཕྱིར་འོང་། ཕྱིར་མི་འོང་། དགྲ་བཅོམ། རང་སངས་རྒྱས་ཏེ་བཞི། ཐམས་ཅད་ཤེས་པ་ཉིད། ལམ་གྱི་རྣམ་པ་ཤེས་པ་ཉིད། རྣམ་པ་ཐམས་ཅད་མཁྱེན་པ་ཉིད་དང་བཅས་པ་རྣམས་ཏེ་རིམ་པར་འཆད་དོ། །དང་པོ་ཕར་ཕྱིན་ལ་དབྱེ་གཞི་དང་། དབྱེ་བའོ། །དང་པོ་ནི། སངས་རྒྱས་ཀྱི་སར་ཕྱིན་པར་བྱེད་པའམ་ཕྱིན་ཟིན་པ་གང་རུང་གིས་བསྡུས་པའི་ཐེག་ཆེན་གྱི་ཉམས་ལེན་ཞིག་གོ །དབྱེ་ན་དྲུག་སྟེ། དེར་གྱུར་པའི་སྦྱིན་པ་ནས་ཤེས་རབ་ཀྱི་བར་རོ། །དང་པོ་ལ་ངོ་བོ་དང་། དབྱེ་བའོ། །སྤྱིར་གཏོང་བའི་སེམས་པ་དང་དེས་ཀུན་ནས་བསླངས་པའི་ལུས་ངག་གི་ལས་ནི་སྦྱིན་པ་ཡིན་ལ། དེ་སེམས་བསྐྱེད་བསྔོ་བ་ཤེས་རབ་གསུམ་གྱིས་ཟིན་པའི་ཚེ། སྦྱིན་པའི་ཕར་ཕྱིན་དུ་འགྱུར་ཏེ་གཞན་ལའང་ཤེས་པར་བྱའོ། །དབྱེ་ན། ཆོས་དང་། ཟང་ཟིང་གི་སྦྱིན་པ་གཉིས། སྦྱིན་བྱའི་རྫས་ནི་སྦྱིན་པ་མིན་པས་གང་ལ་སྦྱིན་པ་དང་སྦྱིན་བྱའི་རྫས་དང་ཇི་ལྟར་སྦྱིན་པ་གསུམ་གྱིས་ཤེས་དགོས་སོ། །ཡང་འཇིག་རྟེན་ལས་འདས་མ་འདས་གཉིས་ཏེ་གཞན་ལྔ་ལ་ཡང་སྦྱོར་རོ། །གཉིས་པ་ཚུལ་ཁྲིམས་ལ་ངོ་བོ་དང་། དབྱེ་བའོ། །སྤྱིར་གཞན་ལ་གནོད་པ་གཞི་དང་བཅས་པ་ཅི་རིགས་ལས་ཕྱིར་ལོག་པའི་སྤོང་སེམས་ནི། ཚུལ་ཁྲིམས་ཡིན་ལ། སྤོང་སེམས་ཁྱད་པར་ཅན་གྱི་ས་བོན་ཡང་ཚུལ་ཁྲིམས་སུ་འདོད་པ་ཡོད། དབྱེ་ན་ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་ཀྱི་ཚུལ་ཁྲིམས་གསུམ། ཚུལ་ཁྲིམས་ལ་གང་བསྲུང་བ་དང་གང་གིས་སྲུང་བ་དང་ཇི་ལྟར་སྲུང་བ་གསུམ་གྱིས་སོ། །གསུམ་པ་བཟོད་པ་ལ་ངོ་བོ་དང་། དབྱེ་བའོ། །གནོད་བྱེད་ལ་ཇི་མི་སྙམ་པ་དང་སྡུག་བསྔལ་དང་དུ་ལེན་པ་དང་ཆོས་ལ་ངེས་པར་སེམས་པས་མོས་པའི་སེམས་བྱུང་ནི། བཟོད་པ་ཡིན་ལ། དབྱེ་ན་སྔར་ལྟར་གསུམ་ཡོད། འདི་ལའང་གང་ལ་བཟོད་པ་དང་གང་གིས་བཟོད་པ་དང་ཇི་ལྟར་བཟོད་པ་གསུམ་གྱིས་སོ། །བཞི་པ་བརྩོན་འགྲུས་ལ། ངོ་བོ་དང་། དབྱེ་བའོ། །དགེ་བའི་བྱ་བ་ལ་མངོན་པར་སྤྲོ་བའི་སེམས་པ་ནི། བརྩོན་འགྲུས་ཡིན་ལ། དབྱེ་ན། དགེ་བསྡུད་པ་དང་སེམས་ཅན་དོན་བྱེད་ཀྱི་བརྩོན་འགྲུས་གཉིས། འདི་ལའང་བརྩམ་བྱ་དང་རྩོམ་བྱེད་དང་ཇི་ལྟར་རྩོམ་པ་གསུམ་གྱིས་སོ། །ལྔ་བ་བསམ་གཏན་ལ། ངོ་བོ་དང་། དབྱེ་བའོ། །རང་གི་དམིགས་པ་ལ་སེམས་རྩེ་གཅིག་པའི་སེམས་དགེ་བ་ནི། བསམ་གཏན་ཡིན་ལ། དབྱེ་ན་འཇིག་རྟེན་དང་འཇིག་རྟེན་ལས་འདས་པའི་བསམ་གཏན་གཉིས་སོ། །འདི་ལའང་གང་ལ་བསམ་གཏན་བྱ་བ་དང་བྱེད་པ་དང་ཇི་ལྟར་བྱེད་པའི་ཚུལ་གསུམ་གྱིས་སོ། །དྲུག་པ་ཤེས་རབ་ལ། ངོ་བོ་དང་། དབྱེ་བའོ། །བརྟགས་པའི་དངོས་པོ་ལ་ཆོས་རབ་ཏུ་རྣམ་པར་འབྱེད་པའི་སེམས་བྱུང་ནི། ཤེས་རབ་ཡིན་ལ། དབྱེ་ན་ཇི་ལྟ་ཇི་སྙེད་མཁྱེན་པའི་ཤེས་རབ་གཉིས་སམ། །རིག་པའི་གནས་ལྔ་ལ་མཁས་པའི་ཤེས་རབ་པོ། །འདི་ལའང་གང་ཤེས་པ་དང་གང་གིས་ཤེས་པ་དང་ཇི་ལྟར་ཤེས་པའི་ཚུལ་གསུམ་གྱིས་རིག་པར་བྱའོ། །འཇུག་པའི་ཊིཀྐ་ལྟར་ན། དྲུག་པོ་དེ་རྣམས་ཟིན་བྱེད་སྔར་ལྟར་དང་། ལམ་རིམ་ལས། དེ་དག་གོམས་པ་ཡོངས་སུ་རྫོགས་པ་ན་དེ་དང་དེའི་ཕར་ཕྱིན་འགྱུར་བར་བཤད་དེ་མི་འགལ་ལོ། །གཉིས་པ་སྟོང་ཉིད་བཅོ་བརྒྱད་བཤད་པ་ལ་གཉིས། ངོ་བོ་དང་། དབྱེ་བའོ། །དང་པོ་ནི། དགག་བྱ་བདེན་གྲུབ་བཀག་ཙམ་གྱིས་རབ་ཏུ་ཕྱེ་བའི་དེ་བཞིན་ཉིད་དེ། སྟོང་ཉིད་ཀྱི་དོན་ཏེ་མཚན་ཉིད་ཀྱང་ཡིན་ནོ། །དབྱེ་ན་ནང་སྟོང་བ་ཉིད་ནས་དངོས་པོ་མེད་པའི་ངོ་བོ་ཉིད་སྟོང་བ་ཉིད་ཀྱི་བར་བཅོ་བརྒྱད་དེ། དེ་ཡང་ནང་མིག་ནས་ཡིད་ཀྱི་བར་སྐྱེ་མཆེད་དྲུག་བདེན་པས་སྟོང་བ་དང་སྟོང་བ་ཉིད་དང་། ཕྱིའི་གཟུགས་སོགས་བདེན་སྟོང་ཕྱི་སྟོང་བ་ཉིད་དང་། དབང་རྟེན་ཁོག་པ་ལྟ་བུ་ནི་ཤེས་རྒྱུད་ཀྱིས་བསྡུས་ཤིང་དབང་བོས་མ་བསྡུས་པས་དེ་བདེན་སྟོང་ཕྱི་ནང་སྟོང་བ་ཉིད་དང་། སྟོང་ཉིད་བདེན་སྟོང་སྟོང་པ་ཉིད་སྟོང་བ་ཉིད། ཕྱོགས་བཅུ་བདེན་སྟོང་ཆེན་པོ་སྟོང་བ་ཉིད་དང་། མྱ་འདས་བདེན་སྟོང་དོན་དམ་པ་སྟོང་བ་ཉིད་དང་། ཁམས་གསུམ་པོ་སོགས་འདུས་བྱས་བདེན་སྟོང་འདུས་བྱས་སྟོང་པ་ཉིད་དང་། ནམ་མཁའ་སོགས་འདུས་མ་བྱས་བདེན་སྟོང་འདུས་མ་བྱས་སྟོང་བ་ཉིད་དང་། རྟག་ཆད་ཀྱི་མཐའ་དང་བྲལ་བའི་དབུས་བདེན་སྟོང་མཐའ་ལས་འདས་པ་སྟོང་བ་ཉིད་དང་། འཁོར་བ་བདེན་སྟོང་ཐོག་མ་དང་ཐ་མ་མེད་པ་སྟོང་བ་ཉིད་དང་། ཐེག་ཆེན་དོར་བྱར་མེད་པ་བདེན་སྟོང་དོར་བ་མེད་པ་སྟོང་བ་ཉིད་དང་། དེ་བཞིན་ཉིད་བདེན་སྟོང་རང་བཞིན་སྟོང་བ་ཉིད་དང་། ཁམས་བཅོ་བརྒྱད་ལ་སོགས་པའི་ཆོས་ཐམས་ཅད་བདེན་སྟོང་ཆོས་ཐམས་ཅད་སྟོང་བ་ཉིད་དང་། གཟུགས་གཟུགས་རུང་གི་མཚན་ཉིད་དང་ཚོར་བ་མྱོང་བའི་མཚན་ཉིད་ཅན་སོགས་ཐུན་མོང་དང་ཐུན་མོང་མིན་པའི་མཚན་ཉིད་བདེན་སྟོང་རང་གི་མཚན་ཉིད་སྟོང་བ་ཉིད་དང་། འདས་པ་སོགས་དུས་གསུམ་བདེན་སྟོང་མི་དམིགས་པ་སྟོང་པ་ཉིད་དང་། རྒྱུ་རྐྱེན་ཚོགས་པ་བདེན་སྟོང་དངོས་པོ་མེད་པའི་ངོ་བོ་ཉིད་སྟོང་བ་ཉིད་དེ་བཅུ་དྲུག་གོ །བཅུ་དྲུག་པོ་དེ་རྣམས་ནི་ཡུམ་གྱི་མདོ་ལས་ཡང་ཡང་ཟློས་ཏེ་གསུངས་ཤིང་། ཉི་ཤུར་ཡང་བཤད་དེ། དེ་ཉིད་ལས། རབ་འབྱོར་གཞན་ཡང་དངོས་པོ་ནི་དངོས་པོས་སྟོང་ངོ་། །དངོས་པོ་མེད་པ་ནི་དངོས་པོ་མེད་པས་སྟོང་ངོ་། །རང་བཞིན་ནི་རང་བཞིན་གྱིས་སྟོང་ངོ་། །གཞན་གྱི་དངོས་པོ་ནི་གཞན་གྱི་དངོས་པོས་སྟོང་ངོ་། །ཞེས་བཤད་དོ། །དེ་ཡང་ཕུང་བོ་ལྔ་བདེན་སྟོང་དངོས་པོ་སྟོང་བ་ཉིད། ནམ་མཁའ་དང་མྱང་འདས་སོགས་བདེན་སྟོང་དངོས་པོ་མེད་པ་སྟོང་བ་ཉིད། རང་བཞིན་ནམ་ཆོས་ཉིད་བདེན་སྟོང་རང་བཞིན་སྟོང་བ་ཉིད། བྱེད་པ་པོ་གཞན་གྱིས་སྟོང་བའི་ངོ་བོ་ཉིད་བདེན་སྟོང་གཞན་གྱི་ངོ་བོ་སྟོང་བ་ཉིད་དོ། །བཅུ་དྲུག་ཏུ་བཤད་པ་ནི་བློ་ངོ་ལ་ལ་བལྟོས་ཏེ་ལོག་རྟོག་སེལ་བའི་ཕྱིར་རྒྱས་པའི་དབང་དུ་བྱས་ལ། ཕྱི་མ་བཞི་དོན་ལ་ལྟོས་ཏེ་བསྡུས་ནས་གསུངས་པས་མི་འགལ་ཞིང་། ཤིན་ཏུ་བསྡུ་ན་དེ་ཐམས་ཅད་དངོས་པོ་སྟོང་བ་ཉིད་དང་དངོས་པོ་མེད་པ་སྟོང་བ་ཉིད་གཉིས་སུ་འདུ་བ་ཡིན་ནོ། །མིང་ཙམ་གྱིས་ངོས་བཟུང་ན་དེ་ལྟར་ཡིན་ཀྱང་། སྟོང་ཉིད་དེ་རྣམས་ཀྱི་དོན་ལེགས་པར་གོ་ཞིང་རྟོགས་པ་ནི་དགག་བྱ་བདེན་གྲུབ་རིགས་པས་ཁེགས་པ་ལ་རགས་ལས་སོ། །དེས་ན་འདིར་དགག་གཞི་དགག་བྱ་བཀག་པ་གསུམ་གྱིས་ཤེས་པར་བྱའོ། །གསུམ་པ་བྱང་ཕྱོགས་སོ་བདུན་ལས། དབྱེ་གཞི་དང་། དབྱེ་བའོ། །དང་པོ་ནི། བྱང་ཆུབ་སྒྲུབ་བྱེད་ཀྱི་ཕྱོགས་དང་མཐུན་པའི་ལམ་མོ། །དབྱེ་ན། སྡེ་ཚན་བདུན་ཏེ། དྲན་པ་ཉེར་གཞག་བཞི། ཡང་དག་སྤོང་བ་བཞི། རྫུ་འཕྲུལ་གྱི་རྐང་བ་བཞི། དབང་བོ་ལྔ། སྟོབས་ལྔ། བྱང་ཆུབ་ཀྱི་ཡན་ལག་བདུན། འཕགས་ལམ་ཡན་ལག་བརྒྱད་དོ། །དང་པོ་ལ། དབྱེ་གཞི་དང་། དབྱེ་བའོ། །དང་པོ་ནི། བདེན་བཞི་གང་རུང་གི་བླང་དོར་ལ་སོ་སོར་དཔྱད་ཅིང་འཛིན་པའི་མཁྱེན་པ་ཞིག་གོ །དབྱེ་ན་བཞི་སྟེ། ཉེར་ལེན་གྱི་ཕུང་བོས་བསྡུས་པའི་ལུས་མི་གཙང་བར་ལྟ་བའི་ལུས་དྲན་པ་ཉེར་གཞག །ཟག་བཅས་ཀྱི་ཚོར་བ་སྡུག་བསྔལ་བར་ལྟ་བའི་ཚོར་བ་དྲན་པ་ཉེར་གཞག །སེམས་སྐད་ཅིག་གིས་སྐྱེ་འཇིག་བྱེད་པའི་མི་རྟག་པར་ལྟ་བའི་སེམས་དྲན་པ་ཉེར་གཞག ཆོས་ཐམས་ཅད་གང་ཟག་གི་བདག་མེད་པར་ལྟ་བའི་ཆོས་དྲན་པ་ཉེར་གཞག་གོ །གཉིས་པ་ཡང་དག་སྤོང་བ་ལ། དབྱེ་གཞི་དང་། དབྱེ་བའོ། །དང་པོ་ནི། བདེན་བཞི་གང་རུང་གི་བླང་དོར་ལ་སྤྲོ་བའི་རང་གི་དམིགས་པ་ལ་རྩེ་གཅིག་པའི་མཁྱེན་པ་ཞིག་གོ །དབྱེ་ན་བཞི་སྟེ། མི་དགེ་བའི་ཕྱོགས་སྐྱེ་འགྱུར་མི་སྐྱེད་པར་བྱེད་པའི་ཡང་དག་སྤོང་བ་དང་། དེ་བཞིན་དུ་སྐྱེས་ཟིན་སྤོང་བར་བྱེད་པ་དང་། དགེ་བའི་ཕྱོགས་སྐྱེ་འགྱུར་བསྐྱེད་པར་བྱེད་པ་དང་། སྐྱེས་ཟིན་སྤེལ་བར་བྱེད་པའི་ཡང་དག་སྤོང་བའོ། །གསུམ་པ་རྫུ་འཕྲུལ་གྱི་རྐང་བ་ལ་དབྱེ་གཞི་དང་། དབྱེ་བའོ། །དང་པོ་ནི། སྤྲུལ་སྒྱུར་སྣ་ཚོགས་ཀྱི་རྟེན་བྱེད་པའི་མཁྱེན་པ་ཞིག་གོ །དབྱེ་ན་བཞི་སྟེ། རྫུ་འཕྲུལ་དང་ཏིང་ངེ་འཛིན་སྒྲུབ་པ་ལ་དགའ་བའི་འདུན་པའི་རྫུ་འཕྲུལ་གྱི་རྐང་བ་དང་། དེ་ལ་བརྩོན་པའི་བརྩོན་འགྲུས་ཀྱི་དེ་དང་། དེའི་ཚེ་སེམས་རྩེ་གཅིག་པའི་སེམས་པའི་དེ་དང་། དེའི་ཆེད་དུ་ཆོས་རྣམ་པར་འབྱེད་པའི་དཔྱོད་པའི་རྫུ་འཕྲུལ་གྱི་རྐང་བའོ། །བཞི་པ་དབང་བོ་ལ་དབྱེ་གཞི་དང་། དབྱེ་བའོ། །དང་པོ་ནི། རང་འབྲས་འཕགས་ལམ་བསྐྱེད་པ་ལ་དབང་བྱེད་པའི་མཁྱེན་པ་ཞིག་གོ །དབྱེ་ན་ལྔ་སྟེ། བདེན་བཞིའི་བླང་དོར་ལ་ཡིད་ཆེས་པའི་དད་པའི་དབང་བོ་དང་། དེ་ལ་སྤྲོ་བའི་བརྩོན་འགྲུས་ཀྱི་དེ་དང་། དམིགས་རྣམ་མི་བརྗེད་པའི་དྲན་པའི་དེ་དང་། སེམས་རྩེ་གཅིག་པའི་ཏིང་ངེ་འཛིན་གྱི་དེ་དང་། བདེན་བཞིའི་བླང་དོར་སོ་སོར་འབྱེད་པའི་ཤེས་རབ་ཀྱི་དཔང་བོའོ། །ལྔ་བ་སྟོབས་ལ་དབྱེ་གཞི་དང་། དབྱེ་བའོ། །དང་པོ་ནི། རང་འབྲས་འཕགས་ལམ་བསྐྱེད་པ་ལ་དབང་བྱེད་པ་གོང་འཕེལ་དུ་གྱུར་པའི་མཁྱེན་པ་ཞིག་གོ །དབྱེ་ན་ལྔ་སྟེ། དད་སོགས་དབང་བོ་ལྔའི་གནས་སྐབས་གོང་འཕེལ་དུ་སོང་བའི་དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཀྱི་སྟོབས་ལྔའོ། །ས་མཚམས་ནི་དྲན་པ་ཉེར་གཞག་སོགས་གསུམ་ནི་ཚོགས་ལམ་ནས་ཐོབ་ཅིང་། དབང་བོ་དང་སྟོབས་གཉིས་སྦྱོར་ལམ་ནས་འཐོབ་པར་འགྱུར་རོ། །དྲུག་པ་བྱང་ཆུབ་ཀྱི་ཡན་ལག་ལ་དབྱེ་གཞི་དང་། དབྱེ་བའོ། །དང་པོ་ནི། རང་འབྲས་བྱང་ཆུབ་ཀྱི་རྒྱུའམ་ཡན་ལག་བྱེད་པའི་འཕགས་པའི་མཁྱེན་པ་ཞིག་གོ །དབྱེ་ན་བདུན་སྟེ། བདེན་པ་ལ་དམིགས་པ་མི་གཡེང་བའི་དྲན་པ་ཡང་དག་བྱང་ཆུབ་ཀྱི་ཡན་ལག་དང་། བདག་མེད་རྟོགས་པའི་ཆོས་རབ་ཏུ་རྣམ་འབྱེད་དང་། ངེས་པར་འབྱུང་བའི་བརྩོན་འགྲུས་དང་། ཕན་ཡོན་གྱི་དགའ་བ་དང་། ལུས་སེམས་ལས་རུང་གི་ཤིན་ཏུ་སྦྱངས་པ་དང་། རྩེ་གཅིག་པའི་ཏིང་ངེ་འཛིན་དང་། ངོ་བོའི་སྒོ་ནས་བཏང་སྙོམས་བྱང་ཆུབ་ཀྱི་ཡན་ལག་གོ །བདུན་པ་འཕགས་ལམ་ལ་དབྱེ་གཞི་དང་། དབྱེ་བའོ། །དང་པོ་ནི། འཕགས་ལམ་གྱི་ཆ་ཤས་སམ། རང་འབྲས་འཕགས་ལམ་གྱི་རྒྱུ་བྱེད་པའི་འཕགས་པའི་མཁྱེན་པ་ཞིག་གོ །དབྱེ་ན་བརྒྱད་དེ། ཆོས་ཉིད་ཀྱི་དོན་ལ་དཔྱོད་པའི་ཡང་དག་པའི་ལྟ་བ་དང་། རང་གིས་རྟོགས་པ་ལྟར་སྟོན་པར་སེམས་པའི་ཡང་དག་པའི་རྟོགས་པ་དང་། ངག་གི་ལས་རྣམ་པར་དག་པའི་ཡང་དག་པའི་ངག་དང་། ལུས་ཀྱི་ལས་རྣམ་པར་དག་པའི་ཡང་དག་པའི་ལས་ཀྱི་མཐའ་དང་། ལོག་འཚོ་སྤང་བའི་ཡང་དག་པའི་འཚོ་བ་དང་། སྒོམ་སྤང་སྤོང་བའི་ཡང་དག་པའི་རྩོལ་བ་དང་། དམིགས་རྣམས་མི་བརྗེད་པའི་ཡང་དག་པའི་དྲན་པ་དང་། ཡོན་ཏན་ཁྱད་པར་ཅན་བསྒྲུབ་པའི་ཆེད་དུ་དམིགས་པ་ལ་རྩེ་གཅིག་པའི་ཡང་དག་པའི་ཏིང་ངེ་འཛིན་རྣམས་སོ། །བཞི་བ་ལ་བདེན་པ་བཞི་ལ་གཉིས། དབྱེ་གཞི་དང་། དབྱེ་བའོ། །དང་པོ་ནི། འཕགས་པའི་བདེན་པའོ། །དབྱེ་ན་བཞི་སྟེ། སྡུག་བསྔལ་བདེན་པ། ཀུན་འབྱུང་། འགོག་པ། ལམ་བདེན་ནོ། །དང་པོ་སྡུག་བདེན་ལ། དབྱེ་བཞི་དང་། དབྱེ་བའོ། །དང་པོ་ནི། རང་རྒྱུ་ལས་ཉོན་གྱིས་དབང་གིས་བྱུང་བའི་རིགས་སུ་གནས་པའི་ཀུན་ནས་ཉོན་མོངས་པའི་བདེན་པའོ། །དབྱེ་ན། སྡུག་བསྔལ་གྱི་སྡུག་བསྔལ་འགྱུར་བའི་སྡུག་བསྔལ་འདུ་བྱེད་ཀྱི་སྡུག་བསྔལ་གསུམ། དང་པོ་ནི། ཚོར་བ་སྡུག་བསྔལ་ཆེན་པོ་ཐམས་ཅད། གཉིས་པ་ནི། ཟག་བཅས་ཀྱི་ཚོར་བ་བདེ་བ་ཕལ་ཆེར། གསུམ་པ་ནི། ཉེར་ལེན་གྱི་ཕུང་བོ་ལྟ་བུའོ། །མདོར་ན་ལས་ཉོན་གྱིས་བྱུང་བའི་མ་དག་པའི་སྣོད་ཀྱི་འཇིག་རྟེན་དང་མ་དག་པའི་བཅུད་ཀྱི་སེམས་ཅན་དང་དེའི་ཕུང་བོ་ནི་སྡུག་བསྔལ་བདེན་པའོ། །གཉིས་པ་ཀུན་འབྱུང་ལ་དབྱེ་གཞི་དང་། དབྱེ་བའོ། །རང་འབྲས་སྡུག་བདེན་བསྐྱེད་བྱེད་ཀྱི་རིགས་སུ་གནས་པའི་ཀུན་ནས་ཉོན་མོངས་པའི་བདེན་པའོ། །དབྱེ་ན། ལས་དང་ཉོན་མོངས་པའི་ཀུན་འབྱུང་གཉིས། དང་པོ་ནི། ཟག་བཅས་ཀྱི་དགེ་མི་དགེ་མི་གཡོ་བའི་ལས་རྣམས་སོ། །གཉིས་པ་ནི། མ་དག་པའི་སོ་སྐྱེའི་རྒྱུད་ཀྱི་འདོད་ཆགས་ཞེ་སྡང་ཁོང་ཁྲོ་ང་རྒྱལ་མ་རིག་པ་སོགས་རྩ་བ་དང་ཉེ་བའི་ཉོན་མོངས་པ་རྣམས་སོ། །གསུམ་པ་འགོག་བདེན་ལ་དབྱེ་གཞི་དང་། དབྱེ་བའོ། །དང་པོ་ནི། ལམ་བདེན་གྱི་སྟོབས་ཀྱིས་ཐོབ་པའི་བྲལ་བའོ། །དབྱེ་ན། ཐེག་པ་གསུམ་གྱི་འཕགས་པའི་རྒྱུད་ཀྱི་འགོག་བདེན་རྣམས་སོ། །བཞི་བ་ལམ་བདེན་ལ་དབྱེ་གཞི་དང་། དབྱེ་བའོ། །དང་པོ་ནི། འགོག་བདེན་ཐོབ་བྱེད་ཀྱི་ཐབས་སུ་གྱུར་པའི་འཕགས་ལམ་མོ། །དབྱེ་ན། འཕགས་ལམ་ཐམས་ཅད་དོ། །ཕྱི་མ་གཉིས་ཀྱི་དོན་བསྡུ་ན། འཕགས་པའི་ལམ་གང་གིས་རང་གི་ངོ་སྐལ་གྱི་སྤང་བྱ་མཐོང་སྤང་དང་སྒོམ་སྤང་དེ་རང་གི་སེམས་ཀྱི་སྟེང་དུ་སླར་སྐྱེ་མི་རུང་བའི་ཚུལ་གྱིས་བཀག་པའི་སེམས་ཀྱི་ཆོས་ཉིད་ལ་འགོག་བདེན་ཞེས་བྱ་ལ། འཕགས་ལམ་དེ་ཉིད་ལ་ལམ་བདེན་ཞེས་བྱའོ། །འཁོར་བར་འཇུག་རིམ་གྱི་དབང་དུ་བྱས་ནས་ཀུན་འབྱུང་ལས་སྡུག་བསྔལ་འབྱུང་བས་དེ་གཉིས་བསྟན་ལ། འཁོར་བ་ལས་ལྡོག་རིམ་གྱི་དབང་དུ་བྱས་ནས་ལམ་བདེན་ལ་བརྟེན་ནས་འགོག་བདེན་འཐོབ་པར་འགྱུར་བས་དེ་གཉིས་བཞག་པ་སྟེ། དེའི་དང་པོ་གཉིས་དོར་བྱ་དང་། ཕྱི་མ་གཉིས་བླང་བྱའོ། །ལྔ་བ་བསམ་གཏན་ལ་དབྱེ་གཞི་དང་། དབྱེ་བའོ། །དང་པོ་ནི། རང་གི་འོག་ས་འདོད་པ་དང་བསམ་གཏན་དང་པོ་གསུམ་གང་རུང་ལ་ཆགས་པ་ཅི་རིགས་དང་བྲལ་བྱེད་དམ་བྲལ་བས་རབ་ཏུ་ཕྱེ་བ་གང་རུང་གིས་བསྡུས་པའི་གོང་སའི་སྙོམས་འཇུག་ཞིག་གོ །འདི་ལ་དབྱེ་ན་བཞི་སྟེ། བསམ་གཏན་དང་པོ་གཉིས་པ་གསུམ་པ་བཞི་བའོ། ཁྱད་པར་ལ་ཞི་བ་ན་མང་ཡང་བསྡུ་ན། རང་གི་འོག་ས་འདོད་པ་ལ་ཆགས་པ་ཅི་རིགས་དང་བྲལ་བྱེད་དམ་བྲལ་བས་རབ་ཏུ་ཕྱེ་བའི་སེམས་རྩེ་གཅིག་པ་མཚུངས་ལྡན་དང་བཅས་པ་ནི། བསམ་གཏན་དང་པོ་དང་། དེ་བཞིན་དུ་བསམ་གཏན་དང་པོ་དང་དེ་གཉིས་པ་དང་གསུམ་པ་ལ་ཆགས་པ་ཅི་རིགས་དང་བྲལ་བྱེད་དམ་བྲལ་བས་རབ་ཏུ་ཕྱེ་བའི་སེམས་རྩེ་གཅིག་པ་མཚུངས་ལྡན་དང་བཅས་པ་རྣམས་ནི། རིམ་པ་བཞིན་བསམ་གཏན་གཉིས་པ་དང་གསུམ་པ་དང་བཞི་བའི་སྙོམས་འཇུག་གོ །འདིར་བསམ་གཏན་གྱི་སྙོམས་འཇུག་བཞི་དང་། དེའི་གནས་བཞི་ཡོད་པ་རྣམས་ཁྱད་པར་ཕྱེད་པར་བྱའོ། །དྲུག་པ་ཚད་མེད་པ་ལ་དབྱེ་གཞི་དང་། དབྱེ་བའོ། །དང་པོ་ནི། བསམ་གཏན་ལ་བརྟེན་ནས་སྐྱེས་ཤིང་དམིགས་པ་དང་འབྲས་བུ་ཚད་མེད་པ་དང་ལྡན་པའི་སེམས་པའོ། །དབྱེ་ན་བཞི་སྟེ། བྱམས་པ་སྙིང་རྗེ་དགའ་བ་བཏང་སྙོམས་ཚད་མེད་དེ། རིམ་པ་བཞིན་དུ་སེམས་ཅན་ཐམས་ཅད་བདེ་བ་ལ་འགོད་འདོད་ཀྱི་བྱམས་པ་ཚད་མེད་དང་། སྡུག་བསྔལ་ལས་སྐྱོབ་འདོད་ཀྱི་སྙིང་རྗེ་དང་། བདེ་བ་དང་ལྡན་ན་དགའ་བའི་དགའ་བ་དང་། ཆགས་སྡང་དང་བྲལ་ན་སྙམ་པའི་བཏང་སྙོམས་ཚད་མེད་རྣམས་སོ། །བདུན་པ་གཟུགས་མེད་པའི་སྙོམས་པར་འཇུག་པ་ལ་དབྱེ་གཞི་དང་། དབྱེ་བའོ། །དང་པོ་ནི། རང་གི་འོག་ས་གཟུགས་དང་གཟུགས་མེད་དང་པོ་གསུམ་སོ་སོ་ལ་ཆགས་པ་ཅི་རིགས་དང་བྲལ་བྱེད་དམ་བྲལ་བས་རབ་ཏུ་ཕྱེ་བ་གང་རུང་གིས་བསྡུས་པའི་གོང་མའི་སྙོམས་འཇུག་གོ །དབྱེ་ན་བཞི་སྟེ། སྦྱོར་བའི་ཚེ་གཟུགས་ཀྱི་འདུ་ཤེས་ནི་རགས་པ་དང་ནམ་མཁའི་འདུ་ཤེས་ནི་ཞི་བའོ་སྙམ་དུ་ལྟ་ཞིང་གོམས་པའི་གཟུགས་མེད་ནམ་མཁའི་སྙོམས་འཇུག་དང་། ནམ་མཁའི་འདུ་ཤེས་ཀྱང་རགས་པ་དང་རྣམ་པར་ཤེས་པའི་འདུ་ཤེས་ནི་ཞི་བའོ་སྙམ་དུ་ལྟ་ཞིང་གོམས་པའི་རྣམ་ཤེས་ཀྱི་སྙོམས་འཇུག་དང་། རྣམ་ཤེས་ཀྱི་འདུ་ཤེས་ཀྱང་རགས་པ་དང་དམིགས་པ་ཙམ་ནས་ཅི་ཡང་མེད་དོ་སྙམ་དུ་ལྟ་ཞིང་གོམས་པའི་ཅི་ཡང་མེད་ཀྱི་སྙོམས་འཇུག་དང་། ཅི་ཡང་མེད་པའི་འདུ་ཤེས་ཀྱང་རགས་པ་དང་། བློ་ངོར་འདུ་ཤེས་རགས་པ་མངོན་གྱུར་ནི་ཡོད་པ་ཡང་མིན་ཕྲ་བ་མེད་པ་ཡང་མིན་ནོ་སྙམ་དུ་ལྟ་ཞིང་གོམས་པའི་སྲིད་རྩེའི་སྙོམས་འཇུག་རྣམས་སོ། །བརྒྱད་པ་རྣམ་པར་ཐར་བ་ལ་དབྱེ་གཞི་དང་། དབྱེ་བའོ། །དང་པོ་ནི། རང་སའི་ཉོན་མོངས་ཀྱིས་མ་བསླད་ཅིང་ཐར་བ་དོན་གཉེར་གྱིས་བསམ་པས་ཟིན་པའི་སྙོམས་འཇུག་གོ །དབྱེ་ན་བརྒྱད་དེ། སྔར་བཤད་པ་ལྟར་གཟུགས་མེད་ཀྱི་སྙོམས་འཇུག་བཞིས་བསྡུས་པའི་རྣམ་ཐར་བཞི་དང་། གཟུགས་ཅན་གཟུགས་ལ་ལྟ་བའི་རྣམ་ཐར་དང་། གཟུགས་མེད་གཟུགས་ལ་ལྟ་བའི་རྣམ་ཐར་དང་། གེགས་སེལ་སྡུག་པའི་རྣམ་ཐར་དང་། འགོག་པའི་རྣམ་ཐར་རོ། །ཕྱི་མ་བཞི་ནི་རིམ་པ་བཞིན་དུ། ནང་རང་ལུས་ལ་གཟུགས་ཀྱི་འདུ་ཤེས་བཞག་སྟེ་ཕྱིའི་གཟུགས་ལ་དམིགས་ནས་སྤྲུལ་སྒྱུར་བྱེད་པ་དང་། རང་ལུས་ལ་གཟུགས་མེད་པའི་འདུ་ཤེས་བཞག་སྟེ་ཕྱིའི་གཟུགས་ལ་དམིགས་ནས་སྤྲུལ་སྒྱུར་བྱེད་པ་དང་། གཟུགས་སྡུག་མི་སྡུག་ཕན་ཚུན་བལྟོས་པར་བསམས་ཏེ་མཐར་གཟུགས་ཐམས་ཅད་སྡུག་པར་མོས་པ་དང་། ཚོར་བ་དང་འདུ་ཤེས་རགས་པ་བཀག་པའི་འགོག་པའི་རྣམ་ཐར་ཏེ་བཞིའོ། །དགུ་བ་མཐར་གྱིས་གནས་པའི་སྙོམས་འཇུག་ལ་དབྱེ་གཞི་དང་། དབྱེ་བའོ། །དང་པོ་ནི། དམིགས་པ་སྔ་མ་ནས་ཕྱི་མ་ལ་རིམ་གྱིས་འཇུག་པའི་སྙོམས་འཇུག་ཁྱད་པར་ཅན་ཞིག་གོ །དབྱེ་ན་དགུ་སྟེ། སྔར་ལྟར་བསམ་གཏན་བཞི་དང་། གཟུགས་མེད་ཀྱི་སྙོམས་འཇུག་ཁྱད་པར་ཅན་བཞི་སྟེ་བརྒྱད་དང་། འགོག་པའི་སྙོམས་འཇུག་གཅིག་གོ །བཅུ་བ་རྣམ་པར་ཐར་བའི་སྒོ་ལ་དབྱེ་གཞི་དང་། དབྱེ་བའོ། །དང་པོ་ནི། བདག་མེད་ཕྲ་རགས་དང་མི་རྟག་སོགས་ཅི་རིགས་ལ་དམིགས་པའི་སྒོ་ནས་མི་མཐུན་ཕྱོགས་ཀྱི་གཉེན་པོ་བྱེད་པའི་སྙོམས་འཇུག་ཞིག་གོ །དབྱེ་ན་གསུམ་སྟེ། སྟོང་བ་དང་བདག་མེད་པ་ལ་དམིགས་པའི་རྣམ་པར་ཐར་བའི་སྒོ་སྟོང་བ་ཉིད་དང་། འགོག་ལམ་ལ་དམིགས་པའི་རྣམ་པར་ཐར་པའི་སྒོ་མཚན་མ་མེད་པ་དང་། མི་རྟག་སྡུག་བསྔལ་གཉིས་ཀུན་འབྱུང་གི་རྣམ་པ་བཞི་ལ་དམིགས་པའི་རྣམ་པར་ཐར་བའི་སྒོ་སྨོན་པ་མེད་པའོ། །འདི་དག་ནི་སྒྲིབ་པ་ཅི་རིགས་ལས་གྲོལ་བར་བྱེད་པའམ་ཐར་བའི་སྒོ་ཡིན་པས་ན། རྣམ་པར་ཐར་བའི་སྒོའོ། །བཅུ་གཅིག་པ་མངོན་པར་ཤེས་པ་ལ་དབྱེ་གཞི་དང་། དབྱེ་བའོ། །དང་པོ་ནི། སྦྱོར་བྱུང་ངམ་སྐྱེ་བས་ཐོབ་ཅིང་ཡུལ་རང་སྟོབས་ཀྱིས་མངོན་སུམ་དུ་རིག་པ་མཚུངས་ལྡན་དང་བཅས་པའོ། །དབྱེ་ན་དྲུག་སྟེ། སྤྲུལ་སྒྱུར་སྣ་ཚོགས་མངོན་སུམ་དུ་རྟོགས་པའི་རྫུ་འཕྲུལ་གྱི་མངོན་ཤེས་དང་། གཟུགས་ཕྲ་རགས་མངོན་སུམ་དུ་མཐོང་བའི་ལྷའི་མིག་གི་མངོན་ཤེས་དང་སྒྲ་ཕྲ་རགས་མཐོང་བའི་ལྷའི་རྣ་བའི་མངོན་ཤེས་དང་། རང་གཞན་གྱི་ཚེ་སྔོན་གྱི་གནས་སམ་ཚེ་རབས་དུ་མ་རྟོགས་པའི་སྔོན་གནས་རྗེས་དྲན་གྱི་མངོན་ཤེས་དང་། གང་ཟག་གཞན་གྱི་སེམས་གྱི་རྒྱུ་ཚུལ་རྟོགས་པའི་གཞན་སེམས་ཤེས་པའི་མངོན་ཤེས་དང་། སྒྲིབ་གཉིས་སྤོང་བའི་ཐབས་དང་སྤངས་པ་ཅི་རིགས་མངོན་སུམ་རྟོགས་པའི་ཟག་པ་ཟད་པའི་མངོན་ཤེས་རྣམས་སོ། །དེ་དག་ནི་མངོན་ཤེས་ཀྱི་གཙོ་བོ་ཡིན་ལ། གཞན་ཡང་མི་འདྲ་བའི་ཁྱད་པར་མང་དུ་ཡོད་དོ། །མངོན་ཤེས་ནི་མངོན་སུམ་དུ་བཤད་པས། རང་གཞན་གྱི་བྱུང་བ་དང་འབྱུང་འགྱུར་ཅི་རིགས་སྣང་ལ་མ་ངེས་པའི་ཚུལ་གྱིས་རྟོགས་པ་འགའ་ཞིག་མངོན་ཤེས་མིན་ལ། རྟགས་སམ་མཚན་མ་འགའ་ལ་བརྟེན་ནས་བྱུང་བ་དང་འབྱུང་འགྱུར་འགའ་ཞིག་རིག་པ་ནི་རྟོག་པ་ཡིན་པས། མངོན་ཤེས་མིན་ཀྱང་བླུན་པོས་ནི་མངོན་ཤེས་སུ་འཛིན་ནོ། །བཅུ་གཉིས་པ་ཏིང་ངེ་འཛིན་ལ་དབྱེ་བ་དང་། དབྱེ་གཞིའོ། །དང་པོ་ནི། ཡང་དག་པའི་དམིགས་པ་ལ་རྩེ་གཅིག་པའི་སེམས་བྱུང་ངོ་། །དབྱེ་བ་ནི་ཡུམ་གྱི་མདོ་ལས་གྲངས་མང་དུ་བཤད་ཅིང་། ཇི་ལྟ་ཇི་སྙེད་ལ་དམིགས་དམིགས་པ་གཉིས་དང་། ཐེག་པ་གསུམ་གྱི་བར་ཆད་མེད་ལམ་དང་རྣམ་གྲོལ་དང་མི་སློབ་པའི་ཏིང་ངེ་འཛིན་རྣམས་སོ། །སྤྱིར་སྔགས་རིམ་དུ་དགེ་བའི་དམིགས་པ་ལ་སེམས་རྩེ་གཅིག་པ་ཞིག་བྱུང་ན་རྒྱུན་རིང་ཐུང་གང་ཡིན་ཀྱང་ཏིང་ངེ་འཛིན་ཡིན་ཞེས་བཤད་ལ། ཏིང་ངེ་འཛིན་ཁྱད་པར་བ་ནི་ཞི་གནས་དང་ལྷག་མཐོང་གིས་བསྡུས་པ་དང་། བསམ་གཏན་དང་གཟུགས་མེད་ཀྱི་སྙོམས་འཇུག་གིས་བསྡུས་པ་རྣམས་སོ། །བཅུ་གསུམ་པ་གཟུངས་ཀྱི་སྒོ་ལ་དབྱེ་གཞི་དང་། དབྱེ་བའོ། །དང་པོ་ནི། ཞི་གནས་དང་མཚུངས་ལྡན་གྱི་དྲན་པ་དང་ཤེས་རབ་ཀྱིས་བསྡུས་པའི་རིག་པ་ཁྱད་པར་ཅན་ནོ། །དབྱེ་ན་གསུམ་སྟེ་བཟོད་པའི་གཟུངས་དང་། གསང་སྔགས་ཀྱི་གཟུངས་དང་། ཚིག་དོན་གྱི་གཟུངས་སོ། །དང་པོ་ནི། གནས་ལུགས་སྟོང་ཉིད་ཀྱི་དོན་ལ་མི་སྐྲག་པའི་ཏིང་ངེ་འཛིན་དང་ཤེས་རབ་བོ། །གཉིས་པ་ནི། སྡིག་པ་སོགས་ཞི་བར་བྱེད་ནུས་པའི་གསང་སྔགས་རྩོམ་ནུས་པའི་ཏིང་ངེ་འཛིན་དང་ཤེས་རབ་བོ། །གསུམ་པ་ནི། ཚིག་དོན་བསྐལ་བར་མི་བརྗེད་པར་འཛིན་ནུས་པའི་ཏིང་ངེ་འཛིན་དང་ཤེས་རབ་བོ། །འདི་དག་ནི་སྦྱོར་ལམ་བཟོད་པ་ནས་འཐོབ་ཀྱི། དེའི་གོང་དུ་མིན་ནོ། །གཟུངས་ཀྱི་ཚིག་ལ་གཟུངས་ཞེས་བརྗོད་པ་ནི། རྗོད་བྱེད་ལ་བརྗོད་བྱའི་མིང་གིས་བཏགས་པའོ། །ཨ་ལ་སོགས་པའི་ཡི་གེའི་དོན་དེ་དང་དེ་རང་བཞིན་མེད་པའི་སྟོང་པ་ཉིད་དུ་བསྒོམས་པས་གཟུངས་དེ་དག་སྐྱེ་བས་ན་གཟུངས་ཀྱི་སྒོའོ། །བཅུ་བཞི་བ་དེ་བཞིན་གཤེགས་པའི་སྟོབས་ལ་དབྱེ་གཞི་དང་། དབྱེ་བའོ། །དང་པོ་ནི། གདུལ་བྱའི་མི་མཐུན་ཕྱོགས་འཇོམས་པར་བྱེད་པ་ལ་སྟོབས་དང་ལྡན་པས་རབ་ཏུ་ཕྱེ་བའི་སངས་རྒྱས་ཀྱི་མཁྱེན་པ་སྟེ། འདིར་སྟོབས་སོ། །དབྱེ་ན། བཅུ་སྟེ། རྒྱུ་དགེ་མི་དགེ་བྱས་པ་ལས་འབྲས་བུ་བདེ་སྡུག་མ་ནོར་བ་འབྱུང་བ་གནས་དང་། ནོར་ནས་འབྱུང་བ་གནས་མ་ཡིན་པ་མཁྱེན་པའི་སྟོབས་དང་། ལས་ཀྱི་འབྲས་བུའི་དབྱེ་བ་མ་ལུས་པར་རྟོགས་པའི་ལས་ཀྱི་རྣམ་སྨིན་མཁྱེན་པ་དང་། མངོན་མཐོ་དང་ངེས་ལེགས་གསུམ་པོ་གང་ལ་མོས་པའི་མོས་པ་སྣ་ཚོགས་མཁྱེན་པ་དང་། འཇིག་རྟེན་གྱི་ཁམས་རིགས་སྣ་ཚོགས་པ་མཁྱེན་པ་དང་། དབང་བོ་རྣོ་འབྲིང་རྟུལ་གསུམ་གྱི་ཁྱད་པར་ཇི་ལྟ་བ་བཞིན་དུ་མཁྱེན་པ་དང་། མངོན་མཐོ་དང་ཐེག་པ་གསུམ་གྱི་ལམ་ཐམས་ཅད་མཁྱེན་པ་དང་། ཀུན་ནས་ཉོན་མོངས་པ་དང་རྣམ་པར་བྱང་བའི་ཚུལ་ཇི་ལྟ་བ་བཞིན་མཁྱེན་པ་དང་། སྔོན་དང་ཕྱི་མའི་ཚེ་རབས་རྣམས་སུ་འཆི་འཕོ་བྱས་པ་དང་བྱེད་པ་རྣམས་མཁྱེན་པ་གཉིས་དང་། སྒྲིབ་པ་མཐའ་དག་སྤངས་པའི་སྤངས་པ་མཁྱེན་པའི་ཟག་པ་ཟད་པ་མངོན་སུམ་དུ་མཁྱེན་པའི་སྟོབས་རྣམས་སོ། །བཅོ་ལྔ་བ་མི་འཇིགས་པ་ལ་དབྱེ་གཞི་དང་། དབྱེ་བའོ། །དབྱེ་བ་ནི། རང་དང་གཞན་གྱི་དོན་ གང་མངོན་དུ་བྱས་ཤིང་རྟོགས་པར་ཞལ་གྱིས་འཆེས་པ 
་ལ་མི་འཇིགས་པའི་མཁྱེན་པ་མཐར་ཐུག་སྟེ། འདིར་མི་འཇིགས་པའོ། །དབྱེ་ན་བཞི་སྟེ། རང་དོན་གྱི་དབང་དུ་བྱས་ཏེ་ང་ཉིད་ཆོས་ཐམས་ཅད་ལ་མངོན་པར་སངས་རྒྱས་སོ་ཞེས་ཞལ་གྱིས་འཆེས་པ་ལ་འདི་ཐུགས་སུ་མ་ཆུད་ཞེས་ཆོས་མཐུན་གྱི་རྒོལ་བ་མེད་པས་རྟོགས་པ་ཕུན་ཚོགས་བསྟན་པ་ལ་མི་འཇིགས་པ་དང་། གཞན་དོན་གྱི་དབང་དུ་བྱས་ན་སྒྲིབ་གཉིས་ཀྱིས་ཐར་བ་དང་ཐམས་ཅད་མཁྱེན་པ་འཐོབ་པ་བར་ཆད་བྱེད་པར་བསྟན་པ་ལ་དེ་མི་བྱེད་དོ་ཞེས་རྒོལ་བ་མེད་པས་བར་ཆད་ཀྱི་ཆོས་བསྟན་པ་ལ་མི་འཇིགས་པ་དང་། གཞི་ཤེས་དང་ལམ་ཤེས་བསྒོམས་པས་ཐར་བ་དང་ཐམས་ཅད་མཁྱེན་པ་འཐོབ་པར་འགྱུར་རོ་ཞེས་བསྟན་པ་ལ་དེ་མི་ནུས་སོ་ཞེས་རྒོལ་བ་མེད་པས་ངེས་པར་འབྱུང་བ་བསྟན་པ་ལ་མི་འཇིགས་པ་དང་། ངས་སྒྲིབ་པ་མ་ལུས་པ་སྤངས་སོ་ཞེས་དམ་བཅས་པ་ལ་འདི་མ་སྤངས་སོ་ཞེས་རྒོལ་བ་མེད་པས་སྤངས་པ་ཕུན་ཚོགས་བསྟན་པ་ལ་མི་འཇིགས་པ་རྣམས་སོ། །བཅུ་དྲུག་པ་སོ་སོ་ཡང་དག་པར་རིག་པ་ལ་དབྱེ་གཞི་དང་། དབྱེ་བའོ། །དང་པོ་ནི། འཆད་བྱ་འཆད་བྱེད་ཀྱི་དོན་ལ་ཐོགས་པ་མེད་པས་རབ་ཏུ་ཕྱེ་བའི་མཁྱེན་པའོ། །དབྱེ་ན་བཞི་སྟེ། ཆོས་རྣམས་ཀྱི་མིང་གི་རྣམ་གྲངས་མཐའ་དག་ལ་མཁྱེན་པ་ཐོགས་པ་མེད་པར་འཇུག་པའི་ཏིང་ངེ་འཛིན་དང་ཤེས་རབ་ནི་ཆོས་སོ་སོ་ཡང་དག་པར་རིག་པ་དང་། དེ་བཞིན་དུ་ཆོས་རྣམས་ཀྱི་རང་དང་སྤྱིའི་མཚན་ཉིད་ཐམས་ཅད་ཐོགས་མེད་དུ་མཁྱེན་པའི་ཆོས་སོ་སོ་ཡང་དག་རིགས་པ་དང་། སྐད་ཀྱི་རིགས་སྣ་ཚོགས་དང་མཐུན་པར་སྨྲ་བར་ནུས་པའི་ངེས་པའི་ཚིག་སོ་སོ་ཡང་དག་རིག་པ་དང་། ཆོས་རྣམས་ཀྱི་རྣམ་དབྱེ་མ་ལུས་པ་ཆགས་ཐོགས་མེད་པར་འཇུག་པའི་སྤོབས་པ་སོ་སོ་ཡང་དག་པར་རིག་པ་རྣམས་སོ། །བཅུ་བདུན་པ་བྱམས་པ་ཆེན་པོ་ལ་གཉིས་ཀྱི་དང་པོ་ནི། འདིར་བསམ་གཏན་ལ་བརྟེན་ནས་སེམས་ཅན་ཐམས་ཅད་བདེ་བ་དང་ལྡན་པ་དང་བདེ་བ་འགོད་པར་འདོད་པའི་མཁྱེན་པའོ། །དབྱེ་ན། སྤྱིར་སེམས་ཅན་ཐམས་ཅད་བདེ་བ་དང་ལྡན་ན་སྙམ་པའི་བྱམས་པ་དང་། བདེ་བ་ལ་འགོད་པར་འདོད་པའི་བྱམས་པ་གཉིས་ཡོད་ཀྱང་། འདིར་བྱམས་པ་ཆེན་པོ་ནི། སེམས་ཅན་ཐམས་ཅད་གཏན་གྱི་བདེ་བ་ལ་རང་ཉིད་ཀྱིས་ཁུར་དུ་བཞེས་ནས་འགོད་པར་བྱེད་པའི་སངས་རྒྱས་ཀྱི་མཁྱེན་པ་ཞིག་གོ །བཅོ་བརྒྱད་པ་སྙིང་རྗེ་ཆེན་པོ་ལ་གཉིས་ཀྱི་དང་པོ་ནི། འདིར་སེམས་ཅན་ཐམས་ཅད་སྡུག་བསྔལ་དང་བྲལ་བའམ་སྐྱོབ་པར་འདོད་པའི་མཁྱེན་པའོ། །དབྱེ་ན། སེམས་ཅན་ཐམས་ཅད་སྡུག་བསྔལ་དང་བྲལ་ན་སྙམ་པ་དང་། བྲལ་བར་བྱའོ་སྙམ་པའི་སྙིང་རྗེ་གཉིས་ཡོད་ཀྱང་། འདིའི་སྙིང་རྗེ་ཆེན་པོ་ནི། སེམས་ཅན་ཐམས་ཅད་སྡུག་བསྔལ་མཐའ་དག་ལས་སྐྱོབ་པར་ཁུར་དུ་བཞེས་པའི་སངས་རྒྱས་ཀྱི་མཁྱེན་པ་ཞིག་གོ །ཉན་རང་བྱང་སེམས་སངས་རྒྱས་ཀྱི་སྙིང་རྗེ་གསུམ་ལ་ཁྱད་པར་ཅི་ཡོད་ཅེ་ན། རྟེན་གྱི་སྒོ་ནས་ཀྱང་ཁྱད་པར་ཡོད་མོད། སངས་རྒྱས་ཀྱི་སྙིང་རྗེ་ནི། དཔེར་ན། རྐང་དང་། བྱང་སེམས་ཀྱི་སྙིང་རྗེ་ནི་རུས་པ་དང་། ཉན་རང་གི་སྙིང་རྗེ་ནི་ཤ་དང་མཚུངས་པར་མདོ་ལས་བཤད་པ་ལྟར་ཁྱད་པར་ཡོད་དོ། །བཅུ་དགུ་བ་སངས་རྒྱས་ཀྱི་ཆོས་མ་འདྲེས་པ་ལ་དབྱེ་གཞི་དང་། དབྱེ་བའོ། །དང་པོ་ནི། འཕགས་པ་འོག་མ་བ་དང་རྟོགས་རིགས་མ་འདྲེས་པའི་སངས་རྒྱས་ཀྱི་མཁྱེན་པའོ། །དབྱེ་ན་བཅོ་བརྒྱད་དེ། སྤྱོད་པ་མ་འདྲེས་པ་དྲུག །རྟོགས་པ་མ་འདྲེས་པ་དྲུག །འཕྲིན་ལས་མ་འདྲེས་པ་གསུམ། ཡེ་ཤེས་མ་འདྲེས་པ་གསུམ་རྣམས་སོ། །དང་པོ་དྲུག་ནི། སྐུ་ལས་འཁྲུལ་བ་མི་མངའ་བའི་སྤྱོད་པ་མ་འདྲེས་པ་དང་། དེ་བཞིན་དུ་གསུང་ལ་ཅ་ཅོ་མི་མངའ་བ་དང་། ཐུགས་དྲན་པ་ཉམས་པ་མི་མངའ་བ་དང་། མཉམ་པར་མ་བཞག་པ་མི་མངའ་བ་དང་། བླང་དོར་བདེན་པར་ཐ་དད་དུ་འཛིན་པ་མི་མངའ་བ་དང་། དུས་ལ་བབ་མ་བབ་མ་བརྟགས་པའི་བཏང་སྙོམས་མི་མངའ་བའི་མ་འདྲེས་པ་རྣམས་སོ། །གཉིས་པ་དྲུག་ནི། སེམས་ཅན་གྱི་དོན་མཛད་པ་ལ་འདུན་པའི་རྟོགས་པ་མ་འདྲེས་པ་དང་། དེ་བཞིན་དུ་གདུལ་བྱའི་དོན་དུ་གཤེགས་པའི་བརྩོན་འགྲུས་དང་། གདུལ་བྱ་འདུལ་བ་མི་བརྗེད་པའི་དྲན་པ་དང་། དེ་བཞིན་ཉིད་ལ་མཉམ་པར་འཇོག་པའི་ཏིང་འཛིན་དང་། ཆོས་ཐམས་ཅད་རྣམ་པར་འབྱེད་པའི་ཤེས་རབ་དང་། སྒྲིབ་པ་སྤངས་པ་ལས་མི་ཉམས་པའི་མ་འདྲེས་པ་རྣམས་སོ། །གསུམ་པ་ནི། འབད་མེད་ལྷུན་གྱིས་གྲུབ་པའི་སྐུ་གསུང་ཐུགས་ཀྱི་འཕྲིན་ལས་མ་འདྲེས་པའི་ཡེ་ཤེས་གསུམ་མོ། །བཞི་པ་ནི། དུས་གསུམ་ཆགས་ཐོགས་མེད་པར་མཁྱེན་པའི་ཡེ་ཤེས་མ་འདྲེས་པ་གསུམ་མོ། །ཉི་ཤུ་བ་རྒྱུན་དུ་ཞུགས་པ་ལ། ཞུགས་པ་དང་། འབྲས་གནས་གཉིས་ཀྱི་དང་པོ་ལ། མཚན་ཉིད། དབྱེ་བ། ས་མཚམས་སོ། །དང་པོ་ནི། མཐོང་སྤངས་ཀུན་སྦྱོར་གསུམ་སྤངས་པས་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ཐོབ་ཕྱིར་དུ་བརྩོན་བཞིན་པའི་ལམ་སྒོམ་པའི་རྒྱུན་ལ་ཞུགས་པའི་ཉན་ཐོས་སོ། །འདིའི་ཀུན་སྦྱོར་གསུམ་ནི། འཇིག་ལྟ་ཀུན་བརྟགས་དང་། ཚུལ་ཞུགས་མཆོག་འཛིན་དང་། ཐེ་ཚོམ་ཀུན་བཏགས་སོ། །དབྱེ་ན་དེར་གྱུར་པའི་དབང་བོ་རྣོ་རྟུལ་གཉིས་སོ། །ས་མཚམས་ནི། ཉན་ཐོས་ཀྱི་སྦྱོར་ལམ་ནས་མཐོང་ལམ་རྣམ་གྲོལ་ལམ་མ་ཐོབ་ཚུན་ཆད་དུའོ། །གཉིས་པ་འབྲས་གནས་ལ་མཚན་ཉིད། དབྱེ་བ། ས་མཚམས་སོ། །དང་པོ་ནི། དེ་ལྟ་བུའི་འབྲས་བུ་ལ་གནས་པའི་ཉན་ཐོས་སོ། །དབྱེ་ན། དེར་གྱུར་པའི་སྤང་བྱ་གཅིག་ཅར་བ་དང་རིམ་གྱིས་པ་གཉིས་སོ། །ས་མཚམས་ནི། ཉན་ཐོས་མཐོང་ལམ་རྣམ་གྲོལ་ལམ་ནས་ཉན་ཐོས་དགྲ་བཅོམ་ཐོབ་ཁ་མའི་བར་དུའོ། །ཉེར་གཅིག་པ་ལན་ཅིག་ཕྱིར་འོང་ལ་ཞུགས་པ་དང་འབྲས་གནས་གཉིས་ཀྱི་དང་པོ་ལ་མཚན་ཉིད། དབྱེ་བ། ས་མཚམས་སོ། །དང་པོ་ནི། འདོད་པའི་ཉོན་མོངས་དྲུག་པ་མངོན་གྱུར་པ་སྤངས་པས་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ཐོབ་ཕྱིར་དུ་བརྩོན་ཞིང་འདོད་པར་སྐྱེ་བ་གཅིག་ལེན་པའི་རིགས་སུ་གནས་པའི་ཉན་ཐོས་སོ། །དབྱེ་ན་དེར་གྱུར་པའི་ཐོད་རྒལ་བ་དང་མཐར་གྱིས་པ་གཉིས་སོ། །ས་མཚམས་ལ། ཐོད་རྒལ་བའི་ཞུགས་པ་ནི་ཉན་ཐོས་ཀྱི་སྦྱོར་ལམ་ནས་མཐོང་ལམ་རྣམ་གྲོལ་ལམ་མ་ཐོབ་བར་དང་། མཐར་གྱིས་པ་ནི་སྒོམ་ལམ་ཐོབ་པ་ནས་འདོད་ཉོན་དགུ་པ་དངོས་སུ་སྤོང་བའི་བར་དུའོ། །གཉིས་པ་འབྲས་གནས་ལ་མཚན་ཉིད། དབྱེ་བ། ས་མཚམས་སོ། །དང་པོ་ནི། དེ་འདྲའི་འབྲས་བུ་ལ་གནས་པའི་ཉན་ཐོས་སོ། །དབྱེ་ན་སྔར་ལྟར་གཉིས་སོ། །ས་མཚམས་ལ་ཐོད་རྒལ་བ་ནི་མཐོང་ལམ་པ་དང་། མཐར་གྱིས་པ་ནི་འདོད་ཉོན་དྲུག་པ་སྤངས་པའི་སྒོམ་ལམ་ནས་དགུ་བ་དངོས་སུ་སྤོང་བའི་བར་དུའོ། །ཉེར་གཉིས་པ་ཕྱིར་མི་འོང་ལ་ཞུགས་པ་དང་འབྲས་གནས་གཉིས་ཀྱི་དང་པོ་ལ། མཚན་ཉིད། དབྱེ་བ། ས་མཚམས་སོ། །དང་པོ་ནི། འདོད་ཉོན་དགུ་པ་མངོན་གྱུར་པ་སྤངས་པས་རབ་ཏུ་ཕྱེ་བའི་དགེ་སྦྱོང་ཚུལ་གྱི་འབྲས་བུ་ཐོབ་ཕྱིར་དུ་བརྩོན་བཞིན་པའི་ཉན་ཐོས་སོ། །དབྱེ་ན། དེ་ལ་དེར་གྱུར་པའི་ཆགས་བྲལ་སྔོན་སོང་དང་མཐར་གྱིས་པ་གཉིས་སོ། །ས་མཚམས་ལ། ཆགས་བྲལ་སྔོན་སོང་ནི་མཐོང་ལམ་ཚུན་དང་། མཐར་གྱིས་པ་ནི། འདོད་ཉོན་བདུན་པ་སྤོང་བའི་སྒོམ་ལམ་ནས་འདོད་ཉོན་དགུ་པ་དངོས་སུ་སྤོང་བའི་བར་དུའོ། །གཉིས་པ་འབྲས་གནས་ལ་མཚན་ཉིད། དབྱེ་བ། ས་མཚམས་སོ། །དང་པོ། དེ་འདྲའི་འབྲས་བུ་ལ་གནས་པའི་ཉན་ཐོས་སོ། །དབྱེ་ན། སྔར་ལྟར་གཉིས་ཏེ། རྒྱས་པར་ཕྱེ་ན་མང་དུ་ཡོད་དོ། །ས་མཚམས་ལ། ཆགས་བྲལ་སྔོན་སོང་ནི་མཐོང་ལམ་པ་དང་། མཐར་གྱིས་པ་ནི། འདོད་ཉོན་དགུ་བ་སྤངས་པ་ནས་སྲིད་ཉོན་དགུ་བ་དངོས་སུ་སྤོང་བའི་བར་དུའོ། །ཉེར་གསུམ་པ་དགྲ་བཅོམ་སྐོར་ལ། ཞུགས་པ་དང་འབྲས་གནས་གཉིས་ཀྱི་དང་པོ་ལ། མཚན་ཉིད་དབྱེ་བ། ས་མཚམས་སོ། །དང་པོ་ནི། སྲིད་རྩེའི་ཉོན་མོངས་དགུ་བ་སྤངས་པས་རབ་ཏུ་བྱེ་བའི་དགེ་སྦྱོང་ཚུལ་གྱི་འབྲས་བུ་ཐོབ་ཕྱིར་དུ་བརྩོན་བཞིན་པའི་ཉན་ཐོས་སོ། །དབྱེ་ན་གཅིག་ཆར་བ་དང་རིམ་གྱིས་པའི་དགྲ་བཅོམ་ཞུགས་པ་གཉིས་སོ། །ས་མཚམས་ནི། ཉན་ཐོས་ཀྱི་སྒོམ་ལམ་ཐོབ་ནས་རྡོ་རྗེ་ལྟ་བུའི་ཏིང་ངེ་འཛིན་གྱི་བར་དུའོ། །གཉིས་པ་འབྲས་གནས་ལ་མཚན་ཉིད། དབྱེ་བ། ས་མཚམས་སོ། །དང་པོ་ནི། དེ་འདྲའི་འབྲས་བུ་ལ་གནས་པའི་ཉན་ཐོས་སོ། །འདི་དང་ཉན་ཐོས་དགྲ་བཅོམ་པ་གཉིས་དོན་གཅིག །དབྱེ་ན་སྔར་ལྟར་དགྲ་བཅོམ་པ་གཉིས་སོ། །ས་མཚམས་ནི། ཉན་ཐོས་ཀྱི་མི་སློབ་ལམ་ཁོ་ནའོ། །ཉེར་བཞི་བ་རང་སངས་རྒྱས་ལ་མཚན་ཉིད། དབྱེ་བ་གཉིས། དང་པོ་ནི། རང་དོན་དུ་ཐར་བ་དོན་གཉེར་གཙོ་བོར་བྱེད་པའི་ཐེག་པ་འབྲིང་བོའི་གང་ཟག་གོ །རང་སངས་རྒྱས་ཞེས་པ་ནི། སྲིད་པ་ཐ་མའི་ཚེ་སློབ་དཔོན་གཞན་གྱི་མན་ངག་ལ་མི་བརྟེན་པར་རང་སྟོབས་ཀྱིས་མྱང་འདས་མངོན་དུ་བྱེད་པས་དེ་སྐད་ཅེས་བྱའོ། །དབྱེ་ན། བསེ་རུ་ལྟ་བུ་དང་ཚོགས་སྤྱོད་ཆེ་ཆུང་གི་རང་རྒྱལ་གཉིས་ཏེ་གསུམ་མོ། །ཉེར་ལྔ་བ་ཐམས་ཅད་ཤེས་པ་ཉིད་ལ་མཚན་ཉིད་དང་། དབྱེ་བའོ། །དང་པོ་ནི། ཐེག་དམན་འཕགས་པའི་མཁྱེན་པ་དངོས་དང་ཐེག་དམན་གྱི་རྟོགས་རིགས་སུ་གནས་པའི་ཐེག་ཆེན་འཕགས་པའི་མཁྱེན་པ་གང་རུང་གིས་བསྡུས་པའི་འཕགས་པའི་མཁྱེན་པའོ། །འདི་དང་གཞི་ཤེས་གཉིས་དོན་གཅིག །དབྱེ་ན་ཐེག་པ་གསུམ་གྱི་གཞི་ཤེས་རྣམ་པ་གསུམ་མོ། །ཉེར་དྲུག་པ་ལམ་ཤེས་པ་ཉིད་ལ་མཚན་ཉིད་དང་། དབྱེ་བའོ། །དང་པོ་ནི། ཐེག་པ་གསུམ་གྱི་ལམ་བདེན་མེད་དུ་མངོན་སུམ་དུ་རྟོགས་པའི་ཤེས་རབ་དང་ཐབས་ཁྱད་པར་ཅན་གཉིས་ཀྱིས་ཟིན་པའི་ཐེག་ཆེན་འཕགས་པའི་མཁྱེན་པའོ། །འདི་དང་ཐེག་ཆེན་འཕགས་པའི་མངོན་རྟོགས་གཉིས་དོན་གཅིག །ཉེར་བདུན་པ་རྣམ་པ་ཐམས་ཅད་མཁྱེན་པ་ཉིད་ལ་མཚན་ཉིད་དང་། དབྱེ་བའོ། །དང་པོ་ནི། ཤེས་བྱའི་རྣམ་པ་ཐམས་ཅད་མངོན་སུམ་དུ་རྟོགས་པའི་ཡེ་ཤེས་མཐར་ཐུག་གོ །འདི་དང་སངས་རྒྱས་ཀྱི་མཁྱེན་པ་གཉིས་དོན་གཅིག དབྱེ་ན། ཇི་ལྟ་ཇི་སྙེད་མཁྱེན་པའི་རྣམ་མཁྱེན་གཉིས་ཏེ། རྒྱས་པར་ཕྱེ་ན་མང་དུ་དོགས་པས་རེ་ཞིག་དེ་ཙམ་མོ། །སྨྲས་པ། གསུང་རབ་སྤྱི་དང་ཤེར་ཕྱིན་མདོ་ཉིད་ཀྱི། །དངོས་བསྟན་འགྲེས་རྐང་ཇི་སྙེད་ཡོད་གྱུར་བའི། །དོན་རྣམས་ཐོགས་མེད་སྐུ་མཆེད་རྣམ་གཉིས་སོགས། །མཁས་པའི་བཞེད་སྲོལ་དཔང་བཞག་ལེགས་པར་བཀྲལ། །རྒྱལ་བའི་དམ་ཆོས་འཆད་རྩོད་རྩོམ་གསུམ་གྱིས། །འཛིན་པར་མཛད་པའི་ཚུལ་དེ་ཆེས་དཀའ་ཡང་། །ཡུམ་གྱི་དགོངས་པ་འགྲེལ་བར་རབ་བསམས་ཏེ། །ཉུང་ངུའི་ཚིག་གིས་རྒྱ་ཆེའི་གནས་ཀུན་བསྡུས། །ཐུབ་པའི་གསུང་རབ་དགོངས་དོན་ནམ་མཁའ་བཞིན། །རྒྱ་བོད་མཁས་པའི་མཁྱེན་མཆོག་ཉི་ཟླ་བཞིན། །དེང་དུས་མཁས་རློམ་རྣམ་དཔྱོད་རྒྱུ་སྐར་བཞིན། །བདག་འདྲའི་བློ་གྲོས་ཉམས་ཆུང་མེ་འཁྱེར་བཞིན། །གཟུར་གནས་བློ་ལྡན་གང་གིས་འདི་མཐོང་ཚེ། །དགྱེས་པའི་འཛུམ་དཀར་སྟོན་པར་ངེས་མོད་ཀྱང་། །གཞན་དག་སྙིང་ལ་ཟུག་རྔུ་སྦྱིན་པའམ། །ཀུན་དུ་རྨོངས་པའི་རྟོག་པ་འཐོབ་འགྱུར་སེམས། །གྲོགས་དག་ཚུལ་འདི་ལྟ་བུའི་ལེགས་བཤད་ཀྱི། །བདུད་རྩི་མྱོང་བའི་དགའ་བདེས་རོལ་གྱིས་ན། །བསྟན་ལ་ཞུགས་པའི་དགོས་པ་མཆིས་སྲིད་ཀྱི། །དེ་མིན་རབ་ཏུ་བྱུང་བའི་དགོས་པ་གང་། །རྒྱ་མཚོའི་དབུས་ན་ཡིད་བཞིན་ནོར་བུ་རྡོ། །མ་ལ་ཡ་ན་ཙན་དན་ནགས་ཚལ་བཞིན། ཁ་ཆེའི་ཡུལ་ན་གུར་གུམ་རྩྭ་ལྟ་བུ། །གླིང་གཞན་འགའ་ན་གསེར་དངུལ་ས་རྡོ་བཞིན། །སྙིང་བོ་མེད་ལ་སྙིང་བོར་མཐོང་བ་ཡི། །ཚུལ་འདིས་རང་ཅག་ཐམས་ཅད་བསླུས་པ་སྟེ། །དེས་ན་རབ་ཏུ་བྱུང་བས་དོན་གང་ལ། །སྙིང་བོར་འཛིན་པའི་གནས་དེ་ཤེས་པར་གྱིས། །འདིར་འབད་ལེགས་པར་བཤད་ལས་ཐོབ་པའི་དགེས། །ཚེ་རབས་ཀུན་དུ་དལ་བའི་རྟེན་རྙེད་ནས། །རྒྱལ་བའི་དམ་ཆོས་རྒྱལ་བའི་དགོངས་པ་བཞིན། །འཛིན་ལ་རྗེ་བཙུན་འཇམ་པའི་དབྱངས་བཞིན་ཤོག །ཅེས་པ་འདིའང་སྐྱིད་ཐང་གནས་བརྟན་རྒྱལ་མཚན་དཔལ་བཟང་ཞེས་བགྱི་བས་ཞོན་རྟའི་གནང་སྦྱིན་བཅས་མཐུན་རྐྱེན་སྦྱར་བ་ལ་བརྟེན་ནས། བཤད་སྒྲུབ་མིང་ཅན་གྱིས་ལེགས་པར་བགྱིས་པ་སྟེ་མཚན་ཉིད་སོགས་ལ་བཞེད་པ་མི་འདྲ་བ་ཅུང་ཟད་རེ་ནི་ཡོད་དོ། །བཀྲ་ཤིས། ཤུ་བཾ། དགེ་ལེགས་འཕེལ་ལོ།། །།