ཐེག་པ་མཆོག་གི་ལམ་གྱི་རིམ་པ་དང་མཐུན་པར་བརྗོད་པའི་སྨོན་ལམ་བྱང་ཆུབ་བགྲོད་པའི་ཐེམ་སྐས།

ཐེག་པ་མཆོག་གི་ལམ་གྱི་རིམ་པ་དང་མཐུན་པར་བརྗོད་པའི་སྨོན་ལམ་བྱང་ཆུབ་བགྲོད་པའི་ཐེམ་སྐས་ཞེས་བྱ་བ་བཞུགས།

འཕགས་པ་ཀུན་ཏུ་བཟང་པོ་ལ་ཕྱག་འཚལ་ལོ། །ཕྱོགས་བཅུར་བཞུགས་པའི་བླ་མ་མཆོག་གསུམ་དང་། །ཡི་དམ་རྒྱལ་བ་སྲས་བཅས་ཉན་རང་འཕགས། །དཔའ་བོ་མཁའ་འགྲོ་བསྟན་སྲུང་ཚོགས་དང་བཅས། །འདིར་གཤེགས་སྨོན་པ་འགྲུབ་པའི་དབང་པོ་མཛོད། །ཕྱག་འཚལ་མཆོད་ཚོགས་ཀུན་འབུལ་སྡིག་ལྟུང་བཤགས། །དགེ་ལ་ཡི་རང་ཆོས་འཁོར་བསྐོར་བར་བསྐུལ། །མྱང་ངན་མི་འདའ་བཞུགས་གསོལ་དགེ་བ་རྣམས། །འགྲོ་བའི་དོན་དུ་སངས་རྒྱས་ཐོབ་ཕྱིར་བསྔོ། །དགེ་བའི་རྩ་བ་འདིས་མཚོན་ཏེ་རང་གཞན་སྐྱེ་འཕགས་ཐམས་ཅད་ཀྱི་དགེ་ཚོགས་རྣམས་ཕྱོགས་གཅིག་ཏུ་བསྡོམ་པའི་མཐུ་དང་ནུས་པ་ལ་བརྟེན་ནས། བདག་ཅག་ལ་སོགས་པའི་སེམས་ཅན་ཐམས་ཅད་ཚེ་རབས་ཀུན་ཏུ་ཡང་ངན་སོང་ངན་འགྲོ་ལོག་པར་ལྟུང་བའི་སྐྱེ་གནས་དམན་པ་རྣམས་སུ་ནམ་ཡང་སྐྱེ་བར་མ་གྱུར་ཅིག །ཁྱད་པར་དུ་ཡང་། ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། དུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་དང་བཅས་པའི་ཚ་བའི་དམྱལ་བ་རྣམས་སུ་ནམ་ཡང་སྐྱེ་བར་མ་གྱུར་ཅིག །ཆུ་བུར་ཅན་དང་། ཆུ་བུར་བརྡོལ་བ་དང་། སོ་ཐམ་ཐམ་པ་དང་། ཀྱི་ཧུད་ཟེར་བ་དང་། ཨ་ཆུ་ཟེར་བ་དང་། ཨུཏྤལ་ལྟར་གས་པ་དང་། པདྨ་ལྟར་གས་པ་དང་། པདྨ་ཆེན་པོ་ལྟར་གས་པ་དང་བཅས་པའི་གྲང་བའི་དམྱལ་བ་རྣམས་སུ་ནམ་ཡང་སྐྱེ་བར་མ་གྱུར་ཅིག །མེ་དམར་མུར་གྱི་འོབས་དང་། རོ་མྱགས་ཀྱི་འདམ་དང་། རལ་གྲིའི་ལོ་མའི་ནགས་ཚལ་དང་། ཆུ་བོ་རབ་མེད་དང་། ཤལ་མ་ལིའི་སྡོང་པོ་ལ་སོགས་པའི་ཉེ་འཁོར་ཉེ་ཚེ་བའི་དམྱལ་བ་རྣམས་སུ་ནམ་ཡང་སྐྱེ་བར་མ་གྱུར་ཅིག །དམྱལ་བར་སྐྱེས་ཟིན་པའི་སེམས་ཅན་དེ་དག་ཐམས་ཅད་ཀྱང་དམྱལ་བའི་སྡུག་བསྔལ་ལས་ཐར་པར་གྱུར་ཅིག །བདག་ཅག་ལ་སོགས་པའི་སེམས་ཅན་ཐམས་ཅད་ཕྱིའི་སྒྲིབ་པ་ཅན་དང་། ནང་གི་སྒྲིབ་པ་ཅན་དང་། མེ་ལྕེའི་འཕྲེང་བ་ཅན་དང་། མི་གཙང་བ་ཟ་བ་དང་། རང་ཤ་བཅད་ཅིང་ཟ་བ་ལ་སོགས་པའི་ཡི་དྭགས་ཀྱི་གནས་རྣམས་སུ་ནམ་ཡང་སྐྱེ་བར་མ་གྱུར་ཅིག །ཡི་དྭགས་ཀྱི་སུ་སྐྱེས་པའི་སེམས་ཅན་དེ་དག་ཐམས་ཅད་ཀྱང་ཡི་དྭགས་ཀྱི་སྐྱེ་གནས་ལས་ཐར་བར་འགྱུར་ཅིག །བདག་ཅག་ལ་སོགས་པའི་སེམས་ཅན་ཐམས་ཅད་བདུད་དང་གནོད་སྦྱིན་དང་གཤིན་རྗེ་དང་སྲིན་པོ་དང་ཤ་ཟ་དང་འབྱུང་པོ་ལ་སོགས་པའི་མི་མ་ཡིན་རྣམས་སུ་ནམ་ཡང་སྐྱེ་བར་མ་གྱུར་ཅིག །ཀླུའི་རིགས་དང་སེངྒེ་དང་སྟག་དང་དོམ་དྲེད་དང་འཕར་སྤྱང་དང་གླང་པོ་ཆེ་དང་རྟ་དང་མ་ཧེ་དང་བ་ལང་དང་རྔ་མོང་དང་བོང་བུ་དང་ར་ལུག་དང་ཕག་དང་བྱ་ཁྱི་དང་བྱི་བ་དང་སྡིག་སྦྲུལ་དང་ཉ་དང་འབུ་སྲིན་ལ་སོགས་པའི་དུད་འགྲོའི་སྐྱེ་གནས་རྣམས་སུ་ནམ་ཡང་སྐྱེ་བར་མ་གྱུར་ཅིག །མི་མ་ཡིན་དང་དུད་འགྲོར་སྐྱེས་པའི་སེམས་ཅན་ཐམས་ཅད་ཀྱང་སྐྱེ་གནས་དེ་དག་ལས་ཐར་བར་གྱུར་ཅིག །བདག་ཅག་ལ་སོགས་པའི་སེམས་ཅན་ཐམས་ཅད་རྟག་ཏུ་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་གྱུར་ཅིག །མི་ཁོམ་པ་བརྒྱད་ཀྱི་གནས་སུ་ནམ་ཡང་མི་སྐྱེ་ཞིང་། རྟག་ཏུ་དམ་པའི་ཆོས་ཚུལ་སྒྲུབ་ནུས་པའི་ལྷ་མིའི་རྟེན་ཁྱད་པར་ཅན་ཐོབ་པར་གྱུར་ཅིག །རྟག་ཏུ་དལ་འབྱོར་ཚང་བའི་མིའི་ལུས་རྣམ་པར་དག་པ་བར་མ་ཆད་དུ་ཐོབ་ཅིང་ཚེ་རབས་དྲན་པར་གྱུར་ཅིག །ཚེ་རབས་ཐམས་ཅད་དུ་བསླབ་གསུམ་རྣམ་པར་དག་པ་དང་ལྡན་པའི་རབ་བྱུང་གི་རྟེན་ཤ་སྟག་ཐོབ་པར་གྱུར་ཅིག །བདག་ཅག་ལ་སོགས་པའི་སེམས་ཅན་ཐམས་ཅད་ཀྱི་རྒྱུད་ལ་འཁོར་བ་མཐའ་དག་སྡུག་བསྔལ་གྱི་རང་བཞིན་དུ་ཤེས་ནས་དེ་ལས་ཐར་བར་འདོད་པའི་ཐར་པ་དོན་གཉེར་ཀྱི་བློ་རྩོལ་མེད་དུ་སྐྱེ་བར་གྱུར་ཅིག །མིར་སྐྱེས་ཀྱང་ཡོ་བྱད་ཀྱིས་ཕོངས་ཞིང་དབུལ་བའི་སྡུག་བསྔལ་ལས་ཐར་བར་གྱུར་ཅིག །ཚ་གྲང་དང་བཀྲེས་སྐོམ་དང་ནད་སྣ་ཚོགས་དང་གདོན་སྣ་ཚོགས་ཀྱིས་གཟིར་བ་ལས་ཐར་བར་གྱུར་ཅིག །བཀྲ་མི་ཤིས་པ་དང་འཐབ་རྩོད་དང་ནོར་ཕྱུག་དང་ལོ་ཉེས་པ་དང་མེ་ཆུ་ལ་སོགས་པའི་འཇིགས་པ་ཆེན་པོ་བརྒྱད་ལས་ཐར་བར་གྱུར་ཅིག །སྡུག་བསྔལ་གྱི་སྡུག་བསྔལ་སོགས་སྡུག་བསྔལ་གསུམ་དང་། དགྲ་གཉེན་ངེས་མེད་ལ་སོགས་པའི་སྡུག་བསྔལ་དྲུག་དང་། སྐྱེ་རྒ་ན་འཆི་ལ་སོགས་པའི་སྡུག་བསྔལ་བརྒྱད་ལས་ཐར་བར་གྱུར་ཅིག །འཁོར་བར་སྐྱེ་བའི་རྒྱུ་མི་དགེ་བ་བཅུ་དང་མཚམས་མེད་པ་ལྔ་དང་རྩ་བ་དང་ཉེ་བའི་ཉོན་མོངས་པ་ཐམས་ཅད་དང་དེས་བསགས་པའི་ལས་ཀྱི་ཀུན་འབྱུང་གི་བདེན་པ་རྣམས་ལས་ཐར་བར་གྱུར་ཅིག །བདག་ཅག་ལ་སོགས་པའི་སེམས་ཅན་ཐམས་ཅད་ཀྱང་ལྷ་མིན་གྱི་འཇིག་རྟེན་དུ་མི་སྐྱེ་ཞིང་ལྷ་མ་ཡིན་འཐབ་རྩོད་ཀྱི་སྡུག་བསྔལ་ལས་ཐར་བར་གྱུར་ཅིག །ལྷའི་གནས་སུ་སྐྱེས་ཀྱང་འཆི་འཕོ་ལྟུང་བྱེད་ཀྱི་སྡུག་བསྔལ་ལས་ཐར་བར་གྱུར་ཅིག །མདོར་ན་ཁམས་གསུམ་འཁོར་བ་ན་སྡུག་བསྔལ་གྱི་རིགས་ཇི་སྙེད་ཅིག་འཆིས་པའི་འཁོར་བའི་སྡུག་བསྔལ་ཐམས་ཅད་ལས་ཐར་ནས་ཞི་བ་མྱ་ངན་ལས་འདས་པ་ཐོབ་པར་གྱུར་ཅིག །བདག་ཅག་ལ་སོགས་པའི་སེམས་ཅན་ཐམས་ཅད་ཀྱི་རྒྱུད་ལ་སེམས་ཅན་མཐའ་དག་ལ་དམིགས་པའི་བྱམས་པ་དང་སྙིང་རྗེ་ཆེན་པོ་རྒྱུན་མི་ཆད་དུ་སྐྱེ་བར་གྱུར་ཅིག །སྙིང་རྗེས་ཀུན་ནས་བསླངས་ཏེ་རང་གཞན་གྱི་དོན་དུ་དམིགས་ནས་སངས་རྒྱས་ཐོབ་འདོད་ཀྱི་བྱང་ཆུབ་ཏུ་སེམས་བསྐྱེད་པར་གྱུར་ཅིག །སེམས་བསྐྱེད་ནས་སྤྱོད་པ་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱེད་ནུས་པར་གྱུར་ཅིག །ཆོས་དང་ཟང་ཟིང་གི་དངོས་པོ་གཞན་ལ་གཏོང་བའི་སྒོ་ནས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་ཅིག །ཉེས་སྤྱོད་སྡོམ་པའི་ཚུལ་ཁྲིམས་དང་། དགེ་བ་ཆོས་སྡུད་ཀྱི་ཚུལ་ཁྲིམས་དང་། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་གྱི་སྒོ་ནས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་རྫོགས་པར་གྱུར་ཅིག །གནོད་པ་ལ་ཇི་སྙམ་པ་དང་། སྡུག་བསྔལ་དང་ལེན་དང་། ཆོས་ལ་ངེས་སེམས་ཀྱི་བཟོད་པའི་སྒོ་ནས་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་ཅིག །གུས་སྦྱོར་དང་རྟག་སྦྱོར་གྱི་བརྩོན་འགྲུས་ཀྱི་སྒོ་ནས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་ཅིག །ཇི་ལྟ་བ་དང་ཇི་སྙེད་པ་ལ་དམིགས་པའི་ཞི་གནས་ཀྱི་སྒོ་ནས་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་ཅིག །ཀུན་རྫོབ་དང་དོན་དམ་པའི་ཆོས་ཀྱི་རང་བཞིན་ཇི་ལྟ་བ་བཞིན་ཤེས་པའི་སྒོ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་ཅིག །སྦྱིན་པ་དང་ཚིག་སྙན་པ་དང་དོན་མཐུན་པ་དང་དོན་སྤྱོད་པའི་བསྡུ་བ་བཞིའི་སྒོ་ནས་སེམས་ཅན་གྱི་དོན་བྱེད་པར་གྱུར་ཅིག །རང་ཉིད་སྡུག་བསྔལ་བར་གྱུར་ཀྱང་སླ་ཡི། སེམས་ཅན་ཐམས་ཅད་ཀྱི་དོན་བྱེད་པར་འདོད་པའི་གཞན་ཕན་གྱི་བློ་ནམ་ཡང་འདོར་བར་མ་གྱུར་ཅིག །གྲངས་མེད་པའི་ཞིང་རྣམས་སུ་སྣ་ཚོགས་པའི་སྤྲུལ་པའི་རྣམ་རོལ་གྱིས་སེམས་ཅན་མཆོག་དམན་མཐའ་དག་དང་ཁྱད་པར་དུ་མ་དག་པའི་ཞིང་གི་འགྲོ་བ་རྣམས་སྨིན་གྲོལ་གྱི་ལམ་ལ་འགོད་པར་མཛད་པ་ལ་འཕགས་པ་རིགས་གསུམ་གྱི་ མགོན་པོ་ཅི་འདྲ་བར་དེ་འདྲ་བར་གྱུར་ཅིག །བྱང ་ཆུབ་སེམས་དཔའ་ཀུན་ཏུ་བཟང་པོས་སྨོན་ལམ་ཇི་ལྟ་མཛད་པ་དེ་འདྲ་བའི་སྨོན་ལམ་རླབས་པོ་ཆེ་མ་ལུས་པ་འགྲུབ་པར་གྱུར་ཅིག །ཚེ་རབས་ཐམས་ཅད་དུ་རྒྱལ་བ་ཀུན་གྱི་མདོ་སྔགས་ཀྱི་དམ་པའི་ཆོས་མ་ལུས་པར་རྒྱལ་བའི་དགོངས་པ་ཇི་ལྟ་བ་བཞིན་དུ་འཛིན་པ་ལ་ཆོས་ཀྱི་རྒྱལ་པོ་ཙོང་ཁ་པ་ལྟ་བུར་གྱུར་ཅིག །བདག་ཅག་ལ་སོགས་སེམས་ཅན་ཐམས་ཅད་འཆི་བའི་དུས་ཀྱི་ཚེ་རྒྱལ་བ་འོད་དཔག་ཏུ་མེད་པ་དང་མི་འཁྲུགས་པ་དང་སྨན་གྱི་བླ་མ་དང་ཉེ་བའི་སྲས་ཆེན་བརྒྱད་ལ་སོགས་པ་སངས་རྒྱས་བྱང་སེམས་ཀྱི་ཞལ་མངོན་སུམ་དུ་མཐོང་ནས་ལམ་སྣ་མཛད་པར་གྱུར་ཅིག །ཤི་འཕོས་ནས་དགའ་ལྡན་དང་མངོན་དགའ་འམ་བདེ་བ་ཅན་ལ་སོགས་པའི་དག་པའི་ཞིང་རྣམ་པར་དག་པ་ཉིད་དུ་ཐེག་པ་ཆེན་པོའི་རིགས་ཅན་དབང་པོ་རྣོན་པོ་ཤ་སྟག་ཏུ་པདྨ་ལས་བརྫུས་ཏེ་སྐྱེ་བར་གྱུར་ཅིག །དེར་སྐྱེས་མ་ཐག་ཏུ་ཏིང་ངེ་འཛིན་དང་གཟུངས་དང་སྤོབས་པ་དང་མངོན་པར་ཤེས་པ་དང་རྫུ་འཕྲུལ་མཆོག་གི་ཕ་རོལ་ཏུ་ཕྱིན་པ་ཐོབ་པར་གྱུར་ཅིག །དག་པའི་ཞིང་དུ་སྐྱེས་ནས་རང་དབང་ཐོབ་པ་ན་མ་དག་པའི་ཞིང་དུ་ཕྱིན་ནས་དེའི་སེམས་ཅན་རྣམས་གང་ལ་གང་འཚམས་ཀྱི་ཆོས་སྟོན་པ་ལ་སོགས་པའི་ཐབས་ཚུལ་སྣ་ཚོགས་པའི་སྒོ་ནས་རྒྱལ་བའི་ལམ་བཟང་རྣམ་པར་དག་པ་ལ་འགོད་ནུས་པར་གྱུར་ཅིག །བྱང་ཆུབ་ཀྱི་སྤྱོད་པ་སྤྱད་པའི་ཚེ་བྱ་དཀའ་བའི་སྤྱོད་པ་མཐའ་དག་ལ་ནམ་ཡང་མི་ཞུམ་ཞིང་སྒྱིད་ལུགས་པ་མེད་པར་རྒྱལ་སྲས་ཀྱི་སྤྱོད་པ་རླབས་པོ་ཆེ་རྒྱ་མཚོའི་ཕ་རོལ་ཏུ་སོན་པར་གྱུར་ཅིག །གཞན་ཡང་སྐྱེ་བ་ཐམས་ཅད་དུ་ཐེག་པ་མཆོག་གི་དགེ་བའི་བཤེས་གཉེན་གྱིས་དགྱེས་བཞིན་དུ་རྗེས་སུ་འཛིན་པ་དང་མི་འབྲལ་བར་གྱུར་ཅིག །རྗེས་སུ་བཟུང་ནས་ཀྱང་དེས་བསྟན་པའི་མདོ་སྔགས་ཀྱི་དམ་པའི་ཆོས་མཐའ་དག་གི་དོན་ཁོང་དུ་ཆུད་ནས་དོན་ཉམས་སུ་ལེན་ཅིང་། ཁྱད་པར་དུ་ཡང་རྡོ་རྗེ་ཐེག་པའི་རིམ་གཉིས་ཀྱི་ཟབ་ལམ་ཉམས་སུ་ལེན་པ་དང་མི་འབྲལ་བར་གྱུར་ཅིག །དེ་ལྟར་མདོ་སྔགས་ཀྱི་ཟབ་དོན་ཀུན་རྒྱལ་བའི་དགོངས་པ་ཇི་ལྟ་བ་བཞིན་ཉམས་སུ་བླངས་ནས་མར་གྱུར་འགྲོ་བ་ཐམས་ཅད་ཀྱི་དོན་དུ་རྒྱལ་བའི་གོ་འཕང་རིན་པོ་ཆེ་མྱུར་དུ་ཐོབ་པར་གྱུར་ཅིག །བདག་གང་དུ་འཚང་རྒྱ་བའི་སངས་རྒྱས་ཀྱི་ཞིང་དེར་ངན་སོང་གསུམ་གྱི་མིང་ཡང་མི་གྲགས་ཤིང་རྣམ་པར་དག་པ་དང་སྣོད་བ ཅུད་ཀྱི་འབྱོར་པ་ཕུན་སུམ་ཚོགས་པའི་སྒོ་ནས་དག་པའི་ཞིང་གཞན་དུ་མ་ལས་ཁྱད་པར་དུ་འཕགས་པ་རྗེ་བཙུན་འཇམ་དབྱངས་སངས་རྒྱས་པའི་རྒྱལ་བ་ཀུན་གཟིགས་ཀྱི་ཞིང་དེ་ལྟ་བུར་གྱུར་ཅིག །རྒྱལ་སྲས་སྨོན་ལམ་གངྒཱའི་ཀླུང་རྣམས་ནི། །དམ་ཆོས་འཛིན་པའི་སྨོན་ལམ་ནང་འདུས་པར། །གསུངས་ཕྱིར་དགེ་རྩ་ཇི་སྙེད་བསགས་པ་རྣམས། །ཀུན་ཀྱང་བསྟན་པ་རྒྱས་པའི་ཆེད་དུ་བསྔོ། །རྨད་བྱུང་སྲས་བཅས་རྒྱལ་བའི་བྱིན་རླབས་དང་། །རྟེན་འབྲེལ་བསླུ་བ་མེད་པའི་བདེན་པ་དང་། །བདག་གི་ལྷག་བསམ་དག་པའི་མཐུ་སྟོབས་ཀྱིས། །རྣམ་དག་སྨོན་པའི་གནས་འདི་འགྲུབ་པར་ཤོག། །།ཅེས་ཐེག་པ་མཆོག་གི་ལམ་གྱི་རིམ་པ་དང་མཐུན་པར་བརྗོད་པའི་སྨོན་ལམ་བྱང་ཆུབ་བགྲོད་པའི་ཐེམ་སྐས་ཞེས་བྱ་བ་འདི་ནི། དད་དང་བློ་གྲོས་ལྡན་པ་ཏཱ་ཡི་ལ་ལུང་བློ་བཟང་དོན་གྲུབ་ཀྱིས་རང་གཞན་ལ་ཕན་པའི་ཆེད་དུ་བསྐུལ་བའི་ངོ་བོར། ཤཱཀྱའི་དགེ་སློང་བཤད་སྒྲུབ་མིན་ཅན་གྱིས་ཅོ་ནེའི་དགོན་ཉིད་དུ་སྦྱར་བ་སྟེ། པར་གྱི་ཡི་གེ་པ་ནི་བསྐུལ་བ་པོ་ཉིད་དོ། །མངྒ་ལཾ།།