རྡོར་དྲིལ་སོགས་ཀྱི་རྣམ་གཞག་བཤད་པ།
རྡོར་དྲིལ་སོགས་ཀྱི་རྣམ་གཞག་བཤད་པ་བཞུགས།
ན་མོ་བཛྲ་སཏྭ་ཡེ། ངེས་དོན་ལྷན་སྐྱེས་ཡེ་ཤེས་རྡོ་རྗེ་དང་། །ཟབ་མོའི་དེ་ཉིད་རྟོགས་པའི་དྲིལ་བུ་གཉིས། །དབྱེར་མེད་ཟུང་འཇུག་རྡོ་རྗེ་འ ཆང་ཞབས་ལ། །གུས་པས་འདུད་དོ་སྙིང་དབུས་རྟག་རོལ་ཞིག །འདིར་རྣལ་འབྱོར་རོལ་བའི་དགའ་སྟོན་ལས་རྡོར་དྲིལ་སོགས་ཀྱི་རྣམ་གཞག་རྒྱས་པར་གསུངས་པ་འཐོར་འཁྲུགས་སུ་ཡོད་པའི་དོན་ཉེར་མཁོ་འགའ་ཞིག་བསྡུས་ནས་གོ་བདེར་བརྗོད་པར་བྱ་སྟེ། དེ་ལ་ཐོག་མར་རྡོར་དྲིལ་གྱི་རྣམ་གཞག་འཆད་པ་ལ། དབྱེ་བ་དང་རྣམ་གཞག་སོགས་ལས། དང་པོ་ནི། དེ་གཉིས་ལ་སྒྲས་བརྗོད་ཀྱིས་དབྱེ་ན་དྲང་ངེས་གཉིས་རེ་སྟེ། དྲང་དོན་ལ་མན་ངག་སྙེམ་ལས་བཤད་པ་ལྟར། རྡོ་རྗེ་རྩེ་ཀ་ཅིག་པ་དང་། རྩེ་གསུམ་པ་དང་། རྩེ་ལྔ་པ་དང་། རྩེ་དགུ་པ་དང་། རྩེ་བཅུ་གཉིས་པ་དང་རྭ་ཉི་ཤུ་བའི་སྣ་ཚོགས་རྡོ་རྗེ་རྣམས་དང་། དྲིལ་བུ་ལ་ནི་རྩེ་ལྔ་པ་དང་རྩེ་དགུ་བས་ཡུ་བ་བྱས་པ་གཙོ་ཆེ་ལ། སྣ་ཚོགས་རྡོ་རྗེས་ཡུ་བ་བྱས་པའང་ཡོད་དོ། །རྩེ་གསུམ་པ་དང་ལྔ་བ་དང་དགུ་བ་ལ་ནི་ཞི་དྲག་གི་དབྱེ་བས་ཕྱོགས་རྭ་ཟུམ་པ་དང་གདེངས་བ་གཉིས་རེ་ཡོད་ལ། འོན་ཀྱང་དམ་ཚིག་གི་རྡོ་རྗེ་ནི་རྩེ་ལྔ་བར་ངེས་སོ། །མཁའ་འགྲོ་རྒྱ་མཚོ་ལས་ནི། དེ་ལྟར་ལ་སོགས་དྲིལ་བུ་ཆེ། རྩེ་མོ་སྟོང་གི་བར་དུའོ། །ཞེས་འབྱུང་བ་ལྟར་རྡོར་དྲིལ་གཉིས་ལའང་རྩེ་མོ་གཅིག་པ་ནས་རྩེ་མོ་སྟོང་གི་བར་ཡོད། གཉིས་པ་ལ་རྡོ་རྗེའི་རྒྱུ་ནི། རྡོ་རྗེ་མཁའ་འགྲོ་ལས། རྡོ་རྗེ་དག་ནི་ཐམས་ཅད་ཀྱང་། གསེར་ལ་སོགས་པ་ལེགས་པར་བརྡུངས། ཞེས་དང་། དེའི་འགྲེལ་པར་གསེར་དང་འཁར་བ་སོགས་དང་ཐ་མ་ཤིང་ལས་ཀྱང་བྱར་རུང་བར་བཤད་དེ། དྲིལ་བུའི་ཡུ་བ་ལའང་དེ་ལྟར་རོ། །ཚད་ནི། སམ་བྷུ་ཊི་ལས། ཆ་གསུམ་བཟུང་བའི་གནས་གསལ་ཤིང་། །ཞེས་དང་། མན་སྙེ་ལས་ཀྱང་དེ་བཞིན་དུ་བཤད། ཆ་གསུམ་ནི་པད་འདབ་དང་བཅས་པའི་དབུས་ཆ་གཅིག་དང་། རྭ་གཉིས་ཀྱི་སྲིད་ལ་ཆ་རེ་སྟེ་གསུམ་མོ། །ཆ་གསུམ་ཚད་མཉམ་པ་ནི་རྡོ་རྗེ་ཚད་མའི་སྦྱིའི་ལུས་ཚད་ཡིན་ཏེ་དཀྱིལ་འཁོར་ཀྱི་འོག་གཞིའི་རྡོ་རྗེ་སོགས་ནི་དེ་ལྟར་མིན་ནོ། སྲིད་ནི་སོར་བཞི་པ་ནས་ཉི་ཤུའི་བར་བཤད་ཀྱང་དེར་མ་ངེས་སོ། །རྡོ་རྗེ་ཆ་དགུར་བྱེད་པའི་ཚེ་དབུས་ཀྱི་ལྟེ་བ་པད་འདབ་ཀྱི་ཆ་གསུམ་དང་ཕྱོགས་ཀྱི་རྡོ་རྗེ་གཉིས་པོ་རེ་ལའང་ཆ་གསུམ་རེའོ། །ཆ་གསུམ་ཉེར་བདུན་དུ་བྱེད་པའི་ཚེ་ལྟེ་བ་དང་རྡོ་རྗེ་གཉིས་ཀྱི་དབུས་ཀྱི་བོམ་ཆ་དང་མཐའ་གཞོལ་བའི་ཆ་རེ་རེ་ལའང་གསུམ་རེར་ཕྱེ་བའོ། །རྡོ་རྗེ་མཁའ་འགྲོ་ལས། དབུས་ནི་ཟུར་བརྒྱད་དག་ཅུ་བྱ། །ཞེས་པའི་དོན་ཨ་བྷྱས་རྡོ་རྗེའི་ལྟེ་བ་ཟུར་བརྒྱད་ཀྱི་དབྱིབས་ཅན་དུ་བྱ་བར་བཤད་ལ། ཕྲེང་བ་དང་མན་སྙེར། དབུས་རྭ་གྲུ་བཞི་བ་དང་། བྷ་ཝ་བྷ་དྲས་ནི་དབུས་རྭ་ཟླུམ་པོ་དང་། ཕྱོགས་རྭ་རྣམས་ནི་ཅུང་ཟད་ཟུར་བཞི་བའི་རྣམ་པ་ཅན་དུ་བྱ་བར་བཤད་ཅིང་། དབུས་རྭ་ཅུང་ཟད་ཟུར་བརྒྱད་དུ་བྱེད་པའང་ཡོད་ལ། གཉིས་ཀས་རྭ་རྣམས་ཀྱི་འགོ་མཇུག་ཕྲ་ཞིང་དབུས་སྦོམ་པ་དང་། དབུས་རྭའི་ལྟེ་བར་སྐེ་རགས་སུམ་བཤིབས་བྱས་པའི་སྐེ་དཀྲིས་དབུས་མ་གཞན་གཉིས་ལས་གཉིས་འགྱུར་གྱིས་མཐོ་ཞིང་། ཕྱོགས་རྭ་རྣམས་ཀྱི་གཡས་གཡོན་དུ་འོད་ཟེར་གྱི་རྣམ་པ་ཅན་བྱ་བར་བཤད་དོ། །རྡོ་རྗེ་མཁའ་འགྲོར། ཀུན་གྱི་རྩེ་མོ་དབུ་མ་ཟླུམ་ཞེས་གསུངས་པའི་དོན། ཨ་བྷྱས་དབུས་རྭའི་འོག་གཞི་ཟླུམ་པོར་བྱ་བའི་དོན་དང་། ལྷ་ཝ་བྷ་དྲས་རྭ་དབུས་མ་ཉིད་ཟླུམ་པོའི་དོན་དུ་འཆད་པ། མཁས་གྲུབ་རྗེ་ནི། དབུས་རྭའི་ལུས་གྲུ་བཞི་ཡིན་པ་ལ་འོག་ངོས་ཟུར་རིམ་གྱི་མི་མངོན་པར་སོང་ནས་གདན་ལ་ཞུག་པའི་གོང་ཙམ་ནས་ཟླུམ་པོར་བྱ་བའི་དོན་དུ་འཆད་དོ། ཁ་ཅིག་ཕྱོགས་རྭ་རྣམས་དབུས་རྭ་ལ་ཕྱོགས་ནས་ཟུག་པའི་དོད་འབྱར་བ་ལྟ་བུར་མཛད་འདུག་ཀྱང་། དབུས་མ་ལ་ཟུག་པའི་ཚུལ་དུ་བྱས་པ་ནི་མང་ངོ་། །པད་མ་རྣམས་ནི་དབུས་མཐོ་ཞིང་རྩ་བ་རིམ་གྱིས་གཞོལ་བ་དང་རྩེ་མོ་ཅུང་ཟད་གཞོལ་བའོ། །སམ་བྷུ་ཊིར་རྭ་གནས་པའི་ཟླ་བའི་སྟེང་གི་མཐའ་ནས་མུ་ཁྱུད་ཀྱི་རྣམ་པའི་རི་མོས་བསྐོར་བར་བཤད་པ་ལྟར་བྱའི། ད་ལྟ་ཟླ་བའི་ཕྱི་མཐའ་ནས་མུ་ཏིག་གི་ཕྲེང་བ་ལྟ་བུ་གསུམ་གྱིས་བསྐོར་བར་བྱས་པ་ནི་དོན་མིན་པར་བཤད། རྡོ་རྗེ་མཁའ་འགྲོའི་འགྲེལ་པར། །དེ་ལ་རི་མོ་གཉིས་ཀྱིས་བསྐོར་བ་སྟེ་ཞེས་པའི་དོན་འཆད་པ་ན། མཁས་གྲུབ་རྗེས། ལྟེ་པའི་གཡས་གཡོན་དུ་རི་མོ་སྟེ་མུ་ཏིག་གི་ཕྲེང་བ་ལྟ་བུ་རེ་རེ་བ སྐོར་བར་གསུངས་ཤིང་། ཞེས་བཤད་པས་གསུམ་རེ་བྱས་པ་ནི་བརྟག་བྱའི་གནས་ཡིན་ལ། འོན་ཀྱང་མན་སྙེར་ལྟེ་བའི་མཐར་རིན་པོ་ཆེ་དང་པ་ཊ་དང་མུ་ཁྱུད་ཀྱིས་བསྐོར་བ་དང་ལྟེ་བར་ཧཱུྃ་ཡིག་འབྲི་བར་ཡང་བཤད་དོ། །སམ་བྷུ་ཊི་ལས། ཆུ་སྲིན་ཁ་ནས་བྱུང་བ་ཡི། །ཞེས་ཕྱོགས་རྭ་རྣམས་ཆུ་སྲིན་ཀྱི་ཁ་ནས་འཐོན་པར་བཤད་ཅིང་། ཆུ་སྲིན་གདོང་གི་དཔངས་ཚད་ནི། མན་སྙེར། ཆུ་སྲིན་གྱི་གདང་རྭའི་བཞི་ཆའོ་ཞེས་འབྱུང་བ་ལྟར་ཏེ། དོན་འཆད་ཚུལ་མི་འདྲ་བ་ཡོད་དོ། །རྡོ་རྗེ་སོར་བཅུ་བ་ལྟ་བུ་ལ་ཆུ་སྲིན་གྱི་སྣ་རྭ་རྣམས་ནས་ཀྱི་ཞེང་གི་ཕྱེད་ཙམ་ཕྱིར་འཕགས་ཤིང་གཞན་ལ་དེས་མཚོན་ནས་འཕགས་ཚུལ་མ་མ་འདྲ་བར་ཤེས་པར་བྱའོ། །དེས་ན་ཆུ་སྲིན་གྱིས་སྣ་ནི་རྭའི་ཕྱིར་འོང་བར་བྱའི་ནང་དུ་འོང་བར་བྱས་པ་ནི་དོན་མིན་ནོ། །རྡོ་རྗེ་མཁའ་འགྲོ་རྩ་འགྲེལ་ལས། རྡོ་རྗེ་ཆུ་ཞེང་མཉམ་པར་བཤད་པའི་དོན་ནི། རྭ་གཉིས་གང་རུང་གི་སུག་ཆེས་ནས་སྲད་བུས་བསྐོར་བ་བརྐྱངས་ན་ཕྱགས་རྭའམ་དབུས་རྭའི་རྩེ་དང་མཉམ་པ་དང་། ལྟེ་བའི་སྦོམ་ལ་སྐོར་བ་གཅིག་རྡོ་རྗེ་ཕྱེད་དང་སྐོར་བ་གཉིས་རྡོ་རྗེ་གཅིག་གི་སྲིད་དང་མཉམ་པའི་དོན་དུ་བཤད་དོ། །རྭ་རྣམས་ནི་རང་ཕྱོགས་ཀྱི་པད་འདབ་ཀྱི་ཐད་ཀྱི་ཟླ་བ་ནས་འཐོན་པ་ནི་འདྲའོ། །དྲག་པོའི་རྡོ་རྗེ་ཕྱོགས་མཚམས་ཀྱི་རྭ་རྣམས་དབུས་རྭ་རམ་རེག་པར་ཕྱིར་གྱེས་ཤིང་། རྭ་རྣམས་ཀྱང་རྩེ་མོ་ཤིན་དུ་རྣོ་བའོ། །རྭ་གསུམ་པ་ལ་ནི་ཕྱོགས་རྭ་གཉིས་ཙམ་དང་། རྩེ་གཅིག་པ་ལ་ནི་ཕྱོགས་རྭ་མེད་ཅིང་གཞན་རྣམས་སྔར་བཤད་པ་དང་འདྲ་ལ། རྭ་ཉི་ཤུ་བ་ནི་ཕྱོགས་རེར་རྭ་ལྔ་ལྔ་སྟེ། རྒྱན་གྱི་རྡོ་རྗེའི་བཤད་པ་སོགས་ནི་མ་བྲིས་སོ། །དེ་ནས་དྲིལ་བུའི་རྣམ་གཞག་བཤད་པར་བྱ་སྟེ། རྒྱུ་ནི། རྡོ་རྗེ་མཁའ་འགྲོ་ལས། ཀུན་ལ་འཁར་བའམ་ཡང་ན་ནི། །ལྕགས་གསུམ་ལས་ནི་དྲིལ་བུ་སྟེ། །ཞེས་གསུངས་པའི་ལྕགས་གསུམ་ནི་གསེར་དངུལ་ཟངས་གསུམ་ལ་སོགས་པའོ། །དེ་ཡང་སྟེང་གི་ཆའི་དབང་དུ་བྱས་ཤིང་། འོག་གི་ཆ་ནི་ལི ར་གྲགས་པའི་འཁར་བ་ལ་བྱའོ། །མཁའ་འགྲོ་རྒྱ་མཚོ་ལས། དྲིལ་བུ་རྟག་ཏུ་ཆ་གསུམ་ལྡན། །ཞེས་གསུངས་ཏེ། ཆ་གསུམ་ནི། བླ་མ་ཁ་ཅིག་ཁོག་པ་ཆ་གཅིག །སྟེང་གི་དབྱུགས་པ་ཆ་གཉིས་ཏེ་ཆ་གསུམ་ལ་བཞེད་ལ། མཁས་གྲུབ་རྗེ་ནི། བཟང་བོ་ཡོངས་གཟུང་ལས། །དྲིལ་བུ་ཀུན་དུ་ཆ་དྲུག་ལ། །ཞེས་སོགས་བཤད་པ་ལྟར། ཆ་དྲུག་ཏུ་བྱེད་པའི་ཚེ་ཁོག་པ་ཆ་བཞི་དང་། སྟེང་གི་དབྱུག་པ་ཆ་གཉིས་སུ་བྱས་ནས་ཆ་གཉིས་རེ་གཅིག་ཏུ་བསྡོམས་པས་ཆ་གསུམ་དུ་འགྱུར་བར་བཞེད་དེ། སྟེང་གི་རྡོ་རྗེ་ཕྱེད་པ་པད་མ་དང་བཅས་པ་ལ་ཆ་གཅིག་དང་ཤེས་རབ་མའི་ཞལ་བུམ་གདན་དང་བཅས་པ་ཆ་གཅིག་སྟེ་གཉིས་ཀྱིས་གཟུགས་མེད་ཀྱི་གནས་དང་། ཁོག་པའི་སྟེང་གི་ལྷ་མོ་བརྒྱད་ཀྱི་མཚན་མ་འགོད་པའི་གནས་ཀྱི་གཟུགས་དང་། དེའི་འོག་གི་ཆ་ནང་གི་དབྱུག་གུ་ནམ་མཁའ་དང་བཅས་པས་འདོད་ཁམས་མཚོན་པར་གསུངས། ཁོག་པའི་སྟེང་ནས་དྲ་བ་དྲ་ཕྱེད་ཀྱི་སྣེ་ཡན་ཆ་གཉིས་དང་། དེའི་འོག་ཆ་གཉིས་སུ་བྱས་པས་ཆ་བཞིའོ། །བཟང་པོ་ཡོངས་གཟུང་ལས། དྲིལ་བུ་དེ་ཡི་ནང་གི་མཁའ། །ཞེང་དང་མཆུ་རུ་མཉམ་པ་ཡིན། །ཞེས་མཆུ་ཞེང་མཉམ་པར་བཤད་པ་ནི། ཁོག་པའི་དཔངས་དང་ཁ་བ་ལང་གི་མཆུ་ལྟར་ཅུང་ཟད་ཞུམ་པའི་ནང་གི་རྒྱ་ཆེ་བའི་ཁྱོན་གཉིས་ཚད་མཉམ་པའི་དོན་ནོ། །མཆུ་ཞུམ་པ་དེའི་ཕྱི་མཐའི་སྟེང་དུ་མུ་ཏིག་གི་ཕྲེང་བ་གཉིས་ཀྱི་བར་དུ་རྡོ་རྗེའི་ཕྲེང་བ་གྱེན་བསྒྲེངས་དང་། དྲ་བ་དྲ་ཕྱེད་ཀྱི་སྟེང་དང་པད་འདབ་ཀྱི་རྩེའི་བར་དུ་རྡོ་རྗེའི་ཕྲེང་བ་མཆུར་ཉལ་བར་བྱ་སྟེ། འོན་ཀྱང་རྒྱུད་འགྲེལ་ལས་ཉལ་འགྲེང་གང་བྱེད་མི་གསལ་ལོ། །དྲིལ་བུའི་ཁོག་པའི་སྟེང་དུ་དབྱུག་པ་ཇི་ལྟར་འཚམ་པ་ལ་ཕྲེད་པ་གསུམ་དང་། དེའི་སྟེང་དུ་སྟེགས་བུ་གྲུ་བཞི་པ་ལ་གནས་པའི་བུམ་པ་དང་། དེའི་སྟེང་དུ་བུམ་པ་དང་ཚད་མཉམ་པའི་ཤེས་རབ་མའི་ཞལ་དང་། དེའི་སྟེང་དུ་པད་མ་སྐེ་རགས་ཟླ་བ་དང་བཅས་པའི་རྡོ་རྗེ་ཕྱེད་པའོ། །བུམ་པའི་དོད་དུ་བུག་པ་བྱས་པ་ནི་གང་ནས་ཀྱང་མ་བཤད་པས་མི་འཐད་དོ། ཁོག་པའི་ཕྱི་སྟེང་གི་པད་འདབ་བརྒྱད་ལ་ལྷ་མོ་བརྒྱད་ཀྱི་ས་བོན་འགོད་པར་བྱ་ཞིང་། ཕྲེང་བ་དང་མན་སྙེར་ལྷོ་ནས་བརྩམས་པའི་དབང་དུ་བྱས་ནས་ཕྱོགས་སུ་གཡས་སྐོར་དུ། སྦྱན་མ། མཱ་མ་ཀི །གོས་དཀར་མོ། །སྒྲོལ་མ་བཞིའི་ས་བོན་ཡཾ་མཾ་བཾ་ཏཾ་བཞི་དང་། མཚམས་སུ་ནོར་སྦྱིན་མ་དང་། ཙུནྡ་དང་། ཁྲོ་གཉེར་ཅན་དང་། ཕྲེང་མ་མའི་བོན་བཾ་ཙུཾ་བྷྲཾ་མཾ་བཞི་འགོད་པར་བཤད་ལ། སམ་བྷུ་ཊི་དང་གདན་བཞི་སོགས་ལས། ཤར་ནས་བརྩམས་ཏེ་ཕྱོགས་བཞིར་སྒྲོལ་མ་སོགས་བཞི་དང་། མཚམས་སུ་སྔར་ལྟར་ལྷ་མོ་བཞིའི་ས་བོན་འགོད་པར་བཤད་དེ། སྒྲོལ་མའི་ས་བོན་ཤར་དུ་འོང་བར་བྱས་ནས་ཤེས་རབ་མའི་ཞལ་ཡང་ཤར་ལ་བལྟ་བར་གསུངས་སོ། །སྒྲོལ་མའི་ས་བོན་ཤར་དུ་འགོད་པ། འདི་ནི་སྤྱན་མ་ཤར་དང་ཤར་ལྷོ་སྒྲོལ་མ་བྱང་དང་བྱང་ཤར་དུ་འོང་བ་དང་མི་འདྲ་ཞིང་མཚོན་དོན་ཁྱད་པར་ཅན་ཡོད་པའི་དབང་གིས་ཏེ་མི་འགལ་ལོ། །ས་བོན་བཀོད་པའི་པད་འདབ་ཀྱི་རྩེའི་ འོག་ཏུ་སྐེ་རགས་གཉིས་ཀྱི་བར་དུ་རྡོ་རྗེའི་ཕྲེང་བ་དང་། དེའི 
་འོག་དྲིལ་བུའི་ཁོག་པའི་ལོགས་སུ་དྲ་བ་དྲ་ཕྱེད་འཕྱང་བ་སྟེ། ཕྱོགས་མཚམས་ཀྱི་འདབ་མའི་ཐད་ཀར་དྲ་བ་རྫོགས་པ་རེ་དང་དེ་དག་གི་བར་བར་དུ་སྲོག་ཆགས་ཀྱི་ཁ་ནས་དྲ་ཕྱེད་སུམ་བཤིབས་འཕྱང་བའོ། །དྲ་བ་བརྒྱད་ཀྱི་ནང་དུ་ཤར་དུ་འཁོར་ལོ། །ལྷོར་རིན་ཆེན། ནུབ་ཏུ་པད་མ། བྱང་དུ་རལ་གྲི། ཤར་ལྷོར་སྤྱན། ལྷོ་ནུབ་ཏུ་རྡོ་རྗེ། ནུབ་བྱང་དུ་པད་མ། བྱང་ཤར་དུ་ཨུ ཏྤལ་འགོད་ཅིང་། དྲ་བ་དྲ་ཕྱེད་ལ་ཨུཏྤལ་སོགས་པ་ཇི་ལྟར་རིགས་པར་འཕྱང་བའོ། །དཔའ་བོའི་དྲིལ་བུ་ནི་གཞན་སྔར་ལྟར་ལ། སྲིད་དུ་སོར་དགུ་དང་ཁ་སོར་ལྔ་བ་སྟེ། ལྷ་མོའི་མཚན་མ་འགོད་པའི་གནས་དང་དྲ་བ་དྲ་ཕྱེད་སྤངས་པའོ། །འདི་ལ་ཕྲེང་པ་གཉིས་ཀྱང་དགོས་ཤིང་། ཕྲེང་བ་མེད་པའི་བྱི་བོ་ནི་དཔའ་བོའི་དྲིལ་བུ་མིན་ནོ། །གཞན་ཡང་རིགས་བཞིའི་དེ་བཞིན་གཤེགས་པའི་དྲིལ་བུ་ལ། རྣམ་སྣང་གི་དྲིལ་བུར་རྡོ་རྗེ་ཕྲེང་བ་གཉིས་ཀྱི་དོད་དུ་འཁོར་ལོའི་ཕྲེང་བ་གཉིས། རིན་འབྱུང་གི་དྲིལ་བུར་རིན་པོ་ཆེ། སྣང་མཐའི་དྲི་བུར་པད་མ། དོན་གྲུབ་ཀྱི་དྲིལ་བུ་ལ་རལ་གྲིའི་ཕྲེང་བ་གཉིས་རེ་བྱ་བ་སྟེ། གཞན་རྣམས་ནི་སྔར་རྡོ་རྗེ་སེམས་དཔའི་དྲིལ་བུ་ལ་བཤད་པ་ལྟར་རོ། །དྲིལ་བུ་ཐམས་ཅད་ཀྱི་ནང་གི་དབྱུགས་པ་ནི་རྒྱུ་ལྕགས་ལས་བྱས་ཤིང་ཟུར་བརྒྱད་ཀྱི་རྣམ་པ་ཅན་དབུས་ཅུང་ཟད་སྦོམ་པའོ། །རྣལ་འབྱོར་རྒྱུད་ལས་ནི། རྡོ་རྗེ་རྩེ་ལྔ་བས་མཚན་པའི་རིན་པོ་ཆེ་དང་པད་མའི་ཡུ་བ་ཅན་གྱི་དྲིལ་བུ་ཡང་བཤད་དོ། ༤ །དེ་ནས་དག་པ་སོགས་རྒྱས་པར་ནི་རྣལ་འབྱོར་རོལ་བའི་དགའ་སྟོན་སོགས་སུ་གསལ་བ་ལྟར་ཡིན་ལ། འདིར་དེ་དག་གི་དོན་བསྡུས་ཏེ་བཤད་ན། རྡོ་རྗེ་རྩེ་ལྔ་བའི་སྟེང་རྭའི་དབུས་མ་རྣམ་སྣང་དང་། ཕྱོགས་ཀྱི་རྭ་བཞི་མི་བསྐྱོད་པ་སོགས་རྣམ་པར་དག་པ་དང་མཚོན་ཞིང་། ལྷ་དེ་ལྔའི་ངོ་བོར་མོས་པ་དང་། སྟེང་གི་པད་མ་འདབ་མ་བརྒྱད་ནི་འཕགས་ལམ་ཡན་ལག་བརྒྱད་དག་ཅིང་། བྱམས་པ་ལ་སོགས་པ་སེམས་དཔའ་བརྒྱད་ཀྱི་ངོ་བོར་མོས་པ་དང་། རྡོ་རྗེའི་ལྟེ་བ་རྡོར་སེམས་དང་། འོག་གི་པད་འདབ་བརྒྱད་ནི་སྒོམ་བཞི་དང་། ཙུན་ད་སོགས་བཞིའི་ངོ་བོ་དང་། འོག་རྭ་ལྔ་ནི། དབུས་རྭ་ཡེ་ཤེས་ཀྱི་མཁའ་འགྲོ་མ། ཤར་རྭ་རྡོ་རྗེའི་མཁའ་འགྲོ་མ། བྱང་རྭ་དྲག་མོ། ནུབ་རྭ་རོ་ལངས་མ། ལྷོ་རྭ་གཏུམ་མོའི་ངོ་བོ་དང་དེ་དག་རྣམ་པར་དག་པའོ། །རྭ་དགུ་མར། མན་སྙེར་སྟེང་རྭའི་དབུས་རྭ་མི་བསྐྱོད་པ། ཤར་རྭ་སོགས་བཞི་ནི་རྣམ་སྣང་སོགས་དང་། མཚམ ས་རྭ་བཞི་ནི་སྤྱན་སོགས་བཞི་དང་། འོག་གི་དབུས་རྭ་རྡོར་སེམས་དང་ཕྱོགས་མཚམས་ཀྱི་རྭ་རྣམས་སེམས་དཔའ་བརྒྱད་ཀྱི་ངོ་བོར་མོས་བར་བཤད་ལ། བྷ་ཝ་བྷ་དྲས། སྟེང་རྭའི་དབུས་རྭ་རྣམ་སྣང་དང་ཕྱོགས་མཚམས་ཀྱི་རྭ་བརྒྱད་སེམས་དཔའ་བརྒྱད་དང་། འོག་རྭ་བརྒྱད་སྒོམ་བཞི་སོགས་གོང་དུ་བཤད་པ་ལྷ་མོ་བརྒྱད་ཀྱི་ངོ་བོར་བཤད་ནས་དབུས་རྭ་གང་དང་སྦྱོར་བར་མ་བཤད་ཀྱང་སྤྱན་མ་དང་སྦྱོར་བ་ཐོབ་བོ། །རྭ་རྣམས་ཆུ་སྲིན་གྱི་ཁ་ནས་འཐོན་པ་ནི་འགྲོ་བ་སྙིང་རྗེ་མི་གཏོང་བའི་དོན་དང་། རིན་པོ་ཆེའི་ཕྲེང་བ་རྣམས་ཀྱིས་གདུལ་བྱའི་རེ་བ་བསྐོང་བ་དང་། པདྨས་འཁོར་བའི་སྐྱོན་རྣམ་པར་དག་པ་དང་། དབུས་རྭའི་སྐེད་དཀྲིས་གསུམ་གྱིས་སྐུ་གསུང་ཐུགས་མཚོན་པ་སོགས་སོ། །རྡོ་རྗེ་གཞི་ལམ་འབྲས་གསུམ་གྱི་རྣམ་དག་མཚོན་ཚུལ་ནི། གཞི་ལ་ཆོས་རྣམས་ཀྱི་བདག་མེད་པའི་དེ་ཁོ་ན་ཉིད་མཚོན་ཞིང་། ལམ་དུས་ཀྱི་དེ་ཁོ་ན་ཉིད་རྟོགས་པའི་ཚོགས་སྦྱོར་མཐོང་སྒོམ་གྱི་ལམ་དང་། འབྲས་དུས་ཀྱི་རྒྱལ་བའི་ཐུགས་གཉིས་སུ་མེད་པའི་ཡེ་ཤེས་མཚོན་པའོ། །རྡོ་རྗེའི་རྭ་ལྔས་ནི་རྒྱལ་བའི་ཆོས་དབྱིངས་ཡེ་ཤེས་ལ་མེ་ལོང་ལྟ་བུའི་ཡེ་ཤེས་སོགས་བཞིར་ཕྱེ་བའི་ཡེ་ཤེས་ལྔ་མ་མཚོན་ཞིང་། རྭ་དགུ་མའི་ཕྱོགས་མཚམས་ཀྱི་རྭ་གཉིས་རེ་གཅིག་ཏུ་བྱས་ནས་སྔར་བཞིན་མཚོན་པ་འདྲའོ། །རྡོར་དྲིལ་གཉིས་ལ་རིམ་གཉིས་དང་སྦྱར་བའི་མཚོན་དོན་གཞན་མང་ཡང་མདོར་བ སྡུ་ན་ལམ་འབྲས་གཉིས་ཀྱི་ཐབས་ཀྱི་ཆ་ཐམས་ཅད་རྡོ་རྗེས་མཚོན་ཞིང་། ཤེས་རབ་ཀྱི་ཆ་རྣམས་དྲིལ་བུས་མཚོན་པའོ། །རྡོ་རྗེའི་སྐད་དོད་ནི་མི་ཕྱེད་པ་སྟེ་ངེས་དོན་གྱི་ཡེ་ཤེས་ཀྱི་རྡོ་རྗེ་དེ་མི་མཐུན་ཕྱོགས་ཀྱིས་མི་ཕྱེད་པའི་དོན་དང་། དྲིལ་བུའི་སྐད་དོད་གྟཎྜ་ཞེས་པ་སྟེ། ཆོས་ཀྱི་རྣམ་གྲངས་སྣ་ཚོགས་པ་ཐམས་ཅད་ཀྱང་དྲིལ་ན་བདག་མེད་པ་ལས་མ་འདས་པའི་དོན་དང་། དྲིལ་བུའི་ཆ་གསུམ་གྱིས་ཁམས་གསུམ་མཚོན་ཞིང་། དྲིལ་བུའི་སྒྲ་དང་ཤེས་རབ་མའི་ཞལ་གྱིས་ཁམས་གསུམ་རང་བཞིན་མེད་པར་རྟོགས་པའི་ཤེར་ཕྱིན་མཚོན་ནོ། །གཞན་ཡང་། རྣལ་འབྱོར་རྒྱུད་ལས། རྡོ་རྗེ་རྩེ་ལྔ་པ་ལ་དང་པོའི་རྡོ་རྗེ་ཞེས་བཤད་ཅིང་དེ་དག་རྡོ་རྗེ་སེམས་དཔའི་རྡོ་རྗེ་གཉིས་མིང་གི་རྣམ་གྲངས་ཡིན་ལ། དང་པོའི་དོན་ལ་གཉིས་ཏེ་སྟོན་པ་དང་པོར་འོག་མིན་དུ་སངས་རྒྱས་པའི་མངོན་བྱང་ལྔའི་ནང་མཚན་གྱི་རྡོ་རྗེ་དེ་རྡོ་རྗེ་རྩེ་ལྔ་པ་ཡིན་པའི་རྒྱུ་མཚན་གྱིས་དང་། གདོད་མ་ཉིད་ནས་རང་བཞིན་གྱིས་རྣམ་པར་དག་པའི་ཚུལ་གྱིས་ཐོག་མ་མེད་པའི་ཆོས་ཉིད་རྟོགས་པའི་དོན་དམ་བྱང་ཆུབ་ཀྱི་སེམས་ཡེ་ཤེས་ལྔའི་རང་བཞིན་ཅན་དེ་ལྷ་ཐམས་ཅད་འབྱིན་པ་པོ་ཡིན་པའི་ཕྱིར་དང་པོ་དང་། མི་ཕྱེད་པའི་ཕྱིར་རྡོ་རྗེ་ཞེས་བྱ་ལ། དེ་ཉིད་མཚོན་པའི་རྡོ་རྗེ་རྩེ་ལྔ་པ་ལའང་དང་པོའི་རྡོ་རྗེ་ཞེས་བྱའོ། །རྒྱུད་སྡེ་གོང་མར་རྡོ་རྗེ་བྱིན་བརླབ་དང་དམ་ཚིག་སྦྱིན་པའི་སྐབས་སུ་ཐོག་ཐ་མེད་པའི་སེམས་དཔའ་ནི། ཞེས་སོགས་རྐང་བ་བཞི་བརྗོད་ཅིང་དོན་དྲན་དགོས་པ་མང་བས། དོན་བསྡུ་ན་ཐོག་ཐ་མེད་པའི་སེམས་ཀྱི་རྒྱུན་རང་བཞིན་གྱིས་རྣམ་པར་དག་པ་དེ་ཉིད་ལ་དྲི་མ་རིམ་གྱིས་བསལ་ནས་རྣམ་པར་དག་པའི་ཡེ་ཤེས་ཆོས་ཀྱི་སྐུ་དེ་ནི་དོན་དམ་པའི་བྱང་ཆུབ་ཀྱི་སེམས་རྡོ་རྗེ་སེམས་དཔའི་རང་བཞིན་ཡིན་ལ། དེ་ནི་དགའ་བ་ཆེ་སྟེ་མཚན་མ་མེད་ཀྱི་ཆོས་ཀྱི་དགའ་བ་ཆེན་པོ་དང་ལྡན་པའོ། །ཀུན་ཏུ་བཟང་བོ་ནི་འདིར་དགེ་བའི་ཚོགས་ཏེ་དེ་ལས་བྱུང་བའོ། །ཀུན་གྱི་བདག་ཉིད་ནི་ཆོས་རྣམས་ཀྱི་རང་བཞིན་སྟོང་བ་ཉིད་དོ། །རྡོར་སེམས་ཀྱི་ཡུམ་རྡོ་རྗེ་སྙེ་མའི་བདག་པོ་ནི་རྡོ་རྗེ་སེམས་དཔའ་སྟེ། དེའི་བདག་པོ་ནི་ལྷ་སྐུ་ཕྱག་རྒྱ་ཆེན་པོའི་རྒྱུ་ཆོས་ཀྱི་དབྱིངས་དང་དེ་རྟོགས་པའི་ཡེ་ཤེས་ཏེ། དེ་ཉིད་ལ་བཅོམ་ལྡན་འདས་དཔལ་མཆོག་དང་པོའི་སྐྱེས་བུ་རྡོ་རྗེ་འཆང་ངོ་ཞེས་རྒྱུ་ལ་འབྲས་བུའི་མིང་གིས་བཏགས་པའོ། །ཡང་དྲིལ་བུ་བྱིན་བརླབ་སོགས་ཀྱི་ཚེ་སྲིད་པ་ངོ་བོ་ཉིད་ཀྱིས་དག་ཅེས་སོགས་རྐང་བ་བཞི་བརྗོད་ཅིང་དེའི་དོན་དྲན་དགོས་པས་དོན་ནི་སྲིད་པ་ནི་འཁོར་བར་སྐྱེ་པའི་རྒྱུན་ཏེ། དེ་ཉིད་ངོ་བོ་ཉིད་དམ་རང་བཞིན་གྱིས་ཡོངས་སུ་དག་པའོ། །དེ་ལྟར་ཡིན་ཀྱང་བདག་ཏུ་ལྟ་བ་རྣམས་ཀྱིས་བདག་ཏུ་སྒྲོ་བཏགས་པའི་ངོ་བོ་ཉིད་ཀྱིས་སྲིད་པ་རང་བཞིན་གྱིས་མེད་པ་དང་འགལ་བར་བྱས་པའི་ཚུལ་གྱིས་རང་བཞིན་གྱིས་གྲུབ་པར་བཟུང་ཞིང་། བྱང་ཆུབ་སེམས་དཔའ་མཆོག་རྣམས་ཀྱིས་ནི་སྲིད་པ་རང་བཞིན་གྱིས་རྣམ་པར་དག་པར་གཟིགས་ནས་སྲིད་པའི་མཆོག་སངས་རྒྱས་སུ་མཛད་པར་འགྱུར་རོ་ཞེས་པ་ནི་གོ་བདེ་བར་བྱས་པ་སྟེ་ཀུན་སྙིང་དང་ཤནྟི་བ་དང་ཨ་བྷྱས་རྣམས་ཀྱིས་བཤད་པ་གཞན་འདྲ་ཡང་། ཀུན་སྙིང་གིས་ངོ་བོ་ཉིད་ཀྱིས་སྲིད་བྲལ་བྱས་ཞེས་པ་ལ་འབྲུ་སྣོན་མཛད་ཁྱད་པར་རོ། །ཡང་འདི་དེ་སངས་རྒྱས་ཐམས་ཅད་ཀྱི། ཤེས་རབ་དབྱངས་ཀྱི་རྗེས་འགྲོར་བཤད། ཅེས་སོགས་ཤོ་ལོ་ཀ་གཅིག་འབྱུང་བའི་དོན་ནི། སངས་རྒྱས་ཐམས་ཅད་ཀྱི་བྱང་ཆུབ་ཆེན་པོ་སྟོང་ཉིད་རྟོགས་པའི་ཤེས་རབ་ནི་ངེས་དོན་གྱི་དྲིལ་བུ་ཡིན་ལ། དེ་སྟོན་པའི་གསུང་གིས་སྟོང་ཉིད། སྒྲ་དབྱངས་སྣ་ཚོགས་པས་གཞན་ལ་སྟོན་པར་མཛད་དོ། །དྲིལ་བུ་འདི་ཡང་དེ་དང་འདྲ་སྙེ་སྟོང་ཉིད་སྟོན་པའི་དབྱངས་ཀྱི་རྗེས་སུ་འགྲོ་བའི་ཤེས་རབ་དེ་ཉིད་མཚོན་པར་བཤད་དེ་འདི་ཁྱོད་ཀྱིས་བཅད་པར་བྱའོ་ཞེས་པའོ། །ཡང་ཐམས་ཅད་ནམ་མཁའི་མཚན་ཉིད་དེ། ཞེས་སོགས་འབྱུང་བའི་དོན་འདི་ལྟར། ནམ་མཁའ་ཐོགས་བཅས་ཀྱི་རེག་བྱ་བཀག་ཙམ་གྱི་མཚན་ཉིད་ཅན་དུ་འཇོག་པ་དེ་བཞིན་དུ། ཆོས་ཐམས་ཅད་ཀྱང་དགག་བྱས་བདེན་གྲུབ་བཀག་པའི་བདེན་སྟོང་ངོ་། །ནམ་མཁའ་ལ་ནི་ཐོག་བཅས་བཀག་ཙམ་ལས་འཇོག་བྱེད་ཀྱི་མཚན་ཉིད་ངོ་བོས་གྲུབ་པ་གཞན་མེད་ལ། ཐོགས་བཅས་བཀག་པའི་སྟོང་ཆ་མཐོང་བས་ནམ་མཁའ་མཐོང་བ་འཇོག་པ་དེ་བཞིན་དུ། ཆོས་ཐམས་ཅད་ཀྱི་སྟེང་དུ་བདེན་གྲུབ་བཀག་ཙམ་གྱི་མེད་དགག་མཐོང་བས་སྟོང་ཉིད་མཐོང་བར་འཇོག་ཅིང་། དེའི་ཚེ་ཡུལ་དང་ཡུལ་ཅན་གྱི་ཡེ་ཤེས་གཉིས་ནམ་མཁའ་ལྟར་མཉམ་པར་སྦྱོར་བའི་ཚུལ་གྱིས་ཆོས་ཐམས་ཅད་ཀྱི་མཆོག་ཆོས་ཉིད་བདེན་སྟོང་མཉམ་པ་ཉིད་གསལ་བ་སྟེ་རྟོགས་པའི་ཡེ་ཤེས་བསྒོམ་པར་བྱའོ་ཞེས་པའོ། །འདི་དག་གིས་ཀྱང་དྲིལ་བུའི་མཚན་དོན་དང་རྣམ་དག་བཤད་དོ། །འོ་ན་དྲང་ངེས་ཀྱི་རྡོར་དྲིལ་གཉིས་ཀྱི་ནང་ནས་རྡོར་དྲིལ་མཚན་ཉིད་པ་གང་དུ་འཇོག་ཅེ་ན། འདི་ལ་བཞེད་པ་མི་མཐུན་པ་སྣང་སྟེ། ཁ་ཅིག་ངེས་དོན་གྱི་རྡོ་རྗེ་ནི་རྡོ་རྗེ་དངོས་ཡིན་གྱི། དྲང་དོན་གྱི་རྡོ་རྗེ་ལ་རྡོ་རྗེ་ཞེས་གཏགས་པ་ཙམ་ཡིན་པའི་ཕྱིར་རྡོ་རྗེ་དངོས་མིན་ནོ་ཞེས་གསུངས་ལ། ཁ་ཅིག་ནི་སྔ་མ་ལས་ལྡོོག་སྟེ་དྲང་དོན་གྱི་རྡོ་རྗེ་དེ་རྡོ་རྗེ་མཚན་ཉིད་པར་སྨྲའོ། ཁོ་བོ་ནི་དྲང་ངེས་ཀྱི་མདོ་སྡེ་གཉིས་ཀ་མདོ་སྡེ་ཡིན་པ་ལྟར་དྲང་ངེས་ཀྱི་རྡོ་རྗེ་གཉིས་ཀའང་རྡོ་རྗེ་ཡིན་ཞེས་བྱས་ཀྱང་མི་འགལ་ལམ་སྙམ་སྟེ། འོན་ཀྱང་ངེས་དོན་གྱི་རྡོ་རྗེ་ལ་རྡོ་རྗེའི་སྒྲ་བཤད་འཇུག་གཉིས་ཀ་ཡོད་ལ། དྲང་དོན་གྱི་རྡོ་རྗེ་ལ་རྡོ་རྗེའི་སྒྲ་བཤད་དུ་མེད་ཀྱང་འཇུག་ཏུ་རུང་བར་མངོན་ཏེ། དཔེར་ན་གཟུགས་མེད་ཁམས་པའི་ཉན་ཐོས་ཀྱི་སྒྲ་བཤད་དུ་མེད་ཀྱང་འཇུག་ཏུ་རུང་བ་བཞིན་ནོ། །གལ་ཏེ་དྲང་དོན་གྱི་རྡོ་རྗེ་ནི་མཚོན་བྱེད་ཀྱི་དཔེ་ཡིན་པས་རྡོ་རྗེ་དངོས་གནས་པར་མི་རིགས་སོ་སྙམ་ན། དེ་ཡང་མི་འགལ་ཏེ། དཔེར་ན་མཚོན་བྱེད་དཔེའི་དགེ་འདུན་ཉི་ཤུ་པོ་ནི་དགེ་འདུན་དེ་དང་དེ་དངོས་ཡིན་པར་བཞག་ཏུ་རུང་བ་བཞིན་ནོ། །དེར་མ་ཟད་དྲིལ་བུ་ལའང་དྲང་ངེས་གཉིས་སུ་བྱར་རུང་བས། དྲང་དོན་གྱི་རྡོ་རྗེ་རྡོ་རྗེ་མ་ཡིན་ན། དྲང་དོན་གྱི་དྲིལ་བུའང་དྲིལ་བུ་མ་ཡིན་པར་འགྱུར་བར་ཀུན་ནས་མཚུངས་ཏེ་དཔྱད་པར་བྱའོ། །དེ་ལྟར་རྡོར་དྲིལ་གྱི་མཚོན་དོན་ལེགས་པར་ཤེས་དགོས་ཏེ། མི་ཤེས་བཞིན་དྲིལ་བུ་དཀྲོལ་བ་ནི། སམ་བྷུ་ཊི་ལས། དེ་ཉིད་མེད་པའི་རྣལ་འབྱོར་བ། །གླིང་བོ་དྲིལ་བུ་དཀྲོལ་བ་བཞིན། །རྣལ་འབྱོར་དེ་ཉིད་དམན་པ་ཡི། །རང་གི་དངོས་གྲུབ་རིང་དུ་བརྟག །ཅེས་དང་། གདན་བཞིའི་འགྲེལ་པ་སོགས་ལས་ཀྱང་སྔ་མ་ལྟར་གསུངས་པ་བཞིན་ཉེས་དམིགས་སུ་འགྱུར་རོ། །རྡོར་དྲིལ་བྱིན་བརླབ་ནི་རྒྱུད་སྡེ་གོང་མ་གཉིས་གང་རུང་ནས་འབྱུང་བ་ལྟར་རྒྱས་བསྡུས་སྐབས་ཐོབ་ཀྱིས་བྱ་ལ། བསྐྱེད་ཆོག་ལ་བྱས་པའི་རྡོ་རྗེ་ལ་འགོ་མཇུག་གཞག་དཀའ་ཡང་། རྡོར་དྲིལ་གྱི་དག་པ་དང་མཚོན་དོན་གྱི་སྐབས་ནས་བཤད་པ་བཞིན་བསྐྱེད་ཆོག་བྱས་པ་ལ་ནི་ལྷ་ཕོ་མོའི་ཁྱད་པར་གྱིས་འགོ་མཇུག་ཡོད་པས་མི་ནོར་བའི་མཚན་མ་མཛད་པ་ལྟར་ལེགས་སོ། །དེ་ནས་ཅང་ཏེའུའི་རྣམ་གཞག་བསྡུ་ན། རྒྱུ་ནི་རྡོ་རྗེ་ཅན་གྱི་ཤིང་དང་། ཙན་དན་བ་ལང་མགོའི་རྩ་བ་དང་། ཙན་དན་དམར་པོ་གསུམ་མཆོག་ཡིན་ལ། མ་རྙེད་ན་འདོད་པའི་ཤིང་གང་ཡང་རུང་བའོ། །ཚད་ནི་རབ་ཚད་མཆུར་སོར་བཅུ་གཉིས་དང་ཁའི་ཐད་ཀར་སོར་དྲུག །འབྲིང་དཔངས་སུ་སོར་བཅུ་དང་ཁའི་ཞེང་སོར་ལྔ། ཐ་ཚད་དཔངས་སོར་ལྔ་དང་ཁ་དེའི་ཕྱེད་དོ། །གཞན་ཡང་སྐྱེས་པ་ལོ་བཅུ་དྲུག་པ་དང་བུད་མེད་ལོ་བཅུ་གཉིས་པའི་ཐོད་པ་ལས་བྱས་པའི་ཅང་ཏེའུ་འང་ཡོད་ལ། དེའི་ཁ་གཡོགས་ལྤགས་པའི་ནང་དུ་རང་གི་ལྷ་ཡབ་ཡུམ་གྱི་སྔགས་འབྲི་བ་དང་། གཡོགས་ནི་སྤྲེའུའི་པགས་པ་ལེགས་པར་བཤད་དོ། །ཅང་ཏེའུ ས་ནི་བདེ་སྟོང་གི་ཡེ་ཤེས་དང་དེའི་སྒྲ་སྒྲོགས་པར་མཚོན་ཞིང་། མཁའ་འགྲོ་དབང་དུ་སྡུད་པ་དང་ལྷ་མཆོད་དེ་མཉེས་པར་བྱེད་པ་སོགས་མང་ངོ་། །ཡང་བགྲང་ཕྲེང་གི་རྒྱུ་ནི་ས་མ་བྷུ་ཊི་ལས། ཤེལ་དང་ཉ་ཕྱིས་མུ་ཏིག་དང་། ཁམས་ནི་དཀར་བོ་ལ་སོགས་གཞན། །ཞི་བའི་ལས་ལ་ཁྱད་པར་དུ། །ཕྲེང་བ་ཡི་ནི་མཚན་ཉིད་དེ། །གསེར་དང་དངུལ་དང་ཟངས་མ་དང་། །པདྨའི་ས་བོན་ཁྱད་པར་དུ། །རྒྱས་པ་ལ་ནི་ཕྲེང་བ་ཉིད། །རྣམ་པར་མཁན་པས་བགྲང་བར་བྱ། །གུར་གུམ་ལ་སོགས་དྲི་སྦོས་ཀྱིས། །དྲི་ནི་ཐམས་ཅད་བྱང་བར་དུ། །བསྒྲུབས་ཤིང་དྲིལ་བུ་བྱས་ནས་ནི། །དབང་ལ་ཡོངས་སུ་རབ་ཏུ་གྲགས། །རྒྱུ་རཀྴ་དང་ལུད་ཐང་དང་། །དེ་བཞིན་སྐྱེས་པའི་རུས་པ་ཉིད། །དྲག་པོའི་ལས་ལ་སྦྱར་བར་བྱ། །མངོན་སྤྱོད་ལ་ནི་ཡོངས་སུ་གྲགས། །ཞི་རྒྱས་དབང་དང་མངོན་སྤྱོད་ལ། །བོ་དི་ཙེ་ནི་ལས་ཀུན་བྱེད། །ཅེས་གསུངས་བ་ལྟར་རོ། ཁམས་དཀར་བོ་ནི་རུས་པ་དང་། རྡོའི་བྱད་པར་དཀར་བོའོ། །ཧེ་རུ་ཀ་མངོན་འབྱུང་ལས་ཕྲེང་བའི་རྒྱུ་ལ་མི་འདྲ་བ་མང་དུ་བཤད་ཀྱང་མ་བྲིས་ལ་རིལ་བུ་བྱས་ནས་ནི་ཞེས་ཕྲེང་རྡོག་རྣམས་རྒྱུ་དེ་དག་ལ་རིལ་བུར་བྱ་བའམ། རིལ་བུར་གྲུབ་ཟིན་ཡིན་ན་དྲི་བཟང་དེ་དག་བྱུགས་པར་གསུངས་སོ། །ཕྲེང་བའི་གྲངས་ནི། ཁ་སྦྱོར་ལས། སྔགས་ཀྱི་སྒྲུབ་པ་ལྔ་བཅུ་སྟེ། དབང་ལ་དེ་ཡི་ཕྱེད་ནོ། །བརྒྱ་ཕྲག་གཅིག་གི་ཞི་བ་ལ། །དེ་བ ཞིན་རྒྱས་ལ་བརྒྱ་ལྷག་བརྒྱད། །མངོན་སྦྱོད་ལ་ནི་དྲུག་ཅུ་ཉིད། །ཞེས་གསུངས་པ་ལྟར་རོ། །གང་ལས་རྒྱུ་བའི་སྲད་བུ་དང་བྱིན་བརླབ་བྱ་ཚུལ་སོགས་ནི། ཁ་སྦྱོར་དད་གདན་བཞི་དང་སྡོམ་འབྱུང་དང་སྔགས་རིམ་སོགས་ལས་བཤད་པ་བཞིན་ཏེ་ཇི་ལྟར་རིགས་པར་བྱའོ། །ཡང་ཁ་ཊྭཱཾ་ཀའི་ཡུ་བ་ནི་རྒྱུ་ཤིང་སོགས་ལས་བྱས་ཤིང་དམར་སྣེ་རྩེ་གཅིག་པ་དང་། དབྱུག་པའི་སྟེང་དུ་བུམ་པ་སེར་པོ། །དེའི་སྟེང་དུ་སྣ་ཚོགས་རྡོ་རྗེ། དེའི་སྟེང་དུ་མི་མགོ་སུམ་བརྩེགས་ཏེ། ཡས་རིམ་ནས་སྟེང་དུ་སྐམ་པོ་དཀར་བོ། །
དེའི་འོག་ཏུ ་རྙིད་པ་དམར་པོ། ། དེའི་འོག་ཏུ ་རློན་པ་ནག་པོ། དེ་གསུམ་གྱི་སྟེང་དུ་རྡོ་རྗེ་ནག་པོ་རྩེ་ལྔ་ཡོངས་རྫོགས་གྱེན་བགྲེང་ངོ་། །སྔ་མ་ཁ་ཅིག་རྡོ་རྗེ་ཕྱེད་པར་བཞེད་པའང་ཡོད་ལ། མར་སྣ་རྡོ་རྗེ་ཕྱེད་པར་འདོད་པ་ནི་མངོན་བརྗོད་དང་འགལ་ལོ། །སྣ་ཚོགས་རྡོ་རྗེ་ལས་དྲིལ་བུ་འཕྱང་བར་བྱས་པ་ནི་གང་ནས་མ་བཤད་པས། དྲིལ་ཆུང་སོགས་ནི་བུམ་པ་ལས་འཕྱང་བར་བྱའོ། །ཡུ་བའི་རིང་ཐུང་ལ། རིང་ཚད་རང་གི་ལུས་ཚད་དང་། ཐུང་ཚད་སོར་བཅུ་གཉིས་སོ་ཞེས་ཁ་ཅིག་འདོད་ཀྱང་། ཁྲུ་གང་སོགས་ཇི་ལྟར་རིགས་པར་བྱར་རུང་ངོ་། ཁ་ཊྭཱཾ་ཀས་བདེ་བ་ཆེན་པོའི་ལྷ་སྐུ་དང་། མགོ་གསུམ་གྱིས་སྐུ་གསུང་ཐུགས་མཚོན་པ་སོགས་སོ། །ཐོད་པའི་རྒྱུ་ནི། སྡོམ་འབྱུང་ལས། འཇིམ་པའི་རང་བཞིན་རུས་སྦལ་སྐྱེས། །དེ་བཞིན་འཁར་བ་ཟངས་ལྕགས་སྐྱེས། །གསེར་སྐྱེས་དངུལ་ལས་སྐྱེས་པ་ཡང་། །དུང་སྐྱེས་དེ་བཞིན་ཉ་ཕྱིས་ཉིད། །ན་རི་ཀེ་ལ་གཙོ་བོ་མཆོག །།དེ་བཞིན་གཞན་ལས་གང་བྱུང་བ། །རྭ་ལས་བྱུང་དང་ཤིང་སྣོད་སོགས། །གཞན་ཡང་རྡོ་སྣོད་ཁྱད་པར་རོ། །ཞེས་གསུངས་པ་ལྟར། ཐོད་པ་དངོས་ཡོད་ན་དེས་གྲུབ་ཅིང་། མེད་ན་རྒྱུ་དེ་རྣམས་ལས་ཐོད་པའི་དབྱིབས་བྱས་ནས་ནང་མཆོད་སོགས་ཀྱི་སྣོད་དུ་བྱེད་པའོ། །ཐོད་པ་བརྟག་ཐབས་ལ་བཤད་ཚུལ་མང་ཡང་། མཚོན་ཙམ་ཁ་ལྟ་ཕྱོགས་ནི། སྡོམ་འབྱུང་ལས། ལྷོ་རུ་ཁ་བལྟས་བྲམ་ཟེ་འཇོམས། །བདེན་བྲལ་དུ་འགྱེལ་བ་ལང་འཇོམས། །ཆུ་རུ་བལྟས་པས་སྔགས་པ་དམན། །རླུང་བལྟས་སྔགས་ནི་འཇིགས་པར་བྱེད། །བྱང་དུ་ཁ་བལྟས་དབང་ཕྱུག་འགྱུར། །དབང་ལྡན་སྔགས་ཀྱི་དངོས་གྲུབ་སྟེ། །མ་ཉམས་པ་ཡི་བརྟུལ་ཞུགས་རྒྱུན། །མེ་དང་ལྡན་པ་ཉེ་བར་འཕྲོག །དེ་བཞིན་འོག་བལྟས་ཆོམ་རྐུན་ནོ། །སྟེང་དུ་ཁ་བལྟས་བུད་མེད་འཇོམས། །ལོགས་སུ་འགྱེལ་བ་གཏུམ་པོ་སྟེ། །སྣོད་ཀྱི་མཚན་ཉིད་རྣམ་ཤེས་བྱ། །ཞེས་གསུངས་ལ། དུམ་བུ་གཅིག་པ་སོགས་ཀྱི་བཟང་ངན་ནི། དེ་ཉིད་ལས། དུམ་བུ་གཅིག་པས་གནས་སུ་འགྱུར། །དཀྱིལ་འཁོར་དབང་ཕྱུག་དུམ་བུ་གཉིས། །དུམ་གསུམ་བསྒྲུབ་པའི་དངོས་གྲུབ་སྟེ། །སྔགས་ཀྱི་དངོས་གྲུབ་ཆ་བཞི་བ། །ལྔ་བ་ལ་ནི་ཞི་དང་བྱས། །དུམ་དྲུག་སློང་མོ་པར་ཞེས་བྱ། །དབང་བྱེད་དུམ་བུ་བདུན་པ་སྟེ། །དུམ་བརྒྱད་པ་ཡང་དེ་བཞིན་སྤངས། །ཞེས་ཐོད་པ་དུམ་པ་བདུན་པ་ཡན་བཟང་བའི་ཕྱོགས་དང་། བརྒྱད་པས་མཚོན་ནས་དགུ་བ་སོགས་ངན་པའི་ཕྱོགས་སུ་གསུངས་པ་ལྟར་རོ། ཁ་དོག་ནི། དུང་དང་ཀུན་ཟླ་མདོག་མཚུངས། །སྣུམ་ཞིང་མཛེས་པར་དགེ་བར་བལྟ། །ཞེས་སོགས་ཀྱིས་འཆད་ཅིང་། མདོར་ན་ཁ་ལྟ་ཕྱོགས་དང་དུམ་བུ་དར་ཁ་དོག་དང་དབྱིབས་དང་བུ་ག་སོགས་ཀྱི་བརྟག་ཐབས་བཤད་པ་རྣམས་དང་། རྒྱན་དང་བགོ་བའི་རྣམ་གཞག་རྒྱས་པར་བཤད་པ་འདི་རྣམས་མང་དུ་དོགས་པས་མ་བྲིས་སྟེ། རྣལ་འབྱོར་རོལ་བའི་དགའ་སྟོན་ཉིད་ལས་ཤེས་པར་བྱའོ། །དེ་ནས་དགང་བླུགས་ཀྱི་རྣམ་གཞག་ནི། རྗེའི་སྦྱིན་སྲེག་ཆེན་མོར་གསུངས་པ་བཞིན་བརྗོད་ན། དགང་བླུགས་ཀྱི་རྒྱུ་ནི་གསེར་དངུལ་ཟངས་ལྕགས་ར་གན་སོགས་ལས་བྱ་བར་བཤད་པ་ལྟར་རོ། །དགང་གཟར་གྱི་ལུ་བའི་སྲིད་ནི། ཚད་ལྡན་གྱི་རྩ་ཐེབ་སོར་ཉེར་བཞི་ལ་ཡུ་བའི་འོག་ཏུ་རིན་སོར་གསུམ་པ་དང་ དེའི་འོག་ཏུ ་སོར་གསུམ་པ་རྡོ་རྗེ་དང་དེ་གཉིས་ཡུ་བ་བཅས་པ་ལ་སོར་སུམ་ཅུ་སྟེ། བླུགས་གཟར་གྱི་ཡུ་བའང་དེ་ལྟར་རོ། །དགང་གཟར་གྱི་ཡུ་བའི་སྦོམ་ཚད་ནི། རྡོ་རྗེ་དང་བཅས་པའི་ལག་པས་བདེ་བར་བཟུང་དུ་བྱང་བ་ཡིན་ལ། བླུགས་གཟར་གྱི་སྦོམ་ནི། སྔ་མའི་སྦོམ་ཚད་ལས་ཕྱེད་ཀྱིས་ཕྲ་བའོ། །དགང་གཟར་གྱི་ཡུ་བའི་སྟེང་དུ་ནི། དབྱིབས་གྲུ་བཞི་བ། རྒྱར་སོར་བཞི་བའི་དབུས་སུ་ཟབ་སོར་གཉིས་ཀྱིས་དམའ་བ་ལ་རྡོ་རྗེ་རྩེ་ལྔ་བ་སོར་གཉིས་པས་མཚན་པ་དང་གྲུ་བཞི་བའི་སྟེང་གི་རྒྱར་སོར་ཕྱེད་ལ་རྡོ་རྗེའི་འཕྲེང་བས་བསྐོར་ཞིང་། གྲུ་བཞི་བའི་སྟེང་དུ་པད་འདབ་ཀྱི་དབྱིབས་ཅན་སོར་བཞི་བ། ཟབས་སུ་མཐེའུ་ཆུང་གི་ཚད་ལ་སོར་བཞི་བའི་རྡོ་རྗེས་མཚན་པ། སྲིད་དུ་བཅུད་འཛག་པའི་བུ་ག་མཐེ་བོང་ངམ་མཐེའུ་ཆུང་གི་ཚད་ཙམ་གྱི་སྟེང་དུ་རྡོ་རྗེ་རྩེ་གསུམ་པ་སོར་བཞི་བའོ། །ཞེས་པ་ནི་ལུགས་གཅིག་སྟེ། དེ་དང་ཅུང་མི་འདྲ་བ་ཞིག་ཡོད་པའི་ཚུལ་འཆད་པ་ནི། ཡང་ན་ཡུ་བའི་སྟེང་གི་ཆར་པད་འདབ་གྱི་རྣམ་པ་ཅན་སྲིད་དུ་སོར་བརྒྱད་པ་ཇི་ལྟར་མཛེས་པ་ལ། རྒྱར་གྲུ་བཞི་སོར་བཞི་པ་ཟབས་སུ་སོར་གཉིས་ཀྱིས་དམའ་བའི་དབུས་སུ་རྡོ་རྗེ་སོར་བཞི་བ་རྩེ་གསུམ་པའམ་རྩེ་ལྔ་པས་མཚན་པ་སྟེ། ཡུ་བའི་སྐོར་དང་བཅུད་ཀྱི་བུ་ག་སྔར་དང་འདྲའོ། །བླུགས་གཟར་གྱི་ཡུ་བའི་སྟེང་དུ་ཁ་པད་འདབ་ལྟ་བུ་རྒྱར་སོར་གཉིས་པ། ཟབས་སུ་སོར་གཅིག་པ། དབུས་སུ་རྡོ་རྗེ་ལྔ་པས་མཚན་པའོ། །ཡང་ཕྱེད་བཅས་བཞི་བརྒྱ་པ་ལས། སོར་བཞིའི་མཐར་ནི་རྡོ་རྗེ་སྟེ། །བར་དུ་པད་མའི་འདབ་མའི་དབྱིབས། །ཞེས་གསུངས་པའི་དོན་འཆད་པ་ན་ཤན་ཏི་བས། མཐར་ཞེས་པ་ཐམས་ཅད་ཀྱི་སྟེེང་དུ་རྡོ་རྗེ་རྩེ་གསུམ་པ་ཡོད་ལ། བར་དུ་ཞེས་པ་རྩེ་གསུམ་པ་དང་ཟུར་བཞིའི་བར་དུ་པད་འདབ་ཀྱི་དབྱིབས་འདྲ་བ་ཡོད་པ་ལ་བཤད་པ་ལས། འོག་གི་སོར་བཞི་པ་གྲུ་བཞི་བའི་སྟེང་གི་མཐའ་ནས་གྱེན་ཏུ་མཐེའི་ཆུང་གི་ཚད་སོང་བའི་སྟེང་དུ་རྡོ་རྗེ་རྩེ་གསུམ་པ་ཕྱོགས་བཞིར་བྱ་ཞིང་། དེ་དང་ནང་གི་ཟུར་འོག་མ་བཞིའི་བར་དུ་པད་འདབ་ཀྱི་རྣམ་པ་བྱའོ། །སོར་ཕྱེད་པ་ལ་བསྐོར་བའི་རྡོར་ཕྲེང་ནི་སོར་བཞི་བའི་དབུས་སུ་རྒྱར་སོར་གསུམ་པ་དང་དཔངས་སུ་སོར་གཉིས་པའི་བུག་པ་ཡོད་པའི་སྟེང་ངོས་ནས་ཕྱོགས་སུ་སོར་ཕྱེད་ཡོད་པ་བྱའོ། །ཞེས་གསུངས་ཏེ་ཅུང་ཟད་མི་འདྲ་བ་ཡོད་པས་ཁྱད་པར་ཕྱེད་པར་བྱའོ། །དགང་བླུགས་ཀྱི་སྐོར་འདི་དག་ཚིག་ཟུར་རེ་མ་གཏོགས་རྗེ་ཉིད་ཀྱི་གསུང་ཇི་ལྟ་བ་བཞིན་ཏེ། གོ་མི་བདེ་བའི་དབང་གིས་དགོངས་པ་ལེན་ཚུལ་ལ་ཁྱད་པར་བྱུང་སྟེ་དགང་བླུགས་ལ་ཅུང་ཟད་མི་འདྲ་བ་མཐོང་ངོ་། །ཡང་གྲུབ་ན། ཞི་སོགས་ཀྱི་དབྱེ་བས་དགང་གཟར་གྱི་ལྟེ་བར་ཟླུམ་པོ་གྲུ་བཞི་ཟླ་གམ་གྲུ་གསུམ་དབྱིབས་སོ་སོར་བྱས་པ་ལ། འཁོར་ལོ་རིན་པོ་ཆེ་པདྨ་རྡོ་རྗེ་སོ་སོའི་མཚན་མ་བྱ་ཞིང་། མ་གྲུབ་ན་མ་བྱས་ཀྱང་མི་འགལ་བར་བཤད་པ་ལྟར་ཡང་ཤེས་དགོས་སོ། །དེ་ལྟར་བླ་མ་ཡབ་སྲས་རྣམ་གཉིས་ཀྱི། །དགོངས་དོན་སྙིང་བོ་མདོར་བསྡུས་བཀོད་པའི་དགེས། །འདི་དང་ཕྱི་མ་ཀུན་དུ་ཡབ་སྲས་ཀྱིས། །འབྲལ་མེད་བུ་ལྟར་རྗེས་སུ་འཛིན་གྱུར་ཅིག །ཅེས་པ་འདི་ཡང་ཤཱཀྱའི་བཙུན་པ་བཤད་སྒྲུབ་མིང་ཅན་གྱིས་ཅོ་ནེའི་དགོན་ཉིད་དུ་སྦྱར་བའོ། །མདྒ་ལཾ།། །།