རི་བོ་དགའ་ལྡན་པའི་བསྟན་པ་བླ་རབས་དང་བཅས་པ་ཆོས་འབྱུང་གསལ་བར་སྟོན་པའི་སྒྲོན་མེ།

རི་བོ་དགའ་ལྡན་པའི་བསྟན་པ་བླ་རབས་དང་བཅས་པ་ཆོས་འབྱུང་གསལ་བར་སྟོན་པའི་སྒྲོན་མེ་ཞེས་བྱ་བ་བཞུགས།

༈ ན་མོ་གུ་རུ་མཉྫུ་གྷོ་ཥཱ་ཡ། རབ་འབྱམས་རྒྱལ་ཀུན་ཡེ་ཤེས་ཕུང་པོ་ནི། །རབ་མཛེས་གུར་གུམ་མདོག་ཅན་གཞོན་ནུའི་སྐུ། །རབ་དཀར་གངས་རིའི་ལྗོངས་སུ་མངོན་བྱོན་པ། །རབ་མཆོག་བླ་མ་རྒྱལ་བ་གཉིས་པར་འདུད། །མགོན་དེའི་བསྟན་པའི་གདུགས་དཀར་སྲིད་རྩེའི་བར། ཁྱབ་པའི་གྲགས་དཀར་བདག་བློའི་ཡུལ་འགོང་ཡང་། །དབུས་གཙང་ཕྱོགས་སུ་ཇི་ལྟར་དར་བའི་ཚུལ། །མཁས་པའི་སྲོལ་ཞུགས་མདོར་བསྡུས་བརྗོད་པར་བྱ། །༈ དེ་ལ་འདིར་རྗེ་བཙུན་འཇམ་དབྱངས་ཀྱི་རྣམ་འཕྲུལ་རྗེ་རིན་པོ་ཆེའི་བསྟན་པ་ཤར་ནུབ་ཀྱི་རྒྱ་མཚོའི་མཐའི་བར་ཁྱབ་པར་གྱུར་པའི་ཚུལ་རྒྱས་པར་ནི། པཎ་ཆེན་བསོད་ནམས་གྲགས་པ་དང་། སྡེ་སྲིད་སངས་རྒྱས་རྒྱ་མཚོས་མཛད་པའི་དགའ་ལྡན་ཆོས་འབྱུང་སོགས་ལས་བཤད་པ་ལྟར་ཡིན་ལ། འདིར་རང་གི་སྐལ་བར་བསམས་ཏེ་རྗེའི་བསྟན་པ་སེར་འབྲས་དགེ་གསུམ་སོགས་སུ་དར་བའི་ཚུལ་ཙམ་ཞིག་བཤད་པར་བྱ་སྟེ། རྗེ་རིན་པོ་ཆེ་འདི་ཉིད་ལུང་བསྟན་པའི་གཞུང་དུ་མ་ཞིག་སྣང་བ་རྣམས་དྲངས་ན་མང་དུ་འགྱུར་དོགས་ཏེ། མིང་ཙམ་གྱི་སྒོ་ནས་བརྗོད་ན་འཇམ་དཔལ་རྩ་རྒྱུད། མདོ་སྡེ་རྒྱན་གྱི་བཤད་པའི་ལེའུ། རྒྱལ་པོ་བཀའ་འབུམ། རྒྱལ་པོ་བཀའ་ཐང་། པདྨ་བཀའ་ཆེམས། རཏྣའི་སྤྱི་ལུང་ཆེན་པོ། མཚོ་སྣ་ཟངས་བྲག་གི་གཏེར་ལུང་། བཀའ་གདམས་གླེགས་བམ་གྱི་སྐོར་ནས་ཀྱང་རྗེ་རིན་པོ་ཆེ་འདི་ཉིད་འབྱོན་པར་ལུང་བསྟན་ཅིང་། དཔལ་ལྡན་ཟླ་བས་ཀྱང་ལུང་བསྟན་ཏོ། །རྗེ་འཁྲུངས་པའི་ཡུལ་ནི། མདོ་སྨད་བཙོང་ཁའི་ཡུལ་དུ་ཡབ་ཀླུ་འབུམ་དགེ་དང་། ཡུམ་ཤིང་བཟའ་ཨ་ཆོས་གཉིས་ཀྱི་སྲས་སུ་རབ་བྱུང་དྲུག་པའི་མེ་བྱ་ལ་སྐུ་བལྟམས། དགུང་ལོ་གསུམ་པའི་ཚེ་དགེ་བསྙེན་དང་། བདུན་པའི་དུས་སུ་རབ་བྱུང་མཛད་དེ་བློ་བཟང་གྲགས་པའི་དཔལ་ཞེས་མཚན་གསོལ། དགུང་ལོ་བཅུ་དྲུག་བར་དུ་མཁན་པོ་ལ་བསྟེན་ནས་མདོ་སྔགས་ཀྱི་སྐོར་མང་དུ་གསན། དགུང་ལོ་བཅུ་བདུན་པའི་དུས་སུ་ཆོས་རྗེ་དོན་གྲུབ་རིན་ཆེན་ལ་བསྟེན་ནས་དབུས་སུ་ཕེབས། དེ་ནས་བདེ་བ་ཅན་དང་ས་སྐྱ་སོགས་སུ་ཕེབས་ནས་ཕར་ཚད་སོགས་གཞུང་ཆེན་རྣམས་ལ་སྦྱངས་པས་མཁས་པར་གྱུར་ནས་དབུས་དང་གཙང་གི་ཆོས་གྲྭ་རྣམས་སུ་དཀའ་བཞིའི་གྲྭ་སྐོར་མཛད་པ་ན་ཟླ་མེད་པའི་མཁས་པའི་གྲགས་པས་ཁྱབ། བླ་མ་རྗེ་བཙུན་རེད་མདའ་བ། ཆོས་ཀྱི་དཔལ་བ། ཁྱུང་པོ་ལྷས་པ། ལྷོ་བྲག་ཕྱག་རྡོར་སོགས་བསྟེན་ནས་མདོ་སྔགས་ཀྱི་ཆོས་ཀུན་ལ་སྦྱངས་པ་མཐར་ཕྱིན་པ་མཛད་ཅིང་། ཁྱད་པར་དུ་བླ་མ་དབུ་མ་པས་ལོ་ཙཱ་མཛད་དེ་རྗེ་བཙུན་འཇམ་དབྱངས་ལ་ཟབ་པ་དང་རྒྱ་ཆེ་བའི་ཆོས་རྣམས་ལ་དོགས་གཅོད་མང་དུ་མཛད་ལ། ཕྱིས་དགའ་བ་གདོང་དུ་འཇམ་དབྱང་ཀྱི་ཞལ་གཟིགས་ཏེ་དེ་ནས་བཟུང་རྗེ་བཙུན་ཉིད་ལས་ལྟ་བའི་དྲི་རྟོག་དང་འདུས་པ་སོགས་ཀྱི་ཆོས་ཚུལ་མཐའ་ཡས་པ་དངོས་སུ་གསན་ནོ། །རྗེས་ཆོས་གསན་པའི་བླ་མ་མང་དུ་ཡོད་ཀྱང་གཙོ་བོ་ནི་ཆོས་རྗེ་དོན་ཡོད་རིན་ཆེན། རྗེ་བཙུན་རེད་མདའ་བ། བླ་མ་དབུ་མ་པ། ལྷོ་བྲག་གྲུབ་ཆེན་དང་བཞིའོ། །དེ་དག་ཀྱང་མིའི་བླ་མའི་དབང་དུ་བྱས་ཤིང་རྟེན་འབྲེལ་བསྟོད་པ་ལས། བླ་མའི་དྲིན་གྱི་མཐོང་བའི་ཚེ། །ཞེས་པ་ལྟར་ན་བླ་མ་ཐམས་ཅད་ཀྱི་གཙོ་བོ་ནི་རྗེ་བཙུན་འཇམ་པའི་དབྱངས་སོ། །གཞན་ཡང་མདོ་སྔགས་ཀྱི་ལམ་རིམ་གཉིས་ལ་སོགས་པ་རྩོམ་པ་མཛད་པ་དང་། གདུལ་བྱ་ལ་ཆོས་ཇི་ལྟར་བསྟན་པ་དང་། དབེན་པ་བསྟེན་ནས་ཉམས་ལེན་མཛད་པ་དང་། ཉམས་སུ་བླངས་ནས་རྒྱུད་ལ་རིམ་གཉིས་ཀྱི་རྟོགས་པ་ཇི་ལྟར་འཁྲུངས་པ་རྣམས་འགོད་པར་མི་ལང་བས་གཞན་དུ་ཤེས་པར་བྱ་ལ། འདིར་ནི་དགའ་ལྡན། འབྲས་སྤུངས། སེ་ར། བཀྲ་ཤིས་ལྷུན་པོ་སོགས་སུ་དགོན་པ་འ དེབས་པའི་དུས་དང་། དེ་དག་ཏུ་རྗེའི་བསྟན་པ་འཛིན་པའི་བླ་རབས་ཇི་ལྟར་བྱུང་བའི་ཚུལ་ཅུང་ཟད་བཤད་པ་ལ། ཐོག་མར་དགའ་ལྡན་ནི། རྗེ་དགུང་ལོ་ང་གསུམ་པའི་ཐོག་ལྷ་སའི་སྨོན་ལམ་ཆེན་མོ་གྲོལ་ནས། གསང་བདག་གིས་ལུང་བསྟན་པ་ལྟར་འབྲོག་རིར་ཞབས་ཀྱི་བཅག་ཅིང་། རྒྱལ་ཚབ་དང་འདུལ་འཛིན་གཉིས་ཀྱིས་ཁུར་བཞེས་ནས་དགའ་ལྡན་རྣམ་པར་རྒྱལ་བའི་གླིང་བཏབ་སྟེ་དགེ་འདུན་གྱི་སྡེ་རིམ་གྱིས་ཚུགས། དགུང་ལོ་ང་དགུའི་གོང་དཔོན་ནམ་མཁའ་བཟང་པོ་དང་། འཇམ་དབྱངས་ཆོས་རྗེ་ལ་བཀས་བསྐུལ་ཏེ་འབྲས་སྤུངས་གཞི་བཏིང་ནས་དགུང་ལོ་ང་དགུའི་ཐོག་ཏུ་གྲུབ། དགུང་ལོ་རེ་གསུམ་ཐོག་བྱམས་ཆེན་ཆོས་རྗེ་ལ་བཀའ་གནང་སྟེ་སེ་ར་ཐེག་ཆེན་གླིང་བཏབ། རེ་ག །སུམ་པ་ས་ཕག་ལོ་དེའི་ཟླ་བ་བཅུ་པ་ཡན་ལ་སྐུ་དངོས་ཀྱི་གདུལ་བྱ་སྨིན་གྲོལ་གྱི་ལམ་ལ་འགོད་པའི་མཛད་པ་ཀུན་མཐར་ཕྱིན་ཏེ། ཟླ་བ་བཅུ་པའི་ཉེར་ལྔ་ལ་གཟུགས་སྐུའི་བཀོད་པ་ཆོས་ཀྱི་དབྱིངས་སུ་ཉེ་བར་བསྡུས་ནས་དགའ་ལྡན་དུ་གཤེགས། རྗེ་ལ་བུ་སློབ་ནམ་མཁའི་སྐར་ཚོགས་ལྟར་མང་ཡང་སྲས་ཀྱི་ཐུ་བོ་ནི་རྗེ་བཞུགས་པའི་སྐབས་དེར་གྲགས་པ། རྒྱལ་ཚབ་རྗེ་དང་འདུལ་འཛིན་གྲགས་པ་རྒྱལ་མཚན་གཉིས། མཁས་གྲུབ་རྗེ་ནི་ཐུགས་སྲས་ཀྱི་གཙོ་བོ། རྗེ་སྐུ་གཞོན་པའི་དུས་ཀྱི་བུ་སློབ་སྔར་ཚར་བ་གྲགས་ཆེ་བ་རྣམ་པ་བཞི་སྟེ། ཚ་ཁོ་ངག་དབང་གྲགས་པ། གྲགས་པ་བློ་གྲོས། ཛྙཱ་ན་ཤྲཱི །དགེ་བཤེས་སྟོན་པའོ། །ཕྱི་ཚར་འཇམ་དཀར་བ། བཟང་སྐྱོང་བ། རིན་རྒྱལ་བ། བྱང་སེང་བ། འཇམ་དཔལ་རྒྱ་མཚོ། ཤེས་རབ་གྲགས་པ། འཇམ་དཔལ་བཀྲ་ཤིས། དཔལ་སྐྱོང་བ་སྟེ་འཁོར་དག་པ་རྣམ་པ་བརྒྱད། འཕྲིན་ལས་རྒྱ་ཆེ་བ། རྗེ་དགེ་འདུན་གྲུབ། བཀྲ་ཤིས་དཔལ་ལྡན། རྒྱལ་མཚན་བཟང་པོ། རྗེ་བཙུན་ཤེས་རབ་སེངྒེ་སྟེ་ལྔའོ། །བསྟན་པའི་སྒྲོན་མེ་ལྟ་བུ་ནི། དཀོན་མཆོག་ཚུལ་ཁྲིམས། རྒྱལ་དབང་ཁ་ཆེ། རིན་བསམ་པ། གྲགས་བཟང་བ། ཤེས་རབ་རྒྱལ་མཚན། ནམ་མཁའ་དཔལ། བློ་གྲོས་ཆོས་སྐྱོང་། བ་སོ་ཆོས་རྒྱན། དཔལ་སེང་བ། སྣར་ཐང་བ་དང་བཅུའོ། །གཞན་དོན་ནུས་པའི་བྱང་སེམས་ནི། ཤཱཀྱ་བསོད་ནམས། ཀུན་དགའ་བཟང་པོ། བློ་གྲོས་རྒྱལ་མཚན། ཚུལ་ཁྲིམས་དཔལ་བཟང་། གཞོན་ནུ་རྒྱལ་མཆོག །གྲགས་བཟང་བ་སྟེ་དྲུག་གོ །ཏི་ཤྲིར་བཀུར་བ་བྱམས་ཆེན་ཆོས་རྗེ་དང་བྱང་དར་བ་གཉིས་སོ། །དཔོན་སྲས་ནམ་མཁའ་དཔལ་དང་བསོད་ནམས་རྒྱལ་རྣམ་རྒྱལ་གཉིས། སྦྱངས་པའི་ཡོན་ཏན་ལྡན་པ་བཀྲ་ཤིས་རྒྱ་ཚོ་དང་ལེགས་པ་རྒྱལ་མཚན་གཉིས། རྣམ་དཔྱོད་ཕུལ་དུ་བྱུང་བ་རིན་ཆེན་སེངྒེ་དང་ཆོས་དབང་གྲགས་པ་གཉིས། བསྟན་པ་སྤེལ་ནུས་པ་སྟོད་སྨད་ཤེར་བཟང་གཉིས་དང་། ངག་དབང་གྲགས་པ། རྒྱལ་མཚན་སེངྒེ། དཔལ་ལྡན་ཤེས་རབ། ཡོན་ཏན་དཔལ་ཞེས་པ་སྟེ་དྲུག །སྐད་གཉིས་སྨྲ་བ་གཞོན་ནུ་དཔལ་བ་དང་སྟག་ལུང་བ་གཉིས། སྡེ་བདག་དཔལ་ལྡན་བཟང་པོ། བསོད་ནམས་བཟང་པོ། བྱང་ཆུབ་རྡོ་རྗེ། བསོད་ནམས་རྒྱལ་མཚན། དོན་གྲུབ་རྒྱལ་པོ། བཀྲ་ཤིས་དཔལ་འོད་དེ་དྲུག་གོ །མང་དུ་མཁྱེན་པ་ཆོས་རྗེ་ཤེར་འབྱུང་། རིན་བསམ་པ། གྲགས་པ་རིན་ཆེན། བསོད་ནམས་རིན་ཆེན། རིན་ཆེན་རྒྱལ་བ། སངས་རྒྱས་རྒྱལ་མཚན། རིན་ཆེན་གྲགས་པ༑ བདེ་འབྱང་དང་བརྒྱད་དོ། །མདོ་རོང་གི་མཁས་པ་མདོ་སྨད་འོད་ཟེར། ལེགས་བཟང་། བསོད་ནམས་ཤེས་རབ། ལྕེ་ནག་པ་དང་བཞིའོ། །གྲུབ་པའི་གདུང་བྱང་དཔལ་བ་དང་རིན་ཆེན་དཔལ་གཉིས། ཡ་མཚན་ཅན་གྱི་སྐྱེས་བུ་སྨོན་ལམ་དཔལ་བ་དང་བསོད་ནམས་རིན་ཆེན་གཉིས། སྤྱན་སྔ་ནི་ཀུན་བློ། གཞོན་ནུ་འོད། བློ་གྲོས་རྒྱལ་མཚན། དཔལ་བཟང་བ། ནམ་རྒྱལ་བ། བསོད་ནམས་ལྷུན་གྲུབ། རིན་རྒྱལ་བ། རིན་ཆེན་འཕེལ་དང་བརྒྱད་དོ། ཁྲི་ཆེན་ནི་ཆོས་རྗེ་མཛེས་པ་དཔལ། བླ་ཆེན་ཉན་ཤག་པ། གུ་ཤྲཱི་དཔལ་ལྡན་དོན་གྲུབ། ཆོས་རྗེ་ཡེ་ཤེས་དཔལ་དང་བཞིའོ། །མཁན་ཆེན་ནི་ཆོས་རྒྱལ་དཔལ་བཟང་། རྒྱལ་བཟང་བ། ཀུན་རྡོར་བ། བྱང་དཔལ་བ་སྟེ་བཞིའོ། །ཆེན་པོ་ནི་གྲགས་བཟང་བ། དགས་པོ། བློ་འཕེལ། ཀུན་རྒྱལ། བཀྲ་ཤིས་རྒྱལ་མཚན་དང་ལྔའོ། །ཆོས་བསྒོ་བ་འཇམ་དབྱངས་ཁ་ཆེ་དང་བཀྲ་ཤིས་རིན་ཆེན་གཉིས། དཀའ་བཅུ་བ་ནི་དར་བཟང་། མཁའ་སེར། རྒྱལ་མཚན། ཧུ་ལ་བ་དང་བཞིའོ། །བཀའ་བཞི་པ། དོན་ཡོད། རིན་ཆེན་དཔལ། རིན་ཆེན་ཆོས་རྒྱལ། སངས་རྒྱས་དབང་ཕྱུག །སངས་རྒྱས་བཟང་པོ། བསོད་ནམས་བཟང་པོ། གྲོ་ས་བ། འཆོར་བུ་བ། ཆོས་སེང་། གྲགས་པ་རྒྱལ་མཚན་དང་བཅུའོ། །ཇོ་སྟན་པ་ནི་ཟླ་བ་བློ་གྲོས། བསོད་ནམས་ལྷུན་གྲུབ། ལེགས་རིན་པ། ཀོང་པོ་དང་བཞིའོ། །གནས་བརྟན་ནི་ལེགས་བཟང་བ། དོན་གྲུབ་དཔལ། དགེ་འདུན་རྒྱལ་པོ། འོད་ཟེར་བཀྲ་ཤིས། གཞོན་ནུ་སངས་རྒྱས། ཀུན་དགའ་འབུམ་དང་དྲུག་གོ །རྟོགས་ལྡན་ནི་སངས་རྒྱས་དཔལ་བཟང་། ནམ་མཁའ་ཤོ་རེ། གྲགས་པ་འབྱུང་གནས། རལ་ཞིག་པ། ནམ་མཁའ་རྒྱལ་བ་དང་ལྔའོ། །གཞན་ཡང་གྲགས་པ་རྒྱ་མཚོ། གཞོན་ནུ་དཔལ་བ། བསམ་རྒྱལ་བ། གསེར་ཐུབ་པ། ཡང་སྟེང་རིན་པོ་ཆེ། ཞི་བློ་དབོན་པོ། དྲུང་ནམ་མཁའ།  མགོན་པོ་བྱང ་ཆུབ། བསོད་ནམས་རིན་ཆེན། དྲུང་ཆོས་འཕགས་པ། ཤཱག་རིན་པ། ཟླ་བ་བཟང་པོ། ཆོས་རྒྱལ་མཚན། སངས་རྒྱས་ཡེ་ཤེས་སོགས་ཤིན་ཏུ་མང་ཡང་དེའི་ནང་ནས་བརྒྱ་དང་བཞི་བཅུས་ནི་སོ་སོ་ནས་ཆོས་སྡེ་རེ་བཏབ་ཅིང་བསྟན་བཅོས་མཛད་པ་སོགས་ཀྱི་སྒོ་ནས་རྗེའི་བསྟན་པ་ལ་བྱ་བ་ལྷག་པར་བྱས་སོ། །གདན་སའི་གཙོ་བོ་དགའ་ལྡན་གྱི་ཁྲི་རབས་ནི། ཐོག་མ་རྗེ་རང་ཉིད་དང་། ཁྲི་ཐོག་གཉིས་པ་རྒྱལ་ཚབ་དར་མ་རིན་ཆེན་ནི་གཙང་སྟོད་དུ་འཁྲུངས་ཤིང་། གཞུང་ལུགས་ཐམས་ཅད་ལ་སྦྱངས་པས་མཁས་པ་ཆེན་པོར་གྱུར། རྗེ་ཞིང་དུ་གཤེགས་ཁར་དབུ་ཞྭ་གནང་སྟེ་དོན་གྱིས་ཁྲིར་བསྐོ་བར་མཛད་ཅིང་། རྗེ་གཤེགས་རྗེས་དགུང་ལོ་ང་དྲུག་པ་རབ་བྱུང་བདུན་པའི་ས་ཕག་ལོར་འདུལ་འཛིན་པ་སོགས་དགེ་འདུན་པ་རྣམས་ཀྱིས་ཁྲི་ཐོག་ཏུ་མངའ་གསོལ། ཕར་ཚད་ཀྱི་བསྟན་བཅོས་མང་དུ་མཛད་ཅིང་། དགུང་ལོ་རེ་དགུ་པ་ཆུ་ཁྱིར་དག་ཞིང་དུ་གཤེགས་སོ། ཁྲི་ཐོག་གསུམ་པ་མཁས་གྲུབ་དགེ་ལེགས་དཔའ་བཟང་ནི་གཙང་སྟོད་དུ་རབ་བྱུང་བདུན་པའི་ཤིང་གླང་ལོར་འཁྲུངས། མཁས་གྲུབ་ལྷ་དབང་བློའི་སྐུ་སྐྱེར་ངོས་བཟུང་བ་ལ་བརྟེན་ནས་མཁས་གྲུབ་ཆོས་རྗེར་གྲགས། མདོ་སྔགས་ཀྱི་གཞུང་ཀུན་ལ་ཟླ་མེད་པའི་མཁས་པ་ཆེན་པོར་གྱུར། མདོ་སྔགས་ཀྱི་བསྟན་བཅོས་ཀྱང་མང་དུ་བརྩམས། དགུང་ལོ་ཞེ་བདུན་པ་ལྕགས་ཕག་ལ་ཁྲི་ཐོག་ཏུ་ཕེབས། དགུང་ལོ་ང་བཞི་པ་ས་རྟ་ལོར་དག་ཞིང་དུ་གཤེགས་སོ། ༈ ཁྲི་ཐོག་བཞི་པ་ཞ་ལུ་བ་ལེགས་པ་རྒྱལ་མཚན་ནི་གཙང་དུ་ཤིང་ཡོས་ལ་འཁྲུངས། དགུང་ལོ་རེ་བཞི་པ་ས་རྟ་ལ་ཁྲི་ཐོག་ཏུ་ཕེབས། འཇིགས་བྱེད་ཀྱི་འཁྲུལ་འཁོར་ལ་མཁས་ཤིང་མཐུ་ནུས་ཆེ་བས་ལོག་པར་འཁུ་བ་འགའ་ཞིག་ཚར་བཅད། དགུང་ལོ་དོན་དྲུག་པ་ལྕགས་རྟ་ལ་ཞི་བར་གཤེགས་སོ། ཁྲི་ཐོག་ལྔ་པ་ཆོས་རྗེ་བློ་གྲོས་ཆོས་སྐྱོང་ནི་གཡག་སྡེར་ས་སྦྲུལ་ལ་འཁྲུངས། མཁས་གྲུབ་རིན་པོ་ཆེ་བསྟེན་ནས་མདོ་སྔགས་ཀུན་དང་དུས་འཁོར་ལ་མཁས་པར་སྦྱངས། དགུང་ལོ་རེ་གཉིས་པ་རབ་བྱུང་བརྒྱད་པའི་ལྕགས་རྟ་ལ་ཁྲིར་ཕེབས། བསྟན་བཅོས་ཀྱང་འགའ་རེ་རྩོམ་ཞིང་དོན་ལྔ་བ་ཆུ་ལུག་ལ་ཞི་བར་གཤེགས་སོ། །༈ ཁྲི་ཐོག་དྲུག་པ་བ་སོ་ཆོས་ཀྱི་རྒྱལ་མཚན་ནི་མཁས་གྲུབ་རྗེའི་གཅུང་པོར་ཆུ་རྟ་ལ་འཁྲུངས། རྗེ་དང་མཁས་གྲུབ་ལ་བསྟེན་ནས་མདོ་སྔགས་ཀུན་དང་འདུས་པ་ལ་སྦྱངས་པས་མཁས་ཤིང་གྲུབ་པ་བརྙེས། དགུང་ལོ་རེ་གཉིས་པ་ཆུ་ལུག་ལ་ཁྲིར་ཕེབས། འཆད་རྩོད་རྩོམ་གསུམ་གྱི་སྒོ་ནས་བསྟན་པ་སྤེལ། དོན་གཉིས་པ་ཆུ་སྦྲུལ་ལ་དག་ཞིང་དུ་གཤེགས་སོ། ཁྲི་ཐོག་བདུན་པ་བློ་གྲོས་བརྟན་པ་ནི་གཙང་ཕྱོགས་སུ་ཆུ་རྟར་འཁྲུངས། རྗེ་དང་རྒྱལ་ཚབ་པ་བརྟེན་ནས་གཞུང་ལུགས་ཀུན་ལ་མཁས་པར་སྦྱངས་ཤིང་བསྟན་བཅོས་ཀྱང་བརྩམས། དགུང་ལོ་དོན་གཉིས་པ་ཆུ་སྦྲུལ་ལ་ཁྲིར་ཕེབས་ནས་ཆོས་ཀྱི་འཁོར་ལོ་བསྐོར་ཏེ། དོན་བདུན་པ་ས་ཁྱི་ལ་ཞི་བར་གཤེགས་སོ། ཁྲི་ཐོག་བརྒྱད་པ་སྨོན་ལམ་དཔལ་བ་ནི་གཡས་རུ་བྱང་དུ་ཤིང་རྟར་འཁྲུངས། དགེ་འདུན་གྲུབ་པ་སོགས་བསྟེན་ནས་གཞུང་ཆེན་ཀུན་ལ་སྦྱངས་པ་མཐར་ཕྱིན་པར་མཛད། ཕར་ཚད་རྣམས་ལ་མཁས་ཤིང་བསྟན་བཅོས་ཀྱང་ཁ་ཤས་མཛད། དགུང་ལོ་རེ་བདུན་པ་ལྕགས་བྱི་ལ་ཁྲིར་ཕེབས་ཏེ་ཆོས་མང་དུ་གསུངས་ནས། དོན་བརྒྱད་པ་ལྕགས་ཕག་ལ་དག་ཞིང་དུ་གཤེགས་སོ། །རྗེ་གཤེགས་ནས་འདིའི་བར་ལོ་དོན་གསུམ་སོང་སྣང་། རྒྱལ་ཚབ་ནས་འདིའི་བར་འཇམ་དབྱངས་གཙང་པ་བདུན་བརྒྱུད་ཅེས་གྲགས་ཏེ་སངས་རྒྱས་བྱང་སེམས་ཀྱི་རྣམ་འཕྲུལ་དུ་ངེས་སོ། །འདི་མན་ཆད་མཚན་སྒྲ་ཙམ་གྱི་སྒོ་ནས་བརྗོད་ན། ཁྲི་ཐོག་དགུ་པ་རྗེ་བློ་བཟང་ཉི་མ། བཅུ་པ་ཆོས་རྗེ་ཡེ་ཤེས་བཟང་པོ། བཅུ་གཅིག་པ་འདར་སྟོན་བློ་བཟང་གྲགས། བཅུ་གཉིས་པ་འཇམ་དབྱངས་ལེགས་པའི་བློ་གྲོས། བཅུ་གསུམ་པ་ཆོས་ཀྱི་བཤེས་གཉེན། བཅུ་བཞི་པ་རིན་ཆེན་འོད་ཟེར། བཅོ་ལྔ་པ་པཎ་ཆེན་བསོད་ནམས་གྲགས་པ། བཅུ་དྲུག་པ་ཆོས་སྐྱོང་རྒྱ་མཚོ། བཅུ་བདུན་པ་རྡོ་རྗེ་བཟང་པོ། བཅོ་བརྒྱད་པ་རྡོ་རྗེ་རྒྱལ་མཚན། བཅུ་དགུ་པ་ངག་དབང་ཆོས་གྲགས། ཉི་ཤུ་པ་ཆོས་གྲགས་བཟང་པོ། ཉེར་གཅིག་པ་དགེ་ལེགས་དཔལ་བཟང་། ཉེར་གཉིས་པ་དགེ་འདུན་བསྟན་པ་དར་རྒྱས། ཉེར་གསུམ་པ་ཚེ་བརྟན་རྒྱ་མཚོ། ཉེར་བཞི་པ་བྱམས་པ་རྒྱ་མཚོ། ཉེར་ལྔ་པ་དཔལ་འབྱོར་རྒྱ་མཚོ། ཉེར་དྲུག་པ་དམ་ཆོས་དཔལ་འབར། ཉེར་བདུན་པ་སངས་རྒྱས་རིན་ཆེན། ཉེར་བརྒྱད་པ་དགེ་འདུན་རྒྱལ་མཚན། ཉེར་དགུ་པ་བཤེས་གཉེན་གྲགས་པ། སུམ་ཅུ་པ་བློ་གྲོས་རྒྱ་མཚོ། སོ་གཅིག་པ་དམ་ཆོས་དཔལ་བ། སོ་གཉིས་པ་ཚུལ་ཁྲིམས་ཆོས་འཕེལ། སོ་གསུམ་པ་གྲགས་པ་རྒྱ་མཚོ། སོ་བཞི་པ་ངག་དབང་ཆོས་ཀྱི་རྒྱལ་མཚན། སོ་ལྔ་པ་དགོན་མཆོག་ཆོས་འཕེལ། སོ་དྲུག་པ་བསྟན་འཛིན་ལེགས་བཤད། སོ་བདུན་པ་དགེ་འདུན་རིན་ཆེན། སོ་བརྒྱད་པ་བསྟན་པ་རྒྱལ་མཚན། སོ་དགུ་པ་དཀོན་མཆོག་ཆོས་བཟང་། བཞི་བཅུ་པ་དཔལ་ལྡན་རྒྱལ་མཚན། ཞེ་གཅིག་པ་བློ་བཟང་རྒྱལ་མཚན། ཞེ་གཉིས་པ་བློ་བཟང་དོན་ཡོད། ཞེ་གསུམ་པ་བྱམས་པ་བཀྲ་ཤིས། ཞེ་བཞི་པ་བློ་གྲོས་རྒྱ་མཚོ། ཞེ་ལྔ་པ་ཚུལ་ཁྲིམས་དར་རྒྱས། ཞེ་དྲུག་པ་སྦྱིན་པ་རྒྱ་མཚོ། ཞེ་བདུན་པ་བློ་བཟང་ཆོས་འཕེལ། ཞེ་བརྒྱད་པ་སླར་ཡང་ཚུལ་ཁྲིམས་དར་རྒྱས་ཏེ་དེ་ཡན་ནི་བཻཌཱུརྱ་སེར་པོར་གསལ་ལ། ༈ དེ་ནས་རབ་བྱུང་བཅུ་གཉིས་པའི་མཇུག་གི་ཆ་ཤིང་བྱི་འདིའི་བར་ལོ་ལྔ་བཅུར་ཉེ་བར་སོང་འདུག་པས་ལོ་བདུན་རེའི་དབང་དུ་བྱས་ན་དེའི་བར་ཁྲི་ཐོག་བདུན་གྱི་སྐོར་སོང་བར་ངེས་སོ། །དེ་ལྟར་ན་བདུན་པོ་གོང་གི་ཞེ་བརྒྱད་ཀྱི་སྟེང་བསྣན་པས་ཁྲི་ཐོག་ང་ལྔའི་སྐོར་སོང་བར་སྣང་ངོ་། ཁྲི་ཐོག་པ་དེ་ཐམས་ཅད་ཀྱིས་ཀྱང་རྗེའི་བསྟན་པ་ལུགས་གཉིས་ཀྱི་སྒོ་ནས་བཟུང་སྟེ་སྤེལ་བར་མཛད་པ་རྒྱས་པར་སོ་སོའི་རྣམ་ཐར་ལས་ཤེས་པར་བྱའོ། །དགལ་ལྡན་དུ་བྱང་རྩེ་དང་ཤར་རྩེ་གཉིས་བྱུང་བའི་བྱང་རྩེའི་བླ་རབས་ཀྱི་ཐོག་མ་ནི། ཧོར་སྟོན་ནམ་མཁའ་དཔལ་བཟང་། དེ་ནས་ཀུན་དགའ་བཀྲ་ཤིས། བློ་གྲོས་བརྟན་པ། བཀྲ་ཤིས་རྒྱལ་མཚན། ཤེས་རབ་བཟང་པོ། ཚུལ་ཁྲིམས་བཟང་པོ། ཤེས་རབ་དང་། རྒྱལ་མཚན་བཟང་པོ། །ཆོས་གྲགས་བཟང་པོ། དགེ་འདུན་བསྟན་དར། བྱམས་པ་རྒྱ་མཚོ། དམ་ཆོས་དཔལ་འབར། དགེ་འདུན་རྒྱལ་མཚན། བཀྲ་ཤིས་འབྱུང་གནས། བློ་གྲོས་རྒྱ་མཚོ། ངག་དབང་ཆོས་གྲགས། དགེ་འདུན་རྒྱལ་མཚན། ངག་དབང་ཆོས་རྒྱན། བསྟན་འཛིན་ལེགས་བཤད། བསྟན་པ་རྒྱལ་མཚན། ཆོས་རྒྱལ་བཀྲ་ཤིས། དཔལ་ལྡན་རྒྱལ་མཚན། དམ་ཆོས་རྣམ་རྒྱལ། བློ་བཟང་དོན་ཡོད། ངག་དབང་ནོར་བུ། བྱམས་པ་རིན་ཆེན། བློ་གྲོས་རྒྱ་མཚོ། སྦྱིན་པ་རྒྱ་མཚོ། ངག་དབང་ཕུན་ཚོགས། དོན་གྲུབ་རྒྱ་མཚོ་སོགས་སོ། ༈ །ཤར་རྩེར་ནི་རིན་ཆེན་རྒྱལ་མཚན། ཟླ་གྲགས། ཉི་གྲགས། རྒྱལ་མཚན། སྨོན་ལམ་དཔལ། ཡེ་ཤེས་བཟང་པོ། མདར་སྟོན་བློ་བཟང་། ཆོས་ཀྱི་བཤེས་གཉེན། བཟང་པོ། བསོད་ནམས་གྲགས་པ། དཀོན་མཆོག་དར། རྡོ་རྗེ་བཟང་པོ། ངག་དབང་ཆོས་གྲགས། དགེ་ལེགས་དཔལ་བཟང་། ཚེ་བརྟན་རྒྱ་མཚོ། ཤཱཀྱ་རིན་ཆེན། དཔལ་འབྱོར་རྒྱ་མཚོ། ནམ་མཁའ་རྒྱན་མཚན། སངས་རྒྱས་རིན་ཆེན། དོན་གྲུབ་སེངྒེ། བཤེས་གཉེན་གྲགས་པ། ཉི་མ་བཟང་པོ། དམ་ཆོས་དཔལ། གྲགས་པ་རྒྱ་མཚོ། དཀོན་མཆོག་ཆོས་འཕེལ་བ། སངས་རྒྱས་བཀྲ་ཤིས། དགེ་འདུན་རིན་ཆེན། ངག་དབང་རིན་ཆེན། དཀོན་མཆོག་བཟང་། བློ་བཟང་རྣམ་རྒྱལ། བློ་བཟང་དཔལ་འབར། བྱམས་པ་བཀྲ་ཤིས། དགེ་འདུན་གྲགས་པ། ཚུལ་ཁྲིམས་དར་རྒྱས། བློ་བཟང་ཆོས་འཕེལ་སོགས་སོ། །དགའ་ལྡན་སོགས་སུ་རྒྱུད་པ་གྲྭ་ཚང་དང་བླ་རབས་བྱུང་ཚུལ་ནི། རྗེས་རྗེ་བཙུན་ཤེས་རབ་སེངྒེ་ལ་འགྲེལ་པ་བཞི་སྦྲགས་ཀྱི་བཤད་སྲོལ་འཛིན་པའི་བཀའ་བབས་པས་ཐོག་མ་ནི་བླ་མ་དེ་ཉིད་ཡིན་ལ། དེ་ཉིད་ཀྱིས་གཙང་ཕྱོགས་ནས་རྒྱུད་ཀྱི་འཆད་ཉན་མཛད་ཅིང་། སྲད་རིན་ཆེན་རྩེ་བས་སྦྱིན་བདག་མཛད་ནས་རྒྱུད་གྲྭ་བཙུགས་པ་ལ་སྲད་རྒྱུད་པར་གྲགས། དེ་ནས་སྲད་རྒྱུད་ཀྱི་བླ་རབས་ནི། འདུལ་ནག་དཔལ་ལྡན་བཟང་པོ། རོག་ཚོ་ཆོས་མཛད། དགེ་འདུན་འཕེལ། ཆོས་དབྱིངས། བཀྲ་ཤིས་འཕགས། བསམ་གྲུབ་རྒྱ་མཚོ། བསོད་ནམས་རྒྱལ་མཚན། བརྩོན་འགྲུས་འཕགས། རྡོ་རྗེ་བཟང་པོ། བྱམས་པ་རྒྱལ་མཚན། དཀོན་མཆོག་རྒྱ་མཚོ། དགེ་འདུན་རྒྱལ་པོ། རིན་ཆེན་རྒྱ་མཚོ། ཆོས་དབང་། སངས་རྒྱས་རྒྱ་མཚོ། ཕུག་ཆེན་པ། ཤེས་རབ་རིན་ཆེན། དཔལ་ལྡན་མཆོག་སྦྱིན། མཆོག་ལེགས་འོད་ཟེར། དཀོན་མཆོག་ཡར་འཕེལ། བློ་བཟང་ཡེ་ཤེས། བློ་བཟང་དོན་གྲུབ་སོགས་སོ། །རྗེ་བཙུན་ཤེས་རབ་སེངྒེས་ཐོག་མར་སྟོད་གཙང་དུ་རྒྱུད་གྲྭ་བཙུགས་ནས་དབུས་སུ་ཕེབས་ཏེ་རྒྱུད་ཀྱི་འཆད་ཉན་བཙུགས་ནས་ཕྱོགས་ཕྱོགས་སུ་ཆོས་བར་བཏེག་ཅིང་། རབ་བྱུང་བདུན་པའི་ཐོག་རྒྱུད་གྲྭ་ཚུགས་པ་ལ་རྒྱུད་སྨད་དུ་གྲགས་ཤིང་། དེའི་བླ་རབས་ནི། རྡོ་རྗེ་འཆང་སྦྱིན་པ་དཔལ། ཀུན་དགའ་དོན་གྲུབ། བཀྲ་ཤིས་རྒྱལ་མཚན། ཤེས་རབ་བཟང་པོ། ཨུ་རི་དཀའ་བཅུ་བ། སློབ་དཔོན་ཚུལ་བཟང་། ཆོས་སྐྱོང་རྒྱ་མཚོ། རྒྱལ་མཚན་བཟང་པོ། ཆོས་གྲགས་བཟང་པོ། ནམ་མཁའ་གྲགས། བྱམས་པ་རྒྱ་མཚོ། བཀྲ་ཤིས་བཟང་པོ། དགེ་འདུན་རྒྱལ་མཚན། རྣམ་རྒྱལ་དཔལ་བཟང་། བློ་གྲོས་རྒྱ་མཚོ། ངག་དབང་ཆོས་གྲགས། ངག་དབང་ཆོས་རྒྱན། བསྟན་འཛིན་ལེགས་བཤད། ཆོས་རྒྱལ་བཀྲ་ཤིས། དཔལ་ལྡན་རྒྱལ་མཚན། དམ་ཆོས་རྣམ་རྒྱལ། བློ་བཟང་དོན་ཡོད། བློ་བཟང་རྣམ་རྒྱལ། ངག་དབང་ནོར་བུ། ཤེས་རབ་རྒྱ་མཚོ། བློ་གྲོས་རྒྱ་མཚོ། སྦྱིན་པ་རྒྱ་མཚོ། དཔལ་འབྱོར་རྒྱ་མཚོ། དོན་གྲུབ་རྒྱ་མཚོ་སོགས་སོ། །རྒྱུད་སྟོད་བླ་རབས་ནི། རྗེ་བཙུན་ཤེས་རབ་སེངྒེའི་དངོས་སློབ་རྒྱུད་པ་ཀུན་དགའ་དོན་གྲུབ་ཀྱིས་དབུས་སྟོད་དུ་རྒྱུད་ཀྱི་འཆད་ཉན་གནང་བས་རྒྱུད་སྟོད་པར་གྲགས། དེ་ནས་ལྷ་དབང་རིན་ཆེན། ཆོས་ལྡན་བློ་གྲོས། བསོད་ནམས་གྲགས་པ། དཀོན་མཆོག་དར། ངག་དབང་ཆོས་གྲགས། དགེ་ལེགས་དཔལ། ཚེ་བརྟན་རྒྱ་མཚོ། ཤཱཀྱ་རིན་ཆེན། དཔལ་འབྱོར་རྒྱ་མཚོ། ནམ་མཁའ་རྒྱལ་མཚན། བྱང་ཆུབ་འོད་ཟེར། འཇམ་དབྱངས་འོད་ཟེར། གྲགས་པ་རྒྱ་མཚོ། དཀོན་མཆོག་ཆོས་འཕེལ། སངས་རྒྱས་བཀྲ་ཤིས། དགེ་འདུན་རྒྱ་མཚོ། བློ་བཟང་བསྟན་འཛིན། ངག་དབང་ཆོས་འཕེལ། དཀོན་མཆོག་བཟང་། བྱམས་པ་རྣམ་རྒྱལ། བློ་བཟང་རྒྱལ་མཚན། བློ་བཟང་དཔལ་འབར། བྱམས་པ་བཀྲ་ཤིས། དགེ་འདུན་གྲགས་པ། བློ་བཟང་དགེ་ལེགས། བློ་བཟང་ཆོས་འཕེལ་གཉིས་ལ་སོགས་པ་སྟེ་ཕྱིས་དབུས་ཕྱོགས་སུ་སྤོས་སོ། །དཔལ་ལྡན་འབྲས་སྤུངས་ཀྱི་བླ་རབས་ནི། གོང་དུ་བརྗོད་པ་ལྟར་རྗེའི་སྲས་འཇམ་དབྱངས་བཀྲ་ཤིས་དཔལ་ལྡན་དེ་ཉིད་ཀྱིས་རྗེའི་བཀའ་ལྟར་རབ་བྱུང་བདུན་པའི་མེ་སྤྲེལ་ལོར་འབྲས་སྤུངས་བཏབ་སྟེ་མདོ་སྔགས་གྱི་ཆོས་ཀྱི་འཁོར་ལོ་བསྐོར་ཞིང་སྒོ་མང་བློ་གསལ་གླིང་བདེ་ཡངས་སོགས་གྲྭ་ཚང་བདུན་བཙུགས། མཁས་ཤིང་གྲུབ་པ་བརྙེས་པར་གྲགས་ཤིང་འཕྲིན་ལས་རྣམ་མཁའ་དང་མཉམ་པ་དེ་ཉིད་ཀྱི་གདན་སའི་ཐོག་མ་མཛད་དེ། གདན་ས་གཉིས་པ་དཔལ་ལྡན་སེངྒེ། གསུམ་པ་རིན་ཆེན་བྱང་ཆུབ། བློ་བཟང་ཉི་མ། བློ་བཟང་གྲགས། ཤཱཀྱ་རིན་ཆེན། སྨོན་ལམ་དཔལ། ལེགས་པ་ཆོས་འབྱོར། ཡོན་ཏན་རྒྱ་མཚོ། དགེ་འདུན་རྒྱ་མཚོ། བསོད་ནམས་གྲགས་པ། བསོད་ནམས་རྒྱ་མཚོ། ཡོན་ཏན་རྒྱ་མཚོ། བློ་བཟང་ཆོས་ཀྱི་རྒྱ་མཚན། ཐམས་ཅད་མཁྱེན་པ་བློ་བཟང་རྒྱ་མཚོ། བློ་བཟང་རིན་ཆེན་ཚངས་དབྱངས་རྒྱ་མཚོ། ཐམས་ཅད་མཁྱེན་པ་བསྐལ་བཟང་རྒྱ་མཚོའོ། །སྒོ་མང་གྲྭ་ཚང་དུ་བླ་རབས་ནི། དང་པོར་གྲགས་པ་རིན་ཆེན། རྒ་ལེབ། ཚུལ་བཟང་། དཔལ་ཤེ །ཀུན་རྒྱལ་བ། དབང་དཔལ་བ། དཔལ་བློ་དང་ཤེས་བློ། ཡེ་ཤེས་གྲགས། དཔལ་ལྡན་འོད་ཟེར་དང་དཀོན་མཆོག་བཟང་། རིན་ཆེན་བྱང་ཆུབ། ངག་དབང་འབྱུང་གནས། བློ་བཟང་ཨེ་ཝཾ། ཕྱོགས་ལས་རྣམ་རྒྱལ། ཆོས་ཀྱི་འབྱུང་གནས། བྱམས་པ་ལྷུན་གྲུབ། བརྩོན་འགྲུས་རྒྱ་མཚོ། དགེ་ལེགས་ལྷུན་གྲུབ། ཆོས་གྲགས་རྣམ་རྒྱལ། སངས་རྒྱ་བཀྲ་ཤིས། དགེ་ལེགས་དཔལ་འབྱོར། བློ་བཟང་ངག་དབང་། ངག་དབང་དཔལ་འབྱོར། འཕྲིན་ལས་ལྷུན་གྲུབ། བློ་གྲོས་རྒྱ་མཚོ། དོན་གྲུབ་རྒྱ་མཚོ་གཉིས། འོད་ཟེར་སོགས་སོ། །བློ་གསལ་གླིང་དུ་ཐོག་མ་ལེགས་ལྡན་པ། དེ་ནས་གཞུ་བསོད་པ། དཔལ་ལྡན་བློ་གྲོས། ཚུལ་བློ། ཡེ་ཤེས་བཟང་པོ། ཏྲེ་བོ་པ། འཇམ་དབྱངས་དགའ་བའི་བློ་གྲོས། སངས་རྒྱས་བཟང་པོ། རིན་ཆེན་དར་མ་དང་སངས་ལེགས། ཡོན་ཏན་འོད། བསོད་ནམས་གྲགས་པ༑ དགེ་འདུན་དོན་གྲུབ། བཀྲ་ཤིས་འོད་ཟེར། བསམ་གཏན་མཆོག །གཙང་པ་བཀྲ་ཤིས། ཆོས་གྲགས་འོད་ཟེར་སོགས་སོ། །བདེ་ཡང་སུ་དང་པོར་བྱང་དཔལ། ཡོན་ཏན་རྒྱ་མཚོ། དབང་རྒྱལ། བརྩོན་འགྲུས། བློ་སེང་། ནམ་མཁའ་བ། བཀྲ་ཤིས་རྒྱ་མཚོ། རིན་དར་བ། རྒྱལ་མཚན་ལེགས་པ། རིན་ཆེན་རྣམ་རྒྱལ་སོགས་སོ། །འདུལ་བ་གྲྭ་ཚང་དུ་དང་པོར་བརྩོན་འགྲུས་གྲགས་པ། དགེ་ལེགས་དཔལ། དཔལ་ལྡན་བློ་གྲོས། གྲོ་ས་བ། དཔལ་འབྱོར་པ། རིན་ཆེན་གྲགས་སོགས་སོ། །ཤག་སྐོར་གྲྭ་ཚང་དུ་སྣར་ཐང་བ། རྡོ་རྗེ་རྒྱལ་མཚན། རིན་ཆེན་བློ་གྲོས། དབུ་སེ། བདེ་བློ། ཆོས་བཤེས། ཀུན་དགའ་རྒྱལ་མཚན་སོགས་སོ། །ཐོས་བསམ་གླིང་དུ་ཀུན་བཟང་རིན་ཆེན། ཤཱཀྱ་རིན་ཆེན། རྒྱལ་བཟང་བ། དཔལ་ལྡན་པ༑ དཔལ་རྒྱལ་མཚན། བསམ་གཏན་ཤེས་རབ། བློ་གྲོས་མཐའ་ཡས་སོགས་སོ། །སྔགས་པ་གྲྭ་ཚངས་དུ་རྒྱལ་མཚན་ཚུལ་ཁྲིམས། སྦྱིན་མཆོག་པ། རིན་ཆེན་མཆོག །མགོན་པོ་རྒྱལ་མཚན། གདེངས་ཀ་བ། ཐོག་ཁ་བ། དཔལ་ཐུང་བ། ནམ་མཁའ་བཟང་པོ་སོགས་སོ། །ཆོས་འཁོར་གླིང་དུ་དོན་གྲུབ་མགོན་པོ། ལྡན་ཆུང་བ༑ དྲུང་ཆེན་པ། སངས་རྒྱས་བཀྲ་ཤིས། ངག་དབང་ཆོས་འཕེལ། བསྟན་འཛིན་འཕྲིན་ལས་སོགས་བྱོན་ནོ། །འདི་རྣམས་ནི་འབྲས་སྤུངས་པའི་སྐོར་ཏེ། དེ་རྣམས་ཀྱི་ནང་ནས་གྲྭ་ཚང་གྲགས་ཆེ་བ་ནི་སྒོ་མང་དང་། བློ་གསལ་གླིང་གཉིས་སོ། །གྲྭ་པ་སྤྱིའི་གྲངས་ནི་སྟོང་ཕྲག་བཞི་ལྷག་ཙམ་སྟེ། ལུང་བསྟན་ལྟར་ན་ལྔ་སྟོང་ཚོགས་པའང་འབྱུང་ངོ་། །སེ་ར་ཐེག་ཆེན་གླིང་གི་བླ་བརྒྱུད་ནི། དགོན་འདི་བྱམས་ཆེན་ཆོས་རྗེས་བཏབ་པ་སྟེ། དེ་ཡང་རྗེ་རིན་པོ་ཆེ་རྒྱ་ནག་ཏུ་སྤྱན་འདྲེན་པར་བཏང་བའི་ཚབ་ཏུ་ཁོང་རྒྱ་ནག་ཏུ་བྱོན། སླར་བྱོན་ནས་རྗེ་དང་མཇལ་ནས་འབུལ་ཆེན་མཛད། རྗེ་ཞིང་དུ་གཤེགས་པའི་ས་ཕག་ལོ་དེར་རྗེ་ཉིད་ཀྱི་བཀའ་ལྟར་སེ་ར་ཐེག་ཆེན་གླིང་གསར་དུ་བཏབ་སྟེ་རྟེན་མང་དུ་བཞེངས། རྣམ་ཐོས་སྲས་འགྲུབ་པས་སྐུ་བསོད་ཤིན་ཏུ་ཆེ། སྟོད་སྨད་རྒྱ་འབྲོང་སྟེང་སྟེ་གྲྭ་ཚང་བཞི་བཙུགས། གདན་ས་ཐོག་མར་དར་རྒྱས་བཟང་པོ། ཤཱཀྱ་ཚུལ་ཁྲིམས། དེ་ནས་གུ་རུ་རྒྱ་མཚན་བཟང་པོ་སྟེ་འདི་ནི་རྗེའི་བུ་སློབ་རྣམས་ཀྱི་ནང་ནས་མཁས་པའི་ཕུལ་དུ་ཕྱིན་པ་ཞིག་གོ །བཀྲ་ཤིས་རྒྱ་མཚོ། རིན་ཆེན་བློ་གྲོས། ཆོས་རྗེ་འདུལ་འཛིན་པ། ལྷ་ཕུག་ཆོས་རྗེ། དཔལ་འབྱོར་ལྷུན་གྲུབ། དཔལ་ལྡན་བློ་གྲོས། དོན་ཡོད་དཔལ་ལྡན། རྗེ་དགེ་འདུན་རྒྱ་མཚོ། རྗེ་བཙུན་པ། བསོད་ནམས་གྲགས་པ། ཆོས་གྲགས་བཟང་པོ། རྗེ་བསོད་ནམས། རྒྱ་མཚོ། སྟོང་འཁོར་བ། པཎ་ཆེན་བློ་བཟང་ཆོས་ཀྱི་རྒྱལ་མཚན། རྒྱལ་དབང་བློ་བཟང་རྒྱ་མཚོ། ཚངས་དབྱངས་རྒྱ་མཚོ། བསྐལ་བཟང་རྒྱ་མཚོའི་བར་རོ། །སྔར་གྲྭ་ཚང་བཞི་བྱུང་བའི་རྒྱ་འབྲོོང་གཉིས་སྟོང་པ་གྲྭ་ཚང་དུ་བསྡུས་ནས་དེའི་བླ་མ་ཤེས་རབ་རྒྱ་མཚོ། ཆོས་བློ། ཤཱཀྱ་བཟང་པོ། བློ་གྲོས་རིན་ཆེན། འཇམ་གྲགས་པ། མཉྫུ་པ། ནམ་མཁའ་དཔལ་བཟང་། རིན་ཆེན་དར་མ། ཆོས་རྗེ་དོན་གྲུབ། དར་གླིང་བ། བསྟན་པ་དར་རྒྱས། བློ་བཟང་ཨེ་ཝཾ། རིན་ཆེན་གཉིས། ཡོན་ཏན་འོད་ཟེར་སོགས་སོ། །འོན་ཀྱང་ཕྱིས་སྟོད་པ་ཡང་སྨད་གྲྭ་ཚང་དུ་བསྡུས་སོ། །སེ་ར་སྨད་གྲྭ་ཚང་ནི་དང་པོ་བྱང་ཆུབ་འབུམ་པ་པས་བཏབ་ཅིང་། དེ་ནས་བརྩོན་འགྲུས་བཟང་པོ། ཤཱཀྱ་བཀྲ་ཤིས། རིན་ཆེན་རྒྱལ་མཚན། མཚེ་མ་དབང་རྒྱལ། ཚུལ་རྒྱས་བཟང་པོ། ཟླ་འོད་དཔལ་མགོན། ཡོན་ཏན་བཤེས་གཉེན། ཚུལ་ཁྲིམས་འོད་ཟེར། ཆོས་གྲགས་རིན་ཆེན། རྡོ་རྗེ་བཟང་པོ། ཕྱོགས་ལས་རྣམ་རྒྱལ། ཚུལ་ཁྲིམས་འོད་ཟེར། ཆོས་བཟང་གྲགས་པ། ལ་མོ་བ། དགེ་ལེགས་བཟང་པོ། བྱང་ཆུབ་འོད་ཟེར། སངས་རྒྱས་རིན་ཆེན། བཀྲ་ཤིས་འབྱུང་གནས། ངག་དབང་ཆོས་རྒྱ་མཚོ། སངས་རྒྱས་དཔལ་འབྱོར། དགེ་འདུན་རིན་ཆེན། བཟང་པོ་རྣམ་རྒྱལ། ཤེས་རབ་སེངྒེ། ཤེས་རབ་རྒྱ་མཚོ། བྱམས་པ་ལྷུན་གྲུབ། བློ་བཟང་བསྟན་འཛིན། བསྟན་འཛིན་ལེགས་བཤད། སྤོམ་སྤོར་བ་རྒྱལ་མཚན། རིན་ཆེན་རྒྱ་མཚོ། དཔལ་འབྱོར་རྒྱལ་མཚན། ནམ་མཁའ་རྒྱལ་མཚན། བློ་བཟང་དཔལ་འབར། དགེ་འདུན་འཇམ་དབྱངས། ཚུལ་ཁྲིམས་དར་རྒྱས། བློ་བཟང་རྒྱལ་མཚན། བློ་བཟང་དོན་གྲུབ། སློབ་དཔོན་ཚུལ་ཁྲིམས་དར་རྒྱས་སོགས་ཏེ་འདིའི་སྐབས་སུ་ཁོ་བོ་ཅག་སྨད་གྲྭ་ཚང་དུ་སློབ་གཉེར་བྱེད་དོ། །དེ་ནས་ད་ལྟའི་བར་རབ་བྱུང་བཅུ་གཉིས་པའི་མཇུག་གི་ཤིང་བྱ་འདིའི་བར་དུ་ལོ་བཞི་བཅུའི་སྐོར་སོང་འདུག་པས་བླ་རབས་ཀྱང་མང་དུ་བྱུང་སྟེ་འབྲིར་མ་ལང་ངོ་། །སེ་ར་བྱེས་གྲྭ་ཚང་ནི། ཐོག་མར་གདན་ས་ངག་དབང་དང་ཛྙཱ་ན་ཤྲཱིས་འཆད་ཉན་ཅུང་ཟད་མཛད་ཀྱང་བར་སྐབས་སུ་སྟོང་། དེ་རྗེས་སྣེའུ་དཔལ་འབྱོར་རྒྱལ་པོ་དང་བཙུན་མོ་གཉིས་ཀྱིས་སླར་བཙུགས་ཀྱང་གཞི་མ་ཆགས་པའི་དབང་གིས་ཕྱོགས་ཕྱོགས་སུ་འབྱོན་པའི་ཆོས་བར་འདེབས་དགོས་པ་ཞིག་བྱུང་བས་མིང་ཡང་བྱེས་སུ་གྲགས། སློབ་དཔོན་ཐོག་མ་ནི་གཉལ་སྟོན་དཔལ་འབྱོར་ལྷུན་གྲུབ། དཔལ་ལྡན་བློ་གྲོས། དོན་ཡོད་དཔལ་ལྡན། རྗེ་བཙུན་པ། ཤེས་རབ་སེངྒེ། ཤེས་རབ་རྒྱ་མཚོ། དཔལ་འབྱོར་རྒྱལ་མཚན། བདེ་ལེགས་ཉི་མ། མཁས་བཙུན་རྒྱ་མཚོ། ནམ་མཁའ་རྒྱལ་མཚན། རིན་ཆེན་བཤེས་གཉེན། བསོད་ནམས་ལྷུན་གྲུབ། འཕྲིན་ལས་ལྷུན་གྲུབ། དཔལ་འབྱོར་ལྷུན་གྲུབ། བསམ་འགྲུབ་རིན་ཆེན། བྱམས་པ་སྨོན་ལམ། འཕྲིན་ལས་བསམ་གྲུབ། བསོད་ནམས་རྒྱལ་མཚན། འཇམ་དབྱངས་ལྷུན་གྲུབ། བློ་བཟང་བཀྲ་ཤིས། རྒྱལ་མཚན་དོན་གྲུབ། ངག་དབང་རྒྱ་མཚོ་སོགས་སོ། །སེ་རའི་གྲྭ་པ་སྤྱིའི་གྲངས་ནི་ཉིས་སྟོང་བརྒྱད་བརྒྱའི་སྐོར་དང་། སུམ་སྟོང་ཚོགས་པའི་སྐབས་ཀྱང་ཡོད་དོ། །ད་ལྟ་ནི་ཨོར་སྒོས་གྲྭ་ཚང་ཞེས་པ་ཞིག་ཀྱང་ཡོད་པར་གྲགས་སོ། །སྨད་གྲྭ་ཚང་དུ་མཁས་གྲུབ་བསྟན་དར་བའི་དབུ་ཕར་གྱི་སྤྱི་དོན་ཐལ་ཕྲེང་། བློ་གྲོས་ལེགས་བཟང་བའི་འདུལ་བ། དངོས་གྲུབ་པའི་མཛོད་རྣམས་ཆད་ཉན་མཛད་ལ། སེར་བྱེས་སུ་ནི་བདེ་ལེགས་ཉི་མའི་འདུལ་བ། རྗེ་བཙུན་པའི་ཕར་ཕྱིན་ཐལ་ཕྲེང་། སེ་ར་ཤར་བ་དང་དཔལ་འབྱོར་ལྷུན་གྲུབ་ཀྱི་ཕར་ཕྱིན་ཊིཀྐ །དངོས་གྲུབ་པའི་མཛོད། རྗེ་བཙུན་པ་དང་ནམ་མཁའ་རྒྱལ་མཚན་པའི་དབུ་མ་སོགས་ལ་འཆད་ཉན་མཛད་དོ། །གྲྭ་ཚང་འདི་གཉིས་ན་དངོས་སུ་ལྔ་པ་ཆེན་པོའི་མཛོད་ལ་འཆད་ཉན་མེད་ཀྱང་བློ་འཛིན་བྱེད་མཁན་ནི་མང་དུ་སྣང་ངོ་། །གཞན་ཡང་དབུས་ཕྱོགས་སུ་གྲྭ་ཚང་ཆེ་ཕྲ་ནམ་མཁའི་སྐར་ཚོགས་ལྟར་མང་བས་རྒྱས་པར་ནི་སུ་ཞིག་གིས་བརྗོད་པར་ནུས། འོན་ཀྱང་མིང་ཙམ་གྱིས་འགའ་ཞིག་བརྗོད་ན། ལྷ་ས་ན་རྨེ་རུ་བཞི་སྡེ་གཉིས་དང་། གཞན་ན་གསང་སྔགས་མཁར། གསང་ཕུ་བར། རབ་སྟོད་པ་སོགས་དགའ་ལྡན་པའི་གྲྭ་ཚང་བཞི་དང་། ས་སྐྱ་པའི་གྲྭ་ཚང་བདུན་ཏེ་བཅུ་གཅིག་ཡོད་པར་བཤད། དེར་བྱམས་འཇམ་དབྱངས་གཉིས་དྲང་ངེས་ལ་རྩོད་པའི་རྟེན་འབྲེལ་གྱིས་གླིང་སྟོད་སྨད་གཉིས། ས་དགའ་ལྡན་གཉིས། ར་བ་སྟོད་སྨད་གཉིས་ཀྱང་བྱུང་སྟེ་དེ་དག་གི་བླ་རབས་ཡོད་ཅིང་། ར་བ་སྟོད་པའི་བླ་རབས་ཀྱི་ཐོག་མ་ནི་པཎ་ཆེན་མཆོག་ལྷ་འོད་ཟེར་རོ། །ར་བ་སྟོད་པ་ནི་ཐོག་མ་གསང་ཕུ་ུན་ཡོད་ཀྱང་ཕྱིས་སྙེ་ཐང་བདེ་བ་ཅན་དུ་ཚོགས་པའོ། །གསང་ཕུ་ནི་ཇོ་བོ་རྗེས་ལུང་བསྟན་པ་ལྟར་རྔོག་ལེགས་པའི་ཤེས་རབ་ཀྱིས་བཏབ་སྟེ་བསྟན་པའི་འབྱུང་གནས་ཞིག་གོ །གདན་ས་བ་ནི་ཞང་ཚེ་སྤོང་། གཉལ་པ། རྣམ་འཕར་བ། ཆ་བ་ཆོས་སེང་སོགས་སོ། །གཞན་ཡང་། ཚལ་གུང་ཐང་། ཡང་དགོན། དབུས་གླིང་། ཆོས་ཁྲི་ལྷོ་ལྕོག །ཆོས་འཁོར་གླིང་། ཡེར་པ་སྤོས་དགའ། གྲོག་མཁར། གླང་ར། བཀྲ་ཤིས་ལྗོངས། ཆ་ཕུ་བྲག་སོག། ལྷས་བུ་དགོན། ལྷས་གླང་ལུང་། ལྷས་བྲག །བ་ལམ་ནུབ་རྫོང་། བ་ལམ་ཆོས་འཁོར། སྐམ་དཀོན། སྐྱོར་མོ་ལུང་། དེའི་ཆ་ཤས་ཁྱམས་ས། ཡུག་ཁང་པ་འདི་ལ་སྔགས་གྲྭ་དང་མཚན་ཉིད་གྲྭ་ཚང་གཉིས། དགའ་བ་གདོང་། སྟོད་ལུང་ཆུ་བཟང་། ལམ་ས། རྡེའུ་རི། སྡིངས་ཀ །ར་ཚག་སྟེ་སྟོད་ལུང་པའོ། །མཚོ་སྨད། ཤུན་མར་ཁུ་སྦུས་ཀྱུ། ཚེར་གསེབ་དགོན། སྤང་བུ་དགོན། བཀྲ་ཤིས་ཆོས་སྡིངས། ཉན་ཆུ་བཟང་། ཐང་བུ་དགོན་ནོ། །ཡང་སྐྱིད་སྨད་དུ་གསང་སྔགས་ཕོ་བྲང་། སྐྱིད་སྟོད་ཀྱི་གེ་རེ་དགོན། སྣོན་གྱི་དུམ་བུ་རི། ལ་མོ་ཚེར་གསེབ། དགེ་འདུན་སྒང་། བཙུན་མོ་ཚལ། ཉེ་སྡིངས། བདེ་མོ་ཐང་། མལ་དྲོ་ཆ་དཀར། ཀང་ཀང་དགོན། བྲག་རྒྱས། ཐང་སྐྱ། ཨེ་ཝཾ་ཆོས་སྡེ། ཕག་མོ་ཆོས་སྡེ། ཕག་མོ་ལོ་དགོན། རྒྱུ་དགོན། སྤོ་ཐོ། དབེན་དགོན། སེར་དགོན། སྐྱིད་སྤྲོ་དགོན། ཤུགས་གསེབ། ཁྲི་ལྟག །ར་ཁྱིམ། གུར་སྔོན། ཞོགས་ཕུད་འོད་གསལ། འཕན་ཡུལ་རིན་ཆེན་གྲགས། དགོན་ནང་། འབྲོང་སྟེང་། པུ་ཏོ་དགོན། རྒྱལ་ལྷ་ཁང་། གསལ་ཁང་དགོན། ཉན་སོ་དགོན། འབྲི་ཁུང་དགོན། རྭ་སྒྲེང་། དེའི་ཡང་དགོན། དེའི་བསམ་གཏན་གླིང་། ཤགས་མཁར་དགོན། རི་ཆོས་དགོན། བསམ་རྩེ་སྒྲུབ་སྡེ། འབའ་ཚ་ཆོས་སྡེ། དཔལ་འབར་སྒང་། སྤྱིལ་བུ་བ། དབྱེ་བོ་དགོན། མངའ་ཕུ་དགོན། བྱམས་པ་གླིང་། ལྷ་རྩེ་དགོན། འོད་སྣང་དགོན། ཞྭ་ལྷ་ཁང་། བྱ་ཡུལ་མང་ཏ། སྟག་ཕུག་ཆོས་སྡེ། སྙུག་རུམ། ཆོས་འཁོར་སྒང་། མཁར་སྐྱ། རྒྱལ་བཟང་། རིན་ཆེན་གླིང་། རུ་ཐོག་དགོན། འོལ་ཁ། རྫིང་ཕྱི་དགོན། བསམ་གཏན་གླིང་། ཆུ་བཟང་། ཆོས་ལུང་། ཉི་མ་གླིང་། རི་བོ་གསེར་གླིང་། རིན་ཆེན་སྒང་། སླེབ་རི་དགོན། མོ་དགེ་ལུང་། ཆོས་འཁོར་རྒྱལ། དྭགས་པོ་གྲྭ་ཚང་། མངའ་རིས་གྲྭ་ཚང་། སྒར་བ་གྲྭ་ཚང་། རྣམ་རྒྱལ་གྲྭ་ཚང་། བསམ་གཏན་གླིང་། བྲ་སྟེང་དགོན། དྭགས་པོ། ལྷ་སྡིངས་དགོན། མཁར་ཐོག །ལྷས་སྟེང་། སེ་ལུང་ལ་ཁ། སྒྲོམ་མདའ། དགྱེར་དགོན། རྒྱ་རི་དགོན། རི་སྒོ། ཀློག །སེ་བོ། མདོ་མཁར། ཆ་དཀར། ཨེ་རོང་དགའ་ལྡན། རྒྱལ་ལྷ་ཐོག་སྟེང་། ཐར་གླིང་རི་ཁྲོད། ཟེ་མོ་གདོང་དགོན། བཀྲ་ཤི་ཆོས་གླིང་། དགའ་ལྡན་ཆོས་གླིང་། གྲྭ་སྐོར། ཟངས་པོ་ཆེ། རི་སྟེང་། ངང་སྐྱལ། ཏེའུ་ར། ཕྱེ་ཁ་སྟེ་གཉལ་སྡེ་དྲུག །མཁར་སྡེ། པདྨ་བཀོད། གུང་ཐང་། ལྷོ་བྲག །འགྲོ་བ་དགོན། ཁྱུང་ཚང་དགོན། གློ་བོ་དགོན། གདང་དགོན། བཀྲ་ཤིས་ཆོས་གླིང་། འབྱར་ཐོག་དགོན། ཡུག་ནམ་སྟེང་། མཚོ་སྣ་དགོན། མདོ་མཁར་ཆོས་སྡེ། མོན་མཚོ་སྣ། ཆོས་གྲྭ་ཆེན་པོ་རྩེས་དང་། བཀྲ་ཤིས་བདེ་ཆེན། ཐང་པོ་ཆེ། ཆོས་འཁོར་སྡེ། དགོན་གླིང་། རོལ་ཁང་། རྒྱལ་གསར་སྒང་། ལྷག་རུ། དགའ་ལྡན་གླིང་། རི་བོ་ཆོས་གླིང་། ཐེག་ཆེན་གླིང་། རི་བོ་བདེ་ཆེན། སྤྱན་གཡས། བསམ་དགོན་རྩེ། མོན་མཁར་ཞུགས་དགོན། ཨེར་དགེ །ལྷ་སྡིངས། གླང་ལུང་། བྱམས་པ་གླིང་། རི་བོ་རྣམ་རྒྱལ། ཁྲ་བདེ་གླིང་། དགའ་ལྡན་ཆོས་འཁོར་སྡིངས། དགའ་ལུང་དགོན་ལ་སོགས་པ་སྟེ། དེ་དག་ལས་བཙུན་མ་དགོན་དང་འགའ་ཞིག་མ་གཏོགས་རྗེ་རིན་པོ་ཆེའི་བསྟན་པས་ཁྱབ་བོ། །རྗེའི་བསྟན་པ་གཙང་ཕྱོགས་སུ་དར་ཚུལ་ནི། རྗེ་ཉིད་གྲྭ་སྐོར་སོགས་ཀྱི་ཆེད་དུ་གཙང་ཕྱོགས་སུ་ཕེབས་པའི་སྟོབས་དང་། མཁས་བཙུན་ཡོན་ཏན་རྒྱ་མཚོས་རྗེའི་རིང་ལུགས་འཛིན་པའི་ཆོས་སྡེ་བཏབ་པ་ཐོན་རྒྱལ་བྱེད་ཚལ། དེ་ནས་ལྷ་རི་དགོན། དགའ་ལྡན་ལྷུན་པོ། རབ་རྒྱས་གླིང་། ཀུན་ར་དགོན། ངོ་བ་རི། དགེ་འཕེལ། བྱམས་ཆེན་ཆོས་སྡེ། བདེ་བ་ཅན། ལྷན་པ་སོ། དབེན་རྩ། རི་བོ་དགེ་འཕེལ། ཤངས་འབྲས་སྤུངས། སྤོར་ཐོག །བ་ཤེལ། ཡོལ་དཀར། ཤངས་གྲྭ་ཚང་ཆེན་མོ་སྟེ་དེ་རྣམས་ཀྱི་བླ་རབས་དང་། ཁྱད་པར་དུ་བཀྲ་ཤིས་ལྷུན་པོ་ནི། རྗེ་དགེ་འདུན་གྲུབ་ཀྱིས་མེ་ཡོས་བརྒྱད་པའི་ཐོག་ཏུ་བཏབ་ནས་མཚན་ཉིད་ཀྱི་གྲྭ་ཚང་ཞིག་བཙུགས་པར་བཤད་ཀྱང་། ཕྱིས་འཆད་ཉན་གྱི་གྲྭ་ཚང་གསུམ་བྱུང་སྟེ། ཤར་རྩེ་གྲྭ་ཚང་། དཀྱིལ་ཁར་གྲྭ་ཚང་། ཐོས་བསམ་གླིང་གི་གྲྭ་ཚང་ངོ་། །སྔགས་པ་གྲྭ་ཚང་ནི་པཎ་ཆེན་བློ་བཟང་ཆོས་ཀྱི་རྒྱ་མཚན་གྱིས་ཕྱིས་སུ་བཙུགས་ཏེ་དེ་དང་བཅས་བཀྲ་ཤིས་ལྷུན་པོ་ན་གྲྭ་ཚང་བཞིའོ། །དེ་དག་སོ་སོའི་བླ་རབས་རྣམས་ནི་རེ་ཞིག་བཞག་སྟེ། བཀྲ་ཤིས་ལྷུན་པོའི་ཁྲི་ཐོག་པ་ནི། པཎ་ཆེན་བཟང་པོ་བཀྲ་ཤིས། པཎ་ཆེན་ལུང་རིགས་རྒྱ་ཚོ། པཎ་ཆེན་ཡེ་ཤེས་རྩེ་མོ། རྗེ་དགེ་འདུན་རྒྱ་མཚོ། ཉི་མ་རྒྱལ་མཚན། བློ་གྲོས་རྒྱལ་མཚན། དོན་ཡོད་རྒྱ་མཚོ། བློ་གྲོས་ལེགས་བཟང་། ཆོས་ཀྱི་རྒྱལ་མཚན། ཆོས་དཔལ་རྒྱ་མཚོ། བསོད་ནམས་རྒྱལ་མཚན། བསམ་འགྲུབ་དཔལ་བཟང་། དམ་ཆོས་ཡར་འཕེལ། ལྷ་དབང་བློ་གྲོས། པཎ་ཆེན་བློ་བཟང་ཆོས་ཀྱི་རྒྱལ་མཚན། ངག་དབང་བློ་བཟང་རྒྱ་མཚོ། མཆོག་སྤྲུལ་བློ་བཟང་ཡེ་ཤེས་སོ། །བཀྲ་ཤིས་ལྷུན་པོའི་དགེ་འདུན་ཀུན་བསྡོམས་ན་ཕྱེད་དང་སུམ་སྟོང་སྐོར་དང་། དེ་ལས་ལྷག་ཚོགས་པ་ཡང་འབྱུང་ངོ་། །དབེན་ས་ནི་མཁས་གྲུབ་རྗེའི་སྐུ་སྐྱེ་བསོད་ནམས་ཕྱོགས་གླང་གིས་བཏབ་ཅིང་གདན་ས་པ་ལྷ་ཤོངས་པ། སྐྱབས་མཆོག་དཔལ་བཟང་། བློ་བཟང་དོན་གྲུབ། སངས་རྒྱས་ཡེ་ཤེས། བློ་བཟང་ཆོས་ཀྱི་རྒྱལ་མཚན། མཆོག་སྦྲུལ་བློ་བཟང་ཡེ་ཤེས་སོ། །གཞན་ཡང་གཙང་ཕྱོགས་ན་དགའ་ལྡན་ཆོས་འཕེལ། འབྲོང་རྩེ་དང་། དཔལ་འཁོར་ཆོས་སྡེ་འདི་མཁས་གྲུབ་རྗེས་བཏབ་ཅིང་གྲྭ་ཚང་བདུན་ཏེ། རྒྱ་རོང་ལྷ་ཁང་། ནོར་བུ་དགའ་ལྡན། ལེགས་གྲུབ། གསེར་ཁང་། ཞི་གནས། གྲང་མོ་ཆེ། བདེ་འབྱོར་གྲྭ་ཚང་རྣམས་སོ། །དེ་དག་ནི་རྗེ་བླ་མའི་ལུགས་སྲོལ་འཛིན་པའོ། །གཞན་ཡང་དེར་ས་ལུགས་བཞི། ཞ་ལུ་བ་གཅིག །དུས་འཁོར་བ་བཞི། ས་དགེ་ཐུན་མོང་བ་གཉིས་བཅས་ཁྱོན་གྲྭ་ཚང་བཅུ་བདུན་ཡོད་པར་བཤད་དེ། ཐམས་ཅད་ཀྱི་ཐོག་མའི་སྤྱི་བླ་ནི་མཁས་གྲུབ་རྗེའོ། །གནས་རྙིང་དུ་གྲྭ་ཚང་དྲུག་བྱུང་སྟེ། སྐྱེད་ཚལ། མཆོད་ཁ། སེ་ར། ཟུར་ཁང་། ནགས་ཞབས། གཞིས་དགོན་ནོ། །ཤབ་སྟོང་ལྷུན་རྩེ། བསམ་གྲུབ་སྡེ་ཆེན། བཀྲ་ཤིས་དགེ་འཕེལ། མཁའ་སྤྱོད། བྲག་དཀར། གསེར་སྡིངས། རི་ཁྲོད་དགའ་ལྡན། མངོན་དགའ། གསེར་གླིང་། རིན་ཆེན་སྒང་། བསམ་སྡིངས། བསམ་གླིང་། ཐར་པ། རྒོད་ཚང་། གཡང་ཆོས་སྡེ། དར་རྒྱས་སྒྲུབ་སྡེ། ལྷ་སྡིངས། ཡང་རིན་ཆེན་སྒང་། རི་བོ་མདངས་ཅན། རི་མཁར། གསེར་གླིང་། རྡོ་རྗེ་གདན། ཆོས་རྫོང་། བཞད་སྟེང་། བཞད་གྲྭ། རྟ་ནག་ལ་ཁ། རི་ཁུད། རྟ་ནག་སྡེ་ཆེན། ལྷུན་གྲུབ་རྩེ། བཞད་དགའ་ལྡན། བཞད་བྲེས་ཁ། འབྲོང་ཕུ། དབེན་ས་དགེ་འཕེལ། དཔལ་སྣང་ཐང་། རྒྱལ་ཆེན་རྩེ། གནས་ཆོས་སྡེ། སྔོན་མོ་རྫོང་། སེང་རྩེ། བྱང་ཆེན། དཔལ་སྡིངས། རོག་ཚོ། ནམ་མཁའ་ཆོས་མཛོད། ཤེལ་དཀར་ཆོས་ལུང་། དགའ་ལྡན་དར་རྒྱས། དངོས་གྲུབ་ཆོས་རྫོང་། ནོར་བུ་སྒང་། ཟབ་མོ་བྲག་གོ །གཞན་ཡང་ངམ་རིང་དུ་གྲགས་པའི་དགོན་སྡེར་དགེ་ལུགས་ཀྱི་གྲྭ་ཚང་བཅུ་སྟེ། སྡེ་གུང་པ། བདེ་གླིང་ཤར་བ། རྟ་ཤར་བ། བཀྲ་ཤིས་སྒང་། བསམ་གྲུབ་དགའ་ལྡན། མདོག་བུམ་པ། ཆོས་ལུང་ལྷོ་པ། བདེ་བ་ཅན་པ། ཆོས་ལུང་། ལུང་དགའ་ལྡན་པའོ། །དེར་ས་སྐྱའི་གྲྭ་ཚང་བཅོ་ལྔ་སྟེ། དཀར་པོ་ལེགས། དཀར་པོ་ཤར། མངོན་དགའ་ཤར་བ། ལྟག་རྩེ་བ། ཆོས་གླིང་པ། མཐོང་སྨོན་པ། སྣང་རིག་པ། ལྷ་སྡིངས་པ། སྡེ་ཕུག་པ། ཚར་གུང་པ། ཀ་ཚལ་བ། ཆོས་ལུང་པ། ཆོས་སྡིངས་པ། ཆོས་འཁོར་སྒང་བ། སྐར་ཁུག་པ་རྣམས་སོ། །དེས་ན་ངམ་རིང་འདི་དཔལ་ལྡན་ས་སྐྱའི་མ་དགོན་དུ་སྣང་ངོ་། །མང་མཁར་དགའ་ལྡན་དར་རྒྱས་གླིང་། དགའ་ལྡན་ཆོས་འཁོར། ཆུ་ལུང་། ཆོས་སྡིངས། ལྡོག་མཁར་ཆུང་། གསང་སྔགས་མཁར། ཟེ་མཁར། དཔལ་སྡིངས། བསམ་གཏན་གླིང་། གླང་སྣ་སྦུག །བོང་ཤོད། ལྷ་ཆོས་འཁོར། འདོད་རྒྱས། ཤྲཱི་བྱང་ངོས། ཕ་དྲུག །གྲམ་མཚོ། མན་དུར། གཏིང་སྐྱེས། དང་རྩ། སྤོར་ཐོག །ཆོས་འཁོར་སྡེ་ཆེན་ལ་སོགས་པ་སྟེ་དེ་དག་ནི་གཙང་ཕྱོགས་ཀྱི་ཆོས་སྡེ་སྟེ། འགའ་ཞིག་མ་གཏོགས་རྗེའི་བསྟན་པས་ཁྱབ་བོ། །སྟོད་མངའ་རིས་སྐོར་གསུམ་དུ་རྗེའི་བསྟན་པ་དར་བའི་ཚུལ་དང་། དགོན་གྱི་གྲངས་དང་། བླ་རབས་རྣམས་རྒྱས་པར་བཤད་དུ་མི་ལང་བས་ཐར་ཐོར་ཞིག་བརྗོད་ན། ལྷ་བླ་མ་བྱང་ཆུབ་འོད་ཀྱི་དུས་སུ་ཇོ་བོ་རྗེ་ཐོག་མར་མངའ་རིས་སུ་བྱོན་ནས་ཆོས་མང་དུ་གསུངས་ཤིང་། ལྷ་བླ་མ་ཡེ་ཤེས་འོད་ཀྱིས་མཐོ་ལྡིང་དགོན་བཏབ། རྒྱུད་སྡེ་བཞི་སོ་སོར་བཞུགས་པའི་ལྷ་ཁང་། བྲེ་ལྡན། བཀྲ་ཤིས་བདེ་རྒྱས། བཀྲ་ཤིས་ལྷུན་པོ། མུ་དཀར་ཆོས་རྫོང་། རྟ་སོ་ཆོས་སྡེ། ལ་གོ་སྤེལ། རམ་ལམ། ཨོ་ར་མ་ཎི་དང་། དུང་དཀར་དུ་བཀྲ་ཤིས་ཆོས་གླིང་། དགའ་ལྡན་ལྷུན་པོ། ཤངས་རྩེར། བྱམས་པ་གླིང་། ཆུ་བོ་སི་ཏར་ཁྲི་སེ་ཆོས་སྡེ། དཔེ་ཐུབ། ཀླུ་དཀྱིལ། བྱམས་པ་གླིང་། ཕུ་ཏ། མར་པ་གླིང་། ལྷུན་གྲུབ་དགེ་འཕེལ། རྩ་ཧྲང་རང་རིག །བཀྲ་ཤིས་དགེ་འཕེལ་སོགས་དགོན་སྡེ་ཆེ་ཆུང་ཤིན་ཏུ་མང་ཡང་། མདོར་ན་མངའ་རིས་ཕྱོགས་རྣམས་དང་། ཀོང་ཡུལ། སྤོམ་སྦོ་རའི་ཡུལ། རྒྱ་རོང་གི་ཕྱོགས་རྣམས་སུ་དགོན་སྡེ་ཆེ་ཕྲ་བརྗོད་ཀྱིས་མི་ལང་བ་ལྟ་བུ་བྱུང་སྟེ། དེ་ཐམས་ཅད་དུའང་རྗེའི་རིང་ལུགས་ཀྱིས་མ་ཁྱབ་པ་མེད་དོ། །དེ་བཞིན་དུ་མདོ་སྨད་ཁམས་སུ་ཡང་སྐུ་འབུམ། སྟོང་འཁོར། སྒོ་མང་། དགོན་ལུང་། ཤ་རྫོང་། བྱ་ཁྱུང་དང་། དེ་དག་གི་ཕྱོགས་ཕྱོགས་ན་དགོན་ཕྲན་ཤིན་ཏུ་མང་ལ། གཞན་ཡང་བྱམས་པ་འབུམ་གླིང་། མཛོ་མོ་སྒར། ཐང་རིང་། སྟག་ལུང་། བཀྲ་ཤིས་འཁྱིལ། ཁ་གྱ། མཛོད་དགེ་སྟོད་སྨད་སོགས་ནའང་རི་ཁྲོད་ཀྱི་དགོན་དུ་མ་ཡོད་ཅིང་། ཅོ་ནེའི་ཕྱོགས་འདིར་ནི་གཙོ་བོ་ཙོ་ནེའི་མ་དགོན་བཤད་སྒྲུབ་གླིང་ངམ། གོང་མ་ཆེན་པོའི་ལུང་གིས་ཏིང་འཛིན་དར་རྒྱས་གླིང་། དེའི་བུ་དགོན་ནི་གོང་སོ། ནགས་མདོ། གླུ་ཆུང་དགོན་དང་། གཞན་གཡེར་བ། འཁྱར་དགེ །ཚ་རྡོར། མཆེད་པ། སྨྲ་ཉུང་དགོན་ལ་སོགས་པ་དགོན་སྡེ་ཆེ་ཆུང་མང་དུ་མཆིས་སོ། །དེ་དག་གི་ནང་ནས་གཙོ་བོ་ཅོ་ནེ་དགོན་འདི་ཉིད་འདེབས་དུས་དང་བླ་རབས་རྣམས་གང་ཡིན་ཅུང་ཟད་བརྗོད་པར་བྱ་སྟེ། དགོན་སྡེ་འདི་ཉིད་ཐོག་མར་འདེབས་མཁན་ནི་ཅོ་ནེའི་དཔོན་བརྒྱུད་དུ་འཁྲུངས་པ་ཆོས་རྗེ་རིན་ཆེན་ལྷུན་པོ་ཞེས་གྲགས་པ་དེ་ཉིད་ཡིན་ལ། དུས་གང་གི་ཚེ་བཏབ་པ་ནི་ལོ་འདི་ལའོ་ཞེས་ངེས་པ་ཅན་དུ་འཛིན་དཀའ་བར་འདུག་ན་ཡང་། ཁོང་དབུས་སུ་བྱོན་པའི་ཚེ་ཁྲི་རིན་པོ་ཆེ་ཡེ་ཤེས་བཟང་པོ་དང་མཇལ་ནས་ཆོས་གསན་པའི་ལོ་རྒྱུས་སྣང་བ་ལྟར་ན་འདི་ལྟར་དུ་མངོན་ཏེ། ཡེ་ཤེས་བཟང་པོ་ནི་འཇམ་དབྱངས་གཙང་པ་གདུང་བདུན་རྫོགས་པའི་རྗེས་སུ་བྱོན་ཅིང་། དེ་ཡང་བློ་བཟང་ཉི་མ་དང་། དེའི་རྗེས་སུ་ཆོས་རྗེ་ཡེ་ཤེས་བཟང་པོ་ཁྲི་ཐོག་ཏུ་ཕེབས་པར་བཤད་པས། རྗེ་གཤེགས་ནས་ཡེ་ཤེས་བཟང་པོའི་བར་རགས་བརྩིས་སུ་ལོ་བརྒྱད་ཅུའི་སྐོར་སོང་བར་མངོན་ལ། རིན་ཆེན་ལྷུན་པོ་དབུས་ནས་བྱོན་ཏེ་དགོན་འདི་བཏབ་པར་འདོད་དགོས་པས་རབ་བྱུང་བརྒྱད་པའི་སྨད་ཙམ་ནས་བསྐྲུན་པར་སེམས་སོ། །རིན་ཆེན་ལྷུན་པོ་ནས་གདན་སའི་མཁན་པོ་དྲུང་པ་བློ་གྲོས་རྒྱལ་མཚན། དྲུང་དབེན་པ་བློ་གྲོས་རབ་གསལ། བསོད་ནམས་ལེགས་པ། གྲགས་པ་རིན་ཆེན། ངག་དབང་ཆོས་གྲགས། བློ་གྲོས་གྲགས་པ། དཔལ་ལྡན་བཟང་པོ། འཕགས་པ་རྒྱལ་མཚན། བསོད་ནམས་ལྷུན་པོ། རིན་ཆེན་མཆོག་རྒྱལ། སངས་རྒྱས་རྒྱ་མཚོ། ཚེ་བརྟན་དོན་གྲུབ། ནམ་མཁའ་རྣམ་རྒྱལ། བྱིན་པ་དར་རྒྱས། ཐུགས་རྗེ་ལྷུན་གྲུབ། བརྩོན་འགྲུས་དཔལ་ལྡན། ལྷ་དབང་རྒྱ་མཚོ། ཆོས་སྐྱོང་རྣམ་རྒྱལ། བློ་བཟང་རྒྱ་མཚོ། ཚུལ་ཁྲིམས་རྒྱ་མཚོ། བྱམས་པ་བཀྲ་ཤིས། རྡོ་རྗེ་རྒྱལ་མཚན། བློ་བཟང་དར་རྒྱས། དགེ་འདུན་གྲགས་པ། བློ་བཟང་ཚུལ་ཁྲིམས། ངག་དབང་སྨོན་ལམ། ངག་དབང་བསོད་ནམས། འཇམ་དབྱངས་བཀྲ་ཤིས། རིན་ཆེན་བློ་གྲོས། འཇམ་དབྱངས་ཕུན་ཚོགས། གྲགས་པ་རྒྱ་མཚོ། གྲགས་པ་བཤད་སྒྲུབ། ངག་དབང་དགེ་ལེགས། དགེ་འདུན་རྒྱ་མཚོ། སངས་རྒྱས་དཔལ་བཟང་། ངག་དབང་ཉི་མ་སྟེ། དེ་རྣམས་ཀྱི་ནང་ནས་བློ་བཟང་ཚུལ་ཁྲིམས། འཇམ་དབྱངས་བཀྲ་ཤིས། གྲགས་པ་བཤད་སྒྲུབ་གསུམ་གྱི་ཁྲི་ལན་གཉིས་རེ་མཛད་ཅིང་། དེ་ལྟར་ན་རིན་ཆེན་ལྷུན་པོ་ནས་བགྲངས་པས་བླ་རབས་བཞི་བཅུའོ། །དགོན་འདིར་མཚན་ཉིད་གྲྭ་ཚང་བྱུང་ཚུལ་ནི། དཔོན་གྱི་གདུང་བརྒྱུད་དུ་འཁྲུངས་པ་ཀོའུ་ཤྲཱི་ནང་སོ་ངག་དབང་བ་འཕྲིན་ལས་རྒྱ་མཚོ་ཕོ་བྲང་དུ་ཕེབས་ཏེ་རྒྱལ་པོར་མཇལ་ནས་ལུང་ཐམ་ག་གནང་བའི་དུས་སུ། རྒྱལ་པོ་ཉིད་དང་ཕྱོགས་དེའི་བླ་ཆེན་འགས་ཀྱང་ཁྱོད་ཀྱིས་ཅོ་ནེའི་ཕྱོགས་དེར་མཚན་ཉིད་ཀྱི་བཤད་གྲྭ་ཞིག་ཚུགས་ཞེས་བཀའ་བབས་པ་ན་ཞལ་གྱིས་བཞེས་ཏེ། ཕྱིར་བྱོན་ནས་རབ་བྱུང་བཅུ་གཉིས་པའི་ཤིང་རྟའི་ལོའི་ས་ག་ཟླ་བའི་ཚེས་བདུན་ཐུབ་དབང་སྐུ་བལྟམས་པའི་དུས་ཆེན་ལ་ཁོ་བོ་བླ་མར་བསྐོས་ཏེ་མཚན་ཉིད་གསར་དུ་བཙུགས། དེ་ནས་ཀོའུ་ཤྲཱི་སྐུ་མཆེད་གཉིས་ཀྱིས་གྲྭ་ཁང་གསར་རྒྱག་མཛད་པ་ན་ཁོ་བོ་དང་ཀོའུ་ཤྲཱི་གཉིས་མཐུན་གྲོས་མང་དུ་བྱས་ཏེ་གྲྭ་ཁང་གསར་འདེབས་དང་ཆོས་ཕྱོགས་ནས་ཕན་ལེགས་པོ་བཏགས་ཀྱང་དྲིན་མི་བཟོ་བ་འགའ་ཞིག་གིས་མ་ཤེས་པར་སྣང་། ཁོ་བོས་གྲྭ་ཚང་ཁྲི་ལོ་བརྒྱད་བྱས་པའི་ཐོག་ནས་གཟིམ་ཁང་ཁྲི་པར་བསྐོས་ཏེ་ཁྲི་གཉིས་འཛིན་བྱས། དེའི་རྗེས་སུ་གྲགས་པ་རྒྱ་མཚོས་ཀྱང་ཁྲི་གཉིས་འཛིན་མཛད། དེ་ནས་སླར་ཡང་ཁོ་བོས་ཁྲི་གཉིས་འཛིན་བྱས་ཏེ་ལོ་གསུམ་ཙམ་སོང་བ་ན། ཀོའུ་ཤྲི་ཡེས་ནས་རྒྱུད་པ་གྲྭ་ཚང་གསར་བཙུགས་ཀྱི་ཐོག་མའི་སློབ་དཔོན་དུ་བསྐོས་ནས་རེ་ཞིག་ཁྲི་གསུམ་འཛིན་བྱས་ཤིང་། དེ་ནས་ཨ་འབུམ་ཚང་རབ་འབྱམས་པ་སྒོས་སུ་གྲྭ་ཚང་གི་འཆད་ཉན་པར་བསྐོས། དེའི་རྗེས་སུ་གྲུ་རྩི་ནང་རབ་འབྱམས་པ། དེ་ནས་ཐང་ནག་དཀའ་བཅུ། དེ་ནས་ཁྱའོ་ལུང་དཀའ་བཅུའོ། །རྒྱུད་པའི་བླ་རབས་ཀྱི་ཐོག་མ་ནི་ཁོ་བོས་ཁྲི་གཉིས་འཛིན་བྱས་ཏེ་ལོ་ཁ་ཤས་སོང་བའི་ཚེ་སྡེ་པའི་ནང་ངག་དབང་དགེ་ལེགས་བསྐོས་ཀྱང་ལོ་གཅིག་ཙམ་ནས་སྐུ་གཤེགས། སླར་ཁོ་བོས་ཁྲི་ཟུར་ཐོག་གནས་ལོ་གསུམ་བཞི་ཙམ་རྒྱུད་པའི་བླ་མ་བྱས། དེ་ནས་གུར་ཆེན་ངག་དབང་ཉི་མས་མཁན་ས་དང་རྒྱུད་པའི་ཁྲི་ཟུང་འབྲེལ་མཛད་ཅིང་། དེ་ནས་མར་ཐང་དཀའ་བཅུ་སྒོས་སུ་རྒྱུད་པའི་ཁྲི་པར་བསྐོས་སོ། །དགོན་འདིའི་གྲྭ་པ་སྤྱིའི་གྲངས་ནི་མཆོད་རིང་ལྟ་བུའི་དུས་སུ་སྟོང་ཕྲག་གཉིས་དང་བཞི་བརྒྱ་ལྔ་བརྒྱའི་སྐོར་ཚོགས་པ་འབྱུང་ཞིང་གཞན་ནི་ངེས་པ་མེད་དོ། །སྤྱིར་གྲྭ་ཚང་གཉིས་བྱུང་ཚུལ་དེ་ལྟར་ཡིན་ཀྱང་རབ་བྱུང་བཅུ་གཉིས་པའི་ས་རྟ་ནས་བཟུང་སྟེ་ད་ལྟའི་བར་དུ་ནི། དཔོན་གྱི་གདུང་རྒྱུད་གོང་མ་ཆེན་པོའི་ལུང་ཐ་མ་ག་དང་བཅས་པ་གནང་སྟེ་ཀོའུ་ཤྲི་ཞེས་མཚན་གསོལ་ཞིང་མདོ་སྔགས་ཐ་སྙད་ཀྱི་གཞུང་རབ་འབྱམས་ལ་མཁས་པའི་ཕུལ་བྱུང་མཁན་རིན་པོ་ཆེ་འཇམ་དབྱངས་བློ་བཟང་བསྟན་པའི་རྒྱལ་མཚན་ཞལ་སྔ་ནས་ཀྱིས། གྲྭ་ཚང་ཟུང་འབྲེལ་གྱི་བདག་པོ་དང་ཞབས་ཏོག་མཛད་ནས་འཆད་ཉན་དང་འདོན་ཆ་སྒྲིགས་ལམ་སྐོར་གོང་འཕེལ་དུ་མཛད་ཅིང་། ད་དུང་ཡང་མཛད་པར་འགྱུར་བ་ལྟར་ལགས། གཞན་ཡང་སྨད་རྒྱ་སོག་གི་ཡུལ་དུ་རྗེའི་བསྟན་པ་དར་ཏེ་དགོན་སྡེ་འགའ་ཞིག་ཀྱང་བྱུང་ཞིང་། རྗེའི་བསྟན་པ་སྤེལ་བའི་བླ་ཆེན་གྲགས་ཆེ་བ་རྗེ་བཙུན་དམ་པ་སྐུ་སྔ་ཕྱི་གཉིས། ལྕང་སྐྱ་ཞབས་དྲུང་རིན་པོ་ཆེ། ཛ་ཡ་པཎྜི་ཏ། བཀའ་འགྱུར་བ་ནོ་མོ་ཧང་། བྷི་ཡིག་ཐུ་ནོ་མོ་ཧང་སོགས་དུ་མ་སྟེ། འདིས་རྒྱུད་ཐོག་མར་འཛུག་པའི་མཐུན་རྐྱེན་བསྒྲུབས་ཤིང་། ད་ལྟ་ནི་ལྕང་སྐྱ་ཞབས་ཀྱི་སྤྲུལ་སྐུ་དང་། གསེར་ཁྲི་རིན་པོ་ཆེའི་སྤྲུལ་སྐུ་རྣམ་པ་གཉིས་ཀྱི་ལུགས་ཟུང་གི་སྒོ་ནས་རྒྱལ་བའི་བསྟན་པ་སྤྱི་དང་། རྗེའི་བསྟན་པ་ཉིད་དར་ཞིང་རྒྱས་པར་མཛད་དོ་ཞེས་ཐོས་ཤིང་། ཁྱད་པར་དུ་ལྕང་སྐྱ་ཞབས་དྲུང་རིན་པོ་ཆེ་སྐུ་སྔོན་མས་ནི་གསུང་རྩོམ་གྱི་སྒོ་ནས་ཕན་འདོགས་ཆེན་པོ་མཛད་སྣང་ངོ་། །དེར་མ་ཟད། ད་ལྟ་ནི་བྱང་ཕྱོགས་ཨོས་ལོད་ཀྱི་ཡུལ་དུ་རྗེའི་བསྟན་པ་དར་ཞིང་རྒྱས་པར་གྱུར་པས་ད་ལྟའི་དུས་སུ་སངས་རྒྱས་དངོས་བྱོན་ཀྱང་འཕྲིན་ལས་དེའི་ལྷག་མཛད་རྒྱུ་མེད་པ་ལྟར་སྣང་སྟེ་དེ་ཐམས་ཅད་རྗེ་བཙུན་འཇམ་པའི་དབྱངས་ཀྱི་བཀའ་དྲིན་ཀྱང་ཡིན་ནོ། །སྤྱིར་ཐུབ་པའི་བསྟན་པ་ནི་ཕྱོགས་ཀུན་ཏུ་འཕགས་པ་རིགས་གསུམ་གྱི་མགོན་པོའི་སྤྲུལ་པས་གཙོ་བོར་བཟུང་ཞིང་། འཕགས་ཡུལ་ཨུ་རྒྱན་གྱི་ཡུལ་དང་། ཛམྦྷ་ལ་ནི་ཕྱག་རྡོར་གྱི་སྤྲུལ་པ་དང་། བོད་དང་རྒྱ་སོག་གི་ཡུལ་རྣམས་སུ་ནི་སྤྱན་རས་གཟིགས་དང་འཇམ་དབྱངས་ཀྱི་སྤྲུལ་པ་དུ་མས་བཟུང་ལ། ཁྱད་པར་དུ་ཁོང་རྣམ་གཉིས་ཀྱི་སྤྲུལ་པ་རྗེ་ཡབ་སྲས་དང་། པཎ་ཆེན་དང་། རྒྱལ་དབང་སྐུ་སྔ་ཕྱི་རྣམས་ཀྱིས་བཟུང་ཞིང་འཛིན་པར་རྟོགས་སོ། །བོད་ཀྱི་རྒྱལ་པོའི་དབང་དུ་བྱས་ན་ཆོས་རྒྱལ་སྲོང་བཙན་སྒམ་པོ། ཁྲི་སྲོང་སྡེ་བཙན། ཁྲི་རལ་སོགས་ཀྱིས་བསྟན་པ་བཟུང་ཞིང་། ཕྱི་མ་སྡེ་སྲིད་སངས་རྒྱས་རྒྱ་མཚོ་དང་། ད་ལྟ་མི་དབང་ཞེས་གྲགས་པ་འདིས་བསྟན་པ་སྤྱི་དང་། རྗེ་རིན་པོ་ཆེའི་བསྟན་པ་ལྷག་པར་རྒྱས་པར་མཛད་ཅེས་གྲགས་སོ། །ཨེ་མ། ཐུབ་བསྟན་རྣམ་དག་བྱ་ལམ་ཡངས་པའི་མཁར། །བློ་བཟང་རྒྱལ་བའི་ཉིན་བྱེད་ཤར་བའི་ཚེ། །མཁས་དབང་འོད་དཀར་ཅན་དང་ལྷན་ཅིག་ཏུ། །རྗེ་འབྲང་རྒྱུ་སྐར་ཚོགས་ཀྱིས་ཀུན་ཏུ་ཁྱབ། ། དེ་དག་ཀུན་གྱི་མིང་ཙམ་གསལ་བརྗོད་ཀྱང་། །གཞུང་མང་ཉིད་དུ་འགྱུར་ན་སོ་སོ་ཡི། །རྣམ་ཐར་ཆོས་འབྱུང་རྒྱས་པར་བརྗོད་བྱས་ཚེ། །པོ་ཏི་ཆེན་པོར་གྱུར་པ་ལྟ་ཅི་སྨོས། །དེས་ན་དེ་ལྟར་བརྗོད་ལ་སྒྱིད་ལུག་ཀྱང་། །རང་བསྟན་གཙོ་བོ་སེར་འབྲས་དགའ་ལྡན་སོགས། །དབུས་གཙང་ཕྱོགས་ཀྱི་དགོན་མིང་བླ་རབས་འགའ། །དད་པས་འཕྲོས་དོན་ཅུང་ཟད་བཅས་ཏེ་བཀོད། །དེ་ལས་ཐོབ་པའི་དགེ་ལེགས་གངྒཱའི་རྒྱུན། །དུས་གསུམ་རྣམ་དཀར་ཀླུང་དང་ལྷན་ཅིག་ཏུ། །གནས་སྐབས་མངོན་མཐོའི་ཞིང་སར་སྨིན་པ་དང་། །མཐར་ཐུག་ཀུན་མཁྱེན་རྒྱ་མཚོར་འཇུག་པར་ཤོག །ཅེས་རི་བོ་དགའ་ལྡན་པའི་བསྟན་པའི་བདག་པོ་བསྟན་འཛིན་བླ་རབས་དང་བཅས་པ་བྱུང་ཚུལ་ཆོས་འབྱུང་གསལ་བར་སྟོན་པའི་སྒྲོན་མེ་ཞེས་བྱ་བ་འདི་ནི། གཞུང་ལུགས་མང་དུ་ཐོས་པར་རློམ་པ་ཤཱཀྱའི་བཙུན་པ་གྲགས་པ་བཤད་སྒྲུབ་ཅེས་བྱ་བས་རང་ལོ་བཅུ་ཕྲག་བདུན་པ་རབ་བྱུང་བཅུ་གཉིས་པའི་མཇུག་ཤིང་བྱིའི་ལོའི་སྣོན་གྱི་ཟླ་བར་ཅོ་ནེའི་དགོན་ཉིད་དུ་དད་པས་སྦྱར་བའི་ཡི་གེ་པ་ནི་ཏཱ་ཡི་ལ་ལུང་བློ་བཟང་དོན་གྲུབ་བོ། །མངྒལཾ། མངྒལཾ།