དབྱངས་ཅན་མ་དཀར་དམར་ཟུང་གི་སྦྱིན་སྲེག་སྒྲུབ་ཐབས་དང་བཅས་པ་བློ་གྲོས་པད་ཚལ་རྒྱས་བྱེད་ཉི་མ།

དབྱངས་ཅན་མ་དཀར་དམར་ཟུང་གི་སྦྱིན་སྲེག་སྒྲུབ་ཐབས་དང་བཅས་པ་བློ་གྲོས་པད་ཚལ་རྒྱས་བྱེད་ཉི་མ་ཞེས་བྱ་བ་བཞུགས།

ན་མོ་སྭ་ར་སྭ་སྟྱཻ། འཇིག་རྟེན་མེས་པོའི་ཚེམས་དཀར་པད་ཚལ་ ལས། །ལེགས་འཁྲུངས་ཚངས་སྲས་དབྱངས་ཅན་ངང་མོ་ཉིད། །སྒྲ་དབྱངས་རྒྱ་མཚོའི་རྒྱུད་མང་སྒྲོགས་བཞིན་པར། །ཚུར་བྱོན་བདག་བློའི་ཆུ་གཏེར་དཔལ་བསྐྱེད་མཛོད། །དེ་ལ་འདིར་དབྱངས་ཅན་མ་དཀར་དམར་གཉིས་ཀྱི་བསྙེན་སྒྲུབ་དང་འབྲེལ་བའི་སྦྱིན་སྲེག་ཇི་ལྟར་བྱ་བའི་རིམ་པ་མདོར་བསྡུས་པ་ཞིག་བརྗོད་པར་བྱ་སྟེ། རྣམ་དཔྱོད་དོན་དུ་གཉེར་བ་དག་གིས་ལྷ་མོ་འདི་གཉིས་གང་རུང་གི་བསྙེན་པ་སྔོན་དུ་བཏང་ནས་སྦྱིིན་སྲེག་བྱ་བ་ལ། རྫས་དང་ཡོ་བྱད་ཉེར་མཁོ་རྣམས་སྟ་གོན་བྱས་ནས། སྦྱིན་སྲེག་བྱ་བའི་གཞིའི་ས་སྔར་ལོངས་སྤྱད་པ་ཡིན་ན། ས་ཆོག་དགོས་པའི་ངེས་པ་མེད་ཀྱང་དེ་མིན་གཞན་ནས་འབྱུང་བ་ལྟར་ས་ཆོག་བྱེད་པའམ། དེ་ཙམ་མ་གྲུབ་ན་རང་ཉིད་ལྷའི་ང་རྒྱལ་དང་ལྡན་པས། ཨོོཾ་ཧ་ན་ཧ་ན་བཛྲ་ཀྲོ་དྷ་ཧཱུཾ་ཕཊ། རང་གི་ཐུགས་ཀ་ནས་སྤྲོས་པའི་རྡོ་རྗེ་ཁྲོ་བོས་བགེགས་རྣམས་བཅོམ་ཞིང་། ཨོོཾ་ཨཱཿཧཱུཾ། རྡོ་རྗེ་གསུམ་གྱིས་སའི་ཉེས་སྐྱོན་ཐམས་ཅད་སྦྱངས་པར་གྱུར། འདོད་ན་ཨོོཾ་བཛྲ་ཨ་མྲྀ་ཏ་ནས་ཧ་ན་ཧཱུཾ་ཕཊ། ལན་གསུམ་སོགས་བརྗོད་དེ་ཐལ་བ་ཡུངས་དཀར་དྲི་ཆུ་སོགས་ཀྱིས་སྦྱང་བར་བྱ་སྟེ། ཀུན་རྫོབ་ཀྱི་དག་པ་དང་། སའི་ཉེས་སྐྱོན་ཐམས་ཅད་རང་བཞིན་གྱིས་སྟོང་པའི་བདག་ཉིད་དུ་གྱུར་ཅེས་བརྗོད་ཅིང་བསམ་པ་ནི་དོན་དམ་པའི་སྦྱང་བའོ། །ས་གཞི་རང་བཞིན་གྱིས་དཀར་བའམ། དཀར་པོ་གཞན་གྱིས་བྱུགས་ལ་དབུས་བཙལ་ནས་ཚངས་ཟུར་གྱི་ཐིག་དང་། དེ་ནས་དབུས་ནས་ཁྲུ་ཕྱེད་ཀྱིས་ཟླུམ་བསྐོར་དང་། དེ་ལ་སོར་བཞི་བསྣན་ནས་ཟླུམ་པོར་བསྐོར་བར་བྱའོ། །ཁ་ཁྱེར་ལོགས་སུ་བསྐོར་ན་སོར་བཞི་བསྣན་ཅིང་། དབུས་ནས་སོར་བཞིས་ཟླུམ་བསྐོར་དང་། ཐབས་ཀྱི་དཔངས་སུ་སོར་བཅུ་གཉིས་དང་། སྟེང་དུ་ཁ་ཁྱེར་སོར་བཞི་པ་གུད་དུ་བཏགས་ན་ནི་ལེགས། ཁ་ཁྱེར་ལ་རྡོ་རྗེ་དང་རིན་པོ་ཆེའི་འཕྲེང་བས་བསྐོར་ཞིང་། ཟླུམ་ཐིག་ཕྱི་མའི་ཕྱོགས་བཞི་ནས་སོར་གཉིས་རེ་དོར་ཏེ་གྲུ་བཞིར་གདབ། ཕྱིའི་གྲྭ་བཞིར་ཟླ་ཕྱེད་རྡོ་རྗེ་དང་། ཐབ་ཀྱི་དབུས་སུ་པདྨ་དཀར་པོ་དང་དམར་པོའམ། སྣ་ཚོགས་པདྨའི་ལྟེ་བར་དབྱངས་ཅན་མ་དཀར་མོ་ལ་པི་ཝཾ་ང མ། དེ་ལ་ཧྲཱིཾ་དཀར་པོས་མཚན་པའམ་ཧྲཱཾི་ཙམ་དགོད་ཅིང་། དམར་མོ་ལ་མེ་ལོང་ནོར་བུ་ཧྲཱཾི་ཡིག་གིས་མཚན་པའམ་ཧྲཱཾི་དགོད། སློབ་དཔོན་དང་ཐབ་ཀྱི་བར་དུ་མེ་ཡོལ་ལ་བཾ་འདྲི་བ་དང་། རླུང་གཡབ་སྔོན་པོ་ལ་རླུང་དཀྱིལ་དང་ཡཾ་འབྲི་བར་འདོད་ན་བྱ་ལ། སྤྱིར་འགྲེ་ལ་མ་བྱས་ཀྱང་རུང་། གཞན་འདས་མ་འདས་ཀྱི་གཏོར་མ་དང་མཆོད་པ་རྣམས་དང་། སོ་རྩི། གོས་ཟུང་རྣམས་ཕྱག་ལེན་ལྟར་བཤམས། གཞི་བདག་གཏོར་མ་དང་། ཆ་གསུམ་བྱེད་པར་འདོད་ན་རུང་ཞིང་མ་བྱས་ཀྱང་ཆད་ལྷག་ཏུ་མི་འགྱུར། ཡམ་ཤིང་འོམ་བུ་སོགས་འོ་མ་ཅན་གྱི་ཤིང་། མར་ཁུ་ལ་ནི་བྱུང་ན་མར་དཀར་བཞུས་པ་དང་། མ་གྲུབ་ན་འབྲུ་མར་ཡང་རུང་། རྫས་ལ་བསྙེན་པའི་ཁ་སྐོང་བའི་སྐབས་སུ་ཏིལ་ངེས་པར་དགོས་འདུག་ཀྱང་མ་རྙེད་ན་དེ་དང་ཟར་མ་བསྲེས་ནས་འབུལ་བའི་ཕྱག་ལེན་ལྟར་ཡང་རུང་ཙམ། འདིར་རྫས་ཆེན་བཅུ་གཉིས་པོ་ཐམས་ཅད་འབུལ་རྒྱུ་བྱུང་ན་ལེགས་མེད་ན་ངེས་པར་དགོས་པ་མིན་པས་ཐམས་ཅད་དམ། ཅི་འགྲུབ་ཀྱིས་ཀྱང་རུང་ལ། ཡམ་ཤིང་དང་མར་ཁུ་གཉིས་ནི་མེད་དུ་མི་རུང་བའོ། །ཐབ་ཀྱི་ནང་གི་རི་མོ་ཤོ་རས་ཀྱིས་བཀབ་སྟེ་བུད་ཤིང་བཟང་པོ་ཟླུམ་པོར་བརྩིགས། ཨམྲྀ་ཏ་བརྒྱ་སོགས་བཟླས་པའི་བསང་ཆུ་སྟ་གོན་བྱ་ཞིང་། ཆས་བྱེད་དམ་མ་བྱས་ཀྱང་ཆོག སྟན་ཇི་ལྟར་འཚམས་པའི་སྟེང་དུ་པདྨའི་འདུག་སྟངས་ཀྱིས་ཁ་ཤར་དུ་ཕྱོགས་ཏེ་སྨྲ་བ་གཞན་བཅད་ནས། དཀྱིལ་འཁོར་ཆེན་མོ་རྣམས་ཀྱི་སྦྱིན་སྲེག་བྱེད་པའི་ཐོག་མར་རྡོར་དྲིལ་བྱིན་བརླབ་བྱ་ཚུལ་བཤད་ཀྱང་། ལྷ་རེ་རེ་ཙམ་གྱི་སྦྱིན་སྲེག་གི་ཐོག་མར་རྡོར་དྲིལ་བྱིན་བརླབ་བྱ་བའི་ཚུལ་མི་གསལ་བར་མཆོད་པ་བྱིན་བརླབས་ནས་འཇུག་པར་བཤད་པ་མང་ཞིང་། ཁྱད་པར་དུ་འདིའི་སྦྱིན་སྲེག་གི་ཆོ་གར་ཡང་རྡོར་དྲིལ་བྱིན་བརླབ་བྱ་བར་མ་བཤད་པ་ལྟར་རུང་བར་སྣང་ཡང་། རྡོར་དྲིལ་བྱིན་བརླབ་བྱས་ཀྱང་མི་འགལ་བས་སྤྱི་ལྟར་བྱེད་པའམ། །བསྡུ་ན། རྡོ་རྗེ་ནི་ཐབས་དང་། དྲིལ་བུ་ནི་ཤེས་རབ་སྟེ། དེ་གཉིས་ཀའང་དོན་དམ་པའི་བྱང་ཆུབ་ཀྱི་སེམས་ཀྱི་རང་བཞིན་ནོ། །ཞེས་པ་ཙམ་གྱིས་དག་པ་དྲན་པར་བྱའོ། །དེ་ནས་ཨ་མྲྀ་ཏ་བརྗོད་ཅིང་བསང་ཆུ་ནས་བླངས་ཏེ་ཐབས་དང་མཆོད་རྫས་སོགས་ལ་རང་གི་གཡོན་ནས་བརྩམས་ཏེ་གཡས་སྐོར་དུ་བསང་གཏོར་ལན་གསུམ་བྱའོ། །སླར་ཡང་མཆོད་པ་བསང་ཆུས་བསངས། ཨོོཾ་སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ཨོོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོོཾ་འོད་དུ་ཞུ་བ་ལས་བྱུང་བའི་མཆོད་ཡོད་ནས་རོལ་མོ་རྣམས་དྭངས་ཤིང་ཐོགས་པ་མེད་པ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར་པར་བསམས་ལ། སོ་སོའི་ཕྱག་རྒྱ་དང་བཅས་ཏེ་ཨོོཾ་ཨརྒྷཾ་ཨཱཿཧཱུཾ་ནས་ཤཔྟ་ཨཱཿཧཱུཾ་གི་བར་གྱིས་བྱིན་གྱིས་བརླབས་ཤིང་། སྔགས་དྲུག་དང་ཕྱག་རྒྱ་དྲུག་གིས་ཀྱང་བྱིན་བརླབ་བྱ་བར་བཤད། སྐབས་འདིར་ཆུ་བཞི་བྱིན་བརླབས་བྱ་བར་འདོད་ན་རུང་བར་སེམས་ཀྱང་། འདིའི་སྦྱིན་སྲེག་གི་ཆོ་གར་ཆུ་གཉིས་ཙམ་འབུལ་བར་བཤད་པ་ལྟར་བྱས་ཀྱང་རུང་བས་གང་རུང་གི་ཆོག །དེ་ནས་རྡོ་རྗེའི་ཁུ་ཚུར་ལས་གུང་མོ་གཉིས་རྩེ་སྤྲད་དེ། རྫས་རྣམས་བཀྲུས་པར་བསམས་ལ། ཨོོཾ་སྭཱ ཧཱ་ཞེས་བརྗོད། ཨོོཾ་ཨཱ་སྭཱཧཱས་ཡམ་ཤིང་དང་། ཨོོཾ་ཤྲཱིཿསྭཱ ཧཱས་མར་ཁུ། ཨོོཾ་ཛྲིཾ་སྭཱཧཱས་འབྲུ། ཨོོཾ་ཀུ་རུ་ཀུ་རུ་སྭཱཧཱས། དེ་དག་ལས་གཞན་པའི་རྫས་རྣམས་ཀྱི་མཚན་ཉིད་དང་མི་ལྡན་པའི་ཉེས་སྐྱོན་ཐམས་ཅད་སྦྱངས་ནས་བདུད་རྩི་ལྔའི་ངོ་བོར་གྱུར་པར་བསམས། དེ་ནས་མེ་གང་ཡང་རུང་བ་ལ། ཨོོཾ་ཨཱཿཧཱུཾ་ལན་གསུམ་གྱིས་མེ་སྦར་ཏེ། དེ་ལ་འཁྱིལ་བ་ལན་གསུམ་བརྗོད་ཅིང་སྔར་ལྟར་ལན་གསུམ་བསངས་ནས་ཐབ་དུ་འཇུག་པ་དང་མཉམ་དུ། ཧྲཱིཾཿཨ་ཨཱ་ནས་ཨཾ་ཨཿའི་བར་ལན་གསུམ་དང་། ཨོོཾ་བཛྲ་ཛྭ་ལ་རཾ། ཞེས་བརྗོད་དེ་སྦོར་ཞིང་གཟི་བྱིན་བསྐྱེད། དམར་མོ་ལ་དབྱངས་མ་བརྗོད་ཀྱང་ཆོག །དེ་ནས་ཧཱུཾ་བདུན་བརྗོད་ཅིག་རླུང་གཡབ་ཀྱིས་མེ་སྦར། སླར་ཡང་ཨོོཾ་བཛྲ་ཛྭ་ལ་རཾ། ཞེས་བརྗོད་ཅིང་བླུགས་གཟར་བདུན་གྱིས་མེ་གསོོ། དེ་ནས་ཀུ་ཤ་རྣམས་ལག་ཏུ་བཟུང་ནས། ཨོོཾ་བཛྲ་སཏྭ་ཧཱུཾ། ལན་བདུན་གྱིས་བྱིན་གྱིས་བརླབས་ལ། ཨོོཾ་ཀུ་ཤ་འདི་ནི་ གཙང ་ཞིང་དགེ །ཚངས་པ་ལྷ་རྣམས་དག་བྱེད་ཡིན། །དཀོན་མཆོག་གསུམ་པོ་མཉེས་བྱེད་པ། །ས་ལས་སྐྱེས་པའི་འདབ་མའི་སྙིང་། །བདག་གི་བགེགས་རྣམས་ཐམས་ཅད་ནི། །ཞི་དང་བཀྲ་ཤིས་མཛད་དུ་གསོལ། །ཞེས་པ་ལན་གསུམ་བརྗོད་པའི་མཐར། ཀུ་ཤ་རིང་བཟུང་རེ་རྩེ་མོ་རང་གི་གཡོན་ནས་བརྩམས་ཏེ་ཐབ་ཀྱི་ཤར་དང་ལྷོ་དང་ནུབ་དང་བྱང་གི་ཁ་ཁྱེར་ལ་སྔ་མས་རྩེ་མོས་ཕྱི་མའི་རྩ་བ་གནོད་པར་དགྲམ་ཞིང་། ཐབ་ཁུང་དུ་ཀུ་ཤ་རྩེ་མོ་ཤར་དུ་བསྟན་པས་གཡོག་གོ །ཀུ་ཤ་དགོས་ཟིན་པ་དང་ཐལ་མོ་སྦྱར་ཏེ། བཅོམ་ལྡན་འདས་རྡོ་རྗེ་སེམས་དཔའ་བགེགས་ཐམས་ཅད་ཞི་བ་དང་བཀྲ་ཤིས་པར་མཛད་དུ་གསོལ། ཞེས་གསོལ་བ་གདབ། དེ་ནས་ལས་སྔགས་བརྗོད་ཅིང་བསང་ཆུས་ཐབ་བསངས། ཨོོཾ་སྭ་བྷཱ་ཝ་ནས་ཤུ དྡྷོཉ་ཧཾ། ཐབ་སྟོང་པ་ཉིད་དུ་གྱུར། སྟོང་པའི་ངང་ལས་པཾ་ལས་སྣ་ཚོགས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་དཀར་པོ། དེ་ཡོངས་སུ་གྱུར་པ་ལས་ཡེ་ཤེས་ཀྱི་ཐབ་ཁ་དོག་དཀར་ཞིང་དབྱིབས་ཟླུམ་པ། རྒྱར་ཁྲུ་གང་དང་ཟབས་སུ་ཁྲུ་ཕྱེད་པ། མུ་རན་ཁ་ཁྱེར་དང་བཅས་པ་ཁ་ཁྱེར་ལ་རྡོ་རྗེ་དང་རིན་པོ་ཆེའི་ཕྲེང་བས་བསྐོར་བ། ཕྱིའི་གྲྭ་བཞིར་ཟླ་ཕྱེད་རྡོ་རྗེ་མཚན་པ། དྭངས་ཤིང་ཐོགས་པ་མེད་པ་གྱུར། ཐབ་ཀྱི་ནང་དུ་རཾ་ལས་སྐྱེས་པའི་མེ་གྲུ་གསུམ་པའི་དབུས་སུ། སྣ་ཚོགས་པདྨའི་ལྟེ་བར་རཾ་ལས་བགྲང་ཕྲེང་། དེ་ཡོངས་སུ་གྱུར་པ་ལས་མེ་ལྷ་སྐུ་མདོག་དམར་པོ་འོད་ཟེར་དཀར་པོ་འཕྲོ་བ། ཞི་ཞིང་འཛུམ་པའི་ཉམས་ཅན། ཞལ་གཅིག་ཕྱག་གཉིས་པ། གཡས་བགྲང་འཕྲེང་དང་། གཡོན་སྤྱི་བླུགས་བསྣམས་པ། གསུས་ཁྱིམ་ཆེ་ཞིང་སྨ་ར་དང་ཨག་ཚོམ་དང་རལ་བའི་ཐོར་ཅོག་རྣམས་དཀར་བ། དར་གྱི་ཨང་རག་གསོལ་ཞིང་སྲད་བུ་དཀར་པོའི་སེ་རལ་ཅན། ཞབས་སེམས་དཔའི་སྐྱིལ་མོ་ཀྲུང་གིས་བཞུགས་པའི་དཔྲལ་བར་ཨོོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་སྔོན་པོས་མཚན་པར་གྱུར། རང་དང་དམ་ཚིག་པའི་ཐུགས་ཀའི་ཧཱུཾ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས། ཤར་ལྷོ་ནས་འཛིན་བྱེད་མི་ལྷའི་རྒྱལ་པོ་དྲང་སྲོང་གི་ཚོགས་དང་བཅས་པ་སྤྱན་དྲངས། ལག་པ་གཡས་མི་འཇིགས་པའི་ཕྱག་རྒྱས་མཐེ་བོང་གཡབ་ཅིང་། ཨོོཾ་ཚུར་སྤྱོན་ཚུར་སྤྱོན་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །སྲེག་བླུག་ཞལ་ཟས་བཞེས་སླད་དུ། །འདི་ནི་ཡང་དག་བསྙེན་པར་མཛོད། །ཅེས་ལན་གསུམ་དང་། དེའི་མཇུག་ཏུ་སྤྱན་འདྲེན་གྱི་སྔགས་རིང་དང་ཚིག་བཅད་གཉིས་གཞུང་ཁ་ཅིག་ཏུ་འབྱུང་ཡང་། ཕལ་ཆེར་ལས་མི་འབྱུང་བས་བཞག་སྟེ། ཨོོཾ་ཨགྣ་ཡེ་མ་ཧཱ་ཀ་རུ་ཎི་ཀ་ཨེ་ཧྱེ་ཧི། ཧཱུཾ་མཛད་ཀྱི་ཕྱག་རྒྱ་བྱས་ཏེ། ཊཀྐི་ཧཱུཾ་ཛཿཐབ་ཀྱི་མེ་མཚམས་ཀྱི་ཁ་ཁྱེར་གྱི་ཀུ་ཤའི་གདན་ལ་བཞུགས་པར་གྱུར། པདྨ་ཀ་མ་ལ་ཡེ་སྟྲཾ། ཨ་མྲྀ་ཏས་ཕྱིར་འབྲང་གི་བགེགས་བསྐྲད། ཨོཾ་ཨཱཿཧྲཱིཿཔྲ་ཝ་ར་སད་ཀ་རཾ་ཨརྒྷཾ་པྲ་ཏཱིཙྪ་ཧཱུཾ་སྭཱ ཧཱ། ཞེས་པས་མཆོད་ཡོན་དང་། ཨོོཾ་ཨཱཿཧྲཱིཿ ནས་པཱ་དྱཾ་པྲ་ཏཱིཙྪ་ཧཱུཾ་སྭཱཧཱས་ཞབས་བསིལ་དབུལ། ཡང་ན་ཨོོཾ་བཛྲ་ཨགྣ་ཡེ་ཨརྒྷཾ་པྲ་ཏཱིཙྪ་དང་། དེ་བཞིན་དུ་པཱ་དྱཾ་པྲ་ཏཱིཙྪ་ཧཱུཾ་སྭཱཧཱས་ཞབས་བསིལ་ཏེ་ཆུ་གཉིས་དབུལ་ཞིང་། འདོད་ན་ཆུ་བཞི་ཡང་འབུལ་རུང་བར་སེམས་སོ། །དེ་ནས་ཨོོཾ་བཛྲ་ཨཾ་ཀུ་ཤ་ཛཿ ཨོོཾ་བཛྲ་པཱ་ཤ་ཧཱུཾ། ཨོོཾ་བཛྲ་སྥོ་ཊ་བཾ། ཨོོཾ་བཛྲ་གྷཎྜ་ཧོཿས་གཞུག་སོགས་བྱ། འདིར་དབང་བསྐུར་རྒྱས་འདེབས་མཛད་པའི་ལུགས་འདུག་ཀྱང་། གཞུང་གཞན་ཕལ་ཆེར་ནས་དེ་མི་འབྱུང་བ་ལྟར་ཆོག་པས་བཞག་སྟེ། སླར་ཡང་ཆུ་གཉིས་ཙམ་མམ། ཆུ་བཞི་ཕུལ་རྗེས། ཨོོཾ་བཛྲ་ཨགྣ་ཡེ་པུ ཥྤེ་པྲ་ཏཱིཙྪ་ཧཱུཾ་སྭཱཧཱ། ནས་ཨཔྟ་པྲ་ཏཱིཙྪའི་བར་གྱིས་མཆོད་ཅིང་། ཡང་ན་སྔགས་རིང་ལ་མཆོད་སྔགས་སྦྱར་ནས་ཕུལ་ཆོག་ཅིང་། ནང་མཆོད་མི་དགོས། བསྟོད་པ་ནི་སྐབས་འདིར་འབྲེལ་བས། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཊཀྐིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་བསྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཅེས་སམ། མེ་སྟེ་བསྲེག་བྱ་ཟ་བའི་ལྷ། །ཞེས་སོགས་ཀྱིས་བསྟོད་ཅིང་། ཡང་ན་བསྟོད་པ་རྒྱས་པ་སྤྱི་ལྟར་བྱའོ། །དེ་ནས་མེ་ལྷའི་དམ་ཚིག་གི་ཕྱག་རྒྱ་བྱས་ཏེ། ཨོོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལ་ཛྭ་ལ་ཡ། སརྦ་བྷ་སྨི་ཀུ་རུ། སརྦ་དུཥྚཾ་ཧཱུཾ་ཕཊ། ཏྲྀ་ཤྱེ་ཛཿཧཱུཾ་བཾ་ཧོཿ ས་མ་ཡ་སྟྭཾ། ས་མ་ཡ་ཧཾ། ཞེས་པ་ལན་གསུམ་གྱིས་དམ་ཚིག་བསྒྲགས། དེ་ནས་དགང་བླུགས་བཟུང་སྟེ་མེ་ལྷའི་ལྗགས་རྡོ་རྗེའི་རྣམ་པ་ཅན་དཀར་པོ་ལ་རཾ་ཡིག་དང་། དགང་བླུགས་ཀྱི་ཁ་ལ་ཡཾ་ཡིག་འོད་ཟེར་འབར་བ་དང་བཅས་པས་མཚན་པར་གྱུར་པར་བསམས་ལ། ཨོོཾ་བཛྲ་ཨགྣ་ཡེ་ཞེས་པའམ། ཨོོཾ་ཨགྣ་ཡེ་ནས་བ་ཧ་ནཱ་ཡེ་སྭཱཧཱ། ཞེས་པ་བདུན་གྱིས་མར་ཁུ་འབུལ་ཞིང་། ཕྱི་མ་ལ་ནཱ་ཡ་དང་སྭཱ ཧཱའི་བར་དུ་སྤེལ་ཚིག་གང་འདོད་པ་དེ་སྦྱོར་ཞིང་། དེ་ཡང་བདག་གི་རྣམ་དཔྱོད་རྒྱས་པ་ལ་བར་དུ་གཅོད་པའི་སྡིག་སྒྲིབ་དང་། ལྷག་ཆད་ཀྱི་ཉེས་པ་ཐམས་ཅད་ཤནྟིངྐུ་རུ་ཡེ་སྭཱཧཱ། ཞེས་པ་ལྟ་བུའོ། །དེ་ནས་རྫས་ཆེན་བཅུ་གཉིས་སམ། གང་འབྱོར་འབུལ་བའི་ཐོག་མར། ཡམ་ཤིང་བཟུང་ནས། ཡམ་ཤིང་རྣམས་བྱང་ཆུབ་ཀྱི་ཤིང་གི་རང་བཞིན་དུ་གྱུར། ཅེས་བརྗོད་ཅིང་བསམས། ཨོོཾ་ཨགྣ་ཡེ་ནས་བ་ཧ་ནཱ་ཡེ། ཨོོཾ་བོ་དྷི་བྲྀཀྵ་ཡེ། བདག་གི་རྣམ་དཔྱོད་ནས། ཉེས་པ་ཐམས་ཅད་དང་གཟི་བརྗིད་རྒྱས་པ་ལ་བར་དུ་གཅོད་པ་ཐམས་ཅད་ཤནྟིངྐུ་རུ་ཡེ་སྭཱཧཱ། བསྡུས་པ་ལ་གོང་གི་སྔགས་ཐུང་དང་རྫས་སྔགས་རྣམས་སྦྱར་བར་བཤད་པ་ལྟར་ཡང་རུང་། དེ་བཞིན་དུ་མར་ཁུ་མེ་ལྷའི་སྔགས་ཀྱི་མཐར། ཨོོཾ་ཨགྣ་ཡེ༴ བདག་གི༴ འབྱོར་རྒྱས་པ་ལ༴ ཏིལ་ལ། དེ་བཞིན་དུ། ཨོོཾ་སརྦ་པ་བཱཾ་ད་ཧ་ན་བཛྲ་ཡེ། སྡིག་པ་ཐམས་ཅད་ཤནྟིངྐུ་རུ༴ དུར་བ་ལ། ཨོོཾ་བཛྲ་ཨཱ་ཡུ་ཥེ། ཚེ་རྒྱས་པ་ལ༴ འབྲས་ལ། ཨོོཾ་བཛྲ་པུཥྚ་ཡེ། བསོད་ནམས་རྒྱས་པ་ལ༴ ཞོ་ཟན་ལ། ཨོོཾ་སརྦ་སཾ་བཱ་དེ། བདེ་བ་མཆོག་ལ་བར་དུ་གཅོད་པ༴ ཀུ་ཤ་ལ། ཨོོཾ་ཨ་པྲ་ཏི་ཧ་ཏ་བཛྲ་ཡེ། བསྲུང་བ་མཆོག་ལ་བར་དུ༴ ཡུངས་ཀར་ལ། ཨོོཾ་སརྦ་ཨརྠ་སིདྡྷ་ཡེ། བགེགས་ཐམས་ཅད༴ སོ་བ་ལ། ཨོོཾ་བཛྲ་བི་ཛ་ཡེ། ནོར་དང་འབྲུ་རྒྱས་པ་ལ༴ ནས་ལ། ཨོོཾ་མ་ཧཱ་བེ་ག་ཡེ། མྱུར་བའི་ཤུགས་ཕུན་སུམ་ཚོགས་པ་ལ༴ སྲན་མ་ལ། ཨོོཾ་མ་ཧཱ་བ་ལ་ཡེ། སྟོབས་རྒྱས་པ་ལ༴ གྲ་ོལ། ཨོོཾ་བཛྲ་གྷསྨ་རི། བདག་གི༴ ནད་ཐམས་ཅད་ཤནྟིངྐུ་རུ་ཡེ་སྭཱཧཱ་ཞེས་སྦྱོར། སྐབས་འདིར་ཤེས་རབ་རྒྱས་པའི་ཆེད་དུ་བསྙེན་པ་བྱེད་པ་དང་། དེའི་ལྷག་ཆད་གྱི་ཉེས་པ་སྦྱོང་བའི་ཆེད་དུ་སྦྱིན་སྲེག་བྱེད་པ་དགོས་པའི་གཙོ་བོ་ཡིན་པས། ཏིལ་ངེས་པར་དགོས་པར་སེམས་སོ། །ཀ་ར་བུ་རམ་སྦྲང་རྩི་སྟེ་མངར་གསུམ་ལ་སྔགས་ཀྱི་མཇུག་ཏུ། ཨོོཾ་བཛྲ་མ་ལེ་པུསྟྲ་ཡ་ཞེས་དང་སྤེལ་ཚིག་བཅས་སྦྱོར། དེ་ནས་བཛྲ་ཨགྣ་ཡེ་ཨརྒྷཾ་ནས་ཤཔྟ་པྲ་ཏཱིཙྪའི་བར་མཆོད་དེ་བསྟོད་པའམ། མིན་ཡང་རུང་སྟེ། སླར་ཡང་སྔ་མ་ལྟར་མཆོད་ཡོན་དང་ཞབས་བསིལ་གཉིས་སམ། ཞལ་བསིལ་དང་བསང་གཏོར་འབུལ་ཡང་རུང་བར་སེམས་སོ། །འདིར་མར་ཁུ་ལན་བདུན་ཕུལ་ནས། ཨོོཾ་བཛྲ་ཛྭ་ལ་རཾ། མེ་ལྷ་མེ་འབར་བའི་རྣམ་པ་ཅན་དུ་གྱུར་ཅེས་བརྗོད་ཅིང་བསམ། །༈ དེ་ནས་འདས་པའི་མེ་ལྷ་བསྐྱེད་ཅིག་མཆོད་པ་ལ། དབྱངས་ཅན་མ་དཀར་དམར་གང་ཡིན་ཀྱང་སྦྱིན་སྲེག་གི་མེ་འབར་བའི་དབུས་བུ་བསྐྱེད་དགོས་ཤིང་། དེ་ཡང་ཐབ་ཀྱི་ནང་དུ་ཡེ་ཤེས་ཀྱི་མེ་འབར་བའི་དབུས་སུ། དཀར་མོ་ཡིན་ན་བཾ་ལས་པདྨ་དཀར་པོ་དང་། དམར་མོ་ལ། བཾ་ལས་པདྨ་དམར་པོ་འདབ་མ་བརྒྱད་པའི་ལྟེ་བར་ཨ་ལས་ཟླ་བའི་དཀྱིལ་འཁོར་ཞེས་སོགས་སོ་སོའི་བསྒྲུབ་ཐབས་ནས་འབྱུང་བ་ལྟར་བསྐྱེད་དེ། ཐུགས་ཀ་ཧཱུཾ་སྔོན་པོ་ཞེས་པའི་མཇུག་ཏུ། སྒྲུབ་ཐབས་སུ་བཀོད་པ་ལྟར་ཐུགས་ཀའི་ས་བོན་གྱི་འོད་ཟེར་གྱིས་ཡེ་ཤེས་པ་སྤྱན་དྲངས་ནས་བསྟིམ། འོན་ཀྱང་དཀར་མོའི་སྦྱིན་སྲེག་གི་སྐབས་སུ་ཡེ་ཤེས་པ་སྤྱན་འདྲེན་པའི་ཚུལ་སྒྲུབ་ཐབས་ཁོ་ན་ལྟར་བྱེད་མི་དགོས་པ་ནི་ལོགས་སུ་བཤད་པ་ལྟར་རོ། །དེ་ནས་མཆོད་འབུལ་ནི། རབ་འབྱམས་རྒྱ་མཚོ་དཔག་མེད་ ན། །མཆོད་ཡོན་ཇི་སྙེད་ཡོད་པ་དང་། །བདག་གིས་འབུལ་བའི་མཆོད་ཡོན་ འདི། །བཞེ ས་ནས་རྣམ་དཔྱོད་དངོས་གྲུབ་སྩོལ། །ཨོོཾ་ས་ར་སྭ་སྟི་ས་པཱ་རི་ཝཱ་ར་ཨརྒྷཾ་པྲ་ཏཱིཙྪ་ཧཱུཾ་སྭཱཧཱ་ཞེས་པ་དང་། དེ་བཞིན་དུ་ཤཔྟའི་བར་སྦྱར་ལ་མཆོད། དེ་ནས་དྲིལ་སྟབས་དང་བཅས་ཏེ། ཡིད་འཕྲོག་མཛེས་སྡུག་རྣམ་འགྱུར་ཅིར་ཡང་སྟོན། །སྒྲ་དབྱངས་རྒྱ་མཚོའི་སྙན་པ་འབུམ་ཕྲག་སྒྲོགས། །ཟབ་ཡངས་མཁྱེན་བརྩེ་ཉི་ཟླ་ལྟར་གསལ་བ། །ཚངས་སྲས་ལྷ་མོའི་སྐུ་གསུང་ཐུགས་ལ་ བསྟོད། །པདྨའི་བཞིན་ལ་གཡོ་ལྡན་བུང་བའི་སྤྱན། །མཐོན་མཐིང་རལ་བ་ཕྱེད་བཅིངས་ཐོར་ཚུགས་ཅན། །རོལ་སྒེག་གར་གྱིས་འགྱིངས་པའི་དབྱངས་ཅན་ མ། །བདག་ལ་རྣམ་དཔྱོད་སྤོབས་པའི་མཆོག་སྩོལ་མཛོད། །བསྟོད་གསོལ་འདི་དབྱངས་ཅན་མ་གཉིས་ཀ་ལ་སྦྱར་ཆོག །དེ་ནས་ལྷ་མོའི་ལྗགས་རྡོ་རྗེའི་རྣམ་པ་ཅན་དཀར་པོ་ལ་རཾ་གྱིས་མཚན་པར་གྱུར། ཨོོཾ་སྭ་ར་སྭ་སྟི་ཧྲཱིཾ་ཨ་ཨཱ་ནས་ཨཾ་ཨཿཞེས་པས་མར་ཁུ་ཕུལ་ནས་སྤེལ་ཚིག་སྦྱོར། དེ་ནས་ཡམ་ཤིང་རྣམས་བྱང་ཆུབ་ཀྱི་ཤིང་གི་རང་བཞིན་ཅན་དུ་གྱུར་པར་བསམས་ལ། ཨོོཾ་སྭ་ར་སྭ་སྟྱཻ་ཧྲཱིཾཿ ཨ་ཨཱ་ནས་ཨཾ་ཨཿ ཨོོཾ་བོ་དྷི་བྲྀ ཀྵ་ཡེ་སྭཱཧཱ་ཞེས་སོགས་སྔར་བཞིན་རྫས་སྔགས་སྤེལ་ཚིག་དང་བཅས་པ་སྦྱོར། ཐམས་ཅད་ལ་མ་གྲུབ་ན་ཐོག་མཐའ་གཉིས་ཙམ་ལ་སྦྱར་ཡང་རུང་། གྲངས་ནི་སྤྱིིར་གསུམ། བདུན། ཉེར་གཅིག་སོགས་མཐའ་གཅིག་ཏུ་མ་ངེས་ཀྱང་། ཡམ་ཤིང་དང་མར་ཁུ་ཏིལ་གསུམ་གྲངས་མང་བ་དང་། ཁྱད་པར་དུ་ལྷག་ཆད་གྱི་ཉེས་པ་སྦྱོང་ཆེད་ཏིལ་གྲངས་མང་དུ་འབུལ་ཞིང་། མངར་གསུམ་དང་མེ་ཏོག་དམར་པོ་ཡང་མང་ཙམ་འབུལ་བ་ལེགས། དེ་ནས་དགང་བླུགས་བདུན་ཕུལ་ནས། ཆུ་གཉིས་ཉེར་སྤྱོོད་རོལ་མོ་རྣམས་ཀྱིས་མཆོད་ཅིང་བསྟོད་ལ། སྤྱིར་འདས་པའི་མེ་ལྷ་ལ་གཏོར་མ་དགོས་པའི་ངེས་པ་མི་སྣང་ཡང་འདིར་འབུལ་བའི་སྲོལ་ཡོད་པ་ལྟར་ན། གཏོར་མ་དགང་གཟར་དུ་བཞག་ནས་བསངས་སྦྱང་ཏེ། སྟོང་པའི་ངང་ལས་ཨོོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་འོད་དུ་ཞུ་བ་ལས་བྱུང་བའི་གཏོར་མ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་པར་བསམས་ལ། ཨ་ཀ་རོའི་མཐར་ཡི་གེ་གསུམ་བཏགས་པ་ལན་གསུམ་གྱིས་བྱིན་གྱིས་བརླབས་ལ། ཨོོཾ་སྭ་ར་སྭ་སྟྱཻ་ཧྲཱིཾཿ ཨ་ཨཱ་ནས ཨཾ་ཨཿ ཨོོཾ་ཨ་ཀ་རོ་སོགས་ལན་བདུན་ནམ་གསུམ་གྱི་མཐར་ཐབ་ཏུ་ཕུལ། དམར་མོ་ལ་དབྱངས་ཡིག་མ་བརྗོད་ཀྱང་རུང་། དེ་ནས་ཨོོཾ་བཛྲ་ཏཾ་བུ་ལ་ཡེ་སྭཱ ཧཱས་སོ་རྩི་དང་། ཨོོཾ་བཛྲ་ཝསྟྲ་ཡེ་སྭཱཧཱས་གོས་ཟུང་དབུལ། ཨོོཾ་སྭ་ར་སྭ་སྟི་ཨརྒྷཾ་ནས་ཤཔྟའི་བར་གྱིས་མཆོད་ལ་བསྟོད་ཅིང་། ཡིག་བརྒྱ་བཟླས་ནས་ཐལ་མོ་སྦྱར་ཏེ། གང་ཡང་བདག་བློ་རྨོངས་པ་ཡིས། །ཞེས་སོགས་དང་། ལྷག་པ་དང་ནི་ནས་དེ་ཡང་བཟོད་པར་མཛད་དུ་གསོལ། །ཨོོཾ་ཁྱེད་ཀྱིས་སེམས་ཅན་དོན་ཀུན་མཛད། །ནས། འབྱོན་པར་མཛད་དུ་གསོལ། །ཨོོཾ་ཨཱཿབཛྲ་མུཿ ཡེ་ཤེས་པ་རང་བཞིན་གྱི་གནས་སུ་གཤེགས་ཤིང་དམ་ཚིག་པ་རང་ཉིད་ལ་ཐིམ་པར་གྱུར། ཛཿཧཱུཾ་བཾ་ཧོཿ སླར་ཡང་འཇིག་རྟེན་པའི་མེ་ལྷ་མཆོད་པ་ནི། ཨོཾ་བཛྲ་ཛྭ་ལ་རཾ། ཞེས་པ་ལན་གསུམ་གྱིས་མར་ཁུ་ཕུལ་ཏེ། སླར་ཡང་ཡེ་ཤེས་ཀྱི་མེ་འབར་བ་ལས་མེ་ལྷའི་སྐུར་བཞེངས་པར་གྱུར་ཅེས་བརྗོད་དེ། རྫས་ལྷག་རྣམས་སྔར་ལྟར་སྔགས་རིང་ཐུང་གང་རུང་གིས་ཕུལ་རྗེས། སོ་རྩི་དང་གོས་ཟུང་ཀྱང་ཕུལ། གཏོར་མ་སྔར་ལྟར་བསངས་སྦྱངས་བསྐྱེད་དེ། ཨ་ཀ་རོ་ལན་གསུམ་གྱི་བྱིན་གྱིས་བརླབས་ནས། ཨོོཾ་ཨགྣ་ཡེ། ཨ་ཀ་རོ་སོགས་ལན་གསུམ་མམ་བདུན་གྱིས་སྔར་བཞིན་ཕུལ་ཏེ། མེ་སྟེ་བསྲེག་བྱ་ཟ་བའི་ལྷ། །ཞེས་སོགས་ཀྱིས་བསྟོད་ཅིང་། མཆོད་སྦྱིན་གཏོར་མ་འདི་བསྣོམས་ལ། །ཞེས་པ་ནས་ཡིད་ལ་འདོད་པ་ཀུན་འགྲུབ་ཤོག །ཅེས་པའི་བར་གྱིས་འཕྲིན་ལས་བཅོལ། ཡིག་བརྒྱ་བཟླས་ནས། མ་རྙེད་ཅེས་སོགས་ཀྱིས་བཟོད་གསོལ་དང་། རང་གི་དོན་དང་གཞན་གྱི་དོན། །སྒྲུབ་བྱེད་བསྲེག་བྱ་ཟ་བ་གཤེགས། །ཇི་བཞིན་དུས་སུ་ཚུར་བྱོན་ནས། །བདག་གི་དངོས་གྲུབ་ཐམས་ཅད་སྒྲུབས། །ཨོོཾ་ཨགྣ་ཡེ་བཛྲ་མུཿ མེ་ལྷ་ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་མེ་འབར་བའི་རྣམ་པ་ཅན་དུ་གྱུར་ཞེས་བརྗོད་ཅིང་བསྔོ་སྨོན་ཤིས་བརྗོད་བྱ། དེ་ནས་གཞི་བདག་གཏོར་མ་དང་ཆ་གསུམ་བཏང་ཀྱང་ལེགས། སླར་འབུལ་བའི་སྐབས་ཐབ་ཀྱི་ནང་གི་བུད་ཤིང་འབར་འཕྲོ་ཆེ་བ་རྣམས་དོར་ནས་ཐལ་བ་མནན་ཏེ། སྟེང་དུ་ཤིང་གསར་པ་བརྩིགས་ནས་སྔར་ལྟར་འབུལ་བ་ཡིན་ལ། དེའི་ཚེ་ཐབ་མྱུར་དུ་མི་འཇིག་པའི་ཆེད་དུ་ནང་ངོས་སུ་འཇིམ་པ་ལེགས་པོར་བྱུགས་ན་ཁྱད་ཆེའོ། །སརྦ་མངྒ་ ལཾ།། །།