དགེ་བསྙེན་རབ་བྱུང་དགེ་ཚུལ་བསྙེན་རྫོགས་བཅས་བསྒྲུབ་ཚུལ་འཁྱེར་བདེ་མེ་ཏོག་ཕྲེང་མཛེས།

དགེ་བསྙེན་རབ་བྱུང་དགེ་ཚུལ་བསྙེན་རྫོགས་བཅས་བསྒྲུབ་ཚུལ་འཁྱེར་བདེ་མེ་ཏོག་ཕྲེང་མཛེས་བཞུགས།

ན་མོ་གུ་རུ་མཉྫུ་གྷོ་ཥཱ་ཡ། དང་པོར་ཐུགས་བ སྐྱེད་བར་དུ་ཚོགས་གཉིས་བསགས། །ཐ་མར་མངོན་སངས་རྒྱས་ནས་གདུལ་བྱ་ལ། །འཁོར་ལོ་རྣམ་གསུམ་བསྐོར་ནས་དོན་མཛད་པ། །ཟླ་མེད་སྟོན་པ་དེ་ལ་གུས་ཕྱག་འཚལ། །མགོན་དེས་གདུལ་བྱའི་དོན་དུ་བསླབ་གསུམ་དང་། །ཁྱད་པར་ཚུལ་ཁྲིམས་བསླབ་པ་མང་གསུངས་ལས། །རབ་བྱུང་བསྙེན་པར་རྫོགས་པའི་སྡོམ་པ་མཆོག །ཇི་ལྟར་ལེན་པའི་ཆོ་ག་འཁྱེར་བདེ་བརྗོད། །༈ དེ་ཡང་རབ་བྱུང་ནས་བསྙེན་རྫོགས་པར་གྱི་སྡོམ་པ་ཇི་ལྟར་ལེན་པའི་ཆོ་ག་རྒྱས་པ་ནི་བུ་སྟོན་རིན་པོ་ཆེ་དང་། རྒྱལ་དབང་ལྔ་བའི་ལས་ཆོག་ལས་འབྱུང་བ་ལྟར་ཡིན་པས་ལེགས་ཀྱང་། གཞན་འབོག་ཆོག་ཅུང་ཟད་བསྡུས་པ་ཡང་རེ་གཉིས་སྣང་སྟེ་དེ་དག་རྣམས་སུ་མཁན་སློབ་གཉིས་སོ་སོར་བྱེད་པ་དང་། གཅིག་གིས་ཀྱང་འཐུས་པའི་བཤད་པ་གཉིས་ཀ་འབྱུང་བའི་དབང་གིས་བློ་དམན་འགའ་ཞིག་གིས་དབྱེ་བ་ལེགས་པོར་མ་ཕྱེད་པའི་ཕྱག་ལེན་འཁྲུལ་བཅས་བྱེད་པར་མཐོང་ངོ་། །སྤྱིར་འཕགས་ཡུལ་ན་མཁན་སློབ་སོ་སོར་མཛད་པའི་སྲོལ་དར་ཡང་། བོད་ཀྱི་ཕྱོགས་འདིར་སྔོན་དུས་སུ་སོ་སོར་མཛད་པ་མང་ཞིང་ད་ལྟ་ནི་མཁན་སློབ་གཉིས་གཅིག་གིས་གོ་ཆོད་པའི་སྲོལ་དར་ཆེའོ། །དེས་ན་མཁན་སློབ་སོ་སོར་བྱེད་ན་ནི་དེ་ལ་ཞིབ་ཆ་མང་སྟེ་འདུལ་བའི་གཞུང་ཆེ་བ་ནས་ཤེས་པར་བྱ་ལ། འདིར་གཞན་འཇུག་བདེ་བའི་ཆེད་དུ་མཁན་སློབ་གཉིས་གཅིག་གིས་མཛད་པའི་ལུགས་ཙམ་ཞིག་གཞིར་བཞག་ནས་འཆད་ཅིང་། དེའི་ཚེ་བཤད་པ་རྒྱས་བསྡུས་ནི་སྐབས་དང་བསྟུན་ནོ། །དེ་ཡང་དགེ་བསྙེན། རབ་བྱུང་། དགེ་ཚུལ། བསྙེན་རྫོགས་རྣམས་ཇི་ལྟར་བྱ་བའི་ཚུལ་རིམ་པར་བརྗོད་པ་ལ། གང་དུ་བྱ་བའི་གནས་ཁང་བྱི་དོར་བྱས་ལ། སྟོན་པའི་སྐུ་བརྙན་བཟང་པོ་ཞིག་བཀྲམ་ནས་མདུན་དུ་མཆོད་པ་བཤམ། སྐུ་གསུང་ཐུགས་ཀྱི་རྟེན་གཞན་ཡོད་ན་ལེགས་མོད་མེད་ཀྱང་མི་འགལ། རབ་བྱུང་བསྙེན་རྫོགས་ཀྱི་ཡོ་བྱད་དགོས་པ་རྣམས་སྟ་གོན་བྱ་ཞིང་། དགེ་བསྙེན་དང་རབ་བྱུང་དགེ་ཚུལ་གསུམ་ལ་ལས་གྲལ་བ་ཡོད་ན་ལེགས་ཀྱང་མེད་ན་ནི་འགལ་བ་མེད་ལ། བསྙེན་རྫོགས་ལ་ནི་ལས་གྲལ་བའི་བསྙེན་རྫོགས་མང་པོ་ཡོད་ན་དང་། གཞན་དྲུག་གམ་ལྔ་དང་མ་ཐ་བཞི་ངེས་པར་དགོས་སོ། །ལས་གྲལ་བ་རྣམས་ལ་མེ་ཏོག་ཕུལ། བསྙེན་རྫོགས་བྱེད་པའི་ཚེ་ལྟུང་བཤགས་དང་ལྟུང་བ་སྤྱི་བཤགས་སྔོན་དུ་བྱས་ན་འཇུག་པ་བདེ། དེ་ནས་དགེ་བསྙེན་གཅིག་པུ་སྒྲུབ་པ་ལ་བར་ཆད་འདྲི་མི་དགོས་ཤིང་། རབ་བྱུང་དང་དཀྱུས་གཅིག་ལ་སྒྲུབ་ན་ནི་བར་ཆད་འདྲི་དགོས་སོ། །དེ་ཡང་ཐོག་མར་འདྲི་སྲོལ་ཡོད་པ་ལྟར་མཛད་ན། འོ། ཁྱེད་ཅག་རབ་ཏུ་འབྱུང་བ་ལ་བར་ཆད་ཀྱི་ཆོས་དང་མི་ལྡན་པ་ཞིག་དགོས་ལ། བར་ཆད་ཅན་རབ་བྱུང་སོགས་བྱས་ན་རྒྱུད་དེ་ལ་སྡོམ་པ་མི་སྐྱེ་བའམ། སྐྱེས་ཀྱང་ཡུན་དུ་མི་གནས་པ་སོགས་ཀྱིས་རྒྱུད་ལ་ཕན་མི་ཐོགས་ཤིང་། སྒྲུབ་མཁན་ལ་ཡང་ཉེས་པ་འབྱུང་བས་དྲི་བ་འདི་རྣམས་ལ་སེམས་མ་གཡེང་བར་ལན་ཐོབ་ཅིག །ཁྱེད་མུ་སྟེགས་ཅན་མ་ཡིན་ནམ། དེས་མ་ལགས་ཞེས་ལན་འདེབས་ཤིང་། དེ་བཞིན་དུ། ལོ་བཅྭོ་ལྔ་མ་ལོན་པ་མ་ཡིན་ནམ། ལོ་བཅྭོ་ལྔ་ལོན་པ་བྱ་རོག་སྐྲོད་མི་ནུས་པ་མ་ཡིན་ནམ། བྱ་རོག་སྐྲོད་ནུས་པ་ལོ་བདུན་མ་ལོན་པ་མ༴ བྲན་ལ་སོགས་པ༴ བུ་ལོན་ཆགས་པ༴ ཕ་མས་མ་གནང་བ་མ་ཡིན་ནམ། ཕ་མས་མ་གནང་བ་ཡུལ་ཐག་མི་རིང་བ༴ ནད་པ༴ དགེ་སློང་མ་སུན་ཕྱུང་བ༴ རྐུ་ཐབས་སུ་གནས་པ༴ ཐ་དད་དུ་གནས་པ༴ གནས་པར་མི་བྱ་བ༴ ཟ་མ༴ མ་ནིང་༴ སྤྲུལ་པ༴ དུད་འགྲོ༴ མུ་སྟེགས་ཅན་ཞུགས་པ༴ མ་བསད་པ༴ ཕ་བསད་པ༴ དགྲ་བཅོམ་པ་བསད་པ༴ དགེ་འདུན་གྱི་དབྱེན་བྱས་པ༴ དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ༴ ཕམ་པར་འགྱུར་བའི་ལྟུང་བ་བཞི་པོ་དག་ལས་ལྟུང་བ་གང་ཡང་རུང་བ་བྱུང་བ༴ རྒྱུ་ལས་བཟློག་པའི་ཆད་པ་ཁས་མི་ལེན་པས་གནས་ནས་ཕྱུང་བ༴ ལག་རྡུམ་ལ་སོགས་པ༴ སྐྲ་སེར་ལ་སོགས་པ༴ སོར་མོ་གཅིག་པ་ལ་སོགས་པ༴ རྒྱལ་པོས་བཀྲབས་པ་ལ་སོགས་པ༴ རྒྱལ་པོས་མ་གནང་བ༴ རྒྱལ་པོས་མ་གནང་བ་ཡུལ་ཐག་མི་རིང་བ༴ ཆོམ་རྐུན་པར་གྲགས་པ༴ ཕུང་ཁྲོལ་བ༴ ལྷམ་མཁན༴ གདོལ་པ༴ གཡུང་པོ༴ མི་མ་ཡིན་པའི་འགྲོ་བ་པོ༴ བྱང་གི་སྒྲ་མི་སྙན་པ༴ མཚན་ལན་གསུམ་དུ་གྱུར་པ༴ སྐྱེས་པ་འདྲ་བའི་བུད་མེད༴ སྡིག་སྡིག་ལྟ་བུའི་མཚན་ཉིད་ཅན༴ གླིང་གཞན་ནས་སྐྱེས་པ་ཚུལ་བྱད་མི་འདྲ་བ་མ་ཡིན་ནམ། ཞེས་དྲིས་པས། མ་ཡིན་ལགས་ཞེས་ཟེར་ན། འོ་ན། ཁོ་བོས་ཁྱོད་རབ་ཏུ་ད བྱུང་བར་བྱའོ། །ཞེས་སྐབས་དབྱེའོ། །དེ་ནས། བསྟན་པ་རིམ་གྱིས་བསླབ་པའི་ཕྱིར་དགེ་བསྙེན་དུ་བསྒྲུབ་པ་ལ། བསྒྲུབ་བྱ་དེ་དང་པོར་སྟོན་པ་ལ་ཕྱག་གསུམ་དང་། དེ་ནས་རང་ལ་ཡང་ཕྱག་གསུམ་བྱེད་དུ་བཅུག་སྟེ་མདུན་དུ་ཙོག་པུར་འདུག་ཏུ་འཇུག་ཅིང་། ཐལ་མོ་སྙིང་ཁར་སྦྱོར་དུ་བཅུག་ལ། ཁྱེད་རྣམས་སམ། ཁྱོད་དགེ་བསྙེན་དུ་སྒྲུབ་པ་ལ་བསམ་པ་འདི་བཞིན་གྱིས། ལུས་རྟེན་འདི་ལྟ་བུ་རྙེད་དཀའ་ཞིང་འཇིག་པར་སླ་བ་དང་། ཤི་ནས་ལས་ཀྱི་དབང་གིས་གར་སྐྱེ་རང་དབང་མེད་ཅིང་། གལ་ཏེ་ངན་འགྲོར་སྐྱེས་ན་སྡུག་བསྔལ་ཆེན་པོ་མྱོང་བར་འགྱུར་བས་དེ་ལ་སྐྱོབ་པའི་སྐྱབས་ནི་དཀོན་མཆོག་གསུམ་ཡིན་པས། དེ་གསུམ་ལ་སྙིང་ཐག་པ་ནས་སྐྱབས་སུ་འགྲོ་དགོས། འདིར་ངན་སོང་ལས་ཐར་འདོད་ཡོད་པ་ཙམ་གྱིས་མི་ཆོག་གི འཁོར་བ་མཐའ་དག་སྡུག་བསྔལ་གྱི་རང་བཞིན་དུ་མཐོང་ནས་འཁོར་བ་སྤྱི་ལས་ཐར་འདོད་བསྐྱེད་དགོས། སྡོམ་པ་སྐྱེ་བའི་གཞི་ནི་སྐྱབས་འགྲོ་རྣམ་དག་དང་། འཁོར་བ་ལས་ཐར་འདོད་གཉིས་ཡིན་པས་དེ་གཉིས་རྣམ་དག་གམ། བཅོས་མ་ཚུན་ཆད་ཀྱིས་བསྐྱེད་དགོས་པ་ཡིན། དེར་མ་ཟད། སངས་རྒྱས་ཐོབ་འདོད་ཀྱང་དགོས་པས་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་དཀོན་མཆོག་གསུམ་ལ་སྐྱབས་སུ་སོང་ནས་བསླབ་པའི་གཞི་ལྔ་འཛིན་པའི་དགེ་བསྙེན་གྱི་སྡོམ་པ་བླངས་ནས་མ་ཤིའི་བར་དུ་ལེགས་པར་སྲུང་སྙམ་པའི་བསམ་པ་ཁྱད་པར་ཅན་དུང་བ་ཞིག་བསྐྱེད་ལ། འདིའི་རྗེས་ཟློས་མཛོད་ཅིག །བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བར་འདི་ནས་བཟུང་སྟེ་ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་བསྙེན་དུ་བཙུན་པས་གཟུང་དུ་གསོལ། འདི་ལན་གསུམ་བརྗོད་དགོས་པས་གཉིས་པའི་རྗེས་ཟློས་གྱིིས། གསུམ་པ་སོང་བའི་རྗེས་སུ། འདི་ལ་སྐྱབས་བརྗོད། བདག་བརྗོད། གཞན་བརྗོད་གསུམ་ཡོད་པའི་བདག་བརྗོད་དགེ་བསྙེན་དུ་ཞེས་པའི་ཚིག་རྫོགས་པ་དང་མཉམ་དུ་ཁྱེད་ཀྱི་རྒྱུད་ལ་དགེ་བསྙེན་གྱི་སྡོམ་པ་སྐྱེ་ཞིང་། ངེད་ཁྱེད་ཀྱི་སློབ་དཔོན་དུ་གྱུར་པ་ཡིན་པས། དགེ་བསྙེན་དུ་ཞེས་པའི་སྐབས་སུ་ངས་སྐད་ཅུང་ཟད་མཐོ་བར་བྱས་ཏེ་སེ་གོལ་གྱི་བརྡ་སྤྲོད་པས། དེའི་ཚེ་བདག་གི་རྒྱུད་ལ་དགེ་བསྙེན་གྱི་སྡོམ་པ་སྐྱེས་པའི་དུས་ནི་འདི་ཡིན་སྙམ་པའི་ཐོབ་བློ་བསྐྱེད་པ་ཤིན་ཏུ་གལ་ཆེ་ཞིང་། སྡོམ་པ་ཐོབ་དུས་ཤེས་པ་དང་། སློབ་དཔོན་དུ་གྱུར་ནས་སློབ་དཔོན་གྱིས་གཟུང་དུ་གསོལ་ཞེས་བརྗོད་དགོས་པས། དེ་ཡིད་ལ་ཞོག་ལ་གསུམ་པའི་རྗེས་ཟློས་མཛོད། གསུམ་པ་སོང་བ་དང་སློབ་དཔོན་གྱིས། ཐབས་ཡིན་ནོ། །ཞེས་དང་། ལན་དུ་ལེགས་སོ། །ཞེས་བྱ། དགེ་ཚུལ་དུ་བསྒྲུབ་ན་འདིར་སློབ་པ་བརྗོད་མི་དགོས་ཤིང་། དགེ་བསྙེན་ཙམ་མ མ་རབ་བྱུང་མན་ཆད་བསྒྲུབ་ན་དེ་བརྗོད་དགོས་པས། བསླབ་པ་བརྗོད་པ་ནི། དེས་དགེ་བསྙེན་གྱི་སྡོམ་པ་ཐོབ་པ་ཡིན། ཐོབ་ཀྱང་མ་བསྲུངས་ན་ཕན་ཡོན་མི་འབྱུང་བར་མ་ཟད། ཉེས་དམིགས་འབྱུང་བས་བསྲུང་ལུགས་སྔོན་གྱི་དགྲ་བཅོམ་པ་རྣམས་ཀྱིས་ཇི་ལྟར་བསྲུང་བ་བཞིན་བདག་གིས་ཀྱང་བསྲུང་སྙམ་པ་གྱིས་ལ། འདིའི་ལད་མོ་གྱིས་ཤིག།༈ སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་པ་དེ་དག་གིས་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་པོ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །གཞན་ཡང་ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་དང་། མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང་། བཅོས་པའི་ཆང་དང་། མྱོས་པར་འགྱུར་བ་བག་མེད་པའི་གནས་ལས་སླར་ལྡོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་འདི་ནས་བཟུང་སྟེ་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་དང་། མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང་། བཅོས་པའི་ཆང་དང་། མྱོས་པར་འགྱུར་བ་བག་མེད་པའི་གནས་ལས་སླར་ལྡོག་པར་བགྱིའོ། །ཡན་ལག་ལྔ་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། རྗེས་སུ་བསྒྲུབ་བོ། །རྗེས་སུ་བགྱིད་དོ། །ལན་གཅིག་གིས་ཆོག །ཐབས་ཡིན་ནོ་དང་། ལེགས་སོ་ཞེས་བརྗོད། དགེ་བསྙེན་གྱི་སྡོམ་པ་བླངས་ནས་སྐྱབས་འགྲོའི་བསླབ་བྱ་བ སྒྲུབ་དགོས་ཤིང་། དེ་ལ་མང་ཡང་བསྡུ་ན། འཇིག་རྟེན་པའི་ལྷ་ལ་དད་པས་ཕྱག་མི་འཚལ་བ་དང་། སེམས་ཅན་ལ་གནོད་འཚེ་སྤོང་བ་དང་། མུ་སྟེགས་ཅན་སོགས་དཀོན་མཆོག་ལ་མི་གུས་པ་ལ་སྙིང་གྲོགས་མི་བྱེད་པ་གསུམ་དང་། དཀོན་མཆོག་གསུམ་མཆོད་པ། སེམས་ཅན་ལ་སྙིང་བརྩེ་བ། དམ་པའི་ཆོས་ཉན་པ། བསླབ་པ་སྲུང་བ་སོགས་དང་། མདོར་ན་མི་དགེ་བཅུ་སྤོང་ཞིང་དགེ་བཅུ་ཅི་ནུས་སུ་བསྒྲུབ་པ་ལ་འབད་པར་བྱའོ།། ༈ །།དེ་ནས་རབ་བྱུང་དུ་སྒྲུབ་པ་ལ། གདིང་བ་དང་དེའི་སྟེང་དུ་བླ་གོས་ལེགས་པར་བལྟབ་ཏེ་འཇོག་པ་དང་། ལྷུང་བཟེད་དང་ཆུ་ཚགས་སོགས་སྟ་གོན་བྱ། འདིར་ཞུ་ཡུལ་དགེ་སློང་བཞི་སོགས་ཡོད་ན་ཞུ་བའི་ཚུལ་བཤད་ཀྱང་དེ་ནི་རྒྱས་པའི་ལུགས་ཡིན་པས་གྲུབ་ན་བྱས་ཆོག་མོད། མ་གྲུབ་ཀྱང་མི་འགལ་བར་ངེས་པས་བསྡུས་པའི་སྐབས་སུ་བཞག་སྟེ། བསྒྲུབ་བྱས་མཁན་པོར་འོས་པ་ལ་ཕྱག་གསུམ་བྱས་ནས་མདུན་དུ་ཙོག་པུར་ཐལ་མོ་སྦྱོར་དུ་བཅུག་ལ། ཁྱེད་རྣམས་སམ། ཁྱེད་རབ་བྱུང་དུ་སྒྲུབ་པ་ལ་མཁན་པོ་ཞིག་དགོས་ཤིང་། དེ་ཡང་གང་རུང་རུང་གིས་མི་ཆོག་པས་བསྙེན་པར་རྫོགས་ནས་བར་མ་ཆད་པར་ལོ་བཅུ་ལོན་པ་དང་། འདུལ་བ་ཤེས་པའི་བརྟན་མཁས་ཀྱི་ཡོན་ཏན་གཉིས་ལྡན་ཞིག་དགོས་ཤིང་། དེ་ལྟ་བུ་ཁོ་བོས་འགྲུབ་རུང་དུ་ཡོད་པས་སྔར་གྱི་སློབ་དཔོན་ལ་མཁན་པོ་ཞུ་སྙམ་པ་གྱིས་ལ་འདིའི་རྗེས་ཟློས་མཛོད། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་སློབ་དཔོན་ལ་མཁན་པོར་གསོལ་གྱིས། སློབ་དཔོན་བདག་གི་མཁན་པོ་མཛད་དུ་གསོལ། སློབ་དཔོན་མཁན་པོས་བདག་རབ་ཏུ་དབྱུང་བར་བགྱིའོ། །ཞེས་ལན་གཉིས་བརྗོད་དེ། གསུམ་པའི་སྐབས་སུ་མཁན་པོ་མཛད་དུ་གསོལ་ཞེས་པའི་མཇུག་ཏུ་ངེད་ཁྱེད་ཀྱི་མཁན་པོར་འགྱུར་བ་ཡིན་པས། དེ་ཡིད་ལ་ཞོག་ལ་གསུམ་པའི་རྗེས་ཟློས་ཀྱིས། གསུམ་པ་སོང་བའི་མཇུག་ཏུ་ཐབས་ལེགས་བྱའོ། །མཁན་པོར་གསོལ་བ་བཏབ་པའི་བསླབ་བྱར་མཁན་པོ་ལ་སྟོན་པའི་འདུ་ཤེས་འཇོག་ཅིང་གུས་པ་དང་། བསྙེན་བཀུར་དང་། བཀའ་བསྒྲུབ་པ་སོགས་བྱ་དགོས་སོ། །དེ་ནས་གཙུག་ཕུད་འབྲེགས་པའི་དགེ་སློང་ཞིག་ལ་འདིའི་གཙུག་ཕུད་འབྲེགས་པའི་གྲོགས་ལྡན་མཛོད་ཅིག་ཅེས་བསྒོ། དེས་ཆུ་བུམ་དང་སྐྲ་གྲི་བཟུང་ནས་གཡས་མཆོག་སྦྱིན་བྱས་པ་དེའི་སྤྱི་བོར་གཏུགས་ཏེ། ཁྱོད་གཙུག་ཕུད་འབྲེགས་པ་ལ་སྤྲོའམ་ཞེས་འདྲི་ཞིང་། དེས་ཀྱང་སྤྲོ་ལགས་ཞེས་བྱས་ནས་བྲེག་པ་མཁན་པོ་ལ་ཕུལ། མཁན་པོས་དཀར་ཕྱོགས་ལ་དགའ་བའི་ལྷ་རྣམས་དགྱེས་པ་ཆེན་པོ་མཛད་དུ་གསོལ། ཞེས་བརྗོད་ཅིང་རྟེན་ཕྱོགས་སུ་གཏོར། དེ་ནས་ཡན་ལག་ལྔ་ཆུས་བཀྲུ་བའམ་ཁ་བཤལ། དེ་ནས་མཁན་པོའི་མདུན་ནས་ཕྱག་གསུམ་བྱས་ཏེ་ཙོག་བུར་འདུག་པའི་ཕྲག་གཡོན་ལ་གདིང་བ། མཐང་གོས། བླ་གོས་གསུམ་ནང་ལ་བརྒྱད་བལྟབ་ཏུ་བཀལ་ནས། ཆོས་གོས་ཀྱི་སྣེ་མོ་བསྒྲུབ་བྱའི་ལག་པ་གཡོན་པའི་ཁར་བཞག །གཉིས་ཀའི་ལག་པ་གཡས་པས་སྟེང་ནས་བཀབ་སྟེ། འདི་སྟོད་དུ་རྒྱུན་ཏུ་གྱོན་པའི་ཆོས་གོས་བླ་གོས་ཞེས་བྱ་བ་ཁྱིམ་པ་དང་མུ་སྟེགས་ཅན་ལས་རྟགས་ཁྱད་པར་དུ་འགྱུར་བ་དགེ་སྦྱོང་གི་དྲན་པ་གསོ་བ། སྦྲང་བུ་དང་ཤ་སྤྲང་དང་རླུང་དང་ཉི་མ་ལ་སོགས་པའི་ཚ་གྲང་གི་རེག་པ་ལས་སྐྱོབ་པའི་གོས་སུ་སྟོན་པས་གནང་བ་ཡིན་པས། དུས་རྒྱུན་ཏུ་སྟོད་གཡོགས་འདི་འདྲ་རེ་འཆང་སྙམ་པ་གྱིས། ཞེས་བྱས་ལ་ཕྲག་པ་གཡས་ལ་བཞག །མཐང་གོས་ཡང་སྔར་བཞིན་བཟུང་ལ། འདི་སྨད་དུ་གྱོན་པར་བྱེད་པའི་མཐང་གོས་ཞེས་བྱ་བ་སྨད་གཅེར་བ་དང་ངོ་ཚ་བའི་གནས་ལས་སྐྱོབ། སྦྲང་བུ་ལ་སོགས་པའི་རེག་པ་ལས་སྲུང་། ཁྱིམ་པ་དང་མུ་སྟེགས་ཅན་ལས་རྟགས་ཁྱད་པར་དུ་འབྱུང་ཞིང་། དགེ་སྦྱོང་གི་དྲན་པ་གསོ་བའི་གོས་སུ་སྟོན་པས་གནང་བ་ཡིན་པས། དུས་རྒྱུན་ཏུ་སྨད་གཡོགས་འདི་ལྟ་བུ་རེ་འཆང་སྙམ་པ་གྱིས། སྟོན་པས་ཀྱང་སྟོད་གཡོགས་སྨད་གཡོགས་འདི་ལྟ་བུ་བསྣམས་ནས་འདིའི་ལམ་ལ་བསླབ་སྟེ་སངས་རྒྱས་ནས། རྗེས་འཇུག་རྣམས་ལ་གོས་འདི་ལྟ་བུ་གནང་བ་ཡིན་པས། གོས་འདི་ལྟ་བུ་གྱོན་ལ་སེམས་དུལ་བ་དང་ཞི་བར་བྱེད་དགོས་པ་ཡིན་ཞེས་བྱས་ལ་གཡས་སུ་སྤོ། ལྷུང་བཟེད་ནང་དུ་འབྲུ་བླུགས་ལ་གཉིས་ཀའི་ལག་པ་གཡོན་འོག་དང་། གཡས་སྟེང་ནས་བཟུང་སྟེ། འདི་ལྷུང་བཟེད་ཅེས་བྱ་བ་ཁྱིམ་པའི་ཁ་ཕོར། མུ་སྟེགས་ཀྱི་སློང་ཕོར། རབ་བྱུང་དམན་པ་གཞན་ལས་སྣོད་སྤྱད་ཀྱི་རྟགས་ཁྱད་པར་ཅན་དུ་གྱུར་པ་ཡིན། འདི་ཟས་ཀྱིས་འགེངས་པ་བཞིན་དུ་རང་གི་ཤེས་རྒྱུད་ཡོན་ཏན་གྱིས་འགེངས། འདིའི་ནང་ནས་ཟས་ལ་ལོངས་སྤྱོད་པ་བཞིན་དུ་ཆོས་ལ་ལོངས་སྤྱོད། མཐའ་གཉིས་སྤངས་པའི་བསོད་སྙོམས་སྤྱོད་པའི་སྣོད་དུ་སྟོན་པས་གནང་བ་ཡིན་པས་དུས་རྒྱུན་ཏུ་སྣོད་སྤྱད་འདི་འདྲ་རེ་འཆང་སྙམ་པ་གྱིས། དེ་ནས་གདིང་བ་སྔར་བཞིན་བྱས་ལ། འདི་གདིང་བ་བྱ་བ་ཁྱིམ་པའི་དཀར་པོ། གང་ཟག་གི་ཁྲ་བོ་ཕལ་ཆེར་མ་ཉམས་པ་དང་། དགེ་འདུན་གྱི་རྩྭའི་གདན་མ་གཏོགས་གནས་མལ་ལ་ལོངས་སྤྱོད་པའི་དུས་སུ་འདིས་བསྐྱབས་ནས་ལོངས་སྤྱོད་དགོས་པ་ཡིན། ཆུ་ཚགས་གཏད་ལ། འདི་ཆུ་ཚགས་བྱ་བ་སངས་རྒྱས་ཀྱི་བསྟན་པ་ནི་སྙིང་རྗེས་རབ་ཏུ་ཕྱེ་བ་ཡིན་ཞིང་། སོ་སོར་ཐར་པའི་སྡོམ་པ་ནི་གཞན་གནོད་གཞི་དང་བཅས་པ་ལས་ལྡོག་པ་ཡིན་པས། སེམས་ཅན་ཐམས་ཅད་ལ་གནོད་པ་སྤང་དགོས། ཁྱད་པར་དུ་ཆུ་འདི་འབྲེལ་ཆེ་འབྱུང་ཉེ། ནང་ནུབ་ཏུ་ཆུ་ལ་ལོངས་སྤྱོད་དགོས་པས་ཆུ་ཚགས་འདི་འདྲ་རེ་འཆང་སྙམ་པ་དང་། དེས་མཚོན་ནས་ཡོ་བྱད་གང་ལ་ཡང་སྲོག་ཆགས་ལ་མི་གནོད་པ་བྱེད་དགོས་སོ། །ཞེས་བརྗོད་དེ་སྦྱིན། དེ་ནས་མཐང་གོས་ཉིས་བལྟ བ་བྱས་པ་རྒྱ བ་ནས་བསྐོན། དེའི་སྟེང་དུ་བླ་གོས་བརྐྱང་པ་བསྐོན་ཏེ། གཡས་གཡོན་གྱི་སྣེ་མོ་གཉིས་མདུན་དུ་ལྷན་ཅིག་ཏུ་བྱས་ནས་ཐལ་མོ་སྦྱོར་དུ་བཅུག་སྟེ། མཁན་པོ་དགེ་འདུན་རྣམས་ཀྱིས་མེ་ཏོག་གཏོར་བཞིན་པར། ཐར་བའི་རྒྱལ་མཚན་བརྟན་པར་གྱུར་ཅིག །ཚངས་པར་སྤྱོད་པ་ཚེ་མཐར་ཕྱིན་པར་གྱུར་ཅིག །ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་གྱུར་ཅིག །སྐྱེ་བ་དང་ཚེ་རབས་ཐམས་ཅད་དུ་རབ་ཏུ་བྱུང་བའི་ཚུལ་ཁྲིམས་རྣམ་པར་དག་པ་དང་ལྡན་པར་གྱུར་ཅིག །ཅེས་སྨོན་ལམ་གདབ། དེ་ནས་བསྒྲུབ་བྱའི་གདིང་བ་ཉིས་བལྟབ་བྱས་པའི་གླེགས་བུ་ཕྱེད་པ་མདུན་ཕྱོགས་སུ་འོང་བར་བྱས་ཏེ་བཏིང་། བསྒྲུབ་བྱས་དེའི་སྟེང་ནས་སྟོན་པ་དང་མཁན་པོ་ལ་ཕྱག་གསུམ་རེ་བྱས་ཏེ་མདུན་དུ་ཙོག་བུར་འདུག་སྟེ་ཐལ་མོ་སྙིང་ཁར་སྦྱོར་དུ་བཅུག་ལ། ཁྱོད་རབ་བྱུང་དུ་སྒྲུབ་པ་འདོད་པ་དེ་ལེགས། ལེགས་པའི་རྒྱུ་མཚན་མང་ཡང་། དུས་གསུམ་གྱི་སངས་རྒྱས་འཚང་རྒྱ་བའི་ཚེ་ཁྱིམ་པའི་རྟེན་སྤངས་ཏེ། རབ་བྱུང་གི་རྟེན་ལ་འཚང་རྒྱ་བ་ཡིན་གྱི། ཁྱིམ་པའི་རྟེན་ལ་སངས་རྒྱས་པ་མེད། ཁྱིམ་པའི་རྟེན་ལ་སྦྱིན་པ་གཏོང་བ་དང་། དགེ་སྦྱོར་གཞན་བྱས་པ་ལས་རབ་བྱུང་གི་རྟེན་ལ་སྦྱིན་གཏོང་དང་། དགེ་སྦྱོར་བྱས་པ་ཐམས་ཅད་ལྷག་པར་ཕན་ཡོན་ཆེ། ཁྱིམ་པའི་རྟེན་ལ་ཆོས་བསྒྲུབ་དཀའ་ཞིང་རབ་བྱུང་གི་རྟེན་ལ་སྒྲུབ་སླ་བ་སོགས་ཁྱད་ཆོས་དུ་མ་ཡོད་པས་རབ་བྱུང་དུ་སྒྲུབ་པ་དོན་ཆེ། འདི་ལ་བརྗེ་བ་རྣམ་པ་གསུམ་དང་ལྡན་དགོས་ཤིང་། དེ་ཡང་རྟགས་ཆ་ལུགས་བརྗེ་བ། བསམ་པ་བརྗེ་བ། མིང་བརྗེ་བ་གསུམ་ལས། དང་པོ་ནི། རབ་བྱུང་གི་ཆ་ལུགས་སུ་བསྒྱུར་བ་དེ་ཡིན། བསམ་པ་བརྗེ་བ་ནི། ཁྱིམ་གྱི་ཉེས་དམིགས་རྣམས་ཤེས་ཤིང་། རབ་ཏུ་བྱུང་བའི་ཕན་ཡོན་རྣམས་བསམ་པ་དང་། འཁོར་བ་དང་ངན་སོང་གི་འཇིགས་པས་ཡིད་སྐྲག་སྟེ་དེ་ལས་ཐར་འདོད་ཀྱིས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་བའི་ཆེད་དུ་དཀོན་མཆོག་ལ་སྐྱབས་སུ་སོང་ནས། རབ་བྱུང་གི་ཚུལ་ཁྲིམས་བླངས་ཏེ་མ་ཤིའི་བར་དུ་བསྲུང་སྙམ་པའི་བསམ་པ་ཤུགས་དྲག་བྱེད་དགོས་པ་ཡིན། མིང་བརྗེ་བ་ནི། ཁྱོད་ཀྱི་མིང་ལ་འདི་བཞིན་གྱིས་ཞེས་བྱས་ལ་མིང་སྤོ། དེ་ཡང་དཔལ་དང་གྲགས་པ་དང་བཟང་པོ་དང་དོན་ཡོད་དང་འོད་ཟེར་སོགས་དང་། མཁན་པོའི་མིང་གི་མཐའ་ཅན་གང་རུང་བྱ། མིང་སྤོས་ཏེ། ད་འདིའི་རྗེས་ཟློས་མཛོད། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །དགེ་འདུན་ལ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ། ཤཱཀྱ་སེངྒེ། ཤཱཀྱའི་རྒྱལ་པོ་གཙོ་བོ་དེ་རབ་ཏུ་བྱུང་བའི་རྗེས་སུ་བདག་རབ་ཏུ་འབྱུང་སྟེ། ཁྱིམ་པའི་རྟགས་སྤོང་ངོ་། །རབ་ཏུ་བྱུང་བའི་རྟགས་ཡང་དག་པར་ལེན་ཏོ། །ཞེས་ལན་གསུམ་བརྗོད་དེ་ཐབས་ལེགས་བྱ། རབ་ཏུ་བྱུང་བའི་བསླབ་བྱ་ནི། དཀོན་མཆོག་ལ་སྐྱབས་སུ་འགྲོ་ཞིང་ཁྱིམ་པའི་རྟགས་སྤོང་བ་དང་། རབ་བྱུང་གི་རྟགས་ཆ་ལུགས་དང་ལྡན་པ་དང་། མཁན་པོ་ལ་གུས་པ་སོགས་བྱེད་དགོས་སོ། །རབ་བྱུང་གཅིག་པུ་བསྒྲུབ་ན་ཕྱག་གསུམ་འཚལ་དུ་བཅུག་ལ། འགྲེང་ནས་ཐལ་མོ་སྦྱར་ཏེ། མཁན་པོ་རིན་པོ་ཆེ་བཀའ་དྲིན་ཆེ་ལགས་ཞེས་བརྗོད་དུ་གཞུག །མཁན་པོ་འཁོར་བཅས་ཀྱིས་མེ་ཏོག་འཐོར་ཞིང་། ཐར་པའི་རྒྱལ་མཚན་བརྟན་པར་གྱུར་ཅིག་ཅེས་སོགས་དང་། ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། ཞེས་སོགས་བརྗོད་པར་བྱའོ།། ༈ །། དེ་ནས་དགེ་ཚུལ་དུ་བསྒྲུབ་པ་ནི། ཐོག་མར་སྟོན་པ་དང་དེ་ནས་རང་ལ་ཕྱག་གསུམ་རེ་བྱེད་དུ་འཇུག་ཅིང་། མདུན་དུ་ཙོག་པུར་འདུག་སྟེ་ཐལ་མོ་སྙིང་ཁར་སྦྱོར་དུ་བཅུག་ནས། ཁྱོད་དགེ་ཚུལ་དུ་བསྒྲུབ་པ་ལ་ངེས་འབྱུང་གི་བསམ་པ་གལ་ཆེ་བས། ངེས་འབྱུང་གི་བསམ་པ་ནི་འཁོར་བ་ལས་ཐར་འདོད་ཀྱི་བློ་ཞིག་ལ་བྱེད་པ་ཡིན་པས། དེ་ཡང་མདོ་དྲན་པ་ཉེར་གཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། དུད་འགྲོ་གཅིག་ལ་གཅིག་ཟས་ཉམས། །མི་དག་འཚོ་བ་ཐུང་བས་ཉམས། །ལྷ་དག་བག་མེད་པ་ཡིས་ཉམས། །འཁོར་བ་ཁབ་ཀྱི་རྩེ་ཙམ་ན། །བདེ་བ་ནམ་ཡང་ཡོད་མ་ཡིན། ཞེས་གསུངས་པ་ལྟར། དམྱལ་བ་ན་ཚ་གྲང་གི་སྡུག་བསྔལ། ཡི་དྭགས་ལ་བཀྲེས་སྐོམ་གྱི༴ དུད་འགྲོ་ལ་གཅིག་གིས་གཅིག་གསོད་ཅིང་ཟ་བ་དང་བཀོལ་སྤྱོད་ཀྱི༴ མི་ལ་ཚེ་ཐུང་ཞིང་ན་རྒ་འཆི་བ་དང་ཕོངས་པའི༴ འདོད་ལྷ་རྣམས་ནི་ཚེ་འདིར་བག་མེད་དུ་གཡེངས་ཤིང་ཕྱི་མར་ངན་འགྲོར་ལྟུང་བའི་སྡུག་བསྔལ་ཡོད་ཅིང་། མདོར་ན་འཁོར་བ་ཁབ་ཀྱི་རྩེ་ལྟ་བུ་ཆུང་བ་ཞིག་ལའང་སྡུག་བདེན་དང་མ་འདྲེས་པའི་བདེ་བ་མེད་པས། ཁམས་གསུམ་པོ་གང་དུ་གནས་པ་དང་། གང་དང་འགྲོགས་པ་དང་། གང་ལ་ལོངས་སྤྱོད་པ་ཐམས་ཅད་ཀྱང་སྡུག་བསྔལ་བདེན་པ་ལས་མ་འདས། དེས་ན་ངན་སོང་དུ་མ་ཟད། འཁོར་བའི་སྡུག་བསྔལ་མཐའ་དག་ལས་ཐར་འདོད་དགོས་ཤིང་དེ་ལས་ཐར་བའི་སྐྱབས་དམ་པ་སངས་རྒྱས་ཀྱི་གོ་འཕང་ཐོབ་པར་བྱ་དགོས། དེའི་ཕྱིར་དུ་སངས་རྒྱས་བཅོམ་ལྡན་འདས་ལ་སྐྱབས་སྟོན་པ། དམ་པའི་ཆོས་ལ་སྐྱབས་དངོས། དགེ་འདུན་ལ་སྐྱབས་སྒྲུབ་པའི་ཟླ་གྲོགས་ཞུ་བའི་སྐྱབས་འགྲོ་དང་བཅས་པའི་སྒོ་ནས་དགེ་ཚུལ་གྱི་སྡོམ་པ་བླངས་ཏེ་བསླབ་པའི་གཞི་བཅུ་པོ་རྣམས་ལེགས་པར་བསུང་བར་བྱའོ་སྙམ་པའི་བསམ་པ་དང་ལྡན་པའི་སྒོ་ནས་འདིའི་རྗེས་ཟློས་མཛོད། དེ་ནས་སྔར་གྱི་རབ་བྱུང་སྒྲུབ་མཁན་དེ་མིན་ན་དེ་ལུགས་ཤེས་དགོས་ཀྱང་འདིར་དེ་ཡིན་པ་གཞིར་བྱས་ན། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་ཚུལ་དུ་བཙུན་པས་བཟུང་དུ་གསོལ། ཞེས་པ་ལན་གཉིས་སོང་ནས། གསུམ་པའི་སྐབས་སུ་ཁྱེད་ལ་དགེ་ཚུལ་གྱི་སྡོམ་པ་སྐྱེ་བ་ཡིན་ཏེ། དེ་ཡང་སྐྱབས་བརྗོད་བདག་བརྗོད་གཉིས་རྫོགས་པའི་མཇུག་གཞན་བརྗོད་ཀྱི་ཐོག་མར་དགེ་ཚུལ་དུ་ཞེས་པའི་ཚིག་རྗོགས་པ་དང་མཉམ་དུ་སྐྱེ་ཞིང་། སྐྱེས་པ་ན་ངེད་ཁྱེད་ཀྱི་དགེ་ཚུལ་གྱི་སློབ་དཔོན་དུ་གྱུར་པ་ཡིན་པས། དགེ་ཚུལ་དུ་ཞེས་པའི་སྐབས་སུ་དེས་སྐད་ཀྱི་གཟེངས་མཐོ་བ་དང་། སེ་གོལ་གྱི་བརྡ་སྤྲོད་པས་དེའི་དུས་སུ་བདག་གི་རྒྱུད་ལ་དགེ་ཚུལ་གྱི་སྡོམ་པ་སྐྱེས་པ་ཡིན་ནོ་སྙམ་པའི་ཐོབ་བློ་སྐྱེས་པ་ཤིན་ཏུ་གལ་ཆེ། སློབ་དཔོན་དུ་གྱུར་ནས་བཙུན་པ་ཞེས་མི་བརྗོད་པར་སློབ་དཔོན་ཞེས་བརྗོད་དགོས་པས་དེ་ཡིད་ལ་བཟུང་ནས་གསུམ་པའི་རྗེས་ཟློས་གྱིས་ཞེས་བརྗོད། གསུམ་པ་སོང་བ་དང་སློབ་དཔོན་གྱིས་དེ་དགེ་ཚུལ་དུ་བསྒྲུབ་པའི་ཐབས་ཡིན་ནོ་དང་། དེས་ལེགས་སོ་བྱའོ། །དེས་དངོས་གཞིའི་ཆོ་ག་གྲུབ། མཇུག་གི་ཆོ་ག་ལ་དུས་གོ་བ་དང་བསླབ་པ་བརྗོད་པ་གཉིས་ཡོད་ཀྱང་དགེ་ཚུལ་ཙམ་བསྒྲུབ་ན་སྐབས་འདིར་བྱ་དགོས་ཤིང་། བསྙེན་རྫོགས་སུ་བསྒྲུབ་ན་ནི་དེའི་དུས་གོ་དང་བསླབ་པ་བརྗོད་པའི་ནང་དུ་བསྡུས་པས་འདིར་སྒོས་སུ་བྱ་མི་དགོས་སོ། །བསྙེན་རྫོགས་མི་བྱེད་ན། མཇུག་གི་ཆོ་ག་ལ་གཉིས་ཡོད་པའི་དུས་གོ་བ་ནི་མང་དུ་ཐོས་པའི་གནས་བརྟན་ཆེ་གེ་མོས་མཛོད་ཅེས་བསྒོ། དེ་ནས་དེ་ཉིད་ཉི་མ་ཡོད་སར་ཕྱིན་ནས་ཐུར་མ་སོར་བཞི་པས་གྲིབ་ཚོད་གཞལ་ཏེ། ཐུར་མའི་གྲིབ་མ་སོར་བཞི་ལ་སྐྱེས་བུ་དང་། སོར་གསུམ་མན་ལ་རྐང་བའི་ཐ་སྙད་བྱས་པའི་དུས་ཚོད་ངེས་པར་བྱས་ནས་གྲལ་ལ་འཁོད། དུས་གོ་བརྗོད་ཚུལ་རྒྱས་པ་ནི་བསྙེན་རྫོགས་ཀྱི་སྐབས་ལྟར་ཡིན་ལ། འདིར་ཅུང་ཟད་བསྡུས་ཏེ་བརྗོད་ན། ཁྱེད་དགེ་ཚུལ་དུ་བསྒྲུབ་པའི་མཇུག་ཆོག་ལ་གཉིས་ཡོད་པའི་དང་པོ་དུས་གོ་བ་ནི། ཁྱེད་ཀྱིས་དགེ་ཚུལ་གྱི་སྡོམ་པ་ཐོབ་པའི་དུས་ནི། ལོའི་དབང་དུ་བྱས་ན་ལོ་འདི་ཡིན། ཟླ་བའི་དབང་བྱས་ནས་ཟླ་བ་འདི་ཡིན། ཟླ་བའི་ཡར་ངོ་མར་ངོ་གཉིས་ལས་འདི་ཡིན། སྔ་དྲོ་ཕྱི་དྲོ་གཉིས་ལས་འདི་ཡིན། གྲིབ་ཚོད་སྐྱེས་བུ་གཅིག་དང་། རྐང་པ་གཅིག་སོགས་སོང་བའི་དུས་སུ་ཁྱོད་ཀྱིས་དགེ་ཚུལ་གྱི་སྡོམ་པ་ཐོབ་པ་ཡིན། དེ་ཡིད་ལ་ཞོག་ལ་བསྙེན་བཀུར་གྱི་གནས་དགེ་སློང་རྣམས་དང་། རང་ལས་རྒན་པའི་དགེ་ཚུལ་རྣམས་ཡིན་པས་རྙེད་པ་དང་པོར་འབུལ་ཞིང་། ཕྱག་དང་སྔོན་དུ་ལྡང་བ་སོགས་བྱ་ཞིང་རང་ལས་བསླབ་པ་གཞོན་པའི་དགེ་ཚུལ་དང་། བར་མ་རབ་བྱུང་དང་། དགེ་བསྙེན་ཕ་མ་སོགས་ཀྱི་ཕྱག་དང་བསྙེན་བཀུར་དང་དུ་ལོང་། དེ་ལྟར་བྱས་ན་བསྟན་པའི་གོ་རིམ་ཤེས་པ་དང་། བསླབ་པ་ལ་གུས་པའི་ཕན་ཡོན་ཡོད་དོ། །མཇུག་ཆོག་གཉིས་པ་བསླབ་པ་བརྗོད་པ་ནི། སྡོམ་པ་ཐོབ་པ་ཙམ་གྱིས་མི་ཆོག་གི་བསྲུང་དགོས་ཤིང་། བསྲུང་ལུགས་ནི་སྔོན་གྱི་འཕགས་པ་དགྲ་བཅོམ་པ་རྣམས་ཀྱིས་སྤང་བྱ་བཅུ་སྤངས་ཤིང་དེ་ལས་སླར་ལོག་པར་མཛད་པ་དེ་བཞིན་དུ་བདག་གིས་ཀྱང་དེ་ལྟར་བསླབ་པར་བྱའོ་སྙམ་སྟེ་འདིའི་རྗེས་ཟློས་ཀྱིས། སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་བསླབ་བོ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །གཞན་ཡང་འཕགས་པ་དེ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཁ་ཟས་དང་། གསེར་དངུལ་ལེན་པ་སྤངས་ཏེ། གསེར་དངུལ་ལེན་པ་ལས་སླར་ལོག་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་དང་། གླུ་གར་དང་རོལ་མོའི་སྒྲ་དང་། ཕྲེང་བ་དང་སྤོས་ཉུག་པ་དང་། རྒྱན་དང་ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཁ་ཟས་དང་། གསེར་དངུལ་ལེན་པ་སྤངས་ཏེ། གསེར་དངུལ་ལེན་པ་ལས་སླར་ལྡོག་པར་བགྱིའོ། །ཡན་ལག་བཅུ་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །ཐབས་ཡིན་ནོ་དང་ལེགས་སོ་བྱའོ། །དེ་ལྟར་བླངས་ནས་བསྲུང་བའི་ཕན་ཡོན་དང་། མ་བསྲུང་བའི་ཉེས་དམིགས་རྣམས་ཤེས་པར་བྱ་ཞིང་། གལ་ཏེ་ལྟུང་བས་གོས་པར་གྱུར་ན་ནི་བཤགས་སྡོམ་གཞུང་ནས་འབྱུང་བ་བཞིན་བྱའོ། །དེ་ནས་ཕྱག་བྱས་ཏེ། སློབ་དཔོན་རིན་པོ་ཆེ་བཀའ་དྲིན་ཆེ་ལགས། ཞེས་ཞུ་ཞིང་། སློབ་དཔོན་འཁོར་བཅས་ཀྱིས་མེ་ཏོག་འཐོར་བ་དང་། གོང་གི་སྨོན་ལམ་བཞི་གདབ། བཞི་པའི་ཚེ་དགེ་ཚུལ་གྱི་སྡོམ་པ་རྣམ་པར་དག་པ་དང་ལྡན་པར་གྱུར་ཅིག་ཅེས་བསྒྱུར་ཁྲིམས་ཀྱི་ཚུལ་ཁྲིམས་སོགས་ཀྱང་བརྗོད་པར་བྱའོ།། ༈ །།དེ་ནས་བསྙེན་རྫོགས་སུ་བསྒྲུབ་ལ། །བསྒྲུབ་བྱ་དེའི་ཆོས་གོས་གསུམ་དང་ལྷུང་བཟེད་གདིང་བ་སོགས་ཡོ་བྱད་རྣམས་སྟ་གོན་བྱ། མཁན་སློབ་ཏུ་འོས་པ་དང་ཁ་སྐོང་དུ་འོས་པའི་དགེ་སློང་རྣམས་དང་སྟོན་པའི་སྐུ་བརྙན་མཆོད་པ་དང་བཅས་པ་རྣམས་སྟ་གོན་བྱ་ཞིང་། ལྟུང་བཤགས་དང་སྤྱི་བཤགས་སོགས་སྔར་མ་བྱས་ན་འདིར་བྱ། མེ་ཏོག་འགྱེད་ཅིང་རྩ་ཕ་གུ་བཅས་པ་ཡང་སྟ་གོན་བྱས་ཏེ། མཁན་སློབ་ཏུ་འོས་པ་ལངས་ནས་སམ། འདུག་བཞིན་པར་དགེ་འདུན་བཙུན་པ་རྣམས་གསན་དུ་གསོལ། ཚེ་དང་ལྡན་པ་མིང་འདི་ཞེས་བགྱི་བ་འདི་དགེ་འདུན་ལས་བསྙེན་པར་རྫོགས་པར་འཚལ་ནས། དགེ་འདུན་ལ་བསྙེན་པར་རྫོགས་པར་གསོལ་ན། དགེ་སློང་མང་དུ་ཐོས་པའི་འདུལ་བ་འཛིན་པ་ཆེ་གེ་མོ་ཁྱོད་ཀྱིས་གསང་སྟེ་སྟོན་པའི་སློབ་དཔོན་མཛད་པར་ཞུ། འདི་ནི་མཁན་སློབ་གཉིས་གཅིག་གིས་མཛད་པའི་དབང་དུ་བྱས་པ་ཡིན། གཞན་རྣམས་ཀྱིས་ལས་ཀྱི་ཁ་སྐོང་མཛད་ནས་ཚེ་དང་ལྡན་པ་འདི་ལའམ། འདི་དག་ལ་བསྙེན་པར་རྫོགས་པའི་སྡོམ་པ་རྣམ་པར་དག་པ་ཞིག་བཀས་གནང་བར་ཞུ། ཞེས་གསོལ་བ་བཏབ་ནས་སྟོན་པ་ལ་མེ་ཏོག་གཏོར། དེ་ནས་བསྒྲུབ་བྱ་ལ་སྟོན་པའི་སྐུ་གཟུགས་འདི་ལ་སྟོན་པ་དངོས་ཀྱི་འདུ་ཤེས་ཞོག་ལ་ཕྱག་གསུམ་གྱིས། ཞེས་བརྗོད། དེ་ཚར་བ་དང་། ཁྱེད་རང་དགེ་སློང་གི་དགེ་བདུན་གྱི་ནང་དུ་འཇུག་པའི་བསམ་པ་དྲག་པོས་དགེ་སློང་འདི་རེ་རེ་ལ་ཕྱག་གསུམ་གསུམ་གྱིས། ཞེས་བརྗོད་དོ། །ཡན་ལག་ལྔ་ས་ལ་གཏུགས་པའི་ཕྱག་བྱ། ཕྱག་འཚལ་བའི་ཚེ་དགེ་སློང་རེ་རེ་ནས་ཚེ་དང་ལྡན་པ་འདིའི་རྒྱུད་ལ་བསྙེན་རྫོགས་ཀྱི་སྡོམ་པ་མྱུར་དུ་ཐོབ་པར་གྱུར་ཅིག་ཅེས་སྨོན་ལམ་གདབ་ཅིང་མེ་ཏོག་གཏོར། དེ་ནས་རྩ་ཕ་གུའི་སྟེང་ནས་མཁན་པོ་ལ་ཕྱག་གསུམ་འཚལ་དུ་བཅུག་སྟེ། རྐང་བའི་རྟིང་བ་གཉིས་ཀྱིས་རྩ་བཏིང་བ་མནན་ནས་ཙོག་ཙོག་པོར་ཐལ་མོ་སྙིང་ཁར་སྦྱོར་དུ་བཅུག་ནས། ཁྱོད་བསྙེན་པར་རྫོགས་པའི་དགེ་སློང་གི་དངོས་པོ་དོན་དུ་གཉེར་བ་དེ་ཤིན་ཏུ་ལེགས། ལེགས་པའི་རྒྱུ་མཚན་ནི། དགེ་སློང་ལ་རབ་ཏུ་གཅེས་པའི་མདོ་ལས། དགེ་སློང་ཞེས་བྱ་ཆོས་ཀྱི་རྒྱལ་མཚན་ཏེ། །དགེ་སློང་ཞེས་བྱ་རྡོ་རྗེའི་སྲོག་ཤིང་ཡིན། །དགེ་སློང་ཞེས་བྱ་དུཿཁ་སྤོང་བ་ཡིན། །དགེ་སློང་ཞེས་བྱ་རྒྱལ་བའི་སྲས་པོ་ཡིན། །དགེ་སློང་ཞེས་བྱ་ཉོན་མོངས་སྲོག་གཅོད་དེ། །དགེ་སློང་ཞེས་བྱ་ཐར་བའི་ལམ་བགྲོད་དེ། །དགེ་སློང་རང་གི་ངོ་བོ་བསྡམ་པ་སྟེ། །ཞེས་གསུངས་སོ། །དེ་ལྟ་བུའི་ཁྱད་པར་དང་ལྡན་པའི་བསྙེན་རྫོགས་སུ་སྒྲུབ་པ་ནི། སྒྲུབ་ཚུལ་ལ་སྤྱིར་མང་དུ་འབྱུང་ཡང་ཆོ་གའི་དབང་དུ་བྱས་ན་སྔོན་ཆོག་དང་ད་ལྟར་གྱི་ཆོ་ག་གཉིས་གསུངས་པ་ལས། འདིར་ད་ཆོག་ཉེས་མེད་ཕུན་ཚོགས་ཀྱི་སྒོ་ནས་བསྙེན་པར་རྫོགས་པ་ལ་མཁན་པོ་དགོས་ཤིང་། དེ་ཡང་བརྟན་མཁས་ཀྱི་ཡོན་ཏན་གཉིས་དང་ལྡན་པའི་དགེ་སློང་ཞིག་ལ་གསོལ་བ་ལན་གསུམ་འདེབས་དགོས་པས། ངེད་ཀྱིས་མཁན་པོའི་བྱ་བ་སྒྲུབ་རུང་དུ་ཡོད་ལ། བསྙེན་པ་ནི་ཉེ་བ་དང་རྫོགས་པ་ནི་ཐར་པ་ཡིན་པས། བདག་ཐར་བ་མྱ་ངན་ལས་འདས་པ་ལ་ཁད་ཉེ་བའི་དགེ་སློང་གི་དངོས་པོ་སྒྲུབ་མཁན་མཛད་དུ་གསོལ་སྙམ་པས། བསྙེན་རྫོགས་ཀྱི་མཁན་པོར་གསོལ་བ་འདེབས་པ་འདིའི་རྗེས་ཟློས་གྱིས། ཞེས་བརྗོད། སྔར་དགེ་ཚུལ་སྒྲུབ་མཁན་དེ་ཡིན་པའི་དབང་དུ་བཏང་ནས། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་སློབ་དཔོན་ལ་མཁན་པོར་གསོལ་གྱི། སློབ་དཔོན་བདག་གི་མཁན་པོ་མཛད་དུ་གསོལ། སློབ་དཔོན་མཁན་པོས་བདག་བསྙེན་པར་རྫོགས་པར་བགྱིའོ། །ཞེས་ལན་གསུམ་བྱ། འདིར་མཁན་པོ་ཡིན་ན་དེ་དང་། མཁན་སློབ་གང་རུང་མིན་ན་བཙུན་པ་ཞེས་བསྒྱུར་ཤེས་དགོས། གསུམ་པའི་མཇུག་ཏུ་བསྙེན་རྫོགས་ཀྱི་མཁན་པོར་འགྱུར་ཞིང་། མཇུག་ཏུ་ཐབས་ལེགས་བྱའོ། །དེ་ནས་ཕྱག་གསུམ་འཚོལ་ལ་ངེད་ཀྱི་མདུན་དུ་ཤོག་ཅིག་ཅེས་བསྒོ། གྲོོགས་བྱེད་པ་ཆོས་གོས་གསུམ་སོ་སོར་བལྟབ་པ་ཕྲག་པ་གཡོན་པ་ལ་བཀལ་ནས། མཁན་པོ་དང་བསྒྲུབ་བྱ་གཉིས་འགྲེང་བའམ་མ་བདེ་ན་བསྒྲུབ་བྱ་འགྲེང་སྟེ་གཉིས་ཀའི་ལག་པ་གཡོན་པ་འོག་དང་གཡས་པ་སྟེང་དུ་བྱས་ཏེ། སྣམ་སྦྱར་དངོས་སམ། དེའི་རྒྱུར་མི་རུང་བའི་དོད་ཙམ་ཡིན་ན་བཟུང་སྟེ་འདི་སྣམ་སྦྱར་དུ་བྱིན་གྱིས་བརླབས་སྙམ་པ་གྱིས་ལ། འདིའི་རྗེས་ཟློས་གྱིས་ཤིག །སྣམ་སྦྱར་ཡིན་ན། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་བགྱིས་ལགས་པ། རུང་བར་སྤྱད་པར་འོས་པ་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་པོ། །ཞེས་ལན་གསུམ། དངོས་མིན་པའི་དོད་ཙམ་ལ་ནི། བདག་མིང་འདི་ཞེས་བགྱི་བའི་གོས་འདི་སྣམ་སྦྱར་དུ་བྱིན་གྱིས་བརླབ་པོ། །ཞེས་བྱ་དགོས་ཏེ་ཁྱད་པར་རོ། །ཐབས་ལེགས་བྱས་ཏེ་ཕྲག་པ་གཡས་སུ་སྤོ། དེ་བཞིན་དུ་ཇ་གོས་དང་མཐང་གོས་གཉིས་ལ་དེ་གཉིས་བྱིན་གྱིས་བརླབ་པའི་བསམ་པ་དང་རྗེས་ཟློས་བྱ་ཞིང་། སྣམ་སྦྱར་གྱི་གནས་སུ་ཇ་གོས་དང་མཐང་གོས་ཞེས་སྦྱོར། ཐབས་ལེགས་ཀྱང་བྱའོ། །དེ་ནས་མཐང་གོས་ཉིས་བལྟབ་བྱས་པ་བསྒྲུབ་བྱའི་རྒྱན་དང་། དེའི་སྟེང་དུ་བླ་གོས་དང་སྣམ་སྦྱར་སྦྲགས་ནས་བསྐོན་པའི་གཡོན་ཕྱོགས་ཕྲག་པ་གཡོན་དང་། གཡས་ཀྱི་སྣེ་མོ་གཡོན་གྱི་ཕྲག་པའི་སྟེང་དུ་བཞག །གཡས་ཀྱི་དཔུང་བ་ཕྱིར་ཕྱུང་སྟེ་ཐལ་མོ་སྙིང་ཁར་སྦྱོར་དུ་བཅུག་ལ་མགོ་བོར་མེ་ཏོག་གཏོར་ཏེ་སྨོན་ལམ་བཞི་པོ་བརྗོད་ཅིང་། བཞི་པ་ཚེ་རབས་ཐམས་ཅད་དུ་བསྙེན་རྫོགས་ཀྱི་སྡོམ་པ་རྣམ་པར་དག་པ་དང་ལྡན་པར་གྱུར་ཅིག་ཅེས་བསྒྱུར། དེ་ནས་སླར་གདིང་བའི་སྟེང་ནས་དགེ་འདུན་ལ་ཕྱག་ལན་གསུམ་བྱ་ཞིང་མེ་ཏོག་གཏོར། ལུས་ཚིག་པ་ནི་འདིར་ཡང་རུང་ངོ་། །སྣམ་སྦྱར་གྱི་རྒྱུར་རུང་བའི་གོས་ཡུག་སོགས་ཡིན་ན་བལྟབ་སྟེ་བསྒྲུབ་བྱའི་ཕྲག་པ་གཡོན་པར་བཀལ་བའི་སྣེ་མོ་གཉིས་ཀ་ལག་པས་སྔར་ལྟར་བཟུང་ལ། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་གོས་འདི་སྣམ་སྦྱར་དུ་བྱིན་གྱིས་བརླབ་བོ། །འཚལ་ལ་བར་ཆད་མ་བྱུང་ན་སྣམ་ཕྲན་དགུ་པ་ལ་སོགས་པར་བགྱི་སྟེ། གླེགས་བུ་ཕྱེད་དང་གསུམ་པ་ལ་སོགས་པར་བགྱིའོ། །བཀྲུའོ། །བརྐྱང་ངོ་། །དྲའོ། །བསྟེབ་བོ། །གཟུང་གདབ་བོ། །དྲུབ་བོ། ཁ་བསྒྱུར་རོ། །ཡང་ན་འདི་ལ་ལྷན་ཐབས་སུ་ལྷན་ནོ། །རྐྱེན་ཇི་ལྟ་བ་བཞིན་དུ་བགྱིས་ཏེ། ཆོས་གོས་འདི་ནི་རུང་བར་སྤྱད་པར་འོས་པའོ། །ལན་གསུམ་དང་། ཐབས་ལེགས་ཀྱང་བྱའོ། །བླ་གོས་ལ་གཞན་འདྲ་བ་ལ། སྣམ་ཕྲན་བདུན་པར་བགྱི་སྟེ་གླེགས་བུ་ཕྱེད་དང་གསུམ་པར་བགྱིའོ་དང་། མཐང་གོས་ལ་སྣམ་ཕྲན་ལྔ་པར་བགྱི་སྟེ་གླེགས་བུ་ཕྱེད་དང་གཉིས་པར་བགྱིའོ། །ཞེས་བསྒྱུར་ཞིང་གཞན་སྔར་ལྟར་རོ། །དེ་ནས་མཁན་པོས་དགེ་སློང་མིང་འདི་ཞེས་བགྱི་བ་དགེ་འདུན་ལ་འདིའི་ལྷུང་བཟེད་སྟོན་པའི་གྲོགས་ལྡན་མཛོད་ཅིག་ཅེས་བསྒོ། དེས་ལྷུང་བཟེད་སྟོང་པ་མ་ཡིན་པ་རང་གི་ལག་པ་གཡོན་པར་བཞག་པ་གཡས་པས་ཁ་བཀབ་སྟེ། དགེ་སློང་རེ་རེའི་མདུན་དུ་འགྲེང་ནས་འདུད་པ་དང་བཅས་པས། བཙུན་པའམ། ཚེ་དང་ལྡན་པ་དགོངས་སུ་གསོལ། ཚེ་དང་ལྡན་པ་མིང་འདི་ཞེས་བགྱི་བའི་ལྷུང་བཟེད་འདི་མི་ཆུང་ངམ་། མི་ཆེའམ། མི་སྐྱའམ་ཞེས་འདྲི་ཞིང་། རེ་རེ་ནས་ལྷུང་བཟེད་བཟང་ངོ་ཞེས་བརྗོད་ཅིང་། སྟོན་མཁན་དེ་ལ་དགེ་སློང་གཞན་ཞིག་གིས་སྟོན་ལུགས་དེ་བཞིན་དུ་བྱའོ། །མཁན་པོ་ལ་ཡང་བསྟན་དགོས་ན་སྔར་ལྟར་སྟོན། དེ་ན་ལྷུང་བཟེད་དེ་མཁན་པོ་དང་བསྒྲུབ་བྱ་གཉིས་ཀ་འགྲེང་བའི་ལག་པ་གཡོན་པར་བཞག །གཡས་པས་སྟེང་ནས་བཀབ་སྟེ། འདི་ལྷུང་བཟེད་དུ་བྱིན་གྱིས་བརླབ་སྙམ་པ་གྱིས་ལ་འདིའི་རྗེས་ཟློས་གྱིས། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ལྷུང་བཟེད་ཟས་ལ་སྤྱད་པར་འོས་པ་དྲང་སྲོང་གི་སྣོད་འདི་བསླང་བའི་སྣོད་དུ་བྱིན་གྱིས་བརླབ་པོ། །ཞེས་ལན་གསུམ་དང་། ཐབས་ལེགས་བྱའོ། །དེ་ནས་གདིང་བ་དང་ཆུ་ཚགས་སྟེར་ལུགས་རབ་བྱུང་གི་སྐབས་ཇི་ལྟ་བ་བཞིན་བྱའོ། །བསྒྲུབ་བྱའི་ལུས་ཚགས་གོང་དུའམ་སྐབས་འདིར་བྱ་བ་གཙོ་ཆེ་ཡང་གང་བདེ། བསྒྲུབ་བྱ་གདིང་བའི་སྟེང་དུ་ཚུར་བསྟན་ནས་ལས་ཐོས་པའི་ས་ཡིན་ན་རྣ་བ་འགེབས་སུ་འཇུག་ཅིང་ལས་མི་ཐོས་པར་བྱས་ལ་བཞག །དེ་ནས་མཁན་པོས། ལས་ཐམས་ཅད་ཀྱི་སྔོན་དུ་འགྲོ་བ་གཉིས་ལས། ཐོག་མར་ཡུལ་དུས་ཀྱི་སྟོབས་ཀྱིས་བཤགས་པར་མ་ནུས་པའི་ལྟུང་བ་ཐུན་མོང་བ་ལས་ལ་མི་བསྒྲིབ་པའི་སླད་དུ། གསོལ་བའི་ལས་ཀྱིས་བྱིན་གྱིས་བརླབ་པར་བགྱི་བས། དགེ་འདུན་རྣམས་སྤྱོད་ལམ་བསྟུན་ནས་གསོལ་བའི་ལས་ལ་ཐུགས་གཏད་པར་ཞུ། །དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱི་བསྙེན་པར་རྫོགས་པའི་འཕྲིན་ལས་ལ། བདག་ཅག་དགེ་འདུན་ཐམས་ཅད་ནི་ལྟུང་བ་དང་བཅས་པར་གྱུར་ན་གང་གི་མདུན་དུ་བདག་ཅག་ལྟུང་བ་དེ་ཆོས་བཞིན་དུ་བགྱི་བ། བདག་ཅག་ལས་དགེ་སློང་གནས་གཞན་དུ་མཆིས་ལ་དགེ་སློང་གི་མདུན་དུ་ལྟུང་བ་དེ་ཆོས་བཞིན་དུ་སླར་བགྱིད་པར་སྤྲོ་བ་སུ་ཡང་མ་མཆིས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དེང་ལྟུང་བ་བྱིན་གྱིས་བརླབས་ཏེ་བསྙེན་པར་རྫོགས་པའི་འཕྲིན་ལས་མཛད་ལ། སླད་ཀྱིས་དགེ་སློང་གི་མདུན་དུ་ལྟུང་བ་དེ་ཆོས་བཞིན་དུ་སླར་མཛད་དོ། །འདི་ནི་གསོལ་བའོ། །དགེ་འདུན་ཐུགས་མཐུན་པའི་ཕྱིར་གནས་ལ་བློ་མཐུན་བགྱི་བ་ནི། ལས་མཛད་པའི་གནས་འདི་ཉེ་འཁོར་དང་བཅས་པ་ཚུན་ཆད་བསྙེན་རྫོགས་ཀྱི་འཕྲིན་ལས་ཀྱི་གནས་སུ་ཐུགས་བསྟུན་པ་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་ལགས་པ་ནང་མཚམས་དང་། ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་འཕྲིན་ལས་ཀྱི་གནས་སུ་བཞེད་པ། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་གནས་ཐམས་ཅད་ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་འཕྲིན་ལས་ཀྱི་གནས་སུ་བློ་མཐུན་པར་བགྱིའོ། །འདི་ནི་གསོལ་བའོ། །གསོལ་བ་ཐལ། བརྗོད་པ་འཇུག་སྡུད་དང་བཅས་པ་ལ་ཐུགས་གཏད་པར་ཞུ། །དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་འཕྲིན་ལས་ཀྱི་གནས་སུ་བཞེད་དེ། དེའི་སླད་དུ་དགེ་འདུན་གྱི་གནས་ཐམས་ཅད་ལགས་པ་ནང་མཚམས་དང་། ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་འཕྲིན་ལས་ཀྱི་གནས་སུ་བློ་མཐུན་པར་བགྱི་ན། ཚེ་དང་ལྡན་པ་གང་དག་གནས་ཐམས་ཅད་ལགས་པ་ནང་མཚམས་དང་། ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་འཕྲིན་ལས་ཀྱི་གནས་སུ་བློ་མཐུན་པར་བགྱི་བར་བཟོད་པ་དེ་དག་ནི་ཅང་མ་གསུངས་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས། དགེ་འདུན་གྱི་གནས་ཐམས་ཅད་ལགས་པ་ནང་མཚམས་དང་། ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་འཕྲིན་ལས་ཀྱི་བློ་མཐུན་པར་བགྱིས་ལགས་ཏེ། འདི་ལྟར་ཅང་མི་གསུངས་དེ་དེ་བཞིན་དུ་འཛིན་ཏོ། །འདིར་གནས་གྲུབ་པ་དང་བགྱིས་པ་གཉིས་བཞག་སྟེ་ལགས་པ་ཙམ་ཞིག་བརྗོད་པ་ནི་གཙོ་ཆེ་བའི་དབང་དུ་བྱས་པའོ། །དེ་ནས་ལས་བྱེད་པ་པོས། གནས་བརྟན་མིང་འདི་ཞེས་བགྱི་བ་ཁྱེད་མཁན་པོ་མིང་འདི་ཞེས་བགྱི་བས་ཚེ་དང་ལྡན་པ་མིང་འདི་ཞེས་བགྱི་བ་ལ་གསང་སྟེ་སྟོན་པར་སྤྲོའམ། དེས་སྤྲོ་ལགས་ཞེས་ལན་གདབ། དེ་ནས། གསང་སྟེ་སྟོན་པ་བསྐོ་བའི་ལས་ལ་ཐུགས་གཏད་པར་ཞུ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་མཁན་པོ་མིང་འདི་ཞེས་བགྱི་བས། ཚེ་དང་ལྡན་པ་མིང་འདི་ཞེས་བགྱི་བ་ལ་གསང་སྟེ་སྟོན་པར་སྤྲོ་བ། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་སློང་མིང་འདི་ཞེས་བགྱི་བ་འདི་ཚེ་དང་ལྡན་པ་མིང་འདི་ཞེས་བགྱི་བ་ལ་གསང་སྟེ་སྟོན་ཏོ། །འདི་ནི་གསོལ་བའོ། །དེ་ནས་གསང་སྟོན་དེས་བསྒྲུབ་བྱ་ལྐོག་ཏུ་འཁྲིད་ནས་རང་ལ་ཕྱག་གསུམ་འཚལ་དུ་འཇུག་ཅིང་། མདུན་དུ་ཙོག་པར་འདུག་ཏུ་བཅུག་སྟེ་སྙིང་ཁར་ཐལ་མོ་སྦྱོར་དུ་བཅུག་ལ། ཁྱོད་བསྙེན་པར་རྫོགས་པར་བྱེད་པ་ལ་མངོན་དུ་གྱུར་པ་བཅུ་ཚང་དགོས་ཤིང་། དེའི་ནང་ནས་ཡོངས་སུ་དག་པ་མངོན་དུ་གྱུར་པ་བར་ཆད་ཀྱི་ཆོས་དང་མི་ལྡན་པ་ཞིག་དགོས། བར་ཆད་ཡོད་མེད་ངས་དྲིས་ན་ཤེས་པས་དྲི་བ་འདི་རྣམས་ལ་ལན་ལེགས་པར་ཐོབ་ཅིག །ཚེ་དང་ལྡན་པ་ཁྱོད་ཉོན་ཅིག །འདི་ནི་ཁྱོད་ཀྱི་བདེན་པའི་དུས་འདི་ནི་ཁྱོད་ཀྱི་འབྱུང་བའི་དུས་ཏེ། ཁོ་བོས་ཁྱོད་ལ་ཅུང་ཟད་དྲི་ཡི། ཁྱོད་མ་འཛེམ་པར་བྱོས་ལ་ཡིན་པ་ལ་ཡིན་ཞེས་སྨོས། མ་ཡིན་པ་ལ་མ་ཡིན་ཞེས་ལན་ལེགས་པར་ཐོབ་ཅིག །ཁྱོད་སྐྱེས་པ་ཡིན་ནམ། དེས་ཡིན་ལགས། སྐྱེས་པའི་དབང་པོ་དང་ལྡན་ནམ། ལྡན་ལགས། ཞེས་སོགས་དྲི་བ་དང་མཐུན་པའི་ལན་གདབ། ལོ་ཉི་ཤུ་ལོན་ནམ། ཁྱོད་ཀྱི་ཆོས་གོས་གསུམ་དང་ལྷུང་བཟེད་ཚང་ངམ། ཁྱོད་ཕ་མ་གསོན་པས་མ་གནང་བ་མ་ཡིན་ནམ། བྲན་མ་ཡིན་ནམ། བརྐུས་པ་མ་ཡིན་ནམ། རྙེད་བཙོན་པ་མ་ཡིན་ནམ། རྩོད་པ་ཅན༴ བཙོང་བ༴ རྒྱལ་པོས་བཀྲབས་པ༴ རྒྱལ་པོ་ལ་བསྡིགས་པ༴ རྒྱལ་པོ་ལ་གནོད་པའི་ལས་བྱེད་པ༴ རྒྱལ་པོ་ལ་གནོད་པའི་ལས་བྱས་སམ་བྱེད་དུ་བཅུག་པ༴ ཆོམ་རྐུན་པར་གྲགས་པ༴ ཟ་མ་མ་ནིང་༴ དགེ་སློང་མ་སུན་ཕྱུང་བ༴ རྐུ་ཐབས་སུ་གནས་པ༴ ཐ་དད་དུ་གནས་པ༴ གནས་པར་མི་བྱ་བ༴ མུ་སྟེགས་ཅན༴ མུ་སྟེགས་ཅན་ཞུགས་པ༴ ཕ་བསད་པ༴ མ་བསད་པ༴ དགྲ་བཅོམ་པ༴ དགེ་འདུན་གྱི་དབྱེན་བྱས་པ༴ དེ་བཞིན་གཤེགས་པ་ལ་ངན་སེམས་གྱི་ཁྲག་ཕྱུང་བ༴ སྤྲུལ་པ༴ དུད་འགྲོ་མ་ཡིན་ནམ། མ་ལགས་ཞེས་བྱ། ཁྱོད་ལ་ལ་ལའི་བུ་ལོན་མང་ཡང་རུང་ཉུང་ཡང་རུང་བསྙེན་པར་རྫོགས་ནས་འཇལ་མི་ནུས་པ་ཅུང་ཟད་ཀྱང་ཆགས་པ་མེད་དམ། ཁྱོད་སྔོན་རབ་ཏུ་བྱུང་བ་མ་ཡིན་ནམ། ཁྱོད་ཕམ་པར་གྱུར་པ་བཞི་ལས་ལྟུང་བ་གང་ཡང་རུང་བ་ཞིག་བྱུང་བ་མ་ཡིན་ནམ། ཇི་ལྟར་ཁྱོད་ད་ལྟ་རབ་ཏུ་བྱུང་བ་ཡིན་ནམ། ཁྱོད་ཀྱིས་ཚངས་པར་སྤྱོད་པ་སྤྱད་དམ། ལན་སྤྱད་ལགས་ཞེས་བརྗོད། ཁྱོད་ཀྱི་མིང་ཅི། དེས་བདག་གི་མིང་འདི་ཞེས་བགྱི། ཁྱོད་ཀྱི་མཁན་པོའི་མིང་ཅི། དོན་གྱི་སླད་དུ་མཚན་ནས་སྨོས་ཏེ་མཁན་པོའི་མིང་འདི་ཞེས་བགྱི། ཞེས་བརྗོད་དོ། །ཚེ་དང་ལྡན་པ་ཁྱོད་ཉོན་ཅིག །མི་རྣམས་ཀྱི་ལུས་ལ་ལུས་ཀྱི་ནད་རྣམས་པ་འདི་ལྟ་བུ་དག་འབྱུང་སྟེ། མཛེ་དང་། འབྲས་དང་། ཕོལ་ཡིག་དང་། འབྲུམ་ནད་དང་། ཤཀྲ་དང་། ཁྱི་རྔོ་དང་། གཡའ་བ་དང་། གློག་པ་དང་། རྐང་ཤུ་དང་། སྐེམ་ནད་དང་། སྐེམ་པ་དང་། བརྗེད་བྱེད་དང་། བཀྲེས་རྔབ་དང་། སྐྱ་རྦབ་དང་། རྐང་བམ་དང་། མཚན་པར་རྡོལ་བ་དང་། རིམས་དང་། རིམས་དྲག་པོ་དང་། ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་དང་། འདུས་པ་དང་། རིམས་ཉིན་རེ་བ་དང་། རྟག་པའི་རིམས་དང་། རིམས་ལྡང་དུབ་པ་དང་། ཤུ་བ་དང་། གསུང་བ་དང་། སྐྱིགས་བུ་དང་། ལུད་པ་དང་། དབུགས་མི་བདེ་བ་དང་། ལྷོག་པ་དང་། ཡན་ལག་ཏུ་ཟུག་པ་དང་། སྐྲན་དང་། ཁྲག་ནད་དང་། མཁྲིས་ནད་དང་། གཞང་འབྲུམ་དང་། སྐྱུགས་བྲོ་བ་དང་། ཆུ་འགགས་པ་དང་། ངལ་བ་དང་། ལུས་ཚ་བ་དང་། རྩིབས་ལོགས་ཚ་བ་དང་། རུས་པ་ལ་ཟུག་པ་སྟེ་ལུས་ཀྱི་ནད་འདི་ལྟ་བུ་འདི་དག་ལས་གང་ཡང་རུང་བ་དང་། འདི་ལྟ་བུ་གཞན་དག་ཀྱང་ཁྱོད་ཀྱི་ལུས་ལ་མེད་དམ། དེས་མེད་ལགས་ཞེས་བྱ། ཚེ་དང་ལྡན་པ་ཁྱོད་ཉོན་ཅིག །ཁྱོད་ལ་ད་ལྟ་ངས་དྲིས་པ་དེ་ཉ ིད་དགེ་འདུན་གྱི་དབུས་སུ་ཡང་ཚངས་པར་མཚུངས་པར་སྤྱོད་པའི་མཁས་པ་རྣམས་ཁྱོད་ལ་འདྲི་ཡིས། དེར་ཡང་ཁྱོད་ཀྱིས་མ་འཛེམ་པར་བྱོས་ལ། ཡིན་པ་ལ་ཡིན་ཞེས་དང་། མ་ཡིན་པ་ལ་མ་ཡིན་ཞེས་ལན་ཐོབ་ཅིག །དེ་ལྟར་ན་ཁྱོད་བར་ཆད་ཀྱི་དག་པར་འདུག་ཅིང་ངས་དགེ་འདུན་ལ་ཞུས་ནས་ཡོང་གི ཁྱོད་མ་བོས་ཀྱི་བར་དུ་མ་འོང་བར་འདིར་སྡོད་ཅིག །ཅེས་བརྗོད། དགེ་འདུན་གྱི་དྲུང་དུ་འོང་སྟེ་རྒན་པའི་མཐའ་ལོགས་སུ་འགྲེང་ནས་འདུད་པ་དང་བཅས་ཏེ། དགེ་འདུན་བཙུན་པ་རྣམས་གསན་དུ་གསོལ། བདག་གིས་མཁན་པོ་མིང་འདི་ཞེས་བགྱི་བས། ཚེ་དང་ལྡན་པ་མིང་འདི་ཞེས་བགྱི་བ་ལ་བར་ཆད་ཀྱི་ཆོས་རྣམས་གསང་སྟེ་རྗེས་སུ་བསྟན་ན། དེ་ཡང་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆི་ན། ཅི་མཆི་ཞིག་གམ། ཐམས་ཅད་ཀྱིས་གལ་ཏེ་ཡོངས་སུ་དག་ནའོ་ཞེས་བརྗོད། མ་བརྗོད་ན་ཉེས་བྱས་སོ། །དེ་ནས་སོང་སྟེ་བསྒྲུབ་བྱ་ལ་དགེ་འདུན་གྱིས་གནང་གི ཤོག་ཅིག་ཅེས་བརྗོད་དེ་འཁྲིད་ནས་གདིང་བའི་སྟེང་དུ་འདུག་སྟེ་དགེ་འདུན་སྤྱི་ལ་དམིགས་པའི་ཕྱག་གསུམ་འཚལ་དུ་བཅུག་ལ། རང་ཉིད་གྲལ་དུ་འཁོད་པར་བྱའོ། །དེ་ནས་བསྒྲུབ་བྱ་དེས་སྟོན་པ་ལ་ཕྱག་གསུམ་དང་། དེ་ནས་དགེ་འདུན་སྤྱི་ལ་ཕྱག་གསུམ་དང་། དེ་ནས་ལས་བྱེད་པ་རང་ལ་ཕྱག་གསུམ་བྱེད་དུ་བཅུག་སྟེ། ཕ་གུའི་སྟེང་དུ་རྩྭ་བཏིང་བ་ལ་རྟིང་པ་གཉིས་ཀྱིས་མནན་ནས་ཙོག་ཙོག་པུར་ཐལ་མོ་སྙིང་ཁར་སྦྱོར་ལ་འདུག་ཅིག་ཅེས་བསྒོ། དེ་ནས་ལས་བྱེད་པས། ཁྱོད་བསྙེན་པར་རྫོགས་པར་བྱེད་པ་ལ། དགེ་འདུན་ལ་གསོལ་བ་ལན་གསུམ་འདེབས་དགོས་པས་འདིའི་རྗེས་ཟློས་གྱིས་ཤིག །དགེ་འདུན་བཙུན་པ་རྣམས་གསན་དུ་གསོལ། བདག་མིང་འདི་ཞེས་བགྱི་བ། དོན་གྱི་སླད་དུ་མཚན་ནས་སྨོས་ཏེ་མཁན་པོ་མིང་འདི་ཞེས་བགྱི་བས། དགེ་འདུན་ལས་བསྙེན་པར་རྫོགས་པར་འཚལ་ཏེ། བདག་མིང་འདི་ཞེས་བགྱི་བ་དོན་གྱི་སླད་དུ་མཚན་ནས་སྨོས་ཏེ་མཁན་པོ་མིང་འདི་ཞེས་བགྱི་བས། དགེ་འདུན་ལས་བསྙེན་པར་རྫོགས་པར་གསོལ་ན། དགེ་འདུན་བཙུན་པ་རྣམས་ཀྱིས་བདག་བསྙེན་པར་རྫོགས་པར་མཛད་དུ་གསོལ། དགེ་འདུན་བཙུན་པ་རྣམས་ཀྱིས་བདག་དྲང་དུ་གསོལ། དགེ་འདུན་བཙུན་པ་རྣམས་ཀྱིས་བདག་རྗེས་སུ་གཟུང་དུ་གསོལ། དགེ་འདུན་བཙུན་པ་རྣམས་ཀྱིས་བདག་ལ་རྗེས་སུ་བསྟན་དུ་གསོལ། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ལ་ཐུགས་བརྩེ་བར་མཛད་དུ་གསོལ། ཞེས་ལན་གསུམ་རྗེས་ཟློས་བྱེད་དུ་གཞུག་གོ །དེ་ནས་ནང་དུ་བར་ཆད་འདྲི་བ་ནི། དགེ་འདུན་ཐུགས་ཡིད་ཆེས་པའི་ཕྱིར་དུ་དགེ་འདུན་གྱི་ནང་དུ་བར་ཆད་དྲི་བ་ལ་ཐུགས་བསྟུན་པའི་གསོལ་བའི་ལས་བགྱིད་པས། དགེ་འདུན་རྣམས་སྤྱོད་ལམ་བསྟུན་ནས་གསོལ་བའི་ལས་ལ་ཐུགས་གཏད་པར་ཞུ། །དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ཏེ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་བདག་གིས་དགེ་འདུན་གྱི་ནང་དུ་མཁན་པོ་མིང་འདི་ཞེས་བགྱི་བས། མིང་འདི་ཞེས་བགྱི་ལ་བར་ཆད་ཀྱི་ཆོས་རྣམས་དྲི་བར་བགྱིའོ། །འདི་ནི་གསོལ་བའོ། །དེ་ནས་ངེད་ལ་ཕྱག་གསུམ་འཚོལ་ལ་སྔར་བཞིན་ཕ་གུའི་སྟེང་དུ་འདུག་གཅིག་ཅེས་བསྒོ། འདུག་པ་དང་ཁྱོད་བསྙེན་པར་རྫོགས་པར་བྱེད་པ་ལ་རྒྱུད་བར་ཆད་ཀྱི་ཆོས་དང་མི་ལྡན་ཅིང་ཡོངས་སུ་དག་པ་ཞིག་དགོས། བར་ཆད་ཡོད་མེད་སྔར་གསང་སྟོན་གྱི་སྐབས་དྲིས་ཟིན་ཡང་། བར་ཆད་འགའ་ཞིག་གློ་བུར་འབྱུང་བ་ཡང་སྲིད། སྔར་མ་དྲན་པ་དྲན་པའང་སྲིད་པ་སོགས་དགོས་པ་འགའ་ཞིག་ཡོད་ཀྱང་། འདིར་གཙོ་ཆེར་དགེ་འདུན་ཐུགས་ཡིད་ཆེས་པའི་དོན་དུ་ནང་དུ་འདྲི་བ་ཡིན་པས་ལན་དྲང་པོར་ཐོབ་ཅིག །ཚེ་དང་ལྡན་པ་ཁྱོད་ཉོན་ཅིག །འདི་ནི་ཁྱོད་ཀྱི་བདེན་པའི་དུས། འདི་ནི་འབྱུང་བའི་དུས་ཏེ། ཁོ་བོས་ཁྱོད་ལ་ཅུང་ཟད་དྲི་ཡིས་ཁྱོད་མ་འཛེམ་པར་བྱོས་ལ་ཡིན་པ་ལ་ཡིན་པ་དང་། མ་ཡིན་པ་ལ་མ་ཡིན་ཞེས་སྨྲོས། ཞེས་པ་ནས། འདི་ལྟ་བུ་གཞན་དག་ཀྱང་ཁྱོད་ཀྱི་ལུས་ལ་མེད་དམ་ཞེས་པའི་བར་སྔར་གསང་སྟོན་གྱིས་དྲིས་པ་ལྟར་བྱའོ། །དེ་ནས་ལས་བྱེད་པས། ཁྱོད་བསྙེན་པར་རྫོགས་པར་བྱེད་པ་ལ་མངོན་གྱུར་བཅུའི་སྒོ་ནས་བསྒྲུབ་དགོས་ཤིང་། དེ་ཡང་སྟོན་པ་སངས་རྒྱས་དང་ཆོས་དང་དགེ་འདུན་དང་སློབ་དཔོན་དང་མཁན་པོ་དང་ཡོ་བྱེད་དང་ཡོངས་སུ་དག་པ་དང་གསོལ་བ་གདབ་པ་དང་བར་ཆད་དྲི་བ་དང་ལས་མངོན་དུ་གྱུར་པ་སྟེ་བཅུ་ལས། མངོན་གྱུར་གཞན་ཐམས་ཅད་ཕུན་སུམ་ཚོགས་པའི་ཚུལ་གྱིས་ཚང་། བསྙེན་རྫོགས་ཀྱི་སྡོམ་པ་སྐྱེ་བ་ལ་བསྙེན་པར་རྫོགས་པར་འདོད་པ་མངོན་དུ་གྱུར་པ་བསམ་པའི་རྟེན་རྒྱུའི་ཀུན་སློང་ཐོབ་འདོད་དང་། དུས་ཀྱི་ཀུན་སློང་ཐབས་ཤེས། ཡུལ་དང་དུས་དང་གནས་སྐབས་དང་སེམས་ཅན་དང་ཡན་ལག་ངེས་པའི་འགལ་རྐྱེན་ངེས་པ་ལྔ་བྲལ། མཁན་སློབ་དང་ཆོ་ག་ཚང་བ་དང་བསླབ་བྱ་ལ་སློབ་འདོད་ཡོད་པའི་མཐུན་རྐྱེན་ཕུན་སུམ་ཚོགས་པ་གསུམ་དང་ལྡན་པ་རྣམས་དགོས་ཤིང་། སྡོམ་པ་ལ་ངེས་འབྱུང་གི་བསམ་པས་ཟིན་པ་གལ་ཆེ་བས། བསམ་པ་འདི་བཞིན་དུ་གྱིས། ཇི་སྐད་དུ་མདོ་དྲན་པ་ཉེར་གཞག་ལས། སེམས་ཅན་དམྱལ་བ་དམྱལ་མེས་ཉམས། །ཞེས་སོགས་ནས། སངས་རྒྱས་ཀྱི་གོ་འཕང་ཐོབ་པར་བྱ་ཞེས་པའི་བར་སྔར་ལྟར་དང་། དེའི་ཕྱིར་དུ་བསྟན་པའི་གཞི་ལ་ཚུལ་ཁྲིམས་ཀྱི་བསླབ་པའི་གཙོ་བོ་སོ་སོར་ཐར་པའི་སྡོམ་པའི་ཆོ་ག་བསྙེན་རྫོགས་ཀྱི་སྡོམ་པ་རྣམ་པར་དག་པ་བླངས་ནས་མ་ཤིའི་བར་དུ་ལེགས་པར་བསྲུང་སྙམ་པ་བགྱིས་ལ་ཡིད་གཞན་དུ་མ་གཡེང་བར་སྡོད་ཅིག །དགེ་འདུན་རྣམས་སྤྱོད་ལམ་བསྟུན་ནས་ཐུགས་གཏད་ཅིང་། བསྒྲུབ་བྱ་ཆོ་ག་མཁན་སློབ་དགེ་འདུན་ལ་དེ་དང་དེར་འདུ་ཤེས་མ་འཁྲུལ་པ་དེ་དང་། ལས་ཞེ་ཐག་པ་ནས་བྱེད་འདོད་པ་དང་། བསླབ་བྱ་ལ་ཕན་པར་འདོད་པའི་དགོངས་པ་གསུམ་དང་ལྡན་པའི་སྒོ་ནས་གསོལ་པའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། ཚེ་དང་ལྡན་པ་མིང་འདི་ཞེས་བགྱི་འདིའམ། འདི་དག་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ནས། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ཏེ་སྐྱེས་པ་ཡང་ལགས། སྐྱེས་པའི་དབང་པོ་དང་ལྡན། ལོ་ཉི་ཤུ་ཡང་ལོན། འདིའི་ཆོས་གོས་གསུམ་དང་ལྷུང་བཟེད་ཀྱང་ཚང་། བར་ཆད་ཀྱི་ཆོས་རྣམས་ཀྱང་ཡོངས་སུ་དག་གོ་ཞེས་ཁོ་ན་ཉིད་མཆི་སྟེ། ཚེ་དང་ལྡན་པ་མིང་འདི་ཞེས་བགྱི་བ་འདི་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་ཚེ་དང་ལྡན་པ་མིང་འདི་ཞེས་བགྱི་བ། མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་མཛད་དོ། །འདི་ནི་གསོལ་བའོ། །གསོལ་བ་ཐལ། དེ་ལྟར་གསོལ་བ་གཅིག་དང་བརྗོད་པ་གསུམ་སྟེ་གསོལ་བཞིའི་ལས་ཀྱིས་བསྒྲུབ་དགོས་པས། བརྗོད་པ་དང་པོ་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། ཚེ་དང་ལྡན་པ་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་བས། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས། དགེ་འདུན་ལ་བསྙེན་པར་རྫོགས་པར་གསོལ་ཏེ། སྐྱེས་པ་ཡང་ལགས། སྐྱེས་པའི་དབང་པོ་དང་ཡང་ལྡན། ལོ་ཉི་ཤུ་ཡང་ལོན། འདིའི་ཆོས་གོས་གསུམ་དང་ལྷུང་བཟེད་ཀྱང་ཚང་། བར་ཆད་ཀྱི་ཆོས་རྣམས་ཀྱང་ཡོངས་སུ་དག་གོ་ཞེས་ཁོ་ན་ཉིད་མཆི་སྟེ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས། དགེ་འདུན་ལས་བསྙེན་པར་རྫོགས་པར་གསོལ་ན། དེའི་སླད་དུ་དགེ་འདུན་གྱིས་མིང་འདི་ཞེས་བགྱི་བ་འདི། མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་བཟོད་པ་དེ་དག་ནི་ཅང་མ་གསུང་ཞིག །གང་དག་མི་བཟོད་པ་དེ་དག་ནི་གསུང་ཞིག །བརྗོད་པ་དང་པོ་ཐལ། གཉིས་པ་ལ་ཐུགས་གཏད་པར་ཞུ། ཞེས་བྱས་ལ་གཉིས་པ་བྱ། བརྗོད་པ་གསུམ་པའི་སྐབས་སུ་ལས་ཆོགས་པ་ཡིན་ཏེ། མདོ་རྩར་བརྗོད་པ་ཐ་མའི་ཆ་གསུམ་པ་ལ་གྲུབ་པ་ཉིད་དོ། །ཞེས་གསུངས་པ་ལྟར། མཆི་སྟེ་ཞེས་པ་ཡན་ཆད་ངོ་བོ་བརྗོད་པ་དེ་ནས་བཟུང་གསོལ་ནའི་བར་བྱ་བརྗོད་པ། དེའི་སླད་དུ་མན་ཆད་བྱེད་ལ་བརྗོད་པ་ཡིན་པས། ངོ་བོ་བརྗོད་པ་དང་བྱ་བ་བརྗོད་པ་གཉིས་རྫོགས་པ་གསོལ་ན་ཞེས་པའི་ཚིག་འགགས་པ་དང་མཉམ་དུ་ཁྱོད་ལ་བསྙེན་རྫོགས་ཀྱི་སྡོམ་པ་སྐྱེ་ཞིང་ངེད་ཁྱོད་ཀྱི་སློབ་དཔོན་དུ་གྱུར་པ་ཡིན་པས། གསོལ་ན་ཞེས་པའི་སྐབས་སུ་ངེད་ཀྱིས་སྐད་གཟེངས་མཐོ་བ་ཞིག་བརྗོད་ཅིང་། སེ་གོལ་གྱི་བརྡ་སྦྱོར་བས་བདག་གི་རྒྱུད་ལ་བསྙེན་རྫོགས་ཀྱི་སྡོམ་པ་སྐྱེས་པའི་དུས་ནི་འདི་ཡིན་སྙམ་པའི་ཐོབ་བློ་སྐྱེས་པ་ཤིན་ཏུ་གལ་ཆེ། དེའི་སླད་དུ་ཞེས་པའི་ཚིག་བརྗོད་པའི་ཚེ་སྡོམ་པ་སྐྱེས་ཟིན་ཅིང་། དགེ་སློང་དུ་གྱུར་སྙམ་དུ་ཡིད་མ་གཡེང་བར་སྡོད་ཅིག །བརྗོད་པ་གསུམ་པ་ལ་ཐུགས་གཏད་པར་ཞུ། ཞེས་བྱས་ལ་གསུམ་པ་བྱ། དེ་ནས་དགེ་འདུན་རྣམས་ལས་ཀྱི་མཇུག་སྡུད་ལ་ཐུགས་གཏད་པར་ཞུ། དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་མིང་འདི་ཞེས་བ གྱི་བ་འདི་མཁན་པོ་མིང་འདི་ཞེས་བྱ་བས་བསྙེན་པར་རྫོགས་པར་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏེ། དེ་ལྟར་གསོལ་བཞིའི་ལས་ཀྱིས་ཁྱོད་ཀྱི་རྒྱུད་ལ་བསྙེན་རྫོགས་ཀྱི་སྡོམ་པ་འཚལ་ཚུལ་གྱི་རྒྱུན་སྡོམ་ཞིང་འགོག་པར་བྱེད་པའི་ཆུ་ལོན་ལྟ་བུ་ཐོབ། དགེ་སློང་དུ་གྱུར་པས་དགའ་བ་བསྒོམས་ཤིག །དེས་དངོས་གཞི་གྲུབ མཇུག་གི་ཆོ་ག་ལ་དུས་གོ་བ་དང་བསླབ་པ་བརྗོད་པ་གཉིས་ཡོད་པའི་དང་པོ་ནི། གནས་བརྟན་ཆེ་གེ་མོས་མཛོད་ཅིག །ཅེས་བརྗོད། དེ་ནས་དགེ་སློང་དེས་གྲིབ་ཚོད་མཇལ་ལུགས་དགེ་ཚུལ་གྱི་སྐབས་ལྟར་བྱས་ལ། འདིར་མཇུག་ཆོག་གཉིས་ལས་དང་པོ་བསྙེན་བཀུར་གྱི་གནས་དང་གནས་མ་ཡིན་པ་ཤེས་པར་བྱ་བའི་དོན་དུ་དུས་གོ་བ་ནི། བསྙེན་བཀུར་གྱི་གནས་ནི་རང་ལས་གྲིབ་མ་སོར་གཅིག་ཡན་ཆད་ཀྱི་དུས་ཀྱི་བསླབ་པ་རྒན་པའི་དགེ་སློང་རྣམས་ཡིན། གནས་མ་ཡིན་པ་རང་ལས་བསླབ་པ་གཞོན་པའི་དགེ་སློང་རྣམས་དང་། ས་གཞན་ན་གནས་པའི་དགེ་སློང་རྣམས་དང་། དགེ་སློང་མ་རྣམས་དང་དགེ་སློབ་མ་རྣམས་དང་། དགེ་ཚུལ་ཕ་མ་དང་དགེ་བསྙེན་མ་ལ་སོགས་པ་རྣམས་ཡིན། དེ་ཡང་རགས་པ་ལོ་དང་ཟླ་བས་འཇོག་པར་མ་ཟད། ཐ་ན་གྲིབ་མ་སོར་གཅིག་ཡན་ཆད་ཀྱིས་འཇོག་པ་ཡིན། བསྙེན་བཀུར་རང་གི་ངོ་བོ་ནི་ཕྱག་འཚལ་བ་དང་། གྲལ་འགོར་གཏོང་བ་དང་། རྙེད་པ་དང་པོར་འདྲིམ་པ་ལ་སོགས་པ་ཡིན། རིག་པར་བྱ་བའི་དངོས་པོ་དྲུག་གམ་བདུན་ཙམ་ཡོད་པ་ལས། མདོ་རྩ་འགྲེལ་ལས། ཕྲ་བའི་རིམ་པ་ནས་བཤད་ཀྱང་བརྗོད་པ་པོས་བརྗོད་བདེ་ཞིང་ཉན་པ་པོས་བཟུང་བདེ་བའི་ཕྱིར་ལོ་དྲི་མཁན་པོའི་རྗེས་སུ་འབྲངས་ནས་བརྗོད་དེ། དུས་ཚིགས་རྣམས་ཀྱི་ཕྱི་མོ་ལོ་འདི་ཡིན་པས་ད་ལོ་ལོ་འདི་ཞེས་བྱ་བ་ཡིན། དུས་ཚིགས་ལ་དགུན་དང་དཔྱིད་དང་དབྱར་དང་དབྱར་ཐུང་ངུ་དང་དབྱར་རིང་པོ་དང་ལྔ་ལས་དུས་འདི་དང་ཟླ་བ་འདི་ཡིན། དེའི་ཡར་ངོ་མར་ངོ་གཉིས་ལས་འདི་ཡིན། ཚེས་འདི་ཡིན། ཉིན་མཚན་གཉིས་ལས་ཉིན་མོ་ཡིན། སྔ་དྲོ་ཕྱི་དྲོ་གུང་གསུམ་ལས་འདི་ཡིན། གྲིབ་ཚོད་སྐྱེས་བུ་འདི་དང་རྐང་པ་འདིའི་དུས་སུ་ཁྱེད་ཀྱི་རྒྱུད་ལ་དགེ་སློང་གི་སྡོམ་པ་སྐྱེས་པ་ཡིན་པས། དེ་རྣམས་སེམས་ལ་ཞོག་ལ་རང་ལས་རྒན་པ་རྣམས་ལ་ཕྱག་དང་གྲལ་ལ་སོགས་པའི་བསྙེན་བཀུར་སྟོབ། རྒན་པས་བསྙེན་བཀུར་སྟོབས་པ་དང་དུ་ལོང་། དེ་ལྟར་བརྩིས་པས་མཉམ་པར་གྱུར་ན་ཕྱག་བྱ་མི་དགོས་ཤིང་། གྲལ་མགྱོགས་བྱས་པས་ཆོ་ག་སྟེ། མདོ་རྩ་བ་ལས། དུས་མཉམ་པ་རྣམས་ནི་གཅིག་གིས་གཅིག་ལ་ཕྱག་མི་བྱའོ། །སྔར་འོང་བ་དང་པོ་ཡིན་ནོ་ཞེས་གསུངས་སོ། །རིག་པར་བྱས་པའི་དགོས་པ་དངོས་སུ་སྡོམ་པ་ཐོབ་པའི་དུས་ཤེས་པ་དང་བསྟན་པའི་གོ་རིམ་ཤེས་ཤིང་ཁ་ན་མ་ཐོ་བས་མི་གོས་པ་དང་། བརྒྱུད་ནས་ཐར་པ་དང་ཐམས་ཅད་མཁྱེན་པ་འཐོབ་པར་འགྱུར་བ་ཡིན། དེ་རྣམས་ཀྱིས་རྫོགས་པའི་དུས་གོ་བ་སོང་། དེ་ནས་གཉིས་པ་གདམ་ངག་བརྗོད་པའི་དགོས་པ་ནི་ཐོབ་པ་མི་ཉམས་པར་བསྲུང་བའི་ཆེད་ཡིན་པས། ཚེ་དང་ལྡན་པ་ཁྱོད་ཉོན་ཅིག །བཞི་པོ་འདི་དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། དེ་ལྟར་རབ་ཏུ་བྱུང་བ་དང་། བསྙེན་པར་རྫོགས་པ་དགེ་སློང་གི་གནས་སུ་སྤངས་ཏེ། དེ་ལ་གནས་ན་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་། བསྙེན་པར་རྫོགས་པའི་དགེ་སློང་གི་དངོས་པོར་འགྱུར་རོ། །བཞི་གང་ཞེ་ན། གོས་ཕྱག་དར་ཁྲོད་པ་དང་། ཟས་བསོད་སྙོམས་པ་དང་། གནས་མལ་ཤིང་དྲུང་དང་། སྨན་བཀུས་ཏེ་བོར་བ་དང་། འདོད་པ་བསོད་ནམས་ཀྱི་མཐའ་དང་། ངལ་ཤིང་དུབ་པའི་མཐའ་གཉིས་སྤངས་ལ་སྤྱོད་པ་སྟེ། ཁྱོད་ཇི་སྲིད་འཚོའི་བར་དུ་གོས་དང་ཟས་དང་གནས་མལ་དང་སྨན་མཐའ་གཉིས་སུ་མ་ལྷུང་བ་ལ་སྤྱོད་པར་སྤྲོའམ། དེས་སྤྲོ་ལགས་ཞེས་བརྗོད། ཚེ་དང་ལྡན་པ་ཁྱོད་ཉོན་ཅིག །བཞི་པོ་འདི་དག་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། དེ་ལྟར་རབ་ཏུ་བྱུང་བ་དང་། བསྙེན་པར་རྫོགས་པ་དགེ་སློང་གི་ལྟུང་བར་འགྱུར་བའི་ཆོས་སུ་གསུངས་ཏེ། དགེ་སློང་གིས་དེ་བྱས་ན་བྱས་མ་ཐག་དགེ་སློང་དུ་མི་རུང་། དགེ་སྦྱོང་དུ་མི་རུང་། ཤཱཀྱའི་སྲས་སུ་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་པ་ལྟུང་བ་ཕམ་པར་འགྱུར་ཏེ། དེའི་དགེ་སློང་གི་ཚུལ་ཕྱིས་བླང་དུ་མེད་པར་འགྱུར་རོ། །འདི་ལྟ་སྟེ། ཤིང་ཏ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །བཞི་གང་ཞེ་ན། མི་ཚངས་པར་སྤྱོད་པ་དང་། མ་བྱིིན་པར་ལེན་པ་དང་། སྲོག་གཅོད་པ་དང་། བརྫུན་དུ་སྨྲ་བ་སྟེ། ཁྱོད་ཇི་སྲིད་འཚོའི་བར་དུ་ཕམ་པར་འགྱུར་བའི་ཆོས་བཞི་ལ་མི་སྤྱོད་དམ། དེས་མི་སྤྱོད་ལགས། ཚེ་དང་ལྡན་པ་ཁྱོད་ཉོན་ཅིག །བཞི་པོ་འདི་དག་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། དེ་ལྟར་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དགེ་སྦྱོང་དུ་བྱེད་པའི་ཆོས་སུ་གསུངས་ཏེ། བཞི་གང་ཞེ་ན། གཤེ་ཡང་སླར་མི་གཤེ ཁྲོས་ཀྱང་སླར་མི་ཁྲོ། བརྡེག་ཀྱང་སླར་མི་བརྡེག །མཚང་བྲུས་ཀྱང་སླར་མི་འབྲུ་བ་སྟེ། ཁྱོད་ཀྱིས་དེང་ཕྱིན་ཆད་དགེ་སྦྱོང་དུ་བྱེད་པའི་ཆོས་བཞི་ལ་སྤྱོད་དམ། དེས་སྤྱོད་ལགས། ཚེ་དང་ལྡན་པ་ཁྱོད་ཉོན་ཅིག །ཁྱོད་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་ན་ཅི་མ་རུང་སྙམ་དུ་སྨོན་པ་གང་ཡིན་པ་དེ། ཁྱོད་མཁན་པོར་འོས་པ་དང་སློབ་དཔོན་དུ་འོས་པ་གཉིས་དང་། དགེ་འདུན་མཐུན་པ་དང་། གསོལ་བ་དང་བཞིའི་ལས་མི་གཡོ་བ་བཞག་པར་མི་འོས་པས་རབ་ཏུ་བྱུང་ཞིང་བསྙེན་པར་རྫོགས་སོ། །ཚེ་དང་ལྡན་པ་ཁྱོད་ཉོན་ཅིག །བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་གིས་བསླབ་པ་གང་ལ་བསླབ་པར་བྱ་བ་དེ་ལ་དེ་རིང་བསྙེན་པར་རྫོགས་པས་ཀྱང་བསླབ་པོ། དེ་རིང་བསྙེན་པར་རྫོགས་པའི་དགེ་སློང་གིས་བསླབ་པ་གང་ལ་བསླབ་པར་བྱ་བ་དེ་ལ། བསྙེན་པར་རྫོགས་ནས་ལོ་བརྒྱ་ལོན་པས་ཀྱང་བསླབ་པོ། །དེ་ལྟར་ན་ཚུལ་ཁྲིམས་ཉིད་ཀྱིས་མཉམ་པ་དང་། བསླབ་པ་ཉིད་ཀྱིས་མཉམ་པ་དང་། སོ་སོར་ཐར་པའི་མདོ་འདོན་པ་ཉིད་ཀྱིས་མཉམ་པ་དེ་ཁྱོད་ཀྱིས་དེང་ཕྱིན་ཆད་བསྒྲུབ་པར་བྱ་ཡི། མི་བསྒྲུབ་པར་མི་བྱའོ། །དེང་ཕྱིན་ཆད་ཁྱོད་ཀྱིས་མཁན་པོ་ལ་ཕའི་འདུ་ཤེས་ཉེ་བར་བཞག་པར་བྱའོ། །མཁན་པོས་ཀྱང་ཁྱོད་ལ་བུའི་འདུ་ཤེས་ཉེ་བར་བཞག་པར་བྱའོ། །ཁྱོད་ཀྱིས་དེང་ཕྱིན་ཆད་མཁན་པོ་ལ་ཇི་སྲིད་འཚོའི་བར་དུ་བསྙེན་བཀུར་བྱའོ། །མཁན་པོས་ཀྱང་ཁྱོད་ཤིའམ་གསོན་གྱི་བར་དུ་ནད་གཡོག་བྱའོ། །དེང་ཕྱིན་ཆད་ཁྱོད་ཀྱིས་ཚངས་པར་མཚུངས་པར་སྤྱོད་པ་རྣམས་དང་། གནས་བརྟན་རྣམས་དང་། བར་མ་རྣམས་དང་། གསར་བུ་རྣམས་ལ་གུས་པ་དང་བཅས་པ་དང་ཞེ་ས་དང་བཅས་པ་དང་། འཇིགས་པ་དང་བཅས་པའི་དབང་དུ་གྱུར་པས་གནས་པར་བྱའོ། །དེང་ཕྱིན་ཆད་ཁྱོད་ཀྱིས་ལུང་ནོད་པར་བྱ། བཀླག་པར་བྱ། ཁ་ཏོན་བྱའོ། །ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་བར་འབྱུང་བ་ལ་མཁས་པ་དང་། གནས་དང་གནས་མ་ཡིན་པ་ལ་མཁས་པར་བྱའོ། །མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་དུ་མ་བྱས་པ་མངོན་དུ་བྱ་བའི་ཕྱིར་བརྩོན་པ་མི་འདོར་བར་བྱའོ། །དེ་དག་ནི་ཁོ་བོས་ཁྱོད་ལ་བསླབ་པའི་གཞི་ཆེ་ལོང་ཆེ་ལོང་ཙམ་ཞིག་བརྗོད་དེ། གཞན་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པའི་ཚེ་ཐོས་པར་འགྱུར་རོ། །གཞན་དག་ཀྱང་མཁན་པོ་དང་། མཁན་པོ་གཅིག་པ་དང་། སློབ་དཔོན་གཅིག་པ་དང་། གཏམ་འདྲེས་པ་དང་། ཕེབ་པར་སྨྲ་བ་དང་། སྨོན་འདྲིན་དང་། འགྲོགས་བཤེས་རྣམས་ཀྱིས་ཀྱང་རྒྱ་ཆེར་སྟོན་པར་འགྱུར་རོ། །ཤེས་རབ་མཆོག་གི་བསྟན་པ་ལ། །ཁྱོད་ནི་བསྙེན་པར་རྫོགས་པར་འགྱུར། །དལ་དང་འབྱོར་བ་རྙེད་དཀའ་བས། །འདི་དག་ཇི་ལྟ་བཞིན་དུ་བསྒྲུབ། །མཛེས་པ་རབ་ཏུ་བྱུང་བ་དང་། །ཡོངས་སུ་དག་པ་བསྙེན་རྫོགས་པར། །རྫོགས་སངས་རྒྱས་ཀྱིས་རབ་མཁྱེན་ཏེ། །བདེན་པའི་མཚན་གྱིས་བཀའ་སྩལ་ཏོ། །ཚེ་དང་ལྡན་པ་ཁྱོད་བསྙེན་པར་རྫོགས་ཟིན་གྱིས། བག་ཡོད་པར་སྒྲུབས་ཤིག །དེ་ལྟར་སྦྱོར་དངོས་མཇུག་གསུམ་གྱིས་ཁྱོད་བསྙེན་པར་རྫོགས་པར་བསྒྲུབ་པའི་ཆོ་ག་ལེགས་པར་གྲུབ་པ་ཡིན། དེ་ཡང་གཙོ་བོར་མཁན་པོའི་བདག་རྐྱེན་ལས་བྱུང་བ་ཡིན་ཏེ། རང་གིས་མཛད་དགོས་པ་རྣམས་མཛད། གཞན་ལ་བསྒོ་དགོས་པ་རྣམས་བསྒོས་ནས་མཛད་པས། ཕྱག་གསུམ་འཚོལ་ལ་མཁན་པོ་རིན་པོ་ཆེ་བཀའ་དྲིན་ཆེ་ཞེས་བརྗོད། དེས་དེ་ལྟར་བརྗོད་པ་དང་གཞན་རྣམས་ཀྱིས་མེ་ཏོག་འཐོར་བ་དང་གོང་གི་བསྙེན་རྫོགས་ཀྱི་སྐབས་སུ་འབྱུང་བའི་ཐར་པའི་རྒྱལ་མཚན་བརྟན་པར་གྱུར་ཅིག་ཅེས་སོགས་སྨོན་ལམ་བཞི་བརྗོད་ཅིང་། ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། ཞེས་སོགས་དང་། ལུས་ལ་ཆོས་གོས་གསུམ་གྱི་བཀྲ་ཤིས་ཤོག །།ཅེས་སོགས་ཀྱང་བརྗོད་པར་བྱའོ། །མངོན་མཐོ་ངེས་ལེགས་རྣམ་གཉིས་སྒྲུབ་བྱེད་གཙོ། །ཚུལ་ཁྲིམས་བསླབ་པ་ཡིན་ཏེ་ཀུན་གྱི་མཆོག །བསྙེན་རྫོགས་སྡོམ་པར་གྲགས་ཤིང་དེ་ལེན་པའི། །སྡོམ་ཆོག་མེ་ཏོག་ཕྲེང་མཛེས་འདི་ན་མཆིས། །ཚུལ་འདིར་འབད་ལས་ཐོབ་པའི་རྣམ་དཀར་དགེས། །ཚེ་རབས་ཀུན་ཏུ་དལ་རྟེན་རིམ་ བརྒྱུད་ནས། །བསླབ་གསུམ ་ལྡན་པའི་ཚངས་སྤྱོད་རྟེན་ཉིད་ཀྱིས། །རྒྱལ་བའི་ལུང་རྟོགས་དམ་ཆོས་འཛིན་གྱུར་ཅིག །ཅེས་པ་འདི་ནི། རང་གཞན་འགའ་ཞིག་ལ་ཕན་འདོད་ཀྱི་བསམ་པས་ཤཱཀྱའི་བཙུན་པ་ཅོ་ནེའི་ཁྲི་ཟུར་བཤད་སྒྲུབ་མིང་ཅན་གྱིས་རང་ལོ་དོན་གསུམ་ཐོག་ཏུ་དམ་པ་གོང་མའི་མན་ངག་ལ་བརྟེན་ནས་དངོས་གཞི་ཡན་ལག་འགའ་ཞིག་བསྡུས་པ་མིན་ཡང་ཅུང་ཟད་མདོར་བསྡུས་ནས་བཀོད་པའི་ཡི་གེ་པ་ནི་ཏཱ་ཡི་ལ་ལུང་བློ་བཟང་དོན་གྲུབ་བོ། །འདིས་ཀྱང་གཞན་ལ་ཕན་ཐོགས་པར་གྱུར་ཅིག །མངྒ་ལཾ།